ROKA

Roka ati

Yeso tamine okanahanabone

¹Ai one sawi‑kaya yama yanana tamine mai dama mai kanahanamaroni.

²Yeso ene‑ya mai awamaro Yeso ene‑ya mai nokotonihe, ai‑ya mai kanawatowahamaroni.

³Mai ati omita, mai‑ka yama hani okadika, yama owatowahamaroni. Ti·ofiro, tika yama hani‑bone okanahanoneni. Yeso ene tamine okamini amosineni.

⁴Hibati‑ya Yeso tamine timitemari, tosawari awira tiwatowahabone Yeso tamine okamini amosineni.

Yowaho Batita wadebona

⁵Yodeya‑ya mai wi‑wina mai‑ka hidi webote i‑di Erodi tohanasa ne‑ka yama tamine okaminineni. I‑di Sakariya i‑di Abiyasi‑ka nodi tohe, Deoso‑ka yama‑bone‑ya mai da‑daa mai‑ka owa tohematane. Sakariya fadi oni i‑di Isabeo toha, i‑di Araho‑ka nodi tohameteni.

⁶Sakariya fadi‑ya fame mai ihi amosa, Deoso ati‑nima mai ihi nameteni.

⁷Hibati‑ya mai kahiwara, mai‑ka ewe wadare, bote mai tohikimawahameteni.

⁸1:8 Deoso‑ka yama‑bone‑ya mai da‑daa abariko 6 kane‑ya hini mai tabori‑ya yama‑ya mai ani, makobote mahi 7 kane‑ya Deoso‑ka yobe‑ya yama‑ya mai aniteni.I‑di Sakariya hika mai eyehe Deoso‑ka yobe‑ya yama‑ya mai anini‑bone‑ka mai‑ka mahi kobonematane.

⁹Sakariya hika mai eyehe yati bide‑ya werene, mai kiihina, Sakariya oni sone‑ya mai awa, Sakariya‑ya mai yosemeteni, Deoso‑ka yobe‑ya yama mahi amosa‑ya sarikanebonaha.

¹⁰Yama mahi amosa sarikanebonaya, Deoso‑ka yobe nokobiri‑kaya mai dama mai nahokosa, Deoso‑ya mai hiyarameteni.

¹¹Yama mahi amosa‑ya Sakariya anineya, Deoso‑ka yo‑yose fodoki, waane, yama mahi amosa a‑amimi‑ka yama wiye wai‑kaya waimatane.

¹²Deoso‑ka yo‑yose‑ya Sakariya awe, habo siitone, kakomehematane.

¹³Deoso‑ka yo‑yose ati yanane,

“Sakariya, tiwa habo siitoriyahi. Deoso tiwati‑ya mitane, tika yibote i‑di Isabeo naba tohawahabone, bidi wadeya, oni Yowaho tohayaho.

¹⁴Yowaho wadeya, dai ya‑yainaboneni. Yowaho tamine mai himiteya, mai dama mai ya‑yainahareboneni.

¹⁵Yowaho Deoso hiyosewahebona, kawi‑ya fawarihi, fino‑ya fawarihi tebonane. Wadi awisareya, Deoso‑ka Doni sawibonane.

¹⁶Ati ene Isara·eo‑ka nodi Deoso ati‑ya mai nofamatasaboneni.

¹⁷I‑di Eriya ene‑mata‑nima i‑di Yowaho ene namakitasebonane. Mai atibodi‑ya hawa tonihibonane, Deoso‑ya mai nimanabonehe. Yowaho ati ene mai‑ka madehe‑ya mai nofaboneni. Hibati‑ya Deoso ati‑ya mai tokadabaramaro, tika dao ene Deoso ati‑ya mai nofawahaboneni.” Deoso‑ka yo‑yose ati nematane.

¹⁸“Oka yibote oda bote tohikima, hini yamata‑nima tiwa ene nibati, tiwati onofabonehe?” Sakariya ati nematane.

¹⁹“Kabireo ama·oni. Deoso‑kaya osawiteni. Deoso owa‑ya yosene, ati amosabote tiwa‑ya okaminebonaha.

²⁰Owati tinofara, tiwati fawanaboneni. Tika dao wadeya, tiwati yananamatasaboneni. Owati‑nima yama naboneni.” Kabireo ati nematane.

²¹Yobe‑ka nokobi‑ya Sakariya‑ya mai nimana,

“Ka! Hini yamata tohimati, Sakariya kamareri?” Mai atibodi ati nameteni.

²²Sakariya kame, ati‑ba wadamare, hini yehe‑ya mai‑ya hiyarematane.

“Yobe doro‑ya wada‑nima yama na‑ya Sakariya awane.” Mai atibodi ati nameteni.

²³Sakariya‑ka yama anini hawa tohiya, hini tabaro‑ya tokomematane.

²⁴Sakariya amoni fa‑famaraba neya, fadi i‑di Isabeo naba tohawahameteni. Abariko 5 kane‑ya mai one tabori‑ya tokara, hini tamine‑ya kemameteni.

²⁵“Deoso ati ene naba ohawahani. Hibati‑ya naba ohara, owa‑ya mai nofara, Deoso owa‑ya kasome, owa‑ya mai nofawahaboneni.” Isabeo atibodi ati nameteni.

Yeso wadebona

²⁶Isabeo naba tohi‑ke abariko 6 kane‑ya, Kabireo i‑di Deoso hiyose, Nasare Karireya‑ya tokawahematane. Kabireo i‑di Deoso‑ka yo‑yose amane.

²⁷I‑di Mariya Nasare Karireya‑ya wina, maki mai one‑ya siwakarameteni. Mariya i‑di Yose fadi‑bone fai‑ya fami awisarameteni. Yose i‑di Dafi‑ka nodi tohematane.

²⁸I‑di Mariya‑ya Kabireo kobone, fai‑ya hiyare,

“Ya‑yaitinahi. Deoso tiwa‑ya nofe, tiwa‑ya kasomane.” Ati nematane.

²⁹Mariya habi siitona, atibodi yama‑ya dika,

“Hini yamata‑nima yama naba? Deoso owa‑ya nofe, owa‑ya kasomemonane.” Atibodi ati nameteni.

³⁰“Mariya, tiwa habo siitoriyahi. Deoso tiwa kasomi‑ya nofane.” Kabireo ati nematane.

³¹“Owati timitahi. Naba tihabone, tika dao wadeya, oni haatiyaho. Yeso tebonane.

³²1:32 Dafi‑ka nodi hidi kitebona, kiti fawaterebona, Deoso‑ka yama hani ati neni. Fare Yeso tamine amane.Yeso kitatebonane.

‘Deoso kitabote Bidi amane.’ Mai ati teboneni.

Dai‑ka idi i‑di Dafi mai‑ka hidi kitemata, fare‑ka nodi i‑di Yeso tohe, Deoso ene ai nafi‑ka hidi tebonane.

³³Yako‑ka nodi dai toha, dai‑ka hidi oharitebona, kiti fawaterebonane.” Kabireo ati nematane.

³⁴“Naba ohabone, hini yamata ihi naba ohibati? Maki owa‑ya ahaterene.” Mariya ati na,

³⁵“Deoso‑ka Doni tiwa‑ya sawibona, Deoso ene kitabote ati ene naba tihaboneni. Deoso Bidi wadeya, mai awiya,

‘Deoso Bidi amane.’ Mai ati naboneni.

³⁶Tika naki i‑di Isabeo bote toha, naba tohaterabone, mai ati na, abariko 6 kane‑ya naba tohawahineni.

³⁷Deoso ene kitabote amane. Yama nafi‑ya watone.” Kabireo ati nematane.

³⁸“Deoso‑ya na‑narifa ama·oni. Tiwati‑nima yama nahi.” Mariya ati na,

Deoso‑ka yo‑yose tokomematane.

Isabeo tabori‑ya Mariya toka

³⁹Makobote Yodeya‑ka adami fota dama‑kaya i‑di Isabeo tabori‑ya Mariya toka kanibote nameteni.

⁴⁰Sakariya‑ka yobe‑ya Mariya tokiyoma, i‑di Isabeo‑ya hiyarameteni.

⁴¹Mariya ati‑ya i‑di Isabeo mita, fai dori‑ya foye ya‑yaine, tainematane. Deoso‑ka Doni ati ene

⁴²i‑di Isabeo ati kita,

“Mariya ya‑yaitinahi. Mai fanawi one‑ya Deoso kasomi bi‑bidi, tiwa‑ya kasomi nafi, tika dao‑ya kasoma nane.

⁴³Amosabote ama·ora, oka Hidi webote madi owa tabaro‑ya kobona, ya‑yai·oneni.

⁴⁴Tiwati omita, ewe ya‑yaine, owa nabadi‑ya tainane.

⁴⁵Mariya ya‑yaitinahi. Naba tihi awisari‑ya Deoso ati‑ya tinofamaroni.” Isabeo ati nameteni.

Mariya ati

⁴⁶Mariya ati yanana,

“‘Deoso amosabote amane.’ Owatibodi ati nineni.

⁴⁷Deoso owa‑ya kasome ene ya‑yai·oneni.

⁴⁸Deoso‑ya na‑narifa ama·oni. Owa‑ya mai nofara, Deoso owa‑ya nofe, Deoso ati ene owa tamine‑ya mai hiyarabone,

‘Mariya Deoso hinofi nofani.’ Mai ati nabone,

‘Mariya Deoso hinofi nafemeteni.’ Mai‑ka nodi mai ati namakeboneni.

⁴⁹Deoso kitabote owa‑ya kasome, amosabote amane.

⁵⁰Deoso‑ya ai‑ka idi mai nayofina mai‑ya Deoso kasomemata, fare hini ene‑mata‑nima ene nasa ne, Deoso‑ya ai nayofina ai‑ya kasomatene.

⁵¹Deoso ene kitabote tohe, mai kitamone mai ati na, mai‑ya kananihimatane.

⁵²Deoso ati ene hidi webote mai kiti fawana, mai one kitara mai kitawahameteni.

⁵³Mai fi‑fimi tohamete Deoso ati ene yamata amosa‑ya mai kaba, mai korimanawaha, mai‑ka yama dama tohamete, Deoso ati ene mai honita tohawama nameteni.

⁵⁴Isara·eo‑ka nodi ai toha, Deoso‑ya ai na‑narifa ai amani. Deoso ai‑ya nofe, ai‑ya kasomatene.

⁵⁵Ai‑ka idi i‑di Abaraho‑ya Deoso hiyare,

‘Tiwa, tika nodi mai na, dai‑ya okasomateboneni.’ Deoso ati nematane.

Fare ati‑mata‑nima ene nane.” Mariya ati nameteni.

⁵⁶Abariko 3 kane‑ya i‑di Isabeo tabori‑ya i‑di Mariya wina, makobote hini tabori‑ya tokomameteni.

Yowaho Batita wadane

⁵⁷I‑di Isabeo dori kome yanana, bidi wadawahematane.

⁵⁸Isabeo‑ya Deoso kasomi nafi tamine‑ya mai mita, i‑di Isabeo‑ka mai toha, i‑di Isabeo yakari‑ya mai wi‑wina mai toha, mai na, mai ya‑yainameteni.

⁵⁹Bidi wade amoni 8 kane‑ya mai tokomakemeteni, sowiri tati ataro mai wisihinakose‑ya mai awabonehe.

“Badi oni‑ya weyenaho.” Mai ati nameteni.

⁶⁰“Badi oni‑ya weyeterebonane, Yowaho tohebonane.” Madi ati nameteni.

⁶¹“Yowaho oni‑ya tika mai one weyeterani.” Mai ati nameteni.

⁶²Badi‑ya mai haana,

“Eme tika dao oni nabati?” Mai yahi ati nameteni.

⁶³Hini yehe‑ya bebeo‑nima na‑ya haane, bebeo‑nima na‑ya mai daahine, oni hikanahano,

“I‑di Yowaho tohane.”

“Se! Yowaho oni tohabarama?” Mai atibodi ati nameteni.

⁶⁴Bidi oni‑ya kanahano hawa toheya, ati yananamawahe, Deoso‑ya kahiyarematane.

⁶⁵Tamine mai himite, Sakariya‑ka yobe yakari‑ya mai wi‑wina mai habi siitonameteni. Yodeya‑ka adami webote dami‑kaya mai wi‑wina Yowaho tamine‑ya mai ibi hiyarameteni.

⁶⁶Yowaho‑ya Deoso kasome tamine‑ya mai mita, mai atibodi yama‑ya kadika,

“Hini yamata‑nima ewe tebamanati?” Mai atibodi ati nameteni.

Yama kobonabone tamine‑ya Sakariya hiyare

⁶⁷Deoso‑ka Doni ene Yowaho badi i‑di Sakariya ati yanane,

⁶⁸“Deoso ene amosabote amane. Isara·eo‑ka nodi ai toha, Deoso‑ka ai amani. Deoso ai‑ya kasomamatasane.

⁶⁹1:69 Dafi‑ka nodi i‑di Yeso amane.Deoso ati ene Dafi‑ka nodi kobone, kitabotebona, ai‑ya kasomebonane.

⁷⁰Fara Deoso ati‑ya mai mi‑mita‑mete mai ati‑mete‑nima yama naboneni.

⁷¹Ai‑ya mai watikana, ai‑ya mai ka‑kako mai‑ya ati barinebonane.

⁷²Ai‑ka idi mai‑ya Deoso nofe, ai‑ya kasomebona ati ne, hini ati‑nima ai‑ya kasomebonane.

⁷³Ai‑ka idi i‑di Abaraho‑ya Deoso hiyare,

‘Owati abateraboneni.

⁷⁴Tika nodi mai‑ya okasomabone, mai‑ya mai one bisinamarabone, tika nodi owa‑ya mai narifabone, mai habi siitonamaraboneni.

⁷⁵Mai ihi amosabone, owati‑ya mai tokadababone, yama maakani awiraboneni.’ Deoso ati nemata,

fara yama yananaboneni.” Sakariya ati nematane.

⁷⁶Sakariya hini bidi ene tamine‑bona‑ya hiyare,

“Ewe, ai‑ka hidi webote kamakibona, ai atibodi hawine‑ya hawatiniwahaboneni. Fara ihi

‘Deoso Kitabote ati‑ya mi‑mita amatini.’ Mai ati naboneni.

⁷⁷Deoso‑ka ai toha ai‑ya kasomebona, ai ene towe manakone‑ya Deoso haanamaterebona tamine‑ya tihiyarawahaboneni.

⁷⁸1:78 Neme‑ke mahi wehene‑nima ne i‑di Yeso tamine amane. Mahi wehene ene hawi ai wato, Yeso ene Deoso hawine ai watowahani.Deoso ai‑ya nofi nafi, Neme‑ke mahi wehene‑nima ne kiseya, ai‑ya nofi nafibonane.

⁷⁹Yama soki‑ya mai naha mai kome fawaterabone‑ka hawi‑ya mai sawi, Deoso Bidi ene Deoso ati somebona‑ka hawi ai watowahaboneni.” Sakariya ati nematane.

⁸⁰Ewe yanawahe, Deoso ati‑ya nofi nafiwahematane. Isara·eo‑ka nodi mai‑ya Yowaho hiyari awisare, tabora awiri‑ya ohari winematane.

Yeso wadane

^1-2Hibati‑ya tabora nafi‑ka ai oni‑ya Sesa Akosito ati ene hika mai kanahano damamaroni. I‑di Yowaho wadi nowati‑ya ai oni‑ya mai kanahano, fara tamine okaminaboneni. I‑di Kirino Siriya‑ya mai wi‑wina mai‑ka kofenado tohe‑ya ai oni‑ya kanahano daidi tamine amane.

³Ai‑ka idi mai tabori‑ya oda nafi tokomamaroni, ai oni‑ya sodado mai kanahanaro.

^4-52:4-5 Mariya i‑di Yose fadi yokana, Yose‑ka yobe‑ya wina, mai ibi dakorara, i‑di Yeso wadi nowati‑ya mai ibi dakorawahameteni.Nasare Karireya‑ya Yose fadi‑bone eyehe yanane, Bere Yodeya‑ya tokematane, mai oni‑ya sodado mai kanahanabonehe. Bere‑ya Yose‑ka idi i‑di Dafi tabaro tohematane. Mariya‑ya i‑di Yose famanasa reya, Mariya naba tohameteni.

⁶Bere‑ya Mariya dori kome yananameteni.

⁷Mai‑ka oteo‑ya Yose fadi eyehe winebona, oteo kibamone mai ati na, yobe one‑ya Yose fadi eyehe wine, Mariya bidi wade, bora ibe‑ya mai kinihikane, bani mai tafe wiye‑ya forimatane.

Deoso‑ka yo‑yose‑ya mai awa

⁸Bere yakari‑ya yobe awire‑kaya kaneiro mai‑ya mai na‑nawada mai sawe, yama soki‑ya mai nahokosameteni.

⁹Mai nahokosiya, Deoso‑ka yo‑yose mai noki‑ya fodoki, Deoso wehene sawi ene mai naho‑kaya yama tehewama, mai habi siitonameteni.

¹⁰Deoso‑ka yo‑yose mai‑ya hiyare,

“Dai habo siitoriyahi. Yama amosa tamine okaminabone, owati dai mita, dai ya‑yainaboneni. Bofe‑ya dai wi‑wina dai nafi‑ya Deoso kasomebonane.

¹¹Hibayata Dafi tabaro‑mata‑ya ewe wade, dai‑ya Ka‑kasoma‑tebona amane. Deoso‑ka Ka‑kadika amane. Ai‑ka Hidi Webote amane.

¹²Owati dai nofabone, dai awebona tamine okaminebonane. Ewe dai wasiya, bora ibe‑ya mai kinihikane, bani mai tafe wiye‑ya forine.” Deoso‑ka yo‑yose ati nematane.

¹³Deoso‑ka yo‑yose wai‑ya Deoso‑ka yo‑yose mai one dama fodomake, Deoso‑ya mai kahiyara,

¹⁴“Deoso neme‑ya wine, Deoso amosabote amane. Bofe‑ya dai wi‑wina, Deoso dai‑ya nofe, dai ya‑yainahi.” Mai ati nameteni.

¹⁵Neme‑ya Deoso‑ka yo‑yose mai tokoma, mai nowati‑ya kaneiro mai‑ya mai na‑nawada mai ibi hiyara,

“Hima, Bere‑ya ai tokahi. Deoso ati ene tamine ai mite, ai awaho.” Mai ati nameteni.

¹⁶Mai toka kanibote na, i‑di Mariya, i‑di Yose, ewe ne‑ya mai awameteni. Bani mai tafe wiye‑ya ewe fori‑ya mai awa,

¹⁷mai awi hawa hihe, mai wininama, Deoso‑ka yo‑yose ati‑ya mai kaminameteni, mai dami‑ya.

¹⁸Kaneiro mai‑ya mai na‑nawada mai ati‑ya mai mita, mai atibodi yama‑ya kadikameteni.

¹⁹I‑di Mariya atibodi yama‑ya kadiki fawani awirameteni.

²⁰Kaneiro mai‑ya mai na‑nawada, mai‑ka kaneiro mai‑ya mai tokomatasa, mai ya‑yaini nafe, yama tamine amosa‑ya mai mita, yama amosa‑ya mai awa na, Deoso‑ya mai kahiyarameteni.

Yeso oni tohawahe

²¹Hibati‑ya Mariya naba tohi awisari‑ya Deoso‑ka yo‑yose ati‑ya Mariya mitameteni. Ewe amoni 8 kane‑ya Deoso‑ka yo‑yose ati‑nima bidi oni Yeso tohawahe, sowiri tati ataro mai wisihinakosematane.

Deoso‑ka yobe‑ya Yeso‑ya mai towaka

²²2:22 Mai fanawi dori wadiya, mai towe toha‑nima mai na mai amoni 33 kani‑ya mai manakone‑bone‑ya mai daaniyahi. Mose‑ka yama hani ati neni.I‑di Mariya amoni kobonameteni, Mose‑ka yama hani ati‑nima towe fawanabonehe. Yerosare‑ya Yeso‑ya mai towakamameteni, Deoso‑ya mai daahinebonaha.

²³Deoso‑ka yama hani ati,

“Ewe daidi maki toheya, Deoso‑ya dai daanayaho, Deoso‑ka tohebonaha.” Yama hani ati nineni.

²⁴Deoso‑ka yama hani ati one,

“Dai‑ka ewe manakone‑bona okoko mai fama mai dai daanahi, Deoso‑ya. Okoko mai awiriya, wayomata mai fama mai dai daanibisahi.” Yama hani ati nineni.

Fara Mose‑ka Yama hani ati‑nima Deoso‑ka bani bidi mai‑bone mai‑ya mai daanameteni.

Simiyaho tamine

²⁵Simiyaho tamine timitahi. Yerosare‑ya i‑di Simiyaho sawi, ene amose, Deoso ati‑ya nofematane. Deoso‑ka Ka‑kadika Isara·eo‑ka nodi mai‑ya kasomatebona yama hani ati na, fara‑ya Simiyaho nimanematane. Deoso‑ka Doni Simiyaho‑ya sawimatane.

²⁶Hibati‑ya Deoso‑ka Doni ati‑ya Simiyaho mite,

“Simiyaho, ti·abi awisa tiriya, Deoso‑ka Ka‑kadika tiwebonane.” Deoso‑ka Doni ati nematane.

²⁷Deoso‑ka Doni ati ene Deoso‑ka yobe‑ya Simiyaho tokiyomematane. Yeso badi, Yeso madi, mai na mai kamakemeteni, Mose‑ka yama hani ati‑nima Yeso‑ya mai daanabonehe, Deoso‑ya.

²⁸Yeso‑ya i‑di Simiyaho awe, Yeso‑ya waratone, Yeso‑ya diwane, Deoso‑ya kahiyare,

²⁹“Deoso, tiwa‑ya na‑narifa ama·oni. Tika Ka‑kadika oawebona tinamaro, tiwati‑nima oawawahane. Hibayata o·abiya, yama sibaraboneni. Ya‑yai·oneni.

³⁰Tika Ka‑kadika mai dami‑ya kasomatebona oawane.

³¹Mai nafi hiawawahebonane.

³²Tika Ka‑kadika yama wahi‑nima ne, tiwa hawine‑ya Bara mai‑ya yofikanebonane. Isara·eo‑ka nodi ai toha tika ai amani. Tika Ka‑kadika ene ai ya‑yainaboneni.” Simiyaho ati nematane.

³³Yeso tamine‑ya Simiyaho hiyare, ati‑ya Yeso badi, madi, mai na, mai mita, mai atibodi yama‑ya kadikameteni.

³⁴I‑di Simiyaho mai‑ya kasomebona mai tamine‑ya Deoso‑ya hiyare,

“Deoso, mai kasomi tinafihi.” Simiyaho ati ne,

Mariya‑ya hiyare,

“Owati timitahi. Deoso‑ka hawi‑ya mai sawira, tika dao ene Deoso hawine‑ya mai sawiwahabone, mai one amosamone tika dao ene mai atibodi towe mai dami watowahaboneni. Tika dao‑ya mai weenaboneni.

³⁵2:35 Yama kobonabone i‑di Yeso mai hinahabebona tamine amane.Yama kobonaboneni, mai atibodi ati‑ya ai watowahabonehe. Koboni‑ya tika yawa kitaboneni.” Simiyaho ati nematane.

³⁶Simiyaho hiyari hawa toheya, Ana kamakemeteni. Ase‑ka nodi amani. I‑di Fanoeo bide amani. Deoso ati‑ya mi‑mita amani. Bote tohawahameteni. Hibati‑ya fanamete, ano 7 kane‑ya maki abe,

³⁷i‑di Ana hasinibisa, hika ano 84 tohameteni. Deoso‑ka yobe‑ya i‑di Ana sawi fawara, yama tehe‑ya Deoso‑ya hiyara, yama soki‑ya Deoso‑ya hiyara, tafi nafira, Deoso‑ya kahiyarameteni.

³⁸I‑di Ana kamake, Yeso‑ya awa, ya‑yaina, Deoso‑ya kahiyarameteni. Deoso ati ene Yerosare‑ya Bara mai kayafamarabone, Deoso‑ka yama hani ati na, yama hani ati‑ya mai nimana, fara mai‑ya Yeso tamine‑ya i‑di Ana kaminameteni.

Nasare‑kaya mai tokoma

³⁹Deoso‑ka yama hani ati‑nima mai ihi hawa toha, hini mai tabori‑ya mai tokomawaha, Nasare Karireya‑ya mai tabori tohameteni.

⁴⁰Yeso yane, kitawahe, yama‑ya watowahematane. Yeso‑ya Deoso nofe, Yeso‑ya kasomematane.

Deoso‑ka yobe‑ya Yeso mai‑ya hiyare

⁴¹2:41 Ka‑kariwa feriado oni amani.Ka‑kariwa koboni‑nima Yerosare‑ya mai dama mai tokameteni. I‑di Yose i‑di Mariya mai fama, mai‑ka madehe eyehe Yerosare‑ya mai tokaharemeteni.

⁴²I‑di Yeso‑ka ano 12 tohawahiya, ka‑kariwa kobonami yanatoniya, Yerosare‑ya mai tokomatasameteni, mai tafabonehe.

⁴³Ka‑kariwa‑ka mahi 7 kane hawa toheya, hini mai tabori‑ya mai tokoma, Yeso‑ta Yerosare‑ya towakose, badi, madi mai na Yeso‑ya mai watomarameteni.

⁴⁴“Ai dama ai one‑ya Yeso sawi awane.” Badi, madi, mai atibodi ati nameteni.

Yama soki‑ya Yeso‑ya mai sibanameteni.

⁴⁵Yeso‑ya mai wasira, Yerosare‑ya mai winitokanamameteni, Yeso‑ya mai sibanabonehe.

⁴⁶Mahi 3 kane‑ya Deoso‑ka yobe‑ya mai hiwasiwamematane. Deoso ati‑ya mai ka‑kanawato mai‑ya dabe, mai ati‑ya mite, mai‑ya hiyarematane.

⁴⁷Yeso ati‑ya mai mita,

“Ka! Yeso yama‑ya watone.” Mai atibodi ati nameteni.

⁴⁸I‑di Yose fadi‑ya fame, Yeso‑ya mai awa, mai atibodi yama‑ya kadikameteni. Yeso‑ya madi hiyara,

“Hini yamata ihi fawatiniti? Tiwa‑ya abi oda sibana, tiwa ene oda‑ka yama yofinani.” Madi ati nameteni.

⁴⁹“Okobi noko·onihe, Okobi‑ka yobe‑ya osawe, hini yamata ihi owa‑ya sibatiniti?” Yeso ati nematane.

⁵⁰Yeso ati‑ya mai watorameteni.

⁵¹Nasare‑kaya Yeso badi, madi mai na mai eyehe tokome, mai ati‑ya tokadabematane. Yeso ati‑ya Mariya atibodi kadiki fawani awirameteni.

⁵²Yeso yetene tohawahe, yama‑ya watowahematane. I‑di Yeso‑ya Deoso nofi nafi, Yeso ati‑ya mai dama mai nofameteni.

Yowaho Batita mai‑ya hiyare

¹I‑di Yowaho mai dama mai‑ya hiyare, hika ano tamine okaminaboneni. Ai nafi‑ka hidi webote i‑di Tibiro Sesa tohemata, fare hidi tohe‑ka hika faha fowe 15 tohi‑ya Yowaho‑ya Deoso hiyarematane. Abireni‑ka mai‑ka hidi i‑di Risaniya toha, Yodeya‑ka mai‑ka hidi i‑di Bonisiyo Birato toha, Karireya‑ka mai‑ka hidi i‑di Erodi toha, Itoreya, tirakonitisi na‑ke hidi i‑di Erodi sohori i‑di Firibi toha, mai namaroni.

²Deoso‑ka yama‑bone‑ya mai da‑daa mai‑ka hidi webote i‑di Anasi i‑di Kaifo mai fama mai namaroni. Tabora dami‑ka mai‑ka hidi mai oni hiri·ona, i‑di Yowaho‑ka ano tamine amani. Sakariya bidi i‑di Yowaho‑ya Deoso hiyarematane, kabani‑kaya.

³Deoso ati ene Yodaho Faha‑ya Yowaho tokawahe, mai dama mai‑ya hiyare,

“Dai atibodi yama‑ya kadikiya, eya dai atibodi ati nahi.

‘Deoso, oda ene amosaramaro, oda tikasomahi, oda ene amosawamabonehe.’ Dai ati nahi.

Eya dai atibodi ati niya, Deoso dai ene manakone‑ya haanamarebona, dai‑ya haba·onirisaboneni.” Yowaho Batita ati ne, ati damematane.

⁴Hibati‑ya Yowaho tamine‑bona‑ya Isa·iya kanahanomatamonane.

“Bofe‑ke mai‑ka owa kabani‑kaya ati yananeya,

‘Ai‑ka Hidi webote hawine‑bona dai namosahi.’ Ati nebonane.

⁵3:5 Ai atibodi hawine namosabone tamine amani.Faha hawi‑ya wami kayanawahaboneni. Adami tati abiya, wami kariwahaboneni. Hawi ke‑keona hawi daatowiteboneni. Hawi‑ka wami botoroma amosawamaboneni.

⁶Deoso ai‑ya kasomebona, mai nafi awawahaboneni.” Isa·iya‑ka yama hani ati nineni.

⁷Yowaho mai‑ya habanirisebona, mai dama mai kamake, mai‑ya Yowaho hiyare,

“Maka ihi‑nima dai ene na, ebeni‑ke ati ene Deoso‑ya dai nayofiniti?

⁸Dai abarabone dai ati niya, dai ene amosawamiyahi.

‘Abaraho‑ka nodi oda amani. Deoso oda‑ya sarikiterebonane.’ Dai ati riyahi.

Owati dai mitahi. Abaraho‑ka nodi mai one‑bone‑ya Deoso ati wamane‑mana, yati‑ya mai‑ya Deoso wamane nane.

⁹Awa bono bonora toha, awa bono kabi amosara toha na, ade ai kaana, ai sarikiteni. Fara‑nima Deoso bari‑ya maakani hawa tohane. Dai ene amosawami awiriya, awa kaana‑nima Deoso dai‑ya niwahebonane. Dai‑ya nanahabeya, dai‑ya sarikanebonane.” Yowaho ati nematane.

¹⁰“Hini yamata‑nima oda nibati?” Mai dama mai ati nameteni.

¹¹“Tika bora fama toha, ai owa bora‑ya kihare, hika bora ohare‑bone daatiyahi. Tiwa tefe toha, kote daatiyahi, mai tafe wadara mai‑ya.” Yowaho ati nematane.

¹²Kofeno‑ka yinero‑bona‑ya mai ha‑haa mai kamakemeteni, Yowaho mai‑ya habanirisebonaha.

“Ayo, hini yamata‑nima oda nibati?” Mai ati na,

¹³“Kofeno‑ka yinero‑bona‑ya dai ha‑haa yama manakone fiyakana‑ya dai haarihi, yinero kote dai kayafarihi nahi.” Yowaho ati nematane.

¹⁴“Hini yamata‑nima oda nibati?” Sodado mai ati na,

“Mai‑ka yinero honita dai haariyahi. Mai tamine keyehe‑ya dai hiririyahi. Dai‑ka yama anini manakone nafira, dai yawariyahi, dai ya‑yainibisahi.” Yowaho ati nematane.

¹⁵Deoso‑ka Ka‑kadika‑ya mai nafi nimana,

“Yowaho i‑di Deoso‑ka Ka‑kadika tohe awane.” Mai atibodi ati nameteni.

¹⁶“Deoso‑ka Ka‑kadika ohi awirini. Faha‑ya dai‑ya haba·onirisabisateni. Kamaki‑bona kitabotebisa amane. Owa‑ta towebisa ama·oni. Amosabote amane. Ati ene Deoso‑ka Doni dai one‑ya sawiwahebonane. Ai nafi‑ya kadikeya, dai one‑ya sarikanebonane.

¹⁷Tiriko atori abi hawa toha, atori ai sarikana‑nima mai ihi amosara mai‑ya sarikanebona, yama hirini fawateraboneni. Tiriko noki ai kayafi‑nima mai ihi amosa mai‑ya kayafebonane.” Yowaho ati nematane.

¹⁸Deoso ati amosabote tamine‑ya mai‑ya hiyare, mai‑ya hiyari damematane.

¹⁹Karireya‑ka mai‑ka hidi i‑di Erodi tohe, ene towe dame, anidi fadi i‑di Erodiasi‑ya famawahematane. Ene towe dama ihi i‑di Yowaho weehinematane.

