2 KORITO

Korito mai‑ka yama hani yoto‑ke

¹Yeso‑ka yo‑yose i‑di Baoro ama·oni. Deoso owa‑ya yosemarine, Yeso ati okaminabonehe. Korito‑ya dai wi‑wina, Akaiya nafi‑ya dai wi‑wina dai na, Deoso‑ka dai toha dai‑ka yama hani‑bone i‑di Timoti oda kanahanoneni.

²Ai‑ka Abi i‑di Deoso, ai‑ka Ayo i‑di Yeso Kirisito mai fama dai‑ya mai kasoma, dai atibodi ati dai‑ya soma teni.

³Ai‑ka Hidi i‑di Yeso Kirisito‑ka Abi i‑di Deoso ai kahiyarahi. Deoso ai‑ya nofe, ai‑ya kasomatene, ai atibodi komene bi‑bidi nabonehe.

⁴Ai‑ya mai kaka, ai‑ya Deoso kasomatene, ai atibodi komene fawanabonehe. Mai mai hikaka mai ai kasomamake, mai atibodi kome bi‑bidi naboneni. Deoso ai‑ya kasomi‑nima mai one ai kasomateni.

⁵Hibati‑ya Yeso Kirisito bofe‑ya wineya, mai nakoma, Deoso hinakitamematane. Yeso‑nima ai‑ya mai bisinamakitasiya, Deoso ai‑ya kasomebonane. Ai‑ya kasomeya, mai one ai kasomamakeboneni.

⁶Hibati‑ya Deoso Ati Amosabote dai‑ya oda kaminabone, oda‑ya mai bisinamaroni, Deoso ati dai mitarabonehe. Ati dai mitawahe, ati dai nofawahene. Oda‑ya mai bisina, Deoso oda‑ya kasome‑ya dai awa, dai habo kitawaha, dai‑ya mai bisinamake, dai habo siitora.

“Baoro mai‑ya Deoso kasome, oda‑ya kasomahari nebonane.” Dai atibodi ati namaroni.

⁷Oda‑ya mai bisina, Deoso oda‑ya kasome, fara‑nima dai‑ya mai bisiniya, Deoso dai‑ya kasomebona oda watoneni.

⁸Asiya‑ya oda wina, oda tamine dai mitiya, yama dai watowahaboneni. Yama kanaha‑ya ai weyena‑nima ona, okitara, owa abi yanatona, o·ababa amanikani onamaroni.

⁹Oda ababa amanikani oda ati na, oda kasomi‑ya oda watora Deoso‑ta oda kasomi‑ya watone. Oda abano abiya, Deoso oda‑ya nakitamebona oda atibodi ati namaroni.

¹⁰Oda ababone oda ati na, oda abi yanatona, Deoso oda‑ya kasome, oda abi yanatonamatasiya, Deoso oda‑ya kasomatasebona oda ati nineni.

¹¹Deoso‑ya oda tamine dai hiyarahi, Deoso oda‑ya kasomebonaha. Dai ati ene Deoso oda‑ya kasomeya, mai dami ya‑yaina, Deoso‑ya mai kahiyaraboneni.

¹²Oda atibodi oda‑ya weera, oda ene amosamone oda atibodi ati na, oda ya‑yaiteni. Mai tabori‑ya oda ene amosa, dai tabaro‑ya oda ene amosa na, yama nafi oda watora, Deoso oda‑ya kasome ene oda ene amosani.

¹³Oda ati‑nima oda‑ka yama hani ati nineni, oda ati kote oda kemora, oda ati dai watowahabonehe.

¹⁴Hibayata oda‑ya dai wato bide toha, oda‑ya dai nofa, oda ene dai ya‑yaina, fara‑nima dai oda nofa, dai ene oda ya‑yainahare, ai‑ka ayo i‑di Yeso kamataseya, ai ibi tamine kaminaboneni.

¹⁵Hibati‑ya dai tabaro‑ya owa toki oharemaro, owa dai wato ba‑basi nabone, dai tabaro‑ya owa toki famamakebone onamaroni.

¹⁶Masedoni‑ya okiya, dai tabaro‑ya maa·onakosamabone owatibodi ati na, dai‑ya owati wee nofara, dai tabaro‑ya oki awiramaroni. Makobote yana·oniya, dai tabaro‑ya okabone, kobo·oniya, Yodeya‑ya okomakebone ona, owa dai kasomaba awineni.

¹⁷Hibati‑ya dai‑ka yama hani‑bone okanahana, dai tabaro‑ya okabone onamaroni. Hini dai‑ya owati ohare toha‑mone, mai one‑ya owati bara toha‑mone, Deoso ati‑ya mai nofara mai ati‑nima owati toha‑mone dai ati na awineni. Haa‑nima owati terani. Owatibodi ati‑nima owati teni.

¹⁸Deoso keyehe‑ya hirire, hini ati‑nima tene. Dai‑ya okayehera. Dai tabaro‑ya okabone ona, owatibodi ati‑nima owati namaroni.

¹⁹I‑di Timoti, i‑di Sira oda na, Deoso Bidi i‑di Yeso Kirisito tamine dai‑ya oda hiyaramaroni. Deoso ati nafi‑ya Yeso tokadabe, ati‑ya fiyakani awiremarine. Yeso tosawarire, Deoso ati‑nima tene. Keyehe‑ya hiriterene.

²⁰Yama nabone Deoso ati nemata, fara‑nima yama naboneni. Deoso ati‑nima Yeso Kirisito ne ati‑nima oda na, fare dai kahiyaraho.

²¹Deoso ai‑ya haane, ai‑ya kadikemarine, Yeso Kirisito‑ka ai tohabonehe.

²²Deoso oni ai‑ya sawi, hika Doni ai atibodi‑ya sawi ne, ati‑nima yama nabone ai watoboneni.

²³Keyehe‑ya hiri·ora, Deoso owati‑ya wato, dai tabaro‑ya oka‑mani, dai‑ya wee·ona neni. Dai‑ya wee·orabone, dai tabaro‑ya okarani.

²⁴Dai‑ka hidi oda tohara, hiniya dai oda kasomabone, Yeso ati‑ya dai nofi ba‑basi naboneni. Yeso ati dai nofi ba‑basi niya, dai ya‑yaina, dai habo siitoraboneni.

¹Owatibodi komamaro, dai atibodi onakomarabone owatibodi ati na, dai tabaro‑ya okaramaroni.

²Dai‑ya wee·oniya, owa ene dai yawiya, ebeni‑ke ene ya‑yai·obati? Owa‑ya dai ya‑yainihe, dai‑ya owati yawi nofarani.

³Dai‑ka yama hani‑bone okanahanamaroni, dai ene amosawamabonehe. Dai tabaro‑ya kobo·oniya, dai ene owatibodi komarabone, dai ene ya‑yai·obisabone owatibodi ati namaroni. Ya‑yai·oniya, dai ya‑yainaharebone owatibodi ati nani.

⁴Dai ene amosaramone, dai ene owatibodi komene kita, dai ene ohi·ona, owa ohini fawara, dai atibodi nakomi onofara, dai‑ya onofi nafe dai watabone, dai‑ka yama hani‑bone okanahanamaroni.

⁵Dai owa ene amosare, ene ai nafi yawa, ohi·ona, dai nafi ohinaharina.

⁶Dai dami ene dai‑ka owa ene amosawame, dai weenamarayaho.

⁷Dai ati somawamiyahi. Maki dai‑ya sawimataseya, sibaraboneni. Dai ati somawamariya, dai weenaba neya, atibodi yawi kiteya, abeba awane.

⁸Fare dai hiyareya,

“Tiwa ene amosaramaro, tiwa ene amosawama, tiwa ene oda yawamara, tiwa oda nofineni.” Dai ati nahi.

⁹“Owatowahabone, owati dai tokadabakaribana?” Owatibodi ati na,

dai‑ka yama hani‑bone okanahanamaroni.

¹⁰Ene amosaremari, ene amosawame dai ati somawamiya, owati somawamahare, Kirisito owa‑ya aweya, owati somawama, dai owa‑ya owati somawamiya, dai‑ya kasomahareba awineni.

¹¹Satanasi ene ai wato, fare dai owa‑ya keyehe‑ya hirikanamarebona, dai ati somawamiyahi.

¹²Torowadi‑ya okamaroni, Yeso Kirisito Ati Amosabote okaminabonehe. Mai tabori‑ya kobo·ona, Deoso ene owati‑ya mai dami mitamaroni.

