YESO KISISITO

Yeso Kirisito ene‑bona

¹Yeso Kirisito‑ka yama hani amani, dai awahi. Yama yana kanibote nabone tamine‑ya Yeso‑ya Deoso kamine, Yeso‑ya ai na‑narifa ai watowahabonehe. Deoso‑ka yo‑yose‑ya Yeso yose, yama tamine‑ya owa‑ya kaminane. Yowaho ama·oni. Yeso‑ya na‑narifa ama·oni.

²Deoso ati okanahano, Yeso Kirisito hikamina toha na, okanahanoneni. Fara wada‑nima yama na oawani.

³Yeso Kirisito‑ka yama hani ati mai himitabone, tikadikiya, tisibabisaraboneni. Yama hani ati dai mitiya, ati dai tokadabiya, dai sibabisaraboneni. Fara yama kobonabone yama hani ati na, yama kobo kanibote naboneni.

⁴Yowaho ama·oni. Yama hani okanahanoneni. Asiya‑ya Deoso‑ya mai hi‑hiyara‑ke yobe 7 kane‑ka mai yorotokana mai‑ka yama hani‑bone okanahanoneni. I‑di Deoso toha, i‑di Yeso Kirisito toha, Doni mai 7 kana mai toha, mai na, dai‑ya mai kasomi nafiya, dai habo siitoni awiriya, ya‑yai·onaboneni. Deoso hini hini amane, yanaterene, abaterebonane. Doni mai 7 kana Deoso noko‑kaya mai nahoneni.

⁵Yeso Kirisito yama‑ya watone, yama hiwata tamine‑ya kaminawahane. Yeso kitame, abamaterebona, kitami daidi amane. Bofe‑ka hidi mai‑ka hidi webote amane. Fare okahiyarineni. Ai‑ya nofi nafibisane. Hibati‑ya ai ene amosara, ai barikana‑nima ai namaroni. Makobote Yeso abe, ai‑ya seekawahemarine.

⁶1:6 “Yeso‑ka Deoso” yama hani ati na, Yeso Deoso tohe, Yeso Badi i‑di Yeso‑ka Hidi webote tohahari neni.Yeso ene Deoso‑ka ai tohawahineni. Deoso‑ya ai abano hiyarawahineni. Yeso‑ka Deoso, i‑di Yeso Badi‑ya ai kahiyarawahineni. Yeso kitawahebona, yama nafi‑ka hidi tohawahebona, yama maakani awirabone, fara koboni‑ya ya‑yai·onaboneni.

⁷Owati dai mitahi! Neme sabi‑ya Yeso kamebona, mai nafi hiawebonane. Yeso‑ya mai nanahabamaro Yeso‑ya mai awawahaboneni. Mai hiaweya, tabora nafi‑nima mai ohinawahaboneni. Fara yama amosaboneni.

⁸1:8 I‑di Deoso i‑di Yeso yama faina mai amani yama hani ati na, hidi mai one kamakitasarabone, mai kiti fawaterabone tamine amani.“Yama yanakani‑ke ama·oni. Faina ama·oni. Hini hini ama·oni. Oyanaterani. O·abateraboneni. Kitabote ama·oni.” Deoso ati nane.

⁹Yowaho ama·oni. Dai‑ka owa ama·oni. Deoso‑ya mai nofara ai‑ya mai weena, Yeso‑ya ai na‑narifa Deoso‑ka hawi bai‑ya ai maakiterani. Deoso ati onofa, i‑di Yeso tamine okamina ihi owa‑ya mai wata, faha webote bai‑ya wami itakosa, oni Batomosi toha‑ya owa‑ya mai nawineni.

¹⁰Domiko‑ya Deoso ohiyara, Deoso‑ka Doni ene wada‑nima yama na, owa bari‑kaya ati kita yanana, torobeta ati‑nima ati na,

¹¹“Yama tiawa tamine tikanahanohi. Sidadi 7 kana‑ya Deoso‑ya mai hi‑hiyara‑ke yobe 7 kane wade, fara sidadi 7 kana oni Efesiyo toha, Esimina toha, Bekamo toha, Tiyatira toha, Sadisi toha, Firadefia toha, Raodiseya toha na, fare yobe nafi‑ka mai‑ka yama hani‑ba daatinahi.” Ati ne, torobeta ati‑nima ati nene.

¹²Yama ati yanana oawabone, kii·owama, nabarina awe 7 kana siikare oawani. Nabarina awe oro wamani amani.

¹³1:13 Deoso‑ka yama‑bone‑ya mai da‑daa mai‑ka bora‑nima Yeso‑ka bora tohani. Ai ene towe manakone nanahabe tamine.Nabarina awe siikare bai‑ya, ai‑nima ne sawine. Hika bora yaba, ibe oro wamani, fai karari‑ya sawinisiki amani.

¹⁴1:14 Yeso tati sa‑sawani kite, Yeso ene amosabote yokana tamine amane. Yama towe sawiterani. Noko bodi hirine, ai ene nafi‑ya wato tamine amane.Tati, tati kone ne, sa‑sawani kite, kaneiro kone mese‑nima ne, sa‑sawani kitene. Noko bodi wehene, yifo hirini‑nima nihi,

¹⁵Teme wehene metaho amose hewene kite wehene‑nima teme wehene nihi, faha webote moni kita moni‑nima ati nihi,

¹⁶Noko wehene mahi nokorise wehene‑nima wehene nihi nene. Yehe kanika‑ya amowa mai 7 kana mai‑ya damakana, iridi‑kaya yima ini fama kakinani.

¹⁷Fare oawe, o·abakosani. Yehe kanika‑ya owa‑ya boyone, ati yanane,

“Tiwa habo siitoriyahi. Yama yanakani‑ke ama·oni. Faina ama·oni.

¹⁸O·abamaro, okitamamaro, owa tiawahi. O·abamateraboneni. Mai aba mai tame‑ka safi dama·okana, mai korimari wiye‑ka safi dama·okana, oneni.

¹⁹Yama tiawa tamine tikanahano, hibayata timita tamine tikanahano, yama kobonabone tamine tikanahano tinahi.

²⁰Owa yehe kanika‑ya amowa mai 7 kana mai dama·okana, tamine tiwatora, tamine okaminaboneni. I‑di Deoso‑ya mai hi‑hiyara‑ke yobe 7 kane‑ka mai‑ka hidi mai tamine amani. Nabarina awe oro wamani 7 kana Deoso‑ya mai hi‑hiyara‑ke yobe 7 kane‑ka mai‑ka mai tamine amani.” Ati nene.

Efesiyo‑ya mai wi‑wina

¹2:1 Nabarina awe bai‑ya Yeso sawi ati ne, Deoso‑ya mai hi‑hiyara‑ke yobe‑ka mai‑ya sawine.“Yama hani tikanahanohi. Deoso‑ya mai hi‑hiyara‑ke yobe Efesiyo‑ya wai, yobe hidi‑ya daatinahi. Owa yehe kanika‑ya amowa mai 7 kana mai dama·okana, fara owati amani. Nabarina awe oro wamani 7 kana siikare bai‑ya osawe, fara owati amani.

²Dai ene nafi owatoneni. Dai‑ka yama anini amosa, Deoso‑ka hawi bai‑ya dai maakani awirani. Mai ati kasira, mai ati dai nofi awirani.

‘Yeso‑ka yo‑yose oda amani.’ Mai one ati na, keyehe‑ya mai hirina.

Mai ati dai mita, mai‑ya dai watoneni. Mai ati dai nofarani.

³Deoso‑ya mai nofara dai‑ya mai weeniya, dai winitonami awirani. Owa dai nofa ihi Deoso hawine bai‑ya dai maakani awirani.

⁴Dai ene amosa hinama tohi awirani. Hibati‑ya Deoso‑ya dai nofi nafemaroni. Hibayata Deoso‑ya dai nofi bi‑bidi nineni.

⁵2:5 Nabarina awe sobakanebona Yeso ati ne, Efesiyo‑ya mai wi‑wina mai‑ya Yeso nawadamare tamine amane. Fara yama towe mai‑ya kobonaboneni.Hibati‑ya Deoso dai nofi bahe‑nima dai nofamatasaho. Hibati‑ya Deoso dai nofi bahe‑nima dai nofamatasi awireya, dai‑ka nabarina awe soba kanibote onaboneni.

⁶Nikoreita mai ihi‑ya dai nofi awira, dai sibarini. Nikoreita mai ihi onofaharirani.

⁷Deoso‑ka Doni ati dai mita, ati dai tokadabahi. Deoso‑ya mai hi‑hiyara‑ke yobe‑ka mai‑ka yama hani ati dai tokadaba, dai nahi. Hawi bai‑ya mai maanamara, mai amosineni. Owati ihi ai abarabone‑ka awa bono‑ya mai kababoneni. Deoso tabaro amose bai‑ya awa bono ade waineni.” Ati nene.

Esimina‑ya mai wi‑wina

⁸“Yama hani tikanahanohi. Deoso‑ya mai hi‑hiyara‑ke yobe Esimina‑ya wai, yobe hidi‑ya daatinahi. Yama yanakani‑ke ama·oni. Faina ama·oni. O·abamaro, okitamamaro, fara owati amani.

⁹Dai ene nafi owatoneni. Deoso‑ya mai nofara, dai‑ya mai weenineni. Dai‑ka yinero nafire, neme‑ya dai‑ka yama dama tohabisineni.

‘Deoso‑ka dai tohi awirini. Deoso bidi oda amani.’ Yodeo mai one ati na, keyehe‑ya mai hirineni.

Satanasi‑ka mai amani.

¹⁰Dai habo siitoriyahi. Diaboro ati ene kadeya‑ya dai one‑ya mai nafoyabone, dai maaki‑bone‑ka mai ihi amani. Ai amoni ai yehe kafama‑ya dai‑ya mai weenaboneni. Deoso‑ka hawi bai‑ya dai maakani awiriya, dai‑ya mai nanahabiya, dai sibaraboneni. Dai kitamiya, owati ihi dai abaraboneni.

¹¹Deoso‑ka Doni ati dai mita, ati dai tokadabahi. Deoso‑ya mai hi‑hiyara‑ke yobe‑ka mai‑ka yama hani ati dai tokadaba, dai nahi. Deoso‑ka hawi bai‑ya dai maanamara, dai amosineni. Yama kome fawarabone‑kaya dai tokaraboneni.” Ati nene.

Bekamo‑ya mai wi‑wina

¹²2:12 Yeso yima hidi amane ati ne, mai ihi towe mai‑ya weenebona tamine amane.“Yama hani tikanahanohi. Deoso‑ya mai hi‑hiyara‑ke yobe Bekamo‑ya wai, yobe hidi‑ya daatinahi. Yima ini fama, yima hidi ama·oni. Fara owati amani.

¹³Dai ene nafi owatoneni. Dai wini‑kaya Satanasi ati‑ya mai dami tokadabineni. Anitibasi dai‑ya sawimari, owa oni‑ya saatonakosi awiremari ene Anitibasi‑ya mai one nanahabani. Anitibasi‑ya mai nanahabiya, owa oni‑ya dai saatonakosi awirani.

¹⁴Dai ene amosa hinama tohi awirani. Baraho ati‑mari‑nima dai one ene tohanineni. Baraki‑ya i‑di Baraho kanawato, Yodeo mai‑ya Baraki kanawatomakimarine. Baraki ati ene deoso bara mai‑ka bani mai‑ya Yodeo mai kabamaro, fana bara mai‑ya Yodeo mai idiwaha namaroni.

¹⁵Nikoreita mai ati‑nima dai one ati neni.

¹⁶Fara mai atibodi amosawami awiriya, kobo kanibote onabone, yima ini fama‑ya mai onahababoneni. Owa iridi‑kaya yima ini fama kaki‑nima owati kita kakeboneni.

¹⁷2:17 Mai oni yati‑bone Yeso ati ne, Deoso mai‑ya kayawebona tamine amane.Deoso‑ka Doni ati dai mita, ati dai tokadabahi. Deoso‑ya mai hi‑hiyara‑ke yobe‑ka mai‑ka yama hani ati dai tokadaba, dai nahi. Hawi bai‑ya mai maanamara, mai amosineni. Deoso‑ka baho oni mana toha, hibati‑ya kemamaro, fara mai‑ya daa·onaboneni. Mai‑ka yati bide sawa‑ba daa·onaboneni. Yati bide mese‑ya mai oni yati okanahanaboneni. Mai oni yati mai one hiwatoraboneni.” Ati nene.

Tiyatira‑ya mai wi‑wina

¹⁸2:18 Yeso noko bodi wehene wade, yama nafi‑ya Yeso awe tamine amane. Yeso teme metaho amose mai ihi towe mai‑ya Yeso weenebona tamine amane.“Yama hani tikanahanohi. Deoso‑ya mai hi‑hiyara‑ke yobe Tiyatira‑ya wai, fare yobe hidi‑ya daatinahi. Deoso Bidi ama·oni. Yifo hirini‑nima owa noko bodi wehene na, owa teme metaho amose‑nima na, fara owati amani.

¹⁹Dai ene nafi owatoneni. Dai ibi nofa, dai ibi kasoma, Deoso ati dai nofa, Deoso‑ka hawi bai‑ya dai maakani awirani. Hibayata dai ene amosi ba‑basi nineni.

²⁰Dai ene amosa hinama tohi awirani. I‑di Yesabeo ati‑maro‑ya dai one dai‑ya kanawatoneni. Fara ihi owa‑ya mai na‑narifa mai tosawarineni.

‘Deoso ati‑ya ka‑kamina ama·oni. Deoso ati okaminaboneni. Fana bara‑ya dai idi, maki bare‑ya dai idi niya, yama sibarineni. Mai‑ka deoso bara mai‑ya mai kahiyarabone, mai‑ya dai sawi niya, yama sibarineni.’ Ati na, dai‑ya kanawatoneni.

Ati dai mita,

‘Haa‑nima tiwati riyahi!’ Dai ati ni awirani.

Yama towe amani.

²¹Yesabeo ati‑maro‑nima ati na, fara‑ya nima·onani, ati amosawamabonehe. Yama amosawami‑ya nofarani.

²²Owati dai mitahi! Owati ihi kiyanaboneni. Fana ati‑ya mai tokadaba, mai ihi amosawami awiriya, mai wee·onaboneni.

²³Owati ihi Yesabeo ati‑maro‑nima mai ati na mai kiyaniya, mai ababoneni. Mai tamine Deoso‑ya mai hi‑hiyara‑ke yobe‑ka mai nafi himitaboneni. Dai nafi atibodi owatoneni. Fara mai hiwatowahaboneni. Hini dai ene‑nima dai ene manakone na daa·onaboneni.

²⁴Tiyatira‑ya dai wi‑wina dai one ati amosara, mai ati‑ya dai tokadabara, Satanasi ene‑nima dai ene ni awira, dai sibarineni.

²⁵Okomatasabone, owa dai nimaniya, dai ene amosi fawariyahi.

²⁶Deoso‑ka hawi bai‑ya dai maanamara, owa ene‑nima dai ene na, dai okasomaboneni. Bofe‑ka mai dami‑ka hidi dai tohawahaboneni.

²⁷Okobi ene owati kitawahamaro, owa ene dai ati kitawahaboneni. Metaho wamani kite‑nima dai ati kiti naboneni. Mai ihi towe yiwaha keroni wakakana kanibote na‑nima mai nibisabone, mai kiti awiraboneni. Mai‑ka hidi dai toha, dai ene kita, dai naboneni.

²⁸2:28 Yama wahabisari‑ke amowa webote‑nima ati ne, Yeso hini tamine‑ya hiyare, mai‑ya kasomi nafibonaha. 22:16Yama wahabisari‑ke amowa webote‑nima ne dai‑ya daa·onaboneni.

²⁹Deoso‑ka Doni ati dai mita, ati dai tokadabahi. Deoso‑ya mai hi‑hiyara‑ke yobe‑ka mai‑ka yama hani ati dai tokadaba, dai nahi.” Ati nene.

Sadisi‑ya mai wi‑wina

¹3:1 Deoso‑ka doni mai 7 kana yama hani ati na, yobe hidi mai tamine tohaba awini. Deoso‑ka Doni yokana oharibisane.“Yama hani tikanahanohi. Deoso‑ya mai hi‑hiyara‑ke yobe Sadisi‑ya wai, yobe hidi‑ya daatinahi. Deoso‑ka doni mai 7 kana owa‑ya mai sawi, fara amowa mai 7 kana mai dama·okana, fara owati amani. Dai ene nafi owatoneni.

‘Deoso‑ka hawi‑ya dai sawi amosa, dai tosawari awirini.’ Mai one ati na,

dai atibodi‑ya mai watora, dai‑ta dai tosawaribisineni.

²Dai amona‑nima dai nineni. Deoso‑ka hawi‑ya dai nokotoni awirani. Dai dodafihi! Hibati‑ka dai‑nima dai namatasahi. Deoso‑ka hawi‑ya dai nokotonimatasahi. Dai ene amosa fawani yanatoneni. Dai ene amosawamahi.