²⁰Makobote Erodi Yowaho‑ya kadeya‑ya nafoye, ene towe tohamatasematane.

Yowaho Yeso‑ya habanirise

²¹Yowaho mai‑ya habanirise, Yeso‑ya habanirisahari nematane. Deoso‑ya Yeso hiyare, neme‑ya Deoso seekanematane.

²²Yeso‑ya Deoso‑ka Doni kise, wayomata awi‑nima Deoso‑ka Doni awinematane. Neme‑ya ati kaki,

“Oka Dao amatini. Tiwa onofi nafineni. Tiwa ene amosa ene ya‑yai·oneni.” Ati nematane.

Yeso‑ka idi mai oni

²³Yeso‑ka ano 30 tohiya, mai dami‑ya hiyarawahematane.

Yeso badi‑mona i‑di Yose tohematane. Yose badi i‑di Eri tohe,

²⁴Eri badi i‑di Matate tohe, Matate badi i‑di Refi tohe, Refi badi i‑di Meoki tohe, Meoki badi i‑di Yanai tohe, Yanai badi i‑di Yose tohe,

²⁵Yose badi i‑di Matatiya tohe, Matatiya badi i‑di Amosi tohe, Amosi badi i‑di Naho tohe, Naho badi i‑di Esiri tohe, Esiri badi i‑di Nakai tohe,

²⁶Nakai badi i‑di Maate tohe, Maate badi i‑di Matatiya tohe, Matatiya badi i‑di Semei tohe, Semei badi i‑di Yoseki tohe, Yoseki badi i‑di Yoda tohe,

²⁷Yoda badi i‑di Yohana tohe, Yohana badi i‑di Resa tohe, Resa badi i‑di Sorobabeo tohe, Sorobabeo badi i‑di Saratieo tohe, Saratieo badi i‑di Neri tohe,

²⁸Neri badi i‑di Meoki tohe, Meoki badi i‑di Adi tohe, Adi badi i‑di Kosaha tohe, Kosaha badi i‑di Eomadaho tohe, Eomadaho badi i‑di Ere tohe,

²⁹Ere badi i‑di Yosowe tohe, Yosowe badi i‑di Eriesa tohe, Eriesa badi i‑di Yorini tohe, Yorini badi i‑di Matate tohe, Matate badi i‑di Refi tohe,

³⁰Refi badi i‑di Simiyaho tohe, Simiyaho badi i‑di Yoda tohe, Yoda badi i‑di Yose tohe, Yose badi i‑di Yona tohe, Yona badi i‑di Eriaki tohe,

³¹Eriaki badi i‑di Mereya tohe, Mereya badi i‑di Mena tohe, Mena badi i‑di Matata tohe, Matata badi i‑di Nataha tohe, Nataha badi i‑di Dafi tohe,

³²Dafi badi i‑di Yese tohe, Yese badi i‑di Obedi tohe, Obedi badi i‑di Bowasi tohe, Bowasi badi i‑di Sera tohe, Sera badi i‑di Nasomi tohe,

³³Nasomi badi i‑di Aminadabi tohe, Aminadabi badi i‑di Araho tohe, Araho badi i‑di Arani tohe, Arani badi i‑di Esiro tohe, Esiro badi i‑di Feresi tohe, Feresi badi i‑di Yoda tohe,

³⁴Yoda badi i‑di Yako tohe, Yako badi i‑di Isaki tohe, Isaki badi i‑di Abaraho tohe, Abaraho badi i‑di Tera tohe, Tera badi i‑di Na·o tohe,

³⁵Na·o badi i‑di Seroki tohe, Seroki badi i‑di Haka·o tohe, Haka·o badi i‑di Bereki tohe, Bereki badi i‑di Ebere tohe, Ebere badi i‑di Sera tohe,

³⁶Sera badi i‑di Kaina tohe, Kaina badi i‑di Arafasadi tohe, Arafasadi badi i‑di Seme tohe, Seme badi i‑di Nowe tohe, Nowe badi i‑di Rameki tohe,

³⁷Rameki badi i‑di Matosare tohe, Matosare badi i‑di Enoki tohe, Enoki badi i‑di Yaradi tohe, Yaradi badi i‑di Marareo tohe, Marareo badi i‑di Kaina tohe,

³⁸Kaina badi i‑di Inosi tohe, Inosi badi i‑di Seti tohe, Seti badi i‑di Adaho tohe, Adaho badi i‑di Deoso tohematamonane.

Yeso‑ya Satanasi keyehe‑ya hirine

¹Deoso‑ka Doni ati‑ya Yeso tokadabe, Yodaho Faha‑ya yanane, kabani‑ya tokematane.

²Kabani‑ya wai, hawi‑ya Deoso‑ka Doni yofikanematane. Diaboro Yeso‑ya hiyarematane, Deoso ati‑ya tokadabamarebonaha. Yeso tafare, amoni 40 kane fimi watihikanematane.

³“Deoso Bidi amatini, tiwati ihi yati baho tohahi, tikababonehe.” Diaboro ati nematane.

⁴“Deoso‑ka yama hani ati timitahi. Ai tefe ai‑ya kasomi nafirani.” Yeso ati nematane.

⁵Yama wai nemehe‑kaya Yeso‑ya Diaboro towake, mai tabori dami‑ya yofikanematane.

⁶“Mai nafi tiwa‑ya daa·onaboneni, mai tiyosewahabonehe. Yama amosa nafi daa·onaboneni. Hibati‑ya bofe‑ya yama nafi okayawa, owati daahina, daa·onaboneni.

⁷Owa hidi tiniya, yama nafi tiwa‑ya daa·onaboneni.” Diaboro ati nematane.

⁸“Deoso‑ka yama hani ati‑nima obisaboneni. Yama hani ati timitahi.

‘Deoso dai kahiyarahi. Mai one‑ya dai narifariyahi. Deoso dai narifabisahi.’ Deoso‑ka yama hani ati nineni.” Yeso ati nematane.

⁹Yerosare‑ya Yeso‑ya Diaboro towake, Deoso‑ka yobe tati mese‑ya Yeso‑ya hiyaramatase,

“Deoso Bidi amatini, yoratinisahi. Yama sibaraboneni.

¹⁰Fara Deoso‑ka yama hani ati timitahi.

‘Deoso‑ka yo‑yose mai hiyosebonane, tiwa‑ya mai kasomabonehe.

¹¹Tiwa‑ya mai waratonaboneni, yati‑ya tiwa teme taratokarabonehe.’ Deoso‑ka yama hani ati nineni.” I‑di Satanasi ati nematane.

¹²“‘Deoso hini ati‑nima ene nebona, ati‑ya dai siwakariyahi.’ Yama hani ati neni.” Yeso ati nematane.

¹³Diaboro keyehe‑ya hirini hawa tohe, tokome,

“Yama one‑ya Yeso ohiyaramatasiya, owati‑ya nofeba awane.” Atibodi ati nematane.

Karireya‑ya Yeso mai‑ya hiyare

¹⁴Karireya‑ya Yeso winitoname, Deoso‑ka Doni ene Yeso ati kitematane. Karireya‑ka tabaro dami‑kaya Yeso tamine‑ya mai hiyara, Yeso tamine‑ya mai nafi mitawahameteni.

¹⁵Tabora dami‑ya Deoso‑ya mai hi‑hiyara‑ke yobe‑ya Yeso mai‑ya kanawatomatane.

“Yeso ati amosane.” Mai nafi ati nameteni.

¹⁶Nasare‑kaya Yeso ya‑yana toha‑mata‑kaya i‑di Yeso tokome, kobotonamatasematane. Sabado dami‑nima Deoso‑ya mai hi‑hiyara‑ke yobe‑ya Yeso tokiyome, yama hani‑ya kadike, fara sabado‑ya Deoso‑ya mai hi‑hiyara‑ke yobe‑ya Yeso waamisamematane, Deoso‑ka yama hani‑ya kadikebonaha.

¹⁷Isa·iya‑ka yama hani‑ya mai daanameteni, Yeso hikadikabonehe. Yeso warahikana, seehikana, hikadika,

¹⁸“Deoso‑ka Doni owa‑ya sawi, Deoso owa‑ya kadikemari, owa‑ya yosemarine. Yama‑ya mai kihara mai‑ya Deoso ati amosabote okaminawahaboneni. Hibati‑ya mai‑ya barikanemari, owati ihi mai seekawahaboneni. Hibati‑ya yama‑ya mai awatera, owati ihi yama‑ya mai awawahaboneni. Mai mai bisihinamaro, owati ihi mai mai bisihinami awiraboneni.

¹⁹Deoso ai‑ya kasomebona tamine ohiyaraboneni.” Isa·iya‑ka yama hani ati neni, Yeso hikadikaro.

²⁰Yama hani‑ya kinikaname, hidi‑ka yo‑yose‑ya yama hani‑ya daatoname, itarimatane. Mai nafi hiwakatomematane.

²¹“Deoso ati okadike‑nima yama nawawahineni.” Yeso ati nematane.

²²“Se! Yeso ati amosane.” Mai nafi ati nameteni.

“I‑di Yose bidi amanaraniha?” Mai one ati nameteni.

²³Yeso ati yanane,

“‘Mai ihi oda awiya, mai ati oda nofaboneni.’ Dai ati teni.

‘Oda‑ka owa tiha, Kafanaho‑ya tiwa ene‑nima oda tikasomaharihi.’ Dai ati na awineni.” Yeso ati nematane.

²⁴“Owati dai mitamakihi. Hini mai tabori‑ya Deoso ati‑ya mai mi‑mita mai ati‑ya mai nofaterani.

²⁵Hibati‑ya i‑di Eriya hasinasa neya, Deoso ati ene abariko 42 kane‑ya faha kakimara, yamata yanami awirametemoneni. Isara·eo‑kaya ai‑ka fana mai honita wahawama mai dama,

²⁶mai‑ya Eriya kasomare, yara fana honita wahawama ohare‑ya Eriya kasomematamonane. Yara‑ka wami oni Sidoho toha, tabori oni‑ta Sareta tohametemoneni.

²⁷Hibati‑ya i‑di Eriseo hasinasa neya, Isara·eo‑kaya ai one dama mai mese towe mai‑ya i‑di Eriseo nakitamarematamonane. Siriya mai‑ka owa i‑di Naama mese towe tohe‑ya i‑di Eriseo nakitamabisematamonane.” Yeso ati nematane.

²⁸Yeso ati‑ya mai mita, mai nafi yawi kita,

²⁹mai nahomisa, tabora‑ka adami webote widi‑ya Yeso‑ya mai fatani toka, adami dori‑ya mai hiwakematane, mai korohiwitibonaha.

³⁰Hiniya mai teberi‑ya Yeso tokomematane.

Yeso ene madi towe kanane

³¹Karireya‑ka tabora one Kafanaho‑ya Yeso toke, kobone, sabado‑ya mai‑ya kanawatomatane.

³²Yeso ati‑ya mai mita,

“Se! Yeso yama hani ati‑ya wato nafine, yama hani hidi ati‑nima ati nane.” Mai atibodi ati nameteni.

³³Deoso‑ya mai hi‑hiyara‑ke yobe‑ya maki madi towe foye‑ke sawi, Yeso‑ya haane, ati kite,

³⁴“Ka! Yeso Nasare‑ke hini yamata‑nima tinaba? Oda‑ya bisitiriyahi. Tiwa owatoni. Deoso‑ka amosabote amatini.” Madi towe ati nematane.

³⁵Yeso madi towe‑ya weene,

“Tiwati fawanahi. Maki‑ya tifoyamariyahi.” Ati nematane.

Madi towe ene mai bai‑ya maki sone, maki‑ya bisini awire, hiniya toke, maki amosawamematane.

³⁶Yeso ene‑ya mai awa, mai atibodi yama‑ya kadika, mai ibi hiyara,

“Hini yamata ihi tohiti? Hidi ati‑nima Yeso ati ne, ati kite, ati ene madi towe mai kanateni.” Mai ati nameteni.

³⁷Tabora dami‑ya Yeso tamine‑ya mai kaminameteni.

Mai dami‑ya nakitame

³⁸Deoso‑ya mai hi‑hiyara‑ke yobe‑ya Yeso yanane, Simaho‑ka yobe‑ya tokiyomematane. Simaho‑ka koma hiwe nafe, kawinameteni. Yeso kobone, Simaho‑ka koma tamine‑ya mai kaminameteni.

³⁹Simaho‑ka koma kawina, fowari‑ya Yeso wai,

“Yama kome tikahi.” Ati nematane.

Hiwe fawana, kitama, waamisa kanibote na, mai tafe‑bone‑ya awawahameteni.

⁴⁰Mahi toke‑ya Yeso‑kaya mai kiyana mai mai hiwakake, mai tati‑ya Yeso yehe fori, mai kitamameteni.

⁴¹Mai‑ya madi towe mai fo‑foya Yeso ati ene madi towe mai kanana, mai ati kita,

“Deoso Bidi amatini.” Madi towe mai ati na,

“Dai ati fawanahi.” Yeso ati nematane.

“Deoso‑ka Ka‑kadika oha, owa‑ya mai wata, owa tamine‑ya mai hiyararaboneni.” Yeso atibodi ati nematane.

Deoso ati amosabote‑ya hiyarane

⁴²Yama wahabisari‑ya Yeso kabani‑ya tokematane. Yeso‑ya mai sibana, mai hiwasi,

“Oda tabaro‑ya tiwinahi. Mai tabori‑ya tikariyahi.” Mai ati nameteni.

⁴³“Mai tabori dami‑ya Deoso ai nafi‑ka hidi kitabote tohawahe‑bona tamine ohiyaraboneni. Mai dama mai‑ya ohiyarabisabone owa‑ya yosemarine.” Yeso ati nematane.

⁴⁴Yodeya‑ka tabora dama‑ya tokawahe, Deoso‑ya mai hi‑hiyara‑ke yobe dami‑ya Deoso ati‑ya hiyarawarimatane.

Bedoro mai‑ya Yeso himane

¹5:1 Kenesare‑ka faha toha, Karireya‑ka faha toha neni.Kenesare‑ka faha widi‑ya Yeso wai‑ya mai dama mai yorotokana, mai howatokarameteni, Deoso ati tamine‑ya mai mitabonehe.

²Kanawa honita fama demena‑ya Yeso awe, kanawa hidi faha widi‑ya hedi‑ya mai namosameteni.

³Simaho‑ya Yeso haane, kanawa dori‑ya foye, Simaho‑ya hiyare,

“Ai‑ya kanawa maanakihi.” Ati ne,

itari, mai dama mai‑ya kanawatomatane.

⁴Mai‑ya hiyari hawa tohe, Simaho‑ya hiyare,

“Faha kowe‑ya ai towakahi. Tika hedi dai kerokanaba, aba mai dai watabani.” Yeso ati nematane.

⁵“Ayo, yama soki nafi‑ya hedi oda kerokana, aba mai‑ya hedi wati nofarene. Sibaraba awineni. Tiwati ihi ai kerokanamataseya, ai awebane.” Simaho ati nematane.

⁶Hedi mai kerokana, hedi‑ya aba mai dama mai wasiwaha, hedi madone owa betetonematane.

⁷“Kanawa one dai kakamakihi.” Mai yahi ati nameteni.

Kanawa one‑ya mai kakamake, mai hinakibamake, kanawa fama kibikima, bokikimi yanatonameteni, aba mai dama mai ihi.

⁸Yeso ene‑ya Simaho Bedoro awe, yobati‑ya wai,

“Ayo, owa‑ya tisawimariyahi. Towe ama·oni. Amosabote amatini.” Bedoro ati nematane.

⁹Aba mai dama mai‑ya Bedoro awe, habo siitone, Bedoro‑ya mai daba mai habi siitonaharemeteni.

¹⁰Kanawa one‑kaya i‑di Sebedeo bidi mai fama, i‑di Tiyako, i‑di Yowaho mai na, mai habi siitonaharemeteni.

“Simaho, tiwa habo siitoriyahi. Hibati‑ya aba mai‑ya tinawasiteni. Hibayata Deoso ati tikaminaboneni, ati mai one hinofawahebonaha.” Yeso ati nematane.

¹¹Faha widi‑ya mai kobokanama, mai‑ka yama towadakosa, Yeso‑ya mai dabawahameteni.

Mese towe‑ya kasome

¹²Tabora one‑ya Yeso toke, maki mese towe tohe ite‑ya Yeso tofodowiti, Yeso‑ya maki awe, yobati‑kaya itarise, moinisematane.

“Ayo, haa‑nima ai‑na ai kasomi tiwata, owa kasomi tinofakarini?” Ati nematane.

¹³Yeso maki‑ya boyone,

“Onofini. Tiwa mese amosawamahi.” Ati ne, ati ene mese amosawamematane.

¹⁴“Owa ene tamine mai‑ya tihiyarariyahi. Deoso‑ka yama‑bone‑ya mai da‑daa mai‑ya tikahi. Mose‑ka yama hani ati‑nima yama daatiniya, tikitama, tiwa‑ya mai watowahaboneni.” Yeso ati nematane.

¹⁵Yeso ati‑ya mai tokadabara, Yeso tamine‑ya mai kamina, mai ati tamine‑ya aka‑ya mai wi‑wina mai mita, mai dama mai yamanakemeteni, mai one Yeso ati‑ya mita, mai one Yeso hinakitama hinabonehe.

¹⁶Kabani‑kaya Yeso yobinematane, Deoso‑ya hiyarebonaha.

Ka‑kakone‑ya nakitame

¹⁷Mai dama mai yorotokana mai‑ya Yeso kanawatomatane. Fariseo mai toha, Mose‑ka yama hani ati‑ya mai ka‑kamina mai toha, mai na, mai sawi, mai one Karireya‑ka mai kaki, Yodeya‑ka mai one kaki, Yerosare‑ka mai one kaki nameteni. Mai kiyana, Deoso ene mai‑ya Yeso nakitamematane.

¹⁸Maki ka‑kakone awa‑ya bora dasikana‑ya mai damahikanematane. Yobe doro‑ya Yeso wai‑kaya mai hiwakamakibona mai ati na,

¹⁹yobe kibe, yobe tati mese‑kaya mai hiwakimise, yobe tati mese kote‑ya mai seekanameteni. Yobe tati mese hodone‑ya mai hikanakise, mai one teberi‑ya Yeso wai‑kaya, kaforirisematane.

²⁰Mai ihi‑ya Yeso awe, “Owati‑ya mai nofineni.” Yeso atibodi ati ne, maki ka‑kakone‑ya hiyare,

“Tiwa ene towe manakone wadamarini.” Yeso ati nematane.

²¹Mose‑ka yama hani ati‑ya mai ka‑kamina mai toha, fariseo mai toha, mai na, Yeso ati‑ya mai mita, mai yawawahameteni.

“Bofe‑ka ai toha ai ati ene ai owa ene manakone fawaterene. Deoso hini ati ene ai ene manakone fawateni. Maki ene towe manakone wadamaremona Yeso ati ne,

‘Deoso‑nima ona ama·oni.’ Yeso ati ne awane,

hini ati ene abaho.” Mai atibodi ati nameteni.

²²Mai atibodi ati‑ya Yeso wato, ati yanane,

“Hini yamata‑bone owa‑ya dai atibodi weeniti?

²³Bofe‑ka mai ati ihi ai ene towe manakone fawarihi, bofe‑ka mai ati ihi ai owa kitamarihi tene.

²⁴Owati ihi ai owa ene towe manakone wadamare, dai awaboneni.” Yeso ati nematane.

Maki kiyane‑ya hiyare,

“Owati timitahi. Tiwaamisahi. Tika fo‑fori‑ka yama diwatikaniya, tikamahi, tika yobe‑ya.” Yeso ati nematane.

²⁵Mai noki‑ya waamise, hika fo‑fori‑ka yama‑ya damakane, tabaro‑kaya tokome, yakaneya, Deoso‑ya kahiyarematane.

²⁶Kitame‑ya mai awa, mai nafi atibodi yama‑ya kadikameteni. Mai habi siitona,

“Deoso ene amose, hibayata yama bara oda awani.” Mai ati nameteni.

Refi‑ya himane

²⁷Makobote Yeso toke, kofeno‑ka yinero‑bona‑ya ha‑haa‑ya awematane. Kofeno‑ka yobe bidi‑ya Refi itariya, Yeso himane,

“Owa‑ya tisawihi.” Ati nematane.

²⁸Refi waamise, hika yama towadakosa, Yeso‑ya sawiwahematane.

²⁹I‑di Refi‑ka yobe‑ya Yeso eyehe mai tokameteni, mai marinabonehe. Kofeno‑ka yinero‑bona‑ya mai ha‑haa mai dama, mai one dama, mai na, mai nafi marinameteni.

³⁰Fariseo mai one Mose‑ka yama hani ati‑ya mai ka‑kamina mai toha Yeso‑ya mai da‑daba mai‑ya mai weena,

“Hini yamata‑bone towe mai eyehe dai tafiti? Kofeno‑ka yinero‑bona‑ya mai ha‑haa mai eyehe oda tafarihi, mai ihi amosara mai eyehe oda tafarihi, oda teni.” Mai ati nameteni.

³¹Mai ati‑ya Yeso mite, ati yanane,

“Mai kiyara mediko mai‑ya kasomaterene. Mai kiyana‑ta mediko mai‑ya kasomatene.

³²Mai ihi amosamone mai ati na, mai hima·orani. Mai ihi amosara mai hima·obisateni, mai ihi amosawamabonehe. Fara ihi okemaroni.” Yeso ati nematane.

Ai tafarabone tamine‑ya hiyare

³³Yeso‑ya mai hiyara,

“Yowaho‑ya mai da‑daba mahi owa‑ya mai tafa, mahi owa‑ya mai tafarihi na, Deoso‑ya mai hiyarabisateni. Fara mai ihi‑nima fariseo mai‑ya mai da‑daba mai ihi teni. Tiwa‑ta tiwa‑ya mai da‑daba mai tafi fawaterani.” Mai ati nameteni.

³⁴“Mai‑ka owa fanebona sawi ene mai ya‑yaina, mai tafi fawaterani.

³⁵5:34-35 Yeso hini tamine‑ya hiyare, abebona makobote neme‑ya tokebonane.Yama one‑kaya maki mai hiwakebona, tabora bara‑ya tokeya, mai tonokosa, yawa ihi mai tafi fawarimanaboneni.” Yeso ati nematane.

³⁶Mai‑ya kanawatobona, mai‑ya hiyare,

“Ai‑ka bora bote hodeya, bora yati ibe sibinare, bora bote hodi‑ya ai nawaanaterani. Bora bote ihi bora yati ai sibiniya, bora bote amosawamaterani.

^37-38Bani ataro wamani yama wiye toha, wamani yati‑ya fino yati ai soronisiya, wiye taokiterani. Yama wiye bote‑ya fino yati ai soronisaterani. Yama wiye bote‑ya fino yati ai soronisiya, taokana, yama wiye aba, fino abateni. Fino yati yama wiye yati‑ya ai soronisateni.

³⁹5:36-39 Yama bote‑ya yama yati dabara‑nima ai ya‑yainiya, ai tafi fawaterani.Fino bote mai fawa, fino yati mai haanamakiterani. Fino bote fawi amosini. Mai ati teni.” Yeso ati nematane.

Ai‑ka Ayo sabado hidi amane

¹Sabado one‑ya Yeso hika mai da‑daba mai eyehe fadara‑ya mai tokofarama, tiriko tati‑ya mai bakakasa, mai yahi‑ya mai wikohikawaha, mai hikabameteni.

²“Hini yamata ihi sabado‑ya tiriko tati‑ya dai bakakasiti? Sabado‑ya yama dai a‑ani amani.” Fariseo mai ati nameteni.

³Yeso ati yanane,

“Dafi tamine dai kadikaterini? Dafi, hika mai eyehe toke, mai fimi nafemetemoneni.

⁴6:4 Dafi hika mai eyehe Deoso‑ka yama‑bone‑ya mai da‑daa mai tohi awirametemoneni. Deoso‑ka baho‑ya mai kaba, Deoso yawi awirematamonane.Deoso‑ka yobe‑ya Dafi tokiyome, Deoso‑ka baho‑ya yabe, baho‑ya towakame, hika mai eyehe baho‑ya kabematamonane. Deoso‑ka yama hani ati ihi Deoso‑ka baho‑ya mai one kabaterani. Deoso‑ka yama‑bone‑ya mai da‑daa mai hikababisateni.

⁵Dai‑ka Ayo neme‑ke sabado hidi amane.” Yeso ati nematane.

Yehe moikaname‑ya nakitame

⁶Sabado one‑ya Deoso‑ya mai hi‑hiyara‑ke yobe‑ya Yeso tokiyome, mai‑ya kanawatomatane. Yehe kanike moikaname itarimatane.

⁷Fariseo mai toha, Mose‑ka yama hani ati‑ya mai ka‑kamina mai toha, mai na, Yeso‑ya mai kakatoma,

“Maki‑ya nakitameba awane. Sabado‑ya hinakitameya, ai weenebonane.” Mai atibodi ati nameteni.

⁸Mai atibodi ati‑ya Yeso wato, yehe moikaname‑ya haane,

“Tiwaamisiya, oda teberi‑ya tiwaahi.” Ati nematane.

Waamise, mai noki‑ya waimatane.

⁹Yeso mai‑ya hiyare,

“Eme Mose‑ka yama hani ati titi? Sabado‑ya ai owa ai nakitama, ai ati kasiramone dai ati na awini. Sabado‑ya ai owa ai nanahababisa, ai sibabisaramone dai ati na awini. Dai ati yananahi.” Yeso ati nematane.

¹⁰Mai nafi‑ya kakatomi bide tohe, maki‑ya haanamatase,

“Tiwa yehe feotokanahi.” Yeso ati ne,

Yehe feotokaname, yehe amosawamematane.

¹¹Ene mai hiawe, mai yawi kita,

“Yeso maanamare, hini yamata‑nima ai nibati?” Mai ibi hiyara mai ati nameteni.

Mai 12 kana mai‑ya kadike

¹²Makobote adami webote‑ya Yeso tokomorosematane, Deoso‑ya hiyarebonaha. Yama soki‑ya hiyaranabematane.

¹³Mahi kaki‑ya hika mai da‑daba mai‑ya haane, mai one 12 kana mai‑ya kadikematane, hika yo‑yose mai bonehe.

¹⁴Mai‑ya kadike: i‑di Simaho tohe, Yeso ati ene Simaho oni Bedoro tohawahene. Simaho sohori i‑di Anidere‑ya fama, i‑di Tiyako, i‑di Yowaho, i‑di Firibi, i‑di Batoromeho,

¹⁵i‑di Mateo, i‑di Tome, Aofio bidi i‑di Tiyako, i‑di Simaho Seroti,

¹⁶Tiyako bidi i‑di Yoda toha, i‑di Yoda Isikari·oti toha, mai na, mai‑ya Yeso kadikematane. Yoda Isikari·oti i‑di Yeso‑ya kahabanematane.

Yeso mai‑ya kanawato

¹⁷Yeso hika mai da‑daba mai eyehe kamatase, yama amosi‑ya mai nahomiya, Yeso‑ya mai da‑daba mai one dama naha, mai one kobonamake, Yodeya‑ka mai one toha, Yerosare‑ka mai one toha, faha webote widi‑ka mai one toha, mai nameteni.

¹⁸Yeso ati‑ya mai mitabone mai toha, Yeso mai hinakitamabone mai toha, mai na, mai sawemeteni. Madi towe mai sawi‑ka mai‑ya Yeso nakitamahari nematane.

¹⁹Yeso borone‑ya mai nafi boyoni nofa, mai kiyana Yeso‑ya mai boyona, mai kitamameteni.

Mai nafi‑ya Yeso kanawato

²⁰Yeso hika mai da‑daba mai‑ya kiine, mai‑ya hiyare,

“Yama dama dai nokotonira Deoso dai‑ya kasomebona, Deoso ai nafi‑ka hidi kitabote tohawahe‑ya dai sawiwahaboneni.

²¹Dai fime Deoso dai‑ya kasomebona, dai korimanawahaboneni. Dai ohina Deoso dai‑ya kasomebona, dai ya‑yainawahaboneni.

²²Dai‑ka Ayo neme‑ke‑ya dai nofa ihi dai‑ya mai kako, dai‑ya mai kananihe, dai‑ya mai wee na, Deoso dai‑ya kasomebona,

²³6:23 Yodeo mai ya‑yaini nafiya, mai yoranimisateni.dai ya‑yainahi. Dai ya‑yaini ihi dai yoranimisahi. Neme‑ya dai ene manakone nafe dai kayafaboneni. Hibati‑ya Deoso ati‑ya mai mi‑mita‑mete mai‑ya mai‑ka idi mai kakomete, dai‑ya mai kakomakineni.

²⁴Ka! Dai‑ka yama dama‑ya dai nokotonihe dai‑ka yama hawa toha, neme‑kaya dai‑ka yama wadaraboneni.

²⁵Ka! Dai korimana dai toha yamata dai nokotonihe dai fimiwahaboneni. Hibayata dai ya‑yaina dai toha, dai ohinabone, dai ohini nafiteboneni.

²⁶6:20-26 Hibayata‑ka yama dai nokotoniriyahi. Bofe‑ya ai sawi yabora, Deoso‑ka yama dai nokotonibisahi.Ka! Dai‑ya mai nafi nofa dai noko wadahi. Deoso ati tamine‑ya keyehe‑ya mai hirinamete mai‑ya mai‑ka idi mai nofameteni.

Dai‑ya mai ka‑kako mai‑ya dai nofahi

²⁷Owati dai mitahi. Dai‑ya mai nofara mai dai nofiyahi. Dai‑ya mai ka‑kako mai dai kasomiyahi.

²⁸Dai‑ya mai yoko mai‑ya dai kasomiyahi. Dai‑ya mai bisina mai tamine dai hiyarahi, Deoso mai‑ya kasomebonaha.

²⁹Dai ebete‑ya batanariya, dai ebete fami‑ya batanariho. Dai‑ka bora neme‑ya mai kayafa, makobote bora one‑ya mai kayafamakiya, dai yawariyahi.

³⁰‘Oka yama honita‑ba daatinahi.’ Mai ati na,

mai‑ka yama‑ba dai daaniyahi. Dai‑ka yama mai hibote‑ya dai haatonamakiriyahi.

³¹Hini tiwa‑ya tinofi‑nima mai one tinofahi. Hini tiwati koboni‑ka mai‑ya tikasomiyahi.

³²Dai‑ya mai no‑nofa mai‑ya dai nofa, mai one‑ya dai nofariya, dai ene amosi awirani. Mai ati kasira hini mai one‑ya mai nofateni.

³³Dai‑ya mai ka‑kasoma mai‑ya dai kasomiya, mai one‑ya dai kasomi awiriya, dai ene amosarani. Mai ati kasira hini mai one‑ya mai kasomateni.

³⁴Dai‑ka yama‑bone mai daanamatasabone mai‑ya yama dai daa, yama mai daanamarabone mai‑ya yama dai daani awiriya, dai ene amosarani. Mai ati kasira hini mai one‑ya yama mai daateni, yama mai daanamakebonehe.

³⁵Dai‑ta dai‑ya mai kako‑ya mai dai nofahi. Mai‑ka yama‑bone dai daana, manakone dai haatonamakiriyahi. Makobote Deoso dai‑ka yama manakone‑ya daanibisebonane. Haa‑nima dai niya, Deoso kitabote ene‑nima dai ene naboneni. Deoso ati‑ya mai nofara mai toha, hini mai‑ya mai nokotonihe mai toha, mai na, mai‑ya Deoso kasomatene.

³⁶Ai‑ka Abi neme‑ke yawa kanibote re, ai‑ka Abi ene‑nima dai ene nahi.

Mai dai kakoriyahi

³⁷Mai‑ya dai kakoriyahi. Mai dai nofiya, dai‑ya mai kakoraboneni.

“Towe amatini.” Dai ati riyahi.

“Towe amatini.” Dai ati niya,

“Towebisa dai amani.” Mai ati naba awineni.

Mai‑ya dai ati somawamiya, dai‑ya mai ati somawamaboneni.

