YOWAHO

Yowaho ati

Yeso tamine

¹1:1 Deoso, Yeso, Deoso‑ka Doni mai na Deoso mai amani. Deoso‑ya Yo‑yofikana‑bona i‑di Yeso tamine amane.Hibati‑ya yama‑ba awisariya, Deoso‑ya Yo‑yofikana‑bona Deoso‑ya famematamonane. Fare Deoso amane.

²Yama awisariya, Deoso‑ya famematamonane.

³Deoso‑ya Yo‑yofikana yama nafi‑ya wamane, yama‑ya mai one wamarametemoneni.

⁴Deoso‑ya Yo‑yofikana ene ai hasina, ene ai one abaraboneni. Deoso‑ya Yo‑yofikana yama wahi‑nima ne ai‑ya yofikanemarine.

⁵Ai watoremari yama wahi‑nima ne ai‑ya yofikane, yama soki‑ka mai toha mai ati maahikanebona mai ati na, mai kitara, mai maahikaremarine.

⁶Ai‑ka owa kobonemarine, Deoso hiyoseri. Oni Yowaho Batita tohemarine.

⁷Yama wahi‑nima ne tamine‑ya Yowaho Batita kaminemarine, yama wahi‑nima ne ene Deoso ati‑ya ai nofawahabonehe.

⁸Yama wahi‑nima ne tamine‑ya Yowaho Batita kamine, hini tamine tohi awirane.

⁹1:9 Yowaho Batita Deoso tamine‑ya kamine, fara yama wahi‑nima tohaharine. “Yama wahi‑nima ne amosabote” ati ne, ai‑ya kanawatone, i‑di Yowaho Batita tamine tohi awire, i‑di Yeso tamine‑ya hiyarabisane. 6:32, 55; 15:1Yama wahi‑nima ne amosabote bofe‑ya kobone, Deoso‑ya ai nafi‑ya yofikanemarine.

¹⁰Yama nafi‑ya wamanemata, bofe‑ya sawiwahe, bofe‑ka mai hiwatoremarine.

¹¹Hini hika mai‑ya kobone, mai hinofaremarine.

¹²Abano oda nofa, ati oda nofa ne, ati ene Deoso bidi oda tohawahamaroni.

¹³Deoso bidi ai tohabone, fana dori‑ya ai wadamatasi awiramaroni. Ai owa ene tohi awire, Deoso hini ene bidi ai tohawahamaroni.

¹⁴Deoso‑ya Yo‑yofikana ai owa tohawahane, bofe‑ya ai‑ya sawiwahemarine. Deoso Bidi yokana amane. Hini wehene oda awemarine. Ai nafi‑ya nofe, keyehe‑ya hiriremarine.

¹⁵Yeso tamine‑ya Yowaho Batita kamine,

“‘Ai owa kitabise kamakibona, owa‑ba awisariya, hibati‑ya tohematamonane.’ Ona, fare dai awaho.” Yowaho Batita ati nemarine.

¹⁶Yeso ai nafi‑ya nofe, ai‑ya kasomanadimarine.

¹⁷Ai ene towe manakone‑bone tamine‑ya Mose kanahanomatamonane. Yeso Kirisito ene amose, ai ene towe manakone‑ya nanahabe, Yeso Kirisito ene Deoso ai watowahamaroni.

¹⁸Deoso ai aware tamine‑ya Bidi kaminemarine. Bidi yokana Badi‑ya famene.

Yowaho ati‑ya mai mitabone

¹⁹Deoso‑ka yama‑bone‑ya mai da‑daa mai one toha, Refi‑ka mai one toha, mai na, oda‑ka hidi mai mai hiyose, Yerosare‑ya mai yanana, mai toka, mai kobonamaroni, Yowaho Batita ati‑ya mai mitabonehe.

“Ebeni‑ke amatiniti?” Mai ati na,

²⁰Mai ati‑ya mite, keyehe‑ya hirire,

“Deoso‑ka Ka‑kadika ohi awirini.” Ati nemarine.

²¹“I‑di Eriya tihibaya?” Mai ati na,

“I‑di Eriya ohi awirini.” Ati nemarine.

“Deoso ati‑ya mi‑mita kakibona Deoso ati nemata, fare tihibaya?” Mai ati na,

“Fara ohi awirini.” Ati nemarine.

²²“Ebeni‑ke amatiniti? Hini yamata‑nima oda ati ni bati, oda‑ya mai yose tiwa tamine‑ya mai mitabonehe?” Mai ati namaroni.

²³“Isa·iya Deoso ati‑ya mi‑mita‑mata owa tamine‑bone‑ya kanahanomatamonane.

‘Bofe‑ka mai‑ka owa kabani‑kaya ati yananeya,

—Ai‑ka Hidi webote hawine‑bona dai namosahi.— Ati nebonane.’ Fara owa tamine amani.” I‑di Yowaho Batita ati nemarine.

²⁴Fariseo mai‑ya mai yose Yowaho‑ya mai hiyara,

²⁵“Deoso‑ka Ka‑kadika tiharihi, Eriya tiharihi, Deoso ati‑ya mi‑mita kakibona Deoso ati nemata, fare tiharihi tinamone tina, hini yamata ihi mai‑ya habatinirisiti?” Mai ati namaroni.

²⁶“Faha‑ya mai‑ya haba·onirisani. Dai‑ya ai owa sawi, dai watorene.

²⁷Kamakibona amosabote amane. Haa owa‑ta towebisa ama·oni.” Yowaho Batita ati nemarine.

²⁸Betaniya‑ya Yowaho Batita mai‑ya hiyare, Yodaho Faha kowani‑kaya mai‑ya habanirisemarine.

²⁹1:29 Kaneiro Bidi i‑di Yeso ai manakone‑ya nanahabebona tamine amane.Mahi owa‑ya Yowaho Yeso‑ya awe, mai dami‑ya hiyare,

“Kamaki dai awaho. Deoso‑ka Kaneiro Bidi amane. Deoso hiyose, bofe‑ya ai wi‑wina ai manakone‑ya nanahabebonane.

³⁰‘Ai owa kitabise kamakibona, owa‑ba awisariya, hibati‑ya tohematamonane.’ Ona, fare dai awaho, kamakine.

³¹Isara·eo‑ka dai toha faha‑ya dai‑ya haba·onirisamaroni, dai atibodi hawa tohabonehe. Hibati‑ya awi owatoremarine.

³²Makobote Deoso‑ka Doni kise, wayomata awi‑nima Deoso‑ka Doni awine, Yeso‑ya sawiwahemarine.

³³Hibati‑ya owa‑ya yose‑mari owa‑ya hiyare,

‘Deoso‑ka Doni kiseya, maki‑ya sawiya, tiaweya, tiwatowahebonane. Fare ati ene Deoso‑ka Doni mai‑ya sawibonane.’ Deoso ati ne, ati ene Yeso owatowahani.

³⁴Fare oawe, Deoso Bidi amane. Deoso Bidi tamine‑ya dai‑ya okaminineni.” Yowaho Batita ati nemarine.

Yeso‑ya mai one daba

³⁵Mahi owa‑ya hika mai da‑daba mai fama, mai eyehe waiya,

³⁶Yeso yakane‑ya mai awa,

“Deoso‑ka Kaneiro Bidi amane.” Yowaho Batita ati nemarine.

³⁷Yowaho ati‑ya mai mita, Yeso nowati‑ya mai towakamakemaroni.

³⁸Yeso kiinawame, mai‑ya awemarine.

“Hini yamata‑ya dai ati koboniti?” Yeso ati ne,

“Ayo, ai‑ya ka‑kanawato amatini, ebeni‑kaya tisawiti?” Mai ati namaroni.

³⁹“Hima, dai awabani.” Ati nemarine.

Yeso eyehe mai tokoma, 4 ora‑ya Yeso sawi‑kaya mai kobona, mai amoni oharemaroni.

⁴⁰Yowaho Batita ati‑ya mai mita, Yeso‑ya mai towakamake owa oni i‑di Anidere tohemarine. Fare Simaho Bedoro sohori amane.

⁴¹Makobote i‑di Anidere anidi‑ya toke,

“Deoso‑ka Ka‑kadika oda awani.” I‑di Anidere ati nemarine.

(Kereko mai ati‑ya Deoso‑ka Ka‑kadika i‑di Kirisito amane.)

⁴²Yeso‑ya anidi‑ya towakame, mai kobokana, Simaho‑ya Yeso kakatome, ati yanane,

“Yoaho bidi, i‑di Simaho amatini. Tiwa oni one Sefasi tohaboneni.” Yeso ati nemarine.

(Sefasi Kereko mai ati‑ya i‑di Bedoro amane.)

⁴³Mahi owa‑ya Karireya‑ya Yeso tokebona, Firibi‑ya himane,

“Firibi, owa‑ya tisawihi.” Yeso ati nemarine.

⁴⁴I‑di Anidere, i‑di Bedoro, i‑di Firibi mai na Besaida‑ya mai tabori tohamaroni.

⁴⁵I‑di Natanaeo‑ya Firibi toke, fai‑ya hiyare,

“Natanaeo, owati timitahi. Mose‑ka yama hani ati toha, Deoso ati‑ya mai mi‑mita‑mete mai‑ka yama hani ati toha na, ai owa kobonebona yama hani ati na, fare Yeso Nasare‑ke amane. I‑di Yose bidi amane. Yeso oda kobonawahene.” Firibi ati nemarine.

⁴⁶“Nasare‑ya ai owa ati amosa wadaterene.” Natanaeo ati ne,

“Tiawaboneni. Hima.” Firibi ati nemarine.

⁴⁷Mai towakama, Yeso‑ya mai kobokana, Natanaeo‑ya Yeso hiyare,

“Isara·eo‑ka nodi yokana amatini. Tiwa ene amosa hinama tohani.” Yeso ati ne,

⁴⁸“Owa tiawatera, owa‑ya tiwatoneni?” Natanaeo ati ne,

“I‑di Firibi tiwa‑ya himanebona, fiko waa bofe‑ya tiwitare, tiwa oawani.” Yeso ati nemarine.

⁴⁹“Ayo, Deoso Bidi amatini. Isara·eo‑ka nodi oda toha, oda‑ka hidi webote yokana amatini.” Natanaeo ati nemarine.

⁵⁰“‘Fiko waa bofe‑ya tiwitare, tiwa oawani.’ Ona,

owati tinofineni. Owa ene kitabote yokana tiawamakeboneni.” Yeso ati nemarine.

⁵¹“Owati amosabote dai mitahi. Dai‑ka Ayo neme‑ke ama·oni. Neme seekaniya, Deoso‑ka yo‑yose owa‑ya mai kisiya, mai tokomatasa, mai dai awaboneni.” Yeso ati nemarine.

Faha fino tohawaha

¹Oda amoni famamakiya, Kana Karireya‑ya oda‑ka owa fanebona, fare marine‑ya Yeso madi sawe,

²Marina hidi oda‑ya himane, Yeso eyehe oda sawemaroni.

³Fino tosiyoya, Yeso‑ya madi hiyara,

“Mai‑ka fino tosiyoni.” Ati na,

⁴“Ami, hini yamata‑ba owa‑ya haatiniti? Owa ene kitabote mai awa kanibote raboneni.” Yeso ati nemarine.

⁵Fanebona‑ka yo‑yose mai‑ya Mariya hiyara,

“Yeso ati‑ya dai tokadabahi.” Ati na,

⁶Faha wiye webote 6 kana wademaroni. Wiye yati wamani toha, wiye one 80 ritoro toha, wiye one 120 ritoro toha na, fara ai yehe so‑sorokari‑ka faha wiye amani.

⁷“Faha dai kabiniya, yama wiye nafi dai nakibahi.” Yeso ati nemarine.

Faha‑ya mai kabina, yama wiye‑ya mai nakibi amosamaroni.

⁸“Yama wiye bide‑ya dai kabikaniya, dai towakamahi, fino‑ya mai da‑daa mai‑ka hidi‑ya.” Yeso ati ne,

Ati‑nima mai namaroni.

⁹Faha fino tohawaha‑ya mai daana, fino‑ya hidi to‑tomine,

“Se! Fino fawi amosini.” Atibodi ati nemarine.

Fanebona‑ya hidi haanemarine. (Yeso ene‑ya hidi watore, faha‑ya mai kabina yama‑ya mai watobisamaroni.)

¹⁰Fanebona‑ya hidi hiyare,

“Fino fawi amosa ai daani baha, mai towe tohi bide tohiya, fino fawi to‑tobaramana ai daanamakitasateni. Ai owa ene‑nima tiwa ene ra, fino fawi amosa‑ya tinayotoneni.” Ati nemarine.

¹¹Kana Karireya‑ya Yeso ene kitabote daidi oda awa, Yeso amosabote oda watowaha, ati oda nofemarine.

¹²Marina hawa tohiya, Yeso, Yeso madi, Yeso sohori mai toha, Yeso‑ya oda da‑daba oda toha, oda na, kafanaho‑ya oda tokawaha, Kafanaho‑ya oda amoni fa‑famaraba namaroni.

Yeso mai‑ya kananihi

¹³Yodeo oda toha oda yorotokanaboneni, Ka‑kariwa‑ya oda marinabonehe. Fara ihi Yerosare‑ya Yeso oda eyehe tokomakimarine.

¹⁴Deoso‑ka yobe‑ya Yeso toke, Deoso‑ka yobe‑ya bowi mai‑ya mai daa, kaneiro mai‑ya mai daa, wayomata mai‑ya mai daa, yinero bare‑ya mai daa, mai na, mai‑ya Yeso awemarine.

¹⁵Mado‑ya ko‑kosi‑ya wamane, yama‑ya mai da‑daa mai nafi‑ya kananihimarine, bowi mai toha, kaneiro mai toha, mai naro. Yinero‑ya mai da‑daa mai‑ka yinero‑ya nanahaba, mai‑ka mesa‑ya fatatokawiti nemarine.

¹⁶Wayomata mai‑ya mai da‑daa, mai‑ya hiyare,

“Wayomata mai dai towakamahi. Okobi‑ka yobe‑ya yama‑ya dai daanamariyahi.” Ati nemarine.

¹⁷Yeso‑ya oda da‑daba Deoso‑ka yama hani ati oda watowama,

“Deoso‑ka yobe onofi nafi, yobe noko·oni nafeboneni.” Deoso‑ka yama hani ati neni. Fare Yeso tamine amane.

¹⁸Yeso ene‑ya mai awa, mai one yawa,

“Hini yamata‑bone mai‑ya kanatinihi? Deoso ene‑mona tina, Deoso ene kitabote oda awahi.” Oda‑ka hidi mai ati namaroni.

¹⁹“Deoso‑ka yobe‑ya dai nanahabiya, mahi 3 tohe‑ya yobe wama·onamatasaboneni.” Yeso ati nemarine.

²⁰“Tiwa ohare yobe haa‑nima ne wamatiwameya, mahi 3 tohe‑ya hawa tinimakarabana? Faha fowe 46 kani‑ya Deoso‑ka yobe‑ya mai wamanamaroni.” Oda‑ka hidi mai one ati namaroni.

²¹Hini abano tamine‑bona‑ya hiyaremarine.

²²Yeso abe, kitame, oda awe, ati oda watowame, ati oda nofawahe, Deoso‑ka yama hani ati oda nofawahamaroni.

²³2:23 Ka‑kariwa feriado oni amani. Faha fowe‑nima ka‑kariwa koboniya, mai yorotokana, mai mariteni.Ka‑kariwa kobona, Yerosare‑ya oda marini‑ya Yeso ene kitabote‑ya mai awa, Yeso ati‑ya mai dama mai nofawahamaroni.

²⁴Mai atibodi ati‑ya Yeso wato, mai ati‑ya nofaremarine.

²⁵Ai nafi atibodi ati‑ya wato, ai atibodi ati ai kaminara‑ya wato nemarine.

Nikodimo Yeso‑ya hiyare

¹I‑di Nikodimo fariseo tohe, oda‑ka hidi tohemarine.

²Yama soki‑ya Yeso‑ya toke, Yeso‑ya hiyare,

“Ayo, Deoso tiwa‑ya yose‑mata ati tikamine, tiwa ene kitabote tohani. Deoso‑ka tihara‑mani, haa‑nima tiwa ene ra neni.” Nikodimo ati nemarine.

³“Owati amosabote timitahi. Mai wadamatasara Deoso ai nafi‑ka hidi kitabote tohawahebona‑ya mai sawiraboneni.” Yeso ati nemarine.

⁴“Bote ai toha ai‑ka ami dori‑ya ai foyamarani. Hini yamata‑nima ai nibati, ai wadamatasabonehe?” Nikodimo ati nemarine.

⁵“Owati amosabote timitahi. Ai‑ka ami‑ya ai wadi dai tohi bahiya, Deoso‑ka Doni ene ai wadamatasiya, Deoso ai nafi‑ka hidi kitabote tohawahebona‑ya ai sawiwahaboneni. Ai wadi fami awiriya, ai sawiraboneni.

⁶Ai‑ka ami dori‑ya ai yana, ai‑ka ami bidi ai tohani. Deoso‑ka Doni ene ai wadamatasiya, Deoso bidi ai tohawaha, ai atibodi tamine amani.

⁷Hini yamata ihi tiwatibodi yama‑ya kadika?

‘Tiwadamatasahi.’ Ona,

⁸fara ai wadamatasa ai awaterani. Yama hakikikani kake, moni ai mita, aboni ai awarihi, yama hakikikani tabori ai awarihi teni. Fara‑nima Deoso‑ka Doni ene Deoso bidi ai tohawaha, Deoso‑ka Doni ai aware, ene‑ta ai awabisane.” Yeso ati nemarine.

⁹“Hini yamata‑nima tiwati niti? Tiwati owato awirini.” Nikodimo ati nemarine.

¹⁰Yeso ati yananamatase,

“Isara·eo‑ka nodi mai‑ya tikanawatote, owati‑ya tiwatora awineni?

¹¹Owati amosabote timitahi. Yama oda watobisa tamine oda hiyara, yama oda awamaro tamine oda kamina, oda ati dai nofarani.

¹²Bofe‑ka yama tamine okamina, owati dai nofara, neme‑ka yama tamine okaminamakiya, owati dai nofatasaraboneni.

¹³Deoso tabaro dai awara, dai‑ka Ayo neme‑ke ama·oni. Deoso tabaro‑ya owinamaroni.

¹⁴Hibati‑ya ai‑ka idi kabani‑ya mai wina, maka‑nima yama na‑ya i‑di Mose wamane, awa‑ya hinawaanametemoneni. Fara‑nima, awa‑ya owa‑ya mai nawaanaboneni,

¹⁵3:15 “Dai abaterabonehe.” Yama hani ati na, Deoso tabaro‑ya dai ya‑yaini fawaterabone tamine amani.owati‑ya dai no‑nofa dai abaterabonehe.

¹⁶Bofe‑ka dai nafi‑ya Deoso nofi nafi, Bidi yokana ohari‑ya yose, Bidi ati dai no‑nofa yama kome fawaterabone‑kaya dai sawirabone, dai abaterabone‑kaya dai sawibisaboneni.

¹⁷Dai ene towe manakone Deoso dai‑ya haani nofaremarine, Bidi‑ya yose, dai ene manakone‑ya nanahababisebonaha.

¹⁸Bidi ati mai hinofeya, mai ihi towe manakone wadamarani. Deoso Bidi ati‑ya mai nofara mai ihi manakone hasinasa neni. Deoso Bidi yokana oharine.

¹⁹Yama wahi‑nima ne bofe‑ya kobone, bofe‑ya mai wi‑wina yama towe‑ya mai nokotonihe, yama wahi‑nima ne‑ya mai nofarani. Hini mai ihi mai manakone hasinasa neni.

²⁰Yama wahi‑nima ne‑ya mai nofara, yama soki‑ya mai nofabisa, hini mai ihi towe watowami‑ya mai nofarani.

²¹3:19-21 Yama wahi‑nima ne i‑di Yeso tamine amane.Mai ihi amosa yama wahi‑nima ne‑ya mai nofa, Deoso ati‑ya mai tokadaba mai‑ya mai watowaha, mai ya‑yainaboneni.” Yeso ati ne, Nikodimo‑ya hiyaremarine.

Yeso tamine‑ya Yowaho Batita hiyare

²²Yama one‑ya Yeso oda da‑daba oda eyehe toke, Yodeya‑ya oda toka, Yeso oda‑ya hiyare, mai one oda habanirisamaroni.

²³Sarini yakari‑ya Enomi toha, fara‑ya faha ba‑basi na‑ya Yowaho Batita sawi, mahi‑nima mai one kamakina, mai‑ya Yowaho habanirisematane.

²⁴Kadeya‑ya Yowaho waanasa re‑ya

²⁵Yowaho Batita‑ya mai da‑daba mai‑ya maki hiyare, faha‑ya ai yehe sorona tamine‑ya mai ibi weenameteni.

²⁶Yowaho‑ya mai da‑daba Yowaho‑ya mai hiyara,

“Ayo, Yodaho Faha kowani‑kaya tiwa‑ya kobone, tamine tikamine, mai dama mai‑ya habanirisemonane. Fare‑ya mai dama mai tokomake, ai‑ka mai damamarani.” Mai ati nameteni.

²⁷Yowaho mai‑ya hiyare,

“Deoso ene Yeso‑ya mai tokomakineni.

²⁸Hibati‑ya dai ohiyara,

‘Deoso‑ka Ka‑kadika ohi awirini.’ Onaroni.

‘Hawine‑bona hawa·onihibona’ Onaroni.

Owati dai mitaroni.

²⁹Ai‑ka no‑nofa fanebona, ya‑yaine, fadi‑bone‑ya famebonaha. Fane‑bona kobone ene ai ya‑yainahariteni. Yeso‑ka no‑nofa ama·oni. Yeso‑ya mai toka, oyawara, ya‑yai·oneni.

³⁰Yeso‑ya mai sa‑sawi mai dodamawahabone, owa‑ya mai sa‑sawi mai fa‑famaraba nibisaboneni. Yama sibarini. Ya‑yai·oneni.

