2 BAKORINTOS

¹ Ami Bulus waa Cidon ce nwàmi ci fotson bu Yesu Ki risti, ba nwuzai Timoti ina ta afa wakara ri na yini ani pajukun baa bà Cidon baa ki finka Ko rintos ba tswen baa ki fin jen bu Akaya kata. ² Atai Cidòn ba Cindoi Yesu Kiristi ku yini mikyin wa na jinni, wa sansan ku bani ci dzun. ³ Wa sansan ku kwan Cidon Ata bu Cindoi Yesu Kiristi aku Atai Cidon wari hwi cicii, aku Cidon waa wa tsazaza ri dzu byea ribi ko nukon. ⁴ Kuna yii agben mikyin ki bye tswi fyin wama dui kata, ki cin waa ko tswi fyin wani kata wama du pajukun badati í tsayi wa dan gbanbe mikyinbe yo du. Iri tsa numa ki byé gben mikyin waa ī du ki bye Cidon ra. ⁵ Ki cin waa ī wa za Yesu Kiristi fyin ki dzun ra, ki dia iri du gben mikyin hwe hwe numa. ⁶ Ima wa fyin, ī wa jiji wa tsazazani ba wa nwà dzudzuni, Cidon ma tsazai yo, ku tsazani yo ra du hun waa ní du gben ní pantse gbangban, gban mikyin ba tswi fyin dzundzun waa ī ndi wa ra. ⁷ Ci numa ra ī gei mikyin ki cinni ba, ko titi. Ī yinu danra tsadzu waa nina wa tswi fyin bui waa ī ki fin’a ra bai ki dzun ra, ī yinu danra Cidon ri tsazani yo ci tsadzu waa ku tsa zai yo ra. ⁸ Bazhenza, ī con’i waa í fanni so akon numa ki cin afyin waa ī ndi wa ki Asiya raba. Afyin baa dui kiyo ra kagben dii, ī ndi ga danra iri huhu. ⁹ Ina ga ki fin mikyin’i danra be gei kwen wa ya kindo ra. Abu wa tsa tswi fyin baakara dui numa ra ki cin waa iká zan di ki bye gben di bui ba, ama í zan di ki bye Cidon wari dadze pajukun baa huhu ra. ¹⁰ Cidon nwàdzui ki fin fyin wa con wa bwan’i, kuri nwàdzui ki pyen kire du, ī lolo mikyin’i so dia danra kuri nwàdzui kwan yo tiri. ¹¹ Ani du, ci ken ní pya Ci don wei yo. Numa ra pajukun hwehwe numa ri mbu mikyin yi Cidon ki cin’i. Beri fo danra ī du wa sansan bu Cidon ki bye ayo waa Cidon pan ndedzwa bu pajukun hwehwe numa ra. ¹² Abu dzundzun waa ina caco kiyo ciri, aji wa gaga bui na ta yii ki fin mikyin bui danra byecu bui ki fin tswen wakara ci sansan numa ki pyen bu Cidon ba pajukun bani kata. Ī cii byecu waji numa ki bye kyinye bu pajukun ba, ama ki bye wa sansan bu Ci don. ¹³ Ina ta afa wakara na yini ki cin abu waa nī hwayi maari. Ina ga danra niri mbyà yinu sansan numa. ¹⁴ Andi kapyen ra nī hwa yini ba abu waa ī ndi fyenni ra kacin ba, ama tanma ra ina con ní hwayi sansan numa jiji anyunu waa Cindoi Yesu Kiristi ri kasen bi ra ní fo vya bai ci tsadzu waa ina fo vya bani ra. ¹⁵ M hwayi ba wakara nu kata hunnu m ndi mbyā adi kyon wa kapyen jiji m bi mbyàni jiji ní du wa sansan bu Cidon sen dini dzwa pyinna. ¹⁶ M ndi so danra mri kapyen ban dzu byeni hunnu m hun nwādzu ya ki Makidoni-ya, mma do ki Makidoniya ra mka kasen dzu byeni jiji ní dzo mi tabe wa ya ki Yahudiya. ¹⁷ Tanma mna mbyeni danra ko waa m dan numa ra m ci tsadzu apa wari pukan aji mwamwa? Ko waa m dan numa ra m ci tsadzu apa wa ki fin tswen wa yia Cidon ba, ri dan ra, "M zen nde ra." Mwamwa numa kuka pukan a danra, "M zenmi nde ba?" ¹⁸ Tsadzu waa ci aji wajinderi byenbyen numa danra Cidon ri pukan’a aji bara, ci numa aji baa ī dan yini ra cia aji wa jojo ba. ¹⁹ Aku Yesu Nwu bu Cidon waa nī fo aji ki cin’a ki numi, ba Silas, ba Timoti ra, cia aji wa jojo ba. Ci aji wajinderi ko nukon. ²⁰ Ki cin waa aku ciri apa wa zenmu nuge baa Cidon ge ra kata, Ki bye Yesu Kiristi iri danra, "Ku ci numa", jiji í yi zen bu Cidon hwe. ²¹ Cidon ciri apa wari yii gben mikyin, kuri yii gben mikyin jiji ai kata í pantse gbangban numa ki bye Yesu Ki risti, Cidon ndei ri so jiji í ci pajukun bua, ²² Cidon kyii sin’a ki di, ta danra, ī ci pajukun bua ku yii Denden bua ki mikyin bui wa ta danra kuri yii hwe ki pyen kire. ²³ Aji wa ki mikyinmi Cidon ri zen numi. Ku yinu danra abu wa tsa m bimi ki byeni ki Korin tos bara ki cin waa mká yini fyin ba. ²⁴ Iri con’i waa í teni tete ni yi wajinderi ki cin abu dzun ba. Ki cin waa nī tse ba wajinderi gbangban numa. Ama ina tsa numa ki cin waa ní mbu mikyin.

¹ Ki cin wakara m dan ki mikyinmi danra mri bi kami ki byeni jiji m tsabani mikyin ba. ² Mri ma ndi bi ki byeni tsabani mikyin, ki finni hora akani ribi zen gbanmi mikyin ri ri? Ma nwādzu ba ani maari vinni baa m tsani abu wa pe mikyin ra. ³ Abu wa tsa m ndi ta afa yini ra ki cin waa m ndi conmi waa m bi ki byeni jiji pajukun baa fye wa hwa yi mikyinmi ku mbumbu be bi tsabami mikyin ba. M dan numa ki cin waa m yinu byen byen numa danra, ami ma ci ba mikyin wa mbumbu ani du niri ci ba mikyin wa mbumbu. ⁴ Andi ayo waa m ndi ta afa yini ra, m ndi pe mikyin ken ra, ba nde kuto wa kuku ba janme ki zo, ki cin waa jiji niká pe mikyin ba, ama ní hwayi ba waa mna conni ba mikyinmi kata ra. ⁵ Apa dzun ma tsaba apa dzun mikyin ku tsami ba, ama ku tsa pajukun hwehwe numa ki finni, m danmi danra ani katani ba. ⁶ Atswi apa wakara nàtenten waa badati hwehwe numa ki finni naku ra, mba tiri ra numa. ⁷ Tan-ma ra san kari ní fan abu wa babaa yiku, ní dan gbanku mikyin ki cin waa mikyin wa pepe kuká yi kyin’a gedzu ba. ⁸ Ci numa ra mna voni ní tà yiku danra nina conku. ⁹ Abu waa m ndi ta afa wa hun ra yini ra ki cin waa m ken mba foni m mbyà ko nina gon tson fo tson ba ajimi ko ki bye nyaco wani kata re. ¹⁰ Nima fan abu wa baba bu apa yiku, ami du mri fan yiku. Ki cin wakara apa waa mma fan abu wa babaa yiku, in abu wa baba wama ci waa m fan yi apa ma ciyo, mri tsa numa ki cinni ki pyen bu Yesu Kiristi. ¹¹ Ki cin waa kyinye bu Shetan kuká kagben’i ba, ki cin waa ī yì abu waa kuri con ranu. ¹² Dede waa m fo ki finka Ta ruwasu jiji m dan yi pajukun Aji wa Sansan bu Yesu Kiristi, ko waa Yesu pofan nyaco wa tsa butso ki byeri yimi ra, ¹³ mikyinmi wea ki jinni ba, ki cin waa m dumi Titus nwuzami ki bye waji ba. Ci numa ra se m dan yibe danra mri yami yaya ra, m pan nyaco wa ya ki Makidoniya foji kyon. ¹⁴ Í mbu mikyin yi Cidon ki cin waa ki bye Yesu Kiristi wa ciri akù ken bui wari nde nyaco waa í ji ken bi yii, ai waa iri kwan cin baku ina dan ajia kapyo fye ho bye ra, ajia ci tsadzu abu wa nufyin wa sansan. ¹⁵ Ai pajukun baa bà Yesu Kiristi ī ci tsadzu abu wa nufyin sansan waa Yesu Kiristi nde ri ndafan yi Cidon, ki bye pajukun baa Cidon nwàdzube ba baa ri hu ji jinni ki bye abu wa bababe. ¹⁶ Ki bye pajukun baa jan co ī ci tsadzu abu wa nufyin wa baba ci tsadzu aki. Ama ki bye pajukun baa ba Yesu Kiristi ī ci tsadzu abu wa nufyin sansan wa ci ba cindi. Akani ken ri wa tsa butso wakara? ¹⁷ Ai cii tsadzu pajukun badati hwehwe numa nde aji bu Cidon so tsadzu abu ti wa nde hwen fa hwen kiyo raba. Ama bui iri dan yi pajukun aji bu Cidon ba mikyin wa byenbyen tsadzu waa ku tson’i ra. Iri dan yi pajukun ki pyen bu Cidon ki fin zen bu Yesu Kiristi.

