EFESIYO

Efesiyo mai‑ka yama hani

Deoso‑ka ai toha, hika yama amosa ai kayafaboneni

¹Baoro ama·oni. Yeso Kirisito‑ka yo‑yose ama·oni. Deoso owa‑ya kadikemarine, Yeso Kirisito‑ka yo‑yose ohawahabonehe. Efesiyo‑ya dai wi‑wina Yeso Kirisito ati dai tokadaba, dai‑ka yama hani‑bone okanahanaboneni.

²Ai‑ka Abi i‑di Deoso, ai‑ka Ayo i‑di Yeso Kirisito ne, dai‑ya mai kasoma, dai atibodi ati dai‑ya somateni.

³Deoso ai kahiyarahi. Yeso Kirisito ai‑ka Hidi‑ka Abi i‑di Deoso amane. Deoso ai‑ya kasome ene Kirisito‑ka ai toha, neme‑ya yama nafi Kirisito hikayaha, fara ai kayafamakeboneni.

⁴Hibati‑ya yama‑ya Deoso wamani awisareya, ai‑ya kadike, Yeso Kirisito‑nima ai nawahabone, Yeso Kirisito‑ka ai toha, ai ene amosawama ai‑ya awebona ati nematane.

⁵Hibati‑ya yama awiriya, Deoso ai‑ya nofe, ai‑ya kayafebona ati nematane. Yeso Kirisito ene Deoso bidi ai tohawaha, Deoso ya‑yaitene.

⁶Bidi i‑di Yeso‑ya nofi nafi, ai‑ya nofahari, ai‑ya kasome, Yeso ene Deoso bidi ai tohawaha, Deoso ene amosabote ai kahiyarahi.

⁷Deoso Bidi Yeso Kirisito abe, emene tokafodo ene ai manakone abamaroni, ai manakone wadamaterabonehe. Ai ene amosara ai‑ya yaditona‑nima namaro, ai manakone aba, Deoso ai‑ya ati somawame, ai‑ya seekanemarine. Deoso ene amosabote amane.

⁸Ai‑ya kasomi nafi, ai‑ya kanawatone, yama ai watowahabonehe.

⁹Hibati‑ya Deoso atibodi yama kobohina‑ya mai watoramete, Kirisito ene Deoso ai‑ya kanawatowahe, yama Deoso hinofa ai watowahineni.

¹⁰Yama nafi hawa tohiya, Deoso atibodi ati kobona‑mata‑ka‑nima yama nawahaboneni. Yeso Kirisito mai nafi‑ka Hidi tohawahebona, neme‑ya mai wi‑wina, bofe‑ya mai wi‑wina, mai na, Yeso Kirisito mai‑ka Hidi tohawahebonane.

¹¹Hibati‑ya Deoso ai‑ya kadikematane, Kirisito‑ka ai tohabonehe. Deoso tabaro‑ya ai koboniya, yama Deoso ati daahinamaro ai kayafaboneni. Deoso ati‑nima yama nafi nawahaboneni.

¹²Yeso Kirisito ati oda nofi baha, oda‑ya mai awiya, Deoso amosabote‑ya mai watowahiya, Deoso‑ya mai kahiyaraboneni.

¹³Hibayata Yeso Kirisito tamine dai mita, ati dai nofe, hika dai tohawahineni. Deoso Ati Amosabote dai mitamaro, Yeso ati‑ya dai nofa, Deoso‑ka Doni dai‑ya sawiwahe, Deoso‑ka Doni tamine‑ya Yeso hiyare,

“Owati dai nofiya, dai atibodi‑ya Deoso‑ka Doni sawiwahebonane.” Ati nematane.

¹⁴Deoso‑ka ai toha, Deoso‑ka Doni ai‑ya sawitene. Deoso‑ka Doni ai‑ya sawi, Deoso tabaro‑ya ai winabone ai watoneni. Makobote Deoso tabaro‑ya ai koboniya, yama‑ya daanebona ati ne, ai‑ya yama‑ya daanebonane. Deoso amosabote‑ya ai kahiyarahi.

Deoso‑ya dai ene ya‑yai·oneni.

¹⁵Efesiyo‑ya dai wi‑wina, ai‑ka Ayo i‑di Yeso ati‑ya dai nofa dai toha, Yeso Kirisito ati‑ya mai one nofa mai‑ya dai nofamone, dai tamine omita, ya‑yai·onamaroni.

¹⁶Deoso‑ya dai ene amosa, dai tamine ohiyarateni.

¹⁷“Abi Deoso, Yeso Kirisito‑ka Abi amosabote amatini. Yeso Kirisito‑ka Deoso amatini. Efesiyo‑ya mai wi‑wina mai‑ya tika Doni sawiyaho, tiwa‑ya mai wato ba‑basi nabonehe. Tiwa tamine‑ya mai tikanawatohi.” Oteni.

¹⁸Deoso‑ya dai tamine ohiyarateni, dai atibodi yama‑ya watabonehe. Hibati‑ya Deoso dai‑ya kadikematane, Hika dai tohabonehe. Deoso tabaro‑ya dai winabone yama dai nimaniya, dai ya‑yainahi. Deoso tabaro‑ya dai koboniya, dai‑ya Deoso kayafebona, dai wehene nafiwahaboneni.

