1 BITRUS
11 Ami Bitrus fotson bu Yesu Kiristi mna ta afa wakara ri na yini, ani pajukun baa Cidon ceni nī gafan nyana ki cincin ki fin jen bu Pontus, ba Galatiya, ba Kafadokiya, ba Asiya, ka ba Bitiniya. Abyecuni ki byeri ci tsa dzu akyon. 2 Avo ndi gbogbo Atai Cidon ceeni konso hun jiji Denden bu Cidon ku tso nyeeni ní kan pajukun baa nyenye jiji ní gon tson fo aji bu Yesu Kiristi ki bye waa kuri ko asaa ri wo nyeni kiyo ra. Cidon ku sanni sansan suu numa ku yini mikyin wa na jinni ko nukon. 3 Í nya ason bu Ata Cidon bu Cindoi Yesu Kiristi. Ki bye akii wa tata waa ku ta suu numa ra hunnu ku yii cindi wa ripye ki cin waa Yesu Kiristi do don pwadzu ki shimbi ba cindi ra. Ábu wa hwa ī ho mikyin’i so danra, iri du cindi wa ci kenken ki byea ra hun. 4 Ī ho zoi so danra, iri ya du wa sansan suu numa waa Cidon nde konso pa jukun baa bàku. Wa sansan waji ri sò tsabaa ki jinni numa azota ba ko titi. 5 Cidon na tsa butso ba gben’a, kuna konni ani baa yi wajinderi ki bye ajia ra. Niri bi du cindi waa be mbyāsan nde so jiji be pofan ta yini anyunu wa kennu ra. 6 Ki cin wakara ní mbu mikyin, ko waa pan kire tanma numa ya pyen titi numa nī ci fin mikyin wa pepe. Ki cin waa bena ken mba foni ki bye nyaco atswi tswi. 7 Abu wa tsa afyin baaji na duni hwe numa ra ki cin waa jiji pa jukun be mbyàyi danra nina yi wajinderi ki bye Cidon byenbyen numa ajinderi. Ko waa zinariya ci abu wari tsababa ki jinni azota numa rama pajukun ri mbafoku ki bye apyu hunnu beri hun ribi mbyà yinu danra ko ku ci zinari ya wa sansan re. Ci numa ba wajinderini wa san ka zinariya nana numa ra. Bena tani fyin bena ken mbafoni. Ki cin waa jiji anyunu waa Yesu Kiristi ri kasen bira pajukun be nya ason bu Cidon be yiku hwe suu numa ki dini. 8 Ko waa nī ngha mbyà foni Yesu Kiristi ba azo fo raba, nī conku, nī zen nde yi wajinderi ki bye ajia. Ci numa nī ci ba mikyin wa mbumbu suu numa cia wa dandan ki nu ba. 9 Avokwinni waa nī zen nde yi wajinderi ki bye Yesu Kiristi ra ciri, nina du cindi wa ci kenken. 10 Abe pajukun baa da dòn, be ndi da dòn gbogbo numa ki cin wa sansan waji wakara waa Ci don ndi mbyāsan soni yo ra. Be ndi na mba aji waji bena fon fin’a jiji bé yì aji ki cin waa Ci don ri nwàdzu pajukun ra. 11 Denden bu Yesu Kiristi wa ki fin mikyinbe ra na tà yibe nyaco waa Yesu Kiristi ri wa fyin hun nu kuri kan apa wa ci ba hwe ki nyaken. Bena nga jiji be yì anyu nu waa abu baakara ri tsa, ba hwe wari bi ki nyaken ra. 12 Ci don tà yibe ki fa byeya numa danra, beri dube abu baaji mbyà ba azobe ba, ama ani niri mbyà nu. Tanma numa pajukun baa dan yini aji bu Cidon ki bye gben bu Denden bu Cidon waa be tson dzu don bira, be kapyen dan yini baakara kata ra. Abe zhentsōn bu Cidon ba dibe na nyà waa jiji bé mbyà abu baaji ba azobe du. 13 Ki cin wakara ní mbyāsan mikyinni sansan ní ho mikyinni we jinni kyoo