BAKOLOSI

BAKOLOSI

¹ Ami Bulus waa Cidon cemi ci fotson bu Yesu Kiristi, kwan ba Timoti wandoi, ² ina ta afa wakara ri na yini ani pajukun baa bà Cidon ki Kolosi. Ni ci bandoi baa kwan cin ki dzun bà Yesu Kiristi ba mikyin dzundzun tori numa. Atai Cidon ku sanni sansan, ku yini mikyin wa na jinni. ³ Ina mbu mikyin yi Cidon Ata bu Cindoi Yesu Kiristi, ina pya Cidon weni yo ko nukon. ⁴ Ki cin waa i fo aji ki cinni danra, nina yi wajinderi ki bye Yesu Kiristi, ni kana con pajukun baa bà Cidon kata. ⁵ Ki cin waa ni ho hwanni so bye abu waa Cidon nde konsoni yo ki don ra. Abu waji ni ndi kapyen fo aji ki cin’a ki bye aji bu Cidon wajinderi byenbyen numa ra. ⁶ Aji waji ka fye ho bye ki fin tswen kire kata ra. Aji waji hwa pajukun na tsa abu wa dzu cin, Pajukun kana yi wajinderi ki bye aji waji kwan yo foji wana yaya ki pyen. Ci tsadzu waa ani ba dini ndi fo aji waji hwa yini na tsa abu baa dzu cin, avo waa ni ndi ka­ pyen fo aji waji numa, ni hwà yinu byenbyen numa ba waa Cidon hwi cici bu pajukun ra. ⁷ Apa wa nde aji waji wakara kapyen bi dan yini ra ci Apafras ajo butsoi wana tsa abutso bu Yesu Kiristi ki dzun bai. Kuna tsa butso bu Yesu Kiristi nui ki finni ba mikyin dzundzun byen­ byen numa. ⁸ Ku dan yii aji ki cin acon waa Denden bu Cidon yini ki mikyinni nina con pajukun ra, ⁹ Ábu wa hwa avo anyunu waa i ndi fo aji wakara numa ki cinni ra, i be foi wa pya Cidon weni yo ki pyen bu Cidon ki cinni fo raba ko nukon. Ina pya Cidon ku hwa yini ni yì mikyin’a yafan jinni zan myi jiji ni du zobyen wari dzu bye Denden’a ribi ra, jiji ni hwàyi aji. ¹⁰ Jiji ni ci byecu wa vya hwan bu Cindoi ni tsa abu wa san hwan’a ko nukon. Abu waa nima tsa kata kuri ci abu wa sansan, niri yì Cidon kwan yo foji wa yaya ki pyen. ¹¹ Cidon ku yini gben’a wa ka­ gben bu koke kata ra, jiji ni pan­ tse ba gben gbangban numa, ní gban mikyin ba fyin wama duni kata, ní mbu mikyin kiyo. ¹² Ní mbu mikyin yi Ata Cidon wa hwa yii ken wa ji buju baa ku ho konso pajukun’a yo ki ndo tson wa yafan bye ra ki dzun. ¹³ Kú pen’i ki vo bu afitse kú hoi ya ki ndo tson bu Nwua waa kuri con ajia ra. ¹⁴ Nwua waji tso nui, ku fan abu wa babai yii ra. ¹⁵ Yesu Kiristi ci azén bu Cidon kyoo numa. Cidon waa apa ri mbyà kaaku ba azo bara. Ku ci nwu mbafyen ki bye abu baa Ci­ don mà ra kata. ¹⁶ Dzu di bu Yesu Kiristi hunnu Cidon hun mà abu kata. Ku mà abu baa ki don, ba abu baa ki jinni, abu baa apa tsayi wa mbyà ba azo, ba abu baa apa tsayia wa mbyà ba azo ba. Ko abyecu tsòn, ba atsòn wa nánà, ba atsòn wa tsatsa, ba agben wani kata Cidon màbe dzu di bu Yesu Kiristi. Cidon màbe yi Yesu Kiri­ sti. ¹⁷ Ku kapyen bu koke