1 TIMOTI

¹ Ami Bulus fotson bu Yesu Kiristi, Cidon wa nwàdzui ba Yesu Kiristi waa ī ho zoī so nya co na ge cin’a ra gbèmi ri jiji m ci fotson. ² Mna ta afa wakara ri na yiu, au Timoti nwumi wajinderi wa ki bye aji bu Yesu Kiristi: Ata Cidon ba Cindoi Yesu Kiristi ku san u sansan, ku hwi ciciu, ku yiu mikyin wa na jinni. ³ Tsadzu waa m ndi pan nyaco wa ya ki Makidoniya dzwa naya ra, m ndi vou danra, ú ci finka Afisus jiji ú nu pajukun baa na fyen abu wa ci akan ki bye waji ra don jiji be fan jinni. ⁴ Úkà dan yibe jiji be gadi ba ason wa dzwadzwa ba aji bu anwo tsu wa hwèn kapyò suu numa ra, ki cin waa aji baakara ri gbe ayepye wa nya hwan azota numa ribi. Kuri tà yia apa abu dzun waa apa ku tsa we hwan bu Cidon ba, se wajinderi maari vinni ri tà yiiri abu wa we hwen bu Cidon. ⁵ Abu wa hwa m nuu dòn numa ra ki cin waa ú yi pajukun be dado acon wa con dibe wa byenbyen wari dzu fin mikyin wa nyenye ribi ra so don, baa cibe ba aban fyon bu aji dzun wa baba ki cin be bara be ci ba wajinderi wa byenbyen. ⁶ Pajukun badati ngya co ka hwan fan abu baajinderi baakara na zen aji wa nya hwan azota ri. ⁷ Bena nya jiji be fyen pajukun badati adon bu Cidon, ama abe ba dibe be hwa yibe cinna bu aji wana dzu ki nube raba, aji baa bena dan ba gben mikyinbe kata ra, abe ba dibe aji baaji na wabe ngyi. ⁸ I yinu danra, adòn sansan, in aga mana bàku coa ndafan jinni. ⁹ Ú hwayi sansan danra, be nde be adòn so jiji bu apa baa na tsa abu wa byenbyen ba, ama be nde so jiji bu apa baa gban cin baa na gbekyan don, ba baa ri nwa pajukun nwe wa baba, ba baa yìbe Cidon ba, ba baa yībe tswén’a hwe ba. Baa ri bwan atabe ba ayobe ra, ci jiji bu baa bwan pa, ¹⁰ ba baa ri tsa agya, ba bawunu baa ri tsa aso ri na ba dibe ra, ba baa ri vyi pajukun, ba baa kankan, ba baa ri ge aji be pa ki nu ra, ba badati baa na tsa abu badati baa wea ba abu wa fyenfyen wa byenbyen ba. ¹¹ Abu wa fyenfyen wa byenbyen waji ci Aji wa Sansan waa Yesu Kiristi nde kwami ki vo jiji m dan yi pajukun ra. Aji wa Sansan wari tà yii ahwè bu Cidon ba wa sansan’a. ¹² Mna mbu mikyin yi Cindoi Yesu Kiristi wa yimi gben mikyin wa tsa butso wakara ra, mna tsaku mgbagye ki cin waa ku mbyàmi fye wa tsaku butso, ku gbèmi danra, m kofyin tsa butso waku. ¹³ Ko waa m ndi na zen ba boa, m taku fyin, m kana tsoku ce ra, Cidon hwi cicimi ki cin waa m ndi yimi wajinderi ki bye Cindoi Yesu Ki risti raba tiri ra, m ndi yìmi cinna bu abu waa m ndi na tsa raba. ¹⁴ Cindoi Yesu Kiristi sanmi ba wa sansan’a suu numa, ku hwa yimi yi wajinderi ki byea mkà con pa jukun badati. Ku vyon’i ai baa kwan cin ki dzun baku ra wajinderi ba acon wari dzu byea ribi ra. ¹⁵ Aji waa be dan danra, Yesu Kiristi bi ki fin tswen wakara jiji ku nwàdzu pajukun baa tsa abu wa baba ra, ci aji wa byenbyen wa fye waa í panku ba avo pyinna, Ki fin pajukun baa tsa abu wa baba hora ami ci akùbe ki bye abu wa baba wa tsatsa. ¹⁶ Abu wa hwa, ko waa m tsa abu wa baba ka pa jukun ri kata ra, Cidon tā akimi ki cin waa kú tà yi pajukun badati be mbyàyi danra, ku ci apa wa ta mikyin suu numa, tsadzu waa ku ta mikyin