¹⁹Deoso ohiyara, Deoso kitabote‑ya dai watabone, Yeso ati ai no‑nofa ai‑ya kasomebona, ai‑ya kasomi fawaterebonane. Kirisito‑ya kasomemata‑nima dai‑ya kasomebonane.

²⁰Hibati‑ya Kirisito abe, Deoso hinakitame, neme‑ya hiwakame, hini hika kanika‑ya hiwatariwahematane, ai nafi‑ka hidi tohebonaha.

²¹Deoso kitabote toha, Yeso Kirisito kitabote toha nane. Webote mai one toha, hidi mai toha na, mai kiti bi‑bidi, Deoso‑ka yo‑yose mai toha, madi mai toha, mai na, mai kiti bi‑bidi, bofe‑ya mai wi‑wina, neme‑ya mai wi‑wina, mai na, mai kiti bi‑bidi nineni. Kirisito‑ta kiti nafibisane. Kirisito oni amosabotebisa amane. Hibayata Kirisito kitabote tohe, makobote Deoso tabaro‑ya ai koboniya, Kirisito kitabote tohebona, kiti fawaterebonane.

²²Deoso ati ene yama nafi‑ka Hidi Kirisito amane. Yeso ati‑ya ai no‑nofa Yeso‑ka ai toha, Yeso ai‑ka Webote amane.

²³Ai atibodi ati‑nima ai teni. Fare Kirisito ai‑ka Hidi tohe, ati‑nima ai teni. Hibayata ai‑ka Hidi tohe, makobote yama nafi‑ka Hidi tohebonane.

Ai abarabone, ai manakone‑ya Yeso nanahabane

¹Hibati‑ya Deoso ati dai tokadabara, dai ene amosara ene dai aba‑nima dai namaroni.

²Satanasi ati‑ya mai tokadaba, mai‑nima dai namaroni. Madi mai‑ka hidi i‑di Satanasi amane. Madi mai dama ahiyata‑ya mai wi‑wina, ai atibodi‑ya keyehe‑ya mai hirikiteni. Deoso ati ai one nofara, Satanasi ati‑ya mai tokadabateni.

³Fara mai ihi‑nima ai nafi ene namaro, ai atibodi bote ati ai tokadaba, mai ihi‑nima ai ene na, ai ene amosara ene ai‑ya Deoso yawematane.

⁴Ai‑ya yawe, ai‑ya nofi nafinasa ne, ai‑ya kasomatene.

⁵Ai atibodi bote ati‑ya ai tokadabamaro ihi ai aba‑nima ai namaroni. Deoso ai‑ya nofi kite, ai‑ya nakitamane. Ai atibodi yati daahina, fara‑ya hika Doni sawiya, Kirisito‑ka ai tohawahineni.

⁶Yeso Kirisito abe, Deoso hinakitame, neme‑ya hiwakame, hiwatarimatane, yama nafi‑ka hidi tohawahebonaha. Yeso Kirisito‑ka ai toha, Deoso ai‑ya aweya, neme‑ya ai itari hawa toha‑nima ai na, ai‑ya awane. Yeso‑ya nakitamemata‑nima ai‑ya nakitamaharibonane. Yeso‑ya neme‑ya nawitarimata‑nima ai‑ya nawitariharibonane.

⁷Deoso ene Yeso Kirisito ai manakone‑ya nanahabe, ai‑ya kasome, hibayata ai kasomi tamine nafi ai watosa ni awira, makobote ai watowahaboneni. Fara Deoso ene amosabote‑ya mai nafi awawahaboneni.

⁸Ai aba‑nima ai namaro, Deoso ai‑ya nofi nafi hini ene ai‑ya kasome, Yeso ati ai no‑nofa, ai atibodi‑ya Deoso‑ka Doni sawiwahe, Deoso tabaro‑ya ai winabone, hini ai ene ai tohi awira, Deoso ene amane.

⁹Hini ai ene tohi awira, ai‑ya ai kahiyari awiraboneni.

¹⁰Yeso Kirisito‑ka ai toha, ai atibodi yati‑bone‑ya Deoso wamane, ai‑ya daahina, ai ene amosawamabonehe. Ai ene amosa‑ya Deoso ati kobonemata, fara ai ene amosahi.

Deoso‑ka oda toha‑nima dai tohahariteni.

¹¹Bara dai tohamaro, yama‑ya dai atibodi kadamowamariyahi. Hibati‑ya dai sowiri tati ataro‑ya mai wisinakosara, dai‑ya Yodeo mai nofaramaroni. Yodeo mai sowiri tati atori mai wisihinakosa, Deoso‑ka mai tohabone mai ati teni. Mai sowiri tati atori abara, towe mai‑mone Yodeo mai ati namaroni.

¹²Hibati‑ya Kirisito‑ya dai watorihi, Isara·eo‑ka mai‑ya dai dabarihi na, Deoso‑ka yama‑ya Yodeo mai one kayafabone, dai kayafi awirabone. Fara hibati‑ya dai aba‑mani, Deoso tabaro‑ya dai tokara neni.

¹³Hibati‑ya Yeso Kirisito‑ka dai tohara, Yeso Kirisito abe, emene tokafodo, hibayata ati dai nofawahe, Yeso Kirisito‑ka dai tohawahineni.

