BAAFISUS

BAAFISUS

¹ Ami Bulus fotson bu Yesu Kiristi waa Cidon ce. Mna ta afa wakara ri na yini ani pajukun baa bà Yesu Kiristi byenbyen numa ki Afisus. ² Atai Cidon ba Cindoi Yesu Kiristi ku sanni san­ san ku yini mikyin wa na jinni. ³ Í mbu mikyin yi Cidon Ata bu Cindoi Yesu Kiristi wari san’i san­ san numa ki di bu Yesu Kiristi ki cin waa i kwan cin ki dzun baku ra. Kuna tson wa sansan’a wani kata dzu ki don nabi ki byei. ⁴ Ávo waa Cidon ndi màa bye don ba bye jinni raba, Cidon ndi kapyen cei gbogbo numa danra í ci bua ki di bu Yesu Kiristi jiji í ci nyenye numa íká ci ba ada dzun ki pyen’a ba. Ki cin acon wa ki mikyin bu ⁵ Cidon ku cei jiji í kan zhenzhen ki fin zen bu Yesu Kiristi. Ciri abu waa ku con, ábu wa tsa, ku tsa numa ra hun! ⁶ Í nyā Cidon ki cin waa ku hwi cicii kagben. Ciri avyon waa ku vyon’i ki di bu Nwua waa kuri con ba mikyin’a kata! ⁷ Ki di bu aki waa Yesu Kiristi hu ra, ī du wa nwàdzudzu, Cidon fan abu wa babai kata yii. Cidon tā kii kagben. ⁸ Ku tā kii numa cia wa dandan ba! ⁹ Ki bye ayì wa hwehwe waa Cidon ci baku ra, ku tà yii abu wa yuyu kuku numa ki fin mikyin’a waa ku mā danra kuri tsa dzu di bu Yesu Kiristi. ¹⁰ Abu waa kuna con ku tsa ciri ayo ma mba tiri ra abu wa ki don kata ba abu wa ki jinni kuri ho kwa Yesu Kiristi ki vo, kú ci cinbe kata. ¹¹ Ko­ ke kata tsa tsadzu waa Cidon con ra. Cidon cei jiji í kan pajukun bua ki di bu Yesu Kiristi tsadzu waa ku con ra, dzu di bu abu waa ku ndi kapyen con ki mikyin’a dzu jinni bi ávo ponpon. ¹² Ci numa ra, ai baa kapyen ho hwan’i so di bu Yesu Kiristi ra, í she hwe bu Ci­ don. ¹³ Ci numa bani du, nī fo aji wa byenbyen wa sansan bu Yesu Ki­ risti wa nwàdzuni ki byea, ayo waa ni yi wajinderi ra. Cidon yini Den­ den wa nyenye waa ku ndi genu ra, wa ta danra ni ci pajukun bua. ¹⁴ Ku ciri àmà wa tà danra iri bi du abu waa Cidon ndi genu danra iri du ra pan numa keke ya zan anyunu waa kuri zenmu nuge waji. í nya hwe bu Cidon, ¹⁵ Ávo ndi gbogbo m ndi fo danra nina so hwan kiyo yi wajinderi ki bye Yesu Kiristi, ni­ na tà conni na yi pajukun baa bàku kata. ¹⁶ Ábu wa tsa mna mbu mikyin yi Cidon ko nukon ki cinni, na pya Cidon na weni yo kata ra hun. ¹⁷ Mna pya Atai Cidon wa ci ba hwe Ata bu Cin­ doi Yesu Kiristi ku yini Denden wari fyen tà yini zobyen, ku po­ fanni bye ní yì Cidon. ¹⁸ Mna pyaku danra ku pofanni zo mikyinni yo ní mbyà abye wa yafan jinni bua; ní yì nwo abu wa tsa ni lolo hwanni so byea ra. Níkà yì nwo bu wa hwa ku bani nde danra nibi yi wajinderi ki byea ra ní mbyàyi wa sansan wa suu numa waa Cidon ge pa­ jukun’a nu. ¹⁹ Níkà yi ahwea wa ci ba gben tsa butso ki fin mikyin’i ai pajukun baa na yi wajinderi ki byea ra. Agben waa kuna tsa butso kiyo ki mikyin’i ra ci abu dzundzun ba gben ²⁰ waa ku ndi ba do Yesu Kiristi ki fin mbi ra. Ku ndeku so ki go kyekye vo wunua ki don. ²¹ Yesu Kiristi ci ba gben ba hwe kari kata, Kuri tsa tsòn ki cin bu pajukun baa fo kwen, ba abe akù akù ba abe tson kán, ba azèn bu ko kani wa kini kata. Yesu Kiristi ci ba agben tea ki fin tswen wakara maari vinni ba, ama pan numa keke yaya ki bye anyunu wari bi ki pyen. ²² Cindoi fan abu wa ki fin tswen wakara kata kwaku ki voa. Ku nde Yesu so cin abi bu pajukun baa bàku. ²³ Abi bu pajukun hora ci abi bu Yesu Kiristi wa zenmu di bu Yesu Kiristi kata tsadzu waa Yesu Kiristi nari zenmu koke ka­ ta ki fin tswen ra.