³⁸6:37-38 Yeso hini ati‑ya kemo, Deoso tamine‑ya hiyare, ai ene amosa manakone Deoso daanebona, manakone fiyakanebonane.Mai‑ka yama‑bone‑ya dai daana, dai‑ka yama‑bone‑ya mai daanaboneni. Dai‑ka yama‑bone midikani amosiya, kisanisa, wiye kibawahabone, kibi fiyakanaboneni. Yama‑ya dai daani‑nima yama‑ya dai‑ya mai daanaboneni.” Yeso ati nematane.

³⁹6:39 Fariseo mai tosaware, mai ihi mai one tosawarihari teni.Mai‑ya kanawato, mai‑ya hiyare,

“Mai noki wadikimara hawi‑ya mai ibi yofikiterani. Mai noki wadikimara mai fami towaka, mai ibi yofikanabone mai ati na, hodi‑ya mai fami sonirisikimaboneni.

⁴⁰Ai‑ya ka‑kanawato yama‑ya wato ba‑basi ne. Ai‑ya kanawato hawa toheya, ati‑nima ai ati naboneni.

⁴¹Dai owa ene dai kadiki nafimariyahi. Hini dai ene dai kadiki ba‑basi nibisahi. Awa hibakori dai owa noko‑ya boka, awa ibe dai noko‑ya foyana, awa hibakori‑ya dai bikanamaterani, awa ibe dai noko‑ya foyaro.

⁴²‘Soho, awa hibakori tiwa noko‑ya boka, soba·onamaboneni.’ Titerani, tiwa noko‑ya awa ibe foyaro.

Mai ihi towe bide toha mai‑ya tikanawatoriyahi, tiwa ene towe ba‑basi naro. Towe amatini. Tiwa noko‑ka awa ibe sobatinamahi. Tiwa noko amosawamiya, mai‑ka awa hibakori sobatinamaneni. Tiwa ene amosawami bahiya, mai one‑ya tikanawatohi.

Awa bono hini ade‑ya yanateni

⁴³Awa bono amosa‑ya awa bono towe yanarihi, awa bono kabara‑ya awa bono amosa yanarihi, teni.

⁴⁴Bisina‑ya fiko yanarihi, atiwa‑ya ofa yanarihi, teni. Fara‑nima, mai ihi dai awiya, mai atibodi dai watoteni.

⁴⁵Mai atibodi towe tohiya, mai ati towe tohaboneni. Mai atibodi amosiya, mai ati amosaboneni. Ai atibodi ati‑nima ai ati yanateni.

Yobe‑ya mai wa‑wama

⁴⁶‘Ayo, oka hidi amatini.’ Hiniya dai ati niya,

owati‑ya dai tokadabara, owa‑ya dai ayoriyahi.

⁴⁷Owa‑ya mai kama, owati‑ya mai mita, owati‑ya mai tokadaba na, haa‑nima mai teni.

⁴⁸Ai owa hika yobe‑bona‑ya wamanane. Hika yobe ewene hodone kowi‑ya, yati webote mese‑ya yobe ewene waari, yobe hawa toheya, faha fowe nafe‑ya yobe wafi, yobe ewene hodone kowi, yobe wai kitane.

⁴⁹6:47-49 Faha fowe nafe Yeso ai ene‑ya kadikebona tamine amane. Yeso ati ai tokadaba ai ene‑ya Yeso kadikeya, ai‑ya weeni awirebonane. Yeso ati mai tokadabara mai ihi‑ya Yeso kadikeya, mai‑ya weeni kitebonane.Owati‑ya mai mitiya, owati‑ya mai tokadabara, haa‑nima mai nibisaboneni. Ai owa hika yobe‑bona‑ya wami mese‑ya wamane. Yobe hawa toheya, faha fowe nafe‑ya yobe wafi, yobe sone, yobe nafi aba kanibote nane.” Yeso ati nematane.

Sodado mai‑ka hidi Yeso ati‑ya nofe

¹Yeso mai‑ya hiyari hawa toheya, Kafanaho‑ya toke, kobonematane.

²Sodado mai‑ka hidi hika yo‑yose owa‑ya nofi nafi, hika yo‑yose kiyani nafi, abi yanatonematane.

³Yeso tamine‑ya mite, Yodeo mai‑ka hidi mai one‑ya yosematane, Yeso‑ya mai kakamabonehe, hika yo‑yose Yeso hinakitamebonaha.

⁴Yeso‑ya mai kobona, Yeso‑ya mai haana,

“Yeso, ai tokomahi, Sodado‑ka hidi tikasomabonehe. Sodado mai‑ka hidi ati some, ene amosane.

⁵Sodado mai‑ka hidi ai nafi‑ya nofe, Deoso‑ya mai hi‑hiyara‑ke yobe‑ya wamanemarine.” Mai ati nameteni.

⁶Sodado tabaro‑ya mai toka, mai koboni yanatoniya, Sodado mai‑ka hidi‑ka no‑nofa mai one hiyosemakitasameteni, fai ati‑ya mai tokaminamakitasabonehe.

“Yeso, oka hidi webote amatini. Oka yobe‑ya tikariyahi. Towe ama·oni. Amosabotebisa amatini.

⁷Towe ama·oni. Fara ihi tiwa owawitirani. Tiwati yanana, tiwati ihi oka yo‑yose kitamebonane.

⁸Oka hidi ati‑nima oteni. Oka sodado owati‑nima mai teni. Fara‑nima tiwati yananiya, oka yo‑yose kitamebonane.” Sodado mai‑ka hidi ati nematane.

⁹Ati tamine Yeso himite, Yeso ya‑yaine, mai dama mai naha mai‑ya hiyare,

“Owati dai mitahi. Sodado mai‑ka hidi owati‑ya nofi nafine, Yodeo ai toha, owati‑ya dai nofi bi‑bidi neni.” Yeso ati nematane.

¹⁰Sodado mai‑ka one mai hiyari hawa tohe, mai winitonama, sodado mai‑ka hidi‑ka yo‑yose kitame‑ya mai awameteni.

Fana maki wadamare bidi‑ya Yeso nakitame

¹¹Yeso hika mai da‑daba mai eyehe Nahi‑kaya toke, mai one dama mai tokomakemeteni.

¹²Sidadi‑ka nokobi yakari‑ya mai kakiya, yetene abo‑ya mai diwakana, mai‑ya Yeso awematane. Hibati‑ya badi abe, madi ohari wama, bidi ohari abamakitasematane. Nahi‑ya mai wi‑wina mai dama fana‑ya mai dabameteni.

¹³Yetene madi ohina‑ya Yeso awe, atibodi komahari, ati yanane,

“Ohitiriyahi.” Ati nematane.

¹⁴Abo foya‑ka‑ya Yeso boyone ene mai maanake,

“Yetene, tikitamahi.” Ati ne,

¹⁵Yetene itarimisame, ati yananamematane. Yetene‑ya Yeso daatonamematane, yetene madi‑ya.

¹⁶Yeso ene‑ya mai awa, mai habi siitona, Deoso‑ya mai kahiyara,

“Deoso ati ene Deoso ati‑ya mi‑mita oda‑ya dabawahane, kitabote amane. Deoso‑ka ai amani, ai‑ya kasomane.” Mai ati nameteni.

¹⁷Yetene‑ya nakitame tamine‑ya mai hiyara, Yodeya‑ka mai tabori dami‑ya mai ati tamine‑ya mai mita, Yodeya yakari‑ka mai ati tamine mai himitaharemeteni.

Deoso‑ka amatiraniha?

¹⁸Yowaho‑ya mai da‑daba Yeso ene tamine‑ya mai kamineni, Yowaho‑ya.

¹⁹Hika mai da‑daba mai fama mai‑ya yose, Yeso ati‑ya mai mitabone,

“‘Deoso‑ka kakibona mai ati namete fara amatiraniha? Fara tihi awiriya, Deoso‑ka yokana oda nimanaboneni.’ Dai ati niyahi.” Yowaho ati nematane.

²⁰Yeso‑ya mai tonaka,

“Yowaho Batita oda‑ya yosene, tiwati oda mitabonehe. Deoso‑ka kakibona mai ati namete fara amatiraniha? Fara tihi awiriya, Deoso‑ka yokana oda nimanaboneni.” Mai ati nameteni.

²¹Mai demena mai noki‑ya Yeso mai dama mai‑ya nakitamematane. Mai kiyana mai toha, mai hi‑hiyana mai toha, madi foyi‑ka mai toha, mai na, Yeso mai‑ya nakitame, yama‑ya mai awaramete Yeso ene yama‑ya mai awawahameteni.

²²Yowaho‑ya mai da‑daba mai‑ya Yeso hiyare,

“I‑di Yowaho‑ya dai towakamiya, owa ene dai kamina, owati dai kamina, dai nahi. Yama mai awaramaro yama mai awawaha, mai ka‑kakona‑maro mai yakanamawaha, mai mese towe tohamaro mai mese amosawama, mai narabi hawiramaro ai ati‑ya mai mitawaha, mai abamaro mai kitamawaha, yama mai kihara Deoso ati amosabote‑ya mai mitawaha nineni.

²³Owa tamine‑ya mai miti‑ya mai yawi awiriya, Deoso mai‑ya kasomebonane.” Yeso ati nematane.

²⁴Yowaho‑ka yo‑yose mai towakama, mai nowati‑ya i‑di Yowaho tamine‑ya mai dama mai‑ya Yeso hiyare,

“Hibati‑ya i‑di Yowaho‑ya dai toka, hini yamata dai awabone dai tokiti? Watikoro henerikane dai awabone dai tokiraniha?

²⁵Bora amosabote‑ya sakone dai awabone dai ati na awineni. Yama dama mai kiha bora amosabote mai sakona, kabani‑kaya mai winatera, hidi webote‑ka yobe‑ya mai winateni.

²⁶Deoso ati‑ya mi‑mita‑ya dai awabone dai ati na, fare Yowaho i‑di Deoso ati‑ya mi‑mita amane. Yowaho‑ya Deoso yosemarine.

²⁷Fara Deoso‑ka yama hani ati dai mitahi.

‘Owati timitahi. Oka yo‑yose bofe‑ke oyoseboneni, tiwa hawine‑bone‑ya hawa tonihibonaha.’ Deoso‑ka yama hani ati na,

i‑di Yowaho Batita tamine amane.

²⁸Yowaho Batita amosi nafi, hibati‑ka mai nafi amosi bi‑bidi nibisa, Deoso ai nafi‑ka hidi kitabote tohawahe‑ya mai sawiya, mai nafi amosi ba‑basi naboneni.” Yeso ati nematane.

²⁹Kofeno‑ka yinero‑bona‑ya mai ha‑haa mai toha, mai one dama mai toha na, hibati‑ya Yowaho mai‑ya habanirise, Yeso ati‑ya mai mita,

“Deoso ene amosabote amane.” Mai nafi ati nameteni.

³⁰Fariseo mai toha, Mose‑ka yama hani ati‑ya mai ka‑kanawato mai toha, mai na, Yowaho mai‑ya habanirisi awire, Deoso ati‑ya mai nofarameteni.

³¹“Hini yamata‑nima dai niti?

³²7:32 Madehe one ya‑yai, mai one ohi na, mai one hiniya naha, mai ya‑yaina mai‑ya mai nofara, mai ohina mai‑ya mai nofaharirani. Fara mai‑nima fariseo mai toha, Yowaho Batita‑ya mai nofara, i‑di Yeso‑ya mai nofaharirani.Haa‑nima dai nineni. Madehe nahore, mai ibi hiyara, haa‑nima mai ati na,

‘Ka! Kaida oda afona, dai wayomi awirani. Mai tabiyo oda ohina, dai ohini awirani.’ Madehe one ati na,

mai one‑ya mai nofara mai‑nima dai nineni.

³³Yowaho Batita baho‑ya kabare, fino‑ya fawarihi ne,

‘Madi towe i‑di Yowaho‑ya foyane.’ Dai ati teni.

³⁴Dai‑ka Ayo neme‑ke tafi ba‑basi ne, fino‑ya fawane,

‘Yeso towe amane, tafi nafi, fino‑ya fawa, kofeno‑ka yinero‑bona‑ya mai ha‑haa mai toha, mai ihi amosara mai toha, mai na, mai‑ya Yeso nofatene.’ Dai ati teni.

³⁵Yama‑ya mai wata mai ai awa, mai ai watoteni.” Yeso ati nematane.

Yeso teme‑ya fana sokona

³⁶Fariseo mai‑ka owa Yeso‑ya himanematane, fai tabaro‑ya tafebonaha. Mai towakama, mai tafameteni.

³⁷Fariseo‑ka yobe yakari‑ya fana wina, fana ihi amosara, Yeso tamine‑ya mita, yama mahi amosa‑ya damakana, tokomakemeteni. Yama mahi amosa wiye yati amosa wamani meteni.

³⁸Yeso teme‑kaya itarisa, ohina, noki fahi‑ya Yeso teme‑ya nowinihe, tati kone‑ya Yeso teme‑ya tamo, Yeso teme‑ya toma, yama mahi amosa‑ya Yeso teme‑ya sorokaremaki, Yeso teme‑ya tamo, fai teme‑ya toma nameteni.

³⁹Fariseo fana ihi‑ya awe, yawe,

“Yeso‑ya fana boyona, fana towe amani. Yeso i‑di Deoso ati‑ya mi‑mita tohe‑mana, fana tamine‑ya wato nane.” Atibodi ati nematane.

⁴⁰Fariseo‑ya Yeso hiyare,

“Simaho, owati timitahi.” Ati ne,

“Naki, tiwati omitabani.” Ati nematane.

⁴¹“Ai owa defeni 500 toha, ai owa defeni 50 toha mai nineni.

⁴²Makobote yinero mai kihara, yinero mai daatonamara, yinero hidi mai‑ya kasome, yinero‑ya haanamarebona ati nane. Ebeni‑ke yinero hidi‑ya nofi nafibati?” Yeso ati nematane.

⁴³7:41-43 Ai‑ya kasomi nafi ai nofi nafine. Ai‑ya kasomi nafire ai nofi nafirene. Fara Yeso ati ene fana ihi towe manakone‑ya Deoso haanamare, Yeso‑ya fana nofi nafemetemoneni. Simaho hini‑ya kahiyare, “owa ene amosa hinama amani.” Atibodi ati ne, Yeso‑ya nofi nafirematamonane.“Yinero hidi‑ya defeni ba‑basi nemari‑ta hidi‑ya nofi ba‑basi nibisebonane.” Simaho ati ne,

“Fara amani. Tiwatoneni.” Yeso ati nematane.

⁴⁴Fana‑ya kakatomeya, Simaho‑ya hiyare,

“Fana ihi tiawahi. Tika yobe‑ya okiyoma, owa teme sokoni‑bone‑ka faha‑ya daatira, fana noki fahi‑ya owa teme‑ya nowina, tati kone‑ya owa teme‑ya tamoneni.

⁴⁵Owa noko‑ya tomatini awirani. Fana kobona owa teme‑ya tomanasa nibisani.

⁴⁶Owa tati‑ya oyo‑ya sorotikanari awirani. Owa teme‑ya fana yama mahi amosa‑ya sorokaribisineni.

⁴⁷Hibati‑ya fana ihi towe dama, ihi towe manakone wadamarani. Owa‑ya nofi nafineni. Mai ihi amosamone mai ati na, owa‑ya mai nofi nafirani.” Yeso ati nematane.

⁴⁸“Sima, tiwa ene towe manakone wadamarini.” Yeso ati nematane.

⁴⁹Yeso eyehe mai tafa Yeso ati‑ya mai mita,

“‘Tiwa ene towe manakone wadamarini.’ Yeso ati ne,

ai ati ene ai owa ene towe manakone fawaterene.” Mai ati nameteni, mai ibi hiyararo.

⁵⁰“Sima, owati tinofa ihi Deoso ai nafi‑ka hidi kitabote tohe‑ya tisaweboneni. Tiwa tabaro‑ya tikamahi.” Yeso ati nematane.

¹Makobote Yeso hika mai 12 kana mai eyehe sidadi dami‑ya toke, mai tabori bide‑ya tokahari, Deoso ai nafi‑ka hidi kitabote tohawahebona tamine‑ya hiyarematane.

²Yeso‑ya mai fanawi sawemeteni. Hibati‑ya mai one‑ya Yeso nakitame, mai one‑ya madi towe mai foyamete, Yeso ati ene mai kananameteni. Hibati‑ya madi towe mai 7 kana i‑di Mariya Madarena‑ya mai foyamete, Yeso ati ene mai kananawahameteni.

³I‑di Sosana sawi, i‑di Kosa fadi i‑di Yo·ana sawi, mai fanawi one dama Yeso‑ya mai dabameteni. I‑di Kosa Erodi tabaro‑ya yama‑ya aninematane. Yeso‑ya mai da‑daba mai tafe‑bone‑ya mai fanawi kanikameteni, hini mai‑ka yinero‑ya.

Yamata noki‑ya werene

⁴Tabora dami‑ka mai kake, Yeso‑kaya mai yorotokana, Yeso mai‑ya hiyare, hini ati yokana‑ya kemone,

⁵“Ai owa yamata noki‑ya werene, hawi fowari‑ya noki one sona, mai taihinisa, bani bidi mai hikaba hina, yanarani.

⁶Yamata noki one yati iti‑kaya sona, yaniya, fahi wadara, wayatoneni.

⁷Atiwa mete‑ya yamata noki one sona, atiwa ene yamata yani amosarani.

⁸Bodo‑ya yamata noki one sona, yana, bona, ade ohare‑ka boni 100 tohawahani.” Yeso ati nematane.

“Owati dai mita, owati dai tokadabahi.” Ati ne,

yamata noki tamine‑ya Yeso hiyare, haa‑nima ati nematane.

⁹“Tiwati tikahema, tiwati oda watorini.” Yeso‑ya mai da‑daba mai ati nameteni.

¹⁰“Deoso ai nafi‑ka hidi kitabote tohawahebona tamine dai watowahaboneni. Mai one‑ya ohiyara, owati okahemobisateni. Deoso‑ka yama hani ati‑maro‑nima mai nawahani.

‘Owa ene‑ya mai awa, owa‑ya mai watorihi, owati‑ya mai mita, owati‑ya mai watorihi nani.’ Yama hani ati neni.

¹¹Yamata noki tamine yokana dai mitahi. Yamata noki Deoso ati tamine amane.

¹²Fadara‑ka wami ai atibodi tamine amani. Hawi fowari‑ya yamata noki sona, Deoso ati‑ya mai mita, Diaboro ene Deoso ati‑ya mai ati kadamowama kanibote na, Deoso ati‑ya mai nofara, Deoso ai nafi‑ka hidi kitabote tohawahebona‑ya mai sawiteraboneni.

¹³Yati iti‑kaya noki one sona, Deoso ati‑ya mai mita, ati mai nofa, mai ya‑yaina, makobote mai mai weehiniya, mai maakana kanibote na, Deoso ati‑ya mai tokadabamarani.

¹⁴Atiwa mete‑ya yamata noki sona, Deoso ati‑ya mai mita, makobote yinero‑ya mai nokotonihi, yama bara‑ya mai nokotonihi, mai siwa, yamata bonora‑nima mai na, mai ihi amosa‑ba wadarani.

¹⁵Bodo‑ya yamata noki sona, Deoso ati‑ya mai mita, Deoso ati‑ya mai atibodi nofi kita, mai atibodi amosa, mai maakarani. Mai ihi amosani.

Nabarina tamine

¹⁶Nabarina ai botokana, nabarina wahi ai barikiterani. Nabarina ai kanawaarikosateni, mai kiiyomama yama‑ya mai awabonehe.

¹⁷Mai atibodi ati dai watora dai watowahaboneni. Mai ihi‑ya mai kema, mai ihi nafi dai watowahaboneni.

¹⁸Owati dai mita, owati dai nofahi. Deoso ati‑ya mai mita, ati mai hinofeya, Deoso ati‑ya mai wato ba‑basi naboneni. Deoso ati‑ya mai mita, ati mai hinofareya, yama‑ya mai watoteraboneni.” Yeso ati nematane.

Yeso madi kamake

¹⁹Yeso madi, Yeso sohori mai na, mai kamakemeteni, Yeso‑ya mai hiyarabonehe. Mai dama mai ihi Yeso‑ya mai tokomakirameteni.

²⁰“Yeso, tika ami tika soho mai eyehe kobona, tiwa‑ya mai haana, mai nahani, yobe fowari‑ya.” Mai one ati nameteni.

²¹“Deoso ati‑ya mai mita, ati mai tokadaba, okomi mai toha, oka soho mai toha, mai nineni.” Yeso ati nematane.

Kanawa boki yanatona

²²Mahi owa‑ya kanawa‑ya Yeso hika mai da‑daba mai eyehe foye,

“Hima, wara webote kowani‑kaya ai tokahi.” Yeso ati nematane.

Mai toka,

²³mai yakakaniya, Yeso amonematane. Faha bai‑ya mai tohiya, boni yanana, faha rike nafe ihi kanawa boki yanatonameteni.

²⁴Yeso‑ya mai mowakana,

“Ayo, Ayo, ai abi bonehe.” Mai ati nameteni.

Yeso dodafi, boni‑ya wee, faha rike‑ya wee ne, ati ene boni fawa, faha rike fawa nameteni.

²⁵Mai‑ya hiyare,

“Hini yamata ihi dai kakomeheti? Osawe, owa‑ya dai awakarini?” Ati nematane.

Ene mai hiawe, mai habi siitona, mai ibi hiyara,

“Ebeni‑ke tohati? Ai‑nima Yeso ni awire, kitabotebisa amane. Yeso ati‑ya boni mita, fawa, faha rike fai ati‑ya mita, fawa nineni.” Mai ati nameteni.

Madi towe boroko mai‑ya mai foya

²⁶Kerasa mai‑ka wami‑ya mai kobonameteni. Karireya kowani‑kaya Kerasa mai winateni.

²⁷Yeso yoratomaroseya, tabora‑ke mai‑ka owa kobonematane. Madi towe fai‑ya mai foya, mai ihi bora‑ya sakonamarihi, yobe‑ya winamarihi, mai tame‑kaya winematane.

^28-29Yeso‑ya awe, kaikane, Yeso noko‑ya home,

“Maki‑ya tisawimariyahi.” Yeso ati ne,

“Yeso, Deoso kitabote Bidi amatini. Owa arabatinahi. Owa bisitiriyahi.” Maki ati ne, ati kitematane.

Hibati‑ya koheti‑ya maki‑ya sodado mai sokini damameteni. Mai hiwakatome, madi towe ene maki kiti nafi, koheti‑ya betekasarimane, kabani‑kaya kanani tokawahematane. Haa‑nima maki ene ne, ene damematane, madi towe ene.

³⁰“Tiwa oni eme titi?” Yeso ati ne,

“Ibowa ama·oni.” Maki ati ne, fara madi towe mai dama maki‑ya mai foyameteni.

³¹“Hodi yaba‑ya oda‑ya tiyoseriyahi.” Madi towe mai ati nameteni.

³²Adami‑kaya boroko mai dama mai tafameteni.

“Boroko mai‑ya oda tiyosebisahi.” Madi towe mai ati na,

“Sibarini, boroko mai‑ya dai foyahi.” Yeso ati ne,

³³boroko mai‑ya madi towe mai tokiyoma, boroko mai kanani tokofawaha, wami kote wadara‑ya mai nafi toka, mai boka, mai nafi abameteni.

³⁴Boroko mai‑ya mai na‑nawada Yeso ene‑ya mai awa, mai kanana, sidadi toha, tabora bide toha na‑ya Yeso ene‑ya mai kaminameteni.

³⁵Yeso ene‑ya mai awabone mai kamakemeteni. Hibati‑ya maki madi towe mai foyimaro‑ke maki hibayata bora‑ya weyenawahe, hibati‑ya ka‑kana nemari amosawame, itari‑ya mai awa, Yeso‑ya mai nayofinameteni.

³⁶Yeso hinakitame‑ya mai awa Yeso ene tamine‑ya mai kaminameteni.

³⁷Kerasa mai‑ka wami‑ya mai wi‑wina mai toha, Kerasa mai‑ka wami yakari‑ya mai wi‑wina mai toha, mai na, yama yofina ihi Yeso‑ya mai toyosemameteni, yama one‑kaya tokebonaha. Yeso hika mai eyehe kanawa‑ya foyame, mai winitokanamameteni.

³⁸“Tiwa‑ya osaweboneni.” Madi towe mai foyimaro‑ke ati nematane.

³⁹“Owa‑ya tisawiriyahi. Tiwa tabaro‑ya tikamabisahi. Deoso tiwa‑ya nakitame tamine tihiyariyahi.” Yeso ati nematane.

Tokome, hika tabora nafi‑kaya Yeso ene tamine‑ya kaminematane.

⁴⁰Kowani‑kaya Yeso‑ya mai one dama nimana, Yeso kobokanamatase‑ya mai awa, mai ya‑yainameteni.

⁴¹8:41 Hibati‑ya hidi webote‑ya mai koboniya, mai yobati‑kaya mai itametemoneni. Yeso hidi webote amane i‑di Yairo atibodi ati ne, yobati‑kaya itematamonane.Deoso‑ya mai hi‑hiyara‑ke yobe hidi i‑di Yairo tohematane. I‑di Yairo kaki, Yeso yowi‑ya yobati‑kaya ite, Yeso‑ya himanematane, hika yobe‑ya Yeso tokomakibonaha.

⁴²Yairo bide atona ohare kiyani nafe, abi yanatonameteni. Mai dama mai teberi‑ya Yeso tokomakimatane.

⁴³Mai dama mai‑ya fana sawe, hika ama fawani watora, faha fowe 12 kana‑ya hika ama fawani awirameteni. Mediko mai ihi hika yinero nafi tosiyo, hika ama fawarameteni.

⁴⁴Yeso bari‑kaya kamake, Yeso‑ka bora ifi‑ya boyona, hika ama fawanawahameteni.

⁴⁵“Ebeni‑ka tohiti, owa‑ya boyonaro?” Yeso ati ne,

“Tiwa oda boyorani.” Mai ati na,

“Ayo, mai dama hiniya tiwa‑ya mai boyona awineni.” Bedoro ati ne,

⁴⁶“Owa‑ya boyonibisani. Owa ene kitabote owatoneni.” Yeso ati nematane.

⁴⁷“Owa‑ya Yeso watone.” Fana atibodi ati na,

habi siitona, wawawakana, Yeso noko‑ya homa, mai dama mai noki‑ya hiyara,

“Faha fowe 12 kana‑ya oka ama fawani awirani.

‘Yeso‑ka bora ifi boyo·oniya, okitamaboneni.’ Owatibodi ati na,

oka, Yeso‑ka bora ifi boyo·ona, okitamani.” Fana ati nameteni.

⁴⁸“Sima, sibarini.

‘Yeso‑ka bora boyo·oniya, oka ama fawanawahaboneni.’ Tiwatibodi ati na,

fara ihi tiwa onakitamineni. Tikamahi.” Yeso ati nematane.

⁴⁹Yeso hiyareya, Yairo tabaro‑ke owa kamaki,

“Yairo, tikoto abani. Yeso hini tohaya.” Ati nematane.

⁵⁰Ati Yeso himite, Yairo‑ya hiyare,

“Tiwa habo siitoriyahi. ‘Deoso kitatene.’ Tiwatibodi ati nibisahi. Owati tinofiya, tikoto kitamaboneni.” Ati nematane.

⁵¹Yairo tabaro‑ya mai kobona, Yeso ati ene mai one nahokosa, i‑di Bedoro, Yowaho, Tiyako, Yairo, Yairo fadi, mai na, mai tokiyomabisa, mai one nahokosameteni.

⁵²Mai dama mai ohina, hini mai baki‑ya mai boonameteni.

“Dai ohiriyahi. Abi awirini. Hiniya amoneni.” Yeso ati nematane.

⁵³Atona aba‑ya mai watobisa, Yeso‑ya mai hahakanameteni.

⁵⁴Atona aboi yahi‑ya Yeso waratone,

“Tiwaamisamahi.” Ati nematane.

⁵⁵Korimari foyama, kitama, waamisamameteni.

“Tikoto dai natafahi.” Yeso ati nematane.

⁵⁶Yeso ene‑ya Yairo fadi eyehe awe,

“Ka! Yeso kitatene.” Mai atibodi ati nameteni.

“Tikoto onakitama tamine dai kaminariyahi.” Yeso ati nematane.

Mai 12 kana mai‑ya yose

¹Yeso ati ene hika mai da‑daba mai 12 kana mai yorotokana, ati ene mai ihi kitawaha, mai ihi madi towe mai kana, mai ihi mai kiyana mai kitamawaha nameteni.

²Deoso ai nafi‑ka hidi kitabote tohawahebona tamine‑ya mai hiyarabone, mai kiyana mai‑ya mai nakitamabone, mai‑ya yosematane.

³“Dai tokiya, dai‑ka yama‑bone‑ya dai weyeriyahi. Dai dabakiba‑ka awa, yamasi, iyawa, yinero, bora na, dai weyekariyahi.

⁴Mai tabori‑ya dai koboniya, yobe ohari‑ya dai winiyahi. Aka‑ya dai toki awisari‑ya yobe owa‑ya dai winariyahi.

⁵Mai tabori‑ya dai toka, dai ati‑ya mai nofara, dai yananamiya, mai noki‑ya dai teme hibakori dai nanahabiyahi, mai atibodi yama‑ya kadikabonehe.

‘Mai ati oda nofara mai tokineni. Oda ene amani.’ Mai atibodi ati naboneni.” Yeso ati nematane.

⁶Fa‑fai‑ya mai yanana, mai toka, mai tabori dami‑ya Deoso ati amosabote tamine‑ya mai kamina, mai kiyana mai‑ya mai nakitama nameteni.

Yeso tamine‑ya Erodi atibodi kadikane

⁷Yeso tamine‑ya mai‑ka hidi i‑di Erodi mite, atibodi yama‑ya kadiki kitematane. Yeso tamine‑ya mai hiyara,

“Yowaho Batita abe, kitamemonane.” Mai one ati nihi.

⁸“I‑di Eriya kobonamatase awane.” Mai one ati nihi.

“Deoso ati‑ya mi‑mita‑mata abemata, kitame awane.” Mai one ati nihi nameteni.

⁹“Owati ihi Yowaho Batita namidi mai tiihinakosemari, ebeni‑ke tohamata, ene kitemonaha? Yeso oawaboneni.” Erodi atibodi ati nematane.

Mai dami‑ya natafe

¹⁰Yeso‑ka yo‑yose mai kobonama, mai ihi tamine‑ya mai kaminameteni, Yeso‑ya. Yeso hika mai eyehe Besaida‑kaya mai tokameteni, mai one awiri‑kaya mai hasinabonehe.

¹¹Yeso hika mai eyehe toke tamine‑ya mai one mita, mai tokomakemeteni. Mai‑ya Yeso awe, mai‑ya nofe, Deoso ai nafi‑ka hidi kitabote tohawahebona tamine‑ya kamine, mai kiyana mai‑ya nakitamematane.

¹²Mahi toke‑ya mai 12 kana Yeso‑ya mai hiyara,

“Yeso, yobe wadare‑ya ai nahoneni. Mai tiyosehi, mai tabori‑ya mai tokiya, mai tafe‑bone‑ya mai kanikabone, mai amoni‑bone‑ka mai‑ka yobe‑ba mai wasebonehe.” Mai ati nameteni.

¹³“Mai dai natafabisahi.” Yeso ati nematane.

“Oda tefe wadarani. Baho 5 kana, aba mai fama, eya oda tefe nani. Mai tafe‑bone oda kanikaba awineni.” Mai ati nameteni.

¹⁴Mai dama maki mai 5.000 mai kana mai nahameteni. Yeso hika mai da‑daba mai‑ya hiyare,

“Mai nahorisahi. Haa‑ya 50 mai kana mai nahorisa, haa‑ya 50 mai kana mai nahorisa, 50 mai kana mai hinama mai tohahi.” Yeso ati nematane.

¹⁵Mai 12 kana mai ati ihi mai nafi nahorisameteni.

¹⁶Baho 5 kana, aba mai fama na, mai‑ya Yeso damakane, neme‑ya tonokomise, Deoso‑ya hiyarematane. Baho‑ya kebi, mai 12 kana mai‑ya daanematane, mai dami‑ya mai daahinabonehe.

¹⁷Mai nafi tafa, mai korimanama, kote hasina, mai teehina, hisiri 12 kana kibameteni.

