HOMA

Homa mai‑ka yama hani

Owati dai kadikiyahi

¹Yeso Kirisito‑ka yo‑yose i‑di Baoro ama·oni. Deoso owa‑ya kadike, owa‑ya yosemarine, Deoso Ati Amosabote okaminabonehe.

²Hibati‑ya Yeso kaki awisareya, Deoso ati‑ya mai mi‑mita‑mete Deoso Ati Amosabote‑ya mai mita, Deoso‑ka yama hani‑ya ati mai hikanahanomatane.

³Deoso Ati Amosabote i‑di Yeso Kirisito ai‑ka Hidi tamine amane. Fare tamine okaminebonane. Neme‑ya Badi eyehe winemata, makobote bofe‑ya wade, ai‑ka Hidi i‑di Dafi‑ka nodi tohane.

⁴Hibati‑ya bofe‑ya kobone, mai hinahabe, Deoso hinakitame,

“Yeso Kirisito i‑di Deoso Bidi kitabote tohane.” Deoso‑ka Doni amosabote ati nematane.

⁵Kirisito ene Deoso owa‑ya kadikemarine, Yeso‑ka yo‑yose ohawahabonehe. Deoso owa‑ya kasomemarine, Bara mai‑ya Deoso Ati Amosabote okaminabonehe. Yeso ati‑ya mai nofiya, ati mai hikadabeya, Yeso Kirisito‑ya mai kahiyaraboneni.

⁶Homa‑ya dai wi‑wina dai‑ya Deoso kadikaharimata, Yeso Kirisito ati‑ya dai no‑nofa Yeso‑ka dai amani.

⁷Homa‑ya dai wi‑wina Deoso dai‑ya nofe, dai‑ya kadikematane, Deoso‑ka dai tohabonehe. Dai‑ka yama hani‑bone okanahanoneni. Ai‑ka Abi i‑di Deoso, ai‑ka Ayo i‑di Yeso Kirisito mai fama, dai‑ya mai kasoma, dai atibodi ati dai‑ya soma teni.

Homa‑ya dai wi‑wina dai‑ya owatibodi foya

⁸Yeso ati dai nofa, dai tamine omita, ya‑yai·oneni. Mai tabori dami‑ya dai tamine‑ya mai hiyaramoneni.

“Homa‑ya mai wi‑wina Deoso ati‑ya mai nofi nafemoneni.” Mai ati na,

mai ati omita, mai ati ihi ya‑yai·ona, Yeso Kirisito ene Deoso okahiyarateni.

⁹Deoso ati onofi nafe, Yeso Ati Amosabote okamina, dai tamine ohiyara oteni, Deoso‑ya. Dai tamine ohiyaranade‑ya Deoso watone.

¹⁰Dai tabaro‑ya okabone ona,

“Abi Deoso, Homa‑ya mai wi‑wina mai tabori‑ya okabone ona, tiwati amosiya, mai tabori‑ya okaboneni.” Oteni.

¹¹Dai‑ya owati awi nofineni, dai okasomabonehe. Owa ene Yeso ati dai nofi ba‑basi niya, dai atibodi kitawahabone owatibodi ati nineni.

¹²Dai tabaro‑ya kobo·oniya, dai okasoma, fara owa dai kasomahari nabone onani. Ai ibi kasoma, ai atibodi kiti ba‑basi teni.

¹³Dai tabaro‑ya okabone onamaro, mai tabori‑ya yama aninasa ona, dai tabaro‑ya okara. Bara mai dama mai‑ya ohiyarineni, Yeso ati‑ya mai nofabonehe. Makobote dai‑ya ohiyaramakebone onani, Yeso ati‑ya dai one nofamakebonehe.

¹⁴Mai dami‑ya Yeso ati okaminabone Deoso ati nemarine. Kereko mai toha, Bara mai one toha, yama yaki‑ya mai wi‑wina mai toha, yama‑ya mai wa‑wato mai toha, yama‑ya mai watora mai toha, mai na, mai nafi‑ya Yeso Ati Amosabote okaminabone owatibodi ati teni.

¹⁵Mai dami‑ya Yeso ati okaminabone Deoso ati ne. Homa‑ya okiya, dai‑ya Yeso Ati Amosabote okaminabone owatibodi ati nani.

Yeso ati ai no‑nofa ai sibarabone

¹⁶Yeso Kirisito Ati Amosabote okamina, owa habo siitora, owa habo kitabisa, ya‑yai·oneni. Deoso kitabote tohe, ati ene Yeso Kirisito Ati Amosabote‑ya ai nofa, ai‑ya ati somawamatene. Yodeo Yeso tamine‑ya mai miti baha, Bara Yeso tamine‑ya mai mitamakinineni.

¹⁷Deoso hawine‑ya Yeso Ati Amosabote ai‑ya yofikitine. Yeso ati‑ya ai nofa, ati ai nofi na‑nafi nawahebonane. Ai ene amosaramaro Deoso fawanihi. Ai ene amosara wadara‑nima ai ene nawahani. Yeso ati ai nofa, Deoso ai‑ya ati somawame, Deoso tabaro‑ya ai winaboneni. Hibati‑ya Deoso ati‑ya ai owa kanahanomata,

“Kirisito ati‑ya mai nofa, mai ihi amosara mai ihi nafi‑ya Deoso fawanihi. Tabaro‑ya mai winawahateboneni.” Deoso‑ka yama hani ati nineni.

Deoso ati‑ya mai tokadabara, Deoso mai‑ya yawebona

¹⁸Ai one mai tamine okanahanaboneni. Mai ihi amosarihi, Deoso ati miti‑ya mai nofarihi, mai ati ihi mai one Deoso ati‑ya mitarihi, Deoso ene‑ya mai awa, Deoso‑ya mai watorihi, mai na, mai ihi amosara. Neme‑ya mai ihi‑ya Deoso awe, Deoso yawe‑ya mai awawahaboneni.

¹⁹Hibati‑ya yama nafi‑ya Deoso wamane, ene‑ya mai nafi awameteni, Deoso‑ya mai watabonehe.

²⁰Bofe‑ya Deoso ene‑ya mai nafi awa, neme‑ya ene mai hiawahari hine. Deoso kitabote tohe‑ya mai awateni. Deoso‑ya mai watora, hini mai ihi tohateni.

²¹Hibati‑ya Deoso ene‑ya mai awamaro,

“Yama nafi Deoso ene tohi awirini. Hiniya yama yanineni. Deoso wadaterene.” Mai atibodi ati na.

Deoso‑ya mai kahiyari awira, hini mai ihi yama‑ya mai watora, mai ka‑kana na, mai‑nima mai nawaha, hini mai ihi yama soki‑nima mai atibodi nawaha, yama‑ya mai watomarani.

²²Yama nafi‑ya mai watamone mai ati na, mai atibodi honita toha, hiniya mai ka‑kana nawawahani.

²³Deoso yokana ati‑ya mai nofara, hiniya mai yahi‑ya yama‑ya mai wamana, bani mai afe wada mai‑nima na toha, bani yama‑ka mai‑nima na toha, maka‑nima na toha, ai‑nima na toha na, fara yama mai wamahina, ati wadarihi, hasikani wadarihi na‑ya mai kahiyaranasa nineni. Yama mai wamahina‑ya mai kahiyarabisa, Deoso yokana‑ya mai kahiyari awirani.

²⁴Deoso‑ya mai nofi watora mai‑ya Deoso saatokase,

“Feye amani. Mai narabi hawi watora mai‑ya ohiyarami awiraboneni. Hini mai atibodi ati‑ya mai nofabisa, hini mai atibodi ati‑nima mai niya, mai atibodi mai‑ya weenamaraboneni.” Deoso ati nematane.

Hini mai atibodi ihi mai ihi amosara, mai ibi tokatowe, mai dami‑ya mai atibodi ati aha, hini mai atibodi ati‑nima mai ihi teni.

²⁵Deoso ati‑ya mai nofara, keyehe‑ya mai nofa, Deoso‑ya mai kahiyarara, Deoso‑ka yama wamani‑ta‑ya mai kahiyarabisineni. Deoso amosabote amane, ai ati nahi. Deoso ai kahiyari fawariyahi. Fara amani.

²⁶Deoso ati mai hinofare, mai‑ya hiyarami awire, hini mai atibodi ati kasira‑nima mai naboneni. Mai fanawi mai makidi‑ya mai nokotonira, mai fanawi hini one‑ya nokotonibisa, mai ibi famineni. Mai ihi towe‑ya Deoso nofaterene.

²⁷Mai makidi fara tohaharina, mai fanawi‑ya mai nofara, makidi hini mai one‑ya mai nokotonibisa, hini hinama mai fama, mai ibi aha, mai ihi amosara mai manakone Deoso daahina, fara‑ya mai kayafaboneni.

²⁸Deoso ati‑ya mai nofara, Deoso mai‑ya saatokase, hini mai ihi Deoso mai‑ya hiyarami awirane. Mai atibodi yama towe kobohina, hini mai atibodi ati‑nima mai ihi nawahani. Haa‑nima mai ihi rabone Deoso ati ne, haa‑nima mai ihi teni.

²⁹Yama towe‑ya mai atibodi nokotonihe, hini mai atibodi ati koboni‑ka yama‑ya mai nokotoni teni. Mahi‑nima mai ihi amosara, mai one‑ka yama‑ya mai nokotonihe, mai one‑ka yama‑ya mai kayafara, mai yawateni. Mai one‑ya mai kako, mai one‑ya mai nanahaba, mai ibi wee, keyehe‑ya mai hiri na, hini mai‑ya mai kahiyara, mai one noki‑ya mai one‑ya mai kahiyara, mai one noki beheri‑kaya mai one‑ya mai towe tonihi teni. Mai one tamine‑mone‑ya mai ibi narabi basateni.

³⁰Mai one tamine‑mone‑ya keyehe‑ya mai hirinade, Deoso‑ya mai kako na, hini mai‑ya mai atibodi kahiyara,

“Amosabotebisa oda amani.” Mai ati na.

Hini mai atibodi yama towe hikadika‑nima mai ihi na, mai‑ka abi mai‑ka ami mai na, mai ati‑ya mai tokadabaterani.

³¹Yama‑ya mai wato nofarihi, yama amosa‑ya mai nofarihi mai na, hini mai ati‑nima mai nabone mai ati na, hini mai ati‑nima mai ni awira. Mai one‑ya mai nofara, mai one‑ya mai kasomaterani.

³²Mai ihi amosara‑ya mai nokotonihe, hini mai ihi‑ya mai saatonakosara. Deoso mai hinahababone, hini mai‑ya mai watobisa, mai korikasara, mai ihi‑nima mai one ihi namakitasa, mai ya‑yainibisineni.

Deoso mai manakone‑ya daanebona

¹“Mai ihi towe toha, hini mai ihi mai abahi.” Dai ati na.

Mai ihi‑nima dai ene nahare, fara dai ene dai abahareboneni.

²Deoso ai atibodi‑ya wato, ai ene‑ya wato ne, ai ene amosara, ai manakone amosarabone ai watoneni. Ai manakone‑ya Deoso daaneya, tosawariterebonane.

³“Bara mai ihi amosara, Deoso ene mai ababoneni. Yodeo oda toha, Deoso oda‑ya ati somawame, oda‑ya nofe, oda‑ya nanahabarebonane.” Yodeo dai toha, dai atibodi ati na awineni.

Dai narabo hawihi. Yama nafi‑ya Deoso wato, mai ihi‑nima dai ene na, dai‑ya Deoso nanahabaharibonane. Dai manakone dai kayafa, kome fawateraboneni.

⁴Deoso‑ya dai nayawariyahi. Dai‑ya nofi nafi, dai ene‑ya kakatome, dai ene‑ya kadika kanibote re, dai ene‑maro‑nima dai ene namarabone, dai ene‑maro dai nofamarabone‑ya Deoso nimanane.

⁵Dai narabo hawira, dai‑ya dai kaminara, dai ene towe‑ya dai fawanira, dai manakone amosara tonafe. Makobote Deoso yaweya, mai ihi towe‑ya kadikeya, dai ene‑ya kadika neya, Deoso yawe ene dai awaboneni. Dai manakone amosara‑ya dai‑ya daatonameya, tosawari awirebonane.

⁶Hini ai ene‑nima ai ene manakone na‑ya ai nafi‑ya daanebonane.

⁷Deoso ati‑ya mai no‑nofa, Deoso ati‑ya mai tokadaba, mai ihi amosa, Deoso tabaro‑ya mai nokotoni fawara, mai manakone amosa‑ya Deoso daanebonane. Deoso tabaro amosabote‑ya mai winiya, mai ya‑yainaboneni. Deoso ene mai abamateraboneni.

⁸Mai one hini mai‑ya mai nofabisa, Deoso ati‑ya mai nofara, Satanasi ati‑ya mai nofa, hini mahi‑nima mai ihi towe toha, mai ihi Deoso yawi kiteya, mai‑ya nakomeya, Deoso yawe‑ya mai watowahaboneni.

⁹Mai ihi amosara, Deoso ene yama towe‑ya mai kayafiya, mai ohinaboneni. Yodeo mai‑ya Deoso kasomi nafimari, mai ihi towe tohasa na, Deoso mai‑ya nakoma, Bara mai ihi amosara mai‑ya nakomahari nebonane.

¹⁰Mai one ihi amosa, mai manakone amosa‑ya Deoso daanebonane. Hini tabaro amosabote‑ya mai‑ya nawiniya, mai‑ya kasomebona, mai‑ya kahiyarebona, mai atibodi mai‑ya ati somaboneni. Yodeo mai toha, Bara mai toha na, Deoso eyehe mai winiya, mai ya‑yainaboneni.

¹¹Deoso noko‑ka fara hinama ai nafi toha, ai ene‑ya kadikeya, ai ene‑nima ai manakone naboneni.

¹²Mose ati‑ya Bara mai watora, mai ihi amosara, mai ihi‑ya Deoso kadikeya, hini mai ihi‑nima mai manakone na, Deoso tabaro‑ya mai winateraboneni. Mai‑ya Deoso yawi fawaterebonane. I‑di Mose ati‑ya Yodeo mai watobisa, Mose ati‑ya mai tokadabara, mai ihi amosara mai manakone‑ya Deoso daaneya, Deoso tabaro‑ya mai winateraboneni. Mai‑ya Deoso yawi fawaterebonane.

¹³Mose ati‑ya mai mita, ati mai hikadabare, hiniya ati mai himite, mai‑ya Deoso ati somawamarene. Mose ati nafi‑ya mai tokadababisa, mai‑ya Deoso ati somawamane.

¹⁴Deoso ati i‑di Mose hikanahanomata, ati‑ya Bara mai mitasa ni awira, mai atibodi yama amosa‑ya wata, fara yama amosa‑ya mai‑ka yama anini toha, Mose ati‑ya mai tokadaba mai‑nima mai nineni.

¹⁵Hibati‑ya mai atibodi‑ya Deoso hini ati‑ya kanahanomatane, ati mai hikadabebonaha. Mai atibodi ati‑ya mai tokadabiya, mai ya‑yainaboneni. Mai atibodi ati‑ya mai tokadabariya, mai atibodi hini mai‑ya weenaboneni.

