EBEREO

Ebereo mai‑ka yama hani

Yama nafi‑ka Hidi Deoso Bidi tohene

¹Hibati‑ya ai awiriya, ai‑ka idi mai‑ya Deoso hiyari dame, Deoso ati‑ya mai mi‑mita‑mete Deoso ati‑ya ai‑ka idi mai‑ya ati mai hikamine, Deoso ene wada‑ya mai one awa, ai‑ka idi mai‑ya wada‑ya mai kamina nameteni.

²Hibayata ai‑ya Deoso ati‑ya Bidi i‑di Yeso kaminawahene. Deoso ati ene yama nafi‑ya Bidi wamane, neme‑ya wama, bofe‑ya wama nematane. Makobote Deoso ati ene yama nafi‑ya Bidi kayafawahebonane.

³Deoso amosabote noko wehene nafi, noko wehene‑nima Bidi noko wehene ne Deoso‑nima Bidi ne. Ati kite ene neme toha, bofe tohasa nihi nineni. Ai ene amosara manakone wada, ai manakone‑ya nanahabe, Deoso kitabote‑ka kanika‑ya itariwahematane neme‑kaya.

⁴Deoso‑ka yo‑yose mai amosi bi‑bidi nineni. Bidi‑ta amosabote amane. Deoso Bidi‑ya nofi nafi, hika yo‑yose mai‑ya nofi bi‑bidi nane.

⁵Deoso Bidi‑ya hiyare,

“Oka dao amatini. Tika abi ama·oni.” Deoso ati nematane.

Bidi tamine‑ya hiyare,

“Oka dao tohe, owa‑ya abi nebonane.” Deoso‑ka yama hani ati nineni.

Haa‑nima hika yo‑yose‑ya hiyaraterene.

⁶Bidi‑ya yose, oda tabaro‑ya Bidi winebona, hika yo‑yose mai dami‑ya hiyare,

“Oka dao dai kahiyarahi.” Deoso ati nematane.

⁷Deoso hika yo‑yose mai tamine‑ya hiyare,

“Oka yo‑yose mai kita, yama hakikini‑nima mai ihi nihi, yama hirini‑nima mai ihi nihi teni.” Deoso ati nematane.

⁸Deoso Bidi‑ya hiyare,

“Deoso tiha, mai nafi‑ka hidi tiha, tiwa hidi tohi fawaterabone, tika mai ihi tikadika, tiwati amosa hinama tohateboneni.

⁹Mai ihi amosa, mai ihi ya‑yaitina, mai ihi amosara, mai ihi tiyawa titeni. Tiwa ene Deoso tiwa‑ya kadike, tika mai one‑ka hidi tihawahani, tiwa ya‑yaini ba‑basi naboneni.

¹⁰Yama nafi wamatina, bofe, neme na wamatinamaro, mai‑ka hidi amatini.

¹¹Makobote neme, bofe na ababone, tiwa‑ta ti·abateraboneni.

¹²Bora bote abi‑nima mai tabori abi naboneni. Tiwa‑ta bote tihaterabone fawatiteraboneni.” Deoso ati nematane.

¹³Haa‑nima hika yo‑yose mai‑ya hiyaraterene. Bidi ohari‑ya hiyarabisane,

“Oka kanika‑ya tiwitariya, tiwa‑ya mai ka‑kako, owati ihi mai mese‑ya tiwa teme kaforiwahaboneni.” Deoso ati nematane, Bidi‑ya hiyareri.

¹⁴1:14 Deoso‑ka yo‑yose mai‑ya Deoso wamahinameteni. Ai‑nima mai awira, ai abano‑nima hiniya mai sakoneni, mai‑ya ai awabonehe.Hini yamata‑nima Deoso‑ka yo‑yose mai nihi? Deoso ati ai no‑nofa, Deoso tabaro‑ya ai winabone ai‑nima mai ra, ai‑ya mai kasomabone, Deoso mai‑ya wamanematane.

Dai noko wadahi

¹Deoso ati dai mitemari, ati dai tokadabebona dai ati na, dai ati kadamowamariya, ati‑nima dai naboneni.

²Deoso ati‑ya hika yo‑yose mai kamina, ati‑ya ai‑ka idi mai tokadabara, mai manakone‑ya Deoso mai‑ya daanematane.

³Deoso Bidi Badi ati‑ya kamine, ati ai tokadabare, ai manakone amosara ba‑basi nibisaboneni. Deoso Ati Amosabote‑ya Bidi mai‑ya kamine, Yeso ati‑ya mai mita, ati mai hikaminamaki, ati oda mitane.

⁴Yeso ati‑ya mai kaminiya, Deoso ene ai owa‑ya mai nakitama, mai ihi kita, mai ihi‑ya mai awa,

“Ka! Haa‑nima ai ene na, ai awaterani.” Mai one ati namaroni.

Deoso ati ene, Deoso‑ka Doni mai‑ya sawi, ati‑nima mai ihi namaroni.

Yeso ai‑nima nane

⁵Yama nafi‑ka hidi Deoso‑ka yo‑yose mai toharabone, Deoso Bidi yama nafi‑ka Hidi tohebona tamine oda hiyarawahaboneni.

⁶Deoso‑ka yama hani‑ya ai owa tamine‑ya mai kanahanameteni.

“‘Deoso, hini yamata‑nima tina, ai‑ya tinofi nafiti? Hini yamata‑bone ai‑ka Ayo‑ya tikasoma tiniti?

⁷Hibati‑ya bofe‑ya ai‑ka Ayo wineya, Deoso ene ai‑ka Ayo kiti bi‑bidi, amosi bi‑bidi noko wehene bi‑bidi nematane. Makobote Deoso‑ka yo‑yose mai kiti‑ya kiti fiyakana, mai amosi‑ya amosi fiyakana, mai noki wahi‑ya noko wehene fiyakana nane.’ Ai owa ati ne, ati‑ya kanahanomatane.

⁸Yama nafi‑ka hidi ai‑ka Ayo tohe.” Deoso‑ka yama hani ati nineni.

Hibayata mai one‑ka hidi tohe‑ya ai awasara, makobote mai nafi‑ka hidi tohe‑ya ai nafi awawahaboneni.

⁹Hibayata yama ai watoneni. Yeso bofe‑ya wine, ai‑nima ne kiti bi‑bidi, bofe‑ya wineya, Deoso‑ka yo‑yose mai kiti ba‑basi, Yeso abe, ai nafi manakone‑ya nanahabe, Deoso hinakitame, hini kiti tohamatase, abamaterebona, amosabote tohawahene.

¹⁰Yama nafi‑ya Deoso wamanemata, hika yama toha, ai ene amosara manakone‑ya ai‑ka Hidi‑bona nanahabebona, Deoso ene amose ene Yeso komene kitematane, amosabote tohebonaha. Yeso ene Deoso bidi mai dodamawahani.

¹¹Yeso ene Deoso ai‑ya ati somawame, ai‑ya ewe nawahe, ai‑ka Abi i‑di Deoso ene‑nima ai ene nawahaboneni. Deoso Bidi Yeso tohe, Deoso bidi ai tohawaha, Yeso ai‑ya soho nawahene.

¹²Deoso‑ya Yeso hiyare,

“Oka soho mai‑ya ohiyaraboneni. Oka soho mai yorotokani‑ya tiwa tamine okaminiya, tiwa okahiyarahareboneni.” Yeso ati nematane.

¹³“Okobi owa‑ya kasomebona, ati okadabi oharibisaboneni.” Yeso ati ne,

Makobote ati yananamatase,

“Deoso bidi mai one owa‑ya daahina, owa‑ya mai sawe, oda dai awahi.” Ati nematane.

¹⁴Deoso Bidi i‑di Yeso ai owa tohawahe, ai eme‑nima eme nihi, ai emene‑nima emene nihi ne Yeso ai owa tohe, abe, ai manakone‑ya nanahabe, i‑di Satanasi kiti‑ya nanahabematane.

¹⁵Ai manakone abara, Satanasi ai‑ya yaditone, ai ababone, ai habo siitoteni. Yeso ai manakone‑ya nanahabe ene ai habo siitonamara, ai aba, ai kitamabone ai watoneni.

¹⁶Bofe‑ya koboneya, Deoso‑ka yo‑yose mai‑ya Yeso kasomare, Abaraho‑ka nodi ai toha, ai‑ya kasomabisatene.

¹⁷Abaraho‑ka nodi ai toha, ai‑ka Ayo ai‑ya kasomebona, ai‑nima ne. Deoso‑ka yama‑bone‑ya mai da‑daa mai‑ka hidi webote Yeso tohebona, ene amose hinama tohe, ai ene amosara manakone‑ya Deoso‑ya daanebonane.

¹⁸Hibati‑ya ai fimi‑nima Yeso fimi, ai eme komene‑nima Yeso komene, Satanasi ai‑ya keyehe‑nima Yeso‑ya keyehematane. Fare hibayata Satanasi ai‑ya keyeheya, Yeso ai‑ya kasomane, Satanasi ati ai nofarabonehe.

Yeso amosabise, Mose amosi bi‑bidi nane

¹Soho, owati dai mitahi. Hibati‑ya Deoso ai‑ya kadike, Yeso‑ya Deoso yosemari, Deoso‑ka yama‑bone‑ya mai da‑daa mai‑ka hidi webote tohe, tamine dai kadikahi.

²Deoso ati nafi‑ya Yeso tokadabe, Deoso‑ka yobe‑ya Mose yama‑ya anine ene amosaharimatane.

³Yeso‑ta amosabote tohe, Mose amosi bi‑bidi tohe nane. Yobe‑ya mai wa‑wama mai ai kahiyarateni. Yobe mai wamahine ai kahiyaraterani. Fare yobe‑ya mai wa‑wama‑nima Yeso ne, yobe wamahine‑nima i‑di Mose nane.

⁴Yobe hini‑ya wamaterene, yobe ai wamanibisateni. Yama nafi ai wamaterani. Yama nafi‑ya Deoso‑ta wamanibisematane.

⁵Deoso‑ya na‑narifa i‑di Mose tohe, Deoso ati‑ya tokadabe, Deoso ati‑nima yama nabone tamine‑ya i‑di Mose kaminematane.

