Karatiya mai‑ka yama hani
11Baoro ama·oni. Dai‑ka yama hani‑bone okanahanowahaboneni. Yeso Kirisito‑ka yo‑yose ama·oni. Owa‑ya mai one yoseramaroni. Yeso Kirisito‑ta owa‑ya yosemarine. Yeso Kirisito abemari, Deoso hinakitamemari, makobote Yeso Kirisito Badi i‑di Deoso eyehe owa‑ya yosemarine.
2Karatiya‑kaya dai wi‑wina Yeso ati dai no‑nofa dai‑ka yama hani‑bone okanahanoneni. Yeso ati‑ya mai no‑nofa owa‑ya mai sa‑sawi, mai ati okanahanohari onaboneni. Dai tabaro nafi‑ka yama hani‑bone dai kadikahi.
3Ai‑ka Abi i‑di Deoso, ai‑ka Ayo i‑di Yeso Kirisito ne, dai‑ya mai kasoma, dai atibodi ati dai‑ya somateni.
4Ai ene amosara, tabora nafi‑nima ai ene towe namaro, ai manakone wada, ai ababoneni. Yeso ai manakone‑ya nanahabebona, ababisemarine. Hibati‑ya ai ene towe toha, Deoso ati ene ai manakone‑ya Yeso nanahabemari, Yeso ene ai ene amosawahaboneni.
5Deoso‑ya ai kahiyarahi. Makobote Deoso tabaro‑ya ai winiya, Deoso‑ya ai kahiyara. Deoso‑ya ai kahiyari fawariyahi.
Deoso hawine ohari‑ta tohene
6Hibati‑ya Kirisito ene Deoso dai‑ya haane, Ati Amosabote dai nofemari, ati dai nofami awire, mai one ati‑ta dai nofawahamoneni. Ka! Hini yamata‑bone mai ati dai nofawahiti? Mai ati amosabisa‑mone dai ati na awineni.
7Yeso Ati Amosabote ohari‑ta tohe, ati bare‑ya mai kamina, Kirisito Ati Amosabote tohi awirene. Keyehe‑ya dai‑ya mai hirikanineni, mai ati dai nofabonehe.
8Deoso hawine ohari‑ta tohabisane. Deoso hawine bare‑mona‑ya mai kamina, mai‑ya Deoso yawi fawaterebonane. Deoso hawine bare‑mona oda kamina‑mani, oda‑ya Deoso yawi fawarihi, hawine bare‑mona‑ya Deoso‑ka yo‑yose mai kamina‑mani, mai‑ya Deoso yawi fawarihi ne nane.
9Hibati‑ka owati‑nima owati namatasaboneni. Deoso hawine bare‑mona‑ya mai hiyara, mai‑ya Deoso yawi fawaterebonane.
10“Mai ya‑yai·onihebone, owati amani.” Dai ati na awineni.
Deoso‑ta ya‑yai·onira‑mani, mai ya‑yai·onibisa‑mani, Yeso Kirisito‑ka yo‑yose ohara neni. Yeso Kirisito‑ka yo‑yose oha, Deoso‑ta ya‑yai·oniteni.
Baoro‑ya Deoso kadikemata ati hikaminebonaha
11Oka soho dai amani. Owati dai mitahi. Deoso Ati Amosabote dai‑ya okaminamaroni. Hini owati‑ya okamini awiramaroni. Oda owa ati tohi awirihi nemarine. Deoso ati‑ta okaminabisamaroni.
12Owa‑ya mai kanawato awiramaroni. Yeso Kirisito‑ta owa‑ya kanawatobisemarine.
13Hibati‑ka owa tamine dai mita awineni. Deoso‑ka mai onofara, Yodeo mai ati‑ya onofa, Yodeo mai ihi‑nima owa ene na, Deoso‑ka mai‑ya okako, mai‑ya wee, mai‑ya bisi onamaroni, Yeso ati‑ya mai nofarabonehe.
14Yodeo mai one, oda‑ka idi mai ati‑ya mai nofi bi‑bidi namaroni. Owa‑ta oda‑ka idi mai ati onofi nafe. Oda‑ka idi mai ati okadabamaroni.
15Deoso owa‑ya nofe, owadi awisari‑ya owa‑ya kadikematane, ati okaminebonaha.
16Deoso hini Bidi‑ya owa‑ya yofikanemarine.
“Bara mai‑ya Oka dao tamine tikaminawahaboneni.” Deoso ati nemarine.
Deoso ati‑ya omita, mai one ati omitaramaroni. Deoso ati‑ta omitabisamaroni.
17Yerosare‑ya okara, Yeso Kirisito‑ka yo‑yose mai ati omitaramaroni. Yerosare‑ya mai winasa na, mai ati omiti awiramaroni. Arabiya‑ya okabisa, makobote wini·onamamaroni, Damaso‑ya owinabonehe.
18Faha fowe 3 tohamakiya, Yerosare‑ya okawaha, Bedoro‑ka yobe‑ya kobo·ona, owa amoni 15 toha, Bedoro‑ya ohiyarineni.
19Bedoro‑ka yobe‑ya owiniya, Yeso sori i‑di Tiyako‑ta oawa, Yeso‑ka yo‑yose mai one oawi awiramaroni.
20Owa‑ya mai kanawatora, Yeso ati‑ta okanahanobisa, keyehe‑ya hiri·ora, oka yama hani‑ya Deoso awe, oka yama hani‑ya watone.
21Bedoro‑ka yobe‑ya owina, makobote Siriya‑kaya okomake, makobote Sirisiya‑kaya okomaki onamaroni.
22Yodeya‑kaya i‑di Bedoro‑ka yobe waari, owa nowati‑ya Yodeya‑kaya Yeso Kirisito ati‑ya mai no‑nofa mai one mai yorotokana, mai ibi hiyara,
“I‑di Baoro oda awi awisarani.” Mai ati nineni.
