YESO-KA

Yeso‑ka yo‑yose mai tamine

Deoso‑ka Doni kamebona tamine

¹Ti·ofiro, hibati‑ya Yeso tamine tika‑bona okanahano, hika yama anini tamine toha, mai‑ya hi‑hiyara tamine toha ne, okanahanamaroni.

²Neme‑ya Yeso tokome tamine okanahano, neme‑ya toki awisareya, Deoso‑ka Doni ene hika yo‑yose mai hikadikamaro, mai‑ya hiyaremonane.

³Yeso abe, kitame, mai‑ya kamatase, amoni 40 kane mai‑ya hiyaranadi, kitame‑ya mai watowahineni. Deoso ai nafi‑ka hidi‑bona tamine‑ya mai‑ya hiyaremonane.

⁴Mai‑ya yorotokanihi, mai‑ya hiyare,

“Yerosare‑ya dai nahohi. Yama‑ya okobi i‑di Deoso dai‑ya daanebona, dai nimanahi. Hibati‑ya dai‑ya daahinabone tamine okaminamaroni.

⁵Faha‑ya Yowaho mai‑ya habanirisemari, hibayata dai amoni fa‑famaraba ne‑ya Deoso‑ka Doni dai atibodi‑ya sawiwahebonane.” Yeso ati nemonane.

Neme‑ya Yeso tokomebonane

⁶Mai naha, Yeso‑ya mai hiyara,

“Hibati‑ya mai dami‑ka hidi Isara·eo‑ka mai tohamete, hibayata tiwa ene mai‑ka hidi ai tohamatasaba awineni.” Yeso‑ka yo‑yose mai ati na,

⁷Mai ati‑ya mite,

“Hibayata yama nabone‑ka mahi dai watora, ai‑ka Abi i‑di Deoso yama‑ya watobise, hini ene yama boneni.

⁸Dai‑ya Deoso‑ka Doni sawiya, dai habo kitawaha, Yerosare‑ya mai wi‑wina, Yodeya‑ya mai wi‑wina, Samariya‑ya mai wi‑wina, tabora dami‑ya mai wi‑wina, mai na, mai‑ya owa tamine dai kaminaboneni.” Yeso ati nemonane.

⁹Hiyari hawa tohe, neme‑ya tokome mai hiwakatome, neme sabi ihi Yeso‑ya mai awami awiramoneni.

¹⁰Neme‑ya Yeso tokomeya, mai kakatoma, Deoso‑ka yo‑yose mai fama mai kobona, bora sawa‑ya mai weyenikima, Bedoro mai‑ya mai daba,

¹¹“Karireya‑ka dai toha, hini yamata ihi neme‑ya dai kakatoma? Neme‑ya Yeso tokome, kamebonane. Tokomi dai awe, kisami mai hiawebonane.” Deoso‑ka yo‑yose mai ati namoneni.

Yeso‑ka yo‑yose owa i‑di Matiya tohebona

¹²Yeso neme‑ya tokome‑ya Orifera adami‑ya mai naha, Yeso toki hawa toheya, Yerosare‑ya Bedoro mai winitonamamoneni. Yerosare yakari‑ya Orifera adami waineni.

¹³Yerosare‑ya mai kobonama, mai one‑ka yobe tati mese‑kaya mai‑ka yobe waari‑ya mai tokomisama, i‑di Bedoro, Yowaho, Tiyako, Anidere, Firibi, Tome, Batoromeho, Mateo, Aofio bidi i‑di Tiyako, Simaho Seroti, Tiyako sori i‑di Yoda mai na, mai tokomisamamoneni.

¹⁴Yeso‑ka yo‑yose mai toha, Yeso madi i‑di Mariya toha, Yeso sori mai toha, mai fanawi one toha na, mai yorotokana, Deoso‑ya mai hiyaranademoneni.

¹⁵Mahi owa‑ya mai dama mai yorotokana, 120 mai toha, mai bai‑ya i‑di Bedoro waamise, mai‑ya hiyare,

¹⁶“Soho, owati dai mitahi! Deoso‑ka yama hani ati‑nima yama teni. Hibati‑ya Deoso‑ka Doni ati i‑di Dafi hikanahanomata, ati‑nima yama nawahani. Yara mai‑ya Yeso‑ya i‑di Yoda daanebona tamine‑ya i‑di Dafi kanahanomata, ati‑nima yama nawahani.

¹⁷Yoda oda‑ya dabe, oda nafi‑ya Yeso yosemarine.” Bedoro ati nemonane.

¹⁸Yeso‑ya Yoda daane, yinero‑ya kayafe, hini ene amosare, manakone‑ya fadara‑ya kanike, fara‑ya abo sone, nabadi wakakane, yoto siratokanemonane.

¹⁹Yerosare‑ya mai wi‑wina Yoda tamine‑ya mai mita, ‘fadara ama toha’ oni mai haahina Akedama tohamoneni.

²⁰Dafi‑ka yama hani ati one‑ya Bedoro hiyaratase,

“‘Hika yobe abaho, mai winateri‑bone‑karo. Hika yama anini‑ta ai owa anihinamakibisahi.’ Dafi‑ka yama hani ati nineni, wayoma‑kaya.

²¹Hibati‑ya Yeso ai dabiya, ai‑ya dai dabamaro, ohari ai kadikaho, Yoda‑ka yama anini‑ya aninebonaha.

²²I‑di Yowaho Yeso‑ya habanirisemari‑ya awa, neme‑ya Yeso tokome‑ya awahari ai haanaho, Yeso kitami tamine‑ya hiyarebonaha.” Bedoro ati ne.

²³Mai ibi hiyara,

“Hibati‑ya i‑di Yose Basaba Yosito ai‑ya sawi, i‑di Matiya ai‑ya sawi nemari, ebeni‑ke ai‑ya dabamabati?” Mai ati na.

²⁴Deoso‑ya mai hiyara,

“Abi Deoso, ai atibodi tiwata, ebeni‑ke oda‑ya dabamabati? Ebeni‑ke‑ya tiwati koboniti?

²⁵I‑di Yoda oda‑ya dabemari, hini ene oda‑ya dabamaterebona, abe, madi mai tabori‑ya tokawahe, ebeni‑ke oda‑ya dabawahabati? Yeso‑ka yo‑yose tohebonaha.” Mai ati namoneni.

²⁶I‑di Yose, i‑di Matiya mai fama, mai oni‑ya yati bide‑ya mai kanahana, yati bide‑ya mai kisakisa kanana, i‑di Matiya oni yati bide‑ke kaso, Yeso‑ka yo‑yose tohawahemonane.

Deoso‑ka Doni mai‑ya sawiwahe

¹Yeso abe nowati‑ya mai amoni 50 kanamaki‑ya mai marina, mai marini‑ke mahi oni Benekosi tohe‑ya, Yeso‑ka mai nafi yorotokawamamoneni.

²Mai yorotokaniya, neme‑ya moni kaki, yama hakikini kita moni‑nima moni nemonane. Yobe nafi‑ya mai nahore, moni kite, moni mai himitemonane.

³Yifo hirini‑nima na‑ya mai awa, mai hiwakatoma, mai‑nima ebekana, yifo nakasiri darikana‑nima ne mai nafi‑ya boyonawahemonane.

⁴Deoso‑ka Doni mai atibodi‑ya sawiwahe, hibati‑ya mai one ati‑ya mai watora, Deoso‑ka Doni ene mai one ati‑ya mai hiyarawahamoneni.

⁵Tabora dami‑ya mai wi‑wina Yodeo mai toha, Deoso‑ya mai kahiyara, Yerosare‑ya mai winawahani.

⁶Yerosare‑ya mai wina, yama hakikini kita moni‑nima moni ne‑ya mai mita, Bedoro mai‑ka yobe‑ya moni kaki, fara‑ya mai nafi toka, mai kobona, mai habi siitona, Bedoro mai ati‑ya mai mita, mai ibi hiyara,

“Ka! Oda ati‑ya mai ati tohawahineni.” Mai one ati nihi,

“Ka! Oda ati‑ya mai ati tohaharineni.” Mai one ati nihi na, fara mai nafi ati namoneni.

⁷“Ka! Haa‑nima yama na ai awatera, Karireya‑ka mai hinama tohani.

⁸Ai‑ta ai ati bara dama toha, hini yamata ihi ai dama ai ati yokana‑ya mai ati‑ya ai mitineniti?

⁹Baratiya‑ka mai ati‑nima ai owa ati nihi, Mediya‑ka mai ati‑nima ai owa ati nihi, Eraho‑ka mai ati‑nima ai owa ati nihi, Mesobotamiya‑ka mai ati‑nima ai owa ati nihi, Yodeya‑ka mai ati‑nima ai owa ati nihi, Kabadosiya‑ka mai ati‑nima ai owa ati nihi, Boto‑ka mai ati‑nima ai owa ati nihi, Asiya‑ka mai ati‑nima ai owa ati nihi,

¹⁰Firikiya‑ka mai ati‑nima ai owa ati nihi, Banafiriya‑ka mai ati‑nima ai owa ati nihi, Eyito‑ka mai ati‑nima ai owa ati nihi, Ribiya tabora kote‑ya Sireni tabora toha, Sireni yakari‑ka mai ati‑nima ai owa ati nihi, Homa‑ka mai ati‑nima ai owa ati nihi,

¹¹Kereta‑ka mai ati‑nima ai owa ati nihi, Arabiya‑ka mai ati‑nima ai owa ati nihi nane. Yodeo ai owa tohe, Yodeo mai‑nima Deoso ai nafi nofineni. Hini yamata‑nima mai na, ai ati nafi‑ya mai watowaha? Deoso ene amosabote tamine‑ya mai kamina, mai ati oda mitawahi neni.

¹²Hini yamata ihi haa‑nima mai nafi ati niti? Haa‑nima yama na, ai awaterani.” Mai ibi hiyara, mai ati namoneni.

¹³“Kawi ihi mai towe toha awini.” Mai one ati na,

mai‑ya mai hahakana mai nahamoneni.

Mai‑ya Bedoro hiyarawahane

¹⁴Yeso‑ka yo‑yose mai nafi naha, Bedoro ati yanane,

“Tabora dami‑ka dai toha, Yodeo dai toha na, Yerosare‑ya dai wina, owati dai mitahi, yama dai watowahaboneni.

¹⁵Kawi ihi oda towe toha‑mone dai ati na, mahi kaki dai awahi. Mahi kaki‑ya kawi ihi ai towe tohaterani.

¹⁶Deoso‑ka Doni ene dai ati‑ya dai oda hiyarineni. Deoso ati‑ya mi‑mita‑mata i‑di Yoweo Deoso ene haa‑nima ai ene na‑bone tamine‑ya kanahanomatane.

¹⁷‘Hidi Webote kobonama‑bona‑ka mahi koboni yanatoneya, Deoso‑ka Doni dai atibodi‑ya sawi, Deoso‑ka Doni ene dai‑ka madehe Deoso ati‑ya mai kaminaboneni. Dai‑ka yetene mai toha, bote mai toha na, wada‑ya owati‑ya mai mitaboneni.

¹⁸Owa‑ya mai narifa, maki mai toha, fana mai toha na, Deoso‑ka Doni mai‑ya sawiwahe, owa tamine‑ya mai hiyaraboneni.

¹⁹Neme, bofe na‑ya owa ene‑ya mai awaboneni. Ama nafe‑ya mai awa, yama hirini‑ya mai awa, yifo asawi nafe‑ya mai awa naboneni.

²⁰Dai‑ka Hidi koboni awisareya, mahi noko soki toha, abariko noko ama tohe‑nima nihi nebonane. Dai‑ka Hidi koboneya, dai one ya‑yaini nafi, dai one ohini nafi naboneni.

²¹Owati‑ya mai nofa, owa‑ya mai haana, owa ene mai abateraboneni.’ Deoso ati ne,

Ati‑ya i‑di Yoweo kanahanomatane.” Bedoro ati nemonane.

²²Bedoro mai‑ya hiyaramatase,

“Isara·eo‑ka nodi dai toha, owati dai mitahi. Deoso ene Yeso Nasare‑ke ene dai watoneni. Yeso ene kitabote tohe, ene‑ya mai awa,

‘Ka! Haa‑nima ai ene na ai awaterani.’ Mai ati namaroni.

²³Deoso ati ene Yeso kaki, dai‑ya winemarine. Yeso dai nanahababone dai‑ya Deoso wato, Bidi‑ya yosemari, dai tabaro‑ya Bidi wine, dai ati kasira ene yara awa‑ya mai baahikane, abemarine.

²⁴Yeso abano‑ya temene barikiterene. Deoso ene kitame, hini temene‑ke abano wadamare, abe komene wadamare, abamaterebonane.

²⁵Hibati‑ya Yeso tamine‑ya i‑di Dafi kanahanomatane.

‘Oka Hidi oka kanika‑ya sawi, owa‑ya kasome, ene owa habo siitoterani.

²⁶Owa habo kita, ya‑yai ohaneni. O·abiya, Deoso ati ene okitamabone owatibodi ati nani.

²⁷O·abiya, owa‑ya Deoso kasomebonane. Hika Ka‑kadika hini temene‑ya abano bataterebonane.

²⁸Deoso tabaro hawine‑ya owa‑ya yofikanemari, tabaro‑ya owiniya, ya‑yai·onaboneni.’ Dafi‑ka yama hani ati nineni.

²⁹Oka soho dai toha, owati dai mitahi. Dafi hibati‑ya abemata, temene ahiyata‑ya ite, temene‑ya abano itasa nane.

³⁰Dafi Deoso ati‑ya mi‑mita‑mata, Deoso ati‑nima yama nabone‑ya Dafi wato,

‘Dafi ti·abiya, owa ene tika nodi Isara·eo mai‑ka hidi tohebonane.’ Deoso ati ne,

ati‑ya Dafi nofematane.

³¹Dafi‑ka nodi Kirisito tohebona, tamine‑ya kanahano, abeya, abano batatere, kitamebona ati nane.

³²Deoso ene Yeso kitame, kitami oda nafi awemari, tamine oda hiyarawahineni.

³³Deoso neme‑ya hiwakame, Deoso‑ka kanika‑ya itariwahe, Yeso‑ya Deoso‑ka Doni sawimari, Yeso ati ene oda atibodi‑ya sawiwahe, ene dai ati‑ya oda hiyarawahineni.

³⁴Neme‑ya Dafi abano toki awirene, Yeso abano‑ta tokabisane. Dafi‑ka yama hani dai awahi.

‘Oka Hidi‑ya Deoso hiyare, —Oka kanika‑ya tiwitarihi.

³⁵Oka kanika‑ya tiwitariya, tiwa‑ya mai ka‑kako, owa ene mai mese‑ya tiwa teme kaforiwahaboneni.— Deoso ati nane.’ Dafi‑ka yama hani ati nineni.

³⁶Isara·eo‑ka nodi dai toha, yama dai watohi! Yeso dai baakanemari, Deoso ene ai nafi‑ka Hidi tohe, Kirisito amane. Dai ati kadamowamariyahi.” Bedoro ati nane.

³⁷Bedoro ati‑ya mai mita, mai atibodi komawaha, Bedoro mai‑ya mai hiyara,

“Oda‑ka ayo dai toha, hini yamata‑nima oda nibati?” Mai ati na,

³⁸“Deoso‑ya dai‑ya dai kamina, Yeso Kirisito ati dai nofa, dai oda habanirisiya, Deoso dai‑ya ati somawameya, Deoso‑ka Doni dai‑ya sawiwahebonane.

³⁹Fare oda‑ya sawi‑nima dai‑ya sawi, dai‑ka madehe‑ya sawi, yama yaki‑ya mai wi‑wina mai‑ya sawi nebonane. Ai‑ka Hidi i‑di Deoso dai‑ya haane, dai‑ya haani‑nima mai‑ya haaneya, Deoso‑ka Doni mai‑ya sawibona ati nane.” Bedoro ati nemonane.

⁴⁰Bedoro mai‑ya hiyari dame,

“Mai dama mai ihi amosara, mai‑nima dai riyahi.” Bedoro ati nemonane.

⁴¹Bedoro ati‑ya mai nofa, mahi ohari‑ya 3000 mai kana mai habanisa, Bedoro mai‑ya mai dabawahamoneni.

Yamata‑ya mai ibi ebenawahani

⁴²Mahi‑nima mai yorotokana, mai‑ya Bedoro mai kanawata, Deoso‑ya mai hiyara, mai tafateni.

⁴³Bedoro mai ihi‑ya mai awa,

“Haa‑nima ai ene na ai awaterani.” Mai ati na, mai habi siitoneni.

⁴⁴Yeso ati‑ya mai nofa, Bedoro mai‑ya mai daba, mai yorotokana, mai tafabone, mai tafe‑ya mai ebekana, mai nafi tafineni.

⁴⁵Fadara‑ya mai kiha, mai‑ka fadara‑ya mai daana, yinero‑ya mai kanika, yinero‑ya mai ebe, yama bara‑ya mai daana, yinero‑ya mai ebe nineni.

⁴⁶Mahi‑nima Deoso‑ka yobe‑ya mai yorotokana, Deoso‑ya mai hiyara, tabora‑ya mai tokoma, mai tafe‑ya mai ebena, mai nafi ya‑yainawahani. Yama‑ya mai da‑daa mai ya‑yai, yama‑ya mai kayafa, mai ya‑yai namoneni.

⁴⁷Deoso‑ya mai kahiyaranade, mai ihi amosa, mai‑ya mai dami nofa, mai‑nima Yeso ati‑ya mai one nofamake, mai‑ya mai dabamakineni.

Ka‑kakone‑ya Bedoro mai nakitamineni

¹Mahi towitawiti‑ya i‑di Bedoro, i‑di Yowaho mai fama, Deoso‑ka yobe‑ya Deoso‑ya mai hiyarabone, mai towakamineni.

²Deoso‑ka yobe nokobiri amose yakari‑ya maki awa‑ya damakani mai hikame, mahi‑nima yobe nokobiri‑ya mai hina·itaritene. Madi dori‑ya hi‑hiyanemata, yakatere. Deoso‑ka yobe‑ya mai tokiyoma, mai‑ya haatene, yinero‑ya kayafebonaha.

³Mai damahikane, Bedoro, Yowaho mai fama, mai‑ya awe, Deoso‑ka yobe‑ya mai tokiyomabone, mai‑ya haane,

“Oka yinero‑ba dai daanahi.” Ati ne,

⁴Bedoro mai maakanama, maki‑ya mai kiina,

“Oda tiwakatomahi.” Bedoro ati ne,

⁵“Yinero‑ya owa‑ya mai daanaba awineni.” Atibodi ati ne,

mai‑ya kakatomane.

⁶“Barata, oro na, oda kihara, oda haatina, yama oda kihabisa tiwa‑ya daa·onaboneni. Yeso Kirisito Nasare‑ke ene tiwaamisama, yakatinahi.” Bedoro ati nemonane.

⁷Bedoro yehe damahine, hinawaamise, teme, temeribo ne kitawahe,

⁸yoranimise, waane, Deoso‑ka yobe‑ya mai tokiyamake, yakane, yorane, ya‑yaine, Deoso‑ya kahiyarane.

⁹Deoso‑ka yobe‑ya mai yorotokana, yakane‑ya mai awa, Deoso‑ya kahiyare, ati‑ya mai mitineni.

¹⁰Deoso‑ka yobe nokobiri‑ya i‑itari kitame‑ya mai awa, mai atibodi yama‑ya kadika,

“Ka! Deoso‑ka yobe nokobiri‑ya i‑itari, yinero‑ya ha‑haa, fare tohakare?” Mai ati na,

Mai atibodi yama‑ya dika, yama‑ya mai watorani.

¹¹Deoso‑ka yobe kote oni Saromaho tohe‑ya mai naha, Bedoro, Yowaho mai fama, kitame mai mani‑ya damaneya, mai awa, mai kanani kamakineni.

Mai‑ya Bedoro hiyare

¹²Bedoro mai‑ya kakatome mai‑ya hiyare,

“Isara·eo‑ka nodi dai toha, hini yamata ihi

‘Ka!’ Dai ati na?

Oda‑ya dai kakatoma? Oda ene, maki yakanemona dai ati na awineni. Oda ene tohi awirini. Yeso ene amane.

¹³Deoso‑ya Yeso na‑narifa, yara mai‑ya dai kahabanemarine, mai baahikanebonaha. I‑di Birato seehikanebona, dai ati barihine mai hinahabemari, ai‑ka idi i‑di Abaraho, i‑di Isaki, i‑di Yako mai na, mai‑ka Deoso hinakitamemarine.

¹⁴‘Yeso amosabote amane.’ Deoso ati ne,

‘Yeso seetikariyahi, oda nofi awire. Ai‑ya nanahabamari seetikabisahi.’ Dai ati namaroni.

¹⁵Yeso ai‑ya wamanemata, dai ati ene mai hinahabe, Deoso hinakitame, kitami oda awemarine.

¹⁶Yeso ati oda nofa, Yeso ene ka‑kakone‑mata kitamawahe. Hibati‑ya ka‑kakone dai wato, Yeso ene kitame wai, dai awaho.

¹⁷Soho, yama dai watorihi, dai‑ka hidi mai hiwatorihi hina. Yeso Deoso Bidi toharemona dai atibodi ati na, dai nanahabemarine.

¹⁸Deoso ati‑ya mai mi‑mita‑mete Deoso ati‑ya mai kanahana,

‘Deoso‑ka Ka‑kadika‑ya mai nakomaboneni.’ Mai ati namete.

Deoso ati‑nima yama nawahani.

¹⁹Deoso‑ya dai‑ya dai kaminawaha, Deoso dai‑ya ati somawame, dai ene‑ya kadikamaterebonane.

²⁰Hibayata dai‑ya kasome, makobote Hika Ka‑kadika i‑di Yeso Kirisito hiyosematasebonane.

²¹Hibayata neme‑ya Yeso wine, hibati‑ya Deoso ati‑ya mai mi‑mita‑mete Deoso ati‑ya mai kanahano,

‘Yama yanakani‑ya yama nafi amosamete‑nima Deoso ene yama namatasaboneni.’ Mai ati na,

Fara‑nima yama yanatonabone, Yeso kamatasebonane. Deoso ati‑nima yama naboneni.

²²Hibati‑ya Deoso ati‑ya Mose mitemata, ati yanane,

‘Deoso ati omiti‑nima Deoso ene dai owa ati himitamaki, ati dai mitayaho.

²³Deoso ati‑ya mi‑mita ati mai hinofi awireya, mai ababoneni.’ Mose‑ka yama hani ati nineni.

²⁴Mose ati‑nima Samo·eo ati ne, ati‑nima Deoso ati‑ya mai mi‑mita‑mete mai nafi ati toha, hibayata‑ke tamine‑ya mai kanahano nameteni.

²⁵Deoso ati‑ya mai mi‑mita‑mete mai‑ka nodi dai toha, dai tamine‑ya Deoso i‑di Abaraho‑ya hiyare,

‘Abaraho, tabora nafi‑ya mai wi‑wina tika nodi mai‑ya kasomebonane.’ Deoso ati nematane.

²⁶Deoso Bidi‑ya nakitami hawa tohe, dai‑ya hiyosemi dai hihemarine. Dai‑ya kasomebona, dai ene towe tohamarabonehe.” Bedoro ati nemonane.

I‑di Bedoro i‑di Yowaho mai fama mai‑ya hidi mai waratona

¹Mai‑ya i‑di Bedoro, i‑di Yowaho mai hiyariya, Deoso‑ka yama‑bone‑ya mai da‑daa, Deoso‑ka yobe‑ya na‑nawada‑ka hidi, sadoseo mai toha na, Bedoro mai‑ya mai kamakineni.

²Yeso abe, kitame‑nima ai kitamaharebone tamine‑ya Bedoro mai hiyara, mai ati‑ya mai mita, mai yawamoneni.

³Yama soki yanatoni‑ya Bedoro, Yowaho mai fama, mai‑ya mai waratona, kadeya‑ya mai mai hibe, kadeya dori‑ya mai amonamoneni.

⁴Bedoro mai ati‑ya mai one mita, Yeso ati‑ya mai nofawaha, maki mai dama 5000 mai kana Yeso ati‑ya mai nofawahamoneni.

⁵Yama wahi one‑ya mai‑ka hidi mai toha, bote mai toha, Mose‑ka yama hani ati‑ya mai ka‑kamina mai toha, mai na, Yerosare‑ya mai yorotokana,

⁶Deoso‑ka yama‑bone‑ya mai da‑daa mai‑ka hidi i‑di Anasi toha, i‑di Kaifo, i‑di Yowaho, i‑di Aresadiri, i‑di Anasi‑ka mai one toha na, mai eyehe mai yorotokana,

⁷Mai ati ihi i‑di Bedoro i‑di Yowaho mai‑ya mai kakama,

“Oda bai‑ya dai yoronahi. Dai ati oda mitaboneni. Ebeni‑ke ati kite oni dai hirine, maki‑ya dai nakitamiti?” Mai ati na,

⁸Deoso‑ka Doni ene i‑di Bedoro habo kite, mai‑ya hiyare,

“Oda‑ka hidi dai toha, bote dai toha, dai na, owati dai mitahi.

⁹Oda ene amosa, ka‑kakone‑mata oda kasome, kitame tamine‑ya dai haana,

‘Ebeni‑ke ene maki kitamati?’ Dai ati na awineni.

¹⁰Owati dai mita, Isara·eo‑ka nodi mai nafi owati‑ya mai mitahari na, yama dai watowahaboneni. Yeso Kirisito Nasare‑ke dai ene baakane, Deoso hinakitamemari, fare oni ene maki kitamawahene.

¹¹4:11 Dafi‑ka wayoma 118:22Yobe‑ya mai wa‑wama mai‑nima dai na, yobe‑ka yati amosabote‑ya dai nofara, dai ene yati‑ya mai nanahabamaroni. Deoso‑ka yati‑nima Yeso ne, dai nofare, dai ene mai hinahabe, Deoso ene kitame, Deoso‑ka yobe‑ke yati amosabote tohawahene.

¹²Neme‑ya mai wi‑wina, bofe‑ya mai wi‑wina na, mai ihi tohara, Yeso ohari‑ta ati ai nofa, Deoso‑ka ai tohateni.” Bedoro ati nemarine.

¹³Bedoro, Yowaho mai fama mai habi siitora, mai‑ya mai awa, Bedoro ati‑ya mai mita, mai ibi hiyara,

“Ka! Ai‑ka esikora‑ya mai sawiramaro, hini yamata ihi yama‑ya mai watowaha? Yeso‑ya mai da‑daba tohamaro, yama‑ya mai watowahani.” Mai ati na.

¹⁴Ka‑kakone‑mata kitame, mai yowi‑ya wai‑ya mai awa, mai‑ya mai hiyarami awiramoneni.

¹⁵“Dai tokahi.” Mai ati na,

Bedoro ahiyata‑ya mai toka, mai nowati‑ya mai ibi hiyara,

¹⁶“Ka‑kakone‑mata kitame‑ya Yerosare‑ya mai wi‑wina mai dami awa, Bedoro mai ihi‑nima ai ene ra, mai tamine‑ya keyehe‑ya ai hiriniya, ai ati‑ya mai nofaraboneni. Hini yamata‑nima ai nibati?

¹⁷Yeso tamine‑ya mai one mitarabone, Bedoro mai ai weeniya, mai kakomeheya, Yeso tamine‑ya mai hiyaramaraboneni.” Mai ati namoneni.

¹⁸I‑di Bedoro mai mai haahina, mai kakama,

“Yeso tamine‑ya dai hiyaramarihi! Mai dai kanawatomarihi nahi!” Mai ati na,

¹⁹Mai ati‑ya Bedoro i‑di Yowaho mai mita, mai ati yanana,

“Deoso ati‑nima dai ati ni awirani. Deoso ati oda tokadabarabone dai ati na, dai ati‑ta oda tokadababisabone dai ati na awineni.

²⁰Yama oda awa, ati oda mita ne, tamine oda hiyarabisaboneni.” Bedoro, Yowaho mai fama mai ati na.

²¹Mai ati‑ya mai mita, mai atibodi yama‑ya dika,

“Bedoro mai ati ihi ka‑kakone‑mata kitame‑ya mai dami awa, Deoso‑ya mai kahiyarineni. I‑di Bedoro mai ai kosiniya, ai‑ya mai dami weenaba awineni.” Mai atibodi ati na,

I‑di Bedoro, i‑di Yowaho mai‑ya mai hiyara,

“Yeso tamine dai hiyaramatasiya, dai oda bisinaboneni.” Mai ati na,

mai mai seehikana, hini mai tabori‑ya mai towakamineni.

²²Hibati‑ya ka‑kakone‑mata yakatere, bote tohe, hika faha fowe 40 kana fiyakana, Deoso ene yakanawahemonane.

Yeso‑ka mai habi kitabone, Deoso‑ya mai hiyara

²³Mai mai seehikana mai‑ka no‑nofa mai‑ya mai towakama, Deoso‑ka yama‑bone‑ya mai da‑daa mai‑ka hidi, mai‑ka bote mai toha na, mai ati‑ya Bedoro mai kaminamaroni.

²⁴Mai ati‑ya mai mita, Deoso‑ya mai hiyara,

“Abi Deoso, hini tiwa ene neme‑ya wama, wami‑ya wama, faha‑ya wama, faha abe‑ya wama tinameteni.

²⁵Hibati‑ya ai‑ka idi i‑di Dafi Tiwa‑ya na‑narifa‑ya Tika Doni hiyare, Tiwati‑ya kaminematane,

‘Hini yamata‑bone Bara mai ati hama? Deoso‑ya mai ati bisina, mai ati honita tohabisineni.

²⁶Bofe‑ya mai wi‑wina mai‑ka hidi mai yorotokana, Deoso, Deoso‑ka Ka‑kadika ne‑ya mai ati nabohani.’ Deoso‑ka Doni ati ne, ati‑ya Dafi kanahanomatane.

²⁷Abi Deoso, Dafi ati‑nima ahi‑ya sidadi‑ya ai wi‑wina i‑di Erodi, i‑di Bonisiyo Birato, Bara mai toha, Yodeo mai toha na, Tiwa‑ya na‑narifa i‑di Yeso tikadikemata‑ya mai kaka, mai yorotokana,

²⁸Tiwatomata‑nima mai ihi nawahani. Tika Dao‑ya mai weenabone tinamete, Tika Dao‑ya mai weenawahani.

²⁹Abi Deoso, mai ati timitahi. Tiwa‑ya oda na‑narifa, oda‑ya mai bisinabone mai ati na, tiwati oda kamina, oda tikasomahi, oda habo kitabonehe.

