2 BEDORO

Bedoro‑ka yama hani yoto‑ke

Deoso tabaro hawine dai fawaniriyahi

¹Simaho Bedoro Yeso Kirisito‑ka yo‑yose ama·oni. Owa‑ya yosemarine, ati okaminebonaha. Deoso, Bidi‑ya fame amosabote mai toha, Deoso ati dai nofa, Yeso Kirisito ati‑ya dai nofahari, dai na, oda‑nima dai na, dai‑ka yama hani‑bone okanahanowahaboneni.

²Deoso dai‑ya kasomebona, dai habo siitorihi. Dai atibodi dai‑ya weerihi na, Deoso ati dai wato, ai‑ka Hidi i‑di Yeso Kirisito ati dai wato, dai niya, dai korikasateraboneni.

³Deoso ai‑ya haanematane. Deoso‑ya ai kahiyarabone ene amosabote ai kaminebonane. Yeso Kirisito ati ai wato, Deoso kite ene yama ai kayafateni, bofe‑ya ai wi‑wina ai ene amosabonehe.

⁴Deoso ati amosabote tohe, ati‑nima yama naboneni, ai ene amosawamabonehe. Deoso atibodi ati‑nima ai atibodi ati nawahabone, Satanasi ati‑ya mai no‑nofa mai ihi‑nima ai ene raboneni.

⁵Deoso atibodi ati‑nima dai atibodi ati tohabone, Deoso ati‑ya dai nofi baha, dai ene amosawama, Deoso ati wato dai ba‑basi dai nahi.

⁶Deoso ati‑ya dai wato ba‑basi na, dai atibodi yama hinofa dai nokotonihi, yama amosara dai nofarabonehe. Yama dai nofa‑ya Deoso dai‑ya daa kanibote ni awire, dai yawarihi, Deoso yama hinofa‑nima dai ene nahi.

⁷Deoso yama hinofa‑nima yama na dai nofa, dai ibi nofiyahi. Dai ibi nofa, dai ibi nofi na‑nafi nahi.

⁸Haa‑nima dai ene na‑ya mai awiya, Deoso ati‑ya mai nofawaha,

“Yeso ati‑ya mai no‑nofa mai ihi amosa, oda ene‑nima mai ihi terani.” Mai ati niya,

Deoso ati‑ya mai nofawahaba awineni.

⁹Haa‑nima mai ihi ni awiriya, yama‑ya mai awi i‑isi na, mai‑nima mai nihi, mai noki wadara, mai‑nima mai nihi, mai nineni. Mai manakone‑ya Yeso nanahabemari tamine‑ya mai ati kadamowamineni.

¹⁰Oka soho dai toha, Deoso dai‑ya kadike, dai‑ya haane. Tabaro‑ya dai winawahaboneni. Owati‑nima dai ene niya, Deoso tabaro hawine dai fawaniteraboneni.

¹¹Ai‑ka Ayo Yeso Kirisito tabaro abaterebona, fare‑ya dai koboniya, Deoso ya‑yainebonane. Dai‑ka yama dai kayafawahabone, dai abamateraboneni.

¹²Deoso ati dai wato, ati dai tokadabanane. Deoso ati dai‑ya okaminemari, okaminatase, ati dai fawaniterebonane.

¹³O·abi awisa oriya, dai‑ya Deoso ati okaminabone onani.

¹⁴Owa amoni fa‑famaraba ni‑ya o·abawahabone, okoyo i‑di Yeso Kirisito ati nemari, ati‑nima yama naboneni.

¹⁵Hibayata dai‑ya okanawata, o·abiya, owa nowati‑ya Deoso ati dai fawaniteraboneni.

Yeso oda awa, Deoso ati oda mita ne

¹⁶“Yeso Kirisito kitabote tohe, kamatasebonane.” Oda ati namaroni.

Hibati‑ka mai ati oda kaminara, ene kitabote, amosabote ne, oda awemari tamine oda kaminamaroni.

¹⁷Badi i‑di Deoso amosabote neme‑ya ati kaki, ati oda mitemari, ati oda kaminineni.

“Oka dao amane. Oka dao onofi nafi. Oka dao ene ya‑yai·oneni.” Neme‑ya Deoso ati nemarine.

Deoso amosabote‑nima Bidi amosabote tohane.

¹⁸Adami amosa tati‑ya oda naha, Deoso ati neme‑ya kaki, ati oda mitamaroni, Yeso‑ya oda dabaro.

¹⁹Deoso ati‑ya mai mi‑mita‑mete ati mai hikanahanomata, ati ai‑ya sawi, fara nabarina‑nima ati nane. Yama soki‑ya nabarina ai botokiteni, yama ai awabonehe. Deoso ati‑ya mai mi‑mita‑mete mai ati dai kadika, yama dai wato bide toha, yama wahabisari‑nima dai na, makobote Yeso kameya, dai atibodi‑ya kanawatoya, yama dai watowaha, yama tehe‑nima dai nawahaboneni.