¹ Andi ni huhu numa ci ki cin abu wa babani waa ni tsa, nī gonni tson ki bye aji bu Cidon ba. ² Dede waji nina bà aji bu abu wa baba wa ki fin tswen wakara. Nī ndi na gon tson ki bye aji bu Shetan wa ci cin bu denden wa baba kari kata wa ci ki bye wa ki don. A denden wa baba wari tsa butso ki mikyin bu pajukun baa ri gonbe tson ki bye aji bu Cidon ba. ³ Andi ī ci tsa­ dzu waa be ci ra du, ī ndi na tsa abu wana vyai ki di. ī ndi na tsa abu wa vya mikyin’i ba dii, ba aji wa baba wa gaga ki fin mikyin’i. ī yinu danra, andi ai kata kwan ba pajukun badati hora kata akwen bu Cidon tai ra. ⁴ Ama Cidon ri hwi cici bui kagben, kukà con’i numa cia wa dandan ba. ⁵ Ki cin waa ayo waa i ndi huhu numa ci ki fin abu wa baba ki cin waa i gon’i tson fo aji bu Cidon ba. Ku yii cindi ki di bu Yesu Kiristi. Ci numa ra ki bye wa sansan bu Cidon ku nwàdzuni. ⁶ Ki bye cin bui wa kwankwan ba Yesu Cidon can nwai pwadzu ki bye byecui wa riko jiji í ya bā Yesu ci dzun ki ndoa ki don, í tsa tson baku ki dzun. ⁷ Cidon tsa numa ra ki cin waa ki pyen kire ku tà yii wa sansan bua wa hwehwe numa cia wa dandan bara ki bye con waa ku tà yii ki di bu Yesu Kiristi ra. ⁸ Ki bye wa sansan bu Cidon ku nwàdzuni ki fin abu wa babani ki di bu wajinderi waa ni yi ki byea ra. Wakara cia abutso waa ni tsa ba dini ba, ama ci avyon wa vyonvyon bu Cidon. ⁹ Abu waa niri bi caco kiyo ki cin’a kire baani, ki cin waa Cidon nwà­ dzuani ki cin wa nganga buni ba. ¹⁰ Cidon mài ri. Ki bye cin wa kwankwan bui waa ī kwan ba Yesu Kiristi ra, Cidon mài ki cin waa í tsa butso wa sansan waa ku ndi kapyen nde soi yo avo gbogbo danra, í tsa. ¹¹ Ani pajukun baa cini Ya­ hudawa bara, ní kyepan ba bye­ cuni waa ni ndi ci ra. Yahudawa ndi na bani danra pajukun baa kyube abukube ba. Bena ba dibe danra be ci pajukun baa kyu abuku wakara ci abu waa pa­ jukun ri tsa dibe ba dibe. ¹² Ní kyepan andi nī gadi ba Yesu Ki­ risti. Nī ndi ci akyon, nī cini ki fin pajukun baa Cidon ge nuge babe hora ba. Nī ndi ci pajukun baa cibe ba abu dzun waa ni ho hwanni so yo ba. Nī ndi cini ba Cidon ba. ¹³ Ani wa ndi ci nana numa baku ra, ama tanma waa ni ho cinni kwan dzun ba Yesu Kiristi ra, Cidon gbeni kpabi kí go bu Yesu Kiristi wa hu aki we saa ki jinni ra. ¹⁴ Ki cin waa Yesu Kiristi ciri apa wa hoi cin kwan dzun í ci byecu bu vyon. Ku hwa Yahudawa ba baa cibe Yahuda­ wa ba, kan abu dzundzun ba dibe, watoo, akōn wa dzo ge gafanbe ra ku gbeya gafan jinni ra. ¹⁵ Ki bye aki bua waa ku hu nde saa we jinni ra ku ge bwan re nwo adòn bu Yahudawa ba avo shonshonbe kata jiji abe atsu pyinna hora be kwan dzun kan atsu dzundzun wa ripye bé du mikyin wa na jinni. ¹⁶ Ki di bu aki waa Yesu hu ki cin hin wa shon gege ra ku ho tsu pyinna hora kata banbe vyon ki dzun ba Cidon. Ku bwan re aze wa ndi ki yobabe ra don ra. ¹⁷ Ci numa ra ani pajukun baa ndi yini Ci­ don ba, ba ani Yahudawa baa yi Aji