MATEO

Mateo ati

Yeso‑ka idi mai oni

¹Yeso Kirisito‑ka idi mai oni okanahanaboneni. Yeso‑ka idi i‑di Dafi tohe, ai‑ka hidi tohematane. I‑di Dafi‑ka idi i‑di Abaraho tohematane.

²Abaraho bidi i‑di Isaki toha, Isaki bidi i‑di Yako toha, Yako bidi i‑di Yoda toha nematane. Yoda anidi mai toha, sohori mai toha nameteni.

³Yoda bidi i‑di Feresi toha, owa i‑di Sera toha, mai‑ka ami i‑di Tama toha nameteni. Feresi bidi i‑di Esiro toha, Esiro bidi i‑di Araho toha,

⁴Araho bidi i‑di Aminadabi toha, Aminadabi bidi i‑di Nasomi toha, Nasomi bidi i‑di Sarimo toha nematane.

⁵Sarimo fadi i‑di Habi, mai‑ka ewe i‑di Bowasi toha, Bowasi fadi i‑di Hoti, mai‑ka ewe i‑di Obedi toha, Obedi bidi i‑di Yese tohematane.

⁶Yese bidi i‑di Dafi, ai‑ka hidi webote tohematane. I‑di Oriya fadi‑ya Dafi famawahe, mai‑ka ewe i‑di Saromaho tohematane.

⁷Saromaho bidi i‑di Hobowaho toha, Hobowaho bidi i‑di Abiyasi toha, Abiyasi bidi i‑di Asa toha,

⁸Asa bidi i‑di Yosafa toha, Yosafa bidi i‑di Yoraho toha, Yoraho bidi i‑di Osiya toha,

⁹Osiya bidi i‑di Yotaho toha, Yotaho bidi i‑di Akasi toha, Akasi bidi i‑di Esekiya toha,

¹⁰Esekiya bidi i‑di Manasesi toha, Manasesi bidi i‑di Amo toha, Amo bidi i‑di Yosiya toha,

¹¹Yosiya bidi i‑di Yekoniya toha nematane. Yekoniya toha, sohori mai toha, ai‑ka idi mai toha na, mai‑ya mai towakamameteni, Babironi‑kaya.

¹²Babironi‑kaya i‑di Yekoniya bidi wade, oni i‑di Saratieo toha, Saratieo bidi i‑di Sorobabeo toha,

¹³Sorobabeo bidi i‑di Abiodi toha, Abiodi bidi i‑di Eriaki toha, Eriaki bidi i‑di Asohori toha,

¹⁴Asohori bidi i‑di Sadoke toha, Sadoke bidi i‑di Akima toha, Akima bidi i‑di Eriodi toha,

¹⁵Eriodi bidi i‑di Eriasa toha, Eriasa bidi i‑di Mataho toha, Mataho bidi i‑di Yako toha,

¹⁶Yako bidi i‑di Yose tohe, Yose fadi‑bone i‑di Mariya tohameteni. Mariya bidi i‑di Yeso, Deoso‑ka Ka‑kadika amane, mai ati nineni.

¹⁷Abaraho‑ka nodi mai 14 tohawahi‑ke i‑di Dafi tohe, i‑di Dafi‑ka nodi mai 14 tohamakitasi‑ke Yodeo mai hiwakamematane, Babironi‑kaya. Ai‑ka idi mai kamatasa, mai‑ka nodi mai 14 tohamakitasi‑ke i‑di Deoso‑ka Ka‑kadika kobonawahematane.

Yeso wade

¹⁸Fare i‑di Yeso Kirisito wademata tamine timitahi. Yeso madi‑bone i‑di Mariya‑ya i‑di Yose famebona, mai fami awisari‑ya Deoso‑ka Doni ati ene Mariya naba tohameteni.

¹⁹Deoso ati‑ya Yose nofi nafi, Mariya naba tamine‑ya mite, atibodi yama‑ya kadike,

“Owa ene Mariya‑ya mai weeriyahi. Owati yanaraboneni. Hini owa honita wahaboneni.” I‑di Yose atibodi ati nematane.

²⁰I‑di Yose amone, Deoso‑ka yo‑yose wadarine‑ya awe, ati‑ya mite,

“Yose, i‑di Dafi‑ka nodi amatini. Owati timitahi. I‑di Mariya dai famiyahi. Sibaraboneni. Deoso‑ka Doni ati ene Mariya naba toha, maki ene tohi awirane.

²¹Deoso Bidi hiyose, Mariya dori‑ya foye, wadeya, oni Yeso tohebonane. Mai ati kasira mai manakone‑ya nanahabebonane.” Deoso‑ka yo‑yose ati wadarine ati nematane.

²²Deoso ati‑ya mi‑mita‑mata ati‑nima yama nameteni.

²³“Fana atona maki‑ya famatera naba tohawahaboneni. Bidi wadeya, oni Emano·eo tohebonane.” Deoso‑ka yama hani ati neni.

Emano·eo ai ati‑ya Deoso ai‑ya sawine.

²⁴I‑di Yose dodafi, Deoso‑ka yo‑yose ati wadarine‑nima idi Yose ne, Mariya‑ya dodimaki, Mariya‑ya kakame, hini hika yobe‑ya Mariya winawahameteni.

²⁵Hifamarameteni. Dori wadi hawa tohiya, hifamawahameteni. I‑di Yose ati ene, Mariya bidi oni i‑di Yeso tohematane.

Wami bara‑ka mai kake

¹Bere Yodeya‑kaya Yeso wade‑ya wami bara‑ka mai wi‑wina mai kake, Yerosare‑ya mai kobonameteni. Bere‑kaya Yeso wade‑ya Yodeo ai‑ka hidi webote i‑di Erodi tohematane.

²Yerosare‑ya mai kobona,

“Yodeo dai‑ka hidi webote wademona oda awabone, mahi ka‑kaki‑kaya hika amowa oda awe, oda kakeni, Deoso‑ka Ka‑kadika oda awabonehe.” Mai ati nameteni.

³Hidi webote‑mona tamine‑ya i‑di Erodi mite, atibodi yama‑ya kadike, Yerosare‑ya mai wi‑wina mai nafi mai atibodi yama‑ya kadikahari nameteni.

⁴Deoso‑ka yama‑bone‑ya mai da‑daa mai‑ka hidi mai toha, Mose‑ka yama hani ati‑ya mai ka‑kamina mai toha na, i‑di Erodi ati ene mai yorotokana, mai‑ya hiyare,

“Deoso‑ka Ka‑kadika wadebona, yama hani ati na, ebeni‑kaya wadabonati?” I‑di Erodi ati ne,

⁵“Bere Yodeya‑kaya Kirisito wadebona, Deoso ati‑ya mi‑mita ati nematamonane.

⁶‘Bere Yodeya‑ka tabora bide towe tohi awirini. Bere amosateni, fara‑ya ai‑ka hidi wadebonane.’ Deoso‑ka yama hani ati teni.” Mai ati nameteni.

⁷Mai nafi tokoma, mai nowati‑ya wami bara‑ka mai hinama mai‑ya i‑di Erodi haane, mai kamake, mai‑ya hiyare,

“Eme abariko ne‑ya amowa dai awimeteti?” I‑di Erodi ati nematane.

⁸Mai ati‑ya i‑di Erodi mite, mai‑ya yose,

“Bere‑ya dai tokahi, ewe dai sibaniya, dai wasiya, owa‑kaya dai kamahi. Dai ati omitiya, makobote okomiya, okahiyarebonane.” I‑di Erodi ati nematane, keyehe‑ya hirineri.

⁹I‑di Erodi ati‑ya mai mita, mai toka, hibati‑ya amowa mai hiawe‑ya mai awamatasameteni. Amowa yakane, mai hiwakatome, ewe sawi‑ke yobe neme‑ya amowa maatowitimatane.

¹⁰Amowa‑ya mai awa, mai ya‑yaina, mai ya‑yaini nafemeteni.

¹¹Yobe‑ya mai tokiyoma, Yeso madi‑ya fame‑ya mai awa, Yeso‑ya mai kahiyara, Yeso‑ka yama‑bone‑ya mai daanameteni. Oro‑ya mai daa, yama mahi amosa‑ya mai daa, mira‑ya mai daa, mai nameteni.

¹²Deoso‑ka yo‑yose ati wadarine‑ya mai awa,

“I‑di Erodi‑ya dai tokomariyahi.” Deoso‑ka yo‑yose ati wadarine ati nematane.

Wada ihi hawi one‑kaya mai tokoma, hini mai tabori‑kaya mai tokoma, i‑di Erodi‑ya mai hiyari awirameteni.

Eyito‑ya mai toka

¹³Mai tokoma mai nowati‑ya Deoso‑ka yo‑yose i‑di Yose‑ya wadarine hiyare,

“Yose didafihi. Yeso madi‑ya fame tiwakahi. Eyito‑ya dai tokiya, Eyito‑ya dai nahoyahi. Tiwa haa·onamatasaboneni. Yeso‑ya i‑di Erodi sibanebonane, Yeso‑ya nanahabebonaha.” Deoso‑ka yo‑yose ati wadarine ati nematane.

¹⁴I‑di Yose dodafi, fadi bidi‑ya fama‑ya towakebona, yama soki‑ya mai yanana, Eyito‑ya mai towakameteni.

¹⁵I‑di Erodi abi awisareya, Eyito‑ya mai winameteni. Makobote i‑di Erodi abawahematane.

“Oka Dao Eyito‑ya wineya, haa·onaboneni.” Deoso ati nematamonane.

Hibati‑ya Deoso ati‑ya mi‑mita ati‑nima yama nawahameteni.

¹⁶Wami bara‑ka mai tokoma, mai tamine‑ya i‑di Erodi mite, yawe,

“Owa‑ya mai hiyaramabone ona, owa‑ya mai hiyarami awireni.” I‑di Erodi atibodi ati ne,

yawi kite, sodado mai‑ya yose,

“Bere‑ya dai tokahi. Madehe makidi 2 ano toha dai nanahaba, madehe bi‑bidi na toha na, mai nafi dai nanahabahi. Bere‑ka madehe dai nanahaba, Bere yakari‑ya mai wi‑wina mai‑ka madehe dai nanahaba, dai nahi.” I‑di Erodi ati nematane.

“Ano one‑ya amowa‑ya mai awa, fara hidi‑mona‑ka ano fami yanatona awineni.” I‑di Erodi atibodi ati nematane.

¹⁷Yeremiya Deoso ati‑ya mi‑mita‑mata ati‑mata‑nima yama nawahameteni.

¹⁸“Rama‑ka mai ohinaboneni. I‑di Hakeo‑ka nodi mai‑ka madehe tabiyo mai ohinaboneni.” I‑di Yeremiya‑ka yama hani ati neni.

Nasare‑kaya mai toka

¹⁹Eyito‑ya i‑di Yose wine‑ya i‑di Erodi abe, Deoso‑ka yo‑yose i‑di Yose‑ya wadarine hiyare,

²⁰“Isara·eo‑kaya dai tokomahi. Yeso‑ya ati nanahabemari, abawahane.” Deoso‑ka yo‑yose ati wadarine ati nematane.

²¹Ati ene Yeso madi‑ya fame‑ya i‑di Yose towakamematane, Isara·eo‑kaya.

²²I‑di Erodi bidi oni i‑di Akerao tohe, Yodeya‑ya mai wi‑wina mai‑ka hidi tohawahe, tamine‑ya i‑di Yose mite, habo siitonematane. Yama soki‑ya i‑di Yose wada‑ya awamatase,

“Yodeya‑ya tikariyahi.” Ati wadarine ati nematane.

Wada ihi Karireya‑kaya mai tokabisameteni.

²³Karireya‑kaya mai toka, Nasare‑kaya mai winawahameteni.

“Deoso Bidi Nasare‑ke amane, mai ati naboneni.” Deoso ati‑ya mai mi‑mita mai ati nametemoneni.

Fare Yeso Nasare‑ke amane.

Yowaho Batita mai‑ya hiyare

¹Yowaho Batita Yodeya‑ka kabani‑ya tokawahe, Yodeya‑ya mai wi‑wina mai‑ya hiyare,

²“Dai ene amosawamahi. Neme‑ke ai nafi‑ka hidi kitabote tohawahebonane.” Yowaho Batita ati ne, ati damemarine.

³Hibati‑ya Yowaho tamine‑bona‑ya i‑di Isa·iya kanahano,

“Bofe‑ke mai‑ka owa kabani‑kaya ati yananeya,

‘Ai‑ka Hidi webote hawine‑bona dai namosahi.’ Ati nebonane.” Deoso ati ne, ati‑ya i‑di Isa·iya kanahanomatamonane.

⁴Kamero kone wamani‑ya Yowaho Batita weye, bani ataro wamani‑ya dosi‑ya sokinaki nemarine. Yowaho Batita yamata‑ya kihare, ti‑tiri mai‑ya kaba, mo‑mona mai fahi‑ya fawa nemarine.

⁵Yerosare‑ya mai wi‑wina mai toha, Yodeya‑ya mai wi‑wina mai toha, Yodaho Faha yakari‑ya mai wi‑wina mai toha, mai na, i‑di Yowaho‑ya mai tokomakemaroni.

⁶“Owa ene towe amani.” Mai ati na,

Yodaho Faha‑ya i‑di Yowaho Batita mai‑ya habanirisemarine.

⁷Fariseo mai toha, sadoseo mai toha, mai na, mai‑ya i‑di Yowaho awe,

“Maka ihi‑nima dai ene na, ebeni‑ke ati ene Deoso‑ya dai nayofiniti?

⁸Dai abarabone dai ati niya, dai ene amosawamiyahi.

⁹‘Abaraho‑ka nodi oda amani. Deoso oda‑ya sarikiterebonane.’ Dai ati riyahi.

Owati dai mitahi. Abaraho‑ka nodi mai one‑bone‑ya Deoso ati wamane‑mana, yati‑ya mai‑ya wamane nane.

¹⁰Awa bono bonora toha, awa bono kabi amosara toha na, ade ai kaana, ai sarikiteni. Fara‑nima Deoso bari‑ya maakani hawa tohane. Dai ene amosawami awiriya, awa kaana‑nima Deoso dai‑ya niwahebonane. Dai‑ya nanahabeya, dai‑ya sarikanebonane.

¹¹Deoso‑ka Ka‑kadika ama·orani. Faha‑ya dai‑ya haba·onirisineni, dai ene amosawamabonehe. Kamaki‑bona kitabotebisa amane. Owa‑ta towebisa ama·oni. Amosabotebisa amane. Ati ene Deoso‑ka Doni dai one‑ya sawiwahebonane. Ai nafi‑ya kadikeya, ai one‑ya sarikanebonane.

¹²Tiriko atori abi hawa toha, atori ai sarikana‑nima mai ihi amosara mai‑ya sarikanebona, yama hirini fawateraboneni. Tiriko noki ai kayafi‑nima mai ihi amosa mai‑ya kayafebonane.” I‑di Yowaho ati nemarine.

Yowaho Batita Yeso‑ya habanirise

¹³Karireya‑kaya Yeso yanane, Yodaho Faha‑ya tokematane, i‑di Yowaho habahinirisebonaha.

¹⁴“Owa habatinirisabisahi.” Yowaho ati nematane.

¹⁵“Sibaraboneni. Owa habatinirisiya, Deoso ati‑nima ai teni.” Yeso ati nematane.

Ati ene Yowaho habahinirisematane.

¹⁶Yowaho habahinirise, tokomorosame, Deoso‑ka Doni neme‑ya kise, Yeso‑ya sawiwahe, wayomata awi‑nima awi ne‑ya Yowaho awematane.

¹⁷Neme‑ya ati kaki,

“Oka Dao amane. Oka Dao onofi nafineni. Ene amose, ene ya‑yai·oneni.” Ati nematane.

Satanasi Yeso‑ya keyehebona

¹Deoso‑ka Doni ati ene kabani‑ya Yeso tokematane, Diaboro ati‑ya mitebonaha.

“Owa ene Deoso ati‑ya Yeso tokadabamarebonane.” Diaboro atibodi ati nematane.

²Yeso amoni 40 kane‑ya tafare, Deoso‑ya hiyari nokotonihi, fimi watihikanematane.

³Makobote Diaboro kamaki,

“Deoso Bidi amatiniya, tiwati ihi yati baho tohahi, tikababonehe.” Diaboro ati ne,

⁴4:4 “Ai abaraboneni.” Yama hani ati na, Deoso tabaro‑ya ai ya‑yainabone tamine amani.“Deoso‑ka yama hani ati timitahi. Ai tefe ai‑ya kasomi nafirani. Deoso ati ai nofa, Deoso ati ai‑ya kasomi nafibisa, ene ai abaraboneni.” Yeso ati nematane.

⁵4:5 Deoso‑ka sidadi Yerosare tamine amani. Yerosare‑ya Deoso kayawe. Deoso‑ka yobe Yerosare‑ya waamatamonane.Makobote Deoso‑ka sidadi‑kaya Yeso‑ya Diaboro towake, Deoso‑ka yobe tati mese‑ya Yeso‑ya nawitari, Yeso‑ya hiyaramatase,

⁶“Deoso Bidi amatiniya, yoratinisahi. Yama sibaraboneni. Fara Deoso‑ka yama hani ati timitahi,

‘Deoso‑ka yo‑yose mai hiyosebona, tiwa‑ya mai waratonaboneni, yati‑ya tiwa teme taratokarabonehe.’ Deoso‑ka yama hani ati nineni.” Diaboro ati nematane.

⁷“‘Deoso hini ati‑nima ene nebona, ati‑ya dai siwakariyahi.’ Yama hani ati nineni.” Yeso ati nematane.

⁸Adami webote‑ya Yeso‑ya Diaboro towakame, mai tabori dami‑ya yofikanematane.

⁹“Mai tabori amosa dama tiawahi. Owa noko‑kaya tiwa yobati tati‑kaya tiwitiya, owa hidi tiniya, tiwa‑ya yama nafi daa·onaboneni.” Diaboro ati nematane.

¹⁰“Tikamahi. Deoso‑ka yama hani ati‑nima obisaboneni. Yama hani ati timitahi.

‘Deoso dai kahiyarahi. Mai one‑ya dai narifariyahi. Deoso dai narifabisahi.’ Deoso‑ka yama hani ati nineni.” Yeso ati nematane.

¹¹Diaboro tokome nowati‑ya Deoso‑ka yo‑yose mai kake, Yeso‑ya mai kasomameteni.

Yeso mai‑ya kanawato

¹²Yowaho kadeya‑ya wai tamine‑ya Yeso mite, Karireya‑kaya tokomatasematane, Nasare‑ya.

¹³Nasare‑ya wine, Kafanaho‑kaya toke, winemarine. Kafanaho wara webote widi‑ya toha, i‑di Seboro, i‑di Nafitari, mai fama, mai‑ka nodi mai wini‑kaya Yeso winemarine, Kafanaho‑ya.

¹⁴Hibati‑ya Yeso tamine‑ya i‑di Isa·iya kanahanomatane.

^15-16“I‑di Seboro, i‑di Nafitari mai fama mai‑ka wami‑ya mai wi‑wina mai toha, wara webote widi‑ya mai wi‑wina mai toha, Yodaho Faha tati‑ya mai wi‑wina mai toha, Bara mai dama mai wini‑bone‑kaya mai wi‑wina mai toha na; Deoso tamine‑ya mai watora, Deoso tamine‑ya mai mitawahaboneni. Yama‑ya mai watora, yama soki‑ya mai wi‑wina mai‑nima mai na, yama tehe‑ya mai wi‑wina mai‑nima mai nawawahiya, Deoso tamine‑ya mai watowahaboneni.” Isa·iya‑ka yama hani ati nineni.

¹⁷Yeso ai‑ya hiyare,

“Dai ene towe‑ya dai nofamariyahi. Neme‑ke ai nafi‑ka hidi kitabote tohawahebonane.” Yeso ati ne, ati yanani damemarine.

Yeso hika mai‑bone mai‑ya haane

¹⁸Karireya‑ka wara webote widi‑ya Yeso yakane, i‑di Simaho Bedoro, sohori i‑di Anidere‑ya fame faha‑ya hedi‑ya mai kerokana, mai‑ya Yeso awematane. Fara aba mai‑ya mai na‑nawasi mai tohamaroni.

¹⁹“Hima, owa‑ya dai dabahi, owa tamine dai hiyarawahaboneni. Hibati‑ya aba mai‑ya dai nawasiteni. Hibayata owati‑ya mai nofabone, mai‑ya dai sibanaboneni.” Yeso ati nematane.

²⁰Yeso ati‑ya mai mita, mai‑ka hedi towitakosa, Yeso‑ya mai dabawahameteni.

²¹Mai toka, i‑di Tiyako, sohori i‑di Yowaho‑ya fame‑ya Yeso awematane. Kanawa dori‑ya mai mookanameteni, mai‑ka abi i‑di Sebedeo eyehe. Mai‑ka hedi‑ya mai awawama, mai‑ya Yeso himanematane.

²²Mai‑ka abi tofoyakose, Yeso‑ya mai dabameteni.

Mai kiyana mai‑ya nakitama

²³Karireya‑kaya tabora dami‑ya Yeso tokawahe, Deoso‑ya mai hi‑hiyara‑ke yobe dami‑ya mai‑ya kanawatomatane. Ai nafi‑ka hidi kitabote tohawahebona tamine‑ya hiyarematane. Mai kiyana mai‑ya nakitamematane.

²⁴Karireya‑kaya Yeso mai‑ya nakitame tamine‑ya mai mitameteni, Siriya‑ka tabora dama‑kaya. Madi towe mai foyi‑ka mai toha, mai ka‑kana na mai toha, mai yakara mai toha na, fara mai mai hiwakama, mai nafi‑ya Yeso nakitamematane.

²⁵Yeso nowati‑ya mai dama mai tokomakemaroni. Karireya‑ka mai toha, Dikabori‑ka mai toha, Yerosare‑ka mai toha, Yodeya‑ka mai toha, Yodaho Faha kowani‑ka mai toha na, Yeso nowati‑ya mai tokomakemaroni.

Adami‑kaya mai‑ya hiyare

^1-2Mai dama mai‑ya awe, adami‑ya tokomorose, itari, hika mai da‑daba fai yowi‑ya mai nahoremaroni. Mai‑ya kanawatobona, ati yanane,

³“‘Towe ama·oni.’ Dai ati niya,

Deoso dai‑ya kasomebona, Neme‑ke ai nafi‑ka hidi kitabote tohawahe‑ya dai sawiwahaboneni.

⁴Dai o‑ohi Deoso dai‑ya kasomebona, dai ya‑yainibisaboneni.

⁵‘Yama owato nafira, Deoso‑ta yama nafi‑ya watotene.’ Dai atibodi ati na,

Deoso dai‑ya kasomebona, wami nafi‑ya dai kayafaboneni.

⁶‘Owatibodi amosawamaboneni.’ Dai atibodi ati na,

Deoso dai‑ya kasomebona, dai atibodi‑ya namosi nafibonane.

⁷Dai one ene amosara, dai ati hamara, Deoso dai‑ya kasomebona, dai ene kote towe toha, manakone‑ya Deoso haarebonane.

⁸Deoso ati dai nokotoniyahi. Yama bara dai nokotoniriya, Deoso dai‑ya kasomebona, Deoso‑ya dai awawahaboneni.

⁹Mai ibi weena mai dai kasomahi, mai yawi fawanabonehe. Haa‑nima dai ene niya, Deoso dai‑ya kasomebona, Deoso bidi dai tohawahaboneni.

¹⁰Deoso ati‑ya dai nofa, Deoso‑ya mai nofara dai‑ya mai bisiniya, Deoso dai‑ya kasomebona, Neme‑ke ai nafi‑ka hidi kitabote tohawahe‑ya dai sawiwahaboneni.

¹¹Owati‑ya dai nofa dai‑ya mai nofaraboneni. Dai‑ya mai wee, dai‑ya mai bisi, dai tamine‑ya keyehe‑ya mai hiri, mai naboneni.

¹²Deoso ati‑ya mai mi‑mita‑mete mai‑nima dai na, fara hibati‑ya mai‑ya mai bisinaharemeteni. Dai ya‑yainahi. Deoso dai‑ya kasomebona, neme‑ya dai ene manakone nafe dai kayafaboneni.” Yeso ati nemarine.

Sao‑nima dai nahi

¹³“Bofe‑ka mai‑ka sao dai tohateni. Sao ihi ai tefe kabi amosateni. Dai ene amosahi. Deoso ati‑ya mai nofara mai ihi‑nima dai ene riyahi. Dai ene amosa dai maakariyahi. Faha ihi sao abiya, amosawamaterani. Sao towe ai weretowititeni.

¹⁴Bofe‑ka mai‑ka yama wahi‑nima na dai tohateni. Dai ene‑ya mai awiya, Deoso ati‑ya mai nofawahaboneni. Adami tati‑ya ai tabaro ita, ai tabaro‑ya mai nafi awateni.

¹⁵Nabarina ai botokana, nabarina wahi ai barikiterani. Nabarina ai kanawaarikosa, nabarina wahi ihi yama ai awateni.

¹⁶Yama wahi‑nima dai ene nahi. Dai ene amosa, dai ene‑ya mai awiya, dai‑ka Abi neme‑ke‑ya mai kahiyarawahaboneni.” Yeso ati nemarine.

Mose‑ka yama hani tamine

¹⁷“Mose‑ka yama hani ati, Deoso ati‑ya mai ka‑kamina‑mete mai‑ka yama hani ati na, ati fawateraboneni. Mai ati‑nima onaboneni.

¹⁸Owati amosa dai mitahi. Neme aba, bofe aba naboneni. I‑di Mose‑ka yama hani ati kote fawaterabone, ati‑nima yama nawahaboneni.

¹⁹‘Deoso ati kote onofa, fara owa‑nima dai nahi. Deoso ati kote dai nofiya, dai sibaraboneni.’ Mai one ati na,

Mai ati‑ya Deoso nofarebonane. Mai ati‑nima dai riyahi. Deoso ati nafi‑ya mai tokadaba, ati mai hikamine, mai ati‑ya Deoso nofabisebonane.

²⁰Mose‑ka yama hani ati‑ya mai ka‑kamina mai toha, fariseo mai toha na, mai atibodi‑nima dai atibodi na Neme‑ke ai nafi‑ka hidi kitabote tohawahe‑ya dai sawiraboneni.” Yeso ati nemarine.

Hibati‑ka mai ati‑nima Yeso ati re

²¹“Hibati‑ka mai ati dai mita,

‘Ai owa‑ya dai nanahabariyahi. Ai owa‑ya tinahabiya tiwa‑ya mai wataboneni.’ Mai ati nametemoneni.

²²Owati dai mitahi. Mai atibodi ati okadikaboneni. Mai one‑ya mai ka‑kako mai atibodi owataboneni. Mai atibodi amosara wara hirini‑ya mai‑ya onasawiteboneni.

²³Deoso‑ka yama‑bone‑ya dai daanabone, dai ati niya,

‘Se! Oka naki owa ene yawewahane.’ Tiwatibodi ati niya,

²⁴Deoso‑ka yama‑bone tinawadakosiya, tikiya,

‘Naki, towebisa ama·oni. Owa‑ya tiwati somawamahi. Tiwa onofini.’ Tiniya.

Makobote Deoso‑ka yama‑bone daatibisahi.

²⁵Kofeno‑ya tiwa ene towe‑ya ai owa kaminebona, dai kobokani awisariya, tiwati somawama kanibote nahi. Tiwati somawama kanibote ni awiriya, sekorasa tiwa‑ya mai waratoniya, kadeya‑ya tiwa‑ya mai nafoyaba awineni.

²⁶Owati amosa dai mitahi. Yama manakone nafi abi awisariya, tiwa‑ya mai seekani awiraboneni.” Yeso ati nemarine.

Ai atibodi ati‑ya Deoso mite

²⁷“Hibati‑ka mai ati dai mita,

‘Hini tika yibote dai famabisahi.’ Mai ati teni.

²⁸Owati dai mitahi. Fana‑ya dai atibodi kadika,

‘Se! Oahamata.’ Dai atibodi ati niya,

dai atibodi ati‑ya Deoso miteya, yawebonane.

²⁹5:29-30 Yama towe ai nokotoniya, ai yehe ene toharihi, ai teme ene toharihi, ai noko ene toharihi na, ai atibodi ene tohabisani. Wara hirini kome kita tamine‑ya Yeso ai‑ya kanawatone.Tiwa nokobodi sayo‑ka ene yama towe nokotinihe, tiwa noko sayo‑ka sobatinakihi. Tiwa noko abahi, yama hirini‑kaya tisawirabonehe. Tiwa noko ohari‑ya Deoso tabaro‑ya tiwinabisiya, yama amosabisaboneni.

³⁰Tiwa yehe sayo‑ka ene yama towe nokotinihe, tiwa yehe sayo‑ka wisitinakosahi. Tiwa yehe abahi, yama hirini‑kaya tisawirabonehe. Tiwa yehe ohari‑ya Deoso tabaro‑ya tiwinabisiya, yama amosabisaboneni.

³¹‘Tiwa honita wahawamabone tiwatibodi ati niya, tika yibote‑ka yama hani‑ba daatiniya, tiwa honita wahawamahi.’ Hibati‑ka mai ati nametemoneni.

³²Owati dai mitahi. Tifana, hini tiwa ene tika yibote honita wahawamiya, maki bare‑ya tika yibote famawahaba awineni.

‘Tiwa ene toha, tika yibote ihi toha, maki owa ene toha nane.’ Deoso ati nebonane.

Dai nafi‑ya weenebonane. Tika yibote tikako awiriya, hini atibodi ihi maki bare‑ya famawahiya, tiwa‑ta tiwa‑ya Deoso kakorebonane.” Yeso ati nemarine.

Dai ati‑nima dai nahi

³³“Hibati‑ka mai ati dai mita,

‘—Keyehe hiri·otera, keyehe‑ya hiri·oniya, Deoso owa‑ya bisinebonane.— Dai ati niya, fara Deoso oni dai hirina, hini dai ati‑nima dai nahi. Deoso dai‑ya bisirayaho.’ Mai ati nametemoneni.

³⁴Owati dai mitahi. Dai ati‑nima dai nahi. Haa‑nima dai one ati teni.

‘Keyehe‑ya hiri·oniya, Deoso tabaro fawanebonane.’ Dai one ati na,

Mai ati‑nima dai ati riyahi. Deoso tabaro‑ya Deoso‑ka kadera amosa kawateni.

³⁵Wami oni dai hiririyahi, wami‑ya Deoso teme kawatene. Yerosare oni dai hiririyahi, Yerosare‑ya Deoso kayawatene.

³⁶Haa‑nima dai one ati teni.

‘Keyehe‑ya hiri·oniya, owa namidi‑ya mai tiinakosaboneni.’ Mai ati na,

Mai ati‑nima dai ati riyahi. Dai tati kone soki toha, hini dai ati ene dai tati kone sa‑sawanawamaterani. Dai wiyona, hini dai ati ene dai tati kone so‑sokinawamaterani.

³⁷Dai ati amosa hinama tohahi. Keyehe‑ya dai hiririyahi. Satanasi ati ene keyehe‑ya dai hiriteni. Satanasi ati‑nima dai ati riyahi.” Yeso ati nemarine.