¹⁴Hibati‑ya Yodeo oda toha, Bara dai toha na, ai bai‑ya awayara‑nima Mose ati barikanemari, ai ibi koborabonehe. Yeso Kirisito ene awayara aba, ai ibi kakomara, ai ibi nofa, ai hinama tohawahineni.

¹⁵Hibati‑ya Mose ati ai‑ya barikane, Mose ati nafi‑ya ai tokadabara, ai manakone hasinamaroni. Yeso Kirisito‑ta Mose ati nafi‑ya tokadabe, abe, ai nafi manakone‑ya nanahabematane, hika ai tohabonehe. Yodeo ai tohamarihi, Bara ai tohamarihi, ai na, fara hinama ai toha, Yeso Kirisito‑ka ai tohawahineni.

¹⁶Deoso‑ka ai tohabone, Yeso Kirisito awa‑ya abematane. Abe ene ai ibi kakomarani.

¹⁷Hibati‑ya Deoso ati‑ya Yodeo mai wato ba‑basi, Bara Deoso ati‑ya mai wato bi‑bidi nameteni. Deoso Ati Amosabote‑ya Yeso mai nafi‑ya hiyare, Yeso ati ai no‑nofa Kirisito‑ka ai tohawahani. Yodeo mai toha, Bara mai toha na, ai ibi nofawahaboneni.

¹⁸Kirisito ene Deoso‑ka Doni ai‑ya sawi, Deoso ai nafi‑ka Abi tohawahe, ai‑ka Abi‑ya ai hiyara, ai ati‑ya mitatene.

¹⁹Yeso ene Bara dai tohamara, Deoso‑ka dai tohawaha, Deoso‑ka oda tohi‑nima dai tohahare, Deoso bidi ai tohani.

²⁰Kirisito ene Deoso‑ka yobe amosabote ai nafi tohaboneni. Kirisito kitabote, yobe tati mese ewene kite‑nima nane. Yobe wamani nahotene. Hibati‑ya Deoso ati‑ya mai mi‑mita‑mete mai toha, Deoso ati‑ya mai kanahanamete mai toha na, Deoso‑ka yobe kote mai toha, Yeso‑ka yo‑yose Yeso tamine‑ya mai kaminamake, yobe kote mai toha, Yeso ati‑ya dai no‑nofa yobe kote dai toha na,

²¹Dai eyehe, yobe kote oda toha nineni. Kirisito ene Yeso‑ka ai toha, ai nafi yorotokana, Deoso‑ka yobe amosabote kayawe, ai tohawahani.

²²Bara dai tohamara, Deoso‑ka Doni dai‑ya sawi, Deoso‑ka yobe amosabote kote dai toha, kote oda toha nineni.

Yama mai hiwatoramete ai watowahineni

¹Bara dai tamine‑ya owatibodi kadika, dai tamine‑ya Deoso‑ya ohiyarateni. Yeso Kirisito tamine‑ya dai‑ya okaminamaro, kadeya‑ya owa‑ya mai nawaamaroni.

²Bara dai toha, Deoso dai‑ya nofe‑ya dai watabone, owa‑ya yosemarine, Yeso tamine dai‑ya okaminabonehe. Owa tamine dai mitamete awineni.

³Yama Deoso ati kobohina tamine mai hiwatoramete, tamine‑ya Deoso owa‑ya kamine, fara tamine bide okanahanamaroni.

⁴Oka yama hani dai kadikahi. Kirisito tamine mai hiwatoremata tamine Deoso owa hikamine dai watomakeboneni.

⁵Hibati‑ya yama tamine‑ya mai watora, hibayata Deoso ati‑ya mai mi‑mita mai toha, Yeso‑ka yo‑yose oda toha, oda na, fara tamine‑ya Deoso‑ka Doni oda‑ya kaminawahemarine.

⁶Yama Deoso ati kobohina mai hiwatoramete, dai‑ya ohiyarawahineni. Yodeo oda toha, Bara dai toha na, Yeso Ati Amosabote ai nofa, fara hinama ai toha, Deoso‑ka ai tohawahineni. Ai nafi‑ya Deoso kasome, yama amosa‑ya ai‑ya ati daane, ati‑nima nebonane. Yeso ati ai no‑nofa, Yeso‑ka ai nafi tohawahani.

⁷Deoso kitabote owa‑ya yose, owa‑ya kasome ene Yeso Ati Amosabote okaminateni.

⁸Hibati‑ya Deoso owa‑ya haanemari, owa ene amosara nafe mai one‑ta ihi amosara bi‑bidi na, owa‑ta owa‑ya Deoso haanemarine, Bara mai‑ya Yeso Ati Amosabote okaminabonehe. Yeso Kirisito ai‑ya kasomi nafi ene nafi ai watoterebonane.

⁹Hibati‑ya yama‑ya mai watoramete, owati ihi yama‑ya ai nafi watowahaboneni. Yama nafi‑ya Deoso wamanemata, ai hinama tohabone tamine‑ya mai‑ya kamini awiremata, fara tamine‑ya ai nafi watowahaboneni.

¹⁰Kirisito‑ka ai hinama toha ai‑ya Deoso‑ka yo‑yose mai awa, madi ai‑ya mai awa, mai na, yama nafi‑ya Deoso wato, yama ati kobohina amosabote toha‑ya mai awawahaboneni.