23Owa tamine‑ya mai mita, owa‑ya mai awi awisaramaroni.
“Baoro Yeso ati‑ya kako, ai‑ya bisinemarine, Yeso ati ai nofarabonehe. Makobote Yeso ati‑ya tokadabawahe, Yeso ati‑ya kaminatene.” Mai ati namaroni.
24Owa tamine‑ya mai mita, mai ya‑yainamaroni.
“Deoso, amosabote amatini, Baoro hamemari, tiwati ihi ati somawamane.” Mai ati namaroni.
2Baoro ati‑ya Yeso‑ka yo‑yose mai nofa
1Faha fowe 14 tohamakiya, Deoso ati ene Yerosare‑ya okomakitasa, i‑di Banabe i‑di Tito mai fama, owa‑ya mai sawemaroni.
2Yerosare‑ya kobo·ona, Yeso ati‑ya mai no‑nofa mai webote‑ta mai‑ya ohiyarineni. Bara mai‑ya Deoso Ati Amosabote okamina, tamine mai‑ya ohiyarineni. Owatibodi yama‑ya dika,
“Owati‑ya mai mitiya, owati‑ya mai nofaba awineni. Owa‑ya mai weenaba awineni. Owa‑ya mai one ati barinaba awineni.” Owatibodi ati namaroni.
Webote mai‑ya ohiyara,
“Bara mai‑ya Deoso Ati Amosabote okaminateni.” Onamaroni.
“Sibarini, tiwa ene amosini. Bara mai‑ya Yeso tamine tikaminiyahi.” Mai ati namaroni.
3Tito owa‑ya sawi, Yodeo tohi awirene, Kereko amane. Yodeo mai‑nima ni awirene, sowiri tati ataro wisinakosi awiremarine.
“Sibarane.” Mai ati namaroni.
Owa‑ya mai weeni awiramaroni.
4Makobote Yodeo mai one mai kobona, Yeso‑ka mai toha‑mone mai ati na, Yeso‑ka mai tohi awiramaroni. I‑di Tito tamine‑ya mai mita, mai ati yawawahamaroni. Oda ati‑ya mai kamita, oda‑ya mai kakatomamaroni. Oda‑ya mai ati barinabone, oda‑ya mai hiyaramaroni.
“I‑di Tito sowiri tati ataro abaho. Yeso‑ka ai tohabone, ai sowiri tati ataro abateboneni. I‑di Mose ati‑nima dai ni awiriya, Deoso‑ka dai tohateraboneni.” Mai ati namaroni.
Ai yaditona‑nima ai‑ya mai nihebone mai ati amani. Keyehe‑ya ai‑ya mai hirikanaro, Yeso ati‑ya mai nofarani.
5Deoso Ati Amosabote yokana dai watabone ona, mai ati oda tokadabi awiramaroni.
6Yerosare‑ya mai wi‑wina Yeso ati‑ya mai no‑nofa mai‑ka webote owa‑ya mai weeni awirani. Owati‑nima mai ati namaroni. Ai‑ka webote mai‑mone mai ati na, hini ai owa mai amani. Deoso‑ka ai nafi toha, Deoso ai‑ya nofi nafitene.
7Fa‑fai‑ya mai‑ka webote mai yorotokana, owati‑ya mai mita, mai ibi hiyara,
“Hehe, i‑di Baoro‑ya Deoso yosemarine, Bara mai‑ya Yeso Ati Amosabote‑ya kaminebonaha. I‑di Bedoro‑ya Deoso yosenemarine, Yodeo mai‑ya Deoso Ati Amosabote‑ya kaminaharibonaha.” Mai ati namaroni.
8Deoso ati ene Yodeo mai‑ya Yeso ati‑ya i‑di Bedoro kamine, Deoso ati ene Bara mai‑ya Yeso ati okaminahari oneni. Yeso Kirisito‑ka yo‑yose i‑di Bedoro amane. Yeso Kirisito‑ka yo‑yose‑hari ama·oni.
9I‑di Tiyako, i‑di Bedoro, i‑di Yowaho mai na, webote mai‑mone, i‑di Banabe oda fama, oda ati‑ya mai mitamaroni. Oda ati‑ya mai mitiya, oda yehe‑ya mai waranamaroni.
“Hehe, oda‑nima dai na, Bara mai‑ya Deoso Ati Amosabote‑ya dai kaminahi. Oda‑ta Yodeo mai‑ya Deoso Ati Amosabote oda kaminaboneni. Deoso dai‑ya kasomebonane.” Mai ati namaroni.
10Mai ati one,
“Yamata‑ya mai kihara, mai dai kasomiyahi.” Mai ati na.
Fara mai ati‑nima oteni.
I‑di Bedoro‑ya Baoro weenawahe
11Atioki‑ya Bedoro kobonamaki, hini noko‑ya wee·onemarine, ene amosare ene.
12Atioki‑ya Bedoro koboni bahe, sibaremarine. Bara, Yeso ati‑ya mai no‑nofa mai eyehe i‑di Bedoro tafemarine. Yodeo mai‑nima mai ni awira, mai sowiri tati atori abi awira. Mai eyehe i‑di Bedoro tafemarine. Makobote i‑di Tiyako tabori‑ka Yodeo mai kamake, mai kobona, mai ati yanana,
“Yeso ati‑ya mai nofabone, mai sowiri tati atori abahi.” Mai ati namaroni.
Mai ati‑ya i‑di Bedoro mite, habo siitone, Bara mai eyehe tafami awiremarine.
13Bedoro ene‑ya Yodeo mai one awa, mai habi siitona, Bara mai eyehe mai tafami awirani. I‑di Banabe ne hibati‑ya Bara mai eyehe tafe, Bara mai eyehe tafamarene.