bu Cidon nu Yesu bi dan yii kata Aji wa Sansan bu Cidon wari yi mikyin wa na jinni. ¹⁸ Ki cin waa ki dia hunnu katai pyin­ na hora ī du nyaco wa dzu ya bye Atai Cidon ki bye nyaco bu Denden dzundzun maari vinni. ¹⁹ Ma ci numa ase ni cini kyon riba, ama ni ci pajukun baa kwan cin ki dzun ba pajukun bu Ci­ don, nī ci dzundzun ki fin zhen­ zhen bu Cidon. ²⁰ Be honi myi sen cin bu abe fotson ba pa­ jukun baa da don bu Cidon. Yesu Kiristi ba dia ciri aban wa san kari kata wa myi cin pwe bu atan waji. ²¹ Ki bye cinkwan wa kwankwan waa ni kwan ba Yesu Kiristi ra be honi myi kwan bye dzundzun ba dini ni kan atan dzundzun wa nyenye waa beri wa Cidon kiyo ra. ²² Waa ni kwan cin ki dzun ba Yesu Kiristi ra ani du, ni ci ki fin abàn baa bena ri myi tan abye waa Cidon ri tu kiyo ki bye Denden bua.

¹ Abu wa hwa hunnu ami Bu­ lus waa be panmi sa jinni ki bye akan jiji bu Yesu Kiristi pya Cidon na weni yo ani baa cini Yahudawa ba. ² M yinu byen­ byen numa danra ni fonu danra ki bye wa sansan bu Cidon ku yimi butso wakara jiji m tsa ki byeni. ³ Ku dan aji wa yu kuku wakara yimi ki zo mbu tsadzu waa m ndi tā aji ki cin’a titi numa rara. ⁴ Nima hwèn aji waji niri yi danra m hwayi aji wa yu kuku wa ki cin bu Yesu Kiristi ranu. ⁵ Andi gbogbo be pofanbe fin aji waji dan yi pajukun ba. Ama tanma numa ki bye Den­ den bua ku pofan tà yi fotson bua baa nyenye ba pajukun baa da adon bu Cidon. ⁶ Ábu wa yu kuku waji ci kara. Ki bye Aji wa Sansan bu Yesu Kiristi pajukun baa cibe Yahudawa ba beri du wa sansan bu Cidon tsadzu Ya­ hudawa ri du ra. Be ci dzundzun ki fin zhenzhen bu Cidon. Beri du nuge waa Cidon ge ba Ya­ hudawa ra du. ⁷ Ki bye abyon waa Cidon yimi ki bye waa kuna tsa butso ba gben’a kata ki mikyinmi ra m kan anya wa nde Aji wa Sansan bua dan na yi pajukun. ⁸ Ki fin pajukun baa bà Cidon hora, ami ciri apa wa koshe ki finbe kata. Ama ki bye wa sansan bu Cidon ku yimi nyaco wa nde Aji wa Sansan bu Yesu Kiristi ra dan yi pajukun baa cibe Yahudawa ba du. Aji waji ci aji wa sansan numa cia wa dandan ba. ⁹ Cidon wa mà abye wa ki don ba abye wa ki jinni avo ndi gbogbo waa ku ndi tà aji wa yuyu wakara, pajukun yìbe ba. Tanma ku cemi jiji m dan tà yi pajukun kata jiji be mbyàyi butso bu aji wa yuyu wakara. ¹⁰ Be tsa numa ki cin waa tanma numa ki di bu pa­ jukun baa bà Yesu Kiristi zhen­ tsōn bu Cidon baa ciho ciho ba baa ci ba gben ki don be mbyàyi tswi kyinye bu Cidon. ¹¹ Cidon tsa numa we dzun ba abu waa ku ndi mà kapyen avo ndi gbo­ gbo waa ku zenmuku ki di bu Cindoi Yesu Kiristi. ¹² Ki bye cin’i wa kwankwan ki dzun ba Yesu ba wajinderi waa ī ci baku ra, ī ci ba nyaco wa ya ki pyen bu Cidon ba gben mikyin’i kata. ¹³ Ci numa ra mna voni niká zen nde fan dini tashuma ki cin waa mna wa fyin ki cinni raba. M dan numa ra ki cin afyin waa mna wa ra ci wari nde hweni don. ¹⁴ Ki cin wakara mna ho ku­ nubemi tu ben jinni ki