1 TIMOTI

Timoti‑ka yama hani daidi

¹Baoro ama·oni. I‑di Yeso Kirisito‑ka yo‑yose ama·oni. I‑di Deoso owa‑ya kadikemarine, hika ohabonehe. I‑di Yeso Kirisito ai‑ya ka‑kasoma, kamebona ai nimaneni.

²Timoti, tika yama hani‑bone okanahanoneni. Yeso tamine hibati‑ya ohiyare, tamine tinofa, tiwa oka dao onamaroni. Ai‑ka Abi, i‑di Deoso, ai‑ka Ayo i‑di Yeso Kirisito ne, tiwa‑ya mai kasoma, tiwatibodi ati tiwa‑ya somateni.

³Masedoni‑kaya okabone, tiwa ohiyara,

“Efesiyo‑ya tiwina, mai tikanawatoyahi, Yeso ati‑ya mai nofabonehe. Mai ati bara‑ya mai‑ya mai kanawata, mai‑ya tiwati barinahi.” Onamaroni.

Owati‑maro‑nima tinahi.

⁴Hiyara bote‑ya mai hiyari nafiriyahi. Mai‑ka idi mai tamine‑mete‑ya mai kadikanadiriyahi. Haa‑nima mai niya, Deoso ati‑ya mai watoraboneni. Hiniya mai ibi weenaboneni. Yeso ati ai nofa, Yeso ati ai kadikiya, yama ai watobisaboneni.

⁵Owati‑nima mai niya, Yeso ati‑ya mai nofi nafiya, mai ibi nofaboneni. Mai atibodi somawama, mai atibodi mai‑ya weeni awiraboneni.

⁶Mai one hiniya hiyara mai ati honita tohani.

⁷Mose‑ka yama hani‑ya mai‑ya mai kanawatabone mai ati na, yama‑ya mai watora mai‑ya mai kanawatoneni.

⁸Mose‑ka yama hani ati sibabisarineni. Deoso ati‑nima Mose‑ka yama hani ati teni. Mose ati‑nima mai ihi na, mai ihi amosateni.

⁹Yeso ati‑ya ai no‑nofa ai ene amosa, Mose‑ka yama hani ihi ai‑ya mai bisiterani. Mai ihi amosara, Mose‑ka yama hani ati ihi mai‑ya mai bisinaboneni. Deoso ati‑ya mai nofara, mai ihi amosaterani. Deoso ati‑ya owati nofara mai ati na, Deoso tamine‑ya keyehe‑ya mai hirina, mai‑ka abi, mai‑ka ami, mai na, mai‑ya mai bi‑bisi, mai one‑ya mai wakateni.

¹⁰Mai fanawi one‑ya mai aha, maki mai‑ya mai aha, mai na, mai tamine‑ya i‑di Mose kanahano, yara mai‑ya mai one‑ya mai daa, keyehe‑ya mai hiri, mai na, mai tamine‑ya i‑di Mose kanahano nemarine. Deoso ati oda kamine, oda ati‑nima mai terani. Mose‑ka yama hani ati‑nima Deoso mai‑ya bisinebonane.

¹¹Hibati‑ya Deoso owa‑ya yosemarine, Ati Amosabote ohiyarebonaha. Deoso Ati Amosabote‑ya mai tokadabara, Mose‑ka yama hani ati‑nima Deoso mai‑ya bisinebonane.

Yeso ai manakone‑ya nanahabebona kobone

¹²Yeso Kirisito ati ene Deoso tamine‑ya ohiyarineni. Ai‑ka ayo Yeso kitabote tohe, owa‑ya nakitame, owa‑ya kadike,

“Deoso Ati Amosabote tihiyariyahi.” Ati ne.

Ati ene ya‑yai·onamaroni.

¹³Hibati‑ya Yeso ati onofara, Yeso tamine‑ya keyehe‑ya hiri·ona, Yeso ati‑ya mai no‑nofa mai‑ya bisi·ona, yama owatora, Deoso owa‑ya ati somawamemarine.

¹⁴Yeso ene sibare, hibati‑ya mai bisi·ona, Yeso onofara, Yeso owa‑ya nofe, ati ene Deoso ati‑ya onofawaha, hika mai onofawahineni.