14I‑di Bedoro, Banabe mai fama mai ihi amosara, Deoso Ati Amosabote ati‑nima mai namara, i‑di Bedoro wee·owahani, mai dama owati‑ya mai mita,
“Bedoro, Yodeo amatini. Yeso tinofawahamaro, Yodeo mai‑nima tini awira. Bara Yeso ati‑ya mai nofawaha, hini yama‑bone Yodeo mai‑nima mai nabone mai mai hina? Yodeo mai‑nima mai ni awiraboneni.
15Ai wada, Yodeo ai toha, Bara ai tohi awirani, yama ai watoneni.
16Bedoro, I‑di Mose ati‑ta ai ati tokadaba, Deoso ai‑ya ati somawamaterene. Yama tiwatoneni. Yeso Kirisito ai manakone‑ya nanahabe, ai‑ya hiyare,
‘Owa ene‑ta Deoso dai‑ya ati somawamebonane. Owati dai nofa, dai sibaraboneni. Deoso dai‑ya ati somawamebonane.’ Yeso ati nemarine.
I‑di Mose ati nafi ai tokadabaterani. Mose ati ene Deoso ai‑ya ati somawamare. Fare Yeso ai manakone‑ya nanahabe, Yeso ati ai nofiya, Deoso ai‑ya ati somawamebonane.” Onamaroni, Bedoro‑ya ohiyararo.
17Yeso ati‑ya ai no‑nofa Deoso ai‑ya ati somawamare‑mana, Yeso keyehe‑ya hirine nane. Keyehe‑ya Yeso hiriterene.
18Mose ati ai tokadababone, Deoso tabaro‑ya ai kobonabonehe ai ati namaroni. Makobote Yeso ai manakone‑ya nanahabe tamine ai mita, Yeso ai nofawaha, makobote Mose ati ene Deoso tabaro‑ya ai kobonabone ai ati na‑mani, towe ai tohamatasa neni.
19Mose ati‑nima onabone onamaro, Mose ati nafi okadabara, hini owa ene o·ababoneni. Hibati‑ya Deoso owa‑ya awe, o·aba‑nima onamaroni. Yeso abe, owa manakone‑ya nanahabe, Yeso ene okitamawahani. Deoso ati‑ya noko·onibisaboneni.
20Yeso abe, owa manakone‑ya nanahabemarine. Yeso abeya, Yeso eyehe o·aba‑nima onamaroni. Owa abano abara, hini owatibodi bote‑ta aba‑nima nineni. Yeso kitame, owatibodi yati‑ya winane. Owatibodi‑ya wine, Yeso ene‑nima owa ene nawahani. Deoso Bidi owa‑ya nofe, owa manakone‑ya nanahabe, ati onofe, ati‑nima owahani.
21I‑di Mose ati nafi ai tokadabara, ai manakone tohani. Hini ai ene ai manakone ai nanahaba‑mani, Yeso abare nane. Ai manakone ai nanahabaterani. Yeso Kirisito abare‑mana, Deoso ai‑ya ati somawamare nane. Deoso tabaro‑ya ai winara neni.
3Hini ai ene Deoso tabaro‑ya ai koboteraboneni
1Karatiya‑ya dai wi‑wina dai ka‑kana nawaha awineni. Mai‑ka keyehe‑ya dai nofawahineni. Hibati‑ya dai tabaro‑ya oda wina, Yeso Kirisito tamine oda kaminamaroni. Keyehe‑ya dai‑ya oda hirikaramaroni.
“Yeso awa‑ya abemarine, ai manakone‑ya nanahaberi.” Oda ati namaroni.
Yeso ati ai nofiya, ai sibarabone ona. Owati dai mita, owati dai watamaroni.
2Hibati‑ya Mose ati‑nima dai na, Deoso‑ka Doni dai‑ya sawine? Dai‑ya sawi awiremarine. Yeso Kirisito tamine‑ya oda kamina, Yeso ati dai nofa, Deoso‑ka Doni dai‑ya sawiwahabisane.
3Deoso‑ka Doni ene Deoso‑ka dai tohawaha, hini dai ene dai amosawamabone dai ati na awineni? Dai ka‑kana na awineni. Dai ene amosawamabone dai ati na, dai ene tohi awiraboneni. Deoso‑ka Doni ene tohabisebonane.
4Hibati‑ya Yeso ati dai nofa, dai‑ya mai bisina, dai eme komamaroni. Yeso ati dai nofami awira‑mani, dai eme komene honita toha neni.
“Dai eme komene honita tohi awirani.” Owatibodi ati neni.
5Owati dai mitamatasahi. Mose ati‑nima dai namaro, Deoso‑ka Doni dai‑ya sawine? Dai‑ya sawi awirane. Mose ati‑nima dai na, Deoso ene kite dai awane? Ene dai awi awirane. Kirisito tamine oda kamine tamine dai nofabisiya, Deoso ene kite dai awineni.
6Fara‑nima Deoso ati‑ya Abaraho nofemarine. Abaraho tamine i‑di Deoso hiyare,
“Abaraho amosane. Abaraho owati‑ya nofe, sibarane.” Deoso ati nemarine.
7Deoso ati‑ya ai nofa, Abaraho‑ka nodi ai tohaboneni. Dai one Bara toha, Deoso ati‑ya dai nofa, Abaraho‑ka nodi mai dai tohahareboneni. Abaraho Deoso ati‑ya nofemari‑nima dai na, fare Abaraho‑ka nodi dai amani.
8Hibati‑ya Yodeo mai toha, Bara mai toha mai na, mai tamine‑ya Deoso hiyarane Abaraho‑ya. Deoso hini Ati Amosabote‑ya kaminemarine.