Mai nafi dai nofahi

³⁸“Hibati‑ka mai ati dai mita,

‘Tiwa noko‑ya bositokanihi, noko bositikanihariho. Tiwa ino‑ya bakatonihi, ino bakatinihariho.’ Mai ati nametemoneni.

³⁹Owati dai mitamatasahi. Dai ati somahi. Dai ebete‑ya batanariya, dai ebete beheri dai benawamakihi, batahirimakebonehe.

⁴⁰Dai‑ka owa kofeno‑ya hiyare, ati ene kofeno dai‑ya haaneya,

‘Hika bora isi‑ba daatinahi.’ Kofeno ati neya,

bora isi, bora nemehe na, fama dai daanibisahi.

⁴¹Sodado dai‑ya yoseya,

‘Oka yama weyetiniya, tika yama weyeni‑ke ora ohariho.’ Sodado ati neya,

yama dai weyeniya, dai‑ka ora famabisaho.

⁴²5:42 Refo ihi dai‑ka yamata‑ya mai haana, mai‑ka yamata‑ba dai daariyahi. Tesaronika yoto‑ke 3:10.‘Oka yama‑ba daatiniya, yama one‑ya tika yama‑ba daa·onamatasaboneni.’ Ati neya,

hika yama‑ba dai daanahi.

‘Oka yama honita‑ba daatinahi.’ Ati neya,

hika yama‑ba dai daanaharihi.” Yeso ati nemarine.

⁴³“Hibati‑ka mai ati dai mita,

‘Tiwa‑ya mai no‑nofa mai tinofaharihi. Tiwa‑ya mai kaka mai tikakoharihi.’ Mai ati nametemoneni.

⁴⁴Owati dai mitahi. Dai‑ya mai nofara mai dai nofiyahi. Dai‑ya mai bisina mai tamine dai hiyarahi, Deoso mai‑ya kasomebonaha.

⁴⁵Deoso bidi ama·oni dai ati na, Deoso ene‑nima dai ene nahi. Mai ati kasira mai toha, mai ati soma mai toha na, Deoso mai‑ya kasomatene. Deoso ene mahi wehene‑ya mai nafi awateni. Deoso ene mai tabori dami‑nima faha kakiteni.

⁴⁶Dai‑ya mai no‑nofa mai‑ya dai nofa, mai one‑ya dai nofariya, Deoso ya‑yaiterene. Kofeno‑ka yinero‑bona‑ya mai ha‑haa hini mai one‑ya mai nofateni.

⁴⁷Hini tika mai tihiyariya, mai one‑ya tihiyari awiriya, Deoso ya‑yaiterene. Bara hini mai one‑ya mai hiyarateni.

⁴⁸Tiwa ene amosa hinama tohahi. Ai‑ka Abi neme‑ke ene amose hinama tohatene. Ai‑ka Abi ene‑nima dai ene nahi.” Yeso ati nemarine.

Deoso dai nokotonihi

¹“Dai one‑ya dai ati kasoma,

‘Mai okasomabone, owa dai awahi.’ Dai ati riyahi.

Haa‑nima dai ati niya, dai‑ka Abi neme‑ke ya‑yaini awirebonane. Dai‑ka yama kasomi manakone‑ya daani awirebonane.

²Dai one Deoso‑ya mai hi‑hiyara‑ke yobe‑ya yama‑ya mai daanabone, ho‑hori‑ya mai afoteni. Yama‑ya mai kihara mai‑ka yama‑bone‑ya mai daanabone, ho‑hori‑ya mai afoteni, mai one kikawama, mai hiawebonaha. Mai ihi‑nima dai ene riyahi. Owati amosa dai mitahi. Mai‑ka yama manakone hawa tohineni. Mai‑ka yama kasomi manakone Deoso daahini awiraboneni.

³Mai‑ka yama‑bone dai daaniya, dai one‑ya dai hiyarariyahi.

⁴Mai‑ka yama‑bone dai daana, tamine dai one hiwatora, Deoso‑ta hiwatobisa, dai ene manakone‑ya Deoso daanebonane.” Yeso ati nemarine.

⁵“‘Owa‑ya mai awiya, owa‑ya mai kahiyaraboneni.’ Dai one atibodi ati teni.

Owati amosa dai mitahi. Haa‑nima mai atibodi ati na, hibati‑ya mai manakone hawa tohani. Mai one ihi‑nima dai ene riyahi. Deoso‑ya dai ati hiyariya, dai one noko beheri‑ya dai hiyarahi.

⁶Mai one ihi‑nima dai ene riyahi. Deoso‑ya dai ati hiyariya, dai one mai noki‑ya dai hiyarariyahi. Nokobi wada, nokobi dai barikawamiya, dai‑ka Abi neme‑ke‑ya dai hiyarahi. Dai‑ya mai awara, Deoso dai‑ya awabise, dai manakone‑ya daanebonane.

⁷Bara mai toha mai hiyari‑nima dai hiyaririyahi. Mai‑ka deoso‑ya mai hiyara, mai ati yanani dama teni.

‘Oda hiyari yaboya, oda ati‑ya deoso mitebonane.’ Mai atibodi ati teni.

⁸Haa‑nima dai riyahi. Dai‑ka Abi neme‑ke dai hiyarabone, dai ati‑bone‑ya Deoso wato hawa tohene.

⁹Deoso‑ya dai hiyarabone, eya dai atiyahi.

‘Abi, neme‑ya tiwina, amosabote amatini.

¹⁰Tiwati ihi oda nafi‑ka hidi kitabote tihawahaboneni. Neme‑ya tiwati‑ya mai tokadabi‑nima bofe‑ya oda wi‑wina tiwati oda tokadabaharihi.

¹¹Mahi‑nima oda tefe‑ba daatiyahi.

¹²Oda ene amosaramaro mai ihi manakone oda haanamara‑nima oda ene manakone haatinamariyahi.

¹³Tiwa ene yama amosara oda nokotoniriyahi. Oda nafi‑ka hidi tihawahabone, kitabote amatini. Amosabote amatini. Yama maakani awirabone, fara amosineni.’ Dai atiyahi.

¹⁴Mai ihi towe mai‑ya dai ati somiya, dai‑ya dai‑ka Abi neme‑ke ati somaharibonane.

¹⁵Dai one‑ya dai kakoya, dai‑ka Abi neme‑ke dai‑ya kakoharibonane.” Yeso ati nemarine.

Mai tafara tamine

¹⁶“Owati amosa dai mitahi. Deoso‑ya mai kahiyarabone mai ati na, mai tafi maakana, mai noki ohina‑nima mai teni.

‘Owa noko ohina‑nima oniya, owa‑ya mai awiya, —Deoso‑ya nofi nafi ene tafi maakanane.— Mai ati niya, owa‑ya mai nofaboneni.’ Mai atibodi ati na,

Mai manakone hawa tohani. Mai‑nima dai riyahi.

¹⁷Dai tafi maakaniya, Deoso‑ya dai hiyarabisahi. Dai noko ohina‑nima dai riyahi. Dai noko dai soko, dai tati kone dai siri, dai nahi.

¹⁸Dai‑ya mai awiya, dai‑ya mai watoraboneni. Dai fime, dai‑ka Abi neme‑ke dai‑ya awabise, dai manakone‑ya daanebonane.” Yeso ati nemarine.

Neme‑ka yama dai nokotonihi

¹⁹“Bofe‑ya yama dama dai nokotoniriyahi. Dai‑ka yama one‑ya yama aboni kaba, one fehoso hikaba, one mai hiboti hiteboneni.

²⁰Neme‑ya dai‑ka yama dama‑bone dai nokotonihi. Neme‑ya yama aboni yama‑ya kabarihi, fehoso yama‑ya kabarihi, yama‑ya mai botirihi, teni.

²¹Bofe‑ya dai yehe honene dama wadiya, bofe‑ka yama dai nokotoniheboneni. Neme‑ya dai‑ka yama dama tohabisiya, neme‑ka yama dai nokotonibisaboneni. Ai‑ka yama dama wadi tohi‑kaya yama ai nokotoniteni.

²²Ai nokobodi ene yama ai awateni. Dai nokobodi amosa, yama nafi‑ya dai awateni.

²³Ai nokobodi towe toha, yama‑ya ai awaterani. Yama bara‑ya dai nokotoniya, dai noko towe toha‑nima dai na, Deoso ati dai watoraboneni.

²⁴Dai‑ka hidi mai fama, hidi owa ati dai tokadababisa, hidi owa ati dai tokadabaraboneni. Hidi owa dai nokotoniya, hidi owa dai kakaboneni. Deoso ati dai nofabisiya, yinero dai nokotoniraboneni.” Yeso ati nemarine.

Dai habo siitoriyahi

²⁵“Yama kaba wadarihi, faha fa‑fawa wadarihi, dai‑ka bora one wadarihi niya, dai habo siitoriyahi. Mai tafe toha, mai‑ka bora toha na mai‑ya kasomi nafira, mai one ohi, mai one aba nineni.

²⁶Bani bidi mai dai awahi. Bani bidi mai‑ka yamata‑bone‑ya mai kamaterani. Fadara‑ya mai kiharihi, mai tafe yoberi wadarihi teni. Bani bidi mai tafe‑bone‑ya ai‑ka Abi neme‑ke daanibisatene. Bani bidi mai manakone bi‑bidi, dai manakone nafibisateni.

²⁷Dai habo siitoniya, dai‑ya dai kasomaterani.

²⁸Bora one‑ya dai kihariya, dai atibodi yama‑ya kadikariyahi. Awa mowe dai awahi. Awa mowe bora‑ya wamaterani.

²⁹I‑di Saromaho‑ka bora amosa damamete, awa mowe amosabisa, Saromaho‑ka bora amosi bi‑bidi nametemoneni.

³⁰Awa mowe aba kanibote na makobote ai sarikiteni. Awa mowe‑ya Deoso nokotoni nafire, ai‑ya nokotoni nafibisatene. Deoso ati ene awa mowe amosani. Awa mowe‑ya Deoso kasome, ai‑ka bora‑bone‑ya daanaharibonane. Deoso ati dai nofi nafira, ati dai nofi nafihi.

³¹‘Hini yamata ai kaba, hini yamata ai fawa, hini yamata ai sako, ai nibati?’ Dai atibodi ati riyahi.

³²Bara haa‑nima mai atibodi ati teni. Mai‑nima dai riyahi. Ai‑ka Abi neme‑ke dai‑ya watotene.

³³6:25-34 Ai‑ka yama anini tamine tohi awira, ai habo siitorabone tamine amani. Ai‑ka yamata‑bone ai sibana, ai wasira, ai habo siitoraboneni. Yeso ati nematamonane.Neme‑ke ai nafi‑ka hidi kitabote tohawahebona dai nokotoniya, Deoso ati dai tokadabiya, dai‑ka yama‑bone‑ya Deoso daanebonane.

³⁴‘Mahi owa‑ya hini yamata oda kabibati? Oda‑ka bora abiya, hini yamata oda sakonibati?’ Dai atibodi ati riyahi.

Dai habo siitoriyahi. Mahi owa‑ka yama dai kayawariyahi. Mahi owa‑ya yama kobonibisaboneni. Hibayata‑ka yama towe toha, mahi owa‑ka yama hini tohamatahi.” Yeso ati nemarine.

Mai one‑ya dai weeriyahi

¹7:1-2 Yeso hini ati‑ya kemo, Deoso tamine‑ya hiyare, mai ihi ai nokotoni nafiya, ai ene‑ya Deoso nokotoni nafiharibonane.“Mai‑ya dai kakoriyahi. Mai dai nofiya, dai‑ya mai kakoraboneni.

²Dai ene‑nima mai ihi naboneni. Mai ihi dai nokotoni nafiya, dai ene‑ya mai nokotoni nafihareboneni. Mai ihi dai nokotoni nafira, dai ene‑ya mai nokotoni nafihariraboneni.

³Dai owa ene dai kadiki nafimariyahi. Hini dai ene dai kadiki ba‑basi nibisahi. Awa hibakori dai owa noko‑ya boka, awa ibe dai noko‑ya foyana, awa hibakori‑ya dai bikanamaterani, awa ibe dai noko‑ya foyaro.

⁴‘Awa hibakori tiwa noko‑ya boka, soba·onamaboneni.’ Titerani, tiwa noko‑ya awa ibe foyaro.

Mai ihi towe bide toha mai‑ya tikanawatoriyahi, tiwa ene towe ba‑basi naro.

⁵Towe amatini. Tiwa noko‑ka awa ibe sobatinamahi. Tiwa noko amosawamiya, mai‑ka awa hibakori sobatinamaneni. Tiwa ene amosawami bahiya, mai one‑ya tikanawatohi.

⁶7:6 Fariseo mai tamine‑ya i‑di Yeso hiyarane. Deoso ati amosabote‑ya mai nofara, boroko mai‑nima mai na, kasaro amosa‑ya boroko mai nofara‑nima mai na, boroko mai hama‑nima mai nineni.Yome mai‑ya Deoso‑ka yama ai daaterani. Boroko mai‑ya kasaro ai daaterani. Boroko mai‑ya kasaro dai daaniya, kasaro‑ya mai tainiya, dai‑ya mai wainaboneni.” Yeso ati nemarine.

Deoso‑ya dai haanahi

⁷“Deoso‑ya yama dai haanahi. Yama‑ya daanebonane. Deoso dai sibaniya, dai wasibonane. Deoso sawi‑kaya dai ati tokiya, nokobi‑ya dai haaniya, nokobi‑ya seekanebonane.

⁸Yama‑ya mai haana, mai‑ka yama‑bone mai‑ya koboteni. Yama‑ya mai sibana, yama‑ya mai wasiteni. Nokobi‑ya mai haana, nokobi‑ya mai seekiteni.

⁹Tika dao iyawa‑ya haane, atabo daatiterani.

¹⁰Aba‑ya tika dao haaneya, bataromaka daatiterani.

¹¹Dai ene kote towe toha, dai‑ka ewe‑ka yama amosa‑bone dai daateni. Deoso ene amose hinama tohe, Deoso dai haaniya, yama amosa‑ya daanebonane, ai‑ka Abi neme‑ke toheri.

¹²Hini tiwa‑ya tinofi‑nima mai one‑ya tinofahi. Hini tiwati koboni‑ka mai‑ya tikasomiyahi. Fara haa‑nima dai niya, Mose‑ka yama hani ati dai tokadaba, Deoso ati‑ya mai mi‑mita‑mete mai‑ka yama hani ati dai tokadabahari teni.” Yeso ati nemarine.

Deoso‑ka hawi bide toha

¹³“Nokobi bide‑ya dai tokiyomiyahi. Yama hirini‑ka hawi nafe, nokobi nafiteni. Hawi nafe‑ya mai dami tokiya, mai kome fawaraboneni.

¹⁴7:14 “Ai abarabone‑ka hawi” yama hani ati na, Deoso tabaro hawine tamine amane.Ai abarabone‑ka hawi bide toha, nokobi bide tohateni. Hawi bide‑ya mai fa‑famaraba na mai tokateni.” Yeso ati nemarine.

Mai ihi dai awa, mai atibodi dai watabone

¹⁵“Dai noko wadahi.

‘Deoso ati‑ya mi‑mita oda amani.’ Mai one ati naboneni.

Deoso ati‑mona mai ati na, keyehe‑ya mai hirina, Satanasi ati‑ya mai kaminabisateni.

¹⁶Awa bono ai awa, ade ai watoteni. Fara‑nima mai ihi ai awa, mai‑ka hidi oni ai watotene. Bisina ade‑ya ofa yanarihi, atiwa ede‑ya fiko yanarihi teni.

¹⁷Awa bono ade amosa, boni ai kabateni. Awa bono ade amosara, boni ai kabaterani.

¹⁸Awa bono ade amosa‑ya awa bono towe yanarihi, awa bono kabara ade‑ya awa bono amosa yanarihi, teni.

¹⁹Awa bono ade amosara ai tiiniya, ai sarikiteni.

²⁰Awa bono ai awa, awa bono ade oni ai watoteni. Fara‑nima mai ihi ai awa, mai‑ka hidi oni ai watotene.

²¹‘Ayo, oka hidi amatini.’ Hiniya mai ati niya,

Okobi ati‑ya mai tokadabariya, Neme‑ke ai nafi‑ka hidi kitabote tohawahe‑ya mai sawiraboneni. Okobi ati‑ya mai tokadabiya, mai sawibisaboneni.

²²Neme‑ke ai nafi‑ka hidi kitabote tohawahe‑ya mai nafi okadikaboneni. Owa‑ya mai haanabone,

‘Ayo, oda‑ka hidi amatini. Oda ene kita, tiwa tamine oda hiyara, madi towe mai‑ya oda kananihi namaroni, tiwa oni oda weyenaro.’ Mai ati naboneni.

²³‘Dai oyoseramaroni. Dai tokahi, dai ene amosararo.’ Onaboneni.” Yeso ati nemarine.

Yobe‑ya mai wa‑wama

²⁴“Owati dai mitamatasahi. Owati dai tokadabiya, yama‑ya dai watoteni. Yobe‑ya ai owa wamani wato‑nima dai neni. Ai owa yama‑ya wato, yati webote mese‑ya yobe‑ya wamane,

²⁵7:24-27 Boni, faha na Yeso ai ene‑ya kadikebona tamine amane. Yeso ati ai tokadaba ai ene‑ya Yeso kadikeya, ai‑ya weeni awirebonane. Yeso ati mai tokadabara mai ihi‑ya Yeso kadikeya, mai‑ya weeni kitebonane.yobe wamani hawa toheya, faha kaki nafe, faha fowe nafe‑ya yobe wafi, boni kita kobona, yati ihi yobe abi awirane.

²⁶Owati‑ya dai tokadabara, yama dai wato awirani. Haa‑nima dai nineni. Ai owa yama‑ya watore, siki‑ya yobe‑ya wamane,

²⁷yobe wamani hawa toheya, faha kaki nafe, faha fowe nafe‑ya yobe wafi, boni kita kobona, yobe sone, yobe nafi abane.” Yeso ati nemarine.

²⁸Yeso hiyari hawa toheya, mai atibodi yama‑ya dika,

“Se! Yeso yama hani ati‑ya wato nafine.

²⁹Mose‑ka yama hani ati‑ya mai ka‑kamina, haa‑nima mai ati ni awirani. Yama hani hidi ati‑nima Yeso ati nibisane.” Mai atibodi ati namaroni.

Mese towe tamine

¹Adami‑ya Yeso tokofawaha, nowati‑ya mai dama mai kamakemaroni.

²Mese towe tohe kaki, Yeso noko‑ya yobati‑kaya waaki, moinise,

“Ayo, haa‑nima ai‑na ai kasomi tiwata, owa kasomi tinofakarini?” Ati nemarine.

³Yeso maki‑ya boyone,

“Onofini, tiwa mese amosawamahi.” Ati ne, ati ene mese amosawamemarine.

⁴“Owati timitahi. Owa ene tamine mai‑ya tihiyarariyahi. Hiniya Deoso‑ka yama‑bone‑ya mai da‑daa mai‑ya tikahi. Mose‑ka yama hani ati‑nima yama daatiniya, tikitama, tiwa‑ya mai watowahaboneni.” Yeso ati nemarine.

Sodado mai‑ka hidi Yeso ati‑ya nofe

⁵Kafanaho‑ya Yeso kobone‑ya sodado mai‑ka hidi Yeso‑ya kame, Yeso‑ya hiyare,

⁶“Yeso, oka hidi amatini. Oka yo‑yose kiyani nafi, ka‑kakone, owa tabaro‑ya kawinene.” Sodado mai‑ka hidi ati nemarine.

⁷“Hehe, tiwa tabaro‑ya ai towakamahi. Tika yo‑yose onakitamaboneni.” Yeso ati nemarine.

⁸“Yeso, oka hidi webote amatini. Towe ama·oni. Amosabotebisa amatini. Owa tabaro‑ya tikamakiriyahi. Tiwati yananiya, tiwati ihi oka yo‑yose kitamebonane.

⁹Oka hidi ati‑nima oteni. Oka sodado owati‑nima mai teni. Fara‑nima tiwati yananiya, oka yo‑yose kitamebonane.” Sodado mai‑ka hidi ati nemarine.

¹⁰Ati‑ya Yeso mite, ya‑yaine, mai naha mai‑ya hiyare,

“Owati amosa dai mitahi. Sodado mai‑ka hidi owati‑ya nofi nafine, Yodeo ai toha, owati‑ya dai nofi bi‑bidi neni.

¹¹Neme‑ke ai nafi‑ka hidi kitabote tohawaheya, i‑di Abaraho, i‑di Isaki, i‑di Yako, mai na, mai marinabone, mahi ka‑kaki‑ka mai one toha, mahi to‑toka‑ka mai one toha na, fara Bara mai‑ka tabora dami‑ka mai saweboneni.

¹²Hibati‑ya Deoso dai‑ya himane, ati‑ya dai tokadabara, marina‑ya dai sawiraboneni. Dai‑ya mai weretowitebone, yama soki‑kaya dai ohinabone, dai komene kitaboneni.” Yeso ati nemarine.

¹³Sodado mai‑ka hidi‑ya hiyaramatase,

“Sibaraboneni. Tiwa tabaro‑ya tikamahi. Tiwati‑nima yama naboneni. Tika yo‑yose onakitamani.” Yeso ati nemarine.

Sodado mai‑ka hidi hini tabaro‑ya tokome, hika yo‑yose kitame‑ya awematane.

Mai dami‑ya nakitame

¹⁴Bedoro‑ka yobe‑ya Yeso tokomakimatane. Bedoro‑ka koma kiyana, hiwe nafe, kawinameteni.

¹⁵Yahi Yeso boyohina, kitama, hiwe fawana, mai tafe‑bone‑ya awawahameteni.

¹⁶Yama soki yanatoni‑ya madi towe mai sawi‑ka mai mai hiwakama, Yeso ati ene madi towe mai kana, mai kiyana mai‑ya nakitama nemarine.

¹⁷Yama hani i‑di Isa·iya hikanahanamete, fara yama hani ati‑nima Yeso ene nemarine.

“Ai kiyana, ai‑ya nakitamebonane.” Isa·iya‑ka yama hani ati nineni.

Yeso‑ya mai ati dababone

¹⁸Yeso nowati‑ya mai dama mai tokomakemaroni. Yeso mai‑ya awe, hika mai da‑daba mai‑ya himanemarine, kowani‑kaya mai eyehe tokebonaha.

¹⁹Mose‑ka yama hani ati‑ya mai ka‑kamina mai‑ka owa kamaki, Yeso‑ya hiyare,

“Yeso, oda‑ya ka‑kanawato amatini. Tikamiya, tiwa‑ya osaweboneni.” Ati nemarine.

²⁰“Bani mai one tabori hodi‑ya toha, bani mai afe wada mai bori tohateni. Owa‑ta owa tabaro wadarani.” Yeso ati nemarine.

²¹Yeso‑ya mai sawe mai‑ka owa ati yanane,

“Ayo, okobi abeya, hika yama kote okayafiya, tiwa‑ya osawiwahaboneni.” Ati nemarine.

²²“Abi‑ka yama hini tohiya, owa‑ya tisawibisahi. Abi abeya, owati‑ya mai nofara abi‑ka yama‑ya mai kayafabisiya, yama sibaraboneni.” Yeso ati nemarine.

Yeso ati ene yama hakikini fawana

²³Yeso‑ya mai da‑daba, kanawa‑ya Yeso eyehe mai foyawahamaroni.

²⁴Wara webote kowani‑kaya mai berekawahabone, faha bai‑ya mai yakakaniya, boni kita kake, faha rike nafe ihi, kanawa boki yanatonameteni. Yeso amone, forimatane.

²⁵Yeso‑ya mai mowakana,

“Ayo, ai tikasomahi. Ai abi bonehe.” Mai ati nameteni.

²⁶“Hini yamata ihi dai kakomehe? Owa ene hibati‑ya dai awateni. Owa dai wato awirini?” Yeso ati nematane.

Yeso waamise, boni‑ya wee, faha‑ya wee ne, boni fawa, faha rike fawa nameteni.

²⁷“Ebeni‑ke tohati? Ai‑nima Yeso ni awire, kitabotebisa amane. Yeso ati‑ya boni mita, fawa, faha rike fai ati‑ya mita, fawa nineni.” Mai ati nameteni.

Madi towe mai‑ya sawi, Yeso mai‑ya kasome

²⁸Wara webote kowani‑kaya mai kobonameteni, Kadara mai‑ka wami‑ya. Mai aba mai tame‑ya mai fama mai kasawe, mai kakemeteni. Madi towe mai sawi‑ka mai hama, mai ihi hawi‑ya mai one tokomarameteni.

²⁹“Yeso, Deoso Bidi amatini. Oda arabatinahi. Yama one‑ya oda‑ya saritikanabone tinamaro, hibayata mahi koboni awisare, oda bisitiriyahi.” Madi towe mai ati nameteni.

³⁰Yama yaki‑ya boroko mai dama mai tafameteni.

³¹“Yeso, maki mai‑ya oda sawimaterabone tina, boroko mai‑ya oda‑ya tiyosebisahi.” Madi towe mai ati na,

³²“Sibarini, boroko mai‑ya dai foyahi.” Yeso ati ne,

boroko mai‑ya madi towe mai tokiyoma, boroko mai kanani tokofawaha, wami kote wadara‑ya mai nafi toka, mai boka, mai nafi abameteni.

³³Boroko mai‑ya mai na‑nawada, sidadi‑ya mai kanani tokoma, Yeso ene‑ya mai kamina, madi towe mai sawi‑ka mai tamine‑ya mai kaminahari, mai nameteni.

³⁴Sidadi‑ya mai wi‑wina, Yeso tamine‑ya mai mita, mai nafi tokomakemeteni, Yeso‑ya mai awabonehe. Yeso‑ya mai awa, Yeso‑ya mai yosemeteni, yama one‑kaya tokebonaha.

Ka‑kakone‑ya Yeso kasome

¹Kanawa‑ya mai foyama, mai berekawama, Yeso tabaro‑kaya mai tokomatasameteni.

²Mai‑ka owa ka‑kakone fori‑ya mai kakamameteni, Yeso hinakitamebonaha. Mai ihi‑ya Yeso awe, ka‑kakone‑ya hiyare,

“Soho, ya‑yaitinahi. Tiwa ene towe manakone wadamarini.” Yeso ati nematane.

³Mose‑ka yama hani ati‑ya mai ka‑kamina, Yeso ati‑ya mai mita, mai yawawaha,

“‘Deoso‑nima ona ama·oni.’ Ati ne awane.

Hini ati ene abaho.” Mai atibodi ati nameteni.

⁴Mai atibodi ati‑ya Yeso wato, ati yanane,

“Hini yamata ihi dai atibodi yawiti?

⁵Bofe‑ka mai ati ihi ai ene towe manakone fawarihi, bofe‑ka mai ati ihi ai owa kitamarihi tene.

⁶Owati ihi ai owa ene towe manakone wadamare, dai awaboneni.” Yeso ati nematane.

Maki kiyane‑ya hiyare,

“Tiwaamisahi. Tika fo‑fori‑ka yama diwatikaniya, tikamahi, tika yobe‑ya.” Yeso ati nematane.

⁷Waamise, hini tabaro‑ya tokomematane.

⁸Yeso ene‑ya mai awa, mai habi siitona,

“Deoso ene amose, ati ene ai owa yama‑ya wato nafine.” Mai ati nameteni.

Mateo‑ya Yeso himane

⁹Yeso yananamatase, owa‑ya awe, owa‑ya himanemarine. Mateo ama·oni. Kofeno‑ka yinero‑bona‑ya ha‑haa ohamaroni. Kofeno‑ka yobe bidi‑ya owitare, Yeso owa‑ya haane,

“Owa‑ya tisawihi.” Yeso ati ne,

ati omita, Yeso‑ya osawiwahamaroni.

¹⁰Makobote owa tabaro‑ya oda marinamaroni. Kofeno‑ka yinero‑bona‑ya mai ha‑haa mai dama, mai ihi amosara mai dama, mai na, Yeso hika mai da‑daba mai eyehe mai marinamaroni.

¹¹Yeso ene‑ya fariseo mai awa, Yeso‑ya mai da‑daba mai‑ya mai hiyara,

“Hini yamata‑bone towe mai eyehe Yeso tafati? Kofeno‑ka yinero‑bona‑ya mai ha‑haa mai eyehe oda tafarihi, mai ihi amosara mai eyehe oda tafarihi, oda teni.” Fariseo mai ati namaroni.

¹²Mai ati‑ya Yeso mite, ati yanane,

“Mai kiyara mediko mai‑ya kasomaterene. Mai kiyana‑ta mediko mai‑ya kasomatene.

¹³Yama hani ati dai mitahi,

‘Oka bani‑bona mai daana mai ihi ya‑yai·oni nafira, mai ati soma mai ihi ya‑yai·obisaboneni.’ Yama hani ati neni.

Mai ihi amosamone mai ati na, mai hima·orani. Mai ihi amosara mai hima·onabone okemaroni.” Yeso ati nemarine.

Mai tafamarabone tamine

¹⁴Makobote i‑di Yowaho Batita‑ya mai da‑daba mai kamake,

“Mahi owa‑ya oda tafarihi, fariseo mai‑ya mai da‑daba mahi owa‑ya mai tafarihi teni. Tiwa‑ya mai da‑daba mahi‑nima mai tafateni.” Yowaho‑ya mai da‑daba mai ati namaroni.

¹⁵“Mai‑ka owa fanebona sawi ene mai ya‑yaina, mai ohiterani. Yama one‑kaya maki mai hiwakebona, tabora bara‑ya tokeya, mai tonokosa, yawa ihi mai tafi fawanaboneni.” Yeso ati nemarine.

¹⁶9:16-17 Ai ya‑yaina, ai tafi fawaterani. Yama bote‑ya yama yati dabara‑nima ai na, ai ya‑yaina, ai tafi fawaterani.“Ai‑ka bora bote hodeya, bora ibe yati ai nawaana, bora ai sokonawaha, bora ibe yati bi‑bidi nawama ihi bora bote nafi sibitonaboneni. Haa‑nima yama na towe tohateni.

¹⁷Bani ataro wamani yama wiye toha, wamani yati‑ya fino yati ai soronisiya, wiye taokiterani. Yama wiye bote‑ya fino yati ai soronisa terani. Yama wiye bote‑ya fino yati ai soronisiya, taokana, yama wiye aba, fino aba teni. Fino yati wiye yati‑ya ai soronibisateni, abarabonehe.” Yeso ati nemarine.

Fana mai fama mai‑ya Yeso kasome

¹⁸9:18 Hibati‑ya, hidi webote‑ya mai koboniya, mai yobati tati‑kaya mai itametemoneni. Yeso hidi webote amane i‑di Yairo atibodi ati ne, yobati tati‑kaya itematamonane.Yeso mai‑ya hiyareya, mai‑ka hidi owa kamaki, Yeso yowi‑ya yobati tati‑kaya ite,

“Yeso, okoto hibayata abani. Oka yobe‑ya tikamakihi. Okoto tati‑ya tiwa yehe foriya, okoto kitamaboneni.” Mai‑ka hidi ati nemarine.

