1 BAKORINTOS

¹ Afa wakara ami Bulus waa Cidon cemi ci fotson bu Yesu Kiristi, ba Sasitanisu na tari. ² Mna ta afa wakara yini ani pajukun bu Cidon baa ki Korin tos baa ku babe nde kata be ci pajukun bua baa nyenye baa kwan cin ki dzun ba Yesu Kiristi, abe kwan ba pajukun baa ko kini kata baa ri ba zen bu Yesu Kiristi. Ku ci Cindobe bai kata du, ³ Atai Cidon ba Cindoi Yesu Kiristi ku yini wa sansan ba mikyin wa na jinni. ⁴ Ko anyunu wa ki don wani kata mna mbu mikyin yi Cidon ki cin wa sansan waa kuna yini dzu ki di bu Cindoi Yesu Kiristi ra. ⁵ Ki cin waa nī kwan cin ki dzun ba Yesu Kiristi ra nī du wa sansan bu Denden hwehwe numa. Nī yì aji wa zenzen nu, kwan ba aji wa ga yiyi kata. ⁶ Aji bu Yesu Kiristi ci ki fin mikyinni byenbyen numa, ⁷ hwa nī nyanini wa sansan bu Cidon ko dzun dzun numa ba, ki bye waa nina ci bazo waa Cindoi Yesu Kiristi ribi tà dia ra. ⁸ Kuri hwa ní pan tse ba gben gbangban numa keke yaya anyunu wa kennu bu Cindoi Yesu Kiristi waa kuri ka sen bi ra, kúká bi panni ba ada dzun ba. ⁹ Aku Cidon wari ge nuge ri fan taa jinni numa azota bara, ku bani nde ri bi ní ci byecu bu vyon ba Nwua Yesu Kiristi Cindoi. ¹⁰ Ani pajukun bandomi baa ki nyaco bu Yesu Kiristi mna voni ki fin zen bu Yesu Kiristi, ní pantse, ní zen nde ba aji dzun dzun waa niri dan ra. Ní kwan cinni ki bye dzundzun ba mikyin ni kata, ki cin waa wa gafanfan kuká kà ki finni ba. ¹¹ Bandomi, m fo aji ki nu bu bando Kuluwi be dan yimi danra nina gbende ba dini. ¹² Abu waa mna con m dan ra, ciri ko apa wani kata ki finni na zen aji wa vya hwa’a maari. Apa dzun na danra, "Bumi ci apa bu Bulus." Wa dzun na danra, "Bumi ci apa bu Apolo." Wadzun ri danra, "Bumi ci bu Bitrus," Wakara ri danra, "Ami ci apa bu Yesu Ki risti." ¹³ Ajinderi Yesu Kiristi ci dzundzun, ku gafan’a gafanfan ba! Ami Bulus m humi aki ki cin hin wa shon gege ki cinni ba. Nī duni batisma ki fin zenmi ba. ¹⁴ M mbu mikyin yi Cidon ki cin waa m tsámi apa dzun ki finni batisma ba, ma nwādzu ba Kirisbus, ba Gayus vinni ba re. ¹⁵ Apa dzun baani ki finni wari danra m tsaku batisma ki fin zenmi jiji ku bàmi. ¹⁶ (Oho, m kyepan ra, m tsa Istifanus ba fin ndoa batisma, m muji ko m tsa apa dzun kà kwan yo.) ¹⁷ Yesu Kiristi tsonmí tson jiji m ya tsa pajukun batisma ba, ama ku tsonmi jiji m ya dan yi pajukun Aji wa Sansan. Kuri con’a waa m dan aji waji ki bye ayì bu fin tswen azota numa ba. Mma tsa numa tà danra aki bu Yesu Ki risti hu ki cin hin wa shon gege ra dzua cin ba, kuri tsaa butso ba gbentsòn ba hun. ¹⁸ Ki bye pajukun baa jan bá jinni ba nwoa ra aji bu aki waa Yesu Kiristi hu ki cin hin wa shon gege ra cia abu dzun ki byebe ba, ci aji wa nya hwan azota. Ama ki bye bui waa kuri nwàdzui ri ra, aji bu Yesu wa ci kara ciri gbentsòn bu Cidon. ¹⁹ Cidon ki fin Afaa danra, "Mri tsaba ayì bu pajukun baa byen zo, m kari tè hwayiyi bu manu baa fyen abu bà ki kankan." ²⁰ Ci numa ra pajukun baa ci ba byen zo be ci kake? Manu baa ri fyen abu hora be cibe abu dzun ba, Pajukun baa ci ba ayì bu ayepye wa yeye ra, beri yani? Cidon ta yii danra tswi ayì bu fin tswen wakara ci abu wa nya hwan azota. ²¹ Ci numa ra Cidon wa ci ba ayì tsuken nyaco waa pajukun be yìku ki bye tswi ayibe bu fin tswen wakara. Ama Cidon danra kuri nwàdzu pajukun baa yi wajinderi ba ajia waa iri dan yibe, aji waa pajukun baa ki fin tswen wakara ri danra ci aji wa dán. ²² Yahudawa hora na con be mbyà abu wa kyahozo bu gbentsòn bu Cidon ba zobe hun nu be yi wajinderi. Helenawa du nde mikyinbe so danra ci ken be ga hwan be mbyàyi abu wa byen byen hunnu be yi wajinderi. ²³ Bui ina dan yi pajukun aji bu Yesu Kiristi wa hu ki cin hin wa shon gege. Ki bye Yahudawa aji wakara ci aji wa ci adà. Ki bye Helenawa aji waji ci aji wa dán. ²⁴ Ama ki bye pajukun baa Cidon babe nde hora, ko Yahudawa ko Helenawa kata, aji wakara ci aji bu Yesu Kiristi, ku ci gbentsòn bu Cidon ba ayì bu Cidon. ²⁵ Aji bu Cidon waa pajukun badati na ga danra ci aji wa dán ra, aji waji kári ayì bu pajukun baa ki fin tswen. Abu wa ci bu Cidon waa pajukun na mbyà danra ci bye bye numa ra, abu waji gbanka pajukun baa ci ba ayì. ²⁶ Bandomi, ní kyepan ba waa nī ndi ci hunnu Cidon bani nde ra, pajukun baa ndi ci ba zobyen, ba gben, ba zhenkù ki finni hwebe ba, ²⁷ Apa waa pajukun baa ki fin tswen mbyà danra ci apa wa dán numa azota ra, Cidon ri ceku tsa butso baku ku yi pajukun baa ci ba gbentsòn ki fin tswen wakara tsenni. ²⁸ Pajukun baa pajukun baa ki fìn tswen na sinnibe na mbyàbe dán numa, na ga danra be cibe abu dzun bara, Cidon cebe jiji ku bwanji apa waa pajukun baa ki fin tswen na ga danra ku ci apa wa ci ba hwe ra. ²⁹ Ki cin wa ci kara apa dzun ku kána ndē dia ki pyen bu Cidon ba. ³⁰ Cidon honi kwan dzun ki bye Yesu Kiristi, kukà hwa Yesu Kiristi ciri ayii. Ki dia hunnu ī ci sansan numa ba Cidon, ī kan pajukun baa nyenye bu Cidon, ku nwàdzui ki bye kwen. ³¹ Ci numa ra, ci tsadzu Cidon dan ki fin Afaa danra, "Ko kani kata wama con adi wa ndénde, ku ndē di ki cin abu waa Cindoi Yesu Kiristi tsa."

¹ Bandomi, ayo waa m bi ki byeni jiji m dan yini aji bu Cidon wa byenbyen waa ku tà yimi ra, m danmi aji dzun wa dzondzon ba abu wa fyenfyen dzun wa ci tutu waa nī hwa yini ba. ² Abu dzundzun wa ki mikyinmi waa mna con m dan yini ciri aji wa ki cin bu Cindoi Yesu Kiristi ba akia waa ku hu ki cin hin wa shon gege ra. ³ Ayo waa m ndi bi ki byeni ra, m bi na hu dimi huhu numa, azin panmi yi adimi na vonvon suu numa. ⁴ Aji waa m dan yini ba abu wa fyenfyen waa m fyen tà yini ra, m danmi aji dzun wa dzondzon dzun jiji ḿ tà yini dan ra m ci ba ayì ba, ama jiji m tà yini danra Denden bu Cidon ci ba gben. ⁵ Ci numa ra wajinderi waa nī ci baku ra cia jiji kyinye bu apa ba, ama ci jiji agben bu Cidon. ⁶ Ki bye baa ci ba ayì ki co bu Cidon, mri babe zen aji ba ayì du. Ama ayì waji cia ayì bu fin tswen wakara ba, ko bu abe akù baa ci ba gbentsòn wa ki fin tswen wari nwādzudzu raba. ⁷ Ci numa ra mna zen aji bu ayì bu Cidon wa dzondzon waa ku ndi nde yu pajukun yo kuku ra. Ayì wakara Cidon yii avo waa ku ndi màa bye wa ki don ba bye wa ki jinni raba jiji í du hwe. ⁸ Akù dzun wa ki fin tswen wa yì cinna bu aji wakara baani. Akyan beri ma ndi yinu beri ndebe Cindoi wa ci ba hwe kata kan ki cin hin wa shon gege ba. ⁹ Ci tsadzu waa be ta so fin Afa bu Cidon danra, "Abu dzun waa apa mbyà foa raba, abu dzun waa apa ga foa aji ki cin’a danra ribi tsa ba, abu waji ciri abu waa Cidon mbyāsan so pajukun baa conku." ¹⁰ Ai ciri pajukun baa Cidon tà ayì bua waa ku ndi nde yu so hun ra dzu bye Denden wa nyenye. Ki cin waa Denden wa nyenye tsayi wa mbyàyi koke kata nu, ci numa ba abu wa yuyu bu Cidon. ¹¹ Ki fin pajukun akani tsaka wa yì abu wa ki fin mikyin bu apa ri? Se aku apa waji ba dia ri tsaka wa yi abu waa kuna ga ki fin mikyin’a ranu. Ci numa ra apa dzun baani wari yi aji wa yuyu bu Cidon, se Denden wa nyenye maari ri yi ri abu wa ki fin mikyin bu Cidon. ¹² Ci numa ra Denden waa ī du ra, cia abu fin tswen ba. Ku ci Denden wa dzu bye Cidon bi jiji í hwayi cinna bu koke kata waa Cidon nde tafan vo yii. ¹³ Ki cin wakara iri dan’i aji ba ayì bu pajukun baa ki fin tswen ba, ama Denden bu Cidon ciri wari fyen tà yii aji bu Cidon. Aji wakara ina dan yafan fin jinni yi pajukun baa ci ba Denden bu Cidon ki fin mikyinbe. ¹⁴ Ama apa wama cia ba Denden bu Cidon ba, kuri zen’ande ba abu baa ci bu Denden bu Cidon ba, ki cin waa kuri mbyà danra ci abu wa dán numa ki zoa. Kuri tsakaa waa ku mbyà yibe ba. Ki cin waa ci ken apa ku ci ba Denden waji hunnu ku hun hwa yi. ¹⁵ Ci numa ra apa wama ci ba Denden bu Cidon kuri mbafo koke kata, ama aku ba dia pajukun ri hwa yibe baku danra ku ci apa wa sansan ba. ¹⁶ Ci tsadzu waa Afa bu Cidon danra, "Akani hwayi ba mikyin bu Cidon ri akani ri ga zaku aji yo ri. Ama bui ī ci ba mikyin bu Cindoi Yesu Kiristi ki fin’i.

