FIRIBO

Firibo mai‑ka yama hani

¹I‑di Baoro ama·oni. I‑di Timoti oda fama Yeso Kirisito‑ya na‑narifa oda amani. Firibo‑ya dai wi‑wina Deoso‑ka dai toha, Yeso Kirisito dai‑ya sa‑sawi, Yeso‑ka mai dai kanawato, mai tase dai toha, dai na, oka yama hani dai kadikiyahi.

²Ai‑ka Abi i‑di Deoso, ai‑ka Ayo i‑di Yeso Kirisito ne, dai‑ya mai kasoma, dai atibodi ati dai‑ya soma teni.

Deoso‑ya mai tamine‑ya Baoro hiyarane.

³Dai tamine‑ya owatibodi kadika, dai tamine‑ya Deoso‑ya ohiyarateni.

“Abi Deoso, mai ihi ya‑yai·oneni.” Oteni.

⁴Deoso‑ya dai tamine ohiyari dama, Deoso dai‑ya kasomebona ona, ya‑yai·oneni.

⁵Deoso ati ohiyara, owa‑ya dai kasomateni. Hibati‑ya Deoso Ati Amosabote dai miti baha, owa‑ya dai kasomamaro, owa‑ya dai kasomanasa teni. Dai ene ya‑yai·oneni.

⁶Deoso ene Yeso ati dai nofawahamaro, Deoso ene dai ene amosateboneni. Yeso Kirisito kameya, Deoso ene neme‑ya dai sawiwahabone, dai‑ya owatibodi watoneni.

⁷“Dai onofa, sibarineni.” Owatibodi ati na,

owatibodi dai‑ya foyateni. Deoso Ati Amosabote okamina, owa dai kasoma, kadeya‑ya ofoya, owa‑ya dai kasoma, fara owa manakone kote dai kayafahareboneni.

⁸Deoso owatibodi ati‑ya wato, Yeso Kirisito dai‑ya nofi nafi‑nima dai onofi nafini. Dai‑ya owatibodi foyani.

⁹Deoso‑ya dai tamine ohiyara,

“Abi Deoso, tiwati ihi mai ibi nofi ba‑basi nahi. Tiwati nafi‑ya mai watowaha, yama tiwatibodi kobohina‑nima mai atibodi koboniyahi.” Oteni.

¹⁰Yama Deoso atibodi kobohina‑nima dai atibodi koboniya, dai ene amosaboneni. Yeso Kirisito kameya, dai‑ya weeterebonane.

“Dai ene amosini.” Ati neya,

dai ya‑yainaboneni.

¹¹Hibayata Yeso dai‑ya sawi, mahi‑nima dai ene amosi ba‑basi, mahi‑nima dai ene amosi ba‑basi niya, dai ene‑ya mai awiya, Deoso‑ya mai kahiyara,

“Deoso amosabote amane.” Mai ati nawahaboneni.

Kirisito tamine‑ya sodado mai nafi mita

¹²Oka soho dai toha, yama‑ya dai watowahabone, dai‑ka yama hani‑bone okanahanaboneni. Kadeya‑ya owa‑ya mai nawaa, mai ihi Kirisito tamine‑ya mai one mitawahineni. Owa‑ya mai nawaara‑mani, Yeso tamine‑ya sodado mai mitara neni. Owa‑ya mai nawaa, Yeso Ati Amosabote‑ya mai‑ya okaminineni.

¹³Yeso ati okadabe ene kadeya‑ya owa‑ya mai nawaani. Fara Yeso‑ka oha, owa‑ya Sodado mai wato, ahiyata‑ka owa‑ya mai wato nineni, mai nafi.

¹⁴Kadeya‑ya owaanasa oriya, ai‑ka soho mai habi kitaramaro, kadeya‑ya owaawahiya, mai habi kitawaha, Deoso ati‑ya mai kamina, mai habi siitorani.

¹⁵Mai one owa‑ya nofara, owa noko‑ya mai yorinabone, Kirisito ati‑ya mai kamina,

“I‑di Baoro yaweba awane.” Mai ati namoneni.

Mai one owa‑ya mai nofa, Kirisito ati‑ya mai kamineni, owa‑ya mai kasomabonehe.

¹⁶“Baoro, owati tikaminaboneni.” Deoso ati nemarine.

