1 BATASALONIKA

¹ Ami Bulus, ba Silas, ba Ti moti ina ta afa wakara ri na yini ani bi bu pajukun baa bà Cidon ki finka Tasalonika. Ni ci pajukun bu Atai Cidon ba Cin doi Yesu Kiristi. Cidon ku sanni sansan ku hwi cicini. ² Ina mbu mikyin ki cinni suu numa kata yi Cidon ko nukon. Ina ba zenni ki bye ndedzwai ko nukon. ³ Ina kyepan bani ki pyen bu Atai Cidon ki cin waa ni tà wajinderini ba acon ki bye abu baa nina tsa, ba waa ni pantse ba gben ho hwanni so bye Cin doi Yesu Kiristi ra. ⁴ Bazhenza, i yinu Cidon con ajini, ku ceni kan pajukun bua. ⁵ Ki cin waa anyunu waa i ndi nde aji bu Cidon bi dan yini ra, i ndi dan’i aji waji ba anu azota numa vinni ba, ama i dan yini ba gben bu Denden bu Cidon, I yinu danra, ci numa ajinderi. Nī mbyà tswi byecui waa i ndi ci finni bani ranu. Abu baa i ndi tsa ra kata, i ndi tsa soni yo, ⁶ ní bà abei tsa abu ci tsadzu waa i ndi na tsa ra. Níkà bà abe bu Cindoi. Ko waa nī wa fyin ra, nī pan aji bu Cidon ba mikyin wa mbumbu wari dzu bye Denden bu Cidon ribi. ⁷ Ki cin wakara numa hwa pajukun baa ki Maki doniya ba Akaya be bàni na ten abeni numa. ⁸ Aji bu Cidon wa ki byeni ra tsunde tea ki Maki doniya ba Akaya vinni ba, ama pajukun na zen aji ki cin wajinderi waa ni yi Cidon ra fye hou bye kata. Wakara cia abu waa i dandan ribi. ⁹ Ki cin waa abe ba dibe na zen aji ki cin akyon waa i ndi bi byeni kire, ba panpan waa ni ndi pan’i ra, ka ba waa ni gadi ba bakindo wa wawa kasen bi bye Cidon jiji ni wa Cidon wajinderi wa ci ba cin di. ¹⁰ Jiji ni ci bàzo bu Nwua ku dzu ki hwadon bi, Nwua Yesu Kiristi waa ku ba doku pwadzu ki shimbi ra, Yesu Kiristi waji ri nwàdzui ri ki vo bu kyinna bu Cidon wari bi ra.

¹ Bazhenza, ani ba dini yinu danra, akyon waa i ndi kyen bi ki byeni kire ra, i ndi kyen’i kyon wa nya hwan numa azota ba. ² Ani ba dini yinu ko waa i ndi wa gba, ba ace ki Filibi ra, Cidon yii agben mikyin wa dan ajia yini, ko waa pajukun badati suu numa ndi nyai jinyà ra. ³ Aji baa i ndi vya nde zen yini ra, adà baani kiyo. I mai abu dzun wa baba ki mikyin’i danra, jiji i puji apa dzun ba. ⁴ Ama Cidon zen nde cei nde ajia kwai ki vo. Ci numa ina zen aji ki cin aji waji na yi pajukun. Ina zen’i aji ki cin waa jiji i zen aji wa vya mikyin bu pajukun ba, ama ki cin waa jiji i zen aji wa vya mikyin bu Cidon wari ken mbafo mikyin’i ra. ⁵ Ani ba dini, ni yinu kata danra, i bi vya foi apa dzun nde ba aji wa vyavya ki nu vinni ki byeni fo raba. Kati, i zen foi aji wa bye apa dzun jiji i pan abu kiyo fo raba. Cidon ba dia yi wakara numa nu. ⁶ I nyà foi hwe ki bye apa dzun fo raba. Ko ki byeni, ko ki bye pajukun badati. Iri ma ndi con, iri tsayi wa nyà hwe ki byeni, ki cin waa i ci fotson bu Yesu Kiristi. ⁷ Ama i ndi na vuni vuvu ci tsadzu waa ayo nwu ri vu nwua ra. ⁸ I con ajini numa cia wa dandan ki nu ba. Ki cin wakara i nde aji bu Cidon bi dan yini, ikà nde dii ka aki kwan yo ki cinni. ⁹ Bazhenza, ni yi afyin waa i ndi ko, ba afyin waa i ndi wa ki byeni dede waa i ndi na dan aji bu Cidon yini ranu. I ndi na tsa butso anyutu ba afitse ki cin waa jiji iká tani fyin ki bye ayo waa i ndi na dan aji bu Cidon yini raba. ¹⁰ Ani ba dini kwan ba Cidon ni tsayi wa zen nui numa. Dede waa i ndi bani ani baa yi wajinderi ki bye Yesu Kiristi ci bye dzundzun ra, ni yi tswi abe kyon’i waa i ndi na kyen ki byeni ranu. I ndi ci nyenye ndafan jinni byenbyen numa. I dài aji dzun ba. ¹¹ Ni yinu danra, i tsa ko kani kata ki finni abu ci tsadzu waa ata ri tsa bazhenzhen fin’a