pyen bu Atá Cidon, ¹⁵ wari yi atsu wani kata ki don ba ki jinni azèn ra. ¹⁶ M vo Cidon dzu ki bye ahwea wa hwehwe numa ra ku yini gben bu Denden jiji ní pantse gbangban numa ki fin mikyinni, ¹⁷ jiji Yesu Kiristi ku pan ndo ki fin mikyinni ki bye wajinderini. Mna pya danra ní ho beni te bà jinni gangan numa ki bye con, ¹⁸ jiji ani kwan ba pajukun bu Cidon kata ní hwayi ba con bu Yesu Kiristi sansan numa. Acon waji hwe cia wa dandan ba, acon waji tea ki jinni ba, acon waji ri vin’a jinni ba, kuri foji wana yaya ki pyen. ¹⁹ Ní hwayi acon waa Yesu Kiristi na con’i ra, acon waji kagben waa apa ku hwayi kata. Ci numa ra Cidon ku zen­ mu mikyinni kata ba abu baa ku ci baku kata. ²⁰ Aku Cidon wana tsa butso ba gben bu Denden bua ki mikyin’i ra, ku tsayi wa tsa abu nwādzu ba abu waa iri vo, ba abu waa iri ga M fin mikyin’i. ²¹ Ai abi bu pajukun baa bà Yesu í nya zen bu Cidon, í yiku hwe ki di bu Yesu Kiristi. Pajukun baa bà Yesu kini kata bé tsa numa tanma pan numa keke ya­ ya ki pyen ko nukon. Ku ci numa!

¹ Ami waa be panmi tsu tan ki cin waa mna tsa butso bu Cindoi Yesu mna voni ní ci bye­ cuni we dzun mbamba ba ndeba waa Cidon bani ra. ² Ní nde cinni na jinni, ní ho kyinni we jinni, ní pan mikyin. Ní tsaza dini yo ba acon wa con dini. ³ Ki bye cin­ kwan bu vyon waa niri kwan ba dini ki bye Denden bu Cidon ra, ní nga ní pantse ba gben gban­ gban ki bye dzundzun ba mikyin wa na jinni. ⁴ Pajukun baa bà Yesu ci adi dzundzun, Denden ci dzundzun, ai kata ī ho hwan’i so bye abu dzundzun we ki dzun ba ndeba waa Cidon bai ra. ⁵ Cindoi ci dzundzun, wajinderi bui ci dzundzun, batisma bui ci dzundzun. ⁶ Atai Cidon kata ci dzundzun ku ci Ata bu ko kani kata, kuri tsa tson ki cin koke kata, kuri tsa butsoa ki cin’i kata, ku ci fin mikyin’i kata. ⁷ Yesu Kiristi yi ko kani kata byon mba­ mba nu gben butso waa apa ku tsa. ⁸ Ci tsadzu waa be ta ki fin Afa danra, "Dede waa ku do don neya ki don, ku ho abe jo­ ken’a hwehwe numa neya ki dzun baku ki don ki nyaken waa ku ji ken ki cinbe ra, ku yi pa­ jukun byon suu numa" ⁹ Waa ku danra, "Ku neya ki hwadon ra" cinnaa dan dan ke? Cinnaa ciri waa Yesu kapyen tubi ki jinni ki fin tswen wakara, ¹⁰ aku wa ndi tubi ki jinni ki fin tswen wakara ku ciri wa ka ne kasen ya ki hwa cucu ki don ki bye Cidon jiji ashishi dia ku be koke kata. ¹¹ Ku ciri apa wa yi badati byon be kan fotson, badati be kan pajukun baa da don aji bu Ci­ don, badati ci baa ri dan Aji wa Sansan bu Cidon yi pa, badati ci pasta, badati ci manu baa fyen bu. ¹² Ku tsa numa ki cin waa kú dzo pajukun bu Cidon gben wa tsaka butso bu Yesu Kiristi be gbe ho pajukun kata myi kwan bye dzundzun ki di bu Yesu. ¹³ Iri tsa numa pan keke ya zan anyu­ nu waa ai kata iri ho cin’i kwan í ci adi dzundzun ki bye wajinderi bui, ba ayì waa ī ci baku ki bye Nwu bu Cidon, í ci baa hwe byen kan pajukun ra, ya zan ki byecu waa Yesu