¹ Avo jinna ba, na ta danra ina nyā dii danra ī ci pajukun baa sansan? Ko ina con jiji be ta afa ki cin’i, ko ani ní ta ci tsadzu pajukun ri tsa ra, danra ī ci pajukun baa sansan? ² Ani ba dini nī ciri afa wa nyā shii waa be nde ta so fin mikyinni, jiji ko kani ku yinu, ku tsa yinu. ³ Ci byeya numa danra nī ciri afa bu Yesu Kiristi waa ī ta ba avo dii. Ī tai ba jape kuruma ki cin aban azota ba, ama ba Denden bu Cidon wa ci ba cindi ki fin mikyin bu pajukun. ⁴ Ina dan numa ra ki cin waa í ci ba gben mikyin ki di bu Cidon dzu di bu Yesu Kiristi. ⁵ Ai ba dii ī bàini ba abu dzun wa tsayi butso wakara. Ama abu wa tsayii yo ri dzu bye Cidon bi. ⁶ Aku ba dia hwari hunnu ī tsayi wa nya baa tsa butso bu nuge wa ripye wa ci ba cindi ra. A nuge wa gege wa ripye ra, be tabe ku ki fin afa ba, ama be taku ba Denden bu Cidon ki fin mikyin bu pajukun. Adon baa be ta so fin afa ra, ri gbei ya ki bye aki, ama Denden bu Cidon ri yii cindi. ⁷ Adòn baa Cidon yi Musa ta ki bye aban ra, dede waa Musa gantu dzu ki cin kwen nabi ra zhenzhen Isra’ila mbyà hwe bu Cidon hwehwe numa har be tsa yìbe wa nde zobe dzwa mupyen bu Musa ba, ki cin waa mupyen’a na zun nyanya numa ci tsadzu anyunu, se waa mupyen’a wana zun nyanya ra kasen ba nyaken hunnu be hun mbyà kaaku. In adon baa Cidon yi Musa ba hwe numa ma gbebe ya aki, ⁸ ahwè bu Denden wa nyenye ribi hweka wakara ndo panna ri? ⁹ Dòn baa Cidon yi Musa ra pan pajukun kwen, ko waa ci numa ra ayo waa ku yi Musa adòn baakara pajukun mbyà hwe bu Cidon suu numa. Numa ra dede waa kuri yii Den den bua wari ta danra Cidon ri mbyài danra ī ci pajukun baa sansan ra, ahwe’a ri ka wa ndi rari pyuu numa! ¹⁰ Ci numa ra abu waa be ndi duku ba hwe numa ra nwādzu ra, ahwè wa tanma bwan’a zo wa ndi ra don ra. ¹¹ M dan numa ki cin waa abu wa ndi ci ba hwe hwehwe numa ma kasen ba nyáken, ajinderi abu wa ci kenken kári ba hwe kata. ¹² Ki cin mikyin’i waa ī nde so bye wakara numa, ī ci ba gben mikyin. ¹³ Bui ī cii tsadzu Musa wa be tsuken mupyen bua ba tukpa raba. Ku tsa numa ki cin waa jiji zhenzhen Isra’ila beká mbyà mupyen’a wana zun nyanya raba, har ku zunzun ka sen tswa ji jinni ki byeri. ¹⁴ Be be tsuken azo mikyinbe har jinna ayo waa be mana tsa afá bu nuge wa riko tukpa ra na be tsuken zo mikyinbe be mbyà yibe ba. Se apa wama kwan cin ba Yesu Kiristi hunnu kuri pofanku azo mikyin’a yo. ¹⁵ Ajinderi pan numa keke bibi jinna pajukun mana hwèn aji bu adòn baa Ci don yi Musa ta ra, abu dzun na be tsuken zo mikyinbe tiri. ¹⁶ Ama avo ndi gbogbo Cidon dan ki fin Afaa danra, "Ayo waa apa ma pukan zén’a shon Cidon yo atukpa ra ri pofan jinni." ¹⁷ Cinna bu zen bu Cindoi ciri Denden bu Cidon. Apa wama ci ba Denden bu Cidon ki mikyin’a ku ci byecu bu akù dia ra. ¹⁸ Ai kata baa Denden bu Cidon po fan’i zo mikyin ra, pajukun na mbyài tsadzu abu wa mbyàzo wari tà hwe bu Cindoi Cidon wa ci Denden kuri pukan’i tswi waa kuri con, iri ta hwe bua wa kari foji wa yaya ki pyen ki pyen.

