KOROSO

Koroso mai‑ka yama hani

¹Baoro ama·oni. Yeso Kirisito‑ka yo‑yose ama·oni. Deoso owa‑ya kadikemari, Yeso Kirisito‑ka yo‑yose ohawahabonehe. Timoti owa‑ya sawi, i‑di Timoti oda fama dai‑ka yama hani‑bone oda kanahanaboneni.

²Koroso‑ya dai wi‑wina Yeso ati‑ya dai no‑nofa, ati‑ya dai tokadaba na, oda‑ka soho dai toha, dai‑ka yama hani boneni. Ai‑ka Abi i‑di Deoso, ai‑ka Ayo i‑di Yeso Kirisito ne, dai‑ya mai kasoma, dai atibodi ati dai‑ya somateni.

Mai tamine‑ya Baoro miteya, ya‑yainane

³Yeso Kirisito‑ka Abi, i‑di Deoso‑ya oda hiyara, dai tamine oda hiyara, oda ya‑yaiteni.

⁴Koroso‑ya dai wi‑wina dai tamine oda mita, Yeso Kirisito ati‑ya dai nofa, Yeso ati‑ya mai one no‑nofa mai‑ya dai kasomi nofa, dai tamine oda mita, oda ya‑yaina, Deoso oda kahiyarani.

⁵Deoso tabaro‑ya ai winabone tamine‑ya dai mita, Deoso Ati Amosabote dai nofamoneni. Yeso kami tamine dai mita, Yeso kamebona‑ya dai nimanawahamoneni.

⁶Deoso Ati Amosabote ati dai mite, ati dai nofe, mai one‑ya ati dai kaminamaki, dai ene Deoso Ati Amosabote mai one nofamoneni. Awa yana, tonafe, bonowahateni. Fara‑nima Deoso Ati Amosabote toheya mai dami mita, ati mai hinofe Deoso‑ka mai dodamateni.

⁷I‑di Ebafarasi oda yosemaroni, dai‑ya Deoso Ati Amosabote‑ya kaminebonaha. Oda ene‑nima ene nane. Yeso Kirisito ati‑ya tokadabe, Yeso ati‑ya kaminatene.

⁸Dai tabaro‑ya toke, kame, dai tamine‑ya kaminawahene.

“Koroso‑ya mai wi‑wina Deoso‑ka Doni mai‑ya sawi, mai ibi nofawahineni.” Ati nerine.

⁹Dai tamine oda mita, Deoso‑ya dai tamine oda kaminateni.

“Koroso‑ya mai wi‑wina mai tikanawatohi. Yama amosa‑ya mai watoyahi, tiwati‑nima mai nawahabonehe.” Oda ati teni.

¹⁰Yeso‑ya dai ya‑yainihebone, dai ene amosiyahi. Awa bono ade amosa, bona ihi ai ya‑yaiteni. Fara‑nima dai ene amosa, ai‑ka Ayo i‑di Yeso ya‑yainebonane. Deoso‑ya dai wato ba‑basi naboneni.

¹¹“Abi Deoso, tiwa ene kitabisa, tiwati ihi mai habi siitoriyahi. Mai‑ya mai bisi, mai‑ya mai we‑wee, mai na, mai habi siitoriyahi. Mai habi siitoriya, mai ya‑yainibisahi.” Oteni.

¹²Deoso‑ka dai toha, Deoso ene Deoso‑ka yama‑ya dai kayafabone, Deoso tabaro‑ya yama wahi nafiteni.

“Abi Deoso, amosabote amatini. Tika madehe oda amani. Oda ya‑yainineni.” Dai ati nahi.

¹³Satanasi tabaro‑ya yama soki nafiteni. Hibati‑ya Satanasi ai‑ka hidi tohemari, Deoso ene ai‑ka hidi tohamare, Deoso Bidi amosabote ai‑ka Hidi tohawahene.

¹⁴Yeso ai manakone‑ya nanahabe, ene Deoso ai‑ya ati somawamane.