Kiristi kiyo. ¹⁴ Ci numa ra iri cii tsadzu baci riba, baa awo ri sabe jape wa name ri tebe taya numa, tabi numa, bena gon tson fo abu wa fyenfyen bu pajukun baa bye pa­ jukun, baa ri nwà pajukun nwe bu abu wa fyenfyen yibe na jan nyaco. ¹⁵ Ama í dan aji wa byen­ byen ki bye acon, í hwe kan pajukun baa bà Yesu Kiristi Cin­ doi, ina kwan cin baku ki dzun, aku wa ciri cin’i. ¹⁶ Ki cin waa abendi kata ri ho dibe kwan dzun ki dia ki bye dzundzun, kuri ho abendi ra ki cincin numa mbe kwan dzun kan adi dzun­ dzun. Ci numa ra abendi ra dzun wa mana tsa butso wa we baku, kuna tsa ki cin waa adi waji ku hwe ku myi dia ya pyen ki bye con. ¹⁷ Mna dan yini aji ki fin zen bu Cindoi, m kana mbyā dan bavo kiyo kwan yo na yini danra niká ci byecuni ci tsadzu pajukun baa yibe Cidon ba, aji wa gaga bube ci aji wa dán numa nya hwan azota. ¹⁸ Azo mikyinbe nà tsuken jinni numa, abu dzun kwan’abe ba cindi waa Cidon na yi pajukun’a raba, ki cin waa be cibe numa azokon azota, be gban cin kagben. ¹⁹ Atsenni baa­ ni ki zobe, be fan dibe gbaya numa yi abu wa vya hwanbe wa tsatsa, ba atswi aso wani kata, be kanden kabe adibe kiyo ba. ²⁰ Wakara cia abu waa ni ndi fyen ki nyaco bu Yesu Kiristi ba. ²¹ Ajinderi be ndi fyenni abu ki cin bu Yesu Kiristi, ani baa ci pajukun baa bàku ra, ni yi abu wa byenbyen wa ki cin bu Yesu ranu. ²² Ní fan tswi abu wa tsa­ tsani wa ndi kapyen waa ni ndi ci fin’a ra jinni, wana tsabani cin nya hwan azota numa ki cin bye­ bye wa dado mikyin azota. ²³ Ní vyin pukan mikyinni ba aji wa gaga buni ku kan wa ripye. ²⁴ Ní nga tswi mikyin wa ripye waa be mà dzu bu Cidon waa ku ci baku byenbyen numa ada baani kiyo ra. ²⁵ Ci numa ra se ní gadi ba akan wa kankan, ko kani kata kuna dan ajibyen na yi nwuzaa ko nukon, ki cin waa ai kata ī ci abu dzundzun ba dii. ²⁶ Nima ngongo ba dini, niká hwa yi ango ra ku yini tsa abu wa baba ba dini ba. Niká fan anyunu ku koni ki cin ni ci tiri ki fin ango wa ngongo ba dini ba. ²⁷ Niká pofan apyo ko titi numa yi Shetan ku kayo ba. ²⁸ Apa wama ndi na vyi vyu ku fan avyú wa vyivyi jinni ku nga ku tsa abu ba avo dia byenbyen numa ku du abu waa ku tsaza pajukun baa nyani bu yo. ²⁹ Niká zen aji wa soso numa pwadzu ki nuni ba, ama ni zen aji wa sansan wari myi san dini wari tsaza pajukun baa ri fo aji buni ra. ³⁰ Niká tsaba mikyin bu Denden bu Cidon ba, ki cin waa Denden bu Cidon ciri àmà wari tà danra nī ci pajukun bu Cidon waa Cidon ten nwàni pwadzu ki fin pajukun baa tsa abu wa baba keke numa yaya ki bye anyunu wa kennu. ³¹ Ní gadi ba tswi mikyin wa baba. Ní gadi ba ango kata ki mikyinni niká yi mikyinni na do ngo fu ba! Niká gbende ba dini ba, niká zen aji tsaba zen bu adini ba. Ní gadi ba aji wa baba wa gaga ki fin mikyinni. ³² Ama ni tsa dini sansan, nina hwi cici bu dini, nina fan ada bu dini na yi dini tsadzu waa Cidon na fan abu wa babani na yini ki di bu Yesu Kiristi ra.