¹⁹Yeso waamisame, hika mai da‑daba mai eyehe tokomakimarine.

²⁰Mai yakana, mai nowati‑ya fana tokomake, Yeso‑ka bora ifi‑ya boyonamaroni. Fana‑ka ama fawani watora, faha fowe 12 kana‑ya hika ama fawani awiramaroni.

²¹“Yeso borone‑ya boyo·oniya, okitamaboneni.” Fana atibodi ati namaroni.

²²Yeso kiinawame, fana‑ya awe,

“Sima, ya‑yaitinahi.

‘Yeso‑ka bora boyo·oniya, oka ama fawanawahaboneni.’ Tiwatibodi ati na,

fara ihi tiwa onakitamineni.” Yeso ati nemarine.

Fana kitamawahamaroni.

²³Mai‑ka hidi tabora‑ya Yeso kobone, tokiyome, hidi‑ka yobe‑ya mai dama kaida‑ya mai one afo, mai ati kita na, mai‑ya Yeso awemarine.

²⁴“Dai tokahi. Atona abi awirini, hiniya amoneni.” Yeso ati ne,

ati‑ya mai hahakanamaroni.

“Yama tiwato awirini.” Mai ati namaroni.

²⁵Mai toka, mai nowati‑ya Yeso tokiyamaki, atona aboi yahi‑ya waratone, atona waamisamamaroni.

²⁶Yeso ene atona kitama, tamine‑ya mai dama mai mitamaroni.

Mai noki‑ya Yeso kasome

²⁷Makobote Yeso toke, mai noki wadara mai fama, Yeso nowati‑ya mai towakamake,

“Yeso, oda‑ka hidi amatini. I‑di Dafi‑ka nodi amatini. Oda tikasomahi.” Maki mai ati namaroni.

²⁸Mai one‑ka yobe‑ya Yeso tokiyome, nowati‑ya mai towakamakitasa,

“‘Yeso kitabote, oda noko‑ya kasomebonane.’ Dai atibodi ati neni?” Yeso ati ne,

“Hehe, kitabote amatini. Oda noko tikasomabone oda ati neni.” Mai ati namaroni.

²⁹Mai noki‑ya boyone,

“Dai ati‑nima yama naboneni.” Yeso ati nemarine.

³⁰Mai noki amosawama, yama‑ya mai awawahamaroni.

“Owa ene tamine dai hiyarariyahi.” Yeso ati nemarine.

³¹Mai towaka, Yeso ene tamine‑ya mai hiyaramaroni, mai nafi‑ya.

Maki ati fawane‑ya Yeso nakitame

³²Tabora one‑kaya Yeso toke, madi towe ai owa‑ya foye, madi towe ene maki ati wadamaremarine.

³³Yeso ati ene madi towe kanane, maki ati yananawahemarine. Yeso ene‑ya mai dama mai awa, mai ya‑yaina, mai atibodi yama‑ya kadika,

“Haa‑nima ai ene na, ai awaterani.” Mai ati namaroni.

³⁴Fariseo mai‑ta mai yawabisa,

“Madi towe mai‑ka hidi ati ene mai kananineni.” Fariseo mai ati namaroni.

Ai nafi‑ka hidi kitabote tohawahebona tamine

³⁵Mai‑ka sidadi dami‑ya Yeso toke, mai tabori bide dama‑ya toka ne, Deoso‑ya mai hi‑hiyara‑ke yobe‑ya tokiyome, mai‑ya kanawatomarine. Neme‑ke ai nafi‑ka hidi kitabote tohawahebona tamine‑ya hiyara, mai kiyana mai‑ya nakitama nemarine.

³⁶9:36 Bani hame mai‑ya wakane yama hani ati na, Satanasi mai‑ya keyehe, mai tamine amani.Mai dama mai‑ya Yeso awe,

“Kaneiro mai‑ya mai na‑nawada mai awiriya, kaneiro mai kakomehe, mai‑ya bani hame wakanebonane. Kaneiro mai‑ka hidi wadamare mai‑nima mai na, mai okasomaboneni.” Yeso atibodi ati nemarine.

³⁷9:37-38 Deoso‑ka yamata i‑di Deoso ati‑ya mai watora mai tamine amani. Yamata‑ya mai tonaka i‑di Deoso ati‑ya mai ka‑kamina mai tamine amani.“Deoso‑ka yamata dama marafakana, yamata‑ya mai tonaka mai damara,

³⁸Deoso dai hiyarahi, mai one tokomakibakaro, Deoso‑ka yamata‑ya mai kakamabonehe.” Yeso ati nemarine.

Yeso‑ya mai da‑daba mai‑ya yosene

¹Yeso‑ya oda da‑daba oda 12 kana oda‑ya Yeso haane, ati yanane,

“Owati ihi dai ene kitawahiya, dai ati ene madi towe mai kanana, mai kiyana mai dai nakitama naboneni.” Yeso ati nemarine.

²Yeso‑ka yo‑yose oda 12 kana oda oni amani, haro, i‑di Simaho Bedoro, Simaho sohori i‑di Anidere, Sebedeo bidi i‑di Tiyako, Tiyako sohori i‑di Yowaho,

³i‑di Firibi, i‑di Batoromeho, i‑di Tome, owa, (owa oni Mateo toha, kofeno‑ka yinero‑bona‑ya ha‑haa ohamaro,) Aofio bidi i‑di Tiyako, i‑di Tadeo,

⁴i‑di Simaho Seroti, i‑di Yoda Isikari·oti, oda namaroni. Yoda Isikari·oti i‑di Yeso‑ya kahabanawahemarine.

⁵Oda 12 kana Yeso oda‑ya yose,

“Dai tokahi. Bara mai tabori‑ya dai tokarihi, Samaritano mai tabori‑ya dai tokarihi nahi,

⁶Yodeo mai tabori‑ya dai tokabisahi. Kaneiro mai fawatonakosa mai‑nima Yodeo mai nineni.

⁷Dai tokiya, eya dai ati nahi.

‘Neme‑ke ai nafi‑ka hidi kitabote tohawahebona dai‑ya sawine.’ Dai ati nahi.

⁸Mai kiyana mai dai kasoma, mai mese towe toha mai mese dai nataminawama, mai aba mai dai nakitama, madi towe mai dai kananihi, dai nahi. Owati ihi dai ene kitawaha, yama manakone dai‑ya haa·ora, mai one dai kasoma, yama manakone dai haariyahi.

⁹Dai tokiya, yinero oro wamani dai ibirihi, yinero barata wamani dai ibirihi, yinero bidi dai ibirihi, dai nahi.

¹⁰Yamasi dai weyerihi, bora fama‑ya dai nasawirihi, sanidariya owa dai nasawirihi, dai dabakiba‑ka awa one dai nasawirihi, dai nahi. Mai‑ya dai kasoma dai‑ka yama‑bone‑ya mai daanaboneni. Mai‑ka yama ai anina ai‑ka yama‑bone‑ya mai daateni.

¹¹Mai tabori‑ya dai koboniya, mai ati amosa mai‑ka yobe‑ya dai winiyahi. Aka‑ya dai toki awisari‑ya yobe owa‑ya dai winariyahi.

¹²Mai‑ka yobe‑ya dai tokiyomiya, dai ati yananahi.

‘Ahi‑ya dai wi‑wina Deoso dai‑ya kasomebonane.’ Dai ati nahi.

¹³Yobe hidi ati amoseya, Deoso mai‑ya kasomebonane. Yobe hidi ati amosareya, Deoso mai‑ya kasomarebonane.

¹⁴10:14 Hibati‑ya mai ati‑ya mai tokadabara, nokobi‑ya mai tame‑ka wami hibakori‑ya mai nanahaba, haa‑nima mai ihi‑niya, “Deoso dai‑ya weenebona, hini dai ene amani.” Mai ati teni.Dai ati‑ya mai nofara, dai yananamiya, mai noki‑ya dai teme hibakori dai nanahabiyahi.” Yeso ati nemarine.

¹⁵“Owati amosabote dai mitamatasahi. Ai nafi ene‑ya Deoso kadikeya, mai‑ya weeni kitebonane. Hibati‑ya Sodoma‑ya mai wi‑wina, Komora‑ya mai wi‑wina, mai na, Deoso mai‑ya nanahabematane. Ai nafi ene‑ya Deoso kadikeya, mai‑ya weenamatasebonane. Dai ati‑ya mai nofara mai‑ya Deoso bisini kitabisebonane.

¹⁶Owati dai mitahi. Kaneiro mai‑nima dai nahi. Dai hamariyahi. Yome hame‑nima mai teni. Mai‑ya dai‑ya oyose, dai noko wadiyahi. Maka mai noki wadi‑nima dai noko wadiyahi. Wayomata mai hamaterani. Wayomata mai‑nima dai nahi. Dai hamariyahi.

¹⁷Dai noko wadahi, mai‑ka hidi bidi mai‑ya dai‑ya mai daanaboneni. Deoso‑ya mai hi‑hiyara‑ke yobe‑ya dai‑ya mai kosinaboneni.

¹⁸Bara mai‑ka kofenado mai toha, mai‑ka hidi webote mai toha na, mai ati ihi dai‑ya mai wataboneni. Mai noki‑kaya dai nahoya, owa tamine‑ya mai‑ya dai hiyarawahaboneni. Dai‑ka hidi mai toha, Bara mai toha na, mai‑ya owa tamine‑ya dai hiyaraboneni.

¹⁹Dai‑ya mai kahabaniya, dai ati‑ya mai mitabone, dai atibodi yama‑ya kadikariyahi. Deoso ene dai ati yananaboneni.

²⁰Fara dai ati yokana toharabone, ai‑ka Abi neme‑ke‑ka Doni ati nebonane.

²¹Dai‑ka dai‑ya mai kahabanaboneni, dai‑ya mai nanahababonehe. Anidi sohori‑ya kahabana, badi bidi‑ya kahabana, mai‑ka madehe badi, madi mai na, mai‑ya mai kahabana, mai naboneni, mai mai hinahababonehe.

²²Owa dai nofa dai‑ya mai nafi kakaboneni. Owa oni dai saatonakosi awiriya, dai sibaraboneni.

²³Tabora ohare‑ya dai‑ya mai weena, tabora one‑ya dai tokahi. Owati amosa dai mitahi. Isara·eo mai tabori dami‑ya dai tokasa riya, dai‑ka Ayo neme‑ke kiti yananebonane.

²⁴Maki‑ya mai kako hika mai da‑daba mai‑ya mai kakohari naboneni. Mai‑ka hidi mai hikako‑nima mai‑ya mai kakohareboneni.

²⁵10:25 Beosibo idi Satanasi oni owa amane.Dai‑ka hidi‑nima dai‑ya mai ni‑ya yama sibaraboneni. Dai‑ka hidi‑ya mai nofara,

‘Dai‑ka hidi i‑di Beosibo amane.’ Mai ati niya,

‘Satanasi‑ka dai amani.’ Mai ati nihi naboneni.

²⁶Mai ati ihi dai kakomeheriyahi. Yama‑ya mai kema, mai dami yama‑ya watowahaboneni.

²⁷Hibayata dai ohiyara, dai damara, makobote mai nafi‑ya dai hiyarawahaboneni. Owati dai mita, owati dai kaminaboneni, mai nafi‑ya.

²⁸Dai‑ya mai ati naboha, mai‑ya dai nayofinariyahi. Dai atibodi‑ya mai nanahabaterani. Deoso dai nayofinabisahi. Deoso‑ya mai nofara, mai aboni, mai atibodi na‑ya yama hirini‑kaya Deoso weretowitibonane.

²⁹Bani bidi mai fama mai daana, yinero bidi ohari‑ya mai manakone tohateni. Ai‑ka Abi ati sibareya, bani bidi ai naboha, ati sibari awireya, bani bidi ai nabohaterani.

³⁰Deoso ai tati kone nafi‑ya wato, ai tati kone nafi‑ya kadikemarine.

³¹Dai habo siitoriyahi. Bani bidi mai dama mai manakone bi‑bidi teni. Dai‑ta dai manakone nafibisateni.

³²Mai‑ya dai hiyariya,

‘Yeso‑ka ama·oni.’ Dai ati niya,

Okobi ohiyariya,

‘Oka mai amani.’ Onaboneni.

³³‘Yeso‑ka ohi awirini.’ Mai ati niya,

Okobi neme‑ke ohiyariya,

‘Oka mai tohi awirini.’ Onaboneni.

³⁴‘I‑di Yeso ati ene mai nafi ati hamamateraboneni.’ Dai atibodi ati riyahi.

Owati‑ya mai nofara, oka mai‑ya mai bisinaboneni.

³⁵Bidi badi‑ya nofarihi, bide madi‑ya nofarihi, fana hika koma‑ya nofarihi naboneni.

³⁶Hika mai hikakaboneni.

³⁷Owa dai nofi nafibisahi. Abi, ami, mai na, mai dai nofi bi‑bidi nahi. Dai‑ka madehe dai nofi bi‑bidi nahi. Owa‑ya mai nofi nafira, oka mai tohi awirani.

³⁸‘Owa‑ya mai ati nanahaba yama sibarini. Yeso ati okadababisaboneni.’ Dai atibodi ati ni awiriya,

oka dai tohi awirani.

³⁹10:39 Yeso‑ya dai nofa dai‑ya mai nanahaba, Deoso tabaro‑ya dai ya‑yainaboneni. Oda abariyahi dai ati niya, Yeso ati‑ya dai tokadabara, dai ohinaboneni.Owa‑ya dai nofa dai‑ya mai nanahaba, dai abaraboneni.

“Oda abariyahi.” Dai ati niya,

owati‑ya dai tokadabara, dai ababoneni.

⁴⁰Oka dai toha dai ati‑ya mai nofa owati‑ya mai nofahari, owati‑ya mai nofa owa‑ya yose‑mari ati‑ya mai nofahari teni.

⁴¹Owati amosa dai mitahi. Deoso ati‑ya ka‑kamina dai aweya,

‘Deoso ati‑ya ka‑kamina amane, okasomaho.’ Dai ati niya,

Deoso ati‑ya mai ka‑kamina mai ihi manakone‑nima dai manakone na‑ya Deoso dai‑ya daanebonane. Ai owa Deoso ati‑ya nofe dai awiya,

‘Deoso ati‑ya nofane, okasomaho.’ Dai ati niya,

Deoso ati‑ya mai nofa, mai ihi manakone‑nima dai manakone na‑ya Deoso dai‑ya daanebonane.

⁴²Oka mai baki hoka, mai‑ya faha dai daaniya,

‘Yeso Kirisito‑ka mai amani, mai okasomaboneni.’ Dai atibodi ati niya,

dai ene amosa manakone‑ya Deoso daanebonane.” Yeso ati nemarine.

¹Oda 12 kana, oda‑ya Yeso hiyari hawa tohe, mai tabori dami‑kaya oda eyehe tokemarine, mai one‑ya kanawatobonaha.

Yeso tamine‑ya Yowaho Batita mitebona

²Kadeya‑ya Yowaho wai, Yeso Kirisito ene tamine‑ya mite, hika mai da‑daba mai‑ya yosematane.

³Yeso‑ya mai haana,

“‘Deoso‑ka kakibona mai ati namete, fara amatiraniha? Fara tihi awiriya, Deoso‑ka yokana oda nimanaboneni.’ I‑di Yowaho ati nene.” Mai ati namaroni.

⁴Yeso mai‑ya hiyare,

“I‑di Yowaho‑ya dai towakamiya, owa ene dai kamina, owati dai kamina, dai nahi.

⁵Yama mai awaramaro yama mai awawaha, mai ka‑kakona‑maro mai yakanamawaha, mai mese towe tohamaro mai mese amosawama, mai narabi hawiramaro ai ati‑ya mai mitawaha, mai abamaro mai kitamawaha, yama mai kihara Deoso ati amosabote‑ya mai mitawaha nineni.

⁶Owa tamine‑ya mai mitiya, mai yawi awiriya, Deoso mai‑ya kasomebonane.” Yeso ati nemarine.

⁷Yowaho‑ka mai tokoma, mai nowati‑ya i‑di Yowaho tamine‑ya mai dama mai‑ya Yeso hiyare,

“Hibati‑ya i‑di Yowaho‑ya dai toka, hini yamata dai awabone dai tokiti? Watikoro henerikane dai awabone, dai tokiraniha?

⁸Bora amosabote‑ya sakone dai awabone, dai ati na awineni. Bora amosabote‑ya mai sakona, kabani‑kaya mai winatera, hidi webote‑ka yobe‑ya mai winateni.

⁹Deoso ati‑ya mi‑mita‑ya dai awabone, dai ati na, fare Yowaho Deoso ati‑ya mi‑mita amane. Yowaho‑ya Deoso yosemarine.

¹⁰Deoso‑ka yama hani ati dai mitahi,

‘Owati timitahi. Oka yo‑yose bofe‑ke oyoseboneni, tiwa hawine‑bone‑ya hawa tonihibonaha.’ Deoso‑ka yama hani ati na,

i‑di Yowaho Batita tamine amane.

¹¹Owati amosa dai mitahi. I‑di Yowaho Batita amosi nafi, hibati‑ka mai nafi amosi bi‑bidi nibisa, Neme‑ke ai nafi‑ka hidi kitabote tohawahe‑ya mai sawiya, mai nafi amosi ba‑basi naboneni.

¹²Hibati‑ya Neme‑ke ai nafi‑ka hidi kitabote tohawahebona tamine‑ya i‑di Yowaho hiyaremarine. Tamine‑ya mai mita, mai hama, mai hami fawarani.

‘Oda kita, hini oda ene Neme‑ke ai nafi‑ka hidi kitabote tohawahe‑ya oda saweboneni.’ Mai ati nani.

¹³Yowaho koboni awisareya, Deoso ati‑ya mai mi‑mita‑mete mai toha, i‑di Mose toha ne, Eriya kamebona tamine‑ya mai kanahanameteni.

¹⁴I‑di Eriya i‑di Yowaho tamine amane.

¹⁵Owati dai mita, owati dai tokadabahi.

¹⁶Hini yamata‑nima dai niti? Haa‑nima dai nineni. Madehe nahore, mai ibi

hiyara, haa‑nima mai ati na,

¹⁷‘Ka! Kaida oda afona, dai wayomi awirani. Mai tabiyo oda ohina, dai ohini awirani.’ Madehe one ati na,

mai one‑ya mai nofara mai‑nima dai nineni.

¹⁸I‑di Yowaho tafi bi‑bidi ne, fino‑ya fawarihi ne,

‘Madi towe i‑di Yowaho‑ya foyane.’ Dai ati teni.

¹⁹11:16-19 Madehe one ya‑yai, mai one ohi na, mai one hiniya naho, mai ya‑yaina mai‑ya mai nofarihi, mai o‑ohi mai‑ya mai nofarihi na. Fara mai‑nima fariseo mai toha, Yowaho Batita‑ya mai nofara, i‑di Yeso‑ya mai nofaharirani.Dai‑ka Ayo neme‑ke tafi ba‑basi ne, fino‑ya fawane,

‘Yeso towe amane. Tafi nafi, fino‑ya fawa, kofeno‑ka yinero‑bona‑ya mai ha‑haa mai toha, mai ihi amosara mai toha, mai na, mai‑ya Yeso nofatene.’ Dai ati teni.

Yama‑ya mai wa‑wato mai ihi ai awa, mai ai watoteni.” Yeso ati nemarine.

Mai tabori ababone tamine

²⁰Yeso ene kitabote‑ya mai awamaro, Yeso ati‑ya mai nofara, mai‑ya Yeso weenemarine, mai ihi amosawami watoraro.

²¹“Ka! Korasi‑ya dai wi‑wina, Besaida‑ya dai wi‑wina, dai na, dai ene manakone wadani. Owa ene kitabote‑ya dai awamaro, owati‑ya dai nofaramaroni. Tiro‑ya mai wi‑wina‑mete, Sidoho‑ya mai wi‑wina‑mete, mai na, Deoso ati‑ya mai tokadabara, tabora fami‑ya Deoso nanahabematamonane. Owa ene kitabote‑ya mai awi bahamete‑mani, mai atibodi amosawama nemeteni.

²²11:21-22 Tiro‑ya mai wi‑wina‑mete mai toha, Sidoho‑ya mai wi‑wina‑mete mai toha na, Deoso ati‑ya mai tokadabarametemoneni. Mai amosawahi watora, mai ihi sidadi fami‑ya Deoso nanahabematamonane.Owati dai mitahi. Hibati‑ya Tiro‑ya mai wi‑wina‑mete, Sidoho‑ya mai wi‑wina‑mete, mai na, ai nafi ene‑ya Deoso kadikeya, mai‑ya weenamataseya, mai‑ya weeni bi‑bidi nebona, dai‑ya weeni kitabisebonane.

²³Kafanaho‑ya dai wi‑wina, neme‑ya dai winabone dai ati na, yama hirini‑kaya dai sawibisaboneni. Sodoma‑ya mai wi‑wina‑mete owa ene kitabote‑ya mai awi bahamete‑mani, mai abara nemeteni.

²⁴Ai nafi ene‑ya Deoso kadikeya, dai‑ya weeni kitebonane. Ai nafi ene‑ya Deoso kadikeya, hibati‑ya Sodoma‑ya mai wi‑wina‑mete mai‑ya weenamataseya, mai‑ya weeni bi‑bidi nebona, dai‑ya weeni kitabisebonane.” Yeso ati nemarine.

Dai maa toha owa‑kaya dai kamiyahi

²⁵Yeso Badi‑ya hiyare,

“Abi Deoso, bofe‑ka hidi tiha, neme‑ka hidi tiha, yama‑ya mai wa‑wato‑mone mai ati na tiwa ene‑ya mai watorani. Madehe‑nima mai na, yama‑ya mai watoramone mai ati na tiwa ene‑ya mai watobisineni. Tiwa ene ya‑yai·oneni.

²⁶Tiwati‑maro‑nima yama nineni.” Yeso ati nemarine.

²⁷Oda‑ya hiyaramatase,

“Okobi ene yama nafi okayafawahineni. Owa‑ya dai wato nafira, owa‑ya Okobi watobisane. Okobi owato oteni. Owati ihi Okobi‑ya dai one watomakineni. Dai‑ya okasomara‑mani, Okobi‑ya dai watora neni.

²⁸Dai maa tohiya, owa‑kaya dai kamiya, dai okasomaboneni.

²⁹Owa‑nima dai nahi. Hama·oterani. Owati somateni. Owa‑nima dai niya, dai atibodi maa tohamateraboneni.

³⁰Owa‑nima dai niya, dai‑ka yama anini kitara‑nima dai naboneni. Yama kanara dai weyena‑nima dai naboneni.” Yeso ati nemarine.

Sabado hidi i‑di Yeso amane

¹Sabado‑ya Yeso tokemarine. Yeso‑ya oda da‑daba oda sawemaroni. Fadara‑ya oda kariwaha, oda fime, tiriko tati‑ya oda bakakasa, tiriko oda kabamaroni.

²Oda ene‑ya fariseo mai awa, mai yawa, Yeso‑ya mai weena,

“Tika mai da‑daba mai ihi ati kasirani, sabado‑ya yama‑ya mai aninaro.” Mai ati namaroni.

³12:3-4 Deoso‑ka yobe‑ya i‑di Dafi yama‑ya anitere, fimi ihi Deoso‑ka baho‑ya hika mai eyehe kabe, Deoso yawi awirematamonane.Yeso ati yanane,

“Dafi tamine dai kadikaterini? Dafi, hika mai eyehe toke, mai fimi nafemetemoneni.

⁴Deoso‑ka yobe‑ya Dafi tokiyome, Deoso‑ka baho‑ya idi, baho‑ya mai kabametemoneni. Deoso‑ka baho‑ya mai one kabaterani. Deoso‑ka yama‑bone‑ya mai da‑daa mai hikababisateni.

⁵Sabado‑ya yama ai aniteramone dai ati na, Deoso‑ka yama hani dai kadikatera awineni. Sabado‑ya Deoso‑ka yama‑bone‑ya mai da‑daa yama‑ya mai anina, mai ihi Deoso ati yawaterene.

⁶12:6 Yeso hini tamine‑ya hiyare. Yeso amosi nafi, Deoso Bidi amane.Owati dai mitahi. Deoso‑ka yobe amosi bi‑bidi ne, hai‑ta dai‑ya dabe amosi ba‑basi nibisane.

⁷Deoso ati dai watora,

‘Oka bani‑bona onofi nafira, mai ati soma, mai ihi ya‑yai·obisaboneni.’ Deoso ati nane.

Deoso ati‑ya dai wata‑mani, mai ihi amosa mai‑ya dai weeni awira neni.

⁸Dai‑ka Ayo neme‑ke sabado hidi amane.” Yeso ati nemarine.

⁹Yeso hiyari hawa tohe, yananamatase, Deoso‑ya mai hi‑hiyara‑ke yobe‑ya tokiyomemarine.

¹⁰Maki yehe moikanamemata itari,

“Yeso hinakitameba awane.” Mai atibodi ati namaroni.

“Yeso, sabado‑ya ai owa ai nakitama, sibakarini?” Mai ati namaroni, Yeso‑ya mai weenabonehe.

¹¹Yeso mai‑ya hiyare,

“Sabado‑ya tika kaneiro hodi‑ya soniriseya, didire awane.

¹²Bani mai manakone bi‑bidi na, ai manakone nafi bisineni. Sabado‑ya ai owa ai kasoma, ai sibarineni.” Yeso ati nemarine.

¹³Yehe moikaname‑ya hiyare,

“Tiwa yehe feotokanahi.” Yeso ati ne,

Yehe feotokaname, yehe owa‑nima yehe nawahemarine.

¹⁴Yeso ene‑ya fariseo mai awa, mai toka, mai yorotokana, Yeso‑ya mai nanahababone, Yeso tamine‑ya mai ibi hiyarameteni.

Yeso‑ya i‑di Deoso yosene

¹⁵Mai ihi‑bone‑ya Yeso wato, toke, nowati‑ya mai dama mai tokomake, mai kiyana mai‑ya Yeso nakitame,

¹⁶Mai‑ya hiyare,

“Owa tamine dai kaminariyahi.” Yeso ati nemarine.

¹⁷Isa·iya i‑di Deoso ati‑ya mai mi‑mita‑mete mai‑ka owa amane. Isa·iya‑ka yama hani ati‑nima yama nawahani.

¹⁸“Oka yo‑yose dai awaho. Okadikemari, onofi nafine. Owati ihi Oka Doni fai‑ya sawibonane. Bara mai‑ya hiyareya,

‘Mai ihi‑nima mai manakone na kobonaboneni.’ Ati nebonane.

¹⁹Mai‑ya weerihi, yawa ihi ati towe toharihi nebonane. Sidadi hawi‑ya ati towe mai himitarebonane.

²⁰Mai kiyana mai‑ya kasomebonane. Mai ohini kita mai‑ya weeterebonane. Mai kitara mai‑ya kasomeya, mai nafi ihi‑nima mai manakone na‑ya daanebonane.

²¹Oka yo‑yose‑ya Bara mai watoya, mai habi siitonamaraboneni.” Deoso‑ka yama hani ati nineni. Fare ati‑nima yama nawahani.

Yeso tamine‑ya keyehe‑ya mai hirina

²²Maki madi towe foya‑ke‑ya mai kakamamaroni, Yeso hinakitamebonaha. Maki noko wadamarihi, ati wadamarihi ne, Yeso ati ene kitame, yama‑ya awamatase, ati yananamatasa nemarine.

²³12:23 “Dafi‑ka nodi tohe awane.” Mai ati niya, “Ai‑ka hidi webote tohawahebonane.” Mai atibodi ati neni.Yeso ene‑ya mai awa,

“Ka! Haa‑nima ai ene na, ai awaterani. Dafi‑ka nodi tohe awane.” Mai ati namaroni.

²⁴Mai ati‑ya fariseo mai mita, mai yawa,

“Deoso ene tohi awirane. Madi towe mai‑ka hidi i‑di Beosibo ati ene madi mai one‑ya Yeso kananine.” Mai atibodi ati namaroni.

²⁵Mai atibodi ati‑ya Yeso wato, mai‑ya hiyare,

“Hidi webote, hika mai dama mai ibi bisiniya, hidi webote kiti fawanebonane. Sidadi ohare‑ka mai ibi toka toweya, mai nafi wadamaraboneni. Tabora ohare‑ka mai ibi toka toweya, mai nafi wadamaraboneni.

²⁶Satanasi hini hika mai‑ya kananihi‑mana, kitamare nane.

²⁷Beosibo ene madi towe mai kana·onihemone, dai ati na, dai one madi towe mai‑ya mai kanana, ebeni‑ke ene tohati? Satanasi ene amane, dai ati niya, dai one dai‑ya mai weenaboneni.

²⁸Deoso‑ka Doni ati ene madi towe mai kana·onihe, dai ati na, Deoso ai nafi‑ka hidi kitabote tohawahebona dai‑ya sawine.

²⁹12:29 Ai owa kite, Satanasi tamine amane. Satanasi‑ya Yeso wati hawa toheya, madi towe mai‑ya Yeso kananine.Ai owa kite hini tabaro‑ya wai, yehe honene mai hiyabaterene. Ai owa kite‑ya wati dai toheya, yehe yadihikaneya, yehe honene hiyabatene.

³⁰Owa‑ya mai nofara, owa‑ya mai kakoteni. Owa‑ya mai ati sawira,

‘Yeso‑ya dai sawiriyahi.’ Mai ati teni.

³¹Owati dai mitahi. Dai ene towe toha, dai ati towe toha na, makobote Deoso ati dai nofawahiya, dai ene manakone Deoso haanamaterebonane. Deoso‑ka Doni‑ya dai weeniya, dai ene manakone fawateraboneni.

³²Owa‑ya mai weeniya, makobote owati‑ya mai nofawaha, mai ihi manakone Deoso haanamarebonane. Deoso‑ka Doni‑ya mai weeniya, mai ihi manakone wada, mai manakone fawateraboneni.

³³Awa ade amosa boni amosateni. Awa ade towe boni towe tohateni. Awa bono hini ade‑nima boniteni. Ai atibodi amosa, ai ene amosateni. Ai ene‑ya mai awiya, ai atibodi tamine‑ya mai wataboneni.

³⁴Maka yokana‑nima dai nineni. Dai atibodi amosara, dai ene amosateraboneni. Ai atibodi ati‑nima ai ati yanateni.

³⁵Mai atibodi ati towe tohiya, mai ati towe tohaboneni. Mai atibodi ati amosiya, mai ati amosaboneni.

³⁶Ai nafi ene‑ya Deoso kadikeya, ai ati towe manakone‑ya daanebonane.

³⁷Dai ati‑nima dai ati manakone wada, dai ati amosa hinama tohiya, dai sibaraboneni. Dai ati towe toha, wara hirini‑ya dai saweboneni.” Yeso ati nemarine.

Yona tamine‑ya Yeso hiyare

³⁸Mose‑ka yama hani ati‑ya mai ka‑kamina mai toha, fariseo mai toha na, mai ati yanana,

“Naki, Deoso‑ka tihamone tina, neme‑ya tiwa ene kitabote oda awaboneni.” Mai ati namaroni.

