2 TIMOTI

Timoti‑ka yama hani yoto‑ke

¹Baoro ama·oni. Deoso ene Yeso Kirisito‑ka yo‑yose ama·oni. Hibati‑ya Yeso abe, ai manakone‑ya nanahabe, Yeso ati‑ya mai nofiya, mai abiya, Deoso tabaro‑ya mai winabisabone Deoso ati nane.

²Timoti, tiwa oka dao onamaro, tiwa onofa, tika yama hani‑bone okanahanoneni. Ai‑ka Abi i‑di Deoso, ai‑ka Ayo i‑di Yeso Kirisito ne tiwa‑ya mai kasoma, tiwatibodi ati tiwa‑ya soma teni.

³Timoti, tiwa tamine‑ya Deoso‑ya ohiyarateni. Yama tehe‑ya Deoso ohiyara, yama soki‑ya Deoso ohiyara, oteni. Deoso‑ya oka idi mai nofamete, okobi hinofemari, fare onofaharineni. Owatibodi owa‑ya kakoterani.

⁴Hibati‑ya yana·oniya, ohitinamaro, tiwa ene owatibodi yama‑ya dikineni. Owatibodi tiwa‑ya foyani. Tiwa oawiya, ya‑yai·onaboneni.

⁵Tika aki i‑di Rowidi, tika ami i‑di Eonisi, mai na, Deoso ati‑ya mai nofamaro, fara mai‑nima tina, Deoso ati‑ya tinofa, tiwa‑ya owati foyani.

⁶Hibati‑ya tiwa tati‑ya owa yehe fore ene Deoso tiwa‑ya kasomane yama‑ya tiwatowahabonehe. Tiwa habo kitamaro, Deoso ati tikaminiya, tiwa habo kitasa nahi.

⁷Deoso‑ka Doni ai‑ya sawi, ai habo siitora, ai habo kitateni. Ai one‑ya ai nofa, ai ati, ai atibodi ati, ai ene na, ai nawada, ai teni.

⁸Ai‑ka Ayo i‑di Yeso ati tihiyara, mai noki ihi tiwa habo siitoriyahi. Kadeya‑ya owaa, owa ene tiwa habo siitorihi na, Deoso Ati Amosabote tikaminiya, kadeya‑ya tiwa‑ya mai nawaaba awineni. Tiwa‑ya mai nawaa, sibaraboneni. Deoso tiwa‑ya kasomebonane.

⁹Hibati‑ya ai awisari‑ya Deoso ai‑ya kadike, ai ene tohara, Deoso ai‑ya nofe, Yeso Kirisito ati ai nofabone ai‑ya wato, ai‑ya kasomematane.

¹⁰I‑di Yeso kame, ai manakone‑ya nanahabane. Yeso ai manakone‑ya nanahabe ene Deoso ai‑ya nofe‑ya ai watowahineni. Yeso abe, kitame ene Deoso tabaro hawine seekane. Yeso ati ai nofiya, ai abiya, ai atibodi abi awiraboneni. Deoso tabaro‑ya ai atibodi winawahaboneni.

¹¹Fara ihi Deoso ati ene Yeso owa‑ya yose, Bara mai tabori‑ya oka, Deoso Ati Amosabote okamina, mai okanawatoneni.

¹²Deoso ati‑ya ohiyara, kadeya‑ya owa‑ya mai nawaa, kadeya‑ya owaa, oyawi awirani. Sibarabone owatibodi ati nani. Deoso owato, ati onofe, owa‑ya nawadebona, owa‑ya kayawebonane. Hika yama ani·ona‑ya kayafatene. Makobote Yeso kamataseya, oka yama‑bone‑ya daanebonane.

¹³Tiwa okanawato‑nima mai tikanawatohi. Deoso ati‑nima owati toha, fara owati‑nima tinahi. Mai tihiyariya, mai tinofiyahi. Yeso Kirisito ati ai nofa nafiyahi.

¹⁴Deoso‑ka Doni tiwatibodi‑ya sawi, Deoso‑ka Doni ene Deoso ati yokana tihiyarabone, ati tinawadaho. Hiyara one tihiyari awiraboneni.

¹⁵Asiya‑kaya mai wi‑wina mai kananeni. Owa‑ya mai dabami awirini, mai habi siitonaro. Timoti, mai kanani tamine timita awini. I‑di Fikero, i‑di Emokene mai fama, mai kanakanamaroni.