³¹Neme‑ke yama nafi‑ya watone. Bofe‑ya ai wi‑wina bofe‑ka yama bide ai wato, Neme‑ke yama nafi‑ya wato, neme‑ka yama‑ya wato, bofe‑ka yama‑ya wato nane.

³²Yama himitamaro‑ya kamina, yama hiawamaro tamine‑ya kaminane, ati‑ya mai dama mai nofarani.

³³Neme‑ke ati mai one hinofe,

‘Deoso ati amose, keyehe‑ya hirirene.’ Mai ati neni.

³⁴Deoso hiyose, Deoso ati‑ya kaminatene. Deoso ati ene Bidi‑ya hika Doni sawi oharine.

³⁵Deoso Bidi‑ya nofi nafi, yama nafi‑ya Bidi‑ya daanane.

³⁶3:36 “Ai abateraboneni.” Yama hani ati na, Deoso tabaro‑ya ai ya‑yaini fawaterabone tamine amani.Deoso Bidi ati ai nofa ai abateraboneni. Deoso Bidi ati‑ya mai nofara Deoso tabaro‑ya mai sawirabone, mai ihi manakone hasinasa nineni.” Yowaho ati nematane.

¹Mai dama Yeso‑ya mai daba, Yeso ati ene mai oda habanirisamaroni. Mai fa‑famaraba nibisa mai‑ya i‑di Yowaho Batita habanirise, mai tamine‑ya fariseo mai mitameteni.

²Yeso mai‑ya habanirisi awire, Yeso‑ya oda da‑daba mai‑ya oda habanirisabisamaroni.

³Fariseo mai ati tamine‑ya Yeso mite, Karireya‑ya oda tokomamaroni.

⁴Oda toka, Yeso ati ene Samaritano mai‑ka hawi‑ya oda tokawahamaroni.

⁵Samaritano mai tabori one oni Sika‑ya oda kobonamaroni. Fara hibati‑ya Yose‑ya i‑di Yako wami‑ya daanematamonane.

⁶Yako faha hodi wiihinamete wai‑ya oda maatowitemaroni, mahi nokorise‑ya. Faha hodi yowi‑ya Yeso itarimarine, maa toheri.

^7-8Oda‑ka yamata‑bone oda kanikabone oda tokamaroni, mai tabori‑ya. Oda nowati‑ya Samaritano kakemeteni, faha‑ya kabikanabonehe.

“Oka faha‑ba daatinahi.” Yeso ati nematane.

⁹“Yodeo amatini. Samaritano ama·oni. Hini yamata‑bone faha‑ya haatina?

‘Samaritano towe mai amani.’ Yodeo mai ati teni.” Fana ati nameteni.

(Samaritano mai‑ya Yodeo mai haaterani.)

¹⁰“Owa tiwato awirini. Deoso owa‑ya yosemarine. Owa tiwata‑mani, tika faha‑ba haatina neni. Faha haatiniya, faha daa·ona neni. Oka faha‑ya mai fa‑fawa mai baki hokomarani.” Yeso ati nematane.

¹¹“Tika yama wiye wadara, hodi koweni. Ebeni‑ya tika faha toha?

¹²Ai‑ka idi i‑di Yako hodi‑ya wiinematamonane. I‑di Yako toha, Yako bidi mai toha, hika bani mai toha, mai na, hodi‑ka faha‑ya mai fawametemoneni. Yako yama‑ya watomatamonane. Yama wato bi‑bidi tina awineni.” Fana ati nameteni.

¹³“Hodi‑ka faha‑ya mai fa‑fawa mai baki hokomarimateni.

¹⁴4:14 “Mai abateraboneni.” Yama hani ati na, Deoso tabaro‑ya mai ya‑yaini fawaterabone tamine amani.Oka faha‑ya mai fawiya, mai baki hokomarani. Wami hodi‑ka faha kimisa‑nima oka faha kimisabone, tosiyoraboneni. Oka faha‑ya mai fawiya, mai abateraboneni.” Yeso ati nematane.

¹⁵“Oka faha‑ba daatinahi. Owa bako hokomariya, faha kabi·okanamaraboneni.” Fana ati nameteni.

¹⁶“Tika yibote haatinamiya, dai kakamiyahi.” Yeso ati ne,

¹⁷“Oka yibote awirane.” Fana ati na,

“Fara amani. Keyehe hiritini awirini.

¹⁸Tika yibote mai 5 tohamaro, hibayata maki owa tiwa‑ya famawahe, dai nafi yorotokanami awirani. Keyehe hiritini awirini.” Yeso ati nematane.

¹⁹“Se! Deoso ati‑ya mi‑mita amatini. Tiwa owatowahineni. Owati timitahi.

²⁰Oda tabaro‑ka adami webote‑ya Deoso oda kahiyarateni, oda‑ka idi mai toha, oda toha, oda naro. Yodeo dai toha, Yerosare‑ya Deoso‑ya dai kahiyarateni. Tabora one‑ya Deoso ai kahiyararabone dai ati teni.” Fana ati nameteni.

²¹“Owati timitahi. Yama one‑ya ai‑ka Abi i‑di Deoso‑ya ai ati kahiyariya, Yerosare‑ya oda tokomarihi, dai tabaro‑ka adami webote‑ya dai tokomorosamarihi, hini ai sawi‑kaya Deoso ai kahiyara, ai nawahaboneni.

²²Deoso dai kahiyara, yama dai kahiyara dai wato awirini. Yodeo oda toha, Deoso oda kahiyara, Deoso yokana oda watobisineni. Deoso ati somawama‑bona‑ka yama oda watoneni.

²³Deoso ai nofiya, Deoso‑ya ai atibodi kahiyariya, Deoso ya‑yaitene. Fara dai watowahaboneni.

²⁴Deoso abano wadare, ai atibodi‑ya nokotonihi. Deoso‑ya ai kahiyara, ai atibodi ati ene ai ati yanana, Deoso ya‑yaitene. Deoso‑ya ai ati kahiyara, ai atibodi ati yokana tohara, keyehe‑ya ai hirina, Deoso‑ya ai kahiyari awirani.” Yeso ati nematane.

²⁵“Deoso‑ka Ka‑kadika kakibona, oni owa Kirisito tohe, koboneya, yama nafi tamine‑ya kaminebonane.” Fana ati na,

²⁶“Fara owa amani.” Yeso ati nematane.

²⁷Yeso‑ya oda da‑daba oda kama, samaritano‑ya Yeso hiyareno, oda wasima,

“Ka! Hini yamata‑ya fana nofiti? Hini yamata ihi fana‑ya Yeso hiyarati?” Oda atibodi ati na, oda ati yanaramaroni.

²⁸Hika yama wiye towitakosa, hini mai tabori‑ya tokoma, hika mai‑ya hiyara,

²⁹“Owa ene‑maro‑ya maki kamine, Deoso‑ka Ka‑kadika tohe awane. Dai kamakihi, dai aweba.” Ati nameteni.

³⁰Yeso‑ya mai awabone mai kamameteni.

³¹Fana tokoma nowati‑ya Yeso‑ya oda haana,

“Ayo, titafahi.” Oda ati na,

³²“Owa tefe‑bone tohani.” Yeso ati nemarine.

³³“Ai nowati‑ya tefe‑ba mai daahine awane.” Oda ibi hiyara, oda ati namaroni.

³⁴“Yama kaba tamine ohiyari awirani. Dai tafa dai ya‑yaiteni. Owa‑ya yose‑mari ati‑nima owa ene niya, ati‑nima yama hawa·oniya, ya‑yai·oteni.” Yeso ati nemarine.

³⁵4:35 Yamata marafakana Yeso ati ne, samaritano mai atibodi tamine amani. Deoso ati mai mitiya, ati mai hikadabebonane.Yeso oda‑ya kanawatobona oda‑ya hiyare,

“Abariko 4 kane‑ya yamata marafakanabone dai ati na, dai awahi. Marafakanani.

³⁶Yamata‑ya mai kakama, mai ihi amosa manakone wadateni. Mai ihi ai one abateraboneni. Yamata noki‑ya mai werena, yamata‑ya mai kakama, mai na, mai nafi ya‑yainaboneni.

³⁷‘Ai one yamata noki‑ya werena, ai one yamata marafakana‑ya kakamateni.’ Dai ati teni.

Dai ati‑nima yama nineni.

³⁸Mai one yama anini‑ya nafe, mai nowati‑ya dai oyose, mai‑ka yama anini dai hawa tonihebonehe.” Yeso ati nemarine.

³⁹Sidadi‑ka mai‑ya fana hiyara,

“Owa ene nafi‑ya maki kaminene.” Fana ati nameteni.

Yeso ene tamine‑ya mai mita,

“Kirisito tohe awane.” Mai atibodi ati namaroni.

⁴⁰Yeso‑ya Samaritano mai kobona,

“Oda tabaro‑ya tiwinahi.” Mai ati namaroni.

Mai ati ihi mai tabori‑ya oda amoni famamaroni.

⁴¹Yeso ati‑ya mai mita, Yeso ati‑ya mai one dama nofawahamaroni.

⁴²Fana‑ya mai hiyara,

“Yeso tamine tikamina, tiwati oda nofaroni. Hibayata‑ka Yeso ati oda mitawaha, Yeso ati oda nofa, ati oda tokadabawahane. Bofe‑ya mai wi‑wina mai nafi‑ya kasomebona oda watowahane.” Mai ati namaroni.

Mai‑ka hidi bidi‑ya Yeso nakitame

⁴³Mai tabori‑ya oda amoni fama, oda yananamatasa, Karireya‑ya oda tokamaroni.

⁴⁴“Deoso ati‑ya mai mi‑mita hini mai tabori‑ya mai ati mai hinofaterani.” Yeso ati nemarine.

⁴⁵Hibati‑ya Yerosare‑ya oda mariniya, Karireya‑ka mai sawe, Yeso ene‑ya mai awamaroni. Karireya‑ya oda kobotonamake, Yeso‑ya mai awa, mai ya‑yainamaroni.

⁴⁶Kana Karireya‑ya Yeso ati ene faha fino tohiyi‑maro‑kaya oda tokomatasamaroni. Kafanaho‑ya mai‑ka hidi‑ka yo‑yose winemari, bidi kiyani nafi, abi yanatonematane.

⁴⁷Karireya‑ya Yeso koboni tamine‑ya mai‑ka hidi mite, kaki, Yeso‑ya himanemarine, bidi Yeso hinakitamebona, bidi abarebonaha.

⁴⁸Yeso ati yanane,

“Owa ene kitabote dai awara, owati‑ya dai nofarani.” Yeso ati nemarine.

⁴⁹“Ayo, ai towakamahi. Oka dao abarayaho.” Hidi ati ne,

⁵⁰“Tiwa tabaro‑ya tikamahi. Tika dao kitamane.” Yeso ati nemarine.

Yeso ati‑ya nofe, tokomemarine.

⁵¹Hawi‑ya yakane‑ya hika mai one‑ya kobone,

“Ya‑yaitinahi. Tika dao kitamene.” Mai ati nameteni.

⁵²“Ebeni‑ya mahi ite‑ya oka dao kitamati?” Ati ne,

“Amoni ohari, mahi nokorisi fiyakane‑ya, oma ora‑ya tika dao hewene fawanene.” Mai ati nameteni.

⁵³“Oma ora‑ya Yeso ati yanane, fare oka dao‑ya kasoma kanibote nane.” Atibodi ati ne,

hini hika mai eyehe Yeso ati‑ya mai nofawahameteni.

⁵⁴Hibati‑ya Yodeya‑ya Yeso tokemari, kamatase, Karireya‑ya ene kitabote famawahemarine.

¹Yama one‑ya Yeso oda tokomatasamaroni, Yerosare‑ya, Yodeo oda toha oda‑ka marina‑ya.

²Yerosare‑ka nokobi one oni kaneiro nokobi tohani. Kaneiro nokobi yakari‑ya wara bide ita, oda ati‑ya wara oni Betesida toha, Betesida widi‑ya yobe bidi 5 kane siinarimarine.

³Yobe bidi‑ya mai hi‑hiyana mai dama mai nahoteni. Mai noki wadara mai toha, mai yakara mai toha, mai mani i‑isi na mai toha, mai na, yobe bidi‑ya mai nahamaroni, faha werokanabone‑ya mai nimanaro.

⁴Deoso‑ka yo‑yose kise, ene faha werokiteni. Faha werokanaya, boki dai tohe kitamatene. Mai amoni dami‑ya Deoso‑ka yo‑yose kamatasatene.

⁵Wara widi‑ya ai owa hi‑hiyane kafori, faha fowe 38 toha‑ya yakare,

⁶Yeso kamaki, maki‑ya awe, faha fowe dami‑ya yakare‑ya wato,

“Tiwati yakanamineni?” Yeso ati nemarine.

⁷“Ayo, faha‑ya owa‑ya mai nabokabone mai wadara, faha werokanaya, obokabone ona, mai boki dai toharimateni.” Hi‑hiyane ati ne,

⁸“Tiwaamisahi. Tika fo‑fori‑ka yama diwatikaniya, yakatinahi.” Yeso ati nemarine.

⁹Kitame, waamise, hini fo‑fori‑ka yama‑ya diwanemarine, sabado‑ya.

¹⁰Maki kitame‑ya oda‑ka hidi mai hiyara,

“Sabado‑ya ai fo‑fori‑ka yama ai diwaterani. Yama diwatiriyahi.” Mai ati nameteni.

¹¹“Owa‑ya nakitame ati ene oka fo‑fori‑ka yama diwa·okanineni.” Kitame ati ne,

¹²“Ebeni‑ke ati tohati?” Mai ati nameteni.

¹³Yeso oni‑ya maki watore, maki‑ya Yeso nakitame, toka kanibote ne, mai dama mai ihi Yeso‑ya watomarematane.

¹⁴Makobote Deoso‑ka yobe‑ya maki sawi‑ya Yeso awe,

“Yakatinamawaha, tiwa ene amosaramaro‑nima tiwa ene namariyahi, tiwa komene ba‑basi ni awirabonehe.” Yeso ati nemarine.

¹⁵Yeso ati‑ya mite, oda‑ka hidi mai‑ya toke,

“Owa‑ya nakitame oni Yeso amane.” Ati nematane.

¹⁶Sabado‑ya mai‑ya Yeso nakitame, Yeso‑ya mai weenamaroni.

¹⁷“Okobi yama‑ya aninadi‑nima onabone, yama ani·onadeboneni.” Yeso ati nemarine.

¹⁸Yeso ati‑ya mai mita, mai yawi nafemaroni. Sabado‑ya Yeso yama‑ya anine ene mai yawi baha, makobote Deoso‑ya Yeso Abi ne ene mai yawi kitawaha,

“Yeso i‑di Deoso Bidi yokana tohi awirene.” Mai atibodi ati na, Yeso‑ya mai nanahababone mai ati nameteni.

¹⁹Yeso mai‑ya hiyare,

“Owati amosabote dai mitahi. Owa ene yama ani·oterani. Okobi ati ene yama ani·obisa, Okobi‑ka yama anini‑nima oka yama aniniteni.

²⁰Okobi owa‑ya nofi nafi, yama nafi‑ya owa‑ya yofikane, owa ene kitamaro, Okobi ene owa ene kitawahabone, dai awiya, dai atibodi yama‑ya kadikawahaboneni.

²¹Mai aba mai‑ya Okobi nakitame‑nima onabone, mai‑ya owati nakitama mai onakitamabone, owa ene mai abaraboneni.

²²Mai ihi‑ya Okobi kadikare, owa‑ya yosemarine, mai ihi okadikabisabonehe.

²³Owa‑ya yosemari ene Okobi‑ya mai kahiyari‑nima owa‑ya mai kahiyarahareboneni. Owa‑ya mai kahiyari awira, Okobi owa‑ya yose‑mari‑ya mai kahiyaraharirani.

²⁴Owati amosabote dai mitahi. Okobi owa‑ya yosemarine. Owati‑ya mai mita, Okobi ati‑ya mai nofa, mai abateraboneni. Mai ihi towe manakone oda haarabone, mai kome fawarabone‑ka mai tohami awirini, mai abarabone‑ka mai tohabisineni.

²⁵Owati amosabote dai mitahi. Deoso Bidi ama·oni. Mai aba mai haa·oniya, mai kitamawahaboneni.

²⁶Deoso kite, hini ene mai one kitamabone, mai one abarabone, Deoso hini ene Deoso kiti‑nima Deoso Bidi nane.

²⁷Deoso ati ene dai‑ka Ayo neme‑ke dai ene‑ya kadikebonane. Hini dai ene‑nima dai manakone na daa·onaboneni.

²⁸Dai atibodi yama‑ya kadikariyahi. Mai abamaro, hini mai tame‑ya mai sawe owati‑ya mai mitabone,

²⁹5:29 “Mai wee·obisaboneni.” Yama hani ati na, wara hirini‑ya mai kome fawaterabone tamine amani.owati‑ya mai mitiya, mai nafi kitamawahaboneni. Mai ihi amosamaro mai abaraboneni. Mai ihi amosaramaro mai wee·obisaboneni.

³⁰Hini owati ihi tohara, Deoso ati ene mai ihi okadikabisaboneni. Owa‑ya yose‑mari ati‑nima mai‑ya wee·owahaboneni.

³¹Hini owa hare owa tamine okamina‑mani, owati dai nofariya, sibara neni.

³²Owa tamine‑ya kaminahari, ati amosemarine.

³³Yowaho Batita ati dai mitebona dai one‑ya dai yose, owa tamine yokana‑ya Yowaho kaminemarine.

³⁴Ai owa ati noko·onira, Yowaho ati dai nokotonibisineni. Yowaho ati tamine okaminineni, ai komene fawaterabone‑kaya dai sawirabonehe.

³⁵Nabarina wahi ai hawine‑ya yofikana‑nima Yowaho ne, Deoso hawine‑ya yofikanane. Faha fowe fa‑famaraba niya Yowaho dai‑ya yofikane ene dai ya‑yainamaroni.

³⁶Yowaho ati amosi bi‑bidi nane. Okobi ene owa ene kitabote, owa ene dai awiya, Okobi owa‑ya yose‑mari dai watowahaboneni.

³⁷Okobi owa‑ya yosemari, owa tamine‑ya hiyaremari, abano dai awarihi, ati dai mitarihi, dai teni.

³⁸Owa‑ya yose‑mari ati dai atibodi‑ya foyaterene. Dai atibodi‑ya ati foye‑mana, owati dai nofa neni.

³⁹Deoso‑ka yama hani dai kadika,

‘Ai abaterabone tamine oda mitaboneni.’ Dai ati na,

Deoso‑ka yama hani owa tamine‑ya kaminateni.

⁴⁰Owa dai nofarani. Owa dai nofa‑mani, dai abara neni.

⁴¹Owa‑ya dai kahiyarabone bofe‑ya dai wi‑wina dai‑ya noko·onirani.

⁴²Dai atibodi ati owatoni. Deoso dai nofarani.

⁴³Okobi owa‑ya yosemari, owati dai nofara, bare hini ati‑ya kaminabiseya, ati dai nofabisebonane.

⁴⁴Hini dai hinama dai ibi kahiyarabisa, Deoso dai‑ya kahiyarebona‑ya dai nokotonirani. Fara ihi owati dai nofarani.

⁴⁵Okobi‑ya dai‑ya okahabanaraboneni. Mose‑ka yama hani dai‑ya kasomabone dai ati na, Mose‑ka yama hani ati dai tokadabara, Mose‑ka yama hani dai‑ya kahabanabisaboneni.

⁴⁶Mose ati‑ya dai nofa‑mani, owati dai nofahare neni. Owa tamine‑ya i‑di Mose kanahanomarine.

⁴⁷Mose‑ka yama hani ati‑ya dai nofara, owati‑ya dai nofaharirineni.” Yeso ati nemarine.

5.000 mai kana mai‑ya natafe

¹Yama one‑ya Karireya‑ka Wara Webote‑ya Yeso oda eyehe berekawahemarine. Bara mai ati‑ka wara oni Tiberiyadi amani.

²Fara ai one‑ya Yeso nakitame‑ya mai awa, mai dama mai tokobasamakemaroni.

³Oda kobokana, adami webote‑ya oda tokomorosa, oda nahamaroni.

⁴6:4 Ka‑kariwa feriado oni amani.Ka‑kariwa‑ke mahi koboni yanatonemarine, Yodeo oda toha oda marinabonehe.

⁵Yeso kiinawame, mai dama mai kabasamake mai‑ya awe,

“Firibi, ebeni‑kaya mai tafe‑ba ai kanikibati?” Yeso ati nemarine.

⁶Yeso mai‑ya natafebona, hini ene‑bona‑ya wato, i‑di Firibi‑ya haanemarine, fai ati‑ya mitebonaha.

⁷Firibi ati yanane,

“Ka! Yinero yama anini mahi 200 kane manakone‑nima ne‑ya mai tafe‑ba oda kanikiya, baho kote bide oda daaniya, mai nafi‑ya koboraba awineni.” Firibi ati nemarine.

⁸Yeso‑ya oda da‑daba oda‑ka owa i‑di Simaho Bedoro sohori i‑di Anidere ati yanane,

⁹“Yetene oawe, tefe bidi tohene. Baho 5 kana, aba mai fama nani. Yamata bide mai nafi‑ya koboraboneni.” I‑di Anidere ati nemarine.

¹⁰“Dai ati ene mai nahorisahi.” Yeso ati nemarine.

Kabihi mese‑ya mai nahamaroni. Mai dama toha, mai makidi 5.000 tohaba awineni.

¹¹Baho‑ya Yeso damakane, Deoso‑ya hiyare, baho‑ya oda‑ya daani bahe, aba mai‑ya daanamakitase, mai nafi‑ya yama oda daanawahamaroni. Hini mai ati‑nima mai tafe‑bone oda nayowamaroni.

¹²Mai nafi korimanama,

“Yamata kote hasina dai teenahi, abarabonehe.” Yeso ati nemarine.

¹³Yeso ati ene baho 5 kana oda kaba kote hasina oda teena, hisiri 12 kana kibamaroni.

