2 BATASALONIKA

¹ Ami Bulus ba Silas ba Ti moti ina ta afa wakara ri na yini, ani bi bu pajukun baa bà Yesu ki Tasalonika, ani pajukun baa ci abu Atai Cidon ba Cindoi Yesu Kiristi. ² Atai Cidon ba Cindoi Yesu Kiristi ku sanni san san, ku yini mikyin wa na jinni. ³ Bazhenza, ci ken í mbu mikyin ki cinni yi Cidon ko nukon. Fye waa í tsa numa ki cin waa nina yi wajinderi ki bye Yesu Kiristi, nī kana con dini na kwan yo foji wana yaya ki pyen ra. ⁴ Ina zen aji ki cinni caco kiyo ki pyen bu pajukun baa bà Ci don, ki cin waa ni gban mikyin pantse ba gbenni nina yi wajinderi ki bye Yesu Kiristi ki fin afyin baa duni kata ra. ⁵ Wakara tà ki fa byeya numa danra, Cidon ci apa wa gayi kwen ndafan jinni. Ki cin afyin baa ni wa ra, fye waa ní kaya ndo tson bu Cidon. ⁶ Cidon ri tsaa abu wa rimyi ba. Pajukun baa na tani fyin ra, Cidon ri banbe ton yo banban. ⁷ Ani baa na wa fyin hora, anyunu waa Yesu Kiristi Cindoi, ba zhen tsōn bandoa baa gbangban hora ma dzu ki hwadon dzwa jinni ra, niri bi ngha nwo dini, kà kwan bai du. ⁸ Kuri bi ba apyu jiji ku naten pajukun baa sinni Cidon ba pa jukun baa ndebe cinbe na jinni fo aji ki cin bu Cindoi Yesu ba. ⁹ Beri wa fyin wa bwan ji pajukun wa ci kenken numa keke yaya. Beri du be azo bu Cidon ri mbyà ba. Be kari dube gbentsòn’a ki zobe ri mbyà ba. ¹⁰ Anyunu waa kuri ka sen bira, pajukun bandoa kata ri yiku hwe. Ani pajukun baa yi wajinderi ki byea ra kata niri she ashia anyunu waji. Ki cin waa ni yi wajinderi ki bye aji waa ī ndi dan yini ra. ¹¹ Ki cin wakara ina dzwa nde ina pya Cidon weni yo ki cinni ko nukon. Ki cin waa jiji Cidon ku hwa ní tsa abu wa we ba ndeba waa ku bani ra. Cidon ku ga abu baa sansan baa nina nya kata yini. Kú tsa banni abu baa nina tsa kata yo. Kú kwanni wajinderi kiyo. ¹² Jiji ní yi zen bu Cindoi Yesu hwe. Nī kari du ahwè ki dia ki bye wa sansan bu Cidon ba Cindoi Yesu Kiristi.

¹ Bazhenza, ina voni ki cin wa kasen bibi bu Cindoi Yesu Kiristi, ba waa kuri hoi ri kwan dzun ki byea ra. ² Níká yi tuntun ku koni ki mikyin ba. Níká yi mikyinni vyin pukan jinni ki cin aji waa pajukun badati na zen danra, tanma numa anyunu bu Cindoi bayo ra raba. Ko apa dzun ma so dia danra, kuna zen aji bani ki cin waa Denden ta yiku ri, ko apa dzun ma zen aji ba anu yini, ko bema danra, ai ta aji waji ri ki fin afa kire. ³ Níká zen nde fan azo yi apa dzun ku pujini ba, ko kuma tsanini waji kata. Ki cin waa se anyunu bu pajukun baa vyin pukan nyaken yi Cidon ra, ma kapyen tsa nwa dzu ra hunnu. Kati, apa wa tsa abu anwe ra, ri pwadzu ribi, beri bwanku ya kindo. ⁴ Kuna cì dia, kuna so dia danra, ku kagben bu Cidon, ba ko kake kata waa pa jukun ri tu ben jinni wabe har kuna ka yaya ki tan wa wa Cidon kuna she dia danra ku ci Cidon. ⁵ Ayo waa m ndi bani ci tiri ki bye dzundzun ra, m ndi na dan yini aji ki cin abu baakara numa, nī mujini ra? ⁶ Tanma numa ní yinu danra, abu dzun panku so tiri ki jinni ki cin waa anyunu ma bayo ra hunnu kuri pwadzu ribi. ⁷ Aji wa yuyu ki cin adòn wa gbekyankyan ra, na tsa butso ki vo tanma. Ama apa dzun ki tiri pan apa wa gbekyan adon ra so tiri ki jinni. Ayo waa azo bu apa waji ma jan ra hunnu be hun ri fu apa wa gbekyan adon ra ri ta myi ri. ⁸ Ki nyaken wakara Yesu ri ven bwanku ba awo bu anwo wa hoho. Dede waa Yesu ma bi ki bye agbentsòn’a ra, kuri tsa baku caka caka numa. ⁹ Anyunu waji waa apa wa gbekyan adòn ra ma bi ra, kuri bi ba agben bu Shetan. Kuri tsa abu baa kya hozo, ba abu baa ken nwo baa kuri kankan kuri puji pajukun kiyo. ¹⁰ Kuri tsa atswi abu wa baba wani kata jiji kú puji pa jukun baa ri hu jan ba jinni gbo gbo numa, ki cin waa be zenbe nde ba aji bu Cidon jiji be du wa nwàdzudzu ba. ¹¹ Ki cin wakara Cidon ri tson azo abu dzun bi jiji ku nukwanbe fin mikyinbe yo jiji be yi wajinderi ki bye akan wa kankan. ¹² Jiji apa wama ndi zen’ande ba aji wa byenbyen ba, be taku fyin ki cin waa be ndi na foji abu wa ba babe wana tsatsa ra. ¹³ Bazhenza baa concon bu Cindoi, fye waa í mbu mikyin ki cinni yi Cidon ko nukon. Ki cin waa Cidon ndi ceni avo ndi gbo gbo dzu kindo bi, jiji ku nwàdzu ní ba Denden’a wa nyenye, jiji ní ci nyenye numa, ki cin waa nī yi wajinderi ki bye ajia wa byen byen ra. ¹⁴ Ku bani nde bi dzu di bu ajia waa ī ndi dan yini ra, jiji ni du ahwè ki di bu Cindoi Yesu Kiristi. ¹⁵ Ci numa ra, bazhenza, ní pantse ba agben. Abu baa fyenfyen baa ī ndi zen aji ba anu fyen ta yini ra, kwan ba aji baa ī ndi tata ki fin afa fyen ta yini ra ní pan sanbe sansan. ¹⁶ Cindoi Yesu Kiristi ba dia ba Atai Cidon wa con ajii, wa zen gban’i mikyin’i yo keke numa yaya, wa ki bye wa san san’a ku hwa ī ho hwan’i so bye wajinderi ra, ¹⁷ Kú zen gbanni mikyinni yo, ku hwa ní so hwan ki bye abu wa sansan wa tsatsa, ba aji wa sansan wa zenzen.

