Tesaronika mai‑ka yama hani yoto‑ke
1Dai tamine ene oda ya‑yaineni
1I‑di Baoro ama·oni. I‑di Sira, i‑di Timoti mai fama, owa‑ya mai dabineni. Ai‑ka Abi i‑di Deoso, ai‑ka Ayo i‑di Yeso Kirisito‑ka dai toha, Tesaronika‑ya dai wi‑wina dai‑ka yama hani boneni.
2Ai‑ka Abi i‑di Deoso, ai‑ka Ayo i‑di Yeso Kirisito ne, dai‑ya mai kasoma, dai atibodi ati dai‑ya somateni.
3Yeso ati‑ya dai no‑nofa, dai ene oda ya‑yaineni. Deoso‑ya oda hiyara, dai tamine oda hiyara, oda ya‑yaineni. Yeso ati‑ya dai nofamaro, ati dai nofi nafiwahane. Dai ibi nofamaro, dai ibi nofi nafiwahineni.
4Mai tabori one‑ya oda toka, Deoso‑ka mai toha mai‑ya oda yorotokana, dai tamine oda hiyarineni.
“Tesaronika‑ya mai wi‑wina mai mai bisihina, mai mai hinakoma, mai ati sibawarini. Yeso ati‑ya mai nofi nafiwahineni.” Oda ati teni.
Mai ihi‑ya Kirisito kadikebona
5Yeso ati dai nofa dai‑ya mai bisinamaroni. Mai ihi ai awa, mai ihi‑ya Deoso kadikebona ai watoneni. Yeso ati dai nofasa neni. Yeso ati‑ya dai nofa, dai ene Deoso ya‑yainane. Makobote Deoso tabaro‑ya dai winawahaboneni.
6Dai‑ya mai bisinamaro, Yeso kameya, Deoso dai manakone‑ya awebona, mai‑ya bisinawahebonane. Deoso ene amosabisane.
7Makobote Yeso, hika yo‑yose mai kita, mai eyehe kameya, ai‑ya mai bisinamaro mai bisinami awiraboneni.
8Yeso kameya, mai ihi amosara mai manakone‑ya daaneya, yifo hirina‑nima yama kome na‑ya mai kayafaboneni. Deoso‑ya mai watora, Yeso Kirisito Ati Amosabote‑ya mai nofara, haa‑nima mai manakone tohaboneni.
9Mai kome kita fawateraboneni. Ai‑ka Hidi Yeso noko‑ya mai awamateraboneni. Ai‑ka Hidi ene kitabote‑ya mai awateraboneni.
10Ai‑ka Hidi kameya, ati ai no‑nofa ai yorotokanabone, ai‑ka Hidi ai nafi kahiyaraboneni.
“Ayo Yeso, amosabote amatini. Tiwa ene amosini.” Ai ati naboneni.
Yeso tamine oda kamine, Yeso ati dai nofa, dai ati‑ya mai one mitamakiya, Yeso ati‑ya mai nofiya, Yeso koboneya, mai nafi kahiyaraboneni.
11Dai tamine Deoso‑ya oda hiyara,
“Tesaronika‑ya mai wi‑wina, mai ihi amosiyahi. Mai tikadikamaro, tiwa ene‑nima mai ihi nahi. Tiwati‑ya mai nofi nafiya, mai ihi amosi nafiwahaboneni.” Oda ati teni Deoso‑ya.
12Dai ene‑ya mai awiya, Yeso‑ya mai kahiyarawahaboneni. Dai ene Yeso‑ya mai kahiyara, dai ene i‑di Deoso ya‑yainebonane. Ai‑ka Ayo i‑di Yeso Kirisito ene Deoso ai‑ya kasomebonane.
2Satanasi‑ka owa kobonebonane
1Owati dai mitamakitasahi. Ai‑ka Ayo i‑di Yeso Kirisito kamataseya, ai‑ya towakamebona tamine dai watoyahi.
2Ai‑ka Hidi koboni kemorebonane.
“Yeso kobonane.” Mai one ati na,
Mai ati dai nofariyahi.
“‘Yeso kobonamane.’ Deoso‑ka Doni ati nane.” Mai ati na,
mai ati dai nofariyahi.
