TIYAKO

Tiyako‑ka yama hani

¹Tiyako ama·oni. Deoso, ai‑ka Ayo Yeso Kirisito ne mai‑ka yama anini‑ya ani·oteni. Isara·eo‑ka nodi dai toha, mai tabori dami‑ya dai wi‑wina dai‑ka yama hani‑bone okanahanaboneni. Dai‑ya owati foyani.

Yama towe dai‑ya kobona dai ene‑ya Deoso kakatomatene

²Oka dai toha, yama amosara dai‑ya kobona, dai yawara, dai ya‑yainibisahi.

³Deoso tabaro hawine‑ya ai yakana, yama nafi ai watora, yama ai‑ya kobona, ai‑ya kasomabone ai watowaha, ai habo siitora, Deoso ati ai nofi ba‑basi naboneni.

⁴Deoso ati dai nofi ba‑basi na, dai ene amosawama, dai habo siitora, dai hawa toha‑nima dai na, yama one wadamarani.

⁵Yama dai watora, Deoso dai hiyariya, Deoso ati ene yama dai watowahaboneni. Deoso‑ya yama wa‑wato dai haaniya, Deoso yawaterebona, yama‑ya daanebonane.

⁶Deoso dai haana,

“Oka yama‑bone‑ya Deoso daanebonane.” Dai atibodi ati nahi.

“Oka yama‑bone‑ya daaneba awane yama‑ya daareba awane.” Dai atibodi ati riyahi.

Yama hakikini ihi faha rikana, rike‑nima dai atibodi ati riyahi,

⁷Faha rike‑nima mai atibodi ati na, yama‑ya mai atibodi koboni watora, mai‑ka yama‑bone‑ya Deoso daarebonane.

⁸Mahi owa‑ya yama hakikini ihi faha rike kowani‑kaya toka, mahi owa‑ya ahini‑kaya kake, fara‑nima mai atibodi ati toha, mai atibodi‑nima mai ihi naboneni.

⁹Deoso‑ka dai toha, yinero dai kihara, Deoso dai‑ya nofi nafi ene dai ya‑yainahi.

¹⁰Yinero dame dai kiha, mai‑nima dai na, awa mowe amosa aba kanibote na‑nima dai abaharebone, dai ya‑yainasa nahi.

¹¹Mahi kaki, hewene kite ene awa bono ade wayatona, mowe aba, sona, amosamaterani. Yama dama‑ya mai kiha, kabihi bara mowe‑nima mai teni. Yama‑ya mai anina, mai‑ka yinero damebona mai ati na, mai aba, mai‑ka yinero mai‑ya kasomarebonane.

¹²Dai ene‑ya Deoso kakatome, yama towe awi dai‑ya kobona, dai atibodi yawara, Deoso ati dai tokadabanasa na, Deoso dai‑ya kasomebonane. Makobote dai tati‑ya mai‑ka Hidi webote tati borone‑nima ne‑ya dai‑ya daanebonane. Dai tamine‑ya Deoso hiyare,

“Owa‑ya mai nofa, owa tabaro‑ya mai winabisaboneni.” Deoso ati nematane.

¹³Yama amosara‑ya dai atibodi nokotonihe,

“Deoso ene amane, yama amosara‑ya owatibodi nokotonihero.” Dai ati riyahi.

Deoso ene amose hinama tohe, ene towe wadare, ati ene ai ene towe tohaterani.

¹⁴Ai atibodi bote yama amosara‑ya nokotoniteni. Ai‑ya keyeheteni, ati ai nofabonehe.

¹⁵Ai atibodi bote ati‑ya ai nokotonihe, ai ene amosanadira, ai ababoneni.

¹⁶Soho, dai onofa, dai atibodi bote keyehe‑ya dai‑ya hirikana, ati dai tokadabariyahi.

¹⁷Deoso ene yama amosa ai kayafa, mahi, abariko, amowa mai na, mai‑ya wamane, ai wehene‑bone‑ya Deoso daanematane. Hibati‑ke‑nima ne, hibayata‑ke tohasa ne, fare‑nima tohatebonane.

¹⁸Deoso ati ai nofi awisariya, ai‑ya kadike, Ati Amosabote ai nofawahe, hika ewe ai tohawaha, hika yama wamani‑ka hidi ai tohawahaboneni.