ra. ¹² I nuni don, ikà zen gbanni mikyin danra, ní ci byecu wa san hwan bu Cidon wa bani nde bi ki ndo tson’a wa ndanda ra. ¹³ I kana mbu mikyin yi Cidon ko nukon, ki cin waa dede waa i nde aji bu Cidon bi dan yini ni pan ki byei ra, ni panni aji waji ci tsadzu aji bu pajukun ba, ama ci aji bu Cidon wajinderi byen byen, Aji waji na tsa butso ki byeni ani baa yi wajinderi ra. ¹⁴ Bazhenza, atswi fyin wa duni kara, we dzun ba atswi fyin wa ndi du pajukun baa bà Yesu ki Yahudiya ra. Nī wa fyin ki vo bu pajukun bandoi ci tsadzu waa be ndi wa fyin bube ki vo bu Ya hudawa bandobe ra. ¹⁵ Abe Ya hudawa baaji be ci pajukun baa ndi bwan Cindoi Yesu, ba abe baa da don bu Cidon, beka kan’i pwadzu. Abu baa be tsa ra san’a hwan bu Cidon ba. Bekà zenbe nde ba aji bu pajukun ba. ¹⁶ Be nga jiji be kanden’i wa dan aji bu Cidon yi tsu pajukun badati jiji Cidon ku nwadzube. Bena nga jiji be tsa ban abu wa ba babe ko nukon. Ama akwen bu Cidon bira ki cinbe ra. ¹⁷ Bazhenza, andi be ndi gaidi ba azo dii titi numa. I ndi gadi ba adii ki bye adi maari vinni azota. Mikyin’i ci tiri ki dini. Ina nga jiji i mbyà azoni ina con wa kasen bi byeni numa cia wa dan dan ba, ¹⁸ Ami Bulus m nga ka gben dzwa pyinna waa jiji m kasen bi byeni, ama Shetan tsu kenmi nyaco wa bibi ki byeni. ¹⁹ Pajukun baa i lolo hwan’i so dibe, ina cu cucu ki cinbe, ina mbu mikyin ki cinbe, i kana caco ki pyen bu Cindoi Yesu ki bye anyunu waa kuri kasen bira, cia ni ba? ²⁰ Ani ciri pajukun baa ina caco ina mbu mikyin ki cinni.

¹ I mbyà danra jiji i cici i gban kai mikyin ba. I mbyà danra san kari ai pajukun badati i ci ki Atina. ² I tson Timoti wandoi, wana tsa butso bu Cidon bai ki dzun, ina dan aji ki cin bu Yesu Kiristi ra bi ki byeni jiji ku zen gbanni mikyinni yo, ni pantse san gbangban numa ki bye wajinderi. ³ Ki cin waa apa dzun ki finni kúká vyin pukan mikyin’a jinni ki cin afyin wa du ni raba. Ani ba dini ni yinu dan ra, bui be ndei so danra, i ci pajukun baa wa fyin numa. ⁴ Avo ndi gbogbo waa i ndi bani ci tiri ki bye dzundzun ra, i ndi dan ge yini ba mbwari numa danra, afyin nai ki tiri ki cin ki pyen. Abu waji bi ci numa ajinderi. Ani ba dini ma ni yinu numa. ⁵ Ki cin wakara m gban kami mikyin ci ba. M tsontson bi byeni ki cin waa jiji m fo aji ki cin wajinderini. M ndi na we bon ban danra, dzun tiri ba, Shetan bye pan honi ra. Mká dan afyin butso waa i ndi ko ki byeni koko ra, i ko nya hwan numa azota ba. ⁶ Ama waa Timoti kasen dzu byeni bi byei ra, ku dan yii aji wa vyavya wa fofo ki cin wajinderini ba acon wa ki mikyinni. Kukà dan yii danra, nina kyepan bai, nina mbu mikyin ki cin’i ko nukon. Nina ma jiji ni mbyà azoi ci tsadzu waa ina ma jiji i mbyà azoni ra. ⁷ Bazhenza, ko waa ina wa fyin, ina kofyin ra, waa i fo danra, ni pantse gbangban ki bye wajinderini ra yii agben mikyin. ⁸ Tanma nwoi ko jinni ra, ki cin waa ni pantse sansan numa ki nyaco bu Cindoi ra. ⁹ Iri mbu mikyin nini yi Cidon ki cinni hun? Cucu waa ina cu ki pyen bu Cidon ra kata ina cu ki cinni. ¹⁰ Ina so hwan kiyo ina pya anyu tu ba afitse jiji í mbyà azoni i zen muni yo abu baa koshe ki bye wajinderini. ¹¹ Tanma ina pya danra, Atai Cidon ba dia, ba Cindoi Yesu ku pofan’i nyaco wa bibi ki byeni. ¹² Cindoi ku tsa ni con dini kwan yo foji wa yaya ki pyen, kú hwa ni con pajukun kata ci tsadzu waa ina conni ra, ¹³ Ki cin waa ku hwa mikyinni ku ci ndafan jinni sansan numa ki pyen bu Atai Cidon ki bye ayo waa Cin doi Yesu ri kasen bi ba pajukun bandoa ra.