bami ami pa wa tsa abu wa baba ka pajukun kata ra; wa kara na tà yi pajukun kata danra, mikyin wa tata waa Yesu ta bami ra pajukun baa ribi ki nyaken ri yi wajinderi ki byea ra ribi du cindi wa ci kenken. ¹⁷ Ahwè ba gben kú ci abu Akù wa ci kenken ko nukon. Ku ciri Cidon dzundzun maari vinni wari hua ba, apa tsa yia wa mbyà kaku ba azo ba. I she shia í yiku hwe kenken numa yaya. Ku ci numa. ¹⁸ Au Timoti nwumi, mna nde adòn wakara wa we ba aji baa baa da dòn bu Cidon ndi dan ki cin u gbogbo ra kwau ki vou. Aji baakara ci tsadzu atswén bu aken ki byeu, ú pan gben ki dibe jiji ú nuken sansan numa. ¹⁹ Ú pansan wajinderiu nde so san san, ba abu wa sansan waa mikyin u ma fyen ta yiu. Pajukun badati sinni ba abu baa mikyinbe fyen ta yibe ra be nde wajinderibe tswà jì jinni tsadzu akò ri gban ya gafan ki cin aban ki fin nu ra. ²⁰ Himinayus ba Ali kizanda be ki fin tswi pajukun baakara du, m tswà sube yi She tan jiji ku na tenbe béká zen babo bu Cidon riba.

¹ Ajimi wa kapyen ciri, ki bye abu baa nima vo, ba abu baa nima nya, ka ba mikyin wa mbu mbu waa niri mbu yi Cidon ra, ní tsa numa jiji bu ko kani kata. ² Ní dzwa nde vo Cidon jiji bu abe akù, ba abe baco baa na tsonkù hora kata, jiji í ci byecu wa rito, mikyin’i ku na jinni, jiji í bà Cidon ba hwan dzundzun, jiji í pan yi cinna bu dii sansan. ³ Abu baakara ci abu baa sansan, Cidon wa ci apa wa nwadzui ra fo vya ba abu baaji du. ⁴ Áku wana con jiji ku nwàdzu pajukun kata, jiji békà yì aji wa byenbyen. ⁵ Cidon ci dzundzun tori numa maari vinni, apa wari kà ki yoba bu Cidon ba pajukun ci apa dzundzun maari vinni, apa waji ci Yesu Kiristi, ⁶ ku nde dia yi aki jiji ku hwa pen pajukun kata. Ki bye ayo waji bwa numa ku ta yi pajukun danra, Cidon na con jiji ku nwàdzu pajukun kata. ⁷ Ki cin wakara Cidon gbèmi jiji m ci fotson’a, m nde jia dan yi pa jukun, m fyen tsu pa badati jiji be yi wajinderi ki bye aji baa byenbyen baakara. Mna dan aji wajinderi mna kanmi akan ba. ⁸ Ci numa ra ko abye wani ka ta waa bema kwan na yo, bawu nu béna dzwa nde vo Cidon, bena dzwa nde vo Cidon be ho vobe tan don. Bé kana ngongo ki mikyinbe ba, béká kana ye yepye ba dibe ba. ⁹ Bawuwa be mbyā dibe san san, be dze tukpa wa mbamba tiri, be pan dibe kyoo numa. San’a waa be te ajinbe be gyaku gyagya numa nwàdzudzu ba, bé ká pā abu baa mbyā adi bu zi nariya, ba takude, ba bigya baa mbumbu baa ci ba abè wa nwa dzudzu ba. Béká dze tukpa wa ba abè kacin ba. ¹⁰ Ama adi mbyābe kú ci mikyinbe wa we ba ábe baa na danra, be ci baa bà Cidon ra. ¹¹ Awuwa ku bànde ba nua kyoo numa ku nde cin’a na jinni ku fyen abu. ¹² M zenmi nde ba waa wuwa ku fyen wunu bu ba, ko ku tsa tson ki cin bu wunu ba. Se ku bànde ba nua ku ci kyoo numa. ¹³ Ki cin waa Cidon ndi kapyen mà Adamu ahunnu ku mà Awa ki nyaken. ¹⁴ Wa hwa pyinna, Adamu cia apa waa She tan ndi pu jiku raba. Shetan ndi pú awaa har hwa yiku gbekyan dòn bu Cidon. ¹⁵ Ko waa ci numa rare awuwa ri du wa nwàdzudzu ki dibu bazhenzhen wa mbamba, in kuma pansan wajinderia ba gben, ba acon wa con apa, ba byecu wa ci nyenye, ba adi wa panpan sansan numa.

