MAROKO

Maroko ati

¹Yeso Kirisito tamine amosabote amane. Yeso Kirisito, i‑di Deoso Bidi tamine okanahanaboneni.

²Hibati‑ya yama kobonabone tamine‑ya i‑di Isa·iya kanahanomatane.

“Owati timitahi. Oka yo‑yose bofe‑ke oyoseboneni, tiwa hawine‑bone‑ya hawa tonihibonaha.

³Fare bofe‑ke mai‑ka owa kabani‑kaya ati yananeya,

‘Ai‑ka Hidi webote hawine‑bona dai namosahi.’ Ati nebonane.” Deoso ati ne, ati‑ya i‑di Isa·iya kanahanomatane.

⁴Isa·iya ati‑mata‑nima Yowaho Batita koboni dai tohe, kabani‑kaya mai‑ya hiyare,

“Dai atibodi yama‑ya kadikiya, eya dai atibodi ati nahi.

‘Deoso, oda ene amosaramaro, oda tikasomahi, oda ene amosawamabonehe.’ Dai ati nahi.

Eya dai atibodi ati niya, Deoso dai ene manakone‑ya haanamarebona, dai‑ya haba·onirisaboneni.” Yowaho Batita ati ne, ati damemarine.

⁵Yodeya‑ya mai wi‑wina mai tokomaki, Yerosare‑ya mai wi‑wina mai tokomaki na, i‑di Yowaho Batita‑ya mai tokomakemaroni.

“Owa ene towe amani.” Mai ati na,

Yodaho Faha‑ya i‑di Yowaho Batita mai‑ya habanirisemarine.

⁶Kamero kone wamani‑ya Yowaho Batita weye, bani ataro wamani‑ya dosi‑ya sokinaki nemarine. Yowaho Batita yamata‑ya kihare, ti‑tiri mai‑ya kaba, mo‑mona mai fahi‑ya fawa nemarine.

⁷Yowaho Batita eya ati ne,

“Ai owa kamakibona, kitabotebisa amane. Owa‑ta towebisa ama·oni. Amosabotebisa amane.

⁸Faha‑ya dai‑ya haba·onirisa, ai owa koboneya, ati ene Deoso‑ka Doni dai one‑ya sawiwahebonane.” Yowaho Batita ati ne, ati damemarine.

⁹Yowaho Batita mai‑ya hiyareya, Yeso kamakimarine. Nasare Karireya‑kaya yanane, kamaki, Yodaho Faha‑ya Yeso‑ya i‑di Yowaho Batita habanirisemarine.

¹⁰Faha‑ya Yeso habanise, waamisame, neme seekana, Deoso‑ka Doni kisemarine, Yeso‑ya. Wayomata awi‑nima Deoso‑ka Doni awinemarine.

¹¹Neme‑ya ati kaki,

“Oka Dao amatini. Tiwa onofi nafineni. Tiwa ene amosa ene ya‑yai·oneni.” Ati nemarine.

Kabani‑ya Yeso tokane

¹²Deoso‑ka Doni ati ene kabani‑ya Yeso tokawahemarine.

¹³Kabani‑ya Yeso winawahe, amoni 40 kane bani kabani‑ka mai‑ya dabematane. Satanasi Yeso‑ya hiyarematane, Deoso ati‑ya tokadabamarebonaha. Deoso‑ka yo‑yose Yeso‑ya mai kasomameteni.

Yeso hika mai da‑daba‑bone mai‑ya himane

¹⁴Yowaho Batita‑ya sodado mai wata, kadeya‑ya mai hinafoyemarine. Fare nowati‑ya Karireya‑kaya Yeso tokomatasemarine. Deoso ati amosabote‑ya Yeso kaminemarine.

¹⁵Yeso mai‑ya hiyare,

“Deoso ai nafi‑ka hidi kitabote tohawahebonane. Dai ene towe‑ya dai nofamariyahi. Deoso ati amosabote ati dai nofahi.” Yeso ati ne, ati damemarine.

¹⁶Karireya‑ka wara webote widi‑ya Yeso tokobase, Simaho, sohori i‑di Anidere‑ya fame, hedi‑ya mai kerokana, mai‑ya Yeso awematane. Fara aba mai‑ya mai na‑nawasi mai tohamaroni.

¹⁷Yeso mai‑ya himane,

“Hima, owa‑ya dai dabahi. Owa tamine dai hiyarawahaboneni. Hibati‑ya aba mai‑ya dai nawasiteni. Hibayata owati‑ya mai nofabone mai‑ya dai sibanaboneni.” Yeso ati nematane.

¹⁸Yeso ati‑ya mai mita, mai‑ka hedi towitakosa, Yeso‑ya mai dabawahameteni.

¹⁹Mai toka, i‑di Tiyako, sohori i‑di Yowaho‑ya fame‑ya Yeso awematane. Mai‑ka abi i‑di Sebedeo‑ya mai daba, kanawa dori‑ya mai mookana, mai‑ka hedi‑ya mai awawamameteni.

²⁰Yeso mai‑ya awe, mai‑ya himanamakitase, mai‑ka abi‑ka yama‑ya mai a‑ani mai eyehe tofoyakose, bidi‑ta Yeso‑ya mai dabameteni.

Kafanaho‑ya mai toka

²¹Kafanaho‑ya mai toka, sabado‑ya Deoso‑ya mai hi‑hiyara‑ke yobe‑ya Yeso tokiyome, mai‑ya kanawatomarine.

²²Yeso ati‑ya mai mita,

“Se! Yeso yama hani ati‑ya wato nafine. Mose‑ka yama hani ati‑ya mai ka‑kamina haa‑nima mai ati ni awirani. Yama hani hidi ati‑nima Yeso ati nibisane.” Mai atibodi ati namaroni.

²³Deoso‑ya mai hi‑hiyara‑ke yobe‑ya maki madi towe foye‑ke sawi, Yeso‑ya haane,

²⁴“Yeso Nasare‑ke hini yamata‑nima tinaba? Oda‑ya bisitiriyahi. Tiwa owatoni. Deoso‑ka amosabote amatini.” Madi towe ati nemarine.

²⁵“Tiwati fawanahi. Maki‑ya tifoyamariyahi.” Yeso madi towe‑ya weene, ati nemarine.

²⁶Madi towe ene maki yehe, teme ne, weokanemarine. Madi towe ati kite, toke, maki amosawamemarine.

²⁷Yeso ene‑ya mai awa, mai atibodi yama‑ya kadika, mai ibi hiyara,

“Se! Hibati‑ya haa‑nima ai ene na ai awaterani. Hini yamata ihi Yeso ati kite, ati‑ya madi towe mai tokadabateni.” Mai ati namaroni.

²⁸Yeso tamine‑ya mai kaminamaroni. Karireya‑ka tabora dami‑ya Yeso ene tamine‑ya mai mitamaroni.

Simaho‑ka yobe‑ya mai toka

²⁹I‑di Yeso, i‑di Simaho, i‑di Anidere, i‑di Tiyako, i‑di Yowaho mai na, Deoso‑ya mai hi‑hiyara‑ke yobe doro‑ya mai yanana, i‑di Simaho, i‑di Anidere mai‑ka yobe doro‑ya mai tokiyamameteni.

³⁰Simaho‑ka koma kiyana, hiwe nafe, kawina tamine‑ya mai kaminameteni.

³¹Simaho‑ka koma yahi‑ya Yeso waratokane, hiidimisameteni. Simaho‑ka koma kitama, hiwe fawana, mai tafe‑bone‑ya awawahameteni.

³²Yama soki yanatoni‑ya mai kiyana mai toha, madi towe mai sawi‑ka mai toha na, Yeso‑ya mai mai hiwakamamaroni.

³³Tabora‑ka Yeso‑ya mai nafi kamake, yobe‑ka nokobi‑ya mai nahamaroni.

³⁴Yeso mai‑ya awe, mai kiyana mai dami‑ya nakitamemarine. Madi towe Yeso‑ya mai wata, Yeso tamine‑ya mai kaminabone, Yeso ati ene madi towe mai ati yanara, mai kananineni.

Kabani‑ya Deoso‑ya Yeso hiyare

³⁵Yama wahi yanatoni‑ya kabani‑ya Yeso tokematane, Deoso‑ya hiyarebonaha.

³⁶I‑di Simaho hika mai eyehe Yeso‑ya sibanematane.

³⁷Yeso‑ya mai wasiwama, Yeso‑ya mai hiyara,

“Tiwa oda sibana, mai nafi tiwa‑ya sibanani.” Mai ati nameteni.

³⁸Yeso ati yanane,

“Hima, tabora one‑ya ai tokahi, Deoso ati‑ya mai one‑ya okaminamakitasaboneni. Mai tabori dami‑ya Deoso ati ohiyarabone okamaroni.” Yeso ati nematane.

³⁹Karireya‑kaya tabora dami‑ya Yeso tokawahe, Deoso‑ya mai hi‑hiyara‑ke yobe dami‑ya Deoso ati‑ya Yeso hiyare, madi towe mai‑ya kananiwahemarine.

Mese towe tohe

⁴⁰Mese towe tohe kaki, Yeso noko‑ya yobati‑kaya waaki, Yeso‑ya hiyare,

“Haa‑nima ai‑na ai kasomi tiwata, owa kasomi tinofakarini?” Ati nemarine.

⁴¹Yeso maki‑ya nofe, fai‑ya boyone, ati yanane,

“Onofini, tiwa mese amosawamahi.” Yeso ati nemarine.

⁴²Hika yama kome fawanawaha, mese amosawamemarine.

⁴³Maki‑ya Yeso yose kanibote ne,

“Owati timitahi.

⁴⁴Owa ene mai‑ya tihiyarariyahi. Hiniya Deoso‑ka yama‑bone‑ya mai da‑daa mai‑ya tikahi. Mose‑ka yama hani ati‑nima yama daatiniya, tikitama, tiwa‑ya mai watowahaboneni.” Yeso ati nemarine.

⁴⁵Yeso ati‑ya maki tokadabare, mai nafi‑ya Yeso ene tamine‑ya hiyaremarine. Mai dama mai ihi yama tehe‑ya tabora webote‑ya Yeso tokomaremarine. Kabani‑kaya Yeso waabisemarine. Tabora dami‑ka Yeso‑ya mai towamakemaroni, kabani‑kaya.

Maki yakare tamine

¹Mahi fa‑famaraba ne‑ya Kafanaho‑ya Yeso kamatase, koboname tamine‑ya mai mita,

“Yeso, hini tabaro‑ya sawimatasematane.” Mai ati nameteni.

²Mai dama mai yorotokana, mai ihi yobe kibe, nokobi‑ya mai one dama naha, Deoso ati‑ya Yeso mai‑ya kaminemarine.

³Maki ka‑kakone mai hiwakame, awa‑ya bora dasikana‑ya maki foriya, mai 4 kana mai diwakanamaroni.

⁴Mai kamake, yobe doro kibe ene nokobi‑ya mai tokiyomara, yobe tati mese‑kaya mai hiwakimise, yobe tati mese‑ya mai seekana, yobe tati mese hodone‑ya maki‑ya mai kanakisamaroni.

⁵Mai ihi‑ya Yeso awe, “Owati‑ya mai nofineni.” Yeso atibodi ati ne, ka‑kakone‑ya hiyare,

“Soho, tiwa ene towe manakone wadamarini.” Yeso ati nemarine.

⁶Mose‑ka yama hani ati‑ya mai ka‑kamina Yeso ati‑ya mai mita mai yawawahamaroni.

⁷“Ai ati ene ai owa ene manakone fawatere, Deoso hini ati ene ai ene manakone fawateni. Maki ene towe manakone wadamaremona Yeso ati ne,

‘Deoso‑nima ona ama·oni.’ Yeso ati ne awane.

Hini ati ene abaho.” Mai atibodi ati namaroni.

⁸Mai atibodi ati‑ya Yeso wato, ati yanane,

“Hini yamata‑bone owa‑ya dai atibodi weeniti?

⁹Bofe‑ka mai ati ihi ai ene towe manakone fawarihi, bofe‑ka mai ati ihi ai owa kitamarihi tene.

¹⁰Owati ihi ai owa ene towe manakone wadamare, dai awaboneni.” Yeso ati nemarine.

Maki kiyane‑ya hiyare,

¹¹“Owati timitahi. Tiwaamisahi. Tika fo‑fori‑ka yama diwatikaniya, tikamahi, tika yobe‑ya.” Yeso ati nemarine.

¹²Waamise, hika fo‑fori‑ka yama‑ya damane, mai dama mai noki‑ya tokome, mai hiwakatomemarine. Mai nafi atibodi yama‑ya kadika, Deoso‑ya mai kahiyara,

“Deoso ene amosane. Hibati‑ya haa‑nima ai ene na ai awaterani.” Mai ati namaroni.

Yeso Refi‑ya himane

¹³Faha widi‑ya Yeso tokomatase, mai nafi tokomake, mai‑ya Yeso kanawatomarine.

¹⁴I‑di Refi i‑di Aofio bidi amane. Yeso yakane, kiinawame, kofeno‑ka yobe bidi‑ya i‑di Refi itariya, Yeso awe, Refi‑ya himane,

“Owa‑ya tisawihi.” Yeso ati ne,

Refi waamise, Yeso‑ya sawiwahemarine.

¹⁵Yeso hika mai da‑daba mai eyehe i‑di Refi‑ka yobe‑ya mai tokamaroni. Kofeno‑ka yinero‑bona‑ya mai ha‑haa mai dama, mai ihi amosara mai dama, mai na, Yeso‑ya mai tokomake, Refi‑ka yobe‑ya mai nafi marinamaroni.

Yeso fariseo mai‑ya hiyare

¹⁶Mose‑ka yama hani ati‑ya mai ka‑kamina mai one fariseo mai toha, Yeso marine‑ya mai awa, Yeso‑ya mai da‑daba mai‑ya mai hiyaramaroni.

“Hini yamata‑bone towe mai eyehe Yeso tafati? Kofeno‑ka yinero‑bona‑ya mai ha‑haa mai eyehe oda tafarihi, mai ihi amosara mai eyehe oda tafarihi, oda teni.” Mai ati namaroni.

¹⁷Mai ati‑ya Yeso mite, ati yanane,

“Mai kiyara mediko mai‑ya kasomaterene. Mai kiyana‑ta mediko mai‑ya kasomatene. Mai ihi amosamone mai ati na mai hima·orani. Mai ihi amosara mai hima·onabone ihi okemaroni.” Yeso ati nemarine.

¹⁸Yowaho‑ya mai da‑daba Deoso‑ya mai kahiyarabone, mai tafarihi, fariseo mai‑ya mai da‑daba mai tafaharirihi namaroni. Fara ihi Yeso‑ya mai one hiyara,

“Yowaho‑ya mai da‑daba mahi owa‑ya mai tafara, fariseo mai‑ya mai da‑daba mahi owa‑ya mai tafaharirani. Haa‑nima mai ihi na damateni. Tiwa‑ya mai da‑daba mai tafi fawaterani.” Mai ati namaroni.

¹⁹Yeso mai‑ya hiyare,

“Mai‑ka owa fanebona sawi ene mai ya‑yaina, mai tafi fawarani. Maki fanebona sawi ene mai tafi fawarani.

²⁰Yama one‑kaya maki mai hiwakebona, tabora bara‑ya tokeya, mai tonokosa, yawa ihi mai tafi fawanaboneni.” Yeso ati nemarine.

²¹2:20-22 Ai ya‑yaina ai tafi fawarani. Yama bote‑ya yama yati dabara‑nima ai na, ai ya‑yainiya, ai tafi fawarani.“Ai‑ka bora bote hodeya, bora ibe yati ai nawaana, bora ai sokonawaha, bora ibe yati bi‑bidi nawama ihi bora bote nafi sibitonaboneni. Haa‑nima yama na towe tohateni.

²²Bani ataro wamani yama wiye toha, wamani yatiya, fino yati ai soronisiya, wiye taokiterani. Yama wiye bote‑ya fino yati ai soronisaterani. Yama wiye bote‑ya fino yati ai soronisiya, taokana, yama wiye aba, fino abateni. Fino yati wiye yati‑ya ai soronibisateni.” Yeso ati nemarine.

Ai‑ka Ayo sabado hidi

²³Sabado one‑ya mai yakana, fadara bai‑ya mai tokofaramiya, Yeso‑ya mai da‑daba tiriko tati‑ya mai bakakasamaroni, tiriko‑ya mai kababonehe.

²⁴Mai ihi‑ya fariseo mai awa, Yeso‑ya mai hiyara,

“Hini yamata‑bone tiwa‑ya mai da‑daba tiriko tati‑ya mai bakakasiti? Sabado‑ya yama‑ya mai anina.” Fariseo mai ati namaroni.

^25-262:25-26 Dafi hika mai eyehe Deoso‑ka yama‑bone‑ya mai da‑daa mai one mai tohi awirametemoneni. Deoso‑ka baho‑ya mai kaba, Deoso yawi awirematamonane.Yeso ati yanane,

“Dafi tamine dai kadikaterini? Abiata, Deoso‑ka yama‑bone‑ya mai da‑daa mai‑ka hidi webote tohemataya; Dafi, hika mai eyehe toke, mai fimi nafemetemoneni. Deoso‑ka yobe‑ya Dafi tokiyome, Deoso‑ka baho‑ya idi, baho‑ya mai kabametemoneni. Deoso‑ka yama hani ati ihi Deoso‑ka baho‑ya mai one kabaterani. Deoso‑ka yama‑bone‑ya mai da‑daa mai hikababisateni.” Yeso ati nemarine.

²⁷2:27 Feriado‑ya yama‑ya mai anirani. Domiko, nataho, semana sahata na‑ya yara mai anira, feriado ihi.Yeso ati yananamatase,

“Deoso ai‑ya wamani dai tohe, makobote ati ene sabado feriado tohawahametemoneni. Feriado‑ya Deoso wamanematamonane, ai‑ya kasomebonaha.

²⁸2:28 Dai‑ka Ayo neme‑ke Yeso ati ne, hini tamine‑ya hiyarematane.Dai‑ka Ayo neme‑ke sabado hidi amane.” Yeso ati nemarine.

Maki yehe moikaname

¹Deoso‑ya mai hi‑hiyara‑ke yobe‑ya Yeso tokiyome, maki yehe moikaname itari‑ya Yeso awemarine.

²Yeso‑ya mai ka‑kako Yeso‑ya mai kakatomamaroni.

“Maki‑ya nakitameba awane. Sabado‑ya hinakitameya, ai weenebonane.” Mai atibodi ati namaroni.

³Maki‑ya Yeso hiyare,

“Tiwaamisiya, oda teberi‑ya tiwaahi.” Yeso ati ne,

maki kamemarine.

⁴Yeso mai‑ya hiyare,

“Eme Mose‑ka yama hani ati titi? Sabado‑ya ai owa ai nakitama, ai ati kasiramone dai ati na awini. Sabado‑ya ai owa ai nanahababisa, ai sibabisaramone dai ati na awini. Dai ati yananahi.” Yeso ati ne,

ati‑ya mai mita, mai ati yananami awiramaroni.

⁵Fariseo mai atibodi ati amosara, mai atibodi ati‑ya Yeso mite, yawe, mai nafi hiwakatome, maki‑ya hiyare,

“Tiwa yehe feotokanahi.” Yeso ati ne,

Yehe feotokaname, yehe amosawamemarine.

⁶Yeso ene‑ya fariseo mai awa, mai yawi kita, i‑di Erodi‑ka mai one‑ya mai hiyarabone mai tokamaroni, Yeso‑ya mai nanahababonehe.