³⁹Mai‑ya hiyare,

“Towe dai amani. Deoso ati dai tokadabara, hiniya owa ene kitabote dai awabone dai ati na, dai ati‑nima oteraboneni. Yama dai awabone dai ati na, i‑di Yona ene‑mata‑nima yama na dai awabisahi.

⁴⁰Hibati‑ya aba doro‑ya i‑di Yona foye, mahi, yama soki na 3 kane‑ya aba doro‑ya foye, aba saahinamematane. Fare‑nima onabone, hodi‑ya ofoyabone, mahi 3 kane‑ya okitamaboneni. Dai‑ka Ayo neme‑ke ama·oni.” Yeso ati nemarine.

⁴¹“Ai nafi ene‑ya Deoso kadikeya, Ninifa‑ya mai wi‑wina‑mete dai‑ya mai weenaboneni, owati‑ya dai nofararo. Ninifa‑ya mai wi‑wina i‑di Yona ati‑ya mai mita, mai ihi‑maro‑nima mai ihi namarameteni. Yona kiti bi‑bidi nemata, dai‑ya da‑daba kiti nafibisane. Owa ene dai nofara dai ene towe manakone nafeboneni.

⁴²Ai nafi ene‑ya Deoso kadikeya, bato‑kaya mai wi‑wina‑mete mai‑ka hidi fana dai‑ya weenaboneni. Hibati‑ya Saromaho hasineya, yama yaki‑ya kakemeteni, Saromaho ati‑ya mitabonehe. Saromaho yama‑ya wato bi‑bidi nematane. Dai‑ya da‑daba yama‑ya watobisane.

⁴³Madi towe ai owa‑ya sawimari, tokawahe, tabora one‑ya sibane, tabora one‑ya wasi awire,

⁴⁴hini‑ya hiyare,

‘Hibati‑ya osawimaro‑kaya wini·onamaboneni.’ Madi towe ati ne,

fa‑fai‑ya kamatase, hibati‑ya sawimari‑ke doro honita tohe, madi towe sawire‑ya awe, doro amosawame‑ya awa ne,

⁴⁵tokomatase, hika mai one 7 kana mai‑ya himanane, mai towe ba‑basi naro. Hini sa‑sawi‑kaya mai nafi sawiwahaboneni. Ai owa kiyani nafiwahebonane. Fara‑nima dai komene nafiwahaboneni.” Yeso ati nemarine.

Mariya, bidi mai eyehe koboneni

⁴⁶Yeso mai‑ya hiyareya, sohori mai eyehe madi kobonamaroni, Yeso‑ya mai hiyarabonehe.

⁴⁷“Yeso, tika ami, tika soho mai eyehe kobonani, tiwa‑ya mai hiyarabonehe. Yobe fowari‑ya mai nahani.” Mai‑ka owa ati nemarine.

⁴⁸“Ebeni‑ka oka soho mai toha, ebeni‑ka okomi tohaniti? Oka soho mai dama, okomi mai damateni.” Yeso ati nemarine.

⁴⁹Yeso‑ya oda da‑daba, oda‑ya yofikane,

“Okomi, oka soho dai nineni.

⁵⁰Okobi neme‑ke ati‑nima mai niya, okomi mai toha, oka soho mai toha, oka asima mai toha, mai nineni.” Yeso ati nemarine.

Yamata noki tamine‑ya hiyare

¹Mahi itamise‑ya Yeso toke, Karireya‑ka Wara Webote widi‑ya itabasemarine.

²Mai dama mai yorotokanamaroni, Yeso ati‑ya mai mitabonehe. Mai dama mai ihi kanawa‑ya Yeso foye, itari, faha widi‑ya mai dama mai nahobasamaroni.

³13:3 Tiriko noki‑ya mai kamabone, wami mese‑ya mai wereteni.Deoso tamine‑ya mai‑ya Yeso kanawatobona, mai‑ya hiyare,

“Ai owa yamata noki‑ya werene,

⁴hawi fowari‑ya noki one sona, bani bidi mai hikabani.

⁵Yamata noki one yati dama iti‑kaya sona, yati mese‑ya wami si‑sifina fore ihi noki yana kanibote na,

⁶yati ihi habi tokara, mahi hewene ene wayatokana, fahi wadamara, abani.

⁷Atiwa mete‑ya yamata noki one sona, atiwa ene yamata yani amosarani.

⁸Bodo‑ya yamata noki one sona, yana, ade ohare‑ya boni 100 toha, ade one‑ya boni 60 toha, ade one‑ya boni 30 toha nani.

⁹Owati dai mita, owati dai tokadabahi.” Yeso ati nemarine.

¹⁰“Mai‑ya tihiyara, hini yamata‑bone hiyara bara‑ya mai‑ya tihiyariti?” Yeso‑ya oda da‑daba oda ati namaroni.

¹¹“Neme‑ke ai nafi‑ka hidi kitabote tohawahebona tamine dai watobisaboneni. Mai hiwatorebonane.

¹²Deoso ati‑ya mai mita, ati mai hinofeya, Deoso ati‑ya mai wato ba‑basi naboneni. Yama nafi‑ya mai watowahaboneni. Deoso ati‑ya mai mita, ati mai hinofareya, yama‑ya mai watoteraboneni.

¹³Hiyara bara ohiyarateni, yama‑ya mai watorabonehe. Owa ene‑ya mai awa, owa‑ya mai watora, owati‑ya mai mita, mai narabi hawira, owati‑ya mai watorani.

¹⁴Hibati‑ya mai tamine‑ya Deoso hiyare, ati‑ya i‑di Isa·iya kanahanomatane.

‘Owati‑ya mai mita, owa ene‑ya mai awa na, mai narabi hawira, yama‑ya mai watoraboneni.

¹⁵Owati miti‑ya mai nofara, mai narabi‑ya mai barikana‑nima mai na mai toha, mai noki barikana‑nima mai na mai toha, mai naboneni, oka yama‑ya mai watorabonehe. Mai narabi hawe‑mani, owa ene‑ya mai awa, yama‑ya mai watoya, mai ihi‑maro‑nima mai ihi namariya, mai okasoma neni.’ Deoso ati nemata, ati‑ya i‑di Isa·iya kanahanomatane.

¹⁶Dai ya‑yainahi, dai noko wada, dai narabo hawi, dai nibisateni.

¹⁷Owati amosa dai mitahi. Hibati‑ya Deoso ati‑ya mai mi‑mita‑mete mai toha, Deoso ati‑ya mai no‑nofa‑mete mai toha, mai na, owa‑ya mai awabone mai ati namete, owa‑ya mai awi awirameteni. Owati‑ya mai mitabone mai ati namete, owati‑ya mai miti awirameteni.

¹⁸Yamata noki‑ya werene tamine yokana dai mitahi.

¹⁹Fadara‑ka wami ai atibodi tamine amani. Neme‑ke ai nafi‑ka hidi kitabote tohawahebona tamine‑ya mai mita, ati mai hiwato awireya, mai ati kadamowama kanibote na. Hawi fowari‑ya yamata noki sona‑nima mai na, Satanasi ati ene Deoso ati‑ya mai ati kadamowamani.

²⁰Wami si‑sifina‑ya yamata noki one sona, yana kanibote na, aba kanibote na, fara Deoso ati‑ya mai mita, mai ya‑yai kanibote na, mai tamine amani.

²¹Deoso ati‑ya mai nofara mai mai weehiniya, mai atibodi kitara, mai maakana kanibote na, Deoso ati‑ya mai tokadabamarani.

²²Atiwa mete‑ya yamata noki sona, fara Deoso ati‑ya mai mita, makobote yamataha, bora, yinero na‑ya mai nokotonihe, Deoso ati‑ya mai nokotonimara, yamata atiwa‑ya daba, bonora‑nima mai na, mai ihi amosa‑ba wadarani.

²³Bodo‑ya yamata noki sona‑nima mai na, Deoso ati‑ya mai mita, Deoso ati‑ya mai atibodi nofa, mai tamine amani. Mai ihi amosani. Mai one ihi amosi bi‑bidi, mai one ihi amosi ba‑basi teni.” Yeso ati nemarine.

Yamata tamine‑ya hiyare

²⁴“Hiyara one dai mitahi. Neme‑ke ai nafi‑ka hidi kitabote tohawahebona, haa‑nima tebonane. Ai owa yamata noki amosa‑ya werenane.

²⁵Yamata hidi‑ya kako yama soki‑ya kaki, yama towe kabara noki‑ya werenamakitase, tokomane.

²⁶Yamata noki amosa yana, yama kabara noki yanahari neni.

²⁷13:24-30 Tamine yokana‑ya Yeso kaminane, fesikoro 36-43‑ya.Yama kabara‑ya hidi‑ka yo‑yose mai awa, mai‑ka hidi‑ya mai hiyara,

‘Yamata noki amosa weretina‑ya yama kabara dabawahani.’ Mai ati neni.

²⁸‘Owa‑ya kako ene amane.’ Hidi ati nane.

‘Yama kabara oda boreniba?’ Hika yo‑yose mai ati na,

²⁹‘Dai boreriyahi. Yama kabara dai boreniya, yamata amosa‑ya dai boreriyahi.’ Hidi ati nane.

³⁰Yamata marafakaniya, dai oyosebone,

‘Yama kabara dai boreni bahiya, dai yadiniyahi, sarikanabonehe. Yamata amosa‑ta oka yobe‑ya dai nawadahi.’ Onaboneni.” Yeso ati nemarine.

Yamata noki i‑isi na tamine

³¹13:31-33 Mositada noki toha, femeto toha ne tamine fara kafamineni. Tamine yokana dai mitahi. Yeso‑ya mai da‑daba mai damara, makobote faha fowe damamaki‑ya ai nafi‑ka hidi kitabote tohawahebonane.Yeso mai‑ya kanawatobona mai‑ya hiyare,

“Neme‑ke ai nafi‑ka hidi kitabote tohawahebona haa‑nima tene. Mositada noki‑ya maki hika fadara‑ya korotoni‑nima tene.

³²Mositada noki i‑isi na yana, ade tonafe, awa webote tohawaha, bani mai kake, awa ini‑ya mai bori‑bone‑ya mai wamateni.” Yeso ati nemarine.

Femeto tamine

³³Mai‑ya kanawatomakibona, mai‑ya hiyaramatase,

“Femeto‑ya fana kemabone, farina tiriko 7 kiro toha bodi‑ya femeto bide‑ya fana ibe, femeto dodama ihi farina tiriko nafi‑ya femeto sawineni. Neme‑ke ai nafi‑ka hidi kitabote tohawahebona haa‑nima nebonane.” Yeso ati nemarine.

³⁴Deoso ati tamine‑ya Yeso hiyare, yama bara tamine‑ya hiyaremarine. Mai dama mai‑ya hiyare, yama tamine yokana‑ya kamini awiremarine.

³⁵Hibati‑ya Deoso ati‑ya mi‑mita‑mata i‑di Yeso tamine‑ya kanahanomata,

“Hiyara bara‑ya mai‑ya hiyarebona, hibati‑ya yama‑ya mai watora yama tamine‑ya mai‑ya kanawatobonane.” Deoso‑ka yama hani ati nineni.

Yamata tamine yokana

³⁶Yeso hiyari hawa tohe, oda toka, yobe doro‑ya oda eyehe tokiyomemarine. Yeso‑ya oda hiyara,

“Yama kabara tamine‑ya tihiyara, yama kabara tamine oda mitaboneni.” Oda ati namaroni.

³⁷“Yamata noki amosa‑ya we‑were owa tamine amani.

³⁸Maki‑ka wami ai nafi wi‑wina‑ka tamine amani. Deoso‑ka dai toha, yamata noki amosa‑nima dai nineni. I‑di Satanasi ati‑ya mai no‑nofa yama kabara noki‑nima mai nineni.

³⁹Yama kabara noki‑ya werene i‑di Diaboro tamine amane. Yobe‑ya yamata‑ya mai nawada, yama towe mai sarikana na, yama faina‑bone tamine amani. Yamata‑ya mai a‑ani Deoso‑ka yo‑yose mai tamine amani.

⁴⁰13:36-43 Yama faina Yeso ati ne, hini kamatasebona tamine amane. Kamataseya, hika mai‑ya towakamebonane. Bofe‑ka yama we‑wee tamine dai watohi. Yeso Kirisito ene‑bona kabitoro 16‑ya dai kadikahi.Yama faina koboniya, yama kabara‑ya mai sarikana‑nima mai ihi towe‑ya mai sarikanaboneni.

⁴¹Oka yo‑yose mai oyosebone, owati ihi oka wami nafi‑ya mai tokabone, mai ihi amosara mai‑ya mai sokinaboneni.

⁴²Yama sa‑sarikana‑ka yama wiye‑ya mai‑ya mai weretowitebone, fara‑kaya mai ohinabone, mai kome kitaboneni.

⁴³Mai ihi amosa mai‑ka Abi neme‑ke‑ya mai saweboneni. Mai wahi wadabone, mahi wehene‑nima mai wahi nawahaboneni. Owati dai mita, owati dai tokadabahi.” Yeso ati nemarine.

Oro, daro‑ka kasaro na tamine‑ya hiyare

⁴⁴“Hiyara one dai mitamakitasahi. Fadara‑ya yama manakone nafe‑ya ai owa wasi, ya‑yaine, yama‑ya barikaname, hika yama nafi‑ya daane, fadara‑ya kanike, yama manakone nafe‑ya kayafebonaha. Fara‑nima Neme‑ke ai nafi‑ka hidi kitabote tohawahebona‑ya dai nokotoni kitahi.” Yeso ati nemarine.

⁴⁵“Neme‑ke ai nafi‑ka hidi kitabote tohawahebona tamine dai mitamakihi. Yama‑ya ka‑kanika daro‑ka kasaro amosa‑ya sibatene.

⁴⁶13:46 Tamine timitahi. Yama manakone nafe‑ya mai nokotoni‑nima Deoso‑ya ai nokotoni kitahi.Makobote daro‑ka kasaro amosabote‑ya wasi, hika yama nafi‑ya daane, daro‑ka kasaro amosabote‑ya kanikane.” Yeso ati nemarine.

Mayadera tamine‑ya hiyare

⁴⁷Neme‑ke ai nafi‑ka hidi kitabote tohawahebona tamine dai mitamakihi.

“Mayadera‑ya mai yadina, aba mai dama mai wasineni.

⁴⁸Mayadera‑ka aba mai kiba, mai‑ya mai horokana, hisiri‑ya aba mai amosa mai‑ya mai teena, aba towe mai‑ya mai weretowitineni.

⁴⁹Yama faina‑ya Deoso‑ka yo‑yose mai kamakeboneni, mai ihi amosara mai‑ya mai kadika,

⁵⁰13:50 Bofe‑ya mai‑ya mai weeni kitabone tamine amani. Yeso Kirisito ene‑bona kabitoro 16‑ya dai kadikaharihi.yama sa‑sarikana‑ka yama wiye‑ya mai‑ya mai weretowitebone, fara‑kaya mai ohinabone, mai kome kitaboneni.

⁵¹Owati nafi dai watokarini?” Yeso ati ne,

“Hehe, tiwati nafi oda watoneni.” Oda ati namaroni.

⁵²“Mose‑ka yama hani ati‑ya mai ka‑kamina Neme‑ke ai nafi‑ka hidi kitabote tohawahebona tamine‑ya mai watomakiniya, yama nafi‑ya mai wataboneni. Mai one‑ya mai kanawataboneni. Yama hani‑ya kanahanomata tamine toha, hibayata ati tamine toha ne‑ya mai‑ya mai kanawataboneni.” Yeso ati nemarine.

Nasare‑ya Yeso ati‑ya mai nofara

⁵³Hiyari hawa tohe, tokomemarine.

⁵⁴Yeso hini yana‑mata‑kaya toke, Deoso‑ya mai hi‑hiyara‑ke yobe‑ya tokiyomemarine, mai‑ya kanawatobonaha. Yeso ati‑ya mai mita,

“Ka! Ebeni‑ke ene Yeso yama‑ya watoti? Ebeni‑ke ene Yeso ene kitati?

⁵⁵Yama‑ya wa‑wama bidi tohatekare? I‑di Mariya bidi tohatekare? I‑di Tiyako, i‑di Yose, i‑di Simaho, i‑di Yoda, mai na, mai‑ka ayo tohatekare?

⁵⁶Hika asima ai‑ya mai sawe, ebeni‑ke Yeso‑ya kanawatoti?” Mai ati namaroni.

⁵⁷Yeso‑ya mai nofaramaroni. Mai‑ya Yeso ati yanane,

“Tabora bara‑ya Deoso ati‑ya mai mi‑mita mai one nafi‑ya mai nofateni. Hini mai tabori‑ka mai toha, mai one toha, mai na, mai‑ya mai nofaterani. Fara‑nima oka dai toha owa‑ya dai nofi awirani.” Yeso ati nemarine.

⁵⁸Yeso ati‑ya mai nofara, Yeso mai nafi‑ya nakitami awiremarine.

Yowaho Batita‑ya mai nanahaba

¹Nasare‑kaya Yeso wine, tamine‑ya mai‑ka hidi i‑di Erodi mite,

²hika yo‑yose mai‑ya hiyare,

“Yowaho tohe awane. Yowaho Batita abe, kitame ene kite toha ne awane.” Erodi ati nematane.

^3-4Yowaho Batita namidi‑ya i‑di Erodi ati ene mai tiinakosamaro tamine okaminebonane. I‑di Erodi anidi i‑di Firibi tohe, i‑di Firibi fadi i‑di Erodiasi toha, Erodi anidi fadi‑ya famawahe, fare ene i‑di Yowaho Batita ati yanane,

“Erodi, ayo fadi arabatinahi.” Ati ne, ati damemarine.

I‑di Erodiasi ati ihi Yowaho mano‑ya Erodi sokikase, kadeya‑ya Yowaho‑ya nafoyemarine.

⁵Yowaho‑ya nanahabebona,

“‘Yowaho Deoso ati‑ya mi‑mita amane.’ Mai ati teni.

Yowaho onahabiya, owa‑ya mai bisinaba awineni.” Erodi atibodi ati nematane.

⁶Makobote i‑di Erodi‑ka ano kobona, mai yorotokana, i‑di Erodiasi bide atona mai noki‑ya siwana ihi Erodi ya‑yainematane.

⁷Atona‑ya hiyare,

“Hini yamata‑ya tiwati koboniti? Yama tinofa daa·onaboneni. Keyehe hiri·oterani.” Erodi ati nematane.

⁸Atona madi‑ya hiyara, madi ati ihi Yowaho Batita tati‑ya atona haana,

“Barato‑ya Yowaho Batita tati foye, owa‑ya daatinahi.” Atona ati nameteni.

⁹Atona ati‑ya i‑di Erodi mite, yawe, atibodi yama‑ya dike,

“Yowaho Batita nanahabi onofarini. Hini owati tohani.

‘Yama tinofa daa·onabone’ ona,

owati‑ya mai nafi mita, owati‑nima oriya, owa‑ya mai hahakariyahi.” Hidi webote atibodi ati ne,

Sodado mai‑ya yosematane, Yowaho namidi‑ya mai tiinakosabonehe.

¹⁰Kadeya‑ya mai toka, Yowaho namidi‑ya mai tiinakosa,

¹¹Yowaho tati barato‑ya foye‑ya sodado kakame, atona‑ya daahine, atona madi‑ya tokoma, Yowaho tati‑ya daatonamameteni.

¹²Yowaho‑ya mai da‑daba Yowaho abo‑ya mai towakama, abo mai hikamematane. Makobote Yeso‑ya mai toka, Yowaho tamine‑ya mai kaminamaroni.

5.000 mai kana mai‑ya Yeso natafe

¹³Erodi ati tamine‑ya Yeso mite, mai one awiri‑kaya tokebona, kanawa dori‑ya oda foya, oda towakamamaroni. Yeso toke tamine‑ya mai one dama mita, mai tokobasamakemaroni.

¹⁴Oda kobona, oda tokomorosa, mai dama mai‑ya Yeso awe, mai‑ya nofe, mai kiyana mai‑ya nakitamemarine.

¹⁵Mahi toke‑ya Yeso‑ya oda da‑daba Yeso‑ya oda hiyara,

“Yeso, mahi toke, yobe wadare‑ya ai naha, mai tiyosehi, mai tabori‑ya mai tokiya, mai tafe‑bone‑ya mai kanikabonehe.” Yeso‑ya oda da‑daba oda ati namaroni.

¹⁶“Mai toki awiraboneni. Mai dai natafabisahi.” Yeso ati nemarine.

¹⁷“Oda‑ka baho 5 kana, oda‑ka aba mai fama na, ai tefe one wadarani.” Oda ati namaroni.

¹⁸“Owa‑ya mai dai kakawahi.” Yeso ati nemarine.

¹⁹Yeso ati ene kabihi mese‑ya mai dama mai nahorisamaroni. Baho 5 kana, aba mai fama na, mai‑ya Yeso damakane, neme‑ya tonokomise, Deoso‑ya hiyaremarine. Baho‑ya kebi, oda‑ya baho‑ya daanemarine, mai dami‑ya oda daanabonehe.

²⁰Mai nafi tafa, mai korimanama, baho kote oda teena, hisiri 12 kana kibamaroni.

²¹Maki 5.000 mai kana, mai fanawi dama, madehe dama na, mai tafamaroni.

Faha baki‑ya Yeso yakane

²²Hisiri‑ya baho kote oda teeni hawa toha, Yeso ati ene kanawa‑ya oda foyamamaroni, faha kowani‑kaya oda beretokawami dai tohabonehe. Makobote mai dama hini mai tabori‑kaya mai‑ya yosemarine.

²³Mai‑ya hiyari hawa toheya, adami webote‑ya Yeso tokomorosematane, Deoso‑ya hiyarebonaha. Yama soki‑ya Yeso ohari towitakosematane.

²⁴Kanawa‑ya faha bai‑ya oda yakakana, boni ihi faha rike oda‑ya werekanamaroni.

²⁵4 ora‑ke, yama wahi yananiya, Yeso kamaki, faha baki‑ya yakanemarine.

²⁶Yeso faha baki‑ya yakane‑ya oda awa, oda kakomehe, oda e‑erina,

“Ai korimari toha awini.” Oda ati namaroni.

²⁷Oda kakomehe, oda‑ya Yeso haane,

“Dai habo kitahi. Fara ama·oni. Dai kakomeheriyahi.” Yeso ati nemarine.

²⁸Bedoro ati yanane,

“Ayo, fara tiwa amani? Owa haatinahi, faha baki‑ya tiwa kobo·onabonehe.” Bedoro ati nemarine.

²⁹“Hehe, tikihi.” Yeso ati nemarine.

Bedoro waamise, faha baki‑ya yakanemarine, Yeso‑ya kobonebonaha.

³⁰Faha rike nemehe‑ya Bedoro awe, kakomehe, habanisi yanane,

“Ayo, owa tikasomahi. Haba·onisariyahi.” Bedoro ati nemarine.

³¹Yeso yehe‑ya daatowiti, Bedoro‑ya waratone,

“Owati tinofara, hini yamata ihi tiwa kakomeheti?” Yeso ati nemarine.

³²Kanawa dori‑ya mai teenama, boni fawanamaroni.

³³Yeso ene oda awa, Yeso‑ya oda kahiyara,

“Deoso Bidi yokana amatini.” Oda ati namaroni.

³⁴Kenesare‑kaya oda kobonamaroni.

³⁵Yeso‑ya mai watowamiya, mai tabori dami‑ya mai one kanani toka, Yeso koboni tamine‑ya mai kaminamaroni, mai kiyana mai‑ya mai kakamabonehe.

³⁶Yeso‑ya mai mai hiwakama,

“Yeso, tika bora ifi oda boyonaboneni.” Mai ati na,

Yeso borone‑ya mai boyoniya, mai kitamamaroni.

Deoso ati ai nofi nafihi

¹Mose‑ka yama hani ati‑ya mai ka‑kamina mai toha, fariseo mai toha na, Yerosare‑ya mai wi‑wina mai kakemaroni. Yeso‑ya mai weena,

²“Hini yamata‑bone tiwa‑ya mai da‑daba ai‑ka idi mai ati‑ya mai nofariti?

‘Ai tafabone, ai yehe‑ya ai sorokariteni.’ Ai‑ka idi mai ati teni.

Tiwa‑ya mai da‑daba mai yahi towe tafateni.” Fariseo mai ati namaroni.

³“Ai‑ka idi mai ati dai nofabisa, Deoso ati‑ya dai tokadabarani.

⁴‘Abi, ami, mai na, mai tinofahi. Mai‑ka abi, mai‑ka ami, mai na, mai one‑ya mai weena, —Towe amatini.— Mai ati na, mai abahi.’ Deoso‑ka yama hani ati nineni. Haa‑nima dai ati nibisa,

⁵‘Abi, ami, oka yama dai kayafabone dai ati na, oka yama dai‑ya daa·orabone, Deoso‑ya yama daa·oni hawa ohani.’ Ati ne,

⁶‘Sibarini, hika yama‑ya Deoso‑ya daanebona, badi, madi, mai na mai hinofare, yama sibarini.’ Dai ati teni.

Deoso ati‑ya dai nofara, ai‑ka idi mai ati dai nofabisineni.

⁷Towe dai amani. Deoso ati‑ya i‑di Isa·iya kamine, fare dai tamine‑ya kanahanone,

⁸‘Owa‑ya mai nofamone mai ati na, hiniya keyehe‑ya mai hirina, owati‑ya mai tokadabarani.

⁹Mai ati omita, ya‑yai·oni awirini. Owati‑ya mai kaminamone mai ati na, mai one ati‑ya mai kaminabisineni.’ Deoso ati ne, ati‑ya i‑di Isa·iya kanahanomatane.” Yeso ati nemarine.

¹⁰Mai dama mai‑ya Yeso haane,

“Owati dai mitahi. Owati dai watohi.

¹¹Ai tefe ene ai towe tohaterani. Ai ati towe ene ai towe tohabisateni.” Yeso ati nemarine.

¹²“Tiwati ihi fariseo mai yawa, mai tiwini?” Yeso‑ya oda da‑daba oda ati namaroni.

¹³“Fadara‑ya yama towe yana, Okobi yama hikamara‑ya mai borenaboneni.

¹⁴15:14 Fariseo mai tamine amani. Deoso ati yokana‑ya mai watora mai one‑ya mai kanawata, mai nafi tosawariteni.Mai noki wadara‑nima mai teni. Mai noki wadikimara mai fami towaka, mai ibi yofikanabone mai ati na, hodi‑ya mai fami sonirisikimaboneni.” Yeso ati nemarine.

¹⁵“Tiwati oda watora, oda yofitikana, oda tikanawato tinahi.” Bedoro ati nemarine.

¹⁶“Ka! Hibati‑ya owa‑ya dai daba, owati‑ya dai wato awisarani.

¹⁷Yama dai watohi. Ai tefe ene ai towe tohaterani. Yamata ai kaba, ai nabadi‑ya toka, ai miiniya, wadamaterani.

¹⁸Ai atibodi towe toha, ai ati towe tohateni. Ai atibodi‑ya yama towe yanana ihi ai towe tohateni.

¹⁹Yama towe‑ya mai nokotonihe mai toha, mai one‑ya mai nanahaba mai toha, fana one‑ya mai ide mai toha, fana mai dama mai‑ya mai nokotonihe mai toha, yama‑ya mai bote mai toha, keyehe‑ya mai hirina mai toha, mai one‑ya mai weena mai toha na, mai atibodi ihi mai ihi towe toha teni.

²⁰Ai yehe ai sorokari awiri‑ya ai tafiya, ai towe toharani. Ai atibodi towe tohiya, ai towe tohateni.” Yeso ati nemarine.

Fana Kanaha‑ka Yeso ati‑ya nofani

²¹Hiyari hawa tohe, tokawahe, Tiro toha, Sidoho toha na, fara yakari‑ya tokemarine.

²²Kanaha mai‑ka fana kamake, Yeso‑ya hiyara,

“Ayo, oka hidi amatini. Dafi‑ka nodi amatini. Owa tikasomahi. Madi towe ene okoto kiyani nafeni.” Fana ati namaroni.

²³Yeso ati yanare, Yeso‑ya oda da‑daba oda ati yananibisa,

“Yeso, yara fana tokahi, ati fawararo.” Oda ati na, oda ati damamaroni.

²⁴“Yara mai‑ya Deoso owa‑ya yosere, Yodeo, Deoso ati‑ya mai watora mai‑ya Deoso owa‑ya yosebisemarine.” Yeso ati nemarine.

²⁵Yeso yowi‑ya fana yobati tati‑kaya ita, Yeso‑ya hiyara,

“Ayo, owa tikasomahi.” Fana ati namaroni.

²⁶“Ai‑ka madehe tafe‑ya yomahi‑ya ai daaterani.” Yeso ati nemarine.

²⁷“Ayo, fara amani. Owati timitaharihi. Yome hidi tafa, tafe ibe bofe‑ya sona‑ya yome mai kabateni.” Fana ati namaroni.

²⁸“Hehe, owati tinofi nafini, tiwati‑nima yama naboneni.” Yeso ati ne, ati ene fana bide kitamawahamaroni.

4.000 mai kana mai‑ya Yeso natafe

²⁹Karireya‑ka wara webote widi‑kaya Yeso tokomatase, adami webote‑ya tokomorose, itarimarine.

³⁰Mai dama mai tokomake, mai kiyana mai‑ya mai kakamamaroni. Mai ka‑kakona mai toha, mai noki wadara mai toha, mai ati fawana mai toha, mai kiyana mai toha na, mai‑ya mai kakama, Yeso noko‑kaya mai mai hinafore, mai nafi‑ya Yeso nakitamemarine.

³¹Mai ati wadara mai ati yananawaha, mai mani yanara mai mani yananawaha, mai ka‑kakona mai yakanawawaha, mai noki wadara yama‑ya mai awawaha, mai namaroni. Yeso ene‑ya mai awa,

“Ka! Isara·eo‑ya ai wi‑wina ai‑ka Deoso ene kitane.” Mai ati namaroni.

³²Yeso‑ya oda da‑daba oda‑ya hiyare,

“Ai‑ya mai sa‑sawi mai okasomaboneni. Ai amoni 3 kani‑ya ai‑ya mai sawe, mai tafe wadarani. Mai oyoseya, fimi ihi mai abariyahi.” Yeso ati nemarine.

³³“Ebeni‑kaya mai dama mai tafe‑ba ai kanikibati? Yobe awire‑kaya ai nahoneni.” Oda ati namaroni.

³⁴“Dai‑ka baho emeniti?” Yeso ati nemarine.

“Oda‑ka baho 7 kana toha, aba bidi mai fa‑famaraba nihi nani.” Oda ati namaroni.

³⁵Yeso ati ene mai nafi nahokosamaroni.

³⁶Baho toha, aba mai toha na‑ya Yeso damakane, tefe tamine‑ya Deoso‑ya Yeso hiyare, baho‑ya kebi, Yeso‑ya oda da‑daba oda‑ya baho kote‑ya daa, aba bidi mai‑ya daane, mai nafi‑ya oda daanamaroni.