Yama nafi‑ka Hidi Kirisito tohane

¹⁵Deoso ai awatera, Yeso‑ta ai awabisa, Deoso‑nima nane. Deoso Bidi yokana ohari, oni Yeso Kirisito tohane. Yama‑ya Deoso wamani awisareya, Kirisito‑ta tohematane.

¹⁶Kirisito yama nafi‑ya wamane, neme‑ya mai wi‑wina‑bone mai‑ya wama, bofe‑ya mai wi‑wina‑bone mai‑ya wama, yama ai awa‑ya wama, yama ai awara‑ya wama, Deoso‑ka yo‑yose mai toha, mai‑ka webote mai toha na, mai‑ya wama, madi mai‑ya wama, mai‑ka webote mai toha mai‑ya wama, mai‑ka hidi mai toha ne‑ya wama nematane. Deoso eyehe yama nafi‑ya Kirisito wamanemata, yama nafi‑ka hidi Kirisito tohawahebonane.

¹⁷Yama one awisari‑ya Yeso Kirisito‑ta tohe, ati ene yama nafi hasineni.

¹⁸Yeso ati‑ya mai no‑nofa mai‑ka Hidi i‑di Yeso tohe, hini mai atibodi mai‑ya yose‑nima Kirisito mai‑ya yose, mai teni. Hibati‑ya yama nafi‑ya wamemata, makobote ahi‑ya kobone, mai hinahabe, Deoso hinakitamemari, yama nafi‑ka hidi tohe, Yeso ati‑ya mai no‑nofa mai aba, mai kitamahareboneni.

¹⁹Deoso hini‑ya hiyare,

“Owa‑nima oka dao nane.” Ati nane.

Deoso‑nima Bidi, i‑di Yeso Kirisito nane. Yeso ai toha Deoso toha nane.

²⁰“Mai manakone‑ya oka dao nanahabebonane, mai‑ya owati somawamabonehe.” Deoso ati nematane.

Awa‑ya Yeso waane, abemarine. Yeso emene‑ya yama nafi‑ka manakone‑ya nanahabane, Deoso ati somawamebonaha. Yeso ati mai nofa, Deoso mai‑ya kasomebonane. Bofe‑ya mai wi‑wina mai‑ya Deoso ati somawame, neme‑ya mai wi‑wina mai‑ya Deoso ati somawamahari nebona ati nane.

²¹Hibati‑ya Deoso‑ya dai ka‑kako, dai ene amosaramaroni. Dai ene Deoso yawemarine.

²²Kirisito abano abemarine, dai manakone‑ya nanahabe, Deoso noko‑ya dai waa, dai ene amosara‑ya awarebona, dai amosa hinama dai‑ya awebonane.

²³Dai ene amosawama, Kirisito ati dai tokadaba, Deoso Ati Amosabote ati dai mitemari, ati dai nofi faware, dai habo siitorihi na, dai ene Deoso ya‑yainebonane. Deoso Ati Amosabote okaminamaro, ati dai mitemarine. Deoso ati‑ya mai nafi mitawahineni. Bofe‑ya mai wi‑wina mai nafi Deoso ati‑ya mai mitawahineni. Yeso‑ka yo‑yose ama·oni, Deoso ati okaminabonehe.

Oka yama anini kitateni

²⁴Deoso Ati Amosabote okamina, owa‑ya mai bisina, owa abano komamaroni. Owa‑ya mai bisina, oyawara, ya‑yai·obisamaroni. Kirisito‑ya mai bisinamaro‑nima ai‑ya mai bisinawaha, Kirisito‑ka ai amani. Kirisito abano‑nima ai nawahaboneni. Kirisito‑ka mai okasoma, Kirisito ati‑ya mai nofara owa‑ya mai bisinamaroni.

²⁵Deoso owa‑ya yose,

“Oka mai‑ya tihiyarahi. Mai tabori dami‑ya owa tamine nafi mai‑ya tihiyarahi. Mai‑ya tikasomahi.” Ati nemarine.

²⁶Hibati‑ya Deoso Ati Amosabote‑ya mai dami mitaramete, hibayata Yeso ati ai no‑nofa Deoso ati nafi ai mitawahini.