¹ Bazhenza, ajii wa ken niken ciri, ina voni ní kyepan bai ki bye ndedzwa jiji aji bu Cindoi Yesu Kiristi ku ya pyen mwa mwa jiji pajukun be panku ba ahwè ci tsadzu waa nī panku ba hwe ki byeni kire ra. ² Ní pya Cidon ku nwàdzui ki vo bu pa jukun baa baba, baa nwa nwe hora, ki cin waa bàa pajukun kata yi wajinderi ki bye Cidon ba. ³ Ama Cindoi Yesu ci apa wajinderi, kuri yini tse ba agben, kuri nwàdzuni ki vo bu Shetan. ⁴ Cidon hwa ī yinu byenbyen numa danra, nina tsa abu baa ī ndi nuni dòn kiyo danra, ni tsa ra. ī kana pya danra, niri tsa numa foji wa yaya ki pyen, ⁵ Cin-doi ku tsa ní hwayi ba acon waa Cidon conni ra, kukà tsa ní hwa yi ba agben mikyin waa Yesu Kiristi gban ra. ⁶ Bazhenza, ina nuni dòn ba azen bu Cindoi Yesu Kiristi, apa waa adia ma zen’a hwen wa tsa abu ba, kuma ten’a abe bu abu waa ī ndi fyen ta yini raba, ní gadi ba apa waji. ⁷ Ani ba dini nī yinu danra, ayo waa ī ndi ci bye dzundzun bani ra, ī ndi na tsai abu jadi kiyo ba. San kari ní ten abei ni tsa numa. ⁸ Ī ndi bài buju baba ki vo bu apa dzun ji ba, ama ī ndi kofyin tsa butso ba avo dii anyutu ba afitse ki cin waa jiji iká yini fyin ba. ⁹ Ī ken waa í ndi dan yini danra, ní yii buju jiji í ji. Ama ī ndi tsai numa ba, ki cin waa jiji í tani nyaco waa jiji ní ten abei kiyo. ¹⁰ Ko waa i ndi bani ci tiri ki bye dzundzun ra, ī ndi na nuni dòn danra, apa wa ma zen’ande ba aji bu abu wa tsatsa ba, níká yiku buju ku ji ba. ¹¹ Abu wa tsa ina dan numa ra, ki cin waa ī fo dón bu bandoi badati ki finni danra, adibe zen’a hwen wa tsa abu dzun bu dibe ba, se be ho zobe na so bye abu apa. ¹² Ina nu pajukun baaji dòn bàvo kiyo gbangban numa dan ra, bema jiji Cindoi Yesu Kiristi be bànde ba anube kyoo numa, jiji be tsa butso ba avo dibe, be du buju bu dibe jiji be ji. ¹³ Ba-zhenza, níká nì ba abu wa san san wa tsatsa ba. ¹⁴ Apa wama zen’ande bà abe bu aji waa ī dan ki fin afa wakara ba, ní wà dini sansan ba apa waji. Níká kwan abu dzun ki dzun baku ba, jiji atsenni ku panku. ¹⁵ Ama níká ndeku so ci tsadzu ku ci ajo zeni ba. Ama ni nuku dòn, ní ndeku so ci tsadzu nwuza ki byeni. ¹⁶ Cindoi wa senji mikyin wa na jinni, ku yini mikyin wa na jinni ki bye koke kata ko nukon. Cin doi ku bani ci dzun kata. ¹⁷ Ajen wa nana wa ci kara ami Bulus mna tari ba avo dimi. Wakara ci amàu abu wa tatami ki fin afami kata. Wakara ci nyaco wa ta bu mi hun. ¹⁸ Cindoi Yesu Kiristi ku sanni sansan numa kata ken cin dini.