³⁷Mai dama mai tafa, mai korimana, tefe kote hasina oda teena, hisiri 7 kana oda nakibamaroni.

³⁸Maki mai 4.000 kana, mai fanawi dama, madehe dama na, mai tafamaroni.

³⁹Mai korimana, mai tabori‑ya mai‑ya Yeso yosemarine. Yeso oda eyehe kanawa‑ya foye, wami oni Makada toha‑ya oda tokamaroni.

Yeso ene kite‑ya mai awabone mai ati na

¹Fariseo mai toha, sadoseo mai toha na, mai kamake,

“Yeso, Deoso‑ka tihamone tina, neme‑ya tiwa ene kitabote oda awaboneni.” Mai ati namaroni, Yeso‑ya mai weenabonehe.

²“Mahi toke‑ya neme‑ya dai kiina, neme mawa tona,

‘Yama amosaminaboneni.’ Dai ati teni.

³Yama wahabisari‑ya neme‑ya dai kiina, neme mawa, neme sabi soki na,

‘Faha kakeboneni.’ Dai ati teni.

Neme‑ka yama kiini dai wata, Deoso ene‑ya dai awa, yama‑ya dai watorani.

⁴Towe dai amani. Deoso ati dai tokadabara, hiniya owa ene kitabote dai awabone dai ati na, dai ati‑nima oteraboneni. Yama dai awabone dai ati na, i‑di Yona ene‑mata‑nima yama na dai awabisaboneni.” Yeso ati ne, tokomemarine.

Fariseo mai‑ka femeto tamine

⁵Oda‑ka baho‑ya oda ati kadamowamamaroni. Faha kowani‑kaya oda kobona, Yeso ati yanane,

⁶“Dai noko wadahi. Fariseo mai toha, sadoseo mai toha na, mai‑ka femeto‑ya dai arabanahi.” Yeso ati nemarine.

⁷“Ai‑ka baho awira tamine‑ya Yeso hiyarane.” Oda ibi hiyara, oda ati namaroni.

⁸Oda ati‑ya Yeso wato, oda‑ya hiyare,

“Ka! Owa ene kitaramone dai atibodi ati na awineni. Baho yokana tamine‑ya ohiyari awirani.

⁹Yama dai wato kanibote rani. Owa ene dai awa, 5.000 mai kana baho 5 kana‑ya mai onatafa, mai korimana, hisiri kiba dama hasina, tamine‑ya dai ati kadamowama awineni.

¹⁰4.000 mai kana, baho 7 kana‑ya mai onatafa, mai korimana, hisiri kiba dama hasina, tamine‑ya dai ati kadamowama awineni.

¹¹Yama dai watora, baho yokana tamine‑ya ohiyari awirani. Fariseo mai toha, sadoseo mai toha na, mai‑ka femeto‑ya dai arabanahi.” Yeso ati nemarine.

¹²16:12 Femeto dodama‑nima fariseo mai ati towe dodamateni. Fara Yeso mai‑ya kanawatomatamonane, fariseo mai ati‑ya mai nofarabonehe.Makobote yama oda watowaha, femeto yokana tamine‑ya Yeso hiyari awire, mai ati tamine‑ya Yeso hiyarabisane.

Kirisito i‑di Deoso Bidi amane

¹³Sesareya Firibo‑ya oda kobona, oda‑ya hiyare,

“Dai‑ka Ayo neme‑ke tamine‑ya mai hiyara, eme mai ati niti?” Yeso ati ne,

¹⁴“‘Yowaho Batita amane.’ Mai one ati nihi,

‘I‑di Eriya amane.’ Mai one ati nihi,

‘Yeremiya amane.’ Mai one ati nihi,

‘Deoso ati‑ya mai mi‑mita‑mete mai‑ka owa amane.’ Mai one ati nihi teni.” Oda ati namaroni.

¹⁵“Dai‑ta eme dai ati niti?” Yeso ati nemarine.

¹⁶“Deoso‑ka Ka‑kadika amatini. Deoso yokana Bidi amatini.” Simaho Bedoro ati nemarine.

¹⁷“Simaho, Yona bidi amatini. Ya‑yaitinahi. Owa tiwatobisineni. Bofe‑ka mai ihi tohi awira, Okobi neme‑ke ene yama tiwatowahani.

¹⁸Owati timitahi. Tiwa oni Bedoro toha, yati oni‑ya weyetineni. Okobi yati webote‑nima ne, Okobi ene oka mai damawahabone, mai tosiyoteraboneni.

¹⁹16:19 Deoso‑ka safi Bedoro‑ya daanabone Yeso ati ne, Bedoro‑ya Yeso yosene, hika mai hinawadabonehe.Deoso‑ka safi tiwa‑ya daa·onabone, neme‑ya Deoso mai‑ya barikaneya, bofe‑ya mai baritikanahareboneni. Neme‑ya Deoso mai‑ya seekaneya, bofe‑ya mai seetikanahareboneni.

²⁰Deoso‑ka Ka‑kadika ama·oni. Hiniya owa tamine dai hiyarariyahi.” Yeso ati nemarine.

Yeso abebona tamine‑ya hiyare

²¹Yeso abebona, hini tamine‑ya hiyare,

“Yerosare‑ya ai tokaboneni. Yodeo mai‑ka hidi mai bi‑bidi na mai toha, Mose‑ka yama hani ati‑ya mai ka‑kamina mai toha, Deoso‑ka yama‑bone‑ya mai da‑daa mai‑ka hidi mai toha, mai na, dai‑ka Ayo neme‑ke ati‑ya mai nofarabone, mai weeni hikitebona, mai hinahabeya, mahi 3 tohe‑ya okitamaboneni.” Yeso ati nemarine.

²²Ahiyata‑ya Yeso‑ya Bedoro towake, fai‑ya weene,

“Ayo, haa‑nima tiwati riyahi. Tiwati‑nima yama ni awiteraboneni.” Bedoro ati nemarine.

²³Bedoro‑ya Yeso hiyarebona, tonokowame, ati yanane,

“Satanasi ati‑nima tiwati nineni. Owa‑ya tiwati baririyahi. Deoso‑ka yama nokotini awira, hini tiwatibodi ati‑ya nokotinibisineni.” Yeso ati nemarine.

²⁴Yeso‑ya oda da‑daba oda‑ya Yeso hiyaramaki,

“Owa‑ya dai ati daba, dai‑ka yama dai nokotoniriyahi. Owa‑ya dai dabiya, owa‑ya mai nanahababone‑nima dai‑ya mai nanahabahareba awineni.

²⁵16:25 Yeso‑ya dai nofa dai‑ya mai nanahabiya, Deoso tabaro‑ya dai ya‑yainaboneni. Yeso ati‑ya mai tokadabara, mai ohinaboneni.Owa‑ya dai nofa dai‑ya mai nanahabiya, dai abaraboneni. Oda abariyahi dai ati niya, owati‑ya dai tokadabara, dai ababoneni.

²⁶Yama dama‑ya mai kihamaro mai abiya, mai‑ka yama mai‑ya kasomateraboneni. Owati‑ya mai nofara yama hirini‑kaya mai sawiwahaboneni. Yinero‑ya ai atibodi manakone abaterani.

²⁷Deoso‑ka yo‑yose mai eyehe okomatasabone, Okobi wehene owa‑ya sawibonane. Bofe‑ka dai ene‑nima dai ene manakone na daa·onaboneni.

²⁸Owati amosabote dai mitahi. Dai one abi awisari‑ya dai‑ka Ayo neme‑ke kiti yananebona dai one awaboneni.” Yeso ati nemarine.

Mahi noko‑nima Yeso noko nawahe

¹Oda amoni 6 kani‑ya i‑di Bedoro, i‑di Tiyako, Tiyako sohori i‑di Yowaho, mai na, mai‑ya Yeso himane, adami nemehe tati‑ya mai tokomorosa, oda sawi awiramaroni.

²Adami tati‑ya mai kobona, mai noki‑ya Yeso hini wehene‑ya yananihi, mahi wehene‑nima Yeso noko wehene nawahe, hika bora sa‑sawani kita, wahi wadameteni.

³I‑di Mose, i‑di Eriya, mai fama, mai kobona, Yeso‑ya mai hiyarameteni.

⁴Mai‑ya Bedoro awe, ati yanane,

“Ayo, tiwa‑ya oda sawe, yama sibarini. Dai‑ka wa‑wasa‑ba wama·onaboneni. Tika ohari, Mose‑ka ohari, Eriya‑ka ohari nebonane.” Ati nematane.

⁵Bedoro hiyaranasa neya, neme sabi wahi wada mai‑ya barikanameteni. Neme sabi‑ya ati kaki,

“Oka Dao amane. Oka Dao onofi nafi, ati dai tokadabahi.” Ati nematane.

⁶Ati‑ya mai mita, mai wiyarisameteni, mai kakomehero.

⁷Mai‑ya Yeso boyone,

“Dai nahomisamahi. Dai habo siitoriyahi.” Yeso ati nematane.

⁸Mai kiikimisama, Yeso ohari‑ya mai awameteni.

⁹Makobote mai yananamatasa, mai tokofawamiya, mai‑ya Yeso hiyare,

“Adami tati‑ya yama dai awa tamine‑ya dai kaminariyahi. O·abiya, okitamiya, owa kitami hawa tohiya, yama dai awa tamine dai kaminabisaboneni.” Yeso ati nematane.

¹⁰Makobote Yeso‑ya mai hiyara,

“Mose‑ka yama hani ati‑ya mai ka‑kamina eya mai ati na,

‘I‑di Eriya koboni dai toheya, Deoso‑ka Ka‑kadika koboni yotobonane.’” Mai ati teni.

¹¹Mai ati‑ya Yeso mite, ati yanane,

“Fara amani. Eriya koboni dai tohebona, yama nafi‑ya nataminawamebonane.

¹²Owati dai mitahi. Eriya koboni hawa tohe, Eriya‑ya mai watora, mai weeni hikitemarine. I‑di Eriya‑nima dai‑ka Ayo neme‑ke‑ya mai weeni kitaboneni.” Yeso ati nemarine.

¹³Yowaho Batita tamine‑ya Yeso hiyareya, yama‑ya mai watowahamaroni.

Kayatone‑ya nakitame

¹⁴Mai dama mai yorotokani‑kaya Yeso kobone, ai owa Yeso‑ya awe, Yeso noko‑kaya yobati tati‑kaya itemarine.

¹⁵“Ayo, oka dao tikasomahi. Oka dao ka‑kana ne. Hini‑ya werekaneya, yifo hirini‑ya sonari, faha‑ya boka, kayatona nofene.

¹⁶Tiwa‑ya mai da‑daba mai haa·ona, oka dao‑ya mai kasomabone, mai ihi kitarani.” Maki ati nemarine.

¹⁷Yeso ati yanane,

“Ka! Owati dai nofara, dai narabo hawirani. Owati dai wato kanibote nahi. Dai‑ya owa sawi nafimaraboneni. Yetene dai kakamahi!” Yeso ati nemarine.

¹⁸Madi towe‑ya Yeso weene, madi towe toke, yetene kitamawahemarine.

¹⁹Mai noki beheri‑kaya Yeso‑ya oda da‑daba Yeso‑ya oda hiyara,

“Madi towe oda weena, hini yamata ihi oda ene kitariti?” Oda ati namaroni.

²⁰“Owati dai nofi nafira ihi madi towe kanarene. Owati amosa dai mitahi. Deoso ati‑ya dai nofi i‑isi niya, dai ene kitaboneni. Adami webote‑ya dai hiyariya, dai ati‑nima adami nawahaboneni.

²¹Deoso‑ya dai hiyari baha, dai tafi fawaniya, madi towe haa‑nima ne kanatene. Deoso‑ya dai hiyari awiriya, dai tafi fawariya, madi towe haa‑nima ne kanaterene.” Yeso ati nemarine.

²²Karireya‑ya oda wina, oda‑ya hiyare,

“Dai‑ka Ayo neme‑ke‑ya ai owa daanebona,

²³owa‑ya mai nanahababone, o·abiya, mahi 3 toheya, okitamaboneni.” Yeso ati ne, ati ene oda yawawahamaroni.

Deoso‑ka yobe‑ke yinero tamine

²⁴Kafanaho‑ya oda kobona, Deoso‑ka yobe‑ke yinero‑bona‑ya mai ha‑haa Bedoro‑ya mai hiyara,

“Dai‑ya ka‑kanawato Deoso‑ka yobe‑ke yinero‑bona‑ya daanaraniha? Yama anini mahi fame‑ka manakone‑nima yama manakone nineni.” Mai ati namaroni.

²⁵“Yinero‑ya daatene.” Bedoro ati nemarine.

Yobe‑ya Bedoro tokomakiya, Yeso haane,

“Simaho, tiwati omitaboneni. Ebeni‑ke‑ka yinero‑ya hidi webote mai haatiti? Bidi‑ka yinero‑ya haaterene. Mai one mai‑ka yinero‑ya haanibisatene.” Yeso ati nemarine.

²⁶“Fara amani. Mai one mai‑ya yinero‑ya mai haateni.” Bedoro ati nemarine.

“Bidi mai‑ya yinero‑ya mai haaterani.” Yeso ati nemarine.

²⁷“Mai yawariyahi. Faha widi‑ya tikamiya, ka‑kabi korotifiya, aba ohari tikanawasiya, aba ebene‑ya yinero tiwaseboneni. Yama anini mahi 4 kane‑ka manakone‑nima yinero nebonane. Yinero damatiniya, mai‑ya daatiyaho, ai fama ai manakone boneni.” Yeso ati nemarine.

Ebeni‑ke kitabisabonati?

¹Bedoro‑ya hiyari hawa tohe, Yeso‑ya oda da‑daba oda one kamake, Yeso‑ya oda hiyara,

“Neme‑ke ai nafi‑ka hidi kitabote tohawahebona koboneya, ebeni‑ke kiti ba‑basi nabati?” Oda ati namaroni.

²Ewe‑ya Yeso haane, oda teberi‑ya waimarine.

³“Owati amosa dai mitahi. Dai ene amosawahi awiriya, Neme‑ke ai nafi‑ka hidi kitabote tohawahe‑ya dai sawiraboneni. Madehe‑nima dai nawawahiya, dai sawibisaboneni.

⁴‘Mai‑ka hidi ama·ora, mai‑ka yo‑yose ama·obisineni.’ Madehe ati teni.

Fara madehe‑nima dai niya,

‘Mai‑ka yo‑yose ama·oni.’ Dai ati nibisa,

Neme‑ke ai nafi‑ka hidi kitabote tohawahebona‑ya dai sawebone, hidi kiti ba‑basi ne dai tohawahaboneni.

⁵‘Owa ene Yeso ya‑yainebonane.’ Dai atibodi ati na,

ewe dai kasomiya, owa‑ya dai kasomaharineni.

⁶Dai one ati ene owati‑ya ewe nofamareya, hini ene towe manakone wadebonane. Hini ene towe tohi awisareya, yati webote‑ya namidi mai yadihineya, faha webote‑ya bokeya, abeya, yama sibarabone, komene bi‑bidi nibisebonane. Ene towe tohe, hini ene manakone komene nafibisebonane.

⁷Ka! Bofe‑ya mai wi‑wina mai one ati ihi owati‑ya mai one tokadabara, mai ihi manakone wadani.

⁸18:8-9 Yama towe ai nokotonihe, ai yehe, ai teme, ai nokobodi na ihi tohi awira, ai atibodi ene tohabisani. Wara hirini kome kita tamine‑ya Yeso ai‑ya kanawatone.Tiwa yehe, tiwa teme na ene yama towe nokotinihe, tiwa yehe, tiwa teme na wisitinakosahi, yama towe‑ya nokotinimaterabonehe. Tiwa yehe ohari, tiwa teme ohari ni‑ya ti·abiya, tikitamiya, ti·abarabone‑kaya kobotina, yama sibabisaraboneni. Tiwa yehe fama, tiwa teme fama ni‑ya ti·abiya, tikitamiya, yama hirini fawaterabone‑kaya tikiya, yama towe tohawahaboneni.

⁹Tiwa nokobodi one ene yama towe nokotiniya, tiwa noko one sobatinakihi, yama towe‑ya nokotinimarabonehe. Tiwa nokobodi ohari‑ya ti·abiya, tikitamiya, ti·abarabone‑kaya kobotina, yama sibabisaraboneni. Tiwa noko fami‑ya ti·abiya, tikitamiya, wara hirini‑kaya tikiya, yama towe tohaboneni.

Kaneiro fawane tamine

¹⁰“Owati dai mitahi.

‘Madehe towe hini tohiya.’ Dai atibodi ati riyahi.

Okobi tabaro‑ya Deoso‑ka yo‑yose madehe‑ya mai kayawateni.

¹¹Bofe‑ya dai wi‑wina Deoso hawine dai watora, dai‑ya okemaroni, dai‑ya okasomabonehe.

¹²Ai owa‑ka kaneiro mai 100 kana mai toha, ohari fawaneya, mai 99 kana mai naha, owa fawane hidi sibahitine.

¹³Owati amosa dai mitahi. Kaneiro fawane‑ya wasi, ya‑yaitene. Kaneiro mai one ihi ya‑yaini awire, hiwasi ene ya‑yainibisatene.

¹⁴Ai‑ka Abi neme‑ke tabaro‑ya ai nafi winabone Deoso atibodi ati ne, tabaro‑ya madehe one tokara, Deoso yawebonane.

Ai owa ene amosare tamine

¹⁵Dai owa ene amosare, ohari tihiyaraho. Ene amosare tihiyare, tiwati‑ya nofeya, yama amosaboneni. Dai ya‑yainaboneni.

¹⁶Tiwati‑ya nofareya, dai fama dai towakeya, dai fama dai ati‑ya nofeba awane.

‘Mai fama mai ati fara kafama, mai ati ai nofateni.’ Deoso‑ka yama hani ati nineni.

¹⁷Dai ati‑ya nofare, Deoso‑ka dai toha dai yorotokaniya, mai‑ya dai hiyarahi. Makobote, dai dama dai ati yananahi. Dai nafi ati‑ya nofareya, dai owa tohamare‑nima nebonane.

¹⁸Owati amosa dai mitahi. Neme‑ya Deoso mai‑ya barikaneya, bofe‑ya mai baritikanahareboneni. Neme‑ya Deoso mai‑ya seekaneya, bofe‑ya mai seetikanahareboneni.

¹⁹Deoso‑ya dai hiyara, dai fama dai ati fara kafamiya, yama dai ati kobohina‑ya Deoso daanebonane.

²⁰Owa dai nofa dai fa‑famaraba na, dai yorotokaniya, dai‑ya osaweboneni.” Yeso ati nemarine.

Ai ati somawama tamine

²¹Bedoro kamaki, Yeso‑ya hiyare,

“Ayo, owa‑ya mai weenadiya, mai‑ya owati somawami 7 kana, sibakarini?” Bedoro ati nemarine.

²²“Tiwati somawami 7 toharaboneni. Tiwati somawami 490 kana tohabisahi.

²³Neme‑ke ai nafi‑ka hidi kitabote tohawahebona tamine dai mitahi. Mai‑ka hidi webote mai‑ya haane, mai‑ka yama manakone‑ya mai daa kanibote nabonehe.

²⁴Hidi‑ka yo‑yose maki owa‑ya kakame, hika yama manakone nafe, yama anini faha fowe dama manakone‑nima maki‑ka yama manakone nineni.

²⁵Yinero nafire ene hidi yawe, maki‑ka yobe, maki‑ka yama toha, maki abano, fadi, bidi mai toha, mai na, mai one mai‑ya mai‑ya daanebonane, yinero‑ya kayafebonaha.

²⁶Maki kakomehe, yobati‑kaya ite,

‘Oka hidi amatini. Owa daatiriyahi. Hibareya, yama manakone nafi daa·onaboneni.’ Maki ati nane.

²⁷Hidi ati somawame,

‘Hehe, sibaraboneni. Tiwa manakone haa·onamaraboneni.’ Hidi ati nane.

²⁸Maki toke, hika owa‑ya hiyare, hika yama manakone‑ya haane, fara yama anini abariko 4 kane‑ka manakone‑nima hika owa‑ka yama manakone nineni. Hika owa namidi‑ya waratone,

‘Oka yinero‑ba daanama kanibote tinahi.’ Maki ati nane.

²⁹Ai owa yobati‑kaya ite,

‘Hibareya, yama manakone onahababoneni.’ Ati nane.

³⁰Fai ati‑ya nofare, kadeya‑ya hinawaane,

‘Tiwa manakone abiya, tiwa‑ya mai seekanaboneni.’ Maki ati nane.

³¹Ati ene mai one yawa, mai‑ka hidi narabo‑ya mai kaminani.

³²Maki hidi haahine, kame,

‘Towe amatini. Owa haatina, tiwa manakone haa·onamarabone onani.

³³Owa ene‑nima tiwa ene na‑mani, sibara neni.’ Hidi ati nane.

³⁴Hidi yawe, kadeya‑ya maki‑ya nawaane. Maki manakone abeya, maki‑ya mai seekanebonane.

³⁵Fara‑nima dai owa‑ya dai ati somawamara, Okobi neme‑ke dai‑ya weenebonane.” Yeso ati nemarine.

Ai honita wahawama tamine

¹Makobote oda yananamatasa, Karireya‑ya oda sawimara, Yodeya‑ya oda tokoma, Yodaho Faha kowani‑kaya oda tokawahamaroni.

²Yeso nowati‑ya mai dama mai kamake, mai dami‑ya Yeso nakitamemarine.

³Fariseo mai one kamake, mai atibodi yama‑ya dika,

“Yeso ati amosareya, ati oda miteya, oda weenebonane.” Mai atibodi ati na, mai ati yanana,

“Yeso, maki fadi‑ya nofamare, honita wahawamebona ati ne, sibakare?” Fariseo mai ati namaroni.

⁴“Deoso‑ka yama hani dai kadikara‑mani? Yama yanakani‑ya maki toha, fana toha na‑ya i‑di Deoso wamanematane.

⁵‘Maki fana‑ya famebona, badi, madi mai na, mai‑ya dabamaterene. Maki fadi‑bone‑ya fame, mai aboni ohariteboneni.’ Deoso‑ka yama hani ati nineni.

⁶Mai fama mai aboni ohariwamani. Deoso ati ene mai aboni ohariwama, Deoso ene dai arabanahi. Mai honita wahawamariyahi.” Yeso ati nemarine.

⁷Fariseo mai ati yanana,

“Hini yamata‑bone Mose yama‑ya kanahanomatati?

‘Dai honita wahawamabone, dai‑ka yibote‑ka yama hani‑ba dai daaniya, dai honita wahawamiya, yama sibaraboneni.’ Mose‑ka yama hani ati nineni.” Fariseo mai ati namaroni.

⁸“Ai‑ka idi mai habi kita ihi mai honita wahawami‑bone‑ka yama hani tamine‑ya i‑di Mose kanahanomatane. Yama yanakani‑ya haa‑nima yama rametemoneni.

⁹Owati timitahi. Tiwa honita wahawamariyahi. Fadi hini ati ihi maki bare‑ya famawaha, maki daidi ene tohi awire, maki daidi‑ta sibarane. Maki hini ene honita wahawameya, fana one‑ya famawaheya, ene ati kasiro, hiniya siwanane.” Yeso ati nemarine.

¹⁰“Haa‑nima yama na, ai fanara, ai sibabisarineni.” Yeso‑ya oda da‑daba oda ati namaroni.

¹¹“Deoso ati ene mai one fana, ai one fanarihi naboneni.

¹²Ai owa wade dene noko wadare fanarihi, ai owa dene noko mai hinahabe fanarihi, ai owa hini‑ya kayawe fanarihi ne, Deoso‑ya nokotoni oharibisebona hini‑ya kayawane. Hini dai‑ya dai kayawa, dai‑ya dai kayawahi.” Yeso ati nemarine.

Madehe‑ya Yeso kasome

¹³Yeso‑ya madehe‑ya mai kakama, mai tati‑ya Yeso yehe foribona, Deoso‑ya mai tamine‑ya hiyarebona, mai ati na, madehe‑ya mai kakama, mai‑ya oda ati barinamaroni.

¹⁴“Madehe dai ati baririyahi. Madehe owati‑ya nofa, madehe‑nima mai na, Neme‑ke ai nafi‑ka hidi kitabote tohawahe‑ya mai saweboneni.” Yeso ati nemarine.

¹⁵Mai tati‑ya Yeso yehe fori, tokawahemarine.

Hika yinero dame kamaki

¹⁶19:16 “Ai abaterabone‑kaya” yama hani ati na, Deoso tabaro tamine amane.Maki yetene kamaki, Yeso‑ya hiyare,

“Ayo, hini yamata‑nima obati, ai abaterabone‑kaya osawebonehe?” Ati ne,

¹⁷“Tiwa ene amosabone tina, Deoso ohari‑ta amosabotebisa amane. Ai abarabone‑kaya tisawebone tina, Deoso ati‑ya tikadabiya, tisaweboneni.” Yeso ati nemarine.

¹⁸“Deoso ati dame, ati kiti ba‑basi ne yofitikanahi, ati‑ya osawebonehe.” Maki ati nemarine.

“Ai owa tinahabarihi, mai fanawi one ti·aharihi, yama tibotirihi, mai one tamine‑ya keyehe‑ya hiritirihi,

¹⁹Abi, ami mai na, mai tinofa, hini tiwa tinofi‑nima dai yakari‑ya mai sawe mai tinofa tiyahi.” Yeso ati nemarine.

²⁰“Fara haa‑nima oteni. Hini yamata‑nima onamakitasibati?” Maki ati nemarine.

²¹“Tiwa ene amosa hinama tohabone tina, tiwa yehe honene nafi daatinahi, manakone waratiniya, mai yahi hone wadara mai‑ya daatinahi. Deoso tabaro‑ya tika yama dama tohaboneni. Eya tiwa ene niya, makobote owa‑ya tisawiyahi.” Yeso ati nemarine.

²²Yeso ati‑ya mite, yawe, tokome, hika yama dama toha, hika yama‑ya kayawemarine.

²³“Owati amosa dai mitahi. Mai yahi hone dama toha, Neme‑ke ai nafi‑ka hidi kitabote tohawahe‑ya mai dami sawiraboneni.

²⁴Owati dai mitahi. Akoye hodone‑ya kamero tokiyomaterene. Fara‑nima mai naboneni. Mai yahi hone dama Neme‑ke ai nafi‑ka hidi kitabote tohawahebona‑ya mai dami sawiraboneni.” Yeso ati nemarine.

²⁵Yeso ati‑ya oda mita, oda atibodi yama‑ya kadika,

“Ka! Ebeni‑ke sawibati?” Oda ati namaroni.

²⁶Yeso oda‑ya nokotonihi, ati yanane,

“Hini ai ene ai sawiteraboneni. Deoso ene ai one sawibisaboneni. Deoso ene kitabotebisa amane.” Yeso ati nemarine.

²⁷“Ayo, oda‑ka yama nafi towadakosa, tiwa‑ya oda honita daba, hini yamata‑nima ai manakone nibati?” Bedoro ati nemarine.

²⁸“Owati amosa dai mitahi. Mai abamete mai kitamiya, hidi‑ka kadera amosabote‑ya dai‑ka Ayo neme‑ke itaribona, owa‑ya dai da‑daba hidi‑ka kadera amosa‑ya dai nahorihareboneni. Isara·eo‑ka nodi mai ihi‑ya dai kadikiya, mai ihi‑nima mai ihi manakone na dai daanaboneni.

²⁹Owati dai mitahi. Owati‑ya mai tokadaba ihi mai‑ka yama nafi‑ya mai tonawadakosa, mai ihi manakone wadaboneni. Mai‑ka yobe, mai‑ka fadara, mai‑ka ayo, mai‑ka asima, mai‑ka abi, mai‑ka ami, mai‑ka madehe, mai na, mai tonokosa, mai manakone amosa‑ya mai kayafaboneni. Mai manakone fiyakanaboneni. Makobote mai abateraboneni.

³⁰Bofe‑ya hidi webote mai toha, Deoso tabaro‑ya mai bi‑bidi na mai tohabisaba awineni. Bofe‑ya mai bi‑bidi na mai toha Deoso tabaro‑ya hidi mai ba‑basi na mai tohawahaba awineni.” Yeso ati nemarine.

Ofa‑ya mai batana mai tamine

¹Yeso oda‑ya kanawatobona, oda‑ya hiyare,

“Neme‑ke ai nafi‑ka hidi kitabote tohawahebona haa‑nima nebonane. Ai owa‑ka ofa dama toha,

²bosane, mai one‑ya yose,

‘Oka ofa dai bataniya, dai‑ka yinero‑ba daa·onaboneni. Barata wamani ohari daa·onaboneni.’ Ati nane.

³9 ora‑ya tokomatase, mai one‑ya awe, yama‑ya mai anira,

⁴mai‑ya yose,

‘Oka ofa dai batanamatahi. Dai‑ka yinero‑ba daa·onaboneni.’ Ati ne,

mai tokomake, awa bono‑ya mai batanamakitasineni.

⁵Mahi nokorise‑ya mai one‑ya yose, 3 ora‑ya mai one‑ya yosemakitase, mai tokomakineni.

⁶5 ora‑ya mai one‑ya awe, yama‑ya mai anira, mai‑ya hiyare,

‘Hini yamata‑bone yama dai anirihi?’ Ati ne,

⁷‘Oda‑ya mai yose awirani.’ Mai ati na,

mai‑ya yose,

‘Oka ofa dai batanahi.’ Ati nane.

⁸6 ora‑ya ofa hidi, hika yo‑yose‑ya hiyare,

‘Yama‑ya mai anina mai haatinahi. 5 ora‑ya mai kamake, mai‑ka yama manakone daatini bahiya, mai bosana mai‑ka yama manakone daatini yotohi.’ Ofa hidi ati nane.

⁹5 ora‑ya mai‑ka yama anini yanana mai kamake, mai‑ka barata wamani ohari‑ya hidi‑ka yo‑yose daanane.

¹⁰Mai bosana mai one‑ka yinero‑ya mai awa,

‘Oda‑ka yinero damabiseba awane.’ Mai atibodi ati na,

barata wamani ohari‑ya mai kayafaharineni.

¹¹Mai yawa, ofa hidi‑ya mai hiyara,

¹²‘Mai one ora ohari‑ya yama‑ya mai anina, oda‑ta mahi hewene‑ya yama oda anina, oda‑ka yama anini nafibisa, oda‑ka yinero‑nima mai‑ka yinero daatine nane.’ Mai ati nineni.

¹³Ofa hidi ati yanane,

‘Owati dai mitamatahi. Dai‑ka yama anini manakone‑ya keyehe hiri·ora, barata wamani ohari daa·onaboneni.’ Onani.

¹⁴‘Dai‑ka yinero‑bona daa·ona, dai tokomahi. Mai‑ka yinero‑bona hiniya daa·onaboneni.’ Owatibodi ati nineni.

¹⁵‘Hini oka yinero tohe, owatibodi daahine, mai okasoma, hini yamata‑bone dai yawiti?’ Hidi ati nane.