numa, ní ho mikyinni kata so di bu wa sansan waa niri du anyunu waa Yesu Kiristi ribi nde dia tà yi pajukun ra. 14 Ní nde cin na jinni fo tson bu Cidon foji wa yaya ki pyen. Níká kasen ya tsa abu we dzun ba abu wa babani waa nī ndi na tsa azo kon numa riba. 15 Ci tsadzu waa Cidon wa bani nde bira ku ci apa wa nyenye, ci numa ra ani ní tsa abu kata nyenye numa du. 16 Ci tsadzu waa be ndi ta ki fin Afa bu Cidon gbogbo numa danra, "Ní ci nyenye numa ki cin waa ami ci apa wa nyenye." 17 Nī mana bā Cidon danra, "Ata," se ní tsa abuni kata ba azin sansan numa ki pyen’a ki fin tswen wakara waa nī ci akyon kiyo kire ra. Ki cin waa Cidon na fo ko kani kata akwen ndafan jin ni sansan numa mbamba anu bu waa apa tsa. 18 Nī yinu danra, Yesu Kiristi penreni ki fin abu Yakuba da wa tsa nya hwan azota numa ra. Yesu Kiristi hwēn’ani ba zinari ya ko azurufa wari tsababa ki jinni raba. 19 Ku hwa penreni ba asaa wajinderi. Ku ci tsadzu nwudòn wa wunu dzun wa baani ba aban fyon dzun ki dia, kukà taa àbá dzun ki dia ba. 20 Avo ndi gbogbo dzu jinni bi kapyen waa be ma abye wa ki don ba abye wa ki jinni ra, Cidon ndi kapyen yinu gbogbo numa danra, Yesu Kiristi ri hwa pen pajukun. Tanma waa fin tswen na ngaa wa tete ki jinni rara, Cidon ndeku tà yii ki byeya numa jijini. 21 Nī bà dzu byea hun nu nī hun pan aji bu Cidon wa doku pwadzu ki shimbi ba cindi, kukà yiku hwe ra. Ábu wa hwa hunnu nī zen nde pan aji bu Ci don nikà ho hwanni so dia danra, kuri nwàdzuni ra hun. 22 Nī tsonye mikyinni nyenye numa ra, ki cin waa nī nde cinni na jinni fo aji bu Cidon wa byen byen ra hwa nina con pajukun bandoi baa bà Yesu Kiristi aji nderi byenbyen numa. Se ní con dini byenbyen numa kd fin mikyin ni. 23 Ní yinu danra, be mbyā mba ni mba wa ripye ki bye aji bu Cidon wa riju wa ci kenken ra. Aji baaji ri tsabaa ki jinni ba ko nukon. Apa wa yini cindi ra cia apa wa huhu ba, ama Cidon wa sen cindi yini ri. 24 Andi gbogbo be ndi ta ki fin Afa bu Cidon danra, "Pajukun kata ci tsadzu abyen. Asan bu apa ci tsadzu asan bu ambyì hin ri vyo dzu nyanya ki jinni. 25 Ama aji bu Cindoi ci ken ken ra hun ko nukon." Aji waji waa ī dan yini ra, ci aji bu Cidon waa be ndi dan yini ra.
21 Ci numa ra ní gadi ba anwe wa baba wa nwanwa ki fin mikyinni. Níká puji pajukun ba, níká ta aban nde vo yu ba, níká nye abu dzun bu apa ba, níká zen aji tsaba cin bu apa dzun ba. 2 Abu waa nima tsa kata ní tsa ci tsadzu zhen baci baa rijan baa nari con jiji be ma myi bu ayobe ko nukon. Áni du, nina nya jan myi wajinderi byenbyen numa wa ci aji bu Cidon waa ku yini hwe mwamwa numa kan pa jukun nde numa ya zan anyunu wa hun waa niri yà du wa nwà dzudzu ra. 3 Ki cin waa ani ba dini nī mbafo nī mbyà danra, Cindoi ci apa wari hwi cicii suu numa. 4 Ci numa nina kpabi go bu Yesu Kiristi. Ku ci aban wa ci ba cindi waa pajukun nghaku ta