Kadeya‑ya owaa, Deoso ati okaminanasa onabone, owa‑ya mai wato, owa‑ya mai nofa, owa‑ya mai kasomabone, Deoso Ati Amosabote‑ya mai kaminaharineni.

¹⁷Owa‑ya mai nofara, owa ene‑ya mai ihi fiyakanabone mai atibodi ati na, Kirisito ati‑ya mai kamina,

“Kirisito ati oda kamina, kadeya‑ya Baoro wai, oda tamine‑ya miteya, yawabake amane.” Mai ati neni.

¹⁸Sibarini. Kirisito ati‑ya mai kamina, ya‑yai·oneni. Owa‑ya mai nofara Kirisito ati‑ya mai kamina, owa‑ya mai nofa Kirisito ati‑ya mai kamina, mai na, mai ihi ya‑yai·oneni.

¹⁹Deoso‑ya owa tamine‑ya dai hiyarahi, owa‑ya mai seekanabonehe. Yeso Kirisito‑ka Doni owa‑ya kasomeya, owa‑ya mai seekanaboneni.

²⁰Owa‑ya mai nanahabiya, sibarihi, owa‑ya mai nanahabi awiriya, sibarihi naboneni. Owati ihi Yeso ati‑ya mai nofawahaba awineni. Mai ihi owa habo siitoraboneni. Owa ene‑ya mai awiya, Kirisito ati‑ya mai nofabone owatibodi ati nofateni.

²¹Hasi·oniya, Kirisito ati‑nima onabone, Kirisito ati ohiyaramaboneni. O·abiya, owa manakone‑ya Deoso daanebonane.

²²Hasi·oniya, mai dama mai‑ya ohiyaramakeni. Owatibodi yama kobohina owato awirani.

²³Yama fama‑ya owatibodi kobonineni. Kirisito tabaro‑ya owatibodi wina, Kirisito tabaro wini amosi ba‑basi nibisane.

²⁴O·abara owatibodi nofaharine, Kirisito ati okaminamakebonehe. Dai ene o·abarabone, Kirisito tamine‑ya dai okanawatabone owatibodi ati nineni.

²⁵O·abarabone owatibodi watoneni. Dai‑ya osawimiya, dai ya‑yainaboneni. Kirisito dai nofi ba‑basi naboneni.

²⁶Dai‑ya osawima, owa koboni ene dai ya‑yainabone, Yeso Kirisito dai kahiyaraboneni.

²⁷Dai ene‑ya mai awa, Kirisito ene‑nima dai ene na‑ya mai awiyahi. Dai tabaro‑ya kobo·ona, kobo·orihi ona, dai tamine omitaboneni. Dai ibi nofiya, Kirisito‑ka yama ani‑ya dai nafi aniniya, mai one Deoso ati‑ya mai nofaboneni.

²⁸Dai‑ya mai kaka, dai habo siitoriyahi. Dai habo kitiya, dai sibaraboneni. Deoso‑ka dai toha, dai‑ya kasome‑ya mai watowahaboneni. Towebisa mai amani. Deoso ene mai abawahabone, hini mai‑ya mai watowahaboneni.

²⁹Kirisito‑ka dai amani, Yeso ati dai nofaro. Deoso dai‑ya nofe, Kirisito ati dai tokadabiya, dai‑ya mai nakomaboneni. Dai‑ya mai bisina, dai ya‑yainahi.

³⁰Owa‑nima dai nawahani. Kirisito ati ai hiyara, ai‑ya mai kakoteni. Owa‑ya mai kakomaro, owa‑ya mai kakonasa nineni. Owa‑ya mai kaka, mai dai awamaro, owa‑ya mai kakonasa na, mai tamine dai mitineni.

Kirisito hini‑ya kahiyarare, ai‑ya ai kahiyararihi

¹Kirisito‑ka dai toha, Kirisito dai‑ya kasome, dai ya‑yainabone, Yeso dai‑ya nofe, dai atibodi koma‑ya nasomawama tene. Deoso‑ka Doni dai‑ya sawi, dai ibi nofiya, dai owa atibodi kome, dai atibodi komahari nani.

²Owa dai ya‑yainihi. Dai one atibodi‑nima dai atibodi niya, dai ibi nofiya, yama‑ya mai ati nofa dai nofaharihi. Haa‑nima dai niya, owa ya‑yaini fawaraboneni.