“Abaraho, tabora dami‑ya mai wi‑wina mai okasomaboneni, mai nafi. Owati tinofa‑nima owati‑ya mai nofiya, mai okasomaboneni.” Deoso ati nemarine.
Deoso ati‑ya mai kanahanamaroni, Deoso‑ka yama hani‑ya.
9Deoso ati‑ya Abaraho nofe‑ya Deoso kasomemarine.
“Abaraho owati tinofa sibarineni.” Deoso ati nemarine.
Abaraho‑nima ai ni‑ya, Kirisito ati ai nofiya, Deoso ai‑ya kasomaharibonane.
“Owati dai nofa dai sibarineni.” Deoso ati nebonane.
Yeso ati ai nofa ai manakone aba ai sibarani
10I‑di Mose ati dai tokadaba ene Deoso ati somawamebona dai ati na, i‑di Mose ati nafi dai tokadabariya, Deoso ati somawamarebona, ati yawabisebona i‑di Mose‑ka yama hani ati nineni.
11I‑di Mose ati nafi ai tokadabaterani. Ai ene amosa hinama tohaterani. Hini ai ene Deoso ati somawamaterebonane. Yeso ati‑ya ai nofa, ai manakone aba‑ya Deoso aweya, ati somawamatene.
12Hibati‑ya Mose‑ya Deoso hiyare,
“Tiwati nafi‑ya mai tokadaba, mai sibaraboneni. Ati mai hinofabise, ati nafi mai tokadabare, mai ababoneni.” Ati nematane.
13Mai ihi amosara nafe, awa‑ya mai mai nawaanateni, mai ababonehe.
“Awa‑ya mai waana, mai aba, mai‑ya Deoso yawatene.” Deoso‑ka yama hani ati neni.
Yeso Kirisito ai ene towe‑ya kayafawahe, awa‑ya waane, abemarine. Ai manakone‑ya nanahababisemarine. Yeso Kirisito‑ya Deoso yawemari, ai‑ya yawarebonaha.
14Abaraho‑ya Deoso kasomemarine. Yeso Kirisito ene Abaraho‑ya Deoso kasome‑nima Bara dai toha, Yeso ati dai nofiya, dai‑ya Deoso kasomaharibonane. Deoso‑ka Doni dai‑ya sawiwahebonane.
I‑di Abaraho‑ya Deoso hiyari bahi i‑di Mose‑ya hiyaramakine
15Soho, owati dai mitahi. Yama ai kanika, manakone nafi abi awisariya, yama hani‑ya ai oni‑ya ai kanahano, makobote yama hani ati‑nima ai teni. Yama hani kote ai kanahanomakitera, ati kote ai nanahabateni.
16Abaraho‑ya Deoso hiyare,
“Tiwa okasomaboneni, tika nodi eyehe.” Deoso ati nemarine.
Ati dai mitamatasaho. Abaraho‑ka nodi mai dami tamine‑ya hiyari awirane. Hika nodi ohari tamine‑ya hiyarabisemarine. Abaraho‑ka nodi i‑di Yeso Kirisito tohe, fare‑ya Deoso kasomebonane.
17Abaraho‑ya Deoso hiyare,
“Owati‑nima yama teboneni.” Deoso ati ne.
Ati‑ya mai kanahanamaroni. Makobote amoni dameya, faha fowe 430 tohamakiya, Deoso Mose‑ya hiyare,
“Mai ihi‑bone onofabone mai‑ya tikaminiyahi.” Ati ne.
Mose‑ya hiyareya, Abaraho‑ya hiyaremata ati abarene. Ati‑nima yama teboneni.
18Abaraho‑ya Deoso hiyare,
“Owati‑ya tika mai nofiya, mai‑ya owati somawamiya, mai sibaraboneni.” Deoso ati nemarine.
Hiniya Mose ati‑ya ai tokadaba, Deoso ai‑ya kasome‑mana, i‑di Abaraho‑ya Deoso keyehe‑ya hirine nane. Deoso keyehe‑ya hiritere, Abaraho hiyaremata ati‑nima yama naboneni.
19Hini yamata ihi i‑di Mose‑ya Deoso hiyarati? Ai ene amosara ai wato, ai ene amosara manakone ai wato, ai nabone‑ya Mose‑ya Deoso hiyarane. Ati‑ya Mose kanahanomatane. Abaraho‑ka nodi i‑di Yeso Kirisito kobonebona‑ya nimanane. Kirisito koboni awisareya, Deoso ai‑ya hiyarebona, hika yo‑yose‑ya hiyare, ati‑ya hika yo‑yose i‑di Mose‑ya hiyaramakitase, ati‑ya i‑di Mose ai‑ya hiyaramakitasematane.
20Abaraho‑ya Deoso hiyare, hini ene‑bona tamine‑ya hiyarane. Mose‑ya Deoso‑ka yo‑yose mai hiyara,
“Deoso ati dai tokadabeya, Deoso dai‑ya kasomebona, ati dai tokadabareya, dai‑ya kosinebonane.” Mai ati neni.
21I‑di Abaraho‑ya Deoso hiyare, ati amosa, i‑di Mose‑ya Deoso hiyare, ati amosahari nane. Deoso ati abaterene. Mose ati ene ai manakone aba‑mani, ai‑ya Deoso ati somawame nane. Mose ai manakone‑ya nanahabaterene.
22Mose ati ene ai nafi manakone wada ai wato teni. Makobote Yeso Kirisito ati‑ya mai nofa, mai manakone abateni.
23Hibati‑ya Yeso Kirisito koboni awisareya, Deoso ati ai tokadababone i‑di Mose kanahanomarine. Mose ati ai‑ya kasomebona, ai‑ya barikane, makobote Yeso kobone, ati ai nofeya, Mose ati ai‑ya barikanamare, Yeso‑ka ai tohawahani.