“‘Yeso kobonamane.’ I‑di Baoro‑ka yama hani ati nane.” Mai ati niya,
mai ati dai nofariyahi. Dai habo siitoriyahi.
3Dai‑ya keyehe‑ya mai hirikariyahi. Ai‑ka Hidi koboni awisareya, mai dami Deoso‑ya mai kakowahaboneni. Deoso ati‑ya mai one ati nofamone, ati‑ya mai nofaraboneni. Satanasi‑ka owa kobonebonane.
4Satanasi‑ka owa koboneya, hini‑ya kahiyare, Deoso‑ka mai‑ya kakotebona,
“Mai one dai kahiyarariyahi. Owa‑ta owa dai kahiyarabisahi.” Ati nebonane.
Deoso‑ka yobe‑ya itariya,
“Deoso yokana ama·oni.” Ati nebonane.
5Hibati‑ya dai‑ya osawiya, Satanasi‑ka owa tamine dai‑ya ohiyaramaroni.
6Satanasi‑ka owa kamebona, koboni awisare, hika hawi barikananasa nineni. Hawi barikana tamine dai mitamaroni. Deoso‑ka yama nafi hawa tohiya, hawi‑ya seekanebonane. Fara hika hawi seehikanaya, Satanasi‑ka owa kobonebonane.
7Hibayata Satanasi mai‑ya keyeheteni. Satanasi‑ka owa‑ta hini‑ya kemoteni, Satanasi‑ka tohe mai hiwatorebonaha. Makobote yama nafi hawa tohiya, ene mai hiawawahebonane.
8Satanasi‑ka owa ati kasiro‑ya mai awawahaboneni. Ai‑ka Hidi Yeso kobonameya, ati ene Satanasi‑ka owa abebonane.
9Ai‑ka Hidi koboni awisareya, Satanasi ene Satanasi‑ka owa kobonebonane. Koboneya, ene kitebonane. Ati ene neme‑ya yama‑ya mai awaboneni. Yama‑ya mai awa, mai habi siitona,
“Ka!” Mai ati naboneni.
Ene owa kita, ene owa hiniya mai‑ya keyehe nebonane.
10Yeso ati‑ya mai nofara, Satanasi‑ka owa keyehe‑ya mai‑ya hirikane, Satanasi‑ka owa ati‑ya mai nofawahaboneni. Hibati‑ya Deoso mai‑ya kasomebona ati ne, Deoso ati‑ya mai nofaramaro, mai abawahaboneni.
11Deoso ati‑ya mai nofara, ati ene Satanasi‑ka owa mai‑ya keyehe nafibise, ati‑ya mai nofi nafeboneni.
12Deoso ati‑ya mai nofaramaro, Satanasi‑ka owa ati‑ya mai nofabisa, mai ya‑yainaboneni. Mai ihi amosara‑ya mai nofamaro, hini mai ihi mai hatiwahaboneni.
13Dai tamine oda hiyarateni, Deoso‑ya. Dai ene oda ya‑yaineni. Deoso dai‑ya nofe, dai‑ya kadike, yama‑ya wamani awisareya, dai‑ya kadikematane. Deoso tabaro‑ya dai winawahaboneni. Yeso ati dai no‑nofa, Deoso‑ka Doni dai‑ya sawi, dai ene namosebonaha.
14Hibati‑ya Deoso Ati Amosabote dai‑ya oda kamina, oda ati‑ya dai nofamaro, makobote ai‑ka Ayo i‑di Yeso Kirisito tabaro amosabote‑ya ai winawahaboneni.
15Oka soho dai toha, dai‑ya oda hiyara, dai oda kanawato, dai‑ka yama hani‑bone oda kanahano na, ati dai fawaniriyahi.
16Ai‑ka Ayo i‑di Yeso Kirisito, ai‑ka Abi i‑di Deoso ne, ai‑ya mai nofa, ai‑ya mai kasomateni. Fara mai ihi Deoso tabaro‑ya ai kobonabone ai watoneni.
17Deoso ene dai atibodi somahi. Dai ati amosahi. Dai ene amosahari nahi.
3Oda tamine dai hiyarahi
1Oda tamine‑ya dai hiyarahi Deoso‑ya.
