BAGALATIYA

BAGALATIYA

¹ Ami Bulus fotson bu Yesu Kiristi mna ta afa wakara ri na yini ani bi bu pajukun baa bà Yesu Kiristi baa ki Galatiya. Butso bu fotson waji m hwami hwahwa ba, m zhenmi zhenzhen ba, m panmi panpan ki vo bu apa ba, ama Yesu Kiristi ba Ata Cidon wa doku pwadzu ki shimbi ra cemi ri m tsa. Ami ba bandomi baa bà Yesu kire na nani jen kiyo. ³ Ata Cidon ba Cindoi Yesu Kiristi ku sanni sansan ku yini mikyin wa na jinni. ⁴ Yesu Kiristi wa nde dia yi aki ki cin’i yi Cidon jiji ku nwadzui ki fin abu wa babai, jiji kúkà penrei don ki vo bu abu wa baba wa tanma wa ki fin tswen ra. ⁵ Ahwè ku ci abu Cidon numa keke yaya ko nukon. Ku ci numa. ⁶ Abu waa nina tsa ra kenmi nwo. Kwan ba waa Cidon bani nde ki bye wa sansan bu Yesu Kiristi ra, mwamwa numa ni vyin pukan nyaken yi Cidon ni yana bà aji dzun wa sansan ken! ⁷ Mbyà, m dan yini ajinderi byen­ byen numa, aji waji cia aji wa sansan dzun ba. Ama pajukun badati ci tiri baa na nukwanni mikyinni yo ki cincin, Bena nga jiji be vyin pukan aji wa sansan wa ki cin bu Yesu ra jinni. ⁸ Mna dan yini kara, ko ai ba dii, ko nwutsōn bu Cidon wama dzu don dzwa jinni ma fyen tà yini aji dzun ma dzu ken ba waa i ndi dan yini ra, apa waji ahoma! ⁹ Ci tsadzu waa i kyan dan yini ra, i ka mbyā kana dan yini kwan yo kara, apa dzun ma fyen tà yini aji dzun wa dzu ken ba waa ni ndi fo nikà yi wajinderi kiyo ra, apa waji ahoma! ¹⁰ Wakara na tà danra mna nya jiji m du acin wa sansan ki pyen bu pajukun re ko mna nya jiji m du acin wa sansan ki pyen bu Cidon? Mna nga jiji m vya pajukun nde jiji be nyami? M mana nga jiji m tsa numa tiri, m fyemi wa tsa butso bu Yesu Ki­ risti ba. ¹¹ Bandomi, mna con m dan yini ní yi sansan danra aji wa sansan waa m ndi dan yini ra apa màa riba. ¹² M panmi aji waji panpan ki bye apa dzun ba, apa dzun ka dan’a aji waji dandan yimi fo ba, ama Yesu Kiristi ba dia pofan fin aji waji yimi. ¹³ Nī yi atswi byecumi waa m ndi ci fin’a ki bye ayo waa m ndi na kon dòn bu Yahudawa tiri ranu. Ayo waji m ndi na tà abi bu pajukun baa bà Yesu fyin ka­ gben. M ndi na bà avo kiyo jiji m tsaba aji waji don. ¹⁴ Ki fin abe san jomi hora, m ndi kon dòn bu Yahudawa kabe ri naco. M ndi fan dimi yi mbyà abu yakubada wa tsatsa kata. ¹⁵ Ama Cidon ndi cemi avo ndi gbogbo numa ra, avo waa be ndi mbami raba. Kukà hwi cicimi ku bami nde jiji m bi baku. ¹⁶ Ku ta Nwua yimi jiji m ya dan Aji wa Sansan ki cin’a yi tsu pajukun badati. Ki fin ayo waji m yami ki bye apa dzun jiji ku genmi ace ki cin bu aji waji ba. ¹⁷ Mkà yami ki Uru­ shalima ki bye fotson baa Yesu Kiristi ndi kapyen ce hobe raba, Nu wakara m kapyen mwamwa numa ya ki fin jen bu Arabiya hunnu m hun kasen bi ki Dima­ shika. ¹⁸ Ki nyaken waa aju tsara tsa nwadzu hunnu m hun ya ki Urushalima jiji m ya mbyà Bi­ trus. M ci dzun ki byeri baku zan byecen pyinna. ¹⁹ M shón ba Yakubu nwuza bu Cindoi Yesu Kiristi vinni. M shonmi ba fotson badati hora ba. ²⁰ Abu baa mna tā yini kara ci aji wajinderi byenbyen numa. M ci pyen bu Cidon na tā, cia akan ba. ²¹ Ki nyaken wakara m do ya ki bye jen bu Suriya, ba Kilikiya. ²² Ki bye ayo waji ra abi bu pajukun baa bà Yesu Kiristi ki fin jen wa ki Yahudiya ngha yi­ bemi sansan numa raba tiri. ²³ Se bena fo dónmi maari vinni dan­ ra, "Apa wa ndi na tai fyin ra kasen bi na dan yi pajukun Aji wa Sansan wajinderi waa ku ndi nga jiji ku tsabaa don ra." ²⁴ Se be nya Cidon ki cinmi.