²⁷Hibati‑ya Deoso Ati Amosabote‑ya mai watoramete, hibayata ai‑ya Deoso kanawato, Bara mai atibodi‑ya Kirisito sawiwahebonane. Yodeo ai toha, Bara dai toha na, ai nafi‑ya sawiwahane. Ai atibodi‑ya Kirisito sawi, Deoso tabaro‑ya ai winawahabone ai watowahini.

²⁸Mai dami‑ya Yeso Kirisito tamine oda hiyara, Deoso oda kasome, mai oda kanawata, Kirisito kameya,

“Ayo Yeso, mai tiawahi. Tiwati mai nofa, tiwati‑nima mai namaroni.” Oda ati naboneni.

Kirisito ati nafi oda kamine, ati‑nima dai naboneni.

²⁹Fara yama ani·ona, oka yama anini kitateni. Yeso Kirisito owa‑ya sawi, owa‑ya kasome, tamine okaminabonehe.

¹Owati dai mitahi. Koroso‑ya dai wi‑wina, Raodiseya‑ya dai wi‑wina, owa noko dai awatera, dai tamine omita, dai tamine ohiyariteni, Deoso dai‑ya kasomebonaha.

²Dai atibodi ya‑yainabone, dai ibi nofi nafi nabone, Deoso‑ka yama nafi dai watabone, Kirisito tamine mai hiwatoremari dai watowahebonane.

³Kirisito yama nafi‑ya watone. Kirisito ene yama‑ya ai wataboneni. Yama amosabote ai watoteboneni.

⁴Dai‑ya ohiyara onani, dai‑ya keyehe‑ya mai hirikarabonehe. Keyehe‑ya mai hirina, mai ati amosa‑mone mai ati na, mai ati dai nofaraboneni.

⁵Dai‑ya osawira, dai‑ya owati foyani. Dai ibi kasomahi, Satanasi‑ka keyehe‑ya dai one nofarabonehe. Yeso ati‑ya dai nofi nafi, dai ene ya‑yai·oneni.

Ai atibodi yati tohawaha ai kitama‑nima ai teni

⁶“Yeso Kirisito ai‑ka Hidi amane. Ati ai tokadabebonane.” Dai ati namaro,

dai ati‑nima dai nahi.

⁷Awa habi bodi‑ya toka, sona kanibote terani. Fara‑nima Yeso ati ai tokadaba, Satanasi ati ai nofa kanibote terani. Kirisito ati‑ya dai‑ya mai kanawata, ati dai nofi ba‑basi naho.

“Abi Deoso, amosabote amatini. Oda‑ya tikasoma, tiwa ene oda ya‑yaineni.” Dai ati nahi.

⁸Dai noko wadahi, dai‑ya keyehe‑ya mai hirikarabonehe. Keyehe‑ya mai hi‑hiri mai ati dai nofa‑mani, dai yaditona‑nima dai na neni. Keyehe‑ya mai hirina, Deoso ati‑mona mai ati na, hini mai ati toha awineni, madi mai ati toha awineni. Yeso Kirisito ene tohi awire, hini mai ihi keyehe‑ya mai hirinineni.

⁹Deoso‑nima Yeso Kirisito nane. Yeso Kirisito ai awiya, Deoso ai watowahaboneni. Deoso abano wadare, Kirisito abano wadabise, Deoso ati‑nima Kirisito ati nane. Deoso ene‑nima Yeso ene nane.

¹⁰Yeso Kirisito ai‑ya sawi, yama nafi ai kihawahineni. Yeso Kirisito kitabotebisa amane. Ai webote‑ka hidi kiti bi‑bidi, madi mai‑ka hidi kiti bi‑bidi nane.

¹¹Yodeo makidi mai sowiri tati atori wisinakosa, Kirisito‑ka mai tebone mai ati neni. Ai‑ta ai atibodi amosaramaro, Kirisito ene ai atibodi yati tohawaha, Kirisito‑ka ai teboneni. Kirisito ene Satanasi ati ai nofamaraboneni.