¹⁶Bofe‑ya mai yota Deoso tabaro‑ya mai dai tohaba awineni. Bofe‑ka mai dai toha Deoso tabaro‑ya mai yotaba awineni.” Yeso ati nemarine.

Yeso abebona tamine‑ya hiyare

¹⁷Yerosare‑ka adami‑ya oda tokomorosa, Yeso‑ya oda da‑daba oda‑ya Yeso haane, oda‑ya hiyaremarine, ati mai dama mai himitarebonaha.

¹⁸“Yerosare‑ya ai tokabone, ai koboniya, Mose‑ka yama hani ati‑ya mai ka‑kamina mai toha, Deoso‑ka yama‑bone‑ya mai da‑daa mai‑ka hidi mai toha na, dai‑ka Ayo neme‑ke‑ya mai watiya, mai ati hinahabeya,

¹⁹kofeno mai‑ya owa‑ya mai daanabone, owa‑ya mai hahakana, owa‑ya mai bisi, awa‑ya owa‑ya mai baakana naboneni. Mahi 3 kani‑ya dai‑ka Ayo neme‑ke kitamebonane.” Yeso ati nemarine.

Sebedeo fadi, bidi mai eyehe tamine

²⁰Sebedeo fadi, bidi mai eyehe kama, yobati‑kaya itarisamaroni, Yeso‑ya hiyarabonehe.

²¹“Hini yamata tiwati koboniti?” Yeso ati ne,

“Ai nafi‑ka hidi kitabote tihawahiya, oka dao tika yo‑yose mai kiti na‑nafi nabone, tiwa mano kanika‑kaya owa itari, tiwa mano sayo‑kaya owa itari nebona, onani.” Sebedeo fadi ati namaroni.

²²20:22 ‘Yama ofebone,’ Yeso ati ne, mai hinahabebona, tamine‑ya hiyarane.“Yama dai haana dai wato awirini. Yama ofebone dai fawahari, dai nibana?” Yeso ati ne,

“Hehe, haa‑nima oda naboneni, sibarini.” Mai ati namaroni.

²³“Yama ofebone‑nima dai fawamakeboneni. Okobi ati ene owa mano kanika‑kaya owa itari, owa mano sayo‑kaya owa itari nebona, mai oni hawa tohineni. Fara mai i‑itari‑bone‑ka dai‑ya daa·oteraboneni.” Yeso ati nemarine.

²⁴Sebedeo bidi mai ati‑ya oda one 10 kana mita, oda ati yawamaroni.

²⁵Yeso oda‑ya haane, oda‑ya hiyare,

“Bara mai‑ka hidi mai one‑ya mai kasomaterani. Mai ati ihi mai mai hinarifateni.

²⁶Mai‑nima dai riyahi. Hidi tihabone tina, dai one tikasomabisahi.

²⁷Mai‑ka webote tihabone tina, mai nafi tikasomabisahi.

²⁸Dai‑ka Ayo neme‑ke‑nima dai nahi. Owa dai narifara, dai‑ya onarifabisateni. Mai dama mai ihi manakone‑ya onahababone, o·ababoneni.” Ati nemarine.

Yama‑ya mai awara Yeso mai‑ya kasome

²⁹Oda toka, Yeriko‑ya oda fiyakani yanatoniya, mai dama mai kamakemaroni.

³⁰Mai noki wadara hawi fowari‑ya mai demenare, Yeso tamine‑ya mai mita, mai haana,

“Ayo, oda‑ka hidi amatini. I‑di Dafi‑ka nodi amatini. Oda tikasomahi.” Mai ati namaroni.

³¹“Dai ati fawanahi.” Mai dama mai ati na,

Mai haani kitawaha,

“Ayo, oda‑ka hidi amatini. I‑di Dafi‑ka nodi amatini. Oda tikasomahi.” Mai ati namaroni.

³²Yeso maatowiti, mai‑ya haane, mai kakama,

“Hini yamata‑ya dai ati koboniti?” Yeso ati ne,

³³“Ayo, oda noko tikasomahi, yama oda awabonehe.” Mai ati namaroni.

³⁴Yeso mai‑ya nofe, mai noki‑ya boyone, mai noki amosawama, yama‑ya mai awawaha, Yeso‑ya mai sawiwahamaroni.

Yerosare‑ya Yeso kobone

¹Yerosare hawi‑ya oda yakana, Orifera adami toha, Befaki toha na, yakari‑ya oda kobona, Yeso‑ya oda da‑daba mai fama mai‑ya yose,

²“A‑ahi‑ya mai tabori‑ya dai towakahi. Mai tabori‑ya dai towakiya, mai tabori‑ke boho bidi yetene madi eyehe yaditone dai awiya, dai disawaheya, dai kakamayaho.

³‘Hini yamata‑bone boho mai dai disawahiti?’ Mai ati niya,

‘Ai‑ka Hidi mai haahinani.’ Dai ati niya,

Boho mai‑ya mai daanaboneni.” Yeso ati nemarine.

⁴Hibati‑ya Deoso ati‑ya mai mi‑mita‑mete mai‑ka owa ati‑mata dai mitahi,

⁵“Yerosare‑ya mai wi‑wina mai‑ya dai hiyarahi. Dai‑ka hidi webote dai‑ya kakibona, ati hamarebona, boho mese‑ya itaribonane. Boho bidi yetene mese‑ya itaribonane.” Ati nemata,

ati‑nima yama nawahamaroni.

⁶Yeso‑ya oda da‑daba mai fama, Yeso ati‑nima mai towaka, Yeso ati‑nima boho mai‑ya mai wasemaroni.

⁷Boho bidi yetene madi eyehe‑ya mai kakama, boho mai mese‑ya oda‑ka bora oda sookanire‑ya Yeso itari, Yerosare‑ya oda tokawahamaroni.

⁸Yeso‑ya mai dama mai sawe, Yeso hawine‑ya mai‑ka bora‑ya mai nawiya, mai one awa afe‑ya nawiya namaroni.

⁹Mai one dai toha, mai one yoto na, mai hiyara, mai ati kita,

“Oda‑ka hidi i‑di Dafi‑ka nodi oda kahiyarineni. Deoso tiwa‑ya yose, tiwa‑ya kasomayaho, oda ati nineni. Deoso neme‑ya wine, Deoso oda kahiyarineni.” Mai dama mai ati namaroni.

¹⁰Yerosare‑ya oda kobona, mai dama mai ati yanana,

“Ebeni‑ke tohati?” Mai ati namaroni.

¹¹“Yeso Nasare‑ke amane. Deoso ati‑ya mi‑mita amane.” Mai ati namaroni.

Deoso‑ka yobe‑ya Yeso toke

¹²Deoso‑ka yobe‑ya Yeso toke, yama‑ya mai one daa, mai one yama‑ya kanika na, mai‑ya Yeso kananiwahemarine. Yinero‑ya mai da‑daa mai‑ka mesa‑ya Yeso fatatokawiti, wayomata mai‑ya mai da‑daa mai‑ka kadera‑ya Yeso fatatokawiti nemarine.

¹³Mai‑ya hiyare,

“‘Oka yobe‑ya owa‑ya mai hiyaraboneni.’ Deoso‑ka yama hani ati na,

dai ene yama‑ya mai bo‑boti mai‑ka yobe‑nima yobe nawawahane.” Yeso ati nemarine.

¹⁴Deoso‑ka yobe‑ya mai noki awihinara mai toha, mai one ka‑kakona mai toha na, mai‑ya Yeso nakitamemarine.

¹⁵Deoso‑ka yobe‑ya Yeso tamine‑ya madehe hiyara,

“Dafi‑ka nodi ai kahiyarineni.” Madehe ati namaroni.

Deoso‑ka yama‑bone‑ya mai da‑daa mai‑ka hidi mai toha, Mose‑ka yama hani ati‑ya mai ka‑kamina mai toha na, Yeso ene amose‑ya mai awa, madehe ati‑ya mai mita na, mai yawawahamaroni.

¹⁶“Yeso, madehe ati timitineni?” Mai ati na,

“Mai ati omitani. Deoso‑ka yama hani dai kadikaterini?

‘Madehe, madehe borehe, mai na, Deoso ene Deoso‑ya mai kahiyaraboneni.’” Yeso ati nemarine.

¹⁷Makobote Betaniya‑kaya Yeso oda eyehe tokomemarine, oda amonabonehe.

Fiko abineni

¹⁸Yerosare‑ka hawi‑ya oda tokomaminatasa, Yeso fimimarine.

¹⁹Hawi fowari bodi‑ya fiko ohare waa‑ya Yeso awe, toke, fiko bonora, afe hinama tohamaroni.

“Tibonomateraboneni.” Yeso ati ne,

Ati ene fiko wayatonamaroni.

²⁰Fiko wayatona‑ya oda awa,

“Ka! Hini yamata ihi fiko wayatona kanibote nihi?” Oda ati namaroni.

²¹Yeso oda‑ya hiyare,

“Owati amosa dai mitahi.

‘Deoso kitatene.’ Dai atibodi ati nahi,

‘Deoso kiteba awane.’ Dai atibodi ati riyahi,

Deoso ati dai nofabisiya, owa ene kitabote‑nima dai ene naboneni.

‘Adami webote, tibokahi.’ Dai ati niya,

dai ati ene adami webote bokaboneni.

²²Deoso ati dai nofiya, Deoso dai haaniya, dai ati‑nima yama naboneni.” Yeso ati nemarine.

Yeso‑ya mai weena

²³Deoso‑ka yobe‑ya Yeso tokiyome, mai‑ya kanawatomarine. Deoso‑ka yama‑bone‑ya mai da‑daa mai‑ka hidi mai toha, Yodeo mai‑ka hidi mai bi‑bidi na mai toha na, mai kamake, Yeso‑ya mai weenabone, Yeso‑ya mai hiyara,

“Ebeni‑ke ati ene mai‑ya kanatiniti? Ebeni‑ke ati ene mesa‑ya fatatikawiti tiniti?” Mai ati namaroni.

²⁴“Dai ati omiti bahi, owati dai mitahareboneni.

²⁵Ebeni‑ke ati ene Yowaho Batita mai‑ya habanirisati? Deoso ene toha, ai owa ene toha nane, hini yamata‑nima dai ati niti?” Yeso ati nemarine.

Mai ibi hiyara,

“‘Deoso ati ene amane.’ Ai ati niya,

‘Hini yamata ihi Yowaho Batita ati dai nofariti?’ Yeso ati nebonane.

²⁶‘Ai owa ati ene amane.’ Ai ati niya,

ai‑ya mai bisinaboneni. Mai dama Yowaho Batita ati‑ya mai nofa,

‘Yowaho Batita Deoso ati‑ya mai mi‑mita mai‑ka owa amane.’ Mai dama mai ati teni.” Mai ibi hiyara mai ati namaroni.

²⁷Yeso‑ya mai hiyaramatasa,

“Yowaho Batita tamine oda wato awirini.” Mai ati na,

Yeso mai‑ya hiyare,

“Yowaho tamine dai kaminara, owa tamine okaminahariraboneni.

Ai owa bidi mai fama

²⁸Owati dai miti bahiya, dai ati omitaboneni. Ai owa bidi mai fama, bidi daidi‑ya hiyare,

‘Ai‑ka ofa bodone‑ya yama anitinahi.’ Badi ati ne,

²⁹‘Ofa bodone‑ya yama anini onofarini.’ Bidi daidi ati ne,

makobote, atibodi ene toke, ofa bodone‑ya yama‑ya aninibisane.

³⁰Makobote bidi yoto‑ke‑ya hiyare,

‘Ai‑ka ofa bodone‑ya yama anitinahi.’ Badi ati ne,

‘Ofa bodone‑ya yama ani·onaboneni.’ Bidi yoto‑ke ati ne, makobote yama‑ya anirene.

³¹Ebeni‑ke badi ati‑ya tokadababisati?” Yeso ati ne,

“Bidi daidi badi ati‑ya tokadababisane.” Mai ati namaroni.

“Owati amosa dai mitahi. Kofeno‑ka yinero‑bona‑ya mai ha‑haa mai toha, fana towe mai toha na, Neme‑ke ai nafi‑ka hidi kitabote tohawahe‑ya mai sawebone, dai‑ta dai sawiraboneni.

³²Dai atibodi amosawahabone tamine‑ya Yowaho Batita hiyare, ati dai nofaramaroni. Kofeno‑ka yinero‑bona‑ya mai ha‑haa, fana towe mai toha na, Yowaho Batita ati‑ya mai nofabisamaroni. Mai ihi amosawaha mai dai awa, Yowaho ati dai nofasa rani.” Yeso ati nemarine.

Fadara tamine

³³Yeso mai‑ya kanawatobona mai‑ya hiyare,

“Ofa tabori‑bone‑ya hidi hawa tonihi, ofa noki‑ya kamane, yama ba‑barikana‑ya wamane, ofa ta‑tai‑ka hodi‑ya wamane, ofa‑ya mai na‑nawada‑bone mai tabori nemehe‑bone‑ya wamanamaki, yama yaki‑ya tokebona mai‑ya hiyare,

‘Oka awa bono dai nawadahi, hadiya, one okayafa, one dai kayafa naboneni.’ Ofa hidi ati ne,

‘Hehe, sibarini.’ Mai ati nani.

Fara yama yaki‑ya ofa hidi tokawahemarine.

³⁴Ofa hadiya, ofa hidi‑ya mai na‑narifa mai‑ya yoseme,

‘Owa tabaro one‑ya dai tokomahi. Ofa one‑ya dai‑ya mai daaniya, ofa dai kakamiyahi.’ Hidi ati nene.

³⁵Hidi‑ka ofa‑ya hika yo‑yose mai haana, ofa‑ya mai na‑nawada ofa‑ya mai daara, hidi‑ka yo‑yose owa‑ya mai bisi, owa mai hinaboha, owa yati‑ya mai hikinari hinane.

³⁶Hidi yawe, hika yo‑yose mai one dama mai‑ya yosemakitasane, ofa‑ya kayafebonaha. Ofa‑ya mai daara, hika yo‑yose mai mai bisihinamakitasineni.

³⁷Makobote bidi‑ya yosemakitase,

‘Oka dao ati‑ya mai nofabisaboneni.’ Hidi ati nene.

³⁸21:33-41 Ofa mai na‑nawada Yodeo mai‑ka hidi mai tamine toha, ofa hidi i‑di Deoso tamine toha, ofa hidi‑ya mai na‑narifa i‑di Deoso ati‑ya mai mi‑mita mai tamine toha, hidi bidi i‑di Yeso tamine toha ne, Yeso‑ya mai nanahababone ihi Deoso mai‑ya weeni kitebonane.Hidi bidi‑ya mai awa, mai ibi hiyara,

‘Bidi ai nanahabaho. Ai nanahabeya, badi abamakiya, mai‑ka yama nafi ai kayafaboneni.’ Mai ati na,

³⁹bidi mai hinahabe, awa beheri‑kaya abo mai korohiwitine.

⁴⁰Ofa hidi kameya, hini yamata‑nima nabati?” Yeso ati nemarine.

⁴¹Yeso ati‑ya mai mita, mai ati yanana,

“Hidi kameya, mai nafi‑ya nanahabebonane. Mai one mai‑ya yosemakiya, hika awa mai hinawada, ofa one‑ya mai daanaboneni.” Mai ati nemarine.

⁴²21:42 Yobe‑ya mai wa‑wama Yodeo mai‑ka hidi mai tamine amani. Awa mai werehiwite Yeso tamine amane. Deoso ati ene mai‑ka hidi kitabote Yeso tohawahebonane.Yeso ati yananamatase,

“Fara amani. Deoso‑ka yama hani ati dai mitahi,

‘Yobe‑ya mai wa‑wama awa mai werehiwite, yobe tati mese ewene tohawahene.’ Deoso‑ka yama hani ati nineni.

Deoso ene ai awemari, ai ya‑yainineni.” Yeso ati nemarine.

⁴³“Owati dai mitahi. Deoso dai‑ya haanemarine, hika yama dai nawadabonehe. Hibayata bara mai‑ya haanebonane, hika yama mai hinawadabisabonehe. Deoso ati‑nima mai nawahaboneni. Deoso‑ka yama dai nawadami awiraboneni.

⁴⁴21:44 Awa‑ya ai sonariya, Yeso ati mai nofara Deoso mai‑ya weenebona tamine amane. Awa ai‑ya koboniya, Deoso‑ka we‑wee tamine amani.Yobe tati mese‑bona home‑ya ai sonariya, ai bakatonaboneni. Yobe tati mese ewene soneya, ai‑ya koboneya, ai abi ohareboneni.” Yeso ati nemarine.

⁴⁵Deoso‑ka yama‑bone‑ya mai da‑daa mai‑ka hidi mai toha, fariseo mai toha na, Yeso ati‑ya mai mita, mai yawa,

“Oda tamine‑ya Yeso hiyarane.” Mai atibodi ati namaroni.

⁴⁶Yeso‑ya mai watabone mai atibodi ati na, mai hiwati awiremarine. Mai dama mai sawe mai ihi yama yofina, Yeso Deoso ati‑ya mi‑mita amane, mai dama mai ati teni.

Hidi webote bidi fanebona

¹Yeso mai‑ya kanawatobona mai‑ya hiyare,

²“Neme‑ke ai nafi‑ka hidi kitabote tohawahebona tamine dai watohi. Ai one mai‑ka hidi webote bidi fanebona, mai dami‑ya haanane, mai tafabonehe.

³Hika yo‑yose mai‑ya yose,

‘Mai oni tiawahi. Mai dai haanahi, marina‑ya mai kamabonehe.’ Hidi webote ati ne,

mai‑ya mai haana, mai ati a‑arira, mai kamaki awirani.

⁴Hika yo‑yose mai one‑ya yosemaki,

‘Mai dai haatonamatasahi. Oka bani mai wataka mai onahaba, ai tefe‑bone hawa tohini, mai kama kanibote niyahi.’ Hidi webote ati nane.

⁵Mai mai haahina yama tokomaki‑ya mai nofara, fadara‑ya mai one toka, yama‑ya da‑daa‑kaya mai one toka na, hidi webote bidi marine‑ya mai ati toki nofarani.

⁶Mai mai haahina, mai one hama, hidi webote‑ka yo‑yose mai one‑ya mai bisi, mai one‑ya mai nanahaba, mai nineni.

⁷Mai tamine‑ya hidi webote mite, yawawahe, sodado mai‑ya yose, mai‑ya mai nanahaba, mai tabori‑ya mai sarikanamakeni.

⁸Hika yo‑yose mai one‑ya yosemakitase,

‘Hibati‑ya mai haa·ona mai ati kasirani.

⁹Bara mai‑ya dai haanahi, mai nafi. Tabora nafi‑ya dai tokiya, mai dai haanahi.’ Hidi webote ati nane.

¹⁰Mai toka, mai nafi‑ya mai haana, mai ati kasira mai‑ya mai haa, mai ati amosa mai‑ya mai haa na, hidi webote tabaro kibawahane.

¹¹Mai‑ka hidi webote mai‑ya kiine, maki ohari bora amosara‑ya sakone‑ya awane.

¹²22:12 Bora amosa ai ene amosa tamine amani. Yeso ati ai nofa, bora amosa ai sakona‑nima ai teni.‘Hini yamata‑bone bora amosa‑ya sakotini awiriti?’ Hidi webote ati ne,

maki ati yanarene.

¹³Hidi webote hika yo‑yose mai‑ya yose,

‘Yehe, teme ne, dai sokikaseya, dai korotowitiho, yama soki‑kaya mai ohinabone, mai kome kitaboneni.’ Hidi webote ati nane.

¹⁴Mai nafi‑ya Deoso haane, mai fa‑famaraba na mai‑ya Deoso kadikebonane.” Yeso ati nemarine.

Hidi webote‑ka yinero

¹⁵Fariseo mai toka, mai ibi hiyara,

“Ai ati ene Yeso ati tosawariba awane.” Mai ati namaroni.

¹⁶Mai‑ka mai da‑daba mai‑ya mai yose, i‑di Erodi‑ka mai one mai‑ya mai yose, Yeso‑ya mai hiyara,

“Ayo, keyehe hirititerani. Deoso ati tikamine amosatene. Webote mai‑ya tinayofinara, fara yokana tikaminateni.

¹⁷Tiwati oda mitabone, ai‑ka yinero‑ya Sesa haaneya, yinero ai daanibaraniha?” Mai ati namaroni.

¹⁸Mai atibodi ati amosara‑ya Yeso wato,

“Towe dai amani. Owa‑ya dai watabone dai ati amani.

¹⁹Sesa‑ka yinero‑bona oaweba, dai namoho.” Ati ne,

barata wamani‑ya mai daanamamaroni.

²⁰“Yinero bako dai awahi. Ebeni‑ke korimari amanati, oni tohaneri?” Yeso ati ne,

²¹“I‑di Sesa korimari, oni ne, yinero bako‑ya waane.” Mai ati namaroni.

“Sesa‑ka yama‑ya Sesa‑ya dai daatonama, Deoso‑ka yama‑ya Deoso‑ya dai daatonamahari, dai nahi.” Yeso ati nemarine.

²²Yeso ati‑ya mai mita,

“Ka! Yeso yama‑ya watone.” Mai atibodi ati na, mai yamatonamaroni.

Ai kitamabone

²³Sadoseo mai one kamakemaroni, Yeso ati‑ya mai mitabonehe.

“Ai aba ai kitamaterani.” Sadoseo mai ati teni.

Mai kobona, Yeso‑ya mai hiyara,

²⁴“Yeso, tiwati oda mitaboneni. Hibati‑ya i‑di Mose ati‑mata timitahi,

‘Ayo abeya, fadi hasina, bidi, bide mai na, mai wadara, anidi fadi‑ya famawahayaho. Bidi toheya, anidi abemari oni‑ya bidi weyenayaho.’ Mose‑ka yama hani ati nineni.

²⁵Ai owa‑ka soho mai 6 kana, fane, kahiware, abe, fadi‑ya sohori famawahemarine.

²⁶Sohori kahiware, abamakitasemarine. Anidi fadi‑ya mai nafi kayafa, mai nafi abamaroni.

²⁷Mai nafi aba, mai‑ka yibote abamakemaroni.

²⁸Yeso, oda ati timitahi. Mai nafi‑ka yibote tohamaro, mai kitamiya, ebeni‑ke fadi tohawahibati?” Sadoseo mai ati namaroni.

²⁹Yeso mai‑ya hiyare,

“Deoso‑ka yama hani dai watorihi, Deoso ene dai watorihi, dai na, dai tosawarineni.

³⁰Mai aba Deoso ati ene mai kitamiya, neme‑ya mai winiya, mai fanamateraboneni. Deoso‑ka yo‑yose mai‑nima mai naboneni.

³¹‘Ai aba, ai kitamateraboneni.’ Dai ati na,

Deoso‑ka yama hani ati dai mitahi.

³²‘I‑di Abaraho, i‑di Isaki, i‑di Yako mai na, mai‑ka Deoso ama·oni.’ Deoso ati nematamonane.

Hibati‑ya mai abametemoneni. Mai wadamara mai‑ka Deoso tohaterene. Mai hasinibisa mai‑ka Deoso amane.” Yeso ati nemarine.

³³Mai dama Yeso ati‑ya mai mita,

“Ka! Yeso yama‑ya watone.” Mai atibodi ati namaroni.

Deoso ati kitabote

³⁴Yeso ati ene sadoseo mai ati fawana, mai tamine‑ya fariseo mai mita, mai yorotokanamaroni.

³⁵Mai‑ka owa Mose‑ka yama hani ati‑ya ka‑kanawato sawi,

“Owati ihi Yeso ati tosawaribonane.” Atibodi ati nemarine.

Yeso‑ya haane,

³⁶“Naki, yama hani ati kote amosabote tikaminahi.” Fariseo owa ati nemarine.

³⁷“‘Ai‑ka hidi webote i‑di Deoso dai nofi nafiyahi. Yama one dai nofi nafiriyahi. Deoso‑ta dai nokotonibisahi.’ Yama hani ati na,

³⁸ati amosabote amani.

³⁹‘Hini tiwa‑ya tinofi‑nima dai yakari‑ya mai sawe mai tinofiyahi.’ Yama hani ati na, ati amosabotehari amani.

⁴⁰Ati amosabote fama, ati‑ya mai tokadabiya, Mose‑ka yama hani ati nafi‑ya mai tokadaba, Deoso ati‑ya mai mi‑mita‑mete mai‑ka yama hani ati nafi‑ya mai tokadabahari, mai teni.” Yeso ati nemarine.

Ebeni‑ke‑ka nodi i‑di Kirisito toha

⁴¹Fariseo mai yorotokana, mai‑ya Yeso hiyare,

⁴²22:42 “Deoso‑ka Ka‑kadika ai owa tohe, Deoso Bidi tohi awire.” Fariseo mai atibodi ati na, mai tosawarineni. Deoso‑ka Ka‑kadika ai owa toha, Deoso Bidi tohahari nane.“Dai ati omitaboneni. Ebeni‑ke‑ka nodi Deoso‑ka Ka‑kadika amanati?” Yeso ati ne,

“Dafi‑ka nodi amane.” Mai ati namaroni.

^43-44“Deoso‑ka Ka‑kadika tamine‑ya i‑di Dafi kanahano, ati dai mitahi.

‘Oka hidi webote‑ya Deoso hiyare,

—Owa mano kanika‑ya tiwitarihi. Owati ihi tiwa‑ya mai ka‑kako mai‑ka hidi tihawahaboneni.—’

Deoso‑ka Ka‑kadika tamine‑ya Dafi atibodi‑ya Deoso‑ka Doni kamine, yama hani‑ya Dafi kanahanomatamonane.” Yeso ati nemarine.

⁴⁵Yeso ati yananamatase,

“Deoso‑ka Ka‑kadika i‑di Dafi‑ka hidi webote tohemona i‑di Dafi ati nematamonane. Fare Dafi‑ka nodi tohe, i‑di Dafi‑ka hidi webote tohahari ne.” Yeso ati nemarine.

⁴⁶Yeso ati‑ya mai mita, mai ati yanani awira, Yeso‑ya mai nafi nayofina, mai ati fawanamaroni.

Yama‑ya mai watamone

¹Mai dama mai toha, Yeso‑ya oda da‑daba oda toha na, oda‑ya hiyare,

²“Fariseo mai toha, Mose‑ka yama hani ati‑ya mai ka‑kamina mai toha na, Mose‑nima mai na, dai‑ka hidi mai amani.

³Mai ati dai tokadabiyahi. Mai ati‑ta dai tokadababisa, mai ihi‑nima dai ene riyahi. Hini mai ati‑nima mai ihi ni awirani.

⁴Yamasi kiba kanaha‑ya mai yaditona, mai one weyehinabonehe. Hini mai aboni yama‑ya mai weyeterani. Fara‑nima mai ati dami‑ya mai one tokadababone mai ati na, hini mai ati‑ya mai tokadabi awirani.

⁵23:5 Yama hani wiye bide‑ya Yodeo mai sakoteni.Mai‑ka yama hani wiye ba‑basi na‑ya mai sako, mai‑ka bora fowari kawiya yabona,

‘Oda ene‑ya mai awa, oda‑ka bora‑ya mai awa niya, oda‑ya mai nofaboneni.’ Mai atibodi ati teni.

⁶Dai yorotokana, dai tafabone‑ya mai sawe, kadera amosabisa‑ya mai nahore, Deoso‑ya mai hi‑hiyara‑ke yobe‑ya mai sawe, kadera amosa‑ya mai nahoriteni, mai dai kahiyarabonehe.

⁷Oda‑ya ka‑kanawato webote amatini dai ati na, dai ati ene mai ya‑yaiteni. Dai‑ya mai nokotoniteni, mai dai kahiyarabonehe.

⁸Dai‑ya mai haana, ‘ka‑kanawato webote’ mai ati niya,

‘Haa‑nima dai ati riyahi.’ Dai ati nahi.

Fara hinama dai amani. Dai‑ya ka‑kanawato webote yokana oharine. Dai ibi haaniya, ‘ayo’, ‘soho’ dai ati nibisahi.

⁹Ai owa dai hiyariya,

‘Abi amosabote amatini.’ Dai ati riyahi.

Ai‑ka Abi amosabote yokana neme‑ya winane.

¹⁰23:10 Wami hidi, tabora hidi mai na, mai tamine tohara. Ai atibodi‑ka hidi tamine amane. Ai atibodi‑ka hidi i‑di Deoso‑ka Ka‑kadika amane.Dai ibi hiyariya,

‘Oka hidi amatini.’ Dai ati riyahi,

dai‑ka hidi yokana ohari, i‑di Deoso‑ka Ka‑kadika amane.

¹¹Dai‑ka hidi webote haa‑nima naho, mai nafi‑ya kasomaho.

¹²Hini mai‑ya mai kahiyara Deoso ene mai mai hinofaraboneni. Ai‑ya ai nokotonira, Deoso ai‑ya kahiyarabisebonane.

¹³Ka! Mose‑ka yama hani ati‑ya dai ka‑kamina dai toha, fariseo dai toha na, dai ati kasiroteni. Dai ene manakone wadani. Neme‑ke ai nafi‑ka hidi kitabote tohawahebona‑ya dai sawirabone, mai one sawebone mai ati na mai‑ya dai ati barinineni.

¹⁴Ka! Mose‑ka yama hani ati‑ya dai ka‑kamina dai toha, fariseo dai toha na, dai ati kasiroteni. Dai ene manakone wadani. Fana maki abe mai‑ka yobe‑ya dai kayafateni. Deoso‑ya dai hiyari yaboteni, dai‑ya mai awabonehe. Deoso dai‑ya weeni kitabisebonane.

¹⁵Ka! Mose‑ka yama hani ati‑ya dai ka‑kamina dai toha, fariseo dai toha na, dai ati kasiroteni. Dai ene manakone wadani. Tabora dami‑ya dai toka, hawi‑ya dai toka, faha kowani‑kaya dai toka, dai teni, dai‑nima mai one nawahabonehe. Satanasi ati dai nofa, dai ati ene Satanasi ati‑ya mai nofi ba‑basi neni.

¹⁶Ka! Yama‑ya dai watora mai dai kanawatoteni. Dai ene manakone wadani. Deoso‑ka yobe oni‑ya mai hirina,

‘Mai‑ka keyehe hini tohiya.’ Dai ati teni.

Deoso‑ka yobe‑ka oro oni‑ya mai hirina,

‘Dai ati‑nima dai nahi.’ Dai ati teni.

¹⁷Yama‑ya dai watoterani. Deoso‑ka yobe amosi ba‑basi, Deoso‑ka yobe‑ka oro amosi bi‑bidi teni. Deoso hini hika yobe‑ya kayawe, oro‑ya Deoso kayawi awirane.

¹⁸Deoso‑ka bani ai da‑daa‑ka mesa oni‑ya mai hirina,

‘Mai‑ka keyehe hini tohiya.’ Dai ati teni.

Deoso‑ka bani‑bona mesa‑ya sookari, bani oni‑ya mai hirina,

‘Dai ati‑nima dai nahi.’ Dai ati teni.

¹⁹Yama dai watoterani. Deoso‑ka mesa‑ya yama sookare‑ya Deoso kayawatene, mesa ihi. Bani‑ya Deoso kayawatere, hini hika mesa‑ya bani sookari‑ya kayawatene. Mesa amosi ba‑basi nibisa, mesa‑ya sookari amosi bi‑bidi nane.