¹ Ani pajukun bu Cidon baa Cidon ri conni ba mikyin dzundzun, ní tsa kokeni kata ci tsadzu waa Cidon ri tsa. ² Ní tsa buni kata ki fin con ci tsadzu waa Yesu Kiristi con’i ku nde dia hwa aki kiyo yi Cidon ki cin’i. Cidon mbu mikyin ba aki wa penrei waa ku hu ra. ³ Tsadzu waa ni d pajukun bu Cidon ra, san’a waa ni tsa agya ba, ba abu baa ci aso, ba abu wa ngingi. San’a waa nina zen aji ki cin abu baakara ki finni ba. ⁴ Niká zen aji wa soso ba, niká zen aji jeje numa ba, ko aji wari da doni mikyin wa tsa aso, ama nína mbu mikyin yi Cidon. ⁵ Ní yinu danra, ko apa wani kata wa mana tsa aso, ko aji wa baba wa gaga ki mikyin’a, ko apa wa ngingi bu, ku ba apa wa wa aki kata ci abu dzundzun. Kuri dua abu dzun ki bye abu waa Yesu Kiristi ri yi pajukun bua hora ba, kuri kakaa ki ndo Cidon ki don ba. ⁶ Niká zen nde fan zo yi apa dzun ku byeni ba aji wa dán numa ba, ki cin waa ki bye abu baakara Cidon ri pan pajukun kwen ki cin waa be gonbe tson fo ajia ba. ⁷ Ki cin wakara ní gadi ba tswi pajukun baakara. ⁸ Andi gbogbo ani ba dini ni ci fin afi­ tse, ama tanma ni ci fin bye wa yafan jinni bu Cidon, ci numa ra ní tsa abu ci tsadzu pajukun baa ci fin bye wa yafan jinni. ⁹ Ki cin waa abye wa yafan jinni ri mba abu wa sansan wa tsatsa ba abu wa byenbyen ba aji wajinderi ri­ bi. ¹⁰ Ní nga ni tsa abu wa we hwan bu Cidon. ¹¹ Ní gadi ba abu baa dán numa baa pajukun ri tsa ki fin fitse, ama ni fu abu baaji nya myi ki bye wa yafan jinni. ¹² Ko aji wa zenzen ki cin abu waa bena tsa yuyu rama ci abu wa pan tsenni kagben. ¹³ Ko ka­ ke kata waa bena tsa yuyu ra anyunu waa bema pwadzu ki myi ki bye wa yafan jinni ra hunnu ri tà yibe cinnabe waa be ci. ¹⁴ Ki cin waa ko kake kata wama ci ki fin afitse, bema ndeku pwadzu bi ki fin bye wa yafan jinni kuri pukan kan wa yafan jinni. Ábu wa hwa be danra, "Dze jinni au apa wa nana, do don ki fin baa huhu. Abye wa yafan jinni bu Yesu Kiristi ri yafan bye dzwau ki di." ¹⁵ Ci numa ra se ní wa dini sansan ba byecuni waa ni ci. Byecuni kuká ci tsadzu bu pa­ jukun baa ci àfo numa ba, ama