Deoso ati‑nima ai nahi

¹⁹Oka dai toha, dai onofa, owati dai mitahi. Dai narabo hawihi. Dai ati yana kanibote rihi, dai yawa kanibote rihi nahi.

²⁰Ai yawa, ai ene amosarani. Ai ene amosabone Deoso ati nemata, ai yawa, Deoso ati‑nima ai ni awirani.

²¹Dai ene amosaramaro‑nima dai ene namariyahi. Dai ati yanana, dai ati amosahi. Mai ati towe, mai ati‑nima dai ati rihi, mai ihi towe, mai ihi‑nima dai ene rihi nahi. Deoso hini ati‑ya dai atibodi‑ya kanahanomata, ati dai nofe, tabaro‑ya dai winamakeboneni.

²²Deoso ati dai mite, ati dai tokadabaho. Ati dai mite, ati dai tokadabare, dai atibodi bote dai‑ya keyeheboneni.

²³Deoso ati dai mite, ati dai tokadabare, isibiyo‑ya ai noko‑ya ai awa‑nima dai nineni.

²⁴Isibiyo‑ya dai noko besene dai awa, dai toka, dai noko besene‑ya dai atibodi watomarani.

²⁵Deoso Ati Amosabote ati dai mite, ati dai kadike, ati dai fawani awire, ati dai tokadaba ne, Satanasi dai‑ya yaditonamare, Deoso dai‑ya kasomebonane.

²⁶Deoso ati tinofamone tina, tiwati tinawadi amosara, keyehe‑ya hiritineni. Deoso ati tinofamone tina, tiwatibodi ati tohara, tiwati honita tohani.

²⁷Dai ene‑ya ai‑ka Abi i‑di Deoso nofebona dai ati na, haa‑nima dai ene nahi. Mai‑ka abi wadare mai dai kasoma, mai‑ka yibote aba, mai dai kasoma dai nahi. Deoso ati‑ya mai nofara mai ihi‑nima dai ene riyahi.

Mai mese dai kadikariyahi

¹Oka soho dai toha, ai‑ka Hidi i‑di Yeso Kirisito amosabote ati‑ya dai no‑nofa, owati dai mitahi. Mai mese dai kadikariyahi. Yeso mai nafi‑ya nofi‑nima mai dai nofaharihi.

²Deoso‑ya dai hi‑hiyara‑ke yobe‑ya mai fama mai kakiyamake, ai owa bora amosa‑ya weye, oro wamani‑ya sakone, ai owa bora bote‑ya weyene‑ya fame dai awa,

³Bora amosa‑ya weyene‑ya dai awa,

“Kadera amosa‑ya tiwitarihi.” Dai one ati teni.

Bora bote‑ya weyene‑ya dai awa,

“Aka‑ya tiwaahi. Tinofiya, yani baki‑ya tiwitari tinahi.” Dai one ati nihi teni.

⁴Mai mese‑ta dai kadika, mai atibodi dai awara, haa‑nima dai ene na, dai ati kasironeni.

⁵Oka soho dai toha, owati dai mitahi. Yama dama‑ya mai kihara Deoso mai‑ya kadikemata, Deoso ati‑ya mai nofi ba‑basi na, mai tabori‑bone‑ya wamane,

“Owati‑ya dai no‑nofa owa tabaro‑ya dai winaboneni.” Deoso ati nematane.

⁶Yama‑ya mai kihara mai‑ya dai ene amosarani. Yama dama‑ya mai kiha mai‑ya dai nofa, mai ihi dai watokarini? Yama dama‑ya mai kiha, dai‑ya mai wata, kadeya‑ya dai‑ya mai nawaateni,

⁷Dai‑ka Hidi amosabote oni‑ya mai towe toniteni.

⁸“Hini dai‑ya dai nofi‑nima dai one dai nofahi.” Deoso‑ka yama hani ati nineni.

Deoso ati dai tokadabiya, yama sibaraboneni.

⁹Mai‑ka bora amosa mai dai kasomi ohare, dai ene ati kasira, Deoso ati mai hikanahanomata, ati dai tokadabara, towe dai tohani.

¹⁰Deoso ati ba‑basi ne‑ya dai tokadaba, ati ohari dai tokadabare, dai ene towe tohasa nineni.

¹¹Mai‑ka yobote dai aharihi, dai owa dai nanahabarihi nahi. Deoso ati nemata, ati ohari dai tokadabe, ati owa dai tokadabare, Deoso ati nafi dai tokadabara, dai ene amosarani.