¹⁶Owa‑ya i‑di Onesiforo kasomemarine. Kadeya‑ya owaa, yawaremarine. Onesiforo‑ka mai‑ya Deoso kasomamakibonane.

¹⁷Homa‑ya kamaki, owa‑ya sibane, owa‑ya wasimarine.

¹⁸Yeso kamataseya, Onesiforo‑ya weeni awirebonane. Ya‑yainibisebonane. Hibati‑ya Efesiyo‑ya owina, i‑di Onesiforo owa‑ya kasome tiwemarine.

Yeso Kirisito‑ka sodado amose tihiyahi

¹Timoti, oka dao amatini. Tiwa eme kitahi. Deoso ene Yeso Kirisito ai‑ya kasome, ai eme kitateni.

²Owati‑ya dai dami mitamaroni. Yama okanawata, owa‑nima mai tikanawatoyahi. Mai ihi amosa, mai tikanawata, makobote mai one‑ya mai kanawatowahaboneni.

³Sodado mai toha mai aboni koma, mai aninasa teni. Yeso Kirisito‑ka sodado ai toha, ai abano koma, yama sibarineni, ai yawariyahi.

⁴Sodado mai toha kofeno‑ka yama‑ya mai anina, mai‑ka yama anini ohariteni. Fara mai‑nima Yeso‑ka yama‑ya ai aninabone, yama one ai nokotoniriyahi, ai‑ka Hidi i‑di Yeso Kirisito ya‑yainebonaha.

⁵Mai kanana mai‑ya fiyakane, koboni dai tohe, yama‑ya kayafatene. Mai kanana mai‑ka hidi ati‑nima mai na, yama‑ya mai kayafateni. Sibarini. Mai‑ka hidi ati‑ya mai tokadabara, yama‑ya mai kayafaterani. Fara‑nima Deoso ati ai tokadabara, yama ai kayafateraboneni.

⁶Fadara hidi yama‑ya anini kite, hika yamata‑ya kame, yamata hawa tohabone‑ya nimane, yamata hadiya, kote hikayafi dai hiha, makobote mai one kote hikayafamakiteni.

⁷Owati timitiya, owati tikadikiya, Kirisito tiwa‑ya kanawatobonane. Yeso Kirisito tiwa‑ya kanawato, yama nafi tiwatowahaboneni.

⁸Yeso Kirisito i‑di Dafi‑ka nodi tohe, abe, Deoso hinakitamemari tamine ohiyaratene, Deoso Ati Amosabote amane. Ati tiwatibodi hikadikayaho.

⁹Deoso Ati Amosabote ohiyare, owa‑ya mai bisina, kadeya‑ya owa‑ya mai nafoyawahani. Koheti‑ya owa‑ya mai yaditona, Deoso ati‑ya mai yaditoterani.

¹⁰Kadeya‑ya ofoya, oyawara, sibaraboneni. Kadeya‑ya owaa, Deoso Ati Amosabote mai one‑ya okamina, Yeso ati‑ya mai nofamakeba awineni. Hibati‑ya Deoso mai‑ya kadikane, Yeso ati‑ya mai nofabonehe. Yeso ati‑ya mai nofamakiya, Deoso tabaro‑ya mai winawahaboneni. Mai ya‑yaini fawateraboneni.

¹¹Keyehe toharani. Ati tinofaho.

“Yeso eyehe ai abamaro,

ai kitamatasaboneni. Deoso tabaro‑ya ai winawahaboneni.

¹²Yeso ati ai nofa, ai‑ya mai bisina,

makobote neme‑ya Yeso eyehe ai nahoya, mai ihi ai kadikaboneni.

‘Yeso owatorini.’ Ai ati na,

‘Tiwa owatorini.’ Yeso ati nebonane.

‘Yeso‑ka ama·ora ama·oni.’ Ai ati na,

‘Oka amatira amatini.’ Yeso ati nebonane.

¹³Ai ati‑nima ai ni awiraba awineni.

Yeso hini ati‑nima nebonane.

Yeso ati oharitene. Ati abaterene.” Ai ati teni.

Deoso‑ka yama anini‑ya ai anina, haa‑nima ai ene nahi

¹⁴Timoti, owati timitamatasahi. Tika mai‑ya tihiyarahi. Mai ati‑ya Deoso mite, mai ihi‑ya Deoso kakatomane, mai one hini mai ati‑ya mai hiyara, mai ibi weena, mai ati ihi mai one atibodi koma kita, mai teni. Mai‑ya tiwati barinahi.