¹ Bandomi, waa m ndi bi ki byeni ra m tsakami wa zen ji bani ci tsadzu baa ci ba Denden bu Cidon ki finbe ba, ama ci ken m dan yini aji ci tsadzu m bá pajukun baa ki fin tswen kire na dan, ko m danra tsadzu baci baa ci tiri rijan baa kabibi tiri ki nya co bu Cidon baa gbenbe ken’a raba. ² Ci ken m yini janmyi ní ma hunnu, cia buju dzun wa ci ba gben waa m yini ba, ki cin waa nī ngha kenni wa ji buju wa ci ba gben ki bye ayo waji raba tiri, pan numa keke bibi jinna du, nī ngha kenni raba. ³ Ki cin waa ávo tanma ba, byecuni ci tiri ci tsadzu bu pajukun baa ki fin tswen wa ci kara, Nina ri fifi ba dini, nī kana gbende ba dini. Wakara taa byecu buni ci tsadzu bu pajukun baa ki fin tswen ba? ⁴ Ki cin waa apa dzun ma danra, "Ami ci bu Bulus." Apa dzun ma ka danra, "Ami ci bu Apolo." Ma ci numa tswi byecuni wea ki dzun ba tswi byecu bu pajukun baa ki fin tswen ba? ⁵ Bando, Apolo ci kani waji? Ami Bulus ci kani waji? Ai kata ī ci nya bu Cidon baa ndi gbeni bi ki nyaco bu Yesu Kiristi. Ki fin’i pajukun pyinna hora ina tsa butso waa Cindoi Yesu yii dan í tsa. ⁶ Ami ma ci apa wa tàtaa, Apolo ka ci apa wa we jape, ama Cidon ciri apa wa yi buju waji tsa cin, ⁷ Ki cin waa apa wa tà abu, ba apa wa we jape kwan dzun kata cibe nu abu dzun ba, se Cidon maari vinni wari yi buju waji tsa cin ra. ⁸ Apa wa tà abu, ba apa wa we jape kata be ci abu dzundzun. Abu wa kiyo ciri ko kani kata ri pan vokwin’a mbamba nu fyin waa ku ko. ⁹ Ci numa ra bui ī ci jo butso ba dii na tsa butso bu Cidon ki dzun, ani nī ci ada bu Cidon; nikà ci abu wa myimyi bu Cidon. ¹⁰ Ki bye wa sansan bu Cidon ku hwa yimi kan apa wa myi yì bu. Ci numa ra m jo nwo tan wa myimyi, apa dzun ri myi ken cin’a. Ama ko kani kata ku tsa sansan ba tswi co waa kuri myi ken cin’a ra. ¹¹ Nwo tan waji be joku gbogbo numa ra, apa dzun baani wari jo nwo tan dzun kiyo di. Nwo tan waji ci Yesu Kiristi dzundzun’a vinni. ¹² Ci numa ra ko ma kani kata wama myi cin tan ra, ko kuma myi ba zinariya ko azurufa, ko ba abàn baa ci ba hwe, ko ba hin, ko ba byen wa nwenwe, ko ba ase. ¹³ Ci numa tswi butso bu ko kani kata ribi tà dia. Ki cin waa anyunu waji ribi fuku fufu. Beri fuku ba apyu. Apyu waji ribi mba butso bu ko kani kata jiji í mbyà tswi butso waji. ¹⁴ Ci numa ra apa wa myi cin tan ra, bema mbà ma mbyà kuma tse ba gben, kuri bi pan vokwin’a. ¹⁵ Anyunu waji atan bu apa dzun ma ji tsòn tsaba jinni, apa waji ribi nyani vokwin’a. Kuri nwàdzu, ama kuri nwàdzu nwo ndu pwapwa ci tsadzu ku nwàdzu fin tan waa apyù na seku. ¹⁶ Nī yini waa nī ci tan bu Cidon bà? Kati Denden bu Ci don ka ci ki fin mikyinni. ¹⁷ Ci numa ra apa dzun ma tsaba tan bu Cidon, Cidon ri tsabaku du. Ki cin waa atan wa wa Cidon ci bye wa nyenye, ani nī ciri atan’a waji. ¹⁸ Ko kani kata kuká byea dia ba. Ko kani kata ki finni mana ga danra ku ba ayì bu fin tswen wa tanma, kú nde dia ka sen kan apa wa jeje jiji ku du bu Cidon. ¹⁹ Ci numa ra ayì bu fin tswen wakara ci abu wa nya hwan azota ki bye Cidon, ci tsa dzu waa be tā ki fin Afa bu Cidon danra, "Akwen bu Cidon pan pajukun baa ci ba ayì ba zobyenbe bu fin tswen wakara." ²⁰ Cidon kà dan aji dzun ki fin Afaa danra, "Cindoi Cidon mbyà aji wa gaga bu pajukun baa ki fin tswen kire ci abu wa nya hwan azota." ²¹ Ci numa ra ko kani kata kúká caco ki cin pajukun ba, ki cin ke ba, koke kata ci buni. ²² Ko Bulus, ko Apolo, ko Bitrus, ko fin tswen waa Cidon mà ra, ko cindi, ko aki, ko abu waa bena tsa tanma, ko abu waa beri tsa ki pyen kire, abu baakara kata ci buni. ²³ Ki cin waa nī ci zhenzhen bu Yesu Kiristi.

¹ San kari ní hoi so danra ī ci pajukun baa tsa butso bu Yesu Kiristi baa Cidon nde ajia wa yu kuku kwai ki vo. ² Ki nya ken wakara abu waa beri nya ki bye apa waa cindoa nde abu kwaku ki voa ra ciri, ko ayo wani kata be duku ba wajinderi ko nukon. ³ Ci numa ra bumi ki bye mi nima ken mbafomi cia abu wa tutu ba, ko pajukun ma ken mbafomi ki pyen bu kwen. Ki cin waa ami ba dimi m mbyàmi bo bu dimi ba. ⁴ Ki cin waa m yimi abu dzun waa m dà ba, ama m yì sanmi ba, Cindoi Yesu ciri apa wari ga kwen. ⁵ Ci numa ra niká dzodi fo apa dzun kwen ávo waa anyunu ngha mbaa raba, kapyen waa Yesu Cindoi ku kasen bi ba. Kuri bi fu abu baa yuyu ki fin fitse, ku kari bi pofan aji wa ki fin mikyin ki fa byeya numa. Ki bye wakara numa ri hwa Cidon ri yi ko kani kata votso ki bye butso waa ku tsa. ⁶ Bandomi, aji baakara mna dan we ki dimi ba Apolo. Ní fyen ki byei ní yì cinna bu aji waa Cidon dan ki fin Afaa danra, "Níká kyenkyon danyà jinni ki bye aji baa be ta so ki fin Afa ba." Ki cin waa jiji apa dzun ki finni kúká ndē di nyā apa dzun wa fyen bu dzun ku sinni apa dzun ba. ⁷ Ayoo, buu una ga danra ukā apa dzun bake waji? Ake waa u du ki vou waa Cidon yiuri ba? Tsanini una ndē diu ba abu waa Cidon mbyà san hwan’a ri hunnu yiu? ⁸ Tanma nī ji ze ra, ni fa hwen ra, Jinna nī kasen kàn akù kàn abon na tsa tsonni hwani cei kiyo riba, San kamri waa ni na akù nde abon sen yo ra ki cin waa iri bi bani tsa tson ki dzun, ⁹ Ki bye wa mbyàmbya bumi eiri, ai fotson bu Yesu Ki risti Cidon ndei so ci tsadzu pajukun baa kwen tabe beri bwanbe bwanbwan. ī kan abu wa mbyàmbya ki bye fin tswen, ba zhentsōn, ba pajukun. ¹⁰ Ki cin bu Yesu Kiristi ī kan pajukun baa ci jeje numa ki zo bu pajukun. Ama buni nina ga dan ra ni ci ba yì ki cin bu Yesu Kiristi waji. Ai ci baa byèbyè, ani ci baa gbangban. Pajukun nari yini hwe ama bui bena sinnii. ¹¹ Avo jinna ba, ambo buju ba mbo jan na bwan’i, atukpai yà bài ki di, ina wa gba, ī ci baa kyenkyon tan ki don na kyen, ī bai ndo bu dii ba. ¹² Ina kofyin tsa butso ba vo dii ina ji ba vo dii. Bena tsoi ce, ama ina pya wa sansan bu Cidon webe yo. Bena tai fyin ina gban mikyin. ¹³ Bena sinnii ina gban mikyin. Avo jinna ba, be ndei so abu wa shendi numa ki fin tswen ashijen bye waa beri za abu nya yo. ¹⁴ Mna tami afa wakara yini ki cin waa jiji ḿ yi tsenni ku panni ba, ama ki cin waa jiji m gbeni tson, ani zhenzhenmi baa con con. ¹⁵ Ko nima ci ba manu manu hwehwe numa zan dubu dzwe baa ri fyenni abu ki nyaco bu Yesu Kiristi, nī ci ba atani dzun dzun tori numa vinni. Ki cin waa ki fin zen bu Yesu Kiristi m mbani ri, ki bye Aji wa Sansan bu Yesu Kiristi waa m nde bi dan yini ra. ¹⁶ Ci numa ra mna voni danra ní fyen abu ki dimi. ¹⁷ Abu wa hwa m tson Timoti bi ki byeni ra ki cin waa m mbaku mbamba ki bye aji bu Yesu Ki risti nwu wa conconmi wa ci ba cin wa na jinni ki bye Cindoi. Kuri bi kyepanni yo cinna bu cindi wa ripye ki fin zen bu Yesu Kiristi waa mna bà. Aji wakara ci aji waa mna fyen tà yi pajukun baa bà Yesu kata ko kini. ¹⁸ Pajukun badati ki finni na ndē di danra mri bimi ki byeni jiji m mbyàni riba. ¹⁹ Cidon ma zen nde mri bi ki byeni mwamwa numa jiji m mbyà vo butso bu pajukun baa na ndē dibe ra, ko bena tsa butso wa byenbyen ajinderi re, ko bena gban nu azota re. ²⁰ Ki cin waa butso bu Cidon cia abu wa nde hwa nu gban nu kiyo ba, ama ci butso bu gbentsòn. ²¹ Buni ni mbyà nini? Nina con m bi ki byeni ba akpan re, ko m bi ba wa tashuma bu acon?

¹ M fo bena danra pajukun badati ki finni na tsa agya har apa dzun ba awa bu ataa na na. Tswi agya wa tsatsa wakara ci abu wa shendi wadzun waa ko ki fin pajukun baa yìbe Cidon ba ri zenbe nde tsa abu wakara ba. ² Aji ba numa tuani ba, waa ní ten nwà apa waji wakara taya hun ki finni, ama nina foji dini wa ndéndē na we yo. ³ Ko waa bumi azomi baani ki byeni, ama kyinmi ci tiri ki dini na kyepan bani. Kati, ki fin zen bu Cindoi Yesu Kiristi m kapyen ge kwen bu apa wakara gbogbo numa ra. ⁴ Ayo waa niri kwan cinkwan ki bye dzundzun ra, ami du mikyin mi bani ci bye dzundzun. Ci numa ra ki bye gbentsòn bu Yesu Kiristi ⁵ ní fan tswi apa wa kara dzo Shetan ki vo jiji ku tsaba dia, anyunu wa kennu Cin doi Yesu Kiristi ku nwàdzu cin dia. ⁶ Cucuni waa nina cu ra san’a ba! Nī yiní waa yist titi numa ri yi agan bu borodi kata fè poto po numa ba? ⁷ Ní ho yist baa riko hora pwadzu nyaya hun jiji ní kan agan bu borodi wa baani ba yist ci tsadzu waa m yinu nī ci numa ra. Cinkwan waa ī ndi na kwan kyepan ba waa Cidon ndi nwàdzu bayakui ki Masar ra ci Paska. Ama tanma ra paska bui ci Yesu Nwudòn bu Cidon waa be panku ge bwan ki cin’i. ⁸ Ci numa ra iká kyepan ba Ci don ki bye cinkwan waji ba bo rodi wa ci ba yist ba, tsadzu abu wa baba ba agya wa tsatsa. Ama í kyepan ba Cidon ba borodi wa baani ba yist wa ci borodi wa nyenye ba wajinderi. ⁹ Ki bye afami wa kapyen waa m ndi ta yini ra, m nuni dòn danra níká kwan cin ba pajukun baa tsa agya ba. ¹⁰ Aji waa m zen ra, m zenmi ki cin bu pajukun baa yìbe Cidon ba, baa na tsa agya ba, ko baa vya ju, ko baa ri ji bupyu, ko baa ri wa aki ba, ki cin waa nima con ní gadi babe kata ci ken ní pwadzu fan fin tswen wakara jinni hun. ¹¹ Ama aji waa m dan yini ra, mna zen aji bani ki cin apa waa be mana baku danra, ku ci nwuza, ama ku mana tsa agya, ko ku mana wa aki, ko ku mana tso ce, ko kuma ci apa wa pyen jan, ko ku mana ji bupyu, ci numa ra, tswi apa wakara ko buju wa jiji ma níká dzo vo ki dzun baku ba. ¹² Ajimi dan ke kiyo waa m fo baa cibe bui ba kwen? Ama abe baa ki fin abini ra nī ciri baa ri fobe kwen. ¹³ Cidon ciri apa wari fo pajukun baa ki ya kwen. Ní ten apa wa tsa abu wa baba ra ki finni pwadzu.