³Hibati‑ya Deoso ati dai mitamaro, ati dai nofemari, ati dai tokadabamatasaho, Deoso‑ka hawi‑ya dai nokotonimatasahi. Dai dodafi awiriya, Deoso‑ka hawi‑ya dai nokotoni awiriya, yama‑ya mai bo‑boti mai kaki‑nima owa koboni naboneni. Oka mahi dai wato awiraboneni. Hiniya kobo·onaboneni.

⁴Sadisi‑ya dai one fa‑famaraba na mai ihi amosabisineni. Neme‑ya owa‑ya mai sawebone, mai‑ka bora sawa‑ya mai sakonabone, mai ihi amosa ihi mai saweboneni.

⁵3:5 Bora sawa ai sakonabone ai atibodi amosa hinama tohabone tamine amani, yama towe sawimaraboneni.Hawi bai‑ya dai maanamara, dai amosineni. Bora sawa‑ya dai sakonabone, Deoso tabaro‑ya dai sawebone, dai abarabone‑ka yama hani‑ya dai oni kawaneni. Dai oni abaraboneni.

‘Oka mai amani.’ Onaboneni.

Okobi, Okobi‑ka yo‑yose mai toha, mai na, mai‑ya okaminaboneni.

⁶Deoso‑ka Doni ati dai mita, ati dai tokadabahi. Deoso‑ya mai hi‑hiyara‑ke yobe‑ka mai‑ka yama hani ati dai tokadaba, dai nahi.” Ati nene.

Firadefia‑ya mai wi‑wina

⁷3:7 Dafi Yodeo mai‑ka hidi webote‑mata amane. Dafi‑ka safi Yeso ati ne, safi yokana tamine tohara, Yeso kitabote tamine amane.“Yama hani tikanahanohi. Deoso‑ya mai hi‑hiyara‑ke yobe Firadefia‑ya wai, yobe hidi‑ya daatinahi. Amosabotebisa ama·oni. Keyehe‑ya hiri·oterani. I‑di Dafi‑ka safi owa‑ya sawe, yama see·okani‑ya mai barihikaraboneni. Yama bari·okani‑ya mai seehikani awiraboneni. Fara owati amani.

⁸3:8 Nokobi honita waa, Yeso ati ene Satanasi‑ka mai kitara, Deoso tamine‑ya Firadefia‑ka mai kamina, mai‑ya mai maakaraboneni.Dai ene nafi owatoneni. Owati dai mitahi! Nokobi dai noko‑ya waa, owa ene seekani hawa toha, mai barihikani awiraboneni. Owati dai tokadabamaro dai kiti bide toha, owa oni dai saatonakosarineni.

⁹‘Deoso bidi oda amani.’ Yodeo mai one ati na, keyehe‑ya mai hirineni.

Satanasi‑ka mai amani. Owati dai mitahi. Dai yowi‑ya mai yobati‑kaya mai waakeboneni, dai‑ya mai kahiyarabonehe.

‘Deoso dai‑ya nofane.’ Mai ati naboneni.

¹⁰3:10 Deoso‑ka ai toha Deoso ati ai dami tokadaba, Satanasi‑ka yama towe yanaraboneni. Deoso‑ka ai toha Deoso ati ai one dami tokadabamara, Satanasi‑ka yama towe yananabone, ai hasina ai saweboneni. 6:9-11; 7:14; 12:17; 20:4-6Yama towe yananabone, bofe‑ya mai wi‑wina mai nafi saweboneni.

‘Deoso‑ka hawi bai‑ya dai maakariyahi.’ Onamaroni.

Owati dai dami tokadaba ene dai hasinasa niya, yama towe yanani awiraboneni.

¹¹Kobo kanibote onaboneni. Dai ene amosi fawariyahi, dai manakone‑ya dai one kayafarabonehe.

¹²3:12 Yeso oni‑ya kanahanobona Yeso ai‑ya kayawebona tamine amane.Dai maakani awiriya, Deoso‑ka yobe fowari ewene‑nima dai nabone, Deoso‑ya dai sawiteboneni. Oka Deoso oni‑ya dai‑ya okanahanowahaboneni. Owa oni yati‑ya dai‑ya okanahanowahaboneni. Oka Deoso tabaro oni‑ya dai‑ya okanahanowahaboneni. Deoso tabaro oni Yerosare yati tohineni. Fara oka Deoso tabora‑ya yanana, bofe‑ya kisaboneni.

¹³Deoso‑ka Doni ati dai mita, ati dai tokadabahi. Deoso‑ya mai hi‑hiyara‑ke yobe‑ka mai‑ka yama hani ati dai tokadaba, dai nahi.” Ati nene.

Raodiseya‑ya mai wi‑wina

¹⁴“Yama hani tikanahanohi. Deoso‑ya mai hi‑hiyara‑ke yobe Raodiseya‑ya wai, yobe hidi‑ya daatinahi. Deoso ati‑nima owati na, keyehe‑ya hiri·otera, Deoso fara oda ati kafamineni. Deoso ati ene yama nafi‑ya wama·onamaro, fara owati amani.

¹⁵Dai ene nafi owatoneni. Dai ene sari hiwa‑nima ni awira, faha sire‑nima dai ene ni awira, dai ene yama kaba tosire‑nima na, onofi awirani. Yama hiwa fawi amosabisateni. Faha sire fawi amosabisineni. Yama kaba tosire, kabi towebisa amani.

¹⁶3:16 Mai‑ya firokanamebona mai‑ya nawadamare tamine amane.Deoso‑ya mai nofara mai ihi‑nima dai ene na, yama tosire kabi‑nima dai na, sari hiwa‑nima dai ni awira, faha sire‑nima dai ni awira; fara ihi dai‑ya firo·okanamaboneni. Yama fawi towe ai firokanama‑nima dai‑ya firo·okanamaboneni.

¹⁷‘Yinero nafi okihe, owa yehe honene dama, oka yama nafi hawa tohineni.’ Dai ati neni.

Yama dai wato awirini. Towebisa dai amani. Dai amosi awira, yama nafi dai kihara, mai noki wadara‑nima dai na, dai bodi toha‑nima dai nineni.

¹⁸3:18 Yeso‑ka oro, bora sawa na ai kanikabone Yeso ene ai atibodi amosawahabone tamine amani.Yama dai watora dai narabo okaminaboneni. Oka oro, yifo hirini ihi bise wadami awirani. Oka oro dai kanikahi, dai‑ka yama amosawahabonehe. Bora sawa owa‑ya dai kanikahi, dai sakonabonehe, dai bodi‑ya mai awari‑bone‑karo. Dai noko bodi tene‑ba owa‑ya dai kanikahi, dai noko bodi dai ketehebonehe, yama dai awibakaro.

¹⁹Mai onofa mai wee·oteni, mai ihi amosawahabonehe. Dai noko wadahi! Dai ene towe tohamaro‑nima dai ene namariyahi.

²⁰3:20 Ai atibodi tamine amani. Yeso ai‑ya haane, ati ai nofeya, ai‑ya dabebonane.Owati dai mitahi. Nokobi‑ya dai‑ya haa·onani. Owati dai mitiya, nokobi dai seekaniya, yobe doro‑ya okomakeboneni. Ai tafa, ai ibi hiyara naboneni.

²¹Bofe‑ya osawemaro, hawi bai‑ya maa·okani awiramaroni. Makobote Okobi owa‑ya yose, yama nafi‑ka hidi ohawahineni. Hawi bai‑ya dai maakani awiriya, dai‑ya oyosemakebone, mai‑ka hidi bidi dai tohawahaboneni.

²²Deoso‑ka Doni ati dai mita, ati dai tokadabahi. Deoso‑ya mai hi‑hiyara‑ke yobe‑ka mai‑ka yama hani ati dai tokadaba, dai nahi.” Ati nene.

Hidi Webote‑ka kadera‑ya hidi itari

¹4:1 Torobeta ati‑nima ati ne Yeso tamine amane. 1:10-16Yeso ati hawa toheya, owa noko toka, neme‑ya nokobi seekani hawa toha oawani. Hibati‑ya ati yanane, ati yananamatase, torobeta ati‑nima ati ne owa‑ya haane,

“Tikamahi, owa‑ya! Yama yananabone tamine tiwa‑ya yofi·okanaboneni.” Ati nene.

²4:2 Hidi Webote Deoso tamine.Deoso‑ka Doni ene wada‑nima na‑ya neme‑ya oawani. Hidi Webote‑ka kadera‑ya, hidi itarine.

³4:3 Yasibe toha, saridio toha, esimeraoda toha na, yati amosabote toha, manakone fotani. Deoso amosabote tamine amane. Maka neme‑ke, fara faha kaki nowati‑ya maka neme‑ke ai awateni.Hidi yasibe mese‑nima mese nihi, saridio mese‑nima mese nihi nene. Maka neme‑ke kemoname, Hidi‑ka kadera amosa‑ya barikane, esimeraoda awi‑nima maka awi nene.

⁴Hidi yowi‑kaya kadera 24 kana siitokana oawamakitasani. Kadera‑ya hidi bi‑bidi mai na 24 kana mai nahore, bora sawa‑ya mai sakona, hidi‑ka sabewa oro wamani mai tati‑ya siinareni.

⁵4:5 Deoso itari‑kaya bahi yebekane, ati kite, taokane, Deoso kitabote tamine amane.Hidi‑ka kadera‑ya bahi yebekane, batarara ati ne, taokane. Kadera yowi‑ya nabarina 7 kana botokana siikare oawani. Fara Deoso‑ka doni mai 7 kana mai tamine amani.

⁶Kadera kawi‑ka wara webote‑nima na, kahafa amosabote awi‑nima awinani. Kadera yowi‑ya Deoso‑ka bara mai 4 kana mai sawinani. Mai noki bodi dama, mai noki kabaka, mai noki one hini mai noki‑kaya toha, mai noki one mai bari‑kaya toha nani.

⁷Deoso‑ka bara mai 4 kana daidi iriyaho‑nima nihi, owa bowi bidi‑nima nihi, owa noko ai noko‑nima nihi, owa sibire diwatone‑nima nihi nene.

⁸Mai nafi afe 6 kana hinama toha, mai afe dori‑ya mai noki bodi dama, mai afe baki‑ya mai noki bodi dama kobobonani. Eya mai ati na,

“Amosabote hinama, Amosabote hinama, Amosabote hinama, ai‑ka hidi i‑di Deoso kitabotebisa amane. Deoso yama yanakani‑ke amane. Deoso hini hini amane. Abaterebonane.” Mai ati nade, mai ati fawaterani.

Yama tehe‑ya mai ati toha, yama soki‑ya mai ati toha teni.

^9-10Hidi abaterebona‑ya Deoso‑ka bara mai 4 kana mai kahiyara, mai ati yananiya, hidi bi‑bidi mai na 24 kana mai baki‑ya mai wiyamarimateni, mai‑ka Hidi‑ya mai kahiyarabonehe. Hidi abaterebona‑ya hidi bi‑bidi mai na mai kahiyara, mai‑ka sabewa‑ya mai daana, kadera yowi‑ya mai‑ka sabewa siitonani.

¹¹“Oda‑ka hidi amatini. Oda‑ka Deoso amatini. Amosabote amatini. Kitabote amatini. Fara ihi tiwa oda kahiyarateni. Yama nafi wamatinamaroni, ya‑yaitinabonehe.” Hidi bi‑bidi mai na mai ati nani.

Hidi Webote bebeo‑ya damakane

¹Hidi Webote yehe kanika‑ya bebeo kinikane‑ya damakane oawani. Bebeo‑ka yama barikani 7 kana toha, bari‑kaya yama hani one toha, dori‑kaya one kawana nani.

²Deoso‑ka yo‑yose kite oawani. Fare ati yanane, ati kite,

“Ebeni‑ke bebeo‑ya seekabati? Ebeni‑ke ati kitabote toha titi, yama barikana‑ya wakakanebonaha?” Ati nene.

³Neme‑ya mai awa, bofe‑ya mai awa, wami bodi‑ya mai awa na, bebeo‑ya seekanebona‑ya mai wasi awirihi, bebeo doro‑ya awebona mai wasi awirihi nani.

⁴Bebeo‑ya seekanebona‑ya mai wasi awirihi, bebeo doro‑ya awebona mai wasi awirihi na, ihi owa ohini kitani.

⁵5:5 Yako bidi i‑di Yoda tohe, fare Yoda‑ka nodi i‑di Yeso tamine amane.Hidi bi‑bidi ne owa ati yanane,

“Ohitiriyahi. Tiawaho!

‘Yoda‑ka nodi iriyaho kiti‑nima kiti nebonane.’ Deoso ati‑ya mi‑mita‑mata ati nematamonane.

Tiawaho. I‑di Dafi‑ka nodi amane. Kitabote yokana tohawahe, bebeo‑ya seekanebonane. Yama barikani 7 kana‑ya wakakanebonane.” Ati nane.

⁶5:6 Dafi‑ka nodi kaneiro bidi‑nima ne, Yeso tamine amane.Kaneiro bidi‑nima ne waane. Hidi Webote‑ka kadera yowi‑ya Deoso‑ka bara mai 4 kana mai sawe, hidi bi‑bidi mai na 24 kana mai nahore, mai bai‑ya Kaneiro Bidi waine. Kaneiro Bidi‑ka yama ihi wada, mai hinahabemari‑nima ne, narabo ewene 7 kane toha, noko bodi 7 kane toha nane. Narabo ewene toha, noko bodi toha ne, Deoso‑ka doni mai 7 kana mai tamine amani. Deoso‑ka doni mai‑ya Deoso yosetene, wami nafi‑ya mai sawebonehe.

⁷Hidi Webote‑ya Kaneiro Bidi toke, Kaneiro Bidi hidi webote yehe kanika‑ya bebeo‑ya waratokanane.

⁸Bebeo waratokani‑ya mai awa, Deoso‑ka bara mai 4 kana mai toha, hidi bi‑bidi mai na 24 kana mai toha, mai na, mai baki‑kaya mai wiyani, Kaneiro Bidi yowi‑ya Kaneiro Bidi‑ya mai kahiyarabonehe. Fiaraho bara oni Araba toha, fara‑ya mai nafi aka, barato doro‑ya yama mahi amosa kiba‑ya mai nafi aka nani. Yama mahi amosa ai ati tamine amani. Fara Deoso‑ya ai nofa, Deoso ai hi‑hiyara, ai ati tamine amani.

⁹Wayoma yati‑ya mai hirina,

“Bebeo seetikanahi, yama barikani 7 kana‑ya wakatikanahi. Kitabote yokana amatini. Tiwa‑ya mai nanahabamaro, tabora nafi‑ka mai one tiwa emene‑ya mai tikanikamaro, Deoso‑ka mai tohabonehe. Tabora nafi‑nima mai‑ka mai one tikanikamaroni.

¹⁰Tiwa ene Deoso‑ka mai tohawahineni. Deoso‑ya mai kahiyarawahineni. Bofe‑ka mai‑ka hidi mai tohawahineni.” Mai ati nani.

¹¹Owa noko toka, Deoso‑ka yo‑yose mai dama mai oawa, mai ati omitani. Hidi‑ka kadera kawari‑kaya Deoso‑ka bara mai 4 kana mai sawi, hidi bi‑bidi mai na mai sawi, mai yowi‑kaya Deoso‑ka yo‑yose mai kakabasawama, mai dama, mai ihi mai kadiki ai watorani.

¹²Mai dami ati kita,

“Kaneiro Bidi amosabote yokana amane. Kaneiro Bidi mai hinahabemari, kitawahebona, hika yama dama tohawahabone, hika yama wato nafiwahabone, mai dami hinofawahebona, mai dami hikahiyarawahebonane. Fara yama koboniya, yama amosaboneni.” Mai ati nani.

¹³Hibati‑ya yama nafi Yeso wamahinamete‑ya mai ati yananani. Neme‑ya mai toha, wami‑ya mai toha, wami bodi‑ya mai toha, faha webote mese‑ya mai toha, faha webote bodi‑kaya mai toha na, fara mai nafi ati yanana,

“Hidi Webote Kaneiro Bidi eyehe amosabote dai amani. Oda nafi dai‑ya nofa, oda nafi dai‑ya kahiyara, oda nafi‑ka hidi dai toha, yama maakani awiraboneni.” Mai ati nani.

¹⁴Mai ati yananiya, Deoso‑ka bara mai 4 kana mai one ati‑ya mai mita,

“Fara amani!” Mai ati na, mai ati yanani damani.

Hidi bi‑bidi mai na mai baki‑kaya mai wiya, Hidi Webote Kaneiro Bidi‑ya fame‑ya mai kahiyaraharinani.

Yama barikani‑ya Kaneiro Bidi wakakane

¹Yama barikani daidi‑ya Kaneiro Bidi wakakane oawani. Deoso‑ka bara mai 4 kana, ohari‑ta ati yanane,

“Tikihi, owa‑ya.” Ati ne, bahi ati‑nima ati nene.