¹⁴Yeso ene kite‑ya mai awa,

“Deoso ati‑ya mi‑mita kakibona yama hani ati na, fare i‑di Yeso tohe awane.” Mai ati namaroni.

¹⁵“Yeso oda‑ka hidi‑bona oda ati na, oda ati‑ya nofareya, Yeso oda waratoneya, hidi tabaro‑ya oda towakamebonane, oda‑ka hidi webote tohawahebonaha.” Mai one atibodi ati na,

mai atibodi ati‑ya Yeso wato, ohari toke, adami webote‑ya tokomorosemarine.

Faha baki‑ya Yeso yakane

¹⁶Yeso kamare, yama soki yanatoni‑ya Yeso‑ya oda da‑daba oda tokofawama,

¹⁷kanawa‑ya oda foyamamaroni, Kafanaho‑ya oda beretokawamabonehe. Yama soki nafiwahiya, Yeso kamaki awisareya,

¹⁸boni yanana, faha rike nafemaroni.

¹⁹Faha bai‑ya kanawa oda oriniya, Yeso faha baki‑ya kamaki, kanawa yakari‑ya yakane, oda awa, oda habo siitoni kitamaroni.

²⁰“Dai kakomeheriyahi. Fara ama·oni.” Yeso ati nemarine.

²¹“Se! Sibarini, tifoyahi.” Oda ati namaroni.

Kanawa dori‑ya Yeso foyamaki, faha widi‑ya oda koboni hawa tohamaroni.

Baho‑ya mai nokotonihe

²²Yama wahabisari‑ya mai dama mai naha, mai atibodi yama‑ya kadika,

“Yeso‑ya mai da‑daba kanawa ohare‑ya mai towakama, Yeso mai‑ya sawirene.” Mai atibodi ati nameteni.

²³Tiberiyadi‑ka mai kake, kanawa‑kaya mai yamakanake, mai dama mai‑ya Yeso natafe‑ka fara yama yakari‑ya mai kobonameteni.

²⁴Mai dama mai naha Yeso‑ya mai nimana, Yeso kamarihi, fara Yeso‑ya oda da‑daba oda wadamarihi na, ihi Tiberiyadi‑ka mai‑ka kanawa‑ya mai haana, Kafanaho‑ya mai kamakemeteni, Yeso‑ya mai sibanabonehe.

²⁵Kafanaho‑ya mai kobonamake, Yeso‑ya mai wasimake, mai ati yanana,

“Ayo, ebeni mahi ite‑ya kobotiniti?” Mai ati namaroni.

²⁶“Owati amosabote dai mitahi. Baho dai kaba ihi owa‑ya dai sibanineni. Deoso ene dai nofabone, owa‑ya dai sibana‑mani, yama sibabisara neni.

²⁷6:27 “Dai abaterabone” yama hani ati na, Deoso tabaro‑ya ai ya‑yaini fawaterabone tamine amani.Yamata dai nokotoniriyahi. Yamata batateni. Oka yamata bara ihi dai abaterabone, fara dai nokotonibisahi. Okobi i‑di Deoso owa‑ya yose, owa‑ya kayawemarine. Yamata bara dai‑ya daa·onaboneni. Dai‑ka Ayo neme‑ke ama·oni.” Yeso ati nemarine.

²⁸“Deoso ati‑nima oda nabone hini yamata‑nima oda ene nibati?” Mai ati namaroni.

²⁹“Deoso ati‑nima dai nabone, Deoso hiyosemari ati dai nofahi.” Yeso ati nemarine.

³⁰“Tiwati oda nofawahabone, tiwa ene kitabote oda awahi.

³¹6:31 Hibati‑ya Deoso ati ene mahi‑nima mana wiya‑ya mai yaba, baho‑ya mai wamana, mai hikabametemoneni.Ai‑ka idi kabani‑kaya mai yakani‑ya mana‑ya mai kabawaremetemoneni. Fara yama hani ati timitahi,

‘Neme‑ka baho‑ya mai kabametemoneni.’ Deoso‑ka yama hani ati nineni.” Mai ati namaroni.

³²“Owati amosabote dai mitahi. Neme‑ka baho‑ya mai kayafamete, Mose ene tohi awirematamonane. Neme‑ka baho amosabote‑ya Okobi daanibisatene.

³³6:33 Yeso hini tamine‑ya hiyare, ati‑ya mai watorametemoneni.Neme‑ya yanane, bofe‑ya kise, ene dai abarabone, fare Deoso‑ka baho amane.” Yeso ati nemarine.

³⁴“Ayo, Deoso‑ka baho mahi‑nima oda‑ya daatinahi.” Mai ati namaroni.

³⁵6:35 Ai fimimara, ai bako hokomara Yeso ati ne, Deoso tabaro‑ya ai ya‑yaini fawaterabone tamine amani.“Deoso‑ka baho ama·oni. Owa ene mai fimiraboneni. Owa‑ya mai nofa mai fimimarihi, owati‑ya mai nofa mai baki hokomarihi teboneni.

³⁶Hibati‑ya owa ene dai awa, owati‑ya dai nofi awirini.

³⁷Dai one‑ya Okobi owa‑ya daane, Okobi mai daahina owa‑ya mai nafi nofabone, owa‑ya mai nofiya,

‘Dai‑ya onofi awirini, dai tokahi.’ Oteraboneni.

³⁸Bofe‑ya okemaroni, Okobi ati‑nima onabonehe. Owa‑ya yose‑mari ati‑nima oteni. Hini owati‑nima oterani.

³⁹Owa‑ya yose‑mari haa‑nima yama na‑ya nofane, owa‑ya daahina mai one‑ya fawa·onirabone, yama faina‑bone‑ya mai onakitamaboneni.

⁴⁰Haa‑nima yama na‑ya Okobi nofane, Bidi mai hiawa, Bidi ati mai hinofa hine mai abateraboneni. Yama faina‑bone‑ya mai onakitamaboneni.” Yeso ati nemarine.

⁴¹“Neme‑ka baho ama·oni.” Yeso ati ne,

ati‑ya mai one nofara, Yeso tamine‑ya mai ibi hiyara,

⁴²“Yose bidi i‑di Yeso amane. Neme‑ya kisemona ati ne; neme‑ya kisaremarine. Madi, badi mai na, mai oda watoneni.” Mai ati namaroni.

⁴³“Owa tamine‑ya dai ibi hiyara, dai ati yawariyahi.

⁴⁴Okobi owa‑ya yosemari, owa‑ya Okobi mai hiyosera, owati‑ya mai nofaraboneni. Owati‑ya mai no‑nofa yama faina‑bone‑ya mai onakitamaboneni.

⁴⁵‘Deoso mai nafi‑ya kanawatowahebonane.’ Deoso ati‑ya mai mi‑mita‑mete mai‑ka yama hani ati neni.

Okobi mai‑ya kanawato, ati‑ya mai nofa owati‑ya mai nofawahaboneni.” Yeso ati nemarine.

⁴⁶(Bofe‑ka dai toha Okobi dai awaterani. Owa‑ta Deoso owa‑ya yose‑mari oawabisane.)

⁴⁷“Owati amosabote dai mitahi. Owati dai no‑nofa dai abateraboneni.

⁴⁸Baho amosabote‑nima ona ama·oni. Owa ene mai abaraboneni.

⁴⁹Hibati‑ya ai‑ka idi kabani‑kaya mai yakani‑ya mana‑ya mai kabaware, mai abametemoneni.

⁵⁰6:50 Baho ai kabiya, Yeso ati ai tokadaba tamine amani.Baho neme‑ke ama·oni. Fara neme‑ya baho kisa, dai kabiya, dai abaraboneni.

⁵¹Neme‑ya okisamaroni. Baho‑nima ona ama·oni. Oka baho‑ya mai kaba, mai abateraboneni. Bofe‑ya dai wi‑wina dai‑ya okasomabone, oka baho daa·onaboneni. Oka baho owa eme tamine amani.” Yeso ati nemarine.

⁵²“Hini yamata‑nima Yeso eme ai kababoneni?” Mai ibi hiyara mai ati na, mai yawamaroni.

⁵³6:53 Mai abani Yeso ati ne, Deoso‑ka mai tohara, Deoso tabaro‑ya mai ya‑yairaboneni.“Owati amosabote dai mitahi. Dai‑ka Ayo neme‑ke eme dai kabarihi, dai‑ka Ayo emene dai fawarihi, dai na, dai abani.

⁵⁴6:54 Yama kaba toha, yama fa‑fawa toha Yeso ati ne, ati ai nofe tamine amane. Yeso ati amosabote amane, fare ati ai nofeya, Deoso tabaro‑ya ai ya‑yaini fawateraboneni.Owa eme‑ya mai kaba, owa emene‑ya mai fawa na, mai abateraboneni. Yama faina‑bone‑ya mai onakitamaboneni.

⁵⁵Owa eme yama kaba amosabote amani. Owa emene yama fawa amosabote tohaneni.

⁵⁶Owa eme‑ya mai kaba, owa emene‑ya mai fawa na, oka mai toha, mai‑ya osawiteboneni.

⁵⁷6:57 Yeso abaharire yama hani ati na, Yeso ya‑yaine tamine amane. Yeso abe, ai manakone‑ya nanahabe, kitamematamonane.Okobi abarene. Okobi owa‑ya yosemari, Okobi ene o·abaharirani. Owa eme‑ya mai kaba, owa ene mai abahariraboneni.

⁵⁸Neme‑ka baho amosabote ama·oni. Mana‑ya ai‑ka idi mai kaba, mai abametemoneni. Oka baho‑ya mai kaba, mai abateraboneni.” Yeso ati nemarine.

Yeso ati‑ya mai one nofamara

⁵⁹Fara Kafanaho‑ya Deoso‑ya mai hi‑hiyara‑ke yobe‑ya mai naha, mai‑ya Yeso kanawatomarine.

⁶⁰Yeso ati oda mita,

“Ati bare, ati oda watorene.” Yeso‑ya oda daba oda one dama ati namaroni.

⁶¹Mai ati‑ya Yeso wato,

“Owati bara dai mita, owati dai nofamaraba awineni.

⁶²Neme‑ya dai‑ka Ayo tokomisame dai awiya, owati dai nofaraba awineni.

⁶³Ai atibodi ene ai abarani. Ai abano ababisateni. Dai atibodi tamine‑ya ohiyara, owati dai nofiya, dai abaraboneni.

⁶⁴Owati‑ya dai one nofarani.” Yeso ati nemarine.

Oda atibodi ati‑ya Yeso wato, ati mai hinofare mai‑ya wato, fai‑ya kahabanebona‑ya wato nemarine.

⁶⁵6:65 Deoso‑ya mai nofara Yeso‑ya Deoso mai‑ya yoserene. Deoso‑ya mai nofabisiya, Yeso‑ya mai‑ya yosetene.Oda‑ya hiyaramatase,

“Owati‑ya dai one nofara, hibati‑ya owati yanana,

‘Okobi mai‑ya yosere owati‑ya mai nofaraboneni.’ Onamaroni.” Yeso ati nemarine.

⁶⁶Yeso‑ya oda dabamaro Yeso ati‑ya oda one nofara, mai toka, Yeso‑ya mai sawimaramaroni.

⁶⁷Mai dama mai tokoma, oda 12 toha oda‑ya Yeso hiyare,

“Dai tokomahareba awini.” Ati nemarine.

⁶⁸“Ayo, oda toki awirini. Ai abaterabone‑ka hawi yofitikana, ai‑ya yo‑yofikana‑ba ai owa wadarane.

⁶⁹Deoso‑ka yokana amatini. Tiwati oda nofini.” Simaho Bedoro ati nemarine.

⁷⁰“Dai 12 toha, dai okadikamaroni, owa‑ya dai dababonehe. Dai okadika Diaboro‑ka yo‑yose dai owa ohari tohabisane.” Yeso ati nemarine.

⁷¹Simaho Isikari·oti bidi i‑di Yoda tamine‑ya hiyare, oda 12 toha oda owa amane, fare Yeso‑ya kahabanewahemarine.

Yeso ati‑ya sohori mai nofi awisarani

¹Makobote Karireya‑ya Yeso yakane, Yodeya‑ya tokaremarine. Yodeya‑ya oda‑ka hidi Yeso‑ya mai ati nanahabamaroni.

²Oda amoni fa‑famaraba niya, Yodeo oda toha oda‑ka feriado yananaboneni. Feriado oni Wa‑wasa tohamaroni.

³Yeso‑ya sohori mai hiyara,

“Ayo, Yodeya‑ya tikahi, tiwati‑ya mai no‑nofa tiwa ene kitabote‑ya mai awabonehe.

⁴Tiwa tamine‑ya mai nafi mitabone tina, tiwa tikahemoriyahi. Tiwa ene kitabote‑mone tina, tiwa ene‑ya mai nafi awiyahi.” Sohori mai ati namaroni.

⁵Fara Yeso ati‑ya sohori mai nofi awiramaroni.

⁶“Hibayata mai dama mai noki‑ya owati toki awisarani. Dai‑ya mai awabisiya, yama sibarini.

⁷Dai‑ya mai kakoterani.

‘Mai ihi amosarani.’ Ona,

owa‑ya mai kakoteni.

⁸Mai marinabone mai‑ya dai tokabisahi. Hibayata oki awiraboneni. Hibayata mai dama mai noki‑ya owati toki nofarini.” Yeso ati nemarine.

⁹Karireya‑ya Yeso oda nahobisamaroni.

¹⁰Sohori mai toka, mai nowati‑ya Yeso oda tokomakemaroni, mai noki beheri‑ya.

¹¹Oda marini‑ya oda‑ka hidi Yeso‑ya mai sibana,

“Fai Yeso‑ya?” Mai ati na, mai ati damamaroni.

¹²Yeso tamine‑ya mai dama mai ibi basana,

“Yeso ati amosane.” Mai one ati na,

“Yeso ati kasiro, ati ene mai dami tosawariteni.” Mai one ati namaroni.

¹³Hini mai ati‑ya mai kemamaroni, oda‑ka hidi mai‑ya mai nayofinaro.

¹⁴Mai marini beheri hawa tohiya, Deoso‑ka yobe‑ya Yeso tokiyome, mai‑ya kanawatomarine.

¹⁵Yeso ati‑ya oda‑ka hidi mai mita,

“Ka! Ebeni‑ke Yeso‑ya kanawato timata? Oda‑ka isikora‑ya sawiterene.” Mai ibi hiyara mai ati namaroni.

¹⁶Mai ati‑ya Yeso wato, mai‑ya hiyare,

“Hini owati tohi awirini. Owa‑ya yose‑mari ati okaminabisateni.

¹⁷Deoso ati dai tokadabiya, hini owati ihi owati yanara, Deoso ati ene owati yananibisa dai wataboneni.

¹⁸Hini mai ati ihi yama‑ya mai kanawata,

‘Amosabote ama·oni. Owa dai nofahi.’ Mai ati teni.

Hidi ati‑ya kamine,

‘Owa‑ya yose dai nofabisahi.’ Ati ne,

keyehe‑ya hirire, ati amose hinama toha tene.

¹⁹Deoso‑ka yama hani‑ya i‑di Mose kanahanomata ati‑nima dai ene ra, hiniya owa‑ya dai ati nanahabineni.” Yeso ati nemarine.

²⁰“Madi towe tiwa‑ya foye, keyehe‑ya hiritineni. Tiwa oda ati nanahabarani.” Mai dama mai ati namaroni.

²¹7:21 Sabado‑ya mai‑ka owa‑ya Yeso nakitame ene mai yawametemoneni.“Owa ene dai awa, dai yawawahani.

²²I‑di Mose ati ene dai‑ka madehe sowiri tati atori dai wisinakosateni. Ai‑ka idi mai ihi dai toha, makobote i‑di Mose ene tohamaki ne, mai ihi‑nima sabado‑ya dai‑ka madehe sowiri tati atori dai wisinakosateni.

²³Mose‑ka yama hani ati ihi sabado‑ya ai one dai wisina, sabado‑ya ai owa onakitamabisa, owa ene dai yawariyahi.

²⁴Owa ene tamine dai kadikariyahi, owatibodi ati dai kadikabisahi.” Yeso ati nemarine.

²⁵Yeso ati‑ya mai mita, Yerosare‑ya mai wi‑wina mai one ati yanana,

“Se! Maki mai sibahine mai hinahabebona, fare amanaraniha?

²⁶Dai awaho, ai dami noko‑ya hiyare, ai‑ka hidi maki‑ya mai weeni awirini.

‘Deoso‑ka Ka‑kadika tohe awane.’ Ai‑ka hidi mai atibodi ati nawama awineni.” Mai ati namaroni.

²⁷7:27 “Deoso‑ka Ka‑kadika kakiya, tabaro ai watorebonane.” Mai ati na, mai tosawarineni.“Yeso tabaro oda wato, Deoso‑ka Ka‑kadika kakiya, tabaro ai watorebonane.” Mai one ati namaroni.

²⁸Deoso‑ka yobe‑ya Yeso mai‑ya kanawatobona mai‑ya hiyare,

“Hehe fara amani. Owa dai wato, owa tabaro oni dai wato neni. Owa‑ya yose‑mari dai watora, owa‑ya yose‑mari amosabote amane.

²⁹Owa‑ya yose‑mari owatobisane.” Ati nemarine.

³⁰Ati mai himite mai one yawa, Yeso‑ya mai waratonabone mai atibodi ati na, Yeso abebona‑ka mahi kobore ene Deoso mai‑ya maakane, Yeso‑ya mai waratoni awiramaroni.

³¹Yeso ati‑ya mai dami mita, Yeso ati‑ya mai one dama nofawaha,

“Deoso‑ka Ka‑kadika Yeso amane. Yeso ene kitabote tohe, Deoso‑ka Ka‑kadika tohare‑mana, kameya, ene kiti ba‑basi re nane.” Mai ati namaroni, mai ibi basanaro.

³²Mai ati‑ya fariseo mai mita, mai yawa, fariseo mai toha, Deoso‑ka yama‑bone‑ya mai da‑daa mai‑ka hidi mai toha, mai na, sekorasa mai‑ya mai yosemaroni, Yeso‑ya mai waratonabonehe.

³³Yeso ati yanane,

“Dai tabaro‑ya owa amoni damamaraboneni. Owa‑ya yose‑mari‑ya okomaboneni.

³⁴Owa dai sibaniya, owa dai awami awiraboneni. Okomi‑kaya dai tokomakiteraboneni.” Yeso ati nemarine.

³⁵Oda‑ka hidi mai ibi hiyara,

“Ebeni‑kaya tokabamata? Ai tokomakirabone ati neri, oda one Kereko mai tabori‑ya mai wina mai‑ya tokebona, Kereko mai‑ya kanawatoba awane.

³⁶‘Owa dai sibaniya, owa dai awami awiraboneni. Okomi‑kaya dai tokomakiteraboneni.’ Ati ne,

ati oda watorene.” Mai ibi hiyara mai ati namaroni.

³⁷7:37 “Oka faha dai fawahi.” Yeso ati ne, “Owati‑ya dai nofahi.” Ati nematamonane.Feriado‑ka mahi faina tohe, fare amosabote tohe‑ya Yeso mai‑ya hiyaramatase, ati kite,

“Dai bako hokoya, owa‑kaya dai kamahi. Oka faha dai fawahi.

³⁸Deoso‑ka yama hani ati‑nima owati‑ya mai no‑nofa mai atibodi‑ya faha webote yananiya, faha ihi mai abaraboneni.” Yeso ati nemarine.

³⁹Faha webote Yeso ati ne, Deoso‑ka Doni tamine amane. Yeso bofe‑ya wineya, Deoso‑ka Doni oda‑ya sawi awisare, neme‑ya Yeso tokeya, Yeso ati oda no‑nofa Deoso‑ka Doni oda atibodi‑ya sawiwahemarine.

⁴⁰Yeso ati‑ya mai mita,

“Deoso ati‑ya mi‑mita kamebona, fare Yeso amane.” Mai one ati nihi,

⁴¹“Kirisito amane.” Mai one ati nihi,

“Kirisito Karireya‑ya yanareba awane.

⁴²I‑di Dafi tabaro bote, Bere‑kaya Kirisito wadebonane. Dafi‑ka nodi i‑di Kirisito tohebonane. Deoso‑ka yama hani ati teni. Yeso i‑di Kirisito tohi awireba awane.” Mai one ati nihi neni.

⁴³Yeso ati‑ya mai one nofa, Yeso ati‑ya mai one nofarihi nani.

⁴⁴Yeso‑ya mai one waratonabone mai ati na, Yeso‑ya mai waratoni awiramaroni.

⁴⁵Deoso‑ka yobe‑ka sekorasa Yeso‑ya mai waratonabone, hiniya mai wininama,

“Hini yamata ihi Yeso dai kakami awiriti?” Deoso‑ka yama‑bone‑ya mai da‑daa mai‑ka hidi mai toha, fariseo mai toha mai na, mai ati namaroni.

⁴⁶“Yeso ati‑nima mai one ati terani.” Sekorasa mai ati namaroni.

⁴⁷Sekorasa mai‑ya fariseo mai weena,

“Yeso keyehe‑ya hirine, ati dai nofa awini.

⁴⁸Mai‑ka hidi oda toha, Yeso ati‑ya oda one nofaterani.

⁴⁹Mai one dama Mose ati‑ya mai watora, Yeso ati‑ya mai nofabisa, hini mai‑ya mai yokaboneni.” Fariseo mai ati namaroni.

⁵⁰Nikodimo fariseo owa tohe. Hibati‑ya Yeso‑ya tokemarine, Yeso ati‑ya mitebonaha. Fariseo mai one ati‑ya Nikodimo mite, mai‑ya hiyare,

⁵¹“‘Ai owa ati dai miti dai tohi awireya, dai weerayaho.’ Mose‑ka yama hani ati teni.” Nikodimo ati nemarine.

⁵²“Towe amatini. Karireya‑ka mai ati‑nima tiwati neni. Deoso‑ka yama hani tikadikiyahi. Deoso ati‑ya mi‑mita Karireya‑ya yani tamine sawiterene.” Fariseo mai one ati namaroni.

