2 BITRUS

¹ Ami Siman Bitrus nwu anya bu Yesu Kiristi, mka ci fo tson’a kati, mna ta afa wakara ri na yini kata ani pajukun baa wa sansan bu Cidon ba Cindoi Yesu Kiristi apa wa nwàdzui hwa nī yi wajinderi ki bye Yesu Kiristi byenbyen numa ci tsadzu waa ī yi ra. ² Wa sansan bu Cidon ku kwanni kiyo suu numa. Ku yini mikyin wa na jinni, ní yì Cidon ba Cindoi Yesu. ³ Yesu Kiristi ciri apa wa tsa yii bi yì Cidon wa cei danra jiji í du ahwè ki di bu hwea ba abu wa sansan’a wa kagben ra. Ki cin waa jiji í du cindi, í tsa abu wari vya hwan bu Cidon. ⁴ Dzu bye nyaco wakara ku yii abu baaji baa kwakyi ajinderi baakara baa ku ndi genu ki cinbe ra. Ki cin waa jiji ki di bu abu baakara ní nwàdzu ki vo bu abu baa baba baa ki fin tswen wari dzu bye abu wa vyavya wa baba ra. Jiji ní nga tswi mikyin bu Cidon. ⁵ Ki cin wakara numa, se ní so hwan kiyo ní nga jiji ní foji abu wa sansan wa tsatsa kwan bye aji bu Cidon waa nī zen nde yi wajinderi kiyo ra. Ní foji abu wa sansan wa tsatsa kwan yo foji wa yaya ki pyen. Ní nga jiji ní yì abu kwan cin’a. ⁶ Ki nyaken abu wa yìyi wa kwan cin’a ciri, ní pan dini bi dzun sansan. Ki nyaken bu adi wa pan bi dzun sansan, ní gban mikyin pantse ba gben kwan cin’a. Ki nyaken bu mikyin wa gbangban pantse ba gben, níkà tsa abuu Cidon. ⁷ Ki nyaken bu abu Cidon wa tsatsa, abu wa sen kwan yo ciri, ní tsa abu vyon ba dini ci tsadzu nwuza. Ki nya ken bu abu vyon wa tsatsa ba dini, ní con pajukun kata. ⁸ Abu baakara kata ciri atswi abu baa fyeni waa ní tsa hun. Nima foji abu baaji baakara numa wa tsa kwan yo ya pyen ki bye buni waa nima tsa kata kuri dzu cin san san numa. ⁹ Ama apa wama tsaa abu baakara ba, ku ci tsadzu agbànzo wari mbyà kaa abye ba. Ku mujia ba waa be fan abu wa babaa waa ku ndi tsa ra yiku ra. ¹⁰ Ci numa ra, bazhenza, ní nga gbangban numa jiji ní pantse ba gben numa ki cin abu baaka ra. Ki cin waa Cidon bani nde, ku ceni ki cin waa jiji ní tsa abu baaji. Nima tsa tswi abu baaji numa niri koni kwi ki nyaco bu Cidon ba, ko nukon. ¹¹ Ki bye wakara numa hunnu niri hun du nyaco wa kaya ki ndo tson wa ci kenken bu Cindoi Yesu Kiristi apa wa nwàdzui. ¹² Ci numa ra, mri kyepanni yo abu baaji baakara ko nukon. Ko waa nī kapyen yìbe, nikà pantse gbangban numa ki cin bu aji baajinderi byenbyen baa nī yi wajinderi kiyo ra. ¹³ Waa m ci tiri ki ju ki fin tswen kire ra, m mbyà san kari waa mna kyepanni yo abu baakara jiji ní do don tse don. ¹⁴ M yinu danra, nde kire ya pyen ri dedea riba, mri gadi ba fin tswen wakara ci tsadzu waa Cindoi Yesu Kiristi ndi dan yimi ra kyoo numa. ¹⁵ Mri nga dimi jiji m hwa ní kyepan ba abu baakara ko nukon. Ko ki nyaken waa