¹ Apa wama nyà ku ci baco ki fin bi bu baa bà Cidon, wakara ci butso wa sansan kuna nyà. ² Apa wama ci baco ki fin bi bu baa bà Cidon ci ken kú ci apa waa pa jukun mbyàbe boa ki bye abu dzun ba; kú ci apa wa ci ba awuwa ngyikan dzundzun tori numa, kú ci apa wa ta mikyin, kú pan cin’a bi dzun sansan, kú tsa abu bua kata coa ndafan jinni, kú pan akyon sansan ba avo pyinna, kúkà tsayi wa fyen pajukun abu. ³ Kúká ci apa wa pyen cen ba, kúká ci apa wa ngongo mwamwa nde vo da apa ki di ba, ama kú ci apa wa tashuma numa, kúká ci apa wa nyà jinyà ba, kúká ci apa wa vya aji bu abè zadi ba. ⁴ Ci ken ku pan ndoa sansan, bazhenzhen’a bé nde cinbe na jinni gon tson nari foku ko nukon. ⁵ Ki cin waa apa wama tsa yia tson ki cin bu ba zhenzhen’a kú panbe sansan ba, kuri bi tsanini ahunnu kú pan yì pajukun bu Cidon? ⁶ Ci ken apa waji kúká ci apa wa pan aji bu Cidon panpan tiri ripye numa ba, ki cin waa kuri bi nde cin’a ki don ri caco ri gbe kwen ribe dia ki cin tsadzu waa Shetan tsa ra. ⁷ Baco ku ci apa waa ko pajukun baa bàbe Yesu bara be mbyàku ba hwe, ki cin waa kúká bi ko ki bye tswe bu Shetan pajukun bebi na zen baboa ba. ⁸ Kà ci numa ba abe dikon du, bé ci pajukun baa pan cinbe bi dzun sansan, béká ci pajukun baa zen aji nu pyinna ba, béká wa jan kacin ba, béká ngingi bu abu hwe kacin ba. ⁹ Ama be pan san aji wa byenbyen waa Cidon tà yibe ra gangan numa ba mikyin wa nyenye. ¹⁰ Se ní ka pyen ken mbafobe ní mbyà ahunnu, nima pannibe ba ada dzun ba ahunnu bé tsa butso wakara. ¹¹ Bawuwabe bé ci baa tashuma, béká ci bawuwa baa ri fyi aji ba, be pan cin nabe bi dzun sansan, abu waa bema tsa be tsa wa ndafan jinni. ¹² Ci ken dikon kú ban awuwaa a ngyikan dzundzun tori numa vinni, kúkà tsa tson kú pan ndoa ba bazhen zhen’a sansan. ¹³ Dikon baa tsayi butsobe sansan ndafan jinni ra beri du azen wa sansan, bekà tsayi wa dan yi pajukun aji ba agben ki cin wajinderi waa i yi ki bye Yesu Kiristi ra. ¹⁴ Afa waa mna ta yiu kara, mna ma ki fin mikyinmi danra, m bi ge ba mbwari jiji m mbyà zou. ¹⁵ Ama mma bi gemi ba, afa wakara ri ta yiu cinna bu abu wa fye waa pa jukun bu Cidon bé tsa, pajukun bu Cidon wa ci ba cindi wa ci kenken ra, bé ci tsadzu ahinpo bé na nyaken bu ajibyen be teku soso ki don. ¹⁶ Ajinderi, aji bu Cidon bui waa ina bà ra ci aji wa ndanda kwakyi numa: "Ku kàn pajukun pwadzu bi nde dia tà yi pajukun ki fin tswen, Denden bu Cidon zen nua danra, ku ci apa wa byenbyen. Abe zhentsōn bu Cidon mbyàku nu ba zo dibe, pajukun nde aji ki cin’a dan yi tsu pajukun kata, pajukun ki fin tswen yi wajinderi ki byea, Cidon ndeku ki fin hwe numa neya don."