¹⁶Ai ene ai kema‑ya ai one watoterani. Deoso‑ta ai ene‑ya watotene. Ai atibodi ati ai one himitara‑ya Deoso mitatene. Makobote yama ai kemamaro‑ya Deoso kadika, ai atibodi ati‑ya kadika nebonane. Deoso ene Yeso Kirisito ai ene‑ya kadikebona tamine okaminateni.

Deoso ati‑ya Yodeo mai wato ba‑basi namone

¹⁷Yodeo dai toha, Deoso dai‑ya hiyaremata, Deoso ati i‑di Mose dai‑ya daanemata ene Deoso‑ka dai tohamone, dai‑ya yawamaterebona dai ati na awineni.

¹⁸Deoso yama ati kobohina dai wato, Deoso ati amosabote tohe dai wato na, Mose ati‑ya dai‑ya mai kanawatamaroni.

¹⁹Deoso ati‑ya dai watamone, yama‑ya mai watora mai‑ya dai kanawatabone dai ati nineni. Yama wahi‑nima dai namone, Deoso hawine‑ya mai awara, mai‑ya dai kanawatoya, Deoso hawine‑ya mai awawahabone dai ati nineni.

²⁰“Deoso ati nafi‑ya oda watoneni.” Dai ati na,

“Yama‑ya mai watora, madehe‑nima mai na, mai oda kanawataboneni.” Dai ati teni.

²¹Mai dai kanawatabone dai ati na, hini dai‑ya dai kanawato bahi. Mai dai kanawata,

“Yama‑ya dai yabariyahi.” Dai ati na,

dai abano‑ta yama‑ya yababisineni.

²²“Mai fanawi one‑ya dai ahariyahi.” Dai ati na,

dai‑ta mai fanawi‑ya dai aha awineni. Mai‑ka deoso bare‑ya mai kahiyari awirabone dai ati na, mai‑ka deoso bare‑ka bani‑bona mai daahine‑ya dai boti na. Haa‑nima dai ene na, towe dai amani.

²³“Mose ati oda watoneni.” Dai ati na,

ati dai tokadabare, dai ene Deoso‑ya mai one hahakanineni.

²⁴“Owati‑ya dai tokadabara, dai ene owati‑ya mai one nofaraboneni.” Deoso‑ka yama hani ati na.

Deoso‑ka yama hani ati‑nima yama nawaha, dai ene‑ya Bara mai awa, Deoso‑ya mai kakowaha,

“Deoso towe amane.” Mai ati nawahani.

²⁵Deoso‑ka dai tohabone, dai sowiri tati ataro‑ya mai wisinakosamaro. Deoso ati dai tokadaba‑mani, Deoso dai‑ya kasome nane. Deoso ati dai tokadabara, Deoso‑ka dai tohi awira. Mai sowiri tati atori abara mai‑nima dai nawahani.

²⁶Bara mai sowiri tati atori abara, Deoso ati‑ya mai tokadababisa‑mani, Deoso‑ka mai toha neni.

²⁷Bara mai sowiri tati atori abara Deoso ati‑ya mai tokadababisa, dai ene‑ya mai awiya, dai‑ya mai kasawariya,

“Ka! Yodeo dai toha, Deoso‑ka yama hani dai kayafa, Deoso ati dai tokadabamone dai ati na, dai ene amosara, Deoso dai manakone‑ya daanebonane.” Mai ati teboneni.

²⁸Yodeo yokana mai toha, Deoso‑ka mai tohahari neni. Ai‑ka ami, ai‑ka abi mai na Yodeo mai toha, Yodeo yokana ai toha awineni, Yodeo yokana ai toharihi na awineni. Ai sowiri tati ataro aba, Yodeo yokana ai toha awineni, Yodeo yokana ai toharihi na awineni.

²⁹Yodeo yokana ai tohabone, ai sowiri tati ataro wisina ene tohaterani. Deoso‑ka Doni ai atibodi‑ya sawi, ai atibodi‑ya namose ene Deoso‑ka ai toha, Yodeo yokana ai toha teni. Ai atibodi‑ya mai one awara, Deoso‑ta ai atibodi‑ya awe, ai atibodi amosa ene Deoso ya‑yaitene.

¹“Baoro, hini yamata ihi oda sowiri tati ataro‑ya mai wisinakositi? Yodeo ai toha hini yamata ai kayafa titi?” Dai ati na awineni.

²Yodeo ai toha yama dama‑ya ai kayafa, Deoso ai‑ya kasomi nafitene. Hibati‑ya ai‑ka idi mai‑ya Deoso hini ati‑ya hiyarematane. Deoso ati yokana mai hikanahano, ati‑ya ai‑ka idi mai kayafameteni.

³Deoso ati‑ya Yodeo mai one nofara, ati mai hikadabarihi hine, Deoso ati‑nima yama ni awirabone dai ati na awineni.

⁴Deoso ati‑nima yama nasa naboneni. Ati fawaterebonane. Ai nafi‑ta keyehe‑ya ai hirina awineni. Deoso‑ta keyehe‑ya hiriterene. Deoso ati‑nima yama na dai awaboneni. Deoso ati ai kadika,

“Deoso ati tosawariterene. Hini ati‑nima yama teni. Deoso ati‑ya mai nofara, Deoso ati‑nima yama nasa nineni.” Deoso‑ka yama hani ati nineni.

⁵Mai atibodi honara eya mai ati nineni.

“Oda ene amosara‑ya mai one awiya, oda‑ya mai nofaraboneni. Deoso‑ta ohari ene amose hinama tohe‑ya mai watoya, fara Deoso ati‑ya mai nofawahaboneni. Oda ene Deoso ati‑ya mai nofiya, Deoso oda‑ya yawaterebonane. Oda‑ya yawe‑mana, ati kasiro nane.” Mai atibodi honara mai ati teni.

⁶Deoso ati kasiroterene. Ai ene amosara‑ya Deoso kadikeya, ai manakone amosara‑ya daanebona, tosawariterene. Yodeo mai ihi amosara mai ihi‑ya Deoso kadiki awire‑mana, Bara mai ihi‑ya kadikare nane.

⁷Dai owa atibodi honare ati,

“Keyehe hiri·oniya, owati‑ya mai mita, owati‑ya mai nofara, Deoso‑ta keyehe‑ya hiritere‑ya mai kahiyarabisaboneni. Owa ene Deoso‑ya mai kahiyariya, owa‑ya Deoso yawaterebonane.” Dai owa atibodi honare ati nane.

⁸“Fara ai ene amosara nafiya, ai ene Deoso‑ya mai kahiyarabone i‑di Baoro ati nene.” Mai atibodi honara mai ati na,

keyehe‑ya mai hirina, haa‑nima oterani. Haa‑nima mai ati na, hini mai‑ya mai yokoteni.

⁹Yodeo ai toha, ai ene amosabisa‑mone dai one ati na awineni. Ai ene amosi awirini. Yodeo ai toha, Bara mai toha mai na, ai nafi ene amosarani.

¹⁰Deoso‑ka yama hani ati dai mitahi.

“Bofe‑ya dai wi‑wina dai ene amosa hinama tohaterani.

Dai owa ohari ene amose‑ba wadarene.

¹¹Bofe‑ya dai wi‑wina yama amosa‑ya dai watora,

Owa‑ya dai atibodi nokotoniterani.

¹²Owa hawine‑ya dai sawimara,

Dai ati kasira,

Owa noko‑ka dai ene amosara hinama dai toha,

Dai owa ohari ene amose‑ba wadarene.”

¹³“Keyehe‑ya dai hi‑hiri, dai ati towe toha na,

Mai bata mai mahi‑nima dai ati toha teni.”

“Dai one‑ya dai towe tonihe, maka mai‑ya waina kome‑nima dai ati towe komene teni.”

¹⁴“Dai one tamine‑mone‑ya dai hiyara, dai ati bida toha, dai owa oni‑ya dai hirina, keyehe‑ya dai hiriteni.”

¹⁵“Dai one‑ya dai nanahaba kanibote na,

¹⁶Dai toka, dai nowati‑ya mai dama mai ohi, mai one atibodi kome kitateni.

¹⁷Dai ibi kaka, dai ati somaterani.”

¹⁸“Dai ene Deoso ati yawe‑ya dai watobisa, Deoso ene dai korikasarani.” Deoso ati nane, Deoso‑ka yama hani‑ya.

¹⁹Deoso‑ka yama hani ihi ai nafi ene amosara ai watowahineni. Bara mai atibodi‑ya Deoso hini ati‑ya kanahanomata, ati‑ya mai tokadabarihi, Mose ati‑ya Yodeo mai tokadabarihi mai na, ai nafi ene‑ya Deoso kadikeya, eya ati nebonane.

“Owati dai tokadabarani.” Deoso ati neya,

“Hehe, towe oda amani. Tiwati oda tokadabaterani.” Ai nafi ati naboneni.

²⁰Mose ati‑ya ai ati tokadaba, ati nafi ai tokadabare, Deoso ai‑ya ati somawami awirane. Mose ati ai kadika, ai ene towe‑ya ai watowahateni.

²¹Hibayata Deoso ai‑ya ati somawamebona tamine‑ya ai watowaha, Deoso hini tabaro hawine‑ya ai‑ya yofikawawahe, ai ene toharihi, Mose ati ene toharihi nane. Hibati‑ya Deoso hawine‑ya Kirisito wamanebona tamine‑ya i‑di Mose kanahano, Deoso ati‑ya mai mi‑mita‑mete tamine mai hikanahanohari hinematane.

²²Yeso Kirisito Deoso tabaro hawine‑ya wamanemata, ati ai nofe, Deoso ai‑ya ati somawamatene. Yodeo oda toha, Bara dai toha, dai na, Deoso ai‑ya awe, fara hinama ai toha, Yeso ati‑ya ai nofiya, Deoso ai‑ya ati somawamebonane. Ai ene amosara‑ya Deoso fawanihi, ai ene amosara wadamara‑nima ai ene nawahani.

²³Ai nafi ene amosaramaro, Deoso ene amose hinama tohe, ene‑nima ai ene terani.

²⁴Ai nafi ene amosara, ai ene manakone wadasa na‑mani, ai aba neni. Deoso ai‑ya kasomebona, Bidi‑ya yosematane, ai manakone‑ya nanahabebonaha. Ai manakone‑ya Yeso Kirisito nanahabe, ati ai nofeya, Deoso ai‑ya ati somawame, Deoso ati ene ai manakone wadamarani.

²⁵Deoso hini Bidi‑ya daane. Yeso abe, emene tokafodo, hini emene‑ya ai manakone‑ya nanahabematane.

“Abi Deoso, owa manakone Yeso hinahabamete, owa‑ya tiwati somawamahi.” Ai atibodi ati na,

Deoso ai‑ya ati somawamatene. Ai manakone abara‑mani, ai nafi aba neni. Deoso ene amose hinama ai nafi awabone, hini ene tamine‑ya kaminane. Hibati‑ya Yeso abi awisareya, mai one ihi‑ya Deoso kadiki awisareya, Yeso abebona‑ya Deoso nimanematane. Mai manakone‑ya Yeso nanahabaharibona‑ya Deoso watomatane.

²⁶Hibayata Deoso ene amose hinama‑ya ai nafi awabone, hibati‑ka mai manakone‑ya Yeso nanahaba, ai manakone‑ya nanahaba nane. Deoso ati‑ya mai nofamete, Yeso ati‑ya ai nofa na, Deoso ai‑ya ati somawamane.

²⁷“Owa ene amosa, owa ene Deoso ati somawamane.” Dai ati riyahi.

Dai ene Deoso ati somawami awirane. Dai‑ya dai kahiyarariyahi.

“Mose ati okadaba, Mose ati ene Deoso owa‑ya ati somawamane.” Dai ati riyahi.

Mose ati ene tohi awire. Yeso ati‑ta ai nofa, Deoso ati somawamabisatene.

²⁸Yeso ati‑ta ai nofa, Deoso ati somawamatene. Ai ene amosa ene tohi awirihi, Mose ati ene tohi awirihi nane.

²⁹Eme dai ati niti?

“Deoso Yodeo mai‑ya kayafabise, Bara mai‑ya kayafaterebonane.” Dai ati na awineni.

Yama dai wato awirini. Ai nafi‑ka Deoso amane. Yodeo mai‑ka hidi toha, Bara mai nafi‑ka hidi toha nane.

³⁰Deoso ohari‑ta tohe, Yeso ati‑ya Yodeo mai nofa, mai‑ya Deoso ati somawama, Yeso ati‑ya Bara mai nofa, mai‑ya ati somawamahari tene.

³¹“Yeso Kirisito ati ai nofiya, Deoso ai‑ya ati somawameya, Mose ati fawanebonane.” Dai ati na awineni.

Mose ati fawani awirebonane. Deoso ati Mose hikanahanomata, ati‑nima yama nabone ai watoneni.

Deoso ati‑ya Abaraho nofemata

¹Yodeo ai‑ka idi i‑di Abaraho tohemata tamine‑ya dai atibodi kadikahi. Hibati‑ya i‑di Abaraho‑ya Deoso ati somawamematane. Hini yamata ihi Deoso ati somawamamatati?

²“Abaraho‑ka yama anini amosa ihi Deoso ati somawame awane.” Dai ati na awineni.

Abaraho‑ka yama anini amosa ihi tohi awirini. I‑di Abaraho‑ka yama anini manakone‑mani, hini‑ya kahiyare nane. Deoso hini ene i‑di Abaraho‑ya ati somawamematane.

³Deoso‑ka yama hani ati dai mitahi.

“Deoso ati‑ya i‑di Abaraho nofe ene Deoso ati somawamane.” Deoso‑ka yama hani ati nineni.

⁴Yama ai anira, yama ai kayafa, honita tohabisateni. Yama ai anina, yama ai kayafa, honita tohara, yama ai anina manakone tohabisateni.

⁵Ai ene amosaramaro, Deoso ai‑ya ati somawame, yama ai anina manakone tohara. Deoso ati ai nofe ene Deoso ai‑ya ati somawamabisane.

⁶Deoso mai‑ya ati somawame, hini yamata ihi Deoso mai‑ya ati somawama titi? Mai‑ka yama anina manakone ihi tohara, hiniya Deoso mai‑ya ati somawame, mai ya‑yainawaha, ai‑ka hidi i‑di Dafi tohemata ati hikanahanomatane.

⁷“Deoso ati‑ya mai tokadabaramaro, Deoso mai‑ya ati somawame, mai ihi‑ya ati sawimare mai ya‑yaiteni.

⁸Mai ihi‑ya Deoso kadikare,

mai ya‑yaiteni.” Dafi ati nematane.

⁹Deoso mai‑ya ati somawame, mai ya‑yaiteni.

“Yodeo mai sowiri tati atori wisinakosabisa, mai‑ya Deoso ati somawamabisane.” Dai ati na.

Yama‑ya dai wato awirini. Bara mai sowiri tati atori‑ya mai wisinakosara, mai‑ya Deoso ati somawamaharine. I‑di Abaraho‑ya Deoso ati somawamemata tamine dai mitamatasahi. Deoso ati‑ya Abaraho nofe, Deoso ati yanane,

“Abaraho, tiwa‑ya owati somawamawahani.” Deoso ati nematane.

¹⁰“I‑di Abaraho sowiri tati ataro‑ya wisinakosi hawa toheya, Deoso ati somawamane.” Dai atibodi ati na awineni.

Abaraho sowiri tati ataro‑ya wisinakosi awisareya, Deoso ati somawamematane.