¹⁵Timoti, tiwa noko wadahi. Deoso ati tikadika, Ati Amosabote mai‑ya tikamine, Deoso tiwa ene‑ya kadikeya, tiwa habo siitoraboneni.

¹⁶Deoso ati‑nima mai ati ni awira, mai ati honita toha, mai‑nima tiriyahi. Hini mai ati ihi mai ihi towe tohaboneni.

¹⁷Ido ai kiha, ai ketehera, dodamawahateni. Fara ido‑nima i‑di Imeneo, i‑di Fireto mai ati tohateni. Mai ati‑ya tiwati barini awiriya, mai ati dodamawahaboneni.

¹⁸Deoso ati‑ya mai hiyaramaro, ati bare‑ya mai hiyarawahineni.

“Hibati‑ya ai kitama‑nima ai na, ai abawaha, ai abano kitamaraboneni.” Mai ati teni.

Keyehe‑ya mai hirina, mai ati‑ya mai one mita, Deoso ati‑ya mai nofami awirani.

“Dai aba, dai kitamaboneni.” Deoso ati tene.

¹⁹I‑di Deoso ati abaterene. Deoso mai‑ya kadikemari, Deoso mai oni‑ya watone. Deoso‑ka ama·oni, ai ati niya, Deoso ati‑nima ai nahi. Ai ene amosahi.

²⁰Yobe webote‑ya yama wiye amosa toha, manakone nafe toha, yama wiye one amosara toha, manakone bide toha teni. Oro wamani yama wiye one toha, barata wamani yama wiye one toha, awa wamani yama wiye one toha, atabo wamani yama wiye one toha teni.

²¹Dai ene towe tohara, Deoso ati‑mona mai ati na, ati bare‑ya mai hiyara, mai ati dai nofara, mai‑ya dai dabarihi. Oro wamani‑nima dai nawahabone, Kirisito‑ka yama anini‑ya dai aninabone, dai hawa tohaboneni.

²²Yetene mai ihi towe‑nima tinirihi, kawi nokotinirihi, mai fanawi nokotinirihi, Yeso‑ta nokotinibisahi. Yeso‑ya mai nofa mai tisawihi. Tiwa ene amosahi, Yeso mai‑ya nofa‑nima mai‑ya tinofahi, mai‑ya tiwatibodi ati somahi, tiwatibodi tiwa‑ya weenamakiraboneni.

²³Hiniya mai hiyara, mai ibi weenaboneni. Yama‑ya mai watora, mai ati tinofariyahi. Mai ati‑ya tisawiriyahi.

²⁴Yeso‑ka amatini. Mai‑ya wee kanibote tiriyahi. Mai tikasoma, Deoso ati‑ya mai watowahaboneni. Mai‑ya tikanawata, tiyawa kanibote tiriyahi. Tiwa‑ya mai ati bisiniya, tiwati yanariyahi.

²⁵Tiwa‑ya mai nofara, mai‑ya tinofa, Deoso ati yokana mai‑ya tikanawatonadihi. Deoso ati ene Yeso ati‑ya mai nofawahaba awineni. Mai ihi amosaramaro‑ya Deoso‑ya mai‑ya mai kaminawahaba awineni. Mai ihi amosaramaro‑ya mai nofami awiraboneni.

²⁶Hibati‑ya Satanasi mai‑ya kayawe, ati‑nima mai namaro, hibayata Deoso ati‑ya mai nofiya, Satanasi ati abawahebonane. Yeso mai‑ya kasomebonane, mai atibodi abarabonehe.

Yeso kami yakari‑ya mai ihi amosaraboneni

¹Timoti, owati timitamatasahi. Yeso kami yakari‑ya Yeso ati‑ya ai no‑nofa ai‑ya mai bisi, ai owa‑ya mai nanahaba naboneni.

²Hini mai‑ya mai nofa, ai one‑ya mai nofi awiraboneni. Mai one‑ka yamata‑ya mai kayawa naboneni. Yinero‑ya mai nokotonihe.

“Amosabote ama·oni. Deoso ati kasiro ati oda nofi awirini.” Mai ati naboneni.

Mai‑ka abi, mai‑ka ami na, mai ati‑ya mai nofaraboneni. Yama mai daahina ihi mai ya‑yaira, yama one‑ya mai nokotoniteni. Deoso ati‑ya mai nofaraboneni.