Mai dama mai‑ya Yeso kanawato

⁷Yeso hika mai da‑daba mai eyehe Karireya‑ka faha widi‑ya mai tokamaroni. Karireya‑ka mai toha, Yodeya‑ka mai toha,

⁸Yerosare‑ka mai toha, Idomeya‑ka mai toha, Yodaho Faha kowani‑ka mai toha, Tiro‑ka mai toha, Sidoho‑ka mai toha, mai na, Yeso ene kite tamine‑ya mai mita, mai dama mai tokomakemaroni.

⁹Yeso hika mai‑ya yose,

“Kanawa dai kakamahi. Mai dama mai ihi yama howatokani awirini. Kanawa dori‑ya ofoyiya, mai ohiyaraboneni.” Yeso ati nemarine.

¹⁰Mai kiyana mai dama Yeso‑ya mai boyona, mai kitamamaroni. Mai kiyana mai dama mai kamakitasa, mai one‑ya mai keweni kita, Yeso‑ya mai boyonabonehe.

¹¹Madi towe ai one‑ya mai foya, Yeso‑ya mai awa, madi mai ihi mai baki‑kaya mai wiya, mai ati yanana,

“Deoso Bidi amatini.” Mai ati na, mai ati damamaroni.

¹²Madi towe mai ati‑ya Yeso mite, ati yanane, ati kite,

“Owa tamine dai kaminariyahi.” Yeso ati ne,

ati damaharimarine, madi mai‑ya hiyareri.

Mai 12 kana mai‑ya Yeso kadike

¹³Adami webote‑ya Yeso tokomorose, hika mai‑bone mai‑ya haane, mai tokomakemaroni.

¹⁴Mai 12 kana mai‑ya Yeso kadike, fai‑ya mai dababone, Deoso ati‑ya mai kaminabonehe.

“Oka yo‑yose mai amani.” Yeso ati nemarine.

¹⁵Yeso ati ene madi towe mai‑ya mai kananiheboneni.

¹⁶Mai‑ya kadike, mai oni‑ya haanawahemarine. I‑di Simaho tohe, Yeso ati ene Simaho oni Bedoro tohawahemarine.

¹⁷Sebedeo bidi i‑di Tiyako, sohori i‑di Yowaho‑ya fama ne mai‑ya kadike, mai oni yati‑bone‑ya Yeso haanemarine. Mai oni yati Boanerekesi toha, ai ati‑ya Bahi ati‑nima dai nineni.

¹⁸I‑di Anidere, i‑di Firibi, i‑di Batoromeho, i‑di Mateo, i‑di Tome, Aofio bidi i‑di Tiyako, i‑di Tadeo, i‑di Simaho Seroti,

¹⁹i‑di Yoda Isikari·oti, mai na, mai‑ya Yeso kadikemarine. Yoda Isikari·oti i‑di Yeso‑ya kahabanawahemarine.

Beosibo Yeso‑ya foyemona

²⁰Mai wini‑ke yobe‑ya Yeso tokomatase, mai dama mai kobonamake, mai tafabone, yobe kibe ene mai tafi awiramaroni.

²¹Yeso madi, Yeso sohori mai toha na, fai tamine‑ya mai mita, mai kamakemaroni, Yeso‑ya mai towakamabonehe.

“Mai dama mai ihi Yeso tafare, yama‑ya watomare awane.” Mai ati namaroni.

²²Mose‑ka yama hani ati‑ya mai ka‑kamina Yerosare‑ya mai wi‑wina mai one kamake, Yeso tamine‑ya mai hiyara, mai ati yanana,

“Madi towe mai‑ka hidi, i‑di Beosibo Yeso‑ya foyane, madi mai‑ka hidi ati ene mai one‑ya Yeso kananihi, awane.” Mose‑ka yama hani ati‑ya mai ka‑kamina mai ati namaroni.

²³Yeso mai‑ya kanawatobona mai‑ya himane, mai‑ya hiyare,

“‘Satanasi ene madi towe kananane.’ Dai ati na,

Satanasi hini hika‑ya kananiterene.

²⁴Hidi webote hika mai dama mai ibi bisiniya, hidi webote kiti fawanebonane.

²⁵Tabora ohare‑ka mai ibi toka toweya, mai nafi awimaraboneni.

²⁶Satanasi‑ka mai ibi bisina‑mani, kiti fawane nane. Satanasi hini hika‑ya kananiterene.

²⁷3:27 Satanasi tamine amane. Satanasi‑ya Yeso wati hawa toheya, madi mai‑ya Yeso kananine.Ai owa kite hini tabaro‑ya wai, yehe honene mai hiyabaterene. Ai owa kite‑ya wati dai toheya, yehe yadihikaneya, yehe honene hiyabatene.

²⁸Owati dai mitahi. Dai ene towe dama toha, dai ati towe dama toha na, makobote Deoso ati dai nofawahiya, dai ene manakone Deoso haanamaterebonane.

²⁹Deoso‑ka Doni‑ya mai weena, mai ihi manakone wadabisateni. Mai ihi manakone fawateraboneni.” Yeso ati nemarine.

³⁰Hibati‑ya mai one haa‑nima ati na,

“Madi towe Yeso‑ya foye awane.” Mai one ati na,

mai ati‑ya Yeso mite, mai ihi manakone fawaterabone tamine‑ya hiyaremarine.

Yeso madi, sohori mai na mai kamake

³¹Yeso madi, Yeso sohori mai na, mai kamake, yobe‑kaya mai tokiyomara, nokobi‑ya mai naha, mai‑ya mai hiyara,

“Yeso dai haanahi, oda tokomabonehe.” Mai ati namaroni.

³²Mai dama Yeso yowi‑ya mai naha, mai ati yanana,

“Yeso, tika ami, tika soho mai eyehe kobona, tiwa‑ya mai haana, yobe fowari‑ya mai nahani.” Mai ati namaroni.

³³Yeso ati yanane,

“Ebeni‑ka oka soho mai toha, ebeni‑ka oka ami tohaniti? Fara oka soho mai dama, oka ami mai damateni.” Yeso ati nemarine.

³⁴Yeso yowi‑ya mai naha, mai‑ya Yeso kiikawame, mai‑ya hiyaramatase,

“Okomi, oka soho dai nineni.

³⁵Deoso ati‑nima mai niya, okomi mai toha, oka soho mai toha, oka asima mai toha, mai nineni.” Yeso ati nemarine.

Yamata noki‑ya werene

¹Karireya‑ka wara webote widi‑ya Yeso tokomatase, mai‑ya kanawatomatasemarine. Mai dama mai yorotokana, mai dama mai ihi kanawa‑ya Yeso foye, itari, mai dama faha widi‑ya mai nahobasamaroni.

²Yeso mai‑ya kanawatobona Deoso tamine‑ya mai‑ya hiyare,

³4:3 Tiriko noki‑ya mai kamabone, wami mese‑ya mai wereteni.“Owati dai mitahi. Ai owa yamata noki‑ya werene,

⁴hawi fowari‑ya noki one sona, bani bidi mai hikabani.

⁵Yamata noki one yati dama iti‑kaya sona, yati mese‑ya wami si‑sifina fore ihi noki yana kanibote na,

⁶yati ihi habi tokara, mahi hewene ene wayatokana, fahi wadamara, abani.

⁷Atiwa mete‑ya yamata noki one sona, atiwa ene yamata yani amosara, bonorani.

⁸Bodo‑ya yamata noki one sona, yana, dodama, ade ohare‑ya boni 30 toha, ade one‑ya boni 60 toha, ade one‑ya boni 100 toha nani.

⁹Owati dai mita, owati dai tokadabahi.” Yeso ati nemarine.

¹⁰Mai dama mai toka, mai nowati‑ya Yeso‑ka mai 12 kana, Yeso‑ya mai da‑daba mai one toha na, mai ati yanana,

“Tiwati oda watorini.” Mai ati namaroni.

¹¹“Deoso ai nafi‑ka hidi kitabote tohawahebona tamine dai watowahaboneni. Mai one‑ya ohiyara, owati okahemobisateni.

¹²Deoso‑ka yama hani ati‑maro‑nima mai nawahani.

‘Owati‑ya mai mita, owa ene‑ya mai awa na, mai narabi hawira, yama‑ya mai wato awiraboneni. Mai narabi hawe‑mani, mai ihi‑maro‑nima mai ihi namariya, mai ihi manakone‑ya Deoso haanamare nane.’ Yama hani ati namaroni.” Yeso ati nemarine.

¹³Yeso ati yananamatase,

“Ka! Yamata noki tamine‑ya dai wato awirini. Oka hiyara nafi dai wato awiraba awineni.

¹⁴Fadara‑ka wami ai atibodi tamine amani. Yamata noki Deoso ati tamine amane.

¹⁵Hawi fowari‑ya yamata noki sona ai owa tamine amane. Deoso ati‑ya mai mita, Satanasi ene Deoso ati‑ya mai ati kadamowama kanibote na, mai tamine amani.

¹⁶Wami si‑sifina‑ya yamata noki one sona, yana kanibote na, aba kanibote na, fara Deoso ati‑ya mai mita, mai ya‑yai kanibote na, mai tamine amani.

¹⁷Deoso ati‑ya mai nofara mai mai weehiniya, mai atibodi kitara, mai maakana kanibote na, Deoso ati‑ya mai tokadabamarani.

¹⁸Atiwa mete‑ya yamata noki sona, fara Deoso ati‑ya mai mita,

¹⁹makobote yamataha, bora, yinero, yama dama toha na‑ya mai nokotonihe, Deoso ati‑ya mai nokotonimara, yamata atiwa‑ya daba, bonora‑nima mai na, mai ihi amosa‑ba wadarani.

²⁰Bodo‑ya yamata noki sona‑nima mai na, Deoso ati‑ya mai mita, Deoso ati‑ya mai nofa, mai ihi amosani. Mai one ihi amosi bi‑bidi, mai one ihi amosi ba‑basi teni.” Yeso ati nemarine.

Deoso ati yama wahi‑nima ne

²¹4:21-22 Tamine yokana dai mitahi. Yeso hini ati yokana‑ya kemo kitarematane. Hika mai watowamaboneni.“Nabarina ai towakamiya, nabarina wahi ai barikiterani. Nabarina ai kanawaarikosateni.

²²Fara nabarina ihi yama ai watowama‑nima owati dai watora, owati dai watowahaboneni.

²³Owati dai mita, owati dai tokadabahi.” Yeso ati nemarine.

²⁴“Owati timita, owati tinofahi. Owati tinofiya, ati tiwato ba‑basi tinabone, ati owa okaminamakitasaboneni.

²⁵Deoso ati‑ya mai mita, ati mai hinofeya, Deoso ati‑ya mai wato ba‑basi naboneni. Deoso ati‑ya mai mita, ati mai hinofareya, yama‑ya mai watoteraboneni.” Yeso ati nemarine.

Ahosi‑nima na tamine

²⁶Yeso ati yananamatase,

“Deoso ai nafi‑ka hidi kitabote tohawahebona tamine okaminaboneni. Fadara‑ya yamata noki‑ya ai owa werene,

²⁷amoni dameya, hika fadara‑ya tokomatase, hika yamata moona, ai owa ene tohi awirene.

²⁸Wami honita ihi yamata noki moona, makobote bonowaha, marafakiteni.

²⁹Marafakanaya, hidi tiihiteni.

Mositada noki tamine

³⁰Deoso ai nafi‑ka hidi kitabote tohawahebona tamine ohiyaramatasaboneni.

³¹Fara mositada noki‑nima tene. Mositada noki i‑isi teni.

³²Mositada noki i‑isi na‑ya fadara‑ya ai owa korotona, noki yana, nafiwaha, ini webote tohawaha, ini‑ka yama sire‑ya bani bidi mai bori‑ya mai wamateni.” Yeso ati nemarine.

³³Hiyara haa‑nima na‑ya Yeso hiyare, ati damemarine. Deoso ati‑ya Yeso hiyare, yama bara tamine‑ya hiyarabisemarine. Yama nafi‑ya Yeso kamina kanibote ni awire, yama‑ya mai wato‑ya yama one tamine‑ya kaminamakitasematane.

³⁴Mai dama mai‑ya Yeso hiyare, yama tamine yokana‑ya kaminare, makobote hika mai da‑daba mai‑ya yama tamine yokana‑ya kaminawahematane.

Boni mai‑ya monona

³⁵Mahi toke‑ya Yeso hika mai da‑daba mai‑ya hiyare,

“Hima, faha kowani‑kaya ai tokahi.” Yeso ati nemarine.

³⁶Mai yanana, kanawa‑ya mai foyama, kanawa one‑ya mai one foyama na, mai one dama tonokosamaroni.

³⁷Faha bai‑ya boni kita yanana, faha rike nafe ihi kanawa boki yanatonameteni.

³⁸Kanawa yodi‑kaya kama bide homa‑ya Yeso amone, home‑ya mai mowakana,

“Ayo, ai abi bonehe, ai tikasomara, oda‑ya tinofara awineni.” Mai ati nameteni.

³⁹Yeso dodafi, boni‑ya weene, faha‑ya hiyare,

“Faha rikatiriyahi.” Ati ne,

ati ene boni fawa, faha rike fawa nameteni.

⁴⁰Mai‑ya hiyare,

“Hini yamata ihi dai kakomeheti? Owa ene kitabote‑ya dai awaterini?” Yeso ati nematane.

⁴¹Yeso ene‑ya mai awa, mai habi siitona, mai ibi hiyara,

“Ebeni‑ke tohati? Ai‑nima Yeso ni awire, kitabotebisa amane. Yeso ati‑ya boni mita, fawa, faha rike fai ati‑ya mita, fawa nineni.” Mai ati nameteni.

Madi towe boroko mai‑ya mai sawe

¹Wara webote kowani‑ka Kerasa mai‑ka wami‑ya mai kobona,

²Yeso yoratomaroseya, maki kobonematane. Madi towe maki‑ya foye, mai tame‑kaya winematane.

³Maki kiti nafi ene koheti‑ya mai sokihinamarematane.

⁴Hibati‑ya koheti‑ya maki mai sokihini dame, koheti‑ya betekasarimane, mai nafi kiti bi‑bidi na, maki‑ya mai watamarameteni.

⁵Maki ai temene‑ya kaikana, adami tati‑kaya kaikana, yama tehe‑ya kaikana, yama soki‑ya kaikana nematane. Kaikane, yati‑ya hini‑ya wisinematane.

⁶Yama yaki‑ya maki Yeso‑ya awe, kanani kaki, Yeso noko‑kaya home,

^7-9Madi towe‑ya Yeso hiyare,

“Maki‑ya tisawimariyahi.” Yeso ati nematane.

“Yeso, Deoso kitabote Bidi amatini. Owa arabatinahi. Owa bisitiriyahi.” Madi towe ati ne, ati kitematane.

“Tiwa oni eme titi?” Yeso ati ne,

“Ibowa ama·oni, oda damaro.” Ati nematane.

¹⁰“Aka‑ya oda‑ya tiyoseriyahi.” Madi towe mai ati nameteni.

¹¹Adami‑ya boroko mai dama mai tafameteni.

¹²“Boroko mai‑ya oda‑ya tiyosebisahi.” Madi towe mai ati na,

¹³“Sibarini, boroko mai‑ya dai foyahi.” Yeso ati ne,

boroko mai‑ya madi towe mai tokiyoma, boroko mai kanani tokofawaha, mai 2.000 kana wami kote wadara‑ya mai nafi toka, mai boka, mai nafi abameteni.

¹⁴Boroko mai‑ya mai na‑nawada mai kanana, sidadi toha, tabora bide toha na‑ya Yeso ene‑ya mai kamina, mai ati‑ya mai dama mai mita, faha widi‑ya mai kamakemeteni, Yeso ene‑ya mai awabonehe.

¹⁵Yeso‑ya mai kobona, maki‑ya mai awameteni. Hibati‑ya maki madi towe mai dama mai foyimaro‑ke, maki hibayata bora‑ya weyenawahe, hibati‑ya ka‑kana nemari, amosawame, itari‑ya mai awa, Yeso‑ya mai nayofinameteni.

¹⁶Yeso ene‑ya mai awa Yeso tamine‑ya mai hiyara, maki tamine toha, boroko mai tamine toha na, mai tamine‑ya mai hiyarameteni.

¹⁷Yeso ene tamine‑ya mai mita, mai kakomehe, Yeso‑ya mai yosemeteni, yama one‑kaya tokebonaha.

¹⁸Kanawa‑ya Yeso mai eyehe foyamematane, mai berekawahabonehe. Hibati‑ya maki‑ya madi towe mai sawimaro‑ke Yeso‑ya haane,

“Tiwa‑ya osaweboneni.” Maki ati nematane.

¹⁹“Owa‑ya tisawiriyahi. Tiwa tabaro‑ya tikamabisahi. Deoso tiwa‑ya kasome tamine tihiyarahi, tika mai‑ya. Deoso tiwa‑ya nakitame tamine tihiyariyahi.” Yeso ati nematane.

²⁰Yeso ati‑ya mite, Dikabori‑kaya tokome, Yeso ene tamine‑ya kaminematane. Ati mai himite, mai atibodi yama‑ya kadika,

“Ka! Yeso kitatene.” Mai atibodi ati nameteni.

Yairo‑ka yobe‑ya Yeso toke

²¹Faha kowani‑kaya Yeso koboname, faha widi‑ya Yeso waasa ne‑ya mai dama mai yorotokanamaroni.

²²5:22 Hibati‑ya hidi webote‑ya mai kobona, mai yobati‑ya mai itameteni. Yeso hidi webote amane i‑di Yairo atibodi ati ne, yobati‑kaya itematane.Deoso‑ya mai hi‑hiyara‑ke yobe hidi i‑di Yairo tohe, i‑di Yairo kaki, Yeso‑ya himanebona Yeso yowi‑ya yobati‑kaya itemarine.

²³I‑di Yairo Yeso‑ya hiyare,

“Yeso, okoto atona abi yanatonani. Ai towakamahi, oka yobe‑ya. Tiwa yehe‑ya okoto boyotiniya, okoto kitamabone onani, okoto abarabonehe.” I‑di Yairo ohini yanatone ati nemarine.

²⁴Yeso i‑di Yairo eyehe mai dama mai bai‑ya tokomemarine.

²⁵Mai dama mai‑ya fana sawe, hika ama fawani watora, faha fowe 12 kana‑ya hika ama fawani awiramaroni.

²⁶Fana‑ka ama tahi‑bone mediko mai dama mai daahina, mai hikasomi hiwatorameteni. Mediko mai‑ka hemedi manakone fota‑ya fana nika, hika ama fawara, hiniya hika ama tonafe, hika yinero nafi tosiyomatane.

²⁷Yeso tamine‑ya fana mita, mai dama mai teberi‑ya tokomake, Yeso bari‑kaya kamake, Yeso‑ka bora‑ya boyonamaroni.

²⁸“Yeso borone‑ya boyo·oniya, okitamaboneni.” Fana atibodi ati na,

²⁹Yeso‑ka bora‑ya boyona, kitamawaha, kome fawa, hika ama fawanawaha namaroni.

³⁰Yeso hini ene kite‑ya wato, kiinawame,

“Ebeni‑ka tohiti, oka bora‑ya boyonaro?” Yeso ati nemarine.

³¹Yeso‑ya mai da‑daba mai ati yanana,

“Ai dama, ai‑ya tiawara?

‘Ebeni‑ka tohiti, owa‑ya boyonaro?’ Tina,

fara oda dama tiwa oda boyona awini.” Mai ati namaroni.

³²Yeso mai‑ya kiinemarine, fana‑ya awebonaha.

³³Fana habi siitona, wawawakana, Yeso noko‑ya homa, hini ihi tamine‑ya kaminamaroni.