³⁰Tiwa yehe daatite, mai‑ya tinakitamabonehe. Tiwa ene kita‑ya mai awa, tiwa‑ya na‑narifa amosabote i‑di Yeso tamine oda kamina, yama‑ya mai awaramaro, yama‑ya mai awiyahi.” Mai ati namoneni.

³¹Deoso‑ya mai hiyari hawa toha, mai yorotokani‑ke yobe henene, Deoso‑ka Doni mai nafi‑ya sawi ene Deoso ati‑ya mai kamina, mai habi siitonami awiramoneni.

Yeso‑ka mai hinama‑ya yamata‑ya mai ebena

³²Yeso ati‑ya mai no‑nofa mai atibodi fara hinama toha,

“Owa hare oka yama tohi awirini. Ai nafi‑ka yama amani.” Mai nafi ati teni.

³³Ai‑ka Ayo i‑di Yeso kitami tamine‑ya Yeso‑ka yo‑yose mai hiyara, mai ihi kita dama, mai dami‑ya Deoso kasomane.

^34-35Mai‑ka yama kaba tosiyora, yobe‑ya mai kiha, yobe‑ya mai daana, yinero‑ya mai kanika, yinero‑ya mai kakama, i‑di Yeso‑ka yo‑yose mai‑ya yinero‑ya mai daana, yama‑ya mai kihara, mai‑ka yama‑bone‑ya mai kanikateni. Fadara‑ya mai kiha, fadara‑ya mai daana, yinero‑ya mai kanika, Yeso‑ka yo‑yose mai‑ya yinero‑ya mai daanamoneni.

^36-37I‑di Yose hika fadara‑ya daane, yinero‑ya kanike, Yeso‑ka yo‑yose mai‑ya yinero‑ya daanemarine. Refi mai‑ka owa i‑di Yose tohe, tabaro oni Sibe tohe, yara mai‑ka ha‑haa Yose toha, Yeso‑ka yo‑yose mai‑ka ha‑haa Banabe toha, ai ati‑ya ‘Ai‑ya ka‑kasoma’ tohene.

Ananiya fadi‑ya fame keyehe‑ya mai hirina

¹Makobote i‑di Ananiya, fadi i‑di Safira‑ya fame, mai‑ka fadara‑ya mai daanamake, yinero‑ya mai kanika,

²yinero owa‑ya fadi eyehe kemo, i‑di Yeso‑ka yo‑yose mai‑ya yinero owa‑ya i‑di Ananiya daatoname,

“Oda‑ka fadara oda daana, yinero nafi dai kayafahi.” Ananiya ati nane, keyehe‑ya hirineri.

³Ananiya‑ya Bedoro hiyare,

“Ananiya, hini yamata ihi keyehe‑ya hiritina? Satanasi ene Deoso‑ka Doni‑ya keyehe‑ya hiritikana, tika fadara manakone kote tikayaha, keyehe‑ya hiritineni.

⁴Fadara tiwatibodi daahiniya, daatina, sibarihi, tiwatibodi daahira, daatira, sibarihi nani. Daatiniya, yinero tikayaha, tika yinero tohatene. Yinero tiwatibodi daahineya, daatine, sibarihi, tiwatibodi daahire, daatire, sibarihi nane. Hini yamata ihi keyehe‑ya hiritina? Owa‑ya keyehe‑ya hiritikani awirineni. Deoso‑ya keyehe‑ya hiritineni.” Bedoro ati nemonane.

⁵Bedoro ati‑ya i‑di Ananiya mite, abo sone, tamine‑ya mai mita, mai kakomehemoneni.

⁶Yetene mai nahomisa, bora‑ya i‑di Ananiya abo‑ya mai katafa, mai hiwakame, mai hikamane.

⁷Mahi toki yanatone‑ya Ananiya abe, tamine‑ya fadi mitara, mai wini‑kaya tokiyamake.

⁸I‑di Safira‑ya i‑di Bedoro hiyare,

“Tiwati omitaboneni. Fadara i‑di Ananiya daahina, fara manakone nafi amaniraniha?” I‑di Bedoro ati ne.

“Fara manakone nafi amani.” Safira ati na,

⁹“Ka! Hini yamata ihi ai‑ka Hidi‑ka Doni‑ya keyehe‑ya dai hirikana? Tika yibote‑ya mai kama, hibayata nokobi‑kaya mai kobonama, tiwa‑ya mai kamamakeboneni.” Bedoro ati nemonane.

¹⁰Bedoro ati‑ya mita, aba, aboi sona, Safira maki‑ya mai kama, mai kiiyomama, Safira abamake‑ya mai awa, mai hiwakamineni, maki temene fowari‑kaya mai hikamamakebonehe.

¹¹Ananiya abe tamine‑ya Yeso‑ka mai mita, mai habi siitona, Ananiya abe tamine‑ya mai one mita, mai habi siitonahari nineni.

Mai dama mai‑ya Yeso‑ka yo‑yose mai nakitama

¹²Mai kiyana, mai dami‑ya Yeso‑ka yo‑yose mai nakitama, mai ihi‑ya mai one awa, mai habi siitona,

“Haa‑nima ai ene na, ai awaterani.” Mai ati namoneni.

Deoso‑ka yobe kote oni Saromaho tohe‑ya Yeso ati‑ya mai no‑nofa mai yorotokateni.

¹³Yeso ati‑ya mai no‑nofa mai tamine‑ya mai one hiyara, mai ihi amosa tamine‑ya mai hiyara, mai‑ya mai ati dabi nofarani, mai habi siitonaro.

¹⁴Yeso ati‑ya mai no‑nofa mai dodamawaha, mai makidi toha, mai fanawi toha nineni.

¹⁵Bedoro mai ihi tamine‑ya mai mita, mai kiyana, mai‑ya mai kakama, hawi fowari‑ya mai‑ya mai nawiyineni, Bedoro mai‑ya fiyakaneya, korimari mai‑ya boyonebonaha.

¹⁶Yerosare yakari‑ya mai wi‑wina, mai kiyana mai toha, madi towe mai‑ya mai foya mai toha na, mai‑ya mai kakama, Yeso‑ka yo‑yose mai ihi madi towe mai kanana, mai kiyana mai nafi kitamamoneni.

Yeso‑ka yo‑yose mai‑ya mai wata

¹⁷Deoso‑ka yama‑bone‑ya mai da‑daa mai‑ka hidi toha, sadoseo mai toha na, Yeso‑ka yo‑yose mai ihi tamine‑ya mai mita, mai yawa,

¹⁸Yeso‑ka yo‑yose mai‑ya mai waratona, kadeya‑ya mai‑ya mai nafoya,

¹⁹Yama soki‑ya Deoso‑ka yo‑yose tokomaki, kadeya nokobiri‑ya seekane, Yeso‑ka yo‑yose mai fidotona,

²⁰“Deoso‑ka yobe‑ya mai naha, mai dai hiyarabone, dai tokomahi. Yeso ati‑ya mai nofiya, mai manakone ababone, Deoso mai‑ya ati somawamebona tamine dai kaminiyahi.” Deoso‑ka yo‑yose ati nemonane.

²¹Deoso‑ka yo‑yose ati‑ya mai mita, Deoso‑ka yobe‑ya mai tokoma, yama wahabisari‑ya mai tokiyoma, mai‑ya mai kanawatoneni. Deoso‑ka yama‑bone‑ya mai da‑daa mai‑ka hidi toha, hidi‑ka mai one toha na, mai yorotokana, Isara·eo‑ka nodi mai‑ka webote mai dami‑ya mai haana, sodado mai‑ya mai yose,

“Kadeya‑ya Bedoro mai foya, mai dai towamakihi.” Mai ati namoneni.

²²Kadeya‑ya sodado mai towakama, Bedoro mai awira, mai winikanama,

²³Mai‑ka hidi mai‑ya mai hiyara,

“Bedoro mai awirani. Oda tokoma, kadeya barikani kita, nokobi‑ka sodado mai one naha, oda tokiyamake, kadeya dori honita tohani.” Mai ati na.

²⁴Sodado mai ati‑ya mai mita, sodado mai‑ka hidi mai toha, Deoso‑ka yama‑bone‑ya mai da‑daa mai‑ka hidi mai toha na, mai ibi hiyara,

“Ka! Ebeni‑kaya mai tokiti? Hini yamata‑nima yama nibati?” Mai ati na.

²⁵Mai hiyariya, bare kamaki, ati yanane,

“Kadeya‑ya mai dai nafoya, Deoso‑ka yobe‑ya mai‑ya mai kanawata, mai nahani.” Ati ne.

²⁶Ati‑ya sodado mai‑ka hidi mite, hika sodado mai eyehe mai‑ya towamaki,

“Ai ati yawiya, mai dama yati‑ya ai‑ya mai nanahababa awineni.” Sodado mai atibodi ati namoneni.

Yeso‑ka yo‑yose mai‑ya mai kakama

²⁷Yeso‑ka yo‑yose mai‑ya sodado mai kakama, mai‑ka hidi mai yorotokana, mai bai‑ya Yeso‑ka yo‑yose mai naha, Deoso‑ka yama‑bone‑ya mai da‑daa mai‑ka hidi mai‑ya weenawahe,

²⁸“Dai hiyari fawanahi. Yeso tamine dai hiyaramarabone oda ati namaro, dai ati fawarani. Yeso oda nanahabamone dai ati na, dai ati‑ya Yerosare‑ya mai wi‑wina mai nafi mitani.” Deoso‑ka yama‑bone‑ya mai da‑daa mai‑ka hidi ati nemonane.

²⁹Mai ati‑ya Bedoro mai mita, mai ati yanana,

“Dai ati ene oda hiyari maakaraboneni. Deoso ati‑nima oda nibisaboneni.

³⁰Awa‑ya Yeso dai baakane, abe, ai‑ka idi mai‑ka Deoso hinakitamemarine.

³¹Deoso ene Deoso‑ka kanika‑ya hina·itari, itarine, ai nafi‑ka hidi toha, ai manakone‑ya nanahaba toha nane. Isara·eo‑ka hini mai tamine‑ya mai kamina, mai‑ya Deoso ati somawamebonane.

³²Tamine oda hiyare, Deoso‑ka Doni tamine hikaminaharitene. Deoso ati‑ya mai tokadaba, Deoso‑ka Doni mai‑ya sawitene.” Yeso‑ka yo‑yose mai ati namoneni.

³³Yeso‑ka yo‑yose mai ati‑ya mai‑ka hidi mai mita, mai yawi kita,

“Mai ai nanahabahi.” Mai ati namoneni.

³⁴Mai‑ka hidi owa, i‑di Kamari·eo waamisane, mai‑ya hiyarebonaha. I‑di Kamari·eo fariseo tohe, Mose‑ka yama hani ati‑ya ka‑kanawato tohahari, ati‑ya mai dami nofateni.

“Ahi‑kaya mai tokahi, oda ati‑ya mai mitarabonehe. Mai naho bide tohiya, mai kamaboneni.

³⁵Isara·eo‑ka nodi dai toha, dai noko wadahi. Mai‑ya dai ene toha, dai manakone tohahareba awineni.

³⁶I‑di Ti·oda tamine dai mitatekarini.

‘Dai‑ka hidi amosabote ama·oni.’ Ati ne,

ati ene 400 mai kana Ti·oda‑ya mai dabamakitasamone, Ti·oda abe, hika mai hinama tohawama, hini mai tabori‑ya mai yama tonamameteni.

³⁷Makobote ai dama, ai oni‑ya sodado mai kanahanoya, Karireya‑ke owa i‑di Yoda kaki,

‘Dai‑ka hidi‑bone ama·oni. Owa‑ya dai dabahi.’ Ati ne,

mai hidabawahe, i‑di Yoda abe, mai hinama tohawamatasameteni.

³⁸Owati dai mitahi. Hibayata mai dai arabanahi. Ai one ene tohiya, mai ati fawanaboneni.

³⁹Deoso‑ta ene toheya, mai ati fawaraboneni. Deoso‑ya dai weeniya, dai ati kasiraboneni.” Kamari·eo ati ne,

ati‑ya mai nofineni.

⁴⁰Kamari·eo ati‑ya mai mita, Yeso‑ka yo‑yose mai‑ya mai haana, mai kama, mai‑ya mai bisina, mai‑ya mai saatokasa,

“Yeso tamine‑ya dai hiyaramariyahi. Dai tokahi.” Mai ati namoneni.

⁴¹Yeso‑ka yo‑yose mai toka, mai ya‑yaina,

“Yeso‑nima oda nawaha, oda‑ya mai bisinamakineni.” Mai atibodi ati na.

Mai ya‑yainamoneni.

⁴²Mai ati fawara, mahi‑nima Deoso‑ka yobe‑ya Yeso tamine‑ya mai one‑ya mai kanawato, yobe owa‑ya mai toka, Yeso Kirisito tamine‑ya mai kamina namoneni.

Yamata‑ya mai da‑daa‑bone mai 7 kana mai‑ya mai kadika

¹Yeso ati‑ya mai no‑nofa mai dodamawaha, mai fanawi bote honita toha, mai tafe‑bone‑ya mai daateni. Kereko mai ati yawawaha,

“Oda‑ka fana bote mai honita waha‑ka yamata‑bone dai daana bi‑bidi, Yodeo dai‑ka fana bote mai honita waha‑ka yamata‑bone dai daana ba‑basi teni.” Mai ati namoneni.

²Yeso‑ka yo‑yose mai 12 kana, Yeso ati‑ya mai no‑nofa mai dami‑ya mai yorotokanihe, mai‑ya mai hiyara,

“Deoso ati kamini oda maakaniya, yamata oda daaniya, yama ati kasirani.

³Oda‑ka soho dai toha, maki mai 7 kana mai dai kadikahi. Yama‑ya mai wa‑wato mai toha, Deoso‑ka Doni mai‑ya sawi mai toha na, mai dai kadikiya, oda ati ene yamata‑ya mai daanaboneni.

⁴Deoso‑ya oda hiyara, Yeso tamine oda kamina, oda naboneni.” Yeso‑ka yo‑yose mai ati namoneni.

⁵Mai ati‑ya mai mita, mai ya‑yaina, mai 7 kana mai‑ya mai kadika, i‑di Tefaho‑ya mai kadiki dai toha, Tefaho Yeso ati‑ya nofi nafi, Deoso‑ka Doni ati‑nima ene ne, Firibi, Bokoro, Nikano, Timaho, Bamena, Nikorao mai na, mai‑ya mai kadikamoneni. Nikorao Bare tohe, tabaro oni Atioki tohemata, Yodeo mai‑ya sawimari, sawine.

⁶Yeso‑ka yo‑yose mai‑kaya mai mai hiwakama, Yeso‑ka yo‑yose Deoso‑ya mai hiyara, mai‑ya mai yahi foremoneni.

⁷Mai ihi Yeso tamine‑ya mai dami mita, Yerosare‑ya Yeso ati‑ya mai no‑nofa mai dodamamaki, Deoso‑ka yama‑bone‑ya mai da‑daa Yeso ati‑ya mai dami nofa, ati‑ya mai tokadabamoneni.

Tefaho‑ya mai waratona

⁸Yeso ati‑ya i‑di Tefaho nofi nafi, ene kite, ati ene Deoso ene kitabote‑ya mai awa, ati ene mai one kitama, mai teni.

⁹Sireni‑ka mai toha, Aresadiriya‑ka mai toha, Sirisiya‑ka mai toha, Asiya‑ka mai toha, mai na, hibati‑ya mai yaditonamaro mai seekawaha, Yerosare‑ya mai winawaha, Deoso‑ya mai hi‑hiyara‑ke yobe‑ya mai yorotokana, Tefaho ati‑ya mai mita, mai ati yawa, Tefaho‑ya mai weenawahani.

¹⁰Tefaho‑ya mai weena, Tefaho‑ya Deoso‑ka Doni sawi ene yama ba‑basi na‑ya wato, ati ene mai ati fawanani.

¹¹Mai ati fawana, mai one‑ya mai toka, mai ati ihi Tefaho tamine‑ya keyehe‑ya mai hirina,

“Tefaho ati oda mite, ati amosarene. Mose‑ka yama hani tamine‑ya Tefaho keyehe‑ya hiri, Deoso tamine‑ya keyehe‑ya hiri ne, ati kasiro nafine.” Mai ati namoneni.

¹²Tefaho tamine‑ya mai ati dama, mai ati ihi bote mai toha, Mose‑ka yama hani ati‑ya mai ka‑kamina mai toha, mai one toha na, mai ati yawawaha, i‑di Tefaho‑ya mai tonaka, Tefaho‑ya mai waratona, mai‑ka hidi tabaro‑ya mai hiwakamane.

¹³Mai‑ka hidi tabaro‑ya mai kobona, mai ati ihi i‑di Tefaho tamine‑mona‑ya keyehe‑ya mai one hirina,

“I‑di Mose‑ka yama hani‑ya Tefaho keyehe‑ya hiri, Deoso‑ka yobe tamine‑ya keyehe‑ya hiri ne, ati dame, ati oda mitene.” Mai ati namoneni.

¹⁴“Yeso Nasare‑kaya kakimari tamine‑ya Tefaho hiyare, ati oda mite, Deoso‑ka yobe‑ya Yeso nanahabebona, ati ene Mose ati bare tohawahebona ati nene.” Mai ati namoneni.

¹⁵Mai‑ka hidi Tefaho‑ya mai kiina, Deoso‑ka yo‑yose noko‑nima Tefaho noko ne‑ya mai nafi awamoneni.

Tefaho mai‑ya hiyare

¹“Tefaho, mai ati‑nima tiwati nineni?” Deoso‑ka yama‑bone‑ya mai da‑daa mai‑ka hidi ati ne,

²Tefaho mai‑ya hiyare,

“Okoyo dai toha, okobi dai toha na, owati dai mitahi. Hibati‑ya ai nafi‑ka idi i‑di Abaraho Mesobotamiya‑ya wine, Hara‑ya toki awisareya, Deoso amosabote ati‑ya mitematane.

³‘Abaraho, tiwa tabaro tiwini‑kaya tiwinamariyahi. Tika mai‑ta mai winahi, tiwa tabaro yati‑bone‑ya tiwa yofi·okanaboneni.’ Deoso ati nematane.

⁴Kaodeya‑ya wine, yanane, Hara‑ya toke, wine‑ya badi abe, yananamatase, Deoso ene ai wini‑kaya winawahane.

⁵Hibati‑ya ai tabaro‑bone‑ya Abaraho kobone, mai one tabori tohameteni. Abaraho‑ka tabora toharihi, bidi wadarihi neya, Deoso ati‑ya mite,

‘Abaraho, mai tabori nafi tikayahaboneni. Ti·abiya, tika dao mai hikayahamakeboneni.

⁶Tika nodi mai one tabori‑ya mai tokaboneni. Mai one‑ya mai narifi‑ya yama manakone‑ya mai kayafaraboneni. Hiniya mai mai kosihina, faha fowe 400 kana‑ya mai‑ya mai narifaboneni.

⁷Mai‑ya mai na‑narifa, makobote mai ihi okadikiya, mai manakone daa·onaboneni. Owa ene mai‑ya mai narifamarabone, ahi‑kaya mai kama, owa‑ya mai kahiyarawahaboneni.

⁸Abaraho, tika mai sowiri tati atori wisitinakosa, madehe wada amoni 8 kaniya, mai sowiri tati atori wisitinakosa tinahi.’ Deoso ati nematane.

Makobote i‑di Abaraho bidi i‑di Isaki wade, amoni 8 kane, sowiri tati ataro wisihinakose, i‑di Isaki bidi i‑di Yako wadamaki, I‑di Yako bidi mai 12 kana ai‑ka idi mai‑bone mai wadamaki na, mai sowiri tati atori‑ya mai wisinameteni.

⁹I‑di Yako bidi mai‑ka soho i‑di Yose‑ya mai kaka, yara mai‑ya sori‑ya mai daana, Eyito‑kaya i‑di Yose‑ya yara mai towakama, Deoso i‑di Yose‑ya kasomabisematane.

¹⁰Eyito‑ya kobone, makobote kadeya‑ya foye, Deoso hikasome, yama‑ya Yose wato ene Eyito mai‑ka hidi webote i‑di Yose‑ya nofe, ati ene Eyito mai‑ka hidi bidi i‑di Yose tohawahe, hidi webote‑ka yama‑ya nawadematane.

¹¹Eyito, Kanaha na‑ya faha kakira, ai‑ka idi mai tabori‑kaya yamata yanara, ai‑ka idi mai fimemeteni.

¹²Eyito‑ya yamata toha, tamine‑ya i‑di Yako mite, ai‑ka idi mai‑ya yosene, mai tafe‑bone‑ya mai kanikabonehe.

¹³Mai tafe tosiyotasa, Eyito‑ya mai tokomatasa, Eyito mai‑ka hidi bi‑bidi ne mai‑ka soho i‑di Yose tohe‑ya mai watowahineni. Eyito mai‑ka hidi webote‑ya i‑di Yose anidi mai‑ya yofikanematane.

¹⁴I‑di Yose badi kamebona tamine‑ya anidi‑ya hiyare,

‘Okobi eyehe dai kamahi. Okobi‑ka mai toha na, dai kamiyahi.’ Yose ati ne,

ati ene 75 mai kana Eyito‑ya mai tokameteni.

¹⁵Eyito‑ya i‑di Yako toke, Eyito‑ya abe, makobote Eyito‑ya ai‑ka idi mai abamaki nameteni.

¹⁶Mai aba, Sikemi‑ya mai‑ya mai towakama, Abaraho temene‑ya mai‑ya mai kamamaki, Hamo bidi mai tabori i‑di Abaraho hikanikamete, fara‑ya ai‑ka idi mai kamameteni.

¹⁷‘Tabora bara‑ya mai wini nafiya, mai owakamatasaboneni.’ Abaraho‑ya Deoso hiyare ati nemata.

Eyito‑ya mai amoni tosiyo yanana, mai dodamawaha,

¹⁸Eyito‑ke mai‑ka hidi webote abe, hidi bare tohawahe, Yose tamine‑ya watore,

¹⁹Ai‑ka idi mai‑ya nofare, mai‑ya kosine, mai‑ka madehe wada yati‑ya hidi ati ene mai tonahomakosameteni, mai ababonehe.

²⁰Fara‑ya i‑di Mose wade, Deoso noko‑ke amosi ba‑basi ne, abariko fama abariko owa ohari ne‑ya badi tabaro‑ya forine, mai hikahemori, Mose ati wadawahe, ke‑kemoma daani awire,

²¹Mose madi hiwake, homeya, Fara·o bide wase, hikayahamatane, hinayanebonaha.

²²Yama‑ya Eyito‑ka mai wata, Mose‑ya mai kanawata, mai ati‑ya wato ba‑basi, ene kiti ba‑basi nematane.

²³Mose‑ka faha fowe 40 kaniya, hika mai one Isara·eo‑ka nodi mai toha, mai‑ya awebona atibodi ati ne.

²⁴I‑di Mose toke, Isara·eo‑ke owa‑ya Eyito‑ke owa kosine‑ya awe, Isara·eo‑ke owa‑ya kasomebona, Eyito‑ke owa manakone‑ya daane, hinahabane.

²⁵‘Deoso ene mai nafi okasomiya, mai owakamabone, yama‑ya oka mai wata awini.’ I‑di Mose atibodi ati ne,

mai‑ya towakamebona‑ya mai wato awirameteni.

²⁶Mahi owa‑ya i‑di Mose tokomatase, Isara·eo‑ka mai fama, mai ibi weena, mai‑ya i‑di Mose awe,

‘Isara·eo‑ka dai fama, hini yamata ihi dai ibi wee?’ I‑di Mose ati ne,

²⁷hini owa‑ya weene, i‑di Mose‑ya fatatowiti, ati yanane,

‘Oda‑ka hidi tiwa‑mone tina awineni? Oda‑ka hidi amatira amatini. Oda ene tikadikariyahi.

²⁸Mahi owa‑ya Eyito‑ke owa tinahaba, owa tinahabamakebone tina awineni.’ Isara·eo‑ke owa ati nematane, i‑di Mose‑ya weeneri.

²⁹Ati ene Mose habo siitone, kanane, Midiya‑ka mai tabori‑ya tokawahe, mai tabori‑ya wineya, bidi mai fama mai wada,

³⁰makobote ano 40 tohamakiya, Sinai adami yakari‑ya Mose toke, tabora awiri‑kaya awa bide hirina‑ya Deoso‑ka yo‑yose‑ya awematane.

³¹Yama‑ya awe, awatokane, ahiyata‑ya yama‑ya awebona, Deoso ati‑ya mitawahe,

³²‘Tika idi i‑di Abaraho, i‑di Isaki, i‑di Yako, mai na, mai‑ka Deoso ama·oni.’ Ati ne.

Ati‑ya Mose mite, habo siitone, wawawakane, awa hirina‑kaya kiinawamarematane.

³³‘Mose, oka wami‑ya tiwaa, tika sabata tanitikanisahi. Oka wami amani.

³⁴‘Eyito‑ya oka mai wina, mai mai kosihina mai oawa, mai baki moni omita, mai see·okanabone, bofe‑ya okisama, Eyito‑ya tiwa oyoseboneni.’ Deoso ati nematane.

³⁵Hibati‑ya Mose‑ya Isara·eo‑ka nodi mai nofara,

‘Oda‑ka hidi tihara, oda ene tikadikariyahi!’ Mai ati namete.

Fare Deoso ati ene mai‑ka hidi tohawahebonane. Deoso‑ka yo‑yose awa hirini‑kaya i‑di Mose awe, ati ene Isara·eo‑ka nodi mai‑ya i‑di Mose kasomebona mai‑ya seekanebonane.

³⁶Eyito‑ya mai wi‑wina i‑di Mose ene‑ya mai awa, Mose‑ka mai‑ya Eyito‑ka mai saatokasa, Mose mai‑ya towakame, faha Mawa‑ya i‑di Mose ene kite‑ya mai awa, faha fowe 40 kana‑ya mai yakana, ene kite mai hiawa hinematane.

³⁷Isara·eo‑ka nodi mai‑ya i‑di Mose hiyare,

‘Deoso ene dai‑ka soho owa Deoso ati‑ya mi‑mita‑bona, owa‑nima nebonane.’ Mose ati nematane.

³⁸Tabora awiri‑ya i‑di Mose mai yorotokana, Deoso‑ka yo‑yose ati‑ya mai mitameteni. Sinai adami‑ya i‑di Mose tokomorose, Deoso‑ka yo‑yose ati himitemata, ati ai nofa, ai abarabone, ati hikanahanomata, ati ai fawaniterebonaha.

³⁹Mose ati‑ya ai‑ka idi mai tokadabara, Eyito‑ya mai atibodi winitonamameteni.

⁴⁰I‑di Mose Anidi i‑di Araho‑ya mai toka,

‘Araho, ai‑ka deoso‑ba wamatinahi, ai‑ya yofikanebonaha. I‑di Mose ai‑ka hawi‑ya yo‑yofikana fawane, abe awane.’ Mai ati na.

⁴¹Oro wamani bowi bidi‑nima na‑ya mai wamanineni, mai‑ka deoso bonaha. Hini mai ihi mai ya‑yaina,

‘Bowi bidi amosabote amane.’ Mai ati na,

Bani nawade‑ya mai nanahabineni, mai‑ka deoso oro wamani‑ka bani bonaha.

⁴²Amowa mai‑ya mai kahiyara na, hini mai ihi Deoso mai‑ya kahabanematane. Deoso ati‑ya mi‑mita‑mata mai tamine‑ya kanahano,

‘Ano 40 kana‑ya tabora awiri‑kaya Isara·eo‑ka nodi mai yakana, bani mai dai nanahaba, Deoso‑ka bani‑ba dai daanini? Deoso‑ka bani‑ba dai daani awirameteni.

⁴³Dai‑ka deoso bare mai dai wamana, owa oni Moroki toha, owa Hefa amowa‑nima ne toha ne, fara mai‑ya dai kahiyarabisateni. Dai ene amosara dai‑ya mai towakamaboneni, Babironi‑kaya mai‑ka yama anini dai aninabonehe.’ Deoso ati ne, Deoso ati‑ya mi‑mita mai kanahanameteni.

⁴⁴Tabora awiri‑ya ai‑ka idi mai yakana, Deoso‑ka yobe‑ya mai towakameteni. Yobe‑bona‑ya Deoso yofikane,

‘Haa‑nima oka yobe neba wamatinahi.’ Deoso ati ne,

ati‑nima i‑di Mose ne yobe‑ya wamanematane.

⁴⁵Ai‑ka idi mai‑ya i‑di Yosowe dabe, Deoso‑ka yobe‑ya mai kakama, Deoso ati ene Bara mai‑ya mai bisina, mai‑ka tabora‑ya mai kayafawaha, mai amoni dami‑ya Dafi mai‑ka hidi tohawaheya, Deoso‑ka yobe bote tohasa nematane.

⁴⁶I‑di Dafi‑ya Deoso nofi nafi, Deoso‑ya Dafi haane,

‘Yako‑ka Deoso amatini. Tika yobe yati‑bona wamani onofineni.’ Dafi ati nematane.

⁴⁷Dafi bidi i‑di Saromaho‑ta Deoso‑ka yobe‑ya wamanibisematane.

⁴⁸Yobe ai wamane‑ya Deoso kitabote winaterene. Deoso ati‑ya mi‑mita‑mata ati ne,

⁴⁹‘Neme‑ya oka i‑itari toha, bofe‑ya owa teme kawateni. Hini yamata‑bone oka yobe‑bona‑ya dai wamani boneti, hasi·obonekaro?

⁵⁰Yama nafi wama·onamaroni.’ Deoso ati nematane.

⁵¹Dai eme kita, dai atibodi kita na, Deoso‑ka Doni ati dai nofateraba awineni. Dai‑ka idi mai‑nima dai nineni, dai narabo hawiraro.

⁵²Deoso ati‑ya mai mi‑mita mai nafi‑ya dai‑ka idi mai bisinamete,

‘Deoso‑ka owa amosabote kamebonane.’ Mai ati na,

mai‑ya dai‑ka idi mai nanahabameteni. Fare kame, dai kahabane, dai ati ene mai hinahabene.

⁵³Deoso‑ka yo‑yose Deoso ati‑ya mai kaminamete, Deoso ati‑ya dai tokadabarineni.” Tefaho ati nematane.

Tefaho abane

⁵⁴Tefaho ati‑ya mai mita, mai yawi kita, mai nafi ini kawakosa,

⁵⁵Tefaho Deoso‑ka Doni fai‑ya kibe, neme‑ya tonokomise, Deoso wehene‑ya awe, Deoso‑ka kanika‑ya Yeso waari‑ya awe,

⁵⁶“Dai awahi. Neme hawi tohawaha, Deoso‑ka kanika‑ya okoyo i‑di Yeso waari‑ya oawawahineni.” Tefaho ati nemonane.