³Mai‑ka madehe‑ya mai nokotonira, mai ati somawamara, mai ati‑nima mai ni awira, mai one tamine‑ya keyehe‑ya mai hirina, hiniya mai ati yawa, ai ene amosa, ai‑ya mai kako naboneni.

⁴Bara mai‑ya mai‑ka owa‑ya mai daanaboneni. Hini mai‑ya mai nofabone mai one‑ya mai nofara, yama mai ati kobohina‑ya mai kayafateni. Deoso‑ya mai ati nofarini.

⁵“Deoso‑ka ama·oni.” Mai ati na,

Mai ihi amosawamara. Timoti, mai‑ya tisawiriyahi.

⁶Mai one tabori‑ya mai tokiyoma, mai fanawi‑ya mai keyeheteni. Mai fanawi yama‑ya watora, mai ati‑ya mai tokadabateni. Mai fanawi ihi amosaramaro tamine mai atibodi hini mai‑ya weena, mai atibodi mai‑ya weenamara, keyehe‑ya mai nofawahani.

⁷Yama‑ya mai watabone mai ati na, Deoso ati‑ya mai ati koboterani.

⁸Hibati‑ya i‑di Yani, i‑di Yabiri mai fama, i‑di Mose‑ya mai weena, fara mai‑nima mai nawawahineni. Deoso ati‑ya mai nofara, yama towe‑ta‑ya mai atibodi nofa, Deoso ati mai watorani.

⁹Mai amoni fa‑famaraba niya, keyehe‑ya mai hirinamaro, mai ati‑ya mai one nofami awirabone, hibati‑ya i‑di Yani, i‑di Yabiri mai fama, mai ihi‑ya mai awa, mai ati‑ya mai nofami awiramaroni. Hibayata mai ihi towe‑ya mai awa, mai ati‑ya mai nofami awiraboneni.

Deoso ati‑ya mai kanahanameteni

¹⁰Owa‑ta owa ene tiawamaroni. Owati timitamaroni. Mai ihi‑nima owa ene terani. Mai wee·ora mai onofateni. Deoso ati onofa, owa tiwatoneni.

¹¹Atioki‑ya owa‑ya mai wee, Ikoniyo‑ya owa‑ya mai wee, Risita‑ya owa‑ya mai weenamaro, owa tiwatoneni. Owa‑ya mai bisinamaro, Ai‑ka Ayo Yeso owa‑ya kasome, hasinasa oneni.

¹²Yeso Kirisito ati ai no‑nofa Yeso ati‑nima ai niya, ai‑ya mai bisinaboneni.

¹³Mai ihi towe toha, mai ihi towe ba‑basi naboneni. Mai one‑ya mai keyeheneni. Mai one mai hikayeheriya, mai ati‑ya mai nofahareboneni.

¹⁴Hibati‑ya tiwa okanawata, owati‑nima tiyahi. Owa ene‑nima tiwa ene nahi. Owa ene tiawa, owa ene sibabisaramaroni.

¹⁵Madehe tiha, tiwa‑ya mai kanawatamaroni, Deoso‑ka yama hani‑ya. Deoso‑ka yama hani tinofa, Yeso ati tinofa tiniya, Deoso tabaro‑ya tiwinawahaboneni.

¹⁶Deoso hini ati‑ya kamine, ati‑ya ai owa mai kanahanomaroni. Ati ai kanawatomaki, Deoso ati‑nima mai ni awiriya, mai ai weenaboneni, Deoso ati‑ya mai tokadababonehe.

¹⁷Deoso‑ka yama hani ai watoya, ai ene amosaboneni. Deoso ati‑nima ai nawahaboneni.

Deoso ati tihiyarahi

¹Yeso Kirisito kamataseya, ai nafi ene‑ya kadikebonane. Ai hasina, ai ene‑ya kadika, mai abamete mai ihi‑ya kadika nebonane. Ai one‑ya kayafa, ai one‑ya sarikana nebonane. Deoso owati‑ya mite, owati timitaharihi.

²Deoso ati tihiyara, tiwati fawariyahi. Deoso ati‑nima mai ni awiriya, mai weetiyahi, Deoso ati‑nima mai nabonehe. Tiyawariyahi. Hiniya mai tikanawatobisahi, Deoso ati‑ya mai nofabonehe.