³⁴Fana‑ya Yeso hiyare,

“Sima, sibarini.

‘Yeso‑ka bora boyo·oniya, oka ama fawanawahaboneni.’ Tiwatibodi ati na,

fara ihi tiwa onakitamineni. Tikamahi. Tiwa kitami hawa tohini.” Yeso ati nemarine.

³⁵Yeso hiyareya, Yairo‑ka mai one kamake,

“Yairo, tikoto abani. Yeso hini tohaya.” Mai ati namaroni.

³⁶Mai ati‑ya Yeso mite, Yairo‑ya hiyare,

“Tiwa habo siitoriyahi.

‘Deoso kitatene.’ Tiwatibodi ati nibisahi.” Yeso ati nemarine.

³⁷Mai dama Yeso ati ene mai one nahomake, i‑di Bedoro, i‑di Tiyako, sohori i‑di Yowaho, mai na, Yeso‑ya mai dababisamaroni.

³⁸Yairo‑ka yobe‑ya mai kobona, Yairo‑ka yobe‑ya mai naha, mai ohini kitameteni.

³⁹5:39 Atona abineni. Yeso hiwata, hiniya atona‑ya nakitamebona ihi ai amona‑nima teni. Kitama kanibote naboneni.Yairo‑ka yobe‑ya Yeso tokiyome, ati yananane,

“Hini yamata ihi dai ohini kita? Atona abi awirini, hiniya amoneni.” Yeso ati nematane.

⁴⁰Yeso ati‑ya mai mita, mai hahanameteni. Makobote Yeso mai‑ya yose,

“Dai nafi tokomahi.” Yeso ati ne,

atona badi, madi, Yeso‑ka mai toha na, Yeso mai‑ya himane, atona fori‑kaya mai tokiyamakemeteni.

⁴¹Atona aboi yahi‑ya waratone,

“Tarita komi” Yeso ati ne, ai ati‑ya,

“Atona, tiwaamisamahi.” Ati nematane.

⁴²Atona kitama, waamisama, yakana‑ya mai awa, mai atibodi yama‑ya kadika,

“Ka! Yeso kitatene.” Mai atibodi ati nameteni.

Atona‑ka ano 12 kanameteni.

⁴³Yeso ati yananamatase,

“Tikoto aba, kitama tamine dai kaminariyahi. Tikoto tinatafiyahi.” Ati nematane.

Nasare‑ya Yeso tokome

¹Yeso hini yana‑mata‑kaya hika mai da‑daba mai eyehe tokomemarine.

²Sabado‑ya Deoso‑ya mai hi‑hiyara‑ke yobe‑ya Yeso tokiyome, mai dama mai sawe mai‑ya kanawatomarine. Yeso ati‑ya mai mita, mai ibi hiyara,

“Ka! Yeso yama‑ya wato, ene kite, ebeni‑ke ene Yeso yama‑ya wato, ebeni‑ke ene Yeso ene kitanati?

³Fare ai‑ka owa amane. Hibati‑ya awa‑ya wa‑wama tohemari, hika ami i‑di Mariya toha, sohori i‑di Tiyako, i‑di Yose, i‑di Yoda, i‑di Simaho, mai na, mai ai wata, hika asima ai‑ya mai sawinineni.” Mai ibi hiyara mai ati na,

Yeso‑ya mai nofaramaroni.

⁴Yeso ati yanane,

“Tabora bara‑ya Deoso ati‑ya mai mi‑mita mai one nafi‑ya mai nofateni. Hini mai tabori‑ka mai toha, mai one toha, mai na, mai‑ya mai nofaterani. Fara‑nima oka dai toha owa‑ya dai nofi awirani.” Yeso ati nemarine.

⁵Tabora‑ka mai kiyana, mai dama Yeso‑ya mai haaramaroni. Mai one‑ta fa‑famaraba na Yeso‑ya mai haana, mai‑ya Yeso nakitamemarine.

⁶Mai ihi‑ya Yeso awe, atibodi yama‑ya kadike,

“Ka! Owati‑ya mai nofi awirini.” Yeso atibodi ati nemarine.

Tabora bide dama‑ya Yeso tokemarine, mai‑ya kanawatobonaha.

Mai 12 kana mai‑ya Yeso yose

⁷Yeso hika mai da‑daba mai 12 kana mai‑ya haane, ati ene mai ihi kitawahamaroni, madi towe mai‑ya mai kananihebonehe. Mai‑ya Yeso hiyare,

“Hawi dami‑ya dai fa‑fama dai tokaboneni.

⁸Dai tokiya, dai dabakiba‑ka awa dai aka, sibarini, dai‑ka yama one dai weyekarihi. Iyawa, yamasi, yinero ne dai towakariyahi.

⁹Sanidariya‑ta dai sakonahi. Bora fama dai weyeriyahi.

¹⁰Mai tabori‑ya dai koboniya, yobe ohari‑ya dai winiyahi. Aka‑ya dai toki awisari‑ya yobe owa‑ya dai winariyahi.

¹¹Mai tabori‑ya dai koboni‑ka dai ati‑ya mai nofara, dai yananamiya, mai noki‑ya dai teme hibakori dai nanahabiyahi, mai atibodi yama‑ya kadikabonehe.

‘Mai ati oda nofara mai tokineni. Oda ene amani.’ Mai atibodi ati naboneni.”

Yeso ati nematane.

¹²Mai 12 kana mai tokamaroni, mai dami‑ya mai hiyarabonehe.

“Dai ene towe‑ya dai nofamariyahi.” Mai ati namaroni.

¹³Mai ati ihi madi towe mai kananamaroni. Mai kiyana mai tati‑ya oyo‑ya mai sorokare, mai‑ya mai nakitamamaroni.

Erodi tamine

¹⁴Yeso‑ka mai ihi tamine‑ya mai nafi hiyara, mai ati‑ya i‑di Erodi mite,

“Yowaho tohe awane. Yowaho Batita abe, kitame ene kite toha ne awane.” Mai one ati nihi,

¹⁵“I‑di Eriya kamatase awane.” Mai one ati nihi,

“Deoso ati‑ya mai mi‑mita‑mete mai‑nima ne awane.” Mai one ati nihi namaroni.

¹⁶Mai ati‑ya i‑di Erodi mite,

“Owati ihi Yowaho Batita namidi mai tiihinakosemari, kitame awane.” Ati nemarine.

^17-18Yowaho Batita namidi‑ya i‑di Erodi ati ene mai tiinakosamaro, tamine okaminebonane. I‑di Erodi anidi i‑di Firibi tohe, i‑di Firibi fadi i‑di Erodiasi toha, i‑di Erodi anidi fadi‑ya famawahe, fare ene i‑di Yowaho Batita ati yanane,

“Erodi, ayo fadi arabatinahi.” Ati ne, ati damemarine.

I‑di Erodiasi ati ihi Yowaho mano‑ya Erodi sokikase, kadeya‑ya Yowaho‑ya nafoyemarine.

¹⁹Yowaho Batita‑ya i‑di Erodiasi kako kita, i‑di Yowaho Batita‑ya ati naboha, i‑di Erodi ati barihinamaroni.

²⁰I‑di Erodi habo siitone,

“Yowaho Batita ene amose, Deoso‑ya na‑narifa amane.” I‑di Erodi atibodi ati ne,

fai‑ya nayofine, fai‑ya kasomematane. I‑di Yowaho ati miti‑ya i‑di Erodi nofe, fai ati‑ya tokadabare, ati hiwatoremarine.

²¹I‑di Erodiasi yawi fawara, i‑di Erodi‑ka ano kobona, mai yorotokana, i‑di Erodi‑ka yo‑yose hidi mai toha, sodado mai‑ka hidi mai toha, Karireya‑ka hidi mai bi‑bidi na mai toha, mai na, mai yorotokanamaroni, mai marinabonehe.

²²Makobote mai ya‑yainabone i‑di Erodiasi bide atona kama, mai noki‑ya siwana, atona ihi i‑di Erodi mai one eyehe ya‑yaine, atona‑ya hiyare,

“Hini yamata‑ya tiwati koboniti? Tiwa‑ya yama daa·onaboneni.

²³Yama tinofa daa·onaboneni. Keyehe hiri·oterani. Oka yama beheri‑ya tiwati koboniya, daa·onaboneni. Hini tiwati kobohina daa·onaboneni.” I‑di Erodi ati nematane.

²⁴Atona tokoma, madi‑ya hiyara,

“Ami, hini yamata haa·obati?” Ati na,

“I‑di Yowaho Batita tati haatiyahi.” Madi ati nameteni.

²⁵Atona hidi webote‑ya tokoma kanibote na, ati yanana,

“Barato‑ya Yowaho Batita tati foye, hibayata owa‑ya daatinahi.” Ati nameteni.

²⁶Atona ati‑ya i‑di Erodi mite, atibodi a‑arire,

“Yowaho Batita nanahabi onofarini. Hini owati tohani.

‘Yama tinofa daa·onabone’ ona,

owati‑ya mai nafi mita, owati‑nima oriya, owa‑ya mai hahakariyahi.” Hidi webote atibodi ati nematane.

²⁷Sodado‑ya i‑di Erodi yose, Sodado toke, kadeya dori‑ya Yowaho Batita namidi‑ya tiinakosematane.

²⁸Yowaho Batita tati barato‑ya foye‑ya sodado kakame, atona‑ya daahine, madi‑ya daahinamematane.

²⁹Yowaho Batita tamine‑ya hika mai da‑daba mai mita, mai kamake, abo mai hiwakame, yati hodi‑ya mai barihikanemarine.

Mai dami‑ya Yeso natafe

³⁰Yeso‑ka yo‑yose mai kobonama, mai ihi tamine‑ya mai kaminamaroni, Yeso‑ya.

³¹Mai dama mai sawe, mai ihi mai tafaramaroni.

“Hima, mai awiri‑kaya ai tokomahi, ai hasinabonehe.” Yeso ati nemarine.

³²Kanawa dori‑ya mai foyamamaroni, mai awiri‑kaya mai tokomabonehe.

³³Yeso mai eyehe toke‑ya mai dama mai awa, tabora dami‑ka mai tokomake, faha widi‑ya mai kanani tokobasamake, mai koboni dai tohamaroni.

³⁴Yeso mai eyehe kobone, tokomorose, mai dama mai‑ya awe, atibodi yama‑ya kadike,

“Kaneiro mai‑ka hidi wadamare mai‑nima mai na, mai okasomaboneni.” Yeso atibodi ati ne,

mai dama mai‑ya hiyare, Deoso tamine‑ya kamine, hiyari damemarine.

³⁵Mahi toke‑ya Yeso‑ya mai da‑daba mai ati yanana,

“Yeso, mahi toke, yobe wadare‑ya ai nahoneni.

³⁶Mai tiyosehi, mai tabori‑ya mai tokiya, mai tafe‑bone‑ya mai kanikabonehe.” Yeso‑ya mai da‑daba mai ati namaroni.

³⁷“Mai dai natafabisahi.” Yeso ati ne,

“Mai dama mai‑ka baho‑ba ai kanikiya, manakone nafeba awini. Yama‑ya ai a‑ani ai‑ka yama anini manakone 200 kana manakone‑nima mai dama mai tafe manakone na‑ba awini.” Yeso‑ya mai da‑daba mai ati namaroni.

³⁸Yeso mai‑ya yose,

“Ai‑ka baho dai kadikahi.” Ati ne,

Baho‑ya mai kadiki hawa toha, mai ati yanana,

“Ai‑ka baho 5 kana, ai‑ka aba mai fama mai nani.” Mai ati namaroni.

³⁹Yeso ati ene kabihi mese‑ya mai dama mai nahowamamaroni.

⁴⁰Haa‑kaya mai one 50 kana naho, haa‑kaya mai one 100 kana naho, ahini‑kaya mai one 50 kana naho na, fara hinama mai yorotokana, mai nahamaroni.

⁴¹Baho 5 kana, aba mai fama na, mai‑ya Yeso damakane, neme‑ya tonokomise, Deoso‑ya hiyaremarine. Baho‑ya kebi, aba mai‑ya dobikana ne, mai 12 kana mai‑ya daanemarine, mai dami‑ya mai daahinabonehe.

⁴²Mai nafi tafa, mai korimanama,

⁴³baho kote hasi, aba mai kote hasina, kote mai teehina, hisiri 12 kana kibamaroni.

⁴⁴Maki 5.000 mai kanamaroni.

Faha baki‑ya Yeso yakane

⁴⁵Hisiri‑ya mai teeni hawa toha, Yeso‑ya mai da‑daba mai‑ya Yeso yose, kanawa‑ya mai foyamamaroni, Besaida‑ya mai beretokawami dai tohabonehe. Mai dama hini mai tabori‑kaya mai‑ya yosemarine.

⁴⁶Yeso mai‑ya hiyari hawa toheya, adami webote‑ya tokomorosematane, Deoso‑ya hiyarebonaha.

⁴⁷Yama soki yanatoni‑ya kanawa‑ya mai foya, faha bai‑ya mai tohiya, Yeso ohari towaakosematane.

⁴⁸Faha bai‑ya Yeso noko toke, hika mai da‑daba mai‑ya awe, yama hakikini kita ihi kanawa‑ya mai orini kita, 4 ora‑ke, yama wahi yanatoniya, Yeso tokomaki, faha baki‑ya yakanematane, mai‑ya fiyakanebonaha.

⁴⁹Yeso‑ya mai awa,

“Ai korimari toha awini.” Mai atibodi ati na,

Mai e‑erinameteni.

⁵⁰Yeso‑ka fara hinama, fai‑ya mai awa, mai kakomehe, mai‑ya Yeso hiyare,

“Dai habo kitahi. Fara ama·oni. Dai kakomeheriyahi.” Ati nematane.

⁵¹Kanawa dori‑ya Yeso foyamakiya, yama hakikini fawanawahameteni. Yeso ene kitabote‑ya mai awa, mai atibodi yama‑ya kadikameteni.

⁵²Yeso ene kite‑ya mai awi baha, baho dodama‑ya mai awa, Yeso‑ya mai watomi awirameteni, mai habi kitaro.

Kenesare‑kaya Yeso mai‑ya hiyare

⁵³Kenesare‑kaya mai kobona, kanawa‑ya mai yaditona,

⁵⁴mai tokomorosa, mai‑ya mai awa,

“Yeso tohene.” Mai ati nameteni.

⁵⁵Tabora nafi‑ya mai one kanani tokomameteni, Yeso tamine‑ya mai kaminabonehe. Mai ati‑ya mai mita, mai kiyana mai‑ya mai kakamameteni. Awa‑ya bora dasikana‑ya mai kiyana mai fo‑fore mai‑ya mai diwarikana, Yeso sawi‑kaya mai‑ya mai towakameteni.

⁵⁶Tabora bide dama, sidadi dama na‑ya Yeso toke, koboneya, mai kiyana mai‑ya mai kakamamaroni. Tabora bai‑ya mai‑ya mai kakamamaroni. Yeso‑ya mai haana,

“Yeso, tika bora ifi oda boyonaboneni.” Mai ati na,

Yeso borone‑ya mai boyoniya, mai kitamamaroni.

Yodeo mai‑ka idi mai ati tamine

¹Yerosare‑ya mai yanana, fariseo mai one toha, Mose‑ka yama hani ati‑ya mai ka‑kamina mai one toha, mai na, mai kamake, Yeso‑kaya mai yorotokanamaroni.

²Yeso‑ya mai da‑daba mai tafabone, mai yahi‑ya mai sorokarira, mai‑ya mai awa, mai ati yanana,

“Mai yahi towe tafineni.” Mai ati namaroni.

³Yodeo ai‑ka idi mai ati ihi mai tafabone, mai yahi‑ya mai sorokariteni. Ai‑ka idi mai ati‑ya fariseo mai tokadabi nafiteni.

⁴Yama ka‑kanika‑ya mai tokiya, mai wininamiya, mai yahi faha‑ya bokiya, hini mai‑ya mai wisakari mai teni. Mai‑ka keneko, mai‑ka faha wiye, mai‑ka yiwaha na faha‑ya mai korotofiteni. Mai‑ka idi mai ati dama mai ati‑ya mai tokadabateni.

⁵Fariseo mai toha, Mose‑ka yama hani ati‑ya mai ka‑kamina mai toha, mai na, Yeso‑ya mai hiyaramaroni.

“Hini yamata ihi tiwa‑ya mai da‑daba ai‑ka idi mai ati‑ya mai tokadabarani? Mai yahi towe tafateni.” Mai ati namaroni.

⁶Yeso mai‑ya hiyare,

“Towe dai amani. Deoso ati‑ya i‑di Isa·iya kamine, dai tamine‑ya hiyare,

‘Owa‑ya mai nofamone mai ati na, owa‑ya mai kahiyara na, hiniya keyehe‑ya mai hirina, owati‑ya mai tokadabarani.

⁷Mai ati omita, ya‑yai·oni awirini. Owati‑ya mai kaminamone mai ati na, mai one ati‑ya mai kaminabisineni.’ Deoso ati ne, ati‑ya Isa·iya kanahanomatane.

⁸Deoso ati yokana dai nokotonira, dai‑ka idi mai ati‑ya dai nokotonibisateni.” Yeso ati nemarine.

⁹Yeso ati yananamatase,

“Ai‑ka idi mai ati dai nofabisa, Deoso ati‑ya dai tokadabarani.

¹⁰Deoso ati‑ya i‑di Mose kanahanomatane.

‘Abi, ami, mai na, mai tinofahi. Mai‑ka abi, mai‑ka ami, mai na, mai one‑ya mai weena, —Towe amatini.— Mai ati na, mai abahi.’ Mose‑ka yama hani ati neni.

^11-12Deoso ati‑nima dai ati ni awirineni. Haa‑nima yama na dai kanawatoteni.

‘Deoso‑ya oka yama daa·onaboneni.’ Dai ati niya,

‘Mai one‑ya dai daariyahi. Dai‑ka abi, dai‑ka ami, mai na, mai dai kasomariyahi.’ Dai ati teni.

¹³Deoso ati‑ya dai tokadabara, dai‑ka idi mai ati‑ya dai kanawatobisineni. Haa‑nima dai ene na damateni.” Yeso ati nemarine.

¹⁴Fariseo mai‑ya Yeso hiyari hawa toheya, mai dama mai‑ya Yeso haane,

“Owati dai nafi mitahi. Owati dai watohi.

¹⁵Ai tefe ene ai towe tohaterani. Ai atibodi towe ene ai towe tohabisateni.

¹⁶Owati dai mita, owati dai tokadabahi.” Yeso ati nemarine.

¹⁷Yobe doro‑ya Yeso hika mai da‑daba mai eyehe tokiyome, mai dama mai nahokosamaroni. Yeso‑ka fai‑ya mai haanameteni, ai tefe tamine‑ya mai mitabonehe.

¹⁸Yeso ati yanane,

“Ka! Hini dai one‑nima dai na, yama‑ya dai watoteraba awineni. Ai tefe ene ai towe tohaterani.” Ati nemarine.

¹⁹Ai tefe nafi sibara tamine‑ya Yeso hiyare,

“Ai atibodi‑ya ai tefe tokaterani. Ai tafiya, ai nabadi‑ya tokabisa, makobote ai miiniya, abateni.

²⁰Mai atibodi towe ihi mai towe tohateni.