¹ Ki bye wa hwihwi bu Cidon ku yii butso wakara, ci numa ra ī gei kyin ba. ² Ī gadi ba abu wa tsatsa wa yuyu ba abu wa pan tsenni wa tsatsa. Iri byei apa dzun bā, iri pukan’i aji dzun ki bye aji bu Cidon ba. Ama iri fu aji wa byenbyen ra yi pajukun ki byeya numa. Numa ra ko aji waa apa ma ga ki cin’i ku mbyà danra byecui ci sansan ki pyen bu Ci don. ³ Aji wa Sansan bu Yesu Kiristi waa ina dan yi pajukun ra ci kon numa ki bye pajukun baa jan co maari. ⁴ Abu wa tsa be yibe wajinderi ki bye Cidon bara ki cin waa denden wa baba waa pajukun baa ki fin tswen kire ri waku ra be tsuken zo mikyinbe ra. Ku be tsuken zobe jiji beká mbyà yi abye wa yafan jinni bu Aji wa Sansan wari ta hwe bu Yesu Kiristi ba, aku Yesu wa ci Cidon kyoo numa ra. ⁵ Ina dan yií pajukun aji waji ki cin dii ba, ama ina dan yi pajukun danra Yesu Kiristi ci Cindoi. Ai ba dii ī ci anya ki byeni ki cin Yesu Kiristi. ⁶ Cidon danra "Ki bye afitse abyeya ri pwadzu kiyo ya fan bye," ku ciri Cidon wa yi byeyaa yafan bye ki fin mikyin’i ra, jiji ki bye Yesu Kiristi í mbyà yi hwe bu Cidon nyenye numa. ⁷ Ai baa Cidon yii wa sansan’a hwehwe numa ra, ī ci tsadzu ape jen, wakara na ta danra ai ba dii ī cii ba gben dzun ba, ama agben kata ri dzu bye Cidon bi. ⁸ Ko ki bye yo wani ina wa fyin suu numa, ama ī hui ba. Ayo dzun ī ci fin hwan wa pyanpyan, ama ī gei kyin ba. ⁹ Bena tai fyin, ama Cidon pukan’a nyaken yii ba, bena ten’i fo, ama be bwan jii ba. ¹⁰ Ko ayo wani kata ina tswan aki bu Yesu ki dii na kyen jiji pajukun be mbyà cindi bu Yesu Kiristi na tsa butso ki mikyin’i. ¹¹ Ki bye byecui waa ī ci riju numa ki fin tswen kire ci ra, ī ci fin aki ko nukon ki jiji bu Yesu Kiristi, ki cin waa ko ima hu pajukun be mbyà cindi bu Yesu Kiristi ki dii. ¹² Wakara ta danra aki na tsa butso ki cin’i, cindi na tsa butso ki fin mikyin’i. ¹³ Afa bu Cidon danra, "M dan aji ki cin waa m yi wajinderi." Ci numa ra ai ina dan aji du, ki cin waa ī yi wajinderi. ¹⁴ Ī yì Cidon waji nu, wa ba do Cindoi Yesu Kiristi pwadzu ki bye ambi ba cindi ra, kuri doi numa pwadzu ba cindi ki bye dzundzun ba Yesu Kiristi kuri hoi kwan bani kata nu dzundzun ya ki pyen’a. ¹⁵ Abu baakara kata ku tsa jijini ki cin waa jiji pajukun hwehwe numa be du wa sansan wari ka pyo foji wa yaya ki pyen ra. Numa ra pajukun hwehwe numa ri ta mikyin wa mbumbu yi Cidon ki bye hwea. ¹⁶ Ki cin wakara ko anyunu wa kini ī gei mikyin ba, ko waa agben dii na kasen ba nyaken ridan ridan tsadzu iri huhu ra, ama ki mikyin’i jinna ba kyen ina du gben mikyin wapye. ¹⁷ Afyin wa titi wari bi tsa fe numa ra ri gbe hwe hwehwe numa wa ci kenken ribi yii wa kagben fyin waji. ¹⁸ Ki cin wakara ī loloi hwan’i so bye abu waa iri mbyà ba azo tanma ba, ama ki bye abu waa iri mbyà kai ba. Abu waa apa ri mbyàka ba zoa ri cifo titi numa vinni, ama abu baa apa ri mbyà kaa be ba azo ba, ri ci kenken ko nukon.

¹ Ī yinu danra adii waa í ci baku ki fin tswen kire ra ri dzu hún hun ki jinni ci tsadzu atan waa ī ci kiyo anyunu dzun kuri gban dzu hun jinni ra. Ama Cidon myi atan wa ci kenken ki ndoa ki don soi yo. Atan waji apa myia ku myimyi ba vo ba. ² "Tanma ī ci ki fin tswen ra ina kundekuto, ina con ba mikyin’i kata jiji í kà ki atan bu Cidon wa ki don waa ku myi soi yo ra. ³ Anyunu waa ima hu aki iri nyanii atan waa iya ka kiyo ki ndo Cidon ba, iri cii tsadzu apa wa ci nwo rinyi azota numa ba. ⁴ Ayo waa adii ci tiri riju ki fin tswen wakara ina kundekuto ba mikyin wa pepe. San kari waa í hu í gadi ba dii wa huhu wa ki fin tswen wakara, ina con í du cindi wa ripye wari hua ba, a cindi wari ci kenken ko nukon. ⁵ Aku Cidon ba dia tsai ri jiji í vyin pukan numa, ku yii Den den’a wari ta yii abu kata ki pyen kire. ⁶ Ki cin wakara ī ci ba gben mikyin ko nukon. Ī yinu danra adii waa ī ci baku ki fin tswen wa ci kara anyunu ma mbaa raba iri ci tiri ki fin tswen wakara iri cii ba Cindoi Yesu Kiristi ki dzun ki ndo Cidon ki don ba. ⁷ Ki cin waa ina tsa abu bui ki bye abu waa ī yi wajinderi kiyo, cia abu waa ī mbyà ba azo ba. ⁸ Ī ci ba gben mikyin waa í hu fan ndo bu dii ra jinni, í ya ci ba Cidon ki don ki ndoa. ⁹ Abu wa sansan kari kata ciri í tsa abu wa vya hwan’a ko ki ndoa wa ki bahun. ¹⁰ Ki cin waa ai kata iri ya pantse pyen bu Yesu Kiristi kuri foi kwen. Ko kani kata ri ya pan vokwin’a mbamba nu bu waa ku tsa ki fin tswen, ko wa sansan, ko wa baba. ¹¹ Ī yì cinna bu azin bu Cidon wa zinzin nu, ábu wa hwa ina nga jiji í gbe pajukun badati bi bye Cidon ra. Cidon yì byecui waa ī ci nu byenbyen, ami mna ga danra ni yì cinna bu byecumi waa m ci nu du. ¹² Har jinna ī con’i waa ī nyā dii ki byeni ba, ama ina yini apyo wa caco ki cin’i jiji ní zen aji yi pajukun baa ri caco ba abu waa be mbyà ki di bu apa, ama be cabe co ba abu wa ki mikyin bu apa ba. ¹³ Ima ci pajukun baa kyakya ī kya jiji bu Cidon, ima cii pajukun baa kyakya ba, ī tsa numa jijini. ¹⁴ Acon bu Yesu Kiristi na tsa tsòn ri ki cin’i. Numa ra, ī yinu danra apa dzundzun hu aki ki cin bu pajukun kata ci numa ra pajukun kata hu aki. ¹⁵ Ku hu aki ki cin bu ko kani kata ki cin waa pajukun baa riju hora beká ci byecu bu dibe ba, ama be ci byecube jiji aku wa hu aki wa do don ba cindi jijibe ra. ¹⁶ Ci numa ra pan kire ya ki pyen iri mbyài byecu bu apa ba azo waa pajukun ri mbyà raba, ko waa andi ī mbyà byecu bu Yesu Kiristi ba azo bu pajukun baa ki fin tswen, tanma ra iri mbyài ku numa riba. ¹⁷ Ci numa ra anyunu waa apa ma kwan cin ba Yesu ku kan apa wa ripye ra, mikyin wa riko jan ra, mikyin wa ripye za yo ra. ¹⁸ Abu wakara kata ci butso bu Cidon. Cidon hwa í ban vyon baku ki di bu Yesu Kiristi, ku yii butso waa í nyà pajukun be bi ban vyon ba Cidon. ¹⁹ Ki di bu Yesu Kiristi Cidon ri ba pajukun baa ki fin tswen wakara nde be bi ban vyon baku, numa ra ku hwèn’a kwe bu abu wa baba waa be tsaku ra riba. Kukà yii butso waa í dan yi pajukun aji ki cin vyon wa banban baku. ²⁰ Ci numa ra, ai ci fotson bu Yesu Kiristi wa bi ki byeni. Ci don na bani nde ki bye aji bua waa ī fyen ta yini ra. Ki fin zen bu Yesu Kiristi ina voni ní ban vyon ba Cidon. ²¹ Ki cin’i Cidon hwa Yesu kan apa wa tsa abu wa baba ko waa ku tsaa abu wa baba dzun bara, ki cin waa jiji í bà ki dia í kan pajukun baa san san ki bye Cidon.