¹ Ki finni hora aji dzun ma tu apa dzun ba nwuzaa titi numa tsanini gbogbo numa kuri nde nwuzaa ya dzwa kwen ki pyen bu pajukun baa ji bupyu? Àke tsari niri ndeni ku ribi ki pyen bu pajukun baa bà Yesu jiji be foku kwen ba? ² Nī yini waa baa bà Yesu ri fo fin tswen kwen ba? Nima yinu danra niri fo fin tswen kwen, nī kenni waa ní fo kwen ki cin abu baa titi ba? ³ Ko nī yini waa ai iri fo abe zhentsōn kwen ba? Fyin mbye abu baa ki fin tswen tanma? ⁴ Nima ci ba aji badati baa tanma baa nina con be fo kwen ki cinbe, ki cin ke nina ho dini naya ki pyen bu baa kenbe abu dzun ba ki bye abi bu baa bà Cidon ba? ⁵ M dan numa jiji tsenni ku panni. Ase ko apa dzundzun tori numa baani ki fin ni wa ci ba kyinye wari tsaka wa mbyāsan abu dzun ki fin bazhen za? ⁶ Ama tanma numa nwuza ba nwuza ho dibe naya kwen ki pyen bu pajukun baa yibe wajinderi ki bye Yesu ba. ⁷ Tanma numa ki cin waa aji bu kwen wa dzwadzwa ki tiri ki yo bani tà danra ani kata nī jan nya co. Bà sanfo kari ni gban mikyin ba bupyù waa bena jini yo raba? Bà sanfo kari ní gban mikyin ki cin tswaku waa bena tswàni yo raba? ⁸ Aji wajinderi ani ba dini nina nwà dini nwe du, nina tswà dini tswaku numa du, ama azen bāā danra, nī ci bazhenza. ⁹ Ko nī yini waa pajukun baa tsa abu wa baba ri nyani ndo tson bu Cidon ba? Níká bye dini ba. Ní yinu danra, baa ri tsa agya, ba baa ri wa aki, ba baa ri nyà wa bu apa, ba wuwa wari na ba wuwa joa, ba wunu wari na ba wunu joa, ¹⁰ ba baa vyi vyu, ba baa vya ju, ba baa ri pyen jan, ba baa ri tso ce, ba baa ri jī apa, abe kata beri kabe ki ndo tson bu Cidon ki don ba. ¹¹ Ci numa ra badati ki finni ndi ci numa du, ama tanma Cidon tso nyeni honi kan pajukun bua ra. Ku nwàdzuni ki bye zen bu Yesu Kiristi ba Denden bu Cidon. ¹² Apa dzun ri danra, "Koke kata ci abu wa sansan ki byemi, ama bà koke kata fye wa tsatsa ba. Koke kata ci abu wa sansan ki byemi wa tsatsa, ama mri zen mi nde m kan nyà bu abu dzun wa tsatsa ba." ¹³ Apa dzun ri danra, "Cidon yii buju tswi tswi wa ji we fin’i afin ci jiji bu buju wa jiji." Ama Cidon ri hwa afin ba buju kata ri tsababa ki jinni. Adi bu apa cia jiji bu agya wa tsatsa ba, ama ci jiji bu Cindoi Yesu. Cindoi Yesu ka ci jiji bu dii. ¹⁴ Cidon ba do Yesu don ki bye aki, ci numa ra kuri ba doi ki bye gbentson’a numa du. ¹⁵ Nī yini waa adini ci abèn di bu Yesu Kiristi ba? Ko m nde abèn di bu Yesu Kiristi ya bàn kwan ba awuwa gbaza? Sheshe! ¹⁶ Ko nī yini waa apa wama godi ba agbaza be ci tsadzu abu dzun dzun ba? Ki cin waa be tata so ki fin Afa danra, "Abe pyinna beri kan awidi dzundzun." ¹⁷ Ama apa wama kwan cin ki dzun ba Cindoi Yesu beri ci abu dzundzun ba dibe ki bye Den den wa nyenye. ¹⁸ Ní shesho gadi ba agya wa tsatsa. Tswi abu wa baba waa apa ma tsa ba dia kata ri kàa ki dia ba, ama abu wa baba bu agya wa nyanya ri gbe fyin yi di. ¹⁹ Ko nī yini waa adini ci atan bu Denden wa nyenye wa ki finni waa nī pan ki bye Cidon raba? Ani ni cini Cindo bu dini ba. ²⁰ Ki cin waa adini ci abu Cidon waa ku hwénhwèn ba asa bu Yesu. Ci numa ra abu waa nima tsa ba dini kata ku ci wa nya son bu Cidon.

¹ Tanma mri dan san yini aji ki cin aji wa mbyembye waa nī tā ki fin afa bi yimi ra. Apa wama ci tiri nukyon ci sansan. ² Ama ki cin waa apa ku she gadi ba agya wa tsatsa, san kari ko wunu wani kata ku bàn wuwa, kati, ko awuwa wani kata kúkà ci ba anu ben’a. ³ San kari awunu ku yi awaa abu wa vya mikyin bu awaa, kà ci numa ba wuwa ku yi anua abu wa vya mikyin bu anua. ⁴ Wuwa baani ba gben dzun bu dia ki cin bu adia se anua, kà ci numa ba wunu ku baani ba gben dzun bu dia ki cin bu dia se awaa. ⁵ Níká den dini yo ba, se nima zen nde ri ba dini danra niri cikpo ya zan anyunu badati ní fan dini yi ndedzwa wa dzwadzwa ki nyaken wakara hunnu níkà mbyā shon kwan dzun, jiji Shetan kúká bi byeni ki cin waa nī gban mikyin kagben ba. ⁶ Aji waa mna dan yini kara cia dòn ba, ama se abu waa mikyinni ma con. ⁷ Ko waa ci numa ra, ki byemi san kari apa ku ci tsadzu m, Ama ko kani kata ci ba vyon waa Cidon vyonku. Apa dzun ci ba tswi vyon dzun, apa dzun ka ci ba tswi vyon dzun ken. ⁸ Abu waa m mbyà ki cin bu baa ci tiri nukyon, kà ba bawuwaki san kari be cibe numa ci tsadzu waa m ci ra. ⁹ Ama nima gban kani mikyin ba, ní banni ben, San kari apa ku ban aben, ba nū waa aeon wa ki mikyin’a ku kaagben dia. ¹⁰ Ani baa bàn ben rara, mna nuni dòn, adòn waji cia dòn bumi ba. Ci don bu Cidon Cin doi wa danra awuwa kuká gadi ba nua ba. ¹¹ In kuma gadi ba nua se kú cia numa kuká bàn wapye riba, ko ku kasen ya bàn vyon ba nua. Ci numa ba awunu du kúká ngha awaa ba, ¹² Wadati ami na dan ri, cia Cindoi ba. In nwuza dzun ma ci ba awuwa dzun wa yia wajinderi ki bye Cidon ba, ama awuwa waji ma zen nde danra bé ci byecu ki dzun kúká gafan ba awuwa waji ba. ¹³ Kati, awuwa wama ci ba awunu wa yia wajinderi ki bye Cidon ba, ama kuma dan bé ci byecu ki bye dzundzun kúká fan awunu waji ba. ¹⁴ Ki cin waa wunu wa yia wajinderi bara, Cidon ri zen nde baku ki cin waa ku ci abu dzun dzun ba awaa. Ka ci numa du ba awuwa wari yia wajinderi bara Cidon ri zen nde baku ki bye waa ku ci dzundzun ba nua wa yi wajinderi, Ma cia numa ba, Cidon ri zen’ande ba bazhen zhenbe ba, ama Cidon na zen nde ba bazhenzhenbe hora. ¹⁵ Ama apa dzun wama yia wajinderi ki bye Yesu ba, kuma con ku gafan ba awaa wa yi wajinderi ku gafan’a. Kà ci numa ba awuwa wari bàa Yesu ba, kuma con ku gafan ba anua wari bà Yesu aku du ku gafan’a, ki cin waa Cidon ri con í ci byecu wa rito. ¹⁶ Au wuwa, uri tsanini yinu danra u ribi nwàdzu nuu, kati, au wunu du, uri tsanini yinu danra uri tsaka wa nwàdzu awàu, ¹⁷ Ko kani kata ku ci byecua waa Cidon yiku waa kukà baku nde kiyo. Wakara ci abu wa fyenfyen waa mna fyen abi bu baa bà Yesu ko kini kata. ¹⁸ Ko apa wani kata wama ndi kyu abukua hunnu Ci don hun baku nde, kuká nga ku kasen ya yi abukua ku ci akon ba. Apa waa Cidon baku ba abukua ki tiri kon numa kuká nya nyaco waa be kyuku yo ba. ¹⁹ Ko apa wama kyu abuku ko apa wama kyua ba, cia abu dzun ba, apa ku kon dòn bu Cidon maari. ²⁰ Ko apa wani kata ku ci byecua waa ku ndi ci Cidon baku ra. ²¹ Uma ndi ci anya dede waa Cidon bau nde ra, úká gau ji dzun ba. Ama uma du nyaco waa ú kan aku diu ú pan nyaco waji. ²² Apa wama ndi ci nya bu apa dzun, Cidon Cindoi baku nde bi, ku kan akù dia ki bye Cindoi ra. Kati, apa wama ci bye cu bu aku dia Yesu Kiristi ma baku nde apa waji ci nyaa. ²³ Ci don hwenni ba asa bu Yesu ci numa ra níká zen nde ní kan nya bu apa dzun ba. ²⁴ Ani bandomi, san kari ko kani ku ci byecu bu vyon ba Cindoi Yesu Kiristi ci tsa dzu waa ku ndi ci baku ayo waa Cidon ndi baku nde kapyen ra. ²⁵ Aji ki cin bawuwa baa ngha banbe aben raba ra, m cimi ba aji dzun wa dzu bye Cindoi bi ba, ama mri zen aji yini tsadzu apa waa ki bye wa sansan bu Cidon hwari hunnu m kan apa wajinderi. ²⁶ Mna mbyà abu wa san kari apa ku cia numa tsadzu waa ku ci, ki cin fyin wa na tswen ra. ²⁷ Uma ci ba ajù bu aben ki hwan u, too, ká nga danra uri gbekyu re don ba. Ajù bu aben ma baani ki hwan u ká nga danra uri ban ben ba. ²⁸ Ci numa ra ko apa ma ban wuwa baa ba. Ko nwu mafan wa wuwa ma ban aben baa ba. Ki cin waa baa ma ban ben beri wa fyin ki bye byecu bu aben, ami mna con m kodzuni afyin waji yo. ²⁹ Bandomi, cinna bu aji waa mna dan yini ra ci kara. Anyunu nabèn jinni ra. Ki cin wakara bawunu baa ci ba bawuwa be ci tsadzu be cibe ba wuwa ba. ³⁰ Baa na ku ndekuto be ci tsa dzu baa na pebe mikyin ba, Kati, baa na mbu mikyin be ci tsadzu bena mbube mikyin ba. Kata, baa na hwen ti be ci tsadzu bena hwenbe ba abu dzun ba. ³¹ Baa ri tsa butso ba tswén bu butso wa ki fin tswen béká nde gbenbe yi tswén bu butso waji ba, ki cin waa abu wa ki fin tswen ri nwā dzudzu. ³² Abu waa mna con ciri ní nwàdzu ki fin fyin wa ki fin tswen. Apa wama ci nukyon kuri lolo hwan’a so bye butso bu Ci don wa tsatsa ki cin waa kuri con ku tsa abu wa we hwan bu Ci don ki bye butso waa kuna ri tsa ra. ³³ Ama apa wa ci ba wuwa ri nde mikyin’a so bye butso wa ki fin tswen, ki cin waa kuri con ku tsa vya mikyin bu awaa. ³⁴ Mikyin’a gafan pyinna ra hun. Awuwa wa ci nukyon ko nwu mafan wa wuwa kuri nde mikyin’a so ki cin butso bu Cin doi. Ama awuwa ben ri nde mikyin’a so bye butso wa ki fin tswen ki cin waa kuri con ku tsa abu wa vya mikyin bu nua. ³⁵ Mna dan yini numa ki cin waa jiji m tsazani yo, cia tsadzu mna con m tseni jù ki hwan ba. Mna con ní tsa abu wa sansan ki pyen bu Cindoi, ní fan dini ba mikyinni so bye Cindoi Yesu, abu dzun kúká yi mikyinni ku gafan jinni pyinna ba. ³⁶ Apa wama tsaa wuwa ben waa ku vo so myi ra sansan ba, ma fanku so byeri mu mbamba wa ya ndo ben ko nwādzudzu ma, kuma gban kaa mikyin ba, ku tsa abu wa vya hwan’a be tse aben, cia abu wa baba ba. ³⁷ Apa dzun ma dan ki fin mikyin’a ba gben danra kuri ban’a ben ba, kuri tse gban ki bye nugea, kati apa dzun teaku tete danra ku tsa numa ba, ama apa wama ci numa san kari kuká ban wuwa waji ba. ³⁸ Ci numa ra apa wama nde nwua yi aben ci abu wa sansan, apa wama ndea nwua yi aben ba, san kari. ³⁹ Ajù bu aben sa ci tiri ki hwan bu wuwa dede waa anua ci tiri ba cindi. Ama anua ma hua ra ku ci ba nyaco waa ku ban wunu dzun wa sanku ki mikyin, ama se ma ci apa wa bà Cidon. ⁴⁰ Abu waa m mbyà ra ciri, awuwa waa anua ma hu ra, kuká ban wunu dzun riba, kuri mbu mikyin kari waa ku ban wunu dzun. Mna ga danra aji wa gaga waji dzu bye Cidon bi.