²⁰Deoso ati‑ya mai mi‑mita‑mete Deoso ati‑ya mai kanahanamete, hini mai ati‑ya mai kanahanoterani. Yama dai watohi.

²¹Mai ati ihi hiniya Deoso ati‑ya mai kanahanoterani. Deoso‑ka Doni mai‑ya Deoso ati‑ya kamine, ati‑ya mai mita, ati‑ya mai kanahanameteni.

Dai one deoso bare ati‑ya mai kaminaboneni

¹Hibati‑ka mai one Deoso ati‑ya mai mitamone mai ati na, bara mai ati‑ya mai kaminabisa, Deoso yokana ati‑ya mai kaminarameteni. Fara dai tabaro‑ka dai‑ya mai ka‑kanawato, mai one Deoso yokana ati‑ya mai kamina, mai one‑ta Deoso ati‑mona‑ya mai kamina, deoso bare ati‑ya mai kaminabisineni. Mai ati dai tokadabiya, Deoso yokana ati‑ya dai nofaraboneni.

“Yeso Kirisito ai‑ka hidi tohi awire, ai manakone‑ya nanahabi awirane.” Mai one ati naboneni.

Keyehe‑ya mai hirina, hini mai ati ihi mai abawahaboneni.

²Keyehe‑ya mai hi‑hiri mai ati‑ya mai one nofa, mai ati‑ya mai tokadaba, Deoso ati‑ya mai nofa‑mone mai ati na, mai ihi amosara mai ihi‑ya dai one mai awiya, Deoso‑ya mai kakowahaboneni.

³Keyehe‑ya dai‑ya mai ka‑kanawato, hini mai ati‑ya dai‑ya mai kamineni, Deoso ati monaha. Yinero‑ya mai nokotonihe, keyehe‑ya mai hiriteni, dai‑ka yinero‑ya mai kayafabone, mai ihi‑ya Deoso watomata, mai manakone‑ya daaneya, mai ababoneni. Mai manakone daani‑ya Deoso fawaterebonane.

⁴Hibati‑ya Deoso‑ka yo‑yose neme‑ya mai wina, mai one ihi amosara, mai‑ya Deoso ati somawami awire, mai‑ya weretowiti, yama soki nafi‑kaya mai‑ya yadimata, makobote mai ihi‑ya kadikebonane.

⁵Hibati‑ya bofe‑ya i‑di Nowe wineya, mai ihi amosara, mai‑ya Deoso kasomare, faha fowe nafe ihi mai nafi abameteni. I‑di Nowe‑ya kasomabise, i‑di Nowe hika mai 7 kana mai eyehe Deoso hikasomematane, mai abarabonehe. Faha kimisi awisari‑ya i‑di Nowe mai‑ya hiyare,

“Deoso ati dai nofiya, dai ene amosawamahi.” Ati nematane.

⁶Sodoma‑ya mai wi‑wina, Komora‑ya mai wi‑wina, mai na, mai ihi amosara mai‑ya Deoso sarikane, mai hatiwahameteni.

“Mai ihi amosara, haa‑nima mai oniheboneni.” Deoso ati nematane.

⁷Sodoma‑ya i‑di Ro wineya, Deoso kasome, Sodoma‑ya mai wi‑wina mai ihi amosara, mai ihi i‑di Ro yawe, Deoso ati‑ya mai tokadabara, Deoso mai‑ya nanahabebona, i‑di Ro‑ta ene amose, Deoso ati ene tokematane, abarebonaha.

⁸Mai ati‑ya i‑di Ro mite, mai ati amosarihi, mai ihi‑ya awe, mai ihi amosarihi na, mai ihi i‑di Ro atibodi yawematane.

⁹I‑di Ro‑ya Deoso kasomemata, Deoso ati ai no‑nofa ai‑ya kasomebona ai watoharitene. Sodoma‑ya mai wi‑wina mai ihi amosara, mai manakone amosara‑ya Deoso daanemata, hibayata mai ihi amosara mai manakone amosara‑ya daani watohari, makobote mai ihi‑ya kadikebonane.

¹⁰Ai one Satanasi ati‑ya mai tokadaba, mai one‑ya mai nokotoniteni, mai‑ya mai ahabonehe. Mai‑ka hidi ati‑ya mai kaka, Satanasi‑ka madi mai kiti ba‑basi na mai toha, mai tamine‑ya mai weeni kofina, mai habi siitora, mai ihi‑ya Deoso kadikebonane.