¹ Ki bye butsoi ki dzun ba Ci don ina voni ani baa pan wa sansan bu Cidon ra niká panku dan numa ba. ² M dan numa ki cin waa Cidon dan ki fin Afaa danra, "M gon tson foni ki bye ayo waa ni du mupyen wa sansan ki byemi, m tsazani yo ki bye anyunu waa m nwàdzuni." Ní gon tson ní fo, tanma ciri ayo waa niri du mupyen wa san san bu Cidon. Jinna ciri anyunu wa du nyaco wa nwàdzudzu! ³ Ī con’i waa apa dzun ku mbyà boi ki bye butsoi waa ina tsa raba, ci numa ra i con’i wa tsuken apa dzun nyaco bu Cidon ba. ⁴ Ama ki bye abu waa i mana tsa kata ina ta danra ī ci zhen nya bu Cidon, ki bye fyin tswi tswi waa ina wa ra ina gban mikyin, ko dede wani waa afyin tswi tswi ma dui, ko kake ma tsari iri pantse gbangban numa. ⁵ Be dai gba, pajukun na kya ajinu ki cin’i suu numa, ī dui pyo waa í ngha nwo ba, i dui buju wa jiji ba. ⁶ Ī kà ta wajinderi byenbyen numa ki bye byecu wa ci nyenye, ba ayì ba mikyin wa gbangban, ba wa san san’i, ba Denden wa nyenye, ba acon wajinderi byenbyen numa. ⁷ Ki bye ajii wa byenbyen waa iri dan yibe, ba pan tsetse waa ī pantse ki bye gben bu Cidon. Abu wa sansan wa we hwan bu Cidon waa ina tsa ra ci atswen ken’i hun. ⁸ Anyunu dzun bena yii tsenni anyunu dzun beri tsoi ce, anyunu dzun beri nyāi. Pajukun ndei so tsadzu ī ci pajukun baa kankan, ama aji bui ci aji byen ko nukon. ⁹ Pajukun ma mbyài be nde zobe ta hun tsadzu be mbyà yii ba, ama pajukun kata yii nu. Pajukun na dai gba, ama be da bwan’i ba, be mbyài tsadzu ī huhu numa ci ki zobe, ama ní mbyài ī ci riju foji wa yaya ki pyen. ¹⁰ Ko waa bena yii mikyin wa pepe ra, ina mbu mikyin ko nukon. Ī ci pajukun baa tsa hwen ama ina yi pajukun suu numa na fa hwen, ko waa ī cii ba abu dzun bara, ki bye Ci don ī ci ba koke kata. ¹¹ Bazhenzami baa ki nyaco bu Yesu Kiristi baa ki Korintos i dan ta yini aji pofan fin mikyin’i kata yafan jinni yini. ¹² ī tsuken’i fin mikyin’i ki byeni ba, ani ciri baa tsuken’i fin mikyinni yo. ¹³ Ama mna con m dan aji bani tanma ci tsadzu nī ci zhen baci baa titi. Ci tsadzu waa i ta yini con ba mikyin’i kata ra, ani du ní ta yii con ba mikyinni kata. ¹⁴ Niká kwan cin ba pajukun baa yibe wajinderi ki bye Cidon ba. Tsanini abu wa sansan, ba abu wa baba ri kwan tswi? Tsa nini abye wa yafan jinni ba afitse ri kwan tswi? ¹⁵ Tsanini Yesu Ki risti ba Shetan ribi ji vyon? Akake kwan apa wa yi wajinderi ri, ba apa wa yia wajinderi ba? ¹⁶ Akake kwan atan wa wa Cidon vyon ri, ba aki? Ai ciri atan wa wa Cidon wa riju, ci tsadzu waa Cidon ba dia danra, "Ami Cidon mri babe ci bye dzundzun, m tsa àfá numa ki yobabe, ami mri ci Cidon bube, abe beri kan pajukun bumi." ¹⁷ Cindoi Cidon ka danra, "Ki cin wa ci kara mna dan yini ní pwadzu ki finbe ní gadi babe, niká tsa abu dzun wa ci aso ba. Numa mri zen nde bani, mri panni ba mikyin dzundzun." ¹⁸ Ami Cindoni Cidon wa ci ba hwe kari kata, m danra, "M ciri Atani, ani niri kan zhenzhenmi bawunu ba bawuwa."

¹ Bazhenzami baa ki nyaco bu Yesu Kiristi baa mna conni ba mikyin dzundzun, aji baa m dan hora, ciri nuge wa gege waa Cidon ge bai ra. Ci numa ra í tsonye abu wa baba wa ki fin mikyin’i wari hwa adii ba denden’i ci nà jín numa ra. í nga í ci nyenye numa dzu don dzwa dzwa ki jinni. Ki bye byecu waa í ci í zin zin bu Cidon. ² Nī ta yii con ki fin mikyinni. ī tsai apa dzun abu wa baba dzun ba, ī tsabai cin bu apa dzun ba akan wa kankan ba, ī pujii apa dzun ba. ³ M danmi aji wa kara ki cin waa m mbyà boni ki cin abu dzun ba, ki cin avo ndi gbogbo m ta afa yini danra ina conni ba mikyin dzundzun. Ko ima huhu, ko ima ci tiri riju iri ga kai di ba dii ba ko nukon. ⁴ M yi agben ki dini ken ra ko nukon. M mbu mikyin ki cinni, m yi gben mikyin ki dini cia wa dan dan ba. Ko waa ina wa fyin ki cin numa ra, m ci ba mikyin wa mbumbu cia wa dandan ba. ⁵ Ko ayo waa ī ndi bi zan ki Makidoniya ra ma, ī dui apyo waa í ngha nwo dii ba. Pajukun baa yibe Cidon ba, na gbende bai na tai fyin ki bye nyaco wani kata, azin na pan’i ki fin mikyin’i! ⁶ Ama Cidon wari yi apa wa zinzin mikyin wa gbangban ra, se ku yii gben mikyin ki bye akyon waa Titus bi zan ra. ⁷ Cia akyon wa bibi bu Titus maari vinni ba, ama dede waa ī fo ki nua danra nī dan gbanku mikyin ra, ai du ī du gben mikyin. Ku dan yii danra nina con ki fin mikyinni ní mbyà zomi, kukà dan yii tswi mikyin wa pepe waa ni ci baku ki cin abu waa nī ndi tsami, ama tanma numa nī zen nde bami danra niri tsa koke kata wemi yo ki nyakenmi, waa m fo numa ra, m mbu mikyin suu numa ka wa ndi gbogbo rari nana numa. ⁸ Ko ki bye afa wa hun waa m ndi ta yini ra, aji waa m dan kiyo ra, yini mikyin wa pepe, andi kapyen ra m pe mikyin du, ama tanma ra m pemi mikyin ki cin afa waji ba. M yinu danra aji waa m ndi ta yini ra, yini mikyin wa pepe, ama cia fo anyunu suu numa ki fin mikyinni ba. ⁹ Tanma numa m ci ba mikyin wa mbu mbu ama cia ki cin waa m ndi hwa yini pe mikyin ba, ama ki cin waa mikyin wa pepe buni gbeni vyin pukan mikyinni bi ki bye Cidon. Ki cin waa nī pe tswi mikyin waa Cidon ri con. Ci numa ra, nī nyani ní abu dzun ki bye afa waa ī ta yini raba. ¹⁰ Tswi mikyin wa pepe wari dzu ki bye Cidon wari hwa apa ku pukan mikyin bi ki bye Cidon, ci numa ra, apa waji ri pea mikyin riba, ama tswi mikyin wa pepe wari dzu ki fin tswen wakara ri gbe aki ri yi apa. ¹¹ Ní mbyà abu waa Cidon tsa ki bye mikyin wa pepe buni ra, nina so hwan kiyo jiji ní bà Cidon ba mikyinni kata ní mbyàyi abu wa babani nu, nina con ní vyin pukan mikyinni, mikyinni tsaba jinni suu numa ki cin abu baa baba waa nī tsa. Nina she zen bu Cidon, nina con ba mikyin jiji m bi ki byeni m mbyàni, nina con jiji ní tse ba wajinderi buni, ní tsa koke kata we hwan bu Cidon. Abu baa nī ndi tsa hora kata ni mbyā sanbe ra, nī ta dini danra nī bàni nī ba ada dzun ki cin bu aji wa ci kara. ¹² Ci numa ra, ko waa m ndi ta afa kapyen yini ra, m tami afa waji ki cin waa mna mbyà bou apa dzun ba, ko be tsa apa dzun abu wa baba ba, ama ki cin waa jiji ní mbyàyi acon waa nī ci baku jijii ki pyen bu Cidon. ¹³ Ábu waa ī du gben mikyin ra hun. Cia agben mikyin azota vinni ī du ba, ama ayo waa ī du Titus, ī fo danra ani kata nī tsazaku yo jiji ku du mikyin wa na jinni, ī mbu mikyin kari wa ndi gbogbo! ¹⁴ Waa m zen aji ba Titus ra, m caco ki cinni. Nī tsa cimi ba. Abu baa ī dan yini ajinna ba akyen hora kata ci ajinderi, ka ci numa acò waa ī ca ki cinni duzo bu Titus ra ta danra ci ajinderi. ¹⁵ Ci numa ra, waa ku kyepan nī gon tson fo aji bua, nī panku ba mikyin dzun dzun, ba azin wa zinzin, ba adi wa vonvon, acon waa ku ci baku ki mikyin jijini ra foji wana kwan yo yaya ki pyen ki pyen. ¹⁶ M mbu mikyin kagben ki cin waa m zen nde bani kagben.