¹ Tanma mna zen aji ki cin bucon waa beri bwan wa bakindo kiyo. ī yinu danra katai kata ī ci ba ayì. Ayì ri hwa apa ri ndē dia, ama a con ri hwa apa ku ci ba hwe wajinderi. ² Apa wa mana ga danra ku yi koke kata nu, ku ngha yia abu ken wa fye waa ku yi raba. ³ Ama ko kani kata wama con Cidon Cidon ri yìku nù. ⁴ Tanma ra ī hwayi aji ki cin buju waa pajukun ri bwan wa bakindo kiyo ra. ī yinu danra bakindo baani ba cindi ki fin tswen wakara. ī kà yinu Cidon ci dzundzun vinni ki fin tswen wakara, ma nwādzu baku ra Ci don dzun baani. ⁵ Ko waa abu baa apa ri babe danra, "Baki ndo" Ki tiri ki don ko ki jinni. (Tsadzu waa iri fo zen bu "Bakindo" ba abe "Cindo" suu numa). ⁶ Bui ī yinu danra Cidon ci dzundzun vinni. Atai wà mà tswen kán mà tswe kù. Ki byea iri du cindi. Kati, Cindoi Yesu Kiristi ci dzundzun kenken. Ki dia Cidon mà koke kata. Ki dia hunnu ī du cindi. ⁷ Ama bà ko kani kata hwayi ba abu baakara ba. Ki cin wa kara hwa pajukun badati baa ndi na wa bakindo kapyen waa tan ma be bi bà Yesu, bema ji buju waa be wa bakindo kiyo, be nde bakindo so tsadzu abu dzun, be babeni ba mikyin wa ci ba gben. Bena we hwan danra buju waji ri tsababe ki pyen bu Cidon. ⁸ Buju cia abu wari hoi ya ki ndo Cidon ba. Ko. ima jii ba, iri koi dii kasen ba nyaken ba. Ko ima ri ji ī kwan’i dii abu dzun kiyo ba. ⁹ Ama ko kani ki finni ku wà dia sansan ba byecu bu akù dia waa ku du ra, kúká hwa baa ngha tsebe ba gben ki fin mikyinbe raba be ta tsu ba. ¹⁰ Dzun tiri ba, apa dzun wa gban’a ki nyaco bu Cidon ba, ma mbyàu au wa ci ba ayì mana ji buju waa be wa bakindo kiyo ki ndo aki, wakara ri gbea mikyin’a jiji aku du ku ya ki ndo aki ku ya ji buju bu bakindo ba? ¹¹ Ci numa ra ayiu tsaba nwuzau wa byebye wakara waa Yesu Ki risti hu aki jiji’a ra ra. ¹² Ci numa ra nīna tsa bazhenzani abu wa baba nīna nukwanbe mikyinbe ciki ciki numa be ci byebye numa. Abu wa baba wakara nī tsa Yesu Kiristi ba dia. ¹³ Ci numa tswi buju waa mri ji, ma kan wari hwa nwuzami ku kokwi ki nyaco bu Cidon, ko ma awī ma mri dzwanmi riba, ki cin waa m ká hwa nwuzami ku kokwi ba.

¹ Ami cimi byecu bu akù dimi ba? Ami cimi fotson bu Yesu ba? Ami mbyà Cindoi Yesu nu ba zomi, Ani nī jini byetu bu butsomi ki bye zen bu Cindoi ba? ² Ko waa badati zenbe nde danra m ci fotson ba, ama ki byeni ci ken ní zen nde danra m ci fotson. Ki cin byecuni waa m gbeni kabi ki nyaco bu Cindoi Yesu Kiristi ciri wa tà danra m ci fotson. ³ Ayo waa pajukun mari ken mba fomi jiji be panmi ba ada dzun, aji waa mri mbyebe ciri, ⁴ ko m kenmi waa m du buju wa jiji, ba jan wa wawa ba? ⁵ Ko m bamni ba gben dzun waa m kyenkyon ba awuwa ben wa yi wajinderi, tsadzu abe fotson badati, ba bazhenza bu Cindoi Yesu, kà ba Bitrus du, na kyen ra? ⁶ Ko ami ba Barnabas kenken ci ken í tsa butso ba vo dii hunnu í du buju wa jiji ba jan wa wawa? ⁷ Nī fo fo danra apa wa nuken dzun ki fin baa nuken ri jia ba dia tiri, kari dzea dia tukpa tiri fora? Akani wa nà ada anab ri jia nwaa ba? Akani wa pyu ana ri nì wa pen jan myia wa? ⁸ Aji waa mna dan ra, cia aji wa gaga bu apa maari vinni ba. Ki cin waa adòn bu Cidon dan numa du. ⁹ Ci tsadzu waa be ta ki fin adòn bu Musa danra, "Níká nde abú be tsuken nu bu ana waa niri nde ya ri tsa butso bu aza wa dada ba." Nina ga danra Cidon ri con ana maari vinni re, ¹⁰ ko aji waa kuna dan ra kuna dan ki cin’i du? Ajinderi be ta abu wakara ki cin’i. San kari apa wa nane ku lolo hwan’a so danra kuri du abu dzun ki daa. Kà ci numa ba apa wa da aza, kuri lolo hwan’a so danra kuri du vokwin ki bye wa sansan bu adaa. ¹¹ Bui waa ī ndi nde aji bu Cidon tà ki fin mikyinni ra, ribi kan abu wa ci ba fyin ki byeni waa í ben buju wa jiji ba tukpa wa dze di ki byeni? ¹² Badati baa ri tsa butso bu Yesu ma ci ba gben wa du buju ki voni ji, bui ī kaibe waa í du buju ki voni ka bube waa nī yibe raba? Ama ī tài gbentsòn waji ba, nu waa í tà gbentsòn waji numa ī wa fyin bu koke kata jiji íká tsa abu dzun wari hwaden Aji wa Sansan bu Yesu Kiristi ku ya pyen ba. ¹³ Ní yinu sansan danra apa wari tsa butso ki tan wa wa Cidon ri du buju wa jiji bua ki fin buju baa pajukun ri ten bi wa Cidon kiyo ra. Kati, baa ri tsa butso ki bye cin kyen kyen be kana du nyi kwinbe ki bye bucon waa beri ge bwan ki cin kyenkyen ra, ¹⁴ Ci numa ra Cindoi Yesu nu dòn danra baa da dòn bu Aji wa Sansan be du bujube ki di bu adòn wa dada be. ¹⁵ Ama bumi m pan tsemi gan gan numa ki cin gbentsòn baakara ba. M tāmi afa wakara ki cin waa jiji ní tsami numa tanma ba. Ki cin waa anu waa apa ku mbyà acò waa mna ca ra ci abu wa nya hwan azota, sanfo waa aki ku bwanmi. ¹⁶ Ro waa mna dan Aji wa Sansan bu Yesu yi pajukun ra mri ndemi cinmi ki don ki cin aji waji ba. Ci ken m dan yi pajukun aji bu Ci don, mma tsami numa ba, ci abu wa ciei ki byemi. ¹⁷ Akyan mri ma kyan tsa butso waji ba mikyin bu dimi mri kyan du vokwin. Ama cia numa ba, Cidon nderi kwami ki vo danra m tsa, ci numa ra ci ken m pan butso waa Cidon nde yimi rá m tsaku yo. ¹⁸ Ci numa ra vokwin bumi ci kake kiyo tanma? Avo kwinmi ciri ḿ dan yi pajukun aji bu Ci don, ki bye conmi mká nyà vokwin kiyo ba. ¹⁹ Ko waa m cimi anya bu apa dzun ba, ama m nde dimi kan nya bu ko kani kata ki cin waa jiji m gbebe bi ki bye Cidon. ²⁰ Ayo waa mri tsa butso ki bye Yahudawa m nde dimi so ci tsa dzu m ci Yahudawa ki cin waa jiji m gbebe bi ki bye Cindoi Yesu. Akwen bu dòn waa Cidon yi Musa ra panna Yahudawa ki tiri ki cin. Dede waa mna tsa butso babe ra ci tsadzu akwen waji pan nami ki tiri ki cin du, ko waa akwen waji baani ba gben dzun ki cinmi ra. Ki cin waa jiji m gbe pajukun baa kwen ki cinbe ra bi bye Cidon. ²¹ Kà ci numa du, mma tsa butso ki bye tsu badati baa cibe Yahudawa ba, mri tami dimi yibe danra m ci Yahudawa ba. Akwen bu dòn bu Musa pan naabe ki cin ba. Ci numa ra mri tsa abu tsadzu abe jiji m gbebe bi ki bye Yesu. Tàa danra mri shèmí dòn bu Cidon ba, ki cin waa kwen bu Yesu Kiristi pan nami ki tiri ki cin. ²² Dede waa m mana tsa butso ki bye baa wajinderibe ma ci bye bye numa, ci numa ra mri tà yibe ci tsadzu wajinderi bumi gban kaa bube ba, ki cin waa jiji m gbebe bi ki bye Yesu. Mri tà dimi ki bye ko kani kata danra ī ci abu dzundzun. Ki cin waa jiji nyaco dzun ma ki tiri m gbe badati bi ki bye Yesu. ²³ Mna tsa abu baakara kata ki cin waa jiji ḿ dan Aji wa Sansan bu Cindoi Yesu Kiristi yi pajukun be fo, jiji ami du, m du vokwin wa sansan ki bye Aji waa mna dan yibe ra. ²⁴ Nī yini waa pajukun baa mbasi bu ashò wa sheshe kata ri ci pyín adzundzun vinni ki finbe ri jiri vyon wa vyonvyon bu ashò waji ba? Ci numa ra ní foji shò wa sheshe ki cin keni jiji ní ji. ²⁵ Baa ri jojo bu asi wa mbamba kata, beri gban mikyin wa tswi fyin wani kata. Bena tsa numa jiji be jī abu wari tsababa ki jinni dán numa azota, ama bui jiji bu abu wari tsabaa jinni ba. ²⁶ Ki cin wakara bumi mna shesho pen penpen gemi mikyin ba. Ka ci numa mna dagba numa, mna dami vo da abe wa ki fa byeya ba. ²⁷ Mna jon pukan dimi kata mna pan dimi ki cin waa ki nyaken waa mma dan vinni aji bu Cidon yi pajukun ra, ami ba dimi m ká kò ba.