byeri. Ama Cidon ba dia ceku ndeku so apa wajinderi numa ki zoa. 5 Ani du nī ci tsadzu aban wa ci ba cindi waa Cidon honi myi tan kiyo jiji Denden’a ku ci yo. Ani ci pajukun baa Cidon ce honi konso hun jiji ní kan avon’a baa ri kofyin waku ba mikyinni kata ki bye nyaco waa Cidon kú pan vo kiyo ki cin bu Yesu Ki risti, 6 Be ndi ta aji bu Cidon so fin Afa gbogbo numa danra, "Ní mbyà, mna nde aban wa san kari kata wa myi cin pwe bu tan na hwa jinni ki Sihiyona kire kara. Ami ceri aban waji, aban waji ci aban wajinderi numa ki byemi. Apa wama zen nde ba aban waji atsenni ri pan’aku ba." 7 Ani pa jukun baa zen nde baku ra, ku ci aban wajinderi numa ki byeni. Ama pajukun baa zenbe nde ba ku bara, beri mbyà danra, "Aban waa pajukun baa myi tan ngha beku ra kuri kasen bi kan aban wajinderi numa waa beri nde myi cin pwe bu atan kiyo." 8 Be-kà ndi ta so ki fin Afa bu Cidon danra, "Aban wa ci kara ri hwa yi pajukun ri ta atsu ki cin’a beri kokwi." Abu wa tsa pajukun ta atsu ki cin’a ri kokwi ra ki cin waa be ndebe cinbe na jinni fo aji bu Cidon ba. Cidon ndi so avo ndi gbogbo numa danra ribi tsa numa. 9 Ama buni ki byeni nī ci atswi pajukun baa Cidon ceni cece. Nī ci abi bu von wa kofyin wa akù wa ciho. Nī ci atsu pajukun baa nyenye baa Cidon ce nwaani numa konso kankan jiji dia. Ni ci tsu pajukun bu Cidon. Ku ceni numa ki cin waa jiji ní dan aji yi pajukun ki cin abu baa san ka gben waa ku tsa, ku gbe nwaani pwadzu ki fin abye wa naken jinni honi bi ki fin abye wa yafan jinni wa hwa yi nwo bu pajukun ken jinni ra. 10 Andi kapyen nī cini abu dzun ba, ama tanma numa nī kan pajukun bu Cidon ra. Andi kapyen Cidon hwia ci cini ba, ama tanma numa Cidon hwi cicini ra. 11 Bandomi, nī yinu danra, nī ci kyon baa ri cibe numa keke yaya ba. Ci numa mna voni ní nde mikyinni taya hun ki bye abu baa baba baa na vyani wa tsatsa ki dini ra. Abu baaji na nuken ki fin mikyinni jiji be hwa denni wa tsa abu waa Cidon ri con ní tsa. 12 Ní foji abu wa san san wa tsatsa ki pyen bu pajukun baa yìbe aji bu Cidon bara jiji be mbyà. Ki cin waa ko bema con jiji be zen aji tsabani cin danra nī ci pajukun baa tsa abu wa baba, bé wezo bé mbyà abu baa sansan baa nina tsa ra, jiji be yi Cidon hwe ki bye anyunu wa hun waa kuri dube ra. 13 Ki jiji bu Cindoi ní nde cinni na jinni yi pajukun baa natson kata. Ní yi akù wa ki pyen kata hwe. 14 Ba baco baa te nwo bea baa ku gbebe jiji bé tà pajukun baa tsa abu wa baba fyin, jiji békà nya ason bu pajukun baa tsa abu wa sansan. 15 Cidon na conni jiji ní tsa abu wa sansan jiji ní hwa pajukun baa jeje baa yìbe abu dzun bara, be bànde ba nube. 16 Ani ci pajukun baa ci byecu bu akù dini. Ama níká nde byecu bu akù dini waji waa nī cira gòn akì kiyo tsa abu wa baba ba. Ama ní tsa abu wa ta danra, nī ci nya bu Cidon. 