¹²Dai ene, dai ati na‑ya Deoso kadikebona, dai ene, dai ati na, amosahi. Deoso dai‑ya nofe, dai‑ya kasomebona ati nane.

¹³Ai owa‑ya ai ati somawamara, Deoso ai‑ya ati somawamarebonane. Ai owa‑ya ai ati somawamiya, Deoso ai‑ya ati somawamaharibonane.

Hini Deoso ati‑ya ai ati nofa, ai ati honita tohateni

¹⁴Soho, Deoso ati‑ya mai ati nofa, ati mai hikadabare, mai‑ya kasomarebonane. Ati mai hikadabare, mai ati‑ya Deoso nofabana? Mai ati‑ya nofarebonane.

¹⁵Dai one tefe wadarihi, mai‑ka bora wadarihi na,

¹⁶mai dai kasomara, hiniya mai dai hiyara,

“Dai tokiya dai ya‑yaina, dai fimirihi, dai siri toharihi nahi.” Dai ati na.

Dai ati mai‑ya kasomibana? Mai‑ya dai ati kasomaraboneni.

¹⁷Fara‑nima Deoso ati‑ya ai ati nofa, Deoso ati ai tokadabara, ai ati honita tohateni.

¹⁸Deoso ati‑ya dai ati nofa, feye amani dai ati na. Hiniya Deoso ati‑ya dai ati nofa, dai‑ya mai watoraboneni. Deoso ati onofe, ati okadabe, owa ene‑ya mai awiya, Deoso ati onofa, owa‑ya mai watowahaboneni.

¹⁹“Deoso oharine.” Dai ati na,

Dai ati‑nima madi towe mai ati na, Deoso ene mai habi siitoteni. Dai ati ohare sibara, yama one hasinineni.

²⁰Yama‑ya dai wato awisara awineni. Deoso ati‑ya mai ati nofa, Deoso ati‑ya mai tokadabara, mai ati honita toha, dai awi awiriya, dai ka‑kana naba awineni.

²¹Ai‑ka idi i‑di Abaraho Deoso ati‑ya tokadabe, bidi‑ya nanahabebona ene Deoso ati somawame ati yanane,

“Abaraho, tiwa ene amosini.” Deoso ati nematane.

²²Yama dai watokarini? Deoso ati‑ya Abaraho ati nofe, hiniya ati tohi awirane, Deoso ati‑ya tokadabematane. Abaraho ati toha, ene toha nematane.

²³Deoso‑ka yama hani ati‑nima yama na, i‑di Abaraho Deoso ati‑ya nofe ene i‑di Abaraho‑ya Deoso hiyare,

“Abaraho, tiwa ene amosini.” Ati ne.

“Deoso‑ka no‑nofa i‑di Abaraho amane.” Mai ati nameteni.

²⁴Deoso ati ai tokadaba, Deoso ai‑ya ati somawamatene. Hiniya Deoso ati ai ati nofa, Deoso ai‑ya ati somawamarebonane.

²⁵Abaraho‑nima i‑di Habi nameteni. Hibati‑ya i‑di Habi mai makidi dami‑ya dakoramete, makobote Deoso ati‑ya nofawaha, i‑di Yosowe‑ka mai fama mai kobokana, mai‑ya i‑di Habi kema, mai‑ya kasoma, hawi one‑kaya sodado mai‑ya yosemeteni, i‑di Yosowe‑ka mai abarabonehe. I‑di Habi ihi‑ya Deoso awe, i‑di Habi‑ya ati somawamematane.

²⁶Ai abano toha, ai korimari wadamara, ai abano abateni. Fara‑nima Deoso ati‑ya ai ati nofa, Deoso ati ai tokadabara, ai ati abateni.

Ai ebene tamine

¹Oka soho dai toha, owati dai mitahi. Dai ene amosara mai‑ya dai kanawatoriyahi. Mai‑ya oda ka‑kanawato oda ene‑ya Deoso kakatomi ba‑basi ne. Oda ene amosara, oda‑ya weeni ba‑basi nebonane.

²Deoso hawine‑ya ai yakana, ai dama ai taratokani dama, ai ati ene ai taratokani awira‑mani, ai ene amosa hinama toha neni.

³Kafaro ai ati‑ya tokadabebona, iridi‑ya feho bide ai nafoya, feho bide ai hokana, ai toki‑bone‑kaya kafaro tokawahatene.