³Dai ati dai kahiyarariyahi. Mai ati dai mita,

“Yama‑ya mai wato ba‑basi na, ai‑ta yama ai wato bi‑bidi nibisineni.” Dai atibodi ati nahi.

⁴Dai‑ka yama anini‑ya dai ohaririyahi. Yama‑ya mai anina, mai dai kasoma nahi.

⁵Yeso Kirisito atibodi ati‑nima dai atibodi ati nahi.

⁶Deoso‑nima Kirisito ne, Deoso‑ka yama‑ya kayawaterene.

⁷Hiniya hika yama nafi‑ya daane. Mai‑ya ai na‑narifa, ai‑nima Kirisito nawawahane.

⁸Ai noko‑nima Kirisito nokone. Deoso ati‑ya Kirisito tokadabe, Deoso ati ene abane, awa‑ya waaneri.

⁹Deoso ati nafi‑ya Kirisito tokadabe, Deoso hiwakamane neme‑ya.

“Mai one amosarani. Yeso‑ta amosabotebisa amane.” Deoso ati nematane.

¹⁰Neme‑ya wi‑wina‑ka mai toha, wami‑ya wi‑wina‑ka mai toha, wami bodi‑ya wi‑wina‑ka mai toha, mai na, Yeso noko‑kaya mai yobati‑kaya mai naha, mai moikanisa, mai ati yanana,

¹¹“Yeso Kirisito ai‑ka Hidi amatini.” Mai dami ati naboneni.

Ai‑ka Abi i‑di Deoso‑ya mai kahiyaraboneni.

¹²Hibati‑ya dai‑ya osawe, owati‑ya dai nofamaroni. Hibayata dai‑ya osawira, owati‑ya dai nofasa nahi. Owati abariyahi. Yama‑ya Deoso nofare‑ya yama dai nofahaririyahi. Dai habo siitoniya, ai‑ka Abi i‑di Deoso ati dai tokadabahi, yawarebonaha.

¹³Deoso dai‑ya sawi ene yama hinofa dai nofawaha, ati dai tokadabe, ya‑yainebonane.

¹⁴Dai ibi towe tonirihi, dai ibi ati wararihi, dai nahi.

¹⁵Haa‑nima dai niya, dai ene kabatata raboneni. Deoso bidi amosabote dai tohawahaboneni. Mai ihi amosara dai yakari‑ya mai wina, yama soki‑nima mai na, yama soki‑ya yama wahi ai awa‑nima dai‑ya mai awaboneni.

¹⁶Deoso ati dai nofa, mai ihi amosara mai dai hiyarahi.

“Yeso dai‑ya nofe, dai manakone‑ya nanahabemata, ati dai nofeya, dai abaraboneni.” Dai ati nahi.

Haa‑nima dai ene niya, Kirisito kamataseya, dai ene ya‑yai·ona, oka yama anini honita tohara owatowahaboneni.

¹⁷Hibayata o·aba yama sibaraboneni. Owa emene‑ya Deoso aweya, Deoso ati dai no‑nofa dai ene amosa na‑ya Deoso kayafe, ai ya‑yainamatahi.

¹⁸O·abiya, ya‑yai·onabone, owa eyehe dai ya‑yainahi.

Dai tabaro‑ya i‑di Bafodito oyosebone

¹⁹Ai‑ka Ayo, i‑di Yeso, ati sibareya, ai amoni fa‑famaraba niya, i‑di Timoti oyoseboneni. Dai tabaro‑ya i‑di Timoti oyose, kameya, dai tamine omita, ya‑yai·onaboneni.

²⁰Owa‑nima Timoti ne, dai‑ya nofi nafine. Mai one dai‑ya nofi bi‑bidi na, i‑di Timoti‑ta dai‑ya nofi nafine.

²¹Hini mai‑ka yama‑ya mai nokotonihe, Yeso Kirisito‑ka yama‑ya mai nokotonirani.

²²I‑di Timoti ene dai awemari, ene sibaremarine. Oka dao‑nima i‑di Timoti ne, oda fama, Deoso‑ka yama oda aninineni, Deoso Ati Amosabote mai watowahabonehe.

²³Owa tamine‑ya Sesa‑ka mai kadikiya, mai ati omitiya, i‑di Timoti oyosebani.

²⁴Owa tamine‑ya mai kadika, Deoso ene mai ati sibariya, dai tabaro‑ya okomakebone owatibodi ati nineni.