²Owa noko toka, kafaro sawa oawani. Ai‑nima ne kafaro mese‑ya itari, di‑disa‑ya damakanene. Hidi‑ka sabewa‑ya mai daana, tokawahane, tabora one dama‑ya kayafebona, mai one‑ka hidi tohawahebonane.

³Kaneiro Bidi yama barikani 2‑ka‑ya wakakanamakitaseya, Deoso‑ka bara mai 4 kana owa ohari ati yanane,

“Tikihi, owa‑ya.” Owa ati tasene.

⁴Kafaro ma‑mawane tokataseya, ai‑nima ne kafaro mese‑ya itari, yima webote‑ya mai daahine, ati ene wami‑ya mai wi‑wina mai ibi nanahabani.

⁵Kaneiro Bidi yama barikani 3 kani‑ka‑ya wakakanamakitaseya, Deoso‑ka bara mai 4 kana, owa ati yananamakitase,

“Tikihi, owa‑ya.” Owa ati tasene.

Owa noko tokatasa, kafaro soki oawani. Ai‑nima ne kafaro mese‑ya itari, barasa‑ya damakanene.

⁶6:6 Deoso‑ka bara mai 4 kana mai bai‑ya i‑di Deoso itari, Deoso yowi‑ya i‑di Yeso waa, fara Yeso ati tohe awane.Deoso‑ka bara mai 4 kana mai bai‑ya yama ati yanana,

6:6 “Oyo tosiyorihi, fino tosiyorihi, dai ene nahi.” Ati ne, hemedi tamine amani. Hemedi nafiraboneni.“Tiriko manakone fotawaha, ritoro kare yama anini mahi ohari manakone‑nima manakone nawahani. Farina‑nima na ritoro 3 kana yama anini mahi ohari‑ka manakone‑nima manakone fotawahani. Oyo tosiyorihi, fino tosiyorihi, dai ene nahi.” Ati nene.

⁷Kaneiro Bidi yama barikani 4 kani‑ka‑ya wakakanamakitaseya, Deoso‑ka bara mai 4 kana owa ati yananamakitase,

“Tikihi, owa‑ya.” Ati tasene.

⁸6:8 “Ai‑nima ne kafaro mese‑ya itari, oni ‘Ai abi ohare’ tohe, nowati‑ya owa oni ‘Mai korimari wiye’ tohe, tokomakine.” Ati ne, ai one dama ababone tamine amani.Owa noko tokatasa, kafaro mese re‑reforamane oawani. Ai‑nima ne kafaro mese‑ya itari, oni “Ai abi ohare” tohe, nowati‑ya owa oni “Mai korimari wiye” tohe, tokomakine. Fara mai ihi mai dama mai abi ohareni. Mai ibi bisina, mai tafe wadarihi, mai kiyanihi, bani hame yama‑ke mai mai hinahaba, fara mai ihi ai 4 kana‑nima mai na, ohari‑ta abane.

⁹Kaneiro Bidi yama barikani 5 kani‑ka‑ya wakakanamakitaseya, Deoso ati‑ya mai no‑nofa, Deoso tamine‑ya mai one‑ya mai ka‑kamina mai mai hinahabamaro, mai atibodi‑ta oawani. Deoso‑ka yobe‑ka yama mahi amosa a‑amimi‑ka yama bofe‑ya mai oawani.

¹⁰Deoso‑ya mai haana, mai ati kita,

“Deoso, amosabote amatini. Keyehe hirititerani. Oda‑ya mai nanahabamaro mai wee kanibote tinahi. Bofe‑ya mai wi‑wina oda‑ya mai nanahabamaro, mai ihi manakone haa kanibote tinahi.” Mai ati nani.

¹¹6:10-11 Deoso ati ai nofa ai‑ya mai weeni kitabone, ai one‑ya mai nanahababoneni. Deoso mai‑ya maakarebonane. Makobote mai‑ya weeni kitamakibonane.Deoso ati ene bora sawa‑ya mai‑ya daane, mai‑ya hiyare,

“Yama dai nimani bide tohamakimatahi. Dai‑ya mai nanahabamaro‑nima dai one owati‑ya mai tokadaba mai‑ya mai nanahabamakeboneni. Fara dai one‑ta hawa tohi awisarini.” Ati nene.

¹²6:12 Haa‑nima yama na ai awiya, ai ya‑yainahi. Yeso koboni yanatonane. Mateo 24:27-31Yama owa katoma, Kaneiro Bidi yama barikani 6 kani‑ka‑ya wakakanamakitaseya, wami wawawakani kita toha, mahi noko soki tohawaha, bora bani kone soki wamani‑nima na so‑sokina toha, abariko bako wame ma‑mawane, ama noki‑nima noko nihi nene.

¹³Bofe‑ya amowa mai‑nima yama na fororona, boni kita ihi awa bono hadara fororona‑nima nani.

¹⁴6:14 Yama towe famabone tamine amani. Mahi, amowa ne, mai wahi fawanabone makobote wami wawawakanabone ihi adami webote tati nafi sonabone, wami itakosa nafi faha bodi‑ya nafi kisabone, fawanaboneni.Neme‑ya yama wahi nafi fawana, hini bebeo‑ka yama kinikawaha‑nima yama nani. Bofe‑ka adami webote nafi kisa, faha bai‑ka wami i‑itakosa nafi kisa, fawanani.

¹⁵Bofe‑ya mai wi‑wina mai nafi hini‑ya kemo, wami hidi mai ba‑basi na mai toha, hidi bi‑bidi mai na mai toha, sodado mai‑ka hidi mai toha, yama nafi‑ya mai kiha mai toha, mai kita mai toha, mai‑ya mai ka‑kanika mai toha, mai‑ya mai kanikatera mai toha, mai na, fara mai nafi hini mai‑ya mai kemo, mai one yati webote teberi‑ya hini mai‑ya mai kemo, mai one yati hodi‑ya hini mai‑ya mai kemabone, mai tokiyoma, mai nani.

¹⁶Adami webote yati toha, fara yati‑ya mai hiyara,

“Tisohi, oda‑ya baritikanaba. Hidi Webote oda‑ya awarayaho. Kaneiro Bidi oda‑ya weerayaho.” Mai ati nani.

¹⁷6:17 Kabitoro 7‑ya mai kitabone mai tamine sawi, fara Yodeo mai 144,000 mai toha, Yeso ati ai tokadaba ai toha, ai na, ai kitabisaboneni, Deoso‑ka we‑wee ai‑ya komarabonehe.Fara mai weeni‑bone‑ka mahi kobonane. Ebeni‑ke kitabonati?

Deoso‑ka mai‑ya Deoso oni korimari kobobokane

¹Makobote Deoso‑ka yo‑yose mai 4 kana, mai oawani. Wami fowari 4 kana‑ya mai nahani. Yama hakikikani‑ya mai maakana, mai ihi wami‑ya yama hakikikani koborihi, faha webote‑ya yama hakikikani koborihi, awa ini‑ya yama hakikikani koborihi nani.

²Deoso‑ka yo‑yose mai 4 kana wami‑ka yama nafi‑ya mai weenabone, faha webote‑ka yama nafi‑ya mai weenaboneni. Deoso‑ka yo‑yose owa mahi ka‑kaki‑kaya yanane, tokomisane. Deoso yokana oni korimari wa‑wama‑ya damakane. Ati kita yanane, Deoso‑ka yo‑yose mai 4 kana mai‑ya hiyare,

³“Hibareya! Deoso‑ya mai na‑narifa mai noki ate‑ya Deoso oni korimari kobobokani hawa·oniya, dai yanatonaboneni. Yama hawa tohiya, wami‑ka yama nafi‑ya dai wee, faha webote‑ka yama nafi‑ya dai wee, awa dai wee, dai niya, yama sibaraboneni.” Ati nene.

⁴7:4 Isara·eo i‑di Yako amane.144.000 mai kana Deoso oni korimari‑ya mai kayafani. Mai kadiki tamine omitani. Isara·eo‑ka nodi mai amani.

⁵Yoda‑ka nodi mai 12.000 kana, Hobi‑ka nodi mai 12.000 kana, Kade‑ka nodi mai 12.000 kana,

⁶Ase‑ka nodi mai 12.000 kana, Nafitari‑ka nodi mai 12.000 kana, Manasesi‑ka nodi mai 12.000 kana,

⁷Simiyaho‑ka nodi mai 12.000 kana, Refi‑ka nodi mai 12.000 kana, Isaka‑ka nodi mai 12.000 kana,

⁸7:8 Deoso oni korimari mai kayafa Deoso mai‑ya kayawe, mai‑ya kasomebonane.Seboro‑ka nodi mai 12.000 kana, Yose‑ka nodi mai 12.000 kana, Besami‑ka nodi mai 12.000 kana. Fara Deoso oni korimari‑ya mai kayafani.

Hidi Webote Kaneiro Bidi eyehe noko‑kaya mai one sawe

⁹7:9 Yeso kamataseya, Deoso‑ka ai toha neme‑ya ai tokabone, ai tamine amani.Hawa tohiya, kii·onamatasa, mai dama mai oawani. Mai dama mai ihi mai kadiki ai watoterani. Hidi Webote Kaneiro Bidi eyehe noko‑kaya tabora nafi‑ka mai one saweni. Tabora dami‑ka mai sawe, bora sawa‑ya mai sakona, mai ya‑yaini ihi kosi afe‑nima yama na‑ya mai aka nani.

¹⁰Tabora dami‑ka mai ati kita yanana,

“Hidi Webote Kaneiro Bidi dai fama oda‑ya dai ka‑kasoma dai amani. Oda‑ya dai kasomi‑nima mai one oda‑ya kasomaterani.” Mai ati nani.

¹¹Hidi Webote tohe, hidi bi‑bidi mai na mai toha, Deoso‑ka bara mai 4 kana mai toha, mai na, mai yowi‑ya Deoso‑ka yo‑yose mai kakabasawama, fara mai baki‑kaya mai wiya, Deoso‑ya mai kahiyarani.

¹²Mai ati yanana,

“Fara amatini. Amosabote amatini. Oda nafi tiwa‑ya nofa, oda nafi tiwa‑ya kahiyara, tiwa ene oda nafi ya‑yaiteni. Yama wato tinafe, yama nafi‑ka hidi tiha, tiwa oda kahiyari fawateraboneni. Ti·abateraboneni.” Mai ati nani.

¹³Hidi bi‑bidi ne owa‑ya owa hiyare,

“Ebeni‑ka mai amaniti, bora sawa‑ya mai sakonaro? Ebeni‑kaya mai kakiti?” Ati nene.

¹⁴Owati yanana,

“Hidi amatini. Mai tiwatobisahi.” Onani.

Hidi bi‑bidi ne ati yananamatase,

“‘Bofe‑ya yama towe dama yananabone ihi yama yofinaboneni.’ Deoso‑ka yama hani ati neni.

7:14 Yeso emene‑ya bora ai sokona Yeso ai manakone‑ya nanahabemata tamine amane.Fara‑ya mai yanana, neme‑ya mai kobonineni. Kaneiro Bidi emene‑ya mai‑ka bora mai sokona, mai‑ka bora sawa tohawahineni.

¹⁵Kaneiro Bidi emene ene mai manakone wadamarani. Deoso‑ka kadera amosa yowi‑ya mai sawinani. Hidi Webote mai‑ya nofe, mai‑ya dabene. Deoso‑ka yobe‑ya mai‑ka yama anini fawani awiraboneni.

¹⁶Mai fimimarihi, mai baki hokomarihi, mahi hewene mai‑ya natirihi, yama hiwe mai‑ya sarikarihi naboneni.

¹⁷Hidi Webote‑ka kadera amosa yowi‑ya Kaneiro Bidi wai, Bani hidi hika bani mai‑ya kakatomi‑nima Kaneiro Bidi hika mai‑ya kakatominebonane. Bani hidi faha kimisa‑ya yofikitine. Bani mai baki hokorabone‑nima Kaneiro Bidi ene mai ya‑yaiteboneni. Deoso ene mai ohinamaraboneni.” Hidi bi‑bidi ne ati nene.

¹8:1 “Yama moni nafi fawaneni.” Yama hani ati na, Deoso tabaro honita tamine toheba awane. Fara bofe‑ya Yeso hika mai eyehe kisebona, wami hidi ai tohaboneni.Kaneiro Bidi yama barikani 7 kani‑ka‑ya wakakanamakitaseya, neme‑ya ora beheri‑ya yama moni nafi fawaneni.

Deoso‑ka yo‑yose mai 7 kana

²Deoso‑ka yo‑yose mai 7 kana Deoso noko‑kaya mai naha, mai‑ya torobeta‑ya mai daanani.

³Hidi Webote‑ka kadera yowi‑ya yama mahi amosa a‑amimi‑ka yama wiye oro wamani waani. Deoso‑ka yo‑yose owa kamaki, yifo nakasiri hime da‑damakana‑ka yama oro wamani‑ya damakane, yama mahi amosa a‑amimi‑ka yama yowi‑ya waane. Yama mahi amosa nafi‑ya Deoso‑ka yo‑yose‑ya mai daanani, amiminabonehe. Yama wiye oro wamani dori‑ya amiminani, Deoso‑ya mai hi‑hiyara mai ati‑ya yama asawi dababonehe.

⁴Deoso‑ka yo‑yose ene Deoso‑ya mai hi‑hiyara mai ati toha, yama mahi amosa asawi toha na, fama Deoso‑ya tokomisani.

⁵8:5 Yifo nakasiri Deoso‑ka we‑wee yananabone tamine.Yifo nakasiri hime da‑damakana‑ka Deoso‑ka yo‑yose hini yama sarihikana‑ya kerokaname, bofe‑ya kasahinisani. Fara nowati‑ya wami wawawakana, bahi yebekane, batarara ati ne, taokana nene.

⁶Deoso‑ka yo‑yose mai 7 kana mai‑ka torobeta‑ya mai maakani hawa tohani.

⁷Daidi torobeta‑ya afoni bahe, faha boni yifo hirini‑ya fama ama‑ya daba bofe‑ya mai koronisa, kabihi nafi hirinani. Awa 3 kana‑nima na ohare‑ta hirinani. Wami midikani‑nima na 3 kana yama midikani ohare hirinani.

⁸Deoso‑ka yo‑yose owa 2‑ke torobeta‑ya afonamaki, yama adami webote‑nima na hirina, faha webote bai‑ya mai korohinisa, faha webote midikani 3 kana, midikani ohare ama‑ya dabineni.

⁹Faha webote abe dama abani. Faha abe 3 kana‑nima na, abe ohare‑ta abani. Maboro dame abe, maboro 3 kane‑nima ne, ohari‑ta abane.

¹⁰Deoso‑ka yo‑yose owa 3‑ke torobeta‑ya afonamakitase, amowa webote‑nima yama na neme‑ya hirini sonani. Faha bide‑ya sona, faha ba‑basi na‑ya sona nani. Faha 3 kana‑nima na, faha ohare‑ta‑ya sonani.

¹¹Amowa‑nima na oni “Awa Bida” tohani. Faha 3 kana‑nima na, faha ohare‑ta bidawahani. Faha bida fawi ihi mai dama mai abani.

¹²Deoso‑ka yo‑yose owa 4‑ke torobeta‑ya afonamakitase, yama neme‑ka wahi fawanani. Mahi wehene kote fawa, abariko wehene kote fawa, amowa mai one dama fawakana nani. Yama midikani 3 kana, midikani ohare wahi fawanani. Yama tehe‑ya mahi wehene fawane, yama sokiwahani. Mahi tokeya, amowa, abariko mai na mai wahi fawana, yama soki kitawahani.

¹³Sibire oawani. Neme‑ya wai, ati yanane,

“Torobeta 3 kana hasina, Deoso‑ka yo‑yose mai afonaboneni. Ka! Ka! Ka! Bofe‑ya mai wi‑wina mai‑ya, yama towe 3 kana kobonaboneni.” Sibire ati nene.

¹9:1 Amowa‑nima ne neme‑ya yananemata i‑di Satanasi tamine amane.Deoso‑ka yo‑yose owa 5‑ke torobeta‑ya afonamakitase, amowa‑nima ne oawani. Hibati‑ya neme‑ya yanane, bofe‑ya sonemata, fare amowa‑nima ne bofe‑ya oawani. Amowa‑nima ne hodi‑ka safi‑ya mai daahinane. Hodi yaba, hika metoro ai watorani.

²Hodi yaba‑ya seekane, yifo asawi nafe, yama sa‑sarikana‑ka wiye webote asawi‑nima na tokomisani. Asawi nafe ihi mahi wehene fawanene.

³9:3 Isara·eo‑ya ti‑tiri mai dama mai yorotokana, mai diwatona, awani mai dama mai yorotokana mai diwatona mai‑nima mai nineni.Ti‑tiri mai dama mai diwatona mai‑nima mai na, yifo asawi‑ya mai sawe, mai dama mai tokani. Yomasa ai‑ya ide komene‑nima mai komenineni.