ku ci bu pajukun baa ci ba ayì. ¹⁶ Apyo waa nima du kata ní tsa abu kiyo sansan numa, ki cin waa anyunu baa tanma ra ci anyunu baa baba. ¹⁷ Niká ci pa­ jukun baa ci jeje numa ba, ama ni hwayi abu waa Cindoi ri con. ¹⁸ Niká pyen cen tsaba ba, ama ní zen nde fan Denden bu Cidon ku mu ki fin mikyinni. ¹⁹ Nína dan aji ba dini ki bye vyon wa ki fin aku Afa wa tso vyon ra, ní tso vyon gba bu we yo she Cidon ba mikyinni kata. ²⁰ Nína mbu mikyin yi Ata Cidon ki cin koke kata ko nukon ki fin zen bu Cindoi Yesu Kiristi. ²¹ Ní fo tson bu dini ci tsadzu waa nina con Yesu Kiristi nina yiku hwe ra. ²² Ko awuwa wani kata ki finni ku gon tson fo tson bu nua ci tsadzu waa kuri gon tson fo tson bu Cindoi ra. ²³ Ki cin waa awu­ wa ci ki vo bu wunu ci tsadzu waa Kiristi ci cin bu abi bu baa bàku ra. Abi waji ci dia, ku ciri apa wa nwàdzu adi waji. ²⁴ Ci numa ra ko awuwa wani kata ku fo tson bu nua ku zen nde ba aji bua tsadzu waa abi bu pajukun bu Yesu Kiristi ri fo aji bua ri zen nde baku ra. ²⁵ Ko wunu wani kata ki finni kú con awaa tsadzu waa Yesu Kiristi con abi pajukun’a ku nde dia yi aki ki cinbe ra. ²⁶ Ku tsa numa ki cin waa ki nyaken waa ku tsonye be ba jape ki bye ajia ra kú hobe ndafan yi Cidon ki pyen. ²⁷ Ki cin waa jiji ku gbe abi bu pajukun bi dia be ci nyenye numa ada dzun baani ki dibe ko abanfyon bu abu dzun wa baba wa tsatsa, ba ko tswi abu wa baba wani kata baani ki dibe. ²⁸ Ko wunu wani kata ku con awaa ci tsadzu waa kuri con dia ra. Apa wama con awaa kuna con adia hun. ²⁹ Ki cin waa apa dzun wa ngha fo dia fora baani, ama kuri ji buju, kuri kon di bua ci tsadzu waa Yesu na kon abi pajukun ra. ³⁰ Ki cin waa ī ci aben baa ki dia. ³¹ Afa bu Cidon danra, "Ki cin wakara apa ku fan ataa, ba ayoa ku tābà ba awaa abe pyinna hora be kan apa dzundzun." ³² Afin aji waka­ ra dzondzon. M hwayi fin aji waji danra ci Yesu Kiristi ba abi pajukun bua. ³³ Ama cinna bu aji waji tea kire kenken ba, bi ki byeni du, ko kani kata ki finni ku con awaa ci tsadzu waa ku con dia ra. Ko awuwa wani kata kukà yi nua hwe.