17 Ní yi ko kani kata hwe. Ní con bandoni baa bà Yesu Kiristi. Ní zin Cidon. Ni yi akù hwe. 18 Ani baa ci vo bu apa na tsa butso, ní nde cin na jinni yi baa sen ndo ba azin. Ko bema ci pa jukun baa sansan tashuma numa ki byeni, ko bema ci pajukun baa sepyu kata. 19 Apa wama gban mikyin wa fyin ki cin abu waa ku yinu danra, ci abu wa san hwan bu Cidon, ko waa ku dàa aji dzun hunnu be taku fyin waji bara, ku ciri apa wa tsa abu wa san hwan bu Cidon hun. 20 Apa waa bema daku gba ki cin abu wa ci nua ki cin abu wa baba waa ku tsa, wa kara ci abu wa zama kiyo hun? Ama apa wama gban mikyin wa afyin wa cia nua ba, Cidon ri san ku sansan. 21 Cidon bani nde bi kà ki fin fyin waji wakara ki cin waa Yesu Kiristi ba dia ndi poni nyaco ku wa fyin ki cinni yara. Ci numa ra fye waa ní ten abea numa du. 22 Ku tsa foa abu wa baba dzun fo raba ko dzundzun. Kukà kan foa akan ki nua fo raba. 23 Ko waa pajukun tsoku ce tsotso ra, ku tsoabe ce banton zayo ba. Ko waa pajukun taku fyin ra, ku zuabe bye danra, kuri tabe fyin banton ba. Ama ku fan aji waji yi Cidon wari fo kwen wajinderi ndafan jinni byenbyen numa ra ki vo. 24 Yesu Kiristi ba dia ho abu wa babai be dia ki cin ki bye ayo waa be ndeku kan ki cin hin wa shon gege ra. Ki cin waa jiji í gadi ba abu wa babai í ci byecui í tsa abu wa ndafan jinni byenbyen numa, Ki cin afo waa be tenku ra hunnu be hun dà gbanni kiyo. 25 Andi kapyen nī ngyangya na kyen ci tsadzu adòn. Ama tanma ra nī kasen bira ki bye apa wa zani, wa kana kon dndini.
31 Ci numa ra, ani bawuwa du, ní nde cinni na jinni yi bawu nuni. Ki cin waa anù bu wuwa dzun wama yia wajinderi ki bye aji bu Cidon ba, dzun tiri kuri vyin pukan mikyin’a bi bye Cidon ki cin abu wa sansan waa awaa na tsaku ra. 2 Bawununi ri nde azo hwa jinni ridan numa ri mbyà abu baa san san baa ndafan jinni nyenye numa baa nina tsa ba azin ra. 3 Níká ho hwanni so bye aji bu adi wa mbyá mbyà vinni ba. Ci tsadzu ajin wa tete, ba ago wa pa hwan, ba tukpa wa ba abè. 4 Ama ní yi adi mbyáni wa sansan ku dzu ki fín mikyinni bi. Ní ho mikyinni we jinni ní sinni dini. Ki cin waa atswi san waji cia wari tsaba jinni ba, ka ci abu wa sansan numa ki bye Cidon. 5 Ba-wuwa baa ndi na bà Cidon ra, be ndi na pan dibe sansan numa ki cin waa be fan dibe kata yi anube ki vo. 6 Saraya ndi fan dia yi anua numa, kuna ba anua danra, "Angya," Nima ten bea numa nī ci bazhenzhen ki byea. Níká zen nde yi abu dzun ku hwani azin ba. 7 Ani bawunu du, ni tsa ba wuwani sansan. Ní yinu danra, be gbanbe bani mba dzun ba. Ci numa ra ni yibe hwe. Ki cin waa ani pyinna kata, nī kwan dzun na pan cindi wa hun waa Cidon ga yini azota ra. Nima tsa numa abu dzun wari hwa ndedzwani ri cia ba gben ba baani. 