²⁰Deoso‑ka mesa oni‑ya mai hiri, Deoso‑ka bani oni‑ya mai hirina mai‑nima mai teni.

²¹Deoso‑ka yobe oni‑ya mai hiri, Deoso oni‑ya mai hirina mai‑nima mai teni.

²²Deoso tabaro oni‑ya mai hiri, hidi‑ka kadera oni‑ya mai hiri, Deoso oni‑ya mai hiri na mai‑nima mai teni.

²³Ka! Mose‑ka yama hani ati‑ya dai ka‑kamina dai toha, fariseo dai toha na, dai ati kasiroteni. Dai ene manakone wadani. Dai‑ka yamata ke‑ketehe kote‑ya Deoso‑ya dai daateni. Deoso ati owa dai tokadabara,

‘Mai ihi‑nima mai manakone daatinahi. Mai kitara mai tikasomahi. Tiwati‑nima tinahi.’ Deoso ati nematane.

Ati amosabote amane. Ati dai tokadabaterene. Deoso ati amosabote dai tokadabe, makobote Deoso‑ka yama‑bone dai daaniya, dai sibarineni.

²⁴Yama dai watoterani. Yama hani ati i‑isi na dai nokotoni kita, tamine yokana‑ya dai mitaterani.

²⁵Ka! Mose‑ka yama hani ati‑ya dai ka‑kamina dai toha, fariseo dai toha na, dai ati kasiroteni. Dai ene manakone wadani. Keneko mese dai sorona, keneko doro dai awara‑nima dai ene na, mai noki‑ya dai ene amosabisa, dai atibodi towe tohabisineni. Yama‑ya mai bo‑boti mai toha, hini mai‑ya mai no‑nokotoni mai toha na, mai atibodi ati‑nima dai atibodi ati neni.

²⁶Fariseo dai toha, yama‑ya dai watora, keneko doro dai namosi baha, keneko mese dai namosahi. Ai atibodi amosi baha, ai ene amosahariteni.

²⁷Ka! Mose‑ka yama hani ati‑ya dai ka‑kamina dai toha, fariseo dai toha na, dai ati kasiroteni. Dai ene manakone wadani. Ai temene mese‑ya mai tihitakana‑nima dai neni. Ai temene mese amosa, bodi‑kaya ai tone tohabisineni.

²⁸Dai‑ya mai awa, dai atibodi amosamone mai ati na awineni. Dai atibodi towe hinama toha, mai ati‑nima dai atibodi terani.

²⁹Ka! Mose‑ka yama hani ati‑ya dai ka‑kamina dai toha, fariseo dai toha na, dai ati kasironeni. Dai ene manakone wadani. Deoso ati‑ya mai mi‑mita‑mete mai tame yoberi‑ya dai wa‑wama, Deoso ati‑ya mai tokadabamaro mai tame‑ya yama amosa dai nawadateni.

³⁰‘Hibati‑ya oda sawemete‑mani, oda‑ka idi ene‑nima oda ene ra nemeteni. Hibati‑ya oda sawemete‑mani, Deoso ati‑ya mai mi‑mita‑mete mai oda nanahabara nemeteni.’ Dai ati na, fara haa‑nima dai ati niya,

³¹‘Deoso ati‑ya mai mi‑mita‑mete mai‑ya oda‑ka idi nanahabematane.’ Dai ati nineni.

³²Fara dai‑ka idi ene‑nima dai ene naboneni.

³³Maka ihi‑nima dai ene na, maka yokana‑nima dai na, dai ene Deoso dai‑ya sarikanebonane.

³⁴Deoso ati‑ya mai mi‑mita mai toha, yama‑ya mai wa‑wato mai toha, Mose‑ka yama hani ati‑ya mai ka‑kamina mai toha na, mai oyoseboneni. Oka yo‑yose mai one dai nanahaba, mai one awa‑ya dai nawaana naboneni. Deoso‑ya mai hi‑hiyara‑ke yobe‑ya oka mai one dai kosi, mai one dai kananihi naboneni.

³⁵Dai‑ka idi mai ihi‑nima dai ene na, mai ihi nafi yorotokawama‑nima dai ene manakone naboneni. Oka mai ihi amosa mai‑ya dai‑ka idi mai nanahabameteni. Abeo‑ya nanahabi bahe, mai dami‑ya mai nanahabamaki, Barakiya bidi i‑di Sakariya‑ya Deoso‑ka yobe‑ya dai‑ka idi mai nanahaba nameteni.

³⁶Owati amosa dai mitahi. Dai‑ka idi mai ihi yorotokana manakone‑nima dai ene manakone naboneni.

³⁷Yerosare, tika mai ihi ohi·oneni. Tiwa‑kaya mai wi‑wina Deoso ati‑ya mai mi‑mita mai‑ya mai nanahabateni. Tika mai okasomabone ona, owati‑ya mai nofarani. Arakawa afe bodi‑ya bidi mai mookana, madi mai hikayawateni. Fara‑nima tika mai okayawabone ona, owa‑ya mai nofarani.

³⁸Tika mai fawaniya, tika yobe honita tohawamebonane.

³⁹Owati timitahi. Owa‑ya tika mai hiyara, eya mai ati naboneni.

‘Deoso tiwa‑ya yose, tiwa‑ya kasomayaho, oda ati nineni.’ Mai ati nabone,

mai ati ni awisari‑ya osawimatasaraboneni.” Yeso ati nemarine.

Yama nabone

¹Deoso‑ka yobe‑ya oda naha, Yeso yanane, Yeso‑ya oda da‑daba oda ati yanana,

“Deoso‑ka yobe amosabote tiawaho.” Oda ati namaroni.

²“Owati amosa dai mitahi. Hibayata yobe amose‑ya dai awineni. Yama one‑ya yobe wadamarebona, yati fama demenarimaraboneni.” Yeso ati nemarine.

³Orifera adami‑ya oda kobona, oda nahokosa, Yeso‑ya oda daba, Yeso‑ya oda hiyara,

“Eme ai amoni niya, yobe ababonati? Tikamatasabone tina, yama faina‑bone kobonabone tina, yama koboni yanatoniya, hini yamata oda awibati, yama oda watowahi‑bone‑karo?” Oda ati namaroni.

⁴Yeso oda‑ya hiyare,

“Dai noko wadahi. Dai‑ya mai keyeheriyahi.

⁵‘Deoso‑ka Ka‑kadika ama·oni.’ Mai dama mai ati naboneni.

Mai‑ka keyehe‑ya mai dama mai nofawahaboneni.

⁶24:6 Yama faina‑bone Yeso ati ne, kamatasebona tamine amane. Yeso kamataseya, hika mai‑ya idibona, makobote mai one‑ya weeni kitebonane. Mateo 13:24-30, 36-43Wami hidi mai ibi nofaraboneni. Mai‑ka sodado mai‑ya mai yoseya, mai‑ka sodado mai ibi taonabone, mai tamine dai mitiya, dai habo siitoriyahi. Yama faina‑bone koboni awisarini. Yama one‑ya kobonaboneni.

⁷Owati dai mitamatasahi. Wami one‑kaya mai wi‑wina mai‑ka sodado ahini‑kaya mai kakeboneni, mai dami‑ya mai nanahababonehe. Ahini‑kaya mai wi‑wina mai‑ka sodado maa kowani‑kaya mai toka naboneni, mai‑ya mai nanahababonehe. Mai dami tafe tosiyabone, fimi ihi mai aba naboneni. Wami wawawakana naboneni. Haa‑nima yama na dai awiya, yama faina‑bone koboni yanatoneni.

⁸Fana dori wadabone, dori kome yanani kita, dori wada kanibote na‑nima yama na tiwiya, yama faina‑bone yana kanibote naboneni.

⁹Oka dai toha dai‑ya mai bisina, dai one‑ya mai nanahababoneni. Mai dama owa‑ya mai nofarabone, oka dai toha dai‑ya mai kakaboneni.

¹⁰Owati‑ya mai tokadabamaro, owati‑ya mai nofami awiraboneni, mai damaro. Mai‑ka owa mai kaka, mai‑ka owa mai daanaboneni, mai hinahabebonaha.

¹¹‘Deoso ati‑ya mi‑mita ama·oni.’ Mai one ati naboneni, keyehe‑ya mai hirinaro.

Mai ati‑ya mai dami nofaboneni.

¹²Mai dama mai ati kasira, mai ihi owa‑ya dai one nofamaraboneni.

¹³Owa oni dai saatonakosi awiriya, dai sibaraboneni.

¹⁴24:14 Yama faina‑bone Yeso kamatasebona tamine amane. Kamataseya, hika mai‑ya towakamebonane. Mai towitakosa mai‑ya weeni kitebonane. 13:39 dai kadikahi. Bofe‑ka yama we‑wee tamine dai watohi. Yeso Kirisito ene‑bona kabitoro 16‑ya dai kadikaharihi.Neme‑ke ai nafi‑ka hidi kitabote tohawahebona tamine‑ya mai kaminabone, tabora dami‑ya dai‑ka Hidi tamine‑ya mai nafi mitiya, yama faina‑bone kobonaboneni.

¹⁵24:15 Satanasi‑ka yo‑yose tamine amane. “Deoso yokana ama·oni.” Ati nebonane. Ati ene korimari mai hinawaaribonane, Deoso‑ka yobe‑ya.Deoso‑ka yobe‑ya deoso bare‑ka yama waabone, fara ihi Deoso‑ka yobe towe tohawahebona tamine‑ya Daniyeo kanahanomatamonane.

(Yama towe waa, dai awiya, dai atibodi yama‑ya kadikahi, dai watowahabonehe.)

¹⁶Deoso‑ka yobe doro‑ya yama towe wai, dai awiya, dai kananiyahi. Yodeya‑ya dai wi‑wina adami webote‑kaya dai tokiyahi.

¹⁷Yama siri‑kaya dai naha, dai yehe honene yobe doro‑ya towadakosa, dai tonakamariyahi. Hiniya dai kananahi.

¹⁸Fadara‑ya yama dai anina, dai‑ka bora one yobe‑ya toha, yobe‑ya dai tokomariyahi. Hiniya dai kananahi.

¹⁹Ka! Mai fanawi naba toha, mai‑ka madehe i‑isi na toha na, mai kananiya yama ati kasiraboneni.

²⁰Deoso dai hiyarahi. Yama towe yananabone, yama siri kiti awirihi, sabado awirihi ni‑ya yama towe yanana, yama amosabisaboneni.

²¹Yama towe koboniya, dai‑ya mai kako nafeboneni. Dai‑ya mai bisi, dai‑ya mai nanahaba naboneni. Adaho nowati‑ya haa‑nima yama ni awisarani, yama nabone kitabisaboneni. Deoso‑ka dai toha dai‑ya mai kako bi‑bidi namaro, dai‑ya mai kako kiti nafibisaboneni. Haa‑nima yamana, kobonamatasateraboneni.

²²Haa‑nima yama niya, yama nahoraboneni. Deoso yama‑ya maakare‑mana, dai nafi aba neni. Yama towe‑ya Deoso maakanebonane, hika mai one hasinabonehe.

²³Dai‑ya mai keyehebone,

‘Deoso‑ka Ka‑kadika kobone. Ahiyata sawine.’ Mai one ati nihi,

‘Deoso‑ka Ka‑kadika tabora one‑ya sawine.’ Mai one ati nihi naboneni.”

Haa‑nima mai ati na, mai ati dai nofariyahi.

²⁴‘Deoso‑ka Ka‑kadika ama·oni.’ Mai one ati naboneni, keyehe‑ya mai hirinaro.

‘Deoso ati‑ya mi‑mita ama·oni.’ Mai one ati nihi naboneni.

Mai ihi kiti nafeboneni, Deoso‑ka dai toha, mai‑ka keyehe‑ya dai nofabonehe.

²⁵Yama tamine okamina, fara koboniya, yama‑ya dai watowahaboneni.

²⁶‘Deoso‑ka Ka‑kadika kabani‑ya waine.’ Mai ati niya,

mai ati dai nofariyahi. Dai tokariyahi.

‘Deoso‑ka Ka‑kadika yobe doro‑ya sawine.’ Mai ati niya, mai ati dai nofariyahi.

²⁷Bahi yebekane ai nafi awateni. Bahi yebekane‑nima dai‑ka Ayo neme‑ke kakine, dai nafi awaboneni.

²⁸Bani bate home‑ya boko mai toka, bani bate dai watoteni. Fara‑nima dai‑ka Ayo neme‑ke kamataseya, dai nafi watowahaboneni.

²⁹Dai‑ya mai bisina mai amoni tosiyoya, mahi wehene fawa, abariko wehene fawa, amowa mai dama bofe‑ya mai fororo, neme‑kaya yama nafi wawawakana naboneni.

³⁰Haa‑nima yamana yananiya, neme‑ya dai‑ka Ayo neme‑ke fodomakibona, mai nafi ohinawahaboneni. Dai‑ka Ayo neme‑ke‑ya mai awabone, neme sabi‑ya kisameya, wehene nafibonane. Ene kitebonane.

³¹Deoso‑ka yo‑yose mai one‑ya yosebonane, hika mai‑ya mai yababonehe. Ho‑hori ati yananiya, wami nafi‑kaya mai wi‑wina Deoso‑ka mai toha mai‑ya mai yorotokanaboneni.

³²24:32 Mai tabori‑ya yama siri‑ya awa afe aba, yama hiwe koboni yanatoniya, afe yanamatasateni.Dai‑ya okanawataboneni. Fiko ai awiya, ini fahi kobonama, afe yanama, yama hiwe kakebone ai watoteni.

³³Owati‑nima yama niya, dai‑ka Ayo neme‑ke koboni yanatone, kobo kanibote nebonane.

³⁴Owati amosa dai mitahi. Owati‑nima yama yanana‑ya mai awiya, mai one hasinasa niya, dai‑ka Ayo neme‑ke kobonebonane.

³⁵Owati‑nima yama naboneni. Neme, bofe na, ababisabone, owati‑ta abateraboneni.” Yeso ati nemarine.

Yeso amoni ai watora

³⁶“Dai‑ka Ayo neme‑ke amoni, hika ora ne dai watorihi, Deoso‑ka yo‑yose neme‑ya mai sawe, mai hiwatorihi, Deoso Bidi hini amoni‑ya watorihi nane. Okobi ohari hiwatobisineni.

³⁷Dai‑ka Ayo neme‑ke kamataseya, Nowe sawimata‑ka yama‑nima yama na yananamatasaboneni.

³⁸Faha kimisi awisari‑ya Nowe ati‑ya mai tokadabara, hiniya mai tafa, kawi‑ya mai fawa, mai fana mai na, mai ihi towe tohanasa niya, kanawa dori‑ya Nowe tokiyomematamonane.

³⁹Yama‑ya mai wato awisari‑ya faha kakiwaha, mai abawahametemoneni. Fara‑nima, yama‑ya mai wato awisari‑ya dai‑ka Ayo neme‑ke kobonamatasebonane.

⁴⁰Awa‑ya mai fama mai anina, okomiya, ohari owakame, owa‑ta towakosebonane.

⁴¹Kimi‑ya mai fanawi fama tooniya, okomiya, ohare owakama, ohare towitakosa naboneni.

⁴²Dai noko wadahi. Dai‑ka hidi amoni dai watorani.

⁴³Ai‑ka yama‑ya botibona‑ka ora tamine‑ya ai mita, ai noko wadaboneni, ai‑ka yama‑ya botirebonaha.

⁴⁴Dai noko wadahi. Dai‑ka Ayo neme‑ke kobonebona, dai one nimahinamareya, kobonebonane.

⁴⁵Owati dai mitahi. Hidi‑ka yo‑yose mai dama, hika yo‑yose ohari yama‑ya watone, hidi ati‑ya tokadabi amose, hidi ati ene mai one‑ka hidi tohawahebonane, mai‑ya natafebonaha.

⁴⁶Hidi koboneya, hidi ati‑nima ene ne, ya‑yainebonane.

⁴⁷Owati amosa dai mitahi. Yama dama‑ya hidi daanebonane, hinawadabonehe.

⁴⁸Hidi‑ka yo‑yose towe toheya, hidi‑ya nimani nafi,

‘Oka hidi kama kanibote re, kama kanibote ni awirebonane.’ Hika yo‑yose atibodi ati ne,

⁴⁹mai one‑ya bisi, kawi‑ya mai fawa mai‑ya daba neya,

⁵⁰hidi kama kanibote nebonane. Hika mahi, hika ora ne‑ya hika yo‑yose wato awirebonane.

⁵¹Hidi kobonameya, hika yo‑yose towe‑ya bisini kitebonane. Deoso ati‑ya mai tokadabara mai sawi‑kaya hinawaibonane. Mai ohi, mai kome kita naboneni.” Yeso ati nemarine.

Atona mai 10 kana

¹“Neme‑ke ai nafi‑ka hidi kitabote tohawahebona tamine ohiyaramatasaboneni. Atona mai 10 kana nabarina‑ya mai akineni, mai‑ka naki fanabone maki‑ya mai nimanabonehe.

²Atona mai 5 kana yama‑ya mai wato, atona mai one 5 kana yama‑ya mai watorani.

³Yama‑ya mai watora nabarina‑ya mai aka, nabarina fahi one‑ya mai damakarani.

⁴Yama‑ya mai watobisa nabarina fahi one‑ya mai damakaneni.

⁵Maki mai nimahine, kama kanibote re, nokobisa ihi mai amoneni.

⁶Yama soki bai‑ya ati yanane,

‘Maki fanebona kaki, dai awaho.’ Ati nene.

⁷Mai nafi dodafe, mai‑ka nabarina bafiri‑ya mai sobanimisa,

⁸yama‑ya mai wa‑wato nabarina fahi‑ya mai soroneni. Yama‑ya mai watora mai‑ka nabarina fahi wadara, mai one‑ka nabarina fahi kote‑ya mai haana,

‘Oda‑ka nabarina fahi‑ba dai daanahi. Oda‑ka nabarina owi yanatoneni.’ Mai ati nani.

⁹‘Nabarina fahi oda daani awiraboneni. Oda‑ka nabarina fahi tosiyoriyahi. Nabarina fahi‑ya mai da‑daa mai‑ya dai tokahi. Nabarina fahi dai kanikiyahi.’ Yama‑ya mai wa‑wato mai ati nani.

¹⁰Nabarina fahi‑ya mai kanikabone mai toka, mai nowati‑ya maki kobone, mai hawa toha‑ta yobe‑ya mai tokiyoma, nokobi‑ya barikawame, mai tafineni.

¹¹Makobote nabarina fahi‑ya mai kanika mai kamake,

‘Anihi, anihi, nokobi seetikanahi.’ Mai ati neni.

¹²‘Owati amosa dai mitahi. Dai owato awirini.’ Maki ati nebonane.

¹³Dai noko wadahi. Dai‑ka Ayo neme‑ke kobonebona, hika amoni, ora ne dai wato awirane.” Yeso ati nemarine.

Yinero da‑daa

¹⁴Yeso oda‑ya kanawatobona, oda‑ya hiyare,

“Neme‑ke ai nafi‑ka hidi kitabote tohawahebona tamine dai mitamatasahi. Ai owa ati ene hika yo‑yose mai yorotokana, mai‑ya hiyare,

‘Okabone, oka yama dai nawadahi.’ Maki ati nane.

¹⁵Hika yo‑yose owa yama‑ya wato nafi‑ya yinero webote 5 kane‑ya daanane. Hika yo‑yose owa‑ka yinero webote fame‑ya daanane. Hika yo‑yose owa yama‑ya wato nafire, yinero webote ohari‑ya daane,

‘Oka yinero dai nawadahi, yinero dodamebonaha.’ Yinero hidi ati ne, tokawahane.

¹⁶Yinero webote 5 kane‑ya kayafe yama‑ya kanike, yama‑ya daanamaki, haa‑nima ne hika yinero webote 5 kanamaki‑ya kayafane.

¹⁷Yinero webote fame‑ya kayafe yama‑ya kanike, yama‑ya daanamaki, haa‑nima ne hika yinero webote famamaki‑ya kayafane.

¹⁸Yinero webote ohari‑ya kayafe toke, hodi‑ya wiine, hidi‑ka yinero‑ya kemone.

¹⁹Amoni dame‑ya mai‑ka hidi kamatasane, hika yinero tamine‑ya mitebonaha.

²⁰Hibati‑ya yinero webote 5 kane‑ya kayafe kame, yinero webote 10 kane‑ya damane,

‘Ayo, tika yinero 5 kane daatinemari, yinero webote 10 kane tohawahane.’ Ati nane.

²¹‘Tiwa ene amosa, owati‑nima tiwa ene na, hibati‑ya tika yama bide daa·onamaro, owati‑nima tina, tika yama dama‑ba daa·onaboneni. Ya‑yai·ona, ya‑yaitinaharihi.’ Yinero hidi ati nane.

²²Hibati‑ya yinero webote fame‑ya kayafe kame,

‘Ayo, oka yinero webote fame‑bona daatinamaro, yinero webote 4 kane tohawahane.’ Ati nane.

²³‘Tiwa ene amosa, owati‑nima tiwa ene na, hibati‑ya tika yama bide daa·onamaro, owati‑nima tina, tika yama dama‑ba daa·onaboneni. Ya‑yai·ona, ya‑yaitinaharihi.’ Yinero hidi ati nane.

²⁴Hibati‑ya yinero webote ohari‑ya kayafe kame,

‘Ayo, tiwa ene amosi awira, awa‑ya anitira, yamata marafakaniya, yamata tikayafateni.

²⁵Tika yinero ani·one, dodameya, yinero nafi tikayafaba awineni, owatibodi ati na, tika yinero okahemamaro, wami hodi‑ya. Hibayata wii·oni. Hibaha, tikayahamatasahi.’ Ati nane.

²⁶‘Towe amatini, refo tiharo. Oka yo‑yose‑ka yinero okayafamone tina,

²⁷bahako‑ya oka yinero daatina‑mani, okomiya, mai‑ka yinero kote okayafabisa neni.’ Yinero hidi ati nane.

²⁸25:14-30 Tamine yokana timitahi. Yeso‑ka yama anini‑ya ai anina, yama amosineni. Yeso kamataseya, ya‑yaine, ai ene manakone‑ya daanebonane. Yeso‑ka yama anini‑ya mai nofara, Yeso kamataseya, mai‑ya weenebonane.Hidi, hika yo‑yose mai one‑ya hiyare,

‘Yinero webote ohari dai kayafe, yinero webote 10 kani‑ya kihe‑ya dai daanahi.

²⁹Hika yama toha, hika yama one daa·ona, yama nafi tohaboneni. Hika yama awira, oka yama‑ya damanamaterebonane.

³⁰Yama‑ya anire dai korotowitiho, yama soki nafe‑kaya mai ohinabone, mai kome kitaboneni.’ Hidi ati nane.” Yeso ati nemarine.

Mai nafi ihi‑ya kadikebonane

³¹“Dai‑ka Ayo neme‑ke Deoso‑ka yo‑yose mai eyehe kamataseya, wehene nafi, hidi webote tohawahebonane.

³²Bofe‑ke dai toha dai‑ka Ayo neme‑ke noko‑ya dai nafi yorotokanaboneni. Dai atibodi‑ya kadikeya, dai ene‑nima dai ene na‑ya haanebonane.

³³Ati dai one hikadabemari hika kanika‑ya mai nahaboneni. Ati dai one hikadabaremari hika sayo‑kaya mai naho naboneni.

³⁴Hidi webote‑ka kanika‑ya mai naha mai‑ya hiyarebona,

‘Okobi dai‑ya nofi nafine, dai nafi‑ka hidi kitabote ohawaha, owa‑ya dai sawiwahaboneni. Hibati‑ya yama nafi‑ya wamani awisareya, dai‑ya okayawamaroni.

³⁵Hibati‑ya ofime, owa tefe‑bone‑ya dai daa, owa bako hoka, oka faha‑bone‑ya dai daana, owa‑ya dai watora, dai‑ka yobe‑ya owa‑ya dai amonihi,

³⁶oka bora wadara, oka bora‑bone‑ya dai daa, kiya·ona, owa‑ya dai yobikana, kadeya‑ya ofoya, owa‑ya dai yobikana namaroni.’ Ati nebonane.

³⁷Deoso ati‑ya mai tokadabamaro mai ati yananaboneni.

‘Oda‑ka hidi amatini. Tifime, tiwa oda awara, tiwa tefe‑bone oda daani awirihi, tiwa bako hoka, tiwa oda awara, tika faha‑bone oda daani awirihi,

³⁸oda‑ka yobe‑ya amotirihi. Tika bora aba, tiwa oda awara, tika bora‑ba oda daarihi,

³⁹Tiwa kiyani tamine oda mitara, kadeya‑ya tifoya tiwa tamine oda mitara, tiwa oda yobikani awirihi namaroni.’ Mai ati naboneni.

⁴⁰Hidi webote mai‑ya hiyarebona,

‘Owati amosa dai mitahi. Oka mai one dai kasoma, owa‑ya dai kasomaharemaroni.’ Ati nebonane.

⁴¹Sayo‑kaya mai naha mai‑ya hiyaramakine,

‘Towe dai amani. Owa‑ya dai sawirabone, yama hirini fawaterabone‑kaya dai tokabisahi. Yama hirini fawaterabone‑ya Deoso wamane, Diaboro hika yo‑yose mai eyehe‑ya sarikanebonaha.

⁴²Hibati‑ya ofime, owa tefe‑bone‑ya dai daarihi, owa bako hoka, oka faha‑bone‑ya dai daarihi,

⁴³dai tabaro‑ya oka, dai‑ka yobe‑ya owa‑ya dai nawinarihi, oka bora awira, oka bora‑bone‑ya dai daarihi, kiya·ona, kadeya‑ya ofoya ona, owa‑ya dai yobikarihi namaroni.’ Ati nebonane.

⁴⁴Sayo‑kaya mai naha mai ati yananabone,

‘Oda‑ka hidi amatini. Tifime tiwa oda awarihi, tiwa bako hoka, tiwa tamine oda mitarihi, tika bora awira tamine oda mitarihi, kiya tina, tiwa tamine oda mitarihi, kadeya‑ya tifoya, tiwa tamine oda mitarihi namaroni.’ Mai ati naboneni.

⁴⁵‘Owati amosa dai mitahi. Oka mai one dai kasomara, owa‑ya dai kasomahariramaroni.’ Ati nebonane.

⁴⁶Mai ihi amosara mai toka, mai kome fawateraboneni. Mai atibodi amosa mai abaterabone‑kaya mai tokaboneni.” Yeso ati nemarine.

Yeso‑ya mai watabone

¹Yama nabone tamine‑ya hiyari hawa tohe, Yeso‑ya oda da‑daba oda‑ya hiyaramatase,

²“Ai amoni fami‑ya ka‑kariwa‑ya ai marinabone, dai‑ka Ayo neme‑ke‑ya mai daanaboneni, mai baahikanebonaha.” Ati nemarine.

³Kaifo Deoso‑ka yama‑bone‑ya mai da‑daa mai‑ka hidi webote amane. Deoso‑ka yama‑bone‑ya mai da‑daa mai‑ka hidi mai toha, Yodeo mai‑ka hidi mai bi‑bidi na mai toha na, Kaifo‑ka yobe fowari barikane doro‑ya mai yorotokanamaroni.

⁴Yeso‑ya mai kaka, mai awiri‑kaya Yeso‑ya mai wataboneni, Yeso‑ya mai nanahababonehe.

⁵“Ai marinasa niya Yeso‑ya ai watiya, mai dama mai yawaba awineni. Ai marini hawa tohiya, Yeso ai wataboneni.” Mai ati namaroni.

Yeso tati‑ya fana sorokare

⁶Simaho hibati‑ya mese towe tohemari, kitamemarine. Betaniya‑kaya Simaho‑ka yobe‑ya mai tafiya,

⁷yama mahi amosa‑ya fana damakana, kamakemaroni. Yama mahi amosa manakone nafe, yati amosa wamani‑ya wiye toha, Yeso tati‑ya sorohikanaremaroni.

⁸Yama mahi amosa sorokari‑ya oda awa, oda yawa,

“Hini yamata‑bone yama mahi amosa‑ya Yeso tati‑ya fana sorokariti? Yama mahi amosa manakone fotateni.” Oda ati namaroni.

⁹“Yama mahi amosa manakone fota, Yeso tati‑ya sorotikanarira‑mani, oda‑ya daatibisiya, mai one‑ya oda daaniya, manakone oda waratokaniya, yinero‑ya mai kihara mai‑ya yinero oda daaniya, yama sibabisara neni.” Oda ati namaroni.

¹⁰Oda ati‑ya Yeso mite,

“Dai ati fawanahi. Fana ihi amosineni.

¹¹Yamata mai kihara dai‑ya mai sawiteni. Dai‑ya mai sawe, mai sawi fawateraboneni. Owa‑ta owa sawi yaboraboneni.

¹²Ai abiya, ai abo‑ya yama mahi amosa‑ya dai sorokariteni. O·ababone, owa‑ya fana sorokari dai tohineni.

¹³Owati amosa dai mitahi. Yama nafi‑kaya Deoso ati amosabote tamine‑ya mai hiyariya, fana ihi amosa tamine‑ya mai hiyarahareboneni.” Yeso ati nemarine.

Yeso manakone‑bone‑ya Yoda kayafe

¹⁴Yeso‑ka oda 12 kana oda‑ka owa i‑di Yoda Isikari·oti amane. Deoso‑ka yama‑bone‑ya mai da‑daa mai‑ka hidi mai‑ya i‑di Yoda Isikari·oti tokematane.

¹⁵“Yeso dai‑ya daa·onibone, hini yamata‑ya owa‑ya dai daanibati?” Yoda ati nematane.

Barata wamani 30 kane‑ya mai kadika, Yoda‑ya mai daahinematane.

¹⁶Yoda toke,

“Mai dama mai awiri‑kaya Yeso daa·onaboneni.” Yoda atibodi ati nematane.

Yeso tafi faina‑bona

¹⁷Ka‑kariwa‑ka semana‑ya baho femeto‑ya ketehera‑ya Yodeo mai kabateni. Ka‑kariwa‑ka mahi daidi‑ya Yeso‑ya oda da‑daba oda one ati yanana,

“Ebeni‑kaya ai marinibati? Ai tefe‑ba oda aninabonehe.” Mai ati namaroni.

¹⁸Yeso ati yanane,

“Maki dai awiya, hika yobe‑ya dai tokiya,

‘Ai‑ya ka‑kanawato‑ka mahi kobonemona ati nene. Tika yobe‑ya ai‑ya ka‑kanawato oda eyehe tafebona, kaneiro bidi oda tabasinaboneni.’ Dai ati nahi.” Yeso ati nemarine.

¹⁹Yeso ati‑nima mai na, ka‑kariwa‑ka yamata‑bone‑ya mai aninamaroni.

²⁰Mahi bidi‑ya oda 12 kana oda eyehe Yeso tafemarine.

²¹Oda tafiya, Yeso ati yanane,

“Owati amosa dai mitahi. Owa‑ya dai‑ka owa daanebonane.” Yeso ati nemarine.