¹³Owati‑ya mai mitamatasabone mai ati na, oka soho, i‑di Tito‑ya owatibodi watinawaha, Torowadi‑ya i‑di Tito kobo·onabone ona, i‑di Tito kobo·ora, owatibodi i‑di Tito tamine‑ya kadikanade, Masedoni‑kaya okawahamaroni, i‑di Tito owasebonehe.

¹⁴Deoso kitabote tohe, ai kahiyarahi. Mai tabori dami‑ya oda toka, Satanasi mai yadihinamaro, Deoso ene mai oda seekana, yama mahi amosa ai hisina, ai ya‑yaina, fara‑nima Kirisito ati oda kamine, ati‑ya mai mita, mai ya‑yaiteni.

¹⁵Mai‑ya Kirisito ati oda kamina, oda ati‑ya Deoso mite, yama mahi amosa mahi‑nima oda ati toha, Deoso ya‑yainane.

¹⁶Yeso ati oda kamine, oda ati amosa, oda ati‑ya mai mita, Yeso ati‑ya mai nofa, Yeso ati amose mai ati na, yama mahi amosa mahi‑nima oda ati teni. Yeso ati oda kamine, oda ati‑ya mai mita, Yeso ati‑ya mai nofara yama bata mahi‑nima oda ati toha‑mone mai ati teni. Deoso oda‑ya kasomare‑mana, Yeso ati yokana oda kaminara neni.

¹⁷Mai one yinero‑ya nokotonihe, Yeso ati yokana‑ya mai kamini awirani. Deoso oda‑ya yosemarine, Yeso ati yokana oda kaminebonaha. Deoso ene Yeso ati yokana oda kamini oharineni.

¹Oda‑ya oda kahiyari awirihi, mai one‑ka yama hani oda‑ya kahiyara oda damakani awirihi, dai‑ka yama hani oda‑ya kahiyarabone oda haarihi, oda teni.

²Oda‑ka yama hani dai amani, oda atibodi‑ya Deoso dai‑ya kanahano, dai oda nofa, dai ene‑ya mai one awiya, oda tamine‑ya mai watowahaboneni.

³Yeso Kirisito‑ka yama hani dai amani. Oda‑ka yama hani dai tohaharina, oda‑ka yama hani bebeo‑ya awirihi, yati‑ya awirihi na, dai atibodi‑ya Deoso‑ka Doni oda‑ka yama hani‑ya kanahano, Yeso ati‑ya kanahano ne, fara dai atibodi ati‑nima dai ene na, dai ene‑ya mai kadikaboneni.

⁴Kirisito dai‑ya kasome, dai ene amosawamabone oda atibodi ati na, dai tamine‑ya Deoso‑ya oda hiyara, oda ya‑yainawahani.

⁵Deoso ati dai nofa, oda ene tohi awirani. Deoso ene amane. Deoso oda‑ya kasome, oda ene amosani.

⁶Deoso ati‑ya i‑di Mose kanahanomata, ati nafi ai tokadabara, ai manakone wadateni. Ai manakone abara‑mani, ai aba neni. Deoso oda‑ya yose, ai manakone‑ya Yeso nanahabe tamine dai‑ya oda kaminaboneni. Ati ai nofe, ai manakone wadamarabone, Deoso‑ka Doni ai‑ya sawi, Deoso‑ka Doni ene Deoso‑ka ai toha ai wata, Deoso tabaro‑ya ai winaboneni.

⁷Yati‑ya Deoso hini ati‑ya kanahano, i‑di Mose‑ya ati‑ya daanematane. Ati nafi ai tokadabare, ai ababoneni. Yati‑ya Mose kayafe ene noko wehene kite, mai kiihine mai noki‑ya nakomematane. Makobote i‑di Mose noko wehene isitone, fawanawahameteni.

⁸Deoso hini ati yati‑ya hikanahano ene amose, fare Deoso‑ka Doni ai atibodi‑ya ati hikanahano ene amosi ba‑basi nebonane.

⁹Deoso ati Mose hikayahemata ati amosi bi‑bidi ne, ati ene ai ene amosara, ai ababone tamine ai watonineni. Deoso ati ai mitamaki amosi ba‑basi nibise, ati ene Yeso ai manakone‑ya nanahabe tamine ai wato, Deoso‑ka Doni ai‑ya sawibona tamine ai wato, ai ene amosara‑ya Deoso fawanihibona tamine ai wato na, ati amosi nafibisane.

¹⁰Mose ati amose‑mona oda ati namaro, Deoso ati amose yokana oda mitawaha, Mose ati amosami awire‑mona oda ati nawaha.

¹¹Mose ati amosi fawane, Deoso ati ai mitawahe, ati amosi fawaterebona, amosi ba‑basi nane.

¹²Deoso ati amosi fawaterebona, fare ati ai kamine, ai habo siitoterani.

¹³Deoso ati‑ya i‑di Mose kamine, noko‑ya barikanematane, noko wehene fawani yanatone, Isara·eo‑ka nodi mai hiawarebonaha. Mose‑nima oda ni awira, Deoso ati oda kamina, oda‑ya mai awa, sibarini.

¹⁴Deoso ati‑ya Mose kamine, noko‑ya barikanematane, noko mai hiawi nafirebonaha. Mose noko‑ya barikanemata‑nima mai na, mai atibodi‑ya mai bari kiteni, yama‑ya mai watorabonehe. Deoso ati i‑di Mose hikanahanomata‑ya hibayata mai kadika, mai atibodi barikana‑nima mai na, yama‑ya mai wato i‑isi nineni. Yeso Kirisito ati‑ya mai no‑nofa mai atibodi barikani fawana, yama‑ya mai watowahani.

¹⁵Hibayata i‑di Mose ati‑ya mai kadika, mai atibodi barikana‑nima mai na, yama‑ya mai watoraboneni.

¹⁶Yeso Kirisito ai‑ka Hidi ati‑ya mai nofa, mai atibodi‑ya ba‑barikana fawanawahateni.

¹⁷Ai‑ka Hidi owa Deoso‑ka Doni tohe, ai‑ya sawi, ai atibodi‑ya seekanateni.

¹⁸Isibiyo noki bisa tohaya, ai‑ya ai awa, ai awi re‑refona, noki ai namosiya, ai‑ya ai awi amosateni. Kirisito‑ka ai toha, Kirisito‑ka isibiyo‑nima ai na, ai‑ya mai awa, Yeso‑ya mai awaboneni. Ai ene amosi bi‑bidi na, Kirisito‑ya mai awi re‑refona, Deoso‑ka Doni ene ai ene amosi ba‑basi niya, Kirisito‑ya mai awi amosawahaboneni.

¹Deoso ati oda kaminebona ati ne. Ati oda kamine, oda habo siitora, oda ati fawaterani.

²Deoso ati‑ya mai one kaminamone mai ati na, Deoso ati‑nima mai ihi ra. Deoso ati kote‑ya mai kema, ati yokana‑ya mai kaminara. Hini yama miti mai hinofa‑nima mai ati na, mai ati‑ya mai nofabonehe. Mai‑nima oda ni awira. Deoso ati yokana oda kamine, ati mai himite, Deoso ati‑ya mai atibodi nofaboneni. Deoso oda ene‑ya awe, ati‑nima ati oda kaminatene.

³Deoso ati‑ya mai nofa oda ati‑ya mai mita, oda ati‑ya mai watoneni. Deoso ati‑ya mai nofara oda ati‑ya mai mita, mai atibodi barikana oda ati‑ya mai watora, mai abiya, madi mai‑ya mai dabawahaboneni.

⁴Deoso yokana ati‑ya mai nofara, madi mai‑ka deoso i‑di Satanasi ati‑ya mai nofabisa, Satanasi ene mai atibodi noki wadara, Deoso Ati Amosabote mai mitara, Kirisito amosabote‑ya mai awara, Deoso yokana‑nima Kirisito ne amane.

⁵Oda tamine‑ya oda kaminara. Yeso Kirisito ai‑ka Hidi ati oda kaminabise, Yeso ene dai‑ka yo‑yose oda toha, Yeso ati dai nofahi.

⁶Hibati‑ya yama soki hinama tohaya, Deoso ati yanane,

“Yama wahi tohawahi.” Ati ne.

Ati ene yama wahi tohawahameteni. Makobote Bidi i‑di Yeso Kirisito‑ya yose, ai atibodi noko‑ya Bidi noko wehene ai aweya, Deoso amosabote tohe ai watowahaboneni.

⁷Atabo‑ya Deoso ai‑ya wamanemata, ai kitara, Deoso kitabote ai‑ya sawi, ati yokana ai kamine, ai ene kitara, Deoso‑ta ene kitabote tohe‑ya mai watowahaboneni.