⁵⁷Mai narabi‑ya mai barikaneni, Tefaho ati‑ya mai mitarabonehe. Mai yawa, mai ati kita, Tefaho‑ya mai wata kanibote na,

⁵⁸tabora awiri‑kaya Tefaho‑ya mai horoni towaka, yati‑ya Tefaho‑ya mai baana, mai hinahabe, yati‑ya mai werenisa, i‑di Saoro yetene teme‑kaya mai‑ka bora‑ya mai nawiyineni.

⁵⁹Tefaho yati‑ya mai hibaane, hiyare,

“Ayo Yeso, tiwa tabaro‑ya owa korimari tiwakamahi.” Ati nane.

⁶⁰Yobati‑kaya ite,

“Ayo, owa‑ya mai nanahaba, mai‑ya tiwati somawamahi.” Ati ne, ati kite,

Ati fawane, abawahematane.

Yeso‑ka mai‑ya Saoro kakowahe

¹Tefaho abe‑ya i‑di Saoro awe, ya‑yaine. Yerosare‑ya mai wi‑wina Yeso ati‑ya mai no‑nofa mai‑ya mai bisinawaha, mai ihi tabora bide‑kaya mai tokawaha, Yodeya‑kaya mai one toka, Samariya‑kaya mai one toka na, Yeso‑ka yo‑yose mai‑ta mai kanani awirani.

²Deoso ati‑ya mai no‑nofa Tefaho abo‑ya mai kama, mai ohinadineni.

³I‑di Saoro yawe, Yeso ati‑ya mai no‑nofa mai‑ya kako, mai nafi‑ka yobe‑ya toke, mai makidi, mai fanawi na‑ya waratone, mai horokani tokomane, kadeya‑ya mai mookanabonehe.

Deoso ati‑ya Firibi kaminane Samariya‑ya

⁴Tabora bide‑ya mai toka, Yeso ati‑ya mai kaminamoneni.

⁵Samariya‑kaya i‑di Firibi toke, Kirisito tamine‑ya mai‑ya hiyarane.

⁶Firibi ati‑ya mai dama mai mita, ene kite mai hiawa, ati mai atibodi hikadika hine,

⁷Madi towe mai‑ya mai foya, Firibi ati ene mai eekana mai toka, mai one kiyana, mai kitama, mai one ka‑kakona‑maro, Firibi ati ene mai yakanawaha nani.

⁸Firibi ene mai ya‑yaini nafineni, Samariya‑karo.

Simaho inawa

⁹Simaho Samariya‑kaya wi‑wina,

“Inawa oha, oka yama kitateni.” Ati ne.

Ati‑ya mai mita, ene kite mai hiawa hine, mai awatokana,

¹⁰Yinero‑ya mai kihara mai toha, yinero nafi‑ya mai kiha mai toha na, Simaho ati‑ya mai nafi nofa, ene mai hiawa hine,

“Deoso kitabote ene‑nima ene nane.” Mai ati nineni.

¹¹Mai amoni damiya, Simaho‑ka yama ihi‑mone‑ya mai awa, ati mai hikadabatene.

¹²Yeso tamine Deoso ai nafi‑ka hidi‑bona tamine ne‑ya Firibi kamine, ati‑ya mai mita, mai makidi mai fanawi na, Yeso ati‑ya mai nofawaha, Firibi mai‑ya habanirisawahane.

¹³Makobote i‑di Simaho, Yeso ati‑ya nofawahe, i‑di Firibi habahinirise, i‑di Firibi‑ya sawiwahe, i‑di Firibi ene‑ya awe,

“Ka!” Ati ne,

awatokawahemonane.

¹⁴Yerosare‑kaya Yeso‑ka yo‑yose mai wina, Samariya‑kaya mai wi‑wina Deoso ati‑ya mai nofawahamone, mai tamine‑ya Yeso‑ka yo‑yose mai mita, Bedoro, Yowaho mai fama, mai‑ya mai yose,

“Samariya‑ya mai wi‑wina mai dai tonakahi!” Mai ati na,

¹⁵Samariya‑ya mai kobokana, Deoso‑ya mai hiyara,

“Abi Deoso, Tika Doni mai‑ya sawiyaho.” Mai ati namoneni.

¹⁶Yeso ati‑ya mai nofa, Yeso‑ka mai toha, mai‑ya Firibi habanirise, Deoso‑ka Doni mai‑ya sawi awisare, Deoso‑ya mai tamine‑ya Bedoro mai hiyaramoneni.

¹⁷Mai‑ya mai yahi fore, Deoso‑ka Doni mai‑ya sawiwahemonane.

¹⁸Mai‑ya Yeso‑ka yo‑yose mai yahi fore, mai ihi Deoso‑ka Doni mai‑ya sawiwahe‑ya Simaho awe, yinero‑ya mai‑ya daanebona ati ne,

¹⁹“Bedoro, Yowaho dai ene‑nima owa ene nabone, owa dai kanawatoya, dai‑ka yinero‑ba daa·onabani. Mai‑ya owa yehe foriya, Deoso‑ka Doni mai‑ya sawibonane.” Simaho ati ne.

²⁰Ati‑ya Bedoro mite, ati yanane,

“Yama Deoso‑ka da‑daa tikanikabone tina, tiwati ihi ti·aba, tika yinero aba nebonane. Deoso‑ka yama daahinaya, yinero‑ya ai kanikaterani.

²¹Haa‑nima tiwa ene teraboneni. Deoso‑ya tiwatibodi amosi awisarani.

²²Deoso‑ya tiwatibodi ati amosara tamine tikamini bahiya, tiwa‑ya ati somawameba awane.

²³Tiwatibodi bida toha, tiwa ene amosara tiwa‑ya yaditoneni.” Bedoro ati ne.

²⁴“Ai‑ka Ayo‑ya owa tamine dai hiyarahi, dai ati‑nima yama na owa‑ya koborabonehe.” Simaho ati nemonane.

²⁵I‑di Bedoro i‑di Yowaho mai fama, Deoso Ati Amosabote‑ya mai kamini hawa toha, Yerosare‑kaya mai towakamatasa, hawi‑ya mai yakakana, Samaritano mai tabori‑ya mai kobokana, Yeso tamine‑ya mai kaminineni.

Eti·obi‑ke owa‑ya Firibi hiyarane

²⁶Deoso‑ka yo‑yose i‑di Firibi‑ya hiyare,

“Bato‑kaya tikamakihi. Yerosare‑ka hawi‑ya Kasa‑ka hawi waana‑ya tikamakiyahi.” Deoso‑ka yo‑yose ati ne.

Kasa‑ka hawi‑ya mai winaterani.

²⁷Firibi toke, Kasa‑ka hawi‑ya yakaneya, Eti·obi‑ke hidi‑ka yinero‑ya na‑nawada kakamaki‑ya awane. Eti·obi‑ke hidi fana Kadasi toha, Kadasi‑ka yinero‑ya maki na‑nawade‑bona ene dene noko mai hinahabemata. Deoso ati‑ya nofe, hibati‑ya Yerosare‑ya toke, Deoso‑ya hiyare, hiyari hawa tohe, tabora‑ya winitoname, tokomane.

²⁸Kafaro ho‑horokana‑ya itari, Isa·iya‑ka yama hani‑ya kadike,

²⁹“Firibi, kafaro ho‑horokana yakari‑ya yakatinahi.” Deoso‑ka Doni ati ne,

³⁰Firibi kanani tokomaki, Isa·iya‑ka yama hani‑ya maki kadike, ati‑ya mite,

“Yama hani tikadika tiwatoneni?” Firibi ati ne.

³¹“Yama hani owato awirini. Owa‑ya mai kanawatora, yama owatoterani. Owa tikanawataba, tikamisahi. Owa yowi‑ya tiwitarihi.” Yinero‑ya na‑nawada ati ne.

³²Deoso‑ka yama hani ati hikadika eya ati na,

‘Kaneiro mai mai hinahababone, mai‑ya mai towakama, mai‑nima mai hiwakamane. Kaneiro bidi mai kone mai seohina, mai ati yanara, mai‑nima mai hinahabe, ati yanarene.

³³Ene amose, noko mai firohine, hidi hikasomare, bidi wadare tamine ai hiyarariyahi. Mai hinahabane.’ Deoso‑ka yama hani ati nineni.

³⁴Firibi‑ya hiyare,

“Ebeni‑ke tamine‑ya yama hani hiyara? Isa·iya hini tamine‑ya kanahano, bare tamine toha nabaya? Yama owato awirini.” Yinero‑ya na‑nawada ati ne.

³⁵“Yeso tamine‑ya Isa·iya kanahanomatane.” Firibi ati ne,

Yeso Ati Amosabote nafi‑ya kaminamakine.

³⁶Kafaro mai‑ya horokane, mai ibi hi‑hiyara tosina, wara widi‑ya mai kobokana,

“A‑ahi‑ya faha ita‑ya owa habatinirisakaribana?” Yinero‑ya na‑nawada ati ne.

³⁷“Yeso ati nafi tinofiya, tiwa haba·onirisabani.” Firibi ati ne.

“Deoso Bidi i‑di Yeso Kirisito ati onofawahani.” Ati ne.

³⁸Ati ene kafaro maatowiti, mai towakifawaha, Firibi habahinirisemonane.

³⁹Mai kakamorosama, Deoso‑ka Doni i‑di Firibi‑ya towakame, Firibi‑ya awamare, kafaro ho‑horokana‑ya foyame, ya‑yaine. Hini tabaro‑ya tokomematane.

⁴⁰Deoso‑ka Doni ene Asoto‑ya Firibi kobone, yananamatase, hini tabaro Sesareya‑ya tokome, Sesareya‑ka hawi‑ya mai kobohine, Yeso Ati Amosabote‑ya mai‑ya hiyare, tokome, hini tabaro‑ya kobotonamemonane.

Yeso ati‑ya Saoro nofawahe

¹I‑di Saoro, Yeso ati‑ya mai no‑nofa, mai‑ya ati nanahabe, Deoso‑ka yama‑bone‑ya mai da‑daa mai‑ka hidi‑ya toke,

²“Damaso‑ya Deoso‑ya mai hi‑hiyara‑ke yobe hidi mai‑ka yama hani‑ba owa‑ya daatinahi.

‘Yeso hawine‑ya mai ya‑yaka mai dai daanahi i‑di Saoro‑ya.’ Tika yama hani ati nahi.

Damaso‑ya owakamiya, mai hikadikiya, Yeso hawine‑ya mai ya‑yaka mai makidi mai fanawi toha na, mai wara·oniya, mai soki·oniya, Yerosare‑kaya mai owakamabani.” Saoro ati nemonane.

³Yama hani‑ya waratone, Damaso‑ya toke, Damaso‑ka hawi bai‑ya yakane, neme‑ya yama wahi kita, fai‑ya kobona,

⁴Yama wahi kita ihi sone, yama wahi‑ya ati kaki,

“Saoro, Saoro hini yamata‑ba owa‑ya bisitiniti?” Ati ne,

⁵“Ayo, eme tiwa oni niti?” Saoro ati ne,

“Yeso ama·oni, owa bisitinaro.” Ati ne.

⁶Saoro wawawakane,

“Hini yamata‑nima ona‑ba ama·oniti?” Saoro ati ne,

“Tiwaamisamiya, Damaso‑kaya tikahi. Tiwa‑ya mai hiyariya, yama tiwatowahaboneni.” Yeso ati nemonane.

⁷Saoro‑ya mai sawe, ati mai himite, abano mai hiaware, mai ati yanaramoneni.

⁸I‑di Saoro waamisame, noko weetokane, yama‑ya awami awire, yehe mai damahine, mai hiwakamane Damaso‑kaya.

⁹Damaso‑kaya amoni 3 tohe, yama‑ya awi awisare, tafarihi, faha‑ya fawarihi nemonane.

¹⁰Damaso‑ya Ananiya wine, Deoso ati‑ya nofe, wada‑nima yama na‑ya Yeso ati‑ya mite,

“Ananiya.” Yeso ati ne,

“Ayo, fara ama·oni.” Ananiya ati ne,

¹¹“Hawi oni Hetekana toha‑ya Yoda‑ka yobe waari‑ya i‑di Saoro Taso‑ke wine, haatiyahi. Hibayata Deoso‑ya Saoro hiyarane.

¹²I‑di Saoro wada‑nima yama na‑ya awe, maki oni Ananiya tohe, koboneya awane. Wada‑ya Saoro tati‑ya yehe fori, yama‑ya awawahebonaha.” Yeso ati nane.

¹³“Ayo Yeso, Saoro tamine omitani. Yerosare‑ya tika mai dami‑ya i‑di Saoro ene amosarene.

¹⁴Damaso‑ya kamaki, tika yama‑bone‑ya mai da‑daa mai‑ka hidi‑ka yama hani ihi, tiwati‑ya oda no‑nofa oda‑ya wateya, Yerosare‑kaya oda‑ya towakamebonane.” Ananiya ati ne.

¹⁵“Tikamakihi. Saoro okadike, oka yama‑ya a‑ani tohawahebonane. Bara mai toha, Bara mai‑ka hidi mai toha, Isara·eo‑ka nodi mai toha na, mai‑ya owa tamine‑ya hiyarebonane.

¹⁶Owa tamine hiyari ene, mai bisihineya, yama bisini kome‑ya watowahebonane.” Yeso ati nane.

¹⁷Ananiya toke, Yoda‑ka yobe‑ya tokiyome, Saoro‑ya yehe fori,

“Soho Saoro, Yeso owa‑ya yosene, hawi‑ya yakatina, tiawemona, fare owa‑ya yose, yama‑ya tiawamatasabone, Deoso‑ka Doni tiwa‑ya sawiwahebonane.” Ananiya ati nemonane.

¹⁸Saoro‑ya Ananiya yehe fori, aba ataro‑nima yama na, fai noko‑ka sona, ihi noko amosawame, Saoro waamise, i‑di Ananiya habahinirisawahane.

¹⁹I‑di Saoro tafawahe, kitamatase, amoni fa‑famaraba ne‑ya, Damaso‑ya Yeso ati‑ya mai no‑nofa mai‑ya sawiwahe.

Yeso tamine‑ya Saoro kaminawahe

²⁰Deoso‑ya mai hi‑hiyara‑ke yobe‑ya i‑di Saoro Yeso tamine‑ya hiyare,

“I‑di Yeso, Deoso Bidi amane.” Ati ne.

²¹Saoro ati‑ya mai mita, mai ibi hiyara,

“Ka! Yerosare‑ya Yeso ati‑ya mai no‑nofa mai‑ya Saoro nanahabe, ahi‑ya kamaki, mai‑ya wateya, Deoso‑ka yama‑bone‑ya mai da‑daa mai‑ka hidi mai‑ya mai‑ya towakamebona ati ne, fare amanaraniha?” Mai ati na,

²²mahi‑nima Saoro kiti tonafi mai‑ya hiyare,

“Owati dai mita, Deoso‑ka Ka‑kadika i‑di Yeso tohe, dai watowahebonane.” Ati ne,

Ati‑ya Yodeo mai mita, mai ati fawanamoneni.

²³Makobote Yodeo mai yorotokana mai ibi hiyara,

“Saoro ai nanahabahi.” Mai ati namoneni.

²⁴Damaso‑ka tabora barikana‑ka nokobi‑kaya i‑di Saoro‑ya mai nimanineni, mai hinahabebonaha. Mai tamine Saoro mite,

²⁵I‑di Saoro‑ya mai daba, yama soki‑ya Saoro‑ya mai towaka, Damaso‑ka awayara nemehe hodi‑ya hisiri‑ya mai hikanakise, tabora one‑kaya tokawahemonane.

Yerosare‑ya Saoro toke

²⁶Makobote Yerosare‑ya toke, Yeso‑ka mai‑ya sibanane, mai‑ya dabawahebonaha. Saoro tamine‑ya mai mita, mai kakomehe.

“Yeso ati‑ya nofe‑mona keyehe‑ya hirine awane.” Mai atibodi ati namoneni.

²⁷Saoro‑ya i‑di Banabe towakamane, Yeso‑ka yo‑yose mai‑ya yofikanebonaha.

“Hibati‑ya Damaso hawi‑ya, ai‑ka Ayo‑ya Saoro awe, ati himita hine, Damaso‑ya Yeso tamine‑ya mai‑ya hiyarane.” Banabe ati nemonane.

²⁸Banabe ati ene, mai‑ya sawiwahe, Yerosare‑ya Yeso tamine‑ya kamine habo siitoremonane.

²⁹Yodeo mai one, Kereko mai ati‑nima mai ati na, mai‑ya Yeso tamine‑ya hiyare ene mai ati yawa, fai‑ya mai ati nanahabamoneni.

³⁰Mai tamine‑ya Yeso ati‑ya mai no‑nofa mai mita, Sesareya‑kaya mai hiwakame, hini tabaro‑ya tokomebona mai hiyose,

“Taso‑ya tikamahi.” Mai ati namoneni.

³¹Yodeya, Karireya, Samariya na‑ya, mai wi‑wina mai‑ya mai bisinami awira. Yeso ati‑ya mai no‑nofa mai dodamawahani. Deoso‑ka Doni mai‑ya kasome, Deoso ati‑ya mai tokadabamoneni.

Ene·asi, Tabita na, mai kitama

³²Mai tabori dami‑ya Bedoro toke, sidadi oni Rida toha‑ya kobone, Yeso ati‑ya mai no‑nofa mai‑ya hiyarane.

³³Rida‑ya ka‑kakone wine, oni i‑di Ene·asi tohe, faha fowe 8 kana‑ya yakare‑ya, i‑di Bedoro awe,

³⁴“Ene·asi, Yeso Kirisito tiwa‑ya nakitamane, tiwaamisamiya, tika fo‑fori tinamosahi.” Bedoro ati ne,

Ene·asi waamisame,

³⁵Rida‑ya mai wi‑wina, Sarona‑ya mai wi‑wina, mai na, Ene·asi kitame‑ya mai awa, Yeso ati‑ya mai nofawahamoneni.

³⁶Yabe‑ya Tabita wina, oni one i‑di Doka toha, Yeso ati‑ya nofa, yama‑ya mai kihara, mai dami‑ya kasomateni.

³⁷I‑di Tabita kiyana, abamakineni. Aboi mai sokohina, yobe nemehe‑ya mai hinaforineni.

³⁸Rida‑ya Bedoro wine, tamine‑ya mai mita, mai fama mai‑ya mai yose,

“Yama yakari‑ya Bedoro wine, dai towamaki, dai dabama kanibote nayaho.” Mai ati namoneni.

³⁹Bedoro eyehe mai kama, yobe nemehe‑ya mai tokomisama, mai fanawi honita toha, hibati‑ya mai‑ka yobote mai abamaro, mai‑ya Tabita ka‑kasoma, abawaha, tabiyo mai ohina, mai naha,

“Bedoro, oda‑ka bora i‑di Doka wamahinamaro, tiawahi.” Mai ati na.

⁴⁰Bedoro mai‑ya yose,

“Dai tokomahi.” Ati ne.

Mai toka, mai nowati‑ya Bedoro yobati‑kaya itarise, Deoso‑ya hiyare, hiyari hawa tohe, Tabita‑ya haane,

“Tabita, tiwaamisamahi!” Ati ne,

Tabita noki weetokana, Bedoro‑ya awa, itarimisamamoneni.

⁴¹Bedoro Tabita yahi‑ya waratone, Tabita‑ya nawaamisame, mai fanawi honita‑ya haa, Yeso ati‑ya mai no‑nofa mai‑ya haa ne, mai kamake,

“Tabita kitama, dai awahi.” Ati nemonane.

⁴²Yabe‑ya mai wi‑wina, Tabita kitama tamine‑ya mai mita, Yeso ati‑ya mai dami nofawahineni.

⁴³Yabe‑ya Bedoro wine, amoni dame‑ya bani ataro‑ya wa‑wama‑ka yobe‑ya winane. Bani ataro‑ya wa‑wama oni i‑di Simaho tohane.

Koneriyo Tamine

¹Sesareya‑ya i‑di Koneriyo winane, Itari·ano mai‑ka sodado mai‑ka hidi toheri,

²Deoso ati‑ya i‑di Koneriyo hika mai eyehe nofe, Deoso‑ya hiyaratene. Yama‑ya mai kihara mai‑ka yama‑bone‑ya daatene.

³Mahi towitawiti‑ya wada‑nima yama na‑ya Deoso‑ka yo‑yose‑ya Koneriyo awe,

“Koneriyo,” Deoso‑ka yo‑yose ati ne,

⁴Deoso‑ka yo‑yose‑ya awe, habo siitone,

“Ayo, hini yamata‑ya tiwati koboniti?” Koneriyo ati ne.

“Deoso tiwati‑ya mite, tiwa yehe honene mai‑ya daatina, tiwa‑ya awatene, tiwa‑ya nofe, ati somane.

⁵Yabe‑ka mai tabori‑ya tika mai tiyosehi, i‑di Simaho Bedoro‑ya mai kakamabonehe.

⁶Maa widi‑ya bani ataro‑ya wa‑wama, i‑di Simaho wine, Simaho‑ka yobe‑ya Simaho Bedoro wine, mai hiwakameya, ati dai mitebonane.” Deoso‑ka yo‑yose ati nemonane.

⁷Deoso‑ka yo‑yose tokomeya, Koneriyo hika yo‑yose mai fama mai‑ya haa, sodado ohari‑ya haa ne, mai kakiya, mai‑ya yosebonane. Deoso ati‑ya sodado nofe, Koneriyo‑ka yama‑ya anitene.

⁸Deoso‑ka yo‑yose ati‑ya mai‑ya kaminane. Yabe‑ya mai‑ya yosene, Bedoro‑ya mai tonakabonehe.

Bedoro neme‑ya yama kisa‑ya awe

⁹Mahi owa nokorise‑ya Yabe yakari‑ya mai yakaniya, Simaho‑ka yobe tati mese‑ya i‑di Bedoro tokomisane, Deoso‑ya hiyarebonaha.

¹⁰Bedoro fimi, tafebona, tefe‑bona mai hawahiniya, wada‑nima yama na‑ya awane.

¹¹Neme seekana‑ya yama kisa‑ya awemonane. Neme‑ya, bora ibe webote‑nima yama na kisa‑ya awe, bora ibe fowari‑ya ai 4 kana damana‑nima yama na, kisa, bofe‑ya kawitamoneni.

¹²Bora dori‑ya yama‑ka bani mai dama mai toha, bani mai afe wada mai toha, maka mai toha namoneni.

¹³Neme‑ya ati kaki, ati i‑di Bedoro himite,

“Bedoro, tiwaamisiya, bani tinahabiya, bani tikabahi.” Ati ne,

¹⁴“Ayo, bani haa‑nima mai na, mai okobaterani. Bani towe mai kabaterani.” Bedoro ati ne.

¹⁵Neme‑ya ati kakitase,

“Yama kababone Deoso hina, kabi towe amani dai ati riyahi,” Ati nemonane.

¹⁶Hibati‑ya yama hiawa‑ya awamatase, hika yama awi 3 tohiya, bora ibe‑nima yama na, neme‑ya tokomisamawahani.

¹⁷Bedoro hini‑ya hiyare,

“Hini yamata‑nima yama na‑ba amaniti?” Bedoro atibodi ati ne.

Atibodi yama‑ya dikeya, Koneriyo‑ka mai kobona, Simaho‑ka yobe‑ya mai sibana, yobe nokobiri‑ya mai naha,

¹⁸Nokobi‑ya mai haana,

“Simaho Bedoro wine awane?” Mai ati na.

¹⁹Bedoro atibodi yama‑ya dikeya, Deoso‑ka Doni ati yanane,

“Owati timitahi. Maki mai fama owa oharine tiwa‑ya mai sibanani.

²⁰Tikisamiya, mai‑ya tisawiyahi. Tiwa eme kitahi. Owati ihi mai kakineni.” Deoso‑ka Doni ati ne.

²¹Bedoro kisame,

“Fara owa dai sibana, fara ama·oni. Hini yamata‑ya dai ati koboniti?” Bedoro ati ne.

²²“Sodado mai‑ka hidi i‑di Koneriyo oda‑ya yosene. I‑di Koneriyo amosabote amane. Deoso ati‑ya nofe, Yodeo mai nafi hinofatene. Mahi owa‑ya Deoso‑ka yo‑yose‑ya awe, tiwa‑ya haanebona, tiwati‑ya mitebona Deoso‑ka yo‑yose ati nemonane.” Mai ati na.

²³“Sibarini, ahi‑ya dai amoniya, ai bosatonamabani.” Bedoro ati ne.

Mai amona, Bedoro mai‑ya tosawime, Yabe‑ka mai one Yeso ati‑ya mai no‑nofa, Bedoro‑ya mai one daba,

²⁴mai amoni oharimaki‑ya Sesareya‑ya mai kobona, Koneriyo hika mai eyehe mai‑ya nimanemonane.

²⁵Bedoro‑ya Koneriyo awe, yobati‑kaya ite, moinise, Bedoro‑ya kahiyarane.

²⁶Koneriyo mano‑ya Bedoro waratone,

“Tiwaamisamahi. Fara tiwa‑nima ona, ama·oni.” Bedoro ati ne.

²⁷Mai yakana, mai ibi hi‑hiyara tosina, mai tokiyoma, mai dami yorotokana, mai‑ya Bedoro awe,

²⁸“Yama‑ya dai wata awineni. Bara mai tabori‑ya Yodeo oda toha, oda tokaterani. Bara mai tabori‑ya oda toka,

‘Towe dai amani.’ Mai ati teni.

Deoso owa‑ya kanawatowahe, mai nafi sibarani. Mai‑ya oda daba, oda sibarineni, oda towe toharani.

²⁹Hini yamata‑ba owa‑ya dai haaniti? Owa‑ya mai idikebone mai kama, mai‑ya wee·ora, Deoso ati ene mai‑ya sawi kanibote onani.” Bedoro ati ne.

³⁰Ati‑ya mite, Koneriyo hiyare,

“Hibati‑ya owa amoni 4 toha, oka yobe doro‑ya Deoso‑ya ohiyarani. Mahi towitawiti‑ya, ai owa bora sawa‑ya weyene wai, wehene kite, owa‑ya hiyare,

³¹‘Koneriyo, tiwati‑ya Deoso mite, tiwa yehe honene daatina‑ya awane.

³²Yabe‑ya maa widi‑ya bani ataro‑ya wa‑wama, i‑di Simaho wine, Simaho‑ka yobe‑ya Simaho Bedoro wine, tinakamakiho.’ Bora sawa‑ya weyene ati ne.

³³Fare ati ene tiwa haa·onani. Tiwa ene sibarini. Oda yorotokana, tiwati oda mitaboneni. Hini yamata‑nima Deoso ati nati?” Koneriyo ati nane.

Bedoro mai‑ya hiyare

³⁴Bedoro mai‑ya hiyarawahe,

“Ka! Deoso noko‑ka fara ai nafi hinama toha owatowahani.

³⁵Tabora dami‑kaya Deoso ati‑ya mai nofa, Deoso ati‑nima mai na, mai‑ya Deoso ati somawamatene.

³⁶Hibati‑ya Deoso Bidi‑ya yosene, Isara·eo‑ka nodi mai‑ya Ati Amosabote hikaminebonaha. Yeso Kirisito ati‑ya mai nofa, Deoso mai‑ya ati somawamebonane. Fare‑nima Yeso Kirisito ati dai nofa, Deoso dai‑ya ati somawamaharibonane.

³⁷Yodeya‑ka yama tamine dai mitatekarini? Hibati‑ya i‑di Yowaho Batita mai‑ya habanirise, makobote Karireya‑kaya yama yanana, tamine dai mitahare awineni.

³⁸Yeso Nasare‑ke tamine dai mite awane. Deoso ene Deoso‑ka Doni Yeso‑ya sawi, mai tabori dami‑ya toke, ene amose, kite, madi mai‑ya mai foya, Yeso ene madi mai kanana, mai kiyanamaro, mai kitamawahani.

³⁹Yerosare, Yodeya na‑ya Yeso ene oda awa, awa‑ya mai baahikane, abe, oda awa nemarine.

⁴⁰Amoni fama, amoni owa ohari ne‑ya Deoso hinakitame. Kitami oda awemarine.

⁴¹Mai nafi hiawi awire, oda‑ya Deoso kadikemata tamine oda kaminebona, oda‑ta oda awemarine. Hibati‑ya oda‑ka da‑daba, kitami oda awemarine. Oda eyehe tafe, faha‑ya fawa nemarine.

⁴²Oda‑ya hiyare,

‘Owa tamine mai‑ya dai hiyarahi. Owati‑ya mai nofiya, sibaraboneni. Mai hasina mai toha, mai abamete mai toha, mai na, Deoso ene mai ihi okadikaboneni.’ Ati nemarine.

⁴³Hibati‑ya Deoso ati‑ya mai mi‑mita‑mete Yeso tamine‑ya mai kanahanameteni. Ati mai hinofeya, Deoso mai‑ya ati somawamebona mai ati nameteni.” Bedoro ati nemonane.

Bara mai‑ya Deoso‑ka Doni sawi

⁴⁴Bedoro mai‑ya hiyare, ati‑ya mai mita, Deoso‑ka Doni mai‑ya sawiwahane.

⁴⁵Bedoro‑ya mai sawe, mai ibi hiyara,

“Ka! Deoso‑ka Doni Bara mai‑ya sawine. Bara mai‑ya Deoso‑ka Doni sawiterebona oda atibodi ati nani.” Mai ati namoneni.

⁴⁶Homano mai toha, mai ati one‑ya Deoso‑ya mai kahiyara, mai ati‑ya Yodeo mai mita, Bedoro ati yanane,

⁴⁷“Deoso‑ka Doni ai‑ya sawi, mai‑ya sawine. Mai ai habanirisahi.

‘Ai‑ya Yodeo mai ati bari awiraboneni.’ Owatibodi ati nineni.” Bedoro ati nemonane.

⁴⁸Bedoro ati ene Yeso ati‑ya mai no‑nofa mai‑ya mai habanirisawahani. Bedoro‑ya Koneriyo mai haana,

“Oda tabaro‑ya tiwa amoni fa‑famaraba nahi.” Mai ati namoneni.

Yerosare‑ka Yeso ati‑ya mai nofa mai‑ya Bedoro hiyare

¹Yodeya‑ya Yeso ati‑ya mai nofa mai toha, Yeso‑ka yo‑yose mai toha na, Yeso ati‑ya Bara mai nofawaha tamine‑ya mai mitineni.