¹ Bandomi, mna con ní kye pan sansan ba abu wa ndi du abe bayakui baa ndi na bà Musa ra. Cidon bebe nwini bu anandi ki bye akyon wa kyen kyenbe ki nyaco. Katabe kata Cidon hobe kyenkyon pwadzu ki fin teku waa beri baku danra teku wa nyonyo ra pwadzu ya kyan myi. ² Ki bye nwini bu anandi ba teku waa be kyan ba abe ra be du batisma wa tà dan ra pajukun baaji kata na bà Musa, ku ciri cinbe. ³ Ki bye abu wa ken nwo waa Cidon tsa yi buju dzu don ko jinni ra, be kwan cin kenbi ji buju waji ki bye dzundzun kata. ⁴ Ki bye abu wa ken nwo dzun waa Cidon tsa yi jape dzu ki di bu aban ra, be kwan cin kenbi wa bye dzun dzun, aban waji ci Yesu Kiristi. ⁵ Ko waa ci numa ra Cidon foa vya ba badati baa hwe kari ki finbe ba, ci numa ra Cidon bwan jibe nya hwan. ⁶ Í mbyà abu baakara ci abu baa í fyen aji ki cinbe ki byei jiji íká vya ju bu abu baa baba ci tsadzu waa be ndi vya raba. ⁷ Íká wa aki ci tsadzu badati ndi ki finbe na wa raba. Ci tsadzu waa be ta ki fin Afa bu Cidon danra, "Pajukun wena jinni na ji, na wa, bekà do don na foji ajo wana gbegbe." ⁸ Iká tsa agya ci tsadzu badati ki finbe ndi na tsa raba. Anyunu dzundzun pajukun zan dubu didzun nwa tsara hu ba jinni kata. ⁹ Iká ken mbafo Cidon ci tsadzu badati ki finbe ndi tsa raba. Anyo dzwan bwanbe kata. ¹⁰ Íká nwinde ci tsadzu waa pajukun badati ki finbe ndi na tsa raba. Cidon tson bazhen tsōn’a bi bwan jibe kata, ¹¹ Abu baakara tsa numa ki cin abu wa bababe, í mbyàbe ci abu baa í fyen aji kiyo ki cinbe ki byei. Be tābe ki cin waa be nui don danra íká ten abebe tsa numa ba. Í hwayi sansan ki cin waa ī ki fin we baa kennu tanma. ¹² Ki cin wakara apa wama ga danra ku pantse gbangban ku tsa sansan sheji waa kúká bi kokwi ba. ¹³ Tswi mbafofo dzun wari duni baani, se tswi mbafofo waa apa ri tsaka wa gbanka mikyin kiyo. Ama Cidon ci apa wajinderi kuri zen’ande yi wa mbafofo bu Shetan ku kagbenni ba, Ama ki di bu wa ken mba fofo hunnu kuri tsani nyaco wa nwàdzudzu. ¹⁴ Ci numa ra, ani bandomi baa concon ní fan aki wa tsatsa jinni. ¹⁵ Mna zen aji bani ci tsa dzu nī ci pajukun baa ci ba ayì, ci numa ní mba abu waa mna dan yini ra, ko ci wa sansan re, ko ci wa baba. ¹⁶ Avyé wa wa jape jibi bu Cindoi Yesu waa iri she shia kiyo ra, tàa danra ī du vyon wa banban ba dii ki di bu asa bu Yesu ba? Ayo waa ī mana ji borodi waa be koken gafanku ra tàa danra ī ban vyon ba dii ki di bu awi di bu Yesu Kiristi ba? ¹⁷ Ki cin waa borodi ra ci agan dzundzun, ci numa ra ai baa ci suu ra ī ci widi dzun dzun, ki cin waa ai kata ī kwan dzun na ji agan bu borodi dzun dzun waji. ¹⁸ Í kyepan ba bazhenzhen bu Isra’ila beri banbe vyon ki di bu butsobe waa beri tsòn abu ki cin kyenkyen ki don raba? ¹⁹ Cinna bu aji waa mna mbyeni ra dan ke? Bucon waa beri bwan wa bakindo kiyo ra ciri abu dzun re, ko bakindo waji ba dia ciri abu dzun? ²⁰ Cia numa ba ko titi, cin na bu aji waa mna dan yini ra ci kara. Abu waa abe tsu badati ri nde yi aki ra, be nde yi ajon wa baba, cia waa be danra be nde yi Cidon ba, Mri conmi wa kwan cin ba ajon wa baba ba. ²¹ Nyaco baani waa ní wa avyé bu Cindoi, nikà wa avyé bu jon baa baba. Kati, nyaco baani waa ní ji jibi bu Cindoi Yesu nikà ji buju waa be nde wa jon baa baba kiyo. ²² Ko nina con ní ken mbafo Cindoi Yesu jiji ku ngongo bai? Nina ga danra ī kaku ri ba gben? ²³ Nina dan aji danra, "Abu dzun wa sheshe baani." Ci numa ajinderi, ama bà koke kata waa ima con ci abu wa sansan ba. Ci numa adòn dzun baani wari hwaden’i abu dzun wa tsatsa, ajinderi ama bà koke waa ima tsa kata ri yii gben mikyin ba. ²⁴ Ci numa ra ko kani kata kúká tsa abu wani wa vya hwan’a vin ni ba, ama ku tsa abu wari vya hwan bu jo ndoa ku tsazaku yo. ²⁵ Nī ci ba nyaco waa ní ji tswi buju wani kata waa bema ri hwen ji baku ki ti. Níká mbye aji ki cin’a ba. ²⁶ Ci tsadzu waa be tā ki fin Afa bu Cidon danra, "Fin tswen ba abu wa ki fin’a kata ci abu Cindoi." ²⁷ In apa wa bàa Yesu ba ma bani nde buju ki ndoa, nima zen nde, nima ya ra, ní ji ko tswi buju wani kata waa ku ma nde yini, níká we hwan ki cin’a na mbye aji kiyo ba. ²⁸ Ama apa ma dan yini danra, "Be kapyen ko buju waji tswan aki yo ra," ci numa ra níká jini riba. Ki cin waa apa wa dan yini ra kuna we hwan ki cin buju ra níká gbeku kasen ba nyaken ba. ²⁹ Níká ji buju waji ba. Cia ki cin hwan wa wewe buni ba, ama ci jiji bu hwan wa wewe bu apa ra, wa ga danra buju waji sheshe ra. Ko dzun tiri uri mbye aji danra, "Ami ci vo dimi tsa nini mri ngha buju ki cin hwan wa wewe bu apa dzun?" ³⁰ In ami ma kapyen mbu mikyin yi Cidon hunnu m hun ko buju waji tsanini beri bi tsomi ce ki cin abu waa m ji ba mikyin wa mbumbu ki bye Ci don? ³¹ Ko nī mana ji buju fa, ko nī mana wa jan, ko ma kake kata waa nī mana tsa, ní tsa abu wari bi yi zen bu Cidon hwe. ³² Níká gbe nwoja bu atsu wa tata yi Yahudawa, ko tsu badati baa cibe Yahudawa ba, ko ki fin abi bu Cidon ba. ³³ Ci tsadzu ami ki bye abu waa mna tsa kata mna nyàmi abu dzun wari tsaza dimi yo ba. Ama mna nyà abu wari tsaza pajukun baa hwehwe suu numa yo.

¹ Ní ten bemi ci tsadzu waa mna ten abe bu Yesu Kiri sti ra. ² M mbu mikyin bani ki cin waa nina kyepan bami ko nukon, nī kana bà abu wa fyenfyen waa m fyenni ra. ³ Aji dzun waa mna con ní hwayi sansan ciri Yesu Kiristi ci cin bu ko wunu wani kata. Kati, ko awunu wani kata ci cin bu awaa. Cidon kà ci cin bu Yesu. ⁴ Ko wunu wani kata wama kà ki tan wa wa Cidon ku mana dzwa nde, ko ku mana dan aji bu Cidon yi pajukun ba bucin be ci cin’a kuna sinni Cindoi. ⁵ Ko awuwa wani kata wama kà ki tan wa wa Cidon mana dzwa nde, ko ku mana dan aji bu Ci don yi pajukun, kuma kpon’a abu ki cin’a ba kuna tsa dia abu wa pan tsenni. Ma ci numa awuwa waji ba awuwa wa kpa jin abu wa gafanbe baani. ⁶ Awuwa wama kpon’a abu ki cin’a ba, ku ba awuwa wa kpa jin ci abu dzundzun. Abu dzun wa gafanbe baani ki yobabe. Wakara ci abu wa pan tsenni waa awuwa ku kpa jin, ko ku mbi ho jin’a don, ki cin wakara san kari ku kpon abu ki cin’a. ⁷ Ci numa ra cia abu wa sansan waa awunu ku be abu ki cin’a ba, ki cin waa Cidon màku dzu dia, kuri bi tà yi pajukun hwe ba gbentsòn bu Ci don, ama awuwa ri tà yi pajukun ahwè bu nua. ⁸ Ki cin waa Cidon ndea akego bu wuwa mbyā wunu kiyo ba, ama ku nde akego bu wunu mbyā awuwa kiyo. ⁹ Ci numa ra be màbe wunu ki jiji bu awuwa ba, ama be mà awuwa ki jiji bu awunu. ¹⁰ San kari waa awuwa ku kpon abu ki cin’a jiji ku tà yi bazhentsōn bu Cidon be mbyà danra kuna yi anua hwe, ¹¹ Ci numa ki nyaco bu Cindoi Yesu Kiristi awuwa ri cia cindi bua numa danra abu dzun kwan’aku ba wunu ba, awunu kari cia cindi bua numa danra abu dzun kwan’a ku ba awuwa ba, ¹² Ko waa Cidon ten nwà akego bu wunu hunnu mbyā awuwa kiyo ra, ki nyaken kukà tsa yi awuwa mba awunu, kati, koke kata dzu bye Cidon bi. ¹³ Buni nī mbyà aji wa ci kara anini ki fin mikyinni? Ribi san san waa awuwa ma ri dzwa nde ki fin tan wa wa Cidon ku fan cin’a kpakpa wiri yo numa? ¹⁴ Ḿ’m̀, ní mbyà butso waa Cidon tsa ki fin tswen wakara. Awunu ma fan jin’a gon zoro zoro peku pepe gyen te zo numa kuna tsa dia abu wa pan tsenni, ¹⁵ Ama awuwa ma fan jin’a gon zoro zoro numa ci abu wa ba hwe ki byea. Ki cin waa Cidon yiku ajin waji àji ku ci abu wa be tsuken cin’a. ¹⁶ Ci numa ra apa dzun ma ki tiri wama con ku ye yepye bami, too, ai ī yii nyaco dzun riba, kati, abi bu baa bà Cidon yìbe nyaco dzun ba. ¹⁷ Aji waa mna tā yini tanma kara m fomi vya ba kwankwanni waa nina kwan ki tan wa wa Cidon raba. Ki cin waa abu waa nina tà kiyo ra ri gbe abu wa baba ribi hweka abu wa sansan. ¹⁸ Ci numa aji wa kapyen ciri, m fo bena danra ayo waa nima kwan cin ki tan wa wa Cidon anu wa gafan nyana cincin ki yobani. Ci numa ra mna ga dan ra ci aji wajinderi gban, ama m yi sanmi ba. ¹⁹ Ci ken wa gafan fan ku ci tiri ki yobabani ki cin waa jiji pajukun baa ci baajinderi byenbyen be tà dibe ki byeya. ²⁰ Ani kata baa na kwan cin ki bye dzundzun kenbi hora, nina ga danra nina kwan cin ki cin waa ní ji jibi bu Cindoi Yesu, ama cia numa ba. ²¹ Ki cin waa ko kani nari ji tswi buju waa ku con, nina ci bàni zo dini jiji ní ji bye dzundzun ba. Ci abu wa hwa badati mbo na bwanbe, badati na pyenpyen. ²² Akake waji tsari numa hun? Nī mbyàni ndo waa ní ji buju kiyo, ní wa jan kiyo ba? Ko nina sinni ba abi bu baa bà Yesu? Nī kana yi pajukun baa cibe ba abu dzun ki vo ba tsen ni? Mri bi dan yini dan ke? Ḿ nyāni ki cin abu wakara? Mri nyāmi ni ba! ²³ Ki cin waa aji waa m ndi pan ki bye Yesu ba dia, m nde fyen tà yini danra, atsunu, kapyen waa be nde Yesu hwenji yi pajukun baa tsa abu wa baba ki vo, Yesu nde agan bu borodi, ²⁴ Ku mbu mikyin yi Cidon, ku koken gafanku, ku danra, "Wa kara ci widimi wa ci jijini, ní tsa numa jiji ní kyepan bami." ²⁵ Ci numa ki nyaken waa be ji vinni buju kata ra, ku nde avyé ki don, ku danra, "Cinna bu avyé wa kara ci nuge wa ripye waa Cidon ge ba pajukun ki bye asami. Ko ayo wani kata waa nī mana wa jape wakara ní wa ki cin waa ní kyepan bami." ²⁶ Ci numa ra ko dede wani kata waa nī mana ji borodi ra, ko ni mana wa jape bu jibi ra, nina tà yi pajukun danra, nina kyepan ba aki bu Cindoi Yesu ki pyenbe nde numa keke ya zan anyunu waa kuri kasen ribi. ²⁷ Ko kani kata wama ji agan bu borodi bu Cindoi Yesu, ko kuna wa jape bu jibi ki bye avyé ra ba mikyin wa fyea ba, kuna tsa abu wa baba wa tà danra kuna sinni ba awidi bu Yesu ba asaa. ²⁸ Ci numa ra ko kani kata ku kapyen ku mba mikyin’a san san numa hunnu ku nde agan bu borodi ra, ku hun kà wa jape wa ki fin avyé bu jibi ra. ²⁹ Apa wa mana ji borodi wakara, mana wa jape wakara, ku mana hwa yia ba cinna bu fyin waa Yesu wa jijia raba, apa wakara nari gbe kyinna bu Cidon be dia ki cin. ³⁰ Ábu wa hwa badati suu numa ki finni nari dā ado, badati nyani ba gben, badati foji wana huhu rá. ³¹ Akyan iri kapyen mba mikyin’i iri gbei kwen bu Cindoi Yesu be dii ki cin ba. ³² Ama Cindoi ciri apa wari foi kwen tanma. Kuri nàten’i ki cin waa anyunu wa kyen kúká bi foi kwen jiban ki bye dzundzun numa ba pajukun badati baa ki fin tswen ba. ³³ Ki cin wakara, ani bazhen zami, ki bye waa nima bi wà ji buju ní ci bàzo dini. ³⁴ In ambo mana bwan apa dzun ku ji buju ki ndoa sheji waa kwankwanni kúká bi gbe kwen beni ki cin ba. Aji badati se ayo waa mma ka sen bi ki byeni ra hunnu mri bi dan san yini.