¹ Denden wa nyenye na dan yii ki byeya numa danra, ki fin yo dzun wari bi ki pyen ra pajukun badati ribi fan wajinderibe jinni, beri gon tson ri fo aji bu denden baa kankan, beri bà abu wa fyenfyen bu ajon baa baba. ² Abu wa fyenfyen baakara dzu nu bu pajukun baa kankan baa nari byebe ra ribi, mikyinbe pyi ken jinni ra ci tsa dzu be nde ashó dzo pyu nde tsònbe kiyo. ³ Atswi pajukun baaji ri den pajukun aben wa banban ba dibe, be kari danra, pajukun bé she atswi buju badati sheshe, ama buju baa Cidon mà ra ki cin waa pajukun baa yi wajinderi ki byea kà yì ajia wa byenbyen ndafan jinni ra bé pan buju baakara ba mikyin dzun dzun be ji, be mbu mikyin yi Cidon. ⁴ Ki cin waa ko kake waa Cidon mà ra kata ci abu wa san san, ci numa ra abu dzun wa sheshe baani, apa kú pan ko ka ke ba hwan dzundzun ku dzwa nde ku mbu mikyin yi Cidon. ⁵ Ki cin waa aji bu Cidon ba ndedzwa wa dzwadzwa mbyāsan buju waji ra. ⁶ Uma nde abu wa fyenfyen wakara fyen yi bandoi baa bà Yesu, uri ci apa wa kofyin tsa butso wa Yesu Kiristi ndafan jin ni sansan; ki cin waa una pyu diu ba aji baa ù yi wajinderi kiyo ra, ka ba abu wa byenbyen waa una bà ra. ⁷ Ú gadi ba aji baa màmá ciki ciki ra. Ú tà diu fyin ú ci byecuu ndafan jinni sansan numa we mikyin bu Cidon. ⁸ Pa-jukun badati na ta dibe fyin jiji adibe kú yafan jinni jiji be du gben, wakara sansan. Ama abu wa san kari ciri apa kuna tà dia fyin ki cin waa kuna nyà jiji ku bà Cidon, ki cin waa ku genu danra, apa wama tsa numa kuri du cindi wa ki myi kire, ba cindi wa ci kenken wa anyunu wa kyen. ⁹ Aji wakara ci aji wa byen byen wa fye waa apa ku pan ba mikyin’a kata. ¹⁰ Abu wa hwa ina kofyin na nga ra ki cin waa ī ho zoi so di bu Cidon wa ci ba Cindi wari nwàdzu ko kani kata ra, tuntun baa na yi wajinderi ki byea raba. ¹¹ Ú nu pajukun dòn ki cin bu abu baakara, úkà nde fyenbe yo. ¹² Úká dada fan zo yi pajukun be sinniu danra ù ci tiri nwutishe ba. U ci byecuu pan diu bi dzun sansan, jiji be fyen bu kiyo ki diu, ki bye aji wa zenzen u, ba tswi byecuu, ba acon wa con pa jukun, ba wajinderiu waa ù yi ki bye Cidon, ba abu baa ù mana tsa kata ku ci nyenye. ¹³ Ú nde diu yi Afa bu Cidon una tsa tà yi pajukun ki byeya numa, una nube dòn, ú kana fyenbe abu kapyen waa mri bira. ¹⁴ Ká nde abyon waa Cidon yiu dzu bye Denden bu Cidon bira hwa janta kiyo ba. Abyon waa Cidon yiu ki bye yo waa baco ndi ho vobe sen u ki cin u, waa apa dzun na da dòn na zen aji bu Cidon ki cin u ra. ¹⁵ Ú so hwan kiyo una tsa abu baakara, ú kon diu so una tsabe jiji ko kani kata ku mbyàyi danra, una ya pyen. ¹⁶ Ú wezo ú mbyà diu sansan, úkà wezo ú mbyà abu baa una fyen pajukun ra. Ú pantse ki cin abu baa una fyen ra gangan numa, ki cin waa uma tsa numa, uri nwàdzu diu, ba baa una fyenbe bena gon tson na fou ra.