²Yerosare‑ya Bedoro koboneya,

“Mai sowiri tati ataro‑ya mai wisinakosi awiriya Deoso‑ka mai tohaterani.” Mai ati toha, Bedoro‑ya mai weenamoneni.

³“Bedoro, mai sowiri tati ataro‑ya mai wisinakosi awiriya mai tabori‑ya ai tafaterani. Tiwa‑ta mai tabori‑ya titafani. Tiwa ene towe tohani.” Mai ati namoneni.

⁴Bedoro mai‑ya hiyare,

“Bara mai tabori‑ya oki‑ka, owa tamine dai mitahi.

⁵Yabe‑ya owina, Deoso‑ya ohiyara, Deoso ene wada‑nima yama na oawa, neme‑ya bora ibe webote‑nima yama na kisa, bora ibe fowari‑ya mai 4 kana mai damana kisa‑nima yama na owa yakari‑ya maanisa,

⁶Owakatoma, bani tabora‑ka mai toha, bani yama‑ka mai toha, bani mai afe wada mai toha, maka mai toha na, mai oawani.

⁷Neme‑ya ati kaki, ati omite,

‘Bedoro, tiwaamisiya, mai tinahabiya, mai tikabiyahi.’ Ati ne.

⁸‘Ayo, haa‑nima yama na okobaraboneni. Bani towe yama bisa toha‑nima mai na okobaterani.’ Ona.

⁹Neme‑ya ati kakitase,

‘Yama Deoso hinamosi hawa hiha, —Bisa tohani.— Tiriyahi.’ Ati ne.

¹⁰Neme‑ya bani mai oawi 3 toha, neme‑ya bora ibe tokomisama, oawami awirani.

¹¹Neme‑ya yama tokomisami hawa tohiya, Koneriyo tabaro Sesareya‑ka mai 3 toha, mai kobona, I‑di Simaho tabaro‑ya osawe, owa‑ya mai sibanani.

¹²Deoso‑ka Doni owa‑ya yose,

‘Mai‑ya tisawimahi. Mai oyoseni.’ Deoso‑ka Doni ati ne.

Ati ene mai‑ya osawima, ai‑ka mai 6 toha, owa‑ya mai sawe, Koneriyo‑ka yobe‑ya oda tokiyomaroni.

¹³Deoso‑ka yo‑yose‑ya i‑di Koneriyo awe, Deoso‑ka yo‑yose ati‑ya mite,

‘Yabe‑ya tika yo‑yose mai tiyosehi, Simaho Bedoro‑ya mai kakamaba.

¹⁴Bedoro ati dai nofiyahi. Tiwa, tika mai toha na, dai‑ya Deoso ati somawamebonane.’ Deoso‑ka yo‑yose ati nemona, Koneriyo ati ne.

¹⁵Mai ohiyara, mai‑ya Deoso‑ka Doni kobone, mai‑ya sawi, hibati‑ya ai‑ya kobone, ai‑ya sawi‑nima i‑di Koneriyo mai‑ya sawiwahene.

¹⁶Ai‑ka Ayo ati‑ya owati kadamowama,

‘Faha‑ya Yowaho mai‑ya habanirisemari. Makobote Deoso‑ka Doni dai‑ya sawiwahebonane.’ Ai‑ka Ayo ati ne.

¹⁷Ai‑ka Ayo Yeso Kirisito ati ai nofawahamaro, Deoso‑ka Doni ai‑ya sawi, fare mai‑ya sawiwahene. Deoso mai‑ya ati sawine, hini yama‑nima obati?” Bedoro ati ne.

¹⁸Bedoro ati‑ya mai mita, fai‑ya mai weenami awirani.

“Deoso amosabote amane, ai‑nima mai nawaha, Deoso‑ya mai tamine‑ya Bara mai kamina, mai‑ya Deoso ati somawamebonane. Mai abateraboneni.” Mai ati namoneni.

Atioki‑kaya Yeso ati‑ya mai nofawaha

¹⁹Hibati‑ya Tefaho‑ya mai nanahabiya, Yeso ati‑ya mai no‑nofa tabora dami‑ya mai toka, Fenisiya‑ya mai one toka, Sibe‑ya mai one toka, Atioki‑ya mai one toka na, Yodeo mai‑ya Yeso tamine‑ya mai hiyara, Bara mai‑ya mai hiyari awira,

²⁰Sibe‑ka mai toha, Sireni‑ka mai toha na, Atioki‑ya mai toka, Bara mai‑ya ai‑ka Ayo Yeso tamine‑ya mai hiyarawaha,

²¹Bara mai‑ya Yeso tamine‑ya mai hiyara, ai‑ka Ayo mai‑ya kasome, Yeso ati‑ya mai dami nofawaha,

²²Yerosare‑ka mai toha Yeso ati‑ya mai no‑nofa Bara mai tamine‑ya mai mita, i‑di Banabe‑ya mai yosemoneni, Atioki‑ya tokebonaha.

²³Atioki‑ya kobone, mai‑ya awe, ya‑yaine,

“Deoso mai‑ya kasomane.” Atibodi ati ne.

“Ai‑ka Ayo i‑di Yeso ati‑nima dai nahi, dai nafi.” Ati nemonane.

²⁴Banabe ene amose, Deoso‑ka Doni fai‑ya sawi, Deoso ati‑ya nofi nafi, ati ene Yeso ati‑ya mai dami nofawahamoneni.

²⁵Makobote Taso‑ya tokane, i‑di Saoro‑ya dodimakibonaha.

²⁶Saoro‑ya wasi, Atioki‑ya Saoro‑ya kakame, Yeso ati‑ya mai no‑nofa faha fowe ohare‑ya mai‑ya mai daba, mai‑ya mai kanawata, Kirisito‑ka mai amani, mai ati nawawahamoneni, Atioki‑ya.

²⁷Yerosare‑ka mai one Deoso ati‑ya mai mi‑mita, Atioki‑ya mai tokawaha,

²⁸Deoso ati‑ya mai mi‑mita mai‑ka owa oni i‑di Akabo tohe, waamise, Deoso‑ka Doni ene mai‑ya hiyare,

“Ai amoni damariya, bofe nafi‑ya faha kakiriya, yamata yanariya, mai dami fimeboneni.” Akabo ati nemonane.

Makobote mai‑ka hidi i‑di Karaodio toheya, i‑di Akabo ati‑nima yama nawaha,

²⁹Yeso ati‑ya mai no‑nofa mai ibi hiyara,

“Yodeya‑ya mai wi‑wina mai tafe wadara. Mai‑ka yinero‑ba ai daanahi. Mai tafe‑ba‑ya mai kanikibakaro.” Mai ati namoneni.

³⁰Mai‑ka yinero‑ya mai yorotokani wama, i‑di Banabe, i‑di Saoro mai fama, yinero‑ya mai towakama, Yeso ati‑ya mai no‑nofa mai‑ka bote mai‑ya yinero‑ya mai daanamoneni.

Tiyako‑ya Erodi nanahabe, Bedoro‑ya kadeya‑ya nawaane

¹Fara‑ya mai‑ka hidi i‑di Erodi ati ene Yeso‑ka mai one‑ya sodado mai waratoneni, mai‑ya mai nanahababonehe,

²Yowaho anidi i‑di Tiyako namidi‑ya mai tiinakosineni.

³Mai marina, baho femeto kihara‑ya mai kaba, Tiyako abi tamine‑ya Yodeo mai mita, mai ya‑yaina, mai ya‑yaini‑ya Erodi awe, Bedoro‑ya waratonane.

⁴Kadeya‑ya hinafoye, ati ene sodado mai 16 kana Bedoro‑ya mai nawadaboneni. Marina hawa tohiya, Yodeo mai‑ya daahinebonaha.

⁵Kadeya‑ya i‑di Bedoro waiya sodado mai dabineni, tokarebonaha. Yeso‑ka mai Bedoro tamine‑ya mai hiyari nafineni, Deoso‑ya.

⁶“Yodeo mai‑ya Bedoro daa·onaminaboneni.” Erodi atibodi ati ne.

Koheti fama‑ya mai yadihine, yama soki‑ya sodado mai fama mai bai‑ya Bedoro amone, nokobi kowani‑kaya sodado mai one yoronineni.

⁷Kadeya dori‑ya i‑di Bedoro amoneya, Deoso‑ka yo‑yose kobone ene kadeya dori‑ya yama wahi kita, Deoso‑ka yo‑yose Bedoro fowari‑ya wai, fai‑ya mowakanebona, fai‑ya boyone,

“Bedoro, waamisa kanibote tinahi.” Deoso‑ka yo‑yose ati ne.

Bedoro waamise, koheti hini‑ya kasoneni.

⁸“Tika bora bodi‑ka sakotinama, tika sanidariya tikawatama, tika bora mese‑ka weyetinama tiniya, owa‑ya tisawiyahi.” Deoso‑ka yo‑yose ati ne.

Ati‑nima Bedoro nane.

⁹Deoso‑ka yo‑yose‑ya i‑di Bedoro tosawime,

“Wada amanikani.” Atibodi ati nemonane.

¹⁰Nokobi‑ya Sodado wai‑ya mai fiyakana, nokobi one‑ya sodado owa wai‑ya mai fiyakana na, nokobi feho wamani‑ya mai kobokana, nokobi feho hini‑ya seekana, mai towakama, hawi ohare‑ya mai fiyakaniya, Deoso‑ka yo‑yose toke, Bedoro ohari waane.

¹¹Bedoro yama‑ya watowame, hini‑ya hiyare,

“Se! Yodeo mai‑ya Erodi owa‑ya daanaminebona ati ne, Deoso‑ka yo‑yose owa‑ya seekane, Yodeo owa‑ya mai ihi tohabone mai ati na, Deoso‑ka yo‑yose owa‑ya kasomene, owa‑ya mai watarabonehe.” Bedoro atibodi ati nemonane.

¹²Yama‑ya Bedoro atibodi watowame, Yowaho Maroko madi i‑di Mariya‑ka yobe‑ya tokome, Mariya‑ka yobe‑ya Yeso‑ka mai yorotokana, Deoso‑ya Bedoro tamine‑ya mai hiyara,

¹³Bedoro nokobi‑ya baane, moni‑ya mai mita, Mariya‑ka yo‑yose i‑di Hode nokobi‑ya seekanabone tokoma,

¹⁴Bedoro ati‑ya Hode mita, ya‑yaina, nokobi‑ya seekara, hiniya kanani winitonama, mai‑ya haana,

“Nokobi‑ya Bedoro ati waine.” Ati na.

¹⁵“Ka‑kana tineni.” Mai ati na.

“Ka‑kana oni awirini. Bedoro nokobi‑ya ati waine.” Hode ati na.

“Se! Bedoro korimari tohe awane.” Mai ati na.

¹⁶Mai hiyariya, nokobi‑ya Bedoro baanamatase, nokobi‑ya mai seekana, Bedoro‑ya mai awa, mai habi siitona,

¹⁷Bedoro yehe‑ya mai‑ya ati barine, mai‑ya hiyarawahe, kadeya‑ya wai Deoso hikasome, hini tamine‑ya kamine, i‑di Tiyako toha, Yeso ati‑ya mai no‑nofa mai one‑ya mai hikaminamakebone ati ne, tabora bara‑kaya tokane.

¹⁸Yama wahabisari‑ya Bedoro amone tabaro‑ya sodado mai awa, mai habi siitona,

“Ka! Hini yamata‑nima yama naba? Bedoro ebeni‑kaya tokati?” Mai ibi hiyara mai ati namoneni.

¹⁹Bedoro‑ya sodado mai kakamabone Erodi ati ne, Bedoro fawane tamine‑ya Erodi mite, yawe, mai tabori dami‑ya Bedoro‑ya sibane, Bedoro‑ya wasire, sodado Bedoro‑ya mai nawada mai‑ya nanahabane. Makobote Sesareya‑ya Erodi toke, winawahemonane.

Erodi abawahane

²⁰Tiro‑ya mai wi‑wina Sidoho‑ya mai wi‑wina mai na, i‑di Erodi mai‑ya ati yawe, Erodi ati tamine‑ya mai mita, Sesareya‑ya mai tokineni, Erodi‑ya mai hiyarabonehe. Erodi‑ka yo‑yose i‑di Rasito mai‑ya nofe‑ya mai hiyara,

“Rasito, tiwati ihi oda‑ya i‑di Erodi ati somawamaho. Oda‑ya ati somawami awireya, oda‑ka yamata‑ba‑ya daareba awane.” Mai ati namoneni.

²¹Mahi owa‑ya Erodi mai‑ya hiyarebona, bora amosabote‑ya weyene, kadera amosa‑ya itari, mai‑ya hiyaremonane.

²²Erodi ati‑ya mai mita,

“Maki ati tohi awire, deoso ati amane.” Mai ati na, mai ati kitamoneni.

²³“Hehe, deoso‑nima ona ama·oni.” Erodi atibodi ati ne.

Deoso yokana‑ya Erodi kahiyari awire, hini‑ya kahiyarabise, Deoso‑ka yo‑yose ene toha kanibote ne, Erodi‑ya yo‑yori mai kaba, abawahane.

²⁴Yeso ati‑ya mai no‑nofa mai tabori dami‑ya mai toka, Deoso ati‑ya mai kamina, mai ati ihi Yeso ati‑ya mai dami nofawahamoneni.

²⁵Yerosare‑ya mai‑ka yama anini hawa tohiya, Banabe, Saoro mai fama Atioki‑ya mai towakama, mai‑ya Yowaho Maroko dabemonane.

Banabe, Saoro mai fama mai‑ya mai yose

¹Atioki‑ya Deoso ati‑ya mai mi‑mita mai toha, Yeso ati‑ya mai ka‑kanawato mai toha na, mai wina, i‑di Banabe toha, Simiyaho so‑sokine toha, Rosiyo Sireni‑ke toha, Manaeni Erodi mai yanikimamete mai toha, Saoro toha nane.

²Deoso‑ya mai kahiyara mahi ohari‑ya mai tafarani, Deoso‑ya mai hiyari oharebonehe. Deoso‑ya mai hiyariya, Deoso‑ka Doni mai‑ya hiyarawahe,

“I‑di Banabe i‑di Saoro mai fama mai yoronahi. Oka mai toha, mai oyoseboneni, oka yama ani‑ya mai aninabonehe.” Ati nemonane.

³Deoso‑ka Doni ati ene mahi owa‑ya mai tafara, i‑di Banabe i‑di Saoro mai‑ya mai yahi fore, mai‑ya mai yosemoneni.

Banabe, Saoro Sibe‑ya Deoso ati‑ya mai kamina

⁴Deoso‑ka Doni ati ene Serosiya‑ya mai toka, Serosiya‑ya maboro‑ya mai foya, faha teberi‑ya mai towaka, faha teberi oni Sibe tohateni.

⁵Sibe‑ka sidadi one Saramina toha‑ya mai kobona, Yodeo mai hi‑hiyara‑ke yobe‑ya mai tokiyoma, Deoso ati‑ya mai hiyarineni. Yowaho Maroko mai‑ya dabane, mai‑ya kasomebonaha.

⁶Sibe‑ka tabora dama‑ya mai yakana, sidadi one oni Bafo‑ya mai kobona, Bafo‑ya i‑di Bayeso‑ya mai awa, Bayeso Yodeo mai‑ka inawa tohe, Deoso ati‑ya mi‑mita‑mona ati ne, keyehe‑ya hi‑hiri amane. Bayeso oni fame, oni owa Erima tohane.

⁷Mai‑ka hidi i‑di Seoso Baoro‑ya i‑di Erima sawitene. Seoso Baoro yama‑ya wato ba‑basi nemona, Banabe, Saoro mai fama mai‑ya Seoso Baoro haanemonane, Deoso tamine‑ya mitebonaha.

⁸Banabe mai ati‑ya Inawa i‑di Erima nofare,

“Seoso Baoro, mai ati tinofariyahi.” Erima ati nemonane.

⁹I‑di Saoro oni owa Baoro tohe, Deoso‑ka Doni fai‑ya sawi ene, i‑di Erima‑ya kakatome ati yanane,

¹⁰“Satanasi bidi amatini. Yama amosa‑ya tinofara. Yama towe‑ya tinofa, towe amatini, keyehe‑ya hiritinaro. Deoso hawine amose tohe, hawi bara‑ya mai tiyoseriyahi.

¹¹Oda‑ka Hidi yehe kite ene mahi wehene tiawamaraboneni. Tiwa amoni dami‑ya tiwa noko amosawamaboneni.” Baoro ati ne.

Ati fawaneya, Erima yama‑ya awamare, yama soki‑nima noko ne, mai‑ya haane,

“Owa yehe dai damaniya, hawi‑ya owa dai yofikanahi.” Ati nemonane.

¹²Baoro ene‑ya mai‑ka hidi i‑di Seoso Baoro awe, Yeso ati‑ya nofawahe,

“Deoso ene sibabisarane.” Ati nemonane.

Bisidiya‑ka Atioki‑ya mai kobona

¹³Bafo‑ya maboro‑ya Baoro mai foya, Banafiriya sidadi oni Beki toha‑ya, Yowaho Maroko maaname, Yerosare‑kaya winitonamemonane.

¹⁴Beki‑ya mai fiyakana, Bisidiya‑ka Atioki‑ya mai kobokana, Sabado‑ya Yodeo mai hi‑hiyara‑ke yobe‑ya mai towakiyoma, mai demenarineni.

¹⁵Mose‑ka yama hani‑ya yobe hidi kadike, Deoso ati‑ya mai mi‑mita‑mete mai‑ka yama hani‑ya kadikamaki ne, yama hani kadiki‑ya hawa tohe, Baoro mai‑ya haane,

“Ayo, mai dai ati hiyariya, mai dai hiyarahi. Dai ati ene mai ya‑yainaboneni.” Yobe hidi ati ne.

¹⁶Baoro waamise, yehe mai‑ya ati barine,

“Yodeo dai toha, Deoso ati dai nofa, dai na, owati dai mitahi.

¹⁷Hibati‑ya Isara·eo‑ka nodi mai‑ya Deoso kayafe, mai tabori yokana awisara, Eyito‑ya mai wina, mai‑ya kayafane. Eyito‑ya Deoso ene mai dodama, Eyito mai‑ka hidi mai‑ya seekani nofare, Eyito‑ka mai‑ya Deoso ene kite tohe, nowati‑ya mai‑ya seekane,

¹⁸tabora awiri‑kaya faha fowe 40 kana‑ya mai yakana, Deoso mai‑ya sawi, ati‑ya mai tokadabara, mai‑ya kasomanasa ne,

¹⁹Kanaha‑ya mai wi‑wina tohamete, mai‑ka hidi mai 7 kana toha, Deoso ene mai mai hinahaba, mai tabori‑ya ai‑ka idi mai kayafamete, fara mai tabori ai kayafawahameteni.

²⁰Faha fowe 450 tohiya, mai one‑ya Deoso kadike, mai ihi‑ya kadikebonaha. Makobote Deoso ati‑ya mi‑mita‑mata i‑di Samo·eo mai ihi‑ya kadike.

²¹I‑di Samo·eo bote toheya, mai‑ka hidi webote‑bona‑ya mai haaneni. Mai ati‑ya Deoso mite, Besami‑ka nodi i‑di Kisi bidi i‑di Saoro‑ya Deoso kadike, mai‑ka hidi webote tohawahe, faha fowe 40 kana mai‑ka hidi webote tohematane.

²²I‑di Saoro‑ya Deoso nofamare, i‑di Dafi mai‑ka hidi webote tohawahebonane.

‘Dafi onofabisa, i‑di Yese bidi ene ya‑yai·ona, hini owati‑nima nebonane.’ Deoso ati nematane.

²³Dafi‑ka nodi i‑di Yeso tohe, Deoso ati ene ai nafi manakone‑ya Yeso nanahabane. Hibati‑ya Deoso ati yananemata ati‑nima yama nawahani.

²⁴Yeso kamaki awisareya, Isara·eo‑ka nodi mai dami‑ya Yowaho Batita hiyare,

‘Deoso ati dai nofaramaro, Deoso‑ya dai‑ya dai kaminiya, dai haba·onirisaboneni.’ Ati nemonane.

²⁵Yowaho ati fawani yanatoneya, mai‑ya hiyare,

‘Deoso‑ka Ka‑kadika oha‑mone dai ati na awineni. Deoso‑ka Ka‑kadika ohi awirini. Owa nowati‑kaya ai owa kamaki, amosabotebisa amane. Hika sanidariya madone‑ya kakasawa amosi ba‑basi ne, owa‑ta owa amosi bi‑bidi nibisa ama·oni.’ Yowaho ati nemonane.

²⁶Soho, Abaraho‑ka nodi dai toha, Deoso ati dai no‑nofa, dai na, ai manakone‑ya Deoso‑ka Ka‑kadika nanahabebona tamine‑ya Deoso ati‑ya mai mi‑mita‑mete mai kanahanameteni.

²⁷Deoso ati‑ya mai mi‑mita yama hani mai hikanahanamete‑ya Sabado‑ya mai kadikateni. Yerosare‑ya mai wi‑wina mai‑ka hidi mai toha na, yama‑ya mai kadika, yama hani ati‑ya mai watoramaro, yama hani ati‑nima Deoso‑ka Ka‑kadika‑ya mai nanahaba,

²⁸Yeso towe tohi awire, amosabise, hiniya Birato hinahabebonaya, mai kahabana,

²⁹yama hani ati‑mete‑nima mai na, hawa tohe, awa‑ya waane‑ya mai idibasa, yati hodi‑ya mai hinafoye,

³⁰abe Deoso hinakitamemonane.

³¹Yeso kitame‑ya mai awarima na, hika da‑daba mai hiawa, Karireya‑ya mai sawemaro mai hiawa, Yerosare‑ya mai eyehe kameya, mai awa na, mai dami‑ya tamine mai hiyarawahane.

³²Ai‑ka idi mai‑ya Deoso Ati Amosabote‑ya hiyaremata, fare Ati Amosabote dai‑ya oda kaminineni.

³³Ai‑ka idi mai‑ya hiyare, ati‑mata‑nima yama na, ai awawaha, Yeso‑ya Deoso nakitamebona ati nemata, fare hinakitamawahene. Yeso tamine‑ya Deoso kamine, ati‑ya Dafi kanahanomata,

‘Oka dao amatini. Hibayata tiwa oka dao oneni.’ Deoso ati nematane.

³⁴Fare hinakitame, abamaterebona, bataterebona,

‘Dafi okasomamaro, tiwa okasomahareboneni.’ Deoso ati ne.

³⁵Dafi‑ka yama hani one ati,

‘Oka Ka‑kadika bataterebonane.’ Deoso ati ne.

³⁶Owati dai mitamakihi. Hibati‑ya Deoso ati‑ya Dafi nofe, bote toheya, abo batematane.

³⁷Yeso‑ta Deoso hinakitame, bataterene.

³⁸Soho, yama dai watomakihi. Yeso ene Deoso ai‑ya ati somawamatene.

³⁹Yeso ati ai nofa, ai‑ya Deoso ati somawamatene. Mose‑ka yama hani ati ihi ai‑ya Deoso ati somawamare, Yeso ati ai nofa‑ta Deoso ai‑ya ati somawamatene.

⁴⁰Dai noko wadahi. Deoso ati‑ya mai mi‑mita‑mete mai ati‑ya mai tokadabara mai‑ya yama towe kobonameteni. Fara mai ati dai nofara yama towe dai‑ya kobonahareboneni.

⁴¹Dai habo kita, Deoso ati dai mitahi.

‘Owati‑ya mai mita owa ene‑ya mai awa, tiwa‑ya mai kamina, mai ati dai nofaraboneni. Mai ati dai nofara, dai habo siitona, dai abawahaboneni.’ Deoso ati nematane.” Baoro ati nemonane.

⁴²Mai tokabone, Baoro‑ya mai hiyara,

“Sabado one‑ya tiwati oda mitamatasaboneni.” Mai ati namoneni.

⁴³Mai toka, mai nowati‑ya Baoro mai‑ya mai one dabamake, Yodeo mai one toha, Bara mai one toha na, Baoro mai‑ya mai dabamake, mai‑ya Baoro mai hiyara,

“Deoso ati‑ya dai ati kadamowamariyahi. Deoso ati amose dai nofahi.” Baoro, Banabe mai ati namoneni.

⁴⁴Sabado one‑ya mai dama mai yorotokanineni, Deoso ati tamine‑ya mai mitabonehe.

⁴⁵Mai dama, mai‑ya Yodeo mai awa, mai ati yawawaha,

“Baoro keyehe‑ya hirine. Deoso ati‑ya kamini awire, Satanasi ati‑ya kaminabisane.” Mai ati namoneni, mai yawaro.

⁴⁶Baoro, Banabe, mai fama mai ati fawani awira,

“Yodeo dai toha, Deoso ati ene dai oda hiyari baha, dai ati a‑arira, Deoso ati dai nofara, Deoso tabaro‑ya dai wini awirabone, dai abi ohareboneni. Dai ati ene Bara mai‑ya oda tokiya, mai oda hiyarawahaboneni.

⁴⁷Deoso oda‑ya hiyare, ati oda mite,

‘Bara mai‑ya dai toka, mai‑ka yama wahi‑nima dai naboneni. Mai manakone‑ya Yeso nanahabe tamine mai watowahabone, mai tabori dami‑ya dai ati‑ya mai nofiya, owa tabaro‑ya mai winamakeboneni.’ Deoso ati nemarine.” Baoro ati nemonane.

⁴⁸Baoro ati‑ya Bara mai mita, mai ya‑yaina, Deoso ati‑ya mai kahiyara, Deoso mai‑ya kadikemata, Yeso ati‑ya mai nofawahani.

⁴⁹Tabora dami‑ka Yeso tamine‑ya mai nafi mitawaha,

⁵⁰Yodeo mai ati ihi sidadi‑ka hidi fana mai toha, hidi makidi mai toha na, mai ati yawa, mai ihi mai nafi ati yawa, mai ihi tabora bara‑kaya Baoro, Banabe mai towakawahani.

⁵¹Baoro mai tame mekori‑ya mai nanahaba,

“Oda teme mekori oda nanahabi‑nima dai abawahaboneni, Deoso ati dai nofararo.” Mai ati na.

Ikoniyo‑ya mai towakawahamoneni.

⁵²Yeso ati‑ya mai no‑nofa, Deoso‑ka Doni mai‑ya sawi ene mai ya‑yainamoneni.

Ikoniyo‑ya mai kobokana

¹Ikoniyo‑ya Baoro mai kobokana, Yodeo mai hi‑hiyara‑ke yobe‑ya mai towakiyoma, mai‑ya mai hiyara, mai ati ihi Yeso ati‑ya mai dama mai nofawahamoneni. Yodeo mai toha, Bara mai toha, mai naro.

²Yodeo mai one Yeso ati‑ya mai nofara, iha‑nima mai ati toha, Baoro mai tamine‑ya keyehe‑ya mai hirina, mai ati ihi Baoro mai ati‑ya Bara mai nofaramoneni.

³Ikoniyo‑ya mai wina mai amoni dami‑ya, Yeso tamine‑ya mai hiyara, Deoso mai‑ya kasome, Baoro mai ihi kita‑ya mai awa, mai‑ya mai nakitamineni. Deoso ene tohe‑ya mai watowahamoneni.

⁴Mai dama, mai one Baoro mai ati‑ya mai nofa, mai one Yodeo mai ati‑ya mai nofa, mai nineni.

⁵Bara mai one toha, Yodeo mai one toha, mai‑ka hidi mai one toha na, i‑di Baoro, i‑di Banabe, mai‑ya mai ati bisina, mai‑ya mai ati nanahababoneni, yati‑ya.

⁶Mai tamine‑ya i‑di Baoro mai mita, tabora webote oni Rika·oni‑kaya mai kanani towaka, Rika·oni‑ka tabora bi‑bidi na oni Derebi toha, Risita toha na‑ya mai towakani.

⁷Fara‑ya Yeso Ati Amosabote‑ya mai kamineni.

Risita, Derebi na‑ya mai wina

⁸Maki wade‑ya ka‑kakone‑mata, yakatere, bote tohe, Risita‑ya wine, itarine.

⁹Ka‑kakone Baoro ati‑ya mite, Baoro‑ya kakatome,

“Deoso ati‑ya nofe awane, Deoso hinakitamebonane.” Baoro atibodi ati nane, hiwakatomeri.

¹⁰Baoro ati mai himitebona ati yanane ati kite,

“Tiwaamisiya, tiwa teme‑kaya tiwaawahi.” Baoro ati ne.

Ka‑kakone yoranimise, waane, yakatere yakanawahemonane.

¹¹Baoro ene‑ya mai awa, hini mai ati‑ya mai ibi haana,

“Deoso mai amani, ai tabora‑ya deoso mai kobokana, ai awi‑nima mai awinineni.” Mai ati namoneni.

¹²I‑di Banabe‑ya mai awa,

“Ai‑ka deoso owa i‑di Yobita tohe awane.” Mai ati na.

Baoro tamine‑ya mai ibi hiyara,

“Ai‑ka deoso owa i‑di Mekoriyo tohe awane.” Mai ati na.

Baoro mai‑ya hiyari ba‑basi ne ene i‑di Mekoriyo tohemona mai ati namoneni.

¹³Yama yakari‑ya, i‑di Yobita‑ya mai hi‑hiyara‑ke yobe waane, Yobita‑ka mai kamineni. Bowi‑ya mai kakama, bowi‑ya mai nabohaboneni, Banabe‑ka bani‑bonaha. Banabe‑ka awa mowe‑bone toha na‑ya mai weyekana, mai kamineni.

“Ai‑ka deoso amane.” Mai ati namoneni.

¹⁴Mai ihi‑ya i‑di Banabe i‑di Baoro mai awa, mai ati yawa, mai‑ka bora‑ya mai sibina, mai yorotokana, mai‑ya mai kanani towaka.

¹⁵“Haa‑nima dai riyahi, deoso oda tohi awirini. Dai one oda amani. Deoso yokana Ati Amosabote oda kaminabone oda kakamani. Dai‑ka deoso bara hini mai tohiya, dai‑ya mai kasomara, mai‑ya dai kahiyarariyahi. Deoso yokana‑ta dai nofabisahi. Deoso yokana neme‑ya wama, bofe‑ya wama, faha webote‑ya wama, faha abe na, yama nafi‑ya Deoso yokana wama nibisane.

¹⁶Hibati‑ya mai tabori dami‑ya mai wi‑wina Deoso yokana mai atibodi‑ya barikare, hini mai atibodi ati‑nima mai nineni.