⁶Yeso‑ta Deoso Bidi tohe, Deoso‑ka yobe hidi amane. Deoso ati ai no‑nofa, Deoso ene ai habo siitora, Deoso‑ka yobe ai tohateni. Mai ihi‑maro‑nima dai ene riyahi.

⁷Deoso‑ka Doni ati dai mitahi.

“Dai narabo hawihi. Hibayata Deoso ati dai mitiya, ati dai tokadaba kanibote nahi.

⁸Isara·eo mai‑ya Mose hiyare, Mose ati‑ya mai nofara, tabora awiri‑kaya mai yakana, mai‑ya Deoso hiyare, mai ime kita,

‘Deoso ai‑ya nofe, ati ai tokadabara, ai‑ya weerebonane.’ Mai atibodi ati nameteni,

⁹Owati‑ya dai‑ka idi mai tokadabara.

‘Deoso ati oda tokadabariya, oda‑ya yawarebonane.’ Mai atibodi ati nameteni.

Wana mai ati 40 kaniya, owa ene kitabote‑ya mai awa, owati‑ya mai tokadabi awisaramaroni.

¹⁰Owati‑ya mai nofara, owati‑ya mai tokadabara, mai narabi hawira, mai ihi owati yawawahamaroni.

¹¹Owati‑ya mai nofara, owa tabaro‑ya mai hasiraboneni. Onamaroni.” Deoso ati nematane.

¹²Dai noko wadahi. Dai atibodi amosa, Satanasi dai‑ya keyeheya, ati dai nofarayaho. Deoso ati dai tokadababisabonehe.

¹³Mahi‑nima dai ibi kasomahi. Deoso ati‑ya dai owa tokadabare dai hiyarahi, atibodi tokitarebonaha.

¹⁴Yeso ati ai tokadabamaro, ati ai tokadabanasa neya, Kirisito‑ka yama ai kayafa, tabaro‑ya ai winawahaboneni.

¹⁵Deoso ati dai mitamatasahi.

“Hibayata owati dai mitiya, dai atibodi kitariyahi. Mose‑ya mai da‑daba, mai atibodi kitamaro, mai‑nima dai riyahi.” Deoso ati nematane.

¹⁶Eyito‑ya mai wi‑wina tohamete, mai‑ya i‑di Mose dodimaki, makobote Deoso ati‑ya mai nafi mita, Deoso ati‑ya mai tokadabarameteni.

¹⁷Ebeni‑ka mai‑ya Deoso yawamatati? Mai ihi amosara wana mai ati 40 tohi‑ya mai‑ya kasomanasa nematane. Tabora awiri‑kaya mai nafi abameteni.

¹⁸Ebeni‑ka mai‑ya Deoso hiyaramatati?

“Owa tabaro‑ya dai maa tohi fawateraboneni.” Ati ne,

Deoso ati‑ya mai nofara mai‑ya hiyarematane.

¹⁹Deoso ati‑ya mai nofara, hini mai ihi Deoso tabaro‑ya mai koborameteni.

Deoso ati ai nofa Deoso tabaro‑ya ai hasinabone

¹“Owati‑ya mai nofa mai atibodi tokitara owa tabaro‑ya mai maa tohi fawanaboneni.” Deoso ati nematane.

Dai noko wadahi. Dai atibodi tokitara Deoso tabaro‑ya dai kobonaboneni.

²Deoso tabaro‑ya ai maa tohi fawanabone tamine‑ya mai mita, tamine oda mitahari nemarine. Deoso ati Amosabote‑ya mai mita, ati mai hinofare, mai‑ya kasomare, tabaro‑ya mai koborameteni.

³Ai‑ta Deoso ati ai nofa, Deoso tabaro‑ya ai maa tohi fawanaboneni.

“Owati‑ya mai nofara, owa tabaro‑ya mai winateraboneni.” Deoso yawe ati nematane.

Hibati‑ya yama nafi‑ya Deoso wamane, hini tabaro‑bona‑ya wama, ai tabaro‑bone‑ya wama nematane.

⁴Deoso ati‑ya mai kanahana,

“Deoso amoni 6 kane‑ya yama nafi‑ya wamane, makobote amoni oharimaki‑ya hasine. Yama‑ya aninami awirematane.” Deoso‑ka yama hani ati nineni.

⁵Deoso ati owa,

“Owati‑ya mai nofara, owa tabaro‑ya mai winateraboneni.” Deoso ati nematane.

⁶Mai one Deoso tabaro‑ya winaboneni. Mai one Deoso Ati Amosabote‑ya mai mita, Deoso ati‑ya mai nofara, Deoso tabaro‑ya mai winateraboneni.

⁷Makobote amoni dameya, tamine Dafi hikanahanameteni.

“Hibayata Deoso ati dai mita, dai narabo hawihi. Dai atibodi tokitariyahi.” Deoso‑ka yama hani ati nineni.

⁸I‑di Yosowe ene mai maa tohi fawana‑mani, makobote mahi owa‑ya mai maa tohi fawanabone, mai tamine‑ya Deoso hiyarami awire nane.

⁹Deoso‑ka ai toha, Deoso tabaro‑ya ai winawahiya, ai maa tohi fawanaboneni.

¹⁰Deoso tabaro‑ya ai koboniya, ai hasinaboneni. Ai‑ka yama anini hawa tohawahaboneni. Yama nafi‑ya Deoso wamani hawa tohe, hasinematane.

¹¹Mose‑ka mai Deoso tabaro‑ya mai winabone mai ati na, Deoso ati‑ya mai tokadabara, Deoso tabaro‑ya mai winaramete, mai‑nima ai riyahi. Deoso ati ai kadika, Deoso ati ai tokadababisahi.

¹²Deoso ati kitabote tohe, yima ini fama, ini inokima‑nima ne. Ai atibodi ai korimari na‑ya kebitene. Ai atibodi ati, ai atibodi yama hinofa hina‑ya kadikatene.

¹³Yama nafi‑ya Deoso wato, yama nafi‑ya awa tene. Yama tehe‑ya yama‑ya awa, yama soki‑ya yama nafi‑ya awa tene. Makobote ai abiya, ai ene‑maro tamine ai kaminawahaboneni.

Yeso Deoso‑ka yama‑bone‑ya mai da‑daa mai‑ka hidi webote

¹⁴I‑di Yeso, Deoso‑ka yama‑bone‑ya mai da‑daa mai‑ka hidi webote neme‑ya tokome, Deoso Bidi yokana amane. Deoso ati ai tokadababone ai ati na, Deoso ati ai tokadabahi.

¹⁵Ai‑ya Satanasi keyehe‑nima Deoso‑ka yama‑bone‑ya mai da‑daa mai‑ka hidi webote‑ya keyehemata, Satanasi ati‑ya nofare, ati hikadabarematane. Ai‑ta Satanasi ai‑ya keyeheya, ai kitara, Satanasi ati ai nofaba awineni. Satanasi ati ai nofa ai atibodi koma, Deoso‑ka yama‑bone‑ya mai da‑daa mai‑ka hidi webote ai‑ya kasomebona ati nane.

¹⁶Deoso‑ya ai hiyarabone, ai habo siitoriyahi. Ai ya‑yainibisahi. Deoso ai hiyariya, ati somawamebonane, ai‑ya kasomebonane.

¹Hibati‑ya Deoso‑ka yama‑bone‑ya mai da‑daa mai‑ka hidi webote‑bona‑ya Deoso kadikematane, ai ene amosara manakone‑ya Deoso‑ya daanebonaha.

²Deoso‑ka yama‑bone‑ya da‑daa‑mata, ai‑nima kitare, ai ene‑nima ene ne. Yama ai watora, ai tosawariya, ai‑ya weeni nafirebonane.

³Yama amosara manakone‑ya daanebona, hini hika yama‑ya daani dai tohe, makobote mai‑ka yama‑ya daanamaki ene Deoso mai nafi‑ya ati somawamematane.

⁴Hiniya Deoso‑ka yama‑bone‑ya mai daaterani, Deoso mai‑ya kadikabisatene. Araho‑ya Deoso kadikemata, Araho nowati‑ya mai one‑ya kadikamakitase, Deoso‑ka yama‑bone‑ya mai daanamakebonehe.

⁵Yeso Kirisito hini‑ya kadikaterene. Deoso hikadike, Deoso‑ka yama‑bone‑ya mai da‑daa‑bone mai‑ka hidi webote tohebonaha.

“Oka Dao amatini. Tika Abi ama·oni.” Deoso ati nematane.

⁶Makobote Yeso Kirisito‑ya hiyaramatase,

“Meokisadeki‑nima tina, oka yama daani fawatiteraboneni. Mai tamine owa‑ya tikaminateboneni.” Deoso ati nematane.

⁷Yeso bofe‑ya wine, Deoso‑ya hiyare, hini mahi‑nima badi‑ya hiyare, hini ati koboni‑ka yama‑ya haane, ohinawahe, Yeso Badi ati‑ya tokadabi nafi, Badi ati‑ya nofi nafine. Badi‑ya weere, Deoso ati‑ya Yeso tokadabe, Yeso ati‑ya Deoso tokadabahari, Yeso‑ya nakitamemarine.

⁸Deoso Bidi i‑di Yeso tohe, Deoso ati‑ya tokadabebona, hini eme komenebona‑ya wato, Deoso ati hinama‑ya tokadabanasa nematane.

⁹Deoso ati hinama‑ya tokadabi hawa tohe, ati ai tokadabeya, Deoso‑ka ai tohawaha, Deoso tabaro‑ya ai winamakeboneni.

¹⁰Deoso ati ene Deoso‑ka yama‑bone‑ya mai da‑daa mai‑ka hidi webote i‑di Yeso tohemata, hini tohe, tohasa ne, fawaterebonane. Meokisadeki‑nima Yeso nane.

Ai webote‑nima dai nahi

¹¹Yeso ai nafi‑ka hidi tohe tamine dai‑ya okanawatabone ona, dai narabo karakana‑nima dai na, yama‑ya dai wato kanibote ni awirani.

¹²Hibati‑ya Deoso ati dai mita, mai one‑ya dai kanawatomakebone oda ati na, yama‑ya dai wato awisara, dai‑ya oda kanawatomatasabone dai nofabisineni. Madehe‑nima dai nasa na, yama kita kabi dai watora, yoha fahi‑ta dai ati fawabisineni,

¹³Yoha fahi‑ta dai fawa, madehe‑nima dai na, dai ene amosa ba‑basi ni awisarani.