¹ Ani baci ní gon tson fo tson bu atani, ba ayoni ki cin waa ci abu wa sansan ki bye Cidon. ² Wakara ci adòn wa kapyen wa ci ba anuge danra, "Ú yi atau, ba ayou hwe. ³ Ki cin waa jiji ko kakeu kata ku kyen ndafan jinni sansan, ù kari ribi ci kpasun ya pyen suu numa ki bye jen waji." ⁴ Ani ata bu bazhenzhen ba ayo bu bazhenzhen, niká tsa ba­ zhenzhenni abu wa nàkyin ba. Ama nína nube dòn, nína nàbe, nina fyen tà yibe nyaco bu Cin­ doi Cidon sansan numa. baaji kata ni ci ba Cindo dzun­ dzun ki don wari fo ko kani kata kwen ki bye nyaco dzundzun. ⁵ Ani anyà, ní gon tson fo Cin­ doni ba adi wa vonvon, ba mikyin dzundzun tsadzu waa kuna tsa bu­ tso yi Yesu Kiristi ra. ⁶ Niká tsa wakara numa du zo bu pajukun maari vinni jiji be nyani ba. Ama ní tsa abu waa Cidon ri con kata ba mikyinni ci tsadzu zhen nya bu Yesu Kiristi. ⁷ Ní tsa butsoni ba mikyin wa mbumbu ci tsadzu nina tsa butso waji na yi Cindoi Yesu Kiristi, bà nina tsa yi apa maari vinni ba. ⁸ Ní kyepan danra Cidon ri yi ko kani vokwin bu butso wa sansan waa ku tsa, ko kuma ci anya, ko kuma ci nwu tswen. ⁹ Ani bacindo, nína tsa numa babe ki bye nyaco dzundzun, ni­ ká na hwabe azin ba. Ní yinu danra, ani kwan ba zhen nyani ¹⁰ Aji wa ken niken ciri ní pan­ tse ba gbenni gbangban numa, ní kwan cin ki bye dzundzun ba Cindoi Yesu Kiristi ku yini gben wa gbangban. ¹¹ Ní ho tswén bu ken baa Cidon yini ra ho we dini, ki cin waa ko ayo wani waa Shetan ma bi ba kyinyea jiji ku byeni ní pantse ba gben. ¹² Ki cin waa ina nui ken waji ba pajukun baa ci ba adi ki fin tswen wakara ba, ama ina nuken waji ba zhen­ tsōn bu Shetan ba ajon baa baba ki don baa ci ba gben wa tsa butsobe afitse ki fin tswen waka­ ra, ba abu baa baba hwehwe numa baa ri tsa butsobe ki don. ¹³ Ki cin wa ci kara tanma katani ní ho tswén bu ken bu Cidon we ki dini tanma ki cin waa ko ayo wani waa aken ma sepyu ra niri tsayi wa tse ba gben gbangban numa. Nima ri tse ci ba gben gbangban numa nuken ba She­ tan nde ya fo anyunu wa kennu, niri koni kwi ki nyaco ba. ¹⁴ Ci numa ra ní pantse sansan ní ke dini pyo ba aji wa byen­ byen, ni gòn kwen mikyinni akì ba abu wa we mikyin bu Cidon wa tsatsa. ¹⁵ Ní dzo dini atabe ba Aji wa Sansan bu Yesu Kiristi wa nde ya yi pajukun be du mikyin wa na jinni, ¹⁶ Ko dede wani kata ní nde akì bu wajinderi waa niri tsayi wa gon tsuken abō ba apyu wa kwakyi waa Shetan ri tani ra. ¹⁷ Ní nde wa nwadzudzu bu Cidon wa ci tsadzu abucin bu sho ra be cinni, ba gisingiri bu Denden bu Ci­ don, watoo, ciri aji bu Cidon hun, ¹⁸ Ko anyunu wani nína pya Cidon ku tsazani yo. Ní pya ki bye gben bu Denden bu Cidon. Nína pya Cidon anyutu ba afitse bazo kiyo niká bè ba, niká geni mikyin ba, nina pya Cidon we pajukun bua yo kata. ¹⁹ Nína pya Cidon wemi yo du jiji ayo waa m mana dan yi pajukun aji Ci­ don ku yimi aji wa dan yi pa­ jukun ba gben mikyin kata jiji m pofan fin Aji wa Sansan bu Yesu Kiristi. ²⁰ Abu wa tsa be panmi sa jinni ki bye akan ra ki cin waa m ci fotson wa na dan yi pajukun Aji wa Sansan bu Yesu Kiristi. Ní vo Cidon m dan yibe aji waji ba gben mikyin ki fin nyaco wa san kari m dan. ²¹ Tikikus wandoi wa ki nyaco bu Cindoi Yesu waa ina conku ba mikyin’i wari tsa butso bu Cindoi Yesu ndafan jinni byen­ byen ra, ri dan yini aji ki cinmi kata jiji ní yi tswi byecu waa m ki fin’a naya. ²² Abu wa tsa mna tsonku tson ki byeni ra, ki cin waa jiji ní yi cinna bu byecu waa ai kata kire ki fin’a jiji ní du mikyin gben. ²³ Atai Cidon ba Cindoi Yesu Kiristi ku yi bazhenzai baa yi wajinderi ki bye Yesu Kiristi be con dibe, ku yibe mikyin wa na jinni, ba wajinderi. ²⁴ Cidon ku kwan pajukun kata baa con Cin­ doi Yesu Kiristi tea ki jinni bara kiyo. Ku ci numa!