⁵³Mai tabori‑ya mai nafi tokawahamaroni.

Fana towe‑ya Yeso nanahabi nofare

¹Orifera adami‑ya Yeso tokomorosemarine.

²Yama wahabisari‑ya Deoso‑ka yobe‑ya Yeso kamatasemarine. Yeso wai‑ya mai dama mai kamakemaroni. Yeso itarisemarine, mai dama mai‑ya kanawatobonaha.

³Ai owa fadi maki bare‑ya dakora‑ya mai wasemaroni. Mose‑ka yama hani ati‑ya mai ka‑kamina mai toha, fariseo mai toha, mai na, fana‑ya mai kakamake, oda noko‑kaya mai hinawaamaroni.

⁴Yeso‑ya mai hiyara,

“Yeso, fana tiawahi, maki bare‑ya fana dakora‑ya oda owa wasinahone.

⁵Fana haa‑nima mai ihi na

‘Mai dai nanahabahi, yati‑ya.’ Mose‑ka yama hani ati teni.

Hini yamata‑nima tiwati niti?” Mai ati na,

⁶“Fara haa‑nima ai ati niya, Yeso ati tosawariya, Yeso ai weenaboneni.” Mai atibodi ati nineni.

Yeso mai‑ya hiyari awire, hini yehe‑ya siki‑ya nahanomarine.

⁷Fariseo mai ati yananamarimana, Yeso waamise,

“Hehe sibarini, dai owa ene amose hinama tohe yati‑ya hikinari dai hiyahi.” Ati nemarine.

⁸Moinisamatase, siki‑ya nahanomatasemarine.

⁹Yeso ati‑ya mai mita mai yamatonama, mai bo‑botena mai toki dai tohama, mai nafi tokomakemaroni. Yeso fana‑ya fame mai yorotonakosamaroni.

¹⁰Yeso waamisamatase,

“Fai mai‑ya? Tiwa‑ya mai ati nanahabaro, mai nahoneni?” Ati nemarine.

¹¹“Ayo, owa‑ya mai ati nanahaba, mai awimarini.” Fana ati namaroni.

“Tiwa‑ya owati nanahabaharirani. Tikamahi, tiwa ene towe tohamariyahi.” Yeso ati nemarine.

Deoso ati‑nima Yeso ati ne

¹²8:12 Yeso ati ai tokadaba, Deoso tabaro‑ya ai kobonabone, ai ya‑yainaboneni.Mai naha mai‑ya hiyare,

“Bofe‑ka mai‑ka yama wahi‑nima ona ama·oni. Deoso hawine yofi·okaneni. Owati‑ya dai tokadaba yama soki‑ya mai ya‑yaka mai‑nima dai ni awira, yama wahi ihi dai abaraboneni.” Yeso ati nemarine.

¹³“Hini tiwa tamine tihiyarineni. Hini mai tamine‑ya mai hiyara, mai ati oda nofaterani.” Fariseo mai ati namaroni.

¹⁴“Owa tamine ohiyara, sibaraboneni. Keyehe‑ya hiri·oterani. Yana·omaro‑ka yama dai watora, owa‑ta owatobisineni. Oki‑bone‑ka dai watora, owa‑ta owatobisineni.

¹⁵Mai atibodi ati dai mitara, mai ihi manakone dai haateni. Mai ihi manakone haa·orani.

¹⁶Mai ihi manakone haa·ona‑mani, owati sibara neni. Owa hari terani. Owa‑ya yose‑mari oda ati fara kafamateni.

¹⁷Mose‑ka yama hani ati dai nokotonihe, ati dai mitahi,

‘Mai fama, fara mai ati kafamiya, mai ati dai nofahi.’ Mose‑ka yama hani ati neni.” Yeso ati nemarine.

¹⁸“Owa tamine okamina, Okobi owa‑ya yose owa tamine‑ya kaminahari ne.” Yeso ati nemarine.

¹⁹“Ebeni‑kaya abi sawiti?” Mai ati na,

“Owa‑ya dai watora, Okobi‑ya dai watoharirani. Owa‑ya dai wata‑mani, Okobi dai watohare neni.” Yeso ati nemarine.

²⁰Deoso‑ka yobe‑ya yinero weyene wai yowi‑ya Yeso itari, mai‑ya kanawatomarine. Yeso ati‑ya mai mitiya, Yeso‑ya mai waratonabone mai atibodi ati na, Yeso aba‑bona‑ke mahi kobore ene Deoso mai‑ya maakane, Yeso‑ya mai waratoni awiramaroni.

²¹Mai‑ya Yeso hiyaramatase,

“Okaboneni. Owa‑ya dai sibanabone, owa‑ya dai wasi awiraboneni. Dai ene amosara manakone hasini‑ya dai ababoneni. Oki‑kaya dai tokomakiteraboneni.” Yeso ati nemarine.

²²“‘Oki‑kaya dai tokomakiteraboneni.’ Ati ne,

Yeso hini‑ya naboheba awane, yama ai wato awirini.” Oda‑ka hidi mai ati namaroni.

²³“Bofe‑ya dai yana, bofe‑ka dai amani. Neme‑ya yana·obisa, bofe‑ka ohi awirini.

²⁴Dai ene amosara manakone hasini‑ya dai ababone, ona, owa‑ya dai nofariya, dai ene amosara manakone hasini‑ya dai ababisaboneni.” Yeso ati nemarine.

²⁵“Ebeni‑ke amatiniti?” Mai ati namaroni.

“Owati‑maro‑nima oneni.

²⁶Dai ene towe dama toha, owa‑ya yose‑mari ene amose, keyehe‑ya hiriterene. Owa‑ya yose‑mari ati mai dami‑ya okaminabisani.” Yeso ati nemarine.

²⁷Yeso hini Badi tamine‑ya hiyare, ati‑ya mai watoramaroni.

²⁸“Dai‑ka Ayo neme‑ke awa‑ya dai nawaaneya, owa‑ya dai watowahaboneni. Hini owati ihi yama ani·oterani. Okobi hikamini baha, okaminamakitasateni.

²⁹Owa hari terani. Owa‑ya yose‑mari owa‑ya famatene. Okobi yama hinofa‑nima oteni.” Yeso ati nemarine.

Yeso mai‑ya seekanebona

³⁰Yeso hiyare, ati‑ya mai dami nofawahamaroni.

³¹Yeso ati‑ya oda‑ka hidi mai one nofa mai‑ya hiyare,

“Owati dai tokadaba, oka da‑daba yokana dai amani.

³²Ati yokana dai watobona, ati yokana dai‑ya seekanebonane.” Yeso ati nemarine.

³³Mai ati yanana,

“Abaraho‑ka nodi oda amani. Oda‑ya mai kanikaterani. Hini yamata‑nima yama na oda‑ya seekibati?” Mai ati namaroni.

³⁴“Owati amosabote dai mitahi. Mai ihi amosara yama towe mai‑ya kayafa‑nima mai na, yama towe‑ka ka‑kanika mai tohateni.

³⁵Ai owa‑ya hidi kanikeya, abariko dame‑ya daahinamatasatene. Hidi hini bidi‑ya daaterene.

³⁶Deoso Bidi dai‑ya seekaneya, yama towe dai‑ya kayafamaraboneni.

³⁷Abaraho‑ka nodi dai amani. Owati dai nofara, owa‑ya dai ati nanahabani.

³⁸Okobi oda fama, yama owa tamine okaminabisineni. Dai‑ka idi ati‑nima dai teni.” Yeso ati nemarine.

³⁹“Abaraho oda‑ka idi amane.” Mai ati namaroni.

“Abaraho dai‑ka idi tohe‑mana, Abaraho ene‑nima dai ene na neni.

⁴⁰Deoso ati omite, ati okamine, owa‑ya dai nanahababone dai ati na, dai ene‑nima i‑di Abaraho ene rematamonane.

⁴¹Dai‑ka idi yokana ene‑nima dai ene nibisineni.” Yeso ati nemarine.

“Oda‑ka ami maki mai one‑ya mai siwakiterani. I‑di Abaraho‑ka nodi yokana oda amani. Oda‑ka Abi yokana Deoso amane.” Mai ati namaroni.

⁴²“Dai‑ka Abi Deoso tohe‑mana, owa‑ya dai nofa neni. Deoso oda famamaro, dai tabaro‑ya okemaroni. Hiniya oki awira, owa‑ya Deoso yosemarine.

⁴³Owati dai mita, hini yamata ihi owati dai watorihi? Owati dai nofara ihi amani.

⁴⁴Dai‑ka abi yokana Diaboro tohe, dai‑ka abi ati‑nima dai nabone dai ati neni. Diaboro ai‑ya nanahaba tene. Satanasi fara yama yokana‑ya kaminatere, keyehe‑ya hirinibisatene. Satanasi hini atibodi ene keyehe‑ya hirini fawaterene. Satanasi ati‑ya mai tokadaba keyehe‑ya mai hiriteni.

⁴⁵Ati yokana okamine, hiniya keyehe‑ya dai nofabisa, owati dai nofarani.

⁴⁶Owa ene towe dai awineni? Owa ene towe dai awaterani. Owa ene amosa hinama toha, keyehe‑ya hiri·ora, owati dai nofahi.

⁴⁷Deoso‑ka mai toha Deoso ati‑ya mai tokadabateni. Deoso‑ka dai tohara, owati dai watorani.” Yeso ati nemarine.

Yeso‑ya madi towe sawimona

⁴⁸“Samaritano owa amatini. Madi towe tiwa‑ya sawine.” Oda‑ka hidi mai ati namaroni.

⁴⁹“Madi towe owa‑ya sawi awirane. Okobi okahiyara, owa‑ya dai nofarani.

⁵⁰Hini owa‑ya noko·onirani. Okobi owa‑ya nokotonibisatene, owa‑ya mai kahiyarabonehe. Ai ene‑ya Okobi kadikatene.

⁵¹Owati amosabote dai mitahi. Owati‑ya mai tokadaba, mai abateraboneni.” Yeso ati nemarine.

⁵²“Madi towe tiwa‑ya sawibisane. Abaraho abe, Deoso ati‑ya mai mi‑mita‑mete mai abamakemetemoneni. Tiwati‑ya mai tokadaba mai abaterabone tineni.

⁵³Abaraho amosi bi‑bidi ne‑mona tina, amosabote tiwa‑mone tina awineni. Abaraho abe, Deoso ati‑ya mai mi‑mita‑mete mai abamakemetemoneni. Ebeni‑ke amatiniti?” Mai ati namaroni.

⁵⁴“Owa‑ya okahiyara‑mani, owati‑ya dai nofariya, yama sibara neni. Okobi owa‑ya kahiyarabisatene. Okobi dai‑ka Deoso‑mona dai ati teni.

⁵⁵Okobi dai watore, Okobi owatobisineni. Dai watomona dai ati na, keyehe‑ya dai hirinineni. Okobi owatorini ona‑mani, keyehe‑ya hiri·onahare neni. Okobi owato, ati okadabatene.

⁵⁶Bofe‑ya owinabone, owa tamine‑ya dai‑ka idi i‑di Abaraho mite, ya‑yainemarine. Makobote owa‑ya awe, ya‑yainamatasemarine.” Yeso ati nemarine.

⁵⁷“Bote tihara, tika ano 50‑ba wadara, ‘Abaraho oawani.’ Tina, tiwadi awisari‑ya Abaraho abematamonane.” Oda‑ka hidi mai ati namaroni.

⁵⁸“Owati amosabote dai mitahi. I‑di Abaraho‑ba wadare‑ke ama·oni.” Yeso ati nemarine.

⁵⁹Ati‑ya mai mita, mai yawa, yati‑ya mai yabamaroni, Yeso‑ya mai baanabonehe. Yeso hini‑ya kemo, tokemarine.

Noko amosare‑ya Yeso nakitame

¹Maki wade‑ya noko amosare, yama‑ya awaremarine. Yeso oda eyehe yakane, maki oda awa, oda ati yanana,

²“Ayo, ebeni‑ke ene maki yama‑ya awarati? Badi, madi mai na, mai ihi toha, hini ene toha ne awane. Ebeni‑ke ene tohati?” Yeso‑ya oda da‑daba oda ati namaroni.

³“Mai ihi tohi awirini. Deoso ene dai awebona ene maki yama‑ya awaremarine.

⁴Yama tehe‑ya owa‑ya yose‑mari‑ka yama anini ai aninahi. Yama soki kobonabone, yama soki‑ya yama ai anirani, yama ai awararo.

⁵Bofe‑ya owina, dai nafi‑ka yama wahi‑nima oneni, yama dai watabonehe.” Yeso ati nemarine.

⁶Hiyari hawa tohe, wami ime‑ya firone, atabo‑ya maki noko‑ya ketehe, ati yanane,

⁷“Sirowe faha‑ya tikamiya, tiwa noko sokotiyahi.” Yeso ati nemarine.

“Sirowe faha” ai ati‑ka oni “yosene faha” toha, fara‑ya toke, noko‑ya sokone, yama‑ya awawahe, tokomematane.

⁸Maki‑ya hika mai awa,

“Yama‑ya haanemari, fare amanaraniha?” Mai ati nameteni.

⁹“Fare amane.” Mai one ati nihi,

“Bare amane. Yama‑ya aware‑nima nane.” Mai one ati nihi na,

“Fara ama·oni. Yama oawaramaro, oawawahineni.” Maki ati nematane.

¹⁰“Hini yamata ihi yama tiawawahiti?” Mai ati nameteni.

¹¹“Yeso atabo‑ya wamane, owa noko‑ya atabo‑ya hidine, owa‑ya yose, Sirowe faha‑ya owa noko soko·onabone ati ne, Sirowe‑ya owa noko soko oha, yama oawawahani.” Ati nematane.

¹²“Fai‑ra?” Mai ati na,

“Owato awire.” Maki ati nematane.

¹³Maki noko amosawame fariseo mai‑ya mai hiwakamematane.

¹⁴Sabado‑ya Yeso atabo‑ya wamane, maki‑ya nakitamemarine.

¹⁵“Hini yamata ihi yama‑ya tiawawahati?” Fariseo mai ati na,

“Maki atabo‑ya owa noko‑ya hidine, owa noko soko oha, yama oawawahani.” Maki ati nematane.

¹⁶“Maki Deoso‑ka tohare awane, Deoso‑ka mai toha sabado‑ya yama‑ya mai aniterani.” Fariseo mai one ati na,

“Ati kasiro awire awane, ene kite, Deoso hikasomare‑mana, ene kitare nane.” Fariseo mai one ati na, mai ibi weenameteni.

¹⁷Noko amosawame‑ya mai hiyara,

“Tiwa‑ya nakitame hini yamata‑nima tiwatibodi ati niti?” Mai ati na,

“Deoso ati‑ya mi‑mita tohe awane.” Maki ati nematane.

¹⁸“Yama‑ya awaremona ati ne, keyehe‑ya hirine awane.” Oda‑ka hidi mai atibodi ati na,

Badi, madi, mai na, mai‑ya mai haanameteni, mai ati‑ya mai mitabonehe. Badi, madi mai kobona,

¹⁹“Tika dao amanaraniha? Wade, yama‑ya awaremata amane? Hini yamata ihi yama‑ya awawahiti?” Oda‑ka hidi mai ati na,

²⁰“Hehe, oka dao amane. Wade‑ya yama‑ya awaremarine.

²¹Fai‑ya nakitame oda aware, oda wato awire. Oda‑ka ewe madehe tohamare, dai haanaho. Hini tamine‑ya kaminabisebonane.” Badi, madi mai na mai ati nameteni.

²²Oda‑ka hidi mai‑ya mai nayofinameteni. Hibati‑ya oda‑ka hidi mai ati yanana,

“Yeso i‑di Deoso‑ka Ka‑kadika‑mona mai one ati na, Deoso‑ya mai hi‑hiyara‑ke yobe‑ya mai tokiyomamaraboneni.” Oda‑ka hidi mai ati nameteni.

²³Mai ati tamine‑ya badi mai mita, mai kakomehe,

“Oda‑ka ewe madehe tohamare, dai haanaho.” Mai ati nameteni.

²⁴Mai haahinamatase, kameya, mai hiyara,

“Maki ati kasiro oda watoneni. Deoso tinofiya, maki tinofaraboneni. Tiwati oda mitaboneni.” Mai ati nameteni.

²⁵“Maki ati kasiro awane, yama owato awirini. Hibati‑ya yama oawaramaro; yama oawawaha, fara owatobisineni.” Ati nematane.

²⁶“Hini yamata‑nima ene nati, tiwa‑ya nakitameri?” Mai ati nameteni.

²⁷“Dai‑ya ohiyara, owati dai nofara, hini yamata‑bone owa‑ya dai haanamatasihi? Maki ati‑ya dai tokadabaharibaraniha?” Ati nematane.

²⁸Maki kitame‑ya mai weena,

“Towe amatini. Maki ati tikadaba, i‑di Mose ati oda tokadababisateni.” Mai ati nameteni.

²⁹“Mose‑ya Deoso hiyaremata oda watoneni. Ebeni‑kaya maki kakiti? Maki tamine oda wato awirini.” Mai ati nameteni.

³⁰“Se! Maki kaki tamine dai watore, owa‑ya nakitame dai aware awane.

³¹Deoso ati‑ya mai tokadabara mai ati‑ya Deoso mitaterene. Deoso ati‑ya mai nofa, ati mai hikadaba hine mai ati‑ya Deoso mitabisatene.

³²Hibati‑ya maki noko wadaremata‑ya ai owa nakitame tamine wadaterene.

³³Deoso‑ka tohare‑mana, owa noko‑ya kasomare nane.” Maki kitame ati nematane.

³⁴“Tiwadi awisari‑ya tiwa ene amosaramaro, towe amatini. Oda‑ya tikanawatoraboneni. Tikahi. Deoso‑ya oda hi‑hiyara‑ke yobe‑ya tikamakiriyahi.” Mai ati nameteni.

³⁵Maki kitame mai‑ya sawimarebona mai ati na, mai ati tamine‑ya Yeso mite, tokomaki, hiwasi,

“Dai‑ka Ayo neme‑ke ati tinofiraniha?” Yeso ati nemarine.

³⁶“Ebeni‑ke ai‑ka Ayo tohati, ati onofebonaha?” Kitame ati nemarine.

³⁷“Hibayata dai‑ka Ayo tiawane. Fara dai‑ka Ayo ama·oni.” Yeso ati nemarine.

³⁸Yeso‑ya kahiyare,

“Ayo, tiwa onofa, tiwati onofahari neni.” Ati nemarine.

³⁹“Bofe‑ya okemaroni, dai nafi ene okadikabonehe. Yama‑ya mai awaramaro, yama‑ya mai awawahaboneni. Yama‑ya mai ati awamaro, yama‑ya mai awami awiraboneni.” Yeso ati nemarine.

⁴⁰Fariseo mai one Yeso ati‑ya mai mita, mai ati yanana,

“Yama oda awaramone tineni?” Mai ati namaroni.

⁴¹“Yama‑ya dai awara‑mani, dai ene manakone wadara neni. Yama dai awabisamone dai ati na, dai ene manakone wadanasa neni.” Yeso ati nemarine.

Kaneiro hidi i‑di Yeso amane

¹Yeso mai‑ya kanawatobona mai‑ya hiyare,

“Owati amosabote dai mitahi. Kaneiro mai‑ya mai botebone, awa yara neme‑kaya mai tokiyomateni, kaneiro mai‑ka hidi mai‑ya awarebonaha.

²Kaneiro mai‑ka hidi awa yara nokobiri‑kaya tokiyomabisatene.

³Kaneiro mai nokobiri‑ya wa‑waa kaneiro mai‑ka hidi‑ya awe, nokobi‑ya seekane, mai‑ka hidi yananeya, kaneiro mai oni‑ya mai‑ka hidi haaneya, hidi‑ya mai tokomakiteni.

⁴Mai nafi fidotona, mai‑ka hidi dai tohe, nowati‑ya mai tokomakiteni, mai‑ka hidi ati‑ya mai wataro.

⁵Bara mai‑ya kaneiro mai tokomakiterani. Bara mai ati‑ya mai watora, mai kananibisateni.” Yeso ati nemarine.

⁶Kaneiro mai tamine‑ya Yeso hiyare, ati‑ya mai watoramaroni.

⁷Yama‑ya mai watowahabone, mai‑ya hiyaramatase,

“Owati amosabote dai mitahi. Kaneiro mai‑ka awa yara nokobiri ama·oni.

⁸Hibati‑ya mai kobona yama‑ya mai bo‑boti mai toha, kaneiro mai‑ya mai haana, mai ati‑ya kaneiro mai nofarameteni.

⁹Awa yara nokobiri ama·oni. Owa‑kaya mai tokiyomiya, mai sibaraboneni. Mai yobiniya, mai tafaboneni.

¹⁰Yama‑ya mai bo‑boti kaneiro mai tabori‑ya mai kakiya,

‘Awa yara bai onahabiya, kaneiro o·idiya, kaneiro onahababoneni.’ Mai atibodi ati teni.

Kaneiro mai abarabone, mai tabori‑ya okemaroni. Mai ya‑yaini nafebone, mai tabori‑ya okemaroni.

¹¹Kaneiro mai‑ka hidi amosabote ama·oni. Oka kaneiro mai abarabone, o·ababisiya, yama sibaraboneni.” Yeso ati nemarine.

¹²Ai owa‑ka kaneiro mai‑ya ai owa nawade, kaneiro hidi tohare, yomahi yama‑ke kaneiro mai‑ya kakiya, kaneiro mai‑ya nawade kananeya, yomahi yama‑ke kaneiro mai‑ya kananihi, mai fawateni.

¹³Hika yama anini manakone‑ya nokotonibise, kaneiro mai‑ya nofare, bani hame koboneya, kanatene.

¹⁴Kaneiro mai‑ka hidi amosabote ama·oni. Oka kaneiro mai owato, owa‑ya mai watohari nineni.

¹⁵Okobi owato, owa‑ya watohari ne. O·ababisaboneni, oka mai hasinabonehe.