8 Ajimi wa ken niken ciri, ní yi mikyinni kata be ci abu dzun dzun ní hwi cici bu dini. Ú con apa wa bà Yesu Kiristi wandou ci tsadzu nwuza fin dzun u. Ní tsa dini abu wa sansan, ní nde cinni na jinni yi dini. 9 Apa wama tsau abu wa baba ka tsaku abu wa baba banku ton ba. Apa ma tsou ce ka tsoku ce banton ba. Ama ú tsaku abu wa sansan ban ku ton zayo. Ki cin waa abu wa tsa Cidon bani nde ra ki cin waa jiji ku sanni sansan. 10 Ki cin waa be ta ki fin Afa bu Cidon danra, "Apa wama con jiji ku fo vya ku mbu mikyin se kúká zen aji wa baba riba ko titi. Kúká kankan riba. 11 Ku fan abu wa baba wa tsatsa jinni. Ku tsa abu sansan, ku so hwan kiyo nga jiji ku du nyaco wa du mikyin wa na jinni. 12 Cidon na we pajukun baa tsa abu wa sansan ra azo ki di. Kuna gon tson fo ndedzwabe ko nukon. Ama pajukun baa na tsa abu wa baba ra, ku pukan nya ken yibe." 13 Nima so hwan ki bye abu wa sansan wa tsatsa akani ribi tsa kaani abu wa baba ri? 14 Ama ko nima wa fyin ki cin waa nina tsa abu wa sansan, Ci don ri sanni sansan. Ci numa ra, níká zinzin bu pajukun baa na con jiji be tenni fo raba. Níká geni kyin ba. 15 Ama ki fin mikyinni ní nde Yesu Kiristi so danra, ku ci Cindoni ní yiku hwe. Ní mbyā dini soso ko nukon jiji ní zen aji yi apa wama mbyeni aji ki cin abu wa tsa ni ho hwan ni so bye Yesu Kiristi ra. 16 Ama ayo waa nima zen aji waji ra, ní zenku ki bye akyu wa tashuma ba cin wa nde na jinni. Kati, ní tsa abu waa ní yinu ki mikyinni danra sansan wa tsatsa. Ki cin waa ayo waa pajukun ma zen aji tsabani cin tsenni ku panbe ki cin abu baa sansan baa ani pa jukun baa bà Yesu Kiristi na tsa ra. 17 Ma ci hwan bu Cidon san kari ní wa fyin ki cin abu wa sansan wa tsatsa, ba anu waa ní wa fyin ki cin abu wa baba wa tsatsa. 18 Yesu Kiristi ba dia wa fyin ki cin abu wa babai. Ki bye ayo waji ku tsa vinni butsoa dzwa dzundzun. Bua ku ci san san numa ku hu aki ki cin bu pajukun baa cibe sansan ba, ki cin waa jiji ku gbei bi bye Cidon. Be bwan dia, ama Cidon hwa Denden’a do don ba cindi. 19 Ku nde Denden waji ya baku ki kin do ya dan yi denden baa na tan kon ki byeri ra aji bu Cidon. 20 Denden baaji ci baa ndi ngha be aji bu Cidon, ko waa Cidon gban mikyin ci bazobe baba de de waa Nuhu ndi na hwa akò wa kwakyi ra. Dede waji pajukun kwan dzun tsuntsa ki pwe vo numa vinni nwàdzu ri ki bye ja pe. 21 Jape waji ci àmà bu ba tisma wa tsatsa hun. (Anyunu waa bema tsani batisma, ni nwà dzu ki fin abu wa babani ra, ki cin waa Yesu Kiristi do don pwadzu ki shimbi ra). Jape waa beri tsani batisma kiyo ra, ri tsonyea ajin ki di bu apa ba. Ama ci abu waa ina vo Cidon kiyo ku tsonye fin mikyin ku ci nyenye numa. 22 Yesu Kiristi yara kd don ra. Ku ya ci go kyekye vo wunu bu Cidon. Zhentsōn bu Cidon ba koke kata wa ci ba gben ki bye waji kata be ci abu baa ki voa.