¹¹Yama nafi‑ya wamani awireya, Yeso‑ka ai tohabone, ai tamine nafi‑ya Deoso wato, ai‑ka Hidi Yeso Kirisito tohebona‑ya wato, ai hinama tohabone, ai tamine‑ya wato nematane.

¹²Yeso ati‑ya ai no‑nofa Deoso‑ya ai ati hiyara, ai habo siitora, ai hiyara kanibote na, ai ati‑ya mitatene.

¹³Yeso tamine‑ya dai‑ya ohiyara, kadeya‑ya owa‑ya mai nawaa, dai habo kita, dai yawariyahi. Dai‑ya Deoso kasomebonane.

Dai atibodi kitawahi

¹⁴Fare ai‑ka Abi noko‑ya owa yobati‑kaya owaa, dai tamine‑ya Deoso‑ya ohiyarateni.

¹⁵Bofe‑ya mai wi‑wina‑bone mai toha, neme‑ya mai wi‑wina‑bone mai toha, mai na, ai nafi‑ya wamanemata, ai‑ka yama yanakani daidi tohane.

¹⁶Dai tamine‑ya Deoso‑ya ohiyara,

“Abi Deoso, amosabote, kitabote amatini. Tika Doni mai‑ya sawi, mai atibodi kitawahaboneni.

¹⁷Abi Deoso, Yeso ati‑ya mai no‑nofa mai atibodi‑ya Kirisito sawiwahane. Mai tinofi nafe, mai tikanawatoyahi. Mai tinofi fawatiterabone, tiwa tamine‑ya mai atibodi kadikiyahi, mai habi kitabonehe.

¹⁸Abi Deoso, Yeso‑ka mai toha mai‑ya mai one nofi bi‑bidi nibisa, Yeso Kirisito mai‑ya nofi nafibisane, mai ihi amosara Yeso‑ka yama nofi mai‑ya fiyakana, Yeso‑ka nofi boni tati‑ya mai ihi amosara koboterani.

¹⁹Abi Deoso, Yeso Kirisito‑ka yama nofi‑ya mai wato nafiterabone, mai hiwato ba‑basi hinahi. Abi, tiwa ene Yeso yama hinofa‑ya mai nofiyahi.” Oteni.

²⁰Deoso kitabote ene amose hinama, ai‑ka yama amosabote‑bone‑ya daatene. Deoso‑ya yama ai haana, ai ati‑ya fiyakana, yama‑ya ai atibodi kadika, ai atibodi ati‑ya fiyakana tene.

²¹Kirisito‑ka ai toha Yeso Kirisito ai‑ka Hidi amane. Deoso‑ya ai nafi kahiyarahi. Mahi‑nima Deoso ai kahiyara, ai kahiyari fawaterayaho, Deoso amosabote amane. “Fara amani.” Ai ati nahi.

Yeso‑ka ai toha ai ibi kasomateni

¹Ai‑ka Ayo i‑di Yeso Kirisito ati okamine, kadeya‑ya owa‑ya mai nawaa, owati dai mitahi. Deoso dai‑ya haanemata, Yeso‑ka dai toha, ati dai tokadabaho.

²Hini tiwa‑ya tikahiyarariyahi. Dai owa dai kahiyarabisahi. Dai owa ene amosare, dai ati yawa kanibote ra, mai dai nofa, mai dai kasomabone, mai dai hiyarabisahi.

³Deoso‑ka Doni dai‑ya sawi, fara dai hinama toha, dai ibi nofa, dai atibodi ati somahi.

⁴Yeso‑ka ai hinama toha, Deoso‑ka Doni ohari ai‑ya sawitene, Deoso ai‑ya haanemari, Deoso ati‑nima yama nabone‑ya ai nafi nimanineni.

⁵Ai‑ka Hidi ohari ati ai nofiya, Yeso‑ka ai tohawaha, Yeso ati ene ai nafi‑ya mai habanirisiteni.

⁶Deoso ai‑ka Abi ohari, yama nafi‑ka Hidi tohe, Yeso ati ai no‑nofa ai nafi‑ya Deoso sawi, yama nafi‑ya ene tohane.

⁷Fara ai ibi kasomabone, ai‑ka yama wa‑wato‑ya Kirisito daanane. Yama wa‑wato dama‑ya ebekane, yama wa‑wato‑ya ai one kayafa, yama wa‑wato bara‑ya ai one kayafa, ai na, yama wa‑wato‑ya ai nafi kayafineni, ai ibi kasomabonehe.

⁸Deoso‑ka yama hani‑ya Kirisito tamine‑ya Dafi kanahano,

“Neme‑ya winitoname, mai one‑ya towakame, yama wa‑wato‑ya ai‑ya daane.” Kirisito tamine‑ya Dafi kanahanomatane.

⁹Hini yamata‑nima Kirisito winitoname, tokominati? Hibati‑ya Deoso tabaro‑ya Kirisito wine, ai tabaro‑ya kise, abe, wami bodi‑ya toke,

¹⁰Kitame, neme‑ya tokome, Deoso tabaro‑ya winamatasane, yama nafi‑ka hidi tohawahebonaha.