⁴Kabihi yama kome‑ya watorihi, yamata yama kome‑ya watorihi, awa yama kome‑ya watorihi, teni. Deoso oni korimari mai noki ate‑ya kobobokare mai‑ya yama komabisani.

⁵9:4-5 Neme‑ya ai toki hawa tohiya, bofe‑ya mai winanasa na mai kome nafeboneni. Mai abi awirabone, hiniya mai kome kitaboneni.Yama koma mai‑ya nanahabarani. Yomasa ai‑ya ide komene‑nima komena, abariko 5 kane‑ya kome mai hiawaboneni.

⁶“Ka! Ai aba kanibote na, ai sibara awini.” Yama kome kita ihi mai ati na, hiniya mai hasinibisineni.

⁷Ti‑tiri mai dama mai diwatona mai‑nima mai na, fara sodado‑ka kafaro bora kita‑ya barikani‑nima mai aboni barikanineni. Hidi‑ka sabewa‑nima yamana oro mese‑nima na mai tati‑ya siinari, ai noko‑nima mai noki nani.

⁸Ai fanawi tati kone‑nima mai tati kone nani. Iriyaho ino‑nima mai ini nihi nani.

⁹Mai‑ka yama kita mai barikani‑ka feho wamani‑nima nani. Mai afe moni kita, sodado mai‑ka kafaro mai dama kaho bidi‑ya mai horokana, mai kanana, mai moni‑nima mai afe moni nani.

¹⁰Mai‑ka yama koma kobobonani, hini mai yofari tati‑ya. Fara yomasa‑ka yama koma waani‑nima mai‑ka yama koma kobobonani. Kome mai hiwi‑ka abariko 5 kane ne.

¹¹Ti‑tiri mai dama mai diwatona mai‑nima mai na, mai‑ka hidi Hodi yaba‑ke madi towe amane. Ebereo oda ati‑ke madi oni Abadomi amane. Kereko mai ati‑ke madi oni Aborioho amane. Fare madi towe oni “Yama‑ya Na‑nanahaba” amane.

¹²Ka! ai a‑ati‑ka daidi hawa toha. Ka! ai a‑ati‑ka yama fama hasinasa nani.

¹³Deoso‑ka yo‑yose owa 6‑ke torobeta‑ya afonamakitase, Deoso noko‑kaya yama mahi amosa a‑amimi‑ka oro wamani waa, narabi awe 4 kana‑kaya ati yananene.

¹⁴Deoso‑ka yo‑yose fare torobeta‑ya afone‑ya hiyare,

“Madi towe mai 4 kana faha webote Eofatesi‑ya mai sokikanamaro, fara mai seetikanahi.” Ati nene.

¹⁵Madi mai 4 kana Deoso mai sokihikanametemoneni. Mai seeki‑bone‑ka mai‑ka ano, abariko, mahi, ora ne, Deoso hiwatomatamonane, mai seeki‑bone‑karo. Mai‑ka ora kobone ene Deoso‑ka yo‑yose mai seehikanani, ai one 3 kana‑nima na ohari‑ya mai nanahababonehe.

¹⁶Madi towe mai 4 kana mai‑ka sodado mai oawani. Kafaro‑nima yama na‑ya mai sawe, fara sodado 200.000.000 mai tohani. Mai kadiki tamine omitani.

¹⁷Sodado mai baki‑ya yama kita kobobona, mese kote ma‑mawa, kote yo‑yoni, kote to‑toba nani. Kafaro mai‑nima yama na mai tati iriyaho tati‑nima mai tati na. Mai iridi‑ya yifo hirini toha, yifo asawi toha, yati hirini toha na, fara mai iridi‑kaya kakeni.

¹⁸Yifo hirini toha, yifo asawi toha, yati hirini toha na, fara mai iridi‑kaya kake ihi ai one 3 kana‑nima na, ohare‑ta‑ya nanahabineni.

¹⁹Kafaro‑nima yama na‑ka yama hama famani. Tati‑kaya one toha, one yofari‑kaya toha, yofari‑ka maka tati‑nima nani, fara kome kitani.

²⁰Ai one hasina, mai atibodi yama‑ya kadikarani. Hibati‑ke madi towe toha, mai‑ka deoso oro wamani toha, mai‑ka deoso barata wamani toha, mai‑ka deoso metaho owa wamani toha, mai‑ka deoso yati wamani toha, mai‑ka deoso awa wamani toha ne, yama noki awirihi, narabi hawirihi, yakani wadarihi na, fara‑ya mai kahiyara, mai ihi towe fawani awirani.

²¹Hibati‑ka mai one‑ya mai nanahaba, madi towe mai‑ya mai haanihi, fana mai dami‑ya mai nokotonihi, maki mai dami‑ya mai nokotonihi, yama mai boti na, mai ihi towe fawani watorani.

Yama hani bide tamine

¹10:1 Deoso‑ka yo‑yose wehene wade, fare kitabote amane, Yeso tamine toheba awane.Deoso‑ka yo‑yose owa kite neme‑kaya kise, bora ai weyena‑nima neme sabi‑ya weyenene. Maka neme‑ke fai tati‑ya itarine. Noko wehene mahi wehene‑nima nihi. Teme, iso ne, yama hirini‑nima nene.

²Yama hani bide seekana‑ya damakane, kisene. Teme kanike faha webote‑ya waari, teme sayo‑ke wami‑ya waanani.

³Iriyaho ati‑nima ati ne, ati kitene. Makobote ati owa, bahi ati‑nima ati ne, ati yanani 7 kanamakitasene.

⁴Bahi ati‑nima ati ne, ati 7 kane, ati okanahanobona, neme‑ya ati kaki,

“Bahi ati‑nima ati ne, ati tikanahanorayaho. Ati tikaminarayaho.” Ati nene.

⁵Deoso‑ka yo‑yose hibati‑ya oawe, teme owa faha webote‑ya waari, teme owa wami‑ya waane, fare yehe kanika‑ya daatomisene.

⁶Ati yanane,

“‘Yama nimanamaki one awiraboneni.’ Deoso ati nane.” Deoso‑ka yo‑yose ati nene.

Deoso‑ka yo‑yose ati yananamatase,

“Deoso abaterebona, yama nafi‑ya wamane, neme‑ya wama, neme‑ka yama nafi sa‑sawi‑ya wama, bofe‑ya wama, bofe‑ka yama nafi sa‑sawi‑ya wama, faha webote‑ya wama, faha webote‑ka yama nafi sa‑sawi‑ya wama nane. Fare ati amane.

⁷10:7 Deoso ati‑ya mai mi‑mita‑maro Deoso ati owa‑ya mai watoramaro, tamine timitahi. Yodeo mai toha, Yodeo ai tohara, ai ohari wamaboneni.‘Deoso‑ka yo‑yose owa torobeta faina‑ya afoni yanatoneya, yama hawa tohaboneni. Hibati‑ya Deoso‑ya mai na‑narifa, fara Deoso ati‑ya mai mi‑mita mai toha, mai‑ya Deoso hiyaremarine. Deoso ati owa‑ya mai watoramaro, fara yama hawa tohaboneni.’” Yehe kanika‑ya daatomise ati nene.

⁸Neme‑ya ati omiti baheri, ati omitamatase,

“Deoso‑ka yo‑yose teme kanike faha webote‑ya waari, teme sayo‑ke wami‑ya waa, fare yama hani bide seekani hawa toha‑ya damakane, yama hani waratikanahi.” Ati nene.

⁹Yama hani bide‑ya haa·one, ati yanane,

“Waratikanahi. Tikabahi. Mo‑mona mai fahi fawi‑nima na, sina amani. Tikabiya, tiwa doro‑ya wikonaboneni.” Ati nene.

¹⁰10:9-10 Yama hani kabi sina, yama hani ati mai mita mai ya‑yainaboneni. Yama hani‑ya Yowaho kabeya, fai doro‑ya wikonawaha, fara yama hani ati‑nima yama na yanani‑ya kome mai hiawaboneni.Yama hani bide wara·okana, okoba, mo‑mona mai fahi fawi‑nima na, sinani. Kabi hawa ohiya, owa doro‑ya wikonani.

¹¹Owa‑ya mai hiyara,

“Yama nabone tamine tikaminamatasaboneni. Fara tabora dama, mai‑ka wami dama, wami hidi mai dama na, tamine tikaminamatasa tinaboneni.” Ati nene.

Deoso‑ka yobe‑ya midikane

¹Yama mi‑midi‑ka awa‑ya owa‑ya daane. Owa‑ya hiyare,

“Tikahi. Deoso‑ka yobe miditikana, Deoso‑ka bani‑bona da‑daa‑ka yama miditikana, yobe‑ya Deoso‑ya mai ka‑kahiyara mai tikadika tinahi.

²11:2-3 Ai amoni 1.260 kana, abariko 42 kana tamine toha, faha fowe 3 kana beheri tohamaki tamine tohahari ne. Yeso Kirisito ene‑bona 11:7; 12:6, 14; 13:5Deoso‑ka yobe‑ka wami‑ya miditikariyahi. Yodeo mai tohara mai‑ya wami‑ya mai daanineni. Abariko 42 kane‑ya Deoso‑ka sidadi‑ya Yodeo mai tohara mai kayafaboneni.

³11:3 Hibati‑ya mai atibodi a‑arira, bora kaisa‑ya mai sakoteni. Fara mai dama mai ihi towe‑ya mai nofara, mai atibodi a‑ariraboneni.Owa tamine‑ya mai ka‑kamina mai fama mai kasawebone, owati ihi mai kitawahabone, bora kaisa‑ya mai weyenikimaboneni. Ai amoni 1.260 kana‑ya owa tamine‑ya mai kaminaboneni.

⁴Hibati‑ya Deoso ati‑ya mi‑mita‑mari orifera ade fama tamine‑ya kaminemari, nabarina awe fama tamine‑ya kamina nemari, fara bora kaisa‑ya mai weyenikima mai tamine amani. Wami hidi webote, fare Deoso noko‑ya mai demenaremaroni.

⁵Bora kaisa‑ya mai weyenikima mai mai hikako‑ya hini mai iridi‑kaya yifo hirini kakeboneni, mai‑ya sarikanabonehe.

⁶Bora kaisa‑ya mai weyenikima mai ihi kitateni. Bofe‑ya mai kasawiya, mai ati ihi faha kaki awirabone, faha ama‑nima nawahabone, yama towe dama bofe‑ya kobonabone, hini mai ati‑nima yama towe kobonaboneni.

⁷11:7 Bani hame Satanasi‑ka yo‑yose tamine tohe, madi towe tamine tohahari ne. Fare madi towe ai owa‑ya foyebona, wami hidi tohebonane.Amoni 1.260 kani‑ya mai hiyari hawa tohaboneni. Mai hiyari hawa tohiya, Bani hame hodi yaba‑kaya kimise, fare mai‑ya weeneya, mai‑ya nanahabebonane.

⁸11:8 Sidadi oni Yerosare amani. Mai‑ka Hidi Webote Yeso ati ne, hini tamine‑ya hiyarane.Mai amoni 3 kana beheri tohamakiya, sidadi hawi‑ya mai aboi madanaboneni. Fara dai‑ka bote mai wadi awisari‑ya sidadi mai wamanamaro, fara‑ya mai aboi madanaboneni. Fara Sodoma‑ka mai ihi‑nima sidadi‑ka mai ihi towe toha, Eyito‑ka mai ihi‑nima sidadi‑ka mai ihi towe toha, awa‑ya mai‑ka Hidi Webote‑ya mai baakanamaroni.

⁹Aka‑ya mai wi‑wina mai toha, ahiyata‑ya mai wi‑wina mai toha, mai na, fara bora kaisa‑ya mai weyenikima tabora nafi‑ka mai aboi mai hiwakatomaboneni. Mai mai hinofara, mai aboi tame wadaraboneni. Mahi 3 kane beheri tohamaki‑ya mai aboi mai nafi hiwakatomabone, mai ya‑yainaboneni.

¹⁰Bora kaisa‑ya mai weyenikima, mai ati ihi yama towe kobonamaro, fara mai abawaha, mai abi ihi bofe‑ka mai ya‑yaina, mai sere, yama amosa‑ya mai ibi daa, mai naboneni.” Yeso ati nane.

¹¹Mahi 3 kane beheri tohamakiya, Deoso ati ene mai kitamikima, mai waamisamikima, mai‑ya mai awa, mai habi siitoni nafeni.

¹²Neme‑ke ati yanane, bora kaisa‑ya mai weyenikima mai‑ya haane,

“Dai kakamahi owa‑ya.” Ati ne, ati mai himite,

fara mai mai hinofara mai noki‑ya mai towakamineni, neme sabi‑ya.

¹³Mai nowati‑ya wami wawawakana, tabora‑ke yobe dame sona, yobe 10 kane‑nima ohari sona, 7.000 mai kana mai abani. Mai one hasina, mai habi siitoni nafeni.

“Deoso kitabote amane.” Mai ati nani.

Deoso‑ka yo‑yose owa 7‑ke

¹⁴Ka! ai a‑ati‑ka yama fama hawa tohani. Ka! ai a‑ati‑ka ohare hasina, kobonamaki kanibote naboneni.

¹⁵Deoso‑ka yo‑yose owa 7‑ke torobeta‑ya afonamakitase, neme‑ya mai dama mai ati yanana, mai ati kita,

“Ai‑ka Hidi kitabote Hika Ka‑kadika eyehe bofe‑ka yama nafi‑ka hidi tohawahe, hidi oharitebonane.” Mai ati neni.

¹⁶Hidi bi‑bidi mai na 24 mai kana Deoso yowi‑ya mai nahore, mai baki‑kaya mai wiyineni, Deoso‑ya mai kahiyararo.

¹⁷“Kitabote yokana amatini. Tiwa ene yama nafi‑ka hidi tihawaha, tiwa ene oda ya‑yaineni. Oda nafi‑ka hidi amatini. Deoso amatini. Hini hini amatini. Tiyanaterani.

¹⁸Bofe‑ka mai dama mai yawamaro, tika yawa kobona, hini mai ihi bofe towe toha, fara mai‑ya weetineni. Tiwa‑ya mai no‑nofa mai abamaro, mai ihi amosa manakone daatinaboneni. Mai ihi amosa manakone da‑daa‑ke mahi kobonane. Tiwati‑ya mai ka‑kamina mai toha, tika hawi‑ya mai sa‑sawi mai toha, tiwati‑ya mai to‑tokadaba mai toha, mai na, tiwa‑ya mai na‑narifa mai amani. Fara hidi mai toha, hidi mai tohara mai toha, mai na, mai ihi amosa mai manakone daatinaboneni.” Mai ati neni.

¹⁹11:19 Yeso Kirisito ene‑bona 6:12-14; 16:17-21Deoso‑ka yobe neme‑ke oawe, nokobi‑ya mai seekana, yobe doro‑ya Deoso‑ka yama wiye amosa oawani. Wami wawawakana, bahi yebekane, ati kite, taokane, faha boni webote dama fororo nani.

Dafi fana naba‑ya kako

¹Yama kobonabone ai watowahabone, fara ihi neme‑ya fana fodoke, mahi‑nima na‑ya weye, abariko‑nima na mese‑ya tame kawari, tati‑ya hidi‑ka sabewa amowa mai 12 kana‑nima na‑ya wamani toha‑ya watari nani.

²12:1-2 Amowa mai 12 kana, Yako bidi mai 12 kana mai‑ka nodi mai tamine amani. Yako‑ka nodi Yodeo mai amani. Fana Yodeo mai tamine amani. Fana bidi i‑di Yeso tamine amane.Fana naba toha, dori kome yanana, kaikanani.

³12:3 Dafi mawa i‑di Satanasi tamine toha, Satanasi‑ka yo‑yose tamine toha nane. Satanasi‑ka yo‑yose koboneya, wami 10 kana‑ke hidi tohebonane.Yama kobonabone ai watowahabone, fara ihi neme‑ya dafi mawa fodomaki. Tati 7 kane toha, narabo ewene 10 kane toha nane. Hidi‑ka sabewa 7 kana fai tati‑ya siinareni.

⁴12:4 Amowa mai one‑ya korokanisane yama hani ati na, fara Deoso‑ka yo‑yose mai one Satanasi ati‑ya mai tokadabamete, madi towe mai tohawahametemoneni. Fana bidi‑ya dafi kabebona, Satanasi i‑di Yeso‑ya ati nanahababone tamine amane.Amowa mai dama mai‑ya Dafi yofari korokanisane. Fara amowa mai 3 kana‑nima mai na ohari wami‑ya korohinisane. Fara fana noki‑ya dafi waane, fana dori wadiya, fana bidi‑ya kabebonaha.

⁵Fana dori wada, bidi maki tohene. Bofe‑ka mai nafi‑ka hidi‑bona, kitabote‑bona, fare Deoso idi kanibote hine. Hika kadera amosa‑ya hiwakamane.