mma hu. ¹⁶ Ī ndi kapyen dan yini aji ki cin waa Cindoi Yesu Kiristi ri kasen bira. Ī kà dan yini aji ki cin bu agben’a. Aji baaji baakara baa ī ndi na dan yini ra, be cibe aji baa pajukun màmá ki mikyin be numa pwadzu ba. Ama ai ba dii pantse numa mbyà hwea ba zoi nu. ¹⁷ Ki bye ayo waa ku pan hwea ba tson ki bye Ata Cidon ra, ī fo nde dzu ki bye Cidon wa ka koke kata ki don bi na zen aji ki cin’a danra, "Wakara ci Nwu wa conconmi, ajia sanmi ki mikyin numa cia wa dandan ba." ¹⁸ Ai ba dii ī fo nde waji wakara ba tson dii ki bye ayo waa ī ba Cindoi Yesu ci bye dzundzun ki cin kwèn bu Cidon ra. ¹⁹ Aji bu abe baa da dòn dan rá, tà yii ki byeya numa kwan yo danra, abu baaji ci abu baajinderi. Nima gon tson fo ajibe, ní gon tsonni waji sansan numa fo ajibe. Ki cin waa ajibe waji ci tsadzu be mu pyu so nase ki fin bye wa na tsuken jinni nde numa keke ya kyabye, Atswí wa te cin byekya ri mbu yafan bye dzwa mikyinni. ²⁰ Abu wa kapyen kata ciri, ní hwa yinu danra, aji waa baa da dòn ndi da dòn ki cin’a be nde ta fin Afa bu Cidon ra, be pwabe hwan ki bye kyinye bube bu dibe numa zen aji waji ba. ²¹ Ki cin waa aji ki cin adòn bu Cidon wa dada dzu foa ki mikyin bu apa numa azota bi fo raba, se Den den bu Cidon ma pwa apa ri ki fin mikyin’a hunnu ri hwa yiku zen aji wa dzu bye Cidon bi.

¹ Andi gbogbo pajukun baa da dòn bu akan do ki fin pa jukun bu Cidon ci tsadzu waa manu baa fyen abuu akan ri bòn kabi ki finni jinna ra. Beri kasen ya ho abu baa fyenfyen baa baba ri fyen ta yi pajukun beri tsababe cindibe yo. Beri tson nutson danra, be yìbe Cindoi wa hwa penrebe ki vo bu abu wa baba raba. Be gbe aji wa ciho numa be dibe ki cin ra. ² Pajukun suu numa ri ten bebe ri tsa abu wa bababe waa bena tsa ra. Ci numa ra, beri hwa pajukun ri zen aji tsaba nyaco bu aji wa byenbyen. ³ Manu baa kankan baaji hora be ho zobe so bye abuu pajukun badati ko nukon. Beri mà aji badati ri kankan beri pujini kiyo. Ki cin waa jiji be du abu ki dini. Cidon ge kwen ki cinbe gbogbo numa ra. Ku mbyā mbyàa dia soso numa ci ju na ge cinbe waa kuri bwan jibe. ⁴ Andi gbogbo dzu jinni bi, zhentsōn bu Cidon baa tsa abu wa baba hora Cidon fan’abe adi tata numa azota ba. Ku tswa suube nyaya ki fin pyu ki kindo ki fin shi baa na tsuken jinni gyu numa. Beri ci bye waji numa ba zo anyunu waa beri fobe kwen. ⁵ Pajukun baa tsa abu wa baba, ku ndi fan’abe numa adi tata azota ba. Ku yi acu ta gbanyo ji hou pajukun baa fobe tson’a ba ra don kata ki fin tswen. Pa jukun baa ku nwàdzube ki vo bu jape waji ra, be ci Nuhu wa ndi na da dòn na dan yi pajukun danra jiji be tsa abu wa sansan numa ra. Ka ba pajukun badati kwan dzun