¹ Bazhenza, ina con í dan yini ní yì abu waa wa sansan bu Cidon tsa ki cin bu pajukun baa bà Cidon baa ki Makidoniya. ² Be ken mba fobe ba tswi fyin baa sepyu suu numa, ama ko waa bena wa fyin ra, be foji cucu wana cucu. Ko waa ahwen tsabe kagben ra be kwan abè tafan vo hwehwe numa jiji be tsaza bazhenzabe yo hwehwe numa ba avo wa pofanfan. ³ Ki cin waa m yinu byenbyen numa danra be yi abè ra mbamba gben dibe har tsadzu bé nde cin dibe yi kwan yo. ⁴ Be voi bavo kiyo danra í gbagba í hwènbe ki fin pajukun baa ri kwan vo ri tsaza pajukun baa tsa hwen baa ki fin jen bu Yahudiya. ⁵ Abu waa be tsa ra, ī gai aji ki cin’a danra beri tsa hwe numa ba. Ki cin waa wa kapyen be fan dibe yi Cidon, kati, ki bye mikyin bu Cidon bekà fan dibe yii tsazai yo. ⁶ Ci numa ra, ī vo Titus wa kapyen jo nwo butso wakara jiji ku foji wa tsa numa yaya ki pyen jiji ní tsa vinni butso bu con mikyin wakara. ⁷ NĪ fa hwen kagben ki bye abu waa nī ci baku kata. Nī ci ba wajinderi, nī zen yì aji nu, nī ci ba ayì, ba ngangani waa nina nga nī tsaza, ba acon wa ki fin mikyinni jijii, ci numa ina con ní yi abu pofan voni ki bye butso con mikyin wakara. ⁸ Aji waa mna dan ra, cia adòn dzun mna kan soni ki jinni ba. Ama ki bye wa ngangani pajukun badati ma mbyà numa beri tsaza. Mna nga jiji m mbyà yinu byenbyen numa cinna bu acon waa nī ci baku, ⁹ Ki cin waa nī yì wa sansan bu Cindoi Yesu Kiristi nu. Ku ci apa wa fa hwen numa cia wa dandan ba, ama ku fan dia kan apa wa tsa hwen ki cinni, jiji ahwen waa ku tsa ra ku hwa ní fa hwen. ¹⁰ Acé wa gengen bumi ki cin aji waji ci kara, san kari ki byeni tanma ní tsa ban abu waa nī ndi jo nwoa aju wa hun ra. Nī cini baa ndi kapyen gbè aji bu abu wa tsatsa vinni ba, ama nī ndi kapyen ri tsa. ¹¹ Tanma ra san kari ní tsa vinni abu waa nī ndi kapyen jo nwoa ra mbamba gben waa nī ci baku. ¹² Nima ci ba mikyin wa yi abu, Cidon ri pan abu waa nī yi ra kuri wezo mbyàa abu waa nī ci baku, kuri mbyàa abu waa nī nyani baku ba. ¹³ M conmi waa ní ho afyin kata ngye dini yo ní fan pajukun badati ci numa azota ba. ¹⁴ Ama ní gafan koke kata mba dzun mbamba nu gben dini. Ama ci tsadzu waa tanma numa nī ci ba abu ki vo, bube be babe abu dzun ki vo ba, san kari ní tsazabe yo. Numa anyunu wa kyen bema du abu ki vo, nima nyani bé tsazani yo numa du jiji koke kata ku mba dzun. ¹⁵ Ci tsadzu waa Cidon dan ki fin Afa bua danra, "Apa wama kwan bu suu numa ri kaa gben’a ba. Apa wama kwan bu titi numa ri zoa kagben ba." ¹⁶ Ina mbu mikyin yi Cidon suu numa ki cin waa ku tsa mikyin bu Titus we dzun ba bui, kuna con ku tsazani yo ci tsadzu waa ina con í tsa ra. ¹⁷ Ayo waa ī voku danra ku bi ki byeni ra ku zen nde ba mikyin dzundzun, ávo waa ī ndi tson’i ku tson waji raba aku ba dia ma na con wa bibi ki byeni. ¹⁸ Ina tson nwuzai wa dzun waa pajukun baa bà Yesu ko kini kata na yiku hwe ki cin butso waa kuna dan Aji wa Sansan bu Yesu Kiristi na yi pajukun ko kini ra. ¹⁹ Cia wakara maari vinni ba, ama pajukun baa bà Yesu ko ki bye wa kini kata ceku jiji ku bai kyen dzun na ya tsa butso bu san hwan bu Cidon waa ina tsa. Ina tsa butso wa sansan wakara ki cin waa í ta yi pajukun hwe bu Cindoi Yesu Ki risti, í kà ta yibe danra ina con í tsazabe yo. ²⁰ Ina tsa koke kata sansan numa ki cin waa apa dzun kuká bi mbyà boi ki cin avyon wa vyonvyon waa pajukun yi tafan vo hwehwe numa jiji í ho ya yi pajukun baa tsa hwen hora ba. ²¹ Mikyin bui ciri, í tsa koke kata ndafan jinni sansan numa. Cia ki pyen bu Cindoi Yesu Kiristi vinni ba, ama kwan ba pajukun kata. ²² Ci numa ra ina tson nwuzai kyen dzun babe bi byeni. ī ken mbafo nwuzai waji ki nyaco tswi tswi, ī mbyà ku ci ba mikyin wa tsazaza ma kwankwan kiyo. ²³ Titus ci jo bu tsomi, butsoni waa ina tsa dzun ra ki cin waa jiji í tsazani yo. Bazhenzai badati baa ri baku kyen dzun bi ra be ci azo bu pajukun baa bà Yesu Kiristi ki bye wani kata, bena yi Yesu Ki risti hwe. ²⁴ Ci numa ra, ní conbe jiji pajukun baa bà Yesu Kiristi ko kini kata be yinu ajinderi byenbyen numa danra ina caco ki cinni ra, ī ca mba tiri coa.