²¹Mai atibodi ati towe ihi yama towe‑ya mai nokotonihe, fana mai dama mai‑ya mai nokotonihi, yama‑ya mai boti, mai one‑ya mai nanahaba, fana one‑ya mai idiwaha, mai teni,

²²mai one‑ka yama‑ya mai nokotonihi, yama towe‑ya mai nofa, keyehe‑ya mai hiri, mai siwa, Deoso ati‑ya mai tokadabara,

‘Towe dai amani, amosabotebisa ama·oni.’ Mai ati na,

haa‑nima mai ihi na,

²³yama towe‑ya mai atibodi‑ya yanana, mai atibodi ihi mai towe tohateni.” Yeso ati nematane.

Sirofenisiya‑ka fana tamine

²⁴Yeso yananame, Tiro, Sidoho na, yakari‑ya toke, yobe doro‑ya tokiyomematane.

“Owa‑ya mai dami awariyahi.” Atibodi ati ne,

Yeso‑ya mai one awameteni.

²⁵Fana bide‑ya madi towe foye, Yeso tamine‑ya fana mita, kamake, Yeso yowi‑ya yobati‑kaya itarisa, moinisa, itameteni.

²⁶Fana Yodeo tohara, Sirofenisiya‑ka tohabisa, ati yanana,

“Okoto tikasomahi. Madi towe kanatinihi.” Ati nameteni.

²⁷Yeso ati yanane,

“Yodeo oka mai toha, mai‑ka yama nafi hawa tohiya, Bara mai okasomaboneni. Ai‑ka madehe tafe‑ya yomahi‑ya ai daaterani.” Ati nematane.

²⁸Fana ati yananamatasa,

“Ayo, fara amani. Owati timitaharihi. Madehe tafiya, bofe‑ya yama mekori fororona‑ya yomahi mai kabateni.” Ati nameteni.

²⁹“Tiwati amosa ihi okasomini. Tikamahi. Madi towe tikoto‑ya foyamarane.” Yeso ati nematane.

³⁰Fana hika yobe‑ya tokoma, kobotonama, bide kama‑ya homa, madi towe foyamarematane.

Maki Yeso hinakitame

³¹Tiro‑ya Yeso sawimari, yananame, Sidoho‑ya kariwahe, Dikabori‑kaya kobone, Karireya‑ka faha widi‑ya maatowitimarine.

³²Maki narabo hawirihi, ati amosarihi ne, Yeso‑ya mai hiwakame, Yeso‑ya mai hiyara,

“Tiwa yehe‑ya maki boyotinahi.” Mai ati namaroni.

³³Mai awiri‑kaya maki‑ya i‑di Yeso towakame, maki narabo hodone‑ya yehe‑ya yorinise, makobote hini yehe‑ya firokase, yehe afe‑ya maki ebene‑ya boyonemarine.

³⁴Yeso neme‑ya tonokomise, hasitone, Yodeo mai ati‑ya ati yanane,

“Efata!” Ati ne, ai ati‑ya,

“Hawi wamahi.” Ati nemarine.

³⁵Hibati‑ya narabo hawirihi, ati amosarihi nemari, amosawame, mai ati‑ya mitawaha, ati amosawaha nemarine.

³⁶“Owa ene dai kaminariyahi.” Yeso ati nemarine.

Ati mai hikadabare, mai‑ya Yeso ati barini dame, hiniya ati kamini mai na‑nafi hinemarine. Tamine mai nafi himitawahemarine.

³⁷Yeso ene‑ya mai awa, mai atibodi yama‑ya kadika, Yeso tamine‑ya mai hiyara,

“Ka! Yeso ene amose hinama, hibati‑ya mai narabi hawiramaro mai narabi hawiwaha, mai ati wadaramaro mai ati wadawahateni.” Mai ati namaroni.

4.000 mai kana mai‑ya Yeso natafe

¹Mahi owa‑ya mai dama mai sawe, mai tafe wadara, Yeso hika mai da‑daba mai‑ya haane, mai‑ya hiyare,

²“Ai‑ya mai sa‑sawi mai okasomaboneni. Ai amoni 3 kani‑ya ai‑ya mai sawe mai tafe wadarani.

³Mai one wini yaka, mai tabori‑ya mai oyoseya, fimi ihi hawi bai‑ya mai abariyahi.” Yeso ati nemarine.

⁴Yeso‑ya mai da‑daba mai ati yanana,

“Hini yamata‑nima ai nibati? Yobe wadare‑ya ai naha, haa‑ya yamata ai kanikaterani.” Mai ati namaroni.

⁵“Dai‑ka baho emeniti?” Yeso ati ne,

“Oda‑ka baho 7 kana tohani.” Mai ati namaroni.

⁶Yeso ati ene mai nafi nahokosamaroni. Baho tamine‑ya Deoso‑ya hiyare, baho‑ya kebi, hika mai da‑daba mai‑ya baho‑ya daane, mai dami‑ya mai daahinamaroni.

⁷Mai‑ka aba bidi mai fa‑famaraba na mai tamine‑ya Deoso‑ya hiyare, ati ene mai dami‑ya mai daahinamaroni.

⁸Mai dama mai tafa, mai korimana, tefe kote hasina mai teehina, hisiri kiba 7 tohamaroni.

⁹Mai dama, 4.000 mai toha, mai tabori‑ya mai‑ya yosemarine.

¹⁰Yeso hika mai da‑daba mai‑ya dabe, kanawa dori‑ya mai foyama, Damanota‑kaya mai tokamaroni.

Yeso ene kitabote‑ya mai awabone

¹¹Fariseo mai kamake, Yeso‑ya mai hiyara,

“Deoso‑ka tihamone tina, neme‑ya tiwa ene kitabote oda awaboneni.” Mai ati namaroni, fai‑ya mai weenabonehe.

¹²Mai ati‑ya Yeso mite, atibodi yawe, ati yanane,

“Hini yamata ihi owa ene kitabote dai awabone, dai ati niti? Deoso ene dai awateraboneni.” Yeso ati nemarine.

¹³Makobote kanawa‑ya Yeso mai eyehe foyame, kowani‑kaya mai beretokawamamaroni.

Deoso tamine‑ya keyehe‑ya mai hirina

¹⁴Yeso‑ya mai da‑daba baho‑ya mai ati kadamowama, kanawa dori‑ya baho ohare sawemeteni.

¹⁵8:15-16 Baho ai wamanabone, farina tiriko femeto‑ya ai ketehe. Yeso hini ati yokana‑ya kemore‑mana, eya ati nane, “Baho‑ya femeto daba, dodama‑nima mai‑ka keyehena mai one nofawahani. Fara mai‑ka keyehe dai nofariyahi.”Yeso mai‑ya hiyare,

“Dai noko wadahi. Fariseo mai toha, Erodi toha ne, mai‑ka femeto‑ya dai arabanahi.” Yeso ati nematane.

¹⁶Yeso‑ya mai da‑daba Yeso ati‑ya mai mita, mai ibi hiyara,

“Ai‑ka baho wadara tamine‑ya Yeso hiyarane.” Mai ati nameteni.

¹⁷Mai ati‑ya Yeso wato, mai‑ya hiyare,

“Ka! Baho yokana tamine‑ya ohiyari awirani. Yama dai wato kanibote rani, dai habo kitaro.

¹⁸Dai noko toha, owa ene dai awa, dai narabo toha, owati‑ya dai mitabisa na, owati‑ya dai watora awineni. Owa ene dai awa, dai ati kadamowamarimana awineni.

¹⁹Mai dama 5.000 mai toha baho 5 kana‑ya mai onatafa, mai korimanama, yama kaba kote hasina dai teena, hisiri emeniti?” Yeso ati ne,

“Hisiri kiba 12 tohani.” Mai ati nameteni.

²⁰“4.000 mai kana baho 7 kana‑ya mai onatafa, mai korimana, yama kaba kote dama hasina, hisiri‑ya dai teena, hisiri emeniti?” Yeso ati ne,

“Hisiri kiba 7 tohani.” Mai ati nameteni.

²¹“Owati‑ya dai watoraba awineni.” Ati nematane.

Maki noko‑ya Yeso kasome

²²Besaida‑ya mai kobona, Yeso‑ya mai awa, maki noko wadare‑ya mai kakama, Yeso‑ya mai hiyara,

“Maki boyotinebona oda kakamani.” Mai ati namaroni.

²³Maki yehe‑ya Yeso damane, yobe awire‑kaya maki‑ya towake, maki noko bodi‑ya Yeso iridi fene‑ya hiditokane, maki tati‑ya boyone, ati yanane,

“Tiwa noko amosawamini?” Yeso ati nematane.

²⁴Maki yama‑ya awe, ati yanane,

“Ai one oawini, awa‑nima mai‑nima ne mai yakanaro.” Maki ati nematane.

²⁵Maki noko bodi‑ya Yeso boyonamatase, noko amosawami nafiwahe, yama nafi‑ya awi amosawahematane.

²⁶Yeso ati yanane,

“Tika yobe‑ya tikamahi. Mai tabori‑ya tikariyahi.” Ati nematane.

Yeso i‑di Deoso‑ka Ka‑kadika amane

²⁷Sesareya Firibo‑ya tabora bide dama toha, fara‑ya Yeso hika mai da‑daba mai eyehe toke, hawi‑ya mai yakana, mai‑ya hiyare,

“Owa tamine‑ya mai hiyara, eme mai ati niti?” Yeso ati ne,

²⁸“‘Yowaho Batita amane.’ Mai one ati nihi,

‘I‑di Eriya amane.’ Mai one ati nihi,

‘Deoso ati‑ya mai mi‑mita‑mete mai‑ka owa amane.’ Mai one ati nihi teni.” Yeso‑ya mai da‑daba mai ati nameteni.

²⁹“Dai‑ta eme dai ati niti?” Yeso ati ne,

“Deoso‑ka Ka‑kadika amatini.” Bedoro ati ne,

³⁰“Hehe, fara ama·oni. Hiniya owa tamine dai hiyarariyahi.” Yeso ati nematane.

Yeso abebona

³¹Yeso hini tamine‑bona‑ya kamine,

“Yodeo mai‑ka hidi mai bi‑bidi na mai toha, Mose‑ka yama hani ati‑ya mai ka‑kamina mai toha, Deoso‑ka yama‑bone‑ya mai da‑daa mai‑ka hidi mai toha, mai na, dai‑ka Ayo neme‑ke ati‑ya mai nofarabone, mai weeni hikitebona, mai hinahabeya, mahi 3 tohe‑ya kitamebonane.” Yeso ati nematane.

³²Yeso hini tamine‑ya hiyare, mai hinahabebona hini‑ya kemo awirematane. Ati‑ya i‑di Bedoro mite, ahiyata‑ya Yeso‑ya towake, fai‑ya weenematane.

³³Bedoro‑ya Yeso hiyarebona, kiinawame, hika mai da‑daba mai one‑ya noko tokome, ati yanane,

“Satanasi ati‑nima tiwati nineni. Owa‑ya tiwati baririyahi. Deoso‑ka yama nokotini awira, hini tiwatibodi ati‑ya nokotinibisineni.” Yeso ati nematane.

³⁴Yeso‑ya mai da‑daba mai toha, mai one dama toha na, mai‑ya Yeso haane, mai‑ya hiyare,

“Owa‑ya dai ati daba, dai‑ka yama dai nokotoniriyahi. Owa‑ya dai dabiya, owa‑ya mai nanahababone‑nima dai‑ya mai nanahabahareba awineni.” Yeso ati nemarine.

³⁵8:35 Dai abarabone yama hani ati na, Deoso tabaro‑ya dai ya‑yainabone tamine amani.“Deoso ati amosabote ati dai nofa, owa‑ya dai nofa, dai na, dai‑ya mai nanahabiya, dai abaraboneni. Oda abariyahi dai ati niya, owati‑ya dai tokadabara, dai ababoneni.

³⁶Yama dama‑ya mai kihamaro mai abiya, mai‑ka yama mai‑ya kasomateraboneni. Owati‑ya mai nofara yama hirini‑kaya mai sawiwahaboneni.

³⁷Yinero‑ya ai atibodi manakone abaterani.

³⁸Bofe‑ya mai wi‑wina yama dama‑ya mai nokotonihe, Deoso ati‑ya mai tokadabara dai‑ya mai weeni awirabone dai ati na, owa‑ya dai nofarihi, owati‑ya dai nofarihi dai niya, okomatasiya, dai‑ya onofahariraboneni. Okomatasiya, Okobi wehene owa‑ya sawi, Okobi‑ka yo‑yose mai amosabote owa‑ya mai sawi naboneni.” Yeso ati nematane.

Yeso wehene wade

¹Yeso mai‑ya hiyare,

“Owati dai mitahi. Dai abi awisari‑ya Deoso ai nafi‑ka hidi kitabote tohawahebona dai one awawahaboneni.” Ati nematane.

²Mai amoni 6 kaniya, Bedoro, Tiyako, Yowaho, mai na, mai‑ya Yeso himane, adami nemehe tati‑ya mai tokomorosa, mai one sawi awiramaroni. Adami tati‑ya mai kobona, mai noki‑ya Yeso hini wehene‑ya yananihimatane.

³Bora sa‑sawani kita, bofe‑ka bora haa‑nima na wadatera, bora wahi wadameteni.

⁴I‑di Mose i‑di Eriya mai fama mai kobona, Yeso‑ya mai hiyarameteni.

⁵Mai‑ya Bedoro awe, Yeso‑ya hiyare,

“Ayo, tiwa‑ya oda sawe, yama sibarini. Dai‑ka wa‑wasa‑ba oda wamanaboneni. Tika ohari, Mose‑ka ohari, Eriya‑ka ohari nebonane.” Ati nematane.

⁶Mai habi siitona ihi i‑di Bedoro ati yanane, atibodi yama‑ya watomarematane.

⁷Makobote neme sabi mai‑ya barikanameteni. Neme sabi‑ya ati kaki,

“Oka Dao amane. Onofi nafi, ati dai tokadabahi.” Ati nematane.

⁸Mai kiinawama, Yeso ohari‑ta waimatane.

⁹Makobote mai yanana, mai tokofawamiya, mai‑ya Yeso hiyare,

“Adami tati‑ya yama dai awa tamine‑ya dai kaminariyahi. O·abiya, okitamiya, owa kitami hawa tohiya, yama dai awa tamine dai kaminabisaboneni.” Yeso ati nematane.

¹⁰Yeso ati‑ya mai watora, Yeso kitamebona tamine‑ya mai ibi hiyarameteni.

¹¹Makobote Yeso‑ya mai hiyara,

“Mose‑ka yama hani ati‑ya mai ka‑kamina eya mai ati na,

‘I‑di Eriya koboni dai toheya, Deoso‑ka Ka‑kadika koboni yotobonane.’ Mai ati teni.” Mai ati nameteni.

¹²Mai ati‑ya Yeso mite, ati yanane,

“Fara amani. Eriya koboni dai tohebona, yama‑ya namosebonane. Deoso‑ka yama hani ati one dai mitahi.

‘Dai‑ka Ayo neme‑ke‑ya mai nofi awirabone, mai weehinebonane.’ Yama hani ati nani.” Yeso ati nematane.

¹³“Owati dai mitahi. Eriya koboni hawa tohe, mai weeni hikitemarine. Yama hani ati‑nima mai ihi namaroni.” Yeso ati nematane.

Madi towe yetene‑ya fatatowiti

¹⁴Yeso‑ya mai da‑daba mai one sawi‑kaya mai kobonamatasa, mai one dama mai yorotokana mai‑ya mai awamaroni. Mai dama mai bai‑ya Mose‑ka yama hani ati‑ya mai ka‑kamina mai toha, Yeso‑ya mai da‑daba mai toha, mai na, mai ibi weenamaroni.

¹⁵Mai dama Yeso‑ya mai awa, mai atibodi yama‑ya kadika, Yeso‑ya mai kanani tokamaroni.

¹⁶Yeso mai‑ya hiyare,

“Kobo·onama, hini yamata tamine dai hiyariti?” Ati nemarine.

¹⁷Maki owa sawi, ati yanane,

“Ayo, oka dao owakamani, tikasomebonaha. Oka dao‑ya madi towe foye, madi towe ene oka dao ati wadamarene.

¹⁸Madi towe oka dao‑ya fatatowiti, oka dao wami‑ya sone, iridi sabone toka, ino‑ya wasakana, abano kitane, fare haa‑nima nofene. Tiwa‑ya mai da‑daba mai haa·ona, madi towe‑ya mai kananihebone, mai ati‑ya madi towe nofare, tokarene.” Maki ati nemarine.

¹⁹Yeso ati yanane,

“Ka! Owati dai nofara, dai narabo hawirani. Owati dai wato kanibote nahi. Dai‑ya owa sawi nafimaraboneni. Yetene dai kakamahi!” Yeso ati nemarine.

²⁰Yetene‑ya mai kakama, Yeso‑ya madi towe awe, yetene‑ya fatatowiti, wami‑ya yetene sone, hini‑ya werene, iridi sabone toka nemarine.

²¹Yetene badi‑ya Yeso hiyare,

“Tika dao yanakana‑ke hika abariko emenihi?” Yeso ati ne,

“Oka dao madehe tohe‑ya yanakanemarine.

²²Yifo, faha na‑ya oka dao‑ya madi towe fatatowiti damatene, fai‑ya nanahabebonaha. Tiwa kiti tohiya, oda tikasomahi!” Yetene badi ati nemarine.

²³Yeso ati yanane,

“Owa kiti nafiramone tiwatibodi ati riyahi. Owati tinofiya, yama tinofa‑nima yama naboneni.” Yeso ati nemarine.

²⁴Yetene badi ati yananamatase, ati kite,

“Tiwati onofani! Owatibodi tikasomahi. Tiwati onofi ba‑basi onabonehe!” Ati nemarine.

²⁵Mai dama mai kobonamake, mai‑ya Yeso awe, madi towe‑ya hiyare,

“Madi towe, tiwa ene yetene narabo hawirihi, ati wadarihi ne, tikahi! Yetene‑ya tifoyamariyahi!” Ati nemarine.

²⁶Madi towe e‑erine, yetene‑ya wereni kite, tokemarine. Yetene home‑ya mai kakatoma,

“Yetene abi oharine!” Mai one dama mai ati namaroni.

²⁷Yetene yehe‑ya Yeso waratokane, yetene‑ya nawaamisame, yetene waimarine.

²⁸Makobote yobe doro‑ya Yeso tokiyome, hika mai da‑daba mai ati yanana,

“Madi towe oda weena, hini yamata ihi oda ene kitariti?” Mai ati namaroni.

²⁹“Deoso‑ya dai hiyari awiriya, madi towe haa‑nima ne kanaterene.” Yeso ati nemarine.

Mai kiti ba‑basi na tamine

³⁰Mai yananama, Karireya‑ya mai yakana, Yeso ati ene mai one noki‑ya mai toki awirameteni.

³¹Yeso hika mai da‑daba mai‑ya kanawato, mai‑ya hiyare,

“Dai‑ka Ayo neme‑ke‑ya ai owa daanebona, owa‑ya mai nanahababoneni. O·abiya, mahi 3 tohe‑ya okitamaboneni.” Yeso ati nematane.

³²Yeso ati‑ya mai watora, Yeso‑ya mai nayofina, mai ati yanarameteni.

³³Kafanaho‑ya mai kobona, yobe‑ya mai tokiyoma, Yeso mai‑ya hiyare,

“Hawi bai‑ya dai ibi hiyara, hini yamata tamine‑ya dai ibi hiyariti?” Ati nematane.

³⁴Mai ati yanani awira, fara hawi bai‑ya mai ibi hiyara eya mai ati na,

“Ebeni‑ke kiti ba‑basi nabati?” Mai ati na, mai ibi hiyarameteni.

³⁵Yeso itari, mai 12 kana mai‑ya haane, mai‑ya hiyare,

“Mai nafi‑ka hidi dai tohabone dai ati niya, mai dai kasoma, mai‑ka yo‑yose dai toha, dai nibisiyahi.” Ati nematane.