¹¹I‑di Abaraho‑ya Deoso ati somawami hawa tohe, Abaraho sowiri tati ataro‑ya wisinakose,

“Abaraho, tiwa sowiri tati ataro wisitinakosa, tiwa tamine‑ya mai mitiya, oka tihawaha, tiwa‑ya mai watowahaboneni.” Deoso ati nematane.

Abaraho tamine‑ya Bara mai mita,

“Abaraho‑nima Deoso ati ai nofahi. Abaraho sowiri tati ataro wisinakosi awisareya, Deoso ati‑ya nofe, Deoso ati somawamematane. Deoso ati ai nofiya, ai‑ya ati somawamaharibonane.” Mai ati naboneni.

Abaraho‑nima mai na, Deoso ati‑ya mai nofawahiya, mai‑ya ati somawamaharibonane. Mai sowiri tati atori abara, mai sibarini. Abaraho‑ka nodi mai tohawahaboneni.

¹²Yodeo mai sowiri tati atori wisinakosa, Deoso ati‑ya i‑di Abaraho nofemata‑nima mai na, Abaraho‑ka nodi mai tohahari nineni.

Deoso yama‑ya daanebona ai kayafabone

¹³Hibati‑ya Abaraho‑ya Deoso hiyare,

“Abaraho, yama nafi tikayahaboneni. Makobote tika nodi tiwa tabaro‑ya mai kayafaboneni.” Deoso ati ne,

“Ati‑nima yama naboneni.” Abaraho ati ne,

Deoso ati‑ya nofe, Deoso ati somawame ene Deoso ati‑nima yama na‑ya Abaraho kayafebonane. Abaraho hini ene tohi awirihi, Mose ati ene tohi awirihi ne, Deoso ati‑ya Abaraho nofe ene Deoso ati‑nima yama na‑ya kayafebonane.

¹⁴Deoso ati‑ya i‑di Abaraho nofe ene Deoso ati somawamematane. Fare ati ai nofeya, ai‑ya ati somawamebona ati nane. Deoso ati ai nofa, Mose ati ai tokadabariya, Deoso ai‑ya ati somawami awire‑mana, ati honita tohe nane.

¹⁵Hibati‑ya Deoso ati‑ya i‑di Mose kanahanomatane. Ati hikanahano awire‑mana, ati ai nanahabare nane. Deoso ati ai nanahabare‑mana, yaware nane.

¹⁶Fare Deoso ati‑nima yama nabone ai watowahineni. Deoso ati‑ya Abaraho nofemata, fare‑nima Deoso ati ai nofe, ati‑nima yama ai kayafaboneni. Ai ene tohi awirini. Deoso hini ene ai‑ya kasome, ai‑ya ati somawamebonane. Yodeo oda toha, Deoso ati oda nofiya, Deoso ati‑nima yama na oda kayafaboneni. Abaraho‑ka nodi yokana oda amani. Fara‑nima Bara dai toha, Deoso ati dai nofiya, Abaraho‑ka nodi yokana dai tohahare, Deoso dai‑ya ati somawamaharibonane. Deoso ati ai no‑nofa ai nafi‑ka idi i‑di Abaraho toha tene.

¹⁷Abaraho‑ka nodi mai tamine‑bone‑ya Deoso wato, mai tamine‑ya Abaraho‑ya hiyarematane.

“Abaraho, owa ene tika nodi mai damawahatebone, mai tabori damateboneni.” Deoso ati nematane.

Abaraho bidi awisareya, Deoso ati‑ya nofe, atibodi yama‑ya kadike,

“Deoso kitabote tohe, ai aba, ai‑ya nakitamatene.” Abaraho atibodi ati nematane.

¹⁸“Amowa mai dama mai‑nima tika nodi mai teboneni.” Deoso ati nematane.

Abaraho bote tohe, fadi bote toha na, bidi awisare, Deoso ati‑ya nofasa ne, habo kite. Deoso mai‑ya kasomare‑mana, mai‑ka ewe wadare nane.

“Oka nodi mai damabone Deoso ati ne, oka nodi mai damaboneni.” Abaraho atibodi ati nematane.

¹⁹Abaraho‑ka ano 100 toha, 100 yakari‑ya i‑di Sara‑ka ano toha na, Abaraho hini‑ya atibodi hiyare,

“Sara ai bote tohikima, sibarini. Ai‑ka ewe wadebona Deoso ati ne, Deoso kitabote ati‑nima yama naboneni.” Abaraho atibodi ati nematane.

Sara atona tohiya, kahiwara, kahiwaterabone mai one ati nameteni. Sara kahiwabone Deoso ati ne, ati‑ya Abaraho mite, Deoso ati‑ya nofe, habo kitematane.

²⁰Deoso ati‑nima yama kanibote ra, Deoso ati‑ya i‑di Abaraho nofe. Deoso‑ya kahiyare, Deoso ati‑ya nofi ba‑basi nematane.

²¹“Deoso kitabote ati‑nima yama naboneni.” Abaraho atibodi ati ne, habo kitematane.

²²Deoso ati‑ya Abaraho nofe ene Deoso ati yananamatase,

“Abaraho sibarane.” Ati nematane.

²³Abaraho‑ya Deoso ati somawame, Abaraho‑ya kasome tamine‑ya mai kanahanameteni, Deoso ene ai watowahebonaha.

²⁴Abaraho tamine‑ya mai kanahanamete Deoso ati ai no‑nofa ai‑ya kasomaharibona ai watonane. Ai‑ka Ayo i‑di Yeso Kirisito‑ya Deoso nakitamemata, ati ai nofe, ai‑ya ati somawame, ai‑ya kasomaharibonane.

²⁵Yeso‑ya mai nanahabameteni, ai ene amosara ai manakone‑ya nanahabebonaha. Yeso‑ya Deoso nakitamematane, ai‑ya ati somawamebonaha.

¹Yeso ati‑ya ai no‑nofa Deoso ai‑ya ati somawame, ai‑ka Ayo i‑di Yeso Kirisito ai manakone‑ya nanahabe ene ai manakone wadamara, Deoso ai‑ya ati yawamare, ai‑ya ati somatene.

²Deoso‑ya ai tamine‑ya Yeso Kirisito hiyare,

“Abi, tika mai tiawahi. Mai manakone onahaba, owati‑ya mai nofawaha, tika dao mai tohawahani.” Ati tene.

Deoso ai‑ya kasomi fawatere, tabaro‑ya ai winamakebone, ai ya‑yainineni.

³Hibayata Yeso ati‑ya ai no‑nofa, Yeso ati‑ya mai nofara ai‑ya mai kaka, ai‑ya mai bisi na, fara mai ihi ai yawara ai ya‑yainibisa, ai komene ene ai habo kiti ba‑basi nabone ai watoneni.

⁴Ai habo kita, ai yawara, ai ene sibarabone Deoso ati ne. Deoso ene ai habo kita, Deoso amosabote tabaro‑ya ai kobonabone yama ai nimana, ai ya‑yainaboneni.

⁵Deoso tabaro‑ya ai winabone yama ai nimana, Deoso‑ka Doni ai atibodi‑ya wine ene Deoso ai‑ya nofi nafi ai wato, ai‑ya nofi fawaterebonane.

⁶Hibati‑ya Deoso ai watora, ai ene towe tonafe, ai‑ya ai kasomi watora, Deoso ati ai nofi awisarihi niya, Deoso ati‑nima Kirisito abematane, ai manakone‑ya nanahabebonaha.

⁷Ai owa ene amosabote‑ya mai nanahababone mai ati niya,

“Dai nanahabarayaho. Owa‑ta o·ababisahi.” Ai owa ati neba awane.

Mai ihi amosara mai ababone mai ati na,

“Mai abarabone owa‑ta o·ababisaboneni.” Ai ati terani.

⁸Ai ene‑nima Deoso ene ni awire, ai ene amosara, ai ababone, Deoso ai‑ya nofi nafi ene Bidi i‑di Yeso Kirisito‑ta ababisane, ai manakone‑ya nanahabebonaha.

⁹Yeso abe, emene tokafodo ene Deoso ai‑ya ati somawame, Yeso ene Deoso ai‑ya ati yawamaterebonane.

¹⁰Deoso ai nofasa riya, Deoso Bidi abe, ai manakone‑ya nanahabematane. Deoso Bidi abe ene ai‑ya ati somawame, Bidi kitame ene ai‑ya weenamarebona, hini tabaro‑ya ai winabone ai watoneni.

¹¹Makobote Deoso tabaro‑ya ai winabone, hibayata ai‑ka Ayo i‑di Yeso Kirisito ene Deoso ai‑ya ati somawame, ai ya‑yainawahani.

Adaho ene ai aba, Kirisito ene ai abamara

¹²Hibati‑ya Deoso ati‑ya ai‑ka idi i‑di Adaho tokadabare, hini ene abematane. I‑di Adaho ene ai nafi abaharebone, i‑di Adaho‑ya ai foyamete, fare Deoso ati‑ya i‑di Adaho tokadabare, Deoso ati ai tokadabaharirameteni.

¹³Hibati‑ya Deoso ati‑ya i‑di Mose kanahano awisareya, mai nafi ihi amosaramete. Mai ihi‑ya Deoso kadiki awisarematane.

¹⁴I‑di Adaho nowati‑ya i‑di Mose ati awisareya, mai nafi abameteni. Deoso ati‑ya i‑di Adaho mite, Deoso ati‑ya tokadabare. Deoso ati‑ya mai mitara, mai abaharemeteni. Ai a‑ababone‑ke i‑di Adaho amane. Ai abari‑bone‑ke ai owa kamakibisematane.

¹⁵I‑di Adaho amosare ene ai nafi ababone Deoso ati ne. Ai‑ya Deoso nofe, ai abarabone, hini Bidi‑ya daanane, ai manakone‑ya nanahabebonaha. I‑di Adaho manakone‑ya nanahabe, ai nafi manakone‑ya nanahabane, Bidi ati ai nofeya, ai abarabone, ai‑ya Deoso ati somawamabisane. I‑di Adaho ene amosare ene‑ya i‑di Yeso Kirisito ene amosi fiyakane, ai nafi manakone‑ya nanahabane, ai abarabonehe.

¹⁶I‑di Adaho ene towe ohari manakone ai nafi ababone Deoso ati nematane. Adaho ene‑ya Yeso Kirisito ene fiyakane, Yeso Kirisito ene ai dami manakone aba ene Deoso ati somawame, ai ene amosa‑nima ai na, Deoso ai‑ya awawahane.

¹⁷I‑di Adaho ene ai nafi abano ababone ai wato, Deoso ai‑ya nofe, Bidi‑ya daanane, ai manakone‑ya nanahabebonaha. Hibayata Yeso ati ai nofiya, Deoso ai‑ya ati somawameya, Yeso Kirisito ene‑nima ai ene na‑ya Deoso awabisatene. Yeso ene ai abano yati neme‑ya winabone ai wato, Yeso eyehe ai nahabone ai watohari nineni.

¹⁸I‑di Adaho ohari ene amosare, ene ai nafi ababone Deoso ati ne, Yeso Kirisito ohari ene amose, abematane, Deoso ai‑ya ati somawamabisebonaha. Ai abami awirabone, ai atibodi yati ai kayafabisamaroni.

¹⁹Adaho i‑di Deoso ati‑ya tokadabare ene ai nafi ene towe toha, Yeso Kirisito Deoso ati‑ya tokadabe ene Deoso ai nafi‑ya ati somawame, ai‑ya awe, Yeso ene amose‑nima ai ene na ai‑ya awabisane.

²⁰Deoso ati i‑di Mose hikanahanomata, ati ai tokadabare, ai ene amosara manakone tonafe, Deoso ai‑ya kasomare‑mana, ai aba neni. Ai ene amosara manakone‑ya Yeso nanahabe, ai ene manakone‑ya fiyakanematane.

²¹Ai ene towe manakone ai nafi ababone Deoso ai‑ya kasome, ai‑ka Ayo Yeso Kirisito ene amosabote ene ai‑ya Deoso ati somawame, Yeso ene amose‑nima ai ene na, Deoso ai‑ya awawahe, Deoso tabaro‑ya, ai nafi winawahaboneni.

Ai atibodi bote ati ai tokadabamarabone

¹Dai one Deoso ati‑ya mai tokadabi nofara, eya mai ati na awineni.

“Ai ene amosaramaro, ai‑ya Deoso ati somawame, hibayata ai ene towe ba‑basi niya, ai‑ya Deoso ati somawamatasebona, ai ene towe ba‑basi nahi.” Mai ati na awineni.

²Haa‑nima dai ati riyahi, dai ene towe tohamarabonehe. Deoso ene ai atibodi yati toha, ai atibodi bote ai‑ka hidi tohamara, ai atibodi bote ati‑ya ai tokadabamariyahi.

³Yama‑ya dai watokarini? Yeso‑ka ai tohawaha, hibati‑ka ai ene‑nima ai ene namara, ai ene yati tohawaha, Yeso abe‑ka hetarato‑nima ai nabone, ai‑ya mai habanirisa teni.

⁴Yeso abe, yati hodi‑ya mai hinafoye, Deoso kitabote ene Yeso kitamatasane. Yeso kitame‑ka hetarato‑nima ai na, ai‑ya mai habanirisa, ai waamisama, hibati‑ka ai‑nima ai namaraboneni.

⁵Yeso Kirisito abe, kitamemata, Yeso‑ka ai tohawaha, makobote ai abano aba, ai kitama, Kirisito abano yati tohe‑nima ai abano yati tohawahaboneni.

⁶Hibati‑ya ai ene amosara, ai ene Yeso awa‑ya abemata, ati ai nofa, Yeso ene hibati‑ka ai aba, ai yati tohawaha ai‑ya ai watoneni. Hibati‑ka ai‑nima ai namara, ai atibodi bote kiti fawana, ai‑ka hidi tohamara, ai atibodi yati kitawaha, ai ene amosawamaboneni.

⁷Hibati‑ka ai tohamaro Yeso eyehe ai abamaroni, ai atibodi bote ai‑ya yaditonamarabonehe.

⁸Yeso abemata ene hibati‑ka ai aba, fare Yeso kitamemata‑nima ai yati tohawaha, ai atibodi yati tohahari na, ai atibodi yati‑ya Kirisito sawitene.

⁹Yeso abe, kitamemata, abamaterebona ai watoneni.

¹⁰Ai ene amosara manakone nafi‑ya Yeso nanahabi ohari, abe kitamemata, Deoso‑ya kahiyaratene.

¹¹Haa‑nima dai atibodi ati nahi.

“Hibati‑ka o·aba, yati ohawaha, owatibodi bote kiti fawana, ati okadabami awiraboneni, Yeso Kirisito‑ka ohawaha, Deoso ati okadabiya, okahiyarebonane.” Dai atibodi ati nahi.

¹²Dai atibodi bote yama towe‑ya nokotonihemaro, dai‑ka hidi tohamara. Dai atibodi bote ati‑nima dai riyahi.

¹³Hibati‑ka dai aba, dai yati tohawaha, dai abano kobobona dai daanahi, Deoso‑ya. Dai abano kobobona ene amosaramaro‑nima dai riyahi. Deoso ati kobohina‑nima dai abano kobobona nawahabisahi.

¹⁴Dai atibodi bote dai‑ka hidi tohamara. Yama amosara dai nofamariyahi. Mose ati dai‑ka hidi toharihi ne, Deoso‑ta dai‑ka hidi tohabise, Deoso dai‑ya kasomabise, dai‑ya ati somawame, dai ene‑maro‑ya kadikamarebonane.