24Yama ai nabone, yama ai rabone i‑di Mose ai‑ya kanawato, Yeso Kirisito koboni awisareya, Mose ati ai‑ya barikanane. Yeso kobone, ai manakone‑ya nanahabe, Deoso ai‑ya ati somawamebonaha. Yeso ati ai nofiya, Yeso ati ene ai sibawarineni.
25Yeso Kirisito ati‑ya ai nofawaha, i‑di Mose ati ai‑ya barikanami awirene.
26Yeso ati dai no‑nofa Deoso bidi dai tohawahani, dai nafi.
27Yeso Kirisito ati dai nofa Yeso‑ka dai amani. Deoso‑ka Doni dai‑ya sawiwahane. Dai‑ya mai habanirisa,
“Yeso‑ka dai amani.” Mai ati neni.
Fara‑nima Deoso‑ka Doni dai‑ya sawi,
“Yeso‑ka dai amani.” Ai atibodi‑ya Deoso‑ka Doni ati tene.
28Ai hinama tohawahineni. Yeso‑ka ai nafi tohawahani. Yodeo ai one toha, Bara ai one toha, ai one‑ya mai kanika, ai one‑ya mai kanikarihi mai namaroni. Maki mai toha, mai fanawi toha na, Yeso‑ka ai nafi tohawahineni. Yeso Kirisito ati ai nofa, ai hinama tohawahineni.
29Yeso Kirisito ati‑ya ai nofa Abaraho‑ka nodi ai tohawahani. Abaraho‑ka nodi mai‑ya Deoso kasomebona ati nemari, Deoso hini ati‑mari‑nima ai‑ya kasomaharibonane. Deoso‑ka ai toha, Deoso bidi ai toha, ai‑na, hika yama nafi ai kayafaboneni.
4Deoso bidi mai ai toha, hika yama ai kayafaboneni
1Ai‑ka abi bofe‑ya hika yama ai kayafabone tamine‑ya dai kadikahi. Maki ohari‑ka yo‑yose mai dama, bidi‑ta oharibisatene. Hika yama dama, hika yo‑yose ohari‑ya hiyare,
“Owati timitahi. O·abiya, oka dao oka yama nafi‑ya kayafatebonane. Oka dao nafire ene oka yamata tinawadamataboneni. Oka dao nafire yamata nawadi‑ya watorane. O·abiya, oka dao tinayanaboneni. Oka dao nafi‑mana, sibare nane. Oka dao hawa toheya, oka yama nafi‑ya oka dao kayafawahebonane.” Ati nemarine.
Bidi nafire, badi‑ka yama‑ya kayafaterene. Badi‑ka yo‑yose‑nima bidi ne tohatene.
2Madehe tohasa neya, badi‑ka yo‑yose ati‑ya tokadabatene. Badi ati‑mari‑nima ne, hawa toheya, badi‑ka yama‑ya kayafawahatene.
3Fara‑nima Kirisito koboni awisareya, madehe‑nima ai na, Mose ati‑ya ai one tokadaba, madi mai ati‑ya ai one tokadaba na, ai ene amosara ai‑ya mai yaditonamaroni. Mai‑ka yo‑yose mai‑nima ai namaroni.
4Makobote yama nafi hawa tohiya, Deoso Bidi‑ya yosemarine ai tabaro‑ya. Bofe‑ya Yeso kobone, Yeso madi i‑di Mariya ai toha, Yeso ai tohahari ne. Ai‑nima Yeso ne, Mose ati‑ya tokadabebona Deoso ati nane.
5Mose ati‑ya ai tokadababone Deoso ati ne, ati ai tokadabi awire ene ai ababoneni. Yeso‑ta ai manakone‑ya nanahabe, ati‑ya ai nofe, Deoso bidi hawa tohe, ai tohaboneni.
6Deoso bidi ai tohawaha, Deoso‑ka Doni ai atibodi‑ya sawi ene Deoso ai Abi nineni. Deoso ai‑ya ewe tene.
“Abi Deoso” ai ati teni.
7Deoso dai‑ya ewe ne, mai‑ka yo‑yose dai tohami awiraboneni. Deoso bidi dai amani. Deoso dai‑ya kasomebonane. Yeso ene, Deoso‑ka yama dai kayafaboneni.
Dai‑ya onofa owa‑ya dai nofiyahi
8Hibati‑ya Deoso yokana dai watora, madi mai ati dai nofamaro, deoso mai amanikani dai ati na, mai ati‑ya dai tokadabamaroni.
9Deoso yokana dai watowaha, Deoso dai‑ya watoharine, hini yama‑bone madi mai‑ya dai ati hiyaramiti? Madi mai ati dai nofamatasiya, dai‑ya mai yosematasaboneni. Dai‑ka hidi mai tohawahaboneni. Madi mai kitara, dai‑ya mai kasomateraboneni.
10Hibati‑ka mai ihi‑nima dai ene nawaha, mahi, abariko, faha kaki, faha sai na dai nokotonibisateni.
11Dai tamine omita, owa habo siitonineni. Dai‑ya ohiyaramaro, owati honita toha awineni.
12Oka soho dai amani. Owati dai mitahi. Yodeo mai ati‑nima onami awira, owa‑nima dai nahi. Owatibodi‑ya dai nakomara, dai‑ya mai yaditonamariyahi. Dai owa ama·oni.
13Hibati‑ya dai tabaro‑ya kobo·ona, kiya·onamaroni. Kiya·ona, Deoso Ati Amosabote dai‑ya okaminamaroni.