¹ Bazhenza, ina con i dan yini aji wa ken niken. Abu baa ni ndi fyen ki byei jiji ni tsa abu wa we hwan bu Cidon ra, ina voni ba azen bu Cindoi Yesu ni foji atswi abu waji wa tsatsa numa kwan yo yaya ki pyen. ² Ani ba dini ni yi abu wa fyenfyen waa i ndi fyenni ki bye agben bu Cin doi Yesu ranu. ³ Abu waa Cidon ri nyà ki byeni ciri, ní kon dini so hun nyenye numa yi Cidon. Níká tsa agbaza ba. ⁴ Ko kani kata ki finni ku ban wuwaa ki bye nyaco wa nyenye numa wa ci ba hwe. ⁵ Bà ki bye nyaco bu aso ci tsadzu waa pajukun baa yibe Cidon ba ri tsa raba. ⁶ Apa dzun kúká nwa apa dzun nwe ki cin abu wakara ba. Ki cin waa apa wama tsa abu baakara numa, Cidon ri banku ton’a yo banban ci tsadzu waa i ndi fyen ta yini bàvo kiyo ra. ⁷ Cidon bai’inde ki cin waa jiji i bi tsa abu wa baba ba, ama ki cin waa jiji i bi ci nyenye numa. ⁸ Ci numa ra apa wama sinni ba aji wakara, kuna sinnia apa ba, ama ku sinni Cidon wa yini Denden wa nyenye ra. ⁹ Fyea waa i dan yini dandan danra, ni con bandoni ba, ki cin waa Cidon ba dia fyen ta yini danra, ni con dini. ¹⁰ Ajinderi ni na con bazhenzani baa ki Maki doniya ra numa kata. Ama bazhenza, ina voni danra, ni foji wa tsa numa kwan yo yaya ki pyen. ¹¹ Ní nga jiji ni ci byecuni ni ho mikyinni we jinni kyoo numa ni so hwan ki bye abuni wa tsatsa. Ní tsa butso ba avo dini ci tsadzu waa i ndi fyen ta yini ra. ¹² Nima tsa numa pa jukun baa ki myi ri mbyàni ba hwe. Niri nyanini abu ki voni ba. ¹³ Bazhenza, i con’i waa i fanni so azo kon numa ki cin bu pa jukun baa huhu ba. Ki cin waa níká ci na tsaba mikyin ci tsadzu pajukun baa sobe hwan danra, apa ri do don pwadzu ki shimbi raba. ¹⁴ I yi wajinderi danra Yesu hu aki, kukà do don pwadzu ki shimbi. Ki cin wakara i yi wajinderi danra, anyunu waa Yesu ri kasen bi ra, Cidon ri ho pajukun baa ndi yi wajinderi ki bye Yesu ra ri kyen dzun ba Yesu ribi. ¹⁵ Aji baa ina dan yini kara, ina dan yini ci tsadzu waa Cindoi ba dia dan jiji i dan yini ra. Ai pajukun baa ci tiri riju ra, dede waa kuri kasen bira iri doi ki don kapyen yi pajukun baa ndi huhu hora abye ba. ¹⁶ Anyu-nu waji wa hun ra, Cindoi ri dzu don bi ba dia, kuri bānde ba gben numa. Acin bu zhentsōn bu Cidon ribi nyande, beri nwe ahyu bu Cidon. Cindoi Yesu Ki risti ri dzu ki hwadon bi dzwa jinni ba dia. Pajukun baa huhu baa ndi yi wajinderi ki bye Yesu Kiristi ra, ri kapyen ri do don pwadzu ki shimbi. ¹⁷ Ki nyaken wakara hunnu Cidon ri hoi ai baa ci tiri riju kwan dzun babe ki bye dzundzun ya shon Cindoi ki nyaco ki bye anandi ki hwa cucu ki don. Iri ci bye waji ba Cindoi numa keke yaya. ¹⁸ Ci numa ra, nina zen gban dini mikyin yo ki cin aji baakara.