Deoso‑ka ai toha, Deoso ati ai tokadabahi

¹⁵Eya dai one ati na awineni.

“Mose ati ai‑ka hidi tohamareya, ai ene amosara, sibarineni. Deoso ai‑ya ati somawamatene.” Dai one ati na awineni.

Haa‑nima mai ati na Deoso nofaterene.

¹⁶Owati dai mitahi. Ai owa ati‑ya ai tokadaba, fare ai‑ka hidi tohatene. Fara‑nima dai na, dai atibodi bote ati‑ya dai tokadabatebone dai ati na, dai atibodi bote dai‑ka hidi tohateni. Dai atibodi bote dai‑ka hidi toha, dai ene amosateraboneni. Dai abiya, Deoso eyehe dai winateraboneni. Deoso ati‑ya dai tokadababisabone dai atibodi ati na, Deoso dai‑ka hidi tohatene. Deoso dai‑ka hidi tohe, dai ene amosawamawahaboneni.

¹⁷Deoso ene ya‑yai·oneni. Hibati‑ya dai atibodi bote dai‑ka hidi toha, ati dai tokadabamaroni. Hibayata Deoso ati‑ya dai mita, ati dai nofe, ati dai tokadabawahatene.

¹⁸Dai atibodi bote dai‑ka hidi tohamara, dai wahawama, Deoso dai‑ka hidi tohawahe, dai ene amosawamawahaboneni.

¹⁹Yama‑ya dai watabone dai‑ya ohiyaraboneni. Hibati‑ya dai atibodi bote dai‑ka hidi toha, dai abano kobobona ene amosara tonafemaroni. Hibayata dai abano kobobona Deoso ati‑ya tokadabahi, dai ene amosi ba‑basi nabonehe.

²⁰Hibati‑ya dai atibodi bote dai‑ka hidi toha, Deoso ati‑ya dai tokadabaramaroni.

²¹Dai ene‑maro manakone hini yamata‑ya tohibati? Dai ene‑maro manakone dai ababoneni. Hibayata dai ene‑maro dai nofami awira, dai ene‑maro tamine kadikami dai nofarihi nineni.

²²Dai ene‑maro dai‑ya yaditonamara, dai manakone abawaha, hibayata Deoso‑ka dai toha, dai ene amosawama, dai manakone amosawamahari na, makobote Deoso tabaro‑ya dai winaboneni.

²³Ai ene towe manakone ai ababone, Deoso eyehe ai winateraboneni. Ai‑ka hidi Yeso Kirisito ai manakone‑ya nanahabe ene Deoso ai‑ya ati somawame, hiniya ati somawame, ai anina manakone tohi awirini. Deoso tabaro‑ya ai winabone, ai abamateraboneni.

Ai aba, Mose ati ai‑ya barinamare

¹Oka soho dai amani. Owati dai mitahi. Ai‑ka hidi mai ati‑ya mai kamina, mai ati mai hikanahano hina, mai ati ai tokadabara, ai‑ya mai wee, yama manakone‑ya mai haana, mai dai watoneni. Ai abiya, ai‑ya mai weenamarihi, yama manakone‑ya mai haanamarihi, mai teni.

²Mai fanawi tamine‑ya i‑di Mose kanahanomatane.

“Mai fanawi fana, mai‑ka yibote ohari‑ya mai famabisahi.” Mose‑ka yama hani ati nineni.

Mai‑ka yibote abeya, maki owa‑ya mai famawahiya, mai sibarineni. Mai‑ka yibote abeya, maki owa‑ya mai ati famawaha, Mose‑ka yama hani mai‑ya ati barini awirani.

³Mai‑ka yibote abi awire, maki owa‑ya mai famawaha, towe mai amani. Mai‑ka yibote abeya, maki owa‑ya mai famawahiya, towe mai tohi awirani.

⁴Soho, owati dai mitahi. Yeso ati dai nofawahiya, hibati‑ka dai aba, Mose ati dai‑ya barinami awire. Yeso Kirisito kitamemata, fare hika dai tohawaha, dai yati tohawaha, Deoso‑ka yama anini amosa dai aninaboneni.

⁵Hibati‑ya ai atibodi bote ati ai tokadaba, Mose ati‑ya ai mita, ati ai tokadabi nofare, ai ene amosara tonafe, hini ai ene ai ababoneni.

⁶Hibati‑ya Mose ati ai‑ka hidi tohemari, hibayata Yeso ati ai nofawaha, hibati‑ka ai abawaha, hibayata Deoso ai‑ka hidi tohawahe, ai atibodi yati‑ya Deoso‑ka Doni sawiwahene, ai‑ya kasomebonaha.

Mose‑ka yama hani ai kadika, ai ene amosara ai wato

⁷“Deoso ati‑ya i‑di Mose kanahano ati kasirone.” Onamone dai ati na.

Ati kasiro awire, ati amosabisane. Deoso ati i‑di Mose hikanahanomata ai kadikiya, ai ene amosara ai watoteni. Hibati‑ya mai‑ka yama‑ya owatibodi ati kayafa,

“Yama sibarini.” Owatibodi ati na,

owa‑ya weeramaroni. Makobote Deoso ati okadika,

“Mai‑ka yama‑ya dai atibodi ati kayafariyahi.” Deoso‑ka yama hani ati na.

Okadika, owa‑ya owatibodi weenawahateni.

⁸Mai‑ka yama‑ya owatibodi bote ati kayafa, owa ene sibarabone onamaroni.

“Mai‑ka yama‑ya dai atibodi ati kayafaraboneni.” Deoso ati ne.

Makobote mai‑ka yama oawa, fara‑ya owatibodi bote ati kayafi ba‑basi nawahani.

“Deoso owa‑ya ati barini awire‑mana, owatibodi owa‑ya weera neni.” Oneni.

⁹Hibati‑ya Deoso ati i‑di Mose hikanahanomata, ati nafi owatora.

“Owa ene sibarini.” Owatibodi ati namaro,

Makobote Deoso ati owato ba‑basi ona,

“Mai‑ka yama‑ya tiwatibodi kayafariyahi.” Ati ne,

Mai‑ka yama‑ya owatibodi kayafabisa, owatibodi ati amosara owatowaha, fara ihi o·ababone, Deoso owa‑ya sawire owatowahani.

¹⁰Mose‑ka yama hani ati okadabiya, owa‑ya kasomabone ona, i‑di Mose‑ka yama hani ati nafi okadabara, o·ababone, owa‑ya owatowahineni.

¹¹Owatibodi bote owa‑ya keyeheteni. Mose‑ka yama hani‑ya tokadababone ati na, Mose ati‑ya tokadabara ihi o·ababone owatowahani.

¹²Mose‑ka yama hani ati amosa, Deoso ati yokana amane. Ati tosawariterene, ati amosatene.

¹³Yama hani ati amosa ihi o·ababone dai ati na awineni. Yama hani ati ihi tohi awirini. Yama hani ati amosabisa, owa ene‑ta amosara, hini owa ene o·ababoneni. Owa ene amosara owatowaha, Mose‑ka yama hani ati ihi owa ene towe na‑nafi tohamaro owatowahineni.

¹⁴Deoso‑ka Doni ene Deoso ati‑ya Mose kanahanomata, ati amosane, owatibodi bote Deoso ati‑ya tokadabi nofara, owatibodi bote towe owa‑ya yose, ati okadabanasa oneni.

¹⁵Owatibodi bote ati okadabamarabone ona, owatibodi bote ene owa ene towe tohasa na, yama amosa onabone ona, yama amosa oni awira. Owa ene towe okakoneni.

¹⁶Owa ene towe owato, Mose‑ka yama hani ati amosa owatohari oneni.

¹⁷Owa ene towe tohasa na, owatibodi yati ene tohi awirani, owatibodi bote owa‑ya foyasa na ene tohani.

¹⁸Owatibodi bote yama amosa‑ya nofara. Yama amosa onofabisa, yama amosa‑ya owatonasa oni awirani.

¹⁹Yama amosa onabone ona, yama amosa‑ya oni awisa orani. Yama towe‑ya orabone ona, yama towe‑ya onasa oneni.

²⁰Yama amosa‑ya onofa, yama towe‑ya owatibodi bote nofasa na, fara owa ene amosara owatibodi yati ene tohi awirani. Owatibodi bote ene tohabisani.

²¹Yama amosa onofa‑ya owatibodi bote nofara. Yama amosa onofabone ona, owatibodi bote ene yama amosa oni awirani.

²²Deoso ati owatibodi yati nofi nafineni.

²³Owatibodi bote owa‑ya foyasa na, owatibodi yati‑ya weeteni, owatibodi bote ati‑nima onabonehe.

²⁴Towe ama·oni. O·ababone, ebeni‑ke owa‑ya kasomabati, owatibodi bote ati okadabamarabonehe?

²⁵Ai‑ka Ayo i‑di Yeso Kirisito owa‑ya kasomebonane. Yeso ene owatibodi yati tohawaha, Deoso‑ya owatibodi yati nokotoni teni. Deoso ene ya‑yai·oneni. Owatibodi yati‑ya Deoso ati okadaba, owatibodi bote yama towe‑ya nofasa nineni.

Deoso‑ka Doni ai‑ya sawi, ati ai tokadababone

¹Hibayata Yeso Kirisito ati ai no‑nofa Yeso‑ka ai toha, Deoso ai‑ya yawi awire, ai manakone amosara‑ya daani awirebonane.

²Yeso Kirisito ai manakone‑ya nanahabe ai abamarabone, ai atibodi bote ai‑ya yaditonamaro, Yeso ai‑ya seekane. Yeso‑ka ai tohawaha, ai atibodi yati Deoso daahina, fara‑ya hika Doni sawine, ai ene amosawamawahabonehe. Ai atibodi bote ati ai tokadabarabone, Deoso‑ka Doni ene ai atibodi yati ati ai tokadababoneni.

³Ai atibodi bote‑ya Mose ati namosaterene. Ai tabaro‑ya Deoso hini Bidi‑ya yose, ai abano‑nima Yeso abano ne, ene amose hinama, ai ene towe manakone‑ya nanahabematane. Ai atibodi yati‑ya Mose ati daaterene. Deoso‑ta ai atibodi yati‑ya daane, ai ene amosawama, yama towe ai nokotonimaraboneni.

⁴Deoso ati‑nima ai nawahabone, Deoso‑ka Doni ai‑ya sawi, ai‑ya kasome, Deoso ati ai tokadababone, ai ene towe tohamaraboneni.

⁵Mai atibodi bote ati‑ya mai tokadaba, yama towe‑ya mai nokotoniteni. Mai atibodi yati ati‑ya mai tokadaba, Deoso‑ka Doni ya‑yainebona‑ya mai nokotonibisateni.

⁶Mahi‑nima mai atibodi bote ati‑ya mai tokadaba, mai ababoneni. Deoso‑ka Doni ati‑ya mai nokotonihe, mai hasinabone, mai atibodi ati mai‑ya somateni.

⁷Mai atibodi bote ati‑ya mai tokadaba, Deoso ati‑ya mai kaka, ati mai hikadabaterene. Mai atibodi bote Deoso ati‑ya tokadabaterani.

⁸Mai atibodi bote ati‑ya mai tokadaba, mai atibodi bote mai‑ka hidi toha, mai ihi Deoso ya‑yaiterene.

⁹Deoso‑ka Doni dai‑ya sawi, dai‑ka hidi tohawahe, dai atibodi bote dai‑ka hidi tohami awira, ati dai tokadabamaraboneni. Kirisito ene Deoso‑ka Doni dai atibodi yati‑ya sawitene. Deoso‑ka Doni dai‑ya sawire‑mana, Kirisito‑ka dai tohi awira neni.

¹⁰Kirisito dai atibodi yati‑ya sawi, dai abano abiya, Deoso‑ka Doni ene dai atibodi yati abateraboneni. Dai ene amosaramaro ene dai abano ababone, dai yokana‑ta abateraboneni. Deoso dai‑ya ati somawame, dai ene‑maro‑ya kadikamaterebona, hini tabaro‑ya dai winaboneni.

¹¹Deoso‑ka Doni dai atibodi yati‑ya sawi, Yeso Kirisito‑ya Deoso nakitamemata, fare dai‑ya nakitamaharibonane. Deoso‑ka Doni dai‑ya sawi ene dai abano kitamaboneni.

Deoso bidi mai ai tohawaha

¹²Yeso ati‑ya dai no‑nofa, owati dai mitahi. Dai atibodi bote dai‑ka hidi tohamara, ati dai tokadabamariyahi. Dai atibodi yati ati dai tokadababisahi.

¹³Dai atibodi bote dai‑ka hidi tohasa niya, Deoso tabaro‑ya dai winateraboneni. Deoso‑ka Doni kite ene dai atibodi bote ati‑ya dai tokadabamariya, dai atibodi bote aba‑nima nawaha, Deoso tabaro‑ya dai winabisaboneni.

¹⁴Deoso‑ka hawi‑ya Deoso‑ka Doni mai yofihikana Deoso bidi mai tohateni.

¹⁵Mai mai hikanikamaro mai‑ka hidi mai‑ya nofare awane. Mai‑ka hidi‑nima ai‑ka hidi re, Deoso ai‑ya nofe, hika Doni‑ya ai‑ya daane, ai‑ya ewe ne, ati ene ai kakomehera, ai ya‑yainibisa,

“Abi Deoso” ai ati teni.

¹⁶Deoso‑ka Doni ai atibodi yati‑ya hiyare,

“Deoso bidi amatini.” Ati tene.

¹⁷Deoso bidi ai toha, Deoso‑ka yama ai kayafaboneni. Deoso‑ka yama‑ya Kirisito kayafi‑nima ai kayafahareboneni. Kirisito‑ya mai bisinamete, fare Kirisito ati ai nofe ene ai‑ya mai nofara, ai‑ya mai bisiniya, sibaraboneni. Kirisito eyehe yama amosabote ai kayafaboneni.

Deoso‑ka yama amosa ai kayafabone

¹⁸Hibayata ai‑ya mai bisiniya, ai korikasara, makobote yama nafi amosabote‑ya ai kayafa, yama amosi ba‑basi naboneni.

¹⁹Yama nafi Deoso wamahinamete Deoso bidi mai one tohabone mai‑ya nimakaneni. Deoso bidi ai nafi tohiya, yama wamani nafi ya‑yainaboneni.

²⁰Hibati‑ya yama Deoso wamahina, nafi amosa. Makobote i‑di Adaho ene yama nafi abi yanatonamete, Deoso ene yama amosawamatasabone, fara hini‑ya nimakaneni.

²¹Makobote yama nafi‑ya Deoso namosawameya, yama abamateraboneni. Deoso bidi ai toha ai abamaterabone‑nima yama one na, abamateraboneni.

²²Yama Deoso wamahinamete Adaho ene komawahamete, mai fanawi naba, dori kome yanana, dori kome‑nima yama komenamete, komasa nineni.

²³Ai komaharineni. Bofe‑ya ai winasa na ai abano komateni. Hibati‑ya Deoso ai‑ya ewe ne, hika tabora‑ya ai koboniya, yama ai kayafaboneni. Hibayata ai abano yati ai nimaniya, Deoso‑ka Doni ai‑ya sawi, makobote ai abano yati ai kayafiya, ai komami awiraboneni.