⁸Yeso ati oda kaminarabone mai ati na, oda‑ya mai weeni kofina, Yeso ati oda kaminanasa nineni. Oda‑ya mai ihi tohabone mai ati na, oda habo kitabisineni.

⁹Oda‑ya mai bisina, Deoso oda‑ya kakanare, mai ihi oda sona, oda waamisamatasanineni.

¹⁰Hibati‑ya Yeso‑ya mai nanahababone, Yeso‑ya mai bisinameteni. Oda abano‑ya mai awiya, Yeso‑ya mai bisina‑nima oda‑ya mai bisina mai awaboneni. Oda abano‑ya mai awiya, Yeso kitame oda‑ya kasome‑ya mai watowahaboneni.

¹¹Yeso ati oda kamina, mahi‑nima oda‑ya mai ati nanahabateni. Yeso oda‑ya kasome, oda‑ya mai nanahabi awisarineni. Yeso ene‑ya mai awiya, Yeso kitame oda‑ya kasome‑ya mai watowahaboneni.

¹²Yeso ati oda kamine ene oda‑ya mai ati nanahaba, dai‑ya Yeso ati oda kaminemari, ati dai nofe, dai abamaraboneni.

¹³“Deoso ati onofe ene owati yananineni.” Ai owa ati nane, Deoso‑ka yama hani‑ya.

Fare‑nima Deoso ati oda nofa, oda ati yananineni.

¹⁴Ai‑ka Hidi Yeso Kirisito abeya, Deoso nakitamemata, ai abiya, ai‑ya nakitameya, Deoso tabaro‑ya ai‑ya towakamebonane.

¹⁵Oda‑ya mai bisina, sibarini, oda bisini dai‑ya kasomaboneni. Yeso ati‑ya mai dami mitiya, ati mai hinofe, ai nafi ya‑yaina, Deoso‑ya ai kahiyaraboneni.

¹⁶Oda abano kiti fawani yanatona, kiti fawanaba awineni. Oda atibodi kiti fawarabone, mahi‑nima oda atibodi‑ya Deoso nakitamatene. Oda atibodi kita ene oda ya‑yaiteni.

¹⁷Hibayata oda‑ya mai bisi, oda‑ya mai kako na, oda amoni damariya, oda‑ya mai bisinamarihi, oda‑ya mai kakomarihi naboneni. Yeso kamataseya, oda amosawaha, oda noko wehene wadawaha, oda noko wehene fawateraboneni. Oda bisini oda kadikamaraboneni. Hibayata oda komene bi‑bidi na toha, yama Deoso daahinabone amosi ba‑basi nabone, oda komene‑ya fiyakani nafeboneni.

¹⁸Yama ai awa ai nokotonira, aba kanibote naboneni. Yama ai awara ai nokotonihe abateraboneni.

¹Yobe ewene kitare, aba kanibote tene. Yobe ewene kitare‑nima ai abano na, ai amoni fa‑famaraba niya, ai aba, neme‑ya ai abano bara Deoso ai‑ya daanebona, neme‑ka ai kayafa, abateraboneni.

²Hibayata bofe‑ya ai wina, ai abano komateni. Neme‑ke abano ai kayafiya, ai komamateraboneni. Fara ai abano yati‑ya ai ati kobonineni.

³Neme‑ya ai koboniya, ai atibodi honita toharabone, ai abano yati tohawahaboneni.

⁴Bofe‑ya ai wina ai abano koma, ai kiya, ai atibodi komateni. Ai ababone ai nofara, ai abano yati ai kayafabone ai nofabisa, ai abano yati tohawahiya, ai komamarihi, ai kiyanamarihi, ai atibodi komamarihi, ai abamarihi na, yama amosabisaboneni.

⁵Ai abano yati Deoso wamahina‑ya ai‑ya daanebona ati nane. Hika Doni ai‑ya sawi, ai abano yati ai kayafabone ai watoneni.

⁶Bofe‑ya ai wina ai abano atabo‑ya wamani tohasa niya, makobote ai winabone neme‑ya, ai‑ka Hidi eyehe ai winabone ai wato, ai atibodi ya‑yaiteni.

⁷Ai abano yati ai awara, ai nimana, Deoso ati ai mite, ati ai nofane.

⁸Ai‑ya mai nanahabiya, sibaraboneni. Ai habo siitora, ai abano atabo‑ya wamani toha‑ya ai sawimara, Yeso‑ya ai sawiya, yama amosabisaboneni.

⁹Bofe‑ya ai winasa niya, yama ai aniteni, ai ene Kirisito ya‑yainebonaha. Neme‑ya ai kobona, ai ene ya‑yainebona ai nokotoniheboneni.

¹⁰Yeso Kirisito noko‑kaya ai waa, ai ene‑ya kadikebonane. Ai ene amosa‑ya kadika, ai ene amosara‑ya kadika nebonane. Ai ene‑nima ai manakone naboneni.

¹¹Yeso Kirisito ene kite, ati dai tokadabare, yofinatene.

“Yeso ati dai nofa, ati dai tokadaba, dai naho.” Oda ati teni.

Ai atibodi ati‑ya Deoso wato, oda ene amosa dai atibodi wata awineni.

¹²Oda ene tamine dai‑ya owa kami awiraboneni. Oda ene dai awiya, oda ene amosa tamine dai kaminaba awineni. Hini mai‑ya mai kahiyara, mai ihi amosara, mai‑ya oda ene tamine dai kaminaba awineni.

¹³Oda atibodi honita toha‑mone mai ati na, oda atibodi‑ya Deoso watobisane. Oda atibodi honita tohara, hiniya dai oda kasomabone oda atibodi ati teni.

¹⁴Yeso Kirisito ai‑ya nofi nafi ene dai‑ya oda kaminamaroni. Ai nafi manakone‑ya nanahabebona, abematane. Ai manakone aba ene ai abamete‑nima ai nawaha, ai manakone wadamarani.

¹⁵Ai nafi manakone‑ya nanahabe, ai hasina, ai‑ya ai nokotoniriyahi. Ai manakone‑ya nanahabe, kitamemata ai nokotonibisahi.

¹⁶Hibati‑ya mai one ai awa, mai mese‑ta ai nokotonihe, mai mese ai kadikamaroni. Hibayata mai mese ai nokotonira, mai ihi‑ta ai nokotoniwaha, mai ihi ai kadikabisateni. Hibati‑ya Yeso mese okadikemari, hibayata ene owatowahe, mese okadikami awire, ene okadikabisawahene.

¹⁷Yeso Kirisito‑ka ai toha, ai yati tohawaha, hibati‑ka ai ene amosaramaro, ai ene amosa yanarabateni.

¹⁸Hibati‑ya Deoso ai nofara, ai ene amosara, ai ene ai ababone Deoso ati ne, ai‑ya nofe, ai abarabone, Yeso‑ya yose, ai manakone‑ya Yeso nanahabe, ai‑ya Deoso ati somawame tamine mai dami himitebona, oda‑ya yosemarine.

¹⁹Deoso ati ene mai nafi manakone‑ya Yeso nanahabe, ati‑ya mai no‑nofa mai ihi‑maro‑ya kadikamaterebona oda ati nabone Deoso ati nane.

²⁰Deoso oda‑ya yosemarine, Yeso Kirisito ati dai‑ya oda kaminabonehe.

“Deoso dai‑ya nofe, dai‑ya nokotonihi. Ati dai nofaho, Deoso‑ka dai tohawahabonehe.” Oda ati teni.

²¹Yeso ene amose hinama tohe, ai ene amosara‑ya kayafe, abematane. Ai ene amosara manakone‑ya nanahabemata, ati ai nofe‑ya Yeso ene amose hinama‑ya ai kayafaboneni. Deoso ai‑ya ati somawamatene.

¹Deoso oda‑ya yosemarine, dai oda hiyarabonehe. Deoso dai kasomi‑ya nofe, ati dai nanahabarayaho.

²“Mai ati miti onofa, owa‑ya mai haana, mai ati omita, mai okasoma, owa tabaro‑ya mai winamakeboneni.” Deoso‑ka yama hani ati nineni.

Hibayata dai ati‑ya Deoso miti nofe, dai haaniya, dai‑ya ati somawamebona, Deoso tabaro‑ya dai winamakeboneni.

³Oda ene amosini, Deoso tabaro hawine‑ya mai yakana, oda ene‑ya mai awa, mai taratokarihi, oda ene‑ya mai one awa, Deoso‑ya mai weerihi nabone oda ati teni.