¹¹Kirisito yama wa‑wato‑ya daanane, Yeso‑ka ai toha ai‑ya kasomebonaha. Hini hika yo‑yose mai‑bone‑ya ai owa‑ya daa, Deoso ati‑ya mi‑mita mai‑bone‑ya ai owa‑ya daa, Deoso ati‑ya hi‑hiyara mai‑bone‑ya ai owa‑ya daa, Deoso ati‑ya ka‑kanawato mai‑bone‑ya ai owa‑ya daa tene.

¹²Ai‑ya mai kasoma, ai ibi kasomamakeboneni. Yeso‑ka ai toha, ai ibi kasomiya, Yeso ati‑nima ai naboneni.

¹³Ai ibi kasomiya, Deoso Bidi i‑di Yeso tamine‑ya ai nafi wato ba‑basi naboneni, ati ai nofi ba‑basi nebonaha. Mai hawa toha, mai‑nima ai atibodi hawa tohabone, Yeso ene‑nima ai ene nawawahaboneni.

¹⁴Madehe‑ya keyehe‑ya mai hirikana, mai ati‑ya madehe nofateni. Madehe‑nima ai riyahi. Deoso ati ai wata, ai hawa toha‑nima ai nawahaboneni. Deoso ati‑mona mai one ati na, Deoso ati tohi awireya, mai ati ai nofaraboneni. Keyehe‑ya ai‑ya mai hirikana mai ati ai nofara, faha rike toka, kamatasa‑nima ai atibodi ni awiraboneni. Deoso ati‑ya ai nofi ohariyahi. Mai one ati bara toha, ai nofaraboneni.

¹⁵Keyehe‑ya ai hirira, Deoso ati yokana ai hiyarabisateni. Mai‑ya ai hiyara, mai ai nofa, ai‑ka Hidi i‑di Yeso Kirisito ene‑nima ai ene nawahaboneni.

¹⁶Ai abano kobobona, hini ihi‑ya anina, ai abano nafi‑ya kasoma, ai yana, ai hawa toha, ai teni. Fara‑nima Yeso Kirisito‑ka ai toha ai ene‑bone‑ya ai anina, ai nafi‑ya ai nofa, ai nafi‑ya ai kasoma, Yeso ene‑nima ai ene nawaha, ai hawa toha, ai teboneni.

Dai atibodi yati dai sakonahi

¹⁷Ai‑ka Hidi, i‑di Kirisito ati dai mitahi. Hibati‑ya Bara mai one ihi‑nima dai ene namaro, haa‑nima dai ene namariyahi.

¹⁸Yama‑ya mai atibodi wato nofara, yama‑ya mai watora, mai atibodi kita ihi Deoso hawine toki‑ya mai nofara, Deoso tabaro‑ya mai koboni awiraboneni.

¹⁹Deoso ati‑ya mai nofara, mai ime kita, ai teme yodi ataro baye kita‑nima mai atibodi kita na, mai fanawi‑ya mai aha, mai makidi ibi aha na, haa‑nima mai na, mai ihi amosara, mai habi kita, mai one‑ya mai atibodi ati aha teni. Mai ihi‑ya mai korikasarani.

²⁰Haa‑nima Kirisito ni awire, mai‑nima dai riyahi.

²¹Hibati‑ya Yeso Kirisito Ati Amosabote okamine, ati dai watokarini? Yeso keyehe‑ya hiriterene.

²²Dai atibodi bote ati‑ya dai tokadabamariyahi. Dai atibodi bote, yama towe‑ya nokotonihe. Bora bisa toha, taninisa‑nima dai atibodi bote dai nihi.

²³Dai atibodi yati ati dai tokadababisa, dai ene amosabisaboneni.

²⁴Deoso amose‑nima dai atibodi yati nabone‑ya Deoso wamanematane. Fara bora yati dai sakona‑nima dai atibodi yati dai sakonahi, dai ene amosabonehe.

²⁵Dai one‑ya dai hiyara, dai ati amosahi. Dai‑nima dai one na, mai‑ya keyehe‑ya dai hirikariyahi.

²⁶Mai ihi amosara, mai ihi dai ati yawa, dai yawi yaboriyahi, dai ene towe toharabonehe. Dai yawi‑ke mahi tokarebona, fare hini mahi‑ya dai ati somawamahi.

²⁷Dai yawa, dai noko wadahi, Satanasi dai‑ya keyeherebonaha.

²⁸Yama‑ya dai one botemete, yama‑ya mai botimariyahi. Hiniya yama‑ya mai aninawaha, mai one yama‑ya kihara‑ya mai kasomabisaboneni.

²⁹Dai ibi hiyara, dai ati towe tohariyahi. Dai ati amosa, dai one‑ya dai kasomaboneni, mai ya‑yainabonehe.

³⁰Deoso‑ka Doni dai‑ya sawi, dai ene Deoso‑ka Doni yawarayaho. Deoso‑ka Doni dai‑ya sawi, Deoso tabaro‑ya dai winabone dai watoneni.

³¹Mai‑ya dai kakorihi, dai ati bida‑ya mai dai daarihi, dai nahi, dai ati komene‑ya mai awarabonehe. Mai dai keyeherihi, dai ati ene mai korikasarihi na, dai ati ene mai atibodi komaraboneni.

³²Mai dai nofa, mai dai kasoma, mai ihi amosara mai‑ya dai ati somawamahi. Yeso‑ka dai toha, Deoso dai‑ya ati somawame‑nima mai one‑ya dai ati somawamaharihi.