¹ Bandomi, m conmi wa fanni so tsōn kankàn numa ki cin abyon tswi tswi waa Den den wa nyenye ri yi apa raba. ² Nī yinu danra avo waa nī ndi ngha yini Cidon raba, nī ndi nari danya nyaco na wa bakindo baa tsùnu. Be yi mikyinni pyi ken jinni kata. ³ Ci numa ra mna dan yini danra apa wama ci ba Den den bu Cidon ki fin mikyin’a kuri zen’aji tsaba zen bu Cindoi Yesu ba. Kati apa dzun baani wari danra Yesu ci Nwu bu Ci don, se apa waji ma ci ba Den den bu Cidon ki fin mikyin’a. ⁴ Cidon ri yi pajukun abyon tswi tswi ama ki bye Denden’a wa nyenye dzundzun kuna yi abyon hora. ⁵ Nyaco waa pajukun ri tsa butso yi Cindoi ci tswi tswi, ama ci Cindoi dzun dzun vinni waa bena tsa butso jijia. ⁶ Pajukun badati be yibe butsobe wa tsatsa ki cincin ki cincin, ama Cidon ci dzundzun kenken wari yi pajukun byon wa tsayì butso waji. ⁷ Ko kani kata Cidon ri yiku byon’a jiji apa waji ku tsaza pajukun kata yo sansan numa baku. ⁸ Denden wa nyenye ri yi apa dzun abyon abu wa fyenfyen, apa dzun ki tiri kuri yiku kyinye, kata kwan dzun ci butso bu Denden dzundzun. ⁹ Ci Denden dzundzun wari yi apa dzun byon wa dà gban pajukun baa dā do. ¹⁰ Ci Denden dzun dzun waji wari yi apa dzun byon wa tsa butso bu Cidon bu baa ken nwo, apa dzun ki tiri ku kari yiku byon wa da dòn bu Cidon, ku kari yi apa dzun byon wa mbyàyi byon waji ko dzu bye Cidon bi re, ko dzu ki bye jon baa baba bi re, Kati, apa dzun ki tiri Denden wa nyenye ri yiku byon wa zen yi nu tsu pajukun tswi tswi. Apa dzun ki tiri ku kari yiku byon wa pofan fin aji bu nene hora. ¹¹ Ci numa ki bye abu baa ci kara kata ci Denden bu Cidon dzundzun wari ga yi ko kani kata abyon wakara tswi tswi tsadzu waa kuri con. ¹² Ci tsadzu waa adi ci dzun dzun, ama ku ci ba abendi ki cincin suu numa ki dia, abendi baaji kata ko waa be ci suu numa ra be kwan dzun kata ci adi dzundzun, kà ci numa ba Yesu Kiristi du. ¹³ Ai kata ī kwan dzun du batisma ki bye Denden bu Cidon dzundzun maari, ci numa ra ī ci adi dzundzun. Tan ma ra ko apa wama ci Yahuda wa, ko apa wama cia Yahudawa ba, ko apa wama ci anya, ko apa wama ci nwutswen, katai kata ī kwan dzun wa Denden wa nyenye wa ci dzundzun waji. ¹⁴ Adi bu apa cia abèndi dzun dzun maari ba, ku ci ba abendi suu numa, ¹⁵ In abē ma danra, "M cimi abendi ba," ko waa ku dan numa ra, ajinderi abu dzun kwan’aku ba adi ba? ¹⁶ Atsōn ma danra, "Ami cimi azo ba, ci numa ra abu dzun wa kwanmi ba adi baani." Ko waa ku dan numa ra, ajinderi abu dzun kwan’aku ba adi ba? ¹⁷ Akyan adi rima ci azo vinni kuri tsanini ri fo aji? Ko akyan adi bu apa rima kyan ci atsōn vinni tsanini hunnu kuri fo fyin bu abu dzun? ¹⁸ Ci numa ra Cidon mbyā aben di bu adi ki cincin ki cincin ci tsadzu waa ku con. ¹⁹ Akyan adi bu apa rima kyan ci go kyekye dzundzun vinni, kuri cia adi ba. ²⁰ Ama go kyekye bu adi ci cincin suu be ho dibe kwan bye dzun dzun hunnu kan adi dzundzun. ²¹ Ci numa azo baani ba nyaco waa ku dan yi avo danra, "M conmi waa u tsazami yo ba." Ko acin ku dan yi abē danra, "Mri conmi waa ní tsazami yo ba." ²² Ama kyekye bu adi baa pajukun na mbyàbe danra be cibe ba gben bara, ci ken í ci babe. Ima cii babe ba, iri tsakai abu dzun ba. ²³ Go kyekye bu adi baa iri mbyàbe dan ra be kenbe abu dzun bara, be ci baa í nde mikyin so dibe kā badati hora. Ba ábe go kyekye bu adi baa sanbe wa mbyàmbyá bara iri nga jiji í mbyā sanbe. ²⁴ Go kyekye bu adi baa ma ci sansan cia ken í tsabe abu dzun ba. Ama Cidon mbyā adi bu apa ki bye nyaco waa ábe go kyekye bu adi baa nyani hwe hora ku yibe hwe kwan yo. ²⁵ Cidon tsa numa jiji avyon wa gafanfan kuká kà yobaba bu kye kye bu adi ba, ama ábe go kyekye bu adi hora be ci sansan numa ba dibe, be ci abu dzundzun. ²⁶ Ci numa ra in ago kyekye dzun mana wa fyin, badati hora kata bena wa fyin waji numa du. Ko go kyekye dzun mana fo vya, go kyekye badati na fo vya waji du. ²⁷ Ci numa ra ani baa bà Yesu kata nī ci tsadzu adi bu Yesu Kiristi. Kati, ko apa wani kata ki finni ku ci go kyekye adi bu Yesu. ²⁸ Ki fin bi bu baa bà Yesu, Cidon yi ko kani kata tswi butsoa waa ku tsa. Wa kwan pyinna ku gbè baa ri da dòn bu aji bu Cidon. Wa kwan tsara ku gbè baa ri fyen pajukun badati bu. Badati ri tsa abu baa ken nwo ki bye gbentsòn bu Cidon. Badati ri nwàdzu baa dā do ba gbentsòn bu Cidon. Badati ci baa tsaza pajukun badati yo. Badati yì byon bu atsòn wa tsa tsa, badati zen yi nu tsu pajukun badati ki cincin ki cincin. ²⁹ Butso bu pajukun na cincin ki cincin. Bàa pajukun kata ci fotson bu Yesu Kiristi ba. Kati, bàa pajukun kata ri ci baa dā dòn bu Cidon ba, ko be fyen pajukun bu, ko be tsa abu baa ken nwo ki bye gbentsòn bu Cidon. ³⁰ Bà ko kani kata ri nwàdzu pajukun baa dā do ba, ko be zen nu tsu badati ki cincin ki cincin, ko be pofan fin ji bu nu tsu waji. ³¹ Ci numa ra ní so hwan ki bye abyon baa san kari kata. Tanma mri tà yini nyaco dzun wa san kari kata.

¹ Ko mma tsaka wa zen yi aji ki nu tsu badati ki cincin ki cincin, ko mma tsakà wa zen aji ki nu bu abe bazhentsōn bu Cidon du, ama mma cimi ba con ba, m ci tsadzu ashoton wari tsu nde kan pajukun tson azota, mkà ci tsadzu akōn wa bwabwa wa ci ba nugbon. ² Mma ci ba abyon wari dan aji ki cin abu wari bi tsa ki pyen kire mma kà ci ba ayì bu koke kata, mma kà ci ba wajinderi waa mri tsaka wa dan yi akwèn ku do don ya ci bye dzun, ama mma cimi ba acon ba, m cimi abu dzun ba. ³ Ko mma ho tswénmi kata gafan vyon baa tsa hwen vyon, kati, ko mma nde dimi yibe be nde tsòn pyu, ama mma cimi ba acon ba, abu waji ri tsa zamí yo ki bye abu dzun ba. ⁴ Acon ri ci ba mikyin wa gban gban, kuri yi apa aji wa sansan. Acon ri yia apa ri fifi ba, acon ri yia apa ri caco ba. ⁵ Acon ri yia apa ri nde cin ki don ku sinni apa dzun ba. Acon ri yia apa ri con dia ba, apa ma nyàku jinyà kuri ngoa ngo ba, ku kari ndea nwuzaa dzun ri so mikyin ba. ⁶ Acon ri yi apa ri mbua mikyin ba abu wa baba ba, se abu wajinderi byen byen. ⁷ Acon ri pantse ba gben ko ki bye kake kata, kuri ci ba wajinderi ko ki bye kake kata. Kuri ci ba mikyin wa nde soso ko ki bye kake kata. ⁸ Acon ri tea jinni ba. Adon baa be da ki cin abu baa ri tsa ki pyen ri tsa nwādzu, nene tsu badati ribi hu, ayì wa ki fin tswen ci abu wa nwādzudzu azota. ⁹ Ki cin waa abu baa ī yì ra, ī yi cin’a ki don ki don azota. Ba abu waa iri dan ki cin abu baa ri tsa ki pyen ra ina dán don ki don azota. ¹⁰ Ci numa ra apa wa ci amunu wa yi vinni koke kata ho rododo ra bi ra, baa cibe horo dodo bara ri nwādzudzu. ¹¹ Ayo waa m ndi ci tiri nwu tishe ra, m ndi na zen aji ci tsadzu nwutishe, m ndi na ga aji ci tsadzu nwutishe, kati, mkà ndi na ga aji ci tsadzu nwutishe. Ama tanma waa m hwe kan baco rara, m fan abu nwutishe wa tsatsa be jinni ra. ¹² Tanma ina mbyà zén’i ki bye abu wa mbyà zo wa wezo dù numa, ama anyunu waji ma bayo ra iri mbyàyi zén’i horododo numa zo ba zo. Ayimi wa tanma ci ki cin jan ki don azota, ama anyunu nabi waa mri bi hwayi ba koke kata ci tsadzu waa Cidon hwayi ba byecumi avo tanma ra. ¹³ Tan-ma ra wajinderi, ba mikyin wa nde soso ki bye abu, ba con ci sanbe ra, ki finbe tsara hora kata wa ci ba hwe kari ci acon.