“Deoso‑ka Ka‑kadika amatini.” Bedoro ati ne

¹⁸Kabani‑kaya Deoso‑ya Yeso hiyarematane, hika mai da‑daba mai eyehe. Hiyari hawa toheya, hika mai da‑daba mai‑ya hiyaramaki,

“Owa tamine‑ya mai hiyara, eme mai ati niti?” Yeso ati ne,

¹⁹“‘Yowaho Batita amane.’ Mai one ati nihi,

‘I‑di Eriya amane.’ Mai one ati nihi,

‘Deoso ati‑ya mi‑mita‑mata abemata, kitame, fare amane.’ Mai one ati nihi teni.” Yeso‑ya mai da‑daba mai ati nameteni.

²⁰Mai‑ya hiyare,

“Dai‑ta eme dai ati niti?” Yeso ati ne,

“Deoso‑ka Ka‑kadika amatini.” Bedoro ati ne,

²¹“Hehe, fara ama·oni. Hiniya, owa tamine dai hiyarariyahi.” Yeso ati nematane.

“O·ababone, okitamaboneni.” Yeso ati ne

²²“Yodeo mai‑ka hidi mai bi‑bidi na mai toha, Mose‑ka yama hani ati‑ya mai ka‑kamina mai toha, Deoso‑ka yama‑bone‑ya mai da‑daa mai‑ka hidi mai toha, mai na, dai‑ka Ayo neme‑ke ati‑ya mai nofarabone, mai weeni hikitebona, mai hinahabeya, mahi 3 tohe‑ya okitamaboneni.” Yeso ati nematane.

²³Mai nafi‑ya hiyare,

“Owa‑ya dai ati daba, dai‑ka yama dai nokotoniriyahi. Owa‑ya dai dabiya, owa‑ya mai nanahababone‑nima dai‑ya mai nanahabahareba awineni.

²⁴9:24 Tamine yokana amani haro; Yeso‑ya dai nofa dai‑ya mai nanahaba, Deoso tabaro‑ya dai ya‑yainaboneni. Oda abariyahi dai ati niya, Yeso ati‑ya dai tokadabara, dai ohinaboneni.Owa‑ya dai nofa dai‑ya mai nanahabiya, dai abaraboneni. Oda abariyahi dai ati niya, owati‑ya dai tokadabara, dai ababoneni.

²⁵Yama dama‑ya mai kihamaro mai abiya, mai‑ka yama mai‑ya kasomateraboneni. Owati‑ya mai nofara yama hirini‑kaya mai sawiwahaboneni.

²⁶Deoso‑ya mai nofara dai‑ya mai weeni awirabone dai ati na, owa‑ya dai nofarihi, owati‑ya dai nofarihi dai ni‑ya, okomatasiya, dai‑ya onofahariraboneni. Okomatasiya, Owa wehene wadabone, Okobi wehene owa‑ya sawibona, Okobi‑ka yo‑yose amosabote mai wahi owa‑ya sawi naboneni.

²⁷9:27 Mai amoni 8 kanamaki‑ya adami tati‑ya Yeso wehene wadawahe, fara tamine‑ya Yeso hiyarematamonane.Owati dai mitahi. Dai abi awisari‑ya Deoso ai nafi‑ka hidi kitabote tohawahebona dai one awawahaboneni.” Yeso ati nematane.

Yeso wehene wadane

²⁸Mai amoni 8 kani‑ya Bedoro, Yowaho, Tiyako, mai na, mai‑ya Yeso himanematane. Adami webote‑ya Yeso mai eyehe tokomorosematane, Deoso‑ya hiyarebonaha.

²⁹Deoso‑ya Yeso hiyareya, noko bare tohawahe, borone sawa yokana tohawahe, wehene wadawahematane.

³⁰I‑di Mose i‑di Eriya mai fama Yeso‑ya mai hiyarameteni.

³¹I‑di Mose i‑di Eriya mai fama mai wahi wadameteni. Yerosare‑ya Yeso abebona tamine‑ya mai hiyarameteni.

³²Bedoro mai‑ya nokobisa nafe ihi mai amona, mai dodafiya, Yeso wehene‑ya mai awa, Mose‑ya mai awa, Eriya‑ya mai awa nameteni.

³³I‑di Mose, i‑di Eriya, mai yanakanamiya, Bedoro ati yanane,

“Ayo, tiwa‑ya oda sawe, yama sibarini. Dai‑ka wa‑wasa‑ba oda wamanaboneni. Tika ohari, Mose‑ka ohari, Eriya‑ka ohari nebonane.” Bedoro ati ne,

hiniya ati yananematane, yama‑ya atibodi watoreri.

³⁴Bedoro hiyareya, neme sabi mai‑ya barikawama, mai habi siitonameteni.

³⁵Neme sabi‑ya ati kaki,

“Oka Dao amane. Oka Ka‑kadika amane. Ati dai tokadabahi.” Ati nematane.

³⁶Ati fawaneya, Yeso ohari waimatane. Mai amoni dami‑ya yama mai hiawa tamine‑ya mai one‑ya mai kaminarameteni.

Madi towe kanare

³⁷Adami webote‑ya mai amoni ohare, mai tokofawama, bofe‑ya mai dama mai nahameteni.

³⁸Maki sawi, Yeso‑ya haane,

“Ayo, oka dao tiawamatahi. Oka dao ohari amane.

³⁹Madi towe oka dao‑ya waratorimane ene oka dao e‑erine, hini‑ya were, iridi sabone toka nofene. Madi towe toka kanibote re, tokeya, oka dao‑ya bisitene.

⁴⁰Tiwa‑ya mai da‑daba mai haa·ona, madi towe‑ya mai kananihebone, mai ati‑ya madi towe nofare, tokarene.” Ati nematane.

⁴¹“Ka! Owati dai nofara, dai narabo hawirani. Owati dai wato kanibote nahi. Dai‑ya owa sawi nafimaraboneni. Tika dao tiwakamahi!” Yeso ati nematane.

⁴²Bidi‑ya kakameya, madi towe yetene‑ya fatatowitimatane. Yetene wami‑ya sone, hini‑ya werenematane. Madi towe‑ya Yeso weene, yetene‑ya nakitame, yetene‑ya badi‑ya daatonamematane.

⁴³Yeso ene‑ya mai awa, mai atibodi yama‑ya kadika,

“Deoso ene kitabote amane.” Mai atibodi ati nameteni.

Mai dama mai atibodi yama‑ya kadikiya, hika mai da‑daba mai‑ya hiyare,

⁴⁴“Owati dai mitahi. Dai‑ka Ayo neme‑ke‑ya ai owa daanebonane.” Yeso ati nematane.

⁴⁵Deoso ati ene Yeso ati‑ya mai watora, Yeso‑ya mai nayofina, mai ati yanarameteni.

Ebeni‑ke ba‑basi nati?

⁴⁶Yeso‑ya mai da‑daba mai ibi kadika,

“Ebeni‑ke kiti ba‑basi nabati?” Mai ati na,

mai ati fara hinama tohara, mai ibi ati waranameteni.

⁴⁷Mai atibodi ati‑ya Yeso wato, ewe‑ya nawaawamematane, hini yowi‑ya.

⁴⁸Mai‑ya hiyare,

“‘Owa ene Yeso ya‑yainebonane.’ Dai atibodi ati na,

ewe dai kasomiya, owa‑ya dai kasomahari, Okobi‑ya dai kasomahari neni. Bi‑bidi ne‑mona ati ne, fare ba‑basi nibisane.” Yeso ati nematane.

Dai ati hamariyahi

⁴⁹“Ayo, tiwa oni‑ya ai owa hirine, madi towe mai‑ya kananihi. Ai‑ya dabare, oda ati barihinene.” Yowaho ati ne,

⁵⁰“Maki‑ya dai ati baririyahi. Dai‑ya mai kakora, dai‑ya mai kasomabisateni.” Yeso ati nematane.

⁵¹9:51 Yeso tokomisebona ati ne, awa‑ya Yeso mai nawaanabone tamine toha, Deoso tabaro‑ya Yeso tokebona tamine toha nane.Yeso tokomisebona hika mahi koboni yanatone, Yerosare‑ya nokotoniwahematane, tokomebonaha.

⁵²Hika mai one‑ya yose, mai dai tohameteni, mai amoni‑bone‑ka mai‑ka yobe‑bona‑ya mai wasebonehe. Samaritano mai tabori one‑kaya hika yo‑yose mai koboniya,

⁵³Samariya‑ya mai wi‑wina mai ati a‑arira, Yerosare‑ya mai tokabone mai‑ya mai kasomi nofarameteni.

⁵⁴Mai ati‑ya i‑di Tiyako, i‑di Yowaho mai mita, mai ati yanana,

“Ayo, Deoso oda haaniya, yifo hirini kisaboneni, mai‑ya sarikanabonehe. Tiwati sibakarini?” Mai ati nameteni.

⁵⁵Yeso mai‑ya ati barine, mai‑ya weene,

“Haa‑nima oterani. Owati somabisateni.

⁵⁶Mai‑ya okasomabone okemaro, mai nanahabi onofarani.” Yeso ati nematane.

Tabora one‑kaya mai tokawahameteni.

⁵⁷Mai tokiya, ai owa kamaki,

“Yeso, tikami‑ya tiwa‑ya osaweboneni.” Ati ne,

⁵⁸“Bani mai one tabori hodi‑ya toha, bani mai afe wada mai bori tohateni. Owa‑ta owa tabaro wadarani.” Yeso ati nematane.

⁵⁹Maki bare‑ya hiyaratase,

“Owa‑ya tisawihi.” Yeso ati ne,

“Ayo, okobi abeya, hika yama kote okayafiya, tiwa‑ya osawiwahaboneni.” Ati nematane.

⁶⁰“Abi‑ka yama hini tohiya, abi abeya, owati‑ya mai nofara abi‑ka yama‑ya mai kayafabisiya, yama sibaraboneni. Tiwa‑ta tikamiya, Deoso ai nafi‑ka hidi kitabote tohawahebona tamine‑ya tihiyarabisiyahi.” Yeso ati nematane.

⁶¹“Ayo, tiwa‑ya osaweboneni. Oka mai haa·oniya, okomakeboneni.” Ai owa ati nematane.

⁶²Yeso ati yanane,

“Deoso‑ka yama‑ya mai nokotonihebone mai ati na, makobote yama bara‑ya mai nokotonibisa, Deoso ai nafi‑ka hidi kitabote tohawahebona‑ya mai sawiraboneni.” Yeso ati nematane.

72 mai kana mai‑ya Yeso yose

¹Makobote mai one 72 mai kana Yeso hini tokomakibona‑kaya mai‑ya yosebona mai‑ya hiyare,

“Mai tabori‑nima dai fa‑famiyahi.

²10:2 Deoso‑ka yamata Deoso ati‑ya mai watora mai tamine amani. Deoso ati‑ya mai wata mai damara, Deoso ati‑ya mai wata mai dodama, mai one‑ya mai kanawatoya, yama amosabone, fara tamine amani.Deoso‑ka yamata dama marafakana, yamata‑ya mai tonaka mai damara, Deoso dai hiyarahi, mai one tokomakibakaro, Deoso‑ka yamata‑ya mai kakamabonehe.

³Owati dai mitahi. Dai tokiya, kaneiro bidi mai‑nima dai nahi, dai hamariyahi. Yome hame‑nima mai na, mai‑ya dai oyose, dai noko wadiyahi.

⁴Dai tokiya, yinero dai towakariyahi, yamasi dai weyerihi, sanidariya dai kakibirihi, dai nahi. Dai tokiya, mai‑ya dai koboniya, dai maanamariyahi. Hini dai toka, dai tokiyahi.

⁵Mai‑ka yobe‑ya dai tokiyomiya, dai ati yananiyahi.

‘Ahi‑ya dai wi‑wina Deoso dai‑ya kasomebonane.’ Dai ati niyahi.

⁶Yobe hidi ati someya, yobe‑ya mai sawe mai‑ya Deoso kasomebonane. Yobe hidi ati amosareya, mai sawe mai‑ya Deoso kasomarebonane.

⁷Mai tabori‑ya dai koboniya, Yobe ohari‑ya dai wina, dai dayoriyahi. Dai tefe‑bone‑ya mai daaniya, dai tafiyahi. Hini mai daahini‑ya dai fawiyahi. Mai‑ka yama ai anina, ai‑ka yama manakone‑ya mai daateni.

⁸Mai tabori‑ya dai koboni‑ka dai‑ya mai ati nofa, dai tefe‑ba mai daaniya, dai tafiyahi.

⁹10:9 “Deoso ai nafi‑ka hidi kitabote tohawahebona dai‑ya sawine.” I‑di Yeso bofe‑ya sawi tamine amane.Mai tabori‑ka mai kiyana, mai‑ya dai nakitamiyahi.

‘Deoso ai nafi‑ka hidi kitabote tohawahebona dai‑ya sawine.’ Dai ati niyahi.

¹⁰Mai tabori‑ya dai koboni‑ka dai‑ya mai nofariya, mai‑ka hawi‑ya dai demenariya, mai‑ya dai hiyariyahi.

¹¹‘Dai‑ka wami hibakori oda teme kiha oda nanahabineni, dai atibodi yama‑ya kadikabonehe. Deoso ai nafi‑ka hidi kitabote tohawahebona dai‑ya kobone, dai nofarene.’ Mai‑ya dai hiyara, dai ati niyahi.

¹²Owati dai mitahi. Hibati‑ya Sodoma‑ya mai wi‑wina Deoso mai‑ya nanahabematamonane. Ai nafi ene‑ya Deoso kadikeya, mai‑ya bisinamatasebonane. Owa tamine dai kamina, dai ati‑ya mai nofara mai‑ya Deoso bisini kitabisebonane.

¹³Ka! Korasi‑ya dai wi‑wina, Besaida‑ya dai wi‑wina, dai na, dai ene manakone wadani. Owa ene kitabote‑ya dai awamaro, owati‑ya dai nofaramaroni. Tiro‑ya mai wi‑wina‑mete, Sidoho‑ya mai wi‑wina‑mete, mai na, Deoso ati‑ya mai tokadabara, tabora fami‑ya Deoso nanahabematamonane. Owa ene kitabote‑ya mai awi bahamete‑mani, mai atibodi amosawama nemeteni.

¹⁴Hibati‑ya Tiro‑ya mai wi‑wina‑mete, Sidoho‑ya mai wi‑wina‑mete, mai na, ai nafi ene‑ya Deoso kadikeya, mai‑ya weenamataseya, Deoso dai‑ya weeni kitabisebonane.

¹⁵Kafanaho‑ya dai wi‑wina neme‑ya dai winabone dai ati na, yama hirini‑kaya dai sawibisaboneni.” Yeso ati nematane.

¹⁶Hika mai da‑daba mai‑ya hiyare,

“Dai ati‑ya mai tokadaba owati‑ya mai tokadabahareni. Dai ati‑ya mai nofara owati‑ya mai nofaharirani. Owati‑ya mai nofara owa‑ya yose‑mari ati‑ya mai nofaharirani.” Yeso ati nematane.

¹⁷Mai toka, Yeso ati‑ya mai kaminameteni. Makobote 72 mai kana mai kamatasa, mai ya‑yaini nafi, Yeso‑ya mai hiyara,

“Ayo, tiwa oni oda kamina, madi towe mai kananani.” Mai ati nameteni.

¹⁸“Satanasi bofe‑ya sone oawene. Bahi yebekane‑nima soninene.

¹⁹Owati dai mitahi. Dai okasomabone, maka dai tainisa, yomasa dai tainisa niya, dai‑ya yama komaraboneni. Owa ene dai kiti nafe, Satanasi kiti bi‑bidi nibisane. Yama towe dai‑ya komaraboneni.

²⁰Dai ati ene madi towe mai kananamone, dai ya‑yaini nafiriyahi. Neme‑ya dai oni‑ya Deoso kanahano ene dai ya‑yaini nafibisahi.” Yeso ati nematane.

²¹Mai‑ya hiyareya, Deoso‑ka Doni ene Yeso ya‑yaine, ati yanane,

“Abi Deoso, bofe‑ka hidi tiha, neme‑ka hidi tiha, tiwa ene ya‑yai·oneni. Yama‑ya mai wa‑wato‑mone mai ati na tiwa ene‑ya mai watorani. Madehe‑nima mai na, yama‑ya mai watoramone mai ati na, tiwa ene‑ya mai watobisineni. Tiwati‑maro‑nima yama nineni.” Yeso ati nematane.

²²Yeso ati yananamatase,

“Okobi ene yama nafi okayafawahineni. Owa‑ya dai wato nafira, owa‑ya Okobi watobisane. Okobi owato oteni. Owati ihi Okobi‑ya dai one watomake, dai‑ya okasomara‑mani, Okobi dai watora neni.” Yeso ati nematane.

²³Hika mai da‑daba mai‑ya kiinawame, hi‑hiyararamamatane, ati mai one himitarebonaha.

“Dai ya‑yainahi, owa dai awaro.

²⁴Owati dai mitahi. Hibati‑ya Deoso ati‑ya mai mi‑mita‑mete mai toha, mai‑ka hidi webote‑mete mai toha, mai na, owa‑ya mai awabone mai ati namete, owa‑ya mai awi awirameteni. Owati‑ya mai mitabone mai ati namete, owati‑ya mai miti awirameteni.” Yeso ati nematane.

Samaritano tamine‑ya Yeso hiyare

²⁵10:25 Ai abaterabone‑kaya: Deoso tabaro tamine amane.Makobote Mose‑ka yama hani ati‑ya ka‑kanawato Yeso‑ya kaki,

“Owa ene Yeso ati tosawaribonane.” Atibodi ati ne, Yeso‑ya hiyare,

“Yeso, hini yamata‑nima owa ene nibati, ai abaterabone‑kaya osawebonehe?” Ati nematane.

²⁶“Mose‑ka yama hani tikadika, eme ati titi?” Yeso ati nematane.

²⁷“‘Ai‑ka hidi webote i‑di Deoso dai nofi nafihi. Yama one dai nofi nafiriyahi. Deoso‑ta dai nokotonibisahi. Hini tiwa‑ya tinofi‑nima dai yakari‑ya mai sawe mai tinofiyahi.’ Deoso ati tene.” Mose‑ka yama hani ati‑ya ka‑kanawato ati nematane.

²⁸“Fara amani. Tiwati‑nima tiniya, ai abaterabone‑kaya tisaweboneni.” Yeso ati nematane.

²⁹Mai nafi‑ya nofare, ati yananamatase,

“‘Dai yakari‑ya mai sawe mai tinofiyahi.’ Yama hani ati na,

ebeni‑ke tamine amanati?” Ati nematane.

³⁰Maki‑ya Yeso kanawatobona hiyare,

“Yerosare‑ya ai owa wine, Yeriko‑ya toke, hawi‑ya yakaneya, yama‑ya mai bo‑boti mai warahine, mai bisihine, borone mai hiwake, tohomakosane, abi yananeri.

³¹Deoso‑ka yama‑bone‑ya da‑daa hawi‑ya yakane, maki home‑ya awe, dodikose, tokane.

³²10:32 Refi‑ka nodi Yodeo mai toha, Deoso‑ka yobe‑ya yama‑ya mai aninametemoneni. Samaritano Yodeo mai toharametemoneni.Nowati‑ya Refi‑ka nodi kamaki, maki home‑ya awe, dodikose, tokomakitasane.

³³Mai nowati‑ya Samaritano mai‑ka owa kamaki, maki home‑ya awe, fai‑ya nofe,

³⁴hemedi‑ya hikatee, bora‑ya sokihikane, bani mese‑ya hiwatari, oteo‑ya hiwakame, hikasomane.

³⁵Yama wahabisari‑ya oteo hidi‑ya hiyare,

‘Mai bisihine tikasomaho. Manakone daa·oni bahe. Okomatasiya, manakone kote onahabamakibonane.’ Ati nane.

Mahi fame‑ya yama‑ya ai anina manakone‑nima yinero ne‑ya daanane.

³⁶Mai 3 kana maki‑ya mai awani. Tiwati omitahi. Ebeni‑ke yama hani ati‑nima ene nihi?” Yeso ati nematane.

³⁷“Maki‑ya kasome, yama hani ati‑ya tokadababisane.” Ati nematane.

“Fare ene‑nima tiwa ene nahi.” Yeso ati nematane.

Maata‑ya Yeso kanawato

³⁸Yeso mai eyehe toke, tabora one‑ya mai kobona, Maata ati ihi hika yobe‑ya mai sawemeteni.

³⁹Maata‑ka asima i‑di Mariya Yeso yowi‑ya itaremeteni, Yeso ati‑ya mitabonehe.

⁴⁰I‑di Maata mai tafebone anini‑ya nokotonihe, ati yanana,

“Ayo, owa hare yama‑ya ani·ona, owa tiawahi. Oka asima tiyosehi, owa‑ya kasomabonehe.” Maata ati nameteni.

⁴¹“Maata, Maata, yama anini dama‑ya nokotini kitineni.

⁴²I‑di Mariya owati‑ya mitabone itare, oyoseteraboneni. Owati‑ya no‑nofa amosi nafibisineni. Owa tefe‑bone‑ya wamana amosi bi‑bidi neni.” Yeso ati nematane.

¹Yama one‑ya Deoso‑ya Yeso hiyari hawa tohe, hika mai da‑daba owa ati yanane,

“Ayo, Deoso oda hiyarabone, oda tikanawatohi. I‑di Yowaho Batita hika mai da‑daba mai‑ya kanawatomari‑nima oda‑ya tikanawatohi.” Ati nematane.

²“Deoso‑ya dai hiyarabone, eya dai atiyahi.

‘Abi, amosabote amatini. Tiwati ihi oda nafi‑ka hidi kitabote tihawahaboneni.

³Mahi‑nima oda tefe‑ba daatiyahi.

⁴Oda ene towe tohamaro, oda ene manakone haatinamariyahi. Mai ihi manakone oda haanamaharirani. Tiwa ene yama amosara oda nokotoniriyahi.’ Dai atiyahi, Deoso‑ya dai hiyararo.” Yeso ati nematane.

^5-6Mai‑ya hiyaramatase,

“Yama soki bai‑ya tiwa tabaro‑ya tika owa koboneya, tika yama kaba wadara, tika naki‑ka yobe‑ya tikaba awineni, yamata tikanikabonehe.

‘Naki, oka baho‑ba 3 kana daatinahi. Owa tabaro‑ya oka owa kobone, tefe‑ba wadarene.’ Dai ati naba awineni.

⁷Yobe doro‑ya ati yananeba awane,

‘Naki, madehe eyehe owinineni. Yobe barikawame yama daani awirini, hibayata baho owati daa nofarini.’ Tika naki ati neba awane.

⁸Tika naki tiwa‑ya nofi nafire, baho‑ya ati daa nofare, haatini dameya, yama tinofa‑ya tiwa‑ya daanebonane.” Yeso ati nematane.

⁹“Owati dai mitamakihi. Deoso‑ya yama dai haanahi, yama‑ya daanebonane. Deoso dai sibaniya, dai wasibonane. Deoso sawi‑kaya dai ati tokiya, nokobi‑ya dai haaniya, nokobi‑ya seekanebonane.

¹⁰Yama‑ya mai haana mai‑ka yama‑bone mai‑ya koboteni. Yama‑ya mai sibana, yama‑ya mai wasiteni. Nokobi‑ya mai haana, nokobi‑ya mai seekiteni.

¹¹Aba‑ya tika dao haaneya, bataromaka daatiterani.

¹²Arakawa hife‑ya tika dao haaneya, yomasa daatiterani.

¹³Dai ene kote towe toha, dai‑ka ewe‑ka yama amosa‑bone dai daateni. Deoso ene amose hinama tohe, Deoso‑ka Doni dai‑ya sawibona dai ati na, Deoso dai haaniya, yama‑ya daanebonane, ai‑ka Abi neme‑ke toheri.” Yeso ati nematane.

Yeso tamine‑ya keyehe‑ya mai hirina

¹⁴Madi towe ai owa‑ya foye, madi towe ene maki ati wadamarematane. Yeso ati ene madi towe kanane, maki ati yananawahematane. Yeso ene mai dama mai awa, mai ya‑yaina, mai atibodi yama‑ya kadikameteni.

¹⁵Mai one ya‑yaira,

“Madi towe mai‑ka hidi i‑di Beosibo ati ene mai kananineni.” Mai ati nameteni.

¹⁶“Yeso, Deoso‑ka tihamone tina, neme‑ya tiwa ene kitabote oda awaboneni.” Mai one ati nameteni, Yeso‑ya mai weenabonehe.

¹⁷Mai atibodi ati‑ya Yeso wato, mai‑ya hiyare,

“Hidi webote hika mai dama mai ibi bisiniya, kiti fawanebonane. Tabora ohare‑ka mai ibi toka toweya, mai nafi awimaraboneni.

¹⁸Beosibo ene madi towe kananane dai ati na, i‑di Satanasi‑ka mai ibi toka towe‑mani, Satanasi kiti fawane nane.

¹⁹Beosibo ene madi towe mai kana·onihemone dai ati na, dai one madi towe mai‑ya mai kanana, ebeni‑ke ene tohati? Satanasi ene amane dai ati niya, dai one dai‑ya mai weenaboneni.

²⁰Deoso ati ene madi towe mai kana·onihe, Deoso ai nafi‑ka hidi kitabote tohawahebona dai‑ya sawine.

²¹Owati dai mitahi. Ai owa kite yima‑ya damane, hini tabaro‑ya wai, yehe honene mai hiyabaterene.

²²Ai owa kiti ba‑basi ne kamaki, yobe hidi‑ya wateya, hika yima‑ya kayafe, bora kita‑ya tanikanisa ne, fai yehe honene‑ya mai one‑ya daanane.

²³Owa‑ya mai nofara owa‑ya mai kakoteni. Owa‑ya mai ati sawira,

‘Yeso‑ya dai sawiriyahi.’ Mai ati teni.

²⁴Madi towe ai owa‑ya sawimari, tokawahe, tabora one‑ya sibane, tabora one‑ya wasi awire, hini‑ya hiyare,

‘Hibati‑ya osawimaro‑kaya wini·onamaboneni.’ Madi towe ati ne,

²⁵fa‑fai‑ya kamatase, hibati‑ya sawimari‑ke doro amosawame‑ya awe,

²⁶tokomatase, hika mai one 7 kana mai‑ya himanane, mai towe ba‑basi naro. Hini sa‑sawi‑kaya mai nafi sawiwahaboneni. Ai owa kiyani nafiwahebonane.” Yeso ati nematane.

²⁷Yeso hiyareya, fana one ati yanana,

“Tika ami ya‑yainaba awini.” Ati nameteni.

²⁸“Okomi ya‑yaini bi‑bidi nineni. Deoso ati‑ya mai mita, ati mai hikadabe, mai ya‑yaini nafineni.” Yeso ati nematane.

²⁹Yeso‑ya mai dama mai naho‑ya mai one kamake, mai dama mai‑ya Yeso hiyare,

“Towe dai amani. Deoso ati dai tokadabara, hiniya owa ene kitabote dai awabone dai ati na, dai ati‑nima oteraboneni. Yama dai awabone dai ati na, i‑di Yona ene‑mata‑nima yama na dai awabisaboneni.

³⁰11:30 Hibati‑ya aba nabadi‑ya Yona amoni 3 kane, makobote aba saahinamematamonane. Fara‑nima, Yeso abe, amoni 3 kane‑ya abo foyematamonane, yati hodi‑ya.Yona ene‑nima owa ene naboneni. Dai‑ka Ayo neme‑ke ama·oni. Owa ene dai awawahaboneni.

Mai ihi towe manakone nafebone

³¹Ai nafi ene‑ya Deoso kadikeya, bato‑kaya mai wi‑wina‑mete mai‑ka hidi fana dai‑ya weenaboneni. Hibati‑ya Saromaho hasineya, yama yaki‑ya kakemeteni, Saromaho ati‑ya mitabonehe. Saromaho yama‑ya wato bi‑bidi nematane. Dai‑ya da‑daba yama‑ya watobisane.

³²Ai nafi ene‑ya Deoso kadikeya, Ninifa‑ya mai wi‑wina‑mete dai‑ya mai weenaboneni, owati‑ya dai nofararo. Fara Ninifa‑ya mai wi‑wina i‑di Yona ati‑ya mai mita, mai ihi‑maro‑nima mai ihi namarameteni. Yona kiti bi‑bidi nemata, dai‑ya da‑daba kiti nafibisane. Owa ene dai nofara, dai ene towe manakone nafeboneni.

³³Nabarina ai botokana, wahi ai barikiterani. Nabarina ai kanawaarikosateni, mai kiiyomama yama‑ya mai awabonehe.

³⁴11:34 Ai atibodi tamine amani. Yama towe ai atibodi nokotonihe, Deoso ati ai watoraboneni.Ai nokobodi ene yama ai awateni. Dai nokobodi amosa, yama nafi‑ya dai awateni. Dai nokobodi towe toha, yama‑ya dai awaterani.

³⁵Yama bara‑ya dai nokotoniriyahi, yama bara‑ya dai nokotonihe, dai noko towe toha‑nima dai nineni. Deoso ati dai watoraboneni.

³⁶Yama amosa hinama dai nokotoniya, yama bara dai nokotoni awiriya, yama tehe‑ya dai sawe‑nima dai na, yama dai wataboneni.” Yeso ati nematane.

Fariseo mai tamine

³⁷Yeso hiyari hawa toheya, fariseo mai‑ka owa Yeso‑ya himanematane, fai tabaro‑ya mai tafabonehe. Yeso tokomaki, itarimatane, tafebonaha.

³⁸Yeso yehe‑ya sorokarire, tafebona‑ya fariseo awe, atibodi yama‑ya kadikematane.

³⁹Yeso ati yanane,

“Fariseo dai toha, keneko mese dai sorona, mai noki‑ya dai ene amosa, hiniya dai atibodi towebisa amani. Yama dai bote, dai ene towe damateni.

⁴⁰Yama‑ya dai watotera awineni. Deoso ai mese‑ya wamane, ai atibodi‑ya wamanahari nematane.

⁴¹Dai atibodi amosawamahi. Dai atibodi ati ene mai‑ka yama kaba‑ba dai daaniya, yama sibareni. Dai‑ka yama wiye nafi amosa‑nima dai teboneni.” Yeso ati nematane.

⁴²Ka! Fariseo dai toha, dai ene manakone wadani. Dai‑ka yamata ke‑ketehe‑ya dai kadika, kote Deoso‑ya dai daateni. Deoso ati kote dai tokadabara,

‘Mai ihi‑nima mai manakone daatinahi. Deoso tinofiyahi.’ Deoso ati nematane.

Ati dai tokadabaterene. Dai ene amosa, Deoso dai nofa dai ni‑ya, makobote Deoso‑ka yama‑bone dai daaniya, dai sibarineni.

⁴³Ka! Fariseo dai toha, dai ene manakone wadani. Deoso‑ya mai hi‑hiyara‑ke yobe‑ya dai sawe, kadera amosa‑ya dai nahoteni. Dai‑ya mai kahiyarabone, mai‑ya dai nokotoniteni.

⁴⁴Ka! Mai‑ya dai kanawato amosara, yama‑ya mai watora ihi mai ihi towe tohama, hini dai ene amani. Dai ene manakone wadani.” Yeso ati nematane.

⁴⁵Mose‑ka yama hani ati‑ya mai ka‑kanawato mai‑ka owa ati yanane,

“Ayo, haa‑nima tiwati riyahi. Haa‑nima tiwati niya, oda‑ya weetinaharineni.” Ati nematane.

⁴⁶“Ka! Mose‑ka yama hani ati‑ya dai ka‑kanawato dai toha, dai ene manakone wadaharineni. Yamasi kiba, kanaha‑ya dai daateni, mai weyehinabonehe. Dai‑ta yama‑ya dai weyeterani. Fara‑nima dai ati damiya, mai tokadababone dai ati na, hini dai ati ohare‑ya dai tokadabi awirani.

⁴⁷Ka! Dai ene manakone wadani. Deoso ati‑ya mai mi‑mita‑mete mai tame‑ka yobe dai wamateni. Deoso ati‑ya mai mi‑mita‑mete mai‑ya dai‑ka idi mai nanahabameteni.

⁴⁸Dai‑ka idi mai ihi‑nima dai ene nineni. Dai‑ka idi mai mai hinahabamete mai tame‑ka yobe‑ya dai wamateni.

⁴⁹Deoso yama‑ya watone. Hibati‑ya dai tamine‑ya hiyare,

‘Owati‑ya mai mi‑mita mai toha, oka yo‑yose mai toha, mai na, mai oyoseboneni. Mai one‑ya mai nanahaba, mai one‑ya mai kananihi naboneni.’ Deoso ati nematane.