²⁴Yeso ati ai nofawaha Yeso ati‑nima yama nabone ai nimateni. Yama ai kayafamaro‑mani, yama ai nimanamara neni.

²⁵Yama amosa ai kayafabone ai atibodi ati na, yama ai nimana, fara ai habo kita, ai ya‑yaiteni.

²⁶Ai atibodi yama nafi‑ya watora, Deoso‑ka Doni ai‑ya kanawatotene. Deoso‑ya yama‑ya ai atibodi haanabone, yama ai watora‑ya Deoso‑ka Doni Deoso‑ya basane, ati ai mitare, Deoso‑ta ati himitatene.

²⁷Ai atibodi ati‑ya Deoso wato, fara Deoso‑ya ai tamine‑ya Deoso‑ka Doni kaminatene. Deoso atibodi yama kobohina‑nima Deoso‑ka Doni ati tene.

²⁸Deoso ai‑ya kadikematane, Bidi i‑di Yeso‑nima ai nawahabonehe. Deoso‑ya ai nofa yama ai‑ya kobona, ai‑ka awi towe toha, ai‑ka awi amosa toha na, ai‑ya koboniya, Deoso ai‑ya kasome ene ai watoneni.

²⁹Hibati‑ya Deoso ai‑ya awe, ai‑ya kadikematane, Bidi i‑di Yeso‑nima ai nawahabonehe. Deoso Bidi daidi i‑di Yeso tohe, sohori ai damawahaboneni.

³⁰Deoso ai‑ya kadikemata, ai‑ya haane, ai‑ya ati somawamemari, tabaro‑ya ai winiya, yama amosa hinama ai kayafaboneni.

Deoso ai‑ya nofe ai‑ya nofi fawaterebona

³¹Ai atibodi yama‑ya kadika,

“Deoso kitabote ai‑ya nofe, ai‑ya kasome, ai‑ya nawade, ai‑ya mai ka‑kako mai kiti bi‑bidi na, mai ihi ai korikasariyahi.” Ai atibodi ati teni.

³²Deoso ai‑ya nofi nafi, Bidi‑ya kayawi awire, Bidi‑ya yosene, ai manakone‑ya nanahabebonaha. Fare Bidi‑ya daanemata, yama nafi‑ya ai‑ya Deoso daanamakitasebona ai watoneni.

³³Deoso ai‑ya kadikemata, ai‑ya mai weena, Deoso noko‑ka mai kitara, mai ihi ai korikasara, ai sibaraboneni. Ai‑ka Abi i‑di Deoso ati ene ai manakone wadamarani.

³⁴Deoso‑ya ai tamine‑ya mai hiyariya,

“Mai ihi amosaramaro, mai abahi.” Mai ati naba awineni.

Deoso‑ka kanika‑ya Yeso itari, ai tamine‑ya kaminamakiya,

“Mai abarabone, mai manakone onahaba, o·aba, okitamamaro, mai manakone amosara wadami awirani.” Ati nebonane.

³⁵Kirisito ai‑ya nofi nafi, ai‑ya nofi fawaterebonane. Ai‑ka yama kome kita, ai‑ya nofa, ai‑ya mai bisina, ai‑ya nofa, ai fimi nafe, ai‑ya nofa, ai‑ka bora wadara, ai‑ya nofa, ai abi yanatona, ai‑ya nofa, ai‑ya mai nanahaba, Kirisito ai‑ya nofatene.

³⁶Ai tamine‑ya Deoso‑ka yama hani‑ya i‑di Dafi kanahanomatane.

“Abi Deoso, tiwa oda nofa, oda‑ya mai kaka, mahi‑nima kaneiro mai‑ya mai nanahabi‑nima oda‑ya mai ati nanahabateni.” Dafi ati nane, Deoso‑ka yama hani‑ya.

³⁷Ai‑ya mai kaka, ai‑ya mai ati nanahaba na, Yeso ai‑ya nofi nafi, ai‑ya kasome, ai habo siitora, ai habo kiti ba‑basi na, ai ya‑yaiteni.

³⁸Yama ai watowaha, Deoso ai‑ya nofe, ai nofi‑ya fawaterebonane. Ai aba, ai‑ya sawi, ai hasina, ai‑ya sawitene. Deoso‑ka yo‑yose mai ati ihi ai‑ya kanakiterene, Satanasi‑ka madi mai kiti bi‑bidi na mai toha, hika madi mai kiti ba‑basi na mai toha mai na, mai ihi Deoso ai‑ya kanakiterene. Hibayata yama toha, makobote yama toha na ihi Deoso ai‑ya kanakiterene. Ai‑ya nofi fawaterebonane.

³⁹Neme‑ya ai toka, wami‑ya ai toka, faha bodi‑ya ai toka na, Deoso ai‑ya sawitene. Ai‑ka Ayo i‑di Yeso Kirisito ai manakone‑ya nanahabemata, Deoso ai‑ya nofi nafi, ai‑ya kanakiterebonane.

Isara·eo‑ka mai toha, Kirisito ati‑ya mai dami nofara

^1-29:1-2 Isara·eo‑ka nodi mai oni one Yodeo tohateni.Kirisito‑ka ama·oni. Oka mai one Isara·eo‑ka nodi mai toha, Kirisito ati‑ya mai dami nofara, mai ihi owatibodi komene kita, keyehe‑ya hiri·orani. Owatibodi komene fawara‑ya Deoso‑ka Doni watone.

³Oka mai one Kirisito ati‑ya mai nofara, mai ihi owatibodi yama‑ya kadikani.

“Owa‑ta Deoso tabaro‑ya owinara‑mani, oka mai nafi winabisiya, ya‑yai·ona neni.” Owatibodi ati nineni.

⁴Isara·eo‑ka nodi oka mai toha, Deoso mai‑ya kadikematane, mai‑ya bidinebonaha. Hibati‑ya kabani‑ya mai yakana, mai hawi‑bone‑ya Deoso wehene mai‑ya yofikanematane. Adami tati‑ya mai‑ya hiyare, ati yokana mai himite, ati i‑di Mose hikanahano‑ya mai kayafa, Deoso ati ene Deoso‑ka yobe‑bona‑ya mai wamanameteni, Deoso‑ya mai kahiyarabonehe. Mai‑ya hiyaramatase,

“Oka Ka‑kadika dai‑ka nodi tohebona, dai‑ya kasomebonane. Owati‑nima yama naboneni.” Deoso ati nematane.

⁵9:5 I‑di Isaki bidi oni i‑di Yako tohemari, “I‑di Yako oni Isara·eo tohawahebonane.” Deoso ati nematane.I‑di Abaraho, i‑di Isaki, i‑di Yako mai na, ai‑ka idi mai tohamete. I‑di Abaraho‑ka nodi‑bona i‑di Kirisito, yama nafi‑ka hidi tohe, fare Deoso toha ne, Kirisito‑ya ai kahiyari fawateraboneni. Fara amani.

⁶Deoso ati fawaterebonane. Ati‑nima yama teni. Isara·eo‑ka nodi mai one hika nodi yokana mai tohi awirihi,

⁷Abaraho‑ka nodi mai one Abaraho‑ka nodi yokana mai tohi awirihi nineni.

“Abaraho, tika dao i‑di Isaki bidi mai‑ta tika nodi yokana mai tohabisaboneni.” Deoso ati nematane.

⁸Abaraho bidi mai one‑ka madehe Abaraho‑ka nodi yokana mai tohi awira. Isaki ohari bidi i‑di Abaraho‑ka nodi mai tohabisabone Deoso ati nematane.

⁹Abaraho‑ya Deoso hiyare,

“Ano ohari yanatoniya, okomatasiya, tika yibote i‑di Sara bidi wadawahebonane.” Deoso ati nematane.

¹⁰Bidi wadawahemata, ai‑ka idi i‑di Isaki amane. Makobote i‑di Isaki fadi i‑di Habeka naba toha, bidi mai famameteni.

¹¹Mai wadi awisariya, mai ihi amosi awisarihi, mai ihi towe tohi awisarihi niya, Deoso ati‑nima yama nabone ai watabone mai tamine‑bone‑ya Deoso hiyarematane.

¹²Wadi bahe sohori‑ya narifebona tamine‑ya i‑di Habeka‑ya Deoso hiyarematane. Sohori i‑di Yako‑ya kadike, anidi i‑di Esa‑ya kadikarematane.

¹³“I‑di Yako onofabisa, i‑di Esa‑ta okakoneni.” Deoso ati ne, yama hani‑ya.

¹⁴“Deoso ati kasirone.” Dai atibodi ati na awineni.

Deoso ati kasiro awirane.

¹⁵Hibati‑ya i‑di Mose‑ya Deoso hiyare,

“Mai‑ya owati kasoma, mai‑ya okasoma, mai‑ya owati nofa, mai‑ya onofa onaboneni.” Deoso ati nematane.

¹⁶Deoso kitabote tohe, ai owa‑ya kasomebona ati ne, ai owa‑ya kasomatene. Deoso‑ya mai yoserihi, Deoso‑ya mai ati baririhi teni. Hini ati koboni‑ka yama‑ya anitene.

¹⁷Hibati‑ya Fara·o‑ya Deoso‑ka yama hani hiyara,

“Fara·o, owa ene Eyito‑ka mai‑ka hidi tihawahani, Isara·eo‑ka mai seetikarabone tina, owa ene kitabote tiwiya, mai seetikanaboneni. Mai tabori nafi‑ya owa tamine‑ya mai kaminabone, owa ene kitabote tamine‑ya mai dami mitaboneni.” Ati nematane.

¹⁸Deoso hini hinofa‑nima ene ne, mai one‑ya kasoma, mai one‑ya kasomarene. Deoso ene mai one habi kiti ba‑basi nineni.

¹⁹Owati ihi owa‑ya dai ati haa‑nima niheba awineni.

“Baoro, Deoso ene ai habo kitamone tina, fara Deoso hinofa‑nima ai ene na, hini yamata ihi ai‑ya Deoso weenabati?” Dai ati na awineni.

²⁰Deoso ai‑ya wamanemata dai weeriyahi.

“Abi Deoso, otaminara. Hini yamata‑ba owa‑ya wamatinamete amatiniti?” Dai ati riyahi.

²¹Atabo‑ya wa‑wama hini yama hinofa‑ya atabo‑ya wamatene. Atabo kote‑ya yama amosabote‑ya wama, atabo kote‑ya yama amosara‑ya wama tene. Yama hini hinofa‑ya wamatene.

²²Fare‑nima Deoso ene ne, ai nafi‑ya wamanematane. Mai one ihi amosarabone‑ya watonemata, mai ihi amosawamabone mai‑ya nimane. Mai ihi amosawami awiriya, Deoso yawi kite‑ya mai awabone ati nematane. Deoso yawe‑ya mai awa, mai‑ya nanahabe, sibarane.

²³Deoso yawe‑ya mai kayafiya, mai‑ya ai awa, Deoso ati‑nima yama nabone ai watoneni. Ai‑ya Deoso kadikemata, ati ai nofe, ai‑ya kasomi na‑nafi nebona ati ne, mai one‑ya Deoso ati amosare‑nima‑ya mai kayafa, ai‑ya ati amose‑nima nebona ai watoneni. Deoso tabaro‑ya ai winaboneni.

²⁴Deoso‑ka ai tohabone Yodeo ai one toha, Bara ai one toha na, Deoso ai‑ya kasomebona, ai‑ya kadike, ai‑ya kayafematane.

²⁵Deoso‑ka yama hani i‑di Oseya hikanahanamete, ati dai mitahi.

“Hibati‑ya Bara oka mai tohara, oka mai tohawahaboneni. Hibati‑ya Bara mai onofaramone dai ati na, mai onofa, owa dai watowahaboneni.” Deoso ati nematane.

²⁶Hibati‑ya Bara mai tamine‑ya mai hiyara,

“Deoso‑ka mai tohi awirini.” Mai ati nameteni.

Makobote mai tamine‑ya i‑di Oseya kanahano,

“Deoso kitabote bidi mai tohawahineni.” Oseya ati nematane, Deoso‑ka yama hani‑ya.

²⁷Isara·eo‑ka nodi mai tamine i‑di Isa·iya‑ka yama hani ati dai mitahi.

“Isara·eo‑ka nodi mai dama, siki boni dama‑nima mai na, mai fa‑famaraba na‑ta Deoso tabaro‑ya mai winabisaboneni.” Deoso ati ne, ati‑ya i‑di Isa·iya kanahanomatane.

²⁸“Mai dama mai ihi amosara mai ihi‑ya Deoso kadikeya, hini ati‑nima yama naboneni. Mai ababone ati ne, mai aba kanibote naboneni.

²⁹Deoso kitabote ai‑ya kasomare‑mana, ai nafi aba neni. Sodoma‑ya mai wi‑wina, Komora‑ya mai wi‑wina, mai na, mai abi‑nima ai aba neni.” I‑di Isa·iya ati nematane.

Deoso ati‑ya Isara·eo‑ka nodi mai one nofara

³⁰Hibati‑ya Deoso ati‑ya Bara mai watora, Deoso‑ya mai sibaramete, Yeso ati‑ya mai mitawaha, Yeso ati‑ya mai one nofawaha, Deoso mai‑ya ati somawame, Deoso‑ka mai tohawahani.

³¹Isara·eo‑ka nodi Deoso ati‑ya mai kayafameteni, mai ihi amosabonehe. Mose ati‑ya mai tokadababone mai ati na, ati mai hikadabarene. Mai ati‑nima mai ni awira, mai ihi Deoso mai‑ya ati somawami awire, Deoso‑ka mai tohi awirani.

³²Isara·eo‑ka mai‑ya Deoso nofe, Yeso abe, mai manakone‑ya nanahabane. Yeso ati‑ya mai nofa‑mani, mai manakone wadara neni. Ati mai hinofare,

“Hini oda ene Deoso tabaro‑ya oda kobonibisaboneni.” Isara·eo‑ka mai atibodi ati na,

“Owa tabaro‑ya dai kobonabone Yeso ati dai nofamatahi.” Deoso ati ne.

Deoso‑ka yati‑nima‑ya mai taratokana, Deoso tabaro‑ya mai koboraboneni.

³³9:32-33 “Deoso‑ka Ka‑kadika koboneya, abaterebonane. Yeso abe, fare Deoso‑ka Ka‑kadika tohi awirane.” Mai atibodi ati na, Yeso ati‑ya mai nofara, fara‑ya mai taratokaneni.Ai manakone‑ya Yeso nanahabe Deoso‑ka yati‑nima amane, fare tamine‑ya mai kanahanameteni.

“Siyaho‑ya oka yati onawaana, oka yati‑ya mai taratokaniya, owa tabaro‑ya mai koboraboneni. Oka yati ati‑ya mai one nofiya, mai habi siitorabone, owa tabaro‑ya mai kobonibisaboneni.” Deoso ati nematane, yama hani‑ya.

¹Oka soho dai amani. Owati dai mitahi. Isara·eo‑ka mai onofi nafe, Deoso‑ya mai tamine ohiyarateni. Yeso ati‑ya mai nafi nofiya, Deoso tabaro‑ya mai nafi tokabone owatibodi ati nofani.

²Deoso tabaro‑ya mai atibodi toki nofabisa, Deoso hawine sawi‑ya mai watorani.