14Kiya·ona, owa‑ya dai weeni awira, owa‑ya dai natafa, dai tabaro‑ya owa‑ya dai nawina, dai namaroni. Deoso‑ka yo‑yose dai tabaro‑ya kobone‑nima, Yeso Kirisito dai tabaro‑ya kobone‑nima, owa‑ya dai nihemaroni.
15Hibayata owati ihi dai ya‑yainamarani. Hibati‑ya owa‑ya dai nofi nafemaro, owa‑ya dai nofami awirabone dai ati na awineni. Hibati‑ya dai nokobodi‑ya owa‑ya dai ati daanamaroni, owa nokobodi yati tohawahabonehe. Hini yama‑bone owati ababone dai ati niti? Owati dai nofamaraba awineni. Bara mai ati dai nofawaharo owatibodi ati nineni.
16Deoso ati yokana dai‑ya okaminabisa, keyehe‑ya hiri·oterani. Deoso ati‑ya dai‑ya okamina,
“Baoro oda‑ya kakone.” Dai ati na awineni.
Deoso ati yokana dai‑ya okamina, owa‑ya dai kakowaha awineni. Owatibodi ati nineni.
17Dai‑ya keyehe‑ya mai hirikana, dai‑ya mai ati nofa, dai‑ya mai nofi awirani.
“Oda ati‑ta dai nofabisahi. I‑di Baoro mai ati dai nofariyahi.” Mai ati na.
Mai‑ya dai kahiyarabone mai atibodi nofabisineni.
18Dai tabaro‑ya owina, oda‑ya dai nofi nafemaroni. Owa nowati‑ya oda‑ya dai nofasa na‑mani, yama amosa neni. Mai ati‑ya dai nofabisani.
19Oka madehe‑nima dai na, dai tamine omita, owatibodi koma, owatibodi komene kitineni. Mai fanawi dori kome yanana, mai dori kome kitateni, dori wadabonehe. Fara‑nima owatibodi komene nineni. Dai ene owatibodi komineni. Yeso Kirisito ati dai nofi nafibona, ene‑nima dai ene nabone, dai tamine ene owatibodi komineni.
20Dai‑ya onofi nafe, dai tamine‑ya owatibodi kadikani. Dai‑ya osawira, dai atibodi ati owato awirani. Dai‑ya owatibodi foya, dai tabaro‑ya osawiya, owati amosawamaba awineni. Owati dai nofaba awineni. Onani.
“Mai‑ya osawiya, hini yama‑nima onaba, ama·oniti?” Owatibodi ati teni.
I‑di Hekara, i‑di Sara mai tamine
21I‑di Mose ati‑ya dai tokadababone dai ati na, i‑di Mose ati‑ya dai wata awineni.
22I‑di Abaraho bidi mai fama, fadi yokana‑ka bidi ohari, fadi‑ka yo‑yose‑bone mai hikanikamete‑ya bidi owa toha nematane.
23I‑di Abaraho ene Hekara bidi wadabise, Sara bote toha, Deoso hikasome, Deoso ati‑nima Sara bidi wadawahane.
24Abaraho fadi mai fama, mai tamine‑ya Deoso hiyaremarine, ai‑ya kanawatobonaha. Hibati‑ya Abaraho‑ya Deoso hiyare, makobote Mose‑ya hiyarane. Ai‑ya kasomebona, hika mai hi‑hiyara mai famamaroni. Sinai adami toha, Arabiya‑ya waaya, hibati‑ya Sinai adami tati‑ya Mose wai‑ya Deoso hiyarematane. Deoso ati‑nima ai nabone ai‑ya Mose hiyaramatasane. Abaraho fadi kanika i‑di Hekara‑nima Mose‑ka yama hani nineni. Mose ati‑ya mai ati tokadaba, ai kanika‑nima mai nineni. Mose mai‑ya yosetene.
25Yerosare bofe‑kaya mai wi‑wina Sinai‑nima mai nihi, i‑di Hekara‑nima mai nihi, mai kanika mai yaditona mai‑nima mai nihi na, mai‑ka hidi mai‑ya yosetene.
26Sara yaditona‑nima ni awirini. Yerosare neme‑kaya mai wi‑wina Sara‑nima mai nineni. Ai yaditora‑nima mai nineni. Sara bidi ai toha, ai yaditorani. Abaraho‑nima ai na, Deoso ati ai nofineni.
27Hibati‑ya i‑di Isa·iya kanahanomatane.
“Hibati‑ya naba tihara,
Tika madehe wadaramaro,
Hibayata ya‑yaitiwawahi.
Hibati‑ya tikahiwara,
Madehe kome‑ya titomiterani.
Hibayata tikahiwawahabone ya‑yaitinahi.
Tika nodi mai damawahaboneni.
Fana one naba tohamaro‑ka nodi mai fa‑famaraba nibisaboneni.”
Isa·iya‑ka yama hani ati neni.
28Deoso ati‑nima yama nabone‑ya Abaraho nofemari, Abaraho bidi i‑di Isaki wademarine. Fara‑nima Deoso ati ai nofa, Deoso bidi mai ai amani.
29I‑di Abaraho ene‑bisa i‑di Isima·eo wadematane. Abaraho, Sara mai fame, Deoso‑ka Doni mai hikasomara‑mani, mai‑ka ewe wadare nane. I‑di Isaki wadeya, i‑di Isima·eo kako, i‑di Isaki‑ya yasine, i‑di Isaki‑ya bisinematane. Fare Isima·eo‑nima Yodeo dai‑ya mai wee, dai‑ya mai kaka, dai‑ya mai bisi naboneni.
30I‑di Abaraho bidi tamine‑ya Deoso hini hika yama hani‑ya kanahano,
“I‑di Hekara bidi‑ya fama, mai towakabisahi. I‑di Sara‑ta bidi‑ya fama mai winabisahi. I‑di Abaraho abeya, Abaraho‑ka yama‑ya Sara bidi kayafebonane. Abaraho‑ka yama‑ya i‑di Hekara bidi kayafi awirebonane.” Deoso‑ka yama hani ati nineni.