¹¹Deoso‑ka yo‑yose mai kiti ba‑basi teni. Satanasi‑ka yo‑yose madi mai toha, mai tamine‑ya Deoso‑ka yo‑yose mai hiyariya, mai‑ya mai weeni nafiterani.

¹²Ai one mai ihi amosara, bani yama‑ya mai watora mai‑nima mai nineni. Bani mai ai sibateni, bani mai ai nanahababonehe. Fara bani mai‑nima mai na, Deoso mai‑ya wateya, mai‑ya nanahabebonane.

¹³Mai ihi amosaramaro, hini mai ihi‑nima yama na‑ya mai kayafabone, dai eyehe mai tafa, yama tehe‑ya mai serena, dai‑ya mai sawe, mai ihi‑ya bara mai awa, dai ati‑ya mai nofaraboneni.

¹⁴Mai fanawi‑ya mai ahabone mai nokotonihe, mai ihi amosara, Deoso ati‑ya mai fanawi one wato bide toha, mai‑ya mai keyeheteni, mai‑ya mai ahabonehe. Mai one yahi hone‑ya mai yaba, madehe narabi hawira‑nima mai na, hini mai ihi Deoso mai‑ya bisinebonane.

¹⁵Deoso ati‑ya mai nofarihi, Deoso ati‑ya mai tokadabarihi na, Deoso hawine‑ya mai watoterani. I‑di Baraho‑nima mai nineni. I‑di Beyo bidi i‑di Baraho yinero‑ya nokotonihi, yinero ene Deoso ati‑ya tokadabarematane.

¹⁶Ai ati‑nima boho ati re. Deoso ati ene Baraho‑ya boho ai ati‑ya hiyare, Deoso ati‑ya i‑di Baraho mi‑mita‑mata tohe, ati‑ya tokadabarebona, Deoso ene boho ati yanane ene Deoso ati‑ya Baraho tokadabe, makobote boho ati yananami awirane.

¹⁷Yama‑ya mai watora mai one‑ya mai kanawata, faha hodi hokore‑nima mai na, faha‑ya ai ati fawa, faha hodi‑ya ai toka, faha ai fawabone, faha hodi‑ka awira, faha ai fawara, ai bako hokonasa teni. Yama‑ya mai watora, ai‑ya mai kanawata, neme asawi‑nima mai na, ai‑ya mai kasomaterani. Deoso ene yama soki‑kaya mai winabisaboneni, Deoso tabaro‑ya mai winateraboneni.

¹⁸“Oda‑nima dai nahi! Mai fanawi oda nokotonihe, Deoso oda‑ya kayafebonane.” Mai ati nineni,

keyehe‑ya mai hirinaro. Deoso ati‑ya mai tokadabawahabone mai ati na, mai one‑ka keyehe‑ya mai tokadabamatasa, Deoso ati‑ya mai nofamara, mai fanawi‑ya mai nokotonimatasineni.

¹⁹Mai fanawi dai nokotoniyahi mai ati na, dai‑ya mai barikanabone mai ati amani.

“Oda ati dai tokadabiya, oda ati dai‑ya seekanaboneni.” Mai ati na.

Satanasi hibati‑ya mai barihikana, mai one‑ya mai seekanabone mai ati na, keyehe‑ya mai hirineni.

²⁰Mai atibodi bisa toha Satanasi mai‑ya barikane, makobote ai‑ka Hidi i‑di Yeso Kirisito mai‑ya seekane, Satanasi ati‑ya mai nofamatasa, Satanasi mai‑ya barikanamatase, mai‑ya barikani kitawahebonane.

²¹Deoso hawine tamine‑ya mai mitaramaro, mai manakone amosara bi‑bidi, Deoso hawine tamine‑ya mai mitamaro, Deoso ati‑ya mai tokadabara, mai manakone amosara nafibisaboneni.

²²“Yomahi mai saana, mai saani‑ya mai kabamatasateni. Boroko mai ai sokona, atabo‑ya mai wiyamatasateni.” Deoso‑ka yama hani ati nineni.

Fara‑nima mai na, mai ihi amosaramaro, hini mai ihi‑maro‑nima mai ihi namatasineni.

Yeso kamatasebonane

¹Oka dai toha, hibati‑ya dai‑ka yama hani‑bone okanahanamaro, dai‑ka yama hani‑bone okanahanomatasineni. Oka yama hani kafama dai kadikahi, yama amosa‑ya dai atibodi kadikabonehe.

²Deoso ati‑ya mai mi‑mita ati mai hikanahanomata dai kadikiya, ai‑ka Hidi i‑di Yeso Kirisito ati hika yo‑yose mai hikanahanomari, ati dai kadikiya, dai atibodi yama‑ya kadikiyahi.