¹ Cia ken se m ta afa tata yini hunnu ní hun tsaza pajukun baa ki Yahudiya ba. ² M yinu danra nī ci ba mikyin wa tsazabe yo. M caco ki cinni suu numa yi pajukun baa ki Makidoniya dan ra, "Ávo ju wa hun bazhenzai baa ki tswen wani kata ki Akaya zen nde waa be kwan abè." Ki bye nganga buni waa nī nga ra dado bazhenzai baa ki Makido niya mikyin waa be tsaza pajukun baa tsa hwen yo du. ³ Tanma numa mna tson bazhen za baakara bi ki byeni jiji be mbyà danra acò waa mna ca ki cinni danra, nina kwan abè ra kuká ci aji wa nya hwan azota numa ba. Ama mna con be mbyà danra aji waa m dan ki cinni ra ci aji wa byenbyen. ⁴ M dan numa ki cin waa nima kwanni abè waji ba, pajukun badati bu Yesu Kiristi ma bami kyen dzun dzu ki Makidoniya bi tsenni ribi pan’i kagben, ki cin waa ī yi gben ki dini nwādzudzu. ⁵ Í mbu mikyin yi Cidon ki cin avyon wa vyonvyon waa kuri vyon apa baanu bara. ⁶ Ní kyepan ba aji wakara. Apa wama tà atswi za titi kuri ben aza titi numa. Apa wama tà tswi za suu kuri ben za suu numa. ⁷ Ko kani kata ku yi abu waa mikyin’a dan yiku danra ku yi, kuká pan pyin kiyo dzwan vo ki nyi ci tsadzu be teku tete ba, ki cin waa Cidon ri con aji bu apa wari yiku abu ba mikyin wa mbu mbu. ⁸ Cidon tsayi wa yini abu nwādzu ba abu waa niri nyà jiji ní ci ba koke kata ku kenni ken ken ko nukon. Numa ra jiji ni ten dzu kiyo tafan vo hwehwe numa tsaza ki bye butso wa san san wani kata kiyo. ⁹ Tsadzu waa be ta ki fin Afa bu Cidon danra, "Ku yi pajukun baa tsa hwen abu tafan voa, abu wa sansan waa ku tsa ci kenken ko nukon." ¹⁰ Cidon ciri wari yi apa wa nane atswi za wa tata, kuri yi apa buju wa jiji ri. Cidon ciri wari yini abu waa niri nyà, kuri yi abu waji ku fifi yaya ki pyen ko nukon. Kuri tsaza pajukun badati ki cin mikyin wa sansan waa be ci baku ra. ¹¹ Ci doa ri yini du abu mu voni suu numa ki cin waa ko ayo wani nina tsaza pajukun badati yo. Ki bye abu waa niri yi pajukun tafan avo ra, ri ciri nwo abu wari hwa pajukun hora ri ta mikyin wa mbu mbu yì Cidon ki cin abu waa iri nde yibe ra. ¹² Ki cin waa ki bye butso wa tsazaza wakara na tsazaa pajukun baa yì Cidon maari vinni ba, ama pajukun badati hwehwe numa ri ta mikyin wa mbumbu yi Cidon cia wa dandan ba. ¹³ Ki bye butso wa sansan waa niri tsa ra, ri ta danra nina yi wajinderi ki bye Aji wa Sansan bu Yesu Kiristi, nina gon tson na fo aji bua. Ki bye abu waa nī ci baku kata niri yi pajukun tafan vo hwehwe numa ní tsaza pajukun hora yo, ba ko apa wama kini kata du. ¹⁴ Ci numa ra beri pya Cidon weni yo ba con hwehwe numa ki fin mikyinbe ki ein bu wa sansan waa Cidon yini cia wa dandan bara.

¹ Ami Bulus ba dimi mna voni ní gbagba ki di bu Yesu Kiristi wa nde cin’a na jin ni wa ci ba mikyin wa sansan ra. Ami waa ayo waa mma bani ci dzun mna danra m ci apa wari nde cin na jinni, m ci apa wa ci ba mikyin wa tashuma, ama ayo waa mma gadi bani ya ci bye dzun numa mna zen aji ba gban numa ki cinni. ² Ní gbagba ayo waa mma bi ki byeni ra niká temi jiji m zen aji ba gben ba. M yinu byenbyen numa m tsayi wa zen aji ba gben numa yi pajukun badati ki finni baa na danra abu waa ina tsa ra ina nya abu wa ki fin tswen azota. ³ Ko waa ī yinu danra ī ci fin tswen kire, ama aken waa ina nu ra, ina nui ki cin waa jiji ī du abu wa ki fin tswen kire ba. ⁴ Atswen bufó baa ina nuken waji baku ra, cia tswen bufó baa beri nuken wa ki fin tswen kire baku raba, ama atswen bufo bui waa ina nuken kiyo ra ci agben bu Cidon waa ina bwan abu wa baba bu She tan wa ci ba gben. ⁵ Pajukun baa ri ye ayepye ina panbe ba aji, abu waa pajukun ma nde so na caco kiyo be tsukenbe azo waa be yì Cidon, iri da gbànku nya jinni. Iri nuken ba aji wa baba wa gaga ki mikyin bu apa jiji ku nde cin’a na jinni yi Yesu Kiristi. ⁶ Ayo waa nī zen nde fan voni ba abeni kata yi Yesu, ki nyaken nima gban cin iri na tenni. ⁷ Ní wezo ki pyen ní mbyà. Apa dzun ki finni mana so dia danra ku ci apa bu Yesu Kiristi, ku kye pan, ci tsadzu waa ku yinu byen byen numa danra ku ci apa bu Yesu Kiristi ra ai ma ī ci numa du. ⁸ Ko mma caco ba agbentsòn waa Cidon yii ra ki byeya numa cia abu wa pan tsenni ki byemi ba. Ki cin waa agbentsòn waa Cidon yii ra, ku yii ki cin waa í myini myimyi, bà ki cin waa í dā gbanni da gban gban ba, ⁹ Aji baa mna ta ki fin afa wakara niká ga danra mna con jiji m hwani azin ba. ¹⁰ Ki cin waa badati ribi danra, "Aji wa ki fin afa bu Bulus ra tutu gban kpo kagben, ama apa ma mbyàku ki zo numa ku ci byebye numa zen aji dzu nua dzu tashuma numa." ¹¹ Tswi pajukun baakara bé hwayi sansan danra aji baa ī ta ki fm afa ra ī ci ki bye dzun ta, ayo waa ima bi ki byeni ra iri tsa butso babe numa, ¹² Ī con’i waa ī nde dii hwà ba pajukun badati baa na nyā dibe hora ba! Bena zama ba dibe bena son hwe ba dibe. Be je kagben. ¹³ Ama bui iri cai co wa nwādzudzu ba, iri cacoi kata te bye waa Cidon yii tsa butsoi teyo vinni. Ani pajukun baa ki Korin tos ni ci ki fin bye waa ī tsa butsoi kiyo du. ¹⁴ Ai ciri pajukun baa kapyen bi ki byeni dan yini Aji wa Sansan bu Yesu Kiristi. Ani ci dzundzun ki fin tswen waa Cidon yii danra í tsa butso kiyo. Akyan Cidon rima kyan danra iká tsa butso ya zan ki byeni ba, iri kyan danra ī tsa butso nwādzu ba ashe ra hun. ¹⁵ Tswen baa Cidon yii tsa butso zan yo bara, iri nyāi dii ki cin butso waa pajukun badati tsari ki bye waji ba, Ama ina con wajinderini ku gban foji wa yaya ki pyen ki pyen, ina pya danra iri tsa butso kari wa ndi keke ki finni ya ki pyen ki bye waa Cidon yii danra í tsa butso teyo ra. ¹⁶ Ci numa anyunu dzun iri nwādzuni ya ki tswen badati í ya dan Aji wa Sansan bu Yesu Kiristi. Butso waa apa dzun ma kapyen tsari iri con’i waa í nyā dii danra ī tsari ba. ¹⁷ Be ta ki fin Afa bu Cidon danra, "Apa wama con wa caco, ku caco ba abu waa Cidon tsa." ¹⁸ Apa wama ri caco nyā dia pajukun ri zenbe nde baku ba, se apa waa Cidon ma caco ki cin’a nyaku.