31Isaki‑nima ai nineni. Isima·eo‑nima mai one nihi nineni. Isima·eo‑nima ai ni awirani.
5Dai yaditonamaro, dai‑ya Yeso seekanane
1Yeso Kirisito dai manakone‑ya nanahabemari, ati dai nofe, Deoso‑ka dai toha, dai noko wadahi. Dai‑ya mai yaditonamatasariyahi.
2Baoro ama·oni. Owati dai mitahi. Dai sowiri tati ataro‑ya mai wisinakosiya, Deoso dai‑ya ati somawamebona dai atibodi ati na awineni. Dai sowiri tati ataro aba ene Deoso dai‑ya ati somawame‑mana, Yeso Kirisito abe honitabise tohane.
3Owati dai mitahi. I‑di Mose ati ene dai‑ya Deoso ati somawamebona dai ati na, ati nafi dai tokadabaho. Hiniya dai sowiri tati ataro‑ya mai wisinakosa, Mose ati nafi dai tokadabara, Deoso dai‑ya ati somawamarebonane.
4Yeso dai manakone nafi‑ya nanahabare‑mana, dai sowiri tati ataro‑ya dai manakone kote dai nanahababone dai ati na, Yeso Kirisito‑ka dai toharamone owatibodi ati ni neni.
5Ai‑ta Yeso ati ai nofa, Deoso‑ka Doni ai‑ya sawi, Yeso Kirisito kamebona ai nimana, Yeso kamataseya, Deoso ene ai ene amosa hinama tohaboneni.
6Yeso Kirisito‑ka ai toha ai sowiri tati ataro‑ya mai wisinakosa, ai‑ya kasomarihi, mai wisinakosara, ai‑ya kasomarihi, Yeso ati ai nofa, mai one ai kasoma na ai‑ya kasomabisateni.
7Hibati‑ya Yeso ati dai nofamaro, ebeni‑ke ati ene ati dai tokadabamarati?
8Deoso dai‑ya haanemari, hini ene tohi awirene.
9Femeto i‑isi ne ene baho tonafiteni. Mai ati towe i‑isi na dai kayafiya, dai ati amosamaraboneni, dai nafi.
10Deoso ene owati dai nofabone owatibodi ati neni. Dai‑ya mai kanawato a‑arira, mai oni owatora, mai manakone Deoso daahina, amosaraboneni.
11Dai sowiri tati ataro dai wisinakosabone onamone mai ati na. Keyehe‑ya mai hirina, mai ati amani.
“Dai sowiri tati ataro dai wisinahi.” Oterani.
Mai ati‑nima ona‑mani, owa‑ya mai weenami awira neni. Awa‑ya Yeso abemari, ai manakone nafi‑ya nanahabemari, owatobisineni. Tamine ohiyaratene. Yeso tamine ohiyari awira‑mani, owa‑ya mai weenami awira neni.
12Dai sowiri tati ataro ababone mai ati na, dai‑ya keyehe‑ya mai hirikana, mai dane noki‑ta ababisiya, sibabisarineni.
13Deoso dai‑ya kadikemari, dai ene towe dai‑ya yaditonamaraboneni. Yeso ati‑ya dai nofa, dai atibodi bote ati‑nima dai namariyahi.
“Owa‑ta ya‑yai·obisaboneni. Owatibodi bote ati‑nima onaboneni.” Dai ati riyahi.
Deoso dai‑ya seekane, dai atibodi yati ati‑nima dai naboneni. Dai ibi nofiya, dai ibi kasoma niya, dai nafi ya‑yainaboneni.
14Hini dai‑ya dai nofi‑nima mai‑ya dai nofiyahi. Haa‑nima dai niya, yama sibaraboneni. Fara‑nima i‑di Mose ati nane.
15Dai ibi wee, dai ibi bisi, dai ibi tokatowe na, dai abawahaba awineni. Dai noko wadahi dai nafi abarabonehe. Dai ibi nofabisiyahi.
Deoso‑ka Doni ati dai tokadabahi, dai ene amosabonehe
16Owati dai mitahi. Deoso‑ka Doni ati dai tokadaba, dai ene amosaboneni. Yama towe‑ya dai atibodi koboraboneni.
17“Deoso‑ka Doni ati okadababoneni.” Ai atibodi yati ati teni.
“Owa ene‑maro‑nima owa ene namatasaboneni.” Ai atibodi bote ati teni.
Ai atibodi bote ai atibodi yati‑ya kaka, Deoso‑ka Doni ati‑ya ai tokadabiya, nofaterani.
18Hibati‑ya i‑di Mose ati dai‑ya barikane, hibayata Deoso‑ka Doni dai‑ya sawi, dai‑ya nawade, Deoso‑ka Doni ene Mose ati dai‑ya barikanamarene.
19Mai atibodi bote ati‑ya mai tokadaba, eya mai ihi teni. Mai ihi amosara, mai one‑ka yibote mai‑ya mai kayafa, mai makidi one‑ya mai aha teni.
20Mai‑ka deoso bare‑ya mai kahiyara, madi mai‑ya mai hiyara, mai ibi wee, mai ati yawa, mai ibi kaka, mai yorotokaterani. Hini mai‑ya mai nofabisineni.
21Mai one‑ka yama‑ya mai ati kobo, kawi ihi mai towe toha, mai dami ibi aha na, mai tamine owati dai mitahi. Hibati‑ya dai‑ya okaminamaro, okaminamatasaboneni. Haa‑nima mai ihi na, Deoso tabaro‑ya mai winateraboneni.