¹ Ki nyaken bu aju dzwe nwaa nyena baa tsa nwadzu ra ami ba Barnabas mbyā kasen ya ki Urushalima. M nde Titus kyen dzun bai ya du. ² Abu wa tsa m ya ki bye waji ra ki cin waa Cidon dan ta yimi ri danra jiji m ya. Waa m ya zan ki bye waji numa, m tsa cinkwan dzun ki kankan ba baco baa bà Cidon. M pofan afin aji ki cin Aji wa Sansan waa mna dan yi atsu pajukun badati ra yibe fo. M tsa numa ki cin butso waa m ndi tsa ba waa mna tsa tanma ra kúká tsaba jinni ba. ³ Ko waa Titus wa ci dzun bami ci nwu Helenawa ra ma, be tebe ku tete jiji ku kyu abukua ba. ⁴ Aji do ki cin aji wakara ki cin waa pajukun baa kankan badati baa na so dibe danra be ci pajukun baa bà Yesu ra bon kabi ki fin cinkwan bu baa bà Yesu. Be bon kabi ki fin cinkwan waji ki cin waa jiji be kai avo ki fin jiji be yì byecu bu vya waa i ci fin’a azota numa ki bye Yesu Kiristi ra. Bena con jiji be hoi kasen ya ci byecu bu anya. ⁵ Ama i fan’i azo yibe ko titi numa ba, ki cin waa Aji wa Sansan ra kúká tsaba jinni ba. I pan konsoni yo kyoo numa yaya ci tsadzu waa ku ci ra. ⁶ Pajukun baa be ndi na sobe danra be ci acin hora, be kwanmi aji dzun wa ripye ki bye Aji wa Sansan waa m ndi na dan raba. Bumi ki byemi ko bema ci acin ko bema ci koke kata ci abu dzundzun ki byemi, ki cin waa pajukun kata ci abu dzundzun ki bye Cidon. ⁷ Ama abe baa ci acin baaji hora be mbyà yinu danra Cidon ce butso wa ndanda wakara ri yimi ajinderi. Kukà tsonmi ri jiji m ya dan Aji wa Sansan wakara yi atsu pajukun badati ci tsadzu waa ku ndi ce butso wa ndanda waji yi Bitrus ku tsonku danra ku ya dan Aji wa Sansan waji yi Yahudawa ra. ⁸ Be mbyà danra Cidon wa ndi pofan Bitrus nyaco ku ci fotson’a wa ya ki bye Yahudawa ra ka ciri Cidon waji wa pofanmi nyaco danra m ci fotson wa ya ki fin atsu pajukun badati. ⁹ Ayo waa Yakubu ba Bitrus ba Yohanna baa ci hinpo ki fin abi bu pajukun baa bà Yesu hora, mbyà danra Cidon ce butso wa ndanda wakara ri yimi ra, se be yimi vo ba Barnabas ki fin nde vyon. Katai i zen nde danra iri ya ki bye atsu pajukun badati, abe bekà ya ki bye atsu bu Yahudawa. ¹⁰ Be voi danra i tsaza pajukun baa nyani ba abu ki vo ki finbe ra yo. Wakara ci abu waa m ndi na pyapya m tsa. ¹¹ Ki fin ayo waa Bitrus bi zan ki finka Antakiya ra, m gbenku nde ki zoa numa ki cin waa ku tsaa coa ba. ¹² Ayo waa Bitrus ndi zan kapyen numa ra, kuna ji buju ki kwe dzundzun ba atsu pajukun badati. Ama ki fin ayo waa pajukun baa Yakubu tsonbe tson hora bi zan ki bye waji numa se Bitrus nwa voa don ki kwe ya ci kankan, ki cin waa kuna zinzin bu pajukun baa na bàvo ki bye aji bu abuku wa kyukyu ra. ¹³ Yahudawa baa bà Yesu ra na nukwan atswi abu waji numa du ba Bitrus. Har be bye Barnabas ya ndé finbe kuna ten abebe numa babe du. ¹⁴ Waa m mbyà bena babe Aji wa Sansan ra acoa ndafan jinni byen­ byen bara, m mbye Bitrus du zobe kata danra, "Au Bitrus wa ci nwu Yahudawa rama, una tsa abu baa atsu pajukun badati na tsa ra du. U tsau abu ci tsadzu anwu Yahudawa ba, tsanini hunnu una nga jiji u te atsu pajukun badati be kon adòn bu Yahudawa?" ¹⁵ Ajinderi ai ci zhen Yahuda­ wa ki bye mbamba bu adi. I cii tsadzu atsu pajukun badati baa tsa abu wa baba hora ba. ¹⁶ Ko waa ci numa ra, í yinu danra apa dzun wari ci sansan numa ki pyen bu Cidon ki cin adòn wa konkon baani, se ki bye wajinderi wa yiyi ki bye