³Yama dai watohi. Yeso kami yakari‑ya dai‑ya mai hahakanaboneni.

“Yeso kamebona dai ati na, Yeso kamaterebonane.” Mai ati naboneni.

Mai atibodi towe ati‑nima mai naboneni.

⁴“Yeso kamebona dai ati na, fai‑ra? Hibati‑ya Yeso kamebona‑ya ai‑ka idi mai nimanamaroni. Mai hasiniya, Yeso kamare, oda‑ka abi Yeso kami‑ya mai nimana, Yeso kamare, fare kamaterebonane. Yama Deoso wamahinamete‑nima yama nasa nineni.” Mai ati naboneni.

⁵Mai atibodi yama wato‑ya nofara, hibati‑ya Deoso yama‑ya wamane, neme, bofe na‑ya wamane, ati ene faha bai‑ya wami kimisameteni.

⁶Makobote faha nafe ihi bofe‑ya mai wi‑wina mai nafi abameteni.

⁷Hibayata Deoso ene yama tohasa na, makobote mai ihi amosara mai ihi‑ya Deoso kadikeya, neme, bofe na, nafi hirinaboneni. Deoso ati‑ya mai nofaramaro, mai‑ya nahatiwahebonane.

⁸Owati‑ya dai ati kadamoriyahi. Deoso yama‑ya kadike, ai amoni ohare‑nima faha fowe 1.000 toha nineni. Faha fowe 1.000 toha‑nima mahi ohari nane. Dai ati kadamoriyahi. Oda‑ka dai amani.

⁹Deoso hini ati‑nima nebona dai atibodi kadamowamariyahi. Mai ihi amosara mai ababone ati nemata, ati‑nima nebonane. Mai ihi amosara, mai‑ya nanahaba kanibote ni awire, mai ihi amosawamaba awineni. Mai abiya, Deoso nofare mai ihi‑ya mai kaminabone‑ya nofabisane.

¹⁰Ai‑ka Hidi i‑di Yeso kamebonane. Yama‑ya mai botebone mai kaki, ai watoterani. Fara mai kaki‑nima Yeso kami nebonane. Koboneya, neme hirina, hirini moni nafeboneni. Bofe‑ya mai wi‑wina mai abamete mai na mai ihi‑ya Deoso kadikebonane.

¹¹Yama nafi hirinabone, dai ene amosiyahi, dai hatirabonehe. Deoso ati‑ya dai tokadabiyahi.

¹²Yeso Kirisito kamebona dai nimana,

“Yeso kama kanibote tinahi.” Dai atibodi ati nahi.

Kame nowati‑ya Deoso ene neme hirina ihi yama kitara‑nima amowa mai nawahaboneni.

¹³Neme, bofe na yati tohawaha, ai kayafabone Deoso ati nemata, Deoso ati‑nima yama nabone ai nimana, neme, bofe na, yati tohiya, yama nafi amosaboneni.

Bedoro ati hawa tohe

¹⁴Soho, dai ene‑ya Yeso kadikebona, yama dai nimana, dai noko wadahi, dai atibodi yati kabatata rabonehe. Dai atibodi dai‑ya weera, dai ibi ati somiyahi.

¹⁵Mai one Yeso ati‑ya nofara, Deoso mai‑ya nofe, Yeso ati‑ya mai nofabone mai‑ya Deoso nimanane, mai abarabonehe. Ai‑ka soho i‑di Baoro ai nofi nafi, dai‑ka yama hani‑bone‑ya kanahano, Deoso ati‑ya kaminemarine. Baoro ati‑nima yama nineni. I‑di Baoro‑ya Deoso kanawato, dai‑ya Baoro Deoso ati‑ya kaminawahemarine.

¹⁶Yama hani‑ya i‑di Baoro kanahano, Yeso kamebona tamine‑ya kanahanomarine. I‑di Baoro ati owa kite, ati ai wato kanibote re, ati mai one hiwatore, ati‑ya mai watamone, mai ati na ati‑nima mai ati ra, mai ati ke‑keonibisa, Deoso ati owa‑ya mai keonihe, hini mai ihi mai aba, Deoso tabaro‑ya mai koboraboneni.

¹⁷Dai onofa, mai ihi dai‑ya okamina, mai one tosaware tamine dai wato baha, mai ati ihi dai tosawariraboneni. Deoso ati yokana dai wata, mai ati ihi Deoso ati‑ya dai ati kadamowamaraboneni.

¹⁸Ai‑ka Hidi i‑di Yeso Kirisito ati dai wato ba‑basi niya, ati‑nima dai ene na ba‑basi naboneni. Ai manakone‑ya nanahabemari, hibayata ai kahiyare ai kahiyari fawaterayaho. Feye amani.