¹ Ká nyā baco wa ki pyen u nde ba, ama ú voku ci tsadzu ku ci ata fin u. Ú mbyà azhen mafan ci tsadzu be ci bazhenza fin dzun u. ² Ú mbyà bawuwa hweton ci tsadzu be ci ayo fin u. U mbyà bawuwa mafan ci tsadzu be ci bazhenza fin dzun u. Mikyin u kú ci nyenye numa ki cinbe. ³ Awaki wa cia ba apa dzun ki cin’a wa tsazaku yo bara ní tsa zaku yo. ⁴ Awaki waa anua ma ndi hu fanku ba bazhenzhen, ko zhenda fye kari be fyen, be tà nyaco bu Cidon wa bababe ki bye wa tsaza bavyonbe yo, be tsa numa banton bu abu baa atabe, ba abe yobe, ba yakube ndi ko fyin tsa yibe ra. Cidon ri fo vya ba wakara cia wa titi ba. ⁵ Awaki wajinderi byenbyen waa anua hu fanku ta so dzundzun’a, ku dua apa dzun wa soku hwan ki dia ba ko nukon, kú nde zoa so di bu Cidon. Afitse ba anyunu kú ci gban na vo Cidon, kuna dzwa nde na pya Cidon ku tsazaku yo. ⁶ Ama awaki wama nde dia yi aso wa tsatsa, ku huhu numa ci, ko waa ku ci tiri riju ra. ⁷ Ú nube dòn be ci byecube sansan numa apa dzun kúká bi zen ba bobe ba. ⁸ Apa wama tsazaa bavyon’a yo ba, tuntun abaa ci fin koa raba, wakará ta danra, apa waji yia wajinderi ki bye Yesu Kiristi ba, ku baka apa wa yìa Cidon fora bari. ⁹ Ko awaki wani kata waa ajua ma ngha foa adipa tsara, ba wa ma ban wunu kagben dzundzun níká tā zen’a, ní hwènku ki fin bawuwaki ba. ¹⁰ Se waa be mana she shia ki bye abu wa sansan wa tsatsa, awuwa wa pan hwe bazhenzhen’a acoa ndafan jinni numa ra, wari pan akyon sansan numa, wari tsonye abe bu pa jukun bu Cidon ra, wari tsaza pajukun baa na wa fyin yo ra, wa kana so hwan na bàvo ki bye abu wa sansan wa tsatsa ki bye nyaco atswi tswi. ¹¹ Ká zen nde ta zen bu ba wuwaki baa ci tiri mafan ra ki fin bu bawuwaki baaji ba, ki cin waa dzun tiri ba, bema gban kabe mikyin be tse cin bu nuge waa be ge ba Yesu Kiristi raba beri pwin nuge waji ta Yesu tata ki jinni ya nyà wunu ban dibe yo. ¹² Bema tsa numa be tsa abu wa baba ki cin waa be tsabaa nuge wa kapyen waa be ndi ge ba Yesu Kiristi rara. ¹³ Abu wakà te yo ciri, bē fyen byecu bu dija be ná don na tan ban ndo na kyen. Abu wa ba kari kata ciri, bena dzwaji, bena tsa akaya na zen aji badati baa dzube cin ba. ¹⁴ Tsadzu waa ci numa ra, m con kari bawuwaki baa ci tiri mafan kan cara ra bé mbyā ban wunu, be mba zhenzhen, be pan ndobe sansan numa, ki cin waa ajozei kúká du nyaco wa zen bai kiyo ba. ¹⁵ Ki cin waa bawuwaki badati vyin pukan gbogbo numa ya bà Shetan ra. ¹⁶ Ko apa wani kata wama bà Yesu Kiristi kuma ci ba nwuzaa wuwaki dzun ki ndoa, se ku tsazaku yo, Ki cin waa kuká nde atswén wa ndanda wa kara ya ngye pajukun baa bà Yesu Kiristi bà jinni ba, ki cin waa baa bà Yesu bé du nyaco wa tsaza