TITO

Tito‑ka yama hani

¹I‑di Baoro ama·oni. Deoso‑ka yama anini‑ya ani·oteni. I‑di Yeso Kirisito owa‑ya yosemari, Deoso mai hikayawamaro, mai okanawataboneni. Deoso ati‑ya mai watabone, Deoso ati‑ya mai tokadaba nabone, mai okanawataboneni.

²Ai tabaro wamani awisari‑ya Deoso ati yanane,

“Owati‑ya mai nofa, mai abateraboneni.” Ati nematane.

Deoso keyehe‑ya hiriterene.

³Deoso ene yama hawa tohiya, owa‑ya yosemarine, ati okaminebonaha. Deoso ai‑ya ka‑kasoma tohe tamine mai‑ya okamina, mai hiwatowahebonane.

⁴Tito, tika yama hani‑bone okanahana, tikadikiyahi. Oka dao owa amatini. Deoso ati ohiyara, owati‑ya timita, Deoso ati tinofawahamaro, tiwa oka dao onamaroni. Ai‑ka abi i‑di Deoso, ai‑ka ayo i‑di Yeso Kirisito mai na, tiwa‑ya mai kasoma, tiwatibodi tiwa‑ya weerabone, Yeso Kirisito tiwa manakone‑ya nanahabemari, tiwa‑ya kasomebonane.

Mai‑ya mai kanawatabone, eya mai ihi nahi

⁵Hibati‑ya Kereta‑ya ai winiya, tiwa ohiyaramaroni.

“Kereta‑ya yama nafi hawa tohi awisara, fara tiwinahi. Mai tabori dami‑ya Deoso‑ka mai mai yorotokana, mai‑ka webote mai‑bone mai tikadikiyahi, mai‑ya mai kasomabonehe.” Onamaro,

owati‑maro‑nima tinahi.

⁶Mai tikadika, eya mai ihi nahi. Mai ihi amosa‑ta mai tikadikiyahi. Fadi ohare toha, ati fadi hinofa, ati hika madehe hinofa, Yeso ati‑ya hika madehe nofa na, tikadikabisayaho. Hika madehe ati kasira‑ta tikadikarayaho.

⁷Ene amosare ai‑ya kanawatotere, ene amose‑ta ai‑ya kanawato tene. Hini‑ya kahiyare, Deoso‑ka mai‑ya kasoma, ai ati‑ya miteya, yawa kanibote ra, kawi ihi towe toharihi, ai one‑ya bisirihi, yinero‑ya nokotonirihi tene, tikadikayaho, Deoso‑ka mai‑ya kanawatobonaha.

⁸Mai one kake, fai tabaro‑ya mai wina, mai ihi amosa, mai‑ya nofatene. Ene mai one hiawe, ene mai hinofatene. Yama amosa‑ya anitene. Deoso ati‑nima tene.

“Deoso ati‑nima oteboneni.” Atibodi ati tene.

⁹Deoso ati yokana‑ya mitemari, fare mai‑ya kanawatomakibonane. Ati bare‑ya mai one kamina mai‑ya ati barinebonane.

¹⁰Yodeo mai dama Yeso ati‑ya mai nofara, ati honita‑ya mai‑ya mai keyeheteni.

¹¹Keyehe‑ya mai hirineni, yinero‑ya mai kayafawahabonehe. Mai‑ya tiwati bariniyahi. Mai ati ihi yobe dami‑ya mai wi‑wina mai atibodi mai‑ya weeneni.

¹²Kereta‑ya mai wi‑wina, mai‑ka deoso ati‑ya mai‑ka owa mi‑mita‑mona mai tamine‑ya hiyare,

“Kereta‑ya oda wi‑wina keyehe‑ya oda hiriteni. Bani towe mai hama mai‑nima oda na, oda yawateni. Yama oda anira, hiniya oda tafateni.” Ati nemarine,

¹³Fara mai tamine amani. Hibati‑ka mai ihi‑nima mai ihi namarabone, mai‑ya weetiyahi. Mai weetina, Deoso ati‑ya mai nofabone, ati‑nima mai naboneni.

¹⁴Yodeo bote mai ati‑ya mai nofamariyahi. Deoso ati‑ya mai nofara mai ati mai nofariyahi.