⁵⁰Deoso ati‑ya mai mi‑mita‑mete mai‑ya mai nanahabamete, mai ihi yorotokana manakone‑nima dai ene manakone naboneni.

⁵¹Abeo‑ya nanahabi bahe, mai one dami‑ya mai nanahabamake, i‑di Sakariya‑ya nanahabamake, Deoso‑ka yobe‑ya i‑di Sakariya‑ya mai nanahabamakemeteni. Owati dai mitahi. Mai ihi yorotokana manakone‑nima dai ene manakone naboneni.

⁵²Ka! Mose‑ka yama hani ati‑ya dai ka‑kanawato dai toha, dai ene manakone wadani. Nokobi ai barikana‑nima Deoso ati yokana dai barikana, mai watorabonehe. Deoso‑ka yama dai watora, mai one yama‑ya watabone mai ati na, mai‑ya dai ati barinineni.” Yeso ati nematane.

⁵³Yeso hiyari hawa toheya, toke, Mose‑ka yama hani ati‑ya mai ka‑kamina mai toha, fariseo mai toha, mai na, mai ati yawa, Yeso‑ya mai weenabone, Yeso‑ya mai haanamarimanameteni.

⁵⁴“Yeso ati tosawariya, ati oda mitiya, ati oda kamineya, Yeso oda wataboneni.” Mai atibodi ati nameteni.

¹Mai dama mai yorotokana, 1.000 dame‑nima mai na, mai dama mai ihi mai ibi tame tainameteni. Yeso hika mai da‑daba mai‑ya hiyare,

“Fariseo mai‑ka femeto‑ya dai arabanahi. Fara mai ihi tamine amani. Mai ati amosa, mai ihi ati kasirobisa, mai‑nima dai riyahi.

²Yama tamine‑ya mai kema, mai dama mai hiwatowahaboneni.

³Mai noki awiri‑ya dai hiyara, dai ati‑ya mai nafi mitawahaboneni. Dai ati bo‑boyinamaro, dai ati‑ya mai nafi mitawahaboneni.

⁴Dai‑ya mai ati naboha mai‑ya dai nayofinariyahi. Dai‑ya mai nanahabiya, dai‑ya mai kobonamateraboneni.

⁵Deoso dai nayofinabisahi. Deoso mai one‑ya nanahabeya, yama hirini‑kaya mai one‑ya korotonamakibonane. Fare dai nayofinabisahi.

⁶Bani bidi mai 5 kana mai da‑daa, yinero bidi fame‑ta mai manakone tohateni. Bani bidi mai‑ya Deoso nofe, bani bidi ohari‑ya Deoso ati kadamowamaterene.

⁷Deoso ai tati kone nafi‑ya wato, ai tati kone nafi‑ya kadikemarine. Dai habo siitoriyahi. Bani bidi mai dama mai manakone bi‑bidi teni. Dai‑ta dai manakone nafibisateni.

⁸Mai‑ya dai hiyariya,

‘Yeso‑ka ama·oni.’ Dai ati niya,

‘Oka mai amani.’ Onahareboneni, Deoso‑ka yo‑yose mai‑ya.

⁹‘Yeso‑ka ohi awirini.’ Mai ati niya,

‘Oka mai tohi awirini.’ Obisaboneni, Deoso‑ka yo‑yose mai‑ya.

¹⁰Owa‑ya mai weena, makobote owa‑ya mai nofawahiya, mai ihi manakone wadamaraboneni. Deoso‑ka Doni‑ya mai weeniya, mai ihi manakone fawateraboneni.

¹¹Yama one‑ya dai‑ya mai wataboneni, dai ene‑ya mai kadikabonehe. Deoso‑ya mai hi‑hiyara‑ke yobe hidi‑ya dai‑ya mai towakama, dai‑ka hidi owa‑ya dai‑ya mai towakama na, dai ati‑ya mai mitabone, dai atibodi yama‑ya kadikariyahi.

¹²Dai hiyariya, Deoso‑ka Doni dai‑ya kanawatobonane, ati dai kaminebonaha.” Yeso ati nematane.

Yama dai kayawariyahi

¹³Mai dama mai‑ka owa ati yanane,

“Yeso, okobi abe, tiwati ihi okobi yehe honene one‑ya okoyo owa‑ya daanaho.” Ati nematane.

¹⁴“Ayo haa·oraboneni. Kofeno‑ka yo‑yose ohi awirini.” Yeso ati nematane.

¹⁵Mai nafi‑ya hiyare,

“Dai noko wadahi. Bofe‑ka yama dai nokotoniriyahi. Mai‑ka yama dama toha, mai‑ka yama dama mai‑ya kasomi nafira, mai one ohi, mai one aba nineni.” Yeso ati nematane.

¹⁶Yeso mai‑ya kanawatobona mai‑ya hiyare,

“Ai owa‑ka yamata yani amosa, hika yamata dodamineni.

¹⁷Atibodi yama‑ya kadike,

‘Oka yamata wa‑wada‑ke oka yobe kibane.

¹⁸Yobe onahabiya, yobe webote‑ta wama·oniya, Yobe nafi‑ya oka yamata wadabisaboneni.

¹⁹Oka yamata teeni hawa ohiya, owatibodi yama‑ya kadikamatasiya, —Oka yamata dama tosiyo kanibote raboneni. Yama ani·onamarabone, hiniya otafabone, fino‑ya ofebone, ya‑yai·onaboneni.— Haa‑nima onaboneni.’ Atibodi ati nemarine.

²⁰‘Yama‑ya tiwato awirini. Hibayata ti·ababone, tika yamata‑ya mai one kayafawahaboneni.’ Deoso ati nemarine.

²¹Yama dama‑ya mai nokotonihe, Deoso‑ya mai nokotonira, mai abiya, mai‑ka yama mai‑ya kasomateraboneni.” Yeso ati nematane.

Dai habo siitoriyahi

²²Yeso hika mai da‑daba mai‑ya hiyare,

“Yama kaba wadarihi, dai‑ka bora one wadarihi niya, dai habo siitoriyahi.

²³Mai tafe toha, mai‑ka bora toha na mai‑ya kasomi nafira, mai one ohi, mai one aba nineni.

²⁴Bani bidi mai tamine dai mitahi. Bani bidi mai‑ka yamata‑bone‑ya mai kamaterani. Fadara‑ya mai kiharihi, mai tafe‑ka yobe wadarihi, tene. Bani bidi mai tafe‑bone‑ya Deoso daanibisatene. Bani bidi mai‑ya Deoso nofi bi‑bidi ne, ai‑ya nofi nafibisane.

²⁵Dai habo siitoniya, dai‑ya dai kasomarani.

²⁶Dai hasini‑ya dai watora, hini yamata ihi yama dama‑ya dai nokotonihi?

²⁷Awa mowe dai awahi. Awa mowe bora‑ya wamaterani. I‑di Saromaho‑ka bora amosa damamete, awa mowe amosabisa, Saromaho‑ka bora amosi bi‑bidi nametemoneni.

²⁸Deoso ati ene awa mowe amosani. Makobote awa mowe aba kanibote na, ai sarikiteni. Awa mowe‑ya Deoso nokotoni nafire, ai‑ya nokotoni nafibisatene. Deoso ati ene ai‑ka bora tohaboneni. Deoso ati dai nofi nafira, ati dai nofi nafihi.

²⁹Dai kakomeheriyahi. Deoso ai tefe‑bone‑ya daa, ai‑ka fa‑fawa‑bone‑ya daa nebonane.

³⁰Deoso ati‑ya mai watora yama dama‑ya mai nokotonihe, mai‑nima dai riyahi. Ai‑ka Abi dai‑ya watotene.

³¹Deoso ai nafi‑ka hidi kitabote tohawahebona dai nokotoniya, dai‑ka yama‑bone‑ya Deoso daanebonane.

Neme‑ka yama dai nokotonibisahi

³²Oka dai amani. Dai habo siitoriyahi. Ai‑ka Abi dai‑ya nofe, dai nafi‑ka hidi kitabote tohawahebona‑ya dai saweboneni.

³³Dai yehe honene dai daanahi. Yinero dai waratokaniya, mai‑ka yama wadara mai‑ya yinero dai daanahi. Haa‑nima dai niya, neme‑ya dai manakone wadaboneni. Neme‑ya dai‑ka yama manakone tosiyoteraboneni. Neme‑ya yama‑ya mai botirihi, yama aboni yama‑ya mai kabarihi, teni.

³⁴Bofe‑ya dai yehe honene dama wadiya, bofe‑ka yama dai nokotoniheboneni. Neme‑ya dai‑ka yama dama tohabisiya, neme‑ka yama dai nokotonibisaboneni. Ai‑ka yama dama wadi tohi‑kaya yama ai nokotoniteni.

Yeso kamatasebona, dai noko wadahi

³⁵Okomatasabone, dai‑ya dai hawa tohiyahi. Owa dai nimaniyahi.

³⁶Hidi‑ka yo‑yose mai‑nima dai nahi. Hidi marina‑ya toke, hika yo‑yose mai nimahine, kobonamataseya, nokobi‑ya mai seekana kanibote nabonehe.

³⁷Mai‑ka hidi kamebona‑ya hini mai‑ya mai hawa tonihe, mai ya‑yainaboneni. Hidi kameya, ati ene mai nahaboneni, mai‑ya natafebonaha.

³⁸12:37-38 Yeso hini tamine‑ya hiyare, kamataseya, ai hawa toha, ai ya‑yainaboneni.Yama soki nafi‑ya mai nimana, yama soki bai‑ya mai‑ka hidi kama, yama sibarini, yama wahabisari‑ya mai‑ka hidi kamabiseya, yama sibarini, mai ya‑yainaboneni. Fara mai‑nima owa dai nimaniyahi.

³⁹Ai‑ka yama‑ya botibona‑ka ora tamine‑ya ai mita, ai noko wadaboneni, ai‑ka yama‑ya botirebonaha.

⁴⁰Dai noko wadahi. Dai‑ka Ayo neme‑ke kobonebona, dai one nimahinamareya kobonebonane.” Yeso ati nematane.

⁴¹“Ayo, oda tikanawata, mai nafi tikanawatohareba awineni.” Bedoro ati nematane.

⁴²“Owati dai mitahi. Hidi‑ka yo‑yose mai dama, hika yo‑yose ohari yama‑ya watone, hidi ati‑ya tokadabi amose, hidi ati ene mai one‑ka hidi tohawahebonane, mai‑ya natafebonaha.

⁴³Hidi koboneya, hidi ati‑nima ene ne, ya‑yainebonane.

⁴⁴Owati amosa dai mitahi. Yama dama‑ya hidi daanebonane, hinawadabonehe.

⁴⁵Hidi‑ya nimani nafiya,

‘Oka hidi kama kanibote re, kama kanibote ni awirebonane.’ Hika yo‑yose atibodi ati neya,

mai makidi, mai fanawi mai na, mai‑ya bisi, kawi‑ya fawa neya,

⁴⁶hidi kama kanibote nebonane. Hika mahi, hika ora ne‑ya hika yo‑yose wato awirebonane. Hidi kobonameya, hika yo‑yose towe‑ya bisini kitebonane. Deoso ati‑ya mai nofara mai sawi‑kaya hinawaibonane.

⁴⁷Dai‑ka hidi ati dai mita, dai‑ka hidi ati‑nima dai ni awiriya, dai‑ka hidi dai‑ya kosini kitebonane.

⁴⁸12:48 Deoso‑ka yama hani ati dai wato, ati dai tokadabara, Deoso yawi kitebonane. Deoso‑ka yama hani ati mai mitara, ati mai tokadabara, Deoso yawi bi‑bidi nebonane.Dai‑ka hidi ati dai watore ihi dai ene ati kasira, dai‑ya kosini bi‑bidi nebonane. Yama ai anini kitabone yinero nafi‑ya ai‑ya mai daateni. Mai‑ka yama dama ai nawada, ai ene towe‑ya mai awiya, mai yawa kanibote teni.

⁴⁹Bofe‑ya kobo·onamaroni, yama‑ya hiri·onihebonehe. Yanani hawa toha‑mani, ya‑yai·ona neni.

⁵⁰12:50 “Owa‑ya mai habanirisabone” Yeso ati ne, mai hinahabebona tamine amane.Owa‑ya mai habanirisabone, owa habanisi hawa tohara ihi oyawineni.

⁵¹‘I‑di Yeso ati ene mai nafi ati somaboneni.’ Dai ati na awineni.

Owa ene mai ibi weenibisaboneni.

⁵²Yobe ohari‑ya mai wina mai 3 kana mai‑ya mai fama mai nofaraboneni. Mai fama mai‑ya mai 3 kana mai nofahariraboneni.

⁵³12:53 Yeso ati mai one nofa, Yeso ati‑ya mai one nofarihi na, mai tamine amani.Badi bidi‑ya nofarebona, bidi badi‑ya nofaharirebonane. Madi bide‑ya nofarabone, bide madi‑ya nofahariraboneni. Mai ibi komana mai ibi nofaraboneni.” Yeso ati nematane.

⁵⁴Mai dami‑ya hiyare,

“Mahi to‑toka‑kaya neme sabi dai awa, faha kaki bonehe dai ati na, fara dai ati‑nima faha kakiteni.

⁵⁵Bato‑kaya yama hakikini kake dai awa,

‘Yama hiwe kobonaboneni.’ Dai ati teni.

Fara dai ati‑nima yama hiwe koboteni.

⁵⁶Towe dai amani. Bofe‑ka yama kiini dai wato, neme‑ka yama kiini dai wato na, Deoso ene‑ya dai awa, yama‑ya dai watorani.

⁵⁷Deoso yama hinofa dai sibara, dai sibanahi.

⁵⁸Kofeno‑ya tiwa ene towe‑ya ai owa kaminebona, dai kobokani awisari‑ya tiwati somawama kanibote nahi. Tiwati somawami awiriya, boriso tiwa‑ya mai waratoniya, kadeya‑ya tiwa‑ya mai nafoyaba awineni.

⁵⁹12:58-59 Yeso‑ya mai nofara mai ihi Deoso yawane. Deoso ati‑ya mai tokadaba kanibote na, mai sibaraboneni. Deoso ati mai tokadaba kanibote ra, Deoso mai‑ya weenebona, hika we‑wee tosiyo kanibote raboneni.Yama manakone nafi abi awisariya, tiwa‑ya mai seekani awiraboneni.” Yeso ati nematane.

¹Yeso hiyari hawa toheya, Karireya‑ya mai wi‑wina mai one tamine‑ya mai kamina, fara Deoso‑ka yobe‑ya Deoso‑ka bani‑bona‑ya mai daaniya, Birato ati ene mai‑ya mai nanahaba, mai tamine‑ya mai kaminameteni, Yeso‑ya. Yeso ati yanane,

²“‘Hini mai ihi mai abineni. Oda‑ta, oda ene amosabisani.’ Dai ati na awineni.

³13:3 “Dai abahareboneni.” Yeso ati ne, wara hirini‑ya mai sawiya, mai kome fawaterabone tamine amani.Owati dai mitahi.

‘Oda ene‑maro‑nima oda ene namaraboneni.’ Dai atibodi ati ni awiriya,

dai abahareboneni.” Yeso ati nematane.

⁴“Sirowe widi‑ke yobe nemehe kote bakatone, sone, 18 mai kana mai abameteni.

‘Hini mai ihi mai abameteni.’ Dai ati na awineni.

‘Yerosare‑ya mai wi‑wina mai one hasina, mai ihi amosabisameteni.’ Dai ati na awineni.

⁵Owati dai mitahi.

‘Oda ene‑maro‑nima oda ene namaraboneni.’ Dai atibodi ati ni awiriya,

dai abahareboneni.” Yeso ati nematane.

⁶Mai‑ya kanawatobona, mai‑ya hiyare,

“Maki‑ka awa‑ya fiko waa, faha fowe‑nima fiko‑ya kiine, fiko boni wadarani.

⁷Hika yo‑yose‑ya hiyare,

‘Faha fowe 3 kani‑ya fiko kii·ona, bonora, kaatinahi, awa bono one kamamakeboneni.’ Hidi ati nane.

⁸‘Hibareya, fiko mate wii·okaniya, wami okateheboneni.

⁹13:6-9 Hiyara yokana timitahi. Yodeo mai‑ya Deoso nimanamatamonane, mai ihi amosawamabonehe. Mai ihi amosawama kanibote ra, mai‑ya Deoso weeni kitebonane.Faha fowe oharimaki‑ya bonoya, sibaraboneni. Bonoriya, kaa·onaboneni.’ Hika yo‑yose ati nane.” Yeso ati nematane.

Sabado‑ya fana‑ya Yeso nakitame

¹⁰Sabado‑ya Deoso‑ya mai hi‑hiyara‑ke yobe‑ya Yeso mai‑ya kanawatoya,

¹¹fana sawemeteni. Madi towe ene faha fowe 18 kani‑ya wai moinama, wai amosarameteni.

¹²Fana‑ya Yeso awe, fana‑ya haanematane. Fana kake,

“Tikitamani.” Yeso ati nematane.

¹³Fana‑ya Yeso boyone, fana waamisama, wai amosawama, Deoso‑ya kahiyarameteni.

¹⁴Deoso‑ya mai hi‑hiyara‑ke yobe hidi i‑di Yeso ene‑ya awe, yawe, ati yanane,

“Mahi 6 kane‑ya yama ai aniteni. Sabado‑ya yama ai aniterani. Dai kiyana mahi owa‑ya dai kamabisahi, dai‑ya nakitamebonaha. Sabado‑ya dai kamariyahi.” Yobe hidi ati nematane.

¹⁵Yeso ati yanane,

“Towe dai amani. Sabado‑ya yama dai aninahariteni. Dai‑ka bani mai dai seekana, mai dai towakifawateni, faha‑ya mai fawabonehe.

¹⁶Abaraho‑ka nodi amani. Faha fowe 18 kani‑ya Satanasi yadihinamete sabado‑ya okasomarabone dai ati na, okasomawahani.” Yeso ati nematane.

¹⁷Yeso‑ya mai weena mai ati fawanameteni. Yeso ene‑ya mai dama mai awa, mai ya‑yainameteni.

Deoso ai nafi‑ka hidi kitabote tohawahebona

¹⁸Yeso mai‑ya hiyare,

“Deoso ai nafi‑ka hidi kitabote tohawahebona tamine ohiyaraboneni.

¹⁹Maki hika fadara‑ya mositada noki‑ya korotona, mositada yana, tonafe, webote tohawaha, bani mai kake, mositada ini‑ya mai bori‑ya mai wamaneni.” Yeso ati nematane.

²⁰Mai‑ya hiyaramatase,

“Deoso ai nafi‑ka hidi kitabote tohawahebona tamine dai mitamatasahi.

²¹13:18-21 Mositada noki toha, femeto toha na, tamine fara kafamineni. Hibayata Yeso‑ya mai da‑daba mai damara, faha fowe damamaki‑ya ai nafi‑ka hidi kitabote tohawahebonane.Femeto‑ya fana kemabone farina tiriko kiro 7 kana bodi‑ya femeto bide‑ya fana ibe, femeto dodama ihi farina tiriko nafi‑ya femeto sawineni.” Yeso ati nematane.

²²Yeso Yerosare‑ya tokebona, tabora dama‑ka mai‑ya kanawatone.

²³Mai‑ka owa ati yanane,

“Ayo, Deoso ai nafi‑ka hidi kitabote tohawahebona‑ya mai sawebone mai fa‑famaraba naba awineni.” Ati nematane.

²⁴“Nokobi bide dai nokotonibisahi. Nokobi one‑ya mai dama mai tokiyoma, Deoso‑ya mai tokiyomaraboneni.

²⁵Yobe hidi nokobi‑ya barikawameya, nokobi‑ya dai one nahomake, mai haanaboneni.

‘Ayo, nokobi seetikanahi.’ Mai ati naboneni.

‘Dai owatora, nokobi see·okaraboneni.’ Yobe hidi ati nebonane.

²⁶‘Oda eyehe titafa, oda tabaro‑ya oda‑ya tikanawato tinamaroni.’ Mai ati naboneni.

²⁷‘Owati dai mitahi. Dai owato awirini. Dai tokomahi. Dai ene amosarani.’ Hidi ati nebonane.

²⁸Deoso ati‑ya mai mi‑mita‑mete mai toha, i‑di Abaraho toha, i‑di Isaki toha, i‑di Yako toha ne, Deoso ai nafi‑ka hidi kitabote tohawahe‑ya mai sawe, mai dai awiya, dai tokomakira ihi dai ohinabone, dai komene kitaboneni.

²⁹Oda‑ya Bara mai sawibisa, mahi ka‑kaki beheri‑ka mai toha, mahi to‑toka beheri‑ka mai toha, mahi ka‑kaki‑ka mai toha, mahi to‑toka‑ka mai toha, mai na, Deoso ai nafi‑ka hidi kitabote tohawahe‑ya mai one sawe, oda marinaboneni.” Yeso ati nematane.

³⁰13:24-30 Yobe hidi i‑di Yeso tamine amane. Yeso‑ka mai tohi awira mai tokiyomaraboneni.“Owati dai mitahi. Deoso‑ya mai sawebone dai ati na, mai one sawiraboneni. Deoso‑ya mai sawirabone dai ati na, mai one sawibisaboneni.” Yeso ati nematane.

³¹Yeso hiyari hawa toheya, fariseo mai kamake,

“Yeso, tikamahi. Tiwa‑ya i‑di Erodi ati nanahabene.” Fariseo mai ati nameteni.

³²“I‑di Erodi ati hini tohaya. I‑di Erodi‑ya dai tokiya, dai hiyarahi.

‘Yeso ati tamine timitahi. Owa amoni famiya, madi towe mai kana·onihebone, mai kiyana mai onakitamaboneni. Owa amoni oharimaki‑ya yama noko·onihe, hawa·oniheboneni. Yeso ati nene.’ Dai ati nahi.

³³Owa amoni 3 kani‑ya yaka·onabone, makobote Deoso ati‑ya mai mi‑mita‑mete mai‑nima onaboneni. Yerosare‑ya Deoso ati‑ya mai mi‑mita‑mete mai nafi abameteni.” Yeso ati nematane.

³⁴“Yerosare, tika mai ihi ohi·oneni. Tiwa‑kaya mai wi‑wina Deoso ati‑ya mai mi‑mita mai‑ya mai nanahabateni. Tika mai okasomabone ona, owati‑ya mai nofarani. Arakawa afe bodi‑ya bidi mai mookana, madi mai hikayawateni. Fara‑nima tika mai okayawabone ona, owa‑ya mai nofarani.

³⁵Tika mai fawaniya, tika yobe honita tohawamebonane. Owati timitahi. Eya dai‑ka mai ati naboneni, owa‑ya mai hiyararo.

‘Deoso tiwa‑ya yose, tiwa‑ya kasomayaho, oda ati nineni.’ Mai ati nabone,

mai ati ni awisari‑ya osawimatasaraboneni.” Yeso ati nematane.

Sabado‑ya maki‑ya Yeso nakitame

¹Sabado‑ya fariseo mai‑ka hidi owa tabaro‑ya Yeso tafebona tokiyomeya, mai kakatomameteni.

²Yeso noko‑ya maki warane waane,

³Mose‑ka yama hani ati‑ya mai ka‑kanawato mai toha, fariseo mai toha, mai na, mai‑ya Yeso hiyare,

“Sabado‑ya ai owa ai nakitama, ai sibarineni?” Yeso ati nematane.

⁴Mai ati yanarameteni. Maki yehe‑ya Yeso waratone, fai‑ya nakitame, fai‑ya toyosemematane.

⁵Mai‑ya Yeso hiyaramatase,

“Sabado‑ya dai‑ka bani hodi kowe‑ya soniya, dai idi awirane? Sabado‑ya tika dao hodi kowe‑ya soniya, dai idihari awirane?” Yeso ati nematane.

⁶Mai ati‑bone‑ya mai watora, mai ati yanani awirameteni.

Kadera amosa tamine

⁷Mai tafabone, Yeso mai‑ya kakatomematane. Kadera amosa‑ya mai nahoremeteni, mai‑ya mai one kahiyarabonehe. Mai ihi‑ya Yeso awe, mai‑ya kanawatobona, mai‑ya hiyare,

⁸“Owati dai mitahi. Marina‑ya dai toka, kadera amosabisa‑ya dai nahoririyahi. Maki amosabise‑ya marina hidi haanahariba awane.

⁹Amosabise koboneya, hidi tiwa‑ya hiyarebona,

‘Soho, amosabise‑ka kadera amani, haro. Kadera one‑ya tiwitaribisahi.’ Hidi ati nebonane.

Mai nafi noki‑ya kadera towe‑ya tiwitareboneni.

¹⁰Mai tabori‑ya dai tafabone, kadera towe‑ya dai nahorihi. Hidi dai‑ya ati yananebona,

‘Naki, kadera amosabisa‑ya dai nahoribisahi.’ Hidi ati nebonane.

Hidi ati‑ya mai mita, dai‑ya mai nofaboneni.

¹¹Hini mai‑ya mai kahiyara, Deoso ene mai mai hinofaraboneni. Ai‑ya ai nokotonira, Deoso ene ai‑ya mai kahiyarawahaboneni.” Yeso ati nematane.

¹²Marina hidi‑ya Yeso hiyare,

“Mai one‑ya tiwati natafiya, tika mai toha, tiwa‑ya mai no‑nofa mai toha, yinero dame‑ya mai kiha mai toha, mai na, mai‑ya haatiriyahi. Mai‑ya haatiniya, tiwa‑ya mai haanahariya, tika yama manakone abi hawa tohaboneni.

¹³Mai‑ya tinatafabone, mai‑ka yama wadara mai toha, mai hi‑hiyana mai toha, mai ka‑kana mai toha, mai noki wadara mai toha, mai na, mai tinatafabisahi.

¹⁴Haa‑nima tiwa ene niya, ya‑yaitinaboneni. Tiwa‑ya mai haanami awiraboneni. Yama faina‑bone‑ya mai ihi amosa mai kitamiya, mai‑ya tisawebone, tiwa ene manakone‑ya Deoso daanebonane.” Yeso ati nematane.

Deoso ai nafi‑ka hidi kitabote tohawahebona

¹⁵Mesa‑ya mai nahore, Yeso ati‑ya mai mita, mai‑ka owa hiyare,

“Deoso ai nafi‑ka hidi kitabote tohawahebona‑ya mai tafiya, mai ya‑yainaboneni.” Ati nematane.

¹⁶Yeso mai‑ya kanawatobona mai‑ya hiyare,

“Ai owa mai‑ya natafebona mai dami‑ya haanane.

¹⁷Makobote mai tafe awi hawa tohiya, hika yo‑yose‑ya yosene, mai‑ya dodiwitibonaha. Hika yo‑yose toke,

‘Dai kamaki kanibote nahi. Yama nafi hawa tohani.’ Ati nematane.

¹⁸Fai ati‑ya mai tokadabarani, mai nafi.

‘Fadara okanika, oawawitebone, dai‑ka marinabone‑ya owati toki nofarini.’ Daidi ati nane.

¹⁹‘Bowi mai okanika, ai yehe kafama‑nima mai na, yama‑ya mai horona, mai oawabone, mai marinabone mai‑ya owati tokomaki nofarini.’ Owa ati tasane.

²⁰‘Hibayata ofana, mai marinabone mai‑ya owati tokomaki nofarini.’ Owa ati tasane.

²¹Hidi‑ka yo‑yose kame, mai ati‑ya kaminamane. Hidi yawe, hika yo‑yose‑ya yosematase,

‘Sidadi nafi‑ya tikamiya, yama‑ya mai kihara mai toha, mai hi‑hiyana mai toha, mai noki wadara mai toha, mai ka‑kakona mai toha, mai na, mai tiwakamiyahi, mai tafabonehe.’ Hidi ati nane.

²²Fai‑ya toke, mai‑ya kakame, ati yanane,

‘Ayo, tiwati‑nima ona, mai haa·ona, mai owakama, tika yobe kibarane.’ Hidi‑ka yo‑yose ati nane.

²³Hidi‑ka yo‑yose‑ya yosetase,

‘Hawi‑ya mai one yakana mai toha, mai‑ka yobe oharine‑ka mai toha, mai na, mai‑ya haatiyahi, ai marini‑ya mai kamakebonehe. Oka yobe kibayaho.

²⁴14:16-24 Yama dama‑ya mai nokotonihe, Yeso ai nafi‑ka hidi kitabote tohawahe‑ya mai sawiraboneni. Yeso ati‑ya mai tokadaba mai sawibisaboneni.Fara hibati‑ya mai haa·ona, mai kaki nofara, owa tefe‑ya mai kabateraboneni.’ Hidi ati nane.” Yeso ati nematane.

²⁵Yeso yananeya, mai dama mai tokomakemeteni. Yeso mai‑ya hiyare,

²⁶“Oka dai tohabone dai ati na, owa‑ya dai nofi nafibisahi. Tika abi, tika ami, tika yibote, tika madehe, ayo, soho, adi, asima, mai na, mai dai nofi bi‑bidi, owa‑ya dai nofi nafibisahi. Hini dai‑ya dai nofi bi‑bidi, owa‑ya dai nofi nafibisahi. Owa‑ya dai nofi nafibisariya, oka dai tohi awiraboneni.

²⁷‘Owa‑ya mai ati nanahaba yama sibarini. Yeso‑ya da‑daba ohabisaboneni.’ Dai ati nahi.

Haa‑nima dai ati ni awiriya, oka dai tohi awiraboneni.

²⁸Yobe nemehe ai wamanabone, yobe manakone ai kadiki baha, ai‑ka yinero ai kadikamaki, manakone ai kiha, yama sibarini, manakone kote ai kihara, yobe ai wamaterani.

²⁹14:29 Tamine yokana timitahi. Yeso ai dababone, ai‑ya mai weeniya, hawi bai‑ya ai maakariyahi.Yobe manakone‑ya mai kadikara, yinero tosiyo ene yobe wamani bai‑ya mai maakana, mai‑ya mai hahakanaboneni.

³⁰‘Yobe nemehe‑ya wamanebona ati ne, yinero tosiyo, yobe hawa tohaterebonane.’ Mai ati naboneni, mai hahahikaneya.

³¹Sodado mai‑ka hidi webote, hika sodado mai 10.000 mai kana mai toha, hidi webote owa kamakimona, hika sodado mai damabisa, 20.000 mai kana mai tohanineni. Mai kamaki tamine‑ya hidi webote mite,

‘Mai dama mai kamakemone, ai fa‑famaraba na, ai kitaba awineni.’ Atibodi ati nebonane.

³²‘Mai dama mai toha oda‑ya mai bisinibisaba awineni.’ Hidi atibodi ati neya,

hidi owa aka‑ya tohasa neya, hika mai one‑ya yosebona,

‘Mai‑ka hidi‑ya dai tokahi. —Hini yamata‑nima manakone nibati, tiwati somawami‑bone‑karo?—’ Dai ati niyahi.” Hidi ati nebonane.

³³Dai‑ka yama nafi dai saatokasara, oka dai tohi awiraboneni.

³⁴Sao ihi ai tefe kabi amosa, faha ihi abiya, amosawamaterani.

³⁵Sao ati kasira awa bono mate‑ya ai ketehera, yamata ade‑ya kasomaterani. Hiniya ai weretowititeni. Owati dai mita owati dai tokadabahi.” Yeso ati nematane.

Yama fawana tamine

¹Kofeno‑ka yinero‑bona‑ya mai ha‑haa mai toha, mai ihi amosara mai toha, mai na, Yeso wai‑kaya mai yorotokanameteni, Yeso ati‑ya mai mitabonehe.

²Fariseo mai toha, Mose‑ka yama hani ati‑ya mai ka‑kamina mai toha, mai na, mai yawa,

“Mai ihi amosara mai toha na mai‑ya Yeso sawi, mai eyehe tafane. Yeso towe amane.” Mai ati nameteni.

³Mai ati‑ya Yeso mite, mai‑ya kanawatobona mai‑ya hiyare,

⁴“Dai‑ka kaneiro mai 100 kana ohari fawaneya, 99 mai kana mai tonokosa, ohari‑ya dai sibateni. Dai sibanadi, dai wasi awisareya, dai maakarani.

⁵Dai wasiya, dai ya‑yainiya, diwani dai kamatene.