badati yo baa cibe ba apa dzun ki cinbe bara. ¹⁷ Fye kari be hwā baco baa na tsa butso ki fin bu baa bà Yesu ra abu sen dia dzwa pyinna, tun tun baa na so hwan ki bye aji bu Cidon wa dandan ba abu wa fyenfyen waa bena fyen pajukun raba, ¹⁸ Ki cin waa Afa wa danra, "Dede waa ana mana teka aza ra, úká dzò àbú nde be tsukenku ki nu ba." Kukà danra, "Fye waa be hwa nwu butso abè nu bu tsoa." ¹⁹ Apa dzun ma bi dzwa abo bu apa dzun ki pyen u, ká gon tson foku ba, se uma fo aji ki nu bu pajukun fo tsa pyinna ko atsara numa ahunnu. ²⁰ Ú gben pajukun baa na foji abu wa baba wana tsatsa ra nde ki byeya numa duzo bu pajukun jiji apa badati be zinzin bu abu wa baba wa tsatsa. ²¹ Uma jiji Cidon, ba Yesu Ki risti, ba abe zhentsōn baa kú ce hobe so ra, mna nuu don bàvo kiyo danra, ú pan abu baa fyen fyen baakara sansan, abu waa uma tsa kata ká dada con apa dzun ka apa dzun ba. ²² Úká dzo di nde avo sen apa dzun ki cin mwamwa numa ba. Ká nde diu yà vyà bye abu wa baba bu pa jukun badati ba. Ú pan diu nyenye numa. ²³ Uká wa jabe cobo azota numa vinni riba, ú wa jabe anab titi numa jiji ku tsazau ba aji bu ado fin u wana tuu te dzun ko nukon ra yo. ²⁴ Abu wa baba bu pajukun badati fyīn na byeya numa, ávo waa be ngha hobebe ya ndo Cidon jiji ku ya fobe kwen raba tiri ra. Ama abu wa baba bu pajukun badati se ridan ahunnu kuri fu dia taya. ²⁵ Abu wa sansan wa tsatsa fyinna byeya numa du, ko waa badati ci yuyu numa rare, beri hoka bebe ri yu ji ba di ba.

¹ Bazhenza baa akpen sana hwanbe kata ra, ko anya wani kata ku mbyà cindoa ken waa ku yiku hwe ra, ki cin waa pajukun béká zen babo bu zen bu Cidon ba abu baa ina fyen raba. ² Ko nwu nya wani kata waa cindoa ma ci apa wa bà Yesu Kiristi kúká sinni cindoa ki cin waa ku ci apa wa bà Yesu raba. San kari be tsa butso kā badati ki cin waa bena kofyin na tsa butso ra be ci pajukun baa concon baa bà Cidon ki byebe. ³ Apa dzun mana fyen abu dzun wa dzu ken wa wea ba aji wa byenbyen bu Cindoi Yesu Ki risti ba, wama ndafan’a jinni ba nyaco bu Cidon’i waa ina bà ra ba, ⁴ kuna cì dia azota ku yia abu dzun ba. Mikyin’a vyin pukan jinni ra, kuna nya ayepye wa ye ye ba aye wa tsatsa wa nya hwan. Abu wakara ri gbe aze ribi, abu wakara abu wa ga vyon, ri gbe ace wa tsotso ribi, ri hwa pajukun ri zen tsaba dìbe. ⁵ Atswi pajukun baakara baa mikyinbe vyin pukan jinni rara, be yìbe ajibyen dzun riba, bube maari be ci gban bye aye wa tsatsa ra hun. Bena ga danra, apa ri bà Cidon ki cin waa apa kú du nyaco wa fa hwen kiyo. ⁶ Apa wama bà Cidon ndafan jinni byenbyen ma sinnia ba abu waa ku du ki voa raba, ku fa hwen ra ko nukon. ⁷ Ki cin waa ī ndi bi avo nyi