²⁵Hibayata owati ihi dai tabaro‑ya i‑di Bafodito tokomebonane. Yeso ati‑ya i‑di Bafodito nofane, yama‑ya ani·ona, i‑di Bafodito yama‑ya aninane. Sodado mai habi kiti‑nima i‑di Bafodito habo kitane. Owa‑ya Bafodito dai yosemarine, owa‑ya kasomebonaha.

²⁶Kiyane, tamine dai mitemari, dai‑ya ati foyane. Kitami tamine dai miti awisare awane.

²⁷Kiyani nafi, abi yanatonemarine. Deoso hikasome, kitamemarine. I‑di Bafodito‑ya kasome, owa‑ya kasomahari ne. I‑di Bafodito abe‑mana, owatibodi komene kiti neni. Kitame ene owatibodi kome bi‑bidi nibisamaroni.

²⁸Dai ya‑yainabone, dai‑ya i‑di Bafodito oyosebone owatibodi ati nineni. Bafodito tokomakiya, owatibodi kome bi‑bidi naboneni.

²⁹Bafodito dai tabaro‑ya koboneya, dai ya‑yainahi. Bafodito ene‑nima mai ihi na, mai dai nofi ba‑basi nahi.

³⁰Kirisito‑ka yama anini‑ya kite, abi yanatone, yama yaki‑ya dai wina owa dai kasomara, Bafodito‑ta owa‑ya kasomane.

Baoro ene‑mari tamine

¹Oka yama hani hawa tohi yananineni. Ai‑ka Ayo Yeso ati dai no‑nofa dai ya‑yainaboneni. Hibati‑ya mai tamine okanahanamaro, mai tamine okanahanomatasabone, yama dai watowahaboneni.

²Mai ihi amosara, dai‑ya mai daba, dai noko wadahi. Deoso‑ka dai tohabone, dai sowiri tati ataro‑ya mai wisinakosabone mai ati na. Yomahi towe‑nima mai nineni.

³Deoso ai atibodi‑ya namose ene Deoso‑ka ai tohateni. Ai abano wisina ene tohaterani. Deoso‑ka Doni ai‑ya sawi, Deoso‑ya ai kahiyara, Yeso Kirisito ene ai ene amosawamateni. Mai sowiri tati ataro wisina ihi mai‑ya mai kahiyara, ai ataro ene ai‑ya ai kahiyaraterani.

⁴Ai sowiri tati ataro wisini ene Deoso ati somawame‑mana, hibati‑ya Deoso owa‑ya ati somawame namatane. Owa sowiri tati ataro ene Deoso owa‑ya ati somawami awire, owa ene amosa ene Deoso ati somawame‑mana, hibati‑ya Deoso owa‑ya ati somawame namatane. Owa ene Deoso owa‑ya ati somawami awirane. Mai ihi amosa bi‑bidi, owa ene amosa na‑nafi namaroni.

⁵Wada yati oha, owa amoni 8 kani‑ya owa sowiri tati ataro‑ya mai wisinakosameteni. Oka idi yokana Isara·eo amane. I‑di Besami‑ka owa ama·oni. Oka idi mai nafi Yodeo mai tohateni. Mose‑ka yama hani ati‑nima oteni. Fariseo owa ama·oni. Mose‑ka yama hani oda nokotonihemaroni.

⁶Deoso ati okadabamone ona, Yeso ati‑ya mai no‑nofa mai bisi·onamaroni. Deoso ati mai nofaramone ona, mai bisi·onamaroni. Mose ati‑nima ai niya, ai sibarabone mai ati na, Mose ati‑nima onamaroni.

⁷Hibati‑ya owa ene amosa‑mone owatibodi ati namaro, owa manakone nafebone onamaroni. Kirisito ati onofawaha, owa ene‑maro amosara owatowaha, hibati‑ka manakone onofamara, Kirisito‑ka manakone onofabisaboneni.

⁸Yama anini manakone noko·onihemaro, yama anini manakone noko·onimateraboneni. Oka Ayo Yeso Kirisito noko·onibisa oneni. Hibati‑ka oka yama dama tohamaro, Kirisito ati onofa ene oka yama nafi fawanawahani. Sibarini. Yama one onofamaraboneni. Kirisito ati onofe ene yama one onofami awira, Kirisito‑ta owato ba‑basi nabonehe.