⁴Fara‑nima maboro ne. Maboro webote yama hakikini kita ihi yakani kite, yama ho‑hokakana bide‑ya hidi hokahiwame, hidi ati toki‑kaya tokatene.

⁵Fara‑nima ai ebene na. Ai ebene‑ya ai ati yanateni. Ai ebene bide toha, ai‑ya ati tonanafiteni. Barito ohari i‑isi ne ene awa webote nafi hiriteni.

⁶Ai ebene yifo hirini‑nima na. Ai ebene ene amosara damateni. Ai abano kobobona, ai ebene toha, ene ai abano kabatata na‑nima ai teni. Ai ebene ene mai dama mai atibodi hate‑nima na, komateni, Satanasi ene ai ebene mai‑ya nahate‑nima teni.

⁷Bani yama‑ka mai toha, bani bidi mai toha, maka mai toha, faha‑ka aba mai toha na, mai‑ya mai na‑nawada, hidi‑ya mai kakoterani.

⁸Ai ebene ati hami fawaterani. Ai ati yawa kanibote na, iha‑nima ai ati one teni.

⁹Ai ebene‑ya ai‑ka Abi i‑di Deoso, Bidi i‑di Yeso eyehe ai kahiyara, ai one Deoso‑nima mai na, mai wamahinamete, mai ai towe tonihi teni.

¹⁰Ai ebene ohare‑ya ai one ai kahiyara, ai one ai towe tonihi teni. Soho, haa‑nima dai ati riyahi.

¹¹Wami hodi‑ya faha amosa kimisa, mahi‑nima amosateni. Hodi one‑kaya faha sao kiha, kimisa, mahi‑nima sao kihateni. Hodi ohare‑ya mahi owa‑ya faha amosa, mahi owa‑ya faha sao kihaterani.

¹²Oka soho dai toha, owati dai mitahi. Fiko ade‑ya orifera bono wadaterene. Ofa ade‑ya fiko boni wadarihi teni. Faha hodi sao kiha‑ya faha amosa kimisaterani.

Deoso‑ka wa‑wato dai kayafahi

¹³Yama‑ya dai wa‑wato dai ene amosa tamine‑ya dai hiyari awira, mai‑ya dai kasoma, dai ene amosa‑ya mai awa, yama dai wata dai‑ya mai watowahaboneni.

¹⁴Yama dai atibodi hikayaha‑ya mai one kayafa, mai‑ya dai atibodi kako, yama dai nokotonihe dai kayafabone, mai one dai tai na, haa‑nima dai atibodi na, dai tamine dai kahiyarariyahi. Dai‑ya dai kahiyara, keyehe‑ya dai hiriteni.

¹⁵Haa‑nima Deoso ene terene. Haa‑nima Satanasi ati‑ya mai no‑nofa mai ihi teni.

¹⁶Yama‑ya mai one kayafa mai ihi mai‑ya dai atibodi kaka, dai one‑ya dai taina, dai ene amosara hinama toha, dai ibi kakaboneni dai nafi.

¹⁷Deoso ene yama‑ya mai wato yokana toha, mai ihi amosa mai ibi weerihi, mai ati kitarihi, mai one ati‑ya mai mita, mai one tosaware, mai‑ya mai ati somawamateni. Mai ihi amosa dama, mai dami‑ya mai nofa, mai atibodi ati‑nima mai ihi teni.

¹⁸Mai ati ihi mai one ibi weenamara, mai ibi nofa, mai ati ihi mai one Deoso ati‑ya tokadabamaki naboneni.

Dai atibodi bote ati dai tokadabariyahi

¹Hini yamata ihi dai ibi wee, dai ibi kakoniti? Dai atibodi bote ati‑nima dai ene tohasa nani.

²Yama dai atibodi kobohina‑ya dai kayafara, mai‑ya dai ati nanahabateni. Mai‑ka yama dai atibodi kobohina‑ya dai‑ya mai daara, mai‑ya dai weena, mai‑ya dai bisiteni. Yama dai atibodi kobohina‑ya Deoso‑ya dai haara, yama dai kayafarani.

³Dai atibodi bote yama ati kobohina, dai haana‑ya Deoso daarene, dai atibodi bote ati dai tokadabarabonehe.