⁴Deoso‑ka oda toha Deoso ati yokana oda kamine‑ya mai watabone, oda ene amosateni. Oda‑ka yamata wadara, oda ati yawara. Oda‑ya mai bisina, mai oda weera. Oda atibodi koma, oda ati yawa kanibote ra. Oda ene amosa‑ya mai awa, Deoso‑ka oda toha, Deoso ati yokana oda kamine oda‑ya mai wataboneni.

⁵Oda‑ya mai kosi, kadeya‑ya oda‑ya mai nawaa, mai dama mai yorotokana oda‑ya mai ati bisi na, mai oda kasomabone, oda‑ka yama anini kita, yama soki‑ya oda amorihi, oda tafarihi oda teni.

⁶Oda ene amosa dai awa, Deoso ene yama oda wata, oda yawa kanibote ra, oda‑ya mai kaka mai oda kasomabisa, Deoso‑ka Doni oda‑ya sawi, dai‑ya oda nofi nafineni. Deoso ati yokana oda kamina, oda‑ya dai watowahaboneni.

⁷Deoso ati oda kamina, Deoso ene kitabote tohe, sodado mai‑nima sayo‑kaya yama kita‑ya mai damana, yama koma mai‑ya koborabone, yama mai damahina, mai‑ya kasoma‑nima Deoso oda‑ya kasomatene, Satanasi‑ka yama koma oda‑ya koborabonehe. Sodado mai yahi kanika‑ya yima‑ya mai damateni, mai hama mai‑ya mai bisinabonehe. Fara mai‑nima Deoso ati oda kamina, Satanasi‑ka mai kananaboneni.

⁸Oda‑ya mai one kahiyara, oda‑ya mai one tai, oda tamine‑ya mai kamina, mai one ati amosa, mai one ati amosarihi na, Deoso‑ka oda toharamone mai one ati na, Deoso‑ka oda tohani.

⁹Oda‑ya mai watora, oda tamine‑mone‑ya mai dami mitabisateni. Oda ababone mai dami ati na, oda abi awisarani. Oda‑ya mai bisina, oda‑ya mai nanahabi awisarani.

¹⁰6:10 Deoso‑ka yama tosiyoteraboneni. Yeso Kirisito ai‑ya dabe, ai‑ka yamata tosiyoteraboneni. Firibo 4:19Mai ihi oda atibodi koma, oda ya‑yainasa na, yama oda kiharamone mai ati na, oda ati‑ya mai nofa, Deoso tabaro‑ya mai‑ka yama dama toha, tosiyoteraboneni. Yinero oda kihara, Deoso‑ka yama nafi oda kayafabisaboneni.

¹¹Korito‑ya dai wi‑wina, owatibodi ati dai‑ya okamina, dai oda nofi nafineni.

¹²Dai oda nofi nafe, oda dai nofi awiriya, oda ene tohara, hini dai atibodi ati ene tohani.

¹³Oka madehe‑nima dai na, dai oda nofi‑nima oda dai nofahi.

¹⁴Yeso ati dai no‑nofa Yeso ati‑ya mai nofara mai‑ya dai famariyahi. Ai ene amosa, mai ati kasira, mai‑ya ai dabaterani. Yama wahi ohari yama soki ohari teni. Yama soki‑ya yama wahi famaterani.

¹⁵Yeso Kirisito ati‑nima Satanasi ati terene. Yeso ati ai no‑nofa ai ene‑nima Satanasi ati‑ya mai no‑nofa mai ihi ni awira, mai‑ya dai dabariyahi.

¹⁶Mai‑ka deoso hiniya wamane, Deoso yokana tabaro‑ya sawiterene. Deoso yokana tabaro ai toha, deoso hiniya wamane‑ya ai sawiriyahi.

“Oka mai toha, mai atibodi‑ya osawe, mai eyehe yaka·onaboneni. Mai‑ka Deoso ama·oni.” Deoso ati nematane.

¹⁷“Owati‑ya mai nofara mai ati dai tokadabarihi, mai‑ka yama towe dai boyorihi na, dai okayahaboneni.” Deoso ati nematane.

¹⁸“Dai‑ka abi ohawahabone, oka dao dai toha, okoto dai toha nawahaboneni.” Deoso kitabote ati nematane.

¹Dai onofa, owati dai mitahi. Deoso ai‑ya kasome ene ai atibodi amosa, ai abano ene amosa nahi. Deoso ai nayawarabone, Deoso ai ya‑yainihebone, ai ene amosahi.

²Dai‑ya oda nofa, oda dai nofahi. Dai‑ya oda ene ati kasiro awirihi, dai oda towe tonirihi, dai‑ka yama oda kayafarihi, teni.

³Dai‑ya wee·ora, dai‑ya oda nofi nafe, oda hasi, oda aba niya, dai nofi‑ya oda fawaraboneni.

⁴Dai ene amosabone owatibodi ati na, dai ene owatibodi ya‑yaiteni. Dai ene amosa tamine oda kaminateni. Oda‑ya mai wee, oda‑ya mai bisina, oda korikasara, dai ene oda ya‑yainibisateni.

⁵7:5 Owati‑ya mai mitamatasabone mai ati na, i‑di Tito‑ya owatibodi watinawaha, Torowadi‑ya i‑di Tito kobo·onabone ona, i‑di Tito kobo·ora, owatibodi i‑di Tito tamine‑ya kadikanade, Masedoni‑kaya okawahamaroni, i‑di Tito owasebonehe. Korito yoto‑ke 2:13Masedoni‑kaya oda kobona, oda maa toha, oda hasinabone oda ati na, oda hasini awira, hiniya oda‑ya mai wee, oda‑ya mai bisi na, oda habo siitonamaroni.

⁶Mai atibodi koma mai‑ya Deoso kasomatene. Dai tamine oda mitara, oda atibodi koma, fare Deoso oda‑ya kasome, i‑di Tito koboname, dai tamine‑ya kamine, oda ya‑yainawahani.

⁷I‑di Tito koboname, oda ya‑yai, fare i‑di Tito‑ya dai kasomamone dai tamine oda mita, oda ya‑yai, oda‑ya dai ati foyamone, oda kobonabone oda‑ya dai nimanamone, dai owa ene amosare ene dai ohinamone, dai tamine omita, owa ya‑yaini ba‑basi nineni.

⁸Hibati‑ya dai‑ka yama hani‑bone okanahanamaro, owatibodi komene bide toha, owatibodi komami awira, oka yama hani ihi dai atibodi komamaro owatoneni. Dai amoni damariya, dai ene amosawama ene dai atibodi komene fawanamaroni.

⁹Oka yama hani daa·onamaro ihi tamine omita, ya‑yai·owahani. Dai atibodi komamaro tamine ya‑yai·oni awirani. Dai atibodi koma ene dai ene Deoso‑ya dai kamina, Deoso ati‑nima dai nawaha, oka yama hani dai‑ya nakomara, dai‑ya kasomabisani.

¹⁰Ai ene amosara, Deoso ene ai atibodi komawaha, ai yawa, ai tamine Deoso‑ya ai kamina, Deoso ai‑ya ati somawameya, ai ya‑yaiteni. Hiniya mai ati yawa, mai tamine‑ya mai kaminara, mai ababoneni.

¹¹Oka yama hani dai kadikamaro, Deoso ene dai atibodi komamaro, dai ene dai awahi. Dai ene amosawamabone dai nokotoniwaha, dai owa ene‑nima dai ene ra oda watabone dai nofamone, dai owa‑ya dai yawa, dai owa ene‑nima dai one ene namakitasaba awineni dai ati na, dai habo siitona, dai owa ene amosare manakone hikayahabone dai atibodi ati nawaha, dai owa ene‑nima dai ene ra dai oda awawahani.

¹²Ene amosare‑ka yama hani toharihi, badi‑ka toharihi na, dai ene oawabone, dai‑ka yama hani‑bone okanahanamaroni.

“Oda‑ya mai nofiya, oda ati‑ya mai tokadaba, oda‑ya mai nofariya, oda ati‑ya mai tokadabaraboneni.” Owatibodi ati namaroni.

Dai ene‑ya Deoso awa, dai ene dai awahari nabone, dai‑ka yama hani‑bone okanahanamaroni.

¹³Oda ya‑yainineni. I‑di Tito‑ya dai kasoma, dai ene i‑di Tito ya‑yaine ene oda ya‑yaini ba‑basi nineni.

¹⁴Dai tabaro‑ya i‑di Tito tokebona dai tamine okaminamaroni.