³⁶Ewe owa‑ya Yeso idimise, ewe‑ya diwane, hika mai da‑daba mai 12 kana mai teberi‑ya wai, mai‑ya hiyaramatase,

³⁷“‘Owa ene Yeso ya‑yainebonane.’ Dai atibodi ati na,

ewe dai kasomiya, owa‑ya dai kasomahari, Okobi‑ya dai kasomahari neni.” Yeso ati nematane.

Yeso oni‑ya maki owa hirine

³⁸Yowaho ati yanane,

“Ayo, tiwa oni‑ya ai owa hirine, madi towe mai‑ya kananihi. Ai‑ya dabare, oda ati barihinene.” Yowaho ati nematane.

³⁹Yeso ati yanane,

“Maki‑ya dai ati baririyahi. Owa kiti yananabone ihi owa oni‑ya maki hirinane. Fara haa‑nima maki ati ne, owa‑ya kako kanibote rebonane.

⁴⁰Ai‑ya mai kakora ai‑ya mai kasomabisateni.

⁴¹Dai bako hoka, faha‑ya dai‑ya mai daana,

‘Yeso Kirisito‑ka mai amani. Mai okasomaboneni.’ Mai atibodi ati na,

mai ihi amosa manakone‑ya Deoso daanebonane.” Yeso ati nemarine.

Ene towe manakone

⁴²“Dai one ati ene owati‑ya ewe nofamareya, hini ene towe manakone wadebonane. Hini ene towe awisareya, yati webote‑ya namidi mai yadihineya, faha webote‑ya mai korohifiya, yama sibarabone, komene bi‑bidi nibisebonane. Ene towe tohe, hini ene manakone komene nafibisebonane.

⁴³Tiwa yehe one ene yama towe nokotiniya, tiwa yehe one wisitinakosahi, yama towe‑ya nokotinimarabonehe. Tiwa yehe ohari‑ya ti·abiya, tikitamiya, ti·abarabone‑kaya kobotiniya, yama sibabisaraboneni. Tiwa yehe fami‑ya ti·abiya, tikitamiya, wara hirini‑kaya yama hirini fawaterabone‑kaya tikiya, yama towe tohawahaboneni.

⁴⁴9:43-48 Yama towe ai nokotoniya, ai yehe ene toharihi, ai teme ene toharihi, ai noko ene toharihi na, ai atibodi ene tohabisani. Wara hirini kome kita tamine‑ya Yeso ai‑ya kanawatone.Wara hirini‑ya mai naha, mai ime‑ya makatari mai kababoneni. Makatari mai abarihi, yifo hirini fawarihi naboneni.

⁴⁵Tiwa teme one ene yama towe nokotiniya, tiwa teme one wisitinakosahi, yama towe‑ya nokotinimarabonehe. Tiwa teme ohari‑ya ti·abiya, tikitamiya, ti·abarabone‑kaya kobotiniya, yama sibabisaraboneni. Tiwa teme fami‑ya ti·abiya, tikitamiya, wara hirini‑kaya tikiya, yama towe tohawahaboneni.

⁴⁶Wara hirini‑ya mai naha, mai ime‑ya makatari mai kababoneni. Makatari mai abarihi, yifo hirini fawarihi naboneni.

⁴⁷Tiwa nokobodi one ene yama towe nokotiniya, tiwa noko one sobatinakihi, yama towe‑ya nokotinimarabonehe. Deoso ai nafi‑ka hidi kitabote tohawahe‑ya tiwa noko ohari‑ya tisawiya, yama sibabisaraboneni. Tiwa noko fami‑ya ti·abiya, tikitamiya, wara hirini‑kaya tikiya, yama towe tohaboneni.

⁴⁸Wara hirini‑ya mai naha, mai ime‑ya makatari mai kababoneni. Makatari mai abarihi, yifo hirini fawarihi naboneni.

⁴⁹Fara yifo hirini‑ya mai‑ya Deoso ketehebonane.

⁵⁰Sao amosa. Faha ihi abiya, sao kabi‑nima kabinamaterani. Sao‑nima dai nahi. Dai ene amosahi. Dai ibi nofahi.” Yeso ati nemarine.

Ai honita wahawama tamine

¹Makobote mai yananamatasa, Yodeya‑ya mai tokoma, Yodaho Faha kowani‑kaya mai towaka, mai one dama kobonamake, Yeso mai‑ya kanawatomarine. Haa‑nima Yeso ene ne, mai dama mai kobona mai‑ya kanawatotene.

²Fariseo mai one kamake, mai atibodi yama‑ya dika,

“Yeso ati amosareya, ati oda miteya, oda weenebonane.” Mai atibodi ati namaroni.

“Yeso, maki fadi‑ya nofamare, honita wahawamebona ati ne, sibakare?” Fariseo mai ati na,

³“Hini yamata‑nima Mose ati namatati?” Yeso ati nemarine.

⁴10:4 Mai honita wahawamabone, kofeno‑ka yo‑yose‑ya mai haana, dokometo‑ya mai wamana, makobote mai honita wahawamateni.“‘Dai honita wahawamabone, dai‑ka yibote‑ka yama hani‑ba dai daaniya, dai honita wahawamiya, yama sibaraboneni.’ Mose‑ka yama hani ati nineni.” Fariseo mai ati namaroni.

⁵Yeso ati yananamatase,

“Ai‑ka idi mai habi kita ihi mai honita wahawamabone‑ka yama hani tamine‑ya i‑di Mose kanahanomatane.

⁶Yama yanakani‑ya maki toha, fana toha na‑ya i‑di Deoso wamanematamonane.

⁷‘Maki fana‑ya famebona, badi, madi mai na, mai‑ya dabamaterene.

⁸Maki fadi‑bone‑ya fame, mai aboni ohariteboneni.’ Deoso‑ka yama hani ati neni.

Mai fama mai aboni ohariwahani.

⁹Deoso ati ene mai aboni ohariwama, Deoso ene dai arabanahi. Mai honita wahawamariyahi.” Yeso ati nemarine.

¹⁰Makobote yobe doro‑ya mai tokiyoma, Yeso‑ya mai da‑daba fai‑ya mai hiyaramaroni, fai ati‑ya mai mitamatasabonehe.

¹¹Yeso ati yanane,

“Maki hini ene honita wahawameya, fana one‑ya famawaheya, ene ati kasiro, hiniya siwanane.

¹²Fana hini ihi honita wahawamiya, makobote maki owa‑ya famawahiya, ihi ati kasira, hiniya siwaneni.” Yeso ati nemarine.

Madehe tati‑ya Yeso boyone

¹³Madehe tati‑ya Yeso boyonebona madehe‑ya mai kakama, Yeso‑ya mai da‑daba mai‑ya mai awa, mai‑ya mai ati barinamaroni.

¹⁴Yeso hika mai da‑daba mai ati‑ya mite, yawe, ati yanane,

“Madehe dai ati baririyahi. Madehe owati‑ya nofa, madehe‑nima mai na Deoso ai nafi‑ka hidi kitabote tohawahe‑ya mai saweboneni.

¹⁵Owati amosa dai mitahi. Madehe owati‑ya nofa, fara‑nima mai ni awiriya, Deoso ai nafi‑ka hidi kitabote tohawahe‑ya mai sawiraboneni.” Yeso ati nemarine.

¹⁶Madehe‑ya Yeso diwakane, mai tati‑ya yehe fori, mai‑ya hiyare,

“Deoso dai‑ya kasomebonane.” Yeso ati nemarine.

Mai yahi hone dama mai tamine

¹⁷10:17 Ai abaterabone‑kaya: Deoso tabaro tamine amane.Tabora one‑kaya mai tokabone, mai yananiya, maki kanani kamaki, Yeso yowi‑ya yobati‑kaya wai, ati yanane,

“Ayo, amosabote amatini. Hini yamata‑nima obati, ai abaterabone‑kaya osawebonehe?” Maki ati nemarine.

¹⁸“Amosabote owa‑mone tina, ai owa amosabote wadaterene. Deoso‑ta amosabotebisa amane.

¹⁹Deoso‑ka yama hani ati tiwata, ati timitahi,

‘Ai owa tinahabarihi, mai one‑ka yibote ti·aharihi, yama tibotiriyahi, ai owa ene tamine‑ya keyehe‑ya hiritirihi, yamata‑ka kiro tamine‑ya keyehe‑ya hiritirihi tinahi. Abi, ami mai na, mai tinofabisahi.’ Yama hani ati nineni.” Yeso ati nemarine.

²⁰“Ayo, Deoso‑ka yama hani ati‑nima oteni. Madehe ohi‑ya Deoso ati‑ya okadabateni.” Maki ati nemarine.

²¹Maki‑ya Yeso nofe, ati yanane,

“Tika yama ohare hasinineni. Tiwa yehe honene nafi daatinahi, manakone waratiniya, mai yahi hone wadara mai‑ya daatinahi. Deoso tabaro‑ya tika yama dama tohaboneni. Eya tiwa ene niya, makobote owa‑ya tisawiyahi.” Yeso ati nemarine.

²²Yeso ati‑ya mite, noko yawe, atibodi a‑arire, tokomemarine. Hika yama dama toha, hika yama‑ya kayawemarine.

²³Yeso kiinawame, hika mai da‑daba mai‑ya hiyare,

“Mai yahi hone dama toha, Deoso ai nafi‑ka hidi kitabote tohawahe‑ya mai dami sawiraboneni.” Yeso ati nemarine.

²⁴Yeso ati‑ya mai mita,

“Ka!” Mai atibodi ati namaroni.

Yeso ati yananamatase,

“Oka madehe‑nima dai na, owati dai mitahi. Deoso ai nafi‑ka hidi kitabote tohawahe‑ya mai dami sawiraboneni.

²⁵Akoye hodone‑ya kamero tokiyomaterene. Fara‑nima mai naboneni. Mai yahi hone dama Deoso ai nafi‑ka hidi kitabote tohawahebona‑ya mai dami sawiraboneni.” Yeso ati nemarine.

²⁶Yeso ati‑ya mai mita, mai atibodi yama‑ya kadika,

“Ka! Ebeni‑ke sawibati?” Mai ati namaroni.

²⁷Yeso mai‑ya nokotonihi, ati yanane,

“Hini ai ene ai sawiteraboneni. Deoso ene ai one sawibisaboneni. Deoso ene kitabotebisa amane.” Yeso ati nemarine.

²⁸Bedoro ati yanane,

“Ayo, oda‑ka yama nafi towadakosa, tiwa‑ya oda honita dababisineni.” Bedoro ati nemarine.

²⁹Yeso ati yanane,

“Owati amosa dai mitahi. Deoso ati amosabote tamine‑ya mai kaminabone, owati‑ya mai tokadaba na, fara ihi mai‑ka yama nafi‑ya mai tonawadakosa, mai ihi manakone wadaboneni. Mai‑ka yobe, mai‑ka fadara, mai‑ka ayo, mai‑ka asima, mai‑ka abi, mai‑ka ami, mai‑ka madehe, mai na, mai tonokosa, fara ihi mai manakone wadaboneni.

³⁰10:30 Mai abateraboneni: Deoso tabaro‑ya mai ya‑yaini fawaterabone tamine amani.Mai ihi amosa 100 kana manakone‑nima manakone naboneni. Bofe‑ya mai winanasa niya mai ihi amosa manakone kote‑ya mai kayafaboneni. Yobe toha, mai‑ka ayo mai toha, mai‑ka asima mai toha, mai‑ka ami mai toha, mai‑ka madehe toha, fadara toha na‑ya, mai one kayafaboneni. Bofe‑ya mai winanasa niya yama towe‑ya mai one kayafahare, mai‑ya mai one bisinaboneni. Makobote mai abateraboneni.

³¹Bofe‑ya hidi webote mai toha Deoso tabaro‑ya mai bi‑bidi na mai tohabisaba awineni. Bofe‑ya mai bi‑bidi na mai toha Deoso tabaro‑ya hidi mai ba‑basi na mai tohawahaba awineni.” Yeso ati nemarine.

Yeso abebona, hini tamine‑ya hiyare

³²Yerosare hawi‑ya mai yakana, Yeso dai tohe, nowati‑ya mai dama mai tokomakemaroni. Yerosare‑ya Yeso tokebona‑ya mai one dama mai awa, mai‑ya yama yofinamaroni. Hika mai da‑daba mai atibodi yama‑ya kadikamaroni. Mai dama ati mai himitarebona hika mai 12 kana mai‑ya haane, mai‑ya hiyare,

³³“Yerosare‑ya ai tokabone, ai koboniya, Mose‑ka yama hani ati‑ya mai ka‑kamina mai toha, Deoso‑ka yama‑bone‑ya mai da‑daa mai‑ka hidi mai toha na, dai‑ka Ayo neme‑ke‑ya mai watiya, mai ati hinahabeya, kofeno‑ya mai hiwakamebonane.

³⁴Owa‑ya mai hahakana, owa‑ya mai fironaboneni. Owa‑ya mai bisiniya, owa‑ya mai nanahababoneni. Dai amoni 3 kani‑ya dai‑ka Ayo neme‑ke kitamebonane.” Yeso ati nematane.

Hidi ba‑basi nebona tamine

³⁵Sebedeo bidi i‑di Tiyako, Tiyako sohori i‑di Yowaho‑ya fame, Yeso‑ya mai hiyara,

“Ayo, oda ati timitahi. Yama oda haanabone, oda ati tinofakaribana?” Mai ati nameteni.

³⁶“Yama dai nofa tamine omitabone, owa‑ya dai kaminahi.” Yeso ati nematane.

³⁷“Oda nafi‑ka hidi kitabote tihawahiya, tika yo‑yose oda fama oda kiti na‑nafi nabone, tiwa yehe kanika‑ya oda owa itari, tiwa yehe sayo‑kaya oda owa itari nebonane. Tiwati ihi haa‑nima oda nahi.” Mai ati nameteni.

³⁸“Yama dai haana dai wato awirini. Yama ofe‑bone dai fawa, owa‑ya mai habanirisabone, dai‑ya mai habanirisanibana?” Yeso ati nematane.

³⁹10:38-39 “Yama ofe‑bone” toha “Owa‑ya mai habanirisabone” toha na, Yeso ati ne, Yeso‑ya mai bisi, Yeso‑ya mai nanahaba nabone tamine‑ya Yeso hiyarematamonane.“Hehe, haa‑nima oda naboneni, sibarini.” Mai ati nameteni.

“Yama ofe‑bone‑nima dai fawamakeboneni. Owa‑ya mai habanirisi‑nima dai‑ya mai habanirisamakeboneni.

⁴⁰Deoso ati ene owa mano kanika‑kaya ai owa itari, owa mano sayo‑kaya ai owa itari nebona, mai oni hawa tohineni. Fara mai i‑itari‑bone‑ka dai‑ya daa·oteraboneni.” Yeso ati nematane.

⁴¹I‑di Tiyako, i‑di Yowaho mai ati tamine‑ya mai one 10 kana mita, mai yawameteni.

⁴²Yeso hika mai da‑daba mai‑ya haane, mai‑ya hiyare,

“Bara mai‑ka hidi mai one‑ya mai kasomaterani. Mai ati ihi mai mai hinarifateni.

⁴³Mai‑nima dai riyahi. Hidi tihabone tina, dai one tikasomabisahi.

⁴⁴Mai‑ka webote tihabone tina, mai nafi tikasomabisahi.

⁴⁵Dai‑ka Ayo neme‑ke‑nima dai nahi. Owa dai narifara, dai‑ya onarifabisateni. Mai dama mai ihi manakone‑ya onahababone, o·ababoneni.” Yeso ati nematane.

Batimeo tamine

⁴⁶Sidadi oni Yeriko‑ya mai kobona, Yeriko‑ya mai fiyakanabone, Yeso hika mai da‑daba mai toha, mai one dama mai toha na, Yeriko‑ya mai fiyakani yanatoniya, maki ati yananemarine. Maki noko towe tohe, oni Batimeo tohe, badi oni Timeo toha nemarine. Batimeo hiniya mai‑ka yinero‑ya haane, hawi fowari‑ya itemarine.

⁴⁷Mai one ati yanana,

“Yeso Nasare‑ke ai‑ya fiyakanane.” Mai ati namaroni.

Mai ati‑ya Batimeo mite, ati yanane,

“Yeso, oda‑ka hidi amatini. I‑di Dafi‑ka nodi amatini. Owa tikasomahi.” Batimeo ati ne,

⁴⁸“Tiwati fawanahi.” Mai dama mai ati namaroni.

Batimeo haani kitawahe,

“Oda‑ka hidi amatini. I‑di Dafi‑ka nodi amatini. Owa tikasomahi.” Batimeo ati nemarine.

⁴⁹Yeso maaname, ati yanane,

“Dai haanaho.” Ati ne,

maki‑ya mai haana, mai ati yanana,

“Ya‑yaitinahi. Tiwaamisahi. Yeso tiwa‑ya haane.” Mai ati namaroni.

⁵⁰Yoranimise, hika bora one mese‑ka‑ya sotatonemarine, Yeso‑ya tokomakibonaha.

⁵¹Maki‑ya Yeso hiyare,

“Hini yamata‑ya tiwati koboniti?” Yeso ati ne,

“Ayo, owa noko amosawamabone, onani.” Batimeo ati nemarine.

⁵²“Sibarini, tika yobe‑ya tikamahi. Owati tinofa ihi tiwa noko amosawamawahineni.” Yeso ati nemarine.

Batimeo noko amosawame, yama‑ya awawahe, Yeso‑ya sawiwahemarine.

Boho mese‑ya Yeso itari

¹Yerosare‑ya mai koboni yanatonamaroni. Orifera adami yakari‑ya tabora bi‑bidi na, Betaniya toha, Befaki toha na, yakari‑ya mai kobona, Yeso hika mai da‑daba mai fama mai‑ya yosemarine.

²“A‑ahi‑ya mai tabori‑ya dai towakahi. Mai tabori‑ya dai towakiya, boho yetene yaditone dai awiya, dai disawaheya, dai kakamayaho. Hibati‑ya boho mese‑ya mai itariterani.

³‘Hini yamata‑bone boho yetene‑ya dai disawahiti?’ Mai ati niya,

‘Ai‑ka hidi haahinene.’ Dai ati niyahi.

Boho‑ya mai daanaboneni.” Yeso ati nemarine.

⁴Mai hiyose mai towaka, tabora‑ya mai kobokana, boho yetene wai‑ya mai awa, hawi fowari‑ya boho yetene wai, yobe‑ka nokobi‑ya yaditone, wai‑ya mai disawahameteni.

⁵Mai‑ya mai awa, mai ati yanana,

“Hini yamata‑bone boho yetene‑ya dai disawaha?” Mai ati nameteni.

⁶Yeso ati‑ya mai kamina, mai ati‑ya mai mita,

“Sibarini. Dai towakamaho.” Mai ati nameteni.

⁷Boho yetene‑ya mai kakama, boho mese‑ya mai‑ka bora‑ya mai sookanire, boho mese‑ya Yeso itariwahemarine.

⁸Yeso toke, Yeso hawine‑ya mai dama mai‑ka bora‑ya mai nawiya, awa afe‑ya mai one nawiya namaroni.

⁹Mai one dai toha, mai one yoto na, eya mai ati na, mai ati kitamaroni.

“Deoso ai kahiyarineni. Deoso tiwa‑ya yose, tiwa‑ya kasomayaho, oda ati nineni.

¹⁰Dafi ai‑ka idi tohematane.

‘Dafi‑ka nodi kitabote tohawahebona, hidi webote tohebonane.’ Deoso‑ka yama hani ati na,

fara oda‑ka hidi webote tihabone, oda ya‑yainineni. Deoso neme‑ya wine, Deoso ai kahiyarineni.” Mai ati namaroni.