⁶12:6 Kabani‑kaya yama hani ati na, bara mai‑ka wami tamine amani. Isara·eo mai‑ka wami‑ya bara mai kayafabone, Yodeo mai sawebone, hiniya wami hidi mai toharaboneni.Dafi ene fana korikasa, kanana, kabani‑kaya tabori‑bone Deoso wamahinamete‑ya tokani. Fara‑kaya amoni 1.260 kani‑ya fana‑ya mai kasomaboneni.

⁷12:7 Mikeo Deoso‑ka yo‑yose amane. Deoso‑ka yo‑yose mai one‑ka hidi amane.Mikeo hika yo‑yose mai‑ya daba, Dafi hika yo‑yose mai‑ya dabahari ne, neme‑ya mai ibi bisinineni.

⁸Dafi hika yo‑yose mai eyehe kiti bi‑bidi ne, neme‑ya mai sawimarani.

⁹Dafi kite hika yo‑yose mai eyehe bofe‑ya mai korohinisane. Dafi Satanasi amane. Oni owa Diaboro amane. Satanasi maka‑nima ne, fare amane. Bofe‑ka mai nafi‑ya keyehene.

¹⁰Neme‑ya ati yanane, ati kitane,

“Yama hawa tohini. Mai ihi towe manakone abi hawa tohawahineni. Deoso yama nafi‑ka hidi tohawahe, Deoso‑ka Ka‑kadika hidi tohawahane. Hibati‑ya Deoso‑ya Satanasi hiyaranadi, mai ihi towemone ati nemari, yama tehe‑ya hiyara, yama soki‑ya hiyara ne, ati fawani watoremarine. Fare mai korohinisawahe, Deoso‑ya mai ihi towe tamine‑ya hiyarami awirane.

¹¹‘Yeso ati‑ya dai nofa dai hiyari fawani awiriya, dai‑ya oda nanahababoneni.’ Satanasi‑ka mai one ati nineni.

‘Oda aba, oda sibaraboneni.’ Mai ati namaroni.

Kaneiro Bidi emene ene mai kita, Deoso oni‑ya mai saatonakosi awira ihi Satanasi kiti wadami awirane.

¹²Neme‑ka dai toha, Deoso tabaro‑ya dai wi‑wina dai toha, dai na, dai ya‑yainahi. Diaboro dai‑ya sawimarene. Ka! Bofe‑ka dai toha, faha webote‑ka dai toha, dai na, Diaboro dai‑kaya kobone, hini barika‑bona‑ka amoni tosiyo yanatone‑ya wato, yawi kitawahane.” Ati nene.

¹³Bofe‑ya dafi mai korohinise, atibodi yama‑ya dike,

“Fana, bidi maki tohe, fara fana okakobisaboneni.” Atibodi ati nane.

¹⁴12:14 “Sibire webote efe fame” yama hani ati na, ka‑kasoma tamine amani. Yodeo mai‑ya ai one kasomabone, Satanasi‑ka yo‑yose mai‑ya bisirebonaha.Sibire webote efe fame‑ya fana‑ya mai daaneni. Fana diwatona yama awiri‑kaya tabori toha, fara‑kaya faha fowe 3 kana beheri tohamakiya, fana‑ya mai kasomaboneni, dafi fana‑ya kobonamarebonaha.

¹⁵12:15-16 “Faha nafe‑ya dafi firotokawiti,” sodado mai dama Satanasi yosebona mai tamine toha awini. “Wami fana‑ya kasomabone,” kofeno mai one tamine toha awini.Faha nafe‑ya dafi firotokawiti, faha toki kita ihi fana ababonehe, dafi atibodi ati nane.

¹⁶Wami fana‑ya kasoma, faha‑ya fawineni.

¹⁷Fana abara ihi dafi yawi kite, fana bidi mai one‑ya kakowahane. Fara Deoso ati ai to‑tokadaba ai toha, Yeso ati ai no‑nofa ai toha, ai na, ai‑ya kako kitebonane.

Bani Hame faha‑kaya kakibona

¹13:1 Bani Hame faha‑ke ai owa tohe, Satanasi ati‑ya tokadabe, ai nafi‑ka hidi tohebonane. Tati 7 kane hika yo‑yose hidi bi‑bidi na mai 7 kana mai tamine amani. Narabo ewene 10 kane, hidi‑ka sabewa 10 kana na, hika wami 10 kana tamine amani.Faha webote widi‑ka siki‑ya dafi waane, Bani Hame faha‑kaya kaki, faha widi‑ya tokomorosene. Fare tati 7 kane toha, narabo ewene 10 kane toha nane. Hidi‑ka sabewa 10 kana, fai narabo ewene‑ya siinareni. Tati‑ya yama hani kobobokana, “Deoso ama·oni.” Yama hani ati neni. Hiniya keyehe‑ya hirine ati amane.

²Bani Hame yomahi yama‑ke abano‑nima abano nihi, oso teme‑nima teme nihi, iriyaho iridi‑nima iridi nihi nane. Dafi hini kiti‑ya Bani Hame‑ya daane. Fare ene Bani Hame kiti nafiwahene. Dafi hidi tohe, fare ati ene Bani Hame hidi tohawahene.

³Tati ohari mai kaahirimari, “abi oharine” mai ati namaro, kitame‑ya mai awa, bofe‑ka mai nafi atibodi yama‑ya dika,

“Ka! Bani Hame kitane.” Mai atibodi ati na,

bofe‑ka mai nafi Bani Hame ati‑ya mai tokadabawahani.

⁴Dafi ati ene Bani Hame kitawahane, dafi ene‑ya mai awiya, dafi‑ya mai kahiyara, Bani Hame‑ya mai kahiyarahari nineni.

“Bani Hame kitabote amane. Hidi mai one‑ka sodado mai kitara, Bani Hame‑ka sodado mai kitabisineni.” Mai ati nani.

⁵13:5 Ai amoni 1.260 kana abariko 42 kana tamine toha, faha fowe 3 kana beheri tohamaki tamine tohahari ne. Yeso Kirisito ene‑bona 11:2-3, 7; 12:6, 14Bani Hame hini‑ya kahiyare,

“Deoso ama·oni.” Ati nene.

Bani Hame‑ya Deoso maakana kanibote ni awirebonane. Abariko 42 kane‑ya Bani Hame kitebonane.

⁶“Deoso amosi awirane. Deoso tabaro‑ka, fara neme‑ya mai wi‑wina mai kitarani. Owa‑ta amosabotebisa ama·oni. Kitabotebisa ama·oni.” Bani Hame ati nene.

⁷Deoso ati‑ya mai to‑tokadaba, Bani Hame mai‑ya wee, mai‑ya bisi nane. Dafi ati ene Bani Hame bofe‑ya mai wi‑wina mai nafi‑ka hidi tohawahane.

⁸13:8 Kaneiro Bidi i‑di Yeso tamine amane.Bofe‑ya mai wi‑wina Bani Hame‑ya mai nafi kahiyarabone, fare Kaneiro Bidi‑ka yama hani‑ya mai oni sawi awiriya, Bani Hame‑ya mai nafi kahiyaraboneni. Hibati‑ya wami awisari‑ya Kaneiro Bidi ati‑ya mai to‑tokadababone mai oni‑ya Deoso wato, mai oni‑ya kanahanomatamonane. Kaneiro Bidi abemari, kitamemarine.

⁹Hiyara dai mita, dai tokadabahi.

¹⁰Deoso hawine bai‑ya dai maanamariyahi. Hawi‑ya dai yakani oharibisahi. Ai one‑ya mai wata, fara mai‑ya mai watahareboneni. Yima‑ya ai one‑ya mai nanahaba, fara yima‑ya mai‑ya mai nanahabahareboneni.

Bani Hame owa wami‑kaya kimise

¹¹13:11 Bani Hame wami‑ke ai owa tamine amane. “Kaneiro Bidi narabo ewene‑nima narabo ewene ne,” yama hani ati na, fara “Deoso ati mi‑mita ama·oni.” Bani Hame ati nebonane, keyehe‑ya hirineri. “Dafi ati‑nima ati nane.” Yama hani ati na, fara Satanasi ati‑nima ati nebonane.Bani Hame owa wami‑ya kimise, Kaneiro Bidi narabo ewene‑nima narabo ewene ne, famani. Dafi ati‑nima ati nene.

¹²Bani Hame faha‑ke‑ka yo‑yose amane. Ati ene bofe‑ya mai wi‑wina mai nafi Bani Hame faha‑ke‑ya mai kahiyarani. Fare Bani Hame faha‑ke abi oharine mai ati na, kitamawahane.

¹³Bani Hame wami‑ke inawa webote‑ka yama wato‑nima hika yama watonineni. Ati ene mai noki‑ya neme‑ya yifo hirini kakineni.

¹⁴Bani Hame wami‑ke ene kite‑ya bofe‑ka mai awa, hika keyehe mai hikadaba,

“Bani Hame faha‑ke yima ihi‑ya nawademari, kitame, korimari dai wamanahi, korimari dai kahiyarebonaha.” Bani Hame wami‑ke ati nene.

¹⁵Korimari mai wamahine. Bani Hame wami‑ke ati ene korimari ati wadane. Korimari mai hikahiyari awire‑ya korimari ati ene mai‑ya mai nanahabineni.

¹⁶13:16 Kofeno‑ka dokometo nafi‑ya kofeno‑ka oni korimari sawine. Bani Hame mai‑ya kayafebona, mai yahi‑ya hika oni korimari kobobokanebonane.Bani Hame wami‑ke ati ene mai nafi yahi kanika‑ya Bani Hame faha‑ke oni korimari kobobokana, mai one noki ate‑ya Bani Hame faha‑ke oni korimari kobobokana nene. Yinero nafi‑ya mai kiha mai toha, yinero mai kihara mai toha, hidi mai toha, hidi mai tohi awira mai toha, mai na, Bani Hame faha‑ke oni korimari‑ya mai nafi kobobokanineni.

¹⁷Bani Hame faha‑ke oni korimari mai kayafara, Bani Hame wami‑ke ati ene yama‑ya mai kanikami awirani, mai‑ka yama‑ya mai daa namarihi nineni. Bani Hame faha‑ke oni‑ya mai kayafa mai toha, Bani Hame faha‑ke nomero‑ya mai kayafa mai toha mai na, yama mai kaniki‑ya mai sibarini, yama‑ya mai daani‑ya mai sibarini, Bani Hame wami‑ke ati nene.

¹⁸Yama‑ya dai wa‑wato dai amani, Bani Hame faha‑ke‑ka nomero tamine yokana dai watoyahi. Hini mai hiwato nomero tamine mai hiwatobonane. Bani Hame faha‑ke ai owa tohe, fare‑ka nomero amani haro, 6 6 6 amani.

144.000 mai kana adami webote Siyaho‑ya mai naha

¹14:1 144.000 mai kana Yodeo mai one amani. Yeso Kirisito ene‑bona 7:3-8Owa noko tokomatasa, adami webote Siyaho‑ya Kaneiro Bidi waane, ai one dama, 144.000 mai kana Kaneiro Bidi‑ya mai dabineni. Kaneiro Bidi oni toha, Badi oni toha ne, mai noki ate‑ya kobobokanene.

²Neme‑ya yama ati yanana, faha webote moni‑nima moni nihi, bahi ati kite ati‑nima ati nihi, fiaraho bara oni araba toha fara mai deohina, yama ati amosa ati‑nima ati nihi nani.

³Hidi Webote toha, hidi bi‑bidi mai na mai toha, Deoso‑ka bara mai 4 kana mai toha, mai na, mai noki‑ya wayoma yati‑ya mai one hirina. 144.000 mai kana Kaneiro Bidi hini emene‑ya mai hikanikane, Deoso‑ka mai tohabonehe. Wayoma yati‑ya mai mita, wayoma yati‑ya mai watowahanani. Mai one wayoma yati‑ya mai watorani.

⁴144.000 mai kana fana bara‑ya mai famarani. Kaneiro Bidi‑ya mai sawiteboneni. Hibati‑ya bofe‑ka mai toha, Kaneiro Bidi hini emene‑ya mai hikanika, Deoso Kaneiro Bidi mai fama mai‑ka mai bonehe. Mai‑ya kayafe, Deoso Kaneiro Bidi eyehe ya‑yainane.

⁵Keyehe‑ya mai hirini awira, mai ihi towe wadarani.

Deoso‑ka yo‑yose mai 3 kana

⁶Deoso‑ka yo‑yose neme‑ya yakane oawani. Deoso ati amosabote‑ya kaminene. Deoso ati abaterebonane. Bofe‑ka mai nafi‑ya Deoso‑ka yo‑yose hikaminani. Wami nafi‑ya mai wi‑wina, tabora dama‑ya mai wi‑wina, mai na, mai‑ya Deoso‑ka yo‑yose hikamini neni.

⁷Fare ati kite,

“Deoso dai nayofinahi. Deoso dai kahiyarahi. Neme‑ya Deoso wama, bofe‑ya wama, faha webote‑ya wama, faha bide‑ya wama ne, dai kahiyarahi. Bofe‑ya mai wi‑wina, Deoso mai‑ya weenebonane. Fara yama kobonabone, nahoraboneni.” Ati nene.

⁸14:8 Babironi abi daidi tamine, makobote abamatasaboneni.Deoso‑ka yo‑yose owa 2‑ke kobonamaki, ati yanane,

“Babironi sidadi kitamaro abi famani. Babironi ihi bofe‑ya mai wi‑wina mai ihi towe‑ya mai tokadabineni.” Ati nene.

⁹Deoso‑ka yo‑yose owa 3‑ke kobonamaki, ati yananatase,

“Bani Hame faha‑ke‑ya mai kahiyara, korimari mai hikahiyara, oni korimari mai noki ate‑ya kobobokana, oni korimari mai yahi‑ya kobobokana, mai na,

¹⁰mai‑ya Deoso weeni kiteya, mai‑ya sarikanebonane. Deoso‑ka yo‑yose mai toha, Kaneiro Bidi toha ne, mai noki‑ya mai‑ya sarikanebonane. Yifo hirini yati hirini fama‑ya mai‑ya sarikanebonane.

¹¹14:11 Yeso Kirisito ene‑bona 19:3; 18Bani Hame faha‑ke mai kahiyara mai toha, Bani Hame faha‑ke korimari‑ya mai kahiyara mai toha, Bani Hame faha‑ke oni korimari‑ya mai kobobokanihe mai toha, mai na, mai weeni‑ka yama asawi fawateraboneni. Yama tehe‑ya mai weeni fawarihi, yama soki‑ya mai weeni fawarihi naboneni.” Ati nene.

¹²Fara ihi Deoso‑ka dai toha Deoso hawine bai‑ya dai maanamariyahi. Yeso ati‑ya dai tokadabiyahi.

¹³Neme‑ya ati kaki,

“Owati tikanahanohi,

‘Deoso‑ka mai abamakiya, mai ya‑yainibisaboneni.’ Fare ati tikanahanohi.” Ati nene.

Deoso‑ka Doni ati yanane,

“Fara amani. Bofe‑ya yama‑ya mai anini kitamaro, neme‑ya mai hasinaboneni. Mai ihi amosa mai manakone‑ya mai kayafaboneni.” Deoso‑ka Doni ati nene.

Deoso‑ka yo‑yose bofe‑ya yima‑ya weonawahe

¹⁴Owa noko toka, ai owa‑nima ne neme sabi sawa mese‑ya itarine. Hidi‑ka sabewa oro wamani fai tati‑ya itare, yima webote ina‑ya damanene.

¹⁵14:15-16 Ahosi‑nima ai tamine amani. Deoso tabaro‑ya ai tokaboneni.Deoso‑ka yo‑yose owa Deoso‑ka yobe‑ya yanane, kamaki, neme sabi mese‑ya itari‑ya hiyare, ati kite,

“Yima‑ya ahosi‑nima na tiitinahi, bofe‑ka ahosi‑nima na marafakana, tiini‑bone‑ka mahi kobonane.” Ati nene.

¹⁶Neme sabi mese‑ya itari bofe‑ya yima‑ya weonawahe, bofe‑ka ahosi‑nima na‑ya tiine, hikayahineni.

¹⁷Deoso‑ka yo‑yose owa Deoso‑ka yobe‑ya yanane, kamakitase, yima webote ina‑ya damanene.

¹⁸Deoso‑ka yo‑yose owa Deoso‑ka yobe‑ka yama mahi amosa a‑amimi‑ka yama wiye‑ya yanane, kamaki, fare yama hirini‑ka hidi tohene. Yima fowari ina‑ya damane‑ya hiyare, ati kite,

“Yima‑ya ofa tiitinahi. Bofe‑ka ofa hada, tiini‑bone‑ka mahi kobonene.” Ati nene.