Yesu Kiristi maari vinni hunnu kuri kan apa wa ci sansan numa ki pyen bu Cidon, cia ki bye adòn wa konkon ba. Ki cin waa Afa na danra "Apa dzun wari ci san­ san numa ki pyen bu Cidon ki cin adon wa konkon baani." ¹⁷ Ma ci numa ai baa na nya jiji i ci sansan numa ki pyen bu Cidon ki cin waa ī kwan acin ki dzun ba Yesu Kiristi ra, beri hwèn’i tiri ki fin pajukun baa tsa abu wa baba ci tsadzu atsu pajukun badati na tsa ra hun. Ci numa ra, ta danra Yesu Kiristi yiiri na tsa abu wa baba hun ko? Ko titi cia numa ba. ¹⁸ Ama abu baa m ndi nghabe rara, mma kasen ya gbe do hobe so don tiri, mna gbekyan adòn. ¹⁹ M huhu numa ci ki fin adon baaji jiji m du cindi ki bye Cidon. ²⁰ Be nde­ mi kan ki cin hin wa shon gege ki dzun ba Yesu Kiristi. Nwo waa mna ho tanma ra cia abu dimi riba, ama ci cindi bu Yesu Kiristi wa ki finmi ra. Mna ho nwo tiri ki cin waa m yi wajinderi ki bye Nwu bu Cidon wa conmi, kukà nde dia yi aki, ku hu aki tso numi yi Cidon. ²¹ Ami ri nde­ mi hwihwi waa Cidon na hwi pajukun baa bàku ra hwa janta kiyo ba. Beri ma kyan danra ki bye adòn wa konkon hunnu apa ri ci sansan numa ki pyen bu Cidon, ri ta danra, aki waa Yesu Kiristi hu ra, ku hu nya hwan numa azota ki tswen.

¹ Ani pajukun baa ki Galatiya ni jeje kagben. Akani shini aje waji numa hun? I ndi dan yini ki zoni ki byeya numa waa be pan Yesu Kiristi kan ki cin hin wa shon gege ra. ² Mna con jiji m mbyeni aji dzundzun titi numa. Denden bu Cidon waa ni ndi pan ra, ni ndi pan ki cin adòn wa kon yiyi buni re, ko ki cin waa ni fo Aji wa Sansan ni yi wajinderi ki bye Cidon ra? ³ Ni tsanini jeje numa hun? Ni ndi jo nwoa fan avoni ba abeni kata zan ci di bu Denden bu Cidon, ama tanma nina con jiji ni ken nua ba byecu bu akù dini ri? ⁴ Watoo, ta danra, afyin baa ni wa ra, ni wa nya hwan azota hun ko? Ko titi cia numa ba. ⁵ Cidon yini Denden’a, ku kana tsani abu baa kyahozo ki finni. Abu baakara waa kuna tsani ra, ki cin adòn wa kon yiyini kagben re ko ki cin waa ni fo Aji wa Sansan nikà yi wajinderi ki byea ra? ⁶ Ní kyepan ba aji waa be ta ki fin Afa bu Cidon ki cin bu Ibrahim danra, "Ibrahim yi wajinderi ki bye Cidon, ki cin wajinderia waji hunnu Cidon soku ku ci apa wa sansan numa ra." ⁷ Wakara na ta danra, pajukun baa yi wajinderi ki bye Cidon ra maari vinni ciri zhenda bu Ibrahim byenbyen numa. ⁸ Andi gbogbo numa be ta ki fin Afa bu Cidon danra, "Cidon yi atsu pajukun ri ci sansan numa ki pyen’a ki cin wajinderi bube." Ki fin Afa waji be tà waa Cidon ndi dan ajia yi Ibrahim danra, "Anuu hunnu m hun ri tsa atsu badati kata abu wa sansan." ⁹ Ibrahim yi wajinderi ki bye Ci­ don, Cidon sanku sansan numa. Ci numa ra baa ma yi wajinderi ki bye Cidon beri bi du wa san­ san’a du. ¹⁰ Ama kata pajukun baa nde gbenbe yi adon wa kon­ kon ra, ndeya panbe ra. Ki cin waa be ta numa so ki fin Afa bu Cidon danra, "Apa wama kon’a abu baa be ta ki fin Afa bu don ra byenbyen numa kata ba, nde­ ya panku ra." ¹¹ Ci ki fa byeya numa tanma numa ci kara dan­ ra, adòn ri yia apa ri ci sansan numa ki zo bu Cidon ba, ki cin waa be ta ki fin Afa danra, "Apa wama yi wajinderi ki bye Cidon kuri yiku cindi wa ci kenken." ¹² Abu dzun kwan’a adòn ba wajinderi ba, ama anu wakara, ci tsadzu waa be ta ki fin Afa dan­ ra, "Apa wama kon mbyà abu baa adòn dan ra dzwadzwa ki myi kata hunnu kuri du