²²Yeso ati‑ya oda mita, oda atibodi a‑arira, oda ati yanana,

“Ayo, owa tohi awiraba awineni.” Oda nafi ati namaroni.

²³“Dai‑ka owa ohari owa‑ya daanebona, yama wiye ohare‑ya owa eyehe tafane.

²⁴Dai‑ka Ayo neme‑ke abebona yama hani ati na, fara yama hani ati‑nima abebonane. Owa‑ya kahabane‑ka ene towe manakone nafi bonane. Ka! Wadare‑mana, yama amosabisa neni.” Yeso ati nemarine.

²⁵Yoda Isikari·oti Yeso‑ya kahabanebona, ati yanane,

“Ai‑ka Ka‑kanawato webote amatini. Owa tamine tohi awiraba awineni.” Ati ne,

“Fara tiwa amani.” Yeso ati nemarine.

²⁶Mai tafa, baho‑ya Yeso damane, Deoso‑ya hiyare, baho‑ya bakanakose, Yeso‑ya oda da‑daba oda‑ya baho‑ya daane, ati yanane,

“Dai kabahi, owa abano tamine‑bone amani.” Yeso ati nemarine.

²⁷26:27 Hibati‑ka fino kitara‑ya mai fawa, mai towe tohi awirameteni.Makobote keneko‑ya fino‑ya Yeso damakane, Deoso‑ya hiyare, hiyari hawa tohe, keneko‑ka fino‑ya oda‑ya daakane,

“Dai nafi hifihi.

²⁸Owa emene tamine‑bone amani. Owa emene tokabone, o·ababone, mai dama mai ihi manakone onahababoneni.” Yeso ati nemarine.

²⁹Yeso ati yananamatase,

“Owati dai mitahi. Okobi ai nafi‑ka hidi kitabote tohawahebona, yanani awisareya, awa bono fahi ofimaterabone, yananeya, awa bono fahi wamani yati dai eyehe ofimatasaboneni.” Yeso ati nemarine.

³⁰Deoso‑ka wayoma ohare‑ya oda hirina, makobote Orifera adami‑kaya oda tokawahamaroni.

“Yeso owatorini.” Bedoro ati nebona

³¹“Owa‑ya kobonabone dai awiya, dai kananaboneni. Owa‑ya dai dabamaraboneni. Deoso‑ka yama hani ati‑nima yama nabone,

‘Kaneiro mai‑ya na‑nawada onahabiya, kaneiro mai kananaboneni.’ Deoso‑ka yama hani ati nineni.

³²Okitamiya, Karireya‑kaya okabone, owa‑kaya dai tokomakiyahi.” Yeso ati nemarine.

³³“Ayo, mai kananibisaba awineni. Owa‑ta kana·oteraboneni.” Bedoro ati nemarine.

³⁴26:34 Arakawa haani ora tamine tohe awane. Hibati‑ya mai‑ka herosa wadare, sidadi webote‑ya maki ohari ora‑ya midikane, yama soki bai‑ya, mahi nokorise‑ya ho‑hori‑ya afone, yama wahi yanatoni‑ya ho‑hori‑ya afonamatasatene. Fara yama wahi yanatoni‑ka ho‑hori tamine toha awini.“Bedoro, owati amosa timitahi. Owa‑ya tiwatoramone tinabone, tiwati yanani 3 kanabone, makobote arakawa haanebonane.” Yeso ati nemarine.

³⁵“Ai fama, ai ababa awineni. O·abi‑ya yama sibaraboneni.

‘Yeso owatorini.’ Oteraboneni.” Bedoro ati nemarine.

Haa‑nima oda nafi ati namaroni.

Kesemani‑kaya Deoso‑ya Yeso hiyare

³⁶Kesemani‑kaya oda toka, Yeso‑ya oda da‑daba oda‑ya hiyare,

“A‑ahi‑ya dai nahohi. Ahiyata‑ya okaboneni, Deoso‑ya ohiyarabonehe.” Yeso ati nemarine.

³⁷Bedoro, Sebedeo bidi mai fama, mai na, mai‑ya Yeso himane, ahiyata‑ya mai tokamaroni. Yeso atibodi a‑arire, atibodi ohini kitawahemarine.

³⁸Mai‑ya Yeso hiyare,

“Owatibodi yawi kitini, fara yawa ihi o·abi yanatoneni. A‑ahi‑ya dai naha, dai noko wadahi.” Yeso ati nemarine.

³⁹Ahiyata‑ya Yeso toke, hini home‑ya hini tamine‑ya Deoso‑ya hiyare,

“Abi, yama towe yananabone, yama kobonabone onofarini. Owati‑nima yama riyahi. Hini tiwati‑nima yama nibisiyahi.” Yeso ati nemarine.

⁴⁰Yeso waamisame, kame, hika mai amona, Bedoro‑ya hiyare,

“‘Dai noko wadahi.’ Ona,

hiniya dai amoneni. Ora ohari awisareya, hiniya dai amoneni.

⁴¹Dai noko wadahi. Deoso‑ya dai hiyarahi, Satanasi ati‑ya dai tokadabarabonehe. Dai atibodi amosa, dai abano kitarani.” Yeso ati nemarine.

⁴²Ahiyata‑ya Yeso tokomatase, Deoso‑ya hiyare,

“Abi, mai ihi manakone owa nanahabi awiriya, mai ihi manakone fawaterabone tiniya, Tiwati‑nima onaboneni.” Yeso ati nemarine.

⁴³Yeso kamatase, nokobisa ihi mai amonamatasamaroni.

⁴⁴Yeso tokomatase, yama abiya nofare, hini tamine‑ya Deoso‑ya hiyaramatasemarine.

^45-46Yeso kamatase, mai amonasa na,

“Dai nahomisamahi. Ai tokomahi. Yama one‑ya dai amonaboneni. Hibayata Deoso ati‑ya mai tokadabara mai‑ya owa‑ya daanebona kamane, ahiyata‑ya.” Yeso ati nemarine.

Yeso‑ya mai wata

⁴⁷Yeso hiyaranasa neya, oda 12 kana oda‑ka owa i‑di Yoda‑ya mai dama mai eyehe kamemarine. Deoso‑ka yama‑bone‑ya mai da‑daa mai‑ka hidi mai toha, Yodeo mai‑ka hidi mai bi‑bidi na mai toha na, mai ati ihi Yoda‑ya mai dami sawemaroni. Yima‑ya mai one aka, awa‑ya mai one aka namaroni.

⁴⁸Hibati‑ya Yoda mai‑ya hiyare,

“Yeso‑ya dai‑ya yofi·okanabone, Yeso toma·onabone, fare dai waratonayaho.” Yoda ati nematane.

⁴⁹Yeso‑ya Yoda kame,

“Ayo, kobo·onamini.” Ati ne, fai‑ya tomanemarine.

⁵⁰“Naki, tiwa ene‑bone tina kanibote tinahi.” Yeso ati nemarine.

Yeso‑ya mai waratonamaroni, fai‑ya mai towakamabonehe.

⁵¹Yeso‑ya oda daba, oda‑ka ohari yima‑ya nawaane, yima‑ya sobanaki, Deoso‑ka yama‑bone‑ya mai da‑daa mai‑ka hidi webote‑ya na‑narifa narabo‑ya tarinabasemarine.

⁵²“Tika yima foyamahi, hini bori‑ya. Mai one‑ya yima‑ya mai nanahabiya, yima ihi mai abahariteni.

⁵³Tiwa habo siitoriyahi. Okobi haa·ona‑mani, hika yo‑yose 6.000 mai yorotokana, mai one 6.000 mai yorotokana, mai one 6.000 mai yorotokana, mai yorotokana 12 mai kana owa‑ya mai kasoma neni.

⁵⁴Owa‑ya mai watabone, Deoso‑ka yama hani ati na, fara ihi owa‑ya mai watineni.” Yeso ati nemarine.

⁵⁵Mai dama, mai sawe, mai‑ya Yeso hiyare,

“Yima‑ya dai aka, awa‑ya dai aka nineni, owa‑ya dai watabonehe. Yama‑ya mai bo‑boti mai wati‑nima owa‑ya dai watineni. Hibati‑ya mahi‑nima Deoso‑ka yobe‑ya owitare, mai okanawata, owa‑ya dai wataramaroni.

⁵⁶Deoso‑ka yama hani ati‑nima yama nawahabone, owa‑ya dai watineni.” Yeso ati nemarine.

Yeso‑ya oda da‑daba oda habo siitona, oda kananamaroni.

Yeso‑ya mai weena

⁵⁷Yeso‑ya mai waratona, Yeso‑ya mai towakamameteni, Kaifo‑ya. Kaifo Deoso‑ka yama‑bone‑ya mai da‑daa mai‑ka hidi webote amane. Kaifo tabaro‑ya Deoso‑ka yama‑bone‑ya mai da‑daa mai‑ka hidi mai toha, Mose‑ka yama hani ati‑ya mai ka‑kamina mai toha, Yodeo mai‑ka hidi mai bi‑bidi na mai toha na, mai‑ka hidi webote tabaro‑ya mai yorotokanameteni.

⁵⁸Yama yaki‑ya Bedoro yoto, Deoso‑ka yama‑bone‑ya mai da‑daa mai‑ka hidi webote‑ka yobe fowari barikane doro‑ya tokomaki, sekorasa eyehe itabase, Yeso tamine‑ya mitebona,

“Hini yamata‑nima mai naba, Yeso‑ya mai wata?” Bedoro atibodi ati nematane.

⁵⁹Deoso‑ka yama‑bone‑ya mai da‑daa mai‑ka hidi mai toha, Yodeo mai‑ka hidi mai one nafi toha na, mai yorotokanameteni. Yeso tamine‑mona‑ya keyehe‑ya mai hirinabone, hidi hini mai one‑ya mai keyehebone, mai one‑ya mai sibanameteni, Yeso‑ya mai nanahababonehe.

⁶⁰Yeso tamine‑mona‑ya mai dama keyehe‑ya mai hirina, owa ati bare toha, owa ati bare toha, owa ati bare toha, mai nameteni, keyehe‑ya mai hirinaro. Makobote mai one fama keyehe‑ya mai hirinamake,

⁶¹“‘Deoso‑ka yobe‑ya onahabiya, mahi 3 kane‑ya yobe wama·onamatasaboneni.’ Yeso ati nene.” Mai ati nameteni.

⁶²Deoso‑ka yama‑bone‑ya mai da‑daa mai‑ka hidi webote waamise,

“Yeso, mai ati timitineni? Hini yamata‑nima tiwati nibati?” Ati ne,

⁶³Yeso ati yanare,

“Yeso, Deoso yokana tiwa‑ya watone, tiwati yananahi. Deoso‑ka Ka‑kadika amatiraniha? Deoso Bidi amatini?” Mai‑ka hidi webote ati nematane.

⁶⁴“Hehe, tiwati‑nima, fara ama·oni. Deoso mano kanika‑ya owitariya, kitabote ohawahiya, owa‑ya dai awa kanibote naboneni.” Yeso ati nematane.

⁶⁵Yeso ati‑ya mai‑ka hidi webote mite, yawe, hika bora namidi‑ya sibikari, ati yanane,

“Yeso hini ati ene abaho. Mai one ati hini tohiya, Deoso Bidi‑mona ati ne, keyehe‑ya hirinane. Haa‑nima mai ati na, mai‑ya ai nanahabateni.

⁶⁶Hini yamata‑nima dai ati niti?” Mai‑ka hidi webote ati ne,

“Yeso towe amane. Abaho!” Mai ati nameteni.

⁶⁷Yeso noko‑ya mai firo, noko mai bata, mai one koohinisa hinematane.

⁶⁸“Deoso‑ka Ka‑kadika amatini. Yama nafi tiwata, ebeni‑ke tiwa‑ya koonisa?” Mai ati nameteni.

“Yeso owatorini.” Bedoro ati ne

⁶⁹Yobe fowari barikane doro‑ya mai one dama mai naha mai‑ya Bedoro waiya, hidi webote‑ya atona na‑narifa one kamake,

“Yeso Karireya‑ke‑ya sa‑sawi amatiraniha?” Atona ati nameteni.

⁷⁰Mai nafi narabi‑ya Bedoro ati yanane,

“Maki‑ya osawiterani. Tiwati owatorini.” Bedoro ati nematane.

⁷¹Yobe fowari barikane‑ka nokobi‑kaya toke, wai‑ya hidi webote‑ya na‑narifa one atona Bedoro‑ya awa, mai one‑ya hiyara,

“Nokobi‑kaya wai Yeso Nasare‑ke‑ya sa‑sawi amane.” Atona ati nameteni.

⁷²“Keyehe‑ya hiri·oterani. Keyehe‑ya hiri·oniya, Deoso owa‑ya nanahabe awane. Yeso owatoterani.” Bedoro ati nematane.

⁷³Mai naho bide tohiya, yobe fowari barikane doro‑ya mai naha Bedoro‑ya mai hiyara,

“Yeso‑ya mai da‑daba mai‑ka owa amatini? Yeso ati yanani‑nima tiwati yananineni.” Mai ati nameteni.

⁷⁴“Keyehe‑ya hiri·oterani. Keyehe‑ya hiri·oniya, Deoso owa‑ya nanahabeba awane. Maki owato awirini.” Bedoro ati nematane.

Bedoro ati fawaneya, arakawa maki haanawahematane.

⁷⁵Arakawa haani‑ya mite, Yeso ati‑ya Bedoro atibodi watinawame,

“Arakawa haani awisareya,

‘Yeso owatorini.’ Tinaboneni.

Tiwati yanani 3 kana boneni.” Yeso ati ne,

ati‑ya Bedoro atibodi watinawame, toke, ohini kitawahematane.

Yoda hini namidi‑ya yaditone

¹Yama wahabisari‑ya Deoso‑ka yama‑bone‑ya mai da‑daa mai‑ka hidi mai toha, Yodeo mai‑ka hidi mai bi‑bidi na mai toha na, mai ibi hiyara,

“Ai ati ene Yeso‑ya mai nanahabahi.” Mai ati nameteni.

²Yeso mano‑ya mai sokikasa, Birato‑ya mai hiwakame, mai daahinematane. Birato kofenado amane.

³Yoda Yeso‑ya hibati‑ya daane, Yeso abebona‑ya awe, atibodi a‑arinamare, barata wamani 30 kane mai daahine‑ya daatonamatasebona, Deoso‑ka yama‑bone‑ya mai da‑daa mai‑ka hidi mai toha, Yodeo mai‑ka hidi mai bi‑bidi na mai toha na, mai‑ya Yoda hiyare,

⁴“Towe ama·oni. Ene towe tohare‑ya daa·obisani.” Yoda ati ne,

“Tiwa ene amani. Oda ene tohi awirani.” Mai ati nameteni.

⁵Deoso‑ka yobe doro‑ya yinero‑ya Yoda korotokawiti, toke, hini namidi‑ya yaditone, abawahematane.

⁶Deoso‑ka yama‑bone‑ya mai da‑daa mai‑ka hidi, yinero‑ya mai yaba, mai ati yanana,

“Ai owa abebona manakone amane. Ai manakone‑ya Deoso kayafaterene.” Mai ati nameteni.

⁷Yoda‑ka yinero‑ya yiwaha wa‑wama‑ka fadara‑ya mai kanikameteni, bara mai aba mai tame bonehe.

⁸Fara ihi “Fadara Ama Kiha” oni tohawaha, oni tohanasa neni.

⁹I‑di Yeremiya Deoso ati‑ya mai mi‑mita‑mete mai‑ka owa amane. I‑di Yeremiya yama‑ya kanahanomata‑nima yama nawaha,

“‘Ai owa manakone barata wamani 30 kanebonane.’ Yodeo mai ati na,

fare‑ya mai daanaboneni.

¹⁰Yiwaha‑ya wa‑wama‑ka fadara‑ya mai kanikaboneni. Deoso owa‑ya yose‑nima mai naboneni.” Yeremiya ati nematane.

Yeso abebona Birato ati ne

¹¹Birato noko‑ya Yeso wai, Yeso‑ya Birato hiyare,

“Yodeo mai‑ka hidi webote amatiraniha?” Ati ne,

“Tiwati‑nima, fara ama·oni.” Yeso ati nematane.

¹²Deoso‑ka yama‑bone‑ya mai da‑daa mai‑ka hidi mai toha, Yodeo mai‑ka hidi mai bi‑bidi na mai toha na, Yeso ene towemona tamine‑ya keyehe‑ya mai hirina, Yeso ati yanarematane.

¹³“Yeso, mai ati timitineni? Tiwa ene yokana tamine tikaminabisahi.” Birato ati nematane.

¹⁴Yeso ati yanare,

“Ka! Hini yamata‑bone Yeso ati yanarihi?” Birato atibodi ati nematane.

¹⁵Ka‑kariwa‑ya oda mariniya, ai owa ohari‑ya Birato seekitine, mai yofihikane‑ya Birato seehikatene.

¹⁶Hibati‑ya Barabasi ene towe dame, kadeya‑ya waimatane.

¹⁷Birato‑ka yobe‑ya mai dama mai yorotokana, mai‑ya hiyare,

“Ebeni‑ke see·okabati? Barabasi toha, Yeso, Deoso‑ka Ka‑kadika‑mona toha nabana?” Birato ati nematane.

¹⁸Mai‑ka hidi mai atibodi ati‑ya i‑di Birato wato, Yeso‑ya mai dama mai nofa, mai ihi Yeso‑ya hidi mai kakoteni.

¹⁹Hidi‑ka kadera‑ya Birato itariya, Birato fadi ati‑ya mai kamina,

“Yeso ene towe tohi awire, weetirayaho. Amo·ona, Yeso wadari oawani, wada ihi owa habo siitoneni.” Birato fadi ati nameteni.

²⁰Deoso‑ka yama‑bone‑ya mai da‑daa mai‑ka hidi mai toha, Yodeo mai‑ka hidi mai bi‑bidi na mai toha na, mai dama mai‑ya hiyare, mai ati ihi Yeso‑ya mai nofara, i‑di Barabasi‑ya mai nofabisameteni.

²¹Mai dami‑ya Birato hiyare,

“Ebeni‑ke see·okabati?” Ati ne,

“Barabasi‑ta.” Mai dami ati nameteni.

²²“Yeso i‑di Deoso‑ka Ka‑kadika‑mona ati ne, hini yamata‑nima obati?” Birato ati nematane.

“Awa‑ya baakanaho.” Mai ati nameteni.

²³“Hini yamata ihi baa·okabati? Ene towe wadarene.” Birato ati nematane.

Hiniya mai ati kitawaha,

“Awa‑ya baakanaho, baakanaho.” Mai ati nameteni.

²⁴Birato ati‑ya mai tokadabara, mai ati hamawahameteni. Faha‑ya Birato haane, hini yehe‑ya sokone,

“Owa ene tohi awirini. Dai ene amani.” Birato ati nematane.

²⁵“Oda ene amani. Oda ati ene tinahabaho. Yeso abe manakone oda‑ya toha, oda‑ka nodi mai‑ya tohahari nebonane.” Mai ati nameteni.

²⁶Birato ati ene Barabasi‑ya mai seekana, Yeso‑ya mai kosina, sodado mai‑ya Birato yosematane, Yeso‑ya mai baakanabonehe.

Yeso‑ya mai hahakana

²⁷Birato‑ka sodado Birato‑ka yobe doro‑ya Yeso‑ya mai towakama, Yeso waiya sodado mai dama mai yorotokanameteni.

²⁸Yeso borone‑ya mai taninisa, hidi‑ka bora a‑asabina‑ya Yeso weyenawahematane.

²⁹Hidi‑ka sabewa‑nima yama na‑bone mado atona‑ya sodado mai kemonama, Yeso tati‑ya mai hiwatare, Yeso yehe kanika‑ya awa bide‑ya mai daana, mai yobati‑kaya mai naha, Yeso‑ya mai yasina,

“Yodeo mai‑ka hidi webote amatini.” Hiniya mai yasina, mai ati nameteni.

³⁰Yeso‑ya mai firona, awa bide damahina‑ya mai waratona, Yeso tati‑ya mai kosinameteni.

³¹Mai yasini hawa toha, hidi‑ka bora‑ya mai taninisama, Yeso hini hika bora‑ya weyenamatase, mai towakamameteni, mai baahikanebonaha.

Yeso‑ya mai baakana

³²Mai tokiya, Simaho Sireni‑ke‑ya mai awa, Sodado mai ati ihi Yeso ewene‑bona‑ya Simaho diwanematane.

³³Kokota‑kaya mai kobona, yara ati‑ya adami oni ‘Ai Tati Tone Wai’ tohani.

³⁴27:34 Sifatari hemedi bida amani.Fino‑ya sifatari daba‑ya mai daanameteni, Yeso hifebonehe. Yeso to‑tomihina, hifi awirameteni.

³⁵Yeso‑ya mai baakana, baakani hawa tohe, Yeso borone‑ya mai kayafabone, yati bide‑ya mai werena, mai kiihinameteni, borone hikayafebonaha.

³⁶Bora kayafi hawa tohiya, mai naha, Yeso‑ya mai kakatomameteni.

³⁷Yama ihi ababone tamine‑ya mai kanahana, Yeso tati neme‑kaya yama hani‑ya mai kanawaanameteni.

“Yeso, Yodeo mai‑ka hidi webote amane.” Yeso tati neme‑kaya yama hani kawana ati namaroni.

³⁸Yama‑ya mai bo‑boti mai fama mai‑ya mai baakanaharimaroni. Yeso mano kanika‑ya owa mai baahikana, Yeso mano sayo‑kaya owa mai baahikana hinemarine.

³⁹Hawi‑ya mai yakana Yeso baakane awa‑ya waane‑ya mai awa, Yeso‑ya mai weena, mai tati weona, mai ati yanana,

⁴⁰“Ka! Deoso‑ka yobe tinahabiya, mahi 3 kane‑ya wamatinamatasebona tina, tiwa‑ya tikasomahi. Deoso Bidi amatini, tikisamahi.” Mai ati namaroni.

⁴¹Deoso‑ka yama‑bone‑ya mai da‑daa mai‑ka hidi mai toha, Mose‑ka yama hani ati‑ya mai ka‑kamina mai toha, Yodeo mai‑ka hidi mai bi‑bidi na mai toha na, Yeso‑ya mai weena,

⁴²“Mai one‑ya kasomemari, hini kasomi‑ya wato awire, ai‑ka wami hidi webote tohemona ati ne, awa‑ya kisameya, ai awiya, ati ai nofamakibonane.

⁴³Deoso ati‑ya nofemona ati ne, Deoso hinakisameba awane. Deoso Bidi‑mona Deoso hikayaweba awane.” Mai ati nameteni.

⁴⁴Yama‑ya mai bo‑boti Yeso eyehe awa‑ya mai mai baahikana, Yeso‑ya mai weenahare, mai one ati‑nima mai ati nameteni.

Yeso abane

⁴⁵Mahi nokorise‑ya mahi wehene fawane, 3 ora‑ya wehene yananamatasemarine.

⁴⁶Fara 3 ora‑ya Yeso ati yanane, ati kite,

“Eri, Eri, rama sabakani.” Yeso ati ne,

Ai ati‑ya

“Oka Deoso amatini. Oka Deoso amatini. Hini yamata ihi owa‑ya tikahabaniti?” Ati nematane.

⁴⁷Mai sawe Yeso ati‑ya mai mita,

“Eriya‑ya haane awane.” Mai ati nameteni.

⁴⁸Yeso ati‑ya maki mite, fino‑kaya kanani tokome, yama kitara‑ya fino kofate‑ya sorokari, awa bide‑ya dasihinakosa, yorihikamisamakemeteni, Yeso hifebonehe.

⁴⁹“Ai nimanaho, Eriya kameba awane, Yeso‑ya kasomebonaha.” Mai one ati nameteni.

⁵⁰Yeso eekane, abawahematane.

⁵¹Deoso‑ka yobe‑ya bora kita winamaro, Yeso abeya, bora tati‑ya kebi yanana, nafi kebemeteni. Wami wawawakana, yati webote one wakakanamaroni.

⁵²Deoso ati‑ya mai nofamete mai tame‑ya seekane, mai one dama mai kitamamaroni.

⁵³27:53 Deoso‑ka sidadi Yerosare tamine amani.Yeso kitame, Deoso‑ka sidadi‑ya mai toka, mai dama mai‑ya awemarine.

⁵⁴Yeso abeya wami wawawakana, mahi wehene fawa ne‑ya sodado mai awa, mai habi siitonameteni.

“Deoso Bidi amane. Keyehe tohi awirini.” Mai ati nawahameteni.

⁵⁵Ahiyata to‑toha ni‑ya mai fanawi dama nahameteni. Fara hibati‑ya Karireya‑ya Yeso yakaneya mai kasomamaro, Yeso tokeya, mai fanawi tokomakemaroni.

⁵⁶I‑di Mariya Madarena toha, i‑di Yako, i‑di Yose mai‑ka ami i‑di Mariya toha, Sebedeo fadi toha na, mai fanawi one‑ya mai sawemeteni.

Yeso‑ya mai nafoya

⁵⁷Yama soki bide‑ya Yose Arimateya‑ke kamemarine. Yeso ati‑ya Yose nofe, hika yinero damemarine.

⁵⁸Birato‑ya Yose toke, Yeso abo‑ya haanematane, hinafoyebonaha. Birato ati ene Yeso abo‑ya sodado mai daanameteni, Yose‑ya.

⁵⁹Yeso abo‑ya towakame, bora yati‑ya kinihikanematane.

⁶⁰Yose ati ene ai temene‑ka yati hodi‑bone mai wamahinamete, fara‑ya Yeso abo hinafoye, yati webote‑ya horonawame, hodi‑ya barikane, tokomematane.

⁶¹Mariya Madarena, i‑di Mariya, mai fama, Yeso foye‑ya mai kakatomameteni.

Yeso temene‑ya sodado mai naha

⁶²Mahi owa‑ya feriado hawa tohiya, Deoso‑ka yama‑bone‑ya mai da‑daa mai‑ka hidi mai toha, fariseo mai toha na, Birato‑ya mai tokameteni.

⁶³“Naki, Yeso hasinasa neya,

‘O·abiya, mahi 3 tohe‑ya okitamaboneni.’ Yeso ati ne, keyehe‑ya hirinane.

⁶⁴Tiwati ihi Yeso temene‑ya sekorasa mai nahohi. Mahi 3 kaniya, hika mai da‑daba abo mai hibotirayaho. Abo mai hibotiya, Yeso kitamane mai ati naba awineni. Yeso kitamane mai ati niya, yama a‑ariraboneni.” Mai ati nameteni.

⁶⁵“Sibarini, sekorasa mai dai yosehi. Dai ati ene Yeso temene‑ya mai nahohi, Yeso abo‑ya mai botirabonehe.” Birato ati nematane.

⁶⁶Mai toka, nokobi‑ya hidi oni korimari mai nawaanameteni. Nokobi‑kaya sekorasa mai nahameteni.

Yeso kitame

¹Sabado‑ya mai fanawi tokara, Domiko yama wahabisari‑ya Mariya Madarena, Mariya mai fama, Yeso temene‑ya mai towakamameteni.

²Mai yakakaniya, wami wawawakanamaroni. Deoso‑ka yo‑yose neme‑ya kise, yati webote‑ya karotowiti, yati mese‑ya itarimatane.

³Bahi yebekane wehene‑nima Deoso‑ka yo‑yose wehene ne, Deoso‑ka yo‑yose borone sa‑sawani kitematane.

⁴Deoso‑ka yo‑yose‑ya sekorasa mai awa, mai habi siitona, mai wawawakana, mai abakosameteni.

⁵Yeso temene‑ya mai fanawi kobokana, Deoso‑ka yo‑yose mai‑ya hiyare,

“Dai habo siitoriyahi. Yeso mai baahikane dai awebona dai ati na,

⁶haa‑ya awimare, kitame, abo fori‑ke yama dai awahi. Kitamebona ati ne, kitamawahane.

⁷Dai towakama kanibote nahi. Yeso‑ya mai da‑daba mai‑ya dai hiyariyahi.

‘Yeso kitame, Karireya‑kaya tokebona, dai tokomakihi, Yeso dai awabonehe.’ Dai ati niyahi.

Fara owati‑nima yama naboneni.” Ati nematane.

⁸Mai fanawi towaka kanibote na, mai habi siitona, mai ya‑yainaharemeteni. Mai kanani kamameteni, oda‑ya mai hiyarabonehe.

⁹Mai kanani kakama, Yeso mai‑ya kobone, mai‑ya hiyarematane. Yeso‑ya mai awa, Yeso teme‑ya mai damana, Yeso‑ya mai kahiyarameteni.

¹⁰28:10 “Oka soho mai dai hiyariyahi.” Yeso ati ne, hika da‑daba mai‑ya sohonematamonane.“Dai habo siitoriyahi. Oka soho mai dai hiyariyahi. Karireya‑kaya mai tokiyahi. Karireya‑kaya owa‑ya mai awaboneni.” Yeso ati nematane.

Yerosare‑ya sekorasa mai toka

¹¹Hawi‑ya mai fanawi yakana, Yerosare‑ya sekorasa mai one kobona, Deoso‑ka yama‑bone‑ya mai da‑daa mai‑ka hidi mai‑ya yama tamine‑ya mai kaminameteni.

¹²Sekorasa mai ati‑ya mai mita, Yodeo mai‑ka hidi mai bi‑bidi na mai‑ya mai daba, mai yorotokana, mai ibi hiyarameteni. Sekorasa‑ka yinero webote‑bona‑ya mai daanameteni, keyehe‑ya mai hirinabonehe.

¹³“‘Yama soki‑ya oda amoniya, Yeso abo‑ya hika mai da‑daba mai botenini.’ Dai ati nahi.

¹⁴Dai tamine Birato miteya, oda ati ene dai‑ya bisini awirebonane.” Mai ati nameteni.

¹⁵Yinero‑ya sekorasa mai kayafa, Deoso‑ka yama‑bone‑ya mai da‑daa mai‑ka hidi mai ati‑nima mai ati nawahamaroni. Mai ati‑ya Yodeo mai dami mita,

“Yeso abo‑ya hika mai da‑daba mai botenini.” Yodeo mai ati nasa nani.

Owa tamine dai hiyarahi

¹⁶Karireya‑ya oda 11 kana oda tokamaroni. Hibati‑ya adami webote Yeso yofihikana, fara‑ya oda tokamaroni.

¹⁷Yeso oda awa, oda ya‑yaina, oda kahiyaremarine.

“Yeso tohi awire.” Oda one atibodi ati namaroni.

¹⁸Makobote Yeso oda‑ya kobone, oda‑ya hiyare,

“Neme, Bofe na‑ka hidi ohawahineni.

¹⁹Mai tabori dami‑ya dai tokahi. Owa tamine dai hiyarahi. Mai‑ya dai habanirisahi. Okobi, Deoso Bidi, Deoso‑ka Doni ne oni‑ya mai weyenaboneni.

²⁰Owati nafi‑ya dai kanawatohi, owati‑ya mai tokadababonehe. Dai tokiya, dai‑ya osawebone, dai honita tohateraboneni.” Yeso ati nemarine.