¹⁶Mai tabori one‑ya oka kaneiro mai one toha, mai onakamaboneni. Owati‑ya mai mitaboneni. Oka kaneiro mai one‑ya mai yoro·okanihebone, mai‑ya na‑nawada owa hare boneni.

¹⁷O·abiya, yama sibarini, okitamatasabone ona, fara ihi Okobi owa‑ya nofi nafine.

¹⁸Owa‑ya mai ati nanahaba, mai‑ya owati bariraboneni. Mai‑ya owati bariniya, owa‑ya mai nanahabi awiraboneni. Owati aba, o·aba, owati kitama, okitama onaboneni. Okobi ati‑nima owa ene naboneni.” Yeso ati nemarine.

¹⁹Yeso ati‑ya oda‑ka hidi mai mita, mai ibi weenamatasa,

²⁰“Yeso ka‑kana amane. Madi towe foye ene ati amane. Ati dai nofarayaho.” Mai one ati nihi,

²¹“Madi towe sawi‑ke haa‑nima ai ene terani. Madi towe ai owa noko‑ya kasomaterene.” Mai one ati nihi namaroni.

Deoso ama·oni Yeso ati ne

²²Deoso‑ka yobe awawami hawa tohemata tamine‑ya oda kadikabone, Yerosare‑ya oda marinamaroni.

²³Sire bofe‑ya oda marinamaroni. Deoso‑ka yobe‑ya Yeso yakane, yobe webote fowari‑ya Saromaho‑ka yobe waari, fare‑ya Yeso yakanemarine.

²⁴Yeso ati‑ya oda‑ka hidi mai mitabone, mai yorotokana,

“Yeso, tiwati amosahi. Deoso‑ka Ka‑kadika amatini, tiwa tamine oda‑ya tikaminahi.” Mai ati namaroni.

²⁵“Hibati‑ya owa tamine‑ya dai‑ya okamina, owati dai nofarani. Owa ene kitabote dai awakarini? Okobi ene owa ene kitabote tohani.

²⁶Oka kaneiro dai tohara ihi owati dai nofarani.

²⁷Oka kaneiro mai owatoni. Owati‑ya mai nofa, owa‑ya mai tokomakiteni.

²⁸10:28 “Mai hasinabone” yama hani ati na, Deoso tabaro‑ya mai ya‑yaini fawaterabone tamine amani.Owa ene oka mai hasinabone, mai abateraboneni. Owa yehe doro‑ya oka mai onawada, mai‑ya mai kahiditeraboneni.

²⁹10:28-29 Deoso, Yeso mai yahi dori‑ya ai toha yama hani ati na, ai‑ya mai kayawa tamine amani.Owa‑ya Okobi mai‑ya daane. Okobi kitabote amane. Mai one kitaterani, Okobi yehe doro‑ya mai toha, mai‑ya mai kahiditerani.

³⁰Okobi oda oharineni.” Yeso ati nemarine.

³¹Yeso ati‑ya oda‑ka hidi mai mita, yati‑ya mai one yabamaroni, Yeso‑ya mai nanahababonehe.

³²“Deoso ene owa ene amosa, owa ene kitabote amani. Owa ene dai awamaro, owa‑ya dai ati nanahabi‑ka dai yofikanahi.” Yeso ati nemarine.

³³“Tiwa ene amosa sibarini. Oda owa amatini. ‘Deoso ama·oni.’ Tina, hini tiwati ihi tiwa oda nanahababoneni, yati‑ya.” Mai ati namaroni.

³⁴“‘Deoso dai‑mone oneni.’ Deoso‑ka yama hani ati na,

³⁵Deoso‑ka yama hani keyehe‑ya hiriterani. Bofe‑ka mai‑ya Deoso hiyaremata, deoso dai‑mone Deoso ati nematamonane.

³⁶Okobi owa‑ya kayawe, owa‑ya yosemarine, bofe‑ya okebonehe.

‘Deoso Bidi ama·oni.’ Ona.

Owati kasiramone dai ati neni, dai yawaro. Hini yamata ihi dai yawiti?

³⁷Deoso ene‑nima owa ene ra‑mani, owati dai nofariya, yama sibara neni.

³⁸Deoso ene‑nima owa ene nibisa, owati dai nofara, owa ene dai nofabisahi. Okobi oda famateni. Owa ene dai nofiya, Okobi oda‑ya dai watowahaboneni.” Yeso ati nemarine.

³⁹Yeso‑ya mai watabone, hiniya Yeso tokemarine.

⁴⁰Yodaho Faha‑ya Yeso berenawahe, hibati‑ya i‑di Yowaho mai‑ya habanirisa‑mari‑kaya toke, winawahemarine.

⁴¹Yeso‑ya mai dama mai kamake,

“Yowaho Batita ene kitare, Yeso tamine‑ya hiyare, fare ati‑nima Yeso nane.” Mai ati namaroni.

⁴²Yeso ati‑ya mai dama mai nofawahamaroni.

Rasaro‑ya Yeso nakitame

¹Betaniya‑kaya Rasaro hika adi mai fama mai eyehe winemarine. Rasaro‑ka adi oni i‑di Maata toha, one oni i‑di Mariya toha namaroni. Rasaro kiyane, kaforimatane.

²Hibati‑ya Rasaro‑ka adi i‑di Mariya Yeso‑ya yama mahi amosa‑ya sorokasa, hini tati kone‑ya Yeso teme‑ya tamonamaroni.

³Rasaro‑ka adi mai fama, mai‑ka da‑daba‑ya mai yose,

“Yeso sibatinahi. Tiwasiya, eya tiyahi.

‘Ayo, tinofi nafi kiyanene.’ Tiyahi.” Mai ati nameteni.

⁴Rasaro tamine‑ya Yeso mite,

“Rasaro hasinebonane. Rasaro kiyane ene Deoso ene amose‑ya mai awa, Deoso Bidi ene amose‑ya mai awahari naboneni.” Yeso ati nemarine.

⁵I‑di Maata, i‑di Mariya, i‑di Rasaro, mai na, Yeso mai‑ya nofi nafimarine.

⁶Rasaro kiyane tamine‑ya Yeso mite, tokomaki kanibote ni awiremarine. Oda wini‑kaya oda amoni famamakemaroni.

⁷Makobote Yeso‑ya oda da‑daba oda‑ya hiyare,

“Yodeya‑ya ai tokahi.” Ati nemarine.

⁸“Ayo, tiwa amoni fa‑famaraba niya, ai‑ka hidi tiwa‑ya mai ati nanahaba, Yodeya‑ya tikamariyahi.” Oda ati namaroni.

⁹11:9 Mahi wehene‑nima Yeso ne, Yeso ati mai nofa Deoso hawine mai watowahani. Yeso‑ka yama anini hawa tohi awisara, Yeso‑ya mai nanahabi awiraboneni. “Mahi ohari‑ka ora 12 toha tene.” Yeso ati ne, sa‑sawi‑ka amoni tosiyore tamine amane.“Yama tehe‑ya ai yakana, ai sonaterani. Mahi wehene‑ya ai yakana, ai sibaraboneni. Mahi ohari‑ka ora 12 toha tene.

¹⁰Yama soki‑ya ai yakana, ai sonateni, yama wahi awiraro.” Yeso ati nemarine.

¹¹“Ai‑ka naki, i‑di Rasaro amone, mowa·okanabone okomakeboneni.” Yeso ati nemarine.

¹²“Ayo, Rasaro amone, kitameba awane.” Oda ati namaroni.

¹³Rasaro abe tamine‑ya Yeso hiyare, ati oda watoramaroni.

¹⁴Tamine hikamini amosawahe,

“Rasaro abane.” Yeso ati nemarine.

¹⁵“Rasaro abe ene owa ene dai awabone, owati dai nofabone, fara ya‑yai·oneni. Hima, ai tokomakihi.” Yeso ati nemarine.

¹⁶“Yeso ai dabahi. Yeso abeya, ai abahareboneni.” I‑di Tome ati nemarine.

Tome oni owa i‑di Didimo tohane.

¹⁷Rasaro wini‑kaya oda tokawaha, yama yakari‑ya tamine Yeso himite,

“Rasaro oda nafoye mahi 4 kanane.” Mai ati namaroni.

¹⁸Yerosare yakari‑ya Betaniya toha, 3 kirometoro tohani.

¹⁹Yerosare‑ya mai wi‑wina mai one dama mai tokomakemaroni, i‑di Maata, i‑di Mariya, mai fama, mai‑ya mai kasomabone mai‑ka soho tabiyo mai ohinaro.

²⁰Yeso kaki tamine‑ya i‑di Maata mita, tokamaroni. Mariya‑ta yobe‑ya towitakosameteni.

²¹Yeso‑ya Maata hiyara,

“Ayo, oda tabaro‑ya tisawe‑mani, oka soho abare nane.

²²Deoso haatiniya, tiwati‑nima Deoso nebonane.” Maata ati namaroni.

²³“Tika soho kitamebonane.” Yeso ati nemarine.

²⁴“Hehe, yama faina‑bone‑ya ai kitamiya, oka soho kitamaharibonane.” Maata ati namaroni.

²⁵11:25 “Mai abaraboneni.” Yama hani ati na, Deoso tabaro‑ya mai ya‑yainabone tamine amani.“Mai‑ya na‑nakitama ama·oni. Ai abarabone‑ka yama da‑daa ama·oni. Owati‑ya mai nofa owa ene mai abarabone, mai abano abiya, mai abaraboneni.

²⁶Owati‑ya mai no‑nofa yama kome fawaterabone‑kaya mai sawiteraboneni. Maata, owati tinofiraniha?” Yeso ati nemarine.

²⁷“Hehe, Deoso‑ka Ka‑kadika amatini. Deoso Bidi bofe‑ya kakibona, yama hani ati na, fara amatini.” Maata ati namaroni.

²⁸Hiyari hawa toha, hika yobe‑ya tokiyama, hika asima i‑di Mariya‑ya hiyara,

“Ai‑ya ka‑kanawato‑teno kobone, tiwa‑ya haanene.” I‑di Maata ati nameteni, basanaro.

²⁹Hika adi ati‑ya mita, waamisa kanibote na, tokomamaroni, Yeso‑ya.

³⁰Mai tabori‑ya Yeso tokomaki awire, hini i‑di Maata kobohine‑ya itarimarine.

³¹Mariya‑kaya mai one nahamaroni, Mariya‑ya mai kasomabonehe. Mariya waamisa kanibote na, tokoma‑ya mai awa, mai tokomake,

“Yati hodi‑ya tokomiya, ohinaboneni.” Mai atibodi ati namaroni.

³²Yeso itari‑ya Mariya kobona, Yeso yowi‑ya yobati‑kaya itarisa,

“Ayo, ahi‑ya tisawe‑mani, oka soho abare nane.” Mariya ati namaroni.

³³Mariya ohina‑ya Yeso awe, mai one ohina kamake‑ya awa ne, atibodi a‑arire,

³⁴“Ebeni‑kaya Rasaro foyati?” Yeso ati ne,

“Ayo, tikamakihi, tiwa oda yofikanabani.” Mai ati namaroni.

³⁵Yeso tokomaki, ohinemarine.

³⁶“Rasaro‑ya nofi nafi dai awaho.” Oda‑ka hidi mai one ati nihi.

³⁷“Maki noko‑ya kasome, Rasaro‑ya kasome‑mana, Rasaro abare nane.” Mai one ati nihi namaroni.

³⁸Rasaro temene‑ya Yeso kobone, atibodi a‑ariremarine. Yati one‑ya hodi‑ya mai barikanamaroni.

³⁹“Yati dai karotowitihi.” Yeso ati nemarine.

“Ayo, maho kite awane, mahi 4 kane‑ya abene.” Rasaro‑ka adi i‑di Maata ati namaroni.

⁴⁰“Owati timitara awineni. Owati tinofa, Deoso ene kitabote tiawabone onani.” Yeso ati nemarine.

⁴¹Yati‑ya mai karotowite, Yeso tonokomise, ati yanane,

“Abi, owati timita, ya‑yai·oneni.

⁴²Owati timitateni. Yama‑ya mai watobone‑ka owati amani. Owa tiyosemaro, owa‑ya mai watowahaboneni.” Yeso ati nemarine.

⁴³I‑di Rasaro‑ya haane, ati kite,

“Rasaro tikamahi.” Ati nemarine.

⁴⁴Rasaro kitame, kamemarine. Bora yaba‑ya kinikane, yehe, teme, tati ne, bora‑ya kinikananasa ne, kamemarine.

“Dai kakasawaho, tabaro‑ya tokomebonaha.” Yeso ati nemarine.

Yeso‑ya mai ati nanahababone

⁴⁵Mariya‑ya mai kasomabone mai ati na, mai kamake, Yeso ene‑ya mai awa, Yeso ati‑ya mai nofawahamaroni.

⁴⁶Mai one fariseo mai‑ya mai toka, Yeso ene tamine‑ya mai kaminameteni.

⁴⁷Makobote Deoso‑ka yama‑bone‑ya mai da‑daa mai‑ka hidi mai toha, fariseo mai toha, mai na, oda‑ka hidi mai nafi‑ya haane, mai yorotokanameteni, Yeso tamine‑ya mai hiyarabonehe.

“Hini yamata‑nima ai nibati? Yeso ene kitabote‑ya mai dama mai awineni.

⁴⁸Yeso‑ya ai ati barini awiriya, Yeso ati‑ya mai nafi nofawahiya, homano mai‑ka sodado mai kamakiya, Deoso‑ka yobe‑ya mai nanahaba, ai nafi‑ya mai nanahaba naba awineni.” Mai ati nameteni.

⁴⁹Mai‑ka owa Deoso‑ka yama‑bone‑ya mai da‑daa mai‑ka hidi webote i‑di Kaifo ati yanane,

“Yama dai wato awirini.

⁵⁰Ai‑ka mai one dama hidi mai tohara, fara mai nafi abarabone mai‑ka owa ohari abeya, yama sibaraboneni. Ohari abeya, ai dama ai hasinaboneni.” Kaifo ati nemarine.

⁵¹Hini ati tohi awirene. Deoso‑ka yama‑bone‑ya mai da‑daa mai‑ka hidi webote tohe, Deoso ati ene ati yananibisemarine. Yodeo oda toha, oda manakone‑ya Yeso nanahabebona tamine‑ya hiyaremarine.

⁵²Yodeo oda manakone‑ya nanahaba, Bara mai manakone‑ya nanahabahari nebonane. Deoso‑ka mai toha, mai nafi‑ya ohariwamebonane.

⁵³Oda‑ka hidi Yeso‑ya mai ati nanahabarimanamaroni.

⁵⁴Mai noki‑kaya Yeso tokomare, Eferahi‑ya Yeso‑ya oda da‑daba oda eyehe winemarine. Kabani yakari‑ya Eferahi tohamaroni.

⁵⁵Ka‑kariwa‑ka mahi koboni yanatoneya, tabora bide dama‑ka Yerosare‑ya mai tokomakemaroni, Mose‑ka yama hani ati‑nima yama‑ya mai hawa tonihebonehe.

⁵⁶Yeso‑ya mai sibana, Deoso‑ka yobe‑ya mai naha mai ibi hiyara,

“Ai mariniya, Yeso koboreba awane, hini yamata‑nima dai ati niti?” Mai ati nameteni.

⁵⁷Deoso‑ka yama‑bone‑ya mai da‑daa mai‑ka hidi mai toha, fariseo mai toha, mai na, Yeso tamine‑ya mai hiyara,

“Yeso dai awiya, tamine dai kaminaho, oda‑ya, oda watebonaha.” Mai ati nameteni.

Yama mahi amosa‑ya Mariya sorokasa

¹Oda amoni 6 tohiya Ka‑kariwa‑ya oda marinabone, Betaniya‑ya Yeso oda eyehe tokemarine, Rasaro‑ya nakitame‑kaya.

²Yeso kobone ene mai ya‑yaina, mai yorotokanamaroni, mai tafabonehe. Rasaro oda eyehe tafemarine. Oda tefe‑bone‑ya Maata isonamaroni.

³Yeso teme‑ya yama mahi amosa‑ya Mariya sorokaremaroni. Yama mahi amosa oni narado toha, manakone fotamaroni. Keneko kari kibe‑nima yama mahi amosa na‑ya Yeso teme‑ya sorokare, tati kone‑ya Yeso teme‑ya tamonamaroni. Yobe nafi‑ya mahi amosa mahi mai hisihinamaroni.

⁴Yeso‑ya oda da‑daba oda‑ka owa Yeso‑ya daanebona, i‑di Yoda Isikari·oti amane. Fare Mariya ihi‑ya awe, yawemarine.

⁵“Ka! Yama mahi amosa ai daana‑mani, yama sibabisara neni. Mahi amosa ai daana‑mani, yama ai anini mahi 300 kane‑ka manakone‑nima manakone na manakone ai kayafiya, mai‑ka yamata wadara mai‑ya yinero ai daana neni.” Yoda ati nemarine.

⁶Yoda yama‑ya bo‑boti amane. Oda‑ka yinero‑ya Yoda damane, oda‑ka yinero kote‑ya botimarine. Yama mahi amosa‑ya ati daane, hiniya yinero‑ya atibodi kayafabisemarine, mai one‑ya kasomi awirebonane.

⁷“Yoda, tiwati arabanahi. O·ababone, owa‑ya mai nafoyabone, owa‑ya sorokari hawa tohineni.

⁸Yamata mai kihara mai tosiyoteraboneni. Owa sawi yaboraboneni.” Yeso ati nemarine.

⁹Betaniya‑ya Yeso koboni tamine‑ya oda one mai mita, mai dama mai tokomakemaroni, Yeso‑ya mai awa, i‑di Rasaro‑ya mai awahari nabonehe.

“Rasaro abe, Yeso hinakitame ai awamatahi.” Mai atibodi ati namaroni.

^10-11Rasaro‑ya mai awa, Yeso ati‑ya mai dama mai nofawahamaroni. Deoso‑ka yama‑bone‑ya mai da‑daa mai‑ka hidi i‑di Rasaro‑ya mai ati nanahabaharemaroni.

Yeso‑ya mai dami kahiyara

¹²Ka‑kariwa ihi Yerosare‑ya mai dama mai nahamaroni. Mahi owa‑ya Yerosare‑ya Yeso toke, tamine‑ya mai dami mita,

¹³mai tokomake, kosi afe‑ya mai akamaroni.

“Deoso ai kahiyarineni. Deoso tiwa‑ya yose, tiwa‑ya kasomayaho oda ati nineni. Isara·eo oda‑ka hidi webote amatini.” Mai ati na, mai ati kitamaroni.

¹⁴Deoso‑ka yama hani ati‑nima boho yetene‑ya Yeso wasi, boho mese‑ya itarimarine.

¹⁵“Yerosare‑ya dai wi‑wina dai habo siitoriyahi. Dai‑ka hidi webote‑bona boho yetene mese‑ya itariya, kamakibonane.” Deoso‑ka yama hani ati nineni.

¹⁶Yama hani ati‑ya oda ati kadamowamamaroni. Yama hani ati oda wato kanibote ra, Yeso kitami hawa toheya, yama hani ati oda watowahamaroni.

¹⁷Rasaro‑ya Yeso nakitame‑ya mai awa, Yeso‑ya mai tokomake, Yeso tamine‑ya mai hiyaranademaroni.

¹⁸Yeso ene kitabote tamine‑ya mai mita, Yeso‑ya mai tokomakemaroni, Yeso‑ya mai awabonehe.

¹⁹Mai dami‑ya fariseo mai awa, mai ibi hiyara,

“Ka! Yeso ai ati barinabone ai ati na, ai ati barihini awire, Yeso‑ya mai dami tokomake, mai dai awahi.” Fariseo mai ati namaroni.

²⁰Yerosare‑ya Yodeo oda marinabone, Kereko mai one sawemaroni, Deoso‑ya mai kahiyarabonehe.

²¹Firibi‑ya Kereko mai toka,

“Naki, Yeso oda hiyaraboneni.” Mai ati nameteni.

Firibi tabaro Besaida Karireya‑ka tohemarine.

²²Anidere‑ya Firibi hiyare, Firibi eyehe Anidere toke, Kereko mai tamine‑ya Yeso‑ya mai kaminamaroni.

²³12:23 “Owa ene amosabote‑ya mai awaboneni.” Yeso ati ne, hini abebona tamine‑ya hiyarematamonane.“Dai‑ka Ayo neme‑ke ama·oni. Owa ene amosabote‑ya mai awaboneni. Fara yama kobo kanibote naboneni.

²⁴12:24 Yeso hini tamine‑ya kamine, Yeso abe, kitameya, hika mai dodamawahaboneni.Owati amosabote dai mitahi. Ahosi‑nima na noki ai kamara, dodamaterani. Noki ohare wami‑ya ai kama, noki abiya, yana, noki dodamateni.

²⁵12:25 “Dai abaterabone” yama hani ati na, Deoso tabaro‑ya dai ya‑yaini fawaterabone tamine amane.Dai abarabone dai ati na, owati‑ya dai tokadabara, dai ohinaboneni.

‘O·abi‑ya yama sibarini.’ Dai ati nibisa,

dai abateraboneni.

²⁶Owa‑ya dai narifabone dai ati na, owa ene‑nima dai ene nahi. Owa‑ya dai narifa osawi‑kaya dai sawebone, Okobi dai‑ya kahiyarebonane.” Yeso ati nemarine.

²⁷“Owatibodi a‑arira,

‘Abi, owa tikasomahi, o·abaraboneni.’ Oni awirani, hini o·ababone okemaroni.

²⁸Abi, tiwa ene amosabote‑ya mai awahi.” Yeso ati ne,

neme‑ya ati kaki,

“Owa ene amosabote‑ya mai awamaro, owa ene amosabote‑ya mai awamatasaboneni.” Neme‑ke ati nemarine.

²⁹Mai dama mai naha, neme‑ya ati mai himite,

“Bahi ati amanakani.” Mai one ati nihi,

“Deoso‑ka yo‑yose Yeso‑ya hiyare awane.” Mai one ati nihi namaroni.