¹⁴Bani kite‑ya dai kaba, ai hawa toha‑nima dai na, yama amosa dai wato, yama towe dai wato dai nineni.

¹Yeso ai manakone‑ya nanahabematane, ai abarabonehe. Tamine dai wato, ai ene amosaramaro, ai ene‑maro‑nima ai ene namarabone tamine dai wato neni. Hibayata ai webote‑nima dai na, Deoso ati nafi dai kadikeya, ati dai tokadabaho.

²Faha‑ya ai habanisa tamine dai wato,

Deoso‑ka Doni ai‑ya sawi tamine dai wato,

ai aba, ai kitamabone tamine dai wato,

ai ene‑ya Deoso kadike, ai manakone‑ya daanebona tamine dai wato nineni. Hibayata Deoso‑ka yama kita tamine ai hiyaramakeboneni.

³Deoso ai‑ya kasomeya, Deoso ati kite ai watowahaboneni.

⁴Deoso ati‑ya mai wa‑wato, Deoso‑ka Doni mai‑ya sawi, yama amosabote‑ya Deoso mai‑ya daane, Deoso ati‑ya mai nofami awiriya, mai ihi Deoso‑ya hini mai tamine‑ya mai kaminamariya, Deoso mai‑ya ati somawamaterebonane.

⁵Deoso ati amosabote‑ya mai wa‑wato‑maro, Deoso ene kitabote‑ya mai awamaroni.

⁶Deoso ati‑ya mai nofami awira, awa‑ya Yeso Kirisito‑ya mai baakanamatasa‑nima mai nineni. Fara ihi Kirisito‑ya mai one hahakanaboneni.

⁷Deoso ene faha kakiteni. Faha kake ihi ai‑ka fadara‑ka yamata yana,

“Wami amosabote amani.” Ai ati na, ai ya‑yaina,

“Deoso ene fadara amosini.” Ai ati teni.

⁸Fadara one‑kaya ai‑ka yamata ai kama, yanara, atiwa‑ta yanabise, ai awa, ai yawa,

“Wami towe amani.” Ai ati na, ai sarikanaba awineni.

⁹Mai ati kasira mai tamine oda hiyarani. Dai‑ta dai tamine oda hiyari awirani. Dai ene amosa, dai‑ya oda atibodi watoneni. Deoso ati‑ya dai tokadabamaro, ati dai tokadabanasa nebona oda ati teni.

¹⁰Deoso‑ka mai dai kasomamaro, mai‑ya dai kasomanasa nineni. Dai ene‑ya Deoso ati fawaterebonane. Dai ene‑ya kadikebona, dai manakone amosa‑ya daanebonane.

¹¹Yeso kamebona‑ya dai nimana, dai ene amosi fawariyahi. Dai ene amosa toha, dai manakone wadaboneni.

¹²Dai refo tohariyahi. Deoso ati‑ya mai nofamete, Deoso mai‑ya kasomebona ati ne, Deoso‑ya mai nimanameteni. Mai ihi amosamete mai ihi‑nima dai ene niya, yama amosa‑ya Deoso dai‑ya daanebonane. Yama amosa dai kayafabone, dai ene amosahi.

Yama amosa ai kayafabone ai wato

¹³Hibati‑ya Abaraho‑ya Deoso hiyare,

“Abaraho, tika dao‑ba daa·onaboneni. Owati‑nima onabone, owati fawateraboneni.” Deoso ati nematane.

¹⁴“Tika dao‑bona daa·oniya, tiwa okasoma, tika nodi mai dodamateboneni.” Deoso ati nematane.

¹⁵Abaraho amoni dameya, Deoso ati‑mata‑nima bidi wadawahematane. Hibati‑ya Abaraho Deoso ati‑ya mite,

“Oka dao‑bona‑ya Deoso daanebona ati ne, daahinebonane.” Abaraho atibodi ati ne.

Deoso ati‑nima yama nabone‑ya Abaraho nimane, ati‑nima nawahematane.

¹⁶Owati tinofara oka hidi ati timitahi. Owati‑nima oka hidi ati tohane. Haa‑nima mai ati na mai ati ai nofateni.

¹⁷“Owati dai nofabone, owati‑maro dai awahi. Owati‑maro‑nima ona, fara hibayata owati‑nima onabone dai watowahaboneni.” Deoso ati nematane.

¹⁸Deoso ati‑mata ai kadika, ene‑mata ai kadikamaki, Deoso ati‑nima ene ne ai wato, fare ati‑nima nebona ai wato, ai nimane, ai habo siitoraboneni.

¹⁹Ai‑ka kanawa ai yaditoneni, yama hakikini hiwakarabonehe. Fara‑nima Deoso ati‑nima ene ne ai wata, Satanasi ati ene ai tosawariraboneni.

²⁰6:20 Hibati‑ya mai‑ya Deoso ati somawamebona, Deoso‑ka yama‑bone‑ya mai da‑daa mai‑ka hidi webote Deoso‑ka yobe kote barikane kowani‑kaya tokiyome, Deoso‑ya bani emene‑ya daanematane. Faha fowe ohari‑ya tokiyomi oharimatane.Deoso‑ya Yeso hini emene‑ya towakame, emene daahinaya, ai manakone abawahineni. Deoso‑ka yama‑bone‑ya mai da‑daa mai‑ka hidi webote Yeso tohawahe, Meokisadeki‑nima nane.

I‑di Meokisadeki tamine

¹Hibati‑ya Yerosare‑ya mai wi‑wina mai‑ka hidi webote i‑di Meokisadeki tohe, Deoso‑ka yama‑bone‑ya da‑daa tohematane.

“Neme‑ya Deoso yokana winane.” Meokisadeki ati nematane.

I‑di Abaraho bidi owa i‑di Ro‑ya yara mai towakama, i‑di Abaraho tokomaki, yara mai‑ka hidi mai‑ya bisine, mai‑ka yama mai hiwakama‑ya Abaraho dodimaki, i‑di Ro‑ya dodimaki ne, i‑di Abaraho mai eyehe kame, i‑di Meokisadeki‑ya kobone,

“Abaraho, Deoso tiwa‑ya kasomane.” Meokisadeki ati nematane.

²I‑di Abaraho mai‑ka yama nafi‑ya kakame, Meokisadeki‑ka yama ohare‑bone‑ya daane, Abaraho‑ka 9 kana hasinameteni. Meokisadeki oni ai ati‑ya, ‘Mai ihi amosa mai‑ka hidi toha’ tabora oni ai ati‑ya, ‘Mai ati soma’ mai‑ka hidi toha nane.

³Meokisadeki badi, madi, mai na mai wadarameteni. Wadarihi, abarihi ne, Deoso Bidi‑nima nane.

“Meokisadeki, Oka yama‑bone‑ya da‑daa tihabone, tika yama daani fawateraboneni.” Deoso ati nematane.

⁴Meokisadeki tamine‑ya dai atibodi kadikahi. Meokisadeki webote tohe, ai‑ka idi i‑di Abaraho bi‑bidi nibise, Meokisadeki hidi webote tohe‑ya Abaraho hika yama kote‑ya daanematane.

⁵Makobote i‑di Abaraho‑ka nodi idi Refi tohebona, Deoso ati ene Refi‑ka nodi Abaraho‑ka nodi mai one tamine‑ya Deoso‑ka yama‑bone‑ya mai da‑daa‑bone mai manakone‑ya mai kayafaboneni. Refi‑ka nodi‑ka yama ohari, Abaraho‑ka nodi mai one‑ka 9 kana teboneni.

⁶I‑di Meokisadeki i‑di Refi‑ka nodi tohi awire, hiniya Abaraho‑ka yama kote‑ya kayafe, i‑di Abaraho‑ya i‑di Meokisadeki kasome,

“Abaraho, Deoso tiwa‑ya hiyare, ati‑mari‑nima yama nawahaboneni.” Ati nematane.

⁷Ai webote toha, ai bi‑bidi na‑ya kasomateni. Fare Meokisadeki webote tohe, Abaraho bi‑bidi nane.

⁸Mai‑ka yama kote‑ya Refi‑ka nodi mai kayafa, mai aba, makobote mai‑ka nodi mai abamakitasa nameteni. Meokisadeki‑ta abare, hiniya neme‑ya tokomemata, hasinasa na‑mone mai ati teni.

^9-10Abaraho kahiwanasa reya, Meokisadeki‑ka yama kote‑bone‑ya daane, Abaraho‑ka nodi i‑di Refi tohatebona, i‑di Abaraho bodi‑ya foyasa neya, i‑di Meokisadeki‑ka yama kote‑bone‑ya Abaraho daane. Hika yama toha, i‑di Refi‑ka yama toha na‑ya i‑di Meokisadeki‑ya i‑di Abaraho daanematane.

Kirisito Meokisadeki‑nima nane

¹¹I‑di Refi‑ka nodi mai ihi, ai ene amosa hinama tohaterani. Yama‑ya mai da‑daa mai ihi, ai ene amosara barikana, manakone abara, Deoso ati‑ya Refi‑ka nodi mai mita, ati mai hikaminabisematane. Mai ati ihi ai ene amosara manakone aba‑mani, ai ene amosara manakone wadamara neni. Ai ene amosara manakone wadamara‑mani Deoso‑ka yama‑bone‑ya da‑daa owa‑ya Deoso haare nane. I‑di Refi‑ka nodi‑nima ai owa‑ya kadikare, i‑di Meokisadeki‑nima ai owa ne‑ya kadikematane.

¹²Hibati‑ya i‑di Mose‑ya Deoso hiyare, ati‑ya i‑di Mose kanahano,

“Mai ihi amosara manakone‑ya i‑di Refi‑ka nodi‑ya mai daanaboneni.” Deoso ati ne, ati‑ya Mose kanahanomatane.

Deoso‑ka yama‑bone‑ya bare daanebona Deoso ati yananamatasebonane.

^13-14Refi‑ka nodi Yeso tohare, Yoda‑ka nodi‑ta tohabise. Yoda‑ka nodi Deoso‑ka yama‑bone‑ya daanebona tamine‑ya Mose‑ya Deoso hiyari awirematane.