¹¹Yerosare‑ya Yeso kobone, Deoso‑ka yobe‑ya toke, tokiyome, yama‑ya kiine, mahi toke ene Yeso hika mai da‑daba mai 12 kana mai eyehe Betaniya‑kaya winitonamatasemarine.

Fiko ade tamine

¹²Betaniya‑ya mai amona, mai yananamatasa, Yeso fimimarine.

¹³Aka‑ya fiko‑ya Yeso awe, fiko afe dama, fiko boni‑ya sibanebona fiko‑ya tonake, fiko bonora, abariko owa‑ya fiko bonoteni.

¹⁴Fiko bonora‑ya Yeso hiyare,

“Tiwa bono‑ya mai kabamateraboneni.” Yeso ati ne, ati‑ya hika mai da‑daba mai mitamaroni.

Yama‑ya mai da‑daa mai‑ya Yeso kananiwahe

¹⁵Yerosare‑ya mai kobona, Deoso‑ka yobe‑ya Yeso toke, yama‑ya mai one daa, mai one yama‑ya kanika na, mai‑ya Yeso kananiwahemarine. Yinero‑ya mai da‑daa mai‑ka mesa‑ya Yeso fatatokawiti, wayomata mai‑ya mai da‑daa mai‑ka kadera‑ya Yeso fatatokawiti nemarine.

¹⁶Deoso‑ka yobe‑ya yama‑ya mai daanabone yama‑ya mai kakamake mai‑ya Yeso awe, mai‑ya ati barinemarine.

¹⁷Mai‑ya kanawatobona, mai‑ya hiyare,

“‘Oka yobe‑ya mai tabori dami‑ya mai wi‑wina owa‑ya mai hiyaraboneni.’ Deoso‑ka yama hani ati na,

dai ene yama‑ya mai bo‑boti mai‑ka yobe‑nima yobe nawawahane.” Yeso ati nemarine.

¹⁸Hidi mai tohara Yeso ati‑ya mai mita, Yeso ati‑ya mai nofi nafemaroni. Yeso ati‑ya mai dama mai nofa, mai ihi mai‑ka hidi Yeso‑ya mai nayofinamaroni. Mose‑ka yama hani ati‑ya mai ka‑kamina mai toha, Deoso‑ka yama‑bone‑ya mai da‑daa mai‑ka hidi mai toha, mai na, Yeso‑ya mai nayofina, Yeso‑ya mai nanahababone mai ati namaroni.

¹⁹Mahi toke‑ya tabora one‑ya mai tokoma, Yerosare‑ya mai amoramaroni.

²⁰Yama wahabisari‑ya mai kamaminatasa, fiko nafi wayatona‑ya mai awamaroni.

²¹Fiko‑ya i‑di Bedoro awe, ati yanane,

“Ayo, fiko tiawahi. Weetina, tiwati‑nima wayatoneni.” Bedoro ati nemarine.

²²“Deoso ati dai nofahi.

²³Owati amosa dai mitahi. Deoso ati dai nofiya, dai ene kitabote tohawahaboneni.

‘Adami webote tibokahi.’ Dai ati niya,

‘Deoso kiteba awane.’ Dai atibodi ati riyahi,

‘Deoso kitatene.’ Dai atibodi ati nibisiya,

Deoso ene adami webote bokaboneni.

²⁴Deoso‑ya dai haaniya,

‘Yama haa·ona‑ya Deoso daanebonane.’ Dai atibodi ati nahi.

Haa‑nima dai atibodi ati niya, hini dai ati‑nima yama naboneni.

²⁵Deoso dai hiyariya, dai one‑ya dai ati somawamahi, dai‑ka Abi neme‑ke ati somawamaharibonaha.

²⁶Dai ati somawami awiriya, dai‑ka Abi neme‑ke ati somawamaharirebonane.” Yeso ati nemarine.

Yeso‑ya mai weena

²⁷Yerosare‑ya mai kamatasa, Deoso‑ka yobe‑ya Yeso tokiyome, yobe doro‑ya Yeso yakaneya, Mose‑ka yama hani ati‑ya mai ka‑kamina mai toha, Deoso‑ka yama‑bone‑ya mai da‑daa mai‑ka hidi mai toha, Yodeo mai‑ka hidi mai bi‑bidi na mai toha na, mai kamake, Yeso‑ya mai weenabone,

²⁸Yeso‑ya mai hiyara,

“Ebeni‑ke ati ene mai‑ya kanatiniti? Ebeni‑ke ati ene mesa‑ya fatatikawiti tiniti?” Mai ati namaroni.

²⁹“Dai ati omiti bahi, owati dai mitaboneni.

³⁰Yowaho Batita mai dama mai‑ya habanirise, ebeni‑ke ati ene tohati? Deoso ene tohe awane, ai owa ene toha ne awane, hini yamata‑nima dai ati nihi?” Yeso ati nemarine.

³¹Mai ibi hiyara,

“‘Deoso ati ene amane.’ Ai ati niya,

‘Hini yamata ihi Yowaho Batita ati dai nofariti?’ Yeso ati nebonane.

³²‘Ai owa ati ene amane.’ Ai ati niya,

oda‑ya mai bisinaboneni.” Mai ibi hiyara, mai ati namaroni.

Mai dama mai sawe, Yowaho Batita ati‑ya mai nofa,

“Yowaho Batita Deoso ati‑ya mai mi‑mita mai‑ka owa amane.” Mai dama mai ati namaroni.

³³Yeso‑ya mai hiyaramatasa,

“Yowaho Batita tamine oda wato awirini.” Mai ati na,

“Dai ati yanara, owati yananahariraboneni.” Yeso ati nemarine.

Ofa bodone tamine

¹Yeso mai‑ya kanawatobona mai‑ya hiyare,

“Ofa tabori‑bone‑ya hidi hawa tonihi, ofa noki‑ya kamane, yama ba‑barikana‑ya wamane, ofa ta‑tai‑ka hodi‑ya wamane, ofa‑ya mai na‑nawada‑bone mai tabori nemehe‑bone‑ya wamanamaki, yama yaki‑ya tokebona mai‑ya hiyare,

‘Oka awa bono dai nawadahi. Hadiya, one okayafa, one dai kayafa naboneni.’ Ofa hidi ati ne,

‘Hehe, sibarini.’ Mai ati namaroni.

Fa‑fai‑ya yama yaki‑ya hidi tokawahemarine.

²Ofa hadiya, ofa hidi‑ya mai na‑narifa mai‑ka owa‑ya yose,

‘Owa tabaro one‑ya tikamahi. Ofa one‑ya tiwa‑ya mai daaniya, ofa tiwakamiyahi.’ Hidi ati nene.

³Hika yo‑yose tokome, mai‑ya haane, ofa‑ya mai daara, hiniya mai bisihine, honita kamene.

⁴Hika fai‑ya mai na‑narifa owa‑ya yosemakitase, tokome, ofa‑ya haane, ofa‑ya mai daara, hika yo‑yose mai weehine, tati mai baahirine.

⁵Makobote ofa hidi hika fai‑ya mai na‑narifa owa‑ya yosemakitase, ofa‑ya haane, ofa‑ya mai daara, hiniya mai hinahabawahene. Hidi hika mai dami‑ya yose, hika mai one mai bisi, mai one mai hinahaba hinani.

⁶Ofa hidi hika fai‑ya mai na‑narifa mai one‑ya yosere, bidi‑ya yosebisane. Bidi‑ya nofi nafi,

‘Oka dao ati‑ya mai nofabisaboneni.’ Ofa hidi atibodi ati nene.

⁷12:1-9 Ofa hidi i‑di Deoso tamine amane. Ofa mai na‑nawada Yodeo mai‑ka hidi mai tamine amani. Ofa hidi hika fai‑ya mai na‑narifa i‑di Deoso ati‑ya mai mi‑mita‑mete mai tamine amani. Ofa hidi bidi i‑di Yeso tamine amane.Ofa hidi bidi kobone‑ya mai awa, mai ibi hiyara,

‘Bidi ai nanahabaho. Ai nanahabeya, badi abamakiya, mai‑ka yama nafi ai kayafawahaboneni.’ Mai ati nani.

⁸Bidi mai hinahabe, awa widi‑ya abo mai korohiwitine.

⁹Bidi abe tamine‑ya badi miteya, hini yamata‑nima ene nabati? Kamakiya, hika ofa‑ya mai na‑nawada‑maro mai‑ya nanahabeya, mai one‑ya ofa‑ya hidi daanebonane, mai hinawadawahabonehe.

¹⁰12:10 Yobe‑ya mai wa‑wama Yodeo mai‑ka hidi mai tamine amani. Awa towe‑mona Yeso tamine amane.Fara Deoso‑ka yama hani ati timitahi,

‘Yobe‑ya mai wa‑wama awa mai werehiwite, yobe tati mese ewene tohawahemarine.’ Deoso‑ka yama hani ati nineni.

¹¹Deoso ene ai awemari, ai ya‑yainineni.” Yeso ati nemarine.

¹²Yeso ati‑ya mai mita, mai yawa,

“Ofa‑ya mai na‑nawada mai tamine‑ya Yeso hiyare, fara oda tamine amani. Yeso ati kasirone.” Mai ati namaroni.

Yeso‑ya mai watabone mai ati na, Yeso‑ya mai watara, mai dama mai‑ya mai nayofina, hiniya mai tokomamaroni.

“Yeso ati tosawariba awane.” Mai one atibodi ati na

¹³Mai toki hawa tohiya, fariseo mai one toha, i‑di Erodi‑ka mai one toha, mai na, mai‑ya mai yosemaroni, Yeso‑ya mai hiyarabonehe.

“Oda ati ene Yeso ati tosawariya, mai dama i‑di Yeso ati‑ya mai nofamaraboneni. Yeso oda weenaboneni.” Mai atibodi ati namaroni.

¹⁴Fara Yeso‑ya mai tokomake, Yeso‑ya mai hiyara,

“Ayo, keyehe‑ya hirititerani. Mai nafi tinofa, mai one tinofi bi‑bidi tini awirani. Deoso ati tikamini amose, ene tiwati oda mitaboneni. Homano mai‑ka hidi webote i‑di Sesa tohe, fare ai‑ka yinero‑ya haanene.

¹⁵Ai‑ka yinero‑ya mai haaniya, yinero ai daanibaraniha? Sesa‑ka yinero‑bona ai daaniya, sibakarini?” Mai ati namaroni.

Mai atibodi ati‑ya Yeso wato, ati yanane,

“Owa‑ya dai watabone dai ati amani. Yara‑ka yinero ohari dai kakamahi.” Yeso ati nemarine.

¹⁶Yinero ohari‑ya mai kakamamaroni.

“Yinero dai awahi. Ebeni‑ke korimari‑ya oni fama?” Yeso ati ne,

“I‑di Sesa korimari, oni ne, yinero‑ya waanane.” Mai ati namaroni.

¹⁷“Sesa‑ka yama‑ya Sesa‑ya dai daatonama, Deoso‑ka yama‑ya Deoso‑ya dai daatonamahari, dai nahi.” Yeso ati nemarine.

Yeso ati‑ya mai mita,

“Ka! Yeso yama‑ya watone.” Mai atibodi ati namaroni.

¹⁸Sadoseo mai one kamakemaroni, Yeso ati‑ya mai mitabonehe.

“Ai aba ai kitamaterani.” Sadoseo mai ati teni.

Mai kobona, Yeso‑ya mai hiyara,

¹⁹“Yeso, tiwati oda mitaboneni. Hibati‑ya i‑di Mose yama hikanahanamete tamine timitahi,

‘Ayo abeya, fadi hasina, bidi, bide, mai na, mai wadara, anidi fadi‑ya famawahiyaho. Bidi wadeya, anidi abemari oni‑ya bidi weyenayaho.’ Mose‑ka yama hani ati nineni.

²⁰Ai owa sohori mai 6 kana, fane, kahiware, abemarine.

²¹Fadi‑ya sohori famawahe, kahiware, abamakitase, fadi‑ya sohori yoto‑ke famamakitase, kahiware, abamakitasemarine.

²²Fara hinama mai fana, mai kahiwara, mai nafi aba, mai‑ka yibote abamakemaroni.

²³Yeso, oda ati timitahi. Mai nafi‑ka yibote tohamaro, mai kitamiya, ebeni‑ke fadi tohawahibati?” Sadoseo mai ati namaroni.

²⁴Yeso mai‑ya hiyare,

“Deoso‑ka yama hani dai watorihi, Deoso ene dai watorihi, dai na, dai tosawarineni.

²⁵Mai aba Deoso ati ene mai kitamiya, neme‑ya mai winiya, mai fanamateraboneni. Deoso‑ka yo‑yose mai‑nima mai naboneni.

²⁶Ai aba, ai kitamaterabone dai ati na, Mose‑ka yama hani dai awaterini? Awa hirini‑ya i‑di Mose‑ya Deoso hiyare,

‘I‑di Abaraho, i‑di Isaki, i‑di Yako mai na, mai‑ka Deoso ama·oni.’ Deoso ati nematamonane.

²⁷Hibati‑ya mai abametemoneni. Mai wadamara mai‑ka Deoso tohaterene. Mai korimari hasinibisa, mai‑ka Deoso amane. Yama dai wato awirini.” Yeso ati nemarine.

²⁸Mose‑ka yama hani ati‑ya mai ka‑kamina owa ohari Yeso ati‑ya mite,

“Yeso yama‑ya watone.” Atibodi ati ne, ati yanane,

“Yeso, ai ene tamine‑ya Mose kanahanomatamonane. Yama hani ati one amosabote owa‑ya tikaminamakihi.” Ati nemarine.

²⁹Deoso‑ka yama hani ati‑ya i‑di Yeso kamine,

“‘Isara·eo‑ka dai amani, owati dai mitahi. Ai‑ka hidi webote i‑di Deoso tohe, owa wadaterene.

³⁰Ai‑ka hidi webote i‑di Deoso dai nofi nafihi. Yama one dai nofi nafiriyahi. Deoso‑ta dai nokotonibisahi.’ Yama hani ati na, ati amosabote amani.

³¹Makobote Deoso‑ka yama hani ati,

‘Hini tiwa tinofi‑nima dai yakari‑ya mai sawe mai tinofiyahi.’ Yama hani ati namatasa,

ati amosabote amani. Deoso‑ka yama hani one ati amosi bi‑bidi nibisateni.” Yeso ati nemarine.

³²Mose‑ka yama hani ati‑ya mai ka‑kamina owa ati yananamatase,

“Hehe, tiwati‑nima yama teni. Deoso oharibisane, owa wadaterene.

³³Deoso ai nofi nafibisahi. Ai‑ya ai nofi‑nima ai yakari‑ya mai sawe mai‑ya ai nofaharihi. Haa‑nima ai niya, Deoso ya‑yaini nafibonane. Yamata, bani ne Deoso‑ya ai daaniya, Deoso ya‑yaini bi‑bidi nebonane.” Maki ati nemarine.

³⁴“Maki ati amose, yama‑ya watone.” Yeso atibodi ati nemarine.

Maki‑ya Yeso hiyare,

“Deoso ai nafi‑ka hidi kitabote tohawaheya tisaweba awineni.” Yeso ati nemarine.

Yeso yama‑ya wato, Yeso‑ya mai nafi nayofina, mai ati fawanawahamaroni.

Mose‑ka yama hani ati‑ya mai ka‑kamina mai tamine

³⁵Deoso‑ka yobe‑ya mai‑ya Yeso kanawato,

“Mose‑ka yama hani ati‑ya mai ka‑kamina haa‑nima mai ati teni.

‘Deoso‑ka Ka‑kadika Dafi‑ka nodi amane.’ Mai ati teni.

³⁶Deoso‑ka Ka‑kadika tamine‑ya i‑di Dafi kanahano, ati dai mitahi.

‘Oka hidi webote‑ya Deoso hiyare, —Owa mano kanika‑ya tiwitarihi. Owati ihi tiwa‑ya mai ka‑kako mai‑ka hidi tihawahaboneni.—’

Deoso‑ka Ka‑kadika tamine‑ya Dafi atibodi‑ya Deoso‑ka Doni kamine, yama hani‑ya Dafi kanahanomatamonane.

³⁷Deoso‑ka Ka‑kadika i‑di Dafi‑ka hidi webote tohemona i‑di Dafi ati nematamonane. Fare Dafi‑ka nodi tohe, i‑di Dafi‑ka hidi webote tohahari ne.” Yeso ati nemarine.

Mai dama Yeso ati‑ya mai mita, mai ya‑yainamaroni.

³⁸Yeso mai‑ya kanawato, mai‑ya hiyaramatase,

“Dai noko wadahi. Mose‑ka yama hani ati‑ya mai ka‑kamina dai‑ya mai nokotoniteni, mai‑ya dai kahiyarabonehe. Fara yama ai ka‑kanika‑ke yobe‑ya mai naha, bora yaba‑ya mai sakona;

³⁹Deoso‑ya mai hi‑hiyara‑ke yobe‑ya mai sawe, kadera amosa‑ya mai nahore; dai yorotokana, dai tafabone, mai sawe, kadera amosabisa‑ya mai nahore,

⁴⁰Deoso‑ya mai hiyariya, mai hiyari yaboteni, mai dai kahiyarabonehe. Mai fanawi mai‑ka yibote mai aba mai‑ka yama‑ya mai kayafateni. Mai ihi towe manakone nafibisaboneni.” Yeso ati nemarine.

Fana yahi hone wadara yinero‑ya daana

⁴¹Deoso‑ka yobe doro‑ya yinero weyene wai yowi‑ya Yeso itari, mai dama mai‑ya kakatome, Deoso‑ka yinero‑bona‑ya mai daana, mai one yinero webote dame‑ya mai kiha yinero webote‑ya mai daanamaroni.

⁴²Fana kamake, maki abemata, honita wahawama, yahi hone wadara, hika yinero bidi fame‑ya daanamaroni. Hika yinero yorotokawame manakone i‑isi nemarine. Yinero daani‑ya Yeso awe,

⁴³hika mai da‑daba mai‑ya haane, ati yanane,

“Owati amosa dai mitahi. Fana honita wahawama yama nafi‑ya daaneni. Mai one‑ta yama nafi‑ya mai daani awirani.

⁴⁴Mai‑ka yinero dame, owa‑ya mai daana, mai‑ka yinero dame hasinane. Fana‑ka yama wadatera, hika yinero bidi fame‑ya daana, hika yinero owa hasini awire, tafe manakone‑bone‑ya daanibisineni.” Yeso ati nemarine.

Yama nabone tamine

¹Yeso yananame, Deoso‑ka yobe fowari‑ya hika mai da‑daba mai‑ka owa ati yanane,

“Ayo, Deoso‑ka yobe amosi nafine. Yati amosa wamani amani.” Ati nematane.

²“Owati dai mitahi. Hibayata yobe amose‑ya dai awineni. Yama one‑ya yobe wadamarebona, yati fama demenarimaraboneni.” Yeso ati nematane.

³Orifera adami‑ya mai kobona, mai nahokosameteni. Adami tati one‑ya Deoso‑ka yobe‑ya mai awameteni. Bedoro, Tiyako, Yowaho, Anidere, mai na, Yeso‑ya mai daba, Yeso‑ya mai hiyara,

⁴“Eme ai amoni niya, yobe ababonati? Yama koboni yanatoniya, hini yamata oda awibati, yama‑ya oda watowahi‑bone‑karo?” Mai ati nameteni.

⁵Mai ati‑ya Yeso mite, mai‑ya hiyare,

“Dai noko wadahi. Dai‑ya mai keyeheriyahi.