³⁰“Ati omitebona ati tohi awirane. Ati dai mitebona ati yananibisane.” Yeso ati nemarine.

³¹12:31 Bofe‑ke mai‑ka hidi i‑di Satanasi amane.“Hibayata bofe‑ke mai ene Deoso kadikebonane. Hibayata bofe‑ke mai‑ka hidi‑ya Deoso kananebonane.

³²Owa‑ya mai nawaaniya, mai nafi haa·onabone, oka mai tohawahabonehe.” Yeso ati nemarine.

³³Awa‑ya Yeso abebona hini tamine‑ya kaminane.

³⁴Mai dama, mai one ati yanana,

“Deoso‑ka Ka‑kadika koboneya, hidi tohatebona Deoso‑ka yama hani ati na, hini yamata‑nima ai‑ka Ayo neme‑ke mai nawaanabone tina, hini yamata‑nima ai‑ka Ayo neme‑ke tohati?” Mai ati namaroni.

³⁵12:35 Yeso hini tamine‑ya hiyare, bofe‑ya sawisa ne, ati dai tokadabahi.“Dai amoni fa‑famaraba niya, dai tabaro‑ya yama wahi tohasa naboneni. Yama wahi tohasa ni‑ya dai yakanahi. Yama soki kobonaboneni. Yama soki‑ya mai ya‑yaka mai toki‑ka yama‑ya mai watorani.

³⁶Yama wahi tohasa na dai nofahi. Yama wahi dai nofiya, yama wahi‑nima dai naboneni.” Yeso ati nemarine.

Hiyari hawa tohe, tokome, hini‑ya kemomarine.

³⁷Yeso ene kitabote‑ya mai awi dama, Yeso ati‑ya mai nofasa ramaroni.

³⁸Mai tamine‑ya Isa·iya kanahano,

“Deoso, tiwati okamina, ai ati‑ya mai nofarani. Tiwa ene kitabote mai‑ya yofi·okana, tiwa ene‑ya mai nofi awisarani.” Isa·iya ati nematamonane.

Haa‑nima mai teni.

³⁹Deoso ati‑ya mai nofaterabone, mai tamine‑ya Isa·iya kanahanomatamonane.

⁴⁰“Yama‑ya mai awa, Deoso hini ati ene yama‑ya mai watora, tamine mai himite, Deoso hini ati ene tamine mai hiwatorane. Mai ihi‑maro‑nima mai ihi namariya, mai‑ya Deoso kasomane.” Isa·iya ati nematamonane.

⁴¹Hibati‑ya Yeso amosabote‑ya Isa·iya awe, Yeso tamine‑ya kanahanomatamonane.

⁴²Yeso ati‑ya mai dami nofa, Yeso ati‑ya oda‑ka hidi mai dama mai nofahare, hini mai tamine‑ya mai kamini awirani.

“Oda tamine‑ya oda kaminiya, fariseo oda‑ya mai kakoya, Deoso‑ya mai hi‑hiyara‑ke yobe‑ya oda sawimaraboneni.” Mai atibodi ati namaroni.

⁴³Ai one ati‑ya mai nofi ba‑basi na, Deoso ati‑ya mai nofi bi‑bidi neni.

⁴⁴Yeso ati yanane, ati kite,

“Owati‑ya mai no‑nofa owa‑ya yose‑mari ati‑ya mai nofaharineni.

⁴⁵Owa‑ya dai awa, owa‑ya yose‑mari dai awahari neni.

⁴⁶Yama wahi‑nima oneni. Owati‑ya mai no‑nofa yama soki‑ya mai yakanamarabone ihi okemaroni.

⁴⁷Owati‑ya mai mita, owati‑ya mai tokadabara, mai‑ya wee·orani. Mai nafi okasomabone, okemaroni.

⁴⁸Owa‑ya mai nofara, owati‑ya mai nofaharira, mai ihi manakone wada, yama faina‑bone koboniya, hini mai ihi manakone‑ya mai kayafaboneni.

⁴⁹Owati yanana, owa ene owati yanarani. Okobi owa‑ya yose‑mari ati okaminabisineni.

⁵⁰Okobi ati‑ya dai tokadaba dai abateraboneni. Okobi ati okamine, dai abarabonehe.” Yeso ati nemarine.

Bofe‑kaya Yeso marini faina

¹Yeso bofe‑ya sawimarebona, Badi‑ya tokoma kanibote nebona, hini tamine‑ya watomarine. Bofe‑ya oda wi‑wina Yeso‑ka oda toha, oda‑ya Yeso nofemari, oda‑ya nofi fawaterene. Ka‑kariwa‑ya oda marinabone, oda tafi yanatonamaroni.

²Simaho Isikari·oti bidi i‑di Yoda, Diaboro ati ene Yeso‑ya daanebona, atibodi hawa tohe, mesa‑ya oda nahori hawa tohamaroni.

³“Okobi ati ene yama nafi‑ka hidi ama·oni. Deoso‑ya yana·onamaro, okoma kanibote onaboneni.” Yeso atibodi ati nemarine.

⁴Oda tafiya, Yeso waamise, bora neme‑ya taninise, towaya‑ya idi, dosi‑ya sokinakimarine.

⁵Faha wiye‑ya faha‑ya soronise, oda teme‑ya sokone, towaya‑ya oda teme‑ya tamonemarine.

⁶Simaho Bedoro teme‑ya sokonebona,

“Ayo, owa teme sokotibana?” Bedoro ati ne,

⁷“Hehe, soko·onaboneni. Owa ene tiwatora, yama one‑ya owa ene tiwatowahaboneni.” Yeso ati nemarine.

⁸“Owa teme sokotiraboneni.” Bedoro ati ne,

“Tiwa teme soko·oriya, oka tiharaboneni.” Yeso ati nemarine.

⁹“Se, Ayo, owa teme, owa yehe, owa tati na sokotinahi.” Simaho Bedoro ati nemarine.

¹⁰“Ai afini hawa toha, ai‑ka yobe‑ya ai kama, ai teme ai sokokawama, ai afinamarani. Dai atibodi amosi hawa toha, dai‑ka owa atibodi amosi awirane.” Yeso ati nemarine.

¹¹Yoda ene‑bona‑ya wato, fare oda owa atibodi amosi awire tamine‑ya kaminemarine.

¹²Oda teme‑ya sokoni hawa tohe, bora neme‑ya weyename, hini fori‑kaya toforime,

“Dai teme soko·ona, owa ene dai watoneni?

¹³Owa‑ya dai ayo nineni. Dai‑ya ka‑kanawato owa‑mone dai ati na, dai ati‑nima oneni.

¹⁴Dai‑ya okanawata, dai‑ka Ayo ama·oni. Dai teme soko·oni‑nima dai ibi teme sokoniyahi.

¹⁵Owa ene‑nima dai ene niyahi.

¹⁶Owati amosabote dai mitahi. Ai‑ka hidi ati kitabise, ai ati kiti bi‑bidi teni. Ai‑ya yose ati kitabise, ai ati kiti bi‑bidi teni.

¹⁷Owati dai watoya, dai tokadabiya, dai ya‑yainaboneni.

¹⁸Dai nafi tamine ohiyari awirini. Dai‑ya okayawa, dai owatoni. Deoso‑ka yama hani ati‑nima yama naboneni.

‘Owa tefe‑ya ka‑kaba owa‑ya kahabanebonane.’ Yama hani ati nineni.

¹⁹Owa‑ya daani awisareya, tamine okamine, owa‑ya daaneya, owa‑ya dai watowahaboneni. Deoso‑ka Ka‑kadika ama·oni, owati dai nofaboneni.

²⁰Owati amosabote dai mitahi. Hiyose ati mai hinofeya, owati‑ya mai nofahariteni. Owati‑ya mai nofiya, owa‑ya yose‑mari ati‑ya mai nofahariteni.” Yeso ati nemarine.

²¹Hiyari hawa tohe, atibodi a‑arire, ati yananamatase,

“Owati amosabote dai mitahi. Owa‑ya dai‑ka owa daanebonane.” Ati nemarine.

²²Yeso ati oda mita, oda ibi noko awa,

“Ka! Ebeni‑ke tohabati? Yeso‑ya daanebonaha.” Oda atibodi ati namaroni.

²³Yeso‑ka no‑nofa ama·oni. Yeso yowi‑ya oforemaroni.

²⁴Owa‑ya Simaho Bedoro yehe haane,

“Yeso haatinahi

‘Ebeni‑ke tiwa‑ya daanabati?’ Tinahi.” Bedoro ati nemarine.

²⁵Yeso bako‑kaya oforiwite, Yeso ohiyara,

“Ayo, ebeni‑ke tiwa‑ya daanabati?” Onamaroni.

²⁶“Baho kote daba·okaniya, fare‑ya baho daa·onaboneni.” Yeso ati nemarine.

Baho kote‑ya dabatokane, Simaho Isikari·oti bidi, i‑di Yoda‑ya baho‑ya daanemarine.

²⁷Baho‑ya Yoda waratoneya, atibodi‑ya Satanasi sawiwahemarine.

“Yoda, tiwa ene‑bone toha kanibote nahi.” Yeso ati nemarine.

²⁸Oda sookare Yeso ati oda watoramaroni.

²⁹Yoda oda‑ka yinero‑ya da‑dama ene oda one atibodi yama‑ya dika,

“Oda mariniba‑ka yamata‑ya kanikeba awane. Yamata mai kihara mai‑ka yinero‑bona‑ya daaneba awane.” Oda one atibodi ati namaroni.

³⁰Baho‑ya Yoda damane, tokemarine, yama soki‑ya.

³¹Yoda nowati‑ya Yeso ati yanane,

“Hibayata dai‑ka Ayo neme‑ke ene amosabote‑ya mai awawahaboneni. Owa ene Deoso‑ya mai kahiyari ba‑basi naboneni.

³²Owa ene Deoso‑ya mai kahiyari ba‑basi niya, Okobi ene owa‑ya mai kahiyari ba‑basi nahareboneni. Okobi ene toha kanibote nebonane.

³³Oka dao mai‑nima dai na, dai‑ya owa sawi nafimaraboneni. Owa‑ya dai sibanaboneni. Dai‑ka hidi mai ohiyarimaro‑nima dai ohiyarineni. Okomiya, dai tokomaki awiraboneni.

³⁴Owati dai mitahi. Dai ibi nofiyahi. Dai onofi‑nima dai ibi nofiyahi.

³⁵Dai ibi nofiya, oka dai toha dai‑ya mai nafi watowahaboneni.” Yeso ati nemarine.

³⁶“Ayo, ebeni‑kaya tikiboneti?” Simaho Bedoro ati ne,

“Oki‑kaya tikamaki kanibote tini awiraboneni. Yama one‑ya tikamakiteboneni.” Yeso ati nemarine.

³⁷“Ayo owati tokomaki kanibote nineni. Tiwa‑ya okasoma ihi o·abi‑ya yama sibaraboneni.” Bedoro ati nemarine.

³⁸13:38 Arakawa haani, ora tamine tohe awane. Hibati‑ya mai‑ka herosa wadare, sidadi webote‑ya maki ohari ora‑ya midikane, yama soki bai‑ya, mahi nokorise‑ya ho‑hori‑ya haane, yama wahi yanatoni‑ya ho‑hori‑ya haanamatasatene. Fara yama wahi yanatoni‑ka ho‑hori tamine amani.“Owa tikasoma ihi ti·abiya, yama sibarabone tina, owati amosabote timitahi. Arakawa haani awisareya, owa‑ya tiwatoramone tinabone, tiwati yanani 3 kana boneni.” Yeso ati nemarine.

Yeso hika mai atibodi‑ya kasome

¹“Dai atibodi yama‑ya dikariyahi. Deoso ati dai nofiyahi. Owati‑ya dai nofahari, dai nahi.

²Okobi tabaro‑ya yobe damane. Dai‑ka yobe‑ba hawa·onihebone okomaboneni. Dai‑ka yobe‑ba awire‑mana, hibati‑ya dai ohiyara neni.

³Okomiya, dai‑ka yobe‑ba hawa·oniya, okomatasaboneni. Okomatasiya, dai‑ya owakamaboneni, owini‑kaya dai winawahabonehe.

⁴Oki‑bone‑ka hawi dai watoneni.” Yeso ati nemarine.

⁵“Ayo tiki‑bone‑ka tabora oda watora, hini yamata ihi hawi oda watorihi?” Tome ati nemarine.

⁶“Deoso tabaro hawine ama·oni. Deoso ati yokana ka‑kamina ama·oni. Ai abarabone‑ka yama da‑daa ama·oni. Owati‑ya mai tokadabara, Okobi‑ya mai koboteraboneni.

⁷Hibati‑ya owa‑ya dai wata‑mani, Okobi dai watohare neni. Hibayata Okobi dai wato, Okobi dai awa, dai neni.” Yeso ati nemarine.

⁸“Ayo, Abi yofitikanahi, oda ya‑yainabani.” Firibi ati nemarine.

⁹“Firibi, dai‑ya osawi yaba, owa dai wato awirini. Owa dai awiya, Okobi dai awaharineni. Abi yofitikanahi tiriyahi.

¹⁰Okobi oda famateni. Owati yanana, owa hare owati tohi awirini. Okobi oda fama oda ati tohateni. Owa ene dai awa, owa ene tohi awirini. Okobi oda fama oda ene tohateni.

¹¹Okobi oda famateni ona, owati dai nofiyahi. Owati dai nofariya, owa ene dai nofabisahi. Okobi ene kitabote‑nima owa ene nineni.

¹²Owati amosabote dai mitahi. Owati mai nofiya, owa ene‑nima mai ihi nawahaboneni. Okobi‑ya okomiya, Okobi ene mai ihi kitawahaboneni. Owa ene kiti bi‑bidi namaro, mai ihi kiti ba‑basi naboneni.

¹³Yama onofa‑nima yama na dai nofa, owa‑ya dai haaniya, dai ati‑nima onaboneni. Owa ene‑ya mai awa, Deoso‑ya mai kahiyaraboneni.

¹⁴Yama onofa‑nima yama na dai nofa, owa‑ya dai haaniya, dai ati‑nima onaboneni.

¹⁵Owa‑ya dai nofiya, owati dai tokadababoneni.

Deoso‑ka Doni Yeso yosebona

¹⁶Okobi haa·onaboneni. Dai‑ya ka‑kasoma‑bona‑ya Okobi daanebonane, dai‑ya dabatebonaha.

¹⁷Deoso‑ka Doni Deoso ati yokana‑ya ka‑kamina amane. Bofe‑ka Deoso‑ka Doni‑ya mai awarihi, Deoso‑ka Doni‑ya mai watorihi na, fara ihi mai hinofarebonane. Dai‑ta Deoso‑ka Doni dai‑ya dabe, dai‑ya foyawahebonane.

¹⁸Dai‑ka abi wadamare‑nima dai ni awirabone, dai‑ya okomatasaboneni.

¹⁹Ai amoni fa‑famaraba niya owati‑ya mai nofara, owa‑ya mai awamaraboneni. Owa‑ya dai awabisaboneni. Okitama, hasi·oni‑nima dai hasinaboneni.

²⁰Okobi oda famini, oka dai toha ai ohariwamabone, fara okitamiya dai wataboneni.

²¹Owati‑ya mai mita, owati‑ya mai tokadaba, owa‑ya mai no‑nofa mai amani. Owa‑ya mai nofa Okobi mai‑ya nofane. Owa‑ya mai nofa, mai onofahari ona, owati ihi owa‑ya mai wataboneni.” Yeso ati nemarine.

²²“Ayo, hini yamata‑nima mai ihi na, mai one tiwa‑ya watorabone tina, tiwa‑ta tiwa oda watobisabone tinaro?” Yoda owa ati nemarine.

Yoda Isikari·oti ati tohi awiremarine.

²³“Owa‑ya mai no‑nofa, owati‑ya mai tokadababoneni. Owati‑ya mai tokadaba mai‑ya Okobi nofebonane. Okobi oda fama mai wini‑kaya oda winaboneni.

²⁴Owa‑ya mai nofara owati‑ya mai tokadabaterani. Hini owati tohi awirani, Okobi owa‑ya yose‑mari oda fama oda ati amani.

²⁵Dai‑ya osawe, yama tamine okaminineni.

²⁶Owati ihi Okobi hika Doni‑ya yosebonane. Dai‑ya kanawatoya, ati ene owati nafi‑ya dai atibodi watinawamaboneni. Deoso‑ka Doni dai‑ya kasomebonane.

²⁷Dai habo siitoni awiraboneni. Bofe‑ka dai‑ya mai ati kasomabone mai kitara, mai ati‑nima owati ni awirini, owati ihi dai habo siitoraboneni. Dai atibodi yama‑ya dikariyahi. Dai habo siitoriyahi.

²⁸‘Okomabone, wini·onamatasaboneni.’ Ona,

Okobi‑ya okomaboneni. Owa‑ya dai nofa‑mani, dai ya‑yaina neni. Okobi amosabotebisa amane.

²⁹Okomi awisa oriya, owa tamine okamina, owa nowati‑ya owati dai nofaboneni.

³⁰14:30 Bofe‑ka mai‑ka hidi i‑di Satanasi amane.Dai‑ya ohiyari nafimaraboneni. Bofe‑ka mai‑ka hidi kobonebonane. Oka hidi tohi awirane.

³¹Okobi onofa, Okobi ati‑nima oteni. Bofe‑ka owa ene‑ya mai awiya, owa‑ya mai watowahaboneni. Hima ai tokomahi.” Yeso ati nemarine.

Ai ene amosa ya‑yana‑ka i‑di Yeso amane

¹“Ofa ade amosabote‑nima ona, ofa‑ya na‑nawada‑nima Okobi nane.

²Ofa mate‑ya mohi yanamake, bonora‑ya Deoso tiinakose, ini yaba kote‑ya Deoso tiinakosaharitene, ofa boni damawahabonehe.

³Ofa ini kote‑ya Deoso tiinakose‑nima dai na, owati dai mita, dai ene amosawahineni.

⁴Owa dai nokotoniyahi. Owa dai nokotoniya, dai okasomaboneni. Ofa ini ade‑ya waanamariya, bonoteraboneni. Dai‑ya okasomariya, dai ene amosa wadateraboneni.

⁵Ofa ade‑nima ona, ofa ini‑nima dai na, owa dai nokotoniya, ofa ade‑ya ini waana‑nima dai na, dai‑ya okasomaboneni. Dai‑ya okasomara‑mani, dai ene amosa wadara neni.

⁶Owa‑ya mai nokotonira, ofa ini waanamara‑nima mai teni. Ofa ini wayatoniya, yifo‑ya mai werehiwititeni.

⁷Owa dai nokotonihi, owati dai tokadaba, dai niya, yama dai haana‑ya Deoso daanebonane.

⁸Dai ene amosa, dai bona‑nima dai nineni. Dai bono nafiya, dai ene‑ya mai awiya, oka dai toha dai‑ya mai watowahabone, Deoso ene amose‑ya mai awaboneni.

⁹Okobi owa‑ya nofi‑nima dai‑ya onofineni. Owati dai tokadabahi, dai‑ya owa nofi fawaraboneni.

¹⁰Okobi ati okadaba, Okobi owa‑ya nofi fawarebonane. Owati dai tokadabiya, Okobi owa‑ya nofi faware‑nima dai‑ya onofi fawa·oraboneni.

¹¹Tamine okamine, ya‑yai·oni‑nima dai ya‑yainabone, dai ya‑yaini nafeboneni.

Dai ibi nofahi

¹²Owati dai mitahi. Dai onofi‑nima dai ibi nofiyahi.

¹³Maki hika no‑nofa mai abarabone ababiseya, hika no‑nofa mai‑ya nofi nafine, mai one mai‑ya mai nofi bi‑bidi nibisineni.

¹⁴Owati dai tokadaba, oka no‑nofa dai amani.

¹⁵Hidi‑ka yo‑yose mai‑ya hini tamine‑ya kaminaterene. Oka no‑nofa dai amani. Okobi ati nafi‑ya dai‑ya okaminateni. Oka yo‑yose dai tohamaro, oka no‑nofa dai tohawahineni.

¹⁶Owa‑ya dai kadikara, dai‑ya okadikabisa, dai‑ya oyosemaroni, dai bonabonehe, dai ene amosa fawarabonehe. Yama onofa‑nima yama na dai nofa, yama dai haana‑ya Okobi daanebonane.

¹⁷Dai ibi nofiyahi, onani.

Bofe‑ka ai‑ya mai kakobone

¹⁸Bofe‑ka dai‑ya mai kaka, dai atibodi yama‑ya kadikariyahi. Owa‑ya mai kako dai tohamaroni.

¹⁹Bofe‑ka dai toha‑mani, dai‑ya mai nofa neni. Hini mai one‑ya mai nofateni. Dai okadikamaro, bofe‑ka dai tohamara, dai‑ya mai kakoteni.

²⁰Owati‑maro‑ya dai ati kadamowamariyahi. Owa‑ya mai bisinamaro dai‑ya mai bisinamakeboneni. Owati‑ya mai tokadaba dai ati‑ya mai tokadabahareboneni.

²¹Owa‑ya yose‑mari‑ya mai watora, owa‑ya mai nofi awirani. Fara dai‑ya mai bisinaboneni.

²²Deoso ati okamini awira‑mani, mai ihi manakone wadara neni. Deoso ati okaminabisamaro ene mai manakone wadineni.

²³Owa‑ya mai kako, Okobi‑ya mai kakohari nineni.

²⁴Owa ene kitabote‑ya mai awara‑mani, mai ihi manakone wadara neni. Owa ene kitabote‑ya mai awa, owa‑ya mai kako, Okobi‑ya mai kakohari nineni.

²⁵‘Hiniya owa‑ya mai kakoneni.’ Deoso‑ka yama hani ati na,

ati‑nima mai ihi nineni.

²⁶Deoso‑ka Doni Deoso ati yokana‑ya ka‑kamina amane. Okobi‑ya okomiya, dai‑ya kasomebona oyoseya, dai‑ya koboneya, owa tamine‑ya kaminebonane.