³Yeso ati‑ya mai nofa‑mani, Deoso mai‑ya ati somawame nane. Hini mai ihi Deoso mai‑ya ati somawamebona mai atibodi ati na. Ai ene Deoso ai‑ya ati somawamatere‑ya mai watorani.

⁴Mose ati‑ya mai tokadababone mai ati na, Mose ati nafi‑ya mai tokadabara ene Mose ati mai‑ya barikane, Deoso tabaro‑ya mai koboraboneni. Yeso ati‑ya mai nofa, Mose ati mai‑ya barinami awirebona, Deoso mai‑ya ati somawamatene.

Yeso ati ai nofa, ai atibodi abaterabone

⁵“Owati hinama dai tokadabiya, dai‑ya Deoso ati somawamebonane.” Mose ati nematane.

⁶Yeso ati ai nofa, Deoso ai‑ya ati somawamane.

“Kirisito ati ai watabone, neme‑ya ai dodimakiho.” Ai atibodi‑ya ai ati riyahi.

⁷“Kirisito abemata, fara mai aba mai wi‑wina‑ya ai dodimakiho.” Ai atibodi ati rihi teni.

⁸Yama yaki‑ya Yeso tohare, ati ai nofe, ai atibodi‑ya sawi, tamine ai kaminatene.

⁹“Yeso oka hidi amane.” Dai ati na,

“Deoso ene Yeso kitamematane.” Dai atibodi ati na,

Deoso‑ka dai tohawaha, Deoso tabaro‑ya dai winaboneni.

¹⁰Yeso ati‑ya ai atibodi nofa, Deoso ai‑ya ati somawamatene.

“Yeso oka hidi amane.” Ai ati na,

Deoso‑ka ai tohateni.

¹¹“Yeso ati‑ya mai no‑nofa mai habi siitora, Yeso ati‑nima yama na‑ya mai awawahaboneni.” Deoso‑ka yama hani ati nineni.

¹²Yodeo mai‑nima Bara mai na, mai‑ka hidi i‑di Yeso Kirisito tohe‑ya mai haana, fara hinama mai‑ya kasomi nafi tene.

¹³“Yeso Kirisito‑ya mai haana mai‑ya kasomatene, Deoso‑ka mai tohabonehe.” Deoso‑ka yama hani ati nineni.

¹⁴Yeso Kirisito ati‑ya mai nofara, Yeso‑ya mai haaterani. Yeso Kirisito tamine‑ya mai mitara, ati mai hinofaterebonane. Yeso Kirisito ati mai hikaminare, ati‑ya mai mitateraboneni.

¹⁵Deoso mai‑ya yosere‑mana, Yeso tamine‑ya mai kaminara neni.

“Yeso Kirisito tamine‑ya mai ka‑kamina mai kobona mai ihi ai ya‑yaiteni.” Deoso‑ka yama hani ati nineni.

¹⁶Deoso Ati Amosabote‑ya mai kamina, mai ati‑ya mai dami nofara.

“Deoso, tiwati oda kamina, oda ati‑ya mai nofarani.” Isa·iya ati ne, Deoso‑ka yama hani‑ya.

¹⁷Deoso Ati Amosabote Yeso tamine‑ya mai kamina, ati mai himiteya, ati mai hinofeba awane.

¹⁸Deoso ati‑ya mai nafi mitakarini? Ati mai nafi himitemarine. Yama Deoso wamahinamete‑ya wami nafi‑ya mai awineni.

“Yama wamani Deoso tamine‑ya kaminateni.” Deoso‑ka yama hani ati nineni.

“Deoso kitabote tohe, ai nafi‑ya nofane.” Hika yama wamani ati teni.

¹⁹“Deoso ati‑ya Isara·eo‑ka mai mitamete, ati mai hiwatokare? Ati mai hiwatowahane.” Owatibodi ati nineni.

Hibati‑ya Deoso ati‑ya Mose kanahano,

“Bara towe mai‑mone dai ati na, owati‑ya mai nofawahiya, owa dai kayawaboneni. Yama‑ya mai watoramone dai ati na, mai okasomiya, dai yawawahaboneni.” Deoso ati nematane.

²⁰Isara·eo‑ka mai yawabone, mai‑ya i‑di Isa·iya wato, Deoso ati‑ya mai‑ya kaminanasa nane.

“Owa‑ya Bara mai sibara, owa‑ya mai haara, owa ene owa hawine‑ya mai wase, owa‑ya mai watoneni.” Deoso ati nematane.

²¹Isara·eo mai tamine‑ya Deoso hiyaramatase,

“Mahi‑nima mai haa·ona, owa‑ya mai kamara, mai ime kita, owati‑ya mai tokadabi nofarani.” Deoso ati nematane.

Deoso ati‑ya Isara·eo‑ka nodi mai one nofa

¹Isara·eo‑ka mai dami‑ya Deoso nofami awire‑mona dai ati na awineni. Isara·eo‑ka mai‑ya Deoso kanakiterene. Isara·eo‑ka owa ama·oni. Abaraho‑ka nodi, i‑di Besami tohe, i‑di Besami‑ka nodi ama·oni.

²Hibati‑ya Isara·eo‑ka mai‑ya Deoso kadikemata, mai‑ya kakanaterene. Deoso ati‑ya mi‑mita‑mata i‑di Eriya Isara·eo‑ka nodi mai tamine‑ya hiyarane.

³“Deoso, Isara·eo‑ka mai ihi tika bani‑bona oda da‑daa‑ka yati wamani‑ya mai nanahaba, tiwati‑ya mai mi‑mita mai nafi‑ya mai nanahaba na, owa hare hasi·ona, owa‑ya mai ati nanahabamakineni.” Eriya ati nematane.

⁴I‑di Eriya‑ya Deoso hiyare,

“Tiwa ohari awirini, oka 7000 mai kana Satanasi‑ka owa i‑di Baa noko‑kaya mai yobati‑kaya mai nahoterani.” Deoso ati nematane.

⁵Hibati‑ya i‑di Eriya wineya, Deoso ati‑ya mai one nofamete, fara‑nima hibayata mai fa‑famaraba na mai‑ya Deoso kadikemata, mai‑ya kasomane.

⁶Hibati‑ya Deoso ai‑ya nofe, ai‑ya kadikematane. Deoso hini ene amane. Ai ene ai‑ya kadike‑mana, hini ene tohare nane.

⁷Isara·eo‑ka nodi mai dami‑ya Deoso kadikare, mai fa‑famaraba na mai‑ya kadike, Isara·eo‑ka nodi Deoso‑ka mai dami toha‑mone mai ati na, Deoso mai‑ya kadikemata, Deoso ati‑ya mai nofa, Deoso‑ka mai tohabisa. Mai one Deoso ati‑ya nofara mai atibodi ai teme ataro baye‑nima mai atibodi tokitameteni.

⁸“Mai atibodi kita Deoso ene nokobisa‑ka ai‑nima mai na, Deoso ene‑ya mai awa, yama‑ya mai watorihi, ati mai himite, ati mai hiwatorihi hine.” Deoso‑ka yama hani ati nineni.

⁹Mai atibodi kita mai tamine‑ya Deoso‑ya i‑di Dafi hiyare,

“Mai ihi amosara mai mariniya, mai noki wadariyahi. Mai‑ya mai ka‑kako mai kakiya, mai‑ya mai watiya, mai manakone amosara‑ya mai kayafiyahi.

¹⁰Mai nokibodi fawana, yama‑ya mai awamaterabone, mai‑ya mai ka‑kako mai‑ka yama‑ya mai weyenibisiyahi.” Dafi ati nane, Deoso‑ya hiyareri.

Fara Deoso‑ka yama hani‑ya kanahanomakimatane.

Deoso‑ka yama amosabote‑ya Bara mai kayafa

¹¹“Yeso abeya, Yodeo mai manakone‑ya nanahabebona tamine‑ya mai mita, mai taratokana, mai ihi Deoso mai‑ya kakane, mai‑ya kasomarebonane.” Dai ati na awineni.

Deoso mai‑ya kanakare, Bara mai‑ya kasomeya, Deoso ene‑ya Isara·eo‑ka mai awiya, Deoso‑ya mai kayawabone Deoso atibodi ati nane.

¹²Yodeo mai taratokaniya, Bara mai‑ya Deoso kasome, Yeso ati‑ya Yodeo mai nofariya, Bara mai‑ya kasome, Yeso ati‑ya Yodeo mai nofawahiya, ai nafi‑ya kasomi na‑nafi nebonane.

¹³Bara dai toha, dai‑ya ohiyarabone, Deoso owa‑ya yosemarine. Yeso Ati Amosabote dai‑ya okaminabone ati ne, ati ene ya‑yai·oneni.

¹⁴Dai‑ya ohiyara, owa‑ya Yodeo mai awiya, mai yawaba awineni. Yeso ati‑ya dai nofa Deoso dai‑ya kasome‑ya mai awiya, Yeso ati‑ya mai one nofamakeba awineni.

¹⁵Yodeo mai‑ya Deoso saatokase ene Yeso ati‑ya Bara mai dami mitawahiya. Fara Yodeo mai‑ya kayafamataseya, mai abamaro mai kitama, mai‑nima mai nawahaboneni.

¹⁶Yodeo mai‑ka tiriko marafakana‑ya mai tiina, Deoso‑ka baho‑bone ohare‑ya mai wamani dai tohineni, Deoso mai‑ka tiriko nafi‑ya kasomebonaha. Awa bono habi amosa, ini amosateni. Fara‑nima Yodeo mai‑ka idi Deoso ati‑ya mai nofamete, fara Deoso ati‑ya Yodeo mai‑ka nodi mai nofahareboneni.

¹⁷Tabora‑ke orifera ino‑nima Yodeo mai na, Yeso ati‑ya mai nofara hini mai ihi Deoso mai bakahinakosa, yama‑ke orifera ino‑nima Bara dai na, Yeso ati‑ya dai nofawaha, tabora‑ke orifera‑ya Deoso dai‑ya nawaane, orifera amose habo dai‑ya kasomawahane.

¹⁸Yodeo mai‑ya Deoso bakanakose, dai‑ya nawaane, mai‑ya dai weeriyahi. Dai amosawaha, hini dai ene tohara, orifera amose ede‑ya Deoso dai‑ya nawaane hini Deoso ene‑bisa amane.

¹⁹“Orifera amose ino Deoso bakahinakoseya, oda‑ya nawaanane.” Dai ati na awineni.

²⁰Fara dai ati‑nima yama nineni. Yeso ati‑ya Yodeo mai nofaramaro, hini mai ihi orifera ino‑nima mai na, Deoso mai‑ya bakanakose. Dai‑ta Yeso ati‑ya dai nofa, orifera amose ede‑ya dai‑ya Deoso nawaane. Dai‑ya dai nofi nafiriyahi. Deoso ene dai ya‑yaina, Deoso dai kahiyarahi.

²¹Yeso ati‑ya Yodeo mai one nofara, orifera ino‑nima mai na, mai‑ya Deoso bakanakose, Yeso ati dai nofamara, dai‑ya bakanakosamaki neba awane.

²²Deoso ene ai one ya‑yai, ai one ohiteni. Orifera ede amose‑ya dai‑ya nawaane ene dai ya‑yainineni. Orifera amose ede‑ya Yodeo mai waanamaro, Deoso mai‑ya bakanakose, mai ya‑yainamara, mai ohinibisaboneni. Fara‑nima Yeso ati‑ya dai nofami awiriya, dai‑ya bakanakosamakibonane.

²³Yeso ati‑ya Yodeo mai nofara Deoso mai‑ya bakanakose, Yeso ati‑ya mai nofawahiya, Deoso mai‑ya nawaanamakitasebonane. Deoso kitabote tohe, mai‑ya ati nawaanamakiya, mai‑ya nawaanamakitasebonane.

²⁴Orifera tabora‑ke ede‑ya orifera yama‑ke ino ai nawaanaterani. Orifera yama‑ke ino‑nima Bara dai tohabisa, orifera tabora‑ke ede‑ya dai‑ya nawaane. Orifera tabora‑ke ino‑nima Yodeo mai tohabisa, tabora‑ke orifera ino Deoso bakanakose, hini ede‑ya Deoso hinawaanami nofeya, mai‑ya nawaanama kanibote nebonane.

Isara·eo‑ka mai‑ya yama amosa‑ya Deoso daanebona

²⁵“Yodeo mai ati kasira oda‑ta oda amosabisineni.” Dai ati riyahi.

Yama‑ya mai watoramete yama dai watowahi. Hibayata Isara·eo‑ka mai one atibodi kita, Deoso ati‑ya mai nofara, Bara dai one‑ya Deoso kadikemata, ati dai nafi hinofeya, yama hawa tohawahaboneni.

²⁶Fara yama hawa tohiya, Isara·eo‑ka mai nafi Yeso ati‑ya mai nofawahabone, mai nafi Deoso‑ka mai tohawahaboneni.

“Ai nafi‑ya ka‑kasoma Siyaho‑ya yananebonane. I‑di Yako‑ka nodi yokana mai ihi amosara, mai ihi amosawahaboneni.” Deoso‑ka yama hani ati nineni.

²⁷“‘Mai ihi amosara mai ihi fawa·onihebone onamaro, mai ihi amosara fawa·oniheboneni.’ Deoso ati nane.” Hika yama hani ati nineni.

²⁸Hibayata Yodeo mai one Deoso Ati Amosabote‑ya mai kaka, mai ihi Deoso dai‑ya kasomi ba‑basi nane. Hibati‑ya Yodeo mai‑ka idi mai‑ya Deoso nofemata, mai‑ka nodi mai‑ya nofamakibona ati ne, mai‑ka nodi mai‑ya nofasa nane.

²⁹Deoso ati abaterene, ati‑nima yama naboneni. Deoso yama‑ya ati daane, yama‑ya daanebonane. Mai‑ya kasomebona ati ne mai‑ya kasomebonane.

³⁰Hibati‑ya Deoso ati dai tokadabaramaro, Isara·eo‑ka nodi mai ihi amosara, mai ihi Deoso Ati Amosabote dai mita, ati dai nofe, Deoso dai‑ya kasome, dai‑ya ati somawamane.

³¹Hibati‑ya Deoso ati dai nofasa riya, dai‑ya kasome, ati dai nofawahane. Fara‑nima Deoso ati‑ya Isara·eo‑ka mai nofi awisara, Deoso dai‑ya kasome‑nima mai‑ya kasomebonane. Ati mai hinofeya, mai‑ya ati somawamebonane.

³²Ai nafi ati kasira, Deoso ai‑ya kasome, ai abarabone‑ya nofane.

³³Ka! Yama nafi‑ya Deoso wato, ene nafi ai watorihi, ati nafi ai watorihi ne, yama ai wata‑ya Deoso‑ka yama wato fiyakani nafineni.

³⁴Deoso atibodi ati nafi ai watoterani. Deoso‑ya ai kanawatoterani.

³⁵Yama nafi‑ka hidi Deoso tohe, hini hika yama ai‑ya daane, hika yama ai daatonama, manakone wadaterani.

³⁶Yama ai kiha‑ya Deoso daanemari, yama nafi‑ka hidi amane. Ai kahiyare, ai kahiyari fawarayaho. Feye amani.