¹⁷Deoso yokana ene dai awateni. Deoso ene faha kaki, awa bono hada na‑ya dai kaba dai ya‑yainineni.” Baoro mai ati namoneni.

¹⁸Baoro mai ati fawana, Banabe mai‑ka bowi‑bona mai ati nanahabanasa na,

“Deoso mai toha awineni.” Mai ati na.

I‑di Baoro mai‑ya ati barinane.

Baoro‑ya mai naboha

¹⁹Atioki‑ka mai toha, Ikoniyo‑ka mai toha na, mai kamake, mai‑ya mai hiyara,

“Baoro mai ati kasira, mai ati dai mitariyahi.” Mai ati na,

mai ati‑ya mai mita, yati‑ya i‑di Baoro‑ya mai baana, mai hinahabe,

“Abe amanakani.” Mai ati na,

tabora awiri‑kaya Baoro horoniya mai tokamoneni.

²⁰Yeso ati‑ya mai no‑nofa Baoro home‑ya mai kakatoma, mai yorona, Baoro kitame waamisame, mai tabori‑kaya mai‑ya tosawime, mahi owa‑ya Banabe eyehe Derebi‑kaya mai towakamamoneni.

²¹Derebi‑kaya Yeso Ati Amosabote‑ya mai kamina, mai ati ihi, Yeso ati‑ya mai dami nofawaha, makobote Risita‑ya mai tokomatasa, Ikoniyo‑ya mai tokomatasa, Atioki‑ya mai tokomatasa, mai namoneni.

²²Baoro mai ati ihi Yeso ati‑ya mai nofa mai atibodi kitamamoneni. Mai‑ya hiyare,

“Dai‑ya mai bisina, Yeso ati‑ya dai nofasa nahi, Deoso hawine‑ya ai sawe, ai‑ya mai bisina, ai habo siitoriyahi.” Mai ati namoneni.

²³Sidadi‑nima Kirisito‑ka mai toha, mai‑ka webote mai‑bone mai‑ya Baoro mai kadika, mai eyehe Deoso‑ya mai hiyara, mahi owa‑ya Baoro mai tokabone, mai tafarani, Deoso‑ya mai kahiyarabonehe. Mai‑ya Baoro mai hiyara,

“Yeso ati dai no‑nofa Deoso dai‑ya kasomayaho.” Mai ati namoneni.

Mai‑ya mai yose‑maro mai‑ya mai towakamatasa

²⁴Mai towaka, tabora webote oni Bisidiya‑ya mai fiyakana, tabora webote one Banafiriya‑ya mai kobokana,

²⁵Banafiriya‑ka tabora bide oni Beki toha‑ya, Yeso tamine‑ya mai hiyara, mai hiyari hawa toha, mai towakamatasa, tabora bide one oni Atariya toha‑kaya mai towakama,

²⁶Atariya‑ya maboro‑ya mai foya, tabora webote Siriya‑ka tabora bide oni Atioki‑ya mai towakamaboneni. Hibati‑ya Atioki‑ya mai mai hiyose, Deoso tamine‑ya mai hiyarabone mai towakamete mai hiyari hawa toha, mai winitokanamamoneni.

²⁷Mai kobokanama, mai ati ihi Kirisito‑ka mai‑ya mai yorotokana, Deoso mai‑ya kasome tamine‑ya mai kamina,

“Yeso ati‑ya Bara mai nofawahineni, Deoso ene.” Mai ati namoneni.

²⁸Abariko dameya, Kirisito‑ka mai eyehe mai winamoneni.

Yerosare‑ya Bara mai tamine mai hiyarineni

¹Yodeya‑ya mai wi‑wina Atioki‑ya mai toka, Kirisito‑ka mai‑ya mai kanawata,

“Mose ati‑nima dai sowiri tati ataro abahi. Dai sowiri tati ataro abi awiriya, Deoso dai‑ya ati somawamaterebonane.” Mai ati namoneni.

²I‑di Baoro, i‑di Banabe mai fama mai‑ya mai weena,

“Yama dai watora, dai ati fawanahi. Yodeo mai toha, mai sowiri tati atori aba sibarihi, Bara mai sowiri tati atori abara sibarihi nineni.” Baoro mai ati na.

“Yama dai watora, Mose ati‑ya mai tokadabara, mai sowiri tati atori‑ya mai nanahabi awiriya, Deoso mai‑ya ati somawami awirebonane.” Yodeya‑ya mai kama, mai ati na,

mai ibi weenademoneni. Mai ibi weena mai ihi Baoro mai‑ya Kirisito‑ka mai yose,

“Baoro, Banabe, Yerosare‑ya dai tokahi. Oda‑ka mai one dai‑ya mai dababone, Yeso‑ka yo‑yose mai toha, Kirisito‑ka bote mai toha na, mai ati dai mitahi. Fai‑ya tamine dai mita, yama ai watowahaboneni.” Kirisito‑ka mai ati namoneni.

³Mai mai hiyose, Fenisiya‑ya mai fiyakana, Samariya‑ya mai fiyakana, mai na, hini mai yakaniya, Bara mai tamine‑ya mai hiyara,

“Yeso ati‑ya Bara mai nofawahineni.” Mai ati na,

Yeso ati‑ya mai no‑nofa Baoro mai ati‑ya mai mita, mai ya‑yainamoneni.

⁴Yerosare‑ya mai kobona, Kirisito‑ka mai‑ya mai hiyara, Yeso‑ka yo‑yose mai toha, bote mai toha na, mai‑ya mai hiyara,

“Deoso oda‑ya kasome, oda ati ene Yeso ati‑ya Bara mai nofawahineni.” Mai ati na.

⁵Yeso ati‑ya mai no‑nofa, fariseo mai toha, mai one waamisa,

“Bara Yeso ati‑ya mai nofabone, Mose ati‑nima mai nahi. Mai sowiri tati atori abahi.” Mai ati namoneni.

⁶Yeso‑ka yo‑yose, bote mai‑ya mai yorotokanineni, Mose ati tamine‑ya mai hiyarabonehe.

⁷Mai dami hiyari hawa tohiya, Bedoro waamise,

“Soho, owati dai mitahi. Hibati‑ya Deoso owa‑ya yosemarine, Bara mai‑ya Yeso Ati Amosabote ohiyarabonehe. Bara owati‑ya mai mita, Yeso ati‑ya mai nofawaha, mai dai watoneni.

⁸Ai atibodi‑ya Deoso wato, Yeso ati‑ya mai nofawaha, Deoso‑ka Doni mai‑ya sawi, oda‑ya sawi‑nima mai‑ya sawiwahane.

⁹Deoso noko‑ka oda‑nima mai na, Yeso ati‑ya mai nofa, mai‑ya ati somawamane.

¹⁰I‑di Mose ati‑ya ai‑ka idi mai tokadabara, ati ai tokadabaharire. Hini yamata ihi Bara mai‑ya dai ati bari, Mose ati‑ya mai tokadabara, Deoso‑ka mai toharabone dai ati na, Deoso yawebonane.

¹¹Mose ai manakone‑ya nanahabarihi, manakone ai nanahabarihi ne, ai‑ka Ayo Yeso Kirisito ati‑ya ai nofa, ai manakone aba, Yeso ati‑ya mai nofa, mai manakone abahari teni.” Bedoro ati nemonane.

¹²Mai ati fawana, Baoro, Banabe mai fama, mai‑ya mai hiyara, Bara mai‑ya mai sawe, Deoso ene kite‑ya mai awa, tamine‑ya mai kaminamoneni.

¹³Mai ati fawaniya, Tiyako waamise, mai‑ya hiyare,

“Okoyo dai toha, oka soho dai toha na, owati dai mitahi.

¹⁴Simaho Bedoro ati dai mita,

‘Hibati‑ya Bara mai‑ya Deoso haane, mai‑ya kayafebonaha.’ Ati ne.

¹⁵Fara‑nima yama na‑ya Deoso ati‑ya mai mi‑mita‑mete mai kanahano,

¹⁶‘Okomatasiya, Dafi‑ka yobe abe, wama·onamatasaboneni. Yobe abe sone, onawaamisamaboneni.

¹⁷Hibati‑ya dai‑ka mai toha, Bara mai toha na, dai okadikamaro, owa ene‑ya dai awa, owa‑ya dai sibanabone, dai nafi‑ka Hidi ohawahaboneni.’ Deoso ati ne.

¹⁸Deoso ati‑ya mai mi‑mita‑mete mai hikanahanameteni.

¹⁹Owatibodi ati dai mitahi. Yeso ati‑ya Bara mai nofa, Deoso hawine‑ya mai yaka na, mai‑ya ai ati maakariyahi.

²⁰Mai‑ka yama hani‑ba ai kanahanohi.

‘Mai‑ka deoso bare‑ka bani‑bona mai daahine‑ya dai kabarihi, mai fanawi one‑ya dai aharihi, bani emene abare eme dai kabarihi nahi.’ Ai‑ka yama hani ati naboneni.

²¹Deoso ati i‑di Mose hikanahanomata, sabado hinama‑ya Deoso‑ya mai hi‑hiyara‑ke yobe‑ya mai hikadike, ati‑ya mai dami mitateni.” Tiyako ati nemonane.

Bara mai‑ka yama hani‑bone‑ya mai kanahana

²²Yeso‑ka yo‑yose mai toha, Yeso‑ka bote mai toha, Yeso ati‑ya mai no‑nofa mai toha, mai na, mai ibi hiyara,

“Ai‑ka mai one ai yosehi, Baoro, Banabe mai fama, mai‑ya mai dabiya, Atioki‑ya mai tokabonehe. Ai‑ka webote mai fama, i‑di Yoda Basaba, i‑di Sira ne, mai ai yosehi.” Mai ati na.

²³Atioki‑ya mai wi‑wina mai‑ka yama hani‑bone‑ya mai kanahano,

“Atioki‑ya dai wi‑wina, Siriya‑ya dai wi‑wina, Sirisiya‑ya dai wi‑wina, dai na, dai‑ka yama hani‑bone‑ya. Yeso‑ka yo‑yose oda toha, oda‑ka bote mai toha na, dai‑ka yama hani‑bone oda kanahanoneni. Hibati‑ya Bara‑ta dai tohamaro, hibayata oda‑ka soho dai tohawahineni.

²⁴Oda tabaro‑ya mai sa‑sawi dai tabaro‑ya mai toka, keyehe‑ya mai hirina, mai ati ihi dai atibodi komamoneni. Mai oda yose awiraroni.

²⁵Fara ihi oda‑ka yokana mai oda kadikani, dai tabaro‑ya mai tokabonehe. Oda‑ka soho i‑di Baoro, i‑di Banabe, mai fama, mai‑ya mai saweboneni.

²⁶Hini mai‑ya mai nofara, ai‑ka Hidi i‑di Yeso Kirisito ati‑ya mai nofabisa, ati mai hiwakamebonane. Mai abi yanatonamaro, mai oda nofi nafine.

²⁷Oda ati ene i‑di Yoda i‑di Sira mai fama, dai tabaro‑ya mai towakaboneni, oda‑ka yama hani ati‑nima dai‑ya mai hiyaraboneni.

²⁸Haa‑nima dai niya, sibaraboneni. Deoso‑ka Doni ati toha, oda ati toha nineni.

²⁹Mai‑ka deoso bare‑ka bani‑ya dai kabarihi, ama dai kabarihi, bani emene abare eme dai kabarihi, mai fanawi one dai aharihi nahi. Oda ati‑nima dai niya, dai sibaraboneni. Feye amani.” Yama hani ati nineni.

³⁰Yama hani‑ya mai damakana, mai towakama, Atioki‑ya mai kobokana, Kirisito‑ka mai nafi yorotokana, mai‑ya yama hani‑ya mai daanineni.

³¹Yama hani‑ya mai kadika, mai ya‑yaina,

“Yama hani ati sibarini. Oda ya‑yainineni.” Mai ati namoneni.

³²Yoda, Sira mai fama Deoso ati‑ya mai mi‑mita mai toha, Kirisito‑ka mai‑ya mai hiyara, mai ati ihi mai ya‑yaina, mai habi kitawahamoneni.

³³Mai amoni damara, Yerosare‑ya mai wininamabone,

“Dai‑ya mai yoseni dai tokomahi. Oda ya‑yainawahani.” Kirisito‑ka mai ati namoneni.

³⁴Sira‑ta towitakose,

³⁵Atioki‑ya Baoro, Banabe mai wina, mai dami eyehe, ai‑ka Ayo ati‑ya mai kamina, mai‑ya mai kanawatamoneni.

I‑di Baoro i‑di Banabe mai famamara

³⁶Makobote Banabe‑ya Baoro hiyare,

“Hima, hibati‑ya ai towakimaro‑ka tabora‑ya ai towakamatasahi. Mai ai hiyaramaro ai‑ka soho mai tohawaha, mai ati ai mitabani.” Baoro ati ne.

³⁷“Hehe, ai towaka, ai‑ya Yowaho Maroko dabaho.” Banabe ati ne.

³⁸“Yowaho Maroko ai‑ya dabarebonane. Hibati‑ya ai‑ya sawi, Banafiriya‑ya wininame, ai‑ya kasomaremarine.” Baoro ati ne.

³⁹Yowaho Maroko ene mai ibi weena, mai famamara, i‑di Banabe i‑di Maroko‑ya fame, Sibe‑ya mai towakamoneni.

⁴⁰Baoro i‑di Sira‑ya haanane, mai towakamabonehe.

“Deoso dai‑ya sawine.” Kirisito‑ka mai ati namoneni.

⁴¹Siriya‑ya mai towaka, Sirisiya‑kaya mai towakawaha, Kirisito‑ka mai‑ya mai hiyara, mai habi kitawahani.

Baoro i‑di Sira mai‑ya Timoti dabawahe

¹Derebi‑ya Baoro mai towaka, Risita‑ya mai towakawaha, Risita‑ya Timoti wine. Timoti madi Yeso ati‑ya no‑nofa, Yodeo toha, badi‑ta Kereko toha nemonane.

²“Timoti ene amosatene.” Yeso‑ka mai ati na.

Risita‑ka mai, Ikoniyo‑ka mai na, Timoti‑ya mai nofamoneni.

³I‑di Baoro mai‑ya i‑di Timoti sawibona, sowiri tati ataro i‑di Baoro wisinakosane. Timoti badi Kereko tohe‑ya Yodeo mai nafi wata, fara Timoti sowiri tati ataro‑ya wisinakosane, mai yawarabonehe.

⁴Mai tabori dami‑ya mai toka, mai tabori‑ya mai kobona, Yeso‑ka yo‑yose mai toha, Yeso ati‑ya mai no‑nofa mai‑ka bote mai toha na, mai‑ka yama hani Yerosare‑ya mai hikanahanamete, ati‑ya mai kamina,

“Mai‑ka yama hani ati‑nima dai niyahi.” Mai ati namoneni.

⁵Baoro mai ati ihi Yeso‑ka mai habi kitawaha, mai dodamawahamoneni.

Masedoni‑ke mai‑ka owa Baoro‑ya wadari haane

⁶Tabora webote oni Firikiya‑ya, mai fiyakana, tabora webote one Karatiya‑ya mai fiyakana, tabora webote one Asiya‑ya Yeso ati‑ya mai kaminabone mai atibodi ati na, Deoso‑ka Doni mai‑ya ati barine.

⁷Tabora webote Misiya‑ya mai kobona, tabora webote Bitiniya‑ya mai ati toka, Yeso‑ka Doni mai‑ya ati baritase,

⁸Tabora webote Misiya‑ya mai fiyakana, Torowadi‑ya mai kobona,

⁹Torowadi‑ya Baoro wada‑ya awe, Masedoni‑ke ai owa ati wadarine‑ya mitane,

“Masedoni‑kaya dai kakihi, oda dai kasomabonehe.” Ati wadari ati ne.

¹⁰16:10 Roka i‑di Baoro mai‑ya sawiwahe.Baoro‑ka wada ati ihi, Masedoni‑kaya oda tokabone oda atibodi ati na,

“Deoso ene amane. Masedoni‑kaya Yeso Ati Amosabote‑ya mai‑ya ai kaminaboneni.” Oda ati namaroni.

Yeso ati‑ya Ridiya nofawaha

¹¹Maboro‑ya oda foya, faha teberi oni Samotasi‑ya oda towaka, mahi owa‑ya faha widi Ni·abori‑ya oda kobokana,

¹²Ni·abori‑ya oda fidotona, tabora webote oni Masedoni‑ka tabora ba‑basi na oni Firibo toha‑ya oda tokawaha, Firibo‑ya homano mai dama mai wina, mai tabori‑ya oda winawahani.

¹³Firibo‑ya Deoso‑ya mai hi‑hiyara‑ke yobe wadare ene Sabado‑ya mai fanawi yorotokana, faha widi‑ya Deoso‑ya mai hiyarateni. Mai‑ya oda tokomake, mai oda hiyarawahamaroni.

¹⁴Fana ohare oni Ridiya toha, tabori bote oni Tiyatira tohateni. I‑di Ridiya bora amosa‑ya da‑daa, yinero‑ya kanikateni. Deoso‑ya nofa, Yeso tamine‑ta wato awisara. Baoro Yeso tamine‑ya kamine, ati‑ya Ridiya mita, Yeso ati‑ya nofawaha,

¹⁵Ridiya hika mai eyehe habanisa, oda‑ya hiyara,

“Yeso ati onofamone dai ati na, oka yobe‑ya dai winawahi.” Ati na.

Hika yobe‑ya oda winawahamaroni.

Kadeya‑ya Baoro, Sira mai fama mai foyawaha

¹⁶Deoso‑ya mai hi‑hiyara‑ya oda tokatasa, fana mai hikanikamete oda‑ya kobona, madi towe fana‑ya foyane. Madi towe ene yama nabone‑ya fana kamina ihi hika hidi yinero nafi‑ya mai kayafateni.

¹⁷Oda nowati‑kaya fana kamake, mai‑ya haana,

“Deoso kitabote yokana‑ka yo‑yose mai toha, mai ati dai tokadaba, dai abiya, Deoso tabaro‑ya dai winaboneni.” Ati namaroni.

¹⁸Mahi‑nima fana ati yanani dama ihi Baoro ati yawe, kiinawame, madi towe‑ya hiyare,

“Yeso ati ene tikahi. Fana atibodi‑ya tifoyamariyahi.” Ati ne,

ati ene madi towe toke, ene fana yama nabone‑ya watomara, hikaminamaramaroni.

¹⁹Fana‑ka hidi mai ati yawawaha,

“Fana‑ya madi foyamare ene yinero oda kayafamara oda naboneni.” Fana‑ka hidi mai ati namaroni.

Baoro, Sira, mai fama mai‑ya fana‑ka hidi mai waratona, mai‑ya mai horoni towakamamaroni kofeno‑ka mai‑ya.

²⁰Kofeno‑ka mai‑ya mai hiyara,

“Yodeo mai toha, mai ihi towe toha, oda tabaro‑ya mai towe tonihi teni.

²¹Ai‑ka hidi ati‑nima mai ihi ni awira. Homano ai toha, mai ati‑nima ai terani.” Kofeno‑ka mai‑ya fana‑ka hidi mai ati namaroni.

²²Mai naha, Baoro mai‑ya mai weena, kofeno‑ka mai ati ihi Baoro, Sira mai‑ka bora‑ya mai tanina, mai‑ya mai kosinamaroni.

²³Mai kosini‑ya mai hawa toha, kadeya‑ya mai‑ya mai nafoyabone, kadeya hidi‑ya mai hiyara,

“Mai tiwakatomahi. Mai towakariyahi. Mai towakiya, tiwa‑ta tiwa oda nanahababoneni.” Kofeno‑ka mai ati na.

²⁴Mai ati‑ya kadeya hidi mite, Baoro mai‑ya towakame, kadeya dori‑ya mai‑ya nafoye, mai tameribi‑ya awa webote‑ya barikanemarine.

Yeso ati‑ya kadeya hidi nofawahe

²⁵Yama soki bai‑ya Baoro, Sira mai fama, mai wayoma, Deoso‑ya mai hiyara na, kadeya‑ya mai fo‑foya mai one wayomi‑ya mai mitamoneni.

²⁶Wami wawawakawaha, wawakani ihi kadeya abi yanatona, kadeya nokobiri seekana, kadeya dori‑ka mai nafi seekana namoneni.

²⁷Kadeya hidi amone, wami wawawakana ihi dodafi, kadeya nokobiri seekana‑ya awe, Yima‑ya hini‑ya nanahabebona,

“Kadeya‑ya mai foya mai toka awineni.” Atibodi ati nemonane.

²⁸Hini‑ya watikane‑ya Baoro haane,

“Tiwa arabatinahi, oda nafi nahoneni. Oda toki awirini.” Baoro ati ne.

²⁹Kadeya hidi hika yama wahi‑bone‑ya haane, mai‑ya tokomaki, yobati‑kaya itane, wawawakaneri.

³⁰Mai‑ya himane, mai‑ya towakamane.

“Hini yamata‑nima obati, Deoso tabaro‑ya owinabonehe?” Kadeya hidi ati ne.

³¹“Ai‑ka Hidi Yeso Kirisito ati tinofiya, tiwa manakone aba, tika mai manakone aba, Deoso tabaro‑ya dai winaboneni.” Mai ati nineni.

³²Kadeya hidi hika mai eyehe‑ya Deoso ati‑ya mai kamineni.

³³Mai hiyari hawa toha, mai mai kosihina, mai‑ka ko‑kosi ihi‑ya kadeya hidi sokonawahane. Yeso ati‑ya kadeya hidi nofawahe, hika mai eyehe habanisawahane.

³⁴I‑di Baoro, i‑di Sira mai fama mai‑ya towakame, hika yobe‑ya mai‑ya natafane. Kadeya hidi, hika mai eyehe Deoso ati‑ya mai nofa, mai ya‑yainineni.

³⁵Yama wahabisari‑ya kofeno‑ka mai ati ihi sodado mai toka, kadeya hidi‑ya mai yose,

“Mai seetikanahi.” Mai ati na.

³⁶“Sira dai see·okanabone mai ati na, dai see·okana, dai towakamahi. Dai‑ya mai weenamaraboneni.” Baoro‑ya kadeya hidi ati ne.

³⁷Ati‑ya Baoro mite, ati yanane,

“Homano oda toha, mai dama mai noki‑ya oda‑ya mai bisina, homano mai ai bisiterani. Oda ene amosa, hiniya oda‑ya mai bisina, kadeya‑ya oda‑ya mai yaditona, hibayata hiniya oda‑ya mai yose, oda tokomabone mai ati na. Hiniya oda toki awiraboneni. Ahi‑ya mai kamiya, mai aboni oda‑ya mai seekanahi.” Baoro ati nane.

³⁸Kofeno‑ka mai‑ya sodado mai tokoma, Baoro ati‑ya mai kamineni. Sodado ati‑ya mai mita, kofeno‑ka mai atibodi mai dika,

“Homano mai toha, mai oda bisina, hini oda ene oda‑ka hidi oda‑ya mai bisinawahaba awineni.” Mai atibodi ati na.

Mai habi siitoneni.

³⁹Kadeya‑ya mai toka, Baoro mai‑ya mai hiyara,

“Towe oda amani, dai‑ya oda bisinaro. Dai towakamahi. Oda‑ya dai ati somawamahi. Dai oda bisinamaterabani. Tabora one‑ya dai towakamahi.” Mai ati na.

⁴⁰Ridiya‑ka yobe‑ya i‑di Baoro mai towakama, Yeso ati‑ya mai no‑nofa mai yorotokana, mai‑ya i‑di Baoro hiyare, mai ya‑yaina, hiyari hawa tohe, i‑di Sira mai fama mai towakamamaroni.

Tesaronika‑ya Baoro mai‑ya hiyarane

¹Afibori‑ka mai tabori‑ya Baoro mai fiyakana, Aboroniya‑ka mai tabori‑ya mai fiyakana na, mai toka, Tesaronika‑ka mai tabori‑ya mai kobona, Tesaronika‑ya Yodeo mai hi‑hiyara‑ke yobe owa tohane.

²Fare yobe‑ya Baoro tokane, mai‑ya hiyarebonaha. Sabado‑ya Yodeo mai hi‑hiyara‑ke yobe‑ya Baoro tokatene. Sabado fama Sabado one ohari na‑ya mai‑ya hiyare, Deoso‑ka yama hani tamine‑ya hiyarane.

³“‘Kirisito mai bisihineya, mai hinahabeya, kitamebonane.’ Deoso‑ka yama hani ati nineni.

Yeso ai‑ka Kirisito tohe, Yeso tamine‑ya dai‑ya ohiyarateni.” Ati ne.

⁴Baoro ati‑ya Yodeo mai one nofa, Baoro‑ya mai sawimake, Kereko mai dama Baoro ati‑ya mai nofa, mai fanawi hidi toha, Baoro ati‑ya mai nofa na, Baoro, Sira mai fama mai‑ya mai sawimakemoneni.

⁵Yodeo mai one Baoro ati‑ya mai mita, mai yawa, mai ihi amosara mai tabori‑ya mai toka, mai‑ya mai himana, mai dami yorotokana, Yasoho‑ka yobe‑ya mai toka, mai yakana, mai ati kitineni, Baoro mai‑ya mai watabonehe. Yasoho‑ka yobe‑ya mai kobona, mai tokiyomani, Baoro, Sira mai fama mai‑ya mai watiya, mai‑ya mai daahinabonehe.

⁶Baoro mai‑ya mai wasira, Yasoho toha, Yeso‑ka mai one toha na, mai‑ya mai waratona, sidadi hidi mai‑ya mai daaneni. Mai ati kita,

“Baoro, Sira mai fama ai tabaro dami‑ya mai toka, mai ihi amosara hinama toha, hibayata ai tabaro‑ya mai koboneni.

⁷Yasoho‑ka yobe‑ya mai winawaha, ai‑ka hidi webote i‑di Sesa ati‑ya mai nofara, mai‑ka hidi webote oni Yeso tohemona Baoro mai ati teni.” Mai ati namoneni.

⁸Mai ati‑ya mai nafi mita, mai yawa, mai‑ka hidi mai toha na, mai nafi ati kitawahamoneni.

⁹Yasoho mai‑ka yinero‑ya sidadi‑ka hidi kayafe, yinero‑ya mai manakone‑ya mai nanahaba, hini mai tabori‑ya mai tokomamoneni.

Bereya‑ya Baoro, Sira mai towaka

¹⁰Yama soki‑ya Yeso ati‑ya mai no‑nofa Baoro, Sira mai fama mai‑ya mai yose,

“Bereya‑ya dai towakahi.” Mai ati na.

Mai ati ihi Bereya‑ya mai towaka, mai kobokana, Yodeo mai hi‑hiyara‑ke yobe‑ya mai towakiyomineni, mai‑ya mai hiyarabonehe.

¹¹Tesaronika‑ka mai narabi hawi bi‑bidi na, Bereya‑ka mai narabi hawi ba‑basi na, Baoro ati‑ya mai mita, mahi‑nima Deoso ati‑ya mai kadika, Deoso ati‑nima Baoro ati amane, mai awa, ati mai nofawahamoneni.

¹²Yodeo mai dama mai toha, Kereko mai‑ka hidi fana mai toha, makidi mai toha na, Yeso ati‑ya mai nofawahamoneni.

¹³Bereya‑ya Deoso tamine‑ya Baoro kamine, tamine‑ya Tesaronika‑ka Yodeo mai mita, mai yawamatasa, Bereya‑ya mai toka, Baoro tamine‑ya keyehe‑ya mai hirina, mai nafi yorotokana, mai ati kitawahamoneni.

¹⁴Yeso ati‑ya mai no‑nofa Baoro‑ya mai yose,

“Faha webote widi‑ya toka kanibote tinahi.” Mai ati na.

Bereya‑ya i‑di Sira, i‑di Timoti mai fama mai demetonakosa, faha webote widi‑ya Baoro tokabisemonane.

¹⁵Bereya‑ka mai one Baoro‑ya sawe, Atena‑kaya mai towaka, Atena‑ya mai kobona, Baoro‑ta towitakose, mai winikanamabone, mai‑ya Baoro hiyare,

“Dai kobotokanamiya, i‑di Sira, Timoti mai fama, mai dai yosemiya, mai kakama kanibote niyahi.” Baoro ati nemonane.

Atena‑ya Baoro wine

¹⁶Atena‑ya Baoro wine, Sira, Timoti mai‑ya nimane. Atena‑ka mai‑ka deoso bara mai dama, mai‑ya i‑di Baoro awe, yawemonane. Mai‑ka deoso yokana tohi awire, deoso yati wamani hinama tohani.

¹⁷Mahi‑nima Deoso yokana tamine‑ya mai‑ya hiyaranadi, mai‑ka tabora bai‑ya mai yorotokana, mai‑ya hiyare, Sabado‑ya Yodeo mai toha, Deoso ati‑ya mai no‑nofa mai toha na, Deoso‑ya Yodeo mai hi‑hiyara‑ke yobe‑ya mai yorotokana, mai‑ya hiyaremonane.

¹⁸Ebekoriyo mai toha, Esitoiko mai toha na, Baoro‑ya mai hiyara, Deoso tamine‑ya mai ibi hiyara,

“Baoro yama‑ya watore, hini yamata‑nima ati nati?” Mai one ati na.

“Mai one‑ka deoso tamine‑ya hiyare awane.” Mai one ati na.

Yeso abe, kitame ene ai kitamaharebone tamine‑ya Baoro hiyarane. Ai kitamabone tamine‑ya mai mita, yama‑ya mai watorani.

¹⁹“Are·obako‑ya ai tokomahi. Tiwati oda mitaboneni.” Mai ati na.

Baoro‑ya mai towakama,

“Tiwati oda mitatera, oda mitawahaboneni.

²⁰Haa‑nima mai ati na, oda mitatera, tiwati oda mita, oda mitamatasiya, oda watowahaba awineni.” Mai ati na.

²¹Atena‑ka mai toha, Atena‑ya mai one wi‑wina yama anini‑ya mai nofara,

“Hiniya mai ati ai mitiya, yama ai watowahaboneni.” Mai ati na.

Yama bara tamine‑ya mai hiyaranaditeni.

²²Are·obako‑ya mai naha, mai noki‑ya Baoro waamise, mai‑ya hiyare,

“Owati dai mitahi, deoso mai dama mai dai nofa,

²³Dai tabaro‑ya yaka·ona, dai‑ka deoso yati wamani‑ya kii·ona, yati wamani one‑ya oawani. Yati wamani one‑ya yama hani okadika,

‘Deoso owa oni oda watorani.’ Yama hani ati nani.