¹⁵“Yeso Kirisito kame, ai manakone‑ya nanahabemarine.” Mai ati na.

Keyehe‑ya mai hirini awirani. Towe ama·oni. Owa ene amosara, owa manakone nafibisamaro, ama·oni. Owa manakone‑ya Yeso nanahabemarine.

¹⁶Ai manakone nafi‑ya Yeso nanahabemari, ati ai nofeya, ai ene sibaraboneni. Owa‑ya mai awiya, Deoso yawa kanibote reya, mai watowahaboneni. Yeso ati ai nofiya, ai winawahaboneni Deoso tabaro‑ya. Deoso yawa kanibote ne‑mana, owa‑ya nanahabe namatane.

¹⁷Deoso ai‑ka Hidi webote ohari, abaterebonane. Ai nafi‑ka Hidi i‑di Deoso tohe, Deoso noko ai awatere, neme‑ya wine, Deoso ai nofa,

“Deoso amosabote amane.” Ai ati na.

Ai ati fawariyahi. Owatibodi ati nineni.

¹⁸Timoti, owati timitahi. Tiwa oka dao onamaroni. Tiwa tamine‑ya Deoso ati‑ya mai hi‑hiyara mai kaminamaroni.

“Deoso ati tihiyaraboneni. Tiwati fawariyahi.” Mai ati namaroni.

Tiwa‑ya mai bisiniya, tiwa habo siitoriyahi. Deoso ati tihiyarabisahi.

¹⁹Yeso ati tinofamaro, Yeso ati tinofiyahi. Tiwa ene amosiyahi. Tiwatibodi yati ati‑nima tiniya, tiwatibodi tiwa‑ya weeraboneni. Mai one mai atibodi yati ati‑ya mai tokadabara, mai ihi Deoso ati‑ya mai nofamarani.

²⁰I‑di Imeneo, i‑di Aresadiri, mai fama, mai atibodi ati‑ya mai tokadabara, owati ihi oda‑ya mai dabamarani. Deoso‑ya mai we‑wee tohamaro, Satanasi‑ya mai‑ya daa·onani, Deoso ene tamine‑ya keyehe‑ya mai hirimarabonehe.

Mai daani tamine Deoso‑ya tihiyarahi

¹Dai yorotokana, Deoso dai hiyari bahi. Ai nafi tamine dai hiyarahi. Yama‑ya mai kihara, mai tamine dai hiyarahi, Deoso mai‑ka yama‑bone‑ya daanebonaha. Mai kiyana, mai tamine dai hiyara, Deoso mai‑ya kasomebonaha. Deoso mai‑ya kasome, mai ya‑yaina, dai ya‑yainahare, Deoso‑ya dai kahiyarahi.

²Yara mai‑ka hidi tamine dai hiyara, dai‑ka hidi tamine dai hiyara nahi. Ai‑ka hidi bofe‑ka mai tamine ai hiyariya, ai‑ka hidi ai‑ya mai weeni awiraboneni. Ai ene amosaboneni. Deoso ati‑nima ai naboneni.

³Mai nafi tamine ai hiyariya, ai‑ya Ka‑kasoma i‑di Deoso ya‑yainebonane.

⁴Yeso ati mai dami nofabone, keyehe‑ya mai nofara, Deoso hawine yokana‑ya mai dami watabone, Deoso atibodi nofatene.

⁵Deoso ohari‑ta tohe, Deoso‑ya ai tamine‑ya hi‑hiyara ohari toha nane. Fare ai owa i‑di Yeso Kirisito tohane.

⁶Yama nafi hawa tohiya, Deoso ati ene Yeso kamemarine, ai nafi manakone‑ya nanahabebonaha. Fare tamine‑ya ai hiyarahi mai nafi‑ya.

⁷Deoso owa‑ya kadike, owa‑ya yosemarine, Yeso tamine ohiyarabonehe. Keyehe‑ya hiri·oterani. Deoso Ati Amosabote okaminabisateni. Bara mai okanawataboneni, Yeso tamine‑ya mai watowahabonehe.

⁸Hini dai naho‑kaya Deoso‑ya mai makidi hiyara, mai ihi amosiyahi, mai ati yawarihi, mai ibi weerihi nahi.