¹ Abu wa san kari ciri ní ci ba acon. Kati, ní so hwan ki bye abyon bu Denden bu Cidon tuntun byon bu adòn wa dada ba. ² Ci numa ra apa dzun mana zen aji ki bye nene dzun wa ripye waa pajukun ngha fo fobe raba, apa waji na zen aji waji ba Cidon maari, kuna zen’a ba pajukun ba. Ki cin waa apa dzun wa hwayi aji waji baani. Apa waji nari zen aji wajinderi ki bye gbentsòn bu Denden bu Cidon. ³ Ama aji baaji ci aji bu Cidon kuri zen aji wa myi pajukun myimyi nube dòn, kuri nube dòn dan gbanbe mikyin jiji be du gben mikyin. ⁴ Apa wa mana zen aji ki bye nene dzun kuna tsaza dia yo maari vinni. Ama apa wana ri da dòn bu Cidon kuna tsaza abi bu baa bà Yesu nu dzundzun kata. ⁵ Mna con waa ani kata ní dan yi nene badati ki cincin ki cincin ama san kari waa ní dan yi pajukun aji bu Cidon waa Den den tà yini. Ki cin waa apa wari da dòn bu aji bu Cidon yi pajukun ku kári apa wari zen yi aji ki nene badati tswi tswi, sede apa dzun ma ki tiri wa tsayi wa dan cinna bu nene hora yi pajukun baa bà Yesu kata jiji be du gben kwan yo. ⁶ Too, ani bazhenzami, mma bi ki byeni a mana zen aji ki bye nene dzun waa nī ngha fo foni raba, niri du kake ki byemi? Niri duni abu dzun ba, se mma pofan fin aji dzun yini waa ní du yì ko m da dòn bu aji bu Cidon yini. ⁷ Ci numa ra ko ki bye tswén bu jō, ci tsadzu abu wa gbagba ko ashenshen wa nwenwe baa cibe ba cindi ba. Apa ri fo yia akyube ba, se apa wama gbabe sansan ko kuma nwebe sansan. ⁸ Apa wa nwe hyu ma nwea ba gben ba, tsanini apa ri mbyādi ken? ⁹ Ci numa bani, in nī mana zen aji ba tswi nene dzun waa be fo yibe ba, akani ribi hwayì abu waa nina dan ra ri? Nina zen aji wa nya hwan azota hun. ¹⁰ Anu tsu atswi tswi ki fin tswen suu numa, ama wa nyani ba cinna baani. ¹¹ Mma yimi nu tsu bu apa wana ri zen aji raba, m ci tsadzu akyon ki byea, apa waji du kà ci tsadzu akyon ki byemi. ¹² M yinu nina con jiji Denden bu Cidon ku yini byon waa jiji ní tsayi butso tswi tswi ki bye gbentsòn’a. Ci numa ra abu wa san kari ní nya ba mikyinni kata ciri abe byon baa ri tsaza abi bu baa bà Yesu jiji be ya pyen. ¹³ Ki cin wakara apa wa mana zen aji ki bye nene dzun ku vo Cidon jiji ku yiku byon wa pofan fin aji waji yi pajukun. ¹⁴ M mana dzwa nde ki bye nene dzun numa, denden mi nari dzwa ri nde waji ama kyinmi cia pyì numa. ¹⁵ Ma ci numa mri bi tsa nini hun? Abu waa mri bi tsa dede waa m mana dzwa nde ra, mri bi dzwa nde ba dendenmi ba ki bye aco waa mikyinmi ri hwa yinu du. Mri tso vyon wa nya zen bu Cidon ba dendenmi, kati, mri tsa numa ki bye nyaco waa mikyinmi ri hwa yinu du. ¹⁶ In ma cia numa ba, nī mana pya wa sansan ki bye Cidon ki bye nene dzun ba denden dzun ken, apa dzun ma ki bye waji wama hwa yia cinna bu aji waa nina dan raba, kuri bi tsanini ri dan kú ci numa? ¹⁷ Ko waa nina pyá Cidon ra sansan, ama apa waji ri dua wa tsazaza ki byeni ba. ¹⁸ M mbu mikyin yi Cidon ki cin waa m zen yì nu tsu badati kani ri. ¹⁹ Ama dede waa ī mana wa Cidon ki tan wa wa Cidon, ki byemi anu waa ḿ dan aji ki bye nene badati hwehwe numa baa pajukun fo yibe bara, san kari m zen aji ngyikan tswanna ki pwe vo maari baa pajukun ri hwà yibe nu, jiji m fyenbe abu. ²⁰ Bandomi, aji wa gaga ki fin mikyinni kúká ci tsadzu bu baci baa rijan ba. Ki bye abu wa ba bani ní ci tsadzu baci baa rijan, ama ki bye aji wa gagani, ba ajini ní ci tsadzu baco. ²¹ Ci tsadzu waa be tā ki fin Afa bu Cidon danra, "M dan aji ba pajukun baa ci kara ki bye nene badati, kà ba nu bu kyòn, ko ma ci numa abe pajukun hora beri gonbe tson fo aji waa m dan yibe raba ho?" ²² Ci numa ra abyon wa zen aji ki bye nene badati ci tsadzu amàza wari tà yi baa yibe wajinderi ba danra aji bu Yesu ci aji wajinderi. ²³ Ayo waa pajukun baa bà Yesu ma kwan cinkwan ki bye dzundzun, ko kani kata mana zen nene dzun ken, pajukun badati baa yì fobe nene baaji fo raba, ko badati baa yibe wajinderi ki bye Yesu ba, bema kabi ki tan waji beri danbe danra nī ci pajukun baa kyakya ba? ²⁴ Ama ani kata ma kyan na da dòn bu aji bu Cidon, ayo waa apa wa yia wajinderi ki bye Ci don bara, ko apa wa fo foa aji bu Cidon fo raba kuma kabi ki tan bye waa nī kwan kiyo ra, kuri fo aji bu ko kani kata waa Cidon tà yiku, aji waji ri tswa apa wa yia Cidon bara ki mikyin kuri mbyà yinu ba dia danra ku ci apa wa tsa abu wa baba. ²⁵ Aji baa yuyu baa ndi ki mikyin’a ra kuri fu hobe wewe ki myi. Kuri tu ben jinni ki pyen bu Cidon ri wa Cidon, kuri danra, "Ajinderi Ci don bani ci bye dzundzun." ²⁶ Bandomi, se kake ri? Ayo waa nima ribi kwan cin ki bye dzundzun ra san kari apa dzun ki finni ku tso vyon, apa dzun kuna fyen tà yini abu wa fyen fyen, apa dzun kuna dan yini abu waa Cidon tà yiku ki zo mbu, apa dzun kuna zen tswi nene dzun ken, apa dzun kúkà pofan fin aji waji tà yini. Abu waa nima tsa kata ní tsa abu wa myi dini myimyi. ²⁷ Nima ri zen tswi nene dzun ken gban, apa pyinna ko atsara vinni be zen ri tswi nene waji. Bema zen ra be zen ate ba te, apa dzun kúkà pofan fin aji waji. ²⁸ Ama apa dzun wa pofan cinna bu aji waji ma baani, ko kani kata ku bànde ba nua gyu numa, se ku zen tswi nene wakara ba mikyin’a ba Ci don maari vinni. ²⁹ Ní yi pajukun baa da dòn bu Cidon kwan dzun pyinna ko atsara ki pwe vo vinni be zen ri aji, pajukun badati be mba aji waa be danra sansan numa. ³⁰ Ayo waa apa dzun mana zen aji ki tiri ki nu ngha bàande raba, Cidon ma tà yi apa dzun abu ki zo mbu, se apa wa kyan kapyen na zen aji ki tiri ki nu ra, ku cikpo hunnu. ³¹ Ki cin waa san kari ní zen ajini ate ba ate ki cin abu waa Cidon pofan tà yini mbyà ki zo mbu. Ma ci numa hunnu pajukun baa bà Yesu ri du abu wa fyenfyen kiyo, ba gben mikyin. ³² Ki cin waa apa wa da dòn tsaka wa panka aroho dia. ³³ Ki cin waa Cidon cia apa wa con wowowo ba, ama ku ci Cidon bu mikyin wa na jinni. Ci tsadzu waa pajukun baa bà Yesu ri kwan ki tan wa wa Ci don ra. ³⁴ Bawuwa be bànde ba anube ki tan wa wa Cidon. Ki cin waa be babeni ba nyaco dzun waa be zen aji, ama be ci gyu numa ci tsadzu waa adòn dan ra. ³⁵ In bema con be yì abu dzun se be mbye anube aji ki ndo. Ki cin waa ci abu wa pan tsenni waa awuwa ku zen aji ki fin cinkwan bu abi bu baa bà Cidon. ³⁶ Aní Bakorintos nina ga danra aji bu Cidon kapyen jo nwoa ki byeni? Ko nina ga danra ani maari vinni duri aji waji? ³⁷ Apa dzun ma ga danra aku ci nwutsōn bu Ci don, ko kuma ga danra ku du gbentsòn wa dzu bye Denden bu Cidon, san kari ku hwayi aji waa mna dan yini ra ci adòn bu Cindoi. ³⁸ Ci numa ra apa waji ma gon’a tson fo aji wakara ba, apa dzun ká gon tson foku ba du. ³⁹ Ci numa ra bazhenzami, ní nde mikyinni so bye aji bu Cidon wa dan yi pajukun, ama niká kanden pajukun badati baa ri zen tswi nene badati hora ba. ⁴⁰ Koke waa ni mana tsa kata ní tsaku sansan, ba ki fin nyaco.