ri kata ci. Koke kata ho cinbe kwan dia. ¹⁸ Ku ciri acin bu adi, watoo, pa­ jukun baa bà Cidon. Ku cári apa wa kapyen, kukà ciri apa wa ka­ pyen do don pwadzu ki shimbi ki fin pajukun baa huhu hora, ki cin waa jiji kú kan apa wa kapyen ki bye koke kata. ¹⁹ Cidon mbyà san­ ku ku fan koke kata kwaku ki voa. ²⁰ Cidon ka mbyà sanku ku yi Nwua kú ho koke kata kasen bi kwan dzun ki byea, ki di bu asa bu Nwua waa ku nde we jinni anyunu waa be kan bwan’aku ki cin hin wa shon gege ra. Cidon hwa koke kata wa ki don, ba wa ki jinni bi ci byecu bu vyon ki dzun kata baku. ²¹ Andi gbogbo numa, ani du, ni gadi ba Cidon naco numa ra, nikà ci jo zea ki bye abu wa babani wa tsatsa. ²² Ama tanma numa Cidon hwa yini ban vyon baku ki dzun ki di bu aki waa Nwua waa be mbaku ci tsadzu nwu pajukun ra hu ki cinni ra, Ku hu ki cin waa jiji ku hwa ani pa­ jukun bua hora ni ci ba mikyin wa sansan jiji apa dzun kúká zen aji dzun wa baba ki dnni ba. ²³ In nima pantse gbangban numa ho beni bà jinni yi wajinderi ki bye aji bu Cidon foji wana yaya ki pyen, nima pantse gbangban numa, nima ndeni di ba, nima ho hwanni so bye aji baa ni fo ki nu bu pajukun baa dan aji bu Cidon ho­ ra. Aji baaji be dan yi ko kani kata wa ki fin tswen wa ci kara. Ami Bulus du, Cidon ndemi kan fo­ tson’a wa dan aji wakara yi pa­ jukun. ²⁴ Tanma numa mna mbu mikyin ki cin afyin waa mna wa ki cinni ra, Ci tsadzu waa Yesu Kiristi ndi wa fyin ra, mna wa fyin numa ki dimi du, ki cin bu pajukun bua baa bà Cidon. M wa fyin waji numa ki cin waa jiji m kò ban fyin waa Yesu Kiristi ndi ko te nyaco ra, ²⁵ Cidon nde butso wakara ri kwami ki vo jiji m tsa ki byeni. Butso waji waa ku nde kwami ki vo ra ciri, jiji m nde ajia dan zan myi kata yi pajukun. ²⁶ Aji waji wakara waa m nde na dan yi pajukun ra, ndi yuyu rikon numa ci ki zo bu pajukun avo ndi gbogbo numa dzu jinni bi, Ama tanma numa ku pofan fin aji waji zan myi ta yi pajukun’a ra. ²⁷ Cidon mbyà san hwan’a waa jiji ku tà yi pa­ jukun be mbyàyi danra, aji wa sansan numa. Aji waji ci aji wa dzu cin suu numa ki fin tsu pa­ jukun wani kata. Aji wa yuyu wakara waa ku pofan tà yii ra ciri, Yesu Kiristi ci fin mikyinni. Ki cin wakara numa hwa ni ho mikyinni so danra, niri ya baku ci dzun ki bye hwea. ²⁸ Abu wa hwa ina dan yi pajukun aji ki cin bu Yesu Kiristi, ina nu ko kani kata don, ikà byenzo ina fyenbe aji ki cin bu Yesu Kiristi, ki cin waa apa wama kwan cin ki dzun ba Yesu Kiristi kata apa waji ci apa wa byen titi numa ki bye Yesu Kiristi. ²⁹ Ábu wa tsa mna so hwan kiyo na tsa butso waa Yesu Kiristi yimi ra ba gbenmi kata, waa Yesu yiku na tsa butso ki dimi gbangban numa ra.