41 Ī mbyà danra, andi gbogbo Yesu Kiristi wa fyin ki dia. Ci numa ra ní mbyā dini soso jiji ní wa fyin ci tsadzu waa ku ndi wa ra. Ki cin waa apa wama wa fyin ki dia ku gadi ba abu wa baba ra hun. 2 Nde kire jinna ya pyen níká bà aji bu abu wari vyani ki mikyinni ba, ama ní tsa abu waa Cidon ri con ko nukon. 3 Nī ndi tsaba ayoni suu numa gbogbo numa ya hwan ra. Nī ndi na tsa abu ci tsadzu pajukun baa yìbe Cidon ba. Andi nina panni dini sansan ba. Nī ndi na bà aji bu abu wa vyani ki mikyinni vinni. Nī ndi na pyen cen. Nī ndi na kwan cin ki dzun ko nukon na wa cen. Ni ndi kana tsa aki baa baba wa vyaa hwan bu Cidon ba. 4 Ama tanma numa nī nwaa voni don ki bye abu wa baba waa pajukun baa yìbe Cidon bara na tsa ra, Abu baakara baa nī fan jinni ra hwa yi nwo bu pajukun baaji ken jinni. Ki cin wakara bena tsoni ce. 5 Ama anyunu dzun ki tiri pajukun baaji ribi pantse pyen bu Cidon beri dan nube. Cidon mbyāsan dia soso waa jiji ku fo pajukun baa riju ba baa huhu kwen. 6 Abu wa tsa Yesu Kiristi nde aji bu Cidon ya dan yi pajukun baa huhu ki kin do ra ki cin waa jiji dendenbe ku du cindi ki bye Cidon ko waa Cidon ndi kapyen fobe kwen ki fin tswen kire ci tsadzu waa kuri fo pajukun kata ra. 7 Anyunu bu koke kata naben wa vinvin ki jinni ra. Ci numa ra, ní mbyāsan dini sansan, ní ho kyinni we jinni vo Cidon. 8 Abu wa tutu kari kata ciri, ní con dini sansan numa dzwadzwa ki myi. Ki cin waa acon ri be tsuken abu wa baba suu numa. 9 Pajukun baa ma kani kyon ki ndoni, ní panbe sansan numa, níká nwin de kiyo ba. 10 Cidon ga abyon atswi tswi suu numa yini ki cin cin. Ci numa ní tsa sansan jiji ní tsaza dini yo ba abyon baa Ci don ga yini ra. 11 Apa wama ci apa wa zen aji, ku zen aji waji ci tsadzu dzu bye Cidon bi. Apa waa Cidon ma yiku byon wa tsa pajukun butso yo, ku tsa butso waji ba gben’a waa Cidon yiku ra kata. Ki bye wakara numa ri hwa pajukun ri yi Cidon hwe ki bye koke kata ki di bu Yesu Kiristi. Ahwè, ba gben ci bua numa keke yaya ko nukon. Ku ci numa. 12 Bandomi níká mbyà fyin wa tutu wa duni kara kú kanni abu wa ken nwo ki byeni ba. Abu baakara tsa numa ki cin waa jiji be ken mbafoni. Ci numa níká mbyà ci tsadzu azo abu dzun wa ripye duni riba. 13 Ama ní cu cu cu ki cin waa nī wa fyin waa Yesu Kiristi ndi wa ra du. Ki cin waa anyunu wa hun waa pa jukun ribi mbyà hwea ki byeya numa ra niri cu cucu kwan yo ka wakara. 14 Pajukun ma zenni aji wa baba ki di, ki cin waa nī ci pajukun baa bà Yesu Kiristi wa kara ci abu wa sansan ki byeni. Ki cin waa Denden bu Cidon wa ci ba hwe suu numa ra, bani ci bye dzundzun. 15 Ama apa dzun wa mana wa fyin ki cin waa ku bwan apa ko ku vyi vyu, ko ku dà aji, ko ku dzo anu wa baba ki bye aji cia abu wa sansan ba. 16 Ama apa ma wa fyin ki cin waa ku ci apa wa bà Yesu Kiristi, apa waji kúká pan tsenni ba. Ama kú nya ason bu Cidon ki cin waa pajukun tsoku zen danra ku ci apa wa bà Yesu Kiristi ra. 17 Anyunu mba tiri waa Cidon ri kapyen ri fo kwen ki cin bu pajukun ra. Kuri kapyen ri fo pajukun bua kwen. Kuma ka pyen foi kwen, abe pajukun baa nghabe wa yi wajinderi ki bye aji bu Cidon ra, beri vinni nini? 18 Be ta ki fin Afa bu Cidon dan ra, "Ci ba fyin waa pajukun baa sansan numa be nwàdzu ki vo bu Cidon. Pajukun baa tsa abu wa baba, baa yìbe Cidon bara beri dzu ni?" 19 Ci numa ra, pajukun baa na wa fyin we ba mikyin bu Cidon ra, bé foji abu wa sansan wa tsatsa yaya ki pyen. Bé fan cindibe yi Amà wa mà tswen ki vo, Ku ci apa wajinderi byen byen numa ko nukon.