Deoso‑ya dai‑ya dai daanahi

¹Yodeo dai toha, Bara dai toha, dai na, oka soho dai amani. Owati dai mitahi. Deoso dai‑ya kasomi nafi ene Deoso‑ya dai‑ya dai daanahi. Hibati‑ya Deoso‑ya mai kahiyarabone, Deoso mai‑ya kayafebona, bani‑ya mai nanahaba, Deoso‑ya bani‑ya mai daanameteni. Deoso dai‑ya kayafemari, fara dai‑ta dai abara, dai hasina, Deoso‑ya dai‑ya dai daanahi, Deoso ati‑ya dai tokadababonehe. Haa‑nima dai ene niya, Deoso ya‑yainebonane.

²Deoso ati‑ya mai nofara mai‑nima dai riyahi. Yama amosa hinama tamine‑ya dai atibodi kadikabisahi. Fara yama amosa dai kadikiya, dai ene amosawamabone, yama Deoso hinofa‑ya dai watabone, dai ene Deoso dai ya‑yainiheboneni.

³Deoso owa‑ya kadikemarine, dai‑ya okanawatabonehe. Owati dai mitahi.

“Amosabotebisa ama·oni.” Dai ati riyahi.

Yeso ati dai nofa Deoso dai‑ya kasome, dai‑ya kanawato‑nima dai atibodi dai‑ya kadikabisahi. Deoso ene yama‑ya dai wa‑wato, Deoso ene dai ya‑yainibisa, hini dai‑ya dai kahiyarariyahi.

⁴Ai yehe, ai teme, ai nokobodi, ai narabo na, ai‑ya kobobona, ai yehe ene‑nima ai teme ene rihi. Ai nokobodi ene‑nima ai narabo ene rihi teni.

⁵Fara‑nima Yeso ati ai no‑nofa Deoso‑ka ai dami toha, ai ene fara hinama tohatera ai abano ohare‑ta ai toha ai nineni.

⁶Ai nafi atibodi‑ya Deoso yofikane, mai ai kasomabonehe. Dai one‑ya Deoso yofikane, Deoso ati‑ya kaminebonaha.

“Fara owati tikaminahi!” Deoso ati ne.

Ati tikaminaho.

⁷Mai‑ya ka‑kasoma dai one atibodi‑ya Deoso yofikane, fare dai‑ya yofikane‑nima mai‑ya dai kasomahi. Mai‑ya ka‑kanawato dai one‑ya Deoso yofikane, fare dai‑ya yofikane‑nima mai‑ya dai kanawatohi.

⁸Dai one atibodi‑ya Deoso yofikane mai atibodi komi‑ya dai kasomabone, mai dai kasoma, mai atibodi kome fawanabonehe. Yama‑ya da‑daa dai one atibodi‑ya Deoso yofikane, fare dai‑ya yofikane‑nima yama dai daaniya, dai ya‑yainahi. Hidi dai tohabone, dai atibodi‑ya Deoso yofikane, dai noko wadahi, dai ene amosabonehe. Ai one mai‑ka yama wadara mai‑ya dai kasomahi. Dai one atibodi‑ya Deoso yofikane, fare dai‑ya yofikane‑nima mai‑ya dai kasomahi.

Haa‑nima dai ene nahi

⁹Mai‑ya dai ati nofa, mai‑ya dai nofi yokana tohahi. Yama towe‑ya dai kaka, yama amosa‑ta dai nokotonibisahi.

¹⁰Yeso‑ka dai toha dai‑ka soho dai nofi‑nima dai ibi nofa, mai ihi amosa mai dai kahiyarahi.

¹¹Deoso ati‑ya dai nofa dai refo tohariyahi. Dai hawihi. Deoso‑ka yama anini dai kitahi.

¹²Deoso‑ka yama dai kayafabone ati ne, yama‑ya dai nimana, dai ya‑yainahi. Dai‑ya mai bisina, dai yawarihi. Deoso‑ya dai hiyaranadihi.

¹³Yeso ati‑ya mai no‑nofa yama‑ya mai one kihara, mai dai kasoma, mai‑ka yama‑ba dai daanahi. Mai a‑amo‑ke mai‑ka yobe awire, tika yobe‑ya mai amonahi.

¹⁴Dai‑ya mai bisina, mai dai kasoma, dai ati ene Deoso mai‑ya kasomabise, mai‑ya nakomarayaho.

¹⁵Mai ya‑yaina mai eyehe dai ya‑yainahi. Mai ohina mai eyehe dai ohinahi.

¹⁶Hini dai‑ka yama‑bone‑ya dai nokotini ohaririyahi. Dai atibodi fara hinama tohahi. Dai one‑ka yama‑bone dai nokotoniharihi. Yama‑ya mai kihara mai‑ya tisawiyahi. Tiwa‑ta tinofabisa tiriyahi.

¹⁷Dai‑ya mai ihi amosara, mai‑ya dai ene amosabisa. Dai ene‑ya mai one awiya, dai ene amosa‑ya mai watowahaboneni.

¹⁸Dai ati soma, dai‑ya mai weena, mai dai weeriyahi.

¹⁹Oka soho dai toha, dai‑ya onofi nafe, dai‑ya mai ihi amosara, mai‑ya dai ene amosabisahi. Deoso‑ka yama hani ati dai awahi.

“Mai manakone amosara‑ya daa·onaboneni.” Deoso ati ne,

fare mai manakone‑ya daanebonane.

²⁰“Dai‑ya mai kaka mai fime, mai tafe‑ba dai daa, mai baki hoka, mai‑ka faha‑ba dai daa niya, hini mai‑ya mai atibodi weeniya, mai atibodi komaboneni.” Deoso‑ka yama hani ati nineni.

²¹Dai‑ya mai ihi amosara mai ihi‑nima dai ene riyahi. Hiniya mai dai kasomiya, Deoso ati‑ya mai nofawahaba awineni.

Dai‑ka hidi mai ati dai nofahi

¹Kofeno‑ka mai ati dai tokadabahi. Deoso ene kofeno‑ka mai toha, Deoso mai‑ya kasomare‑mana, mai ati kitara neni.

²Kofeno‑ka mai ati dai tokadabara, Deoso ati‑nima dai ni awirani. Hini dai ene kofeno‑ka dai‑ya mai wee, dai‑ya mai bisi, kadeya‑ya dai‑ya mai nafoya naba awineni.

³Dai ene amosa, dai‑ya kofeno‑ka mai nofateni. Kofeno‑ka mai ihi dai habo siitorabone dai ati na, dai ene amosahi. Dai ene amosara, dai habo siitobisahi. Dai tamine‑ya kofeno‑ka mai mitiya, dai‑ya mai wataboneni. Dai ene amosiya, dai‑ya kofeno‑ka mai kahiyaraboneni.

⁴Deoso‑ka kofeno mai toha, Deoso ene dai‑ya mai kasomaboneni. Deoso ene kofeno ati kitatene. Dai ene amosariya, dai‑ya mai weenaboneni.

⁵Kofeno‑ka mai ati dai tokadabiya, dai‑ya mai bisirabone, dai atibodi dai‑ya weeni awiraboneni.

⁶Kofeno‑ka yinero‑bona‑ya mai haana, mai‑ya yinero dai daanahi. Deoso ene yama‑ya mai anina, yinero‑ya mai kayafa, dai‑ya mai kasomaboneni.

⁷“Yinero‑ya mai haana, mai ati dai tokadabahi.” Deoso ati ne.

Mai ati dai tokadabahi. Mai dai kasomabone mai ati na, mai dai kasoma, mai tamine amosa dai kamina dai nahi.

Deoso ati dai tokadababone, dai ibi nofiyahi

⁸Yama dai kanika, manakone dai nanahaba kanibote nahi. Mai‑ka yinero dai kayafe, manakone dai daatonama kanibote nahi. Mai dai nofabone Deoso ati ne, mai dai nofahi. Mai dai nofi yokana toha, Deoso ati‑nima dai teni.

⁹Deoso ati i‑di Mose hikanahanomata dai watoneni.

“Mai‑ka yibote mai dai aharihi, dai owa dai nanahabarihi, mai‑ka yama dai botirihi, mai‑ka yama dai atibodi koborihi, dai nahi.” Deoso ati ne, ati‑ya i‑di Mose kanahanomatane.

Tiwa tinofi‑nima mai one tinofa, fare Deoso ati nafi tikadabineni.

¹⁰Mai dai nofa, mai atibodi dai nakomarabone, Deoso atibodi yama kobohina‑nima dai ene naboneni.

¹¹Owati‑nima dai na, dai dodafi, mai a‑amo‑nima dai riyahi. Hibati‑ya Yeso ati‑ya ai nofa yati tohiya, Yeso ai awabone nahorebona, hibayata ai amoni fa‑famaraba nibisa, Yeso ai awaboneni.

¹²Yama soki‑nima mai dama mai ihi tohasa nineni. Dai‑ta yama soki‑ya mai wi‑wina mai ihi‑nima dai ene riyahi. Dai ene amosahi. Yama wahabisari‑ya mahi kaki nahore ai wato, fare‑nima hibayata Yeso koboni nahorebona ai watoharine. Deoso‑ka bora kita dai sakona, Yeso kobonebona dai‑ya dai hawa toniheboneni. Yama wahi yanatoni‑ya Sodado mai‑ka bora kita‑ya mai sakona, mai hawa tohabone, mai‑nima Deoso‑ka bora kita dai sakonahi.

¹³Yama tehe‑ka ai toha, ai ene amosa, Yeso koboni hawa tohe‑nima ai ene nahi. Mai ai weerihi, ai yawarihi, kawi ihi ai towe toharihi, ai‑ka yibote mai awira mai‑ya ai dakorarihi, mai‑ka yibote mai ai aharihi, ai‑ka yibote‑ta ai famabisa, ai nahi.

¹⁴Ai‑ka hidi i‑di Yeso Kirisito atibodi yama hini kobohina‑nima dai atibodi kobonahi. Dai atibodi bote yama hinofa tamine‑ya dai kadikariyahi. Dai atibodi bote ati‑nima dai riyahi.

Dai owa ene dai kadikariyahi

¹Yeso ati‑ya mai nofa, Yeso ati‑ya mai wato bi‑bidi na mai dai nofa, dai‑ya mai dabiya, yama mai hiwatora tamine‑ya mai dai weeriyahi.

²Yama nafi‑ya ai one kaba, ai one bani‑ya kabarihi teni.

³Bani dai ati kaba, sibarihi, bani‑ya mai kabara mai‑ya dai weeriyahi, bani‑ya dai ati kabara, sibarihi, bani‑ya mai kabiya, mai‑ya dai weeriyahi, dai nahi. Mai‑ya Deoso kayafemari, mai dai weeriyahi.

⁴Yeso ati‑ya mai nofa, ati mai hiwato bi‑bidi hine, Yeso Kirisito‑ya mai na‑narifa mai amani. Ai owa‑ya mai na‑narifa mai ihi ai kadikara, mai‑ka hidi mai ihi‑ya kadikabisatene. Kirisito‑ya mai na‑narifa mai ihi hikadikabone, mai hikasomaboneni, mai ihi amosabonehe.

⁵Deoso‑ya dai kahiyarabone, dai owa marina dami‑ya nofa, dai owa marina fa‑famaraba na‑ya nofa, hini dai atibodi hinofa‑nima dai na, sibaraboneni. Dai owa marineya, dai owa sawi awiriya, sibaraboneni.

⁶Mahi ohari‑ya dai yorotokaniya, Deoso‑ya dai kahiyara, sibarihi, mahi‑nima dai yorotokana Deoso‑ya dai kahiyara, sibarihi, bani‑ya dai kaba, Deoso‑ya dai kahiyara, dai sibarihi, bani‑ya dai kabara, Deoso‑ya dai kahiyara, dai sibarihi, dai nineni.

⁷Kirisito‑ka ai toha hini ai ene ai hasira, Deoso ene ai hasinibisineni, mai ai kasomabonehe. Ai ababone, hini ai ene ai abara, Deoso ene ai aba, Deoso ai kahiyaraboneni.

⁸Bofe‑ya ai hasinasa niya, Kirisito ai kahiyara, ai abawaha, Deoso tabaro‑ya ai tokabone Kirisito ai kahiyara, ai naboneni. Kirisito‑ka ai toha ai hasi ai aba na, Kirisito ai kahiyara teni.

⁹Hibati‑ya Yeso Kirisito abe, kitamematane, ai hasi, ai aba na, ai nafi‑ka hidi tohebonaha.

¹⁰Dai ene‑nima dai owa mai ihi ra, mai dai tairiyahi, mai ihi‑ya dai kadikariyahi, dai nahi. Ai nafi Deoso noko‑kaya ai nahoya, ai ene‑ya Deoso kadikebonane.

¹¹Hibati‑ya Yeso ati‑ya i‑di Isa·iya kanahano,

“Okitamiya, neme‑ya owinamatasiya, owa noko‑ya mai yobati‑kaya mai nafi nahabone, mai moikanisa,

‘Deoso amatini.’ Mai nafi ati naboneni.” Ati ne.

Ati‑ya i‑di Isa·iya kanahanomatane, Deoso‑ka yama hani‑ya.

¹²Ai nafi ai ene‑ya ai kaminaboneni, Deoso‑ya.

Mai ai taratokariyahi

¹³Deoso mai ihi hikadikabone, mai ihi dai kadikariyahi. Yeso hawine‑ya mai yakana, dai ene‑ya mai awiya, dai ene amosara‑mone mai ati na, dai ene mai taratokanaba awineni. Dai ene mai taratokariyahi.

¹⁴Yeso ene yama‑ya owatoneni. Yama owatibodi hikaba, okobiya, Deoso owa‑ya weerebonane. Yama tiwatibodi hikaba, tikabiya, sibaraboneni. Deoso ene yama‑ya tikabarabone tiwatibodi ati na, tikabariyahi. Tikabiya, Deoso ene tiwatibodi tiwa‑ya weenaboneni.

¹⁵Dai owa yama kabi mai hinofara, mai noki‑ya tikabariyahi. Yama tikaba‑ya mai awiya, mai atibodi mai‑ya weenaboneni. Ai owa mai ai nofa, ai ene mai atibodi mai‑ya weeriyahi. Kirisito mai manakone‑ya nanahabemata, ai ene mai atibodi tosawaririyahi.

¹⁶Dai ene amosahi. Dai ene Yeso‑ka mai‑ya mai one weeraboneni.

¹⁷Deoso ai‑ka hidi tohe, yama ai kaba, yama ai fawa na ihi Deoso ya‑yaini awirihi, yawi awirihi nane. Deoso‑ka Doni ai‑ya sawi, ai ene amosa, ai ati soma, ai ya‑yai na ene Deoso ya‑yaitene.

¹⁸Fara haa‑nima ai toha, Kirisito‑ka yama anini‑ya ai anina, Deoso ai‑ya kayafebona, ai‑ya mai one nofaboneni.

¹⁹Ai ene mai ibi nofi nafe, mai ibi kasomiyahi.

²⁰Deoso ene‑mona bani‑ya mai kabara mai noki‑kaya bani tikabariyahi. Mai noki‑kaya bani tikabiya, mai‑ya taratikaniheba awineni. Bani ai kaba, ai ati kasiroterani. Ai owa ai taratokanihe, ai ati kasirobisateni.

²¹Yama dai kaba, yama dai fawa na ihi dai owa taratokarayaho.

²²Tiwatibodi ati‑nima mai atibodi ati ni awiriya, sibarini. Tiwatibodi ati tikaminiya, tiwa‑ya mai weenaba awineni. Tiwatibodi ati‑ya Deoso wato, tiwatibodi ati tikamini awiriya, tiwa‑ya mai weeni awiraboneni.