¹ Mna con jiji ni yi nganga waa mna nga ki cinni ani pa­ jukun baa ki Kolosi, ba baa ki Lawudikiya, ka ba pajukun baa mbyà fobe zomi riju numa fo raba. ² Mna tsa butso wakara ki cin waa jiji ni du gben mikyin, jiji nikà con dini ni ci abu dzun­ dzun. Mna con jiji ni hwayi ba aji baa yuyu baa Cidon pofan finbe tà yii ki cin bu Yesu Kiristi ra zan myi kata, jiji ni zen nde ba aji baaji byenbyen numa jiji ni du wa sansan kiyo. Aji wa yuyu waji ra, ci Yesu Kiristi ba dia. ³ Yesu Kiristi ciri apa waa Cidon ho zobyen, ba ayì yu so byea ra. ⁴ Mna dan yini abu baakara numa ki cin waa apa dzun kúká bi pujini ba aji wa vyavya ba. ⁵ Ko waa m bàmni kire bani ra, mikyinmi ci tiri ki dini ko nukon. M mbu mikyin suu numa ki cin waa m fo danra, ni ci byecuni ci sansan numa, nikà pantse ba gbenni kata na yi wajinderi ki bye aji bu Yesu Kiristi ra, ⁶ Nī yi wajinderi ki bye Yesu Kiristi danra, ku ci Cindoni, ci numa ra, ní tsa bu wa fye waa pajukun baa kwan dn ki dzun ba Yesu Kiristi be tsa. ⁷ Ní ho beni ba gbenni kata tswa ki dia gbangban numa, ni pan ajia ba mikyinni gbangban numa ci tsadzu waa be ndi fyen ta yini ra. Níkà mbu mikyin yiku kwan yo foji wa yaya ki pyen, ⁸ Ní wà dini sansan jiji níká yi apa dzun ku pujini ba ayì wa ki fin tswen kire wa nya hwan azota numa raba. A nwo yì waka­ ra dzu bye aji wa màmá bu pa­ jukun, ba jon baa baba baa ki fin tswen kire, dzua ki bye Yesu Ki­ risti bi ba. ⁹ Cidon ba dia ci fin bu Yesu Kiristi waa be mbaku dzu pajukun ra. ¹⁰ Ku ho cinni kwan dzun ki dia kata. Ku ciri cin bu tson wani ba gben wani kata. ¹¹ Ki cin waa ni kwan cin ki dzun baku ra, Cidon kyuni bukuni yo ra. Abuku waji cia tswi buku waa pajukun ri kyu ba avo ri geken gehoa ta jinni raba. Ama tswi bu­ ku wa kyukyu wakara dzu bye Yesu Kiristi ba dia bi. ¹² Ayo waa be ndi tsani batisma ra ta danra, be ndi honi jì shimbi ki dzun ba Kiristi. Cidon kà doni pwadzu ki dzun ba cindi wa ripye pwadzu ki shimbi, ki cin waa ni yi wajinderi ki bye butso bu Cidon waa ku tsa ba gben, ku do Yesu Kiristi pwa­ dzu ki shimbi ra. ¹³ Andi gbogbo ni huhu numa ci ki fin bu wa babani waa ni tsa ra. Kati ki cin waa ni ndi kyuni bukuni bara. Ani ciri pajukun baa mna zen aji bani dan­ ra, Cidon fan bu wa babai yii i ci ba cindi ki dzun baku tanma. ¹⁴ Andi i ndi ci ba kwen bu Cidon ki cin’i ki cin waa i tsai bu waa Cidon dan i tsa raba. Ama tanma numa Cidon tsonye abu wa baba wa ki cin’i ra don ra. Ku tsonye abu wa baba waji don ba nwoa kata ku ho kan cin hin wa shon gege ra. ¹⁵ Dede waa Yesu hu ki cin hin wa shon gege ra, ku ten dia don ki bye tson ba gben bu jon baa baba hora ra. Ku tà yi pajukun ki byeya numa danra, ku kagbenbe ra. ¹⁶ Ci numa ra, níká zen nde yi apa dzun ku foni kwen ki cin buju wa jijini, ba jan wa wawani ba. Níká kà zen nde yi apa dzun ku foni kwen ki cin cinkwan waa niri kwan ji buju ki fin ju, ko ki fin son wa ripye, ko wa ki fin byecen ba. ¹⁷ Abu baa hun ra kata ci