^19-2014:19 Ofa i‑di Deoso ati‑ya mai tokadabara mai tamine amani. Yerosare yakari‑ya ofa mai taina, fara Deoso mai‑ya weene tamine amane. Yeso Kirisito ene‑bona 19:15-21Bofe‑ka ofa‑ya Deoso‑ka yo‑yose yima‑ya weonawahe, ofa yorotokana, ta‑tai‑ka hodi‑ya ofa‑ya werenane. Sidadi yakari‑ya ofa‑ya mai taina, ofa fahi benotowite, kafaro namidi‑ya yowa, koweni. Tokisi‑ka 300 kirometoro‑ya yowani. Ofa fahi benonake, fara mai dama mai aba, mai‑ka ama tamine amani.

Deoso‑ka yo‑yose mai one 7 kana

¹Yama kobonabone ai watowahabone, fara ihi neme‑ya Deoso‑ka yo‑yose mai 7 kana mai oawani. Fara oawa,

“Ka! Yama kitineni.” Owatibodi ati nani.

Deoso‑ka yama we‑wee‑bone 7 kana, fara 7 kani‑ka faina‑ya mai akanani. Yama we‑wee‑bone 7 kana hawa tohiya, Deoso‑ka yama weeni hawa tohawahaboneni.

²Faha webote‑nima na oawani. Fara kahafa‑ka yama ai awa awi‑nima yama awi na, dori‑ya yifo hirini awi‑nima nani. Fara mese‑ya mai nahore, Deoso‑ka araba‑ya mai akani. Fara Bani Hame faha‑ke‑ya mai kahiyararihi, korimari‑ya mai kahiyararihi, oni nomero‑ya mai kobobokanirihi, mai na, kahafa‑nima yama na mese‑ya mai nahoreni.

³I‑di Mose i‑di Deoso‑ya na‑narifa amane. Mose‑ka wayoma, Kaneiro Bidi‑ka wayoma na‑ya mai wayoma,

“Deoso, oda‑ka hidi webote amatini. Kitabote amatini. Tiwa ene amosa hinama amani. Tiwa ene kitabote amani. Tiwa ene oda awa, keyehe‑ya hirititerani. Bofe‑ka mai nafi‑ka hidi webote amatini.

⁴Mai nafi tiwa‑ya nayofina, mai nafi tiwa‑ya kahiyara naboneni. Deoso yokana amatini. Deoso owa wadarene. Bofe‑ka mai nafi tiwa‑ya mai kahiyaraboneni. Fara tiwa ene amosa‑ya mai nafi awineni.” Mai wayomi ati nani.

⁵Makobote Deoso‑ka yobe neme‑ke oawani. Yobe kote mai seekanineni.

⁶Deoso‑ka yo‑yose mai 7 kana Deoso‑ka yama we‑wee‑bone 7 kana‑ya mai akanani. Deoso‑ka yobe‑ya mai yanana, mai kamake, bora amosa, bise wadara, wahi wada‑ya mai sakona, bora ibe oro wamani mai bai‑ya siitona nani.

⁷Deoso‑ka bara mai 4 kani‑ke mai‑ka owa barato oro wamani 7 kane‑ya damakane, Deoso‑ka yo‑yose mai 7 kana mai‑ya daahinane. Deoso abaterebona‑ka yama we‑wee‑bone barato 7 kane‑ya kibani.

⁸15:8 “Yama hawa tohi awiriya, Deoso‑ka yobe doro‑ya ai tokiyomaraboneni.” Yama hani ati na, Deoso‑ka yama we‑wee yanani‑ya hika we‑wee 7 kana hawa tohi awiriya, maakarebonane.Deoso kitabote, amosabote, hini hika yawa ihi yama asawi yanana, hika yobe kibane. Deoso‑ka yo‑yose mai 7 kana yama we‑wee‑bone 7 kana‑ya mai soroni hawa tohi awiriya, Deoso‑ka yobe doro‑ya ai tokiyomaraboneni.

Deoso‑ka yama we‑wee‑bone 7 kana

¹Deoso‑ka yobe‑ya yama ati omita, Deoso‑ka yo‑yose mai‑ya hiyara, ati kita,

“Barato 7 kane Deoso‑ka yama we‑wee‑bone kiba bofe‑ya dai soronahi.” Ati nene.

²Deoso‑ka yo‑yose mai 7 kana, fare daidi toke, bofe‑ya barato‑ka yama‑ya soronisane. Bani Hame faha‑ke oni korimari‑ya mai kayafa mai toha, Bani Hame faha‑ke korimari‑ya mai kahiyara mai toha na, yama ihi webote kome kita mai‑ya yananineni.

³Deoso‑ka yo‑yose owa 2‑ke barato‑ka yama‑ya faha webote‑ya soronisane. Faha ama tohawaha, ai aba emene tohiya‑nima faha nawahani. Faha webote abe nafi abani.

⁴Deoso‑ka yo‑yose owa 3‑ke barato‑ka yama‑ya sorone, faha kayana toha, faha kimisa toha na‑ya yama‑ya sorone, faha ama tohawahineni.

⁵Deoso‑ka yo‑yose faha hidi tohe, ati yanane,

“Deoso, hini hini amatini. Tiyanaterani. Amosabote yokana amatini. Fara mai weetina, tiwa ene amosineni. Mai ihi towe amani.

⁶Tika mai‑ya mai nanahabamaro, tiwati‑ya mai ka‑kamina‑maro mai ame‑ya mai tokafodamaroni. Fara tiwa ene ama‑ya mai fawawahineni. Hini mai ihi manakone daatina, tiwa ene amosini.” Deoso‑ka yo‑yose ati nene.

⁷Deoso‑ka yobe‑ka yama mahi amosa a‑amimi‑ka yama wiye‑ya ati yananamakitasa,

“Fara amani. Mai‑ya weetina, hini mai ihi‑nima mai ihi manakone na daatineni. Tiwa ene amosabote yokana amani. Kitabote amatini.” Ati nane.

⁸Deoso‑ka yo‑yose owa 4‑ke mahi noko‑ya barato‑ka yama‑ya soronise, mahi hewene kitawahe, bofe‑ka mai‑ya nahatine.

⁹Bofe‑ka yama hiwe kita ihi mai mese hatineni. Mai ihi towe, Deoso‑ya mai weena, hini mai ihi towe amosawami‑ya mai nofara,

“Deoso amosabote yokana amane.” Ati mai hinofare,

“Deoso towe amane.” Mai ati nani.

¹⁰Deoso‑ka yo‑yose owa 5‑ke barato‑ka yama‑ya Bani Hame faha‑ke i‑itari‑ka‑ya yama‑ya soronise, Bani Hame‑ka wami‑ya yama wahi nafi fawa, Bani Hame‑ka wami‑ya mai wi‑wina yama kome kita ihi mai yaki tokanineni.

¹¹Yama kome kita toha, mai‑ka yama ihi webote toha na, ihi mai ati yanana,

“Deoso neme‑ke towe amane.” Mai ati neni.

Mai ihi towe amosawami‑ya mai nofarani.

¹²Deoso‑ka yo‑yose owa 6‑ke faha ba‑basi na oni Eofatesi‑ya barato‑ka yama‑ya soronisane. Eofatesi fawana, kori‑ya mahi ka‑kaki‑kaya mai wi‑wina mai‑ka hidi mai toha, mai‑ka sodado mai toha na mai kariwakebonehe.

¹³16:13 Deoso ati‑ya mi‑mita‑mona ati ne hiniya keyehe‑ya hi‑hiri fare Bani Hame wami‑ke amane. Ai owa amane. Yeso Kirisito ene‑bona 13:11-16; 19:20Dafi toha, Bani Hame faha‑ke toha, Deoso ati‑ya mi‑mita‑mona ati ne hiniya keyehe‑ya hi‑hiri toha, mai na, mai iridi‑ya madi towe mai fidotona, kose mai toki‑nima madi towe mai 3 kana mai tokineni.

¹⁴Satanasi‑ka madi mai amani. Mai noki‑ya mai ihi kitineni. Bofe‑ka hidi webote mai‑ya mai haaneni. Mai‑ka sodado mai‑ya mai yorotokana, Deoso‑ka mai‑ya mai nanahababonehe. Deoso mai‑ya bisini kitabisebonane. Deoso kitabote amane.

¹⁵Yeso ati yanane,

“Yama‑ya bo‑boti kaki‑nima owa kaminaboneni. Kobo·oniya, mai ihi amosa maakani awiriya, mai amosaboneni. Mai ihi amosa fawana, ai bodi‑nima mai nibisaboneni.” Yeso ati nene.

¹⁶Adami‑ya sodado mai yorotokana, fara ebereo mai ati‑ya adami oni “Amakedo” amani.

¹⁷Deoso‑ka yo‑yose owa 7‑ke barato‑ka yama‑ya neme sabi sawi‑kaya yama‑ya soronisane. Deoso‑ka yobe‑ya hidi webote‑ka kadera kaware, fara‑ya ati kite yanane,

“Yama hawa tohini.” Ati nene.

¹⁸Bahi yebekane, ati kite, taokane, wami wawawakani kiti nafeni. Hibati‑ya ai one sawi‑ya wami haa‑nima ni awiramete, yama wawawakani kitabisineni.

¹⁹16:19 Sidadi wamanamete Yerosare tamine amani.Sidadi wamanamete wakakana ihi 3 kana tohawama, yodeo mai tohara mai‑ka sidadi dama‑ya mai‑ka yobe abawahane. Babironi kitamaro Deoso wee kanibote re, hibayata Babironi‑ya weeni kitawahane.

²⁰Faha bai‑ya wami siitona nafi fawa, adami webote tati nafi fawa nani.

²¹Faha boni fota 45 kiro‑nima na neme‑ya yanana, fororona, ai one‑ya koboneni. Deoso mai‑ya weeni kite, faha boni fororona ihi mai yawa,

“Deoso towe amane.” Mai ati nani.

Fana towe Deoso weehinaboneni

¹17:1 Fana, sidadi kita tamine amani. Yeso Kirisito ene‑bona 17:18Deoso‑ka yo‑yose mai 7 kana, hibati‑ya barato 7 kane‑ya mai aka, mai‑ka owa ohari kaki, owa‑ya hiyare,

“Ai famahi. Fana towe faha dama teberi‑ya itarikosa tiawaboneni. Fana towe mai‑ya ye‑yeeni Deoso weehinaboneni.

²Bofe‑ka hidi fana ihi towe‑ya mai awiya, fana ihi‑nima mai ihi towe nineni. Bofe‑ya mai wi‑wina fana ihi towe‑ya mai tokadabi nafineni.” Ati nene.

³17:3 Bani Hame ma‑mawane Bani Hame faha‑ke amane. Yeso Kirisito ene‑bona 13:1Deoso‑ka Doni ene wada‑nima yama na‑ya Deoso‑ka yo‑yose owa‑ya idimise, yama wadari‑kaya owa‑ya towakamene. Fana oawani. Bani Hame ma‑mawane bari‑ya itarikosani. Bani Hame ma‑mawane tati 7 kane toha, narabo ewene 10 kane toha ne, Bani Hame ma‑mawane‑ya Deoso oni dame kobobokanene. Hiniya keyehe‑ya hirine, Deoso tohi awirene.

⁴17:4 Fana‑ka bora amosa sidadi‑ya mai wi‑wina mai‑ka yinero dame tamine amane.Fana‑ka bora ma‑mawana toha, a‑asabina toha na, manakone fotani. Fara oro toha, yati bide amosa toha, daro‑ka kasaro toha na, bora‑ya kobobokanani. Keneko oro wamani‑ya hini ihi towe kiba‑ya yahi‑ya damakanani.

⁵Noki ate‑ya oni kawana, hini oni yokana tohi awirani.

“Mai ihi towe toha, mai ye‑yee toha, mai na, mai‑ka ami ama·oni. Babironi sidadi kita ama·oni.” Yama hani ati na, kawanani.

Tamine yokana owato awirani.

⁶Fana fino nafi‑ya fawa, towe toha. Fara Deoso‑ka mai toha, Yeso tamine‑ya mai ka‑kamina mai toha, mai na, mai ame tamine amani. Fana ihi mai‑ya mai nanahababone tamine amani. Fana oawa, owatibodi yama‑ya kadiki kitani.

⁷Deoso‑ka yo‑yose ati yananamatase,

“Tiwatibodi yama‑ya kadiki kitariyahi. Bani Hame ma‑mawane fana‑ya weyene, tati 7 kane toha, narabo ewene 10 kane toha ne mai tiawa, mai tamine tiwatora, mai tamine yokana okaminaboneni.

⁸Bani Hame tiwe, hibati‑ya tohemari, hibayata wadamare, makobote tohamatasebonane. Hodi yaba‑kaya kimisamebonane. Makobote Deoso weehineya, komene fawarebonane. Hibati‑ya wami awisari‑ya mai abarabone‑ka yama hani‑ya mai oni‑ya Deoso kanahanomatamonane. Mai oni sawira mai atibodi yama‑ya kadiki kitabone,

‘Ka! Bani Hame ma‑mawane kitane.’ Mai atibodi ati naboneni.

Bani Hame ma‑mawane hibati‑ya tohemari, wadamare, kamatase‑ya mai hiaweya, mai atibodi yama‑ya kadiki kitaboneni.

⁹Tamine mai wato kanibote hirebonane. Bani Hame ma‑mawane tati 7 kane fana i‑itari‑ka adami 7 kana tamine amani.

¹⁰Kofeno mai 7 kana mai tamine amani. Hibati‑ya kofeno mai 5 kana mai kitamaro, makobote mai kiti fawanamaro, mai wadamarani. Hibayata kofeno ohari tohawahane. Kofeno owa koboni awisarane. Koboneya, kitebona, kiti fawa kanibote nebonane.

¹¹Bani Hame hibati‑ya tohemari, wadamare, kamataseya, mai‑ka hidi 8‑ke tohawahebonane. Kofeno mai 7 kana mai‑ka hidi owa amane.

¹²Narabo ewene 10 kane hidi webote mai‑bone, mai 10 kana mai tamine amani. Hibayata hidi webote mai tohi awira, yama one‑ya hidi webote mai tohawahabone, Bani Hame‑ya mai dababoneni. Hidi mai tohi nafiraboneni.

¹³Hidi webote mai 10 kana mai ati fara hinama tohaboneni. Bani Hame‑ya mai‑ka mai‑ya mai kahabanaboneni, Bani Hame ati‑ya mai tokadababonehe.

¹⁴17:14 Kaneiro Bidi‑ya mai daba ai tamine amani.Mai‑ka sodado Kaneiro Bidi‑ya mai ati bisinabone, Kaneiro Bidi mai‑ya bisinibisebonane. Kaneiro Bidi hidi bidi mai nafi‑ka hidi tohe, hidi webote mai nafi‑ka hidi toha nane. Bofe‑ka mai one‑ya Kaneiro Bidi haanemari, mai‑ya kayawemari, Deoso hawine‑ya mai sawi oharemaroni. Kaneiro Bidi‑ya mai dabineni.” Deoso‑ka yo‑yose ati nene.

¹⁵Deoso‑ka yo‑yose owa‑ya hiyaramatase,

“Faha dama fana towe sawi‑ka tiawa, fara tabora bara tamine toha, mai dama mai tamine toha na, sidadi dama tamine amani.

¹⁶17:16 Mai ihi fana bodi tohabone, sidadi‑ya mai wi‑wina mai‑ka yinero fawanebona tamine amane. Fana mai sarihikanabone bohoba‑ya sidadi‑ya mai nanahababone tamine toha awini.Narabo ewene 10 kane toha, Bani Hame toha, mai na, fana towe‑ya mai atibodi kakaboneni. Mai ihi fana towe yahi hone wadamarabone, fana towe bodi tohawahaboneni. Fana towe‑ya mai nanahababone, yifo hirini‑ya mai sarihikanaboneni.

¹⁷Hibati‑ya yama‑ya nebona Deoso hikaminemari, wami hidi webote mai 10 kana mai atibodi‑ya Deoso yofikane, ati‑mari‑nima yama nafi hawa tohawahabonehe.

‘Bani Hame faha‑ke‑ya ai‑ka mai nafi ai daanahi.’ Mai atibodi ati na, Deoso mai‑ya yofikaneri.

¹⁸Fana sidadi kita tamine amani. Bofe‑ka hidi webote mai nafi fana ati‑ya mai tokadabineni.” Deoso‑ka yo‑yose ati nene.

Babironi kita‑ya nanahabene

¹Yama one hawa tohiya, Deoso‑ka yo‑yose owa neme‑ya kise oawani. Deoso‑ka yo‑yose kiti nafi, amosi nafine. Hini wehene ene bofe‑ya yama tehewahani.

²18:2 Babironi‑ka mai ihi‑mete‑nima sidadi‑ka mai ihi naboneni.Ati yanane, ati kite,

“Babironi kita abi fama, madi towe mai‑ka tabora tohawahani. Bani mai afe wada, mai kabara, mai‑ka tabora tohawahineni.

³Babironi‑ka mai ihi towe‑nima bofe‑ka mai ihi towe nawahamaroni, mai nafi. Bofe‑ka mai‑ka hidi Babironi ihi towe‑ya mai tokadabamaroni. Yama amosa dama‑ya Babironi‑ka mai kanika, tabora dami‑ka yama‑ya mai da‑daa mai‑ka yinero nafiwahemarine.” Deoso‑ka yo‑yose ati nene.