Kirisito ai‑ya nofi‑nima mai dai nofahi

¹Ai‑ka abi bofe‑ke ai‑ya nofe, ene‑nima ai ene teni. Fare‑nima dai‑ka Abi i‑di Deoso dai‑ya nofi nafi, ene‑nima dai ene nahi.

²Kirisito ai‑ya nofe, ai manakone‑ya nanahabane, Deoso ai‑ya ati somawamebonaha. Kirisito ene yama mahi amosa‑nima nemona Deoso ati nematane. Kirisito ai‑ya nofi nafi, Kirisito ai‑ya nofi‑nima mai dai nofahi.

³Kirisito‑ka dai toha, dai ene amosahi. Dai tamine‑ya mai hiyariya, dai ene amosara tamine toharaboneni. Dai‑ka yibote ohare‑ta dai dakorabisa, yama dama dai kayawarihi, yama dama‑ya dai nokotonirihi, dai nahi. Kirisito‑ka dai toha, dai ene towe toha riyahi.

⁴Yama towe tamine‑ya dai hiyarariyahi. Yama towe tamine‑ya mai hahakanabone tamine dai kaminariyahi. Deoso dai‑ya kasome tamine, mai ihi amosa tamine na, dai ibi hiyarahi. Deoso‑ya dai kahiyarahi.

⁵Mai ihi amosara, mai fanawi one‑ya mai aha, mai makidi hini one‑ya mai aha, mai nana, yama dama‑ya mai kayawa, yama dama‑ya mai nokotonihi, mai nana, Deoso yokana‑ya mai kahiyari awira, deoso bare‑ya mai kahiyarabisa, Yeso Kirisito tabaro, Deoso tabaro ne‑ya mai winateraboneni.

⁶Dai‑ya keyehe‑ya mai hirikariyahi. Mai ati honita tohateni. Deoso ati‑ya mai tokadabara. Mai ihi towe toha, mai ihi Deoso yawebona, mai manakone‑ya daanebonane.

⁷Mai ihi amosara, mai‑ya dai dabariyahi.

⁸Hibati‑ya yama soki‑nima dai na, yama‑ya dai watoramaroni. Hibayata yama wahi‑nima dai nawaha, Deoso tamine dai watowaha, Deoso ati dai watowaha, dai na, dai ene amosahi.

⁹Deoso ene yama wahi‑ya dai wi‑wina dai ene amosa, yama amosa‑ya dai atibodi kobona, keyehe‑ya dai hiririhi, dai teni.

¹⁰Dai ene Deoso ya‑yainebona tamine dai watohi.

¹¹Mai ihi amosara yama soki‑ya mai wi‑wina, mai‑ya dai dabariyahi. Dai ene mai ihi amosara‑ya mai watomakiyahi.

¹²Yama soki‑ya mai wi‑wina, ai noko beheri‑kaya mai ihi towe tohateni. Mai ihi dai watinawi nofariyahi. Mai ihi tamine‑ya mai kaminiya, dai narabo‑ya dai barikanahi, mai ati dai mitarabonehe.

¹³Yama wahi‑ya yama‑ya ai awa, yama ai watoteni. Yama wahi‑ya ai wi‑wina, ai ene yama wahi‑nima na, mai ihi amosara‑ya mai awawahaboneni.

¹⁴Yama wahi‑nima ai ene na, mai ihi amosara mai amona‑nima mai na, mai‑ya ai haanahi.

“Dai dodafihi! Yeso ati dai mitahi. Dai abarabone, Yeso ati dai nofahi, Kirisito ya‑yainebonane.” Ai ati nahi.

¹⁵Dai noko wadahi, dai ene amosabonehe. Yama‑ya mai watora mai ihi‑nima dai ene riyahi. Deoso ati‑ya mai wa‑wato mai ihi‑nima dai ene nibisahi.

¹⁶Hibayata mai ati kasira, mai dama, mai dai hiyarahi, Yeso ati‑ya mai nofiya, mai ihi amosawamabonehe.

¹⁷Dai ene towe tohariyahi. Deoso yama hinofa dai wata, fara ati‑nima dai nahi.

¹⁸Kawi ihi dai towe tohariyahi. Dai towe tohiya, dai ene amosaraboneni. Deoso‑ka Doni dai‑ya sawi, ati dai tokadabeya, dai ene amosaboneni.

¹⁹Deoso‑ka Doni ene dai ya‑yaina, dai yorotokana, dai wayoma, Deoso tene‑ya dai yowiri, dai na, dai‑ka wayoma, dai‑ka yowiri na‑ya dai atibodi kadika, dai atibodi‑ya Deoso‑ya dai kahiyara na, dai‑ka Hidi i‑di Yeso dai atibodi ati‑ya miteya, ya‑yainebonane.

²⁰Mahi‑nima dai wayoma,

“Abi Deoso, tiwa ene tika dao ene ne amosabote tohe, dai ene oda ya‑yainineni.” Ai‑ka Ayo Yeso Kirisito‑ka dai toha dai ati nahi.

²¹Kirisito ati dai nofa, dai one ati dai mita, mai ati dai kasawaririyahi. Hini dai ati ohare dai nofariyahi.