Fara amani. Deoso oni dai watore, tamine ohiyarawahineni. Hibati‑ya hika yama‑bone dai daana, tamine‑ya dai watowahaboneni.

²⁴Hibati‑ya yama nafi‑ya Deoso wama, wami‑ya wama, neme‑ya wama nematane. Yama nafi‑ka hidi tohe, yobe‑ya ai wamana‑ya winaterene.

²⁵Ai‑ka yama‑ya kayafaterene. Yama nafi Deoso‑ka toha, Deoso ai‑ya wamane ene ai nafi hasi, Deoso ene yama nafi tohani.

²⁶Ai ohari‑ya wamanemata, makobote hika nodi ai toha ai dodamawaha, bofe nafi‑nima ai nawaawaha, ai wini‑bone‑ya wato, ai tabaro‑bone‑ya hawa tonihi nematane. Dai tamine Deoso hiyare,

²⁷‘Owa‑ya mai sibana, owa‑ya mai wasiya, owati‑ya mai nofiya, owa‑ya mai watowahaboneni.’ Ati ne, ai yakari‑ya tohane.

²⁸Deoso ene ai hasina, ai toka, ai winateni. Deoso awire‑mana, ai hasira neni, ai aba neni.

‘Deoso bidi ai amani.’ Dai owa ati ne.

Fara amani. Deoso bidi ai amani.

²⁹Deoso bidi ai toha, ai‑ka Abi oro wamani toharihi, barata wamani toharihi, yati wamani toharihi tene. Ai‑ka Abi ai wamaterene.

³⁰Hibati‑ya Deoso yokana ai watore, ai‑ya weeni awire, hibayata ai watowahe,

‘Hibati‑ya dai ene towe tohamaro, dai‑ya dai kaminahi.’ Deoso ati nane.

³¹Yeso ai ene‑ya kadikebona‑ke mahi‑ya Deoso wato, hibati‑ya Yeso‑ya kadikemata, Deoso ati‑mata‑nima yama nabone ai wato, Yeso‑ya nakitamebona ati nemata, Yeso‑ya nakitamane.” Baoro ati nemonane.

³²Yeso abe kitame, tamine‑ya mai mita, Baoro‑ya mai one hahakana,

“Mahi owa‑ya tiwati oda mitamatasaboneni.” Mai one ati na.

³³Mai ati ihi Baoro tokome,

³⁴Baoro ati‑ya mai nofa, Baoro‑ya mai sawi, Are·obako‑ka mai‑ka owa i‑di Dionisiyo toha, fana i‑di Damari toha, mai one fa‑famaraba na toha, Baoro‑ya mai sawi, Yeso ati‑ya mai nofawahani.

Korito‑ya Baoro tokawahane

¹Makobote i‑di Baoro toke, Korito‑ka mai tabori‑ya kobone,

²Korito‑ya i‑di Akira wine‑ka yobe‑ya Baoro kobone. Hibati‑ya Boto‑kaya Akira wine, makobote Homa‑ya toke, yara mai‑ka hidi i‑di Karaodio mai‑ya yose,

“Yodeo dai toha, dai nafi tokahi, ahi‑ya dai winamaraboneni.” I‑di Karaodio ati ne.

Ati ene Korito‑ya Akira fadi i‑di Birisira eyehe tokawahe, mai tabori‑ya Baoro kobonane.

³Mai tabori‑ya Baoro winawahane. Bora kita‑ya yobe‑ya mai wa‑wama, mai‑nima i‑di Baoro ne, yama‑ya anitene.

⁴Sabado‑ya Deoso‑ya Yodeo mai hi‑hiyara‑ke yobe‑ya tokatene. Yodeo mai toha, Kereko mai toha na, mai‑ya hiyaratene, yama‑ya mai watowahabonehe.

⁵Makobote i‑di Sira, i‑di Timoti mai kobokana, Baoro yama‑ya aninami awire, hiniya hiyarane. Yodeo mai‑ya hiyare,

“Hibati‑ya Yeso Deoso hikadikemata Kirisito tohane.” Baoro ati nemonane.

⁶Yodeo mai ati yawa, Baoro tamine‑mona‑ya keyehe‑ya mai hirina, Baoro‑ya mai weena, mai ati ihi, Baoro ati yawe, hika bora hibakori‑ya nanahabene, hibakori aba‑nima mai ababone mai awabonehe.

“Hini dai ene dai ababoneni. Owa ene toharaboneni. Bara mai‑ya ohiyarawahaboneni.” Baoro ati nemonane.

⁷Bara mai‑ya Baoro toke, Deoso‑ya Yodeo mai hi‑hiyara‑ke yobe fowari‑ya Titiyo Yosito‑ka yobe waari‑ya tokane. Titiyo Yosito Deoso‑ya kahiyaratene.

⁸Deoso‑ya mai hi‑hiyara‑ke yobe hidi i‑di Kirisibo, hika mai nafi eyehe Yeso ati‑ya mai nofawaha, Korito‑ka mai dama Baoro ati‑ya mai mita, Yeso ati‑ya mai nofa, mai mai habahinirisawahani.

⁹Makobote yama soki‑ya Baoro Deoso ati wadarine‑ya mite,

“Baoro, tiwa habo kitahi. Owa tamine hibati‑ya tikaminamaro, tikaminamatasahi. Tiwati fawariyahi.

¹⁰Tiwa‑ya osawebone, tiwa‑ya mai bisini awiraboneni. Mai ihi tiwa habo siitoriyahi. Oka mai dama ahi‑ya mai winateni.” Deoso ati wadarine ati nemonane.

¹¹Korito‑ya Baoro wine, hika abariko 18 tohe‑ya Deoso ati tamine‑ya hiyarane, mai‑ya kanawatori.

¹²Makobote i‑di Kariyo, Akaiya‑ya mai wi‑wina mai‑ka hidi toheya, Yodeo mai yawawaha, Baoro‑ya mai waratona, i‑di Kariyo‑ya mai hiwakamane.

¹³Kariyo‑ya mai hiyara,

“Kariyo, Baoro kositinahi. Mose ati‑nima ai rabone ati ne, Yeso ati‑nima Deoso ai hiyarabisabone Baoro ati nene.” Mai ati nani.

¹⁴Mai ati‑ya Baoro mite, ati yananebona, ati‑ya i‑di Kariyo kahidi, ati yanane,

“Owati dai mitahi. Baoro mai‑ya bisi, mai‑ya nanahaba ne‑mana, tamine omite nane.

¹⁵Hiniya bara mai tamine‑ya Baoro hiyaremona dai ati na, Mose ati tamine tohe, Mose ati owatoterani. Ati dai watobise, dai tokomahi. Dai ati omitamaraboneni.

¹⁶Oka yobe‑ya dai nahoriyahi.” Kariyo ati nane, mai‑ya weeneri.

¹⁷18:17 Sotenesi Yeso ati‑ya nofe ai watowahani. Korito daidi 1:1Deoso‑ya Yodeo mai hi‑hiyara‑ke yobe mai‑ka hidi i‑di Sotenesi‑ya mai waratona, Kariyo‑ka yobe‑ya mai hiwakame, Kariyo‑ka yobe‑ya mai kosihineya, hiniya Kariyo mai‑ya kakatomane.

Birisira, Akira mai tosawiwama

¹⁸Korito‑ya Baoro wine, amoni ba‑basi namakiya, Senekereya‑ya tokawahane. Senekereya‑ya wine‑ya tati kone nafi‑ya nanahabe, Deoso hikasome ene Baoro ya‑yai, tati kone‑ya nanahabane, Deoso‑ya kahiyarebonaha. Hawa toheya, i‑di Baoro, i‑di Birisira, i‑di Akira mai na, maboro‑ya mai foya, Siriya‑ya mai tokaboneni.

¹⁹Efesiyo‑ya mai kobona, Deoso‑ya Yodeo mai hi‑hiyara‑ke yobe‑ya Baoro tokiyome, mai‑ya kanawatone. I‑di Birisira, i‑di Akira mai winabisaboneni. Baoro‑ta tokebona ati ne.

²⁰“Baoro, oda tabaro‑ya tiwinahi.” Mai ati na.

“Hibayata dai tabaro‑ya owini awirabone,

²¹Deoso ati sibareya, okomatasabani.” Baoro ati nane.

Maboro‑ya foyamatasane.

²²Sesareya‑ya fiyakane, Yerosare‑ya toke, Yeso‑ka mai‑ya hiyare, makobote Atioki‑ya tokome,

²³Atioki‑ya wine, makobote Karatiya mai tabori dami‑kaya tokomatasa, Firikiya mai tabori dami‑kaya tokomatasa ne. Yeso ati‑ya mai no‑nofa Baoro ati ene mai habi kitawahamoneni.

I‑di Aboro tamine

²⁴I‑di Aboro, Yodeo tohe, Aresadiriya‑ya wademata, Efesiyo‑ya kame, Deoso ati‑ya wato ba‑basi ne.

²⁵Hibati‑ya i‑di Yeso Deoso‑ka Ka‑kadika kobone tamine i‑di Yowaho Batita mai‑ya hiyare, mai‑ya habanirisane. Tamine‑ya Aboro wato, tamine mai one‑ya kanawatomakine. Yeso abe, kitame, ai manakone‑ya nanahabe tamine‑ya Aboro wato awisare, fara tamine mai‑ya kanawatorene.

²⁶Deoso‑ya Yodeo mai hi‑hiyara‑ke yobe‑ya Deoso‑ka Ka‑kadika tamine‑ya i‑di Aboro hiyare, habo siitore, ati‑ya i‑di Birisira i‑di Akira mai mita, mai tabori‑kaya mai hiwakame, Deoso hawine‑ya mai hikaminawahane.

²⁷Makobote Akaiya‑ya Aboro tokebona ati ne, ati‑ya mai mita, Aboro‑ya mai kasoma, Akaiya‑ya mai wi‑wina Yeso ati‑ya mai no‑nofa mai‑ka yama hani‑bone‑ya mai kanahana, Aboro‑ya mai daaneni.

“Aboro ati sibare, ati dai mitahi. Dai‑ka one oda amani. Yeso ati oda no‑nofa oda amani.” Efesiyo‑ya mai wi‑wina mai‑ka yama hani ati nineni.

Akaiya‑ya Aboro kobone, Yeso ati‑ya mai no‑nofa mai‑ya kasomemonane.

²⁸Yodeo mai yorotokana mai‑ya hiyare,

“Deoso ati dai mitahi, Yeso ai‑ka Hidi Deoso‑ka Ka‑kadika amane.” Aboro ati neya,

mai weena, Deoso‑ka yama hani‑ya Aboro yofikane, mai ati fawanamoneni.

Efesiyo‑ya Baoro wine

¹Korito‑ya Aboro wineya, Efesiyo‑ya Baoro toke, kobone, Yeso‑ka mai one‑ya hiyare,

²“Hibati‑ya Yeso ati‑ya dai nofa yati toha, Deoso‑ka Doni dai‑ya sawiraniha?” Baoro ati ne.

“Deoso‑ka Doni tamine oda mitaterani.” Mai ati na.

³“Hini yamata‑nima mai na, dai‑ya mai habanirisimeteti?” Ati ne.

“Yowaho Batita ati ene oda‑ya mai habanirisamaroni.” Mai ati na.

⁴Yowaho tamine Baoro mai‑ya hiyare,

“‘Deoso‑ya dai‑ya dai kaminahi. Owa nowati‑ya ai owa kamakibona, ati dai nofaho.’ Yowaho ati ne.

Fare Yeso tamine amane.” Baoro ati nane.

⁵Baoro ati‑ya mai mita,

“Yeso ai‑ka Hidi tohane.” Mai ati na.

Mai mai habahinirisamatasineni.

⁶Mai habanisi hawa toha, mai‑ya Baoro yehe fori, Deoso‑ka Doni mai‑ya sawiwahe, mai one ati‑ya Deoso tamine‑ya mai hiyarawahani.

⁷Maki ai yehe kafama mai one famamaki na, Deoso tamine‑ya mai hiyarani.

⁸Deoso‑ya Yodeo mai hi‑hiyara‑ke yobe‑ya Baoro tokiyome, mai‑ya hiyare, abariko fama abariko owa oharimaki ne‑ya mai‑ya hiyaranadi,

“Owati dai mitahi. Deoso‑ka Ka‑kadika kobone, ai‑ka Hidi amane.” Baoro ati nane, habo kiteri.

⁹Mai one Yeso ati‑ya mai nofara, mai ime kita, Yeso‑ka hawi‑ya mai sa‑sawi mai‑ya mai kaka, mai ati dama, mai‑ya Baoro dabamare, Yeso ati‑ya mai no‑nofa Baoro eyehe mai toka, Tirano‑ka tabaro‑ya mai toka, mahi‑nima Baoro mai‑ya hiyarane.

¹⁰Faha fowe fama‑ya Baoro mai‑ya hiyaranadi, mai‑ya hiyaranadine. Asiya‑ya mai wi‑wina mai nafi Yeso tamine‑ya mita, Yodeo mai toha, Bara mai toha na, Yeso tamine‑ya mai nafi mitamoneni.

¹¹Deoso ene Baoro ene kite, mai‑ya nakitamane.

¹²Baoro‑ka reso, bora na‑ya mai towakama, mai kiyana, mai mese‑ya mai hinafore, Deoso ene mai kitama, mai‑ya madi mai foya, mai mese‑ya mai hinafore, Deoso ene madi mai kanana mai kitamateni.

Sefa bidi mai tamine

¹³Madi towe mai‑ya mai foya, mai‑ya Yodeo mai one kananihebone mai ati na,

“Yeso oni‑ya Baoro hirineya, madi towe mai kanateni.” Mai atibodi ati na.

Ai owa madi towe foye, madi towe‑ya mai hiyara,

“Yeso oni‑ya Baoro hiri ene oda ati‑ya dai mita, dai kananahi.” Mai ati na.

¹⁴Deoso‑ka yama‑bone‑ya Yodeo mai da‑daa mai‑ka hidi webote owa i‑di Sefa tohe, bidi mai 7 kana, madi towe mai‑ya mai kananihebone,

¹⁵I‑di Sefa bidi mai ati‑ya madi towe mite, mai‑ya hiyare,

“I‑di Yeso owato, i‑di Baoro owato, dai‑ta dai owato awirani.” Madi towe ati ne.

¹⁶Madi towe kanare, hiniya i‑di Sefa bidi mai‑ya waratone, mai‑ya bisine, mai‑ka bora‑ya sibine, madi towe kite ene mai bodi kanani tokamoneni.

¹⁷Yodeo mai toha, Kereko mai toha, Efesiyo‑ya mai wina, Sefa bidi mai tamine‑ya mai mita, mai habi siitona, Yeso‑ya mai ati nakitawahamoneni.

¹⁸Yeso ati‑ya mai nofawaha, mai kama, mai hiyara,

“Towe oda amani. Hibati‑ya madi mai‑ya oda hiyaramaroni.” Mai ati na.

¹⁹Hibati‑ya inawa mai toha, madi towe mai‑ka yama hani‑ya mai kadikamaro, mai‑ka yama hani‑ya mai kakama, mai dama mai naha, mai bai‑ya yama hani‑ya mai sarikaneni. Hibati‑ya yama hani mai hikanika manakone yinero barata wamani 50.000 manakone tohamaro‑ya mai sarikaneni.

²⁰Deoso ati‑ya mai dama mai mita, Deoso‑ya mai nofawahineni.

²¹Baoro atibodi yama‑ya kadike,

“Yerosare‑ya okaboneni. Yerosare‑ya okomabone, Masedoni‑ka mai ohiyara, Akaiya‑ka mai‑ya ohiyara oniya, Yerosare‑ya okomaboneni. Yerosare kobo·oniya, makobote Homa‑ya okomabone owatibodi ati nineni.” Atibodi ati ne.

²²Asiya‑ya Baoro wine, Timoti i‑di Erasito mai fama mai‑ya yosene, Masedoni‑ya mai towaki dai tohabonehe.

Efesiyo‑ka mai dama mai yawa, mai ati kita

²³I‑di Baoro Efesiyo‑ya winasa neya, Yeso hawine tamine‑ya yara mai dama mai ibi weenamoneni.

²⁴19:24 Diyana oni one Atemisi toha.Yara owa i‑di Demetiro yobe bidi‑bona‑ya barata‑ya wamane, yobe bidi‑ya daane, yinero nafi‑ya kayafatene.

“Ai‑ka deoso i‑di Diyana‑ka yobe amane.” Ati ne.

Demetiro‑nima barata‑ya mai wa‑wama, mai‑ka yinero damane.

²⁵Barata‑ya mai wa‑wama mai dama, mai yorotokana, mai‑ya Demetiro haane,

“Owati dai mitahi. Yobe bidi‑ya ai wa‑wama yobe bidi ene ai‑ka yinero damane.

²⁶Baoro ati dai mita, ene dai awane awane.

‘Yama wamani toha‑ya deoso tohaterene.’ Ati tene.

Ati mai dama mai himite, ahi‑ya ati mai himita hine, Asiya nafi‑ya ati mai himite, ati mai hinofawahene.

²⁷Baoro ati‑ya mai tokadabiya, ai‑ka yobe bidi‑ya mai kanikami awiraboneni. Ai‑ka deosa i‑di Diyana‑ka yobe bidi‑ya mai nofamariya, hika yobe webote‑ya mai kamaterabone, ati mai nofamarihi hiteboneni. Bofe‑ya ai wina i‑di Diyana ai nafi nofa, Baoro ati‑ya mai nofa‑mani, Diyana ati‑ya mai nofamara neni.” Demetiro ati nemonane.

²⁸Demetiro ati‑ya mai dama mai mita, mai ati yawi kita, mai haana,

“Diyana amosabote amani. Efesiyo‑ka mai‑ka deosa kitabote amani.” Mai nafi ati nineni.

²⁹Efesiyo‑ya mai wi‑wina mai nafi yawa, Baoro‑ya mai da‑daba mai fama, mai‑ya mai waratona, yara mai yo‑yorotokana‑ke, mai‑ka yobe‑ya mai hiwakamineni. Baoro‑ka da‑daba i‑di Kayo, i‑di Aritako mai fama hibati‑ya mai wi‑wina tohi‑maro‑ka Masedoni‑kaya Baoro‑ya mai dabamaro, mai‑ya mai towakamineni.

³⁰Mai‑ya Baoro tokomakibona ati ne, Yeso ati‑ya mai no‑nofa mai ati barihine.

³¹Yara mai‑ka hidi mai one Baoro ati‑ya mai no‑nofa Baoro‑ka yama hani‑bone‑ya mai daana,

“Baoro, tikamakiriyahi.” Yama hani ati na.

³²Yara mai yo‑yorotokana‑ke, mai‑ka yobe‑ya mai ati kita, yama‑ya mai watora mai yorotokana, yama ohare‑ya mai one haa, yama bara‑ya mai one haa na, yama‑ya mai watora hiniya yama‑ya mai haanineni.

³³I‑di Aresadiri‑ya Yodeo mai waratona mai naha, mai bai‑ya mai hiwakamane, mai‑ya hiyarebonaha.

“Dai ati fawanahi.” Aresadiri yehe ati ne.

Oda‑ya dai ati weeriyahi ati nebona, mai ati fawara, hiyari awirane.

³⁴Aresadiri Yodeo toheya, mai awa,

mai ati fawara, mai ati kita, mai ibi haana,

“Diyana amosabote amani. Efesiyo‑ka deosa kitabote amani.” Mai ati na,

Ora fame‑ya mai ati fawani awirani.

³⁵Mai‑ka yara owa waamise ene mai ati fawanawahani.

“Owati dai mitahi. Efesiyo‑ya dai wi‑wina, dai tamine mai nafi watoneni. Hibati‑ya neme‑ya i‑di Diyana‑ka yati sona, Diyana ka‑kahiyara‑ka yobe webote, yati na, dai na‑nawada mai watoharineni.

³⁶Mai nafi hiwatoni, keyehe hiri·oni awirini. Dai ati fawanahi. Dai yawariyahi.

³⁷Diyana‑ka yama‑ya mai botirihi, Diyana tamine‑ya keyehe‑ya mai hiririhi na, hini yamata‑ba mai dai kakamineniti?

³⁸Demetiro hika mai eyehe mai‑ya weeneba, mai‑ya mai towakamahi, mai‑ya mai bi‑bisi‑kaya. Mahi owa‑kaya mai yorotokaniya, mai tamine‑ya mai mitiya, mai‑ya mai bisinaba awineni.

³⁹Yama bara‑ya dai ati kobona, ai nafi yorotokaniya, dai ati oda mitabani.

⁴⁰Dai yawa, dai ati kita, ai‑ka hidi ai‑ya mai weenaba awineni. Ai‑ya mai haaniya, yama oda watoraba awineni, hiniya dai yawa, dai ati kitaro.

⁴¹Dai tabaro‑ya dai tokomahi.” Mai‑ka yara owa ati nane.

Masedoni, Kereko mai tabori na‑ya Baoro tokane

¹Mai ibi weeni hawa toha, Yeso ati‑ya mai no‑nofa Baoro ati ene mai yorotokana, mai‑ya hiyarane. Baoro ati ene mai ya‑yaina, hiyari hawa tohe,

“Okomini.” Ati ne.

Masedoni‑kaya tokomane.

²Masedoni‑kaya kobone, yakane, mai nafi‑ya hiyare, ati ene mai ya‑yaina, makobote Kereko mai tabori‑ya tokawahane.

³Abariko fama, abariko oharimaki ne‑ya Kereko mai tabori‑ya Baoro wine, makobote Siriya‑ya tokebona, maboro‑ya foyebona, Yodeo mai tamine‑ya mitane. Baoro‑ya mai nabohabone mai ati na, maboro‑ya foyare, Masedoni‑kaya winitoname, hawi‑ya tokomane.

⁴I‑di Baoro tokeya, mai sawe, i‑di Biro bidi Sobado Bereya‑ke sawi, Tesaronika‑ke i‑di Aritako, i‑di Sekodo mai fama, Derebi‑ke i‑di Kayo ohari, Asiya‑ke i‑di Timoti, i‑di Tikiko, i‑di Tirofimo mai na, mai sawi neni.

⁵20:5 Roka i‑di Baoro‑ya sawitaseMai dai toha, Baoro oda yota, Torowadi‑ya oda‑ya mai nimanani.

⁶Firibo‑ya oda marina, baho kita kabi oda hawa toha, maboro‑ya oda foya, oda towaka, oda amoni ai yehe kahare‑nima na‑ya, Torowadi‑ya oda kobokana, oda fidotona, mai tabori‑ya oda kobona, Torowadi‑ya oda amona, oda amoni 7 toha.

Eotiko tamine

⁷Domiko yama soki bide‑ya oda tafabone, oda yorotokana, oda tafi hawa toha, oda‑ya Baoro hiyarane. Mahi owa‑ya oda tokabone, oda‑ya hiyarama, oda‑ya hiyarama, yama soki bai‑ya oda‑ya hiyaramatasa nane.

⁸Yobe nemehe‑ya oda yorotokana, nabarina dama‑ya mai botonabineni.

⁹Yobe fowari‑ka hodi waanaya, yetene i‑di Eotiko itarine. Baoro ati faware ene i‑di Eotiko amone, neme‑ya itari sone, abe, abo mai hidi abo forine.

¹⁰Baoro kisamaki, yetene abe, abo‑ya Baoro wate,

“Sibarebane, hasinane.” Ati nemarine.

Yetene kitamane.

¹¹Baoro tokomisamatase, oda eyehe tafamatase, oda‑ya hiyaramatase, yama wahi‑ya ati fawane tokawahane.

¹²I‑di Eotiko kitame, hini tabaro‑ya mai‑ya towakame, mai nafi ya‑yainamoneni.

¹³Oda dai toha, maboro‑ya oda foyama, Asoso‑ya oda towakabone, Baoro oda‑ya yose, hawi‑ya tokomakine, Asoso‑ya oda‑ya kobonebonaha.

¹⁴Asoso‑ya oda‑ya Baoro kobone, maboro‑ya foyame Mitireni‑kaya oda towakawaha,

¹⁵Mitireni‑ya oda kobona, oda towakatasa, mahi owa‑ya Kio‑ya oda fiyakana, Samoso‑ya oda kobokana, oda towakatasa, mahi owa‑ya Mireto‑ya oda kobokatasa,

¹⁶Efesiyo‑ya Baoro ati tokare,

“Asiya‑ya ai nahoriyahi. Yerosare‑kaya ai towakahi. Benekosi‑ka marina koboniya, Yerosare‑ya ai nahaba awineni.” Ati nane.

Efesiyo‑ka mai‑ya Baoro hiyarane.

¹⁷Mireto‑ya oda wina, Efesiyo‑ka mai‑ka yama hani‑bone‑ya Baoro kanahano,

“Yeso‑ka bote dai toha, Mireto‑ya dai kamakiyahi.” Baoro‑ka yama hani ati nineni.

¹⁸Mai kobona, mai‑ya Baoro hiyare,

“Hibati‑ya dai tabaro‑ya kobo·ona, owina, owa ene dai awamaroni.

¹⁹Deoso ati dai‑ya okamina, owa‑ya okahiyaraterani. Mai atibodi koma, mai eyehe ohi·ona, Yodeo owa‑ya mai kaka, owa‑ya mai nakomamaroni.

²⁰Deoso ati‑ya dai ohiyara, dai okanawata, dai okasoma, onamaroni. Dai yo‑yorotokana‑kaya dai ohiyara, dai tabaro‑ya ohiyara onamaroni.

²¹Yodeo dai one toha, Kereko dai one toha na, dai nafi ohiyara,

‘Ai‑ka Ayo Yeso ati dai nofabone, Deoso‑ya dai‑ya dai kaminahi.’ Oteni.

²²Yerosare‑ya okabone, owatibodi ati ene tohi awirini. Deoso‑ka Doni ati ene Yerosare‑ya okaboneni. Kobo·oniya, owa‑ya mai ni‑bone‑ka yama owato awirini.

²³Ai tabaro dami‑ya Deoso‑ka Doni ati ene‑mona owa‑ya mai hiyarateni.

‘Yerosare‑ya tikiya, kadeya‑ya tiwa‑ya mai nafoyiya, tiwa‑ya mai bisinaboneni.’ Mai ati teni.

²⁴O·abiya, sibaraboneni. Ai‑ka Ayo Yeso owa‑ya yose‑mari ati‑nima owa ene na ya‑yai·onaboneni. Deoso ene ai manakone aba tamine okaminabone ati nemarine.

²⁵Hibati‑ya Deoso ai nafi‑ka Hidi‑bona dai nafi‑ya ohiyaramaro, okomiya, owa dai awamateraboneni.

²⁶Owati dai mitahi. Deoso ati dai nofara‑mani, owa ene tohi awira neni.

²⁷Deoso tamine nafi‑ya dai‑ya ohiyara, owati fawaterani.

²⁸Dai narabo hawihi. Yeso‑ka mai dai nawadahi. Deoso‑ka Doni ati ene mai‑ka hidi‑nima dai na, mai dai nawadabonehe. Hibati‑ya Yeso abe, mai manakone hinahabamaro, dai atibodi yama‑ya watoyahi. Hika mai toha mai dai nawadabone ati nane.

²⁹Owa nowati‑kaya mai one mai kamake, dai‑ya keyehe‑ya mai hirikanaboneni. Yomahi yama‑ke ene‑nima mai ihi naboneni. Yeso‑ka mai‑ya mai nokotonihebone, Satanasi ati‑ya mai tokadababonehe.

³⁰Makobote dai owa hini‑ya kahiyarebona, Deoso‑ka‑mona hini‑ya ati tonihi, Yeso‑ka mai hikahiyarebonaha.

³¹Dai noko wadahi. Dai atibodi yama‑ya watoyahi. Dai ati kadamowamariyahi. Faha fowe fama, faha fowe oharimaki niya, dai ohiyaramaroni. Yama tehe‑ya dai‑ya ohiyara, yama soki‑ya dai‑ya ohiyara oteni.

‘Dai noko wadahi.’ Ona, dai tabiyo ohi·onamaroni.

³²Deoso dai‑ya nawada, dai‑ya kasoma nebona owatibodi ati nineni. Deoso‑ka yama hani dai kadikiya, dai habo kitawahaboneni. Deoso tabaro‑ya, dai kobona, dai nafi‑ya Deoso hika yama‑ya daanebonane.

³³Dai‑ya osawe, dai‑ka yinero, dai‑ka barata, dai‑ka oro, dai‑ka bora na‑ya okayaterani.

³⁴Owa yehe‑ya yama wama·obisa, oda‑ka yinero‑bona okanika, oda‑ka yama‑bone okanika, manakone onahabamaro, oka manakone dai nanahabatera dai watoneni.

³⁵Dai yofi·okana, yama‑ya ani·ona, dai kiyana, dai okasoma, onamaro, owa‑nima dai niyahi. Dai yofi·okanani. Yeso ati‑ya dai ati kadamowamariyahi.

‘Yama‑ya dai‑ya mai daana, Deoso dai‑ya kasomi bi‑bidi, yama‑ya dai daana, Deoso dai‑ya kasomi ba‑basi nibisane.’ Yeso ati nemona,” Baoro ati nemarine.

³⁶Baoro ati fawaneya, mai nafi yobati‑kaya naha, Deoso‑ya mai hiyarineni.

³⁷Deoso‑ya mai hiyari hawa toha, Baoro tokebona ati ne, ene mai ohinawahani. Baoro‑ya mai nofa, Baoro tokebonaya, mai nafi watawahineni.

³⁸“Owa‑ya dai awamateraboneni.” Baoro ati ne,

ati ene mai atibodi koma, maboro‑ya foyebona, tokeya, mai tokomakineni, fai foyi‑ya mai awabonehe.

Yerosare‑ya Baoro tokawahe

¹Mai‑ya oda haana,

“Oda tokini, oda tokini.” Oda ati na.

Maboro‑ya oda foya, Kosi‑ya oda towaka, Kosi oda fiyakana, mahi owa‑ya Hode‑ya oda kobokana, oda towakatasa, Batara‑ya oda kobokana,

²Batara‑ya maboro owa‑ya oda foya, Fenisiya‑ya maboro tokebona, oda foyawaha, oda towaka,

³Sibe yakari‑ya oda kobokana, oda‑ka sayo‑kaya Sibe itaya, oda fiyakana, Siriya‑ya oda towakabone, Siriya‑ka tabora oni Tiro toha, Tiro‑ya oda kobokana, maboro‑ka yama‑ya mai daanabone, yama‑ya mai yama tokamorosa oda tokomorosamake,

⁴Tiro‑ya Yeso‑ka mai one wina, mai tabori‑ya oda amoni 7 toha, Baoro‑ya mai hiyara,

“Baoro, Yerosare‑ya tikarabone Deoso‑ka Doni ati nene.” Mai ati namaroni.