¹⁵I‑di Meokisadeki‑nima ne, Deoso‑ka yama‑bone‑ya da‑daa owa kobone, Deoso ati bare tohe ai watoneni.

¹⁶Yeso‑ka abise hika idi ne Deoso‑ka yama‑bone‑ya mai daatera, Yeso abaterebona ene Deoso‑ka yama‑bone‑ya daa nibisane.

¹⁷“Deoso‑ya ai manakone‑ya daatinabone, Meokisadeki‑nima tinabone, ti·abateraboneni.” Kirisito tamine‑ya Dafi kanahano ati nematane.

¹⁸I‑di Refi‑ka nodi Deoso‑ya dai manakone‑ya mai da‑daa‑mete, dai manakone abara ene dai manakone‑ya mai daanami awiraboneni.

¹⁹Mose ati kote‑ta ai tokadaba Deoso tabaro‑ya ai winaraboneni. Yeso ati ai nofa, Deoso bidi ai tohawaha, Deoso tabaro‑ya ai winabisaboneni.

²⁰Yeso‑ya Deoso hiyare,

“Yeso, oka yama‑bone‑ya mai da‑daa‑maro mai manakone‑ya mai nanahabaramaroni. Tiwa‑ta, tiwa haa·onamaro, owati ihi mai manakone tinahababisaboneni.” Ati nematane.

²¹I‑di Refi‑ka nodi mai toha, mai‑ka idi mai‑ka abi mai‑nima Deoso‑ka yama‑bone‑ya mai daanamakineni. I‑di Yeso‑ta‑ya Deoso hiyare,

“Tiwa tamine ohiyaramaro, owati‑nima yama nabone, mai manakone tinahabi oharebone, ti·abateraboneni.” Deoso ati nematane.

²²Deoso ati fawaterebonane. Yeso ene Deoso ai‑ya kasomi ba‑basi nebonane.

²³Refi‑ka nodi mai dama Deoso‑ka yama‑bone‑ya mai da‑daa mai aba, nowati‑ya Deoso‑ka yama‑bone‑ya mai daanamakira, mai‑ka madehe‑ta Deoso‑ka yama‑bone‑ya mai daanameteni.

²⁴Yeso‑ta ai manakone‑ya daane, oharibisane. Abaterebonane.

²⁵Yeso ati ai nofa, Deoso‑ka ai tohawaha, Yeso ai‑ya kasomatene. Ai aba, Deoso tabaro‑ya ai‑ya towakamebonane. Yeso abamatere, ai tamine‑ya kaminatene Deoso‑ya.

“Abi, owati‑ya mai no‑nofa mai tikasomahi. Mai ihi amosariya, mai manakone onahabamaroni. Mai‑ya tiwati yawariyahi.” Yeso ati tene.

²⁶Deoso‑ya ai manakone‑ya Yeso daane ene ai manakone abawahani. Ati amose hinama tosawariterene. Ai‑ta ai tosawari, Yeso‑ta tosawari terene. Neme amosi‑ya Yeso amosi fiyakanane.

²⁷Deoso‑ya ai manakone‑ya i‑di Refi‑ka nodi mai daana, mahi‑nima bani‑ya mai daa, mai manakone‑bone‑ya mai daani baha, makobote ai manakone‑bone‑ya mai daanamakitasa nameteni. Haa‑nima i‑di Yeso terene, Yeso hini emene‑ya ai manakone‑ya nanahabi oharibisane.

²⁸Deoso‑ka yama‑bone‑ya mai da‑daa mai‑ka hidi, ai one‑nima mai na, mai kitara, mai aba mai nabone, mai‑ya i‑di Mose kadikabisematane. Hai‑ta Deoso hini Bidi‑ya kadike, ai manakone‑ya nanahabebona, kitabote, amosabote, abaterebonane.

Yeso ai manakone‑ya nanahabe, neme‑ya winawahane

¹Owati dai mita yama‑ya dai watowahaboneni. Deoso‑ka yama‑bone‑ya mai da‑daa mai‑ka hidi webote i‑di Yeso tohe. Ai manakone‑ya Deoso‑ya daane, ai‑ka Abi neme‑ke‑ka kanika‑ya itariwahane.

²Deoso‑ka yobe neme‑ke wamahinemata‑ya ai manakone‑ya Yeso daanawahene.

³Deoso‑ka yama‑bone‑ya mai da‑daa mai‑ka hidi Deoso‑ya bani‑ya mai daa, yama one‑ya mai daanamete, fare Deoso‑ya Yeso yama‑ya daanematane.

⁴Neme‑ya Deoso‑ya Yeso yama‑ya daanane. Bofe‑ya Mose ati ene Refi‑ka nodi mai‑ta Deoso‑ka yama‑bone‑ya mai da‑daa mai toha, i‑di Yeso i‑di Refi‑ka nodi tohare, bofe‑ya Deoso‑ka yama‑bone‑ya da‑daa toharene.

⁵8:4-5 Neme‑ka yama tamine ai watabone, neme‑ka hetarato‑nima yama na‑ya Deoso ai‑ya daanematane.Deoso‑ka yobe neme‑ke korimari‑nima hika yobe bofe‑ke tohane. Neme‑ya Yeso ai manakone‑ya nanahabe korimari‑nima i‑di Refi‑ka nodi bofe‑ya ai manakone‑ya mai daanameteni. Deoso‑ka yobe bofe‑ke i‑di Mose wamanebonaya, Deoso hiyare,

“Mose, adami tati‑ya yobe‑bona tiwa‑ya yofi·okane‑nima ne wamatinahi.” Deoso ati nematane.

⁶Hibayata Kirisito ene amosi ba‑basi ne, Refi‑ka nodi mai ihi amosi bi‑bidina,

“Mose ati‑ya dai tokadabi nafi‑ya dai ene amosara‑ya Deoso barikanebonane.” Refi‑ka nodi mai ati na,

“Owati dai nofa Deoso dai ene‑ya barikanamare, dai‑ya ati somawamebonane.” Kirisito ati nibise.

Fare Kirisito ati amosabisane.

⁷Hibati‑ya Refi‑ka nodi mai ihi Deoso ati somawami ohari‑mana, Yeso abare namatane.

⁸“Hibati‑ya mai‑ya ohiyara, owati nafi‑ya mai tokadabara. Makobote mai‑ya ohiyaramatasaboneni. Isara·eo‑ka mai‑ya ohiyara, i‑di Yoda‑ka mai‑ya ohiyara onaboneni.

⁹Hibati‑ka owati‑nima owati namaraboneni. Hibati‑ya mai‑ka idi Eyito‑ya mai wina, mai okasoma, mai yahi dama·okana, mai tabori yati‑bone‑ya mai owakamaboneni. Owati‑ya mai nofara, owa ene tabora awiri‑kaya mai abamaroni.

¹⁰Makobote Isara·eo‑ka nodi mai‑ka yama hani yati tohamakitasa, mai‑ya ohiyaramakitasaboneni. Mai okanawatabone, mai atibodi‑ya owati okanahanabone, oka mai tohawahabone, mai‑ka Deoso yokana ohawahaboneni.

¹¹Owa tamine‑ya mai wato nafiya, mai ibi kanawatomateraboneni. Owa hawine‑ya mai ibi yofikanamarihi naboneni. Owa‑ya mai nafi watowahaboneni, bote madi, madehe, mai naro.

¹²Mai ihi amosaramaro mai‑ya oyawamarihi, mai ihi okadikamarihi onaboneni.” Deoso ati nematane.

¹³Yama hani yati tohawaha, yama hani daidi bote toha, yama bote fawanawahaboneni.

Deoso‑ya ai kahiyarabone haa‑nima ai nahi

¹Hibati‑ya Deoso ene Deoso‑ya mai kahiyarabone, ati‑nima mai nabone ati ne, bofe‑ya Deoso‑ka yobe toheya, yama towe sawirabone ati nematane.

²Deoso‑ka yobe kote kayawi bi‑bidi hine‑kaya yama wada, nabarina oro wamani toha, wahi kawa, awa wamani amosa fowari wada, mese oro toha, mese‑ya Deoso‑ka baho wiya nameteni.

³Deoso‑ka yobe kote barikane‑ya bora kita wina‑ya Deoso kayawi ba‑basi nematane.

⁴Deoso‑ka yobe kote barikane kayawi ba‑basi hine‑ya yama mahi amosa sa‑sarikana wiye oro wamani toha ita, awa wamani kasaho toha, mese‑ya oro toha, dori‑ya yama 3 toha: oro wamani kahafa‑nima na‑ya mana mookana kafoya, i‑di Araho‑ka awa hibati‑ya moonamete foya, Deoso‑ka yama hani yati‑ya hikanahanamete kafoya nani.

⁵Kasaho noki mese‑ya Deoso‑ka yo‑yose mai afe wadikima mai demenare, mai afe bofe‑ya Deoso ati yananane, mai‑ya ati somawamebonaha. Yama wamani tamine ohiyaramaraboneni.

⁶Yobe, yobe doro‑ka yama toha na nafi hawa toha, Deoso‑ka yama‑bone‑ya mai da‑daa yobe kote kayawi bi‑bidi ne‑ya mahi‑nima mai tokiyoma, mai‑ka yama anini‑ya mai aniteni.

⁷Yobe kote Deoso kayawi ba‑basi hine‑ya mai tokiyomara, faha fowe ohari‑ya Deoso‑ka yama‑bone‑ya mai da‑daa mai‑ka hidi webote tokiyomi oharibisematane. Tokiyome, ama‑ya damakane, Deoso‑ya ama‑ya daane, hini manakone‑bona‑ya daani baha, ai manakone‑bone‑ya daanamakinematane. Ai ene‑ya barikanane, Deoso ai ene‑ya awarebonaha.

⁸Fara tamine‑ya Deoso‑ka Doni ati hiyare,

“Deoso wine‑ka yobe kote barikane‑ya dai tokiyomi awiraboneni.” Deoso‑ka Doni ati nematane.

Ai manakone abi awisariya, Deoso wini‑kaya ai tokiyomi awiraboneni.

⁹Hibati‑ya Deoso‑ya mai kahiyarabone, bani, yamataha na‑ya mai daana, bani‑ya mai nanahaba, bani emene aba, mai ihi towe‑ya Deoso barikane, mai atibodi‑ya namosire mai atibodi mai‑ya weenasa teni.