¹ Tanma bazhenzami, mna con m kyepanni yo Aji wa Sansan bu Yesu Kiristi waa m ndi dan yini nī zen nde ba aji waji nina bà ra. ² Nima pan aji waji ba gben niri nwàdzu, sede nima panni ku dengere numa niri nwàdzuni ba. ³ Aji wa sansan wa ci ba hwe kári ra waa m ndi fyenni ra ciri aji waa m kapyen pan danra Yesu Kiristi hu aki ki cin abu wa babai ci tsadzu waa be ndi tā ki fin Afa hora, ⁴ Be ndeku ji shi, anyunu kò dzun kò pyinna wa kwan tsara Cidon ba doku pwadzu ki shimbi ci tsadzu waa be ndi ta ki fin Afa hora. ⁵ Ku tà dia ki bye Bitrus, kati, kukà tà dia yi abe fotson kwan dzun dzwe nwa pyinna hora. ⁶ Ki nyaken wakara kukà ta dia ki bye bazhenzai badati kwan dzun zan dipa tswanna ndo tswanna ki bye dzundzun. Baa hwe kári ki finbe akwín na ji cinbe tiri vo tanma, ama badati hu ra. ⁷ Ki nyaken wakara ku tà dia yi Yakubu du. Ki nyaken wakara kukà tà dia yi abe fotson kata. ⁸ Wa ken niken ku tà dia yimi, ami wa ci nwu wa titi wa kenmi abu dzun ba. ⁹ Ki cin waa ami ciri anaakwi ki fin abe fotson hora kata, m fyemi waa be bami danra fotson ba, ki cin waa m ndi tà abi bu pajukun baa bà Cidon fyin kagben. ¹⁰ Ama wa sansan bu Ci don hwari hunnu m kan tswi apa waa m ci jinna. Wa sansan’a waji waa kutsaki cinmi ra, ku tsa nyaa hwan azota ba, ki cin waa m tsa butso hweka abu be fotson badati hora ri kata. Ama cia butso waa m tsa ba gben bu dimi ba, Cidon tsari butso waji ki bye wa sansan’a waa ku yimi ra. ¹¹ Ko fotson hora ma tsari, ko mma tsari ci aji dzun dzun kata waa ina dan yi pajukun waa ni yi wajinderi kiyo ra. ¹² Cidon ma do Yesu don ki bye aki ci tsadzu waa ina dan yi pajukun ra, tsanini badati ki fin ni na danra Cidon ri ba doa pajukun baa huhu don ki bye aki ba? ¹³ Beri ma kyan danra Cidon ri ba doa pajukun don ki bye aki ba, se ri kyan tà danra ku ba doa Yesu Kiristi don ki bye aki ba hun. ¹⁴ Akyan Cidon rima ba doa Yesu don ki bye aki ba, aji waa ina dan yi pajukun ra ri kyan ci aji wa nya hwan azota, wajinderi waa ina yi ki byea ra ri kyan ci abu wa nya hwan azota kata, ¹⁵ Kati, iri kyan kan baa nari kan kan nari zen aji be Cidon bebe. Ki cin waa i dan yi pajukun dan ra, ku do Yesu Kiristi ki bye aki. Ama in wa dodo ki bye aki ma baani se Cidon doa Yesu Kiristi ba cindi ba hun. ¹⁶ Akyan Cidon rima ba doa pajukun baa huhu ba, se ri kyan ci ajinderi danra ku ba doa Yesu Kiristi ba. ¹⁷ Akyan Cidon rima ba doa Yesu Kiristi ba, wajinderi ri kyan kan abu wa nya hwan azota, avo jinna ba akwen bu abu wa baba ni ri kyan kà ci tiri ki cinni. ¹⁸ Kati, rima ci numa ri tà danra pajukun baa huhu baa yi wajinderi ki bye Yesu Kiristi ra abe du, be hu baba ki jinni gbo gbo ra hun. ¹⁹ Ima nde mikyin’i so di bu Yesu Kiristi ki cin bye cui wa ki myi kire vinni iri bi kan pajukun baa ci abu wa tsa cici kā pajukun badati ri kata pyuu numa. ²⁰ Ama aji wajinderi Cidon ba do Yesu Kiristi don ki bye aki. Ku ciri apa wa kapyen waa Cidon ba doku don ki fin baa huhu hora. ²¹ Ci tsadzu waa apa dzundzun gbe aki hwa tswen rá, ci numa ki bye apa dzundzun Cidon ri ba do pajukun baa huhu don ki bye aki. ²² Ci tsadzu waa ai pajukun kata iri huhu kata ki cin waa ī ci bazhenda bu yakui Adamu wa ka pyen, ci numa ra Cidon ri ba doi pajukun kata ba cindi. ²³ Ko apa wani kata ri do ki bye ayo wani kata waa Cidon ma yiku pyo. Yesu Kiristi kapyen do ra. A baa bàku ribi do ki bye ayo waa kuma kasen bi ra. ²⁴ Anyunu waji ci anyunu wa kennu. Áyo waji Yesu ri fyere tson don ki vo bu baa sen tsòn kata, ba baa sen hwe kata, kuri nde gbentsòn kata kasen yi Ataa Cidon. ²⁵ Ama tanma ci ken Yesu Kiristi ku foji tson wa tsatsa pan numa keke ya zan ayo waa Cidon ri ji ken ki cin bu abe jo ken’a hora kata be bi tu ben jinni ki pyen bu Yesu. ²⁶ Aki wa bwan apa ciri joken wa kennu waa beri bi jiku. ²⁷ Ci tsadzu waa be tā ki fin Afa bu Cidon danra, "Cidon yi Yesu gbentsòn ki cin bu koke kata." I yì nwo aji waji byenbyen numa danra Cidon ba dia nde hwe ba gbentsòn ki cin bu abu baa ki fin tswen kata nde kwa Yesu ki vo. Ama Yesu baani ba gben ki cin bu Ataa ki cin waa Ataa ba dia nderi gbentsòn waji kwaku ki vo. ²⁸ Ama waa Cidon ma fan koke kata yiku ra, aku Nwu ri nde cin’a so vo bu Ataa wa ndi nde koke kata yiku ra. ci numa Ata Cidon ri ci cin bu koke kata. ²⁹ Rima cia numa ba, ake tsari pajukun badati ki finni na du batisma ki cin bu pajukun baa huhu? Cidon ma doa baa huhu ba cindi ba, ake tsari beri du batisma jiji bu baa huhu? ³⁰ Ma ci numa akake hwari ina da bwan dii jiji í nwàdzu pajukun? ³¹ Bazhenzami, ko anyunu wani kata m ki nu aki. Abu wa tsa m dan numa ra ki cin waa m mbu mikyin mna ndē di ki fin zen bu Cindoi Yesu ki cinni. ³² Aken waa m ciyo nunu ba bupon baa ki Afisus kire ra tsazami yo ki bye ke? Akyan beri ma danra ci aji wajinderi byenbyen Cidon ri ba doa pajukun baa huhu ki bye aki ba, mri dan, "Í ji, í wa ki cin waa anyunu wa kyen iri hu nya hwan azota." ³³ Níká bye dini ba, niká kwan cin ba bajoni baa baba ba. Ki cin waa cinkwan wa kwan ba apa wa baba ri tsaba apa mikyin wa san san. ³⁴ Ní kò nwoni ki jinni san san, niká tsa abu wa baba riba. Pajukun badati ki finni yì dabe aji bu Cidon ba, M dan numa jiji tsenni ku panni, ³⁵ Dzun tiri apa dzun ki finni ri mbye aji danra, "Beri do baa huhu anini? Átswi adi wani waa beri pwadzu bi baku?" ³⁶ Au apa wa jeje! Uma tà abu kuri ngaa ba, se kuma so hunnu. ³⁷ Abu waa uma tà, dede waa una tàku ra ku cia ba je ba, ko ma ngyiza ko ma ngyi ke kata. ³⁸ Cidon ciri wari nde adi waa kuma con nde yi ngyi bu waji, Ko ngyi bu wani kata ri du adi wa fyeku. ³⁹ Ci numa abe adi kata be cibe tswi dzundzun ba, ci tsadzu pajukun adibe dzu ken ba dibe, awi ki hwan adibe dzu ken ba dibe, anyi baa pen don adibe dzu ken ba dibe, ajé ki jape, adibe dzu ken ba dibe. ⁴⁰ Adi bu abu baa Cidon mà ki don ki tiri, baa ku mà ki fin tswen ki tiri du, ⁴¹ Anyunu ci ba ahwè dzundzun, ason kà ci ba hwe bua dzun, atswí kà ci ba tswi hwe bube du, ko ki fin atswí hora be mbube mba dzun ba dibe ba. ⁴² Ci numa du ba wa dodo bu pajukun baa huhu anyunu waa Cidon ri dobe ba eindi ra. Be ndeku ji, ku so, ama Cidon ma ba dzeku ra kuri soa riba. ⁴³ Anyunu waa be jiku ra ku ci dan numa, ama anyunu waa Cidon ri ba dzeku ra kuri do ba hwe. ⁴⁴ Anyunu waa be nde aki hwa fin shi ra, adia ci tswi adi bu pajukun ki fin tswen kire. Anyunu waa Cidon ri ba doku ba cindi ra adia ri ci wa ripye. Apa wa ki fin tswen ci ken ku ci ba di. Ci numa ra anyunu waa Cidon ri ba doku ba cindi ra ci ken ku du adi wa ripye waa kuri ya baku ki don. ⁴⁵ Ci tsadzu waa be tā ki fin Afa bu Cidon danra, "Adamu wa kapyen Cidon màku apa wa ci ba cindi." Adamu wa ken niken ciri wari yi pajukun cindi wa ci kenken. ⁴⁶ Ci numa ra iri kapyen ci ba adi bu pajukun wakara hunnu ki nyaken Cidon ri yii adi wa ripye waa í ya ki don baku. ⁴⁷ Apa wa kapyen, Adamu be myiku ba jen bu tswen, ama aku apa wa kwan pyinna, Yesu Kiristi ku dzu don bi. ⁴⁸ Ko kani ki fin tswen kata ku ci ba adi ci tsadzu apa wa kapyen waa Ci don ko jen myiku kiyo ra. Ama pajukun kata baa kan pajukun bu Yesu Kiristi beri du adi wa ripye ci tsadzu adi bua wa dzu ki don bi ra. ⁴⁹ Tanma tsadzu waa ī dzudi ba apa waa Cidon ko jen myiku kiyo ra, ci numa ra iri bi dzudi ba apa wa dzu don bi ra. ⁵⁰ Bandomi, abu waa mna dan yini ra ciri, adi ba asa ri kaa ki ndo Cidon ba. Ci numa ra adi bu apa wari soso, ahwea ken’a waa kú kaya ki don bye waa abu ri soa kiyo ba. ⁵¹ Ní gon tson ní fo aji bwi wakara waa mri pofan dan yini ra. Bà ai kata ri hu aki waji ba, Cidon ri pukan dii mwamwa numa tsadzu azo wa meme ki bye ande bu hyu wa nwenwe wa anyunu wa ken niken. ⁵² Ayo waa ima fo ande bu ahyu wa nwenwe waji ra, Cidon ri ba do pajukun baa huhu hora. Beri du adi wa ripye wari hua riba, kuri ci ba cindi wa ci kenken gbogbo. Kati, ai kata Cidon ri pukan’i adii yo. ⁵³ Ki cin waa ci ken tswi di bui waa ī ci baku ki fin tswen wari huhu ra, ku kari so bé jinni, Ci don ku za pukan’i dii waji, wari ci ba cindi wa ci kenken gbogbo. ⁵⁴ Ci numa ra ki nyaken waa Ci don ri za pukan’i dii wari huhu wari so bé jinni kata ra, ku kari yii adi wa ripye wari hua riba, wa ci ba cindi wa ci kenken. Anyunu waji numa Cidon ri zenmu aji waa be ndi tā ki fin Afaa danra, "Ku ji ken ki cin bu aki, kukà ji aken ki cin bu koke kata". ⁵⁵ "Au aki, uri ji cin ki cin bu kani? Au aki uri bi tsaka apa akake ri?" ⁵⁶ Aki ri du gben’a ki bye abu wa baba waa pajukun ri tsa. Adon bu Cidon ri dan san yii cinna bu abu wa baba waji. ⁵⁷ Ci numa ra iri mbu mikyin yi Cidon wa hwa ina ji ken ki fin zen bu Cindoi Yesu Kristi. ⁵⁸ Ki cin wakara, bazhenzami baa concon, ní pan tse ba gben, níká ge mikyin ba. Ko anyunu wani ní foji butso bu Cindoi Yesu Kiristi wa tsatsa. Ki cin waa ní yinu danra ko tswi butso wani kata waani mana tsa ki fin zen bu Cindoi Yesu Kiristi ri tsabaa jinni nya hwan ba.

¹ Tánmanuma ní gon tson ní fo aji ki cin abè waa iri yi jiji í tsaza pajukun bu Yesu baa ki tswen bu Yahudiya. Tsa dzu waa m dan yi pajukun baa ki Galatiya dan be tsazabe yo ra. Ci numa ra ani du, ní tsazabe yo numa du. ² Ki bye anyunu wa kapyen bu byecen ko kani ki finni ku ten dzu abèa waa ku du, ba abu waa ku ci baku ku ride so kankan, ki cin waa jiji ní kwan vinni kapyen waa m ngha bimi ki byeni raba ra. ³ Ki nyaken waa mma bi ra, pajukun baa ni zen nde babe ra, mri bi tsonbe tson ba afa be nde avyon wa vyon vyonni te yo ya yibe ki Urushali-ma. ⁴ Nima mbyà danra san kari m ya du, se be bami kyen dzun ya. ⁵ Kapyen waa m bi ki byeni mri dzu ki Makidoniya ki cin waa mna con m ya ban vinni jen waji a hunnu m bi. ⁶ Dzun tiri ba, mri bi cifo ki byeni. Mri bi ci bani nde numa ya pan ànunù jiji ní numi ya ki bye waa mma ya yo kata. ⁷ M conmi wa bi ki byeni tanma m shon zo bani, m nwā dzu mwamwa numà ba. M ci ba mikyin Cidon ma zen nde m bi ci bani dù anyunu pyinnahunnu. ⁸ Ama mna con m pan abē ki Afisus kire ya zan anyunu Pen tekost hunnu. ⁹ Ki cin waa apyo dzun ki tiri popo numa ci riyo waa m tsa butso dzun wa ci ba hwe suu numa, ko waa pajukun baa zei hwehwe numa na tiri du. ¹⁰ Timoti ma bi ki byeni, ní pan ku ba mikyin wa mbumbu ki cin waa kuna tsa butso bu Cindoi Yesu ci tsadzu waa mna tsa ra. ¹¹ Apa dzun ká sinniku ba, ama ní tsazaku yo, ní dzoku vokya jiji ku kyen kyon’a mwamwa ba mkyin wa ná jinni, jiji ku kasen bi ki byemi ki cin waa ami ba bazhenzai ī ho zo so nyaco na bàku. ¹² Aji ki cin bu nwuzai Apolo ciri m voku bàvo kiyo gbangban numa danra jiji ku bi mbyàni, aku ba bazhenzai; badati. Ama ku cia ba mikyin waa ku bi tan ma ba, ko titi. Ci numa ra kuri bi ki bye ayo waa ku con. ¹³ Ní nwe nwo, ní pantse ba gben ki bye wajinderini, niká ge mikyin ba, ní ci ba gben. ¹⁴ Abutsoni waa nima tsa kata, ní tsaku ba con. ¹⁵ Bazhenza, nī yinu danra Istifanus ba fin ndoa be ciri baa kapyen ki fin jen bu Helenawa baa pukan mikyinbe bi pan Yesu, bekà so hwan kiyo na tsa za baa bà Yesu hwehwe numa. ¹⁶ Tanma abu dzun ki tiri waa mna con m voni, ní mbyà hwebe. Ní yibe hwe, ba kani kata wama ri tsazaivyo ki bye butso bu Ci don. ¹⁷ M mbu mikyin ba wa bibi bu Istifanus ba Fotinatus, ba Akai kas, ki cin waa be tsazami yo ki cin abu waa nī du kani nyaco wa tsami ba. ¹⁸ Be dan gbanmi mikyin, be kà dan gbanni du, san kari ní yi tswi pajukun baakara hwe. ¹⁹ Abe abi bu baa bà Yesu ki bye jen bu Asiya na nàni kiyo. Akila ba Biriska, ba abi bu baa bà Yesu baa na kwan cin kenbi ki ndpbe, bena nàni jen gbeni vo, gbeni abe ki fin zen bu Cindoi Yesu. ²⁰ Bazhenzani kata na nàni kiyo. Ní nà dini jen bà kwan mikyin ba dini ba mikyin wa mbu mbu. ²¹ Tanma ami Bulus mna tā jen wa nana wakara na yini ba vo dimi. ²² Ko ma kani kata wama con’a Cindoi ba, ní zen dàn tsa baku. Maranata! (Cinnaa danra Yesu u kasen bi.) ²³ Wa sansan bu Cindoi Yesu ku bani ci bye dzun dzun. ²⁴ Acon ku bani ci dzun ki fin mikyinni, ki fin zen bu Cindoi Yesu Kiristi. Ku ci numa.