⁵Oda yananama, faha widi‑ya oda tokoma, oda‑ya mai sawineni. Mai makidi, mai fanawi, madehe na, faha widi‑ya oda kobona, Deoso oda hiyarabone, oda yobati‑kaya oda naha, Deoso oda hiyaramatasineni.

⁶“Oda tokini. Oda tokini.” Oda ati na,

Maboro‑ya oda foya, mai tabori‑ya mai tokomabisani.

⁷Maboro‑ya oda towaka, Toremaida‑ya oda kobokana, Yeso‑ka mai one‑ya oda hiyara, mai tabori‑ya oda amoni ohareni.

⁸Mahi owa‑ya oda towakatasa, Sesareya‑ya oda kobokana, Firibi‑ka yobe‑ya oda wina, hibati‑ya mai 7 tohabone mai i‑di Bedoro mai hikadikamaro, fare i‑di Firibi ohari Yeso tamine‑ya hiyaratene.

⁹Firibi‑ka fana atona mai 4 kana mai fani awira, Deoso tamine‑ya mai hiyarateni.

¹⁰Firibi‑ka yobe‑ya oda wina, oda amoni dami‑ya Yodeya‑ya Deoso ati‑ya mi‑mita i‑di Akabo kame,

¹¹I‑di Baoro‑ka sitaraho‑ya waratone, hini teme‑ya soki, mano‑ya soki ne, ati yanane,

“Deoso‑ka Doni ati dai mitahi.

‘Haa‑nima sitaraho hidi‑ya mai sokini naboneni. Yerosare‑ya tokeya, mai sokihineya, Bara mai‑ya mai daahinebonane.’ Ati ne.” Akabo ati nemarine.

¹²Akabo ati oda mita, Baoro‑ya oda ati barina,

“Yerosare‑ya tikariyahi.” Oda ati namaroni.

¹³“Hini yamata ihi dai ohina? Dai ati ene owatibodi koma, Yerosare‑ya owa‑ya mai sokiniya, sibaraboneni. Yeso tamine ene owa‑ya mai nanahabiya, o·abiya, sibaraboneni.” Baoro ati nemarine.

¹⁴Oda ati‑ya Baoro nofare,

“Sibarini. Yeso ati‑nima tinahi.” Oda ati na.

Oda ati fawanamaroni.

¹⁵Makobote oda‑ka yama oda teena, Yerosare‑kaya oda tokatema,

¹⁶Sesareya‑ka mai one oda‑ya daba, Yerosare‑ya oda toka, i‑di Manaso‑ka yobe‑ya oda‑ya mai towakamamaroni, oda winabonehe. Hibati‑ya Sibe‑ya i‑di Manaso winemari, Yerosare‑ya winawahe, hika yobe‑ya oda winawahamaroni. Yeso ati‑ya i‑di Manaso nofane.

Tiyako‑ya Baoro hiyarane

¹⁷Yerosare‑ya oda kobona, Yeso‑ka mai ya‑yainineni.

¹⁸Mahi owa‑ya Baoro oda toka, i‑di Tiyako oda hiyarabone, I‑di Tiyako oda hiyara, Yeso‑ka bote mai toha na,

¹⁹Mai nafi‑ya Baoro hiyare,

“Bara mai‑ya oka, Deoso tamine okamine, mai‑ya ohiyara, Deoso ene kite damemarine.” Ati ne.

Deoso ene kite dame tamine‑ya Baoro kadikemarine.

²⁰Baoro ati‑ya mai mita, Deoso‑ya mai kahiyara, Baoro‑ya mai hiyara,

“Soho, oda ati timitahi. Yodeo mai dama Yeso ati‑ya mai nofawaha, Mose ati‑ya mai nofahari na, Mose ati‑nima mai teni.

²¹Tiwa tamine‑mone‑ya mai mita, Bara mai tabori‑ya tisawiya, Yodeo mai one‑ya tihiyaramone,

‘Dai‑ka madehe sowiri tati atori dai wisinakosariyahi. Mose ati‑nima dai riyahi.’ Titemone mai ati teni.

²²Tikama, tiwa tamine‑ya mai mitibaka amani. Hini yamata‑nima ai nibati?

²³Baoro, oda ati‑nima tiyahi. Ai‑ka mai 4 toha, Deoso ati ene hini mai‑ya mai ati barinineni.

²⁴Mose ati‑mata‑nima mai afinaboneni. Mai tati kone nafi ababone, mai‑nima tiyahi. Tiwa tati kone aba, mai tati kone aba na, manakone tinahaba tiyahi. Tiwa ene‑ya mai awiya,

‘Mose ati‑nima i‑di Baoro ene nane.’ Mai ati naboneni.

Tiwa ene‑ya mai awiya, yama‑ya mai watowahaboneni.

²⁵Mose ati‑ya Bara mai tokadabara, mai sibarineni. Hibati‑ya mai tamine oda kanahanamaroni. Mai‑ka deoso bare tefe‑ya mai kabarihi, ama‑ya mai kabarihi, bani emene abi awire‑ya mai kabarihi, mai fanawi one‑ya mai aharihi, haa‑nima mai niya, mai sibaraboneni. Yodeo mai‑ta Mose ati‑nima mai teboneni.” Tiyako ati nemarine.

²⁶Mahi owa‑ya Baoro mai eyehe afine, mai afini hawa toha, Deoso‑ka yobe‑ya mai toka, mai tamine‑ya Baoro hiyare,

“Makobote oda afinamatasiya, oda kamabani. Oda kamatasiya, Deoso‑ka yama‑ba oda daanaboneni.” Ati nemarine.

Baoro‑ya mai waratona

²⁷Oda amoni 7 tohi yananiya, Deoso‑ka yobe‑ya Baoro waiya, Asiya‑ka Yodeo mai one kamake, mai ati yawa, mai ihi mai one nafi ati yawawaha, Baoro‑ya mai waratoneni.

²⁸Mai ibi haana,

“Isara·eo‑ka nodi dai toha, oda dai kasomahi. Hai, mai tabori dami‑ya toke, mai‑ya hiyare,

‘Mose ati‑nima dai rihi, Yodeo mai‑nima dai rihi, Deoso tabaro‑ya dai tokarihi dai nahi.’ Ati tene.

Fare ahi‑ya Deoso‑ka yobe‑ya Kereko mai‑ya kakame ene Deoso ati yawawahane.” Mai ati namaroni.

²⁹Hibati‑ya Yerosare bai‑ya Efesiyo‑ka owa i‑di Tirofimo, Baoro‑ya fame‑ya mai awa, Deoso‑ka yobe‑ya i‑di Tirofimo‑ya kakame awane, mai atibodi ati namoneni.

³⁰Mai ati ihi mai nafi yorotokana, mai yawa, Baoro‑ya mai waratona, Deoso‑ka yobe yowi‑ya Baoro horoniya mai tokoma, Deoso‑ka yobe nokobiri‑ya mai barikaneni.

³¹Baoro‑ya mai nabohabone, mai tamine‑ya sodado mai‑ka hidi mite,

“Yerosare‑ka mai nafi yorotokana, mai yawi kitamoneni.” Mai ati namoneni.

³²Hika sodado mai eyehe kanani tokomaki, sodado mai‑ya mai awa, Baoro‑ya mai bisinami awirani.

³³Sodado mai‑ka hidi Baoro‑ya damane, sodado mai‑ya haane,

“Koheti fame‑ya dai sokinaho.” Ati nane.

Mai yorotokana mai‑ya haane,

“Oni emenati?

Hini yamata ihi dai waratonati?” Ati nemarine.

³⁴Hini ene tohene, mai one ati nihi, yama bara ihi amani, mai one ati nihi na, yama‑ya mai watora. Mai ati dama mai ati ihi sodado mai‑ka hidi mai ati‑ya mitare, sodado mai‑ya yose,

“Hini dai wi‑wina‑kaya dai towakamaho.” Ati nemarine.

³⁵Sodado hini mai‑ka yobe‑ya Baoro‑ya mai towakamaboneni. Mai dama mai yawa, mai ihi Baoro‑ya sodado mai diwanineni.

³⁶Baoro‑ya Sodado mai towakama, mai nowati‑ya mai dama mai tokomake,

“Abaho, abaho.” Mai ati namaroni.

Baoro mai‑ya hiyare

³⁷Yobe‑ya mai hiwakamebona, sodado mai‑ka hidi‑ya hiyare,

“Owati timitahi.” Ati ne.

“Kereko mai ati tiwatoneni?

³⁸Eyito‑ka mai‑ka owa amatini? Hibati‑ya 4000 mai kana mai one‑ya mai nanahaba, kabani‑kaya mai tokoma, fara mai‑ka hidi amatiraniha?” Sodado mai‑ka hidi ati nemarine.

³⁹“Yodeo ama·oni. Tabora webote Sirisiya‑ka tabora ba‑basi na oni Taso‑ya owadamaroni. Tiwati sibariya, mai ohiyaraboneni.” Baoro ati nemarine.

⁴⁰“Sibarini. Mai tihiyarahi.” Sodado mai‑ka hidi ati nemarine.

Yobe nokobiri‑ya Baoro wai,

“Dai ati fawanahi.” Baoro yehe ati ne.

Mai ati fawana, mai‑ya hiyaremarine. Ebereo mai ati‑ya mai‑ya hiyaremarine.

¹“Oka soho dai toha, okobese dai toha na, dai‑ya owa tamine okaminaboneni.” Baoro ati nane.

²“Se! Ai ati‑nima ati nane.” Mai ati na.

Mai ati fawanineni, fai ati‑ya mai mitabonehe.

³“Yodeo ama·oni. Sirisiya‑ya tabora Taso toha‑ya owa‑ya mai nayanamaroni. Yerosare‑ya i‑di Kamari·eo owa‑ya kanawato, Mose‑ka yama hani nafi‑ya owa‑ya kanawatomarine. Fara dai‑nima ona, Deoso ati onofawahamaroni.

⁴Yeso‑ka hawi‑ya mai sa‑sawi mai‑ya onahaba, mai makidi, mai fanawi na, mai soki·ona, kadeya‑ya mai onafoya onamaroni.

⁵Deoso‑ka yama‑bone‑ya mai da‑daa mai‑ka hidi mai toha, ai‑ka hidi mai toha na, mai nafi owa‑ya watoneni. Hibati‑ya yama hani‑ya owa‑ya mai daana, Damaso‑ya yama hani owakama, Damaso‑ya mai wi‑wina, Yeso hawine‑ya mai sa‑sawi Yerosare‑kaya mai owakamiya, Yerosare‑ya mai mai kosihinabone onamaroni.

⁶Damaso‑ya oka, owa koboni yanatoniya, mahi nokorise‑ya neme‑ya yama wahi kita owa‑ya kobonamaroni.

⁷Yama wahi ihi osa, ati omite,

‘Saoro, Saoro, hini yamata ihi owa‑ya bisitiniti?’ Ati nemarine.

⁸‘Ayo, eme tiwa oni niti?’ Ona,

‘Yeso Nasare‑ke ama·oni. Owa‑ya bisitineni.’ Ati nemarine.

⁹Owa‑ya mai sa‑sawi, yama wahi kita‑ya mai awa, mai habi siitonani. Owa‑ya hiyare, ati mai himite ati mai hiwatoremarine.

¹⁰‘Ayo, hini yamata‑nima obati?’ Ona,

‘Tiwaamisamiya, Damaso‑ya tikahi. Damaso‑ka tiwa‑ya mai hiyaraboneni. Deoso‑ka yama anitinabone tamine timitaboneni.’ Ati nemarine.

¹¹Yama wahi kita ihi yama oawamara, owa yehe‑ya mai damana, Damaso‑kaya owa‑ya mai towakamaroni.

¹²Damaso‑ya Ananiya wine, amose, Mose ati‑nima ne, Yodeo mai nafi hinofatene.

¹³Owa‑kaya kame, wai, owa‑ya hiyare,

‘Soho Saoro, yama tiawahi.’ Ati ne.

Ati ene, owa noko amosawama, Ananiya oawawahamaroni.

¹⁴Owa‑ya hiyaramaki,

‘Deoso ai‑ka idi mai‑ya no‑nofa‑mata tiwa‑ya kadike, Deoso‑ka Ka‑kadika amosabote‑ya tiawawaha, ati timitawahene.

¹⁵Yama tiawa tamine tihiyara, ati timite ati tamine tihiyarawahebonane mai dami‑ya.

¹⁶Hibayata tiwa‑ya mai habanirisahi. Tiwa ene‑maro‑nima tiwa ene namarabone, ai‑ka Ayo haatiniya, Deoso tiwa‑ya ati somawamebonane.’ Ananiya ati nemarine.

¹⁷Makobote Yerosare‑ya okomatasa, Deoso‑ka yobe‑ya owitare, Deoso‑ya ohiyara, wada‑nima yama na oawawahamaroni.

¹⁸Neme‑ya ai‑ka ayo oawe, owa‑ya hiyare,

‘Tokoma kanibote tinahi. Yerosare‑ya tiwinariyahi. Ahi‑ya mai wi‑wina mai‑ya owa tamine tihiyariya, tiwati‑ya mai nofateraboneni.’ Ati nemarine.

¹⁹‘Ayo, tika mai bisi·onamaroni. Tiwa‑ya ai hi‑hiyara‑ke yobe‑ya mai toka, tiwa‑ya mai hiyarabone, mai kosi, mai onafoya, onamaro, yama‑ya mai watoneni.

²⁰Tika soho i‑di Tefaho yati‑ya mai nanahaba, mai‑ya osawe ihi ya‑yai·ona, mai‑ka bora mai tanihina onawadamaroni.’ Ona,

²¹Owa‑ya hiyare,

‘Tokoma kanibote tinahi. Yama yaki‑ya tiwa oyoseboneni, Bara mai‑ya.’ Ati ne.” Baoro ati nemarine.

²²Bara mai tamine‑ya mai mita, mai ati yawa, sodado mai‑ya mai haana,

“Abaho, abaho dai towakamaho.” Mai ati namaroni.

²³Mai haani kita, mai‑ka bora‑ya mai tanina, wami hibakori‑ya mai weretomisa namaroni, mai yawaro.

Sodado mai‑ka hidi‑ya Baoro hiyare

²⁴Sodado mai‑ka hidi ati ene sodado mai hiwakamane, hini mai‑ka yobe doro‑ya mai bisihinebonaha.

“Hini yamata ihi mai ati yawiti? Bisi·oneya, owatowaheba awane.” Sodado mai‑ka hidi atibodi ati nemonane.

²⁵Baoro‑ya mai sokina, mai yadihine, mai kosihinebona, sodado mai‑ka hidi owa‑ya Baoro hiyare,

“Homano ama·oni. Owa tamine mai kadiki awisariya, owa kositiniya, tiwa‑ya homano mai ati yawaboneni.” Baoro ati nemarine.

²⁶Baoro ati‑ya sodado mai‑ka hidi owa mite, mai‑ka hidi owa ba‑basi ne‑ya tokome, hidi‑ya hiyare,

“Tiwa noko wadahi. Homano owa i‑di Baoro amane.” Ati nemonane.

²⁷Mai‑ka hidi owa ba‑basi ne i‑di Baoro‑ya kamaki,

“Homano owa amatini?” Mai‑ka hidi ati ne.

“Hehe, homano ama·oni.” Baoro ati ne.

²⁸“Yinero nafi daa·ona, yinero ene homano ama·oni.” Mai‑ka hidi ba‑basi ne ati ne.

“Okobi homano tohemata, homano ama·oni.” Baoro ati nemarine.

²⁹Baoro‑ya mai bisinabone mai habi siitona, mai tokoma kanibote na, homano sokikane ene mai‑ka hidi habo siitonahari ne,

“Owa‑ya mai bisinaba awineni.” Hidi atibodi ati nemonane.

³⁰“Hini yamata ihi Baoro‑ya mai bisinaba amaniti?” Ati ne.

Yama wahi one‑ya Baoro‑ya kakasawame, Yodeo mai‑ka hidi mai toha, Deoso‑ka yama‑bone‑ya mai da‑daa mai‑ka hidi mai toha na, mai‑ya haane, mai kama, mai noki‑ya Baoro‑ya nawaane.

¹Yodeo mai‑ka hidi mai‑ya Baoro kakatome, ati yanane,

“Ayo, Soho, owati dai mitahi. Owa‑ya Deoso kakoterebonane, owa ene amosateni.” Baoro ati nemarine.

²Deoso‑ka yama‑bone‑ya mai da‑daa mai‑ka hidi Ananiya ati ene Baoro bono‑ya mai batanarineni.

³Baoro ati yanane,

“Deoso tiwa‑ya batanaharibona, tiwati‑nima tiwa ene toharani. Mose ati‑nima tiwa ene nabone tina, Mose ati‑nima tiwa ene toharani. Mai ati sibara toha, mai batatiriyahi, Mose ati ne. Owati sibara toha, tiwa ene owa‑ya mai batana, tiwa ene towe tohani.” Ati nane.

⁴Ahiyata‑ya mai naha, Baoro‑ya mai hiyara,

“Deoso‑ka yama‑bone‑ya mai da‑daa mai‑ka hidi weetiriyahi.” Mai ati na.

⁵“Se! Deoso‑ka yama‑bone‑ya mai da‑daa mai‑ka hidi webote‑no owatore‑ya wee·onani. Deoso‑ka yama hani ati ihi ai‑ka hidi ai weeterani.” Baoro ati nemarine.

⁶Baoro mai‑ya kiine, mai one fariseo toha, mai one sadoseo toha na, mai‑ya Baoro haane,

“Ayo, soho, owati dai mitahi. Fariseo ama·oni. Okobi fariseo tohemarine.

‘Ai owa abe, kitamane.’ Ona,

fara owati ihi owa‑ya mai bisinaboneni.” Baoro ati nemarine.

⁷Baoro ati‑ya mai mita, mai ibi weena, fariseo mai‑ya sadoseo mai wee, sadoseo mai‑ya fariseo mai weenahari namoneni.

⁸Sadoseo mai ati,

“Ai aba, ai kitamaterani. Ai abi ohariteni. Deoso‑ka yo‑yose mai awirihi, madi mai awirihi teni.” Mai ati teni.

Fariseo‑ta mai ati,

“Ai aba, ai kitamateni. Deoso‑ka yo‑yose mai toha, madi mai toha, mai teni.” Fariseo mai ati teni.

⁹Mai ibi hiyara,

“Ati sibare, Deoso‑ka yo‑yose ati‑ya mitate awane. Ai weerayaho. Deoso ai‑ya bisirayaho.” Fariseo mai one Mose‑ka yama hani ati‑ya mai ka‑kamina mai ati namaroni.

¹⁰Mai ibi weeni fawara,

“I‑di Baoro‑ya mai nabohibaka amani.” Sodado mai‑ka hidi atibodi ati ne.

Sodado mai‑ya yose,

“I‑di Baoro dai dodimakiya, dai kakamaho. Ai‑ka yobe‑ya mai hinaboharayaho.” Ati nemarine.

¹¹Yama soki‑ya Yeso kaki, Baoro fowari‑kaya wai, Baoro‑ya hiyare,

“Baoro, tiwa habo kitahi. Yerosare‑ya owa tamine tihiyaramaro, makobote Homa‑kaya owa tamine tihiyaramakeboneni.” Yeso ati nemonane.

Baoro‑ya mai ati nanahaba

¹²Yama wahabisari‑ya Yodeo mai yorotokana, mai ibi hiyara,

“Baoro ai nanahabahi. Baoro ai nanahabi awiriya, ai tafamarihi, faha ai fawamarihi, ai naboneni. Baoro ai nanahabi hawa tohiya, ai tafama, faha ai fawama, ai naboneni.” Mai ati namoneni.

¹³Haa‑nima 40 mai fiyakana, mai ati nineni.

¹⁴Deoso‑ka yama‑bone‑ya mai da‑daa mai‑ka hidi mai toha, Yodeo mai‑ka hidi mai toha na, mai‑ya mai toka, mai‑ya mai hiyara,

“Hini oda‑ya oda ati barina, Baoro oda nananahabi awiriya, oda tafamaraboneni.

¹⁵Sodado mai‑ka hidi dai haaniya,

‘Baoro tiwakamahi, ati oda mitamatasebonaha.’

Dai ati niya, Baoro‑ya kakameya, hawi‑ya oda kemoya, kameya, oda nanahabebane.” Mai ati namoneni.

¹⁶Mai‑ya mai kemabone mai tamine‑ya Baoro‑ka bidimi mite, kadeya‑ya tokomaki, Baoro narabo‑ya hika bidimi kaminane.

¹⁷Sodado mai‑ka hidi owa‑ya i‑di Baoro haane,

“Tika hidi‑ya oka bidimi tiwakamahi, hiyarebonaha.” Baoro ati nane.

¹⁸Baoro‑ka bidimi‑ya sodado towake, hidi‑ya hiyare,

“Baoro sokine ati ene hika bidimi owakamani, ati timitebonaha.” Ati nane.

¹⁹Baoro‑ka bidimi yehe‑ya sodado mai‑ka hidi damane, mai awiri‑kaya fai‑ya towakame,

“Tiwati omitahi.” Ati ne.

²⁰“Yodeo tiwa‑ya mai haanaboneni.

‘Mahi owa‑ya Baoro tiwakamahi, tamine oda miti ba‑basi nebonaha.’ Mai ati naboneni.

²¹Mai ati tinofariyahi. Hawi‑ya 40 mai fiyakana mai kemabone, mai ibi hiyara mai ati nani. Mai tafamarihi, faha‑ya mai fawamarihi ni‑ya, Baoro‑ya mai nabohiya, mai tafama, faha‑ya mai fawama naboneni. Hawi‑ya tiwa‑ya mai kema, tiwa‑ya mai nimanineni.” Baoro‑ka bidimi ati nemonane.

²²Ati‑ya mite,

“Sibarabani. Tiwa tabaro‑ya tikamahi. Owa narabo tikamina, mai one‑ya tihiyarariyahi.” Sodado mai‑ka hidi ati nemonane.

I‑di Feri‑ya Baoro tokawahe

²³Sodado mai‑ka hidi mai bi‑bidi na mai fama mai‑ya haane,

“Dai‑ka sodado mai 200 kana mai dai haaniya, yama‑ya mai nimaniyahi. Sesareya‑ya mai tokabone, Sodado mai 70 kana kafaro‑ya itari‑ya mai dabiyahi. Sodado mai one 200 kana wabise‑ya mai aka, mai‑ya mai daba nahi. Yama soki 9 ora‑ya dai tokaboneni.

²⁴Kafaro owa dai nasawi, mese‑ya i‑di Baoro itari‑ya. Ai‑ka kofenado i‑di Feri‑ya i‑di Baoro dai towakamahi, Baoro‑ya mai nanahabariyahi.” Sodado mai‑ka hidi ati ne.

²⁵Feri‑ka yama hani‑bone‑ya kanahano,

²⁶“Ayo Feri, tika soho i‑di Karaodio Risiyasi ama·oni. Oka yama hani tikadikiyahi.

²⁷Hibati‑ya Baoro‑ya Yodeo mai wata, mai hinahabebona, Baoro homano‑mona tamine omite, oka sodado mai hiwakamane, mai hinahabarebonaha.

²⁸Yodeo mai‑ka hidi mai one‑ya Baoro owakama, mai‑ya ohiyara,

‘Hini yamata ihi Baoro‑ya dai watiti?’ Ona.

²⁹‘Mose ati‑ya Baoro nofarene.’ Mai ati na,

‘Haa‑nima ne, towe tohi awire, sibarane. Haa‑nima ne, ai sokirihi, ai nanahabarihi tene.’ Owatibodi ati nani.

³⁰Yodeo hawi‑ya hini mai‑ya mai tamine kemani, Baoro‑ya mai nanahababonehe. Hawi‑ya mai nahamone, mai tamine omita, tiwa‑ya Baoro oyoseni. Makobote fai‑ya mai ka‑kako tiwa‑ya mai oyosebani, mai ati timitabonehe. Feye amani.” Sodado mai‑ka hidi‑ka yama hani ati nineni.

³¹Sodado mai‑ka hidi ati ene Baoro‑ya sodado mai towakamineni. Yama soki‑ya mai hiwakame, Atibatide‑ya mai kobonineni.

³²Yama wahabisari‑ya Atibatide‑ya sodado mai one wininama, kafaro mai toha, kafaro mese‑ya Baoro itarine mai tokomineni.

³³Sesareya‑ya mai kobona, kofenado‑ya yama hani‑ya mai daa, Baoro‑ya mai daa, mai nineni.

³⁴Yama hani‑ya kofenado kadike,

“Ebeni‑ya tiwa tabaro toha titi?” Kofenado ati ne.

“Sirisiya‑ya owa tabaro tohani.” Baoro ati ne.

³⁵“Tiwa‑ya mai ka‑kako mai kamakiya, tiwati omita, mai ati omita onaboneni.” Kofenado ati ne.

Erodi‑ka yobe‑ya Baoro‑ya mai nafoyawahineni.

Feri‑ya Baoro hiyarane

¹Amoni 5 toheya, Deoso‑ka yama‑bone‑ya mai da‑daa mai‑ka hidi i‑di Ananiya, Yodeo mai‑ka hidi mai one toha, i‑di Tetoro ne, mai kamakeni, i‑di Feri‑ya i‑di Baoro tamine mai hiyarabonehe. I‑di Tetoro ati yanani amosi ba‑basi tene.

²Baoro‑ya mai haana, Baoro tamine‑ya Tetoro hiyare,

“Feri, owati timitahi. Amosabote amatini. Tika yama wato ihi oda‑ya mai nofawaha, tiwa ene oda tabaro nafi amosi ba‑basi nineni.

³Tiwa ene amosa, tiwa oda nofi nafineni.

⁴Owati damaraboneni. Owati fa‑famaraba naboneni.

⁵Baoro ati kasiro, ati ene Yodeo mai dama mai yorotokana, mai yawi kitineni. Nasare‑ka mai‑ka hidi Baoro amane.

⁶Baoro ene Deoso‑ka yobe towe tohebona, oda waratonane. Mose ati‑nima oda nabone,

⁷I‑di Risiyasi‑ta oda‑ya bisine, Baoro‑ya towakamene.

⁸Risiyasi oda‑ya yosene, tiwa‑ya. Oda ati timitiya, Baoro towe‑ya tiwatowahaboneni.” Tetoro ati nemonane.

⁹“Hehe, Tetoro ati‑nima yama tohani.” Yodeo mai nafi ati nineni.

¹⁰Baoro ati‑ya Kofenado mitebona, yehe‑ya Baoro‑ya haane, Feri‑ya Baoro hiyarawahe,

“Wana mai ati dami‑ya oda dami‑ka yama‑ya tikadikateni. Owati timitiya, yama tiwatowahaboneni.

¹¹Ai amoni 12 kana‑ya Yerosare‑ya okaroni, Deoso‑ya okahiyarabonehe.

¹²Owa‑ya mai we‑wee owa‑ya mai awiya, Deoso‑ka yobe‑ya mai wee·orihi, Deoso‑ya mai hi‑hiyara‑ke yobe bi‑bidi ne‑ya mai wee·orihi, sidadi‑ya mai wee·orihi, owati ihi mai ibi weerihi teni onaroni.

¹³Owa ene‑mone mai ati na, owa ene tohi awirani. Keyehe‑ya mai hirinineni.

¹⁴Nasare‑ka ama·oni mai ati na, fara ama·oni. Deoso‑ka hawi‑ya Nasare‑ka mai sa‑sawi‑nima osawi, Deoso‑ya mai kahiyara‑nima okahiyara, Deoso ati‑ya i‑di Mose kanahanomata, ati‑ya mai mi‑mita‑mete mai kanahano na, ati onofa oteni.

¹⁵Mai ihi amosamaro, mai ihi amosaramaro mai na, mai aba, mai kitamabone Deoso ati nemata, ati‑nima yama nabone‑ya mai nimana, fara nima·onahari teni.

¹⁶Deoso ati nima·ona ene owa noko wadateni, owa ene amosabonehe. Deoso ohiyariya, owatibodi owa‑ya weerihi, ai one‑ya ohiyariya, owatibodi owa‑ya weerihi teni.

¹⁷Wana mai ati dami‑ya yama yaki‑ya owinamaro, hibayata okoma, oka mai dami‑ka yinero‑bona owakama, Deoso‑ka yama‑bone daa·onabone onani.

¹⁸Deoso‑ka yama‑bone daa·ona, Deoso‑ka yobe‑ya owitare, Yodeo mai one Asiya‑ka kamake, owa‑ya mai awa, owa hare owa‑ya mai nahori awira. Mai wee·oni awirani.

¹⁹Owa ene towe‑mani, tiwa‑ya mai kama, owa tamine tiwa‑ya mai kamina neni.

²⁰Oda‑ka hidi mai noki‑ya owaa, owati‑ya mai mita, owa ene amosarihi na‑mone mai ati na, owa ene‑ya mai kaminahi.

²¹Owati ohare‑ta towe toha awineni. Mai bai‑ya owaa, mai‑ya ohiyarineni.

‘Ai aba, ai kitamabone tamine okamina ihi owa‑ya mai watani.’ Ona.

Owati yanara‑mani, sibara neni.” Baoro ati nemonane.

²²Baoro ati fawaneya, Deoso hawine tamine‑ya Feri watowahe, mai‑ya hiyarawahe,

“Hibareya, sodado mai‑ka hidi webote i‑di Risiyasi kame, ati omitamataseya, owatowahebonane.” Feri ati nane.

²³Sodado mai‑ka hidi‑ya hiyare,

“Baoro‑ya tika sodado sawiho. Honita tohe sibare, hiniya kanarayaho. Hika mai ati yobiniya, Baoro‑ya mai kasoma, mai yobiniyahi.” Feri ati nemonane.

²⁴Makobote Feri fadi‑ya fame Baoro ati‑ya mai mitabone, mai kakamineni. Feri Yodeo one‑ya idimari, fadi oni Dosira toha,

“Yeso Kirisito ati tinofe tamine omitebonane.” Feri ati nane.

²⁵“Yeso ati ai nofiya, ai ene amosa, Yeso ati‑nima ai naboneni. Makobote ai ene‑ya Deoso kadikebonane.” Baoro ati ne.

Ati ene Feri habo siitone,

“Tikamahi. Tiwati omitamatasaba awineni.” Feri ati nane.

²⁶“Baoro ati omitanadiya, yinero‑ya owa‑ya daaneba awane, see·okanebonaha.” Feri atibodi ati ne.