tsupyen. ⁶ Atswen baa beri babe danra, Sodom ba Gomora ra Cidon natenbe ku yi pyu ji tson tsaba tswen baaji jin ni kan tsonpyu kata. Ki bye wa kara ku ta nyaco bu fyin waa kuri ta pajukun baa fobe tson’a ba. ⁷ Ayo waji ku nwàdzu Lot apa wa tsa abu wa sansan. Mikyin bu Lot ndi tsaba jinni ki cin abu wa baba waa pajukun baa tsa abu wa baba ndi ci fin’a na tsa ra. ⁸ Aku Lot apa wa tsa abu wa sansan wakara ku dzo ci fin pajukun baa baba baaji, kuna mbyà abu wa baba waa bena tsa ko anyunu wani ranu. Ku kana fo aji wa baba wana dzu ki nube ranu ba tson dia. Abu waji waa bena tsa ra naku kyin kagben, ki cin waa aku ba dia ku ci sansan numa. ⁹ Abu baakara baa ndi gbogbo ra, tà yii danra, Cidon yì nyaco waa kuri nwàdzu bua ki vo bu fyin wama dube. Kukà yì nyaco waa kuri ta pajukun baa tsa abu wa baba fyin kiyo nu, nde numa ya zan anyunu waa kuri fo pajukun kata kwen. ¹⁰ Tuntun pajukun baa ho cinbe dzo bye abu wa vyavya wa baba waa bena tsa, be kana sinni gbentsòn ra. Manu baa kankan baa ci kara, be zinbe azin bu abu dzun ba, be hwabe ce bu apa dzun ba. Bekà zinbe azin waa be zen aji ki cin bu baa sen hwe ki don béna tsobe ce ba. ¹¹ Ko zhentsōn bu Cidon baa kā manu baaji ba gben pyuu numa ra ma be tsobe manu baa kankan baaji ce ki pyen bu Cindoi ba. ¹² Pajukun baakara na zen aji na tsoce ki cin abu baa be hwà yibe cinnabe ba. Bena pwa hwan tsa butso numa azota. Bena tsa abu ci tsa dzu awī wa hwan waa Cidon màbe ki cin waa apa ku panbe ge bwan dzwan. Beri bwan jibe numa du ci tsadzu awi wa hwan. ¹³ Abwi bu abu wa baba waa be ndi na tsa pajukun ra ri panbe panpan. Pajukun baaji baakara bena con jiji bena tsa abu wari vyabe ki dibe numa vinni ki tswen. Ko anyutu ma bena tsa abu baaji numa. Byecube ki finni gbe tsenni wa panpan beni ki cin, nī bani hwe ba. Be kwan cin ki bye dzundzun bani na ji buju ama be vyin pukan kasen yana byeni bena tsaba dibe ba abu wa baba wari vyabe ki dibe. ¹⁴ Be ci pajukun baa nya agya ki byeya numa, Be tsa abu wa baba tea ki jinni kire ba. Bema mbyà pa jukun baa mikyinbe ci tashuma numa ki nyaco bu Cidon, bena byebe na tsa aso babe. Be lolo hwanbe soso ki bye abu wari vyabe ki dibe numa ko nukon. Be yore aji bu Cidon be dibe ki cin ra. ¹⁵ Be fan nyaco wajinderi ta jinni yana bà nyaco bu Ba laam nwu bu Biyoro wa ndi vya aji bu abu wa dudu ki bye nyaco bu abu wa baba ra. ¹⁶ Ama be ndi gbenku nde ki cin abu wa baba waji. Anyunu waji jakyi wa ri zen’aji bara zen aji yiku anyu nu waji ci tsadzu pajukun. Ku yi apa wa da dòn waji fan abu wana neku ra be jinni. ¹⁷ Manu baakara baa kankan na fyen pajukun bu ra, be ci tsadzu byebo baa ri dzube jape ba. Bekà