⁶Tabora‑ya dai koboniya, mai‑ya dai haana,

‘Dai ya‑yainahi. Oka kaneiro fawane, owasiwamineni.’ Dai ati teni.

⁷Fara‑nima Deoso ati‑ya mai nofaramaro, Deoso ati‑ya mai nofawamiya, neme‑ya mai wi‑wina mai ya‑yaini nafiteni. 99 mai kana Deoso ati‑ya mai nofa, mai ihi‑maro‑nima mai ihi nasa na, neme‑ya mai wi‑wina mai ya‑yaini bi‑bidi nineni.” Yeso ati nematane.

⁸Mai‑ya kanawatomatasebona mai‑ya hiyaramatase,

“Fana‑ka yinero ai yehe kafama‑nima ne. Yinero barata wamani toha, yinero ohari fawaneya, nabarina wahi‑ya yinero‑ya sibana, yobe nafi‑ya yowinineni, yinero‑ya wasebonehe. Yinero‑ya wasi awisariya, sibahinane.

⁹Yinero‑ya wase, hika mai‑ya haana,

‘Dai ya‑yainahi. Oka yinero fawane, owasiwamineni.’ Ati nineni.

¹⁰Owati dai mitahi. Deoso ati‑ya ai owa nofaremari, Deoso ati‑ya nofawaheya, Deoso‑ka yo‑yose mai sawi‑kaya mai ya‑yaiteni.” Yeso ati nematane.

¹¹Mai‑ya kanawatomatasebona mai‑ya hiyare,

“Ai owa bidi mai fama,

¹²bidi yoto‑ke badi‑ya haane,

‘Abi, hasinasa tiniya, oka yinero‑ba daa kanibote tinahi.’ Ati nane.

Yinero‑ya badi kadike, bidi yoto‑ke‑ka yinero‑bona‑ya daanane.

¹³Amoni fa‑famaraba ne‑ya yehe honene nafi‑ya yorotokanihi, yama yaki‑ka tabora bara‑kaya toke, kawi‑ya nokotonihi, mai fanawi‑ya nokotonihi ne, hika yinero tonasiyone.

¹⁴Yinero tosiyoya, faha kakimara, tefe tosiyo, fimi‑ya awane.

¹⁵Yama manakone‑ya waratonebona, maki owa‑ka yama‑ya aninawahane. Maki ati ene boroko mai‑ya natafawahane.

¹⁶Tefe‑ba mai daahire, boroko mai tafe‑ya ati kabane.

¹⁷Badi‑ya atibodi watinawamane.

‘Okobi‑ka yama anini‑ya mai anina mai tafi fotateni, owa‑ta fimi ihi owa abi yanatoneni.’ Atibodi ati nane.

¹⁸‘Okobi‑ya okomiya, Okobi ohiyaraboneni. —Abi, owa ene towe tohamaroni. Deoso ati okadabarihi, tiwati okadabarihi onamaroni.

¹⁹Abi, owa‑ya ewe tinamariyahi. Tika yo‑yose ohawahabisaboneni.— Onaboneni.’ Atibodi ati nane.

²⁰Fai‑ya tokome, badi tabaro yakari‑ya badi hiawe, bidi‑ya nofe, kanani toke, bidi‑ya kobone, bidi‑ya wate, bidi noko‑ya tomanane.

²¹‘Abi, owa ene towe tohamaro, Deoso ati‑ya okadabarihi, tiwati okadabarihi onamaroni. Owa‑ya ewe tinamariyahi.’ Ati nane.

²²Bidi ati‑ya nofare, hika yo‑yose mai‑ya hiyare,

‘Oka dao‑ka bora amosabote‑ba, hika sanidariya‑ba, hika aneho‑ba yama na dai kakama kanibote nahi, sakohinabonehe.

²³Bowi bidi ime‑ta dai nanahabahi. Ai marinaboneni.

²⁴Oka dao tokemari, abe amanakani, onamaro, kitame‑nima nane. Oka dao fawanemari, kamawahane.’ Ati nane.

Mai ya‑yaina, mai marina, mai wayomineni.

²⁵Bidi daidi fadara‑ya anine, kame, yobe yakari‑ya wasime, mai ya‑yaina, mai wayomi‑ya mitane.

²⁶Mai‑ka yo‑yose owa‑ya haane,

‘Hini yamata‑bone mai ya‑yaina, mai wayomineniti?’ Ati nane.

²⁷‘Tika soho koboname, amose ene abi ya‑yaine, ati ene bowi bidi ime‑ya mai nanahabani.’ Mai‑ka yo‑yose ati nane.

²⁸Badi tamine‑ya mite, yawe, ati tokiyomi nofarene. Badi kame, bidi‑ya himane.

²⁹‘Owati tokiyomi nofarini. Tiwa tabaro‑ya yama ani·ona, tika yama anini‑ya fawa·oterani. Tiwati‑nima oteni. Oka no‑nofa mai onatafabone, oda wayoma nabone, oda‑ka bodi bidi‑ba daatiterani.

³⁰Tika dao‑ya tika yinero daatinamaro, yinero‑ya tonasiyone, mai fanawi towe‑ya nokotonihimari, kame ene bowi bidi ime‑ya tiwati ihi mai nanahabawahineni.’ Ati nane.

³¹‘Owa‑ya tisawiteni. O·abiya, owa yehe honene nafi tikayafawahaboneni.

³²15:32 Tamine yokana amani, haro: Ai ene amosaramaro Deoso ati ai tokadabawaha, Deoso ya‑yainane.Tika soho tokemari, abe amanakani, onamaro, kitame‑nima nane. Tika soho fawanemari, kamawahane. Kame ene ai ya‑yainahi.’ Ati nene.” Yeso ati nematane.

¹Yeso hika mai da‑daba mai‑ya kanawatobona mai‑ya hiyare,

“Maki yinero dame‑ya kihe, ati ene hika yinero maki owa hinawadane. Makobote mai one kamake, fai‑ya mai hiyara,

‘Tika yinero‑ya na‑nawada tika yinero‑ya nawadi amosarene.’ Mai ati nineni.

²Fai‑ka yinero‑ya na‑nawada‑ya haane,

‘Oka yinero nawadi tina amosara, oka yinero tinawadamateraboneni. Yinero hano tiwawamiya, yinero hano owa‑ya daanama kanibote tinahi.’ Ati nane.

³Yinero‑ya na‑nawada hini‑ya hiyare,

‘Oka hidi‑ka yinero onawadamarabone ati ne, hini yamata‑nima onaba? Owa yehe kitara, yama anini kita‑ya owati nofarihi, yinero honita haani onofarihi oneni.’ Ati nane.

⁴‘Hehe, yama owatowahani. Mai‑ya okasomabone, hidi‑ka yinero onawadamariya, owa‑ya mai himanaboneni, mai tabori‑ya otafawahabonehe.’ Ati nane.

⁵Hika hidi‑ka yama‑ya mai kanikamaro, yama manakone kote‑ya mai nanahabara mai‑ya haane, daidi‑ya hiyare,

‘Yama tikanikamaro, hini yamata‑nima yama manakone na hasiniti?’ Hidi‑ka yinero‑ya na‑nawada ati nane.

⁶‘Owa defeni, oyo baodi kiba 100 tohani.’ Ati nane.

‘Baodi kiba 50 toha tikanahanobisahi.’ Hidi‑ka yinero‑ya na‑nawada ati nane.

⁷Owa‑ya hiyaramakitase,

‘Eme tika yama manakone na hasiniti?’ Ati nane.

‘Owa defeni, tiriko sako webote kiba 100 tohani.’ Ati nane.

‘Sako 80 kana tikanahanobisahi.’ Ati nane.

⁸Ene towe tamine‑ya hidi mite, ati yanane,

‘Oka yinero‑ya na‑nawada‑mari yama‑ya watone.’ Hidi ati nane.

Deoso ati‑ya mai tokadabara mai‑ka owa atibodi ati‑ya mai watoteni. Deoso ati‑ya mai tokadabamone Deoso atibodi ati‑ya mai wato bi‑bidi nineni.

⁹16:9 “Deoso tabaro‑ya dai‑ya mai towakamaboneni.” Yama hani ati na, Deoso oda‑ya towakamebona tamine amane.Owati dai mitahi. Yinero dai kiha mai one‑ya dai kasomiyahi. Mai‑ya dai kasomiya, dai abiya, Deoso tabaro‑ya dai‑ya mai towakamaboneni.

¹⁰Ai‑ka yama ohare‑ya mai nawadi amosiya, yama dama‑ya mai nawadi amosahareboneni. Mai‑ka yama damara mai ihi amosariya, mai‑ka yama dodamiya, mai ihi amosi awisaraboneni.

¹¹Dai‑ka yinero tohe, dai one mai‑ya dai kasomara, neme‑ka yama‑ya Deoso dai‑ya daaterebonane. Neme‑ka yama manakone nafibisani.

¹²‘Oda‑ka yama dai nawadahi.’ Mai ati na

mai‑ka yama dai nawadi amosariya, dai‑ka yama‑bone‑ya mai daateraboneni.

¹³Dai‑ka hidi mai fama, hidi owa ati dai tokadababisa, hidi owa ati dai tokadabaraboneni. Hidi owa dai nokotoniya, hidi owa dai kakaboneni. Deoso ati dai nofabisiya, yinero dai nokotoniraboneni.” Yeso ati nematane.

¹⁴Fariseo yinero‑ya mai nokotoniteni. Yeso ati‑ya mai mita,

“Yeso yama‑ya watorane.” Mai ati nameteni.

¹⁵Mai‑ya Yeso hiyare,

“Dai ene amosamone dai ati na, dai ati‑ya mai dami nofa, dai atibodi ati‑ya Deoso watobise, dai atibodi ati‑ya Deoso nofarene.

¹⁶16:16 Deoso ai nafi‑ka hidi kitabote tohawahebona kobone yama hani ati na, Yeso tamine amane. Yeso kobone, fare Deoso tohe, ai nafi‑ka hidi kitabote tohawahebonane.Yowaho Batita koboni awisareya, i‑di Mose‑ka yama hani ati toha, Deoso ati‑ya mai mi‑mita‑mete mai‑ka yama hani ati toha na, yama hani ati‑ya mai mitameteni. Yowaho koboneya, Deoso ai nafi‑ka hidi kitabote tohawahebona kobone tamine‑ya mai mitawahani.

‘Oda kita, hini oda ene Deoso ai nafi‑ka hidi kitabote tohawahebona‑ya oda saweboneni.’ Mai ati nani.

¹⁷Neme ababone, bofe ababone, Mose‑ka yama hani ati kote abateraboneni.

¹⁸Maki hini ene honita wahawameya, fana one‑ya famawaheya, ene ati kasiro, hiniya siwanane. Fana maki‑ya famamara‑ya maki owa nofe, fana‑ya famawahe, maki owa ene ati kasirohari, hiniya siwanane.” Yeso ati nematane.

Yama‑ya kihe toha, yama‑ya kihare toha

¹⁹Yeso mai‑ya kanawatobona mai‑ya hiyare,

“Ai owa‑ka yinero dame, bora amosabote‑ya sakone, mahi‑nima marina‑ya hirinematane.

²⁰Hika yobe nokobiri‑kaya ai owa kafori, oni Rasaro tohane. Rasaro‑ka yinero wadare, mese nafi towe tohe, ido‑ya siitonimatane.

²¹Rasaro tefe wadare,

‘Bofe‑ya mai tafe kote soniya, owa‑ya mai daanaba awineni.’ Rasaro atibodi ati nane.

Rasaro‑ka ido‑ya yomahi mai heronameteni.

²²Makobote i‑di Rasaro abe, Deoso‑ka yo‑yose mai hiwakamane. Abaraho korimari sawi‑kaya Rasaro korimari sawiwahane. Maki yinero dame‑ya kihemata, abamaki, mai hikamane.

²³Ai korimari weyene‑ya maki sawibisa, yama kome kita, yama‑ya kiine, yama yaki‑ya Abaraho‑ya awane, Abaraho‑ya Rasaro famarine.

²⁴Abaraho‑ya haane,

‘Idi, owa tikasomahi. I‑di Rasaro tiyosehi. Rasaro yehe faha‑ya bokeya, owa ebene‑ya boyonebonane, yama kome bi‑bidi nabonehe. Yifo hirini kita, owa‑ya kome kawitineni.’ Ati nane.

²⁵‘Ewe, i‑di Rasaro tokaterebonane. Tiwati kadamowamariyahi. Hibati‑ya ti·abi awisa tiriya, tika yama amosa damamaroni. Hibayata tiwa komene kitawahineni. I‑di Rasaro abi awisareya, hika yama wadara, hiniya komene‑ya awemari, hibayata owa‑ya sawi, hika yama amosawahineni.

²⁶Oda tabaro, dai tabaro na teberi‑ya hodi nafe waineni. Hawi wadaterani. Oda owa tokarihi, dai owa kakirihi, teboneni.’ Abaraho ati nane.

²⁷‘Idi, owati timitahi. Okobi tabaro‑ya Rasaro tiyosebisahi.

²⁸Yama kome kita‑kaya osawineni. Oka soho mai 5 kana mai‑ya i‑di Rasaro hiyaraho, owa‑kaya mai kamakirabonehe.’ Ati nane.

²⁹‘I‑di Rasaro tokarebonane. Mose‑ka yama hani‑ya mai kiha, Deoso ati‑ya mai mi‑mita‑mete mai‑ka yama hani‑ya mai kiha na, yama hani ati‑ya mai tokadabiya, tiwa‑kaya mai tokomakiteraboneni.’ Abaraho ati nane.

³⁰‘Idi, yama hani ati‑ya oka soho mai tokadabarani. Ai owa abemari, kitameya, mai‑ya hiyareya, Deoso ati‑ya mai nofawahaboneni.’ Ati nane.

³¹‘Mose‑ka yama hani ati‑ya mai nofarihi, Deoso ati‑ya mai mi‑mita‑mete mai‑ka yama hani ati‑ya mai nofarihi na, ai owa abe, kitameya, ati‑ya mai nofahariraboneni.’ Abaraho ati nane.” Yeso ati nematane.

¹Yeso hika mai da‑daba mai‑ya hiyare,

“Mai one ati ihi owati‑ya mai one tokadabaraboneni. Ka! Hini mai ihi tohiya, mai manakone wadaboneni.

²17:2 Ai ene towe manakone fota tamine amane.Hini ene towe tohi awisareya, yati webote‑ya namidi mai yadihineya, faha webote‑ya mai korohifiya, komene bi‑bidi nibisebonane. Ati ene owati‑ya ewe nofamareya, hini ene komene nafibisebonane.

³Dai noko wadahi. Tika owa tiwa‑ya ene amosare, tihiyaraho, ati amosawamebonaha. Ati amosawameya, tiwati somawamaharihi.

⁴Tika owa tiwa‑ya ene amosare, mahi ohari‑ya ene towe 7 kaneya, makobote tiwa‑ya hiyareya,

‘Owa ene‑nima owa ene namaraboneni.’ Ati neya,

tiwati somawamaharihi.” Yeso ati nematane.

⁵Yeso‑ka yo‑yose Yeso‑ya mai hiyara,

“Oda tikasomahi, Deoso ati oda nofi nafiwahabonehe.” Mai ati nameteni.

⁶“Deoso ati‑ya dai nofi i‑isi niya, dai ene kitaboneni. Awa tiawahi.

‘Awa boretikaniya, faha bai‑ya tikamahi.’ Dai ati niya,

awa‑ya Deoso borekaneya, faha bai‑ya awa‑ya Deoso kamawahebonane.

⁷Dai‑ka yo‑yose fadara‑ya anine, kaneiro mai‑ya nawada ne, kameya,

‘Titafi bahi, owa tafi yotaboneni.’ Dai ati terani.

⁸‘Owa tefe‑ba hawatiniyahi. Owa tefe‑ba daatiniya, korima·oniya, titafamakeboneni.’ Dai ati nibisateni.

⁹Dai ati‑nima dai‑ka yo‑yose ene neya, dai kahiyaraterani.

¹⁰Dai‑ka yo‑yose ene‑nima dai ene nahi. Makobote haa‑nima dai ati nahi.

‘Deoso, oda‑ka hidi amatini. Oda‑ya tikahiyarariyahi. Hini tiwati‑nima oda ene na. Oda ene amosabote wadaterani.’ Dai ati nahi.” Yeso ati nematane.

Mai mese towe 10 kana

¹¹Yerosare‑ya Yeso tokebona, yakanasa neya, Karireya yowi kowani‑kaya Samariya toha, fara yowi‑ya Yeso yakanematane.

¹²Mai tabori bide‑ya kobone, mai mese towe mai 10 kana yama yakari‑ya mai nahameteni.

¹³Yeso‑ya mai haana,

“Ayo Yeso, oda tikasomahi.” Mai ati nameteni.

¹⁴“Hehe, sibaraboneni. Deoso‑ka yama‑bone‑ya mai da‑daa mai‑ya dai tokomiya, dai kitama dai‑ya mai awawahabonehe.” Yeso ati nematane.

Mai tokoma, hawi‑ya mai mese amosawamameteni.

¹⁵Mai mese amosawami‑ya mai awa, ohari‑ta wininame, Deoso‑ya kahiyare, ati kitematane.

¹⁶Yeso‑ya kobone, Yeso yowi‑ya home, Yeso‑ya kahiyarematane. Yodeo mai‑ka owa tohare, Samaritano mai‑ka owa amane.

¹⁷“Mai 10 kana mai okasomamaro, mai 9 kana ebeni‑kaya mai tokimati?

¹⁸Ai‑ka mai kamara, Samariya‑ke kamabisane, Deoso‑ya kahiyarebonaha.” Yeso ati nematane.

¹⁹Mese towe tohemari‑ya hiyare,

“Sibarini, tiwaamisamahi. Tiwa tabaro‑ya tikamahi. Owati‑ya tinofa ihi tikitamineni.” Yeso ati nematane.

Deoso ai nafi‑ka hidi kitabote tohawahebona

²⁰“Deoso ai nafi‑ka hidi kitabote tohawahe kobonebona, hini yamata ai awiboneti, ai watowahebonaha?” Fariseo mai ati nameteni.

“Deoso ai nafi‑ka hidi kitabote tohawahebona yananeya, neme‑ya yama bara dai awateraboneni.

²¹‘A‑ahi‑ya tohane.’ Mai ati rihi.

‘Aka‑ya tohane.’ Mai ati rihi naboneni.

Deoso ai nafi‑ka hidi kitabote tohawahebona dai‑ya sawi hawa tohane.” Yeso ati nematane.

²²Hika mai da‑daba mai‑ya hiyare,

“Yama one‑ya dai‑ka Ayo neme‑ke dai‑ya sawimarebona dai ati hifoyebonane.

²³Keyehe‑ya dai‑ya mai hirinabone,

‘Ahiyata‑ya waine.’ Mai ati nihi,

‘Aka‑kaya waine.’ Mai one ati nihi nabone,

mai ati‑ya dai nofariyahi. Mai ati ihi dai tokariyahi.

²⁴Yama yaki‑ya bahi yebekani ai awateni. Fare‑nima dai‑ka Ayo neme‑ke bofe‑ka hidi tohawahe‑ya mai nafi awawahaboneni.

²⁵Fara‑bone koboni awisariya, owa‑ya mai nofarabone, owa‑ya mai habanaboneni.

²⁶Dai‑ka Ayo neme‑ke kiti yananeya, Nowe sawimata‑ka yama‑nima yama namataboneni.

²⁷Nowe ati‑ya mai nofara hiniya mai tafa, kawi‑ya mai fawa, mai one fana na, mai habi siitoni awisariya, kanawa dori‑ya Nowe tokiyome, makobote faha fowe kobo kanibote na ihi mai nafi abawahametemoneni.

²⁸Hibati‑ya i‑di Ro hasinasa ne‑ka yama‑nima yama namatasaboneni. Hiniya mai tafa, kawiya mai fawa, yama‑ya mai nika, yama‑ya mai daa, yamata‑ya mai kama, yobe‑ya mai wama nametemoneni.

²⁹I‑di Ro Sodoma‑ya wi‑wina‑mata, toke‑ka mahi tohasa ne‑ya Deoso ati ene yifo hirini toha, yati hirini toha na neme‑ya sona, mai nafi‑ya nanahabametemoneni.

³⁰Dai‑ka Ayo neme‑ke kitawaheya, haa‑nima yama namatasaboneni.” Yeso ati nematane.

³¹17:31 Isara·eo mai‑ka yobe doro hiweya, mai‑ka yobe tati mese siri‑kaya mai tokomisametemoneni.“Okomatasiya, yama siwayo‑ya dai nahoya, dai yehe honene yobe doro‑ya wada, dai towamariyahi. Fadara‑ya yama dai aniniya, tabora‑ya dai tokomariyahi.

³²I‑di Ro fadi tamine‑ya dai ati kadamowamariyahi.

³³17:33 Mai‑ka yama mai nokotonihe bofe‑ya yama we‑wee‑ya mai saweboneni.Mai‑ka yama‑ya mai nokotonihe, mai ababoneni. Mai‑ka yama‑ya mai nokotonira, mai abaraboneni.

³⁴Owati dai mitahi. Okomatasiya, mai fama mai amokana, ohari owakameya, owa towinakosebonane.

³⁵Okomatasiya, mai fanawi fama kimi‑ya tooniya, ohare owakamiya, one‑ta towitakosaboneni.

³⁶Fadara‑ya mai fama mai aniniya, ohari owakamiya, owa towitakosebonane.” Yeso ati nematane.

³⁷“Ebeni‑kaya kobotibati?” Hika mai da‑daba mai ati nameteni.

“Bani bate home‑ya boko mai toka, bani bate dai watoteni. Fara‑nima dai‑ka Ayo neme‑ke kamataseya, dai nafi watowahaboneni.” Yeso ati nematane.

¹Yeso mai‑ya kanawatomatane, mahi‑nima Deoso‑ya mai hiyarabonehe, mai atibodi kitiya, mai hiyari maakarabonehe.

²“Mai tabori‑ya kofeno‑ka yo‑yose wine, mai ihi‑ya ka‑kadika amane. Deoso‑ya nayofini awire, ai one‑ya nayofinahariterene.

³Mai tabori‑ya fana winahareni. Fana maki abemata, mai ihi‑ya ka‑kadika‑ya hiyara,

‘Maki owa yehe hone‑ya boti, owa‑ya kako ne, owa tikasomahi.’ Fana ati na, ati yanani damamoneni.

⁴Mai ihi‑ya ka‑kadika fana ati‑ya nofare, makobote fana kaki dama ihi hini‑ya hiyare,

‘Deoso onayofinara, ai owa ati onofaterani.

⁵Haa‑ta fana ati fawakasi watora, ati‑nima onaboneni, owa‑ya maa tonirabonehe.’ Ati nane.

⁶Mai ihi‑ya ka‑kadika ati kasiro, hiniya fana‑ya kasomane.

⁷Deoso hika mai haani hidameya, mai‑ya kasomebonane. Hibareya, Deoso ati ne, ati damarebonane.

⁸Owati dai mitahi. Deoso mai‑ya kasoma kanibote nebonane. Dai‑ka Ayo neme‑ke kamataseya, ati‑ya mai nofasa na mai damaraboneni.” Yeso ati nematane.

⁹Hini mai‑ya mai kahiyara, mai ihi towe wadaramone mai ati na, mai one‑ya mai nofara, mai‑ya Yeso kanawatobona, mai‑ya hiyarematane.

¹⁰“Deoso‑ka yobe‑ya mai fama mai towakamakineni, Deoso‑ya mai hiyarabonehe. Fariseo owa toha, kofeno‑ka yinero‑bona‑ya ha‑haa owa toha nane.

¹¹Fariseo wai, hini tamine‑ya hiyare,

‘Deoso, owati amosabisa, ya‑yai·onineni. Mai one‑ta yama‑ya mai ka‑kahidina mai toha, mai ihi amosara mai toha, mai one‑ka yibote mai‑ya mai a‑aha mai toha, mai na, mai ihi‑nima owa ene terani. Ahiyata‑ya wai kofeno‑ka yinero‑bona‑ya ha‑haa toha, fare ene‑nima owa ene terani.

¹²Semana‑nima mahi fame‑ya otafaterani. Oka yama nafi okadikateni. Oka yama 10 kana okayafa, ohare Deoso‑ya daa·oteni.’ Fariseo ati nane.

¹³Kofeno‑ka yinero‑bona‑ya ha‑haa aka‑ya wai, atibodi yawe, tonokomisi awire, hini bako‑ya batanane. Deoso‑ya hiyare,

‘Deoso, owati kasiramaro, owa‑ya tiwati somahi.’ Ati nane.

¹⁴Ene manakone Deoso haahinamarebonane. Fariseo ene manakone wadanasa nane. Hini mai‑ya mai kahiyara, Deoso ati ene mai mai hinofaraboneni. Hini ai‑ya ai nokotoniriya, Deoso ati ene ai‑ya mai kahiyarawahaboneni.” Yeso ati nematane.

Mai‑ka madehe‑ya Yeso kasome

¹⁵Mai‑ka madehe damana‑ya mai kakamameteni, madehe tati‑ya Yeso boyonebonaha. Madehe‑ya mai kakama, Yeso‑ya mai da‑daba mai‑ya mai awa, mai‑ya mai ati barinameteni.

¹⁶Yeso ati yanane,

“Madehe dai ati baririyahi. Madehe owati‑ya nofa, madehe‑nima mai na Deoso ai nafi‑ka hidi kitabote tohawahe‑ya mai saweboneni.” Yeso ati nematane.

¹⁷Owati amosa dai mitahi. Madehe owati‑ya nofa, fara‑nima mai ni awiriya, Deoso ai nafi‑ka hidi kitabote tohawahe‑ya mai sawiraboneni.” Yeso ati nematane.

Mai‑ka hidi owa Yeso‑ya kamakine

¹⁸Mai‑ka hidi owa kamaki, Yeso‑ya hiyare,

“Ayo, amosabote amatini. Hini yamata‑nima obati, ai abaterabone‑kaya osawebonehe?” Ati nematane.

¹⁹“Amosabote owa‑mone tina, ai owa amosabote wadaterene. Deoso‑ta amosabotebisa amane.

²⁰Deoso‑ka yama hani ati tiwata, fara ati timitahi,

‘Mai one‑ka yibote ti·aharihi. Ai owa tinahabarihi. Yama tibotiriyahi. Ai owa ene tamine‑ya keyehe‑ya hiritirihi. Abi, ami mai na, mai tinofabisahi.’ Yama hani ati nineni.” Yeso ati nematane.

²¹“Madehe ohi‑ya Deoso‑ka yama hani ati tikamina ati‑nima oteni.” Ati nematane.

²²Ati‑ya Yeso mite, ati yanane,

“Tika yama ohare hasinineni. Tiwa yehe honene nafi daatinahi, manakone waratiniya, mai yahi hone wadara mai‑ya daatinahi. Deoso tabaro‑ya tika yama dama tohaboneni. Eya tiwa ene niya, makobote owa‑ya tisawiyahi.” Yeso ati nematane.

²³Yeso ati‑ya mite, atibodi a‑arirematane. Yehe honene dame‑ya kayawematane.

²⁴Maki‑ya Yeso kakatome, ati yanane,

“Mai yahi hone dama mai kiha Deoso ai nafi‑ka hidi kitabote tohawahebona‑ya mai dami sawiraboneni.

²⁵Akoye hodone‑ya kamero tokiyomaterene. Fara‑nima mai yahi hone dama mai naboneni. Deoso ai nafi‑ka hidi kitabote tohawahe‑ya mai dami sawiraboneni.” Yeso ati nematane.

²⁶Yeso ati‑ya mai mita,

“Ka! Ebeni‑ke sawibati?” Mai ati nameteni.

²⁷“Ai ene kitara, Deoso ene kitabotebisa amane.” Yeso ati nematane.

²⁸“Ayo, oda tabaro‑ya oda sawimara, tiwa‑ya oda dababisineni.” Bedoro ati nematane.

²⁹Yeso ati yanane,

“Owati amosa dai mitahi. Deoso ai nafi‑ka hidi kitabote tohawahebona‑ya ai one sawebone ihi mai‑ka yama nafi‑ya mai tonawadakosa, mai ihi amosa manakone wadaboneni. Mai‑ka yobe, mai‑ka yibote, mai‑ka ayo, mai‑ka abi, mai‑ka ami, mai‑ka madehe, mai na, mai tonokosa, mai manakone wadaboneni.

³⁰18:30 “Mai abateraboneni.” Yama hani ati na, Deoso tabaro‑ya mai ya‑yaini fawaterabone tamine amani.Bofe‑ya mai winanasa ni‑ya mai ihi amosa manakone‑ya mai kayafaboneni. Mai manakone fiyakanaboneni. Makobote mai abateraboneni.” Yeso ati nematane.

Yeso abebona tamine‑ya hiyare

³¹Mai 12 kana mai‑ya Yeso haane, Ahiyata‑ya mai toki bide toha, mai‑ya hiyare,

“Yerosare‑ya ai tokawahaboneni. Yerosare‑ya dai‑ka Ayo neme‑ke tamine‑ya Deoso ati‑ya mai mi‑mita‑mete mai kanahanamete‑nima yama nawahaboneni.

³²Kofeno‑ka mai‑ya owa‑ya mai daanabone, owa‑ya mai hahakana, owa‑ya mai fironaboneni.

³³Dai‑ka Ayo neme‑ke‑ya mai bisiniya, mai hinahabebonane. Mahi 3 kani‑ya dai‑ka Ayo neme‑ke kitamebonane.” Yeso ati nematane.

³⁴Yeso ati‑ya mai mita, yama‑ya mai watorameteni. Ati yokana‑ya kemo‑nima nane.

“Yama bara tamine‑ya Yeso hiyare awane.” Mai atibodi ati nameteni.

Batimeo tamine

³⁵Yeriko yakari‑ya mai yakana, hawi fowari‑ya noko wadare itarimatane, hika yama‑bone‑ya haaneri.

³⁶Mai dama mai yakana, mai moni‑ya mite, haane,

“Hini yamata tohiti?” Ati ne,

³⁷“Yeso Nasare‑ke kamakine.” Mai ati nameteni.

³⁸18:38 Dafi‑ka nodi yama nafi‑ka hidi tohawahebona Deoso‑ka yama hani ati neni.Mai ati‑ya mite,

“Yeso, oda‑ka hidi amatini. I‑di Dafi‑ka nodi amatini. Owa tikasomahi.” Ati nematane.

³⁹Mai dai toha maki ati‑ya mai mita,

“Tiwati fawanahi.” Mai ati na,

Hiniya Batimeo haani kitawahe,

“Oda‑ka hidi amatini. I‑di Dafi‑ka nodi amatini. Owa tikasomahi.” Batimeo ati nematane.

⁴⁰Ati‑ya Yeso mite, maatowiti,

“Dai kakamakiho.” Ati nematane.

Mai hiwakamaki,

⁴¹“Hini yamata‑ya tiwati koboniti?” Yeso ati ne,

“Ayo, owa noko amosawamabone, onani.” Ati nematane.

⁴²“Tikitamahi. Owati tinofa ihi tiwa noko amosawamawahineni.” Yeso ati nematane.

⁴³Batimeo noko amosawame, yama‑ya awawahe, Yeso‑ya sawiwahe, Deoso‑ya kahiyarematane. Yeso ene‑ya mai dami awa, Deoso‑ya mai kahiyaraharemeteni.

¹Yeriko‑ya Yeso yakane,

²tamine‑ya Sakeo mite, Yeso‑ya awebona tokomematane. Sakeo kofeno‑ka yinero‑bona‑ya ha‑haa mai‑ka hidi owa amane. Yinero nafi‑ya kihematane.

³Yeso‑ya awebona tokome, wai da‑daone, noko mai dama mai barihikanematane.

⁴Hawi‑ya awa wai‑ya awe, kanani dai towame, awa‑ya tokomisematane, Yeso‑ya awebonaha.

⁵Yeso kamaki, noko tokomise, Sakeo‑ya awe, Sakeo‑ya hiyare,

“Sakeo, tikisamahi. Tika yobe‑ya okaboneni.” Yeso ati nematane.

⁶Yeso ati‑ya Sakeo mite, kisama kanibote ne, ya‑yainematane. Hika yobe‑ya Yeso‑ya towakamematane.

⁷Sakeo‑ka yobe‑ya Yeso tokebona‑ya mai awa, Yeso‑ya mai weena,

“Ati kasiro‑ka yobe‑ya Yeso tokiyomebanane.” Mai ati nameteni.