Baoro hiyare, ati‑ya kamitanadine.

²⁷Wana mai ati famamakiya, i‑di Bosiyo Fesito kofenado tohawahe, Feri kofenado tohami awire, hiniya tokomane. Yodeo mai‑ya ya‑yainihibona, Baoro seekani awire, yaditone waasa nane.

I‑di Fesito Baoro ati‑ya mitawahe

¹I‑di Fesito kofenado tohawahe, Sesareya‑ya winawahe, amoni fama, amoni oharimaki ne‑ya Yerosare‑ya tokatemakine.

²Yerosare‑ya Deoso‑ka yama‑bone‑ya mai da‑daa mai‑ka hidi mai toha, Yodeo mai‑ka hidi mai toha na, Fesito‑ya mai hiyara,

“Baoro ati kasirone.

³Yerosare‑kaya mai hiwakamaho.” Mai ati na.

“Mai hiwakameya, ai kemoya, ai nanahabebane.” Mai atibodi ati na.

⁴Mai ati‑ya Fesito mite,

“Baoro Sesareya‑ya winebonane. Owa amoni fa‑famaraba niya, okomakeboneni.

⁵Owa‑ya dai‑ka hidi mai sawihi. Baoro ati kasiromona dai ati na, aka‑ya mai ati omitabani.” Fesito ati nemonane.

⁶Yerosare‑ya ai yehe kafama‑nima amoni ne, Sesareya‑ya tokomaki, amoni oharimaki‑ya sodado‑ya yosene, Baoro‑ya Sodado kakamebonaha.

⁷Baoro kobone, Yodeo Yerosare‑ya mai kama, mai yorotokana, Baoro tamine‑ya mai hiyara,

“Baoro ati kasiro, ene amosare, Mose ati tamine‑ya mai‑ya keyehe‑ya hiri kitine.” Mai ati na.

“Mai ati‑nima Baoro ene tohare awane, yama owato awirini.” Fesito atibodi ati ne.

⁸Baoro ati yanane,

“Owa ene amosa, Mose ati‑nima oteni. Deoso‑ka yobe bisa·oniterani. Ai nafi‑ka hidi i‑di Sesa tamine‑ya keyehe‑ya hiri·oterani. Owa ene amosabisineni.” Baoro ati nane.

⁹Yodeo mai‑ya Fesito ya‑yainihibona, Baoro‑ya hiyare,

“Yerosare‑ya ai towakamabone ona, tiwati sibakarini? Yerosare‑ya tiwati omitamatasiya, yama owatowahaba awineni.” Ati nane.

¹⁰Baoro ati yanane,

“Homano ama·oni. Homano ai toha, ai ene‑ya Sesa‑ka mai kadikateni. Sesa‑ka amatini. Yodeo mai‑ya owa ene towe tohara tiwatoneni.

¹¹Owa ene towe toha‑mone tina, owa ene owa tinahababone tina, owa tinahabahi. Sibaraboneni. Mai ati‑nima owa ene tohara, fara mai‑ya owa daatiteraboneni. I‑di Sesa‑ya owati tokabisineni.” Baoro ati nane.

¹²I‑di Fesito hika mai‑ya hiyare,

“Hini yamata‑nima obati?” Ati ne.

Baoro‑ya hiyare,

“Sesa‑ya tiwati toka, tiwa oyosebani.” Fesito ati nane.

Akiriba hika asima‑ya fame‑ya Baoro hiyarane.

¹³Makobote Sesareya‑ya mai‑ka hidi i‑di Akiriba, hika asima i‑di Berenisi eyehe kobonane, Fesito‑ya hiyarebonaha.

¹⁴Sesareya‑ya mai amoni dami‑ya mai‑ka hidi i‑di Akiriba‑ya Baoro tamine‑ya Fesito hiyarawahe,

“Hibati‑ya i‑di Feri wineya, ai sokine wai, Feri seehikani awire, hini ati ene sokikane waasa nane.

¹⁵Yerosare‑ya oka, Yodeo owa‑ya mai haanani, Baoro onahababonehe. Deoso‑ka yama‑bone‑ya mai da‑daa mai‑ka hidi mai toha, mai‑ka bote mai toha, mai na, owa‑ya mai haanani.

¹⁶Hiniya ai one‑ya ai nanahabaterani. Mai ibi kako kofina, mai ibi hiyara, mai ati‑ya ai mita teni. Mai ati ai mitiya, yama nafi ai watoteni. Homano ai ati teni. Yama nafi‑ya ai wata, mai ihi towe toha, mai aba, mai ihi towe tohara mai abarihi teni.

¹⁷Owa‑ya mai sa‑sawi ahi‑ya oda kobona, oda amoni ohari‑ya Baoro‑ya haa·onani, ati omitebonaha.

¹⁸Baoro‑ya mai kako kofina, mai ati omita, Baoro ene towe‑mona mai ati na, ene bare‑ta tamine‑ya mai kaminabisa, ene towe yokana tamine mai kamini awirani.

¹⁹Hiniya ai owa abe tamine‑ya mai hiyara, mai ibi weenineni. Yeso abe, kitamemona Baoro ati ne, ati ene Baoro‑ya mai kako kofinineni.

²⁰Mai ati owatora, i‑di Baoro‑ya ohiyara,

‘Yerosare‑ya ai tokahi. Tiwa tamine‑ya mai kaminiya, tiwa tamine owatowahaboneni.’ Onani.

²¹Yerosare‑ya Baoro ati toki nofare, Sesa Akosito‑kaya tokabisebona ati ne. Ati ene Sesa‑kaya oyosebona, sokikane waasa nane.” Fesito ati ne.

²²“Fesito, maki ati miti onofini.” Akiriba ati ne.

“Yama wahabisari‑ya ati timitaminebane.” Fesito ati nane.

Akiriba‑ya Baoro hiyarane

²³Yama wahabisari‑ya Akiriba Berenisi‑ya fame mai‑ka bora amosabote‑ya mai sakona, yobe webote‑ya mai demenarineni. Sodado mai‑ka hidi, yara bote mai toha na, mai eyehe mai nahoneni. Fesito ati ene i‑di Baoro‑ya mai kakamakineni.

²⁴Akiriba mai‑ya i‑di Fesito hiyare,

“Hidi Akiriba, dai nafi na, owati dai mitahi. Baoro dai awahi. Yodeo mai dama owa‑ya mai weena, Baoro‑ya onahababone mai ati nani. Yerosare‑ya mai wi‑wina mai ati toha, ahi‑kaya mai kama, mai ati toha, mai na, Baoro onahababone mai ati nani.

²⁵Ene sibarene, haa‑nima ai ene na, i‑di Sesa nanahabaterene. Sesa Akosito‑ya tokebona ati ne, Homa‑ya oyosebonane.

²⁶Sokikane Sesa‑ya tokebona, mai ihi towe tamine ai kanahanoteni. Baoro sokikane Sesa‑ya tokebona, hini yamata ihi tamine ai kanahanobati? Tamine owato awire, dai nafi‑ya owakamane, ati dai mitebonaha. Hidi Akiriba, ati timiteya, yama ai kanahano‑ya owataba awineni.

²⁷Sokikane ai yose, mai ihi tamine ai kanahano awiriya, yama ati kasiraboneni.” Fesito ati nemonane.

¹“Baoro, tiwati omitaboneni.” Akiriba ati ne.

Baoro yehe daatone, ati yanane,

²“Hidi Akiriba, owati timitabone, ya‑yai·oneni. Towe oha‑mone Yodeo mai ati na tiwatowahaboneni.

³Yodeo mai ihi tiwatoteni. Mai ibi weena, mai tiwato tina, owati timita, tiyawariyahi.

⁴Hibati‑ya yetene ohiya, Yerosare‑ya mai‑ya odaba, owa ene‑ya Yodeo mai watoneni.

⁵Fariseo mai one ihi‑nima owa ene namaro‑ya mai watoneni. Owa ene‑ya mai awamaro, owa ene tamine‑ya mai hiyari awirani.

⁶Hibati‑ya oda‑ka idi mai‑ya i‑di Deoso hiyaremata, Deoso ati onofe ene owa‑ya mai ati nanahabi kofinineni.

⁷Isara·eo‑ka nodi mai‑ya Deoso hiyaremata, mai‑ya kasomebona ati ne. Oda‑ya kasomebona oda nafi nimanineni. Oda‑ya kasomebona ati nemata‑nima owa‑ya kasomebona ona, owa‑ya mai kaka, owa‑ya mai ati nanahabateni.

⁸Ai owa abe Deoso hinakitame, hini yamata ihi dai kasawariti?

⁹Hibati‑ya Yeso Nasare‑ke okako, Yeso‑ya mai no‑nofa mai okakoharemaroni.

¹⁰Yerosare‑ya Yeso ati‑ya mai no‑nofa mai bisi·onamaroni. Deoso‑ka yama‑bone‑ya mai da‑daa mai‑ka hidi mai ati ihi Yeso ati‑ya mai no‑nofa kadeya‑ya mai onafoya, makobote mai‑ya mai nanahaba, mai ihi ya‑yai·onamaroni.

¹¹Deoso‑ya mai hi‑hiyara‑ke yobe dami‑ya oka, mai bisi·onani, Yeso oni‑ya mai towe tonihebonehe. Owa yawi kita, wami bara‑ya mai siba·onabone, okamaroni.

¹²Fara mai‑ya owatabone, Damaso‑ya okomakineni. Deoso‑ka yama‑bone‑ya mai da‑daa mai‑ka hidi mai‑ka yama hani dama·okanani, mai‑ya owatabonehe.

¹³Hidi Akiriba, Damaso hawi‑ya yaka·ona, mahi nokorise‑ya neme‑ya yama wahi kake, oawa, owa‑ya mai sa‑sawi mai toha na, oda‑ya yama wahi kobona, mahi wehene‑ya fiyakanamaroni.

¹⁴Yama wahi ihi oda nafi sona, ati omite, ebereo oda ati‑nima ati ne, owa‑ya hiyare,

‘Saoro, Saoro, hini yamata‑bone owa‑ya bisitiniti? Tiwa‑ta tiwa komene kitaboneni.’ Ati nemarine.

¹⁵‘Ayo, eme tiwa oni niti?’ Ona.

‘Yeso ama·oni. Owa‑ya bisitinani.

¹⁶Tiwaamisamahi. Tiwa oyosewahaboneni. Hibayata yama tiawa tamine tihiyaraboneni. Makobote yama one yofi·okanamakiya, tamine tihiyaraboneni.

¹⁷Tiwa‑ya mai watiya, tiwa okasoma, Yodeo tiwa‑ya mai watiya, tiwa okasoma, Bara mai‑ya tiwa oyose, tiwa okasoma onaboneni.

¹⁸Owa tamine Bara mai‑ya tihiyariya, mai noki weetokana‑nima mai nabone, hibayata yama soki‑nima na‑ya mai wina, tiwati‑ya mai mitiya, yama tehe‑nima na‑ya mai winawahaboneni. Satanasi‑ka mai tohamarabone, Deoso‑ka mai tohaboneni. Mai‑ya owati somawamabone, owati‑ya mai one nofa‑nima yama amosa‑ya mai kayafaboneni.’ Yeso ati nemarine.

¹⁹Hidi Akiriba, neme‑ya ati omite, ati‑nima oteni.

²⁰Damaso‑ya Deoso tamine ohiyara, Yerosare‑ya, Yodeya‑ya Deoso tamine ohiyara, Bara mai‑ya Deoso tamine ohiyaramaki, oneni, Yeso ati‑ya mai nofabonehe.

‘Deoso‑ya dai‑ya dai kamina, dai ati‑nima dai ene nawawahi.’ Onani.

²¹Owati ihi Deoso‑ka yobe‑ya owa‑ya Yodeo mai waratonani, owa‑ya mai nanahababonehe.

²²Deoso owa‑ya kasomanadi ene hasi·ona, hidi mai toha, mai ati kita mai‑ya ohiyara, hidi mai tohara, mai ati kitara mai‑ya ohiyara ona, i‑di Mose ati‑mata‑nima yama nawaha, Deoso ati‑ya mai mi‑mita‑mete mai ati‑nima yama nawaha, tamine okamina oteni.

²³‘Kirisito komene kitebona, mai hinahabebona, abeya, kitamebonane. Kirisito kitami bahe, ai‑ya nakitamaharibonane. Kitame ene yama wahi‑nima Yodeo mai awa, Bara mai awa nabone, Deoso hawine‑ya mai watowahaboneni.’ Mose ati tohe, Deoso ati‑ya mai mi‑mita‑mete mai ati toha neni.” Baoro ati nemonane.

²⁴Ati‑ya Fesito mite, Baoro‑ya haane,

“Baoro, ka‑kana amatini. Yama hani nafi tikadika, tiwa tati tohiya awineni.” Fesito ati nane.

²⁵Ati‑ya Baoro mite, ati yanane,

“Kofenado Fesito, ka‑kana oni awirini. Owati‑nima yama neni. Owati amosani.

²⁶Yama tamine okamina‑ya hidi Akiriba watone, owa habo siitora, yama‑ya Akiriba awemarine. Owatibodi ati nineni. Haa‑nima yama na kemoterani.

²⁷Hidi Akiriba, Deoso ati‑ya mai mi‑mita‑mete mai ati tinofiraniha? Mai ati tinofamone owatibodi ati neni.” Baoro ati nane.

²⁸Akiriba ati yanane,

“Baoro, tiwati fa‑famaraba niya, Yeso ati onofabone tina awineni.” Ati nemonane.

²⁹Ati‑ya Baoro mite, ati yanane,

“Owati fa‑famaraba na toha, owati dama toha na, Deoso ati tinofabone owati nofani. Owati dai nafi mita, owa‑nima dai na‑mani, yama amosa neni. Koheti‑ya soki·okana‑nima dai‑ya owati sokini nofarani.” Ati nemonane.

³⁰Baoro ati fawane, Hidi Akiriba, kofenado Fesito, Berenisi, mai one naho na, mai nahomisa, mai tokomineni, mai nafi.

³¹Yobe kote‑kaya mai toka, mai ibi hiyara,

“Ati sibarane. Haa‑nima ai ati na, ai nanahabarihi, ai sokikarihi ai teni.” Mai ati na.

³²“Sesa‑ya ati koboni awire‑mana, ai seekane nane.” Fesito‑ya i‑di Akiriba ati nemonane.

Homa‑ya Baoro tokawahe

¹Itariya‑ya oda tokabone, i‑di Yoriyo‑ya Baoro‑ya mai daana, mai one sokina‑ya mai daanineni, i‑di Yoriyo mai hiwakamabonehe Itariya‑kaya. Sesa Akosito‑ka sodado hidi i‑di Yoriyo tohane.

²Adaramitio‑ke maboro Asiya‑ka faha kabane‑ya tokebona‑ya oda foyineni. I‑di Aritako oda‑ya sawi, hika tabora bide oni Tesaronika toha, hika tabora webote oni Masedoni toha nineni.

³Mahi owa‑ya Sidoho‑ya oda kobona, Sidoho‑ya Yoriyo ati ene i‑di Baoro hini hika mai‑ya tokane, Baoro‑ya mai kasomabonehe. Yoriyo Baoro‑ya nofane, Baoro‑ya kasome ene Baoro ya‑yainebonane.

⁴Maboro‑ya oda foyama, oda towaka, Sibe yakari‑ya oda towaka, yama hakikini ihi oda towaki amosarani.

⁵Sirisiya‑ya oda fiyakana, Banafiriya‑ya oda fiyakanamake, Risiya‑ka tabora bide Mira‑ya oda kobokanineni.

⁶Mira‑ya maboro owa Aresadiriya‑ke tohe, Itariya‑ya tokebona, Sodado hidi ati ene oda foyawaha,

⁷Oda amoni dama, oda towaka, yama hakikini ihi oda to‑towakarabana, Sinido oda fiyakana, yama hakikini ihi Kereta‑kaya oda towaka, Kereta yakari‑ya oda towaka, Saromona oda fiyakanamakineni.

⁸Yama hakikini fawara, oda towakarabana, Boho Boto‑ya oda kobokawaha, Raseya yakari‑ya Boho Boto tohineni.

⁹Yama hakikini ihi Boho Boto‑ya oda kobokana, yama siriri koboni yanatoneni. Yama siriri‑kaya maboro tokaterene, mai bokarabonehe. Oda tafari‑ke mahi hibati‑ya fiyakaneya, mai‑ya Baoro hiyare,

¹⁰“Owati dai mitahi. Ai towakariyahi, ai tokiya, maboro aba, yamata aba, ai aba naba awineni.” Baoro ati ne.

¹¹Sodado hidi Baoro ati‑ya nofare, maboro hidi ati‑ya nofabisane.

¹²Mai dama mai hiyara,

“Yama siri yanatona, abariko 4 tohamakiya, siriri fawanaboneni. Boho Boto‑ka faha kabane amosara‑ya ai winaraboneni. Kereta‑ka faha kabane one oni Fenisi toha, Fara‑ya ai tokabisiya, Fenisi‑ka faha kabane‑ya ai winiya, amosaboneni. Fenisi‑ka faha kabane‑ka adami dori kowe ihi wini amosateni.” Mai ati namaroni.

Yama hakikini kita, mai‑ya kobonawaha

¹³Mahi toki beheri‑kaya yama hakikini bide kake,

“Yama sibarineni.” Mai ati na,

Maboro ma‑maakana‑ka yama‑ya mai idimisa, maboro‑ya mai yananima, Kereta yakari‑ya oda towakabasa,

¹⁴Yama yakari‑ya oda wasike kabani‑kaya boni kita kake,

¹⁵Maboro‑ya boni kobona, boni hakikini ihi faha beheri‑kaya maboro oda‑ya towakawahene.

¹⁶Faha teberi oni Kaoda toha‑ya oda fiyakani yanatoniya, oda dama, oda‑ka yama anini kita, maboro webote bari‑ya maboro bidi‑ya oda ide, maboro bidi‑ya oda tonaforimisineni, maboro bidi bokarebonaha.

¹⁷Maboro abarebona, bai oda sokikana, faha kowira, siki‑ya oda koborabone, bora ibe waana‑ya mai nakisamineni. Yama hakikini kita ihi oda towakineni.

¹⁸Mahi owa‑ya yama hakikini kita ihi oda kabokarabone, maboro doro‑ka yama‑ya mai weretofineni.

¹⁹Mahi owa‑ya yama hakikikani fawara, maboro‑ka yama one mai weretofimakineni.

²⁰Oda amoni dama mahi oda awarihi, amowa mai oda awarihi na, yama hakikini oda‑ya towaka,

“Ai abawahibaka amani.” Oda nafi ati namaroni.

²¹Oda amoni dama, yama yofina ihi oda tafara, mai bai‑ya Baoro waamise, mai‑ya hiyare,

“‘Kereta‑ya ai winahi.’ Ona.

Owati‑ya dai nofarani. Kereta‑ya ai wina‑mani, maboro‑ka yama abara neni.

²²Dai ya‑yainahi. Ai abi awiraboneni. Maboro‑ta abebonane.

²³Yama soki‑ya Deoso‑ka yo‑yose owa fowari‑kaya waane, fare Deoso‑ka ama·oni. Deoso okahiyarateni.

²⁴Owa‑ya hiyare,

‘Baoro, tiwa habo si‑siiririyahi. Sesa‑ya tikaboneni. Tiwa‑ya mai sa‑sawi Deoso ene mai nafi hasinaboneni. Mai abi awiraboneni.’ Ati nemarine.

²⁵Fara dai habo kitaharihi. Deoso ati onofa, Deoso ati‑nima yama naboneni.

²⁶Faha teberi‑ya ai koboni hawa tohiya, maboro abebonane.” Baoro ati nemarine.

Maboro abawahe

²⁷Oda amoni 14 kana yama hakikini ihi oda towakanasa namaroni. Adiri·atiko faha‑ya oda toha, yama soki bai‑ya wami yakari‑ya oda kobona, yama‑ya mai watowahani.

²⁸Maboro yati‑ya koborebona, faha‑ya mai midikana, 36 metoro toha, hasini bide tohiya, mai midihikanamatasa, 27 metoro tohawahani.

²⁹“Yati‑ya ai koboriyahi.” Mai ati na.

Maboro ma‑maakana‑ka yama 4 toha‑ya maboro yodi‑kaya mai weretofemaroni. Deoso‑ya mai hiyara, yama wahi‑ya mai nimanamaroni.

³⁰Maboro‑ka mai one maboro bidi‑ya mai tokabone,

“Maboro ma‑maakana‑ka yama one oda weretofiba.” Mai ati nani, mai kananabonehe.

Maboro bidi‑ya mai nakisamineni.

³¹Baoro mai‑ya awe, sodado mai‑ka hidi, hika sodado mai na‑ya hiyare,

“Mai tokariyahi. Mai tokiya, dai nafi ababoneni.” Baoro ati nemarine.

³²Baoro ati ene sodado maboro bidi‑ka mado‑ya mai tiikasa, maboro bidi bokane.

³³Yama wahabisari‑ya Baoro mai‑ya hiyare,

“Dai tafahi. Ai amoni 14 toha, dai tafarani.

³⁴Dai tafawahahi, dai kitibakaro. Dai tati kone ohare abi awiraboneni. Dai abaraboneni.” Baoro ati nemarine.

³⁵Ati fawane, baho‑ya damakane, Deoso‑ya hiyare,

“Abi Deoso, tika yamata oda kayafawahini.” Ati ne.

Mai nafi hiwakatome, baho‑ya bakanakose, baho‑ya kabawahemarine.

³⁶Mai ya‑yainawaha, yamata‑ya mai nafi kabawahani.

³⁷Maboro‑ka oda dama, 276 oda tohamaroni.

³⁸Mai tafi hawa toha, mai korimanama, yamata one‑ya mai weretofineni, mai‑ka maboro bokarebonaha.

³⁹Yama wahabisari‑ya yama‑ya mai kiinamina, faha teberi bara toha, teberi‑ya mai watora. Faha bide batori‑ya mai awa,

“Faha bide‑ya ai towakamahi. Maboro tokeba awane.” Mai ati namaroni.

⁴⁰Maboro ma‑maakana‑ka mado‑ya mai wisihina, faha‑ya towitakosa, teme mai hinakisama, hika bora ohare mai yadihinama namaroni, faha widi‑ya mai tokabonehe.

⁴¹Faha bide batori‑ya oda tokabone, maboro bono siki‑ya towe ene maakanemarine. Faha rike kita ihi yodi bakatonemarine.

⁴²“Mai yaditona mai one faha‑ya diboni tokarabone, mai nafi ai nanahabahi.” Sodado mai ati na.

⁴³Sodado mai‑ka hidi Baoro‑ya nofe, sodado mai‑ya ati barine,

“Mai dai nanahabariyahi. Faha diboni‑ya dai wata, dai diboni dai toha, faha widi‑ya dai kobonahi.

⁴⁴Faha diboni‑ya dai watora, awa ibe‑ya dai one towaka, maboro ebe‑ya dai one towaka nahi, dai nafi.” Sodado mai‑ka hidi ati nemarine.

Fara faha widi‑ya mai koboneni, mai nafi.

Maota‑ya Baoro wine

¹Faha widi‑ya oda kobona, tabora oni oda mitawaha, oni Maota tohamaroni.

²Maota‑ya mai wi‑wina mai ati soma, oda‑ya mai kasoma, faha bofe‑ya yifo‑ya mai afokanamaroni, yifo oda hiwanabonehe. Yama siri kitamaroni.

³Oda‑ka yifo‑bone‑ya Baoro sibane, yifo‑ya wasi, yifo‑ya kakame, yifo‑ya wisamaki, yifo hodi‑ya maka foya, Baoro yehe‑ya wainamaroni.

⁴Baoro yehe‑ya maka waina, fai yehe‑ya wina‑ya Maota‑ka mai awa, mai ibi hiyara,

“Ai owa mai‑ya nanahabano tohe awane, faha‑ya abare, hasirebona, maka ihi aba kanibote nebonane.” Mai ati namaroni.

⁵Yifo hirini‑ya maka‑ya Baoro korotonamaki, maka komi awiramoneni.

⁶“Yehe waraneba awane. Hiniya abeba awane.” Mai atibodi ati na,

Mai hiwakatome, mai nimahikani yabo, Baoro‑ka yama komi awira‑ya mai awa,

“Mai‑ka deoso tohe awane.” Mai ati nawahani.

⁷Ahiyata‑ya mai‑ka hidi i‑di Bobiro tabaro tohe, Bobiro oda‑ya kasome, oda‑ya himane, tabaro‑ya oda winawaha, fara‑ya oda amoni fama, oda amoni oharimaki namaroni.

⁸I‑di Bobiro badi kiyane, kawine, yama kome ihi kawine, kowayaka hikanarime, kawine‑ya Baoro tokomaki, Bobiro badi‑ya yehe foriya, Deoso‑ya hiyare, ati ene Deoso hinakitamawahemarine.

⁹Bobiro badi kitami tamine‑ya mai mita, mai kiyana Baoro‑ya mai kama, mai nafi kitamamaroni.

¹⁰Oda‑ya mai kasomi dama, makobote maboro owa‑ya oda foyamabone, oda‑ka yama‑bone‑ya mai daanamakemaroni.

Homa‑ya Baoro kobonawahe

¹¹Maota‑ya oda wina abariko 3 tohe, makobote maboro owa‑ya oda foyawaha, Aresadiriya‑ka maboro owa Maota‑ya ite, yama siriri fawanabone‑ya mai nimana, maboro oni ‘deoso wadi famane’, deoso oni Kasito owa toha, Borosi owa toha nane.

¹²Sirakosa‑ya oda kobokana, Sirakosa‑ya oda amoni fama one oharimaki namaroni.

¹³Oda towakatasa, Hekiyo‑ya oda kobokana, yama hakikini amosa ihi oda amoni ohare, Boteori‑ya oda kobokanamaroni.

¹⁴Boteori‑ya Yeso ati‑ya mai no‑nofa mai one wina, oda‑ya mai himanani, mai tabori‑ya oda winabonehe. Mai tabori‑ya oda amoni 7 kana, makobote Homa‑ya oda tokawahamaroni.

¹⁵Homa‑ya Yeso‑ka mai wi‑wina oda tamine‑ya mai mita, Abio Foro‑ya mai one kama, Tafena 3 kana toha‑ya mai one kama, oda‑ya mai kobona, mai‑ya Baoro awe, Deoso‑ya kahiyare, atibodi kitawahemarine.

¹⁶Homa‑ya oda kobona, sodado eyehe yobe‑ya Baoro wine, kadeya‑ya foyi awiremarine.

Homa‑ya mai wi‑wina, mai‑ya Baoro hiyarane

¹⁷Homa‑ya amoni fama, amoni oharimaki ne‑ya Yodeo mai‑ka hidi‑ya Baoro haane, mai kamake, mai‑ya hiyare,

“Owati dai mitahi. Dai owa ama·oni. Ai‑ka idi mai ati‑ya onofa, ai‑ka mai one okakoterani, mai‑ya wee·orihi oteni. Hiniya owa‑ya mai kako kofina, Yerosare‑ya owa‑ya mai daanineni, homano mai‑ya.

¹⁸Owati‑ya homano mai mita, owa ene sibara, owa‑ya mai nanahabarabone, owa‑ya mai seekanabone mai ati na.

¹⁹Owa‑ya mai seekanabone, Yodeo owa‑ya mai ati barina, mai ati ihi i‑di Sesa‑ya haa·ona, ai‑ka mai okakora, owa‑ya mai kako kofineni.

²⁰Fara dai haa·ona, dai oawaboneni, owati dai mitabonehe. Isara·eo‑ka nodi ai nimane, tamine ohiyare ene koheti‑ya owa‑ya mai yaditoneni.” Baoro ati ne.

²¹Ati‑ya Yodeo‑ka hidi mai mita, mai ati yanana,

“Tiwa tamine‑ya mai kanahanoterani. Yodeya‑ya ai‑ka mai kamake, tiwa tamine towe‑ya mai hiyaraterani.

²²Tiwati oda mitawahaboneni. Yeso ati‑ya dai no‑nofa, towe dai‑mone mai ati teni. Oda dami tiwati‑ya oda mitawahaboneni, yama oda watowahabonehe.” Mai ati namaroni.

²³Mai kamatasi‑bone‑ka mahi tamine‑ya Baoro‑ya mai kamineni. Mai ati kami‑ke mahi kobone, mai one mai‑ya sawe, Baoro wini‑kaya mai kobona, yama wahabisari‑ya Baoro mai‑ya hiyari yanakane, Deoso tabaro tamine‑ya hiyare, Yeso tamine i‑di Mose hikanahanomata‑ya mai‑ya yofikana, Deoso ati‑ya mai mi‑mita‑mete Yeso tamine mai hikanahanomata‑ya mai‑ya yofikana nane. Mahi toke‑ya ati fawanemarine.

²⁴Mai one Baoro ati‑ya nofa, mai one Baoro ati‑ya nofarihi namaroni.

²⁵Baoro hiyari hawa tohi yanatoneya, mai ibi weena, mai‑ya hiyaramatase,

“Hibati‑ya Deoso‑ka Doni dai‑ka idi mai tamine‑ya kamine, ati‑ya Deoso ati‑ya mi‑mita‑mata i‑di Isa·iya kanahanomatane. Fare ati‑nima yama na,

²⁶‘Mai‑ya tikama, mai tihiyariyahi. —Yama tamine‑ya dai mita, dai wato awiraboneni, dai kakatomiya, dai watorihi dai naboneni.—

²⁷Mai habi si‑siirina, yama‑ya mai wato awiraboneni. Mai narabi hawi awira, yama tamine‑ya mai miti awira. Mai noki‑ya mai barina, yama‑ya mai awi awirabonehe. Owa‑ya mai haaniya, mai‑ya okasomabone ona, mai atibodi kita, owa‑ya mai haani awirani.’ Deoso ati nene.” Isa·iya‑ka yama hani ati nineni.

²⁸“Owati dai mitahi. Bara mai‑ya Deoso ati tokawahebona, Deoso ati‑ya mai nofabisaboneni, Deoso mai‑ya kasomebonane.” Baoro ati nemarine.

²⁹Baoro ati fawaneya, Yodeo mai tokoma, mai ibi weenamoneni.

³⁰Faha fowe fami‑ya Homa mai‑ka yobe‑ya Baoro wine, yobe hidi‑ya manakone‑ya daanemarine. Mai kamake, mai‑ya hiyare,

³¹Deoso tabaro tamine‑ya hiyara, Yeso Kirisito ai‑ka hidi tamine‑ya hiyara nemarine. Baoro habo kite, mai ati barihiterene.