ci tsadzu afá wari zuzu awo ri sa kafanku jinni soo numa. Cidon mbyā bye wa naken jinni gyu numa nde sobe yo ra. ¹⁸ Bena zen aji jeje numa, bena ndē dibe nya hwan numa azota, Bena nga jiji be bye pan pajukun baa na nga wa pwin dzudzu ki vo bu pajukun baa ki fin abu wa baba ra, jiji be fan dibe numa ki tswen yi tswi bu wa baba wani kata wari vyabe wa tsatsa. ¹⁹ Bena ge pajukun nu dan ra, beri ci byecu bu akù dibe, ama abe ba dibe be ci anya bu abu wa baba. Ki cin waa abu wama ka gben bu apa kata, apa ci anya bu abu waji. ²⁰ Apa wama bi yì Yesu Kiristi wa ci Cindoi, kukà ci apa wa nwàdzui ra, kuma gadi ba abu wa baba wa ki fin tswen wakara wari tsaba apa ra, ki nyaken wa kara kuma kà vyin pukan mikyin’a kasen ya bye abu baa baba ki fin tswen wakara ma panku ma ji cin ki cin’a tiri, ta danra, abu waa ku ki fin’a tanma ra, baka wa ndi kapyen rari hun, ²¹ Ma ci numa anu waa apa ku yì nyaco wa san san kata hunnu ku kasen ya vyin pukan mikyin’a ki nyaken fan aji waa Cidon nuku don kiyo ra, san fo kari waa kuká ndi yìa nyaco wa sansan waji ba. ²² Abu waa pa jukun baakara tsa ra, ki byebe ta danra, anda waa be ka danra, "Abá hwabu kasen ya ngyo hou abu wa hwahwa waji don. Adzù wo nyee dia kà kasen ya dzu nde bye adzo," ra aji wajinderi.

¹ Bandomi baa concon, waka ra ci afa wa kwan pyinna waa m ta yini kara, Ki fin afa baaji baa kwan dzun pyinna baa m ta yini hora, mna kyepanni aji baakara yo, ki cin waa jiji m dado mikyinni so don ní ga aji sansan numa ki cin aji baaji. ² M dan aji ki cin abu baakara numa, ki cin waa mna con ní kyepan ba aji baa pajukun baa da dòn bu Cidon ndi dan gbogbo numa ra. Níkà kyepan ba aji waa Cindoi apa wa nwàdzui ndi nuni don ki cin’a dzu nu bu abe fotson’a baa ku tsonbe bi byeni hora. ³ Abu wa kapyen kata waa ní yì eiri, anyunu wa kennu pajukun ri tsa abu wani kata wari vyabe ki hwanbe, beri vyenni vyon ⁴ dan-ra, "Yesu ndi genu danra, kuri kasen bi, avo jinna ba, Yesu waji kini? Abe bayakui hu ya hwan gbogbo numa ra, ama koke kata cia tiri kyoo numa ci tsadzu waa be ndi mà tswen kan ma tswen kù ra. Abu dzun numa vyin pu kan’a jinni ba." ⁵ Be nghabe bu para numa danra, Cidon ndi zen’aji hunnu ku hun mà bye don ba bye jinni ba. Ku ndi ko jape mbyā abye wa ki myi kiyo. Ta danra bye myi pwadzu fin jape dzu. ⁶ Cidon kà ndi tsa bu tso ba jape ku hwa jape jire fin tswen wa ndi gbogbo don ki bye anyunu wa hun ra. ⁷ Cidon ka ba dia dan aji danra, abye don ba bye jinni waa ina mbyà jinna ka ra, Cidon ri yibe ci numa keke bazo bu anyunu waa apyu ri ji tson koke kata ra. Watoo, anyu nu waa Cidon ri fo pajukun kata kwen, kuri bwanji baa fobe tson’a bara. ⁸ Bandomi baa concon, abu dzundzun numa ki tiri wa fyea waa ní muji baku ba. Abu waji ciri, anyunu dzundzun ci tsadzu anyunu dipa tswanna ndo dzwe ki bye Cindoi. Aju dipa tswanna ndo dzwe ka ci tsadzu anyunu dzundzun ki byea. ⁹ Pajukun ba dati na so danra, Cindoi jadi wa tsa abu waa ku ndi genu ki cin’a danra, kuri tsa ra. Ama cia numa ba, abu wa tsa ra ciri, Cidon na gban mikyin bani ki cin waa ku con’a waa apa dzun ku hu tsaba cin dia jinni numa azota ba. Ku na con jiji ko kani kata ku fan abu wa babaa jinni. ¹⁰ Anyunu waa Cindoi ri kasen bira, kuri bi tsa bwa numa ci tsadzu avyu. Ayo waji pajukun ri fo nde wa gbangban numa, abye hwa cucu ki don ri jan ba jinni ki zo. Abu baa ki don, ba abu baa ki jinni, apyu ri ji tson tsababe jinni kata mburu mburu numa. Afin tswen ba abu baa be tsa so fin’a kata ri tson tsababa jinni. ¹¹ Ci tsadzu waa koke kata ri jan ba jinni ki zo numa ra, abu wa fye kari waa ní tsa, ní ci nyenye numa, ní fan voni ba be ni yi Cidon ki bye abu waa nima tsa kata. ¹² Ní pya jiji ku bi gee ba mbwari, Anyunu waji ci anyu nu waa apyu ri ji tson tsaba abye hwa cucu ki don mburu mburu numa. Abu baa ki don ba abu baa ki jinni apyu ri ji tson tsa babe jinni mburu numa kata. ¹³ Ama í ho hwan’i so bye anuge waa Cidon gei danra, kuri mbyā mà abye wa ki don ba abye wa ki jinni baa ripye ra, waa koke kata wa ki finbe ribi ci sansan numa ndafan jinni. ¹⁴ Ki cin wakara numa, bandomi baa concon, ci tsadzu waa nina ci bazo bu anyunu waji ra, ní so hwan kiyo jiji ní du mikyin wa na jinni ki pyen bu Cidon. Níká tsada abu dzun waa ku mbyà boni kiyo ba. ¹⁵ Ní kyepan abu wa hwa Cin doi mba nyunu wa kasen bibi hwe numa ra ki cin waa pajukun be du nyaco wa nwàdzudzu ki vo bu kwen. Ci tsadzu waa Bulus nwuzai wa concon waa Cidon yiku zobyen ra, ndi tā yini ra. ¹⁶ Ki fin afaa baa ku tā ra kata ku zen aji ki cin abu baakara. Aji badati ki fin afaa baa ji hwayi tutu. Pajukun baa jeje baa pantse kabe ki bye dzundzun kyoo numa raba, be pan cinna bu aji baaji vyin pukan jinni, ci tsadzu waa bena vyin pukan aji badati ki fin afa badati ra. Bena gbé aki na yi dibe hun. ¹⁷ Ama buni ki byeni bandomi baa concon, nī kapyen yì abu baakara gbogbo numa ra. Ci numa ra, ní tsa sansan ki cin waa pajukun baa na tsaba aji bu Ci don ra, bé byeni bé hwa yini kokwi ni ten abebe ki bye ada wa baba waa bena tsa raba, Níká gbè abe ko titi numa ki bye waa nī pantse yo raba. ¹⁸ Ama ní hwe byen pajukun bu Yesu Kiristi Cindoi apa wa nwàdzui ku sanni sansan kwan yo foji wa yaya ki pyen, ní yìku kwan yo foji wa yaya ki pyen, ní yìku kwan yo. Pan kire jinna ya ya ki pyen ahwè ci bua ko nukon. Ku ci numa!