“Korito‑ya mai wi‑wina mai ihi amosa, tiwa‑ya mai kasomaboneni.” Onamaroni.

Dai tamine ohiyara, owati‑nima yama nihi, Deoso ati dai‑ya oda kaminemari, ati‑nima yama nihi teboneni.

¹⁵Dai tamine‑ya i‑di Tito kadike, dai‑ya nofi nafiwahemonane. Tito ati dai tokadabe, Deoso ati‑ya dai‑ya kamine, Deoso ene dai habo siitona, dai wawawakanamone i‑di Tito ati nane.

¹⁶Hini dai ati‑nima dai ene na, dai ene ya‑yai·oneni.

¹Oda‑ka dai amani. Masedoni‑kaya mai wi‑wina Deoso mai‑ya kasome, mai tamine okaminaboneni.

²Mai mai bisihina, Deoso ati‑ya mai nofasa na, mai ya‑yainineni. Mai‑ka yama bide toha, mai atibodi ya‑yaina, mai one yama‑ya kihara mai‑ka yama bide kote‑bone ba‑basi na‑ya mai daanani.

³Yama bide‑ta mai kiha, ba‑basi na‑ya mai daana, hini mai ati ihi yama‑ya mai daa, oda ati ene toharani.

⁴“Baoro, Yodeya‑ya mai wi‑wina Deoso ati‑ya mai no‑nofa mai‑ka yamata awiramone, mai‑ka yinero‑bona oda daane, dai towakamahi, mai‑ka yamata‑bone‑ya mai kanikabonehe.” Mai ati nineni, mahi‑nima.

⁵“Yama bide‑ya mai daanaba amanikani.” Oda ati na,

oda ati‑ya mai fiyakana, yama nafi‑ya mai daanineni. Deoso‑ya mai‑ya mai daani baha, Deoso ati ene oda ati‑ya mai tokadababone mai ati nineni.

⁶Masedoni‑ya mai wi‑wina mai ihi amosa tamine i‑di Tito‑ya oda hiyarawaha,

“Tito, Korito‑ya mai wi‑wina mai tihiyaramaro, mai tihiyaramatasahi. Yodeya‑ya mai wi‑wina mai‑ka yamata wadara, mai‑ka yinero‑bona‑ya mai daanabone mai ati na, mai ati‑maro‑nima mai nahi.” Oda ati nineni.

⁷Masedoni‑ka mai‑ka yama fa‑famaraba nibisa, Korito‑ya dai wi‑wina dai‑ka yama ba‑basi, Yeso ati dai nofi ba‑basi, dai ati amosi ba‑basi, yama dai wato ba‑basi, oda dai nofi ba‑basi na, yama‑ya dai daani nofamone, yama dai daana ba‑basi nahi.

⁸Owati ihi yama dai daariyahi. Hini dai ati daahina, dai daanibisahi. Mai one ihi tamine dai mita, mai one‑ya mai nofa‑nima mai dai nofahare awineni. Yama dai daana dai awa, mai dai nofa dai watowahaboneni.

⁹Ai‑ka Hidi i‑di Yeso Kirisito ene dai watoneni. Hibati‑ya neme‑ya wine, yama nafi‑ya kihe, makobote bofe‑ya kaki, bofe‑ya hika yama wadara, abe, ai manakone‑ya nanahabe, hibayata yama nafi‑ya mai kiha, mai‑nima ai nawaha, Deoso‑ka yama ai kayafawahabone, tosiyoteraboneni.

¹⁰Owati dai mitamatasahi. Faha fowe one‑ya yama‑ya dai daanabone dai ati na, mai one yama‑ya ati daani awisari‑ya yama dai ati daana, hini dai ati‑nima yama dai daanahi.

¹¹Yama daani dai nofa‑mone dai ati namaro, yama dai kiha, hini dai ati‑nima yama na, dai daaniya, yama amosaboneni. Yama daani dai nofa, hini dai ati‑nima yama dai daanahi.

¹²Ai nafi‑ya Deoso wato, yama ai kiha‑ya wato, ai owa yama dama‑ya kihe‑ya wato, ai owa yama damara‑ya kihe‑ya wato nane. Yama daani‑ya ai atibodi nofa, yama bide‑ta ai kiha, kote ai daana, ai atibodi‑ya awe, ya‑yaitene. Yama dama ai kiha, kote ai atibodi daani nofara, mai one ati ihi yama ai daanibisa, ai atibodi‑ya awe, ya‑yaiterene. Yama ai daana‑ya Deoso nokotoni awire, ai atibodi‑ya nokotonibisa tene.

¹³Yamata‑ya mai kihara mai dai kasomabone, dai‑ka yamata damara, nafi dai daariyahi. Kote mai hikayaha, kote dai kayafa nahi. Dai‑ka yamata fara kafamahi.

¹⁴Hibayata dai‑ka yamata dama, dai ebenabone onani. Makobote mai‑ka yamata damiya, dai‑ya yamata‑ya mai ebekawahaboneni, dai‑ka yamata fara kafamabonehe.

¹⁵Hibati‑ya tabora awiri‑kaya ai‑ka idi mai yakana,

“Mana‑ya mai timana, mai‑ka mana dama, one hasini awirani. Mana‑ya mai timana, mai‑ka mana damara, tosiyo awirani.” Deoso‑ka yama hani ati nineni.

¹⁶Dai‑ya owatibodi kasomi nofa, Deoso ene dai‑ya owatibodi kasomi‑nima i‑di Tito dai‑ya kasomaharine. Deoso ene ya‑yai·oneni.

¹⁷“Tito, mai tabori‑ya tikamatasibana?” Ona,

“Hehe, owa amoni fa‑famaraba niya, mai tabori‑ya okomatasaboneni.” I‑di Tito ati ne.

Hini ati ene dai tabaro‑ya tokomatasebona ati nane.

¹⁸I‑di Tito tokomeya, oda owa oda yoseboneni, I‑di Tito‑ya sawibonaha. Oda owa Deoso ati‑ya kamine, ati‑ya Deoso‑ka mai dami nofani.

¹⁹Yodeya‑ya mai wi‑wina mai‑ka yinero‑bona oda towakamiya, fare oda‑ya sawibona Deoso ati‑ya mai no‑nofa mai yorotokana mai ati nineni. Yeso ati dai nofa, Yeso‑ka mai dai nofa, dai na, Yodeya‑ya mai wi‑wina dai ene amosa‑ya mai awiya, ai ene‑ya mai watowahiya, Deoso‑ya mai kahiyaraboneni.

²⁰Yinero nafi oda towakamabone, dai owa oda‑ya dabaho, oda ene‑ya awebonaha. Yinero kote oda kayafare‑ya awebona oda ati nineni.

²¹Ai‑ka Hidi i‑di Yeso ai ene amosa‑ya awa, mai one hiawa hinabone oda ati nofani.

²²I‑di Tito mai eyehe oda‑ka owa oda yosehareboneni. Hibati‑ya ene amose oda awe, dai tamine ohiyara ene, dai tabaro tokiya, nofi nafimona ati nane.

²³I‑di Tito tamine‑ya dai one mitabone mai ati na, owa‑nima i‑di Tito ne, dai oda kasomabone oda ati teni. I‑di Tito‑ya mai da‑daba, mai tamine‑ya mai mitabone mai ati na, tabora one‑ka Deoso‑ya mai kahiyarabone, mai yorotokana, mai‑ka owa oda‑ya sawibona‑ya mai kadika, tabora one‑ka mai‑ka owa‑ya mai kadika mai na, Kirisito‑ya mai kahiyarabone, fare i‑di Tito‑ya mai sawineni.

²⁴I‑di Tito mai koboniya, mai dai kasomiyahi. Dai tamine i‑di Tito mai‑ya ohiyara,

“Korito‑ya mai wi‑wina dai‑ya mai kasoma, dai‑ya mai nofa naboneni.” Onaroni.

Owati‑nima dai niya, Deoso ati‑ya mai no‑nofa dai tamine‑ya mai nafi mitaboneni.

¹Yodeya‑ya mai wi‑wina mai‑ka yinero‑bona oda towakamabone tamine dai watoneni.

²Hibati‑ya faha fowe one‑ya dai tabaro‑ya oka, yama dai daanabone dai ati na, Masedoni‑kaya okomake, dai tamine okamina, dai ati tamine‑ya mai mita, mai dami yama‑ya daanaharebone mai ati namaroni.

³Masedoni‑kaya dai oda kahiyaramaroni. Yama dai daanabone, yama dai hawa tonihebone oda ati namaroni. I‑di Tito mai oda yosebone, oda koboniya, yinero dai hawa toni awiriya, oda ati honita toha‑mone mai ati naboneni.