¹⁵Yeso ati‑ya ai no‑nofa, ai atibodi, ai atibodi ati, ai ene na amosateni. Yeso ati‑ya mai nofara, mai atibodi, mai atibodi ati, mai ihi na amosaterani.

¹⁶“Deoso ati oda nofini.” Mai ati na,

Deoso ati‑nima mai ni awira, mai ihi towe hinama yama amosa‑ya mai watoteraboneni. Mai atibodi towe, mai ihi amosaterani.

Deoso Ati Amosabote tihiyarahi

¹Tiwa‑ta Deoso Ati Amosabote tihiyarahi, Deoso ati‑nima mai nabonehe.

²Maki bote mai tikanawatohi. Mai ihi amosa, mai ati amosawama, kawi ihi mai towe toharihi na, Deoso ati‑ya mai nofa, mai one‑ya mai nofa nabone, mai‑ya tikanawatohi. Mai ihi amosa, mai ihi‑ya mai one awiya, fara mai ihi amosa, mai ihi‑nima mai one ihi naboneni.

³Mai fanawi bote tikanawatohi, mai ihi amosawamaharebonehe. Mai one tamine‑mone‑ya mai hiyararihi, kawi ihi mai towe toharihi, mai naboneni. Mai one‑ya mai kanawata, mai ihi amosaboneni.

⁴Mai fanawi bote mai fanawi atona‑ya kanawatoya, mai ati haa‑nima nahi.

“Tika yibote tinofa, tika madehe tinofa, titeboneni.

⁵Yama towe‑ya tiwatibodi kadikariya, tiwa ene amosa, tiwa tabaro‑ka tika yama anitibisa, tika yibote, tika madehe na, mai‑ka yama‑ba hawatinihi. Tika yibote weetirihi. Tiwati amosa, tika yibote ati tinofa tiyahi. Owati nafi‑nima tiniya, Deoso ati mai one nofaba awineni. Deoso ati‑ya mai nofa mai ihi amosini.” Mai fanawi bote ati naboneni.

⁶Yetene mai‑ya tihiyariya,

“Dai ene amosahi. Yama towe‑ya dai atibodi kadikariyahi.” Tinahi.

⁷Tito, owati‑nima tiyahi. Tiwa ene amosa‑ya mai awiya, tiwa ene‑nima mai ihi naba awineni. Mai‑ya tikanawatoya, tiwa ene amosa tiwatibodi ati‑nima tiwati tohahi.

⁸Deoso ati tihiyara, tiwa ene amosa‑ya mai dami awiya, Deoso ati‑ya mai one nofara mai yawaba awineni. Tiwa ene amosa mai dami awa, Deoso ati‑ya mai nofara mai ati fawanaboneni.

⁹Mai mai hikanikamaro, mai tihiyariya,

“Dai‑ka hidi ati dai nofa, dai‑ka hidi ati‑nima dai niyahi. Dai‑ka hidi dai‑ya haane, dai ati yanara, ati‑nima dai nahi.

¹⁰Yama dai botira, dai ene amosa‑ya dai‑ka hidi mai awiya, mai ya‑yainaboneni. Deoso ene dai ene amosa‑ya mai awiya, Deoso ati‑ya mai nofaba awineni.” Tinahi.

¹¹Hibati‑ya ai ene amosara, Deoso ai‑ya kasome, ai nafi manakone‑ya Yeso nanahabemarine. Yeso ati ai nofa, Deoso tabaro‑ya ai winabone, ai abateraboneni.

¹²Yeso ati‑ya mai nofara, mai‑nima ai riyahi. Yama towe ai nofarihi. Mai fanawi ai nokotonirihi, kawi ai fawarihi, ai nahi. Ai atibodi bote ati ai nofarihi. Deoso ene‑nima ai ene nahi. Ai ati, ai atibodi ati, ai ene na, ai nawada, ai atibodi yati ati‑nima ai nabone, Ai ene amosahi.

¹³Yeso ai‑ka Ayo kamebona ai nimana, Yeso ai manakone‑ya nanahabemari, kameya, kami amosebonane. Deoso kitabote amose‑nima Yeso nane.

¹⁴Hibati‑ya ai manakone‑ya Yeso nanahabe, ai‑ya kanikemarine. Hibati‑ya ai ati kasira, ai manakone‑ya nanahabe, ai ene towe tohamarabone, Hika mai ai toha, ai ene amosabone, yama amosa‑ya ai nokotoniheboneni.