¹²Dai‑ya mai habanirisa, dai atibodi amosaramaro, dai atibodi bote aba, dai aba‑nima dai namaroni. Deoso ati ene Kirisito ati dai no‑nofa dai atibodi yati tohawaha, dai kitama‑nima dai nawahani. Yeso Kirisito abemari, Deoso hinakitamemarine. Ai atibodi bote amosara, Deoso ene ai atibodi yati tohawahineni.

¹³Hibati‑ya dai ene amosara, hini dai ene dai aba‑nima dai namaro, Yeso ene Deoso dai‑ya ati somawami, Yeso eyehe dai kitawahani. Deoso dai‑ya ati somawamanane

¹⁴Ai nafi ababone,

“Mai ati amosara mai abawahaboneni.” Deoso ati nematane.

Kirisito‑ta ai ati amosara manakone‑ya nanahabe, Yeso ene Deoso ati somawamane, ai manakone‑ya nanahabebona, abemarine.

¹⁵Awa‑ya Kirisito abe, ai manakone‑ya nanahabemarine. Hibati‑ya Satanasi kite mai ati namaro, kitare ai watowaha, neme‑ya mai wi‑wina Satanasi kitare‑ya mai nafi watowahineni.

Dai atibodi yati ati‑nima dai nahi

¹⁶Deoso ati‑ya dai no‑nofa dai atibodi yati ati‑nima dai nahi. Yama dai ati hikaba, dai kaba, dai ati hikabara, dai kabarihi nahi. Fino‑ya dai ati fawa, bide dai fawahi. Fino dai nofara, sibarini. Abariko yati‑ya dai ati yorotokana, Deoso‑ka marina dai hirina, sibarini, mai ati mari nofara, sibarihi teni. Domiko‑ya dai ati yorotokana, Deoso‑ya dai hiyarabone dai ati na, sibarihi, Sabado‑ya mai ati yorotokana, Deoso‑ya mai hiyarabone mai one ati na, sibarihi teni. Fara tamine‑ya dai‑ya mai weena, mai ati dai nofariyahi.

¹⁷Kirisito ati‑nima ai ene nabone ai atibodi ati na, ai atibodi ati‑ya mai mitara, ai ene‑ta‑ya mai awa, yama korimari‑nima yama na‑ya mai awabisa, ai atibodi ati‑ya Deoso watobise, Kirisito ati‑nima ai ene nabone‑ya wato tene.

¹⁸Dai‑ya mai keyeheriyahi.

“Wada owa ihi yama owatowahani.” Mai ati na,

mai ati dai nofariyahi.

“Deoso‑ka yo‑yose mai dai kahiyara, dai abano dai nofara, dai abano dai nakomahi, Deoso dai‑ya nofi ba‑basi nebonane. Owa abano onofara‑nima dai abano dai nofara, hini owa ene Deoso wadarine oawateni.” Mai ati na,

mai ati dai nofariyahi.

¹⁹Yeso Kirisito ati‑ya mai nofarani. Yeso Kirisito ai‑ka hidi amane. Ai atibodi ai‑ya yose, ati ai tokadabateni, Fara‑nima Kirisito ai‑ya yose, ati ai tokadabahareboneni. Kirisito ati ai no‑nofa ai atibodi ati ai tokadaba‑nima Yeso Kirisito ati ai tokadabahi. Madehe yana, tonafe‑nima Kirisito ati ai tokadaba, Deoso ene yama ai wato ba‑basi nawahaboneni.

²⁰Kirisito abe ene dai atibodi bote aba‑nima dai nawaha, dai atibodi bote ati‑nima mai ati na, hini yamata ihi mai ati dai tokadabiti?

²¹“Yama dai damarihi, yama dai kabirihi, yama dai boyorihi nahi.” Mai ati na.

²²Mai ati dai nofariyahi. Ai‑ka yama‑bone‑ya Deoso daanane, yama ai tonasiyabonehe.

²³Mai ati dai mita,

“Hehe, yama‑ya mai wato ba‑basi na, fara mai ati na, Deoso nofe awane. Ai abano koma sibarabani.” Dai ati niya,

mai ati‑nima dai ene na, dai atibodi bote dai‑ya keyehesa naboneni.

