Yowaho‑ka yama hani yoto‑ke
11Yowaho bote ama·oni. Deoso‑ka mai‑ya ka‑kasoma ama·oni. Fana, owati tikadikiyahi. Hibati‑ya Deoso tiwa‑ya kadikemarine, Yeso ati‑ya tinofabonehe. Tiwa onofa, tika dao, tikoto mai na mai onofa, Deoso ati‑ya mai no‑nofa tiwa‑ya mai nofahari neni.
2Deoso ati ene dai oda nofa, Deoso Bidi ai‑ya sawi, ai‑ya kanakiterebonane.
3Deoso, Deoso Bidi i‑di Yeso Kirisito ne ai‑ya mai kasoma, ai‑ya mai ati somawama, mai ihi ai atibodi ai‑ya weenamara, ai‑ya mai ati nofi nafe, ai‑ya mai sawe, keyehe‑ya mai hiriterani.
4Ai‑ka Abi i‑di Deoso ati‑ya mai kaminamaro, mai ati‑ya tika madehe tokadaba mai ihi ya‑yai·oneni.
5Mai‑ka ami amatini, owati timitahi. Owati bara tohi awirini. Fara mai ati‑maro‑nima owati nineni. Ai ibi nofabone mai ati namaro, fara mai ati‑nima owati nineni.
6Deoso ai nofa, ati ai tokadabatene. Hibati‑ya Deoso ati‑ya mai mitamete tiwa‑ya ati mai hikamine ati tikadabebonane.
7Ai tabaro dami‑nima keyehe‑ya mai hi‑hiri mai tokateni.
“Deoso Bidi, i‑di Yeso Kirisito bofe‑ya kakiterene.” Mai ati na.
Haa‑nima mai ati na, Satanasi‑ka mai toha, Kirisito‑ya mai ka‑kako mai amane.
8Tiwa noko wadahi. Tiwa ene amosa ene tiwa manakone amosa wadateni. Tiwa ene towe tohawaha, tiwa manakone amosa fawanaboneni. Tiwa ene amosanasa na, tiwa manakone amosa nafe, tikayahaboneni.
9Yama nafi‑ya mai watobisamone mai ati na, Kirisito ati‑ya mai tokadabara, Deoso mai‑ya sawiterene. Kirisito ati‑ya mai tokadaba, Deoso mai‑ya sawi, Deoso Bidi mai‑ya sawi tene.
10Tika yobe‑ya mai kake, Deoso ati‑mari‑nima mai ati ni awiriya, tika yobe‑ya mai tokiyomarihi, mai tafe‑ba daatirihi, tinahi.
11Deoso ati‑mari‑nima mai ati ni awira, mai tafe‑ba daatiniya, mai manakone amosara kote tikayahaboneni.
12Owati damabone ona, yama okanahana, owati dami awirini. Tiwa awi onofa, tiwa tabaro‑ya kobo·onabone ona, tiwa tabaro kobo·oniya, tiwa oawiya, ai hiyariya, ai ya‑yainaboneni.
13Tika daowa owa, tikotone, mai na tiwa‑ya mai ati foyani.