YODA

Yoda‑ka yama hani

¹Yeso Kirisito‑ya na‑narifa i‑di Yoda ama·oni. Tiyako sori ama·oni. Ai‑ka abi i‑di Deoso dai‑ya nofe, dai‑ya haanemarine, hika dai tohabonehe. Dai‑ka yama hani‑bone okanahanaboneni. Deoso dai‑ya nawade, Yeso Kirisito‑ka dai tohawahaboneni.

²Deoso‑ya ohiyarateni.

“Abi Deoso, tiwa‑ya mai no‑nofa mai tikasomahi. Mai atibodi mai‑ya weerihi. Mai tinofa, mai tinofi nafiyahi.” Oteni.

³Hibati‑ya dai‑ka yama hani‑bone okanahanabone onamaroni. Deoso ai‑ya nofe, ai‑ya ati somawame tamine okanahanabone onamaroni. Deoso ati yokana‑ya ai‑ya mai kaminamaro mai ati dai fawani awiraboneni, yama bara‑ya mai kamina mai ati dai nofarabone tamine okanahanobisaboneni.

⁴Dai noko beheri‑kaya Satanasi‑ka mai one dai‑ya dabawaha, ai‑ka Hidi i‑di Yeso Kirisito‑ya mai nofara, Deoso ati‑mona‑ya mai kamina, mai fanawi mai makidi na, mai ai aha sibarini. Deoso ai‑ya weerebona mai ati teni. Hini mai ihi mai ababone Deoso ati nemata, Deoso ati yokana‑ya mai kamina mai tamine‑ya mai kanahanameteni.

⁵Hibati‑ya yama tamine dai mitamaro, tamine okanahanomatasaboneni. Eyito‑ya ai‑ka idi mai wina, mai‑ya Yeso kasome, mai‑ya i‑di Mose kakamematane. Makobote Deoso ati‑ya mai one tokadabara, mai‑ya Yeso nanahabematane.

⁶Hibati‑ya Deoso‑ka yo‑yose neme‑ya mai wina, neme‑ya mai ati winamara, Deoso ati‑nima mai namara, hini mai ihi Deoso mai‑ya barikane, koheti‑ya mai‑ya sokikane, yama soki‑kaya mai‑ya barikawame, mai‑ka koheti‑ya Deoso sotatokanire. Makobote Yeso kamataseya, mai ihi‑ya kadikeya, mai‑ya sarikanebonane.

⁷Sodoma‑ya mai wi‑wina, Komora‑ya mai wi‑wina, Sodoma yakari‑ya mai wi‑wina, mai na, mai ihi amosara, Deoso ati‑nima mai ni awira. Mai makidi ibi aha, bara mai kobona mai‑ya mai makidi aha na, mai ihi Deoso mai‑ya nanahabematane. Deoso ene neme‑ya yama hirini sona, mai‑ya nanahabameteni, mai tamine dai kadikiya, mai‑nima dai ni awiraboneni.

⁸Sodoma‑ya mai wi‑wina, mai ihi‑mete‑nima dai‑ya mai da‑daba mai ihi nineni.

“Wada ati oda mita, mai fanawi mai makidi na, mai ai aha, ai sibaraboneni. Oda‑ka wada ati nineni.” Mai ati na.

Deoso ati‑ya mai nofara, mai‑ka wada ati‑ya mai nofabisa, Deoso ati‑ya mai tokadabara, Deoso‑ka yo‑yose mai kiti ba‑basi na, mai‑ya mai weena, mai korikasarani.

⁹Mai ati‑nima i‑di Mikeo ati tohare, Deoso‑ka yo‑yose mai‑ka hidi i‑di Mikeo tohe, i‑di Mose abeya, Satanasi kaki i‑di Mikeo‑ya hiyare,

“I‑di Mose abano okayahaboneni.” Satanasi ati ne,

I‑di Mikeo ati yanane,

“Deoso‑ta i‑di Mose abano‑ya kayafebonane. Tiwa weeni onafiraboneni. Deoso‑ta tiwa‑ya weenebonane.” I‑di Mikeo ati nematane.

¹⁰Deoso ati‑ya mai nofara, yama‑ya mai watorihi mai na, Deoso‑ka yo‑yose mai tamine‑ya mai hahakanineni. Bani mai‑nima mai na, yama‑ya mai watora, hini mai ihi Deoso mai‑ya nanahabebonane.