⁴Masedoni‑ya mai wi‑wina owa‑ya mai saweba awineni. Owa‑ya mai sawiya, yinero dai hawa toniriya, oda‑ya mai hahakana, dai‑ya mai hahakana niya, dai habo siitonaba awineni.

⁵Ai‑ya mai hahakarabone, i‑di Tito mai oyose, dai tabaro‑ya mai toki dai tohaboneni. Dai tabaro‑ya mai koboniya, yama dai daanabone dai hawa tonihe, dai ya‑yainaboneni.

“Korito‑ya mai wi‑wina yama daani‑ya mai nofineni?” Owa‑ya mai sawe mai ati naboneni.

Yama dai daanabone dai hawa toni awiriya,

“Korito‑ya mai wi‑wina yama daani‑ya mai nofarani.” Mai ati naba awineni.

⁶Yamata kami tamine‑ya dai ati kadamoriyahi. Yamata damara dai kama, dai‑ka yamata damaraboneni. Yamata dama dai kama, dai‑ka yamata damawahaboneni.

⁷Ai owa ati ene yama dai daariyahi. Yama dai atibodi daara, dai daarihi. Hini dai atibodi daahina, dai daanahi. Yama ai atibodi daani nofa, Deoso ya‑yaitene.

⁸Deoso kitabote tohe, dai kasomi‑ya fawaterebona, dai‑ka yama tosiyoteraboneni, mai dami‑ya dai kasomabonehe.

⁹“Yama‑ya mai kihara mai‑ka yama‑bone‑ya Deoso daatene. Deoso ene amose, ene amosi fawaterene.” Hika yama hani ati nineni.

¹⁰Ai‑ka yamata ai kamabone‑ya Deoso ai‑ya daane, ai kamaya, Deoso nayanatene, ai kababonehe. Dai ene amosa‑ya Deoso kasomebonane, dai ene amosa dodamabonehe.

¹¹Yama dai daana, oda towakama, mai‑ya kasomaboneni. Dai ene Deoso‑ya mai kahiyaraboneni. Deoso dai‑ya kasome, mai dami‑ya dai kasomamakeboneni.

¹²Yamata‑ya Deoso‑ka mai one kihara, dai ene yamata‑ya mai kihawahabone, dai ene Deoso‑ya mai kahiyarahareboneni.

¹³Yama dai daana, dai ene mai ya‑yaina, Deoso‑ya mai kahiyarabone,

“Abi Deoso, amosabote amatini. Korito‑ya mai wi‑wina yama dama‑ya mai kihara, mai ihi amosa, oda‑ka yamata‑bone‑ya mai daana, tika dao i‑di Yeso Kirisito ene‑nima mai ihi na, oda‑ya mai kasoma, mai‑ka yamata‑ya mai daanineni.” Mai ati naboneni.

¹⁴Deoso‑ya dai tamine‑ya mai hiyarabone,

“Abi Deoso, amosabote amatini. Korito‑ya mai wi‑wina mai ihi amosa, mai tikasomamaro, mai kasomi ba‑basi tinahi.” Mai ati naboneni.

¹⁵Deoso ai‑ka yama‑bone daahina, ai fiyakiteraboneni. Deoso ai kahiyarahi.

¹Baoro ama·oni. Owati dai mitahi. Owati hamara, owati somateni. Hibati‑ya Kirisito ati somemata‑nima owati somateni. Dai‑ya osawiya, owati somabisa, yama hani‑ya owati hamatemone dai owa ati nemona mai ati nineni.

²Owati dai mitahi. Dai tabaro‑ya kobo·oniya, dai‑ya owati wee nofarani. Dai owa ene amosawami awireya, fare wee·onebonane. Satanasi‑ka mai ati‑nima owati ni awira, Owati kita miti‑ya dai nofaraboneni.

³Bofe‑ya ai nafi wina, ai ibi weena, ai ati kiti awirini. Deoso ai‑ya weene, ati kitatene. Deoso ati‑nima owati na, dai‑ya wee·oniya, owati kitaboneni.

⁴Deoso ati‑ya mai nofarabone, mai atibodi‑ya keyehe‑ya Satanasi barikane, mai atibodi ba‑barikana‑ya ai ati seekiterani. Deoso ati kitabote tohe, ati oda kamine, mai atibodi ba‑barikana‑ya Deoso ati seekitine.

⁵Keyehe‑ya mai nofamaro Deoso ati oda kamine, ati‑ya mai mita, keyehe‑ya mai nofami awira. Satanasi mai atibodi‑ya barikanemari, Deoso ati‑ya mai mita, mai atibodi seekawahani. Kirisito atibodi ati‑nima oda atibodi ati nabone oda nofateni.

⁶Kirisito ati dai tokadabi bahe, nowati‑ya Kirisito ati‑ya mai tokadabamakira, mai oda weeniya, mai manakone amosara oda daanaboneni.

⁷Owa mese‑ta dai awa, owatibodi dai awara, Kirisito‑ka dai toha‑mone, owa‑ta Kirisito‑ka ohara‑mone dai ati na awineni. Dai atibodi dai kadikamatasahi. Kirisito‑ka‑hari ama·ona dai awaboneni.

⁸Ai‑ka Hidi i‑di Kirisito owa‑ya kadikemari, ati ene owa kiti toha, owa kiti dai‑ya kasomabone, dai nakomi‑ya onofara, owa kiti tamine ohiyariya, owa habo siitorani.

⁹Oka yama hani ihi dai habo siitoriyahi. Hiniya dai‑ya oka yama hani kasomabone oteni.

¹⁰“Yama hani‑ya i‑di Baoro oda‑ya weene. Oda tabaro‑ya koboneya, ati yanani amosare, habo siitone, oda‑ya weeterene. Yama‑ya mai watora mai ati‑nima ati nane.” Dai one ati namoneni.

¹¹Oka yama hani ati kitamone mai ati na, kobo·oniya, mai ihi amosara, oka yama hani ati kiti‑nima owa abano ati kitahare‑ya mai awawahaboneni.

¹²Dai tabaro‑ya mai one toka, amosabote mai‑mone mai ati na, mai‑nima oda ni awirani. Yama amosabote yokana‑ya mai awara. Mai ibi awabisa, haa‑nima mai na, yama‑ya mai wato awisarani.

¹³Oda ene‑ya oda ati fiyakani awirini. Deoso oda‑ya yosemari, ati‑nima oda ene nabone oda nofineni. Dai‑ya oda kasomabone ati ne, dai‑ya oda kasomaboneni.

¹⁴Yeso Kirisito Ati Amosabote dai‑ya oda kamini bahe, tamine oda hiyare, keyehe oda hirini awirani. Hini oda ene‑maro tamine oda kaminineni.

¹⁵Mai one ihi oda kayafi awirani. Deoso ati dai nofi ba‑basi niya, dai ene mai one‑ya oda kasomahareba awineni. Oda ati teni.

¹⁶Deoso ati dai nofi nafiya, dai wini toki‑ka mai‑ya Deoso oda‑ya yoseya, Yeso Kirisito Ati Amosabote tamine‑ya mai one mitatera, mai‑ya tamine oda kaminawahebonane. Hibati‑ya Deoso tamine‑ya mai mita, mai tabori‑kaya oda tokomaraboneni.

¹⁷Dai ene dai kahiyarariyahi.

“Deoso dai‑ya kasome ene tamine dai kahiyarabisahi.” Deoso‑ka yama hani ati nineni.

¹⁸“Amosabote oda amani.” Mai ati na,

mai ati amosa awineni.

“Mai ihi amosini.” Deoso ati neya,

mai ihi amosateni.

¹Mai ati siwana mai ati‑nima owati bide nabone, owa tamine dai‑ya ohiyarabone, owa‑ya dai yawariyahi.

²Mai fanawi fanabone, mai‑ka yibote‑bona‑ya mai nokotonihe, maki bare‑ya mai nokotoniterani. Dai okayawa, Kirisito‑ka dai tohabone, Deoso ati dai nofi oharebone, Satanasi ati dai nofarabone onamaroni.

³Hibayata dai tamine omita, owa habo siitoneni. Hibati‑ya i‑di Efa i‑di Satanasi ati‑ya nofamete‑nima Satanasi ati dai nofawahaba awineni. Satanasi ati dai nofa‑mani, Kirisito ati ohari dai nofara neni.