¹ Bazhenza, aji ki cin anyunu ba ayo waa Cindoi Yesu Ki risti ri kasen bira, cia abu waa í dandan yini riba. ² Ki cin waa ani ba dini nī yinu kata danra, anyu nu waa Cindoi Yesu Kiristi ri kasen bira, kuri bi ge pajukun gege tsa bwa numa ci tsadzu waa avyú ri ge apa afitse ra. ³ Ayo waa pajukun ri danra, "Ko kake kata ci rito, abu dzun tsaa ba," dede waji bwa numa beri bi mbyà afyin ba azo, ci tsadzu amba wa tutu ri tu awuwa ra. Nyaco wa nwàdzudzu ri baani. ⁴ Ama bazhenza, buni nī cini ki fin afitse ba. Ci numa ra Anyunu waji ri geani gege ki don tsa bwa numa ci tsadzu waa avyú ri tsa raba. ⁵ Ai, ani katani nī ci pajukun baa ki fin abye wa yafan jinni ba anyutu. ī cii pajukun baa ki fin afitse ko abye wa na tsu ken jinni ba. ⁶ Iká na ana ci tsa dzu pajukun badati na na raba. í ci ju kyoo numa. ⁷ Afitse ci ayo waa pajukun ri na ana kiyo, ka ci ayo waa pajukun baa wa jan kari pyen ajan kiyo. ⁸ Ama ai pajukun baa ci byecu bui ki fin anyutu ra, í wà dii sansan ci tsadzu waa apa wa nuken ri ho abuken asho ri nuken baku, kuri nde abucin asho ri be tsuken cin’a kiyo ra. Ci numa ra, í nde wajinderi ba acon wa ki fin mikyin’i ra gon akì kiyo, í ho mikyin’i so bye Yesu Kiristi Cin doi wa kari nwàdzui ra. ⁹ Cidon soi danra, í kan pajukun baa wa fyin bu kyinnaa ba. Ama ku cei jiji í du nyaco wa nwàdzudzu ki di bu Cindoi Yesu Kiristi, ¹⁰ wa hu aki ki cin’i ra. Ki cin waa ko ima ci ju ko ima huhu anyunu waa kuri kasen bira iya baku ci dzun. ¹¹ Ki cin wakara numa ní zen gban dini mikyin yo. Ní tsaza dini yo ci tsadzu waa nina tsa tanma ra. ¹² Bazhenza, pajukun baa ki pyenni baa Cindoi cebe yibe na tsa butso ki byeni, bena konni, be kana fyen ta yini abu ra, ina voni, ní yibe hwe sansan numa. ¹³ Ní yibe hwe, ní conbe ki cin butso waa bena tsa ra. Ní ci byecu ba dini rito numa. ¹⁴ Bazhenza, ina voni ni nu pa jukun baa dibe zen’a hwen wa tsa abu bara adon. Ni zen gban pajukun baa zinzin mikyinbe yo. Ní tsaza pajukun baa byèbyè yo. Ní gban mikyin ba ko kani kata. ¹⁵ Ní tsa sansan níká tsa abu pyó ba dini ba. Ama nina tsa adini abu wa sansan ba pajukun badati. ¹⁶ Nina cu cucu ko nukon. ¹⁷ Nina dzwa nde na vo Cidon ko nukon. ¹⁸ Ko kake ma tsari kata ní mbu mikyin yi Cidon. Wakara ciri abu waa Cidon na nya ki byeni ani pajukun baa bà Yesu Kiristi nina tsa hun. ¹⁹ Níká tsaden Denden bu Cidon ba. ²⁰ Níká sinni ba aji waa baa da don bu Cidon na dan ki cin bu Cidon raba. ²¹ Ní ken mbafo ko ke kata ní mbyà, ní pan wa san san, ni fan abu wa baba wa tsatsa be jinni. ²² Níká tsa abu dzun wa baba ba. ²³ Cidon wari yi apa mikyin wa na jinni ra ku tsonyeni horododo numa ba dia. Ku tsonye dendenni, ba cindini, ba dini ku konbe kata rito ho rododo numa dzwadzwa ki myi jiji béká bi mbyà boni ki bye abu dzun anyunu wa kasen bibi bu Cindoi Yesu Kiristi ba. ²⁴ Aku Cidon wa bani nde bi ra ku ci apa wa tsa abu wa sansan kuri tsa numa tsatsa. ²⁵ Ní pya Cidon wei yo du ba zhenza. ²⁶ Ní nà bazhenza bandoi baa ba Yesu kiyo. Ní pan dini be mikyin tsadzu bazhenza fin dzundzun. ²⁷ Ki di bu Yesu mna nuni don ní hwèn afa wakara yi bazhenza kata. ²⁸ Wa sansan bu Cindoi Yesu Kiristi ku bani ci dzun.