²⁷Owa hiyari yanakani‑ya owa dai dabamaro, owa tamine dai kaminahari, dai nahi.” Yeso ati nemarine.

¹“Yama kobonabone tamine okamina, owa hawine‑ya dai yakaniya, dai maakaraboneni.

²Dai‑ya mai ati barinaboneni, Deoso‑ya mai hi‑hiyara‑ke yobe‑ya dai tokiyomamarabonehe. Dai‑ya mai nanahabiya,

‘Oda ene Deoso ya‑yainane.’ Mai atibodi ati naboneni.

³Okobi‑ya mai watora, owa‑ya mai watoharira, oda‑ya mai watora ihi dai‑ya mai kakaboneni.

⁴Hibati‑ya dai‑ya odaba, mai tamine okamina kanibote oramaroni. Hibayata mai tamine okamina, dai‑ya osawimi awiri‑ya owati dai watinawamaboneni.

Deoso‑ka Doni‑ya Yeso yosebona

⁵Owa‑ya yose‑mari‑ya okomatasabone ona,

‘Ebeni‑kaya tikiboneti?’ Dai ati ni awirani.

⁶Okomabone ona, hiniya dai atibodi ohina‑nima nineni.

⁷Owati amosa dai mitahi. Okomariya, dai‑ya ka‑kasoma‑bona kami awirebonane. Okomiya, dai‑ya ka‑kasoma‑bona oyosemaboneni.

⁸Koboneya, bofe‑ka mai ihi tamine‑ya kanawatobonane. Mai ihi amosara toha, mai ihi amosawamabone toha, mai ihi‑ya Deoso kadikebona toha ne, tamine‑ya mai‑ya kanawatowahebonane.

⁹Deoso Bidi ati‑ya mai nofara mai ihi amosara, mai ihi tamine‑ya Deoso‑ka Doni kaminebonane.

¹⁰Okobi‑kaya okomiya, owa ene mai awamariya, owa ene‑nima mai ihi nabone tamine‑ya Deoso‑ka Doni kaminebonane.

¹¹Bofe‑ka mai‑ka hidi Deoso hikadiki hawahinihi, hini ene manakone wade tamine‑ya Deoso‑ka Doni mai‑ya kaminebonane.” Yeso ati nemarine.

¹²Hibayata yama dama tamine okamini awirabone, yama nafi okaminiya, yama dai watomaraboneni.

¹³Deoso‑ka Doni Deoso ati yokana‑ya ka‑kamina koboneya, Deoso ati nafi‑ya yofikanebonane. Hini ati ene ati yanani awirebona, yama himita‑ya kaminabisebonane. Yama nabone tamine‑ya kaminebonane.

¹⁴Ati ene owa ene amosa dai watowahaboneni. Oka yama tamine‑ya kaminebonane.

¹⁵Okobi‑ka yama nafi toha oka tohahari neni. Deoso‑ka Doni oka yama tamine‑ya kaminebona ona, fara oda fama oda tamine amani.

Yeso abebona, kitamebona ati ne

¹⁶Dai amoni fa‑famaraba namakiya, owa dai awamaraboneni. Dai amoni fa‑famaraba namakitasiya, owa dai awamatasaboneni.” Yeso ati nemarine.

¹⁷“Hini yamata‑nima Yeso ati ne, ati amanati? Yama oda watorani.

‘Dai amoni fa‑famaraba namakiya, owa dai awamaraboneni. Dai amoni fa‑famaraba namakitasiya, owa dai awamatasaboneni.’ Ati ne,

Badi‑ya tokebona ati ne, yama oda watorani.

¹⁸‘Dai amoni fa‑famaraba namakiya’ Ati ne,

hini yamata‑nima neba ati amanati?” Oda ibi hiyara oda ati namaroni.

¹⁹Oda ati‑ya Yeso wato, oda‑ya hiyare,

“Owati dai watora awineni.

‘Dai amoni fa‑famaraba namakiya, owa dai awamaraboneni. Dai amoni fa‑famaraba namakitasiya, owa‑ya dai awamatasaboneni.’ Ona,

fara tamine‑ya dai ibi hiyara awineni.

²⁰Owati amosabote dai mitahi. Dai yawiya, dai ohinaboneni. Dai ohiniya, bofe‑ka mai ya‑yainibisaboneni. Makobote dai ya‑yainawahaboneni.

²¹Mai fanawi dori wadabone, mai dori kome kitateni. Mai dori wadiya, mai dori kome‑ya mai atibodi watomaterani. Ewe wade ene madi mai ya‑yainibisateni.

²²Mai fanawi dori kome kita mai‑nima dai nawahabone, dai yawabone, makobote owa dai awamatasiya, dai ya‑yainawahaboneni. Dai ya‑yaini fawaraboneni.

Deoso‑ya mai hiyarabone

²³Koboniya, owa‑ya dai haanami awiraboneni. Owati amosabote dai mitahi. Onofa‑nima dai nofa, Okobi dai haaniya, yama dai haana‑ya Okobi daanebonane.

²⁴Hibati‑ya Deoso dai haanabone, owa oni‑ya dai hiriramaroni. Oka dai toha Deoso‑ya dai haanahi. Yama dai haana‑ya Deoso daanebonane. Dai ya‑yaini nafeboneni.

²⁵Okobi tamine ohiyara, yama bara tamine ohiyarabisa, owati dai wato nafira, yama one‑ya Okobi tamine okamini amosaboneni.

²⁶Onofa‑nima dai nofa, owa oni dai hiriniya, Deoso‑ya dai abano haanaboneni. Okobi‑ya dai hiyarabone, owa‑ya dai yosemaraboneni.

²⁷Owa‑ya dai nofa, Yeso Deoso‑ka amane dai ati na, fara ihi Okobi dai‑ya nofi nafine.

²⁸Hibati‑ya Okobi oda famamaro, dai tabaro‑ya okemaro, Okobi‑ya okomatasaboneni.” Yeso ati nemarine.

Yeso ati mai watowaha

²⁹“Tiwati tikahemomara, tiwati oda watowahani.

³⁰Yama nafi tiwata, oda atibodi ati tiwato, tiwa oda watowahineni. Deoso‑ya tisawemete, tiwa‑ya oda watowahineni.” Oda ati namaroni.

³¹“Hibayata owati dai nofawahamone dai ati na,

³²yama nahorabone, fara hibayata dai kananaboneni. Owa dai dabami awirabone, dai tabaro‑ya dai tokomaboneni. Owa hari awirabone, Okobi oda famaboneni.

³³Yama tamine okamina, owati dai nofiya, dai habo siitoraboneni. Bofe‑ka dai‑ya mai bisinaboneni. Dai habo kitahi. Bofe‑ka mai kiti bi‑bidi, owa kiti nafibisineni.” Yeso ati nemarine.

Yeso hika mai tamine‑ya hiyare, Deoso‑ya

¹Oda‑ya hiyari hawa tohe, neme‑ya tonokomise, Deoso‑ya hiyare,

“Abi, tiwati‑maro‑nima yama yananaboneni. Tiwati ihi owa ene amosabote‑ya mai awahi. Owa ene‑ya mai awiya, tiwa ene‑ya mai watowahaboneni.

²Abi, tiwa ene mai nafi‑ka hidi ama·oni. Owa‑ya mai daatinamaro owa ene mai abateraboneni.

³Deoso yokana amatini. Deoso owa wadaterene. Yeso Kirisito ama·oni. Owa tiyosemaroni. Ai‑ya mai nofiya, mai abateraboneni.

⁴Tiwati‑maro‑nima ona, owa ene‑ya mai awa, tiwa‑ya mai watowahani.

⁵Bofe‑ba awisari‑ya ai fama ai amosabote ai wehene wadamaroni. Tiwa‑ya osawimatasiya, hini owa wehene wadamaro, owa wehene wadamatasahi.

⁶Abi, tika mai one bofe‑ya wi‑wina, owa‑ya mai daatina, mai‑ya tiwa tamine okamina, tiwati‑ya mai tokadabineni.

⁷Oka yama nafi‑bone owa‑ya daatinamaro, tiwa ene‑ya mai watowahineni.

⁸Owa‑ya tikaminamaro, mai‑ya okaminamakineni. Tiwati‑ya mai nofineni. Tika ama·oni. Owa‑ya tiyosemaro, owa‑ya mai watowahineni.

⁹Owati‑ya mai no‑nofa mai tikasomiyahi. Bofe‑ka mai tamine okamini awirani. Owa‑ya mai daatinamaro, tika mai toha, mai tikasomiyahi onani.

¹⁰Oka yama nafi toha tika tohahari, tika yama nafi toha oka mai tohahari neni. Owa‑ya mai watowahini.

¹¹17:11 Ai atibodi ati fara hinama toha, Deoso ohari‑nima ai ohariwamaboneni, ai damaro.Tiwa‑ya okomabone, bofe‑ya owinami awiraboneni. Bofe‑ya mai winabisaboneni. Abi Deoso, oka mai daatinamaro mai tinawadahi, ai ohare‑nima mai ohariwamabonehe, mai nafi.

¹²Owa‑ya mai daatinamaro mai‑ya osawe, mai onawada, tika hawi‑ya mai yakana mai maakara, mai abarani. Mai‑ka owa ohari ababisane. Fara, tiwati‑ya mai kanahanamaro mai ati‑maro‑nima yama nawahaboneni.

¹³Tiwa‑ya okomabone, bofe‑ya winasa ona tiwa ohiyara, owati mai mitiya, mai ya‑yaini nafiwahaboneni. Ya‑yai·ona‑nima mai ya‑yainaboneni.

¹⁴17:14 Bofe‑ka mai toha Satanasi ati‑ya mai nofa mai tamine amani.Mai‑ya tiwati okaminamaroni. Bofe‑ka mai toha oka mai‑ya mai kakoteni. Bofe‑ka mai‑ka owa ama·ora, oka mai toha bofe‑ka mai‑ka mai tohaharirani.

¹⁵Abi,

‘Hibayata mai tiwakamahi.’ Oni awirini.

Bofe‑ya mai winasa na mai tikasomahi, Satanasi ati‑ya mai nofarabonehe.

¹⁶Bofe‑ka mai‑ka owa ohara, oka mai toha bofe‑ka mai‑ka one mai tohahari awirini.

¹⁷Abi, mai tikayawahi, tiwati yokana‑ya mai nofabonehe.

¹⁸Bofe‑ka mai‑ya owa tiyosemaro‑nima bofe‑ka mai‑ya mai oyosemakineni.

¹⁹Mai manakone onahababoneni, tika mai tohabonehe.

²⁰Owa‑ya mai da‑daba mai tamine ohiyara, makobote mai ati mai one hinofawahabone mai tamine ohiyarahari neni.

²¹Abi, tiwati ihi mai nafi oharihi. Ai‑ka mai toha ai ohari‑nima mai oharihi. Ai nafi oharihi. Mai ihi‑ya mai one awiya, owa tiyosemaro owa‑ya mai watowahaboneni.

²²17:21-22 Deoso ati‑nima ai nafi atibodi ati niya, ai atibodi ati kafamiya, Deoso ohari‑nima ai ohareboneni, ai damaro.Owa‑ya tika yama daatina, fara mai‑ya daa·onamaki, ai ohari‑nima mai oharebonehe, mai damaro.

²³Owa‑ya tisawi mai‑ya osawi ona, mai nafi ohariwamabonehe. Mai ihi‑ya mai one awiya, owa‑ya tiyosemaro, owa‑ya mai watowahaboneni. Owa tinofi‑nima oka mai tinofahare, mai‑ya mai watowahaboneni.

²⁴Abi, owa‑ya mai daatinamaro, owa‑ya mai sawebone, mai‑ya owatibodi kobonineni. Yama nafi ai wamani awisari‑ya owa‑ya tinofi nafe, owa wehene‑bone daatinamaroni. Owa wehene‑ya mai awiyahi.

²⁵Abi, amosabote amatini. Bofe‑ka tiwa‑ya mai watora, tiwa owatobisineni. Owa tiyosemaro, owa‑ya oka mai watowahineni.

²⁶Mai‑ya tiwa yofi·okanamaro, tiwa yofi·okateboneni. Tiwa‑ya mai wato, owa tinofi nafe‑nima mai ibi nofabone, mai‑ya osaweboneni.” Yeso ati nemarine.

Yeso‑ya mai wata

¹Hiyari hawa tohe, oda toka, Sedero faha‑ya oda berenawaha, Sedero kowani‑kaya awa bono bodi‑ya Yeso oda tokamaroni.

²Oda toki‑bone‑kaya i‑di Yoda Isikari·oti watomarine. Hibati‑ya Yeso oda daba oda yobinamaroni.

³Yoda sodado mai eyehe kamakimarine. Fariseo mai‑ka yo‑yose mai toha, Deoso‑ka yama‑bone‑ya mai da‑daa mai‑ka hidi‑ka sekorasa mai toha, mai na, mai sawinamaroni. Nabarina‑ya mai one aka, farao‑ya mai one aka, awa‑ya mai one aka, yima‑ya mai one aka namaroni.

⁴Yeso mai ihi‑bone‑ya wato, mai‑ya hiyare,

“Ebeni‑ke dai watibati?” Ati nemarine.

⁵“I‑di Yeso Nasare‑ke oda wataboneni.” Mai ati na,

“Fara ama·oni.” Yeso ati nemarine.

Yoda mai‑ya dabemarine, Yeso‑ya kahabaneri.

⁶“Fara ama·oni.” Yeso ati ne,

ati ene mai bari‑kaya mai sonamaroni.

⁷“Ebeni‑ke dai watibati?” Yeso ati namatase,

“I‑di Yeso Nasare‑ke oda wataboneni.” Mai ati namaroni.

⁸“Fara ama·oni ona, owa dai watiya, oka mai dai arabanahi.” Yeso ati nemarine.

⁹Mai hasinabone ati yanane, hibati‑ya ati‑nima yama nabone ihi ati yanane,

“Oka mai‑bone owa‑ya mai daatinamaro, mai hasineni.” Yeso ati nemarine.

¹⁰Simaho Bedoro yima‑ya nawaane, yima‑ya sobanaki, Deoso‑ka yama‑bone‑ya mai da‑daa mai‑ka hidi webote‑ya na‑narifa narabo kanika‑ya tarinabasemarine. Hidi‑ka yo‑yose oni Maoko tohemarine.

¹¹“Bedoro, tika yima foyamahi, hini bori‑ya. Owa‑ya yama kobonabone Okobi ati nemari, ati‑nima onaboneni.” Yeso ati nemarine.

¹²Sodado mai toha, mai‑ka hidi mai toha, oda‑ka hidi mai‑ka sekorasa mai toha, mai na, Yeso‑ya mai waratona, Yeso mano‑ya mai sokikasamaroni.

¹³Kaifo‑ka koma i‑di Anasi tohe‑ka yobe‑ya Yeso‑ya mai towakamamaroni. Deoso‑ka yama‑bone‑ya mai da‑daa mai‑ka hidi webote i‑di Kaifo tohemarine.

¹⁴Hibati‑ya i‑di Kaifo oda‑ka hidi mai‑ya hiyare,

“Ai‑ka mai one dama hidi mai tohara, fara mai nafi abarabone mai‑ka owa ohari abeya, yama sibaraboneni.” Kaifo ati nemarine.

¹⁵I‑di Simaho Bedoro oda fama Yeso nowati‑ya oda towakamakemaroni. Deoso‑ka yama‑bone‑ya mai da‑daa mai‑ka hidi webote‑ka yobe fowari barikani nafi doro‑ya oda kobokana, Yeso‑kaya okomake, i‑di Bedoro nokobi‑kaya waabisemarine. Deoso‑ka yama‑bone‑ya mai da‑daa mai‑ka hidi webote owatomarine.

¹⁶Bedoro nokobi‑ya waamaki, nokobi‑ya okomatasa, atona nokobi‑ya se‑seekana ohiyara, owati ihi nokobi‑ya seekana, Bedoro kamakimarine.

¹⁷Bedoro‑ya atona hiyara,

“Maki‑ya mai da‑daba mai‑ka owa amatiraniha?” Atona nokobi‑ya se‑seekana ati na,

“Ofamaterene.” Bedoro ati nemarine.

¹⁸Yama sire ihi yifo widi‑ya mai nahobasamaroni. Hidi‑ka yobe‑ya mai na‑nawada mai toha, oda‑ka hidi‑ka sekorasa mai toha, mai na, mai eyehe Bedoro wai, yifo‑ya hiwanemarine.

¹⁹Yeso‑ya mai da‑daba mai tamine toha, hini ati tamine toha ne, tamine‑ya mai‑ka hidi webote mitebona, Yeso‑ya hiyaremarine.

²⁰“Owati‑ya mai nafi mitani. Deoso‑ya mai hi‑hiyara‑ke yobe‑ya mai okanawata, Deoso‑ka yobe‑ya mai okanawata, mai yorotokana mai okanawatoteni. Mai noki beheri‑ya owati yanaterani.

²¹Owa haatiriyahi. Owati‑ya mai mita, mai dai haanibisahi, owati‑ya mai kaminabonehe.” Yeso ati nemarine.

²²Yeso ati‑ya mai‑ka sekorasa owa mite, Yeso noko‑ya batanari,

“Deoso‑ka yama‑bone‑ya mai da‑daa mai‑ka hidi webote ai hiyara, haa‑nima ai hiyariterani.” Ati nemarine.

²³“Owati kasiramone tina, owa tamine tikaminahi. Keyehe‑ya hiri·oni awirini, owa‑ya batatiriyahi.” Yeso ati nemarine.

²⁴Yeso yehe sokikasanasa neya, Anasi ati ene Kaifo‑kaya mai hiwakamemarine. Deoso‑ka yama‑bone‑ya mai da‑daa mai‑ka hidi webote i‑di Kaifo tohemarine.

Bedoro ati towe

²⁵Simaho Bedoro yifo‑ya hiwane wai‑ya owa ati yanane,

“Yeso‑ya mai da‑daba mai‑ka owa amatini.” Ati ne,

“Yeso‑ya ofamaterani.” Bedoro ati nemarine.

²⁶Makobote Deoso‑ka yama‑bone‑ya mai da‑daa mai‑ka hidi webote‑ka sekorasa narabo Bedoro tarihibase‑ka naki ati yanane,

“Awa bono bodi‑ya maki‑ya tisawe, tiwa oawani.” Hidi‑ka yo‑yose ati nemarine.

²⁷“Owa tohi awirani.” Bedoro ati ne,

ati fawaneya, arakawa haanemarine.

Homano mai‑ka hidi‑ya Yeso‑ya mai towakama

²⁸Homano mai‑ka hidi tabaro‑ya Yeso‑ya mai towakama, yama wahabisari‑ya mai kobonamaroni. Ka‑kariwa‑ka mai‑ka marina‑ka semana hawa tohara, mai marinamatasabone,

“Yara mai‑ka yobe‑ya ai tokiyomariyahi. Ai tokiyomiya, ai towe tohariyahi.” Mai atibodi ati na,

Homano mai‑ka yobe‑ya oda‑ka hidi mai tokiyomaramaroni. Yeso‑ya sekorasa mai towakiyomabisamaroni.

²⁹Birato‑ka nokobi‑kaya mai naha, mai‑ya Birato tokomaki,

“Hini yamata‑nima maki ene nati?” Birato ati ne,

³⁰“Maki ati kasiro awire‑mana, tiwa‑ya oda kakamare nane.” Mai ati namaroni.

³¹“Dai‑ka yama hani ati‑nima dai bisinaho. Owa‑ya dai haariyahi.” Birato ati nemarine.

“Oda ati hinahababise, oda kitara, oda ati ene ai owa‑ya mai nanahabaterani.” Mai ati namaroni.

³²18:32 Mateo 20:19; 26:2; Maroko 10:33; Roka 18:32; Yowaho 3:14; 8:28; 12:32Hibati‑ya Yeso hini tamine‑ya kamine, mai baahikanebona ati ne, fare hini ati‑nima yama yananamaroni.

³³Birato hika yobe doro‑ya tokiyamatase, ati ene Yeso‑ya mai kakama, ati yanane,

“Yodeo mai‑ka hidi webote amatiraniha?” Birato ati nemarine.

³⁴“Ebeni‑ka mai ati tohiti? Mai one ati toha, hini tiwati toha na awineni?” Yeso ati nemarine.

³⁵“Yodeo ohara, hini tika mai one, Deoso‑ka yama‑bone‑ya mai da‑daa mai‑ka hidi tiwa‑ya owa‑ya mai daaneni. Hini yamata‑nima tina, tiwa‑ya mai daaniti?” Birato ati nemarine.

³⁶“Neme‑ka hidi webote ama·obisani. Bofe‑ka hidi oha‑mani, oka yo‑yose mai one‑ya mai bisina neni, owa‑ya mai watarabonehe. Bofe‑ka hidi webote oharani.” Yeso ati nemarine.

³⁷“Hidi webote amatiraniha?” Birato ati ne,

“Hehe, hidi webote ama·oni. Deoso ati yokana okaminabone, bofe‑kaya okemaro, owada onamaroni. Deoso ati yokana‑ya mai no‑nofa owati‑ya mai tokadabateni.” Yeso ati nemarine.

³⁸“Deoso ati yokana owatoterani.” Birato ati ne,

tokome, Yodeo mai‑ya hiyare,

“Yeso ene towe tohi awirene.

³⁹Dai‑ka owa barikane Ka‑kariwa‑ya dai ati ene ohari see·okatene. Yodeo dai‑ka hidi webote‑ya dai ati kobona awineni.” Birato ati nemarine.

⁴⁰“Fare‑ya oda ati koboni awirini. Barabasi‑ya oda ati koboneni.” Mai ati namaroni.

Hibati‑ya mai‑ka yama‑ya Barabasi bo‑boti tohematane.

¹Birato ati ene Yeso‑ya sodado mai kosini kitameteni.

²Makobote hidi‑ka sabewa‑nima na‑ya sodado mai kemona mado atona‑ya, Yeso tati‑ya mai nawitare, hidi‑ka bora a‑asabina‑ya Yeso‑ya mai weyenihi nameteni.