⁴Neme‑ya ati yanane,

“Oka dai amani, Babironi‑kaya dai sawimariyahi. Babironi‑ka mai ihi‑nima dai ene riyahi. Babironi‑ka mai wee·oniya, dai sawiriyahi.

⁵Babironi‑ka mai ihi towe dama, manakone‑ya daa kanibote re, hibayata mai ihi manakone‑ya Deoso daanebonane.” Ati nene.

⁶Ati yananamatase, Deoso‑ka yo‑yose mai‑ya yose,

“Babironi‑ka mai ihi manakone dai daanahi. Mai ihi towe‑nima mai weeni famahi. Mai ihi manakone dai fiyakanihi.

⁷Babironi‑ya hini mai‑ya mai kahiyara,

‘Hidi ai amani. Fana ohariwama‑nima ai ni awiraboneni. Ai ohiteraboneni.’ Mai atibodi ati nani.

Hini mai‑ya mai kahiyara, hini mai ihi mai dai weeni kitahi. Mai‑ka yama dama toha, mai‑ka yama nafi abahi, mai ohinabonehe.

⁸Hini mai ihi mahi ohari‑ya mai‑ka yama we‑wee dama kobonaboneni. Yama kome‑ya mai wasi, mai tafe wadamarihi, mai ohi, mai‑ka yama nafi hiri na, mahi ohari‑ya yananaboneni. Deoso mai‑ya weene, Deoso kitatene.

⁹Babironi hirina asawi tokomisa‑ya wami hidi mai awiya, mai ohinaboneni. Fara bofe‑ka mai‑ka hidi Babironi ihi‑ya mai tokadabamaro, mai ohinaboneni.

¹⁰Yama yofina ihi aka‑ya mai nahabone, mai ati yananabone,

‘Ka! Ka! Babironi sidadi webote kitamaro, fara ora ohari‑ya, hika yama we‑wee kobonineni.’ Mai ati naboneni.

¹¹Mai‑ka yama ka‑kanikama wadamara, yama‑ya mai da‑daa mai nafi ohinaboneni.

¹²Oro toha, barata toha, yati bide amosa toha, daro‑ka kasaro toha, bora amosa bara dama toha, awa amosa bara dama toha, erefati ino wamani toha, awa manakone fota wamani toha, metaho amose wamani toha, feho wamani toha, yati webote amosa wamani toha,

¹³yamata ke‑ketehe toha, yama mahi amosa toha, esitarato toha, yama a‑amimi‑bone‑ka yama mahi amosa toha, fino toha, awa bono‑ka oyo toha, farina tiriko amosa toha, tiriko toha, bowi toha, kaneiro toha, kafaro toha, kaho toha, ai toha na, fara‑ya mai kanikami awirani.

¹⁴Yama amosa‑ya Babironi‑ya mai wi‑wina mai nokotonihe. Fara yama‑ya mai kanikamarihi, mai‑ka yama manakone fota wadamarihi, mai‑ka yama amosi nafe wadamarihi naboneni.

¹⁵Yama amosa‑ya mai da‑daa mai‑ka yinero nafiwahemari, mai habi siitona, aka‑ya mai nahabone, mai ohinaboneni.

¹⁶Haa‑nima mai ati nabone,

‘Ka! Ka! Sidadi webote kitamaro, hibati‑ya bora amosi nafe‑ya mai sakonamaro, bora ma‑mawana toha, bora a‑asabina toha na, manakone fota‑ya mai sakonamaroni. Oro wamani toha, yati bide amosa toha, daro‑ka kasaro toha na, mai sakonamaroni.

¹⁷Fara ora ohari‑ya hika yama dama abineni.’ Mai ati naboneni.

Maboro‑ya mai da‑damakana mai toha, maboro‑ya mai a‑ani mai toha, maboro‑ya mai sa‑sawi mai toha, fara faha webote‑ya yama‑ya mai a‑ani mai nafi toha na, aka‑ya mai nahaboneni.

¹⁸Babironi hirina asawi tokomisa mai awiya, mai ati yananabone,

‘Sidadi one kita haa‑nima terani.’ Mai ati naboneni.

¹⁹18:19 Mai atibodi ohini kita, wami hibakori‑ya mai tati‑ya mai matakariteni.Wami hibakori‑ya mai tati‑ya mai matakarinaboneni. Mai ati yananabone, mai ohinaro,

‘Ka! Ka! Sidadi nafe kiti nofa, ora ohari‑ya sidadi nafi abineni. Fara hibati‑ya bara mai‑ka yama dama Babironi‑ya mai wi‑wina mai kanika, maboro hidi mai nafi yinero webote‑ya mai kihawahamaroni.’ Mai ati naboneni.

²⁰Neme‑ya dai wi‑wina dai toha, Deoso‑ka dai toha, Yeso‑ka yo‑yose dai toha, Deoso ati‑ya dai ka‑kamina dai toha, dai na, dai ya‑yainahi. Hibati‑ya Babironi‑ka mai ihi dai‑ya mai weenamaro, mai ihi manakone‑ya Deoso daanawahene. Fara ihi dai ya‑yainahi.” Neme‑ya ati kaki, ati nene.

²¹Deoso‑ka yo‑yose kiti nafi, yati webote‑ya idi, faha webote‑ya yati‑ya korotofi, ati yanane,

“Yati korotofe fawana‑nima Babironi fawa kanibote naboneni. Mai hiwasimi awiraboneni.

²²Mai wayoma, araba‑ya mai one deo, kaida‑ya mai one afo, torobeta‑ya mai one afo, mai nana, Babironi‑kaya mai wayomi wadamateraboneni. Yama‑ya mai wa‑wama Babironi‑kaya mai sawimateraboneni. Babironi‑kaya ahosi‑nima yama na‑ya mai warimateraboneni.

²³Babironi‑kaya nabarina wahi wadamateraboneni. Babironi‑kaya mai fanamateraboneni. Mai ihi towe manakone amani. Fara Babironi‑ka yama mai da‑daa yinero webote‑ya mai kiha, mai ati ihi bofe‑ka mai nafi yinero‑ya mai nokotonihe. Mai ihi towe amani.

²⁴Deoso‑ka mai toha, Deoso ati‑ya mai ka‑kamina mai toha, mai na, mai one‑ya mai nanahabamaro, wami dami‑ya mai one sawi, mai‑ya mai nanahaba namaro, mai manakone‑ya Deoso daanane, Babironi‑ka mai‑ya.” Ati nene.

¹19:1 Yehowa i‑di Deoso oni amane.Yama hawa tohi‑ya neme‑ya mai dama mai ati kita, mai ati omita,

“Yehowa dai kahiyarahi. Ai‑ka Deoso ati ene ai hasineni. Ai‑ka Deoso amosabote amane. Ai‑ka Deoso kitabote amane.

²Hika yama we‑wee amosa hinama toha, keyehe sawi awirani. Fara fana towe mai‑ya ye‑yeeni‑ya Deoso weenene. Fana ihi yama towe‑ya mai one nafi nokotonihe. Fana ihi Deoso‑ya mai na‑narifa mai‑ya mai nanahabamaro, Deoso ene hini mai ihi manakone koboneni.” Mai ati nani.

³Mai ati yananamatasa,

“Yehowa dai kahiyarahi. Fana towe hirini‑ka asawi tokomisa, asawi fawateraboneni.” Mai ati nani.

⁴Hidi bi‑bidi mai na 24 mai kana mai toha, Deoso‑ka bara mai 4 kana mai toha, mai na, mai baki‑kaya mai wiyani, Deoso‑ya mai kahiyarabonehe. Deoso ai‑ka Hidi Webote tohe, Deoso‑ya mai kahiyara,

“Fara amani. Yehowa ai kahiyaraharihi.” Mai ati nani.

⁵Deoso‑ka kadera amosa kawi‑ya yama ati yanana,

“Deoso dai na‑narifa dai toha, Deoso dai nayofina dai toha, dai na, webote dai toha, webote dai tohi awira dai toha, dai na, dai nafi ai‑ka Deoso dai kahiyaraharihi.” Ati nene.

Kaneiro Bidi fanebona

⁶Mai dama mai hiyari‑nima mai ati na, mai ati yanana, mai ati omitani. Faha webote rike moni‑nima mai ati nihi, bahi ati kite ati‑nima mai ati nihi na, mai ati omita,

“Yehowa ai kahiyarahi. Ai‑ka Deoso kitabote yokana amane. Yama nafi‑ka hidi tohawahane.

⁷19:7 Kaneiro Bidi fadi‑bone Deoso ati ai tokadaba ai tamine amani.Hibayata Kaneiro Bidi fanebona, fadi‑bone bora amosa‑ya sakonawaha, ai ya‑yainahi. Kaneiro Bidi ai kahiyarahi.” Mai ati nani.

⁸Bora bise wadara, sa‑sawani kita, amosa‑ya fadi‑bone kayafineni. Bora amosa Deoso‑ka ai toha ai ene amosa tamine amani.

⁹Deoso‑ka yo‑yose ati yananamatase,

“Owati tikanahanohi,

‘Kaneiro Bidi fanebona, dai yorotokanaboneni, dai tafabonehe. Dai‑ya mai haaniya, dai ya‑yainaboneni.’” Deoso ati nene.

“Deoso ati yokana okaminineni.” Deoso‑ka yo‑yose ati nene.

¹⁰Teme yowi‑ya owa bako‑kaya ohoma, okahiyarebona,

“Araba! Owa tikahiyarariyahi! Yeso tamine dai ka‑kamina dai‑nima ona ama·oni. Yeso ati dai to‑tokadaba dai toha, yama yananabone tamine oda ka‑kamina oda toha, ai na, Deoso‑ya ai na‑narifa ai amani. Ai‑ka hidi oharine, Deoso tikahiyarabisahi.” Deoso‑ka yo‑yose ati namatasene.

Yeso mai‑ya weeni kitane

¹¹19:11 Kafaro bari‑ya itari Yeso tamine amane. Kafaro bari‑ya Sodado kite itari‑nima Yeso itarine, mai‑ya bisinebonane.Deoso tabaro‑ka nokobi seekani hawa toha oawani. Kafaro sawa kaki, bari‑ya itari oni owa,

“Deoso ati‑ya tokadabi ohari, keyehe‑ya hirire.”

Mai ihi yokana‑ya wato, fara mai‑ya nanahabeya, yama sibarini, hini mai ihi manakone‑ya daanane.

¹²19:12 Noko bodi yifo hirini‑nima ne mai ihi nafi‑ya Yeso wato tamine amane. Yeso tati‑ya hidi‑ka sabewa dama sinare mai nafi‑ka hidi tamine amane. Yeso hini mese‑ya oni kawane, hini oni‑ya wato, Yeso kitabote yokana tamine amane.Noko bodi yifo hirini‑nima ne, tati‑ya hidi‑ka sabewa dama sinare, hini mese‑ya oni kawane, hini oni‑ya wato, mai one‑ta oni mai hiwatorene.

¹³19:13 Yeso‑ka bora ama toha ai ene manakone‑ya nanahabemata tamine amane.Oni owa “Deoso‑ya Yo‑yofikana” toha, hika bora ama toha nani.

¹⁴19:14 Mai‑ka bora sawa toha mai ihi kote towe wadara tamine amani.Hidi Webote nowati‑ya neme‑ka sodado mai yotani. Mai bori amosa, bora sawa hinama, bise wadara‑ya mai sakona, kafaro sawa mai bari‑ya mai nahoreni.

¹⁵19:15 Yeso iridi‑kaya yima ino nafe kakeni mai‑ya weeni kitebona tamine amane. Ofa taina tamine sawi 14:17-20‑ya.Hidi Webote iridi‑kaya yima ino nafe kakeni. Yima‑ya tabora dama‑ya weeni kitene. Tabora dami‑ka hidi tohawahebona, ati mai nafi tokadaba kanibote hinebonane. Fino ai wamanabone ofa ai taiteni, fahi tokafodabonehe. Fara‑nima Deoso‑ya Yo‑yofikana mai‑ya weeni kite, mai ame tokafodani. Deoso kitabote yokana amane. Deoso yawe ene mai‑ya weeni kitene.

¹⁶Hika bora fanaki‑ya oni kawane,

“Hidi webote mai‑ka hidi ama·oni. Hidi mai nafi mai‑ka hidi ama·oni.” Hika bora fanaki‑ka yama hani kawana ati nani.

¹⁷19:17 Bani mai afe daatokana bokosawe mai tamine amani.Deoso‑ka yo‑yose owa mahi noko‑kaya wai, bani mai afe daatokana mai‑ya haane, ati kitene,

“Owa‑kaya dai kakihi. Deoso ati ene dai tafi nafeboneni.

¹⁸Wami hidi mai toha, sodado mai‑ka hidi mai toha, mai kita mai toha, kafaro mai toha, kafaro bari‑ya mai i‑itari mai toha, mai‑ya mai ka‑kanika mai toha, mai‑ya mai kanikatera mai toha, webote mai toha, webote mai tohi awira mai toha, mai na, fara mai aboi dama mai‑ya dai kababonehe.” Deoso‑ka yo‑yose ati nene.

¹⁹19:19 Kafaro bari‑ya itari i‑di Yeso amane.Bani Hame faha‑ke toha, wami hidi mai toha, hidi mai‑ka sodado mai toha, mai na, mai yorotokana mai oawani.

“Kafaro bari‑ya itari hika sodado mai eyehe ai weenaho.” Bani Hame faha‑ke hika mai eyehe ati nene.

²⁰Mai kiti awirani. Bani Hame faha‑ke toha, Deoso ati‑ya mi‑mita‑mona ati ne toha, mai na, mai‑ya mai wata, mai‑ya mai nanahabi awira, hiniya wara hirini‑ya yati hirini sawini‑kaya mai‑ya mai korotoniki amani. Deoso ati‑ya mi‑mita‑mona ati ne, hiniya keyehe‑ya hi‑hiri, ene kite bofe‑ka mai awiya, hika keyehe mai hikadabamaroni. Bani Hame faha‑ke‑ka yo‑yose amane. Keyehe‑ya hi‑hiri ene Bani Hame faha‑ke oni korimari‑ya bofe‑ka mai kobobokanihe, Bani Hame faha‑ke korimari‑ya mai kahiyara namaroni.

²¹Kafaro bari‑ya itari iridi‑kaya yima kake ihi mai one nafi abi ohareni. Fara mai aboi‑ya bani mai afe daatokana mai kaba, mai nafi korimanani.

Faha fowe 1.000 kani‑ya

¹Deoso‑ka yo‑yose neme‑ya kise oawani. Hodi yaba‑ka safi‑ya damakana, koheti‑ya damakana nene.

²Dafi‑ya wate, koheti‑ya dafi‑ya sokine, faha fowe 1.000 kani‑ya dafi seekani awirebonane. Dafi Satanasi amane. Oni owa Diaboro amane. Satanasi maka‑nima nematamona, fare amane.

³Hodi yaba‑ya korohini, nokobi‑ya barikawamene, Dafi‑ka keyehe‑ya bofe‑ka mai mitamarabonehe. Faha fowe 1.000 kani hawa tohiya, dafi‑ya seekaneya, hiwatamatasebonane.

⁴Hidi‑ka kadera dama oawani. Ai one kadera‑ya mai nahore, hidi mai tohawahani, mai ihi mai kadikabonehe. Ai korimari dama oawani. Yeso tamine‑ya mai kaminamaro, Deoso ati‑ya mai tokadaba ihi mai namidi mai tiihinakosamaro, mai korimari oawani. Bani Hame faha‑ke abano toha, Bani Hame faha‑ke korimari toha ne‑ya mai kahiyari awira, mai korimari oawani. Bani Hame faha‑ke oni korimari mai noki ate‑ya kobobokarihi mai toha, mai yahi‑ya oni korimari kobobokarihi mai toha, mai na, mai korimari oawani. Fara mai abamaro, mai kitama, hidi mai tohawaha, mai oawani. Faha fowe 1.000 kani‑ya Deoso‑ka Ka‑kadika eyehe hidi bidi mai tohawahani.

⁵Fara mai kitami daidi amani. Mai one‑ta hibayata kitami awira, faha fowe 1.000 kani hawa tohiya, mai kitamamakitasaboneni.

⁶Mai kitami daidi mai ya‑yainaboneni. Deoso‑ka mai toha, wara hirini mai‑ya natiraboneni. I‑di Deoso, i‑di Yeso ne mai‑ya mai ka‑kahiyaraboneni. Faha fowe 1.000 kani‑ya Deoso‑ka Ka‑kadika eyehe hidi bidi mai tohawahaboneni.

⁷Faha fowe 1.000 kani hawa tohiya, Satanasi‑ya seekanebonane.