⁶‘Deoso‑ka Ka‑kadika ama·oni.’ Mai dama mai ati naboneni.

Mai‑ka keyehe‑ya mai dama mai nofawahaboneni.

⁷Wami hidi mai ibi nofaraboneni. Mai‑ka sodado mai‑ya mai yoseya, mai‑ka sodado mai ibi taonabone, mai tamine dai mitiya, dai habo siitoriyahi. Yama faina‑bone koboni awisarini. Yama one‑ya kobonaboneni.

⁸Owati dai mitamatasahi. Wami one‑kaya mai wi‑wina mai‑ka sodado ahini‑kaya mai kakeboneni, mai dami‑ya mai nanahababonehe. Ahini‑kaya mai wi‑wina mai‑ka sodado maa kowani‑kaya mai toka naboneni, mai‑ya mai nanahababonehe. Wami wawawakana, mai dami fimi ihi mai aba naboneni. Haa‑nima yama na dai awiya, yama faina‑bone koboni yanatoneni. Fana dori wadabone dori kome yanani kita, dori wada kanibote na‑nima yama na tiwiya, yama faina‑bone yana kanibote naboneni.

⁹Dai noko wadahi. Mai‑ka hidi bidi mai dama mai‑ya dai‑ya mai daanabone, Deoso‑ya mai hi‑hiyara‑ke yobe‑ya dai‑ya mai bisinaboneni. Yara mai‑ka kofenado mai toha, mai‑ka hidi webote mai toha na, mai ati ihi dai‑ya mai wataboneni. Mai noki‑kaya dai nahoya, owa tamine‑ya mai‑ya dai hiyaraboneni.

¹⁰Fara mai tabori nafi‑ya mai wi‑wina Deoso ati amosabote tamine‑ya mai miti dai tohiya, yama faina‑bone yananaboneni.

¹¹Dai‑ya mai watiya, dai‑ya mai kahabaniya, dai ati‑ya mai mitabone, dai atibodi yama‑ya kadikariyahi. Deoso‑ka Doni ene yama‑ya dai watowahabone, ati‑nima dai ati yananahi.

¹²Dai‑ka dai‑ya mai kahabanaboneni, dai‑ya mai nanahababonehe. Anidi sohori‑ya kahabana, badi bidi‑ya kahabana, mai‑ka madehe badi, madi mai na, mai‑ya mai kahabana, mai naboneni, mai mai hinahababonehe.

¹³Owa dai nofa dai‑ya mai nafi kakaboneni. Owa oni dai saatonakosi awiriya, dai sibaraboneni.

¹⁴‘Deoso‑ka yobe‑ya deoso bare‑ka yama waabone, fara ihi Deoso‑ka yobe towe tohawahebonane.’ Deoso‑ka yama hani ati nineni.

(Yama towe waa, dai awiya, dai atibodi yama‑ya kadikahi, dai watowahabonehe.)

Deoso‑ka yobe doro‑ya yama towe wai, dai awiya, dai kananiyahi. Yodeya‑ya dai wi‑wina adami webote‑kaya dai tokiyahi.

¹⁵Yama siri‑kaya dai naha, dai yehe honene yobe doro‑ya towadakosa, dai tonakamariyahi. Hiniya dai kananahi.

¹⁶Fadara‑ya yama dai anina, dai‑ka bora one yobe‑ya toha, yobe‑ya dai tokomariyahi. Hiniya dai kananahi.

¹⁷Ka! Mai fanawi naba toha, mai‑ka madehe i‑isi na mai toha na, mai kananiya, yama ati kasiraboneni.

¹⁸Deoso dai hiyarahi. Yama siri kiti awiri‑ya yama towe yanana, amosabisaboneni.

¹⁹Yama towe koboniya, dai‑ya mai kako nafe, dai‑ya mai bisi, dai‑ya mai nanahaba naboneni. Hibati‑ka yama‑nima yama nami awiraboneni. Deoso‑ka dai toha, dai‑ya mai kako bi‑bidi namete, dai‑ya mai kako ba‑basi nawahaboneni. Haa‑nima yamana kobonamatasateraboneni.

²⁰Haa‑nima yama niya, yama nahoraboneni. Deoso yama‑ya maakanebonane. Deoso yama‑ya maakare‑mana, dai nafi aba neni. Hibati‑ya Deoso hika mai‑bone mai‑ya kayawemata, yama towe‑ya Deoso maakanebonane, hika mai one hasinabonehe.

²¹Dai‑ya mai keyehebone,

‘Deoso‑ka Ka‑kadika kobone, ahiyata sawine.’ Mai one ati nihi,

‘Deoso‑ka Ka‑kadika tabora one‑ya sawine.’ Mai one ati nihi naboneni.

Haa‑nima mai ati na, mai ati dai nofariyahi.

²²‘Deoso‑ka Ka‑kadika ama·oni.’ Mai one ati naboneni, keyehe‑ya mai hirinaro.

‘Deoso ati‑ya mi‑mita ama·oni.’ Mai one ati nihi naboneni.

Mai ihi kitaboneni, Deoso‑ka dai toha mai‑ka keyehe‑ya dai nofabonehe.

²³Dai noko wadahi. Yama tamine okamina, koboniya, yama‑ya dai watowahaboneni.

²⁴Dai‑ya mai bisina mai amoni tosiyoya, mahi wehene fawa, abariko wehene fawa,

²⁵amowa mai dama bofe‑ya mai fororo, neme‑kaya yama nafi wawawakana naboneni.

²⁶Dai‑ka Ayo neme‑ke‑ya mai awabone, neme sabi‑ya kisameya, wehene nafibonane. Ene kiti nafibonane.

²⁷Deoso‑ka yo‑yose mai one oyoseboneni, hika mai‑ya mai yababonehe. Wami nafi‑ya mai wi‑wina Deoso‑ka mai‑ya mai yorotokanaboneni.

²⁸13:28 Mai tabori‑ya yama siri‑ya awa afe aba, yama hiwe koboni yanatoniya, awa afe yanamatasateni.Dai‑ya okanawataboneni. Fiko ai awiya, ini fahi kobonama, afe yanama, yama hiwe kakebone ai watoteni.

²⁹Owati‑nima yama niya, dai‑ka Ayo neme‑ke koboni yanatone, kobo kanibote nebonane.

³⁰Owati amosa dai mitahi. Owati‑nima yama yanana‑ya mai awiya, mai one hasinasa niya, dai‑ka Ayo neme‑ke kobonebonane.

³¹Owati‑nima yama naboneni. Neme, bofe na, ababisabone, owati‑ta abateraboneni.

³²Dai‑ka Ayo neme‑ke amoni, hika ora ne dai watorihi, Deoso‑ka yo‑yose neme‑ya mai sawe, mai hiwatorihi, Deoso Bidi hini amoni‑ya watorihi nane. Okobi ohari hiwatobisineni.

³³Dai noko wadahi. Dai‑ka Ayo neme‑ke kobonebona, hika mahi dai wato awirani.

³⁴Mai‑ka hidi kobonamebona‑ya mai nimana mai‑nima dai‑ka Ayo neme‑ke‑ya dai nimanahi. Yama yaki‑ya maki tokebona, hika fai‑ya mai na‑narifa mai‑ya yosene. Hika yo‑yose owa nokobi‑ya waibona‑ya yosenane, maki kamataseya, nokobi‑ya seekana kanibote nebonaha.

³⁵Nokobi‑ya wa‑waa yama‑ya anine, noko wadi‑nima dai noko wadahi. Dai‑ka Ayo neme‑ke kobonebona hika mahi dai watorihi, hika ora dai watorihi, dai na, mahi toke toha, yama soki bai toha, yama wahi yanatoni toha, yama wahabisari toha na, yama dai wato awirini.

³⁶Mai amona mai‑nima dai riyahi. Dai noko wadahi. Dai‑ka Ayo neme‑ke kobo kanibote nebonane.

³⁷Dai fa‑famaraba na dai sawe, dai‑ya ohiyara, mai nafi‑ya ohiyarahari neni. Dai noko wadahi!” Yeso ati nematane.

Mai‑ka feriado kobonabone

¹Ai amoni fami‑ya ka‑kariwa kobonabone‑ka semana‑ya baho femeto‑ya ketehera‑ya Yodeo mai kabateni. Deoso‑ka yama‑bone‑ya mai da‑daa mai‑ka hidi mai toha, Mose‑ka yama hani ati‑ya mai ka‑kamina mai toha, mai na, mai yorotokana, Yeso‑ya mai kaka, mai awiri‑kaya Yeso‑ya mai wataboneni, Yeso‑ya mai nanahababonehe.

²Mai ibi hiyara,

“Ai marinasa niya Yeso‑ya ai watiya, mai dama mai yawaba awineni. Ai marini hawa tohiya, Yeso ai wataboneni.” Mai ibi hiyara, mai ati namaroni.

Yeso tati‑ya fana ketehe

³Simaho hibati‑ya mese towe tohemari, kitamemarine. Betaniya‑kaya Simaho‑ka yobe tohe, Simaho‑ka yobe‑ya mai tafiya, yama mahi amosa‑ya fana damakana, kamakemaroni. Yama mahi amosa oni narado toha, manakone nafe, yati amosa wamani‑ya wiye toha, noki tabori bakahinakosa, Yeso tati‑ya sorohikaremaroni.

⁴Fana ihi‑ya mai awa, mai one yawawaha, fana‑ya mai weenabone, mai ibi hiyara,

“Hini yamata‑bone yama mahi amosa‑ya Yeso tati‑ya fana sorokariti? Yama mahi amosa manakone fotateni.” Mai ibi hiyara, mai ati namaroni.

⁵“Yama mahi amosa manakone fota, yama anini mahi 300 kane‑ka manakone‑nima manakone na, yama mahi amosa Yeso tati‑ya sorokarira‑mani, oda‑ya daatibisiya, oda daaniya, manakone oda waratokaniya, yinero‑ya mai kihara mai‑ya yinero oda daaniya, yama sibara neni.” Fana‑ya mai weena, mai ati namaroni.

⁶Yeso mai ati‑ya mite, ati yanane,

“Dai ati fawanahi. Fana ihi amosineni.

⁷Yama mai kihara dai‑ya mai dabateboneni. Mai dai ati kasoma, mai‑ya dai kasomaba awineni. Owa‑ta owa sawi yaboraboneni.

⁸Mai abiya, mai abo‑ya yama mahi amosa‑ya dai sorokariteni. O·ababone, owa‑ya fana sorokari dai toha, ihi amosineni.

⁹Owati amosa dai mitahi. Yama nafi‑kaya Deoso ati amosabote tamine‑ya mai hiyariya, fana ihi amosa tamine‑ya mai hiyarahareboneni.” Yeso ati nemarine.

Yeso‑ya Yoda daanebona

¹⁰Yeso‑ka mai 12 kana mai‑ka owa i‑di Yoda Isikari·oti Deoso‑ka yama‑bone‑ya mai da‑daa mai‑ka hidi mai‑ya toke, mai‑ya hiyarematane, Yeso‑ya kahabanebonaha.

¹¹Yoda ati‑ya mai mita, mai ya‑yaina,

“Hehe, tika yinero‑ba oda daanaboneni.” Mai ati nameteni.

Yoda toke,

“Mai awiri‑ya Yeso daa·onaboneni.” Atibodi ati nematane.

Yeso‑ka ka‑kariwa faina

¹²Ka‑kariwa yananiya, Yeso‑ya mai da‑daba mai ati yanana,

“Ebeni‑kaya ai marinibati? Ai tefe‑ba oda aninabonehe.” Mai ati namaroni.

Ka‑kariwa yananiya, kaneiro bidi‑ya Yodeo mai tabasiteni.

¹³Yeso hika mai da‑daba mai fama mai‑ya yose,

“Tabora‑ya dai towakahi, dai kobokaniya, maki faha‑ya damakane dai awaboneni. Faha‑ya damakane nowati‑ya dai towakamakiyahi.

¹⁴Yobe‑ya dai kobokaniya, yobe hidi dai hiyariya,

‘Ebeni‑kaya oka mai da‑daba mai eyehe otafibati? Ai‑ya ka‑kanawato ati nene.’ Dai ati niyahi.

¹⁵Hika yobe waari nemehe, neme‑ke kote honita tohe‑ya dai‑ya yofikanebonane. Yobe kote‑ya mesa kaware, fara‑ya ai tefe‑ba dai hawa tohiyahi.” Yeso ati nemarine.

¹⁶Tabora‑ya mai towaka, Yeso ati‑nima yama na‑ya mai awa, ka‑kariwa‑ka yamata‑bone‑ya mai aninamaroni.

¹⁷Mahi bidi‑ya Yeso hika mai 12 kana mai eyehe kobonamakimarine.

¹⁸Mesa‑ya mai nahore, mai tafa, mai‑ya Yeso hiyare,

“Owati amosa dai mitahi, owa‑ya dai‑ka owa daanebona, ai tafa ai‑ya sawine.” Ati nematane.

¹⁹Yeso ati‑ya mai mita, mai atibodi a‑arira,

“Owa tohi awiraba awineni.” Mai nafi ati nameteni.

²⁰“Oka dai toha, dai 12 kana dai‑ka owa ohari owa‑ya daanebona, yama wiye ohare‑ya owa eyehe tafane.

²¹Dai‑ka Ayo neme‑ke abebona, yama hani ati na, fara yama hani ati‑nima abebonane. Owa‑ya kahabane‑ka ene towe manakone nafeboneni. Ka! Wadare‑mana, yama amosabisa neni.” Yeso ati nematane.

²²Mai tafa, baho‑ya Yeso damane, Deoso‑ya hiyare, baho‑ya bakanakose, hika mai da‑daba mai‑ya baho‑ya daane, ati yanane,

“Dai kabahi. Owa abano tamine‑bone amani.” Yeso ati nematane.

²³Keneko‑ya fino‑ya Yeso damakane, Deoso‑ya hiyare, fino‑ya mai‑ya daane, fino mai nafi fawameteni.

²⁴Fino‑ya mai fawiya, Yeso ati yanane,

“Owa emene tamine‑bone amani. Owa emene tokabone, o·ababone, mai dama mai ihi manakone onahababoneni.

²⁵Owati amosa dai mitahi. Deoso ai nafi‑ka hidi kitabote tohawahebona, yanani awisareya, awa bono fahi ofimaterabone, yananeya, awa bono fahi wamani yati ofimatasaboneni.” Yeso ati nematane.

²⁶Deoso‑ka wayoma ohare‑ya mai hirina, makobote Orifera adami‑kaya mai tokameteni.

Yeso‑ka mai kananabone

²⁷“Dai kananabone, owa‑ya dai dabamaraboneni. Deoso‑ka yama hani ati‑nima yama nabone,

‘Kaneiro mai‑ya na‑nawada onahabiya, kaneiro mai kananaboneni.’ Deoso‑ka yama hani ati nineni.

²⁸Okitamiya, Karireya‑kaya okabone, owa‑kaya dai tokomakiyahi.” Yeso ati nematane.

²⁹“Ayo, mai kananibisaba awineni. Owa‑ta kana·oraboneni.” Bedoro ati nematane.

³⁰14:30 Arakawa haani, ora tamine tohe awane. Hibati‑ya mai‑ka herosa wadare, sidadi webote‑ya maki ohari ora‑ya midikane, yama soki bai‑ya, mahi nokorise‑ya ho‑hori‑ya haane, yama wahi yanatoni‑ya ho‑hori‑ya haanamatasatene. Yama wahi yanatoni‑ka ho‑hori tamine toha awini.“Bedoro, owati timitahi.

‘Yeso owatorini.’ Tinabone,

tiwati yanani 3 kaniya, arakawa haani famebonane.” Yeso ati nematane.

³¹“Ai fama, ai ababa awineni. O·abi‑ya yama sibaraboneni.

‘Yeso owatorini.’ Oteraboneni.” Bedoro ati ne, ati kitematane.

Haa‑nima mai nafi ati nameteni.

Kesemani‑ya mai toka

³²Kesemani‑kaya mai toka, Yeso hika mai da‑daba mai‑ya hiyare,

“A‑ahi‑ya dai nahohi. Ahiyata‑ya Deoso ohiyaraboneni.” Yeso ati nematane.

³³Bedoro, Tiyako, Yowaho mai na, mai‑ya Yeso himane, ahiyata‑ya mai toka, Yeso atibodi a‑arirematane.

³⁴Mai 3 toha mai‑ya Yeso hiyare,

“Owatibodi yawi kitini. Fara yawa ihi o·abi yanatoneni. A‑ahi‑ya dai naha, dai noko wadahi.” Yeso ati nematane.

³⁵Ahiyata‑ya Yeso toke, yama kobonabone‑ya nofare, homeya, hini tamine‑ya Deoso‑ya hiyare,

³⁶“Abi Deoso, kitabote amatini. Yama kobonabone onofarini. Owati‑nima yama riyahi. Hini tiwati‑nima yama nibisiyahi.” Yeso ati nematane.

³⁷Yeso waamisame, kame, hika mai amona, Bedoro‑ya hiyare,

“Simaho, amotiriyahi.

‘Dai noko wadahi.’ Ona,

ora ohari awisareya hiniya amotineni.

³⁸Dai noko wadahi. Deoso‑ya dai hiyarahi, Satanasi ati‑ya dai tokadabarabonehe. Dai atibodi amosa, dai abano kitarani.” Yeso ati nematane.

³⁹Ahiyata‑ya Yeso tokomatase, Deoso‑ya hiyare, hini ati‑nima ati namatasematane.

⁴⁰Yeso kamatase, nokobisa nafe ihi mai amonamatasa, mai‑ya hiyaramatasematane. Mai dodafiya, mai ati yanani awirameteni.

^41-42Yeso tokomatase, kamatase, mai amonamatasameteni.

“Dai dodafihi, dai amonaro. Hibayata Deoso ati‑ya mai tokadabara mai‑ya owa‑ya daanebona kamane, ahiyata‑ya. Dai nahomisamahi. Ai tokomahi.” Yeso ati nematane.

Yeso‑ya mai wata

⁴³Yeso hiyaranasa neya, mai 12 kana mai‑ka owa i‑di Yoda mai dama mai eyehe kamemarine. Deoso‑ka yama‑bone‑ya mai da‑daa mai‑ka hidi mai toha, Mose‑ka yama hani ati‑ya mai ka‑kamina mai toha, Yodeo mai‑ka hidi mai bi‑bidi na mai toha, mai na, mai ati ihi Yoda‑ya mai dami sawemaroni. Yima‑ya mai one aka, awa‑ya mai one aka namaroni.

⁴⁴Hibati‑ya Yoda mai‑ya hiyare,

“Yeso‑ya dai‑ya yofi·okanabone, Yeso toma·onabone, fare dai waratoneya, sekorasa mai dai dabiya dai towakamayaho.” Ati nematane.

⁴⁵Yeso‑ya Yoda kame,

“Ayo” ati ne, fai‑ya tomanemarine.

⁴⁶Yeso‑ya mai waratonamaroni, fai‑ya mai towakamabonehe.

⁴⁷Maki yima‑ya nawaane sawi, yima‑ya sobanaki, Deoso‑ka yama‑bone‑ya mai da‑daa mai‑ka hidi webote‑ya na‑narifa narabo‑ya tarinabasemarine.

⁴⁸Mai sawe mai‑ya Yeso hiyare,

“Yima‑ya dai aka, awa‑ya dai aka nineni, owa‑ya dai watabonehe. Yama‑ya mai bo‑boti mai wati‑nima owa‑ya dai watinineni. Yama bo‑boti ohi awirini.