⁸Sakeo waa kanibote ne, Yeso‑ya hiyare,

“Ayo, owati timitahi. Mai‑ka yama wadara mai‑ya oka yama beheri daa·onaboneni. Mai‑ka yama one obotemaro, mai‑ka yama 4 kanabone daa·onamatasaboneni.” Sakeo ati nematane.

⁹19:9 Abaraho‑ka nodi Sakeo tohe, Yeso ati ne, Abaraho Deoso ati‑ya nofemata‑nima i‑di Sakeo ne, Deoso ati‑ya nofawahane.“Sakeo, Abaraho‑ka nodi tihawaha, hibayata Deoso tiwa‑ya kayawane.

¹⁰Bofe‑ya dai wi‑wina dai‑ya okemaro, Deoso hawine dai watora dai‑ya siba·onaboneni, dai okayafabonehe.” Yeso ati nematane.

¹¹Yeso ati‑ya mai mitiya,

“Yerosare yakari‑ya Yeso kobonane. Deoso ai nafi‑ka hidi kitabote tohawahebona‑ya yama yana kanibote naba awineni.” Mai atibodi ati nameteni.

Mai atibodi ati‑ya Yeso wato, mai‑ya kanawatobona, mai‑ya hiyare,

¹²“Owati dai mitahi. Ai tabaro yaka‑ya hidi webote wai‑ya mai‑ka hidi bi‑bidi ne tokebona ati nene. Hidi webote hikasomebona, kiti ba‑basi nebona ati nene. Yananebona,

¹³hika mai yo‑yose mai 10 kana mai‑ya haane. Mai‑nima mai‑ka yinero webote oharirine‑ya daane, mai‑ya hiyare,

‘Owa nowati‑ya oka yinero dai tonanafiyahi. Okomatasiya, oka yinero owa‑ya dai daanamaboneni.’ Maki ati nane.

¹⁴Maki‑ya mai one kaka, mai ati ihi mai‑ka yo‑yose mai tokomake, hidi webote‑ya mai hiyara,

‘Tiwati ihi maki kiti ba‑basi rebonane.’ Mai‑ka yo‑yose mai ati nineni.

¹⁵Hidi webote ati ene maki kiti ba‑basi ne, maki kameya, hika yo‑yose yinero‑ya mai na‑nawada mai‑ya haane,

‘Dai‑ka yama anini tamine omitaboneni.’ Ati ne,

¹⁶‘Ayo, yinero ohari owa‑ya daatinamaro, yinero 11 tohawahane.’ Hika yo‑yose owa ati nane.

¹⁷‘Tiwa ene amosa, hibati‑ya tika yama bide daa·onamaro, owati‑nima tina, owati ihi tika yama damawahaboneni. Mai tabori 10 kana mai‑ka hidi tihawahaboneni.’ Hidi ati nane.

¹⁸Hika yo‑yose owa kamaki,

‘Yinero ohari owa‑ya daatinemari, yinero 6 tohawahane.’ Hika yo‑yose owa ati ne,

¹⁹‘Owati ihi mai tabori 5 kana mai‑ka hidi tihawahaboneni.’ Hidi ati nane.

²⁰Hika yo‑yose owa kamaki,

‘Hibaha, yinero owa‑ya daatinamaro, tikayahamatasahi. Bora‑ya kini·okane, okahemamaroni.

²¹Tiwati ihi owa habo siitonineni. Tiwa eme kitateni. Mai one ihi tika yinero dodame, yinero nafi tikayahateni. Awa‑ya anitira, yamata marafakaniya, yamata tikayahateni.’ Ati nane.

^22-23‘Hini yamata ihi oka yinero bahako‑ya daatini awiriti? Oka yinero bahako‑ya daatina‑mani, okomiya, oka yinero‑ya mai daanamatasa, mai‑ka yinero kote‑ya mai daanahare neni. Owa eme kitatemone tina, mai one ihi oka yinero dodame, yinero nafi okayahatemone tina, awa‑ya ani·ora, yamata marafakaniya, yamata okayahatemone tinani. Tiwati‑nima yama naboneni.’ Hidi ati nane.

²⁴Mai yorona mai‑ya hiyare,

‘Yinero ohari dai kayafe, yinero 10 kani‑ya kihe‑ya dai daanahi.’ Hidi ati nane.

²⁵‘Hika yinero 10 kane, hini yamata‑nima neba yinero‑ya mai daatonamakibati?’ Mai ati nineni.

²⁶‘Hika yama toha, hika yama one daa·onaboneni. Hika yama awira oka yama‑ya damanamaterebonane.

²⁷19:11-27 Yeso ai nimaniya, Deoso‑ka yama‑ya ai aninahi. Yeso kamataseya, ai ene amosa manakone‑ya daanebonane. Yeso‑ya mai nofara mai‑ya Yeso weeni kitebonane.Owa‑ya mai kakamaro, mai‑ka hidi ohi awirabone, mai ati namaro, owa noko‑ya mai dai nanahabahi.’ Hidi ati nane.” Yeso ati nematane.

Boho yetene mese‑ya Yeso itari

²⁸Yeso hiyari hawa toheya, yananamatasematane, Yerosare‑ya tokomorosebonaha.

²⁹Orifera adami yakari‑ya tabora bi‑bidi na, Betaniya toha, Befaki toha na, fara yakari‑ya Yeso mai kobona, Yeso hika mai da‑daba mai fama mai‑ya yosematane.

³⁰“A‑ahi‑ya mai tabori‑ya dai towakahi. Mai tabori‑ke boho yetene yaditone dai awiya, dai disawaheya, dai kakamayaho. Hibati‑ya boho yetene mese‑ya mai itariterani.

³¹‘Hini yamata‑bone boho yetene‑ya dai disawahiti?’ Mai ati niya,

‘Ai‑ka hidi haahinene.’ Dai ati niyahi.” Yeso ati nematane.

³²Mai hiyose, mai towaka, tabora‑ya mai kobokana, Yeso ati‑nima yama na‑ya mai awameteni.

³³Boho yetene‑ya mai disawaha, boho‑ka hidi ati yanane,

“Hini yamata‑bone boho yetene‑ya dai disawaha?” Ati nematane.

³⁴“Ai‑ka hidi haahinene.” Mai ati nameteni.

³⁵Boho yetene‑ya mai kakama, boho yetene mese‑ya mai‑ka bora‑ya mai sookanire, Yeso‑ya mai nawitariwahameteni.

³⁶Mai toka, Yeso hawine‑ya mai‑ka bora‑ya mai nawiyameteni.

³⁷Yerosare yakari‑ya mai yakana, Orifera adami‑ya mai tokofawaha, mai dama mai‑ya mai daba mai ati yanana, mai ati kita, mai ya‑yaina, Yeso ene kite‑ya mai awamaro Yeso ene‑mari tamine‑ya mai hiyara, Deoso‑ya mai kahiyarameteni.

³⁸“Oda‑ka hidi webote amatini. Deoso tiwa‑ya yose, tiwa‑ya kasomayaho, oda ati nineni. Deoso ati somane, Deoso neme‑ke ai kahiyarineni.” Mai ati nameteni.

³⁹Mai ati‑ya fariseo mai mita, Yeso‑ya mai hiyara,

“Yeso, tiwati ihi mai ati fawanahi.” Fariseo mai ati nameteni.

⁴⁰19:40 Boho bidi yetene mese‑ya Yerosare hidi itari‑ya kamebonane. Deoso‑ka yama hani ati na, fara yama hani ati‑nima yama yanana, mai ya‑yaini nafemetemoneni. Yeso ai one kahiyari awira‑mani, Deoso ati ene yati ati yana nani, Yeso‑ya kahiyarabonehe.Fariseo mai‑ya Yeso hiyare,

“Owati dai mitahi. Mai ati fawana‑mani, yati ati yanana neni.” Yeso ati nematane.

Yerosare‑ya Yeso awe, ohinane

⁴¹Yerosare yakari‑ya Yeso kobone, mai tabori‑ya awe, ohinawahematane.

⁴²“Deoso ati somawama‑bona‑ka yama dai wata‑mani, yama sibara neni. Hibayata dai wato awiraboneni.

⁴³Yama kobonabone tamine okaminaboneni. Dai‑ya mai kaka, Yerosare‑ya mai kakidikosabone, awayara mai wamanaboneni, dai fidotorabonehe.

⁴⁴Dai‑ya mai nanahababone, dai‑ka yobe‑ya mai nanahababone, yati fama demenare wadamateraboneni. Hibayata Deoso dai‑ya sawi, dai watore ene dai abawahaboneni.” Yeso ati nematane.

Deoso‑ka yobe‑ya Yeso toke

⁴⁵Deoso‑ka yobe‑ya Yeso toke, yama‑ya mai da‑daa mai‑ya kananihi,

⁴⁶mai‑ya hiyare,

“‘Oka yobe‑ya owa‑ya mai hiyaraboneni.’ Deoso‑ka yama hani ati na,

dai ene yama‑ya mai bo‑boti mai‑ka yobe‑nima yobe nawawahane.” Yeso ati nematane.

⁴⁷Mahi‑nima Deoso‑ka yobe‑ya Yeso mai‑ya kanawatomatane. Mose‑ka yama hani ati‑ya mai ka‑kamina mai toha, Deoso‑ka yama‑bone‑ya mai da‑daa mai‑ka hidi mai toha, Yodeo mai‑ka hidi mai bi‑bidi na mai toha, mai na, Yeso‑ya mai nanahababone, mai ati nameteni.

⁴⁸Mai dama Yeso ati‑ya mai nofi nafe, mai ihi mai‑ya mai nayofina, Yeso‑ya mai nanahabi awirameteni.

Hini yamata ihi mai kanatiniti? Mai ati na

¹Deoso‑ka yobe‑ya Yeso mai‑ya kanawato, Deoso ati amosabote tamine‑ya Yeso hiyareya, Mose‑ka yama hani ati‑ya mai ka‑kamina mai toha, Deoso‑ka yama‑bone‑ya mai da‑daa mai‑ka hidi mai toha, Yodeo mai‑ka hidi mai bi‑bidi na mai toha, mai na, mai kamake, Yeso‑ya mai weenabone, Yeso‑ya mai hiyara,

²“Ebeni‑ke ati ene mai‑ya kanatiniti? Ebeni‑ke ati ene mesa‑ya fatatikawiti tiniti?” Mai ati nameteni.

³“Dai ati omiti bahaboneni.

⁴Yowaho Batita mai dama mai‑ya habanirise, ebeni‑ke ati ene tohati? Deoso ene toha, ai owa ene toha ne awane, hini yamata‑nima dai ati niti?” Yeso ati nematane.

⁵Mai ibi hiyara,

“‘Deoso ati ene amane.’ Ai ati niya,

‘Hini yamata ihi Yowaho Batita ati dai nofariti?’ Yeso ati nebonane.

⁶‘Ai owa ati ene amane.’ Ai ati niya,

yati‑ya ai‑ya mai nanahababa awini. Yowaho Batita Deoso ati‑ya mai mi‑mita mai‑ka owa amane, mai dama mai ati na.” Mai ibi hiyara, mai ati nameteni.

⁷Yeso‑ya mai hiyaramatasa,

“Yowaho Batita tamine oda wato awirini.” Mai ati nameteni.

⁸“Dai ati yanara, owati yananahariraboneni.” Yeso ati nematane.

Ofa‑ya mai na‑nawada

⁹Yeso mai‑ya kanawatobona mai‑ya hiyare,

“Ofa‑ya maki kame, yama yaki‑ya tokebona, wininama kanibote ni awirebona atibodi ati ne, mai one‑ya yose,

‘Oka awa bono dai nawadahi. Ofa hadiya, one dai kayafa, one okayaha onaboneni.’ Ofa hidi ati ne,

‘Hehe, sibarini.’ Mai ati namaroni.

Fa‑fai‑ya yama yaki‑ya hidi tokawahemarine.

¹⁰Ofa hadiya, ofa hidi‑ka yo‑yose owa‑ya yose,

‘Owa tabaro one‑ya tikamahi. Ofa one‑ya tiwa‑ya mai daaniya, ofa tiwakamiyahi.’ Hidi ati nene.

Hika yo‑yose tokome, mai‑ya haane, ofa‑ya mai daara, hiniya mai bisihine, honita kamene.

¹¹Hika yo‑yose owa‑ya yosemakitase, ofa‑ya mai daarani. Hika yo‑yose‑ya mai wee, mai bisihine, honita kamatasene.

¹²Makobote hika yo‑yose owa‑ya yosemakine, awa bono‑ya tonakebonaha. Kobone, mai bisihine, awa widi‑ya mai korohiwitine.

¹³‘Hini yamata‑nima obati? Oka dao oyosebisaboneni. Oka dao onofi nafi. Oka dao ati‑ya mai nofabisaba awineni.’ Ofa hidi atibodi ati nene.

¹⁴Ofa hidi bidi kobone‑ya mai awa, mai ibi hiyara,

‘Bidi ai nanahabaho. Ai nanahabeya, badi abamakiya, mai‑ka yama nafi ai kayafawahaboneni.’ Mai ati nani, mai ibi hiyararo.

¹⁵20:9-16 Ofa mai na‑nawada Yodeo mai‑ka hidi mai tamine toha, ofa hidi i‑di Deoso tamine toha, ofa hidi‑ya mai na‑narifa i‑di Deoso ati‑ya mai mi‑mita mai tamine toha, hidi bidi i‑di Yeso tamine toha ne, Yeso‑ya mai nanahababone ihi Deoso mai‑ya weeni kitebonane. Fara ano 70‑ya yananametemoneni. Deoso ati ene homano mai‑ka sodado Yerosare‑ya mai wi‑wina mai‑ya mai nanahabametemoneni.Bidi mai hinahabe, awa beheri‑kaya abo mai korohiwitine. Bidi abe tamine‑ya badi mite, hini yamata‑nima ene nabati?

¹⁶Kamakiya, hika ofa‑ya mai na‑nawada‑maro mai‑ya nanahabeya, ai one‑ya awa‑ya hidi daanawahebonane, mai hinawadawahabonehe.” Yeso ati nematane.

“Ka! Haa‑nima yama riyahi.” Mai ati nameteni.

¹⁷Yeso mai‑ya kakatome,

“Yama‑ya dai watora, Deoso‑ka yama hani ati dai mitahi.

‘Yobe‑ya mai wa‑wama awa mai werehiwite, yobe tati mese ewene tohawahemarine.’ Deoso‑ka yama hani ati nineni.

¹⁸20:17-18 Yobe tati mese ewene i‑di Yeso tamine amane. Awa mai werehiwite, Yeso mai nofara tamine amane. Yobe tati mese ewene tohawahe Yeso ai nafi‑ka hidi tohewahebona tamine amane. Awa‑ya ai sonariya, Yeso ati mai nofara Deoso mai‑ya weenebona tamine amane. Awa ai‑ya koboniya, Deoso‑ka we‑wee tamine amani.Yobe tati mese‑bona home‑ya ai sonariya, ai bakatonaboneni. Yobe tati mese ewene soneya, ai‑ya koboneya, ai abi ohareboneni.” Yeso ati nematane.

¹⁹Mose‑ka yama hani ati‑ya mai ka‑kamina mai toha, Deoso‑ka yama‑bone‑ya mai da‑daa mai‑ka hidi mai toha, mai na, mai yawa,

“Ofa‑ya mai na‑nawada mai tamine‑ya Yeso hiyare, fara oda tamine amani. Yeso ati kasirone.” Mai atibodi ati nameteni.

Yeso‑ya mai watabone mai ati na, mai dama mai‑ya mai nayofina, mai maanamameteni.

“Yeso ati tosawariba awane.” Mai atibodi ati na

²⁰Yeso‑ya mai kakatoma,

“Ai‑ka yo‑yose Yeso‑ya mai hiyariya, ai‑ka yo‑yose mai‑ya Yeso watoreya, mai ati ihi Yeso ati tosawariba awane. Ati towe ai miteya, kofeno‑ya ai daanebonane.” Mai atibodi ati nameteni.

Mai‑ka mai‑ya mai yosemeteni, Yeso‑ya mai hiyarabonehe. Owa kobone, ati yanane,

²¹“Ayo, keyehe‑ya hirititerani. Mai nafi tinofa, mai one tinofi bi‑bidi tini awirani. Deoso ati tikamine amose hinama tohe, fare ene tiwati oda mitaboneni.

²²20:22 Homano mai‑ka hidi webote i‑di Sesa tohematamonane.Ai‑ka yinero‑ya Sesa haaneya, yinero ai daanibaraniha?” Mai ati nameteni.

²³Mai atibodi ati‑ya Yeso wato, ati yanane,

²⁴“Yara‑ka yinero ohari dai namoho. Ebeni‑ke korimari toha, oni tohanati?” Yeso ati nematane.

“Sesa korimari, Sesa oni ne, yinero bako‑ya waanane.” Mai ati nameteni.

²⁵“Sesa‑ka yama‑ya Sesa‑ya dai daatonama, Deoso‑ka yama‑ya Deoso‑ya dai daatonamahari, dai nahi.” Yeso ati nematane.

²⁶Mai dama mai noki‑ya Yeso ati tosawariba awane mai ati namaro, Yeso ati‑ya mai mita,

“Ka! Yeso yama‑ya watone.” Mai atibodi ati na, mai ati fawanawahameteni.

²⁷Sadoseo mai one kamakitasameteni, Yeso ati‑ya mai mitabonehe.

“Ai aba ai kitamaterani.” Sadoseo mai ati teni.

²⁸Fara mai kobona, Yeso‑ya mai hiyara,

“Ayo, tiwati oda mitaboneni. Hibati‑ya i‑di Mose yama hikanahanamete tamine timitahi,

‘Ayo abeya, fadi hasina, bidi, bide, mai na, mai wadara, anidi fadi‑ya famawahiyaho. Bidi wadeya, anidi oni‑ya bidi weyenayaho.’ Mose‑ka yama hani ati nineni.

²⁹Ai owa‑ka soho mai 6 kana fane, kahiware, abemarine.

³⁰Fadi‑ya sohori famawahe, kahiwamakitasare, abamakitasemarine.

³¹Fara hinama mai toha, mai fana, mai kahiwara, mai nafi abamaroni.

³²Mai nafi aba, mai‑ka yibote abamakemaroni.

³³Yeso, oda ati timitahi. Mai nafi‑ka yibote tohamaro, mai kitamiya, ebeni‑ke fadi tohawahibati?” Sadoseo mai ati nameteni.

³⁴Yeso mai‑ya hiyare,

“Bofe‑ka mai fanateni.

³⁵Deoso ai nafi‑ka hidi kitabote tohawahebona‑ya mai sawiya, mai fanaterani.

³⁶Deoso‑ka yo‑yose mai‑nima mai nawahabone, mai abamateraboneni. Mai aba, mai kitama, mai abamateraboneni. Deoso bidi mai tohawahaboneni.

³⁷Ai aba, ai kitamaterabone dai ati na, Mose‑ka yama hani ati dai mitahi. Awa hirini‑ya i‑di Mose‑ya Deoso hiyare,

‘I‑di Abaraho, i‑di Isaki, i‑di Yako, mai na, mai‑ka Deoso ama·oni.’ Deoso ati nematamonane.

³⁸20:38 Ai aba, ai wadamara mai one ati na, fara mai‑ya Yeso kanawatone. Ai abi‑ya, ai korimari hasina, Deoso ai nofa, Deoso tabaro‑ya ai korimari tokateni.Hibati‑ya mai abamete, mai wadamara mai‑ka Deoso tohaterene. Mai korimari hasinibisa, fara mai‑ka Deoso amane. Ai hasina ai toha, mai abamete mai toha, ai na, Deoso ai‑ya awatene.” Yeso ati nematane.

³⁹Mose‑ka yama hani ati‑ya mai ka‑kamina Yeso ati‑ya mai mita,

“Ayo, tiwati amosineni.” Mai ati nameteni.

⁴⁰Yeso yama‑ya wato, Yeso‑ya mai nayofina, mai ati fawanawahameteni.

Deoso‑ka Ka‑kadika i‑di Dafi‑ka hidi amane

⁴¹Yeso mai‑ya hiyare,

“‘Deoso‑ka Ka‑kadika Dafi‑ka nodi amane.’ Mai ati teni.

⁴²Hibati‑ya Deoso‑ka Ka‑kadika tamine‑ya i‑di Dafi kanahanomatamonane, Deoso‑ka wayoma hani‑ya.

‘Oka hidi webote‑ya Deoso hiyare,

—Owa mano kanika‑ya tiwitarihi.

⁴³Owati ihi tiwa‑ya mai ka‑kako mai‑ka hidi tihawahaboneni.—’ Yama hani ati neni.

⁴⁴Deoso‑ka Ka‑kadika i‑di Dafi‑ka hidi webote tohemona i‑di Dafi ati nematamonane. Fare i‑di Dafi‑ka nodi tohe, i‑di Dafi‑ka hidi webote tohahari ne.” Yeso ati nematane.

⁴⁵Yeso hika mai da‑daba mai‑ya hiyare, ati mai dama mai himite,

⁴⁶“Dai noko wadahi. Mose‑ka yama hani ati‑ya mai ka‑kamina dai‑ya mai nokotoniteni, mai dai kahiyarabonehe. Fara yama ai ka‑kanika‑ke yobe‑ya mai naha, bora yaba‑ya mai sakona; Deoso‑ya mai hi‑hiyara‑ke yobe‑ya mai sawe, kadera amosa‑ya mai nahore; dai yorotokana, dai tafabone, mai sawe, kadera amosabisa‑ya mai nahore,

⁴⁷20:47 Fariseo haa‑nima mai teni. Deoso ati mai tokadabara, hiniya mai dami noki‑ya Deoso‑ya mai hiyari yaboteni. Fara haa‑nima mai atibodi ati na, “Mai noki‑ya Deoso‑ya ai hiyari yaba, ‘Deoso‑ya oda nofi kitani.’ Mai one ati naboneni.” Fariseo mai atibodi ati teni.Deoso‑ya mai hiyara, mai hiyari yaboteni, mai dai kahiyarabonehe. Mai fanawi‑ka yibote mai aba mai‑ka yama‑ya mai kayafateni. Mai ihi towe mai manakone fotaboneni.” Yeso ati nematane.

Fana honita wahawama yinero‑ya daana

¹Yeso noko toke, yinero dame‑ya mai kiha, Deoso‑ka yinero‑bona‑ya mai daanameteni.

²Makobote fana kamake, fana maki abemata, honita wahawama, yahi hone wadara, hika yinero bidi fame‑ya daanameteni. Ihi Yeso hiawa,

³“Owati amosa dai mitahi. Fana honita wahawama yama nafi‑ya daaneni. Mai one‑ta yama nafi‑ya mai daani awirani.

⁴Mai‑ka yinero dame, owa‑ya mai daana, mai‑ka yinero dame hasinane. Fana‑ta yahi honene wadara, hika yinero bidi fame‑ya daana, hika yinero owa hasini awire, tafe manakone‑bone‑ya daanibisineni.” Yeso ati nematane.

Okomatasiya, haa‑nima nabone

⁵Deoso‑ka yobe yati amosa‑ya wamanihi, yama amosa one siitonihi na tamine‑ya mai one hiyara, Yeso ati yanane,

⁶“Owati dai mitahi. Hibayata yama amosa‑ya dai awineni. Yama one‑ya yobe wadamarebona, yati fama demenarimaraboneni.” Ati ne,

⁷“Ayo, eme ai amoni niya, yobe ababonati? Yama koboni yanatoniya, hini yamata oda awibati, yama‑ya oda watowahi‑bone‑karo?” Mai ati nameteni.

⁸“Dai noko wadahi. Dai‑ya mai keyeheriyahi.

‘Deoso‑ka Ka‑kadika ama·oni. Yama yana kanibote naboneni.’ Mai dama mai ati naboneni.

Mai ati dai tokadabariyahi.

⁹Wami hidi mai ibi nofarabone, mai‑ka sodado mai ibi taonabone, mai tamine dai mitiya, dai habo siitoriyahi. Yama faina‑bone kobonabone, kobo kanibote raboneni.” Yeso ati nematane.

¹⁰Makobote Yeso ati yananamatase,

“Wami one‑kaya mai wi‑wina mai‑ka sodado ahini‑kaya mai kamakeboneni, mai dami‑ya mai nanahababonehe. Ahini‑kaya mai wi‑wina mai‑ka sodado maa kowani‑kaya mai tokaboneni, mai‑ya mai nanahababonehe.

¹¹Wami wawawakani kita, mai dami fimi ihi mai aba, mai kiyana mai dama mai aba naboneni. Yama towe yanana ihi, ‘Ka!’ Mai ati naboneni. Neme‑ya yama yofina‑ya mai awawahaboneni.

¹²Fara haa‑nima yamana yanani awisari‑ya dai‑ya mai wataboneni, dai‑ya mai bisinabonehe. Owati dai no‑nofa dai‑ya mai nafoyaboneni, kadeya‑ya. Owati dai no‑nofa Deoso‑ya mai hi‑hiyara‑ke yobe hidi‑ya dai‑ya mai towakama, mai‑ka hidi webote‑ya dai‑ya mai towakama, mai‑ka kofenado‑ya dai‑ya mai towakama na, dai‑ya mai kako nafeboneni.

¹³Mai‑ka hidi dai ati‑ya mai mitabone owa tamine‑ya dai hiyaraboneni.

¹⁴Dai ati mai mitabone dai‑ya mai haana, dai atibodi yama‑ya kadikariyahi.

¹⁵Owa ene yama‑ya dai watowahaboneni. Dai ati yananiya, mai ati fawanaboneni.

¹⁶Dai‑ya mai kahabanaboneni. Dai‑ka abi, dai‑ka ami, dai‑ka ayo, dai‑ka soho, dai‑ka naki, dai‑ka no‑nofa, mai na, dai‑ya mai kahabanaboneni. Mai‑ka hidi dai one‑ya mai nanahababoneni.

¹⁷Owa dai nofa dai‑ya mai nafi kakaboneni.

¹⁸Dai abi ohari awiraboneni.

¹⁹21:19 “Ai abaterabone‑kaya” Deoso tabaro tamine amane.Owa oni dai saatonakosi awiriya, ai abarabone‑kaya dai saweboneni.

²⁰Yerosare‑ya sodado mai kakidikosa mai dai awa, Yerosare aba kanibote naboneni.

²¹Yodeya‑ya dai wi‑wina adami webote‑kaya dai kananiyahi. Yerosare‑ya dai wi‑wina dai kananaharihi. Sidadi yakari‑ya dai wi‑wina Yerosare‑ya dai tokariyahi.

²²Mai ihi manakone kobonaboneni, yama hani ati‑nima yama nawahabonehe.

²³Ka! Mai fanawi naba toha, mai‑ka madehe i‑isi na mai toha na, mai kananiya, yama ati kasiraboneni. Deoso yawe ene Yodeo mai‑ya sodado mai kakaboneni.

²⁴Mai dama mai‑ya sodado mai nanahaba, mai one‑ya mai watiya, Bara mai tabori dami‑kaya mai‑ya mai towakama naboneni. Yodeo mai tohara Yerosare‑ya mai kayafaboneni. Yodeo mai tohara mai amoni‑ya Deoso kadikatene, mai‑ka kofeno kiti fawanebonane.

²⁵Mahi, abariko, amowa, mai na, mai bara tohaboneni. Bofe‑ya mai wi‑wina mai habi siitonabone, maa rike webote‑ya mai awa, faha moni kita‑ya mai mita, mai na, mai habi siitonaboneni.

²⁶Neme‑kaya yama nafi wawawakanaboneni. Yama towe yananabone ihi mai dama habi siitona, mai habi siitona ihi mai abakosaboneni.

‘Yama nafi ababonehe.’ Mai atibodi ati naboneni.

²⁷Dai‑ka Ayo neme‑ke‑ya mai awabone, neme sabi‑ya kisameya, wehene nafibonane. Ene kitebonane.

²⁸Haa‑nima yama na dai awiya, dai ya‑yainahi. Deoso dai‑ya kasoma kanibote nebonane.” Yeso ati nematane.

²⁹Mai‑ya kanawatobona mai‑ya hiyaramatase,

“Fiko ade dai awiyahi. Awa haa‑nima teni.

³⁰21:30 Mai tabori‑ya yama siri‑ya awa afe aba, yama hiwe koboni yanatonamatasiya, awa afe yananamatasateni.Awa afe yanamatasaya, yama hiwe kakebone ai watoteni.

³¹Fara owati‑nima yama niya, Deoso ai nafi‑ka hidi kitabote tohawahebona koboni yanatonane.

³²Owati amosa dai mitahi. Owati‑nima yama yanana‑ya mai awiya, mai one hasinasa niya, dai‑ka Ayo neme‑ke kobonebonane.

³³Owati‑nima yama naboneni. Neme, bofe na, ababisabone, owati‑ta abateraboneni.” Yeso ati nematane.

³⁴“Dai noko wadahi. Dai siwariyahi. Kawi dai fawariyahi. Yinero dai nokotoniriyahi. Yama dama dai nokoniya, yama yanani kanibote na ihi yama we‑wee‑kaya dai saweboneni.

³⁵Bofe‑ya mai wi‑wina mai nafi‑ya bisi·onaboneni.

³⁶Dai noko wadahi. Deoso‑ya dai hiyarahi, yama we‑wee‑ya dai sawirabonehe. Dai‑ka Ayo neme‑ke‑ya dai sawibisaboneni.” Yeso ati nematane.

³⁷Yama tehe‑ya Deoso‑ka yobe‑ya Yeso mai‑ya kanawatonadi, yama soki‑ya Orifera adami‑kaya a‑amo nematane.

³⁸Yama wahabisari‑ya Deoso‑ka yobe‑ya mai dama mai kamarimanameteni, Yeso ati‑ya mai mitabonehe.

Yeso‑ya Yoda daanebona ati ne

¹Ka‑kariwa koboni yanatona, fara‑ya baho femeto‑ya ketehera‑ya Yodeo mai kabateni.

²Deoso‑ka yama‑bone‑ya mai da‑daa mai‑ka hidi mai toha, Mose‑ka yama hani ati‑ya mai ka‑kamina mai toha, mai na, Yeso‑ya mai kako kofina, mai dama mai‑ya mai nayofina, mai dama mai noki beheri‑kaya Yeso‑ya mai nanahababone mai atibodi ati nameteni.

³Yeso‑ka mai 12 kana mai‑ka owa i‑di Yoda Isikari·oti atibodi‑ya Satanasi sawiwahene.

⁴Deoso‑ka yama‑bone‑ya mai da‑daa mai‑ka hidi mai toha, Deoso‑ka yobe‑ka sekorasa mai‑ka hidi mai toha na, mai‑ya Yoda toke, mai‑ya hiyarematane, Yeso‑ya kahabanebonaha.

⁵Yoda ati‑ya mai mita, mai ya‑yaina,

“Hehe, tika yinero‑ba oda daanaboneni.” Mai ati nameteni.

⁶“Sibarini, daa·onaboneni.” Yoda ati nematane.

Makobote Yoda toke,

“Mai damamari‑ya Yeso daa·onaboneni.” Yoda atibodi ati nematane.

Bofe‑kaya Yeso marini faina

⁷Ka‑kariwa yananiya, kaneiro bidi‑ya Yodeo mai tabasiteni. Ka‑kariwa yanana,

⁸i‑di Bedoro, i‑di Yowaho mai fama mai‑ya Yeso yose,

“Tabora‑ya dai towakiya, ai tefe‑ba dai hawa tohiyahi.” Yeso ati nematane.

⁹“Ebeni‑kaya ai tefe‑ba oda hawa tohiboneti?” Mai ati nameteni.

¹⁰“Tabora‑ya dai kobokaniya, maki owa faha‑ya diwakane‑ya dai awaboneni. Faha diwakane nowati‑ya dai towakamakiyahi.

¹¹Yobe‑ya dai kobokaniya, yobe hidi dai hiyariya,

‘Ebeni‑kaya oka mai da‑daba mai eyehe otafibati? Ai‑ya ka‑kanawato ati nene.’ Dai ati niyahi.

¹²Hika yobe waari nemehe, neme‑ke kote honita tohe‑ya dai‑ya yofikanebonane. Yobe kote‑ya mesa kaware, fara‑ya ai tefe‑ba dai hawa tohiyahi.” Yeso ati nematane.

¹³Mai towaka, Yeso ati‑nima yama na‑ya mai awa, ka‑kariwa‑ka yamata‑bone‑ya mai aninameteni.