cindi ki bye adòn baaji." ¹³ Ci numa ra ndeya pan’i kata ra, ki cin waa i kon kai adon baaji byenbyen ba. Ama Yesu Kiristi penrei don ki bye ndeya waji ra, kukà nde fyin nui bu ndeya waji ra be dia ki cin. Ci tsadzu waa be ta ki fin Afa bu Cidon danra, "Apa waa bema yiku ne ju hu tson ci ki cin hin ki don ku ci apa waa ndeya panku ri hun." ¹⁴ Yesu Kiristi wa fyin wakara numa ki cin’i jiji atsu pajukun badati be bà ki dia be du wa sansan waa Cidon ndi genu danra, kuri yi Ibrahim ki cin wajinderia ra. I kari bà ki dia ri du Denden bu Cidon waa ku ndi genu danra kuri yii ra. ¹⁵ Bazhenzami, mna con m dan yini cinna bu aji ba abu dzun wa pi ci fa byeya numa. Ayo waa apa pyinna ma genu ba dibe ma nene akù kiyo ra, abu dzun wari fenfan nuge waji baani ri. Apa dzun wari kwan kaa abu dzun ki cin’a baani ri. ¹⁶ Ci numa du ba nuge waa Cidon ndi ge ra. Cidon ndi genu baakara yi Ibrahim ba nwudaa. Be danbe danra, Cidon genu abu baakara ba Ibrahim ba zhendaa ba, be danra nwudaa maari vinni. Nwudaa waji ci Yesu Kiristi. ¹⁷ Aji waa mna ma ki mikyinmi ra ci kara, avo ndi gbogbo Cidon kapyen genu baakara ba Ibrahim ra. Ki nya­ ken bu aju adipa tswanna ndo nyena ba didzun kyadzwe hunnu Cidon yi Yahudawa dòn’a. ¹⁸ Ki cin wakara adon baakara cibe ba agben wa fenfan nuge waa Ci­ don ndi ge ba Ibrahim raba. Bekà tsayibe waa be tsaba anuge waji ba. ¹⁹ Ci tsadzu waa ci numa ra cinna bu adòn baaji baa Cidon yi ra dan ke hun? Cidon yi adòn waji ki cin waa be fu abu baa ci abu baa baba ki bye Cidon ra nya myi. Adòn baaji ndi tsa butso ki cin bu pajukun numa kapyen hunnu nwuda bu Ibrahim waa Cidon ndi genu danra kuri bi ra, ku bi. Cidon ndi ho adòn baaji kwa abe zhentsōn ki vo jiji be ho bi. Zhentsōn baaji ka ho adon baaji kwa apa dzun wa ci ki yobaba bu Cidon ba pajukun ra ki vo. ²⁰ Ama avo ndi gbogbo ki fin ayo waa Cidon ndi genu ba Ibrahim ra, ku ge nuge waji ba dia. Ku nyaa apa dzun ku kà nu ki yobababe ba. ²¹ Watoo, wakara na ta danra, adòn baaji sunnu ba nuge bu Ci­ don hun ko? Ko titi cia numa ba. Beri ma kyan danra, adòn dzun ki tiri wa tsaka wa yi apa cindi, ai kuri ka tsaka wa yi apa ci sansan numa ki pyen bu Cidon. ²² Ama abu baa be ta ki fin Afa ra, pan ko kani kata ki fin abu wa baba ra. Abu waa Cidon ndi genu dan­ ra kuri yi pajukun ra, kuri yí pajukun baa yi wajinderi ki bye Yesu Kiristi vinni. ²³ Kapyen waa i ndi yi wajinderi ra, i ndi ci byecu bu anya ci tsutsu numa ci ki vo bu dòn ci tsadzu apa baa na tan akon, ki nyaken hunnu Cidon hun pofan’i nyaco wa yi wajinderi ki bye Yesu Kiristi. ²⁴ Adon baaji zai ri numa nde ya zan ki bye ayo waa Yesu hun bi ra. Ki cin waa jiji i ci sansan numa ki pyen bu Cidon ki cin wajinderi. ²⁵ Tanma ci tsadzu nyaco wa yi wajinderi ki bye Yesu Kiristi pofan jinni rara, i cii ki vo bu dòn riba. ²⁶ Katani baa kwan cin ki dzun ba Yesu Kiristi ra, ni ci zhen­ zhen bu Cidon, ki cin waa ni yi wajinderi ki byea ra. ²⁷ Ani baa be tsani batisma ra honi kwan ba Yesu Kiristi ra hun. ²⁸ Ci numa ra, ko uma ci Yahudawa, ko uma ci atsu dzun ken, ko uma ci anya, ko nwu tswen, ko wunu, ko wuwa, ai ni ci abu dzundzun, ki cin waa ni kwan cin ki dzun ba Yesu Kiristi ra. ²⁹ In nima ci abu Yesu Kiristi ajinderi byen­ byen ni ci zhenda bu Ibrahim hun, ni kari jiri abu baa Cidon ge Ibrahim nu danra kuri yiku ba zhendaa ra.