Ai fani tamine

²²Mai fanawi‑ya ohiyari bahaboneni. Yeso ati dai tokadaba, dai‑ka yobote mai ati dai tokadabahareboneni.

²³I‑di Kirisito ai‑ya yose, ati‑nima ai teni. Fara‑nima dai‑ka yobote dai‑ya mai yose, mai ati‑nima dai nahi. I‑di Yeso‑ka ai toha, ai atibodi ai‑ya yose‑nima i‑di Kirisito ai‑ya yose, ati‑nima ai nahi. Kirisito ai‑ya kasome, ai‑ya nawadatene.

²⁴Yeso‑ka ai toha, Yeso ati ai tokadabi ohariteni. Fara‑nima dai fanawi fana, dai‑ka yobote ati‑ya dai tokadabi ohariyahi.

²⁵Makidi dai toha, dai‑ka yibote mai dai nofi nafihi. Kirisito ai‑ya nofi nafi, ai ene abematane. Kirisito ai‑ya nofi‑nima dai‑ka yibote mai dai nofahi.

²⁶Yeso‑ka ai toha, ai atibodi‑ya Kirisito namosebona, abematane. Bora bisa toha, ai sokona, amosawamabone‑nima Yeso ati ai nofa ai‑ya namosane.

²⁷Yeso‑ka ai toha, neme‑ya ai kobona, Yeso ai‑ya kayafebona, bora kabatata ra‑nima, bora bisa tohara‑nima, bora yikirikara‑nima, ai nabone, ai ene amosa hinama boneni.

²⁸Fara Kirisito ai‑ya nofi nafi, dai‑ka yibote dai nofi nafiyahi. Tiwa‑ya tinofi‑nima tika yibote tinofiyahi. Tika yibote dai fama, fara tika yibote tinofiya, tiwa‑ya tinofineni.

²⁹Tiwa‑ya kobobona tikakora, tinatafa, tikasoma, tinawada titeni. Fara‑nima Kirisito‑ka ai toha, Kirisito ai‑ya kasoma, ai‑ya nawada tene.

³⁰Ai‑ya kobobona ai nofi‑nima Kirisito ai‑ya nofa tene.

³¹Deoso‑ka yama hani ati dai mitahi. Eya dai naboneni.

“Maki fana‑ya fame, badi, madi na, mai‑ya dabami awire, fadi‑ya famabise mai aboni ohari wama teni.” Deoso‑ka yama hani ati nineni.

³²Ai fana tamine‑ya ohiyara, yama mai hiwatoramete tamine ohiyara, Yeso‑ka ai toha, Kirisito ai atibodi‑ya sawi tamine ohiyarahari oneni.

³³Makidi dai toha dai‑ka yibote mai dai nofahi. Dai‑ya dai nofi‑nima dai‑ka yibote mai dai nofahi. Fana dai toha dai‑ka yobote mai ati dai tokadabahi.

Madehe, yetene mai na mai tamine

¹Madehe dai toha, yetene dai toha, dai na, dai ene amosabone, dai‑ka abi, dai‑ka ami mai na, mai ati dai tokadabahi, ai‑ka Hidi i‑di Yeso ya‑yainebonaha.

²Dai‑ka abi, dai‑ka ami, mai na, mai dai nofa, mai ati dai tokadabahi. Mai ati dai tokadaba, dai‑ya Deoso kasomebona ati nematane.

³Mai ati‑ya dai tokadabiya, Deoso dai‑ya kasomebona, dai aba kanibote ni awirabone Deoso ati nematane.

⁴Madehe badi dai toha dai‑ya ohiyarabone, owati dai mitahi. Dai ati amosahi, dai‑ka madehe yawarabonehe. Mai ihi amosabone, mai dai kanawatohi. Ai‑ka Hidi i‑di Yeso ati‑ya mai‑ya dai kanawatohi, Yeso ati‑ya mai tokadababonehe.

Mai kanikamaro mai tamine

⁵Dai‑ya mai kanikamaro, owati dai mitahi. Dai‑ka hidi mai ati dai tokadabahi. Mai‑ya dai ya‑yainihebone, yama anini dai kitahi. Yama dai aniniya, dai atibodi yawariyahi. Yeso Kirisito ati‑ya dai tokadabi‑nima dai‑ya mai kanikamaro, mai ati dai tokadabahari nahi.

⁶Dai‑ya mai yose, dai‑ya mai awa, yama anini‑ya dai kita, dai‑ya mai kakatomara, dai anini kiti fawariyahi. Kirisito dai‑ka hidi tohe, Deoso ati‑ya dai tokadababone dai ati na, yama dai aninahi.

⁷Kirisito ati dai tokadabi‑nima dai‑ya kanikemari ati dai tokadaba, dai anini kitahi. Dai aniniya, dai ya‑yainahi.

⁸Dai ene amosa, dai manakone amosa‑ya ai‑ka Hidi i‑di Kirisito daanebonane. Dai‑ya mai kanikamaro dai toha, dai‑ya mai kanikara dai toha, dai na, dai manakone‑ya ai‑ka Hidi i‑di Kirisito daanebona, hini dai ene‑nima dai manakone naboneni.

⁹Mai one dai kanikamaro, owati dai mitahi. Mai dai weeriyahi. Mai dai nofahi. Neme‑ya dai nafi‑ka Hidi tohe, Kirisito noko‑ka fara dai hinama tohani.