¹¹I‑di Kaina ene‑mata‑nima mai ihi nihi, i‑di Baraho ene‑mata‑nima mai ihi nihi na, yinero‑ya mai nokotoniteni. I‑di Kore‑nima mai ihi na mai aba naboneni.

¹²Dai eyehe mai marina, hini mai‑ya mai kasomabisa, dai‑ya mai kasomara, bora kabatata na‑nima mai na, neme sabi hokore‑nima mai na, dai‑ya mai kasomabone dai ati na, dai‑ya mai kasomara, hiniya mai toka kanibote na, awa bono ade aba, hobakana‑nima mai na, mai ihi amosabone mai ati na, mai ihi amosateraboneni.

¹³Faha webote rike‑nima mai na, yama amosara‑ya mai kakama mai ihi towe tamine kaminiya, mai dama teni. Amowa sone‑nima mai na, yama soki nafe‑ya mai tabori tohawahaboneni.

¹⁴I‑di Adaho‑ka nodi‑ka nodi‑tasa i‑di Enoki tohe, fare mai tamine‑ya hiyarematane. Ai‑ka hidi kameya, hika mai dama mai eyehe kamebonane.

¹⁵Mai kamiya, mai ihi amosara, mai ihi‑ya mai kadikiya, mai manakone amosara‑ya mai daanaboneni. Mai ihi amosara mai toha, Deoso‑ka mai‑ya mai towe tonihemaro mai toha, Deoso‑ya mai we‑wee‑maro mai toha mai na, mai manakone amosara‑ya mai kayafawahaboneni.

¹⁶Mai one tamine‑ya mai hiyariya, mai‑ya mai ati towe tonihi teni. Hini mai tamine‑ya mai hiyara, mai tamine‑ya mai kahiyarani, mai one mai‑ya kahiyaramakibonehe.

¹⁷Oka dai toha, Yeso Kirisito ai‑ka Hidi‑ka yo‑yose dai‑ya mai hiyaramaro, mai ati‑ya dai ati kadamowamariyahi.

¹⁸“Yeso kami yakari‑ya bara mai kakeboneni. Deoso‑ya mai weenabone, hini mai atibodi ati kasira ati‑nima mai naboneni.” Yeso‑ka yo‑yose mai ati namaroni.

¹⁹Deoso ati‑ya mai nofara, Deoso‑ka Doni mai‑ya sawire, mai ihi Deoso‑ka ai toha, ai‑ya mai ebekanaboneni, ai ibi dabamarabonehe.

²⁰Owati dai mitahi. Oka dai toha, Yeso Kirisito ati dai nofa, ati dai nofi nafiyaho, Yeso Kirisito‑nima dai nawahabonehe. Deoso‑ka Doni dai‑ya sawi, ati ene Deoso dai hiyarahi.

²¹Deoso dai‑ya nofe, ati dai tokadabahi. Ati dai tokadabeya, dai‑ya kasomebonane. Makobote Deoso tabaro‑ya Yeso Kirisito ai‑ka Hidi dai‑ya towakamebona, dai abamateraboneni.

²²Yeso ati‑ya mai nofi bide toha, mai dai weeriya, hiniya mai dai kasomiya, Yeso ati‑ya mai nofi ba‑basi naboneni.

²³Yeso ati‑ya mai nofara mai abiya, mai hateboneni. Mai dai kasomiya, Yeso ati‑ya mai nofawaha, mai aba, mai hatiraboneni. Mai dai kasoma, dai noko wadahi. Mai aboni‑ta dai kasoma, mai ihi‑ta dai kakohi, mai ihi‑nima dai ene rabonehe.

²⁴Deoso dai‑ya kasomayaho, dai ene amosabone, Yeso hawine‑ya dai taratokara, Yeso‑ya dai koboni amosaboneni. Yeso amose dai awiya, dai ya‑yaina,

“Dai ene amosini.” Ati nebonane.

²⁵Deoso ohari tohe, amosabote tohe, kitabote tohe, ai dami‑ka Hidi tohe, Yeso Kirisito oda‑ka Hidi dai fama, hibati‑ka dai toha, hibayata‑ka dai toha na, makobote yama nafi abiya, hini dai toha, dai tohasa naboneni. Feye amani.