22Deoso‑ka Doni ai‑ya sawi, ai atibodi yati toha, Deoso‑ka Doni ene eya ai teni. Ai ibi nofa, ai ya‑yai, ai atibodi ai‑ya weerihi, ai atibodi ati somabisateni. Ai ati yawa kanibote rihi, ai ibi kasoma, Deoso ati ai tokadaba ai na, yama amosa teni, ai ati‑nima ai teboneni.
23Mai ihi amosara, mai ihi amosawamabone, mai‑ya ai kasomateni. Ai ati, ai atibodi ati, ai ene na ai nawadateni. Ai ene‑ya yama hani ati barini awirini.
24Yeso Kirisito‑ka ai toha, hibati‑ya Yeso Kirisito abemarine, ai ene amosara manakone‑ya nanahabebonaha. Awa‑ya Yeso‑ya mai baakanamaro, owa ene amosara ene Yeso‑ya mai baakanamaroni. Fara Yeso Kirisito abe‑nima ai atibodi bote ati ai nanahabahi. Ai ene‑maro‑nima ai ene namariyahi.
25Deoso‑ka Doni ai‑ya sawi, ai atibodi yati‑ya foye, ene ai atibodi yati ati kita, Deoso‑ka Doni ati‑nima ai nahi.
26Deoso‑ka Doni ai ene‑ya namose, ai‑ya ai kahiyarariyahi. Ai ibi weerihi, ai one‑ka yama‑ya ai ati koborihi ai nahi.
6Dai ibi kasomiyahi
1Dai narabo hawihi. Dai owa ene amosare, Yeso ati‑ya dai no‑nofa, dai owa‑ya dai hiyarahi.
“Tiwa ene amosara tiwa oda awa, tiwa oda nofa, tiwa ene amosawamahi.” Dai ati nahi.
Dai owa‑ya dai hiyarabone, dai noko wadahi, dai owa ene‑nima dai ene ni awiraboneni.
2Dai ibi kasomiyahi. Dai ibi kasoma, Yeso ati dai tokadababoneni.
3Dai‑ta dai amosabisa‑mone dai ati na, dai‑ya dai keyehe, dai amosabisarani.
4Mai ihi dai kadikariyahi, hini dai ene‑ta dai kadikabisahi. Dai ene amosa, dai ya‑yainaboneni.
5Ai‑ka yama anini‑bone‑ya Deoso ai‑ya daa, mai‑ka yama anini‑bone‑ya Deoso mai‑ya daane. Ai‑ka yama‑ya ai ani, mai‑ka yama‑ya mai ani mai teni.
6Deoso Ati Amosabote‑ya dai‑ya mai kanawata, yama dai kiha‑ya mai‑ya dai kasomahi.
7Dai‑ya keyehe‑ya dai hirikariyahi. Yamata ai kama, yana hini hini‑nima namatasateni. Fara‑nima hini ai ene‑nima ai manakone naboneni. Deoso‑ya keyehe‑ya ai hirina, ai ati‑ya Deoso nofaterebonane. Ai ene amosa, ai manakone amosabisaboneni. Ai ene amosara, ai manakone amosaraboneni.
8Ai owa hini atibodi bote ati amosare‑ya tokadabe, abeya, Deoso tabaro‑ya winaterebonane. Madi mai tabori‑ya winawahebonane. Ai owa Deoso‑ka Doni ati‑ya nofe, Deoso ati‑ya tokadabe, abeya, Deoso tabaro‑ya winebonane.
9Deoso ene mai ai kasoma, mai kasomi ai fawani awiriya, ai manakone wadaboneni. Ai‑ka yama amosabote‑bone‑ya Deoso daanebonane.
10Yama‑ya mai kihara mai dai kasomahi. Dai‑ka yama dama, dai one‑ka yama‑ba dai daanahi. Yeso ati‑ya mai nofara mai dai kasomi bi‑bidi, Yeso ati‑ya mai no‑nofa mai dai kasomi ba‑basi nahi.
Baoro ati fawanebonane
11Owa yehe‑ya yama hani okanahana, fota‑ya dai nafi awahi.
12“Dai sowiri tati ataro abahi.” Mai ati na,
“Yeso tamine ai kaminiya, ai‑ya mai weenaboneni.” Mai atibodi ati neni.
13Mai sowiri tati atori mai hinahabamaro, Mose ati nafi‑ya mai tokadabaterani. Mai ati ihi dai sowiri tati ataro dai nanahaba, hini mai‑ya mai kahiyaraboneni.
“Oda ati‑ya mai nofa mai damineni. Mai dai awahi.” Mai ati naboneni.
14Owa okahiyari awiraboneni. Ai‑ka Ayo, Yeso, awa‑ya waane, ai manakone‑ya nanahabemari, Yeso‑ta okahiyarabisaboneni. Yeso ati‑ya mai nofara, owa‑ya mai nofaharira, mai ihi‑nima owa ene teraboneni.
15Yeso Kirisito ati ai tokadaba, ai sowiri tati ataro aba, sibarihi, ai sowiri tati ataro abara, sibarihi nineni. Ai atibodi yati tohawaha‑ya Deoso nofabisane.
16Yeso ati‑ya mai tokadaba, Yodeo mai toha, Bara mai toha na, mai‑ya Deoso kasome mai atibodi mai weerabone, Deoso‑ka mai toha, Isara·eo‑ka yokana mai toha neni.
17Owa dai weenamariyahi. Yeso ati‑ya okamina, owa‑ya mai bisinamaro, mai‑ka yama ihi‑ya sako oneni.
18Oka mai dai toha dai tamine‑ya Yeso‑ya ohiyarateni.
“Ayo Yeso, Karatiya‑ya mai wi‑wina tiwati‑ya mai no‑nofa mai tikasomahi.” Oteni. Feye amani.