“Abi Deoso, ai‑ka Ayo i‑di Yeso ati‑ya i‑di Baoro mai hiyara, mai ati‑ya mai one nofiyahi, Yeso‑ya mai kahiyarabonehe.” Dai ati nahi.
Deoso Ati Amosabote dai‑ya oda kaminamaro, Yeso ati dai nofamaro‑nima Yeso ati‑ya mai nofawaha, Yeso‑ya mai kahiyaraboneni.
2Yeso ati oda kamina, mai one Yeso ati‑ya nofabone, mai one nofara, mai ati kasira, oda‑ya mai ati watateni. Oda‑ya mai watarabone, mai tamine Deoso‑ya dai hiyarahi.
3Ai‑ka Ayo i‑di Yeso kitabote tohe, ati‑nima yama naboneni. Yeso dai‑ya nawadebonane, Satanasi ati dai nofarabonehe.
4Tesaronika‑ya dai wi‑wina, Yeso ati‑ya dai nofa, dai sibaraboneni. Oda ati dai tokadabamaro, oda‑ka yama hani ati dai tokadabaharebone oda atibodi ati nineni.
5Deoso ai‑ya nofi nafi, ai‑ka Ayo i‑di Yeso dai‑ya kanawatowahebonane. Yeso‑ya mai kakamaro, mai‑ya kakoterene. Fara ai‑ka Ayo ene dai kadikiya, ene‑nima dai ene nawahaboneni.
Yama dai aninahi
6Oka soho dai toha, owati dai mitamakihi. Yeso ati‑ya mai nofa‑mone mai ati na, Yeso ati‑ya mai tokadabara, refo ihi yama‑ya mai anira, mai‑ya dai dabariyahi. Ai‑ka Ayo i‑di Yeso Kirisito ati nemarine.
7“Oda ene‑nima dai ene naboneni.” Oda ati namaroni.
Oda ati‑maro dai watoneni. Dai tabaro‑ya oda wina, oda refo tohara, oda hawemaroni.
8Yamata honita‑ya oda kabara, manakone oda nanahababisamaroni. Yama tehe‑ya yama oda ani, yama soki‑ya yama oda ani na, oda‑ka yamata‑bone manakone oda nanahabamaroni, dai nanahabi awirabonehe.
9Yama anini manakone oda haana‑mani, sibara neni. Yama anini manakone wada, manakone oda haani awirini. Oda ene dai awiya, oda ene‑nima dai ene nawahaboneni.
10Dai‑ya oda sawiya, dai oda hiyaramaroni.
“Yama‑ya mai anini awiriya, mai tafariyahi.” Oda ati namaroni.
11Dai tamine oda mita, dai one refo toha, yama‑ya mai anini awira, hiniya mai one tabori‑ya mai toka, mai one tamine‑mone‑ya mai hiyaramoneni.
12Yama‑ya dai anira, oda ati dai mitahi. Ai‑ka Hidi i‑di Yeso Kirisito ati okaminaboneni.
“Yama‑ya dai aninahi. Hini dai‑ka yamata‑ta dai kababisahi. Mai‑ka yamata dai nokotoniriyahi.” Oda ati toha, ai‑ka Hidi i‑di Yeso ati toha nane.
13Soho, dai‑ta, dai ene amosa, dai ene amosi fawariyahi.
14Oda‑ka yama hani ati‑ya mai nofara, mai‑ya dai kadikiya, mai‑ya dai sawimarihi. Mai‑ya dai dabamarihi niya, mai atibodi hini mai‑ya weeniya, yama‑ya aninawahaba awineni.
15Dai one yama mai anira, mai dai kakoriyahi. Ai‑ka soho‑ya ai weena‑nima hiniya mai dai weenibisahi, yama‑ya mai aninawahabonehe.
16Ai‑ka Ayo ene dai habo siitora, dai atibodi ati dai‑ya somaboneni. Dai‑ya mai kaka, dai‑ka Ayo kitabote ene dai habo siitoteraboneni. Ai‑ka Ayo dai‑ya sawibonane.
17Baoro ama·oni, yama hani okanahanoneni. Owa yehe ene dai awahi. Oka yama hani toha, kote owa yehe‑ya okanahanoteni.
18Ai‑ka Ayo i‑di Yeso Kirisito dai‑ya sawi, dai‑ya kasomebonane. Feye amani.