³Yeso‑ya mai yasina,

“Yodeo mai‑ka hidi webote amatini.” Mai ati na,

mai ati dama, Yeso‑ya mai batanameteni.

⁴Yodeo mai‑ya Birato hiyarebona mai‑ya tokomatase,

“Owati ihi Yeso‑ya mai kakamaboneni. Yeso ene towe tohi awirene, Yeso dai aweya, owati dai nofaba awineni.” Birato ati nemarine.

⁵Yeso‑ya mai kakama, Yeso tati‑ya yama atona wamani itare, bora a‑asabina‑ya weye nemarine.

“Dai awaho.” Birato ati nemarine.

⁶Yeso‑ya mai awa, Deoso‑ka yama‑bone‑ya mai da‑daa mai‑ka hidi mai toha, mai‑ka sekorasa mai toha, mai na, mai ati kita,

“Awa‑ya baakanaho. Awa‑ya baakanaho.” Mai ati namaroni.

“Dai towakamabisaho. Awa‑ya dai baakanaho. Yeso ene towe tohi awirane.” Birato ati nemarine.

⁷“Mose‑ka yama hani ati oda tokadabateni. Deoso Bidi‑mona ati ne, keyehe‑ya hirine, fare Mose‑ka yama hani ati‑nima Yeso oda nanahababoneni.” Mai ati namaroni.

⁸Deoso Bidi‑mona tamine‑ya Birato mite, habo siitone,

⁹hika yobe‑ya tokiyame, Yeso‑ya hiyare,

“Ebeni‑ya tiwa tabaro toha titi?” Ati ne,

Yeso ati yanarematane.

¹⁰“Hini yamata ihi tiwati yanarihi? Okitateni. Tiwa owati seekaniya, tiwa‑ya mai seekana, tiwa owati baakaniya, tiwa‑ya mai baakana naboneni.” Birato ati nemarine.

¹¹“Deoso ati ene tohare‑mana, tiwati kitara neni. Tiwa ene towe bi‑bidi neni. Tiwa‑ya owa‑ya mai daana mai ihi towe nafibisineni.” Yeso ati nemarine.

¹²Yeso ati‑ya Birato mite, Yeso‑ya seekanebona mai‑ya hiyaramatasemarine. Yodeo mai ati kita,

“Yeso seetikaniya, Sesa‑ka tihamaraboneni. Ai‑ka hidi webote i‑di Yeso‑mona ati ne, ati ene Sesa yawebonane.” Mai ati namaroni.

¹³Mai ati‑ya Birato mite, ati ene Yeso‑ya mai kakama, hidi‑ka kadera‑ya Birato itarimarine. Fara hidi‑ka kadera kawari‑ka oni ‘yati baki’ toha, Yodeo oda toha oda‑ka oni ‘kabata’ tohamaroni.

¹⁴Ka‑kariwa‑ka yama ai hawa tonihebone‑ka mahi, 6 ora tohamini‑ya Birato mai‑ya hiyare,

“Dai‑ka hidi webote dai awaho.” Ati ne,

¹⁵“Abaho. Abaho. Tiwati ihi awa‑ya baakanaho.” Mai ati na, mai ati kitamaroni.

“Dai‑ka hidi webote baakanebona dai ati na awineni.” Birato ati nemarine.

“Oda‑ka hidi webote i‑di Sesa tohe, owa wadarane.” Deoso‑ka yama‑bone‑ya mai da‑daa mai‑ka hidi mai ati namaroni.

Yeso‑ya mai baakana

¹⁶Mai ati‑ya Birato tokadabe, sodado mai‑ya yosemarine, Yeso‑ya mai baakanabonehe.

¹⁷Sodado mai ati ihi Yeso hini ewene‑bona‑ya diwane, adami‑ya tokemarine. Adami oni, ‘ai tati tone wai’ toha, oda ati‑ya adami oni “Kokota” tohani.

¹⁸Adami‑ya Yeso kobone, awa‑ya mai baahikanemarine. Awa one‑kaya mai fama mai‑ya mai baakana, Yeso fowari‑kaya mai demekana, mai bai‑ya Yeso kawemarine.

¹⁹Birato ati ene yama hani‑ya mai kanahana, Yeso ewene‑ya yama hani‑ya mai kanawaana,

“Yeso Nasare‑ke, Yodeo mai‑ka hidi webote amane.” Yama hani ati namaroni,

²⁰Oda ati‑ka yama hani toha, homano mai ati‑ka yama hani toha, Kereko mai ati‑ka yama hani toha neni. Yerosare yakari‑ya Yeso‑ya mai baakana, Yodeo mai dama yama hani‑ya mai kadikamaroni.

²¹Deoso‑ka yama‑bone‑ya mai da‑daa mai‑ka hidi, Yodeo mai toha, yama hani‑ya mai kadika, mai yawa, Birato‑ya mai hiyara,

“‘Yodeo mai‑ka hidi webote amane.’ Yama hani ati na,

sobatikanahi.

‘Yodeo mai‑ka hidi webote‑mona ati ne.’ Fara tikanahanomakibisahi.” Mai ati namaroni.

²²“Yama hani one okanahanomakiraboneni.” Birato ati nemarine.

²³Awa‑ya Yeso‑ya mai nawaani hawa tohiya, Yeso‑ka bora mese‑ka‑ya sodado mai 4 kana bora ibe‑ya mai ebekanamaroni. Sodado mai‑nima mai‑ka bora ibe oharirina‑ya mai kayafamaroni. Yeso‑ka bora one yaba dasikara hasinamaroni.

²⁴“Bora yaba ai sibiriyahi. Hiniya yati bide ai wereniya, ai owa ohari bora‑ya kayafeya, yama ai wataboneni.” Sodado mai ati namaroni.

Deoso‑ka yama hani ati‑nima yama nawahani.

“Oka bora‑ya mai ebekana, yati bide‑ya mai wereneni, oka bora one‑ya mai kayafabonehe.” Deoso‑ka yama hani ati na,

fara ati‑nima sodado mai ihi nawahamaroni.

²⁵Yeso madi toha, madise toha, Kobasi fadi i‑di Mariya toha, Mariya Madarena, mai na, Yeso kawe yakari‑ya oda nahamaroni.

²⁶Yeso‑ka no‑nofa ama·oni. Yeso madi yowi‑ya owaa, oda‑ya awe, madi‑ya hiyare,

“Ami, tika dao amane, hari.” Yeso ati nemarine.

²⁷Owa‑ya hiyare,

“Tika ami amani, haro.” Ati nemarine.

Oka yobe‑ya Yeso madi sawiwahamaroni.

²⁸Yama nafi hawa toha, fara Yeso hiwata, ati yanane,

“Owa bako hokoni.” Ati nemarine, Deoso‑ka yama hani ati‑nima yama nabonehe.

²⁹Fino kofate kahafa‑ya kawita, yama kitara‑ya fino kofate‑ya sorone, isobo ini‑ya dasihinakosa, yorihikamisa, Yeso iridi‑ya hidinemarine.

³⁰Fino‑ya to‑tomine,

“Yama nafi hawa tohini.” Ati ne,

tati winarise, abemarine.

Yeso abo‑ya mai nafoya

³¹Deoso‑ka feriado amosabote yananabone, feriado‑ka yama hawa tohi‑bone‑ka mahi toha,

“Deoso‑ka feriado‑ya awa‑ya mai aboi waanariyahi.” Oda‑ka hidi mai atibodi ati na, Birato‑ya mai tokamaroni.

“Birato, awa‑ya mai waana tiwati ihi mai isi‑ya mai bakatokanihi, mai mai soba kanibote hinabonehe.” Mai ati namaroni.

³²Birato ati ene Yeso fowari‑kaya mai waanikima, mai isi‑ya sodado mai bakatokanihemaroni.

³³Yeso abe‑ya mai awa, Yeso iso‑ya mai bakatokanibisaramaroni.

³⁴Yeso abo fowari bodi‑ya sodado idemarine, wabise‑ya, ama faha‑ya fama tokafodamaroni.

³⁵19:35 Yowaho hini tamine‑ya hiyare, yama nafi‑ya Yowaho awe, tamine‑ya kaminene.Hibati‑ya yama hiawamaro tamine‑ya kaminawahe, keyehe‑ya hirini awirene, Yeso ati dai nofawahabonehe.

³⁶Yeso tamine‑ya Deoso hiyarematamonane.

“Tone bakatoterebona.” Deoso‑ka yama hani ati na, ati‑nima nawahane.

³⁷“Maki‑ya mai idi‑ya mai kiihinebonane.” Deoso‑ka Yama hani one ati na,

fare Yeso fowari bodi‑ya mai idawahineni.

³⁸Makobote Yose Arimateya‑ke Birato‑ya tokematane. Yeso ati‑ya nofe, oda‑ka hidi mai‑ya nayofine, hini tamine‑ya kamini awiremarine. Fare Yeso abo‑ya haanemarine, hikamebonaha. Birato ati sibare, Yeso abo‑ya towakamemarine.

³⁹Yose Arimateya‑ke Nikodimo‑ya famemarine. Fare hibati‑ya yama soki‑ya Yeso‑ya hiyaremarine. Mira aroe‑ya daba‑ya kakamemarine, Yeso abo‑ya ketehebonaha. Yama ke‑ketehe dama, 33 kiro tohamaroni.

⁴⁰Yeso abo bora wefe wamani‑ya mai kinihikane, bora‑ya yama ke‑ketehe sawemeteni. Ai owa abeya, haa‑nima Yodeo oda ene teni.

⁴¹Yeso mai baakani yakari‑ya fadara toha, fara‑ya ai temene‑bone‑ka yati hodi mai wamahinamete, hibati‑ya ai abo foyarameteni.

⁴²Deoso‑ka feriado koboni yanatona ihi ahiyata‑ya Yeso abo‑ya mai nafoyameteni.

Yeso kitame

¹Domiko yama wahi awisari‑ya Mariya Madarena bosana, yati hodi‑ya toka, yati hodi barikara‑ya awameteni.

²Yeso‑ka no‑nofa ama·oni. Simaho Bedoro oda fama, oda‑ya Mariya kanani kama, oda‑ya haana,

“Ai noko beheri‑ya ai‑ka Ayo abo‑ya mai towakamanini.” Mariya Madarena ati namaroni.

³Yati hodi‑ya oda towakamamaroni, oda famaro.

⁴Oda kanani towakama, owa kanani kitabisa, owa koboni dai tohamaroni.

⁵Moi·owite, bora wefe wamani oawa, okiyomaramaroni.

⁶Simaho Bedoro yoto, kobonamaki, yati hodi‑ya tokiyome, bora wefe wamani fore‑ya awe,

⁷bora one Yeso tati‑ya mai kinihikana‑ya awa nemarine. Yeso tati‑ya bora mai kinihikana, modokani amosa, ahiyata‑ya foremaroni.

⁸Okiyamake, bora honita owa, Yeso kitame owatomarine.

⁹Yeso kitamebona tamine Deoso‑ka yama hani‑ya sawi, tamine yokana oda watosa rene.

¹⁰I‑di Bedoro oda fama, oda tabaro‑ya oda winitokanamamaroni.

¹¹Yati hodi yowi‑ya Mariya waa, ohina, moinisa, yati hodi‑ya kiina,

¹²Deoso‑ka yo‑yose mai fama bora sawa‑ya mai weyenikima mai‑ya Mariya awameteni. Yeso abo hibati‑ya fori‑kaya mai demenare, Yeso teme kafori‑kaya owa itari, Yeso tati fori‑kaya owa itari nematane.

¹³I‑di Mariya‑ya mai haana,

“Sima, hini yamata ihi ohitina?” Deoso‑ka yo‑yose mai ati na,

“Owa noko beheri‑kaya Okoyo abo‑ya mai towakamanini.” Mariya ati nameteni.

¹⁴Mariya kiinawama, Yeso kitame‑ya awa,

“Bare amane.” Atibodi ati namaroni.

¹⁵“Sima, hini yamata ihi ohitina? Ebeni‑ke sibatiniti?” Yeso ati ne,

“Fadara‑ya na‑namosa amane.” Mariya atibodi ati na,

“Ayo, Okoyo tiwakameya, owa‑ya yofitikanahi, owakamebonane.” Mariya ati nameteni.

¹⁶“Mariya.” Yeso ati ne,

ati ene Mariya kiinimisa, Yeso‑ya watowaha,

“Haboni.” Mariya ati nameteni.

Dai ati‑ya,

“Oda‑ya ka‑kanawato amatini.” Ai ati teni.

¹⁷“Hibareya owa damatiriyahi. Okobi‑ya okomi awisa orani. Oka soho mai‑ya tikamiya, mai tihiyarahi.

‘Ai‑ka Abi‑ya okomabone, ai‑ka Deoso‑ya okomaboneni. Ati nene.’ Tiyahi.” Yeso ati nematane.

¹⁸Yeso‑ya oda da‑daba oda‑ya Mariya Madarena kama,

“Ai‑ka Ayo oawani!” Mariya ati na, makobote Yeso ati‑ya kaminamaroni.

¹⁹Oda‑ka hidi mai oda nayofina, Domiko yama soki‑ya yobe doro‑ya Yeso‑ya oda da‑daba oda yorotokana, nokobi oda barikana, Yeso oda teberi‑ya fodoki,

“‘Deoso, dai‑ya kasomayaho.’ Oneni.” Ati nemarine.

²⁰Hiyari hawa tohe, yehe‑ya yofikana, fowari bodi‑ya yofikana nemarine. Oda‑ka Ayo oda awa, oda ya‑yaini nafemaroni.

²¹“‘Deoso dai‑ya kasomayaho.’ Oneni.

Okobi owa‑ya yosemari‑nima dai‑ya oyosewahineni.” Yeso ati nemarine.

²²Makobote oda‑ya foowane,

“Deoso‑ka Doni dai‑ya foyawahebonane.

²³Mai amosara mai‑ya dai ati somawamariya, Deoso mai‑ya ati somawamaharirebonane. Mai‑ya dai ati somawamiya, Deoso mai‑ya ati somawamaharibonane.” Yeso ati nemarine.

Tome Yeso‑ya awe

²⁴Oda 12 toha oda‑ka owa i‑di Tome tohe, Yeso kobonameya, oda‑ya sawiremarine. I‑di Tome oni owa, i‑di Didimo tohemarine.

²⁵“Tome, ai‑ka Ayo oda awani.” Oda ati na,

“Yeso yehe‑ka birako ihi oawiya, owa yehe yori·onisa, fowari bodi‑ka ihi oawiya, owa yehe yori·onisa oniya, dai ati onofaboneni.” Tome ati nemarine.

²⁶Mahi 8 kane‑ya i‑di Tome oda‑ya sawi, oda yorotokanamatasa, nokobi oda barikana, Yeso oda teberi‑ya fodomakitase,

“‘Deoso dai‑ya kasomayaho.’ Oneni.” Yeso ati nemarine.

²⁷Tome‑ya Yeso hiyare,

“Owa yehe hodone‑ya tiwa yehe yoritinisa, owa fowari bodi‑ya tiwa yehe yoritinisa tinahi. Okitamaramone tiwatibodi ati namariyahi. Okitama, owa tamine tinofahi.” Yeso ati nemarine.

²⁸“Oka Ayo amatini. Oka Deoso amatini.” I‑di Tome ati nemarine.

²⁹“Okitama, owa abano tiawa, owa tamine tinofawahineni. Owa kitami‑ya mai awara, hiniya owa tamine‑ya mai nofa, mai‑ya Deoso kasomebonane.” Yeso ati nemarine.

Yeso ene kitabote dame

³⁰Yeso ene kitabote damemari, Yeso‑ya oda da‑daba ene oda awe, ene nafi okanahano awirene.

³¹Yeso ene kote okanahano, Yeso tamine dai nofebonaha. Yeso i‑di Kirisito amane. Deoso Bidi amane. Tamine dai nofeya, Yeso ene dai abaraboneni.

¹Makobote Tiberiyadi wara webote widi‑ya Yeso‑ya oda da‑daba Yeso oda awamatasamaro tamine okaminaboneni.

²Simaho Bedoro toha, Tome Didimo toha, Natanaeo toha, Yeso‑ya oda da‑daba oda one fama, okoyo oda fama, oda na, oda yorotokanamaroni. (Natanaeo tabaro Kana Karireya‑ka amani.)

³“Faha koro·omatiya.” Simaho Bedoro ati ne,

“Ai dabahi.” Oda ati namaroni.

Kanawa‑ya oda foya, yama soki‑ya tahafa oda werenaba, oda honita tohamaroni.

⁴Yama wahabisari‑ya faha widi‑ya Yeso wai, oda awa,

“Bare amane.” Oda atibodi ati namaroni.

⁵21:5 Mai hawa toha, madehe mai toharani. Ai‑ka madehe ai nofi nafi‑nima Yeso mai‑ya nofi nafi. “Madehe” Yeso ati ne, mai‑ya nofi nafi tamine amane.Oda‑ya haane,

“Madehe, fai aba mai‑ya?” Yeso ati ne,

“Aba mai awirani.” Oda ati namaroni.

⁶“Dai ka‑kanika‑ya tahafa dai wereniya, aba mai dai waseboneni.” Yeso ati ne,

ati‑nima oda na, aba mai dama mai ihi tahafa kanaha, oda kakidiramaroni.

⁷Simaho Bedoro yama‑ya anine, bora neme‑ya weyeremarine. Yeso‑ka no‑nofa ama·oni. I‑di Bedoro ohiyara,

“Ai‑ka Ayo amane.” Ona,

owati‑ya mite, bora neme‑ya weyename, faha‑ya bokemarine, Yeso‑ya tokebonaha.

⁸Faha widi yakari, metoro 90 toha‑ya oda tohamaroni. Kanawa oda orinibisa, tahafa‑ya aba mai oda horokanamaroni. Yeso wai‑kaya oda towakamaroni.

⁹Faha widi‑ya oda kobokaniya, yifo toha, aba mai tabasini toha, baho toha na, yama nafi hawa toha oda awamaroni.

¹⁰“Aba mai dai nawase mai one dai kakamakihi.” Yeso ati nemarine.

¹¹Kanawa‑ya Simaho Bedoro tokomatase, tahafa kiba oda horoni marosamaroni. Aba webote 153 mai toha, tahafa‑ya mai foya, mai kanaha, tahafa abara, sibitoni awira ihi, “Ka!” Owatibodi ati namaroni.

¹²“Ai tafahi.” Yeso ati ne,

Yeso oda nayofina,

“Ebeni‑ke amatiniti?” Oda ati ramaroni.

Oda‑ka Ayo oda wato hawa tohemarine.

¹³Baho‑ya oda‑ya Yeso daane, aba mai‑ya oda‑ya daanamakimarine.

¹⁴Yeso kitami hawa tohe, oda awi 3 tohemarine.

Bedoro‑ya Yeso hiyare

¹⁵21:15 Yeso‑ka kaneiro bidi i‑di Yeso ati‑ya mai nofa mai tamine amani. Fara mai‑ya Bedoro kanawatobonaha.Oda tafi hawa toha, Simaho Bedoro‑ya hiyare,

“Simaho, Yoaho bidi amatini. Owa tinofi nafero, mai one owa‑ya nofi bi‑bidi na awineni?” Yeso ati nemarine.

“Ayo, tiwa onofa, owa tiwatoneni.” Bedoro ati nemarine.

“Oka kaneiro bidi mai tinatafahi.” Yeso ati nemarine.

¹⁶“Simaho, Yoaho bidi amatini. Owa tinofi nafineni?” Yeso ati namatasemarine.

“Ayo, tiwa onofa, tiwatoneni.” Bedoro ati namatasemarine.

“Oka kaneiro mai tikasomahi.” Yeso ati nemarine.

¹⁷Bedoro‑ya hiyaramatase,

“Simaho, Yoaho bidi amatini. Owa tinofiraniha?” Ati namatasemarine.

Yeso ati yanani 3 tohe ene Bedoro ati yawe,

“Ayo, yama nafi tiwatoneni. Tiwa onofa, owa tiwatoneni.” Ati nemarine.

“Oka kaneiro mai tinatafahi.

¹⁸Owati amosabote dai mitahi. Yetene tihiya, tika bora sakotina, tiwati toki‑kaya tikameteni. Makobote bote tihiya, tiwa yehe daatowitikimabone, bora‑ya tiwa‑ya mai sakonihebone, tiwati toki nofariya tiwa‑ya mai towakamaboneni.” Yeso ati nemarine.

¹⁹Bedoro‑ya mai nanahababone mai tamine‑ya Yeso kaminemarine. Bedoro abe ene Deoso‑ya mai kahiyarabone ati ne, ati amane.

“Bedoro owa‑ya tisawihi.” Yeso ati nemarine.

²⁰Mai fama mai towaka, okomake, i‑di Bedoro kiinawame, owa‑ya awemarine. Yeso‑ka no‑nofa ama·oni. Hibati‑ya oda tafi‑ya Yeso bako‑kaya oforiwite, Yeso ohiyara,

“Ayo, ebeni‑ke tiwa‑ya daanabati?” Onamaroni.

²¹Bedoro owa‑ya awe, Yeso‑ya hiyare,

“Ayo, hini yamata‑nima neba ababonati, hari?” Bedoro ati nemarine.

²²“Oka owa tamine‑ya tiwatibodi kadikariyahi. Okomatasiya, owati ihi oka owa abi awisareya, tiyawariyahi. Owa‑ya tisawiyahi.” Yeso ati nemarine.

²³Yeso ati tamine‑ya oda one mita,

“Abaterebonane.” Mai ati na,

O·abarabone, Yeso ati ni awire,

“Oka owa tamine‑ya tiwatibodi kadikariyahi. Okomatasiya, owati ihi oka owa abi awisareya, tiyawariyahi.” Yeso ati nibisemarine.

Yowaho‑ka yama hani

²⁴Yeso‑ya oda da‑daba owa ama·oni. Yeso tamine ohiyare, tamine okanahano, owati oda wato, ati yokana tohene.

²⁵Yeso ene damemari, ene dami oda kanahano‑mana, yama hani dama neni. Feye amani.