¹ Nima zen nde, ní gbagba gon tson fo ajimi wa jeje wakara. Ní gbagba! ² Mna fifi ki cinni ci tsadzu waa Cidon na fi ra. Nī ci tsadzu nwu mafan wa wuwa wa ci tiri kon waa m genu danra mri ndeku yi awunu dzun dzun maari vinni ki ndo aben, apa waji ciri Yesu Kiristi. ³ Ama mna zin zin ko pajukun ribi dzoni aji baa baba ki fin mikyin ni ní she kasen ba nyaken ki bye Yesu Kiristi nibi nghani wa bàku byenbyen ci tsadzu waa anyo ndi bye Awa ba akan wa kankan ra. ⁴ Apa dzun ma bi ki byeni ma dan yini danra aji waa kuna dan yini ra ci aji bu Yesu Kiristi, ama Aji waji ma dzu ken ba Aji wa Sansan bu Yesu Kiristi waa ī ndi dan yini ra ko nima pan denden dzun ken ba waa nī ndi pan ra, ko nima pan Aji wa Sansan dzun ken ba waa nī ndi pan ra, har nī panku ba vo pyinna kata, ci abu wa ken nwo. ⁵ Pajukun baa nina mbyàbe danra be ci "Fotson" baa kari kata ra, mna ga danra, be kenbe jomi ba, ko dzundzun. ⁶ Ko mma zen yimi aji ki nu kacin ba, m yinu danra m ci ba ayì bu aji bu Cidon. Ko ki bye nyaco wani kata ī dan ta yini aji ki fa byeya numa ki cin koke kata. ⁷ Ayo waa m ndi dan Aji wa San san bu Cidon yini ra m gemi abu dzun wa hwa jinni yini ba. M nde cinmi na jinni yini ki cin waa jiji ní ci ba hwe. Waa m ndi tsa numa ra, m tsa ada? ⁸ M gbàn pajukun baa bà Cidon ki bye badati nyaco ki bye nyaco waa m du wa tsazaza ki byebe tsa butso ki byeni ra? ⁹ Ayo waa m ndi bani ci bye dzundzun ra, m kàmni ki di danra ní yimi abu dzun ba, ko waa m ndi na con abu dzun ra, ki cin waa bazhen zami baa ki nyaco bu Yesu Kiri sti baa ki Makidoniya ndi biri ki byemi kire yimi abu baa mna eon kata, m nyanimi abu dzun ba. Avo ndi gbogbo nwādzu ya ba nyaken; pan numa keke yaya ki pyen kire, mri kàmi apa dzun ki di ba, ¹⁰ Waa aji wa byenbyen bu Yesu Kiristi ci mikyinmi ra, mri bàmi ndè ba numi wa ca aco ki cia butso wakara ki fin jen bu Akaya ;katà ba. ¹¹ Akake tsari m dan numa? M dan numa ki cin waa m conmi ni ba? Cidon ba dia yinu danra mna conni. ¹² Bútso waa mna tsa ra, mri foji wa tsa numa yaya ki pyen jiji m hwaden pajukun baa na ta dibe danra be ciri fotson bu Yesu Ki risti ra. M conmi wa fan dabe apyo ko titi numa waa be nyā dibe danra butsobe waa bena tsa ra ci abu dzundzun ba bui ba, ¹³ Tswi pajukun baakara cibe fotson baa byenbyen ba, be ci pajukun baa kankan ki cin butsobe waa bena ísa, be vyin pukan dibe ci tsadzu be ci fotson bu Yesu Kiristi, ¹⁴ Wa-kara cia abu wa ken nwo ba, ki cin waa Shetan ba dia na pukan dia, kuna con jiji pajukun be mbyàku danra ku ci nwutsōn wari ta yi pajukun abye wa yafan jinni. ¹⁵ Ci numa ra cia abu dzun wa ripye ba, waa zhen nyaa pukah dibe bena con jiji pajukun be mbyàbe danra be ci zhen nyà baa ri tsa butso we hwan bu Cidon: Anyunu wa kennu beri pan vokwinbe mbamba nu butsobe. ¹⁶ M kà mbyā na dan yini kwan yo, apa dzun ka ga danra m ci apa wa jeje ba. Ama nima ga danra m ci apa wa jeje ní panmi tsadzu apa wa jeje jiji m du apyo wa caco dimi titi numa. ¹⁷ Aji waa mna dan tanma cia aji waa Cin doi dan ri yimi danra m dan ba, ama ci tsadzu aji bu apa, wa jeje m dan pan dia ndé jinni ra. ¹⁸ Ama tsadzu suu;numa na caco tsadzu pajukun baa ki fin tswen kire ri tsa ra, ami ri tsa numa du. ¹⁹ Ani ba dini nī byenzo kagben, ci numa ra nī gban mikyin fan zo yi pajukun baa jeje! ²⁰ Nī gban mikyin yi apa honi kan nya, ko kuma jini abupyu, ko apa ma puni pupu, ko kuma ta dia danra ku ken apa ra, ku tani pyuta ki nu. ²¹ Ci abu wa pan tsenni ki byemi, ai bàini ba gben mikyin wa tsa tswi abu wakara numa. Apa dzun ma ci ba gben mikyin wa caco ki cin abu dzun, ami du, m tsayi wa tsa numa, mna zen aji bumi abu apa wa jeje. ²² Bema danra be ci zhenzheh bu Ibrani yawa, ami ma m ci numa du. Bema danra be ci zhenzhen Isra’ila, ami ma m ci numa du. Bema danra be ci zhenda bu Ibrahim ami ma m ci numa du. ²³ Be ci nya bu Yesu Kiristi? Ami ciri nya bu Yesu Kiristi, m kabe ri. Mna dan aji bumi ci tsadzu apa wa kyakya. Afyin waa m ko ra ka bube ri pyuu numa, be panmi hwa tan suu numa, be dami gba suu numa cia wa hwenhwen ba, te nu aki. ²⁴ Yahudawa dami akpan dzwa tswanna zan adidzun kya dzwe nwa tsuntsa. ²⁵ Pajukun baa ki Roma dami cuku dzwa tsara, be tami a ban jiji be ta bwanmi, fo dzwa tsara ayo waa mna ya akò na kyen ki fin teku akò waji gban ya gafan jinni kata. Anyunu dzun mri ci fin teku anyutu ba afitse. ²⁶ Ki bye akyon wa kyen jinna kyen akyen m wa fyin ki vo bu anú, m wa fyin ki vo bu pajukun baa gban co suu, m wa fyin ki vo bu atsumi, m wa fyin ki vo bu tsu pajukun badatì, m wa fyin ki finka baa ciho, m wa fyin ki fin hyu, m wa fyin ki fin anú baa ciho, m wa fyin ki vo bu pajukun baa kankan. ²⁷ M tsa butso wa tutu, m wa fyin, afitse suu numa ko aná numa bi kaa ki zomi ba, ambo jan ba mbo buju bwanmi, m na ten mbo ra, awo tami m nyani tukpa wa be wo. ²⁸ Abu wa kwan bye afyin baakara ári, ko anyunu wa kini m nde mikyinmi so gbāngbàn ki cin bu pajukun baa ba Yesu kata. ²⁹ Apa wani ri nyani gben mikyin ri, waa mri nyanimi gben mikyin bumi ba? Apa wani waa beri yiku kokwi ki nyaco bu Cidon ri tumi ba? ³⁰ Rima kyan ci ken m caco, mri kyan caco ba abu baa ta yimi danra m ci byebye numa ra. ³¹ Ata Cidon bu Cindoi Yesu waa wa sansan kwanku yo ko nukon yinu danra m kanmi akan ba. ³² Andi waa m ki finka Dima shika ra Akù wa ki nwo be bu Aku waa beri baku danra Areta ra ho baa nuken kon nyakyon kà kata jiji be panmi. ³³ Ama pajukun badati ndemi dzo bye atikshe ndemi dzo pwadzu ki tson tunken bu akà bu finka waji. Ci numa m pwindzu ki vo bu Akù waji.