¹⁰Yama‑ya mai kaba, yama‑ya mai fawa, yama‑ya mai soko na, mai atibodi‑ya namosaterani. Mai atibodi namosabone tamine‑ya Deoso mai‑ya kaminamakimatane.

Ai manakone abani, Kirisito emene‑ya

¹¹Makobote Kirisito kaki, Deoso‑ka yama‑bone‑ya mai da‑daa mai‑ka hidi webote tohe, neme‑ke Deoso‑ka yobe kote kayawi ba‑basi ne‑ya Kirisito tokiyome, Deoso‑ka yobe webote, amosabote, ai wamatere, Deoso‑ta wamahine‑ya tokiyomane.

¹²Ai manakone‑ya nanahabebona, bodi, bowi bidi mai na mai emene‑ya towakamare, hini emene‑ya towakamabise, yama manakone abi ohariwahabone, ai manakone‑ya wadamaterabonehe.

¹³Hibati‑ya yama aba‑ya mai boyona, mai bisa toha‑nima mai na, bowi maki, bodi maki mai na, mai ame‑ya mai‑ya mai wisana, bowi bide‑ya mai sarikana, bowi nakasiri faha‑ya tabonawahaya, mai‑ya mai wisanamaki na, mai bise fawanani mai ati teni.

¹⁴Fare Kirisito emene ai‑ya namosi nafibona, Kirisito ene amose hinama tohe, Deoso‑ka Doni hikasome ene ai manakone aba, hini emene‑ya Deoso‑ya daane ene ai ene amosaramaro, ai‑ya ai atibodi weenamaraboneni. Ai ene amosaramaro tamine‑ya Deoso kadikamaterebonane. Ai ene amosa, ai abamateraboneni. Deoso‑ya ai narifabisaboneni.

¹⁵Hibati‑ya ai ene amosara ai ene yama amosa‑ya ai kayafarabone, ai ababisabone Deoso ati nemata, Yeso abe ai manakone‑ya nanahabe ene Deoso ai‑ya ati somawame, yama amosa daahinabone ati ne, ai kayafaboneni.

¹⁶Ai abi awisariya, yama ai kanahana,

“O·abiya, oka yama mai‑ya dai daanahi.” Ai‑ka yama hani ati teni.

Ai abi awiriya, ai‑ka yama hani ihi ai‑ka yama‑ya mai kayafaterani, ai abi‑ya ai‑ka yama‑ya mai kayafabisa teni.

¹⁷Ai ababone ai‑ka yama tamine ai kanahanoteni. Ai abi awiriya, ai‑ka yama hani ati‑ya mai nofaterani. Ai abiya, ai‑ka yama hani ati‑ya mai nofateni.

¹⁸Hibati‑ya Mose ati‑ya mai tokadabara, bani‑ya mai nanahabara, mai ihi‑ya Deoso barikarene, bani‑ya mai nanahaba mai ihi‑ya Deoso barikanene.

¹⁹Deoso ati nafi‑ya Mose mai‑ya kamini hawa tohe, bowi bidi, bodi mai na, mai ame‑ya faha‑ya i‑di Mose rawikane, isobo afe mese‑ya kaneiro kone mawa yadineya, mai dami‑ya i‑di Mose wisa, yama hani‑ya wisa nematane.

²⁰“Ama ihi Deoso ati‑nima yama nabone, Deoso ati dai tokadabahi.” Mose ati nematane.

²¹Mai wisani‑ya hawa tohe, ama kote‑ya yobe barikane bari‑ya wisa, yobe doro‑ka yama wada‑ya wisanamaki nematane.

²²Yama Deoso hikayahabone ama‑ya mai keteheteni. Ai ene amosara ene ama tokafodora, Deoso ati somawamaterene.

²³Bofe‑ka yama Deoso hikayahaboneya, bani mai ame‑ya mai ketehemeteni. Neme‑ka yama amosabisa, bani mai ame‑ya mai keteheterani. Yama amosa hinama‑ya yama‑ya ketehebisatene.

²⁴Neme‑ke yobe Deoso wamahinemata, fare bofe‑ke mai wamahine hetarato‑nima ne‑ya idi Mose wamanane. Yobe kote Deoso hikayawemata‑ya Kirisito tokiyomare, neme‑ke yobe‑ta‑ya tokiyomabisene, Deoso‑ya ai manakone‑ya daanebonaha.

²⁵Faha fowe‑nima ai tamine‑ya Deoso‑ka yama‑bone‑ya mai da‑daa mai‑ka hidi webote bani mai ame‑ya mai daanameteni. Kirisito‑ta hini emene‑ya daani oharibisematane.

²⁶Faha fowe‑nima bani mai ame‑ya mai daanamete, mai‑nima Kirisito ne‑mana, abi dame namatane. Yama nafi hawa tohiya, hini emene‑ya daani oharibisematane.

²⁷Bofe‑ya ai abano ababoneni ai nafi. Makobote neme‑ya ai ene‑ya Deoso kadikebonane.

²⁸Kirisito abe, ai manakone‑ya nanahabemata, kamatasebona, ai manakone‑ya nanahabami awirebona, ai nimane, neme‑ya ai‑ya towakamebonane.

Kirisito ene ai manakone abi oharineni

¹Deoso ati‑ya i‑di Mose kanahano, neme‑ka yama korimari‑ya mai‑ya kanawato, neme‑ka yama aboni ai awiya, yama ai wataboneni. Faha fowe‑nima Deoso‑ya yama mai daahina, mai atibodi‑ya namosaterani.

²Bani mai ame ihi mai atibodi amosawama‑mani, faha fowe one‑ya bani mai one‑ya mai nanahabamakira nemeteni. Ai atibodi amosawama‑mani, ai atibodi ai‑ya weenamara neni.

³Bani mai ame‑ya mai daana, mai atibodi amosawamara, hini mai tamine‑ya mai atibodi kadika, mai atibodi hini‑ya weenamatasameteni.

⁴Bowi mai ame, bodi mai ame na ihi mai atibodi amosawamara, mai ihi amosara manakone‑ya bani mai ame nanahabaterani.

⁵Bofe‑ya Kirisito koboni hawa tohe, ati yanane,

“Abi Deoso, tika yama‑bone mai daahinaya, tiwati koboni awirani. Bani‑ya tiwati koboni awirihi, yama kaba‑ya tiwati koboni awirihi na, owa abano daatinamaroni, yama nafi manakone onahababonehe.

⁶Bani mai‑ya mai sarikana, mai ihi ya‑yaitini awirihi, mai ihi amosara yama‑ya mai daana, mai ihi ya‑yaitini awirihi tinamaroni.

⁷Hibati‑ya owa tamine mai‑ya tikamina mai hikanahanamaro, fara mai ati‑nima onaboneni. Abi Deoso, tiwati okadababoneni.” Yeso ati nematane.

⁸Bani, yamataha, yama na‑ya Deoso‑ya mai daana, mai ihi Deoso ya‑yaini awire, tamine‑ya Yeso hiyarematane. Hiniya Mose‑ka yama hani ati ihi yama‑ya mai daana, bani‑ya mai sarikana nameteni.

⁹Makobote Yeso ati yananamatase,

“Owa tiawahi, tiwati‑nima onaboneni.” Ati nematane.

Yeso ene bani mai‑ya mai daanamaterabone, Yeso ene ai manakone abi ohareboneni.

¹⁰Yeso Kirisito hini‑ya daane ene Deoso ai‑ya kayafawahe, ai atibodi‑ya namosawahe, ai‑ya nofe, ai‑ya ati yawamaterebonane.

¹¹Hibati‑ya mahi‑nima Deoso‑ka yama‑bone‑ya mai da‑daa, bani mai‑ya mai daana mai atibodi‑ya namosi awirameteni.

¹²Kirisito‑ta Deoso‑ya yama‑ya daani ohari hawa tohe, Deoso‑ka kanika‑ya itariwahane. Ai manakone abi ohare, ai manakone‑ya Deoso haanamaterebonane.

¹³Yeso neme‑ya itari, Yeso‑ya mai ka‑kako‑mete Deoso ene mai wiya, mai mese‑ya Yeso teme kaforibona, mai‑ya nimanane.

¹⁴Kirisito ai manakone‑ya nanahabi ohari, ai manakone‑ya Deoso haanamaterebona, ai amosa hinama ai tohawahaboneni.

¹⁵Ai atibodi‑ya Deoso‑ka Doni ai‑ya hiyaratene.

¹⁶“Yama hawa tohiya, mai atibodi‑ya owati okanahana, owati‑ya mai watowaha, mai okasomaboneni.

¹⁷Mai ihi amosaramaro, mai ihi okadikamateraboneni.” Deoso‑ka Doni ati nematane.

¹⁸Deoso ati somawame, manakone wadamarani.

¹⁹Oka soho dai toha, owati dai mitahi. Yeso emene ene ai manakone aba, Deoso‑ka yobe kote neme‑ke kayawi ba‑basi hine‑ya ai tokiyoma, Deoso‑ya ai hiyarateni. Ai hiyariya, ai habo siitoriyahi.

²⁰Yeso abi awisareya, Deoso‑ka hawi barikanameteni. Yeso abe, hawi‑ya seekawahe, Deoso‑ya ai kobonaboneni.

²¹Deoso‑ka yama‑bone‑ya mai da‑daa, mai‑ka hidi webote i‑di Yeso tohe, Deoso‑ka yobe hidi tohene.

²²Deoso‑ya ai hiyarabone, ai atibodi amosahi. Deoso ai ati‑ya mitebona ai atibodi ati nahi. Hibati‑ya ai atibodi‑ya Deoso‑ka Doni namose, ai atibodi ai‑ya weenamara, hibati‑ka mai‑ya mai wisana, mai‑nima ai nawaha, ai ene amosara manakone aba ihi faha amosa‑ya ai afina‑nima ai nawahani.

²³Deoso tabaro‑ya ai kobonabone ai ati namaro, ai atibodi yama‑ya kadikariyahi. Deoso ati‑nima yama naboneni.

²⁴Ai one ai kasomahi. Mai one‑ya mai nofawaha, mai‑ya mai kasomamakeboneni.