⁴Deoso Bidi i‑di Yeso ai manakone‑ya nanahabemata tamine dai‑ya oda kaminamaro, mai one dai tabaro‑ya kobona, Yeso oni‑ya mai hirina, Yeso bare tamine‑ya mai kamina, mai ati dai nofamoneni. Doni mai ati‑mone mai ati na, Deoso‑ka Doni ati tohi awire, ati dai nofamoneni. Deoso ati‑mona ati‑ya mai kamina, Deoso Ati Amosabote oda kaminemari, ati‑nima mai ati ni awira, mai ati dai nofamoneni.

⁵Yeso‑ka yo‑yose amosabote mai‑mone mai ati na, Yeso‑ka yo‑yose ohaharineni. Owa ene‑ya mai ihi fiyakiterani.

⁶Owati yanani amosara, Deoso ati owato ba‑basi ona, ati dai‑ya okamine, oka yama wato dai watoneni.

⁷Deoso Ati Amosabote ati dai‑ya okamine, oka hiyara manakone haa·ora, owati kasiramone dai ati na awineni. Dai‑ya okasomabone, hiyara manakone haa·oramaroni.

⁸Dai‑ya ohiyara, Deoso ati‑ya mai no‑nofa tabora bara‑ya mai wi‑wina, oka yinero‑bona‑ya mai daana, mai‑ka yinero oda kayafamaroni, dai‑ka yinero oda haarabonehe.

⁹Dai tabaro‑ya owina, oka yamata tosiya, dai‑ka yamata haa·ora, Masedoni‑ka oka yamata kaniki‑bone‑ka oka yinero‑bona‑ya mai kakamakemaroni. Dai‑ka yamata haa·orihi, dai‑ka yinero haa·orihi onabone, dai‑ka yinero haa·oteraboneni.

¹⁰Kirisito ati okamine‑ya yinero haa·otera tamine ohiyarateni. Akaiya‑ya dai wi‑wina owati dai mitamaro, dai ene amosawamamaro, dai ene owati fawaraboneni.

¹¹“Oda‑ka yamata‑ya i‑di Baoro haare, oda‑ya nofare awane.” Dai ati namone.

Dai onofi nafe owa‑ya Deoso watone.

¹²Hibati‑ya Deoso ati okaminiya, yinero haa·ora, fara‑nima nasa onaboneni. Yinero haa·oraboneni. Oda‑nima mai namone, oda‑nima mai ni awira, mai‑ya mai one awaboneni.

¹³Kirisito‑ka yo‑yose mai tohara, Kirisito‑ka yo‑yose hini mai‑ya mai tonihe, keyehe‑ya mai hiriteni.

¹⁴Mai‑ka hidi i‑di Satanasi Deoso‑ka yo‑yose‑mona, hini‑ya tonihi tene.

¹⁵Mai‑ka hidi ene‑nima mai ihi teni. Satanasi‑ka mai toha, Deoso‑ka mai‑mone mai ati na, hini mai ihi‑nima mai manakone naboneni.

¹⁶Ka‑kana ora, hiniya ka‑kana mai ati‑ya owati toha, owati dai mitahi. Owa tamine okaminaboneni.

¹⁷Owa ene tamine okaminabone, Deoso ati ene tohi awire, hiniya ka‑kana mai ati‑nima owati nineni, owa ene tamine okaminaro.

¹⁸Hini mai‑ya mai kahiyarabone, mai‑ka idi tamine‑ya mai kamina, mai ihi tamine‑ya mai kamina na, mai ihi tamine dai mita, fara owa tamine dai mitahi.

¹⁹Yama nafi‑ya dai watamone dai ati na, ka‑kana mai ati‑ya dai nofasa nineni.

²⁰Amosabote mai‑mone mai ati na, dai‑ya mai yose, dai‑ya mai keyehe, dai‑ka yama‑ya mai kayawa, dai‑ya mai bisi na, mai ati dai nofasa nineni.

²¹Mai ihi‑nima owa ene ra, hiniya okitaramone dai ati na awineni. Ka‑kana mai ati‑nima owati na, owa tamine okaminawahaboneni.

²²Ebereo mai toha, fara ebereo ama·oni. Isara·eo‑ka nodi mai toha, fara Isara·eo‑ka nodi ama·oni. Abaraho‑ka nodi mai toha, fara Abaraho‑ka nodi ama·oni.

²³Yeso Kirisito mai‑ya yosemona mai ati na, owa‑ya yoseharimarine. Ka‑kana mai ati‑nima owati namatasaboneni. Mai ihi‑ya owa ene fiyakana, owa‑ya mai bisini fiyakana, owa‑ya mai kosini fiyakana, owa‑ya kadeya‑ya mai nafoyi fiyakana, owa abi yanatoni fiyakana nineni.

²⁴Yodeo mai‑ka ko‑kosi bowi mai atori‑ya wamani tohaya, owa‑ya mai kosina, mahi 5 tohe‑ka ko‑kosi koboni 39 hinama tohineni.

²⁵11:25 Yeso‑ka yo‑yose mai tamine 14:19Homano ko‑kosi yokana‑ya owa‑ya mai kosina, mahi 3 tohe‑ya owa‑ya mai kosina, owa kosini dama, yati‑ya owa‑ya mai baana namaroni, o·ababonehe. Makobote maboro dame‑ya osawe, maboro 3 tohe boke, mahi ohari yama soki ohari na‑ya maa‑ya ofowa, dibo·onamaroni.

²⁶11:26 Yeso‑ka yo‑yose mai tamine 23:12Mai tabori dami‑ya oka, Yeso tamine okaminabonehe. Faha kaki nafe, faha kayana fowe nafe ihi owa abi yanatona, yama‑ya mai bo‑boti owa‑ya mai ati nanahaba, oka mai one owa‑ya mai ati nanahaba, Bara owa‑ya mai one ati nanahaba, mai‑ka yobe dame wadi‑kaya owa‑ya mai ati nanahaba, mai‑ka yobe awira‑kaya owa‑ya mai ati nanahaba, faha webote bai‑ya owa‑ya mai ati nanahaba namaroni. Deoso ati‑ya mai nofa‑mone mai ati na, Deoso ati‑ya mai nofara, owa‑ya mai nanahababone mai ati namaroni.

²⁷Oka yama anini kita, maa oha, yama soki dama‑ya amo·orihi, mahi dame‑ya otafarihi, faha ofirihi, yama sire oka bora one wadara, siri oha onamaroni.

²⁸Oka yama anini one toha, mahi‑nima Deoso‑ka mai dami tamine‑ya owatibodi kadikateni, mai okasomabonehe.

²⁹Yeso ati‑ya mai one nofa, mai ihi amosara mai tamine omita, owatibodi koma, mai‑ya owatibodi kasomateni. Mai one ihi Deoso‑ka owa ene amosare, mai ihi oyawani.

³⁰Owa tamine okaminabone, owa amosi tamine okamini awirini. Okitara tamine‑ta okaminabisaboneni.

³¹Ai‑ka Hidi i‑di Yeso Kirisito‑ka Abi, i‑di Deoso ai kahiyaranadi, ai kahiyari fawarayaho. Keyehe hiri·ora, Deoso owa‑ya watone.

³²Hibati‑ya Damaso‑ya owina, mai‑ka kofenado mai‑ka hidi ba‑basi na i‑di Aretasi mai na, owa‑ya mai watabone, mai ati ihi mai tabori nafi barikana‑ka nokobi‑kaya sodado mai yoronineni, owa‑ya mai watabonehe.

³³Tabora nafi barikana, fowari‑ya yobe waari ba‑barikana‑ka hodi neme‑ya waana, fara‑ya hisiri‑ya owa‑ya mai kanakisamaroni, sodado owa‑ya mai watarabonehe.

¹Owa tamine okaminamakitasa, dai‑ya kasomara awineni. Oka Hidi i‑di Yeso ene wada‑nima yama na oawa, owa‑ya kanawatomarine.

²Hibati‑ya faha fowe 14 tohi‑ya Kirisito ene neme‑ya maki tokemari owato, korimari toha, abano toha ne awane. Yama owatora, Deoso‑ta hiwatobisane.

³Maki neme‑ya toke, oni owato, korimari toha, abano toha ne awane. Owato awire, Deoso hiwatobisane.

⁴Deoso tabaro‑ya toke,

“Ati timite ati tikaminarayaho.” Deoso ati nemarine.

⁵Neme‑ya maki Deoso hiwakame tamine okahiyaraboneni. Owa‑ta okitara, owa tamine okaminabisaboneni.

⁶Keyehe‑ya hiri·ora, owa tamine nafi okamina‑mani, owa‑ya dai nofi fiyakana neni. Owa dai nofi fiyakarabone, owa tamine nafi okaminaraboneni. Hiniya owa ene dai awa, owati dai mita na‑nima owa dai nofabisaboneni.