Neme‑ka yama tamine‑ya dai kadikahi

¹Kirisito abe, kitame, Deoso‑ka kanika neme‑ya itarine. Kirisito eyehe dai atibodi bote aba‑nima nawaha, Kirisito kitame‑nima dai atibodi yati tohawaha, neme‑ka yama tamine dai kadikiyahi.

²Bofe‑ka yama‑ya dai nokotoniriyahi. Kirisito yama hinofa tamine‑ya dai atibodi kadikabisahi.

³Dai atibodi amosara aba, dai atibodi yati toha, dai one hiawara, Kirisito hiawa, dai‑ya nawadane, Deoso tabaro‑ya dai winabonehe.

⁴Kirisito ene dai atibodi yati tohawahani. Kirisito kamataseya, Kirisito eyehe dai‑ya mai awaboneni. Dai amosi nafeboneni.

⁵Dai atibodi bote dai‑ya keyehe, ati dai nanahabahi. Mai fanawi one‑ya dai aharihi, mai makidi one‑ya mai fanawi dakorarihi. Mai tamine‑ya dai atibodi kadikarihi. Mai one‑ka yama‑ya dai nokotonirihi. Mai‑ka yama‑ya dai nokotoniya, deoso bare‑ya dai kahiyara‑nima dai nineni.

⁶Fara‑nima mai niya, Deoso yawe, mai‑ya weenebonane.

⁷Hibati‑ya Kirisito ati dai nofara, mai‑nima dai namaroni.

⁸Hibayata mai‑nima dai rihi, dai yawamarihi, mai‑ya dai kakomarihi, mai tamine‑mone‑ya dai kaminamarihi, mai‑ya dai weenamarihi, dai iridi‑ya dai ati amosara yananamarihi nahi.

⁹Keyehe‑ya dai ibi hirikanamaro, keyehe‑ya dai ibi hirikanamariyahi. Deoso ati‑ya dai nofawaha, dai atibodi bote ene‑maro‑nima dai ene namariyahi.

¹⁰Dai atibodi yati tohawaha, Deoso dai‑ya mamanemata, dai‑ya kanawatowahe, fare‑nima dai nawahabonehe.

¹¹Deoso ati‑ya ai no‑nofa Kirisito ene fara hinama ai tohawaha, Yodeo dai one toha, Bara dai one toha namaro, dai one sowiri tati ataro‑ya mai wisinakosa, dai one sowiri tati ataro‑ya mai wisinakosarihi, dai one oda ati‑nima ati nihi, dai one ati bara toha, dai one yama yaki‑ya wina, dai one ahiyata‑ya wina na, dai one‑ya mai kanika, dai one‑ya mai kanikarihi namaroni. Yeso Kirisito ai atibodi‑ya sawiwahe, ene fara hinama ai tohawahineni.

¹²Deoso‑ka dai toha, dai‑ya nofe, dai‑ya kadikemata, hika dai tohawahaboneni. Mai atibodi koma mai‑ya kasoma, dai ene amosa, dai‑ya dai kahiyarariyahi. Yama‑ya dai nimana, dai yawariyahi.

¹³Deoso‑ka dai toha, dai‑nima mai ra, mai ihi dai yawariyahi. Mai ihi amosara toha, mai‑ya dai atibodi somawama, Deoso dai‑ya ati somawamemari‑nima mai‑ya dai ati somawamaharihi.

¹⁴Dai ibi nofi nafiyahi. Dai ibi nofi nafe, dai hinama tohaboneni.

¹⁵Yeso Kirisito dai‑ya sawi ene dai atibodi ati somiyahi. Deoso dai‑ya kadikemata, ai ohare‑nima dai na, dai ya‑yainahi.

¹⁶Kirisito ati dai kadiki nafiyahi. Dai‑ka mai‑ya ati nafi dai kanawatohi. Mai ihi amosabone, mai‑ya dai kamina, Deoso‑ka wayoma dai hirina, dai ya‑yaina, Deoso‑ya dai kahiyarahi.