¹ Zando wari ji atswén bu ataa ra, kuma ci tiri nwutishe ku ci tsadzu anya, ko waa kuri ji atswén bu ataa ri kata ra. ² Ayo waa ku ci tiri nwutishe ra, ku ci vo bu pajukun baa panku. Be kari mbyàku zo ki bye atswén baaji numa keke ya zan ki bye ayo waa ataa nde so danra ku hwe byen ken apa rara. ³ Ci numa ki byei du, ayo waa mikyin’i ndi ci tiri bu baci ki bye aji wa gaga ra, abu baa ki fin tswen ndi pan’i kan anyabe kiyo. ⁴ Ama waa anyunu mba tiri waa Cidon tson Nwua waa awuwa mbaku bi ki fin tswen ra Nwu waji nde cin’a na jinni yi dòn bu Yahudawa. ⁵ Cidon tson Nwua ki bye nyaco wakara numa bi jiji ku penre pajukun baa adòn baaji na tsa butso ki cinbe ra don, jiji katai i kan zhenzhen bu Cidon. ⁶ Ki cin waa ni ci zhenzhen bu Cidon ra, ku tson Denden bu Nwua bi ki fin mikyinni kuna bānde danra, "Abba Ata." ⁷ Ki cin wakara ko kani kata ki finni cia anya riba, ama ku ci nwu tswen. Ci tsadzu waa Cidon honi kan zhenzhen’a rara, ku kari yini ji abu baa ku ho konsoni bazhenzhen’a ra yo. ⁸ Ayo waa ni ndi yìni Cidon raba tiri ra, ni ci tsadzu anya, nina wa ajon baa cibe Cidon ba. ⁹ Ama ci tsadzu waa ni yì Cidon tanma rara, ko sanfo kari, m danra Cidon yini ri ni ci bazhenzhen’a. Ake tsari ni con ni kasen ba nyaken ni ya bà ajon baa cibe ba agben ba. Tsanini nina con ni kasen ya kan anyabe? ¹⁰ Nī yi anyunu badati hwe ba ason badati ba ayo badati, ba aju badati nwadzudzu. ¹¹ Mna we bonban ki cinni, butso waa m ndi tsa ki byeni ra kúká kan abu wa nya hwan azota numa ki tswen ba. ¹² Bazhenzami, mna voni, ní ten abemi, ni tsa abu ci tsadzu waa mna tsa ra. Ami ci tsadzu waa ni ci ra du. Nī tsámi abu dzun wa baba fo raba. ¹³ Ní kyepan ba ayo waa m ndi kapyen bi ra, m ndi dan yini Aji wa Sansan bu Yesu Kiristi. Abu wa tsa m ndi ci byeni bani zan anyunu pyinna ra, ki cin waa m ndi fomi vya ba. ¹⁴ Kwan ba waa ni ndi wa fyin na pan ado waji ra, nī nghami ba, nī sinnimi ba, ama nī panmi ci tsadzu nī pan nwutsōn bu Ci­ don, ko m danra tsadzu Yesu Kiristi ba dia. ¹⁵ Ki bye ayo waji ra, ni ndi na mbu mikyin ki cin­ mi, tanma ake tsari ri? M tsa yi wa zen aji nuni danra, beri ma ndi danra, ci abu waa niri kyan tsaka, nī ndi ci ba mikyin waa ni nwa hou ngyizoni yimi ki bye ayo waji. ¹⁶ Ase tanma numa m kan­ mi ajo zeni ra ri ki cin waa mna dan yini aji wajinderi ra? ¹⁷ Pajukun baakara bena soni hwan ki dini kagben, ama abu waa bena ma ki fin mikyinbe ra san’a ba. Abu waa bena nga ra kata ki cin waa jiji be gani di