⁴Mai dami‑ya mai da‑dakora mai‑nima dai na, yama dai watokarini? Satanasi‑ka yama ai nokotonihe Deoso ai‑ka no‑nofa tohaterebonane. Satanasi‑ka ai‑ya mai nofabone mai ihi‑nima ai ene na, Deoso ai ene‑ya kakotebonane.

⁵Deoso ene hika Doni ai‑ya sawi, ai‑ya kayawi kitebona Deoso‑ka yama hani ati na, ati honita toha‑mone dai ati na awineni. Deoso ati honita tohaterene.

⁶Deoso ai‑ya kasomemarine, ati ai tokadabebonaha.

“Hini mai‑ya mai nokotonihe, Deoso mai‑ya kasomi awirebonane. Ai‑ya ai tonanafira, Deoso ai‑ya kasomatebonane.” Deoso‑ka yama hani ati nineni.

⁷Hini dai‑ya dai nokotonira. Deoso‑ta dai nokotonibisa, Satanasi ati dai nofare, kananebonane.

⁸Deoso ati‑ya dai atibodi ati tokadaba, Deoso dai‑ya kasomebonane, ati dai nofi nafibonaha. Dai ene amosara dai ene dai kamina kanibote nahi. Deoso ati kote‑ya dai atibodi ati tokadaba, Satanasi ati kote‑ya dai ati tokadabahari na, towe dai amani. Deoso ati‑ya dai tokadabi ohari kanibote nahi.

⁹Dai ene amosara ene dai ya‑yaira, dai ohinahi. Satanasi ati‑ya mai no‑nofa mai ihi amosara mai ya‑yaina, mai hahateni. Dai‑ta dai ene amosara dai ohinibisahi.

¹⁰Ai‑ka Hidi‑ya dai‑ya dai ati bi‑bidi nihe, ai‑ka Hidi dai‑ya tonanafibisebonane.

¹¹Oka soho dai toha, owati dai mitahi. Dai owa ene dai kadikariyahi. Dai owa atibodi dai watora, Deoso‑ta hiwatobisane. Dai owa ene dai kadikarabone Deoso ati ne. Dai owa ene dai kadika‑mani, Deoso ati dai tokadabara, Deoso yama‑ya wato awire, dai‑ta, dai watobisa‑mone dai atibodi ati neni.

¹²Ai atibodi‑ya a‑awa Deoso ohari‑ta tohe, fara ohari‑ta mai ene‑ya kadikiyahi. Hini ene ai one aba, hini ene ai owa hasi nane. Dai‑ta dai owa ene dai kadikariyahi.

Mahi owa tamine ai watoterene

¹³Owati dai mitahi. Dai atibodi yama‑ya watamone dai ati na awineni.

“Aka‑ya okiya, faha fowe ohari‑ya mai tabori‑ya owiniya, yama ani·oniya, oka yinero tonafibonane.” Dai ati na awineni.

¹⁴Yama‑ya dai wato awirini. Ai amoni ohare‑ka yama tamine dai wato awirani. Hini yamata‑nima ai niti? Yama asawi‑nima ai na, yama asawi fawa kanibote teni. Fara‑nima ai na, hibayata ai naha, ai fawa kanibote teni.

¹⁵Haa‑nima dai ati nahi.

“Deoso hinofiya, hasi·oniya, haa‑nima onaboneni.” Dai ati nahi.

¹⁶Yama‑ya dai watamone dai ati na, dai‑ya dai kahiyara, dai ati‑ya Deoso nofaterene.

¹⁷Yama amosa dai wata, yama amosa dai ni awiriya, dai ene amosarani.

Yama dama dai kiha dai ene amosahi

¹Yinero dame dai kiha, owati dai mitahi. Dai ya‑yairiyahi. Yama amosara‑ya dai kayafabone dai ohinibisahi. Makobote dai komene kitaboneni.

²Dai‑ka yinero aba, dai‑ka bora‑ya yama abe kaba nineni.

³Dai‑ka oro, dai‑ka barata ne, fehoso‑nima hikaba, dai abi yanatoniya, dai‑ka yinero‑ka fehoso‑ya Deoso aweya, dai ene‑ya kadikebona, dai ene amosara dai‑ka yinero dai eme‑ya sarikanebonane. Dai ababone, yinero dai nokotonihe Deoso‑ya dai nokotonira.