nwini bu abu baa ribi ki pyen kire. Abu waji wajinderi byenbyen numa bena tà ra ci Yesu Kiristi. ¹⁸ Ci numa ra níká zen nde yi pajukun baa na so dibe danra, Cidon ta yibe abu ba­ dati be mbyà ki zo mbu ra, be byeni ba. Bena dan yini danra, ní sinni dini ní wa zhentsōn bu Ci­ don. Bena so dibe numa kagben, abe kwa be eibe abu dzun ba. Aji wa gaga bube ken fin tswen wa­ kara vinni. ¹⁹ Be nghabe wa ho cinbe bi kwan bye Yesu wa ci Cin bu adi, wari hwa yi adi ri fifi muzo kwan yo ya pyen, Kuri hwa yi adi ri du gben ki dia, kuri ho aben dibe ban kwan dzun ba azu dibe. ²⁰ Nī hu aki ki bye dzundzun ba Yesu Kiristi, nī gadi ba ajon baa baba ki fin tswen kire ra. Tsanini nina tsa bu ci tsadzu pajukun bu fin tswen, nina she bu tiri? ²¹ Ci tsadzu waa bena fyen ta yini dan­ ra, sheshe níká go vo ki bye abu wakara numa ba, sheshe níká nde buju wakara numa go nuni ba, kati, níká hun di ki bye abu waka­ ra numa ba. ²² Abu baa sheshe baakara kata be ci abu baa tsa nwadzu nya hwan numa azota. Pajukun ba dibe pwa hwan ri na mà aji baaji na fyen pajukun hwa yibe na she abu baaji. ²³ Wa ka­ pyen na tà ci tsadzu abu baa she­ she baaji ri hwa yi apa ri byenzo, ki cin waa be te apa ku nde cin na jinni ken wa abe zhentsōn bu Cidon, apa kúkà sinni dia, ku ta dia fyin. Ama ma ci aji wajinderi byenbyen numa be tsabe cin ba, be babe gben dzun wa tsaza apa yo jiji apa ku den dia abu waa adi ri con ba.

¹ Cidon ma doni pwadzu ki dzun ba Yesu Kiristi ki shi­ mbi, se ni ho hwanni so bye abu wa ki don ki bye waa Yesu Ki­ risti ciyo ki go kyekye vo wunu bu Cidon ra. ² Ní ho hwanni so bye abu baa ki don, níká ho hwanni so bye abu baa ki fin tswen kire ba. ³ Nī ndi hu ra, cindini ci vo bu Yesu Kiristi, ku nde konsoni yo ki bye Cidon. ⁴ Yesu Kiristi ciri cindii wajinderi byenbyen, anyunu waa kuma ka­ sen bira, ani du niri baku kyen dzun kasen bi ki bye hwea, ⁵ Ci numa ra, ní nwa voni don ki bye abu baa ni ndi na tsa ki bye byecuni wa gbogbo ki fin tswen kire. Ní fan aji bu agya wa nyanya ba aso wa tsatsa be jinni, Níká zen nde yi abu wari vyani wa tsatsa ki di ku ho mikyinni ji ba. Níká ma abu wa baba wa tsatsa ki mikyinni ba. Níká nyi abuu apa ba, ki cin waa ni mana nyi abuu apa numa, ni ho abu baaji kan aki wa tsatsa ki byeni ra hun. ⁶ Ki cin tswi abu baaji baakara numa ri gbe kyinna bu Cidon ribi be pajukun baa fobe tson’a bara ki cin. ⁷ Andi gbogbo ani ba dini na tsa tswi abu baaji numa du. Ni ndi fan dini kata dzo ci fin tswi abu baaji wa tsa­ tsa numa. ⁸ Ama tanma ní nwaa dini don ki fin abu baa baba baaji baakara. Níká ngongo na kyinna ba. Níká tsa dini abu wa baba ba. Níká zen aji tsaba dini ba. Níká zen nde zen aji dzun wa baba pwadzu ki nuni ba. ⁹ Ní-ká ge aji be dini ki cin ba. Ki cin waa ní yinu danra, ni gadi ba tswi mikyin wa ndi gbogbo, ba bu baa ni ndi na tsa rara. ¹⁰ Nī nga mikyin wa ripye tanma ra. Mikyin wakara ciri mikyin wa ri­ pye waa Cidon maku, kuna mbyāsanku jiji