¹⁰Yeso Kirisito kitabote tohe, Yeso‑ka dai toha, dai eme kita, dai habo siitoriyahi.

Sodado mai bori kita tamine

¹¹Sodado mai‑ka bora kita‑ya mai sakoteni, mai‑ya mai ka‑kako mai‑ka wati, mai‑ka wabise, mai‑ka yima na, mai‑ya koborabonehe. Sodado mai‑ka bora kita‑nima Deoso‑ka bora kita dai sakonahi, Satanasi ati dai‑ya koborebonaha.

¹²Ai‑ya mai ka‑kako mai ime wadarihi, mai tone wadarihi, mai ame wadarihi na, mai‑ka hidi Satanasi tohe, hika madi mai toha, mai one kiti bi‑bidi, mai one kiti ba‑basi, mai one kiti nafi na ai‑ya mai kaka, mai‑ka hidi ai‑ya kako‑nima ai mai kako teni.

¹³Fara mai ihi Deoso‑ka bora kita dai sakonahi. Bora sakoni dai hawa toha, dai naha, Satanasi‑ka dai‑ya keyehe‑ya mai hirikana, mai ati dai nofaraboneni. Fara bora ihi dai habo siitora, dai habo kitabisaboneni.

¹⁴Deoso‑ka bora kita dai sakoni hawa toha, dai nahohi. Sitaraho kite‑ya sodado mai sakoteni, mai dosi‑ya kasomebonaha. Fare Deoso ati yokana dai wata, dai‑ya kasomebona, Satanasi‑ka mai ati dai nofaraboneni. Bora neme kita‑ya sodado mai sakoteni, mai baki‑ya kasomabonehe. Fare Yeso ati‑ya dai tokadaba, dai atibodi‑ya kasomaboneni.

¹⁵Sabata‑ya sodado mai sakoteni, mai tame yama hiidarabonehe. Fara‑nima Deoso mai‑ya ati somawamebona tamine dai kaminabone, Deoso ati dai wato ba‑basi nahi. Deoso ati‑ya dai wata, sabata sakoni hawa tohe‑nima dai naboneni.

¹⁶Sodado yama kita‑ya hini‑ya barikanane, wati tati sarikane, fai‑ya koborebonaha. Yama kita‑ya wati kobone, owitene. Fara‑nima Yeso ati tinofe, ati tiwatibodi hikadike, Satanasi ati tinofaraboneni.

“Towe amatini, Deoso tiwa‑ya ati somawami awire.” Satanasi ati neya, ati tinofarebonane.

¹⁷Sodado mai tati bori kita‑ya mai sakoteni, mai tati‑ya yima koborabonehe. Fara‑nima tiwa manakone‑ya Yeso nanahabe tamine‑ya tiwatibodi yama‑ya kadika, tiwa manakone one wadamara‑ya tiwatowaha, ya‑yaitinaboneni. Haa‑nima dai ni‑ya, Deoso tati borone kite‑nima na dai sakonaboneni.

Sodado yima‑ya mai damateni, bara mai‑ka sodado mai‑ya mai idabonehe. Fare Deoso ati Deoso‑ka Doni‑ka yima amani. Deoso ati‑ya ai owa mite, mai ihi amosara mai atibodi‑ya Deoso ati ideya, Yeso ati‑ya mai nofawahaba awineni.

¹⁸Yama soki‑ya sodado mai nafi amorani. Mai one amona, mai one‑ya mai kakatoma teni. Sodado mai hama, mai ihi mai sotatorabonehe. Fara mai‑nima dai nahi. Dai noko wadahi. Dai one tamine‑ya Deoso‑ya dai atibodi hiyarahi. Satanasi‑ka keyehe‑ya mai nofarabonehe.

¹⁹Owa tamine‑ya Deoso‑ya dai hiyaraharihi. Yeso Ati Amosabote ohiyare, Deoso ati‑ya mai watoramete, ati mai hiwatowahebonane. Deoso owa‑ya kasomebona, owa habo siitorabone, owa tamine dai hiyarahi.

²⁰Kirisito tamine ohiyare, kadeya‑ya owa‑ya mai nawaamaro, waasa ona, Deoso dai hiyarahi, owa habo siitorabonehe. Owa habo kitiya, Yeso ati okaminamakitasaboneni.

²¹I‑di Tikiko i‑di Kirisito ati‑ya nofi nafi, oda‑ka soho amane. Yeso ati oda kamine, oda‑ya kasomatene. Dai tabaro‑ya tokebonane, owa tamine‑ya kaminebonaha.

²²I‑di Tikiko oyoseboneni. Dai‑ya owa tamine‑ya kamineya, dai ya‑yainabonehe.

²³Kirisito‑ka dai toha, dai‑ya onofineni. Ai‑ka Abi i‑di Deoso, Bidi i‑di Yeso Kirisito‑ya fame, dai‑ya mai kasoma, dai ibi nofa, dai ati soma,

²⁴Deoso‑ya ohiyara,

“Abi Deoso, mai‑ya tikasoma, mai‑ya tiwakasomi fawateriyahi. Tika dao, i‑di Yeso Kirisito‑ya mai nofi nafe, mai tikasoma, mai abateraboneni.” Oteni.

Feye amani.