¹⁴Mai ta‑tafa‑ka ora koboneya, Yeso hika yo‑yose mai eyehe mesa‑ya mai nahoriwahameteni.

¹⁵Yeso mai‑ya hiyare,

“Owa‑ya mai nakamaki awisariya, dai eyehe ka‑kariwa‑ya otafa, yama amosineni.

¹⁶Deoso ai nafi‑ka hidi kitabote tohawahebona koboni awisareya, Ka‑kariwa one‑ya otafamateraboneni. Ka‑kariwa ai abamarabone tamine amani.” Yeso ati nematane.

¹⁷Keneko‑ya fino‑ya Yeso damakane, Deoso‑ya hiyare, keneko‑ya mai‑ya daakanematane.

“Dai nafi hifihi.” Yeso ati nematane.

¹⁸“Owati dai mitahi. Deoso ai nafi‑ka hidi kitabote tohawahebona yanani awisareya, awa bono fahi ofimateraboneni. Deoso ai nafi‑ka hidi kitabote tohawahe‑ya ofimatasaboneni.” Yeso ati nematane.

¹⁹Baho‑ya Yeso damane, Deoso‑ya hiyare, baho‑ya bakanakose, hika mai da‑daba mai‑ya baho‑ya daane, ati yanane,

“Dai kabahi, owa abano tamine‑bone amani. O·ababone, dai manakone onahababoneni. Ka‑kariwa‑ka baho‑ya dai kabiya, owa tamine dai kadikiyahi.” Yeso ati nematane.

²⁰Mai tafi hawa toha, fino‑ya mai‑ya Yeso daakanamatasane.

“Owa emene tamine‑bone amani. Owa emene tokabone, o·ababone, dai ene manakone onahababoneni.

²¹Owa‑ya dai‑ka owa daanebona, ai tafa ai‑ya dabane.

²²Hibati‑ya Deoso ati‑mata‑nima dai‑ka Ayo neme‑ke abebonane. Owa‑ya kahabane‑ka yama manakone wadaboneni. Ka! Hini ene manakone nafibonane.” Yeso ati nematane.

²³“Ai owa Yeso‑ya daanebona, ebeni‑ke tohati?” Mai ibi hiyara, mai ati nameteni.

²⁴Mai‑ka owa ba‑basi ne tamine‑ya mai hiyara, mai ibi weenameteni.

²⁵Yeso mai‑ya hiyare,

“Bara mai‑ka hidi webote mai‑ya mai yoseteni.

‘Mai dama mai‑ya ka‑kasoma ama·oni.’ Mai ati na hiniya mai dama mai‑ya mai yosebisateni.

²⁶Mai‑nima dai riyahi. Mai‑ka hidi dai toha mai‑ya dai yoseriyahi. Mai‑ya dai kasomabisahi.

²⁷Dai‑ka hidi mai one‑ya dai kasomateni. Dai‑ka hidi ama·oni. Hiniya dai‑ya okasomabisani. Owa ene‑nima dai ene nahi.

²⁸Kabani‑ya owa amoni dama, owa‑ya mai weeni kofina, owa‑ya dai dabanasa na, owati‑ya dai nofasa nineni.

²⁹Okobi ati ene dai nafi‑ka hidi kitabote ohawahaboneni. Okobi ene‑nima owa ene nebona, owati ihi

³⁰hidi‑ka kadera amosa‑ya dai nahoreboneni. Isara·eo‑ka nodi mai ihi‑ya dai kadikiya, mai ihi‑nima mai ihi manakone na dai daanaboneni.” Yeso ati nematane.

³¹Bedoro‑ya Yeso hiyare,

“Simaho, Simaho owati timitahi. Deoso‑ya dai tamine‑ya Satanasi hiyare, dai‑ya keyehebona ati nane. Satanasi‑ya Deoso ati barirene.

³²Deoso‑ya tiwa tamine ohiyarani, Deoso ati tinofasa tinabonehe. Owati tikadabamatasiya, mai one tikasomiyahi. Owati‑ya mai tokadabawahaboneni.” Yeso ati nematane.

³³“Ayo, ai‑ya mai watikimiya, ai‑ya mai barikaniya, ai‑ya mai nanahabiya, yama sibarini, tiwa‑ya ofamanasa onaboneni.” Bedoro ati nematane.

³⁴22:34 Arakawa haani, ora tamine tohe awane. Hibati‑ya mai‑ka herosa wadare, sidadi webote‑ya maki ohari ora‑ya midikana, yama soki bai‑ya, mahi nokorise‑ya ho‑hori‑ya haana, yama wahi yanatoni‑ya ho‑hori‑ya haanamatasatene. Fara yama wahi yanatoni‑ka ho‑hori tamine toha awini.“Bedoro owati timitahi. Arakawa haani awisareya,

‘Yeso owatorini.’ Tinaboneni.

Tiwati yanani 3 kana boneni.” Yeso ati nematane.

³⁵Yeso mai‑ya hiyare,

“Hibati‑ya dai oyosemaro, yinero dai mookanirihi, yamasi dai weyerihi, sanidariya owa dai weyekarihi, hawi‑ya dai‑ka yama one hasiramete awineni?” Yeso ati nematane.

“Hawi‑ya yama one hasiramaroni.” Mai ati nameteni.

³⁶“Hibayata, dai‑ka yinero tohe, dai‑ka yinero dai mookanihi. Dai‑ka yamasi dai weye nahi. Dai‑ka yima wadara, dai‑ka bora one dai daaniya, yima‑ya dai kanikiyahi.

³⁷Deoso ati‑mata‑nima yama naboneni.

‘—Towe mai‑ka owa amane.— Mai ati naboneni.’ Deoso‑ka yama hani ati na,

owa tamine amani. Ati‑nima yananaboneni.” Yeso ati nematane.

³⁸“Ayo, oda‑ka yima famani.” Mai ati nameteni.

“Hehe, sibarini.” Yeso ati nematane.

Orifera adami‑ya Deoso‑ya Yeso hiyare

³⁹Orifera adami‑ya mai amoteni. Fara‑ya Yeso, hika mai da‑daba mai eyehe tokematane.

⁴⁰Mai kobona, Yeso ati yanane,

“Deoso‑ya dai hiyarahi, Satanasi ati‑ya dai tokadabarabonehe.” Ati nematane.

⁴¹Ahiyata‑ya toke, yobati‑kaya itarise, Deoso‑ya hiyare,

⁴²“Abi, yama towe yananabone, yama kobonabone onofarini. Owati‑nima yama riyahi. Hini tiwati‑nima yama nibisiyahi.” Yeso ati nematane.

⁴³Deoso‑ka yo‑yose neme‑ke fodoki, Yeso‑ya nakitamematane.

⁴⁴Deoso‑ya Yeso hiyare, atibodi komene kitawahe, tanakori ama‑nima na wami‑ya sonameteni.

⁴⁵Deoso‑ya Yeso hiyari hawa tohe, kamatase, mai amonameteni. Mai atibodi yawa, mai‑ka nokobisa nafemeteni.

⁴⁶“Dai amoriyahi. Dai dodafihi. Deoso‑ya dai hiyarahi, Satanasi ati‑ya dai tokadabarabonehe.” Yeso ati nematane.

Yeso‑ya mai waratona

⁴⁷Yeso hiyareya, mai dama mai kamakemeteni. Yeso‑ka mai 12 kana mai‑ka owa i‑di Yoda dainimaki, Yeso‑ya kakimatane, Yeso‑ya tomanebonaha.

⁴⁸“Tika Ayo neme‑ke tikahabanabone, owa‑ya tomatineni?” Yeso ati nematane.

⁴⁹Yeso‑ya mai watabone mai‑ya mai awa, mai ati yanana,

“Ayo, yima‑ya mai oda kaanaribaraniha?” Mai ati nameteni.

⁵⁰Deoso‑ka yama‑bone‑ya mai da‑daa mai‑ka hidi webote‑ya na‑narifa sawi, Yeso‑ya mai da‑daba mai‑ka owa fai narabo kanika‑ya tarinabasematane.

⁵¹“Mai dai arabanahi.” Yeso ati nematane.

Yeso kamaki, maki narabo‑ya boyone, narabo waanamatasematane.

⁵²Deoso‑ka yama‑bone‑ya mai da‑daa mai‑ka hidi mai toha, Deoso‑ka yobe‑ka sekorasa mai‑ka hidi mai toha, Yodeo mai‑ka hidi mai bi‑bidi na mai toha, mai na, mai‑ya hiyare,

“Yima‑ya dai aka, awa‑ya dai aka nineni, owa‑ya dai watabonehe. Yama‑ya mai bo‑boti mai wati‑nima owa‑ya dai watinineni. Yama bo‑boti ohi awirini.

⁵³Hibati‑ya mahi‑nima Deoso‑ka yobe‑ya osawe, owa‑ya dai wataramaroni. Hibayata Deoso dai‑ya ati barire, yama towe‑ka hidi‑ya Deoso ati baririhi nane.” Yeso ati nematane.

⁵⁴Yeso‑ya mai wata, Deoso‑ka yama‑bone‑ya mai da‑daa mai‑ka hidi webote tabaro‑ya Yeso‑ya mai towakamameteni. Yama yaki‑ya Bedoro yotomatane.

⁵⁵Yobe fowari barikane doro‑ya yifo‑ya mai afokana, yifo‑ya mai hiwana mai naha, mai‑ya Bedoro sawimakimatane.

⁵⁶Yobe hidi‑ya na‑narifa one waare, Bedoro‑ya awa, Bedoro‑ya kiina, ati yanana,

“Yeso‑ya mai da‑daba mai‑ka owa amane.” Ati nameteni.

⁵⁷“Yeso owatorini.” Bedoro ati nematane.

⁵⁸Makobote Bedoro‑ya mai‑ka owa awe,

“Maki‑ka amatiraniha?” Ati nematane.

“Maki‑ka ohi awirini.” Bedoro ati nematane.

⁵⁹Ora oharimaki‑ya Bedoro tamine‑ya maki owa hiyare,

“Yeso‑ya sa‑sawi amane. Karireya‑ya mai wi‑wina mai‑ka owa amane.” Ati nematane.

⁶⁰“Tiwati owatorini.” Bedoro ati nematane.

Bedoro hiyareya, arakawa haanawahematane.

⁶¹Yeso kiinawame, Bedoro‑ya kakatome, Yeso ati‑ya Bedoro atibodi watinawame,

“Arakawa haani awisareya,

‘Yeso owatorini.’ Tinaboneni.

Tiwati yanani 3 kana boneni.” Yeso ati ne,

ati‑ya Bedoro atibodi watinawame,

⁶²toke, ohini kitawahematane.

Yeso‑ya mai bisina

⁶³Yeso‑ya sekorasa mai bisina, Yeso‑ya mai hahakanameteni.

⁶⁴Yeso noko‑ya mai barikana, noko mai batahiri.

“Yama nafi tiwata, ebeni‑ke tiwa‑ya koonisa?” Mai ati nameteni.

⁶⁵Yeso‑ya mai weeni damamakemeteni.

⁶⁶Yama wahabisari‑ya mai‑ka hidi mai dama mai yorotokana, Deoso‑ka yama‑bone‑ya mai da‑daa mai‑ka hidi mai sawi, Mose‑ka yama hani ati‑ya mai ka‑kamina mai sawi na, mai ati ihi Yeso‑ya mai kakamameteni. Makobote hidi owa ati yanane,

⁶⁷“Deoso‑ka Ka‑kadika amatini, tiwati yananahi, oda mitabonehe.” Ati nematane.

“Owati yananiya, owati‑ya dai nofarabone,

⁶⁸dai haa·oniya, dai ati yanaraboneni.

⁶⁹Owati dai mitahi. Deoso mano kanika‑ya dai‑ka Ayo neme‑ke itariwahebonane.” Yeso ati nematane.

⁷⁰“Deoso Bidi amatiraniha?” Mai ati na,

“Hehe, tiwati‑nima, fara ama·oni.” Yeso ati nematane.

⁷¹“Ati ai miti hawa tohe, mai one ati ai mitamakiriyahi.” Mai ati nameteni.

¹Birato‑ya Yeso‑ya mai towakamameteni, mai nafi.

²Yeso tamine‑ya keyehe‑ya mai hirina,

“Yeso ene ai one dama kofeno ati‑ya mai nofamarani.

‘Sesa‑ka yinero‑bona dai daariyahi.’ Yeso ati nihi,

‘Deoso‑ka Ka‑kadika ama·oni. Hidi webote ama·oni.’ Yeso ati nihi tene.” Mai ati nameteni.

³“Yodeo mai‑ka hidi webote amatiraniha?” Birato ati ne,

“Tiwati‑nima, fara ama·oni.” Yeso ati nematane.

⁴Deoso‑ka yama‑bone‑ya mai da‑daa mai‑ka hidi mai toha, mai dama mai toha, mai na, mai‑ya Birato hiyare,

“Yeso ene towe tohi awirene.” Ati nematane,

⁵Birato ati‑ya mai mita, mai ati fawara,

“Karireya‑ka mai‑ya hiyaremari, Yodeya‑ka mai‑ya hiyaramakine, ati ene kofeno ati‑ya mai nofamarani.” Mai ati nameteni.

⁶Karireya tamine‑ya Birato mite, mai‑ya hiyare,

“Karireya Yeso tabaro tohe awane.” Birato ati ne,

⁷“Hehe, Karireya‑ya tabaro tohane.” Mai ati nameteni.

Karireya‑ka mai‑ka hidi i‑di Erodi tohematane. Hibayata Yerosare‑ya i‑di Erodi sawi,

“I‑di Erodi‑ya dai towakamaho.” Birato ati nematane.

⁸Yeso‑ya mai towakama, Yeso‑ya i‑di Erodi awe, ya‑yainane. Hibati‑ya Yeso tamine‑ya Erodi mite, atibodi yama‑ya kadike,

“Yeso oawiya, Yeso ene kitemona mai ati na, ene oaweba awane.” Atibodi ati nematane.

⁹Yeso ati‑ya Erodi mitebona, hiyari dame, Yeso ati yanarematane.

¹⁰Deoso‑ka yama‑bone‑ya mai da‑daa mai‑ka hidi mai toha, Mose‑ka yama hani ati‑ya mai ka‑kamina mai toha, mai na, Yeso ene towemona tamine‑ya Erodi‑ya keyehe‑ya mai hirina, mai ati kitameteni.

¹¹I‑di Erodi, hika sodado mai eyehe Yeso‑ya hahakane, hidi webote‑ka bora‑ya Yeso‑ya weyenihematane. Birato‑ya mai hiwakamatasematane.

¹²Hibati‑ya i‑di Birato i‑di Erodi mai ibi ka‑kako, hibayata mai ibi nofawahameteni.

¹³Birato ati ene mai yorotokana, Deoso‑ka yama‑bone‑ya mai da‑daa mai‑ka hidi mai toha, Yodeo mai‑ka hidi mai toha, hidi mai tohara mai toha, mai na, mai yorotokanameteni.

¹⁴Birato mai‑ya hiyare,

“Yeso ati ene kofeno ati‑ya mai dami nofamaramone dai ati na, Yeso ati omite, dai ati‑nima ene re, ati sibarene.

¹⁵Erodi Yeso weehire, hiniya hiyosematasane. Owati dai mitahi. Yeso ene towe wadare, abarayaho.

¹⁶Owati ihi Yeso‑ya mai bisiniya, mai seekanebonane.” Birato ati nematane.

¹⁷(Ka‑kariwa‑ya mai marini‑ya mai‑ka owa‑ya Birato seekaritene.)

¹⁸Birato ati‑ya mai mita,

“Yeso abaho. Barabasi‑ta seetikanahi.” Mai ati nameteni.

¹⁹Kofeno‑ka yo‑yose mai‑ya Barabasi bisine, maki‑ya nanahaba ne, hini ene mai hiwate, kadeya‑ya mai hinafoyawahematane.

²⁰Yeso‑ya Birato seekanebona, mai‑ya hiyaramatasematane.

²¹Birato ati‑ya mai nofara,

“Awa‑ya baakanaho. Awa‑ya baakanaho.” Mai ati na, mai ati kitameteni.

²²“Hini yamata ihi baa·okabati? Yeso ati omite, Yeso ati sibarene. Yeso ene towe wadare, abarayaho. Owati ihi Yeso‑ya mai bisiniya, mai seekanebonane.” Birato ati nematane.

²³Mai ati kita,

“Abaho. Awa‑ya baatikanahi.” Mai ati na, mai ati damameteni.

Mai ati fawani watora, Birato atibodi kitamare,

²⁴mai ati‑nima sodado mai‑ya Birato yosenematane.

²⁵Barabasi kofeno‑ka yo‑yose mai‑ya bisine, maki‑ya nanahaba ne, hini ene mai hiwate, kadeya‑ya foyemari, Birato ati ene mai seehikanematane. Sodado mai‑ya Birato yosematane, Yodeo mai‑ka hidi mai ati‑nima yama nabonehe.

Yeso‑ya mai baakana

²⁶Yeso‑ya mai towakamameteni, Yeso‑ya mai baakanabonehe. Simaho Sireni‑ke kabani‑kaya kame, mai warahine, Yeso ewene‑bona‑ya diwanematane. Yeso dai tohe, nowati‑ya Simaho Sireni‑ke yotomatane.

²⁷Yeso nowati‑ya mai dama mai tokomake, Yeso tabiyo mai fanawi ohina, hini mai‑ya mai batanameteni.

²⁸Mai fanawi‑ya Yeso hiyare,

“Yerosare‑ya dai wi‑wina owa tabiyo dai ohiriyahi. Dai abano toha, dai‑ka madehe toha na, tabiyo dai ohinibisahi.

²⁹Yama towe kobonabone, yama koboniya, dai ati yananabone,

‘Ai‑ka ewe awire‑mana, yama sibara neni. Madehe mai kihara mai sibabisarineni.’ Dai ati naboneni.

³⁰Adami webote‑ya mai hiyarabone,

‘Oda‑ya tisohi, oda‑ya baritikanaba.’ Mai ati naboneni.

³¹23:31 Awa yati Yeso tamine amane, mai hinahabebonaha. Awa bote Yerosare‑ka mai tamine amani. Mai ihi towe toha mai ihi manakone koboneya, mai kome kiti nafeboneni.Hibayata awa yati‑ya mai sarikana, awa bote hirini kitaboneni.” Yeso ati nematane.

³²Mai ihi towe mai fama mai‑ya mai towakamakemeteni, Yeso eyehe mai ababonehe.

³³Ai tati tone wai‑ka adami‑ya mai kobona, Yeso‑ya mai baakanameteni. Mai ihi towe mai fama Yeso‑ya mai dabameteni. Yeso mano kanika‑ya owa mai baahikana, Yeso mano sayo‑kaya owa mai baahikana hinematane.

³⁴“Abi Deoso, yama‑ya mai watorini. Mai‑ya weetiriyahi. Mai‑ya tiwati somahi.” Yeso ati nematane.

Yeso borone‑ya sodado mai‑ka owa kayafebona, yati bide‑ya mai werenameteni.

³⁵Mai nahokosa Yeso baakane‑ya mai kakatomameteni. Yeso‑ya mai‑ka hidi mai weena,

“Mai one‑ya kasomemari, Kirisito‑mona, Deoso‑ka Ka‑kadika‑mona, hini‑ya kasome ai awahi.” Mai ati nameteni.

³⁶Yeso‑ya sodado mai weenahare, fino kofate‑ya mai daanameteni, Yeso hifebonehe.

³⁷“Yodeo mai‑ka hidi webote tiwa‑mone, tiwa tikasomahi.” Mai ati nameteni.

³⁸Yeso tati neme‑kaya yama hani kawana,

“Yodeo mai‑ka hidi webote amane.” Yama hani ati nameteni.

³⁹Maki mai baahikane, Yeso‑ya weene,

“Deoso‑ka Ka‑kadika tiwa‑mone, ai tikasomahi. Ai kisamaboneni.” Ati nematane.

⁴⁰Mai baahikane owa ati yanane,

“Deoso tinayofina awini? Tiwati arabanahi. Yeso‑ya mai nanahababone‑nima ai‑ya mai nanahabahareboneni.

⁴¹Ai ene amosara, ai ene manakone ai kayafineni. Yeso ene amose hinama amane.

⁴²Yeso, oda nafi‑ka hidi kitabote tihawahiya, owa‑ya tiwatibodi kadikiyahi.” Maki owa ati nematane.

⁴³“Owati timitahi. Hibayata tabora amosabote‑ya okomabone, owa‑ya tisawebani.” Yeso ati nematane.

⁴⁴Mahi nokorise‑ya mahi wehene fawane, 3 ora‑ya wehene yananamatasematane.

⁴⁵Deoso‑ka yobe‑ka bora baye winamaro, fara kebemeteni.

⁴⁶Yeso haane,

“Abi, owa korimari tikayahi.” Ati nematane.

Ati hawa tohe, abawahematane.

⁴⁷Mahi wehene fawane‑ya sodado mai‑ka hidi awe, Yeso ati‑ya mite,

“Deoso ene amane.” Atibodi ati ne,

“Yeso ene amosabisane.” Ati nematane.

⁴⁸Yeso‑ya sodado baakane‑ya mai dama mai awamaro, mahi wehene fawane‑ya mai awa, mai ati‑ya mai mita na, mai atibodi a‑arira, mai tokomameteni.

⁴⁹Ahiyata to‑toha ni‑ya Yeso‑ka mai dama mai naha, mai‑ya mai kakatomameteni. Mai fanawi sawe, fara hibati‑ya Karireya‑ya Yeso‑ya mai dabamaro, Yeso tokeya, mai tokomakemeteni.

⁵⁰Yose Yodeo mai‑ka hidi bidi owa tohe, ene amose, Deoso ati‑ya nofematane.

⁵¹Deoso ai nafi‑ka hidi kitabote tohawahebona‑ya nimanematane. Hidi mai one Yeso‑ya mai weena, mai ati‑nima Yose ati ni awirematane. Yodeya‑ya tabora one toha, oni Arimateya toha, fara‑ya Yose wiinematane.

⁵²I‑di Birato‑ya Yose toke, Yeso abo‑ya haanematane, hikamebonaha.

⁵³Yeso abo‑ya i‑di Yose idibase, bora wefe wamani‑ya hikatafematane. Ai temene‑ka yati hodi‑bone mai wamahinamete, fara ai abo nafoyateri‑ka hodi‑ya Yeso abo‑ya nafoyematane.

⁵⁴Deoso‑ka feriado kobonabone, yama‑ya mai a‑animara‑ka koboni yanatonameteni.

⁵⁵Hibati‑ya Karireya‑ya Yeso‑ya mai fanawi dabamaro, Yeso tokeya, mai tokomakemaro, fara mai fanawi Yeso abo‑ya Yose towakame‑ya mai tokomake, yati hodi‑ya Yeso foye‑ya mai awameteni.

⁵⁶Makobote tabora‑ya mai fanawi tokomameteni, yama mahi amosa‑ya mai wamanabonehe. Mose‑ka yama hani ati ihi feriado‑ya yama‑ya mai anini awirameteni.

Yeso kitame

¹Domiko yama wahabisari‑ya yati hodi‑ya mai fanawi tokomatasa, yama mahi amosa‑ya mai damakanameteni.

²Mai koboniya, yati webote hibati‑ya karotowiti hawa toha,

³mai tokiyoma, Yeso abo‑ya mai awarameteni.

⁴Mai atibodi yama‑ya kadikiya, mai yowi‑ya maki mai fama fodoke, mai demena, mai‑ka bora wahi kitameteni.

⁵Mai habi siitoni kita, mai yobati‑kaya mai nahorisa, mai moikanisameteni.

“Hini yamata ihi abo dai siba? Ai owa hasine abo ai sibaterani.” Mai ati nameteni.

⁶“Haa‑ya Yeso awimare, kitamene. Karireya‑ya sawiya, ati dai mitemari, ati dai atibodi watinawamahi.

⁷‘Dai‑ka Ayo neme‑ke‑ya mai watabone, Deoso ati‑ya mai tokadabara mai‑ya owa‑ya mai daanabone, awa‑ya owa‑ya mai baakanabone, dai amoni 3 tohi‑ya okitamaboneni.’ Yeso ati nemarine.” Mai ati nameteni.

⁸Yeso ati‑ya mai watowamameteni.

⁹Mai winitonama, Yeso‑ka mai 11 kana mai toha, Yeso‑ya mai sa‑sawi mai one toha, mai na, mai‑ya Yeso tamine‑ya mai kaminamameteni.

¹⁰I‑di Mariya Madarena ati toha, i‑di Yo·ana ati toha, Tiyako madi i‑di Mariya ati toha, mai fanawi one mai‑ya mai daba mai ati toha nameteni.

¹¹“Mai fanawi ati tosawarineni.” Mai atibodi ati na,

mai ati‑ya mai nofarameteni.

¹²Bedoro waamise, yati hodi‑ya kanani tokome, moinise, hodi‑ya kiine, bora wefe wamani honita fore‑ya awe,

“Ka! Hini yamata ihi tohiti, Yeso awireri?” Bedoro atibodi ati ne, hini hika yobe‑ya tokomematane.

Emaosi‑ya mai one towakama

¹³Yeso‑ya mai da‑daba mai fama Emaosi‑ya mai towakamameteni. Yerosare toki‑ya ora fame‑ya Emaosi tohameteni.

¹⁴Mai yakakana, Yeso kitamemona tamine‑ya mai ibi hiyara,

¹⁵mai ibi hiyariya, Yeso mai‑ya kobone, mai‑ya sawimatane.

¹⁶Deoso ene Yeso‑ya mai watora, bare tohe awane mai atibodi ati nameteni.

¹⁷“Hini yamata tamine dai hiyara, dai yakakanaro?” Yeso ati nematane.

Mai maakanama, mai noki yawameteni.

¹⁸“Tiwa ohari‑ta yama tamine tiwatora awini? Yerosare‑ya ai sawe yama tamine‑ya ai nafi mitani.” Kirobasi ati ne,

¹⁹“Hini yamata tamine tohiti?” Yeso ati nematane.

“Yeso Nasare‑ke tamine amane. Deoso ati‑ya mi‑mita amane. Ene kite, ati Deoso himite, ati oda nafi hinofemarine.

²⁰Deoso‑ka yama‑bone‑ya mai da‑daa mai‑ka hidi mai toha, ai‑ka hidi mai toha, mai na, Yeso‑ya mai daana, mai baahikanebonaha. Awa‑ya mai baahikane, abe, fare tamine‑ya oda hiyarineni.

²¹Yeso ene oda‑ka hidi yara mai tohamarabone oda ati nani. Oda amoni 3 kani neni, Yeso‑ya mai baanikaro.

²²Mai fanawi ati oda mita, oda atibodi yama‑ya kadikani. Yama wahabisari‑ya yati hodi‑ya mai toka,

²³abo mai hiawarenone. Mai kama,

‘Deoso‑ka yo‑yose mai oda awani. —Yeso kitamene.— Deoso‑ka yo‑yose mai ati nani.’ Mai fanawi ati nani.

²⁴Yati hodi‑ya oda‑ka mai one toka, mai fanawi ati‑nima yama na‑ya mai awani. Abo mai hiawaremonane.” Kirobasi mai ati nameteni.

²⁵Yeso mai‑ya hiyare,

“Yama‑ya dai watora, Deoso ati‑ya mai mi‑mita‑mete mai ati kote‑ya dai nofa kanibote terani.

²⁶Deoso‑ka yama hani ati‑nima Deoso‑ka Ka‑kadika abe, kitame, amosabote tohawahane.” Yeso ati nematane.

²⁷Mose‑ka yama hani ati‑ya Yeso mai‑ya kanawato, Deoso ati‑ya mai mi‑mita‑mete mai‑ka yama hani ati‑ya mai‑ya kanawatomaki, Deoso‑ka yama hani nafi‑ya hini tamine‑ya kanawato nematane.

²⁸Emaosi‑ya mai kobona, Yeso fiyatonamebona,

²⁹“Mahi toke, amotimatahi.” Mai ati nameteni.

Yeso‑ya mai ati barina, mai eyehe tokiyomematane.

³⁰Mai tafabone, mesa‑ya mai nahorisa, baho‑ya Yeso damakane, Deoso‑ya hiyare, baho‑ya ebekane, mai‑ya baho‑ya daanematane.

³¹Deoso ati ene Yeso‑ya mai watowaha, makobote Yeso fawanematane.

³²Mai ibi hiyara,

“Hawi‑ya oda‑ya hiyare, ati ene oda atibodi ya‑yainani. Yama hani ati‑ya oda‑ya kanawato, oda atibodi ya‑yainani.” Mai ati nameteni.

³³Mai yoronimisama, Yerosare‑ya mai towakamatasa, Yeso‑ka mai 11 kana mai yorotokana, mai‑ya mai kobotokanama, mai one sawemeteni.

³⁴“Ai‑ka hidi i‑di Yeso kitame, i‑di Simaho‑ya kobonene.” Mai yorotokana mai ati nameteni.

³⁵Emaosi‑ya mai towaka, hawi‑ya Yeso mai‑ya hiyare tamine mai hikamina,

“Baho‑ya Yeso kebiya, Yeso oda watowamani.” Mai ati nameteni.

Hika mai da‑daba mai‑ya hiyaramatase

³⁶Mai ibi hiyariya, mai teberi‑ya Yeso fodoki,

“‘Deoso dai‑ya kasomayaho.’ Oneni.” Ati nemarine.

³⁷Mai sotatona,

“Ai korimari amani.” Mai atibodi ati na,

mai habi siitona,

³⁸“Hini yamata ihi dai habo siitona? Hini yamata ihi dai atibodi yama‑ya dika?

³⁹Fara ama·oni. Owa yehe, owa teme na, dai awahi. Owa yehe dai boyonahi. Ai korimari eme wadarihi, tone wadarihi teni. Owa‑ta owa eme toha, owa tone toha nibisineni. Fara owa abano amani.” Yeso ati nematane.

⁴⁰Hiyari hawa tohe, yehe‑ya yofikana, teme‑ya yofikana nematane.

⁴¹Mai ya‑yaini nafe ihi mai ati yanara, Yeso‑ta ati yananamatase,

“Dai tefe tohini?” Yeso ati nematane.

⁴²Aba tabasine kote‑ya mai daanameteni.

⁴³Mai noki‑ya aba‑ya Yeso kabematane.

⁴⁴“Hibati‑ya dai‑ya osawe, dai‑ya ohiyara,

‘Owa tamine‑ya Mose kanahano, owa tamine‑ya Deoso ati‑ya mai mi‑mita‑mete mai kanahano, Deoso‑ka wayoma hani‑ya owa tamine‑ya mai one kanahano nameteni. Mai ati‑nima yama naboneni.’ Onamaroni.

Fara yama hani mai hikanahanamete ati‑nima yama nineni.” Yeso ati nematane.

⁴⁵Yeso ati ene Deoso‑ka yama hani ati‑ya mai watowahameteni.

⁴⁶“Yama hani ati dai mitahi.

‘Deoso‑ka Ka‑kadika‑ya mai nanahababone, dai amoni 3 kani‑ya kitamebonane.

⁴⁷Mai ihi towe‑maro‑ya mai nofamariya, mai ihi manakone wadamaraboneni. Fare Deoso‑ka Ka‑kadika ene amane. Fare tamine‑ya mai kaminaboneni, Yerosare‑ya. Makobote mai tabori dami‑ya tamine mai hikaminamakibonane.’ Yama hani ati nineni.

⁴⁸Yama‑ya dai awamaro tamine dai kaminahi.

⁴⁹24:49 Deoso‑ka Doni tamine Yeso hiyarematamonane.Okobi yama‑ya daanebona ati ne, yama‑ya dai‑ya daa·onaboneni. Yerosare‑ya yama dai nimanahi. Yama koboniya, dai kitawahiya, dai tokawahaboneni.” Yeso ati nematane.

Neme‑ya Yeso tokome

⁵⁰Betaniya tohi‑kaya mai eyehe tokome, Yeso yehe daatokamise, mai‑ya hiyare,

“Deoso dai‑ya kasomebonane.” Ati nematane.

⁵¹Mai‑ya hiyareya, neme‑ya tokomematane.

⁵²Yeso‑ya mai kahiyara, Yerosare‑ya mai tokomatasameteni, mai ya‑yainaro.

⁵³Deoso‑ka yobe‑ya Deoso‑ya mai kahiyaranademeteni. Feye amani.