⁸Satanasi kimisameya, bofe‑ka mai nafi‑ya keyehe‑ya hirinebonane. Koki‑ka sodado mai toha, Makoki‑ka sodado mai toha, mai na, Satanasi mai‑ya yorotokanihibonane. Faha webote widi‑ka siki‑nima mai na, mai dama mai kadiki ai watoraboneni.

⁹20:9 Sidadi Deoso hinofa oni Yerosare amani.Fara sodado hinama mai kimarosa mai oawani. Deoso‑ka mai‑ya mai kakidikosawaha, sidadi Deoso hinofa‑ya mai kakidikosawaha, neme‑ya yifo hirini kisa, mai‑ya nanahabani.

¹⁰Diaboro mai‑ya keyehemari wara hirini‑ya korohiniwahene. Wara hirini‑ya Bani Hame faha‑ke hibati‑ya sawi, Deoso ati‑ya mi‑mita‑mona ati ne hiniya keyehe‑ya hi‑hiri hibati‑ya sawi, fara wara hirini, yati hirini na sawi‑kaya mai toka, yama tehe‑ya mai kome tohanadi, yama soki‑ya mai kome tohanaba, mai kome kita fawateraboneni.

¹¹Hidi Webote‑ka kadera sa‑sawana‑ya hidi itari oawani. Bofe toha, neme toha na, hidi‑ya mai nayofina, mai fawanani.

^12-1320:13 Deoso‑ya mai nofara mai abiya, mai korimari tokateni, korimari wiye‑ya.Faha webote‑ya mai abamete mai kitama mai toha; mai tame‑ka mai kitama mai toha, mai na; mai korimari wiye‑ya mai toha, mai nafi kitama, webote mai toha, webote mai tohi awira mai toha, mai na, mai oawani. Hidi Webote‑ka kadera kawi‑ya mai nahani. Deoso‑ka yama hani dama‑ya hika yo‑yose mai seena, makobote yama hani kare‑ya seekanamaki, fara ai abarabone‑ka yama hani amani. Mai ihi‑nima mai ihi manakone‑ya haanene. Fara yama hani dama‑ya mai ihi tamine sawi nani. Hini mai ihi‑nima yama na‑ya daanene.

¹⁴Mai korimari wiye‑ya wara hirini‑ya korotoniwahene. Fara wara hirini‑ya mai sawe, mai abi oharimatasa‑nima mai na, mai kome kita fawaraboneni.

¹⁵Ai abarabone‑ka yama hani‑ya mai oni sawira, wara hirini‑kaya mai‑ya weretoniwahene.

Neme yati toha, bofe yati toha

¹Neme yati toha, bofe yati toha na, oawani. Neme hibati‑ka‑nima na awimarihi, bofe hibati‑ka‑nima na awimarihi, faha webote wadamarihi nani.

²21:2 Yerosare yati ai tamine amani. Maki fadi‑ya fame‑nima Yeso‑ya ai dababone, ai maakaraboneni.Deoso‑ka sidadi oawani. Fara Yerosare yati amani. Neme‑ya Deoso tabaro‑ya yanana, kisani. Fadi‑bone bora amosa‑ya sakoteni, maki‑bona ya‑yainebonaha. Fara‑nima sidadi na, amosi nafeni.

³Hidi Webote‑ka kadera‑kaya yama ati kita yanana,

“Deoso tabaro bofe‑ya tohawahe, Deoso‑ka mai tohawahani. Deoso mai‑ya sawiwahe, mai‑ya winawahene.

⁴Deoso ati ene mai ohini fawana, mai abamarihi, mai ohinamarihi, mai atibodi ohinamarihi, mai kome wadamarihi nani. Fara hibati‑ka yama nafi fawaneni.” Ati nene.

⁵Hidi Webote kadera‑ya itari, ati yanane,

“Owati ihi yama nafi yati tohawamani. Owati amosa hinama, keyehe sawi awira, fara ihi owati tikanahanohi.

⁶21:6 Aofa ama·oni. Omeka ama·oni. Yama hani ati na, fara Kereko mai ati toha, dai ati‑ya haa‑nima toha, yama yanakani‑ke ama·oni. Faina ama·oni.Oka yama a‑ani hawa tohineni. Aofa ama·oni. Omeka ama·oni. Yama yanakani‑ke ama·oni. Faina ama·oni. Mai baki hoka mai‑ya oka faha daa·onabone, manakone haa·orabone, mai hifi‑ya mai abaraboneni.

⁷Haa‑nima yama naboneni. Hawi bai‑ya mai maakani awiriya, oka tabora‑ya mai saweboneni. Mai‑ka Deoso ohaboneni. Oka dao mai tohaboneni.

⁸Mai habi siitona ihi oka hawi‑ya mai sawira mai toha, owati‑ya mai tokadabara mai toha, mai ihi towe mai toha, mai one‑ya mai nanahaba mai toha, mai si‑siwa mai toha, madi mai‑ya mai ha‑haa mai toha, deoso bara mai‑ya mai ka‑kahiyara mai toha, keyehe‑ya mai hi‑hiri mai toha, mai na, wara hirini yati hirini sawi‑kaya mai sawibisaboneni. Mai abi oharimatasa‑nima mai na, mai kome fawaraboneni.” Hidi Webote ati nene.

Yerosare yati

⁹Hibati‑ya Deoso‑ka yo‑yose mai 7 kana mai oawani. Barato 7 kane doro‑ya Deoso‑ka yama we‑wee‑bone‑ya mai aka mai‑ka owa ohari kamatase, owa‑ya haane,

“Tikihi owa‑ya, Kaneiro Bidi fadi‑bone yofi·okanaboneni.” Deoso‑ka yo‑yose ati nene.

¹⁰21:10 Kaneiro Bidi fadi‑bone Yerosare yati toha ai tamine amani.Ai wadame‑ka yama‑nima yama na‑ya adami tati webote‑kaya Deoso‑ka Doni owa‑ya towakame, Kaneiro Bidi fadi‑bone tamine‑ya yofikanene. Deoso‑ka sidadi Yerosare toha, Deoso wine‑kaya yanana, kisa‑ya owa‑ya yofikanene.

¹¹Deoso sawi ene Yerosare wahi wadani. Yati bide manakone fota ooya‑nima ooyana, yasibe amosi nafe ai noko‑ya barikara‑nima nani.

¹²Yama ba‑barikana fota nemehe toha, yama barikani‑ka nokobi 12 kana toha, nokobi‑ya Deoso‑ka yo‑yose mai 12 kana mai nahoneni. Nokobi 12 kana mese‑ya Isara·eo bidi mai oni 12 kana mai oni kobobokanani. Isara·eo‑ka nodi mai tamine amani.

¹³Mahi ka‑kaki‑kaya nokobi 3 kana toha, mahi to‑toka‑kaya nokobi 3 kana toha, mahi ka‑kaki berenakosi‑kaya nokobi one 3 kana toha, berenakosi kowani‑kaya one 3 kana toha nani.

¹⁴21:12-14 Isara·eo‑ka nodi toha, Kaneiro Bidi‑ka yo‑yose mai 12 kana mai toha, mai na, mai oni sawi, fara Yodeo mai toha, Yodeo ai tohara, ai na, Yeso‑ya ai dababoneni. Deoso ati ai tokadaba ai nafi saweboneni.Yama barikani‑ka awe siitona yati wamani 12 kana tohani. Yati mese‑ya Kaneiro Bidi‑ka yo‑yose mai 12 kana mai oni kobobokana nani.

¹⁵Deoso‑ka yo‑yose owa‑ya hiyare, yama mi‑midikana oro wamani‑ya damanene, sidadi midiki‑bone‑karo.

¹⁶Sidadi fowari amosa 4 kana toha, fowari yowi hinama toha, yowi 2.400 kirometoro toha, fowari 4 kana yowi hinama toha, tati mese yowi 2.400 kirometoro toha nani.

¹⁷Yama ba‑barikana‑ya midikanamaki, ifi baiye yowi‑ka 75 metoro tohani. Deoso‑ka yo‑yose‑ka yama mi‑midi ai‑ka yama mi‑midi yowi‑nima yowineni.

¹⁸Yama ba‑barikana yasibe wamani toha, yama ba‑barikana dori‑ya sidadi oro wamani toha, oro amosa kahafa‑nima na, amosi nafe, ai noko‑ya barikani awirani.

¹⁹Yama barikani‑ka awe siitona, yati wamani amani. Yati amosi nafe, manakone fotani. Yati siitona daidi yasibe toha, yati 2‑ke safira toha, yati 3‑ke akata toha, yati 4‑ke esimeraoda toha,

²⁰Yati 5‑ke sadonika toha, yati 6‑ke saridio toha, yati 7‑ke kirisorito toha, yati 8‑ke beriro toha, yati 9‑ke tabasio toha, yati 10‑ke kirisobaraso toha, yati 11‑ke yasinito toha, yati 12‑ke ametisita toha nene.

²¹Yama barikani‑ka nokobi 12 kana, daro‑ka kasaro webote kare wamani toha, fara hinama 12 tohani. Hawi‑ta oro wamani toha, oro amosa kahafa‑nima na toha na, ai noko‑ya barikani awirani.

²²21:22 Deoso‑ka yobe wadarane, yama hani ati na, Deoso ai‑ya sawi ene Deoso noko‑ya Deoso ai kahiyaraboneni.Deoso hidi webote amane. Kitabote yokana amane. Deoso Kaneiro Bidi mai fama sidadi‑ya mai kasawineni. Sidadi‑ya mai kasawe ihi Deoso‑ka yobe wadarane.

²³Deoso Kaneiro Bidi mai fama mai wahi ihi tabora nafi‑nima yama teheteni. Fara mahi toha, abariko toha ne, mai wahi hiniya amani.

²⁴Deoso Kaneiro Bidi mai fama, mai wahi‑ya bofe‑ka mai nafi yakanaboneni. Wami hidi webote mai‑ka yama amosa‑ya sidadi‑ya mai isonaboneni.

²⁵21:25 Nokobi‑ya mai barikara, yama hani ati na, yama‑ya ai nayofinamaterabone tamine amane.Yama tehe‑ya nokobi‑ya mai barikani awiraboneni. Fara yama soki wadara, yama tehe hinama amani.

²⁶Bofe‑ya mai nafi‑ka yama amosa‑ya sidadi‑ya mai kakamaboneni.

²⁷Yama amosara toha, mai ihi towe mai toha, keyehe‑ya mai hi‑hiri mai toha, mai na, sidadi‑ya mai tokiyomateraboneni. Kaneiro Bidi‑ka yama hani‑ya mai oni sawe, sidadi‑ya mai tokiyomabisaboneni. Kaneiro Bidi‑ka yama hani ai abarabone‑ka yama hani amani.

¹Makobote sidadi‑ka hawi bai‑ya faha kayana‑ya Deoso‑ka yo‑yose owa‑ya yofikanene. Ai abarabone‑ka faha amani. Fara Deoso‑ka kadera toha, Kaneiro Bidi‑ka kadera toha na‑ya faha yanana, noki amosi nafe, kahafa amosabote‑nima na, ai noko‑ya barikani awirani.

²Faha widi fami‑ya awa siitona, ai abarabone‑ka awa amani, fara abariko‑nima awa bonona, bofe‑ya mai wina mai‑ya awa afe kasomaboneni.

³Sidadi‑ka mai toha, sidadi‑ka yama toha na mai kahabanamateraboneni. Deoso Kaneiro Bidi‑ya fame mai‑ka kadera amosa sidadi‑ya yorokanaboneni. Deoso‑ya ai na‑narifa Deoso‑ya ai kahiyaraboneni.

⁴22:4 Deoso oni ai noko ete‑ya kobobokane Deoso ai‑ya kayawe tamine amane.Deoso‑ya ai awabone, Deoso oni ai noko ete‑ya kobobokanebonane.

⁵Yama soki wadateraboneni. Yama tehe hinama teboneni. Nabarina wahi, mahi wehene ne, hiniya amani. Deoso hidi webote ene yama nafi‑nima yama tehenineni. Hidi bidi ai tohawahabone, yama maakani awiraboneni.

Yama hani ati‑ya dai tokadabahi

⁶Deoso‑ka yo‑yose ati yanane,

“Yama tamine tikanahana, fara amosa hinama amani. Keyehe sawi awirani. Deoso ati‑ya mai mi‑mita mai atibodi‑ya ai‑ka hidi Deoso kanawatotene. Hika yo‑yose‑ya yosene, Deoso‑ya dai na‑narifa dai toha dai‑ya yofikanebonaha. Yama yana kanibote naboneni.” Deoso‑ka yo‑yose ati nene.

⁷Ati yanane,

“Kiki, kobo kanibote onaboneni. Yama hani ati‑ya mai tokadabiya, mai ya‑yainibisaboneni.” Ati nene.

⁸Yowaho ama·oni. Fara yama tamine omita, yama oawa ona, fara ama·oni. Makobote Deoso‑ka yo‑yose owa‑ya yofikane, fai teme yowi‑ya owa bako‑kaya ohoma, okahiyarebonaha.

⁹Deoso‑ka yo‑yose owa‑ya hiyare,

“Araba! Deoso‑ya dai na‑narifa dai toha, fara dai owa ama·oni, Deoso ati‑ya dai ka‑kamina dai toha, yama hani ati‑ya dai tokadaba dai toha, dai na, fara dai‑nima ona ama·oni. Deoso tikahiyarabisahi.” Deoso‑ka yo‑yose ati nene.

¹⁰Ati yananamatase,

“Yama hani ati tikahemoriyahi. Fara yama tamine dama hibayata timita, fara yama yanani yanatonineni.

¹¹Mai ihi towe mai maakani awiraboneni. Towe mai toha, towe hinama mai tohaboneni. Mai ihi amosa, mai ihi amosi maakaraboneni. Hini amosa, amosahareboneni.” Deoso‑ka yo‑yose ati nene.

¹²Ati yanane,

“Kiki, kobo kanibote onaboneni. Mai ihi amosa manakone dama·okana, daa·onabonehe. Hini mai ihi‑nima manakone na daa·onaboneni.

¹³Aofa ama·oni. Omeka ama·oni. Yama yanakani‑ke ama·oni. Faina ama·oni. Oyanaterani. O·abateraboneni.

¹⁴22:14 Yeso ai ene manakone nanahabemata, Yeso ati ai tokadaba, ai‑ka bora sokona‑nima ai teni.Mai‑ka bora mai sokona Deoso mai‑ya kasomebonane. Fara Deoso‑ka sidadi nokobi‑kaya mai tokiyomaboneni. Ai abarabone‑ka awa wadi‑kaya mai saweboneni.

¹⁵Mai ihi towe mai toha, madi towe mai‑ya mai ha‑haa mai toha, mai si‑siwa mai toha, ai one‑ya mai na‑nanahaba mai toha, deoso bara mai‑ya mai ka‑kahiyara mai toha, keyehe‑ya mai no‑nofa mai toha, keyehe‑ya mai hi‑hiri mai toha, mai na, sidadi‑ya mai tokiyomateraboneni.

¹⁶22:16 “Yama wahabisari‑ke amowa webote‑nima ona ama·oni.” Yeso ati ne, Yeso ai‑ya kasome tamine amane.Yeso ama·oni. Deoso‑ka yo‑yose oyose, tiwa‑ya yofikane, yama tamine‑ya Deoso‑ya mai hi‑hiyara‑ke yobe‑ka mai himitabonehe. Dai‑ka hidi i‑di Dafi tohemari, fare‑ka nodi ama·oni. Yama wahabisari‑ke amowa webote‑nima ona ama·oni.” Yeso ati nene.

¹⁷Deoso‑ka Doni ati toha, Kaneiro Bidi fadi‑bone ati toha na, mai ati,

“Yeso, kobotinahi.”

Yama hani ati dai mitiya, dai ati yananamatasahi.

“Yeso, kobotinahi.” Dai ati nahi.

Dai bako hoko‑ya dai kamahi. Ai abarabone‑ka faha dai fawiya, manakone wadaraboneni.

¹⁸Owati dai nafi mitahi. Mai ati yananiya,

“Yama hani ati kote hasina, okaminamakeboneni.” Mai ati na, keyehe‑ya mai hirina,

Deoso ati ene yama we‑wee‑bone‑ya mai saweboneni. Fara yama we‑wee‑bone kobonabone yama hani ati na, fara koboniya, mai saweboneni.

¹⁹Dai one keyehe‑ya hiriniya,

“Yama hani ati kote tosaware, yama owatobisineni.” Mai ati na,

Deoso ati ene ai abarabone‑ka awa bono‑ya mai kabaraboneni. Deoso‑ka sidadi‑ya mai sawiraboneni. Ai abarabone‑ka awa bono toha, Deoso‑ka sidadi toha na, tamine okanahanoneni.

²⁰Yama hani hidi ati,

“Hehe, kobo kanibote onaboneni.” Ati nene.

Ayo Yeso, fara amani. Kobo kanibote tinahi.

²¹Yeso‑ka yama ka‑kasoma dai‑ya sawiya, ya‑yai·onaboneni. Feye amani.