⁷Yama amosa dama‑ya Deoso owa‑ya yofikanemarine. Owa onofi ba‑basi oni awirihi, owa‑ya mai nofi na‑nafi ni awirihi nabone, atiwa komene‑nima Satanasi ene owa abano komawahateni.

⁸“Ayo Kirisito, owa tinakitamahi. Atiwa‑nima yama na fawanaboneni.” Ona,

Owati yanani 3 tohamaroni.

⁹“Baoro, tiwa eme komene fawaraboneni. Sibaraboneni. Tiwa okasomaboneni. Tiwa eme kitara, tiwa ene‑ta kita‑ya mai awa, owa ene toha‑ya mai watowahaboneni. Tiwa eme komara‑mani, owa ene‑ya mai watora neni.” Kirisito ati nemarine.

Owa eme koma tamine okamina, ya‑yai·oneni, Kirisito ene‑ya mai awabonehe.

¹⁰Kirisito ene‑ya mai awabone, ya‑yai·oteni. Owa eme koma, ya‑yai·ona, owa‑ya mai weena, ya‑yai·ona, oka yama wadara, ya‑yai·ona, owa‑ya mai bisina, ya‑yai·ona, oteni. Owa eme kitara, Kirisito owa‑ya kasome ene, owa ene kitateni.

¹¹Owa tamine‑mone‑ya mai kamina, mai ati dai nofa, owa ene dai awamaro dai kaminara. Dai ene yama‑ya mai watora mai ati‑nima oka yama hani tohani. Amosabote mai‑mone mai ati na, owa ene‑ya mai ihi fiyakani awira, amosabote ama·ora, Deoso ene‑ta owa ene kitateni.

¹²Dai tabaro‑ya owina, Deoso ene dame‑ya dai awa, dai habo siitona,

“Ka! Haa‑nima ai ene na, oda awaterani. Deoso ene amosabote amane.” Dai ati namaroni.

Yeso‑ka yo‑yose ohara‑mani, Deoso ene‑ya dai awara neni.

¹³Mai one tabori‑ya Deoso ati okamini‑nima dai tabaro‑ya owina, Deoso ati dai‑ya okamina, hiniya dai tabaro‑ya owa tefe‑ba haa·orihi, amo·obone‑ka yama haarihi, onamaro, fara ihi dai ati yawa awineni. Owa‑ya dai ati somawamahi.

¹⁴Dai tabaro‑ya oki famamaro, dai tabaro‑ya okomatasiya, dai‑ka yamata haa·oraboneni. Dai‑ka yamata‑ya owati koboni awirini. Dai‑ya onofi nafe, oka madehe‑nima dai na, ai‑ka madehe‑ya ai kasoma, manakone ai haara, manakone mai daahiterani. Dai‑ya okasomabone, dai‑ya ohiyara, oka yama manakone haa·oteraboneni.

¹⁵Dai‑ya okasomabone, dai ene oka yinero tosiyoya, dai ene o·abiya, sibaraboneni. Dai‑ya onofi ba‑basi oniya, owa‑ya dai nofi bi‑bidi bana?

¹⁶“Oda‑ka yamata‑ya i‑di Baoro haare, oda noko beheri‑kaya oda‑ka yinero kote‑ya kayafabise awane.” Dai one ati namoneni.

¹⁷Dai tabaro‑ya oka mai sawe, oka yama‑bone‑ya mai haatini? Oka yama‑bone‑ya mai haaterani.

¹⁸I‑di Tito oyose, oda‑ka owa‑ya fame, owati‑nima i‑di Tito ne, dai‑ka yama‑ya kayafarihi tene. Owa ene‑nima ene tene.

¹⁹Hiniya owa dai nofabone owati toha‑mone dai one ati na awineni. Deoso oda‑ya awe, oda ati‑ya mite, Kirisito ene dai‑ya oda kasomabone, oda ati tohabisa Deoso watone.

²⁰“Dai tabaro‑ya kobo·oniya, dai ene amosaraba awineni.” Owatibodi ati na.

Dai ene amosara‑mani, owa ene dai nofara neni. Dai ibi wee, mai one‑ka yama‑ya dai ati kayafa, dai ibi ati yawa, dai one‑ya dai ati kasomara, keyehe‑ya dai hiri, mai noki beheri‑kaya mai tamine‑mone‑ya dai kamina, dai‑ya dai kahiyarabisa, dai ibi nimani awira, dai ene haa‑nima niya, owa ene‑ya dai awaboneni.

²¹Dai tabaro‑ya kobo·oniya, dai ene amosara, dai tamine‑ya Deoso‑ya dai kaminara, dai ene oyawa, ohi·ona, Deoso owa‑ya weeneba awane. Dai owa‑ka yobote‑ya dai owa aha, mai fanawi one‑ka yibote‑ya mai one dakora namone, dai ene owatibodi komene kitaboneni.

¹Hibati‑ya dai tabaro‑ya owa toki famamaro, makobote owa amoni fa‑famaraba niya, dai tabaro‑ya okomatasaboneni. Ai owa ene towe tohemona ohari ati ne, ati dai nofariyahi. Mai fama, mai 3 toha na, ai owa ene towe tohemona mai ati na, mai ati dai nofabisahi.

²Dai tabaro‑ya oka, mai ihi amosara mai‑ya haa·ona,

“Dai ene‑maro‑nima dai ene namariyahi.” Onamaro,

Hini owati‑maro‑nima yama hani‑ya owati namatasaboneni. Dai tabaro‑ya kobo·onamatasiya, mai ihi amosaramaro, mai ihi amosanasa ra, owa ene‑ya mai awawahaboneni.

³Yeso Kirisito ene kite, owa‑ya dai awabone dai ati na, kobo·oniya, dai owa ene amosare, Yeso ene dai awaboneni. Kirisito ene kitebonane.

⁴Yeso kitaremona mai ati na, mai hinahabe, ene kite, Deoso hinakitamemata, abamaterebonane.

“I‑di Baoro mai kiti awirini.” Dai one ati na awineni.

Ene amosanasa re, Kirisito ene owa ene kita‑ya awebonane.

⁵Dai atibodi dai kadikahi. Deoso‑ka dai toha, Deoso‑ka dai toharihi na, awineni. Dai‑ya dai watoyahi. Yeso Kirisito dai atibodi‑ya sawi awire‑mana, Deoso‑ka dai tohara neni.

⁶Yeso‑ka oda toha, oda‑ya dai watowahabone owatibodi ati nofani.

⁷“Abi Deoso, Korito‑ya mai wi‑wina mai tikasomahi, mai ihi amosabonehe.” Oteni.

Dai ene amosa, oda‑ya ya‑yainihe, oda‑ya dai nofara, sibarini. Dai ene oda ya‑yainaboneni.

⁸Mai ihi amosa, mai‑ya oda ati kitarabone, mai ihi amosara mai‑ya oda ati kitabisaboneni.

⁹Dai ene amosi nafe, oda‑ya ya‑yainihe, oda ene kitaramone mai ati na, sibarineni. Dai ene amosi ba‑basi nabone, dai tamine Deoso‑ya oda hiyarateni.

¹⁰Yama yaki‑ya owina, yama hani‑ya dai‑ya wee·onani, dai ene amosawamabonehe. Dai ene amosawamiya, dai tabaro‑ya kobo·oniya, dai‑ya wee·onami awiraboneni. Kirisito owa‑ya yosemari ene, owa ene kitateni. Owa kiti dai‑ya kasoma, ya‑yai·oteni. Owa kiti dai‑ya nakoma, onofi awirini.

¹¹Feye amani. Deoso ati‑ya dai tokadabi ohare, oka yama hani dai kadika, ati‑nima dai nahi. Dai one ati dai mita, fara dai atibodi ati kafamiya, dai ibi weeraboneni. I‑di Deoso dai‑ya sawi, dai‑ya nofe, dai atibodi ati‑ya nasomebonane.

¹²Deoso ati‑ya dai no‑nofa, dai ibi kobona, dai‑ka ayo dai kobona‑nima dai ibi kobona, dai nahi.

¹³Oda yowi‑ya mai wi‑wina Deoso ati‑ya mai no‑nofa dai‑ya mai ati foyamoneni.

¹⁴Deoso‑ya dai tamine ohiyara, ai‑ka Hidi Yeso Kirisito dai‑ya kasome, Deoso dai‑ya nofe, Deoso‑ka Doni dai‑ya sawinebona oteni. Feye amani.