⁴Dai‑ka yama‑ya mai anina, mai‑ka yinero‑bona dai daara, yinero‑ya dai kayawa, ai‑ka Hidi webote‑ya mai haana, mai ati‑ya mitatene. Yinero dai kayawe, dai tamine‑ya Deoso kitabote‑ya mai kaminahariteni.

⁵Dai‑ka yama‑ya mai anina, mai ihi yama dai anira, hiniya dai tafa, dai yehe‑ya dai sobina, bani watake‑nima dai nineni. Bani watake‑ya mai nanahabateni.

⁶Mai ihi amosa, dai‑ya mai weera, mai‑ya dai nanahabateni.

Deoso dai‑ya kasomebona, dai nimanaho

⁷Soho, owati dai mitahi. Dai anina, dai‑ka yinero‑ba‑ya mai daara dai yawara. Dai‑ka Ayo Yeso kamebona dai ene amosa manakone‑ya daanebona, mai ihi amosara manakone daanahari nebonane. Yamata‑ya mai ka‑kama, yamata hawa toha kanibote ra‑ya hidi mai nimana, faha kake ihi yamata yana, makobote hadabone, faha kakitasa teni.

⁸Fara‑nima yama dai nimana, dai‑ya mai kaka, dai habo siitoriyahi. Yeso kamebona kami nahorebona, dai nimanahi.

⁹Dai owa tamine dai kaminariyahi. Dai ibi soho na, dai ibi ene kadikariyahi. Ai nafi ene‑ya Ka‑kadika‑bona kamebona nokobi‑ya waane.

¹⁰Deoso ati‑ya mai mi‑mita‑mete mai tamine dai mitahi. Deoso ati‑ya mai kamina, mai‑ya mai kaka, mai‑ya mai bisina, Deoso ati‑nima yama nabone‑ya mai nimanameteni.

¹¹Deoso ati‑ya mai tokadabamete, Deoso hiyari‑ya mai fawara, mai ya‑yaiteni. I‑di Yobi tamine dai mitamaroni. Deoso‑ya i‑di Yobi nofe, kiyane, yama kome fawa kanibote ra, amoni dame‑ya Deoso hikasomematane. I‑di Yobi‑ya Deoso kasomemata, Deoso ai kasomi‑ya nofatene.

¹²Dai ati yanana, hini dai ati‑nima dai ene nahi. Yama dai nabone dai ati na, yama dai nahi. Yama‑ya dai rabone dai ati na, yama dai riyahi. Hini dai ati‑nima dai ene na, dai‑ya mai watowahaboneni.

Deoso‑ya yama‑ya dai haana,

dai ati‑nima Deoso ene nebona dai atibodi ati nahi

¹³Dai owa‑ya yama amosara kobona, atibodi kome, hini tamine‑ya Deoso‑ya hiyaraho. Dai owa‑ya yama amosa kobona, ya‑yainawahe, Deoso‑ya kahiyarebona, Deoso‑ka wayoma‑ya wayomaho.

¹⁴Dai kiyana, hibati‑ya Deoso‑ka webote mai toha, mai dai haaniya, dai tamine‑ya Deoso‑ya mai hiyariya, dai tati‑ya oyo‑ya mai keteheya, ai‑ka Hidi i‑di Yeso dai‑ya kasomebonane.

¹⁵Deoso‑ya mai hiyariya, mai ati‑ya Deoso nofebona mai atibodi ati na, Deoso dai‑ya nakitamebonane. Dai ene amosaramaro, Deoso dai‑ya ati somawamebonane.

¹⁶Dai one‑ya dai ene amosara dai tamine dai kaminahi. Dai ibi tamine Deoso‑ya hiyarahi. Dai‑ya Deoso nakitamebona, dai hiyaraho. Mai ihi amosa, Deoso‑ya mai hiyariya, mai ati ihi kita, mai ati ihi dama teni.

¹⁷I‑di Eriya ai owa tohe, Deoso‑ya hiyarematane, faha kakirabonehe. Ene ano 3 toha, ano kote tohamakiya, faha kakirameteni.

¹⁸Makobote Deoso‑ya i‑di Eriya hiyaramatase, ati ene faha kakimatasa, mai tafe‑bone yanamatasameteni.

¹⁹Oka soho dai toha, owati dai mitahi. Deoso ati‑ya dai owa nofemari, tosawari, dai ati ene dai owa ene amosawameya,

²⁰dai ene dai owa abarebona, Deoso ati somawame, ene amosare Deoso hikadikami awirebonane.