¹⁷Dai ati yanana, ai‑ka Ayo i‑di Yeso ati‑nima dai ati na, ene‑nima dai ene na, Yeso ene Deoso‑ya dai kahiyara,

“Abi Deoso, amosabote amatini. Tiwa ene ya‑yai·oneni.” Dai ati nahi.

Dai ene amosiyahi

¹⁸Mai fanawi fana, mai‑ka yibote ati‑ya mai nofiyahi. Kirisito‑ka mai toha, ati ene mai‑ka yibote ati‑ya mai tokadabiyahi.

¹⁹Mai makidi fana, mai‑ka yibote‑ya mai nofiyahi. Mai‑ka yibote mai‑ya mai weerihi, mai mai bisihirihi, hinaboneni.

²⁰Yetene, atona, madehe, mai na, dai‑ka abi, dai‑ka ami mai na, mai ati dai tokadabahi. Deoso ya‑yainebonane.

²¹Mai makidi madehe‑ya kiha, mai‑ka madehe‑ya mai weeni nafiriyahi. Mai‑ka madehe‑ya mai weeni nafiya, hini mai‑ya mai nofaraboneni. Mai atibodi komaboneni.

²²Mai mai hikanikamaro, mai‑ka hidi ati‑ya mai nofiyahi. Ati mai hikadaba hiyaho. Mai‑ka hidi noko‑ya yama mai ani, mai‑ka hidi noko beheri‑kaya yama‑ya mai ani nahi. Yeso ati‑ya mai no‑nofa mai‑ka hidi ati‑ya mai tokadabiyahi, Yeso ya‑yainebonaha.

²³Yama‑ya mai anina, yama‑ya mai anini kitahi. Yeso mai‑ka yama anini‑ya aweya, ya‑yainebonane. Ai owa ati ene yama‑ya mai anira, Yeso ati ene yama‑ya mai aninibisa, Yeso ya‑yainebonane.

²⁴Hibayata yama‑ya mai anina, makobote neme‑ya mai koboniya, mai manakone wadaboneni. Yama‑ya mai anina, mai‑ka Hidi, i‑di Yeso Kirisito mai‑ka yama anini‑ya awe, mai‑ka yama anini manakone‑ya daanebonane.

²⁵Mai ihi amosara mai manakone wadaboneni. Mai manakone amosara mai nofi awiraboneni. Hini ai ene‑nima ai ene manakone naboneni.

Deoso‑ya owa tamine dai hiyarahi

¹Hidi dai toha, mai dai kanikamaro, mai dai weeni nafiriyahi. Dai‑ka yama‑ya mai anina, mai‑ka yama manakone dai daa, mai tafe‑ba dai daa nahi. Mai‑ka hidi dai toha, neme‑ya dai‑ka Hidi tohe, dai ene‑ya awebonane.

²Deoso dai hiyaranadiya, dai ya‑yainahi.

“Deoso, amosabote amatini.” Dai ati nahi.

³Deoso‑ya dai hiyariya, oda tamine dai hiyara,

“Abi Deoso, Baoro mai tikasomahi, tiwati‑ya mai kaminabonehe, mai dami‑ya. Yeso Kirisito tamine‑ya mai kaminabone, mai tikasomahi.” Dai ati nahi.

Yeso Kirisito tamine ohiyaranadi ene kadeya‑ya owa‑ya mai nawaani.

⁴Owa tamine Deoso‑ya dai hiyara,

“Abi Deoso, Kirisito tamine‑ya i‑di Baoro kamine, ati amosayaho, tiwati‑ya mai watowahabonehe.” Dai ati nahi.

⁵Deoso ati‑ya mai nofara mai‑ya dai hiyarahi. Kirisito tamine mai‑ya dai hiyarahi. Dai ene‑ya mai awiya, Kirisito tamine‑ya mai nofawahaba awineni. Dai ene amosiya, Deoso ati‑ya mai nofawahaba awineni.

⁶Mai‑ya dai hiyara, dai ati amosahi, dai ati‑ya mai nofabonehe. Deoso tamine‑ya dai‑ya mai haana, yama dai wataboneni.