²⁵Deoso tamine‑ya ai hiyarabone, mai yorotokana, mai‑ya ai daba, ai ibi kasoma, mai ai ya‑yainihe, mai one yama yorotokani‑ya mai nofara, mai‑nima dai riyahi. Yeso koboni nahore ai yorotokanahi.

²⁶Deoso ati‑ya mai wato, Deoso ati‑ya mai ati nofa mai na, makobote mahi‑nima Deoso ati‑ya mai tokadabara, mai manakone‑ya Yeso nanahabamarebonane.

²⁷Hini mai ihi‑ya mai kadika, mai habi siitoteni. Mai ihi‑ya Deoso kadikebona‑ya mai wata, Deoso‑ya mai ka‑kako mai‑nima mai na, mai‑ya Deoso wara hirini‑kaya mai‑ya weretowitibona‑ya mai wato na, fara mai habi siitoteni.

²⁸Hibati‑ya Mose ati‑ya mai tokadabara, mai ihi‑ya mai fama mai awa, mai tamine‑ya mai kamina, Mose ati‑ya mai tokadabara, mai abameteni.

²⁹Mose ati‑ya mai tokadabara mai abameteni. Hini yamata‑nima Deoso neba, Bidi ati‑ya ai nofarihi? Deoso Bidi abe, ai manakone‑ya nanahabemata, Deoso Bidi ati‑ya ai nofara, Deoso‑ka Doni ai nayawa, hini yamata‑nima Deoso ai‑ya nibona, dai ati niti?

³⁰Hibati‑ya Deoso ati yanane,

“Mai ihi amosara mai manakone amosara daa·onaboneni.” Ati nematane.

Makobote ati yananamatase,

“Ai‑ka Hidi hika mai ihi‑ya kadikebonane.” Ati namatasane.

³¹Deoso ati‑ya mai tokadabi nofara, Deoso ene mai habi siitonaboneni.

³²Hibati‑ya Yeso ati dai nofi yanakani‑ya dai‑ya mai wee, dai‑ya mai ati kosi na, dai habo siitoramaroni.

³³Dai one‑ya mai wee, dai one‑ya mai kosi na, dai one‑ya dai kasomamaroni.

³⁴Kadeya‑ya dai one foya, mai‑ya dai kasoma, mai dai yobikanamaroni. Dai‑ka yama mai kayafa, dai yawara,

“Oka yama mai kayafa, sibaraboneni. Neme‑ya oka yama amosabote hasina, mai kayafateraboneni.” Dai atibodi ati namaroni.

³⁵Dai habo siitoriyahi. Deoso dai manakone amosabote‑ya daanebonane.

³⁶Deoso ati‑nima dai nabone dai ati na, ati‑nima dai na, dai maakara, yama amosa‑ya Deoso daanebona ati ne, yama dai kayafaboneni.

³⁷Yeso kamebona ati ne, dai nimanaho, kamebonane. Fawaterebonane.

³⁸“Oka mai toha, owati‑ya mai nofa, owati‑ya mai tokadaba teni. Owati‑ya mai ati tokadabami nofariya, mai‑ya owatibodi nofamaraboneni.” Deoso ati nematane.

³⁹Deoso ati‑ya mai ati tokadabami nofara, mai ababone‑nima ai ni awira. Deoso ati ai nofe, ati ai tokadabatene. Deoso ai‑ya nofe, tabaro‑ya ai winawahaboneni.

Deoso ati‑ya mai no‑nofa mai‑nima ai nahi

¹Deoso ati ai nofa, haa‑nima ai atibodi ati na,

“Deoso ati‑nima yama nabone, hibayata yama oawara, sibarini. Ati‑nima yama naboneni.” Ai atibodi ati teni.

²Fara haa‑nima hibati‑ka mai atibodi ati na, Deoso mai‑ya kahiyarematane.

³Hibati‑ya yama nafi‑ya Deoso wamanemata oda awara, Deoso ati oda mite, ati oda nofe, oda atibodi yama‑ya watowaha,

“Deoso yama nafi‑ya wamane, yama ai awi awiriya, yama nafi‑ya wamanematane.” Ai atibodi ati teni.

⁴Hibati‑ya Deoso ati‑ya i‑di Abeo nofe, Deoso ati‑nima bani‑ya daane, i‑di Abeo ene‑ya Deoso nofe,

“I‑di Abeo ene amosane.” Deoso ati nematane.

I‑di Kaina Deoso ati‑nima yama‑ya daani awire, ene‑ya Deoso nofarematane. I‑di Abeo abemata ene tamine ai hiyaranasa nineni.

⁵Deoso ati‑ya i‑di Enoki nofe, atibodi ati,

“Deoso ati okadabi ohareboneni.” Atibodi ati nemata,

hini atibodi ati‑nima ne. Abare, hiniya Deoso hiwakamematane, neme‑ya. Mai sibahine, mai hiwasire, neme‑ya Enoki toki awisareya, tamine mai hiyare,

“Enoki ene Deoso ya‑yainane.” Mai ati nameteni.

⁶Deoso ati‑ya mai nofara Deoso‑ya mai ya‑yaini terani. Deoso‑ya ai hiyarabone ai atibodi ai‑ya hiyara,

“Deoso tohe ati onofe, owa‑ya kasomebonane.” Ai atibodi ati teni.

⁷Hibati‑ya faha kaki awiriya, Nowe‑ya Deoso hiyare,

“Nowe, faha kakeboneni. Kanawa wamatinahi.” Deoso ati ne,

Deoso ati‑ya Nowe nofe,

“Deoso ati okadababoneni. Kanawa wama·onaboneni, oka mai hasinabonehe.” Nowe atibodi ati ne.

Nowe ene hika mai one hasi, mai one nafi aba na,

“Nowe owati‑ya nofe, ene amose, atibodi onamosebonane.” Deoso ati nematane.

⁸Abaraho‑ya Deoso hiyare, ati‑ya i‑di Abaraho nofe,

“Abaraho, tabora bara‑ya tikahi. Tabora tiwa‑ya daa·onabone, yofi·okanaboneni.” Deoso ati nematane.

Deoso ati‑ya Abaraho atibodi nofe, toke,

“Deoso ati okadababoneni. Tabora iti oawara‑ya Deoso owa‑ya yofikanebona, owa‑ya daahinaboneni.” Abaraho atibodi ati nematane.

⁹Tabora‑ya kobone, tabora‑ya kayafi awisare, hiniya yobe bani ataro wamani tohe‑ya wine, fare‑nima bidi i‑di Isaki hika nodi i‑di Yako mai na bani ataro wamani‑ya mai wina, Bara mai tabori tohasa na‑ya mai winameteni.

¹⁰“Deoso tabaro‑ya kobo·oniya, oka yobe‑bona‑ya Deoso wamaneya, owa‑ya yobe‑ya daanebonane.” Abaraho atibodi ati nematane.

¹¹Deoso ati‑ya Sara nofa,

“Bote oha, sibarini. Oka dao tohebona Deoso ati ne, ati‑nima nebonane.” Sara atibodi ati na,

bote tohiya, Deoso hikasoma, naba toha, bidi wadawahematane.

¹²Abaraho bote tohe, abi yanatoneya, bidi tohawahe, hibayata hika nodi mai damawaha, amowa mai dama‑nima hika nodi mai nihi, siki faha webote‑ka boni dama‑nima hika nodi mai nihi na, mai damawahani.

¹³Mai tamine okanahana, mai abiya, Deoso ati‑nima yama nabone, nafi‑ya mai awi awisara, mai aba, Deoso ati‑ya mai atibodi nofasa na,

“Deoso ati‑nima yama naboneni. A‑ahi‑ya oda tabaro yokana awirani. Neme‑ya oda tabaro yokana‑bone tohabisani.” Mai atibodi ati nameteni.

¹⁴Mai atibodi ati‑mete‑nima mai one atibodi ati toha, mai tabori yokanabone‑ya mai sibanasa nineni.

¹⁵Mai tabori bote‑ya mai nokotoni awirameteni. Mai tabori bote‑ya mai nokotonihe‑mani, mai tabori bote‑ya mai tokomatasa nemeteni.

¹⁶Neme‑ka tabora‑ya mai nokotonihe.

“Neme‑ya oda tabaro amosabisaboneni.” Mai atibodi ati na.

Fara mai tabori‑bone‑ya Deoso neme‑ya wamane.

“Oka mai amani.” Ati tene.

¹⁷I‑di Isaki yetene toheya, Abaraho‑ya Deoso haane,

“Abaraho, tika dao yokana ohari owa‑ya daatiyaho.” Deoso ati ne,

Deoso ati‑ya Abaraho atibodi nofi nafi, fare Deoso‑ya Isaki‑ya daani yanatonane.

¹⁸Hibati‑ya Deoso ati‑ya Abaraho mite,

“Abaraho, Isaki‑ka nodi mai dama, fara tika nodi mai toha, mai damateboneni.” Deoso ati nematane.

¹⁹Abaraho atibodi ati,

“I‑di Isaki‑ka nodi mai damabone Deoso ati ne, fare hika nodi mai damaboneni. Isaki abeya, Deoso hinakitamebonane.” Abaraho atibodi ati ne,

I‑di Abaraho atibodi‑ya i‑di Isaki abi hawa tohe‑nima ne.

“Deoso ati ene Isaki abe, kitame‑nima nawahene.” Abaraho atibodi ati nawahematane.

²⁰Deoso ati‑ya Isaki atibodi nofe ene bidi i‑di Yako i‑di Esa mai fama mai‑ya hiyare,

“Deoso dai‑ya kasomebona ati ne, dai‑ya kasomebonane.” Isaki ati nematane.

²¹Deoso ati‑ya i‑di Yako nofemari, bote tohe, abi yanatoneya, bidi i‑di Yose bidi mai fama mai‑ya hiyare,

“Deoso dai‑ya kasomebona ati ne, dai‑ya kasomebonane.” I‑di Yako ati ne.

I‑di Yako hika awa‑ya damane wai, moinise‑ya Deoso‑ya kahiyarematane.

²²Deoso ati‑ya i‑di Yose nofe, abebona, hini tamine‑ya hika mai‑ya hiyare,

“Owa tabaro bote‑ya dai tokomiya, owa tone dai towakamiyahi. Ai tabaro bote‑ya owa tone dai kamiyahi.” I‑di Yose ati nematane.