ku ci ripye numa ci tsadzu waa Cidon ci ra, jiji ni yìku sansan. ¹¹ Ci numa ra, nī ci abu dzundzun ba dini tanma. Yahudawa ba tsu pajukun ba­ dati cibe ken ba dibe tanma riba. Pajukun baa kyu bukube, ba pa­ jukun baa kyube bukube ba, be kan bu dzundzun ba dibe tanma ra. Ko apa wama ci kyòn, ko apa wa ki hwan, ko anya, ko nwu tswen, be mba dzun ba dibe, ki cin waa Yesu Kiristi ka koke kata, kúkà ci Cin bu koke kata. ¹² Ani ci pajukun baa Cidon ceni so danra, ni ci pajukun bua baa concon. Ci numa ra ní tsa bu wa fye waa pajukun bu Cidon be tsa. Ní hwi cici bu dini ni ta aki bu dini, ni nde cin na jinni yi dini, ní ci tashuma numa ní gban mikyin. ¹³ Ní gban mikyin ba dini, ni fan dàu dini yi dini. Ko apa dzun ma ge aji sen apa dzun ki cin ní fan abu wa baba bu dini yi dini ci tsadzu waa Cindoi fan abu wa baba buni yini ra. ¹⁴ Abu wa tutu kari kata ciri, ni con dini. Acon ciri abu wari ho koke kata tse kwan bye dzundzun be ci byecu bu vyon ba dibe rito numa. ¹⁵ Mikyin wa na jinni wari dzu bye Yesu Kiristi ribi ra kú ta yini abu wa tsatsa ki fin mikyinni ki cin waa Cidon bani nde bi ki cin waa jiji ní ci byecu ki dzun ba dini ki fin mikyin wa na jinni jiji ní mbu mikyin yi Cidon ko nukon. ¹⁶ Aji bu Yesu Kiristi kú ci fin mikyinni sansan. Nína fyen tà yi dini abu. Nína tà dini aji ki fin nyaco bu kyinye. Ní tso vyon wa ki fin Afa bu Cidon, ba vyon wa ki fin afa wa tso vyon, ba vyon baa màmá baa Denden bu Cidon ta yini ra. Ní­ na tso vyon baaji ki fin mikyinni nína she Cidon kiyo, ní mbu mikyin yiku. ¹⁷ Ki bye abu waa nima tsa kata, ko ki bye aji wa zenzen, ko ki bye butso wa tsa­ tsa, ni tsa abu baaji kata ba zen bu Cindoi Yesu, nína mbu mikyin dzu dia yi Atai Cidon. ¹⁸ Ani bawuwa ni nde cinni na jinni fotson bu bawununi kyoo numa. Wakara ciri abu wa fye waa pajukun baa bà Cindoi Yesu be tsa hun. ¹⁹ Ani bawunu du, ni con ba­ wuwani, níká tsabe abu wa nakyin ba. ²⁰ Ani zhen baci, ni nde cinni na jinni ní fo tson bu abe tani ba ayoni ki bye abu wani kata. Ki cin waa wakara ciri abu wa san hwan bu Cidon hun. ²¹ Ani ba tabe, níká tsabe abu dzun wa nakyin wari hwa yi dibe ku ci tashuma numa ba. ²² Ani zhen nya, ni nde cinni na jinni fo tson bu abe cindoni baa ni ci vobe ki fin tswen wa ci kara, ko ki bye ke kata. Níká nde cin na jinni ki pyenbe ki bye yo waa bena mbyàni vinni raba, ci tsa­ dzu pajukun baa ri nya jiji pa­ jukun be nyabe raba. Ama ni zinzin bu Cidon ni tsa abu ba mikyinni kata ki pyen bu Cidon. ²³ Ki bye abu waa nima tsa kata, ni tsa abu waji ba mikyinni kata, ni mbyà danra, nina tsa abu waji yi Cindoi Yesu Kiristi, níká mbyà danra, nina tsa yi pajukun ba. ²⁴ Cindoi Yesu Kiristi ciri Cin­ doni. Ní yinu danra, kuri hwani ton bu abu wa mba tiri ba abu waa nina tsa ra ri. Niri du abu waa ku nde konso pajukun’a yo ra. ²⁵ Apa wama tsa abu wa baba, kuri banku ton bu abu wa babaa waa ku tsa ra yo banban. Kuri fo pajukun kata kwen ki bye nyaco dzundzun.