⁴⁹Hibati‑ya mahi‑nima Deoso‑ka yobe‑ya mai okanawata, owa‑ya dai wataramaroni. Deoso‑ka yama hani ati‑nima yama nawahabone ihi owa‑ya dai watineni.” Yeso ati nemarine.

⁵⁰Yeso‑ya mai da‑daba mai habi siitona, mai kananamaroni.

⁵¹Maki yetene bora saya‑nima na‑ya weyene, hika bora famaramaroni. Yeso‑ya mai towakama mai nowati‑ya maki tokomakiya, sekorasa mai awa, mai hiwatemarine.

⁵²Maki bodi kanani toke, hika bora mai damahinakosamaroni.

Yeso‑ya mai weena

⁵³Deoso‑ka yama‑bone‑ya mai da‑daa mai‑ka hidi webote‑ka yobe‑ya Yeso‑ya mai towakamameteni. Deoso‑ka yama‑bone‑ya mai da‑daa mai‑ka hidi mai toha, Mose‑ka yama hani ati‑ya mai ka‑kamina mai toha, Yodeo mai‑ka hidi mai bi‑bidi na mai toha, mai na, hidi webote tabaro‑ya mai yorotokanameteni.

⁵⁴Yama yaki‑ya Bedoro yotomatane. Deoso‑ka yama‑bone‑ya mai da‑daa mai‑ka hidi webote‑ka yobe fowari barikane doro‑ya tokomaki, sekorasa eyehe itabase, yifo‑ya mai hiwanameteni.

⁵⁵Deoso‑ka yama‑bone‑ya mai da‑daa mai‑ka hidi mai toha, Yodeo mai‑ka hidi mai one nafi toha na, mai yorotokanameteni, Yeso‑ya mai nanahababonehe. Yeso tamine‑mona‑ya keyehe‑ya mai hirinabone mai‑ya mai sibanameteni. Mai‑ka keyehe fara hinama kafamabone mai‑ya mai wasirameteni.

⁵⁶Yeso tamine‑mona‑ya mai dama keyehe‑ya mai hirina, owa ati bare toha, owa ati bare toha, owa ati bare toha, mai nameteni, keyehe‑ya mai hirinaro.

⁵⁷Mai one‑ya mai keyehebone mai nahomisa, mai ati yanana,

⁵⁸“‘Deoso‑ka yobe maki mai wamahinemata onahabeya, amoni 3 kane‑ya wama·onamatasaboneni. Owati yananiya, yobe hawa tohebonane.’ Yeso ati nene.” Mai one ati nameteni.

⁵⁹Mai ati fara hinama tohi awirameteni.

⁶⁰Deoso‑ka yama‑bone‑ya mai da‑daa mai‑ka hidi webote waamise, ati yanane,

“Yeso, mai ati timitineni? Hini yamata‑nima tiwati nibati?” Ati nematane.

⁶¹Yeso ati yanani awire, mai‑ka hidi ati yananamatase,

“Deoso‑ka Ka‑kadika amatiraniha? Deoso Bidi amatini?” Ati nematane.

⁶²Yeso ati yanane,

“Fara ama·oni. Deoso mano kanika‑ya owitariya, owa‑ya dai awa, neme sabi‑ya okomatasiya, owa‑ya dai awa naboneni.” Yeso ati nematane.

⁶³Yeso ati‑ya mai‑ka hidi webote mite, yawe, hika bora namidi‑ya sibikari, ati yanane,

“Ati dai mitaho. Mai one ati tohiya, Yeso hini ati ene abaho.

⁶⁴Deoso Bidi‑mona ati ne, keyehe‑ya hirine, haa‑nima mai ati na, mai‑ya ai nanahabateni. Hini yamata‑nima dai ati niti?” Mai‑ka hidi webote ati nematane.

“Yeso towe amane. Abaho!” Mai nafi ati nameteni.

⁶⁵Yeso‑ya mai firo, Yeso noko mai barihikane, mai one koohinisa hine,

“Ebeni‑ke tiwa‑ya koonisa?” Mai ati nameteni.

Sekorasa Yeso‑ya mai towakama, Yeso noko‑ya mai batanameteni.

“Yeso owatorini.” Bedoro ati ne

⁶⁶Yobe fowari barikani nafi doro‑ya mai dama mai naha, mai‑ya Bedoro wai‑ya Deoso‑ka yama‑bone‑ya mai da‑daa mai‑ka hidi webote‑ya na‑narifa one atona kamakemeteni.

⁶⁷Bedoro yifo‑ya hiwane‑ya atona awa, ati yanana,

“Yeso Nasare‑ke‑ya sa‑sawi amatiraniha?” Atona ati na,

⁶⁸“Maki‑ya osawiterani. Tiwati owatorini.” Bedoro ati ne,

yobe fowari barikane‑ka nokobi‑kaya toke, waimatane.

⁶⁹Mai one sawe, Bedoro tamine‑ya atona hiyara,

“Nokobi‑kaya wai Yeso‑ya mai da‑daba mai‑ka owa amane.” Atona ati na,

⁷⁰“Yeso‑ya osawiterani.” Bedoro ati namatasematane.

Mai naho bide tohiya, Bedoro‑ya mai one hiyara,

“Yeso‑ya mai da‑daba mai‑ka owa amatini. Karireya‑ya mai wi‑wina mai‑ka owa amatini.” Mai ati nameteni.

⁷¹“Keyehe‑ya hiri·oterani. Keyehe‑ya hiri·oniya, Deoso owa‑ya nanahabeba awane. Maki owato awirini.” Bedoro ati nematane.

⁷²Bedoro ati fawaneya, arakawa haani yananamatasematane. Arakawa haani‑ya Bedoro mite, Yeso ati‑ya Bedoro atibodi watinawame,

“Arakawa haani yanani fami awisareya,

‘Yeso owatorini.’ Tinaboneni.

Tiwati yanani 3 kana boneni.” Yeso ati ne,

ati‑ya Bedoro atibodi watinawame, ohinawahematane.

Birato‑ya Yeso‑ya mai towakama

¹Yama wahabisari‑ya Deoso‑ka yama‑bone‑ya mai da‑daa mai‑ka hidi mai toha, Mose‑ka yama hani ati‑ya mai ka‑kamina mai toha, Yodeo mai‑ka hidi mai one nafi toha, mai na, mai ibi hiyara, mai ati ihi Yeso mano‑ya mai sokikasa, Birato‑ya Yeso‑ya mai towakama, mai daahinemarine.

²Yeso‑ya Birato hiyare,

“Yodeo mai‑ka hidi webote amatiraniha?” Birato ati ne,

“Tiwati‑nima, fara ama·oni.” Yeso ati nemarine.

³Deoso‑ka yama‑bone‑ya mai da‑daa mai‑ka hidi Yeso ene towe damemona tamine‑ya keyehe‑ya mai hirinamaroni.

⁴“Yeso, mai ati dama mai ati timita, tiwati yananahi.” Birato ati ne,

⁵Yeso ati yanaremarine.

“Ka! Hini yamata‑bone Yeso ati yanarihi?” Birato atibodi ati nemarine.

⁶Ka‑kariwa‑ya oda mariniya, ai owa ohari‑ya Birato seekitine, mai yofihikane‑ya Birato seehikatene.

⁷Hibati‑ya kofeno‑ya mai one weenamaroni. Kofeno‑ka owa‑ya mai nanahaba mai‑ya Barabasi dabemari, sodado mai hiwate, kadeya‑ya mai hinawaimarine.

⁸Birato‑ka yobe‑ya mai dama mai yorotokana, mai ati yanana,

“Hibati‑ka tiwa ene‑nima tiwa ene niya, oda owa seetikanahi.” Mai dama mai ati namaroni.

⁹“Ebeni‑ke see·okabati? Yodeo dai‑ka hidi webote‑ya dai ati kobona awineni.” Birato ati nemarine.

¹⁰Deoso‑ka yama‑bone‑ya mai da‑daa mai‑ka hidi mai atibodi ati‑ya i‑di Birato wato, Yeso‑ya mai dama mai nofa, mai ihi Yeso‑ya hidi mai kakoteni.

¹¹Deoso‑ka yama‑bone‑ya mai da‑daa mai‑ka hidi mai ati ihi mai dama mai ati yanana,

“Barabasi seetikanahi.” Mai ati namaroni.

¹²“‘Yodeo oda‑ka hidi webote amane.’ Dai ati na,

hini yamata‑nima obati?” Birato ati nemarine.

¹³“Awa‑ya baakanaho.” Mai dama mai ati na, mai ati kitamaroni.

¹⁴“Hini yamata ihi baa·okabati? Ene towe wadarene.” Birato ati ne,

hiniya mai ati kitawaha,

“Awa‑ya baakanaho. Awa‑ya baakanaho.” Mai ati namaroni.

¹⁵Mai dama mai ati somawamabone, Birato ati ene Barabasi‑ya mai seekana, Yeso‑ya mai kosina, sodado mai‑ya Birato yosemarine, Yeso‑ya mai baakanabonehe.

Yeso‑ya mai hahakana

¹⁶Birato‑ka yobe doro‑ya Yeso‑ya sodado mai towakamamaroni. Sodado mai dama mai yorotokanameteni.

¹⁷Sodado mai ihi hidi‑ka bora a‑asabina‑ya Yeso weyenawahematane. Hidi‑ka sabewa‑nima yama na‑bone mado atona‑ya sodado mai kemona, Yeso tati‑ya mai hiwataremeteni.

¹⁸Yeso‑ya mai yasina,

“Yodeo mai‑ka hidi webote amatini.” Mai ati nameteni.

¹⁹Awa bide‑ya Yeso tati‑ya mai kosi, Yeso‑ya mai firona, mai yobati‑kaya mai naha, mai moikanisa, mai nahameteni.

²⁰Mai yasini hawa toha, bora a‑asabina‑ya mai taninisama, Yeso hini hika bora‑ya weyenamatase, mai hiwakamematane, mai baahikanebonaha.

Yeso‑ya mai baakana

²¹Simaho Sireni‑ke kabani‑kaya yanane, kame, mai‑ya kobonemarine. I‑di Aresadiri i‑di Hofo mai fama mai‑ka abi i‑di Simaho amane. Simaho‑ya sodado mai awa, Simaho‑ya mai haanamaroni, Yeso ewene‑bona‑ya diwanebonaha.

²²Kokota‑ya Yeso‑ya mai towakamamaroni. Ai ati‑ya adami oni, ‘ai tati tone wai’ tohani.

²³Fino mira‑ya daba mai daahinaya, Yeso fawaremarine.

²⁴Yeso‑ya mai baakana, Yeso borone‑ya mai kayafabone, yati bide‑ya mai werena, mai kiihinamaroni.

²⁵Mahi itamise, 9 ora tohi yanani‑ya Yeso‑ya mai baakanamaroni.

²⁶Yama ihi ababone tamine kawana,

“Yodeo mai‑ka hidi webote amane.” Yama hani kawana ati namaroni.

²⁷Yama‑ya mai bo‑boti mai fama mai‑ya mai baakana, Yeso mano kanika‑ya owa mai baahikana, mano sayo‑kaya owa mai baahikana hinemarine.

²⁸(Deoso‑ka yama hani ati‑nima yamana yananamaroni.

“‘Towe mai‑ka owa amane.’ Mai ati naboneni.” Deoso‑ka yama hani ati na,

ati‑nima towe mai eyehe Yeso abemarine.)

²⁹Hawi‑ya mai yakana Yeso baakane awa‑ya waane‑ya mai awa, Yeso‑ya mai weena, mai tati weona, mai ati yanana,

“Ka! Deoso‑ka yobe tinahabiya, mahi 3 kane‑ya wamatinamatasebona tina,

³⁰tiwa tikasomiya, awa‑ya tikisamahi.” Mai ati namaroni.

³¹Deoso‑ka yama‑bone‑ya mai da‑daa mai‑ka hidi mai toha, Mose‑ka yama hani ati‑ya mai ka‑kamina mai toha na, Yeso‑ya mai weena, mai ibi hiyara,

“Mai one‑ya kasomemari, hini kasomi‑ya wato awirane.

³²Deoso‑ka Ka‑kadika‑mona ati ne, ai‑ka wami hidi webote tohemona ati ne, awa‑ya kisame ai aweya, ati ai nofamakibonane.” Mai ati namaroni.

Yeso eyehe awa‑ya mai mai baahikana, mai one ati‑nima mai ati namaroni.

Yeso abawahe

³³Mahi nokorise‑ya mahi wehene fawane, 3 ora‑ya wehene yananamatasemarine.

³⁴Fara 3 ora‑ya Yeso ati yanane, ati kite,

“Ero·i, Ero·i, rama sabakani.” Yeso ati ne,

Ai ati‑ya

“Oka Deoso amatini. Oka Deoso amatini. Hini yamata ihi owa‑ya tikahabaniti?” Yeso ati nemarine.

³⁵Mai sawe, Yeso ati‑ya mai mita,

“Eriya‑ya haane awane.” Mai ati namaroni.

³⁶Yeso ati‑ya maki mite, fino wiye‑kaya kanani tokome, yama kitara‑ya fino kofate‑ya sorokari, awa bide‑ya dasihinakosa, yorihikamisamakemaroni, Yeso hifebonehe. Maki ati yanane,

“Ai nimanaho. Eriya kameba awane, Yeso‑ya idibasebonaha.” Maki ati nemarine.

³⁷Yeso eekane, abawahemarine.

³⁸Deoso‑ka yobe‑ya bora kita winamaro, Yeso abeya, bora tati‑ya kebi yanana, nafi kebemeteni.

³⁹Yeso noko‑ya sodado mai‑ka hidi wai, Yeso abe‑ya awe, ati yanane,

“Deoso Bidi amane. Keyehe tohi awirini.” Ati nemarine.

⁴⁰Ahiyata to‑toha ni‑ya mai fanawi naha, i‑di Mariya Madarena toha, i‑di Yako, i‑di Yose, mai na, mai‑ka ami i‑di Mariya toha, i‑di Sarome toha, mai na, mai fanawi one‑ya mai sawemaroni.

⁴¹Hibati‑ya Karireya‑ya Yeso yakaneya, mai kasomamaro, Yerosare‑ya Yeso tokeya, mai fanawi one dama tokomakemaroni.

Yeso abo foye

^42-43Yose Arimateya‑ke Yodeo mai‑ka hidi bidi owa amane. Yose yama‑ya wato, Deoso ai nafi‑ka hidi kitabote tohawahebona‑ya nimanemarine. Yose i‑di Birato‑ya nayofine, yama soki bide‑ya habo kitawame, Birato‑ya tokematane. Sabado yananabone ihi Yeso abo‑ya haanematane.

⁴⁴Yose ati‑ya i‑di Birato mite,

“Yeso abi awireba awane.” Atibodi ati ne,

Sodado mai‑ka hidi‑ya Birato haane,

“Yeso abakare?” Birato ati ne,

⁴⁵“Hehe, abene.” Sodado mai‑ka hidi ati nematane.

Birato ati ene Yeso abo‑ya i‑di Yose kayafematane.

⁴⁶Bora boni yaba‑ya Yose kanike, bora‑ya towakame, Yeso abo‑ya idibase, abo bora‑ya kinihikane, ai temene‑ka yati hodi‑bone wamahinamete‑ya abo hinafoye, nokobi‑ya yati webote‑ya horonawame, hodi‑ya barikanematane.

⁴⁷I‑di Mariya Madarena toha, i‑di Yose madi i‑di Mariya toha, mai na, Yeso abo mai hinafoye‑ya mai awameteni.

Yeso kitame

¹Sabado nowati‑ya i‑di Mariya Madarena toha, i‑di Yako madi i‑di Mariya toha, i‑di Sarome toha, mai na, yama mahi amosa‑ya mai kanikameteni, Yeso abo‑ya mai ketehebonehe.

^2-3Domiko‑ya mai bosakana, yama wahabisari‑ya Yeso temene‑ya mai kobokani awisari‑ya mai ibi hiyara,

“Ebeni‑ke nokobi‑ya seekabati, ai towakiyomi‑bone‑karo?” Mai ati na,

mai kobokana,

⁴mai noki toka, nokobi‑ya mai awa, yati webote‑ya karotowiti hawa tohameteni.

⁵Mai towakiyoma, maki yetene‑ya mai awameteni. Mai‑ka kanika‑ya maki itari, bora sawa‑ya weyene, maki‑ya mai awa, mai sotatonameteni.

⁶“Dai habo siitoriyahi. Yeso Nasare‑ke mai baahikane, abo dai awebona, dai ati na, haa‑ya awimare, kitame, tokane, fori tabaro dai awaho.” Ati nematane.

⁷“Dai towakamahi. Bedoro toha, Yeso‑ya mai da‑daba mai one toha na, mai‑ya dai hiyariya, eya dai ati nahi.

‘Karireya‑kaya tokebona, dai tokomakihi. Yeso ati‑mari‑nima Karireya‑ya dai awebonane.’ Dai ati niyahi.” Maki ati nematane.

⁸Mai fanawi habi siitona, mai wawawakana, mai kana kana, mai one‑ya mai hiyari awirameteni.

⁹(Hibati‑ya Mariya Madarena‑ya madi towe mai 7 kana mai foyamaro, Yeso ati ene madi towe mai kananamaroni. Domiko, yama wahi yanatoni‑ya Yeso kitame, toke, Mariya Madarena‑ya koboni dai tohematane.

¹⁰Yeso‑ya mai da‑daba mai ohinasa niya, Yeso kitame tamine‑ya Mariya kamina,

¹¹“Yeso kitameno, oawani.” Mariya Madarena ati na, ati‑ya mai nofarameteni.

¹²Makobote Yeso‑ya mai da‑daba mai fama, kabani‑ya mai towaka, Yeso‑ya mai kobona, Yeso‑ya mai awa, Yeso noko bare tohematane.

¹³Yeso‑ya mai da‑daba mai fama mai towakamake, Yeso tamine‑ya mai kamina, mai ati‑ya mai nofarameteni.

¹⁴Makobote Yeso‑ya mai da‑daba mai 11 kana mai tafiya Yeso kobone, mai‑ya weene, Yeso kitame tamine‑ya mai one hiyara mai ati‑ya mai nofara, mai habi kita mai‑ya Yeso weenematane.

¹⁵Mai‑ya weeni hawa tohe, mai‑ya yose,

“Yama nafi‑ya dai yakanawariya, mai nafi‑ya Deoso ati amosabote tamine dai kaminahi.

¹⁶Deoso ati amosabote ati‑ya mai nofa, mai dai habanirisiya, Deoso tabaro‑ya mai saweboneni. Deoso ati amosabote ati‑ya mai nofara, wara hirini‑ya mai‑ya weenebonane.

¹⁷Deoso ati amosabote ati‑ya mai nofa owati ihi mai ihi kitaboneni. Mai ihi‑ya mai one awiya,

‘Deoso‑ka mai amani.’ Mai ati naboneni.

Fara mai ati ihi madi towe mai kana, mai one ati‑ya mai hiyara naboneni.

¹⁸Iha‑ya mai fawiya, mai kiyarihi, maka mai‑ya wainiya, komarihi, mai kiyana mai‑ya mai boyoniya, mai ihi mai kitama, mai naboneni.” Yeso ati nematane.

¹⁹Ai‑ka Ayo Yeso hiyari hawa toheya, Deoso ene neme‑ya tokome, Deoso mano kanika‑ya itariwahematane.

²⁰Yeso‑ya mai da‑daba yama nafi‑ya mai yakanaware, mai‑ya mai hiyaramaroni. Ai‑ka Ayo mai‑ya kasome, mai ihi kitamaroni, mai ihi‑ya mai awiya, mai ati mai hinofabonehe.)