²³Makobote Yose abe nowati‑ya Eyito mai‑ka hidi Isara·eo‑ke mai‑ya nofamare, hika mai‑ya hiyare,

“Isara·eo‑ka madehe makidi wadiya, faha‑ya mai dai korotofihi mai ababonehe.” Ati ne.

Mose badi, madi, mai na Deoso ati‑ya mai nofi nafe, mai‑ka ewe wade amose‑ya mai awa, mai‑ka ewe‑ya mai kema, mai ati yanana,

“Oka dao‑ya Deoso kasomeya, Eyito mai‑ka hidi ati‑nima oda ni awiraboneni.” Mai ati na,

i‑di Mose‑ya mai kemobisa, hidi ati ene mai habi siitora, abariko 3 tohe‑ya mai‑ka yobe‑ya Mose‑ya mai kemomi awira, faha widi‑ya Mose‑ya mai kana·itafemeteni.

²⁴Mose hawa tohe, Deoso ati‑ya nofe, atibodi ati,

“Fara·o‑ka nodi ohara, Deoso‑ka ama·oni.

²⁵Fara·o‑ka nodi ama·oni oniya, owa‑ya mai kasomi ba‑basi niya, owa ya‑yaini bide toha, makobote Deoso ene owa ya‑yaini fawanaboneni. Deoso‑ka ama·oni oniya, hibayata owa‑ya mai kakoya, makobote Deoso ene owa ya‑yaini fawaraboneni.

²⁶Kirisito ati okadaba, owa manakone ba‑basi, Fara·o ati okadabiya, owa manakone bi‑bidi nibisaboneni. Kirisito ati okadababoneni.” Mose atibodi ati nematane.

²⁷Deoso ati‑ya i‑di Mose nofe, Eyito‑ya winemata, tabora bara‑ya tokawahe. Atibodi ati,

“Eyito mai‑ka hidi owa‑ya kako, yama sibaraboneni. Owa habo siitoraboneni. Hibayata Kirisito oawara makobote oawebona, owa manakone amosa‑ya daanebonane.” Atibodi ati nematane.

²⁸Makobote Deoso mai‑ya kakariwahebona, Deoso ati‑ya i‑di Mose tokadabe,

“Nokobi‑kaya bani emene dai nawaanahi. Dai‑ka madehe daidi abarabonehe.” Deoso ati nematane.

Deoso‑ka yo‑yose i‑di Mose‑ka mai‑ya fiyakane, Eyito‑ka mai‑ka madehe daidi‑ya nanahabematane.

²⁹Deoso ati‑ya Isara·eo‑ka mai nofa, faha webote bai‑ya mai berenawaha, faha bai‑ya hawi tokoma, hokore‑ya mai yakana, mai nowati‑ya Eyito‑ka mai kamake, mai berenawahamakebone mai abameteni, faha ihi.

³⁰Deoso ati‑ya mai no‑nofa Yeriko‑ya mai kobona, Yeriko‑ka yati wamani awayara‑nima na, nemehe barikana, mahi 7 kane‑ya bari‑kaya mai daya, Deoso ati‑ya mai tokadaba, Deoso ene awayara yati wamani toha, nemehe bakatonameteni.

³¹I‑di Habi hibati‑ya mai makidi dami‑ya dakoramete, makobote Deoso ati‑ya nofawaha, Isara·eo‑ka mai kobona, Yeriko‑ka mai kiti‑ya mai awabone, Deoso ati‑ya Habi nofa ihi mai‑ya kema, mai‑ya kasoma, Habi‑ya Deoso kasomamakitase, Yeriko‑ya mai wi‑wina mai aba, Habi hika mai eyehe‑ta hasinameteni, Deoso mai hikasomaro.

³²Hini yamata‑nima obati? Deoso ati‑ya mai no‑nofa mai dama mai nafi tamine okanahano awiraboneni. I‑di Kideyaho, i‑di Baraki, i‑di Sanisaho, i‑di Yefete, i‑di Dafi, i‑di Samo·eo, mai na, Deoso ati‑ya mai mi‑mita‑mete mai dama, mai tamine okanahanoraboneni.

³³Deoso ati‑ya mai no‑nofa Deoso mai‑ya kasome ene bara mai‑ka tabora‑ya mai kayafawaha, mai ihi amosa, mai‑ya mai kasoma, mai ihi amosara, mai‑ya mai bisi na, Deoso mai‑ya kasomebona ati ne, mai‑ya kasome, Deoso ati ene iriyaho mai hamarameteni.

³⁴Deoso ati‑ya mai no‑nofa mai one‑ya mai yaditona, yama hirini‑ya mai‑ya mai korotowitineni, mai ababonehe. Mai abara mai‑ka mado‑ta hatibisameteni. Yima‑ya mai one mai mai hinahaba hinabone, Deoso ene mai hinahabarameteni. Hibati‑ya mai kitara, mai‑ya bara mai bisinabone mai ati na, Deoso ene mai kitawaha, mai ihi bara mai‑ta mai kananawahameteni.

³⁵Mai fanawi one Deoso ati‑ya nofa, mai‑ka madehe aba, kitamameteni. Ai owa‑ya mai hiyara,

“Deoso ati tinofa tiwa bisi, tiwa onahaba onaboneni. Deoso ati tinofarabone tiniya, tiwa bisi·orihi, tiwa onahabarihi onaboneni.” Ai owa‑ya mai hiyara mai ati nameteni.

“Sibaraboneni. Deoso ati onofa, owa‑ya tiwati bisiniya, owa bisi, owa‑ya tiwati nanahabiya, owa tinahaba tinahi. O·abiya, Deoso owa‑ya nakitamebona, o·abamaraboneni. Deoso ati onofe, ati nofi fawa·oraboneni.” Ai owa ati nematane.

³⁶Ai one Deoso ati‑ya mai nofa mai‑ya mai kaka, mai‑ya mai wee, mai‑ya mai bisi, koheti‑ya mai‑ya mai soki, kadeya‑ya mai‑ya mai nafoya nameteni.

³⁷Mai one Deoso ati‑ya mai nofa, yati‑ya mai baana, mai aba, mai one‑ya sehoti‑ya mai mai wisina, mai aba, mai one yima‑ya mai tiihina, mai aba nameteni. Mai one yakana bora amosa‑ya kihara, bani ataro‑ya mai sakonibisa, yama‑ya mai one kihara, mai‑ya mai bisina, mai abamakebone, mai‑ya mai siba nameteni.

³⁸Mai yowi‑ya mai yakana, mai amosi‑ya mai amosi fiyakana, mai‑ya mai nanahababone, tabora awiri‑kaya mai yakana, adami‑kaya mai one wina, wami hodi‑ya mai one wina nameteni.

³⁹Mai atibodi ati‑ya Deoso wato, mai‑ya kahiyare, Deoso ati nafi‑nima yama na‑ya mai kayafi awisarameteni.

⁴⁰Deoso yama nafi‑ya wato, mai‑ya kasome, ai‑ya kasomahari, neme‑ya ai koboniya, mai eyehe ai winiya, yama amosa hinama tohaboneni.

Deoso bidi mai‑ya kositene, yama‑ya mai watowahabonehe

¹Deoso ati‑ya mai no‑nofa‑mete mai ihi ai awa, mai‑nima ai nahi. Deoso ati ai tokadaba, yama one ai nokotonira. Ai‑ya mai one awaboneni. Ai kananabone, yama kanaha‑ya ai weyeterani. Yama kanaha ai korotowitiya, ai honita kanateni. Ai ene amosara yama kanaha‑ya ai weyena‑nima teni, Satanasi‑ka keyehe ai tokadabamaro, ati ai nofami awireya, Deoso hawine‑ya ai yakaniya, ai kiti fawaraboneni.

²Yeso‑ta ai nokotoni oharibisahi. Yeso ene Deoso ati ai nofa, Deoso tabaro‑ya ai winamakeboneni. Yeso Deoso ati‑ya tokadabe, fare‑nima ai nahi.

“Deoso owa‑ya kasomebona, ene ya‑yai·onaboneni.” Yeso ati ne.

Yeso mai baahikane, awa‑ya waane, abe, mai hahahikane, mai‑ya yawaremata, hibayata Deoso itari‑ka kanika‑ya itariwahane.

³Yeso mai hikako, mai hinahabemata tamine ai kadika, ai‑ya mai kaka, ai yawaraboneni.

⁴Dai ene amosabone, dai ene dai‑ya mai nanahabi awisarani.

⁵Deoso ati dai fawanihe awineni. Deoso bidi dai toha, dai‑ya hiyare,

“Oka dao dai amani. Dai kosi·oniya, dai yawarihi. Dai wee·oniya, dai habo siitorihi, dai nahi. Dai okasomabone owati amani.” Deoso ati nematane.

⁶Deoso dai‑ya kanawatobona, dai‑ya kositene. Ai‑ka madehe ai nofa, ai kositeni, mai ihi amosabonehe. Deoso‑ka dai toha dai‑ya kosinebonane.

⁷Deoso dai‑ya kosine, yama amosa dai watowahaboneni. Deoso bidi dai toha dai‑ya kanawatotene. Ai‑ka madehe ai kositeni, yama amosa‑ya mai watabonehe. Deoso bidi ai toha, ai‑ya kanawato tene.

⁸Deoso dai‑ya kosire‑mana, bidi dai tohara neni. Ai‑ka abi ai‑ya kosine, madehe bara‑ya kosi terene.

⁹Ai‑ka abi bofe‑ke ai‑ya kosine, ai yawara, ai‑ka abi ai nofateni. Fara‑nima ai‑ka abi neme‑ke ai‑ya kosine, ai yawara, ai‑ka abi neme‑ke ai atibodi‑ya kanawatotene, ai hasinabonehe.

¹⁰Ai‑ka abi bofe‑ke ai‑ya kanawatobona, ai‑ya kosine, yama nafi‑ya watore, ai‑ya kositene. Ai‑ka abi neme‑ke ai‑ya kosineya, ai‑ya kasomatene, hini ene amosi‑nima ai ene amosabonehe.