¹⁵Tito, eya tinahi. Mai tikanawata, mai ihi amosara mai weetinahi, mai ihi amosabonehe. Mai tikasomahi, Yeso ati‑ya mai nofawahabonehe. Yeso ati tihiyariya, tiwati‑ya mai mitiyahi.

Yama dai anini amosabone dai‑ya dai hawa tonihi

¹Tito, mai tihiyarahi.

“Ai‑ka hidi ati dai tokadaba, kofeno ati dai tokadaba, dai nahi. Ai one yama amosa‑ya mai anina, mai dai kasoma nahi.” Tiyahi.

²Tito, mai tikanawatoya, eya tinahi.

“Dai ene amosabone, dai one tamine‑ya keyehe‑ya dai hiririhi, dai ibi weerihi na, dai ibi nofahi, dai nafi.” Tinahi.

³Hibati‑ya yama‑ya oda watora, Deoso ati‑ya oda nofara, keyehe‑ya mai hirina, mai ati oda nofa, yama amosara‑ya oda nokotonihe. Yama amosa oda watora, mai oda kako, oda‑ya mai kakohari namaroni.

⁴Hibati‑ya Deoso ai‑ya kayawemari, ai‑ya nofi nafi ene i‑di Yeso ai manakone‑ya nanahabemarine.

⁵Ai ene tohara. Deoso ai‑ya nofi nafi, ai‑ya kasome, ai ene amosaramaro, ai atibodi‑ya Deoso awe, ai bisa toha‑nima ai atibodi na, Deoso ene ai atibodi yati tohawaha, ai bisa toha, ai‑ya ai sokona‑nima ai atibodi yati tohawaha nineni. Deoso ene‑nima ai ene nawahabone, Deoso‑ka Doni ai‑ya sawi, yama amosa ai watoni.

⁶Yeso Kirisito ai manakone‑ya nanahabe, ai‑ka abi i‑di Deoso ene Deoso‑ka Doni ai‑ya sawitene.

⁷Ai manakone abawaha, Deoso bidi ai tohawaha, ai abateraboneni. Deoso tabaro‑ya ai winabisaboneni.

⁸Owati timitahi. Hini owati‑nima mai‑ya tihiyaramakitasahi. Deoso ati ai nofa, ai ene amosahi. Mai ai kasoma. Ai ene amosiya, mai ai kanawatoya, Deoso ati‑ya mai nofaba awineni.

⁹Yama one tamine‑ya mai hiyara, mai ibi weena, mai‑ya tisawiriyahi. Yama ai watora tamine‑ya ai ibi weerihi, Mose‑ka yama hani tamine‑ya ai ibi weerihi, ai nahi. Yama one tamine‑ya ai ibi weeniya, ai ati‑ya mai one mita, Deoso ati‑ya mai nofaraba awineni.

¹⁰Mai ihi amosara, mai ati ihi mai ibi nofara, mai‑ya weetinahi. Mai‑ya tihiyari famiya, tiwati‑ya mai nofariya, mai‑ya didabamariyahi.

¹¹Mai ihi amosara, Deoso ati ai kamina, ai ati‑ya mai nofara, hini mai ihi mai ababoneni.

¹²Makobote dai tabaro‑ya mai oyoseba awineni. I‑di Atima toha, i‑di Tikiko toha neba awane. Tiwa‑ya koboneya, Nikoborisi‑ya tikama kanibote tiyahi. Nikoborisi‑ya owinaboneni, yama siririya.

¹³I‑di Sena boriso mai‑ya ai tamine‑ya ka‑kamina, i‑di Aboro mai fama, tiwa tabaro‑ya mai kobokaniya, mai tikasomahi. Mai tafe wadariya, mai‑ka yamata‑ba daatiyahi.

¹⁴Mai one yama‑ya kihara, mai‑ka yama‑ba mai daanahi. Yama‑ya mai da‑daa mai ihi sibabisaraboneni.

¹⁵Owa‑ya mai da‑daba, tiwa‑ya mai ati foyamone mai ati nani. Tiwa‑ya mai da‑daba owa tamine‑ya mai‑ya tihiyariyahi. Deoso tiwa‑ya kasomebonane. Feye amani.