Baoro mai‑ya daba, mai tamine

⁷Dai tabaro‑ya i‑di Tikiko tokebona, owa tamine‑ya dai‑ya hiyarebonane. Deoso ati‑ya nofe, Deoso ati‑ya kaminatene. Deoso haahinemarine, ai‑ka ayo i‑di Kirisito ati‑ya kaminebonaha.

⁸I‑di Tikiko oyose, dai tabaro‑ya toke ene dai ya‑yainahi. Tikiko oda‑ka soho amane. Oda tamine‑ya kamineya, dai ya‑yainaboneni.

⁹Tikiko eyehe oda‑ka soho owa i‑di Onesimo sawibonane. Onesimo dai tabaro‑ya winemari, oda‑ya sawiwahemari, Deoso tamine‑ya kaminebonaha. Oda tamine mai kaminabone, mai tokomini.

¹⁰I‑di Aritako oda fama kadeya‑ya oda‑ya mai nawaamaro, oda yoronasa neni. Dai‑ya Aritako ati foyene, Banabe‑ka naki i‑di Maroko dai‑ya ati foyaharine. I‑di Maroko tamine hibati‑ya okanahanomari, dai tabaro‑ya tokeya, dai ya‑yainahi. Dai ene i‑di Maroko ya‑yainaharibonane.

¹¹I‑di Yeso Yosito dai‑ya ati foyemonane. Owa‑ya Yodeo mai one sawiterani. Deoso ati oda kamina, Yodeo mai one oda‑ya dabaterani. Aritako, Maroko, Yeso Yosito, mai na, owa‑ya mai daba, mai ihi ya‑yai·oteni. Owa‑ya mai kasomateni.

¹²Dai‑ka owa i‑di Ebafarasi tohe, Ebafarasi‑ya Yeso Kirisito kadikemari, Yeso ati‑ya kaminebonaha. Dai‑ya Ebafarasi ati foya, dai tamine‑ya hiyaratene, Deoso‑ya.

“Deoso, Koroso‑ya mai wi‑wina mai tikasomahi, tiwati‑ya mai nofi nafebonehe. Tiwati mai nofiya, tiwati‑ya mai tokadababoneni.” Ebafarasi ati tene.

¹³Owati dai mitahi. Keyehe‑ya hiri·oni awirani. I‑di Ebafarasi dai‑ya nofi nafi, Deoso‑ya dai tamine‑ya hiyaranaditene. Raodiseya‑ya mai wi‑wina mai tamine‑ya hiyaraharitene. Iyerabori‑ya mai wi‑wina mai tamine‑ya hiyaratene.

¹⁴Ai‑ya ke‑ketehe i‑di Roka dai‑ya ati foya, i‑di Dema dai‑ya ati foya nene.

¹⁵Raodiseya‑ya mai wi‑wina mai‑ya dai hiyara, owa tamine mai‑ya dai hiyarahi. I‑di Nifa tabori‑ya mai yorotokana, Deoso‑ya mai hiyarabone, mai‑ya dai hiyara, owa tamine mai‑ya dai hiyarahi.

¹⁶Oka yama hani kadiki dai hawa tohiya, Raodiseya‑ya mai wi‑wina Deoso ati‑ya mai no‑nofa mai hikadikamakiyahi. Mai‑ka yama hani‑bone okanahanamaro, dai kadika niyahi.

¹⁷I‑di Arakibo‑ya dai hiyara,

“‘Arakibo, Yeso Kirisito ai‑ka Hidi tiwa‑ya yosemari, ati‑nima tinahi. Deoso Ati Amosabote kamini fawatiriyahi.’ Baoro ati nene.” Dai ati nahi.

¹⁸Owa‑ya kadeya‑ya mai nawaa, owa yehe‑ya yama hani okanahanowahani. Baoro ama·oni, owa dai watoyahi. Owa tamine dai hiyarahi Deoso‑ya. Deoso dai‑ya sawibonane.

“Deoso, Koroso‑ya mai wi‑wina mai tikasomahi.” Oteni. Feye amani.