51 M ci ba aji wa zenzen ba baco baa ki finni hora. Ami ba dimi, m ci baco du. M ndi mbyà fyin waa Yesu Kiristi ndi wa ranu ba zomi. M kari kwan dzun bani ri mbyà ahwè waa Cidon ri tà yi pajukun ri mbyà ba azo ra. 2 Zhenbi baa Cidon ho kwani ki vo ra, ní zabe sansan. Níká tsa ci tsadzu be teni tete ba, ama ní tsa ba mikyin dzun dzun. Níká tsa butso ho hwanni so bye aji bu abè waa beri hwani ra nwadzudzu ba. Ama ní tsa ba mikyin wa sansan. 3 Zhenbi baa Cidon ho kwani ki vo ra, níká tsa tson ki cinbe ba gben ba, ama ní tsa abu waa jiji be ten beni be tsa numa du. 4 Nima tsa numa anyunu wa hun waa Cin bu pajukun baa za zhenbi kata ra ma bi ra, kuri yini vokwin wa ciho numa wari ci kenken ko nukon. 5 Ka ci numa bani ani baci, ní nde cinni na jinni yi baco baa ki pyenni. Ní yi dini hwe kata. Ní mbyā dini soso jiji ní tsaza dini yo. Ki cin waa be ta ki fin Afa bu Cidon danra, "Cidon ze pa jukun baa nde cin ki don, ama kuna hwi cici bu pajukun baa nde cin na jinni." 6 Ci numa ra, ní nde cinni na jinni ki pyen bu Cidon wa sen gben jiji anyunu ma mba tiri ra, ku gbe doni so don. 7 Abu wama tuni kata ní fan yi Cidon ki vo. Ki cin waa kuna soni hwan ki di. 8 Ní kò nwoni ki jinni ridan numa ní wezo sansan. Ajo zeni Shetan na shònshón na kyen ci tsadzu zenku wari hin nyi na kyen, kuna nya apa wa dzwán dzwan. 9 Níká fan apyo yiku ba fa. Ní pantse gbangban numa, ní foji wajinderi wa yiyi ki bye aji bu Cidon numa yaya ki pyen. Ní yinu danra, pajukun bandoni baa bà Yesu Kiristi na wa fyin ki fin tswen numa ci tsadzu waa nina wa ra du. 10 Ki nyaken waa nima wa fyin waji titi numa ma nwādzu ra, aku Cidon wari hwi pa kata, wa ndi bani bi bye Yesu Kiristi jiji ní ci bye hwea wa ci kenken ko nukon ra, aku Cidon ba dia kuri mbyā sanni. Ku kari hwa yini pantse ba gben gban gban numa, 11 Gbentsòn ku ci bua numa keke yaya ko nukon! Ku ci numa. 12 Silavanus tsazami ri yo hunnu m ta anwu afa wakara titi numa yini ra. M mbyà danra, ku ci wa ndoi wa bà Yesu Kiristi. Ku ci apa wajinderi byenbyen numa. Mna nuni dòn, m kana dan yini danra, wakara ciri nyaco wajinderi byen byen numa waa Cidon san’i kiyo hun. Ci numa ra, ní pantse cin abu baaji gbangban numa. 13 Pajukun bu Yesu baa Cidon cebe ki finka Babila kire na nani jen kiyo. Markus nwumi na nani kiyo du. 14 Ní nà dini kiyo, ní bà kwan mikyin ba dini ki bye con mikyin. Ani pajukun baa bà Yesu Ki risti kata Cidon ku yini mikyin wa na jinni!