⁹Yeso Kirisito ati onofe ene Kirisito owa‑ya sawi, Deoso owa‑ya aweya, Kirisito ene amose‑ya awebonane. Mose ati kote ai tokadababone ai ati na, Deoso ai‑ya aweya, ai ene amosara‑ya awatene. Yeso Kirisito ati ai nofa, ai ene‑ya Deoso aware, Yeso ene amose hinama‑ya awabisatene.

¹⁰Yama bara‑ya owati koboni awirani. Yeso Kirisito‑nima onabone owatibodi ati nineni. Yeso‑ya mai bisi, owa‑ya mai bisi, Yeso‑ya mai nanahaba, owa‑ya mai nanahaba, sibarini. Yeso kitame‑nima okitamahareboneni.

¹¹Yama one okayahi awira, sibarini. Deoso owa‑ya nakitamebona onofabisaboneni.

Yeso ati ai nofa, Deoso tabaro‑ya ai winawahabone

¹²Yama nafi owato awisa ora, owa ene amosa hinama tohi awisara, Yeso‑ka oha, Yeso Kirisito‑nima onabone, fare‑ya owatibodi nokotonineni.

¹³Oka soho dai toha, owati dai mitahi. Yeso Kirisito‑nima tohasa ora. Hibati‑ka owa tamine okadikamara, yama onabone noko·onibisani.

¹⁴Owa koboni amosabone, oka hawi bono tati‑ya owakatomateni. Oka hawi bono tati‑ya kobo·oniya, Yeso Kirisito ene owa manakone‑ba Deoso daanebona, neme‑ya owa‑ya towakamebonane.

¹⁵Ai hawa toha‑nima dai na, owatibodi ati‑nima dai atibodi ati nahi. Owatibodi ati‑nima dai ni awiriya, Deoso dai‑ya kanawatobonane.

¹⁶Hibati‑ya Deoso ati ai tokadabamaro, Deoso ati ai tokadabasahi.

¹⁷Oka soho dai toha, owa ene‑nima dai ene nahi. Owa ene‑nima mai ihi na dai kakatoma, mai ihi‑nima dai ene naboneni.

¹⁸Hibati‑ya mai tamine dai‑ya ohiyaramaro, mai tamine ohiyaramatasa, mai tabiyo ohi·onani. Yeso ati‑ya mai ati nofa, ati mai hikadabarene. Yeso abe, mai manakone‑ya nanahabe‑ya mai nofara, mai ihi mai one Yeso ati‑ya mai nofaraboneni.

¹⁹Mai nabadi mai‑ka deoso tohe, ene madi mai tabori‑ya mai winaboneni. Mai ihi amosara tamine‑ya mai hiyara, mai ya‑yaiteni. Hibayata‑ka yama‑ya mai atibodi kadiki ohariteni.

²⁰Ai‑ta Deoso tabaro‑ya ai tabaro yokana toha, ai‑ka Ayo i‑di Yeso Kirisito ai manakone‑ya nanahabemata, ai nimane, neme‑ya kamebonane.

²¹Hibayata ai kitara, Yeso kameya, ai abano yati tohawahaboneni. Hini abano amosabote‑nima ai abano nawahaboneni. Yeso ene kite, yama nafi‑ya kayafebonane.

Haa‑nima dai nahi

¹Oka soho dai toha dai onofa, dai‑ya owati foya, dai ene ya‑yai·oneni. Dai tamine ohiyarateni. Owati dai kadika, Yeso dai‑ya sawi, Deoso ati dai tokadabiyahi.

²Efodiya, i‑di Sitiki, dai fama owati dai mitahi. Yeso ati dai nofa, dai ibi nofa, dai ibi weeriyahi.

³Oka owa amatini. Mai fanawi tikasomahi, mai ibi nofabonehe. Yeso ati okamina, owa‑ya mai daba, yama‑ya mai anini kitamaroni. I‑di Keremete mai nafi owa‑ya mai daba, neme‑ka yama hani‑ya mai oni‑ya Deoso kanahanomatane. Mai abaterabone, Deoso tabaro‑ya mai winabisaboneni.

⁴Ai‑ka Ayo i‑di Yeso dai‑ya sawi, dai ya‑yainahi. Owati dai mitamake, dai ya‑yaini fawariyahi.

⁵Dai‑ya mai weena, dai ati yawariyahi. Yeso kama kanibote nebonane.