²³Deoso ene yama dai kabarabone dai atibodi ati na, yama dai kabariyahi. Yama dai kaba, dai ene towe tohani. Deoso ati‑nima ai ni awira, ai ene amosaterani.

Kirisito ene‑nima ai ene nahi

¹Deoso ati‑ya ai wato ba‑basi na, Deoso ati‑ya mai wato bi‑bidi na, mai dai kasomahi. Hini yama tiwa‑ya kasomi ohare‑bone‑ya nokotiniriyahi. Yama‑ya mai wato bi‑bidi na mai tikasomaharebone, nokotiniharihi.

²Ai owa mai ai kasoma, mai ai ya‑yainihe, Deoso ati‑ya mai wato ba‑basi namakeboneni.

³Kirisito‑nima ai nahi. Kirisito hini ya‑yainebona‑ka yama nokotoni awire, Deoso‑ta ya‑yainebona‑ka yama‑ya Yeso nokotonibise, fare Deoso‑ka yama hani ati dai mitahi.

“Abi Deoso, tiwa‑ya mai kako, owa‑ya mai kako, tiwa‑ya mai wee, owa‑ya mai wee, mai teni.” Deoso‑ka yama hani‑ya Yeso tamine‑ya mai kanahanameteni.

⁴Ai‑ya mai kanawatabone, Deoso ati‑ya mai kanahanameteni. Yeso hawine‑ya ai yakana, Deoso ati‑ya ai kadika, Deoso tabaro‑ya ai koboni awisariya, ai kobonabone ai atibodi ati na, ai ya‑yaiteni.

⁵Dai tamine‑ya Deoso‑ya ohiyara, Deoso dai‑ya kasome ene dai atibodi ati fara hinama toha, Yeso Kirisito ati‑mata‑nima dai nabone, oteni.

⁶Haa‑nima dai niya, dai‑ka hidi i‑di Yeso Kirisito‑ka Abi i‑di Deoso‑ya dai nafi kahiyarawahaboneni.

⁷Hibati‑ya Yeso Kirisito dai‑ya kayafemari, dai ibi kayafiya, dai ene‑ya mai awiya, Deoso‑ya mai kahiyarawahaboneni.

Deoso‑ka yama amosa ai kayafabone

⁸Hibati‑ya oda‑ka idi mai‑ya Deoso hiyare,

“Kirisito kobonebonane, Yodeo mai‑ya kasomebonaha.” Deoso ati nemata.

Fare ati‑nima yama nawaha ai watoneni.

⁹Bara mai‑ya Yeso kasomahari, Deoso‑ya mai kahiyarabone tamine‑ya Dafi hibati‑ya kanahano,

“Bara mai‑ya Deoso tamine okaminiya, mai eyehe Deoso okahiyara, hika wayoma oda hirinaboneni.” Deoso‑ka yama hani‑ya Yeso tamine‑ya Dafi kanahanomatane.

¹⁰“Yodeo dai toha, Bara dai toha na, dai ya‑yainahi.” Deoso‑ka yama hani ati nineni.

¹¹“Bara dai toha, Yodeo ai toha na, Deoso‑ya ai nafi kahiyarahi.” Deoso‑ka yama hani ati nineni.

¹²“Yese‑ka nodi kobonebonane, Bara mai‑ka hidi‑bonaha. Yese‑ka nodi Ati Amosabote‑ya Bara mai nofawahaboneni.” Isa·iya ati nematane, Deoso‑ka yama hani‑ya.

¹³Dai tamine Deoso‑ya ohiyarateni. Yama‑ya Deoso dai‑ya daanebona ati ne dai nimaniya, Deoso ene dai atibodi dai‑ya ati soma, dai habo siitora, dai ya‑yaina, Deoso‑ka Doni kite ene Deoso ati‑nima yama nabone dai watowahaboneni.

Bara mai‑ya Yeso Kirisito ati okaminabone

¹⁴Oka soho dai toha, yama dai wata, dai ene amosa, dai ibi kanawata, dai ene ya‑yai·oneni.

¹⁵Dai‑ka yama hani‑bone okanahana, owati kiti ba‑basi na, yama dai watamaro dai kadikamatasaboneni. Deoso owa‑ya kadike, owa‑ya kasomemarine, dai‑ya okanawatabonehe.

¹⁶Owa‑ya Deoso yosemarine, Bara dai‑ya Yeso Ati Amosabote okaminabonehe. Yeso ati dai nofiya, Deoso‑ka Doni dai‑ya hawa toniya, Deoso‑ya dai‑ya daa·oniya, dai‑ya kayafawahebonane.

¹⁷Deoso ati‑nima ona, Yeso Kirisito ati dai‑ya okamina, owa ene ya‑yai·oneni.

¹⁸Kirisito ene Bara dai‑ya ohiyara, owa ene dai awa, Yeso ati dai nofawaha, fare tamine okamini oharibonane.

¹⁹Yeso Kirisito owa‑ya kasome, Deoso‑ka Doni ene owa ene kita‑ya mai awamaroni. Yerosare‑ya mai wi‑wina, Iririko‑ya mai wi‑wina, hawi bai‑ya mai wi‑wina, mai na, owa ene‑ya mai awa, owati‑ya mai mita, mai namaroni. Deoso ati‑nima owa ene na, Yeso Kirisito ati‑ya mai dami mitamaroni.

²⁰Yeso Kirisito ati‑ya mai mitaramaro mai‑ya ohiyarabisabone owatibodi ati nineni, Yeso Kirisito ati‑ya mai one kaminamete, mai nowati‑kaya owatibodi tokomaki nofarineni.

²¹“Kirisito tamine‑ya mai mitaramaro tamine mai himitawahebonane. Mai‑ya Kirisito tamine‑ya mai kaminaramaro, ati mai himiteya, ati mai hiwatowahebonane.” Deoso‑ka yama hani ati nineni.

Dai tabaro‑ya okabone

²²Yeso Kirisito ati‑ya mai dami mitara mai ohiyara mai ihi dai tabaro‑ya toka kanibote oni awirani.

²³Ahiyata‑ka oka yama anini hawa tohawaha, dai tabaro‑ya okabone onamaro dai tabaro‑ya owati tokasa nineni.

²⁴Esibaniya‑ya okabone, dai tabaro‑ya kobo·oniya, dai‑ya ohiyaraboneni. Ai ibi hiyaranadiya, Esibaniya‑ya okabone, owa dai kasomaba awineni.

²⁵Hibayata Yerosare‑ya okaboneni, Deoso ati‑ya mai no‑nofa mai‑ka yinero‑bona owakamabonehe.

²⁶Masedoni‑ya mai wi‑wina, Akaiya‑ya mai wi‑wina mai na, yinero‑ya mai daanineni. Yerosare‑ya Yeso ati‑ya mai no‑nofa mai‑ka yamata tosiyo yanana, mai‑ya mai kasomabonehe.

²⁷Yinero‑ya Bara mai daana, mai ya‑yainineni. Hibati‑ya Deoso ati‑ya Yodeo mai miti baha, makobote Yodeo mai ihi Deoso ati‑ya Bara mai mitamake, Yodeo mai‑ya Bara mai kasomamake, mai ihi amosineni.

²⁸Yerosare‑ya mai wi‑wina mai‑ka yinero‑bona owakami hawa ohiya, Esibaniya‑ya okomakiya, dai tabaro‑ya owa amoni fa‑famaraba nabone owatibodi ati nineni.

²⁹Dai tabaro‑ya kobo·oniya, Kirisito ai‑ya kasomi ba‑basi nebona owatibodi ati nineni.

³⁰Oka soho dai toha, Yeso Kirisito ai‑ka ayo toha ne, Deoso‑ka Doni ene ai ibi nofa, owa‑ya dai kasoma, owa tamine Deoso‑ya dai hiyarahi.

³¹Yerosare‑ya okiya, Yodeya‑ya mai wi‑wina Yeso ati‑ya mai nofara owa‑ya mai watarabone, Yeso ati‑ya mai no‑nofa mai‑ka yinero‑bona owakameya, mai kayafabone dai ati nahi.

³²Fara haa‑nima dai ati niya, Deoso owa‑ya kasomeya, dai tabaro‑ya kobo·oniya, dai oawiya, owa‑ya dai kasoma, ya‑yai·onaboneni.

³³Deoso ai atibodi ati‑ya na‑nasoma dai‑ya sawiyaho. Feye amani.

Mai owa‑ta, mai‑ya owa tamine dai hiyarahi

¹I‑di Febe ai‑ka asima Yeso ati‑ya nofa, Senekereya‑ya mai wi‑wina mai‑ya kasomateni. Dai‑ka yama hani‑bone okanahanaya, i‑di Febe dai‑ya daanaboneni.

²Dai tabaro‑ya i‑di Febe koboniya, dai kasomahi. Yeso ati‑ya mai no‑nofa ai tabaro‑ya mai kobona, mai ai kasomateni. Dai tabaro‑ya kobona, yama hinofa dai daanahi. Ai owa mai dami‑ya i‑di Febe kasoma, owa‑ya kasomahari nineni.

³I‑di Birisira, maki i‑di Akira‑ya fama Yeso Kirisito‑ka yama oda anina mai dai hiyarahi.

⁴Owa‑ya mai kasomabone mai abi yanatonamaro, mai ihi ya‑yai·ona, mai ihi Bara mai ya‑yaihari nineni. Yeso ati‑ya mai no‑nofa mai dama mai ihi tamine mai mita, mai ya‑yainamaroni.

⁵I‑di Birisira, maki i‑di Akira‑ya fama, mai‑ka yobe‑ya Yeso ati‑ya mai no‑nofa mai yorotokana, mai dai hiyarahi. Asiya‑ya mai wi‑wina mai‑ka owa i‑di Ebeneto Yeso ati‑ya nofi daidi, onofi nafi dai hiyara naho.

⁶Mariya dai‑ya kasomi na‑nafi dai hiyarahi.

⁷I‑di Anidironiko, fadi i‑di Yoniya‑ya fame, mai dai hiyarahi, oka mai amani. Owa eyehe kadeya‑ya mai foyamaroni. Yeso ati‑ya mai nofi baha, ati onofamakimarine. Yeso‑ka yo‑yose mai mai hinofa hineni.

⁸I‑di Abiriato onofi nafi, dai hiyarahi. Ai‑ka hidi i‑di Yeso Kirisito‑ya i‑di Abiriato nofane.

⁹I‑di Oribano Yeso Kirisito‑ka yama‑ya anine, dai hiyara, i‑di Esitaki onofe, dai hiyara dai nahi.

¹⁰I‑di Aberesi ene‑ya Kirisito nofe, Aberesi‑ya dai hiyara, i‑di Arisitaboro‑ka mai dai hiyara, dai nahi.

¹¹Oka owa i‑di Erodiaho dai hiyara, Narasiso‑ka mai one Yeso ati‑ya mai no‑nofa mai dai hiyara, dai nahi.

¹²Ai‑ka Ayo i‑di Yeso‑ka yama‑ya mai anina, i‑di Tirifena, hika kasima i‑di Tirifosa‑ya fama i‑di Bereside ohari na, ai‑ka Ayo‑ka yama‑ya mai anini kita, fara mai onofa, mai dai hiyara, dai nahi.

¹³I‑di Hofo, madi‑ya fame, mai dai hiyarahi. I‑di Hofo‑ya Deoso kayafematane. Okomi‑nima i‑di Hofo madi na, owa‑ya kasomamaroni.

¹⁴I‑di Asinikirito, i‑di Ferekonite, i‑di Eremesi, i‑di Batiroba, i‑di Eremasi, mai na, mai onofa, mai‑ya owa tamine dai hiyara, mai‑ya mai sawe, Yeso‑ka mai toha, mai‑ya dai hiyarahari, dai nahi.

¹⁵I‑di Firiroko, fadi i‑di Yoriya‑ya fama, i‑di Nereo hika kasima‑ya fama, i‑di Orimibasi, mai na, mai onofa, mai‑ya owa tamine dai hiyara, mai‑ya mai sawe, Deoso‑ka mai toha, mai‑ya dai hiyarahari, dai nahi.

¹⁶Deoso ati dai no‑nofa dai ibi kobona, dai‑ka soho‑ya dai kobona‑nima dai ibi kobona, dai nahi. Yeso Kirisito ati‑ya mai no‑nofa mai tabori dami‑ya mai yorotokana, dai tamine‑ya mai hiyarineni.

Owati dai mitahi

¹⁷Oka soho dai toha, owati dai mitamakihi. Dai‑ya mai kanawata mai ati ihi dai ebekanabone, mai ati dai nofariyahi. Yeso ati dai mitamaro, ati‑nima mai ati ni awira, mai ati dai nofariyahi.

¹⁸Dai‑ya mai ebekanabone, ai‑ka hidi i‑di Yeso Kirisito mai hiyosera, hiniya mai dai kahiyarabone mai ati amani. Mai ati amosaya, dai‑ya keyehe‑ya mai hirikana, mai ati amosa ihi yama‑ya mai wato bi‑bidi na, mai ati mai hinofateni.

¹⁹Dai ene amosa tamine oda dami mita, dai ene ya‑yai·oneni. Dai noko wadahi. Dai ene amosa hinama tohabone, yama towe‑ya dai nofaraboneni.

²⁰Hibayata Satanasi ene ai‑ya mai bisi, ai‑ya mai wee, teni. Hasini bideya, Satanasi‑ya Deoso barikanebonane, ai‑ya mai bisinamarabonehe.

“Ai‑ka Ayo i‑di Yeso dai‑ya sawi, dai‑ya kasomebona.” Oteni.

²¹I‑di Timoti oda fama Yeso Kirisito‑ka yama oda anina, dai tamine‑ya i‑di Timoti hiyara, i‑di Rosiyo, i‑di Yasoho, i‑di Sosibataro mai na, oka mai toha, dai tamine‑ya mai hiyarateni. Dai‑ya mai nofineni.

²²I‑di Tesiyo ama·oni. Baoro owa‑ya hiyare, ati okanahanoneni. Dai onofineni.

²³I‑di Kayo dai‑ya nofe, Kayo‑ka yobe‑ya owina, fare yobe‑ya Yeso ati‑ya mai no‑nofa mai yorotokana, dai‑ya mai nofa, i‑di Erasito sidadi‑ke yinero‑ya na‑nawada dai‑ya nofa. Ai‑ka soho i‑di Kowato dai‑ya nofa, mai teni.

²⁴Ai‑ka Ayo i‑di Yeso Kirisito dai‑ya sawi, dai‑ya kasomaho.

²⁵Hibati‑ya yama mai hiwatoramete tamine‑ya Yeso owa‑ya kamine, fara dai‑ya okamina, dai‑ya Yeso kasoma, dai atibodi‑ya nakita, dai habo‑ya nakita nebonane.

²⁶Hibati‑ya Deoso ati‑ya mai mi‑mita‑mete Yeso tamine‑ya mai kanahanamete, tamine yokana‑ya mai watora, tamine mai hikanahanomata tamine ai watowaha, Bara dai toha dai nafi hiwatowahebonane, Deoso ati dai nofabone, ati dai tokadabebonaha.

²⁷Deoso yama nafi‑ya wato, Yeso Kirisito ene Deoso‑ya dai kahiyaranadiya, dai kahiyari fawarayaho. Feye amani.