ki fin tswen, ī kari gadi ba fin tswen ri kasen ya tiri avo nyi. ⁸ Ima nyanii ba abu wa dze di, ba abu wa jiji ba, mba tiri numa ra. ⁹ Ama baa na wozo na nya jiji be fa hwen ba gben ra, be kò ra ki fin tswe ra, bena nye zo nye bu aju vya bu aso ba abu baa zadi baa nya hwan azota numa yibe kokwi ya nya vo bu adzú pan hobe. A hwa yibe hu aki wa nyadi ya kindo. ¹⁰ Nwo bu wa baba wa tsatsa ka ta ri dzu di bu abè wa vyavya ribi. Ki cin abè wa vyavya waa badati ri nya ken nwo ki cin ra, hwa yibe fyin wajinderibe ta hun, be gbe afyin atswi tswi be dibe ki cin na tsònbe mikyin. ¹¹ Au Timoti wa ci apa bu Ci don, ká dada nde cin u dzo bye atswi abu baakara ba. Ú so hwan kiyo jiji ú tsa abu wa byenbyen ndafan jinni, ú tsa abu wa we hwan bu Cidon, ú pansan wajinderiu so gangan numa, ú con pajukun, ú ngo mikyin, ú tā mikyin. ¹² Ú nyo mikyin ú nga ú nuken ba gben u kata ki cin bu wajinderiu, jiji ú du cindi wa ci kenken. Ci abu waa Cidon bau nde ki cin’a ki bye yo waa ù ndi kā do don pantse don ki pyen bu pajukun, ù dan ba nu diu yibe ki byeya numa danra, ù yi wajinderi ki bye Yesu Kiristi ra. ¹³ Uma jiji Cidon wa yi koke kata cindi ra, ba Yesu Kiristi wa ndi pantse pyen bu Bilatus Babuntu dan aji dzu ju wea ki byeya numa ra, ¹⁴ mna nuu dòn: Ú pan aji baakara so hwan u tsa butso babe ndafan jinni kata, ká nde hwa janta kiyo bá ko titi, ú foji wa tsa numa keke yaya ki bye anyunu waa Cindoi Yesu Ki risti ri kasen ribi ra. ¹⁵ Anyunu ma bayo ra Cidon ri yiku ribi. Cidon waa wa sansan kata kwan byea, aku dzundzun tori na tsa tson ku ci Akù ki cin bu abe akù, ku ci Cindo bu abe cindoi. ¹⁶ Aku dzun dzun’a maari vinni ri hua ba, ku ci bye wa yafan jinni waa pajukun tsa yibe wa zanka kiyo ba. Apa dzun wa mbyà foku ba azo fora baani, apa dzun wari mbyà kaaku baani. Ahwè, ba agben, ba atson ci bua keke numa yaya ko nakon. ku ci numa. ¹⁷ Pajukun baa sen bu, baa du bu baa ki fin tswen ki vobe rikya numa ra, ú nube dòn danra, bé ká caco na cì dibe ba, béká ho zobe so bye abu baa ki fin tswen baa ri nwādzudzu raba, ama be ho zobe so di bu Cidon wari tafan vo ri yii abu baa vya hwan’i ra. ¹⁸ Dan yibe be tsa abu wa sansan, be fa hwen bu abu wa sansan wa tsatsa, be tafan vo vyon pajukun vyon, baa na con aji bu vyon, ¹⁹ ki cin waa bema tsa numa bena tsa abu wa san san so dibe yo jiji bu anyunu wa kyen bé du cindi wa ci kenken. ²⁰ Timoti ú kon abu waa be nde kwau ki vou ra sansan. Ú gadi ba baa na zen ajibo baa zota baa nya hwan ra nana numa, ba ayepye bu akan waa badati na mbyà danra, ci "Ayì ra." ²¹ Apa badati cì dibe numa hwa yibe jan nyaco wajinderi wa byenbyen. Cidon ku sanni sansan numa kata.