bami, jiji ni sobe hwan ki dibe ci tsadzu waa bena soni hwan ki dini ra. ¹⁸ Ci abu wa sansan pajukun bena so dibe hwan ki di, in abu waa be ma ki mikyinbe ra ma ci abu wa sansan. Sansan ina tsa numa ba dii, ko ki bye ayo waa mma bani ci byeni, ko ki bye ayo waa mma bamni ci byeni ba. ¹⁹ Ani bazhenzami baa titi, mkà mbyā kana wa fyin ki cinni tiri ci tsadzu awuwa wa tu mba, se ma nde numa keke ya zan anyunu waa mma mbyà nī nga atswi mikyin bu Yesu Kiristi ra hunnu. ²⁰ Bé kyan danra m du nyaco mri kyan ci dzun bani tan­ ma cika mri kyan yi aji waa m dan yini, ki cin waa mikyinmi na kaa ki jinni ki cinni ba. ²¹ Ani baa na bà aji bu adòn wa konkon ra, mna con m mbyeni danra, nī gonni tson fo abu baa adòn baaji dan raba? ²² Be ta dan­ ra, andi gbogbo Ibrahim mba zhen bawunu kwan dzun pyinna. A nwu wadzun ra, awaa Ajara nwutōn mba ri yiku. A nwu wadzun ra Saraya awa shea mba ri yiku. ²³ A nwu bu wuwa nwutōn ra, be mba­ ku ci tsadzu waa beri mba zhen­ zhen baa zota hora. Ama a nwu waa Saraya awa shea mba ra, be mbaku ci tsadzu waa Cidon ge Ibrahim nuge ra. ²⁴ Tanma numa í nde so ci tsadzu cinna bu aji wa zenzen. Bawuwa pyinna hora ci cinna bu nuge apyinna hun. A nuge bu Ajara nwutōn ra dzu ki cin kwen waa beri baku danra Sinai ra bi. Bazhenzhen bu Ajara nwutōn baa ku mba ra, beri ya tsa nya. ²⁵ Ci tsadzu waa Ajara ci cinna bu kwen wa ki fin jen bu Arabiya waa beri baku danra Sinai ra, ku ci cinna bu Urushalima wa ki fin tswen wa ci kara hun. Ki cin waa ku ci byecu bu anya kwan ba pajukun baa na fin’a ra kata. ²⁶ Atna Urushalima wa ki don ra cia byecu bu anya ba, ku ci ayoi. ²⁷ Ki cin waa be ta danra, "Au wuwa wa mba fou nwu fo raba, ú cu cucu. Au wuwa wa tu fou mba fo raba, ú da ndekuto yiriri! Ki cin waa awuwa waa be ndi sinniku ra, kuri du zhenzhen hwe ka awuwa si rari." ²⁸ Bazhenzami, ci tsadzu waa Ishaku ciri nwu waa be ge nuge ki cin’a ra, i ci bazhenzhen bu Cidon ki bye nuge waji du. ²⁹ Andi ki bye ayo waa Ajara mba nwua ci tsadzu waa beri mba zhenzhen baa zota hora, a nwu waji tà nwu bu Saraya mba ki bye gbentsòn bu Denden bu Cidon ra fyin. Kà pan nai ki cin numa du, nde numa keke bibi jinna. ³⁰ Ama be tā ki fin Afa bu Cidon danra, "Ú kan wuwa nwutōn ra ba nwua kata pwa­ dzu. Ki cin waa nwu waa ayoa ci nwutōn ra, ri jia tswén bu ataa ba. Anwu waa awuwa she mba­ ku ri ra kuri jiri tswén bu ataa." ³¹ Ci numa ra, bazhenzami, i cii zhenzhen bu wuwa nwutōn raba, ama i ci zhenzhen bu awuwa ben ki ndo.