¹ Ani baa ci cindobe hora, ni yibe abu wa sansan, níkà yibe mba dzun ba dibe. Ní yinu danra, ani du ni ci ba Cindoni ki tiri ki don. ² Ní foji Cidon wana pyapya ko nukon, níká nì ba. Nína mbu mikyin na yi Cidon. ³ Ní pya Ci­ don wei yo du, jiji ku pofan’i nyaco i dan ajia yi pajukun. Jiji i dan yibe aji wa yu kuku wa ki cin bu Yesu Kiristi waa Cidon pofan tà yii ra. Ki cin waa mna dan aji ki cin aji waji ra hunnu kan waa be panmi saso jinni ci kara, ⁴ jiji m hun dan aji ki cin’a yi pajukun ki byeya numa, ci tsa­ dzu wa fye ni tsa. ⁵ Ki bye buni waa nima tsa kata ba pajukun baa ngha babe Yesu Kiristi raba ra, ni tsa ba kyinye, nina tsa butso ba apyo waa nima du kata sansan numa. ⁶ Ní zen aji dzu nuni vyavya numa wa fofo ko nukon. Níkà yi nyaco wa sansan numa waa niri zen aji kiyo yi apa wama mbyeni aji kata. ⁷ Tikikus ribi dan yini abu waa m ki fin’a kata. Ku ci wandoi ki nyaco-bu Yesu Kiristi waa ina con ajia ba mikyin dzundzun. Kuna tsa butso bu Cidon ba mikyin dzundzun. Aku bami kata ina kofyin ki dzun tsa butso wa Cindoi Yesu Kiristi. ⁸ Abu wa tsa mna tsonku tson bi ki byeni ra ki cin waa jiji ku dan yini abu waa m ki fin’a kire, kúkà zen gbanni mikyinni yo. ⁹ Unismus wandoi wajinderi, apa wa ki tswen waa ina con ajia ra, ri ba Tikikus kyen dzun bi ki byeni kire jiji be dan yini abu wa dui kire kata. ¹⁰ Aristakus waa be panku saso jinni ki dzun bami kire ra, na nani jen kiyo. Markus waa yakua ki dzun ba Barnabas ra, na nani jen kiyo. M ndi kapyen dan yini aji ki cin’a gbogbo numa ra. Ku­ ma bi zan byeni kire ra, ni panku vo pyinna sansan numa. ¹¹ Yesu apa waa be kari baku zen’a dzun danra Yustus ra, kuna nani jen kiyo du. Abe pajukun baa kwan dzun tsara baakara, be ciri Ya­ hudawa ki fin pajukun baa na bami tsa butso kire ki cin bu ndo tson bu Cidon. Be tsazami yo suu numa. ¹² Abafras apa wa ki tswen kire ra, wa ci nya bu Yesu Kiristi ra, kuna nani jen kiyo du. Kuna pya Cidon na weni yo ko nukon, jiji ni ci byen titi numa ki bye abuu Cidon, jiji ni tsa abu wa vya hwan bu Cidon, ni nde cin na jinni fo tson’a. ¹³ Ami ba dimi, m mbyànu ba zo dimi danra, kuna kofyin suu numa ki cinni pa­ jukun baa ki Kolosi, ba pajukun baa ki Lawudikiya, ba pajukun baa ki Hirafolis. ¹⁴ Luka apa wa dàdo waa ina con ajia ra kwan ba Dimas, bena nani jen kiyo. ¹⁵ Ní nà bandoi baa ki Lawudi­ kiya ra kiyo kata yii, ba awuwa waa beri baku danra, Nimfa waa pajukun baa bà Cidon ri kwan cònbé cin ki ndoa bara. ¹⁶ Ki nya­ ken waa bema hwèn afa wakara yini ma fo ki tsonni ra, níkà hwèn yi pajukun baa ki Lawudi­ kiya be fo numa du. Ani du níkà hwèn afa waa pajukun baa ki Lawudikiya ri nde tson bi yini ra du. ¹⁷ Ní nu Arkibus don danra, ku tsa vinni butso waa Cindoi Yesu Kiristi nde kwaku ki vo dan jiji ku tsa ra. ¹⁸ Ami Bulus mna ta afa waka­ ra ri ba avo dimi na nàni jen kiyo. Níká muji ba waa be panmi nde saso jinni kire raba. Cidon ku sanni sansan.