⁹Fana dai toha, owati dai mitahi. Dai‑ka bora dai sakona i‑isi riyahi. Dai‑ka bora, dai‑ka ato, dai‑ka tati kone na‑ya, mai makidi awa, dai tamine‑ya mai atibodi kadikarabonehe.

¹⁰Dai ene‑ya mai awa, dai ene amosa, Deoso‑ya dai nofa mai watowahaboneni.

¹¹Deoso ati yokana‑ya mai makidi kamina, fana dai toha, dai ati yanariyahi. Mai ati dai mitahi.

¹²Dai yorotokaniya, mai makidi‑ya Deoso ati‑ya dai kaminariyahi. Mai makidi‑ta Deoso ati‑ya kaminabisa, mai ati dai mitahi.

¹³Deoso i‑di Adaho‑ya wamani dai tohe, i‑di Efa‑ya wamani yotomatane.

¹⁴Satanasi‑ka keyehe‑ya i‑di Adaho nofare, i‑di Efa‑ta Satanasi‑ka keyehe‑ya nofabisa, keyehe‑ya i‑di Efa nofa ihi Deoso ati‑ya mai fama mai tokadabarameteni.

¹⁵Yeso ati‑ya mai fanawi nofa, mai ihi amosa, Yeso‑ka mai‑ya mai nofa na, Deoso tabaro‑ya mai winawahaboneni. Mai‑ka ewe wade, abarebonane.

Deoso‑ka mai‑ya mai kanawatabone

¹“Deoso‑ka mai‑ya okanawataboneni.” Ai owa ati ne,

yama amosa‑ya ati kobonane. Timoti, owati timitahi. Keyehe‑ya hiri·orani.

²Deoso‑ka mai‑ya kanawatobona, eya ene nebonane. Hika yobote ohareboneni. Mai fanawi one‑ya nokotoni awirihi tebonane. Mai one kake, ati ene hika yobe‑ya mai winateni. Ati, atibodi ati, ene ne‑ya nawadatene. Deoso ati kanawato‑ya watone.

³Kawi ihi towe toharihi, Yinero‑ya nokotonirihi, mai one‑ya nofa, mai one‑ya weerihi, tene.

⁴Ati hika madehe hinofa, ati fadi hinofa nahi.

⁵Ati fadi hinofarihi, ati bidi mai hinofarihi hineya, Deoso‑ka mai‑ya kanawatoya, ati mai hinofaterebonane.

⁶Hibati‑ya Yeso ati‑ya nofe, sibabisarene. Yeso ati‑ya nofa yati tohe, dai‑ya kanawatorayaho. Yeso ati‑ya nofa yati tohe dai‑ya kanawato hini‑ya kahiyare, hini‑ya nofi nafi, Satanasi ene‑nima ene nawahebonane. Satanasi hini‑ya nofi nafi ene Deoso yawemarine. Ai‑ya ai nofi nafe, ai ene Deoso yawebonane.

⁷Ene amosabise‑ya mai awa, Deoso ati‑ya mai nofara mai ati fawanaboneni. Ene amosare‑ya mai awiya, mai ati fawaraboneni. Hiniya fai‑ya mai weenaboneni. Fai ati‑ya mai one nofamarihi naboneni. Ene amosare, ene Satanasi ya‑yainebonane.

Deoso‑ka mai‑ya mai kasoma, eya mai nahi

⁸Deoso ati‑ya mai ka‑kanawato mai ihi amosa‑nima Deoso‑ka mai‑ya mai kasoma mai ihi tohaharihi. Keyehe‑ya mai hiririhi, kawi‑ya mai nokotonirihi, yinero‑ya mai nokotonirihi, mai nahi.

⁹Hibati‑ya yama‑ya mai watora, Deoso ai‑ya kanawatowahene. Mai atibodi yati ati‑nima mai ihi tohawahineni, mai atibodi mai‑ya weerabonehe.

¹⁰Mai ihi dai awi ba‑basi niya, mai ihi amosa, Deoso‑ka mai‑ya mai kasomiyahi.

¹¹Deoso‑ka mai‑ya mai kasomabone, mai‑ka yobote mai ihi amosahari nahi. Mai one tamine‑mone‑ya keyehe‑ya mai hiririhi, kawi‑ya mai nokotonirihi, mai na, hini mai‑ka yama‑ya mai ani, mai one‑ya mai kasoma, mai na, mai sibarineni.