¹ Abu wa tsa Yesu Kiristi pen­ rei don ki vo bu dòn ra, ki cin waa jiji í ci byecu bu vya. Ci numa ra se ní ho abeni bà jinni gangan numa ní ci byecu bu vya. Níká zen nde yibe honi kasen ya kan anya bu adòn riba. ² Ní gon tson ní fo, ami Bulus mna dan yini kara, in nima zen nde yibe kyuni abukuni yo, ta danra aki waa Yesu Kiristi hu ra, tsaa cin ki byeni ba hun. ³ M kana nuni dòn bàvo kwan yo danra, apa wama con wa kyu abukua ci ken ku kon vinni adòn baaji dzwa­ dzwa ki myi kata. ⁴ Ani baa na nga jiji ní ci sansan numa ki pyen bu Cidon ki cin adòn wa konkon ra, nī gadi ba Yesu Kiristi ra hun. Nī ten adini pwadzu ki fin pajukun baa Cidon na hwibe rara. ⁵ Bui ki bye wa tsazaza bu Denden bu Cidon, ī so mikyin’i danra, iri ci sansan numa ki pyen bu Cidon ki cin wajinderi waa ī yi ki bye Yesu Kiristi ra. ⁶ Ima kwan cin ki dzun ba Yesu Kiristi byenbyen numa, ko apa ku kyu abukua, ko kuma kyua ba, ci abu dzundzun kata. Abu wa tutu kari kata ciri, apa ku yi wajinderi ki bye Yesu Kiristi. Wajinderi wari tà dia ki bye con ra. ⁷ Andi ka­ pyen nī ndi na tsa abu wa san­ san, tanma ra akani hwa denni waa ni nde cin na jinni yi Aji wa Sansan bu Yesu Kiristi ri? ⁸ Nde-gya waa bena gyani ra dzua ki bye Cidon wa bani nde bi raba. ⁹ Ci tsadzu waa be danra, "Yist titi numa ri hwa yi borodi ri fè poto po numa." ¹⁰ Ama ki cin waa ī ci abu dzundzun ki pyen bu Cidon ra, hwa yimi ci ba gben mikyin ki dini danra, aji wa gaga buni ri dzua ken ba bumi ba. Apa wana tsani abu wa nakyin ra, kuri wa fyin ki vo bu Cidon ko kuma ci kani waji kata. ¹¹ Bazhenzami, beri ma kyan danra, mna zen aji bàvo kiyo tiri danra, ko kani kata ku kyu abukua, akake ri kyan tsari hun­ nu bena tami fyin numa ri? M rima kyan na dan yi pajukun danra, be kyu abukube kata, aji waa mna dan ki cin waa Yesu Kiristi hu aki ki cin hin ra, ri kyan ri tua apa dzun ki mikyin ba. ¹² Pajukun baa na lareni ba aji bu abuku wa kyukyu ra, san kari be ya can adibe cancan jiji be kan pajukun baa babeni ki ndo. ¹³ Bazhenzami, Cidon bani nde bi jiji ni ci byecu bu vya, ama níká yi avya waji ku kanni abu waa ni nde avo pan kiyo tsa abu wa vyani ki dini ba. Ama ní con dini, ní tsaza dini yo. ¹⁴ Ki cin waa adòn kata kwan dzun ken ki cin bu adòn dzundzun wa danra, "Ú con jo ndou ci tsadzu waa ù con adiu ra." ¹⁵ Ama ni mana dzwan dini nyi, nī mana ten adini fo, ní tsa sansan jiji níká jì tsu bu dini ba. ¹⁶ Mna dan yini, ní yi Denden bu Cidon ku tsa butso ki cinni ko ki bye koke kata. Níká fan adini yi abu waa adini na con ku tsa ba. ¹⁷ Ki cin waa abu baa adi na con ku tsabe ra, cia abu waa Denden ri con ba. Abu waa Denden ri con ra, kà cia abu waa adi ri con ba. Abu baa pyin­ na kara, be ci ajo ze ba dibe. Ci numa ra hwa nī tsakani abu waa nina con ni tsa ba. ¹⁸ Ama ni rima kyan zen nde Denden bu Cidon ku tà yini abu wa tsatsa, niri kyan cini ki vo bu adòn riba. ¹⁹ Abu baa baba baa ri dzu ki fin mikyin bu apa pwadzu ribi ra, ci ki fa byeya numa ci kara, agya wa nyanya, aji baa baba baa gaga, aso wa tsatsa, ²⁰ aki wa tsatsa, nukon wa vonvon, aze wa ze apa, ka ba ndegbe wa gbegbe, ba afi wa fifi, ango wa ngongo, adi wa concon, ba ahwi wa hoho, anu wa gafan nya cincin, ba avyon wa gafanfan. ²¹ Abuu apa wa vyavya, acen wa pyenpyen, ba amà wa zaza, ba abu badati. Mna nuni don ci tsadzu waa m ndi nuni ra danra, apa baa na tsa abu baakara beri kabe ndo bu Cidon jiji be ji abu dzun kiyo ba. ²² Ama abu baa ri dzu bye Denden bu Cidon ribi ra, ciri acon, mikyin wa mbumbu, mikyin wa na jinni, mikyin wa gbangban, mikyin wa ndafan vo yi abu, ba mikyin wa sansan, ba abu wajinderi wa tsatsa, ²³ ba acin wa nde na jinni, ba acin wa panpan. Adòn dzun wa sunnu ba abu baakara baani ko titi. ²⁴ Apa baa ci bu Yesu Kiristi ra, bē ho abu baa baba baa ndi ki mikyinbe ba aji bu aso wa gagabe ra ya kan ki cin hin wa shon gege ra. ²⁵ I mana du cindii ki di bu Denden bu Cidon, se í zen nde yiku tsa butso ki mikyin’i kata. ²⁶ Ki cin wakara iká ndē dii ba, iká kana nyà dii jinyà ba, iká kana fifi ba dii ba.

¹ Bazhenzami, ki finni hora nima du apa wa mana tsa abu wa baba, ani baa ci ba Denden bu Cidon ki fin mikyinni ra, ní nga jiji ní tsazaku yo jiji ní gbeku kasen bi ki nyaco bu Cidon. Ní tsa numa ki bye cin wa nde na jinni. Ní wà dini sansan jiji abu dzun kúká suuni ya tsa da abu dzun ba. ² Ní tan kè nde cin za jinni tswan za adini atswén bu aíyin wama duni. Ki bye wakara numa hunnu niri ta danra, ni kon adòn waa Yesu Kiristi nuni ra. ³ Apa wama so dia danra, ku ci abu dzun, ama ki bye wajinderi byenbyen numa ku cia abu dzun ba, kuna bye dia bye­ bye. ⁴ Ko kani kata ku mba abu baa ku tsa ra ku mbyà danra ko sansan re, kuma mbyà ma ci abu wa sansan kú mbu mikyin ki cin bu abu waji waa ku tsa ra. Kúká caco ndè dia hwa ba apa dzun ba. ⁵ Ki cin waa ko kani kata ri nga ba atswén bua wa ki cin’a. ⁶ Apa waa bema fyen tà yiku aji bu Cidon, san kari abu wa sansan waa kuma du ki voa kata ku ko yi manua wa fyenku abu ra ku ji dzun baku. ⁷ Níká bye dini ba, apa dzun wari byeka Cidon baani, abu waa apa ma tà, ku kari ben tiri abu waji. ⁸ Apa wama tsá abu wa vyaku ki dia vinni, adia waji ri hu so tsaba jinni. Ama apa wama tsa abu wa we hwan bu Denden bu Cidon kuri du cindi wa ci kenken wari dzu bye Denden bu Cidon waji ribi ra. ⁹ Iká nì ba abu wa sansan wa tsatsa ba. Ki cin waa ima nìi ba abu wa sansan wa tsatsa ba, anyunu wa kyen iri pan avokwin wa sansan. ¹⁰ Ci numa ra, ko ki bye ayo wani waa ima du apyo í tsa pajukun kata abu wa sansan, tuntun pajukun baa yi wajinderi ki bye Yesu Kiristi raba. ¹¹ Ní mbyà asin bu abu baa kwakyi kwakyi baa mna tā yini kara. ¹² Pajukun baa na zen aji bàvo kiyo danra ní kyu abukuni ra, be cí baa na nya jiji pajukun be nyabe. Abu wa tsa bena tsa numa ra ki cin waa jiji be nwa adibe don ki fin fyin wa wawa waa bena tà pajukun ki cin waa bena bà Yesu Kiristi waa be panku kan ki cin hin wa shon gege ra. ¹³ Pajukun baa na bàvo ki bye aji bu abuku wa kyukyu waji rama be konbe adòn baaji dzwa myi sansan ba. Ama bena con jiji be kyuni abukuni yo ki cin waa jiji be zama ki cinni dan­ ra, ni zen nde yibe kyuni abukuni yo ra. ¹⁴ Bumi ki byemi Cidon ku tsu coa waa m zama ki cin bu abu dzun. Mri zama bumi ki cin aki waa Cindoi Yesu Kiristi hu ki cin hin wa shon gege ra maari vinni Ki cin akia waji hunnu m fan abu baa ki fin tswen tanma bwan jinni, be ci huhu numa ci ki zomi, ami ka ci huhu numa ci ki zobe. ¹⁵ Ko apa ku kyu abukua kisen, ko kúká kyua ba kisen, kata ci abu dzun­ dzun. Abu wa tutu kari ciri apa ku ci ba cindi wa ripye, ¹⁶ Pajukun baa ci abu Cidon byenbyen numa, be kana bà aji wa ripye bu Cidon ra, Cidon ku sanbe sansan ku yibe mikyin wa na jinni. ¹⁷ Pan kire jinna ya ki pyen, apa dzun kúká ci na tsami abu wa nakyin dzun numa riba. Ki cin waa m ci ba abanfyon baa be tenmi fo ki dimi ki cin bu Yesu Kiristi, bena tà danra m ci bu Cindoi Yesu Kiristi. ¹⁸ Bazhenzami, Cindoi Yesu Kiristi ku sanni sansan. Ku ci numa.