¹ ken m caco, ama kuri tsazai yo ki bye abu dzun ba. Tanma mri ya pyen ba aji wa dandan ki cin abu waa Cidon ta yimi m mbyà ki zo mbu. ² M yì apa dzun wa ci apa bu Yesu Kiristi, aju dzwe nwa nyena baa nwādzu ya ba nyaken ra Cidon ndeku neya ki hwadon wa kwan tsara ki bahun. Ko ku neya ba agangan dia numa re, ko ku neyaa ba agangan di bare, m yimi ba, se Cidon yiri. ³ Abu waa m yì ciri, Cidon nde apa wakara neya ki don, ko ku neya ba agan gan dia, ko denden’a neya ri kenken, m yimi ba, se Cidon maari yi ri. ⁴ Ku fo aji badati baa fyea waa apa ku dan ba. Be ci tswi aji baa apa tsa yia wa zen aji ki cinbe ba. ⁵ Ki cin wakara m tsayi wa nde apa wakara caco kiyo, ama mri cami co ba dimi ba, ama mri caco ki cin abu baa ri ta danra, m ci apa wa ci byebye numa. ⁶ Ko mma con wa caco, ri cia aje wa jeje ba, ki cin waa mri bi dan aji wa byenbyen. Ama m nghami wa tsa numa ki cin waa apa dzun kuká ndemi so nwādzu ba waa m ci, ko nwādzu ba waa kuna fo ajimi ba. ⁷ Ki cin waa Cidon con’a waa m cu cucu ndē dimi ki cin abu baa ku ta yimi mbyà ki zo mbu raba, ku zen nde, fan nwu nya bu Shetan bi tswàmi atswí ki dimi, ku yimi fyin jiji mká cu cucu kacin ba. ⁸ M vo Cidon sen dimi dzwa atsara kata jiji ku nwàdzumi ki bye afyin wakara. ⁹ Ama ku dan yimi danra, "Wa sansan bumi mba tiri ra numa, ki cin waa jiji pajukun bumi ma mbyà yì abyè dibe mri tsa vinni butsomi ki byebe ba gbentsòn-mi." Ki cin wakara mri mbu mikyin hwehwe numa ki cin waa m ci byebye numa. Numa ra gbentsòn bu Yesu Kiristi ri tsa butso ki byemi. ¹⁰ Numa ra, ki jiji bu Yesu Kiristi, ko pajukun mana tsomi ce, ko m mana wa fyin, ko be mana tami fyin atswi tswi, ba azo bu baa ma dumi kata, mri gban mikyin, ki cin waa ayo waa mma ci byebye numa, ciri ayo waa mri ci ba gben. ¹¹ Mna tsa abu tsadzu apa wa jeje, ama ani hwami ri hunnu m tsa numa ra. San kari waa ani ní ci pajukun baa nyámi, ama nina mbyà pajukun baa kankan hora ci tsadzu be ciri fotson baa kami, ko waa m kenmi abu dzun bara, pajukun baa kara kami ba, ko titi. ¹² Àmà bu baa ri ta danra apa ci fotson wajinderi byenbyen numa ra, m gban mikyin tsabe ki byeni ra. M tsa abu baa kyahozo, abu baa ken nwo, ba butso baa ndanda numa. ¹³ Ki bye nyaco wani waa pajukun baa bà Yesu ki bye dzun du mupyen wa san san ki byemi kani? Ko ki cin waa m kàmni ki di bara? Waa m tsa numa ra ma ci ada, ní nashan-yii yimi! ¹⁴ Wakara ci akyon wa kwan tsara waa mna con m bi mbyà zoni kara. Mri bi kàmni ki di ba, ki cin waa mri bi nyami abu dzun nī ki voni ba, mri nyaani ba dini waji. Ki cin waa san kari, ata ba ayo ri tsaza zhenzhenbe yori, cia zhenzhen baa titi ri tsaza atabe ba ayobe ri yo ba. ¹⁵ Bumi, mri bwan avo suu numa, mri bwan dimi kata kwan yo yini ki cin waa m tsazani yo ba mikyin wa mbu mbu, Ko waa m conni hwe numa ra, niri bi conmi kacin riba ho? ¹⁶ Niri bi zen nde numa, ci numa ra m kàmni ki di ba. Ama dzun tiri apa dzun ribi danra, m ndi byenzo tswā pan mikyinni ba akan wa kankan. ¹⁷ Ko ayo waa m ndi tson pajukun bandomi bi ki byeni ra, be pan abu dzun ki voni bi yimi ji? ¹⁸ M vo Titus danra ku bi, m kà tson nwuzai wadzun ra baku kyen dzun bi. Ko Titus bi pan abu pyù dzun ki voni ji? Ina tsai tswi butso dzun dzun ba? Abe kyon’i wea ki dzun ba dii ba? ¹⁹ Ko nina ga danra ī ndi na nga jiji í tsu nwa dii ki pyenni? Cia numa ba ko dzundzun. Ī ndi na zen aji ki cin bu Yesu Kiristi ki pyen bu Cidon yini kata ī ndi na myi sanni soso ki don, bazhenzai baa concon ki nyaco bu Yesu Kiristi. ²⁰ Mna we bon ban danra dzun tiri mma bi zan ki byeni ra, mri bi dumni ki bye tswi byecu waa mna con raba, ani du, dzun tiri ní dumi ki bye tswi byecu waa niri con ba. Dzun tiri mri bi du pajukun badati ki finni ci pajukun baa gbende, baa fifi, baa ngongo, baa condi, baa zen tsaba apa, baa dzwa aji, baa gya aji, ba baa tsa abu ndē di, tsa abu nyana cincin numa. ²¹ M kana we bonban danra mma bi byeni ra Cidon ka yimi pan tsen ni ki pyenni ki cinni, ḿ bi pe mikyin ki cin waa pajukun badati ki finni suu numa baa ndi tsa abu wa baba avo ndi gbogbo be nghabe wa fan butso asobe wa tsatsa jinni, ba agbaza, ba waa be shebe abu wa baba dzun numa waa be ndi na tsa raba.

¹ Bibimi ki byeni wakara ri ci wa kwan tsara hun. "Bema dzwa akwen bu apa dzun, se ní fo aji ki nu bu apa pyinna ko atsara hunnu ní hun ge akwen." ² Andi m kapyen nuni pajukun baa tsa abu wa baba hora ba badati kata dòn ki bye akyonmi wa kwan pyinna ra gbogbo numa ra. Tanma numa waa m bamni ki byeni ra m kana nuni dòn kwan yo ci tsadzu waa m ndi nuni gbogbo ki bye akyon mi wa kwan pyinna ra. Mma ka sen bi ki byeni ra mri fanmbe adi tata azota numa ba, se mma na tenbe. ³ Tsadzu waa nina con ni yi san byenbyen ko Yesu Kiristi bami ci bye dzundzun re ra, ayo waa mma natenbe ra hunnu beri yi san byenbyen danra Yesu bami ci bye dzundzun. Ku cia byebye numa wa tsa koke kata bani ba, ama ku ci ba gbentsòn. ⁴ Anyunu waa be nde Yesu Kiri sti kan ki cin hin wa shon gege ra, ku ci tsadzu apa wa byèbyè numa. Ama ki bye butso bu Ci don ku do ba cindi. Ci numa du ai fotson ī bàini ba agben dzun ki byea, ama ki bye butso bu Cidon kū yii Denden jiji í dan yini aji ba agben. ⁵ Ní mba fin mikyinni, ní mbyà sansan ko nī ci ba wajinderi re. Ko kani kata ku mbye dia aji ku mbyà danra ko ku ci apa bu Yesu Kiristi re. ⁶ Mna pya danra niri mbyà danra ī koi she ba. ⁷ Ina pya Cidon weni yo danra niká tsa abu wa baba dzun ba. Bà ki cin waa pajukun be mbyài danra ī ji cin ra vinni ba, ama ki cin waa ní tsa abu wa ci fin nyaco ndafan jinni byenbyen ko waa dzun tiri niri mbyà danra i koshe ra. ⁸ Ki cin waa iri tsayii wa te aji byen bà jinni ba abe ba, ama iri tsa abu wa byenbyen. ⁹ Ima bàini ba agben ani ma ci ba gben iri cu cucu. Abu waa ina pya kata ciri ní ci byecu nyenye. ¹⁰ Abu wa tsa mna ta afa wakara yini ávo waa m ngha bimi ki byeni raba, ki cin waa anyunu waa mma bi ra, mká dan yini aji dzun wa tutu kagben ki bye gbentsòn waa Cindoi Yesu Kiri sti yimi raba. Ki cin waa gben tsòn waa ku yimi ra ki cin waa jiji m myini myimyi, bà ki cin waa m da gbanni nyanya ki jinni ba. ¹¹ Bazhenza, se anyunu dzun tiri. Ní mbyāsan byecuni, ní gon tson fo aji waa m dan yini ra. Ní zen nde ba dini, ní ci byecu bu vyon ba dini, numa ra Cidon bu acon, ba mikyin wa na jinni ri bani ci bye dzundzun. ¹² Ní nà dini jen kiyo ní gbe dini vo ba abe sansan numa. ¹³ Pajukun baa bà Cidon kata na nàni jen kiyo. ¹⁴ Wa sansan bu Cindoi Yesu Ki risti, ba acon bu Cidon, ba avyon wa banban bu Denden bu Cidon ku bani ci dzun kata.