¹¹Ai‑ka abi ai‑ya kosine, ai ya‑yaira, yama koma, makobote yama ai watowaha, ai ene amosawama, ai atibodi ya‑yainawahateni.

¹²Dai mano abo toharihi, dai wawawakarihi na, yama dai aninahi, dai kitabonehe.

¹³Deoso hawine‑ya dai yakana, dai ene amosa, mai bakatona‑nima dai rabone, mai kitabisa mai‑nima dai yakanahi.

Deoso ati dai tokadabahi

¹⁴Mai ibi weena, mai dai kasomahi, mai ibi weerabonehe. Yama amosa dai ene‑bone dai nokotonihi. Ai ene amosara, Deoso‑ya ai awateraboneni.

¹⁵Dai noko wadahi. Deoso dai‑ya kasomebona ati ne, dai ene amosanadira, dai‑ya kasomi awirebonane. Dai ati bida toha ene mai ibi nofaraboneni. Mai dami ihi amosaraboneni.

¹⁶Dai ene amosahi. Dai‑ka yibote ohare‑ya dai famabisahi. Fana one‑ya dai famamakiriyahi. I‑di Esa‑nima dai riyahi. Deoso‑ka ka‑kasoma‑ya i‑di Esa nokotonire, sohori tefe bidi‑ya kanikebona, Deoso‑ka ka‑kasoma‑ya daanematane.

¹⁷Makobote Deoso hikasomebona Esa ati ne, Deoso hikasomare, fara ohinawahane, Deoso hikasomebonaha. Hibati‑ya Deoso ati‑ya Esa nofare, hini ene Deoso hikasomarematane.

¹⁸Hibati‑ka mai‑nima dai ni awirani. Hibati‑ya ai‑ka idi mai kama, adami mate‑kaya mai naha, adami tati‑ya Deoso mai‑ya hiyare,

“Adami dai boyoriyahi.” Deoso ati ne.

Ati ene adami hirina, yama nafi soke, yama hakikikana kitameteni.

¹⁹Ho‑hori webote ati kita, ati‑ya mai mita, Deoso ati‑ya mai mita na, mai habi siitona,

“Oda‑ya tiwati yananamariyahi.” Mai ati nameteni.

²⁰Deoso ati,

“Adami‑ya bani mai boyona, mai dai nanahabahi yati‑ya.” Deoso ati ne,

ati ene mai habi siitonameteni.

²¹Yama awi yofina ihi Mose ati yanane,

“Ka! Yama yofina, owa habo siitona, wawawa·okanani.” Mose ati nematane.

²²Dai‑ta adami tati‑ya dai kobona‑nima Deoso tabaro yokana‑ya dai kobona, Yerosare neme‑kaya dai kobona, Deoso‑ka yo‑yose mai dama mai yorotokana mai ya‑yaina mai ai kadikaterani.

²³Deoso‑ka dai tohawaha, dai oni‑ya Deoso kanahanone. Neme‑ya mai one Deoso ati‑ya mai no‑nofa mai oni‑ya kanahano dai oni‑ya kanahanone. Hibati‑ka mai oni‑ya kanahanomata mai aboni aba, mai atibodi neme‑ya tohawaha, mai ihi amosa hinama toha, mai‑ya dai oni sawe, Deoso ai ene‑ya kadikebona‑ya dai sawi dai nineni.

²⁴Hibati‑ya Deoso‑ya mai hiyarabone, Deoso‑ka bani emene‑bona‑ya mai towakama, Deoso‑ya mai hiyarameteni. Hibayata Yeso ene Deoso‑ya ai hiyarawahabone, hiniya Deoso‑ya ai hiyarateni. Hibati‑ya Abeo abe ene, i‑di Kaina‑ya Deoso yawe, i‑di Yeso abe ene Deoso ai‑ya ati somawamawahematane.

²⁵Deoso neme‑ya ati yananeya, dai narabo hawihi. Hibati‑ya adami tati‑ya ati yanane, ati mai hinofare, mai abameteni. Neme‑ya ati yananeya, ai narabo hawira, ai abahareboneni.

²⁶Hibati‑ya Deoso ati ene wami wawawakana,

“Makobote owati yananamatasiya, wami, neme na, wawawakana naboneni.” Deoso ati nematane.

²⁷Yama wamani nafi wawawakanaboneni. Deoso‑ka yamata wawawakani kiteraboneni. Bofe‑ka yama nafi ababone, Deoso‑ka yama nafi hasinibisaboneni.

²⁸Deoso‑ka yama wawawakani kiterabone, ai kayafabone ai ya‑yaina, Deoso ai kahiyara, Deoso ene ai nofa,

“Abi Deoso, tiwa ene amosabote tohani.” Ai ati nahi.

²⁹Yama hirini‑nima Deoso nane, yama amosara‑ya sarikanebonaha.

Owati dai mitamakihi. Owati fawani yanatoni.

¹Ai‑ka ayo ai‑ya nofi‑nima ai ibi nofiyahi.

²Dai tabaro‑ya mai kobona, mai dai kasoma, mai tafe‑ba dai daa, mai ati amoniya, dai tabaro‑ya mai amo nahi. Mai‑ya ai owa kasome, ai owa mai amanikani ati ne, Deoso‑ka yo‑yose mai‑ya kasomematane.

³Deoso ati‑ya mai no‑nofa kadeya‑ya mai mai hinafoya, mai dai kasoma, mai dai yobikana, mai mai bisihina, mai dai kasoma, Yeso abano kobobone mai toha, dai toha na, mai dai kasomahi.

⁴Dai‑ka yibote‑ya dai fami ohare, mai one‑ya dai dakorariyahi. Mai one‑ya dai dakoriya, dai ene‑ya Deoso aweya, dai manakone wadaboneni. Dai manakone amosara, dai nofaraboneni.

⁵Yinero dai nokotonira, Deoso ene yama dai kiha, dai ya‑yai nahi.

“Dai‑ya osawebone, dai honita tohateraboneni.” Deoso ati nematane.

⁶Deoso ati ene haa‑nima ai ati teni.

“Deoso owa‑ya kasomebona, mai ihi owa habo siitoteraboneni.” Ai ati teni.

⁷Hibati‑ya Deoso tamine‑ya dai‑ya mai kaminamaro, mai tamine dai kadika, mai ihi amosa, mai ihi‑nima dai ene namakiyahi.

⁸Yeso Kirisito hibati‑ke hini tohe toha, hibayata‑ke hini tohe toha, makobote hini tohe tohatebonane.

⁹Yamata bara dai kababone tamine‑ya mai kamina, mai ati‑nima dai na, dai‑ya kasomi nafebone mai ati na, mai ati dai nofariyahi, Yama ai kaba ai atibodi‑ya namosaterani. Deoso ati ai nofa, ai atibodi‑ya kasomabisatene. Yamata bara mai hikaba, mai atibodi‑ya kasomaterani.

¹⁰Hibati‑ya Deoso‑ka yama‑bone‑ya mai da‑daa, Deoso‑ka bani kote‑ya mai kayafa, bani‑ya mai kabateni. Yeso‑ka ai toha Deoso ai‑ya kasome‑nima mai‑ya kasomarene.

¹¹Hibati‑ya Deoso‑ka yama‑bone‑ya mai da‑daa mai‑ka hidi faha fowe ohari‑ya Deoso‑ka yobe kote kayawi ba‑basi hinemata‑ya bani emene‑ya mai towakamameteni. Tabora tokiya, bani abano‑ya mai sarikanameteni.

¹²Fara‑nima tabora tokiya Yeso abematane. Ai manakone‑ya nanahabe, hini emene‑ya ai atibodi‑ya namosebonaha.

¹³Yeso‑ka hawi‑ya ai sawe, ai‑ya mai kakaboneni. Ai‑ya mai kakoya, sibaraboneni.

¹⁴Ahi‑ya ai tabaro awira, neme‑ya ai tabaro yokana‑bone toha‑ya ai koboni awisarani.

¹⁵Yeso ene ai‑ka ka‑kahiyara Deoso‑ya mahi‑nima ai daanahi.

“Yeso‑ka oda amani.” Ai ati nahi.

¹⁶Mai dai kasoma, mai kasomi dai fawariyahi. Dai‑ka yama mai‑ya dai ebekana, yama‑ya Deoso‑ya dai daana‑nima dai na, dai ene Deoso ya‑yainebonane.

¹⁷Dai ene tamine‑ya dai‑ka webote‑ya Deoso hiyaratene. Dai ene amosa dai‑ka webote‑ya Deoso kahiyara, dai ene amosara dai‑ka webote‑ya Deoso weenebonane. Dai‑ka webote‑ya Deoso weerebona, ati dai nofaho. Dai ene dai‑ka webote‑ya Deoso kahiyare, dai‑ya dai‑ka webote kasome, dai ene amosara, dai‑ka webote‑ya Deoso weene, dai‑ya dai‑ka webote weenamakiya, yama amosaraboneni.

¹⁸Oda tamine dai hiyarahi, Deoso‑ya. Oda atibodi amosa oda watoneni. Oda ene amosabone oda nofateni.

¹⁹Deoso dai hiyariya, dai tabaro‑ya kobo kanibote onabone onani.

²⁰Dai tamine Deoso‑ya ohiyarineni, Deoso ene dai atibodi dai‑ya weerabonehe. Ai‑ka Hidi i‑di Yeso ai‑ya na‑nawada webote abe, emene tokafodo, ai manakone‑ya nanahabi hawa tone, Deoso hinakitamene.

²¹Deoso dai‑ya kasomane, ati dai tokadabebonaha. Yeso ene ai ene amosa, Deoso ai ene‑ya aweya, ya‑yainebonane. Yeso‑ya ai kahiyari fawateriyahi. Feye amani.

²²Oka soho dai amani. Owati dai mitahi. Dai‑ka yama hani nafira okanahanoni.

²³Dai‑ka ayo i‑di Timoti mai sokihine, kadeya‑ya mai hinafoyemari‑ya mai seekana, i‑di Timoti koboneya, dai tabaro‑ya oda tokaboneni.

²⁴Dai‑ka webote mai toha, Deoso‑ka mai one toha na, mai‑ya oda tamine dai hiyarahi. Itariya‑ya mai wi‑wina dai tamine‑ya mai hiyarateni.

²⁵Deoso dai‑ya kasomebonane, dai nafi.