³Makobote Deoso ati miti‑ya mai nofara,

“Ati oda nofe, ati‑nima tiwati niya, tiwati oda nofaboneni. Ati oda nofe, ati‑nima tiwati ni awiriya, mai one oda ati‑nima mai ati na, mai ati oda nofaboneni.” Mai ati naboneni.

⁴Deoso ati‑ya mai mitami awiraboneni. Mai one keyehe‑ya mai hirina mai ati‑ya mai mitabisaboneni. Hiyara bote‑ya mai nofabisaboneni.

⁵Timoti, tiwa noko wadahi. Mai‑nima tiriyahi. Tiwa‑ya mai bisina, tiyawariyahi. Deoso Ati Amosabote ati‑ta tihiyarabisahi. Deoso tiwa‑ya yosemari, ati nafi tikaminiyahi.

⁶Ai amoni fa‑famaraba niya, owa‑ya mai nanahababoneni. Deoso owatibodi‑ya kayafawahebonane.

⁷Owa ene sibarani. Sodado‑ka yama anini kiti‑nima oka yama anini kitani. Owa kanani hawa tohi yanatoni. Deoso ati‑nima onani.

⁸Owa manakone wadaboneni. Ai tati borone oro wamani‑ya tohaboneni. Ai ene amosa ai tati borone oro wamani‑ya tohabone, ai‑ka hidi i‑di Yeso ati nane. Ai ene‑ya kadikeya, ai manakone‑ya daanebonane. Yeso kamebona ai nimaniya, ai manakone wadaboneni.

Timoti, oka yama hani tiwakamiyahi

⁹Timoti, tikamaki kanibote tinahi.

¹⁰I‑di Dema owa‑ya sawimi awira, bofe‑ka yama dama‑ya nokotoniya, Tesaronika‑ya tokane. Karatiya‑ya i‑di Keriseti toka, Daomatiya‑ya i‑di Tito toka nane.

¹¹I‑di Roka ohari owa‑ya sawine. I‑di Maroko dai fama, dai kakama kanibote nahi. I‑di Maroko yama anini‑ya watowahane. Deoso ati hiyari‑ya watone.

¹²Efesiyo‑ya Tikiko oyoseni.

¹³Tikamiya, oka bora damatinamiyahi. Torowadi‑ya oka bora ita, i‑di Karabo‑ka yobe‑ya. Oka yama hani ita, tiwakamiyahi. Bani ataro‑ka oka yama hani one toha, onofi nafe‑ya tiwati kadamowamariyahi.

¹⁴Metaho‑ya Aresadiri yama‑ya wa‑wama, owa tamine‑mone‑ya keyehe‑ya hirinemari, manakone Deoso daahinebonane. Deoso bisihineba awane.

¹⁵Tiwa noko wadiyahi. Deoso ati oda kamine, oda‑ya i‑di Aresadiri weeni kitemarine.

¹⁶Hibati‑ya ai‑ka hidi i‑di Sesa owa ene‑ya kadike, owa‑ya mai sawiramaro, mai nafi kanana, mai tamine ohiyarateni, Deoso mai bisihirabonehe.

¹⁷Ai‑ka Ayo i‑di Yeso ohari owa‑ya sawi, owa habo siitorani. Deoso Ati Amosabote‑ya Bara mai dama mai mitani. Iriyaho mai‑ya owa‑ya mai daanabone mai ati na, Yeso owa‑ya kasome, iriyaho mai‑ya owa‑ya mai daani awirani.

¹⁸Ai‑ka Ayo i‑di Yeso ene yama sibaraboneni. Owa‑ya mai nanahabiya, Yeso owa‑ya nakitamebonane. Deoso tabaro‑ya owinawahaboneni. Deoso ai kahiyari fawateraboneni. Feye amani.

Baoro ati faina amane

¹⁹I‑di Birisira, i‑di Akira mai fama, mai tihiyara, i‑di Onesiforo‑ka mai tihiyara tinahi. Owa tamine mai‑ya tihiyariyahi.

²⁰Okomiya, i‑di Erasito itane Korito‑ya. Mireto‑ya i‑di Tirofimo kiyane, kawinane.

²¹Tikama kanibote tiyahi. Yama siriwahaboneni. I‑di Eoboro, i‑di Birodete, i‑di Rino, i‑di Karodiya, ai‑ka mai na, tiwa‑ya mai ati foyani.

²²I‑di Yeso Kirisito tiwa‑ya sawiya, tiwa‑ya kasomebonane. Feye amani.