⁶Yama awi amosara ihi dai korikasariyahi. Yama hini dai atibodi kobohinaya, Deoso‑ya dai haana, Deoso dai kahiyara, dai ya‑yai dai nahi.

⁷Deoso ene ai atibodi ai‑ya ati somi ba‑basi naboneni. Mai one atibodi ati somiya, oda atibodi ati somi fiyakani nafe, oda atibodi ati somi‑ya mai watora, Yeso Kirisito ene ai atibodi nawade, amosa‑ya nofaboneni.

⁸Oka soho dai toha, owati dai mitahi. Owati fawani yanatoni. Yama amosa toha, mai ati amosa, mai ihi amosa toha na, mai tamine‑ya dai atibodi kadikabisahi. Dai‑ya mai kasoma, mai one‑ya mai kasoma na, mai ihi amosa, mai‑ya mai atibodi kahiyara, mai ihi amosi ba‑basi na, mai tamine dai kadika nahi.

⁹Dai‑ya okanawatamaro, owa ene dai awa, Owati dai mita namaro, fara owa ene‑nima dai ene nahi. Deoso dai‑ya sawibona, dai atibodi ati somabone, dai‑ya weeraboneni.

Oka yama‑bone dai daana, ya‑yai·oneni

¹⁰Ai‑ka Hidi ene owa‑ya dai kasomamaro, owa‑ya dai kasomamatasa, dai ene ya‑yai·oneni. Owa kasomamaki dai nofamaro owa kasomi‑ya dai watora. Hibayata owa‑ya dai kasomamatasa, ya‑yai·oneni.

¹¹Hibati‑ya owa‑ya dai kasomariya, yama sibarihi namaroni. Mahi dami‑ya owatibodi ati somateni.

¹²Oka yamata tosiyoya, kori·okasara, ya‑yai·ona, oka yamata dama, ya‑yai·onahariteni. Ofime, kori·okasara, korima·oniya, ya‑yai·ona oteni. Mahi‑nima owatibodi ati somateni.

¹³Yeso Kirisito kite ene owa kiti toha, Yeso ene yama anini dami owatowahineni.

¹⁴Owa‑ya dai kasoma, yinero‑ya dai daana, dai ene amosini.

¹⁵Hibati‑ya dai‑ya Deoso tamine ohiyari baha, owa dai kasoma, mai one owa‑ya kasomi awirani. Dai‑ta owa‑ya dai kasomabisa, Masedoni‑kaya yana·ona, oka yinero‑bona‑ya dai daanamaroni. Mai one yinero‑ya daaterani. Dai‑ta yinero‑ya dai daanibisineni.

¹⁶Tesaronika‑ya owina, oka yama tosiya ona, yinero‑bona‑ya dai daani famamaroni.

¹⁷Yinero noko·oni awirini. Dai ene amosa oawa, ya‑yai·oteni. Dai ene dai manakone ba‑basi na‑ya Deoso daanebonane.

¹⁸Oka yinero‑bona dai daaneya, i‑di Bafodito kakame ene oka yama damawahineni. Deoso‑ka yama‑bone‑ya ai daana, Deoso ya‑yaitene. Deoso‑ka yinero‑bona‑ya owa‑ya dai daana, dai ene Deoso ya‑yainebonane.

¹⁹Neme‑ya Deoso‑ka yama tosiyotera, Yeso Kirisito ai‑ya sawi, ai‑ya yama daani‑ya nofe, ati ai nofe, ai‑ka yama‑bone‑ya daanebonane.

²⁰“Ai‑ka Abi i‑di Deoso amosabote amane.” Ai ati na.

Ai ati fawariyahi. Neme‑ya ai kobona,

“Ai‑ka Abi i‑di Deoso amosabote amane.” Ai ati nabone,

Hini ai ati tohabone, ai ati tohahi.

Dai‑ya oda atibodi foyani

²¹Yeso Kirisito ati‑ya mai no‑nofa, mai‑ya owa tamine dai hiyarahi. Owa‑ya mai sa‑sawi, dai‑ya mai ati foyani.

²²Yeso ati‑ya mai no‑nofa Sesa‑ka yobe‑ya mai wi‑wina, dai‑ya mai nofa, dai tamine‑ya mai hiyarani.

²³Yeso Kirisito ai‑ka Ayo dai atibodi‑ya dai‑ya kasomebonane. Feye amani.