¹²Deoso‑ka mai‑ya mai kasomabone mai‑ka yobote oharibisa, mai fanawi one‑ya mai nokotonirihi. Ati fadi hinofa, ati hika madehe hinofa, hineya sibarebonane.

¹³Deoso‑ka mai‑ya mai kasoma, mai ihi amosa, mai‑ya mai dami nofawahaboneni. Deoso ati‑ya mai watomakebone, Yeso Kirisito ene mai habi siitoraboneni.

¹⁴Hibayata yama hani okanahana fa‑famaraba naboneni. Owa amoni fa‑famaraba niya, tiwa‑ya okomakeba awineni.

¹⁵Okomaki kanibote oni awiriya, yama tiwatowahaboneni. Deoso‑ka mai ai toha, haa‑nima ai ene naboneni. Deoso‑ka mai ai toha, ai ene‑ya mai awiya, Deoso‑ya mai watowahaboneni. Yobe ewene amosare, yobe soneba awane. Fare‑nima ai ene amosara, Deoso Ati Amosabote mai watoraba awineni.

¹⁶Hibati‑ya Deoso Ati Amosabote tamine‑ya mai watoramete, Ati Amosabote‑ya mai watowahineni. Deoso Bidi i‑di Yeso Kirisito bofe‑ya kame ai owa tohe, ai abano‑nima abano tohe, Deoso‑ka Doni hikasome, ene amose hinama tohemarine. Bofe‑ya wine, Deoso‑ka yo‑yose mai hiawemarine. Ai tabaro nafi‑nima tamine mai hikaminawahane. Yeso ati‑ya mai dami nofawaha, Neme‑ya Deoso hiwakamemarine.

Deoso ati‑ya mai one nofami awiraboneni

¹Deoso‑ka Doni ati dai mitahi. Yeso kami yakari‑ya Yeso ati‑ya mai ati nofa, ati‑ya mai ati nofami awiraboneni. Madi mai ati‑ya mai nofawaha, madi mai ati‑nima mai nawahaboneni.

²Keyehe‑ya mai hirinawaha, mai atibodi ati‑ya mai watomara. Mai atibodi ati fawanaboneni.

³“Dai fanarihi, bani dai kabarihi, dai nahi.” Madi mai ati ihi mai ati naboneni.

Bani‑ya Deoso wamanematane, ai tefe bonehe. Deoso ati ai nofa, Deoso‑ya ai kahiyariya, bani ai kaba, ai sibarihi ai teni.

⁴Yama nafi wamahinamete amosa‑ya dai ati towe toniriyahi. Yama tamine Deoso‑ya dai kahiyara, dai kaba sibaraboneni.

⁵Deoso ati ene yama amosateni. Deoso‑ya ai hiyara, yama ai kaba, ai sibarihi ai teni.

Timoti Yeso ati‑nima tiyahi

⁶Deoso ati‑ya tiwa‑ya okaminamaro, Yeso ati‑ya mai no‑nofa mai‑ya tihiyaramakitasahi. Owati‑ya mai‑ya tihiyariya, sibaraboneni. Haa‑nima Yeso Kirisito‑ya ai na‑narifa ai teni. Yeso ati‑ya tiwatowahaboneni.

⁷Deoso ati‑ta tinofabisahi. Hiyara bote‑ya mai hiyariya, mai ati tinofariyahi. Tiwa‑ya tinawadahi, Deoso ati‑nima tinabonehe.

⁸Ai kiti nafebone, ai yaka, yama ai ani ai teni. Hibayata yakani ai‑ya kasomi bide toha, makobote ai‑ya kasomi terani. Ai‑ya ai kasomi ba‑basi nabone, Deoso ati ai tokadabahi. Deoso ati ai tokadaba, hibayata ai‑ya kasoma, makobote ai‑ya kasomahari nebonane.

⁹Deoso ati yokana amane, ati timitaho.

¹⁰Ai‑ka Hidi i‑di Yeso Kirisito abemari, kitame, abamaterebonane. Ai‑ka Hidi ati ai nofa ene yama‑ya ai ani, ai‑ya mai bisiteni. Ai‑ya Yeso nakitamebona ati ne, fara ai nimaneni.

¹¹Mai nafi‑ya tihiyariya, mai hiwatowahaboneni.

¹²Timoti, Yeso ati‑nima tiyahi. Yeso ati‑nima tiwati nahi. Yeso mai‑ya nofemari‑nima mai‑ya tinofa, tiwa‑ya mai kaka, tiwati yawariyahi. Deoso‑ta owa‑ya nofe, yama sibarabone tiwatibodi ati nahi. Mai fanawi nokotinirihi tinahi. Tiwa ene‑ya mai awaboneni. Yetene tiha, tiwa‑ya mai weeraboneni. Tiwa ene‑nima mai ihi nawahaba awineni.

¹³Okomakebani. Owa nimatiyahi. Owa nimatiniya, Deoso‑ka yama hani tikadikiyahi. Mai narabi‑ya Deoso‑ka yama hani tikadikiyahi. Mai‑ya tikanawata, mai ihi amosara, mai weetiyahi.

¹⁴Hibati‑ya Deoso ati‑ya mai wato ba‑basi na, tiwa tati‑ya mai yahi fore, tiwa tamine‑ya mai hiyara,

“Deoso ati ene mai tikanawatohi.” Mai ati namaroni.

Mai ati timita, tiwati kadamowamariyahi. Mai ati ihi Deoso tiwa‑ya kasomatene.

¹⁵Owati‑ya tiwatibodi kadikanadiyahi. Tiwa noko wadahi, tiwati bara toharabonehe. Deoso ati tiwato ba‑basi tine, tiwa‑ya mai awaboneni.

¹⁶Tiwa noko wadahi. Deoso ati yokana tikamina, Deoso ati‑nima tiniya, Deoso tabaro‑ya tiwinawahaboneni. Tiwati‑ya mai mita, tiwati‑ya mai tokadabiya, Deoso tabaro‑ya mai winahareboneni.

Timoti haa‑nima mai tiniyahi

¹Bote mai ihi amosara mai weetiriyahi. Abi tihiyari‑nima mai tihiyariyahi. Soho mai tihiyari‑nima yetene mai tihiyarahi.

²Ami tihiyari‑nima mai fanawi bote tihiyarahi. Asima tihiyari‑nima atona mai tihiyarahi. Mai nokotiniriyahi.

³Mai‑ka madehe awira, mai‑ka yobote mai abamaro, mai bote toha, mai tikasomahi.

⁴Mai fanawi one kahiwa, mai‑ka ewe hasine, yobote‑ta abemari, ami‑ya ewe mai kasomahi. Fana‑ka nodi mai toha, aki‑ya mai kasomahi. Ai‑ka ami mai‑ya ai kasoma Deoso nofatene. Hibati‑ya ai‑ya mai kasoma, ai‑ya mai nayana, mai bote toha mai ai kasomiya, Deoso ya‑yainebonane.

⁵Mai fanawi fanamaro, mai‑ka yobote mai abamaro, mai‑ka madehe awira, mai‑ka nodi mai awirihi, mai na, hiniya Deoso‑ya mai nofabisa, mai‑ka mai‑ya mai ka‑kasoma‑ba mai wadara, Deoso‑ya mai hiyarateni. Deoso‑ya mai hi‑hiyaranadi, mai oni dai kanahanohi, mai‑ya dai kasomabonehe.

⁶Fana mai one mai‑ka yobote abeya, hini mai ya‑yainabone mai na‑ya, ai aba‑nima mai nawaha, mai oni dai nahanoriyahi.

⁷Mai tikanawatohi. Yama‑ya mai watoya, mai‑ya mai weeraboneni.

⁸Badi, madi, hika mai one na‑ya kasomare, towe amane. Mai‑ya nofarihi, mai‑ya natafarihi ne, Deoso ati‑ya nofaterene. Bara mai‑ta Deoso tamine‑ya mai watora, hini mai‑ka mai one‑ya mai natafateni. Deoso ati ai no‑nofa ai ene amosabisiyahi.

⁹Fana mai fanamaro, mai‑ka yobote mai abamaro, mai makidi one‑ya mai nokotonira, mai‑ka faha fowe 60 kana, mai tikadikiya, mai oni tikanahanoya, mai tikasomiyahi, Deoso‑ka yinero‑ya.

¹⁰Fana madehe‑ya na‑nayana, mai one kake mai‑ya natafa, mai wini‑bone‑ka mai‑ka yobe‑bona‑ya yofikana, mai kiyana mai‑ya kasoma namaroni. Timoti, haa‑nima mai na, mai‑ya tikasomanadiyahi.

¹¹Fana fanamaro, maki abeya, bote tohasa ra, oni tikanahanoriyahi. Deoso‑ka yama ani‑ya aninibisabone ati na, oni tikanahano awisarihi tinahi. Makobote maki owa‑ya nokotonamakiya, hini ati‑nima na raboneni.

¹²Hini mai ihi mai atibodi mai‑ya weenaboneni.

“Ofanamaraboneni. Deoso‑ka yama anina, ani·obisaboneni.” Mai ati namaro.

Makobote mai fanawaha, mai atibodi mai‑ya weenaboneni. Mai ati‑maro‑nima mai ihi tohararo.

¹³Deoso‑ka yinero kote‑ya mai tikasomiya, yama‑ya mai anini awiraboneni. Hini mai one tabori‑ya mai one tamine‑mone‑ya mai hiyaraboneni. Mai ati towe tohawahaboneni.

¹⁴Owati timitamatasahi. Mai fanawi fanamaro, mai‑ka yibote mai abamaro, mai bote tohi awira, mai fanamiya, mai‑ka madehe‑ya mai nayaniya, mai‑ka madehe‑ya mai kanawatoyahi. Haa‑nima mai niya, mai ihi amosaboneni. Yeso ati‑ya mai nofara ai‑ya mai weeni awiraboneni.

¹⁵Mai fanawi one Yeso ati‑ya mai nofa‑mone mai ati na, mai‑ka yibote abe, Yeso ati‑ya mai nofami awira, Satanasi ati‑ya mai nofawahamoneni.

¹⁶Yeso ati‑ya ai no‑nofa ai‑ka mai one‑ka yibote abeya, mai ai kasomahi. Mai ai kasomiya, Deoso‑ka yinero‑ya mai kayafi awiraboneni. Fana ohare yokana toha, hika mai one awira, Deoso‑ka yinero‑ya mai kayafabisahi.

¹⁷Dai‑ya mai ka‑kanawato mai ihi amosa mai dai kasomahi. Deoso ati‑ya dai‑ya mai ka‑kanawato, mai dai kasoma, mai dai nofa, mai ati dai tokadaba, dai nahi.

¹⁸Deoso ati timitahi.

“Dai‑ka bani, yama‑ya anine, iridi‑ya dai barikariyahi. Hini yama‑ya anine, yama‑ya kabayaho.” Deoso ati nemarine.

Yama ai anina, ai‑ka yama manakone wadateni. Fara ai‑ya mai kanawatoya, mai‑ka yama manakone wadateni.

¹⁹Deoso ati‑ya mai ka‑kamina towe mai‑mone ai owa ati ne, ati tinofariyahi. Mai fama mai ati‑ta timitiyahi.

²⁰Ai‑ya ka‑kanawato ene amosare‑ya weetiyaho. Deoso‑ka mai yorotokana, mai noki‑ya ai‑ya ka‑kanawato weetiyahi. Ai‑ya ka‑kanawato ene‑nima mai ihi rabonehe.

²¹Owati timitamatasahi. Deoso, Yeso, Deoso‑ka yo‑yose mai toha na, mai ati‑nima owati nineni. Ai owa ene amosare, weetiyaho. Ene amoseya, weetirayaho. Mai ihi amosa, mai ai weeterani. Mai ihi amosariya, mai weetiyahi. Tika no‑nofa ene amosareya, weetiyaho. Ai‑ka no‑nofa‑mare ene amosare, ai weenahariteni.

²²Deoso ati‑ya mai hiyarabone mai ati na, mai ihi tiwibaiyahi. Mai ihi amosiya, mai tati‑ya tiwa yehe foriya,

“Deoso ati tihiyariyahi.” Tinahi.

Mai ihi amosara, mai tati‑ya tiwa yehe foririyahi. Tiwati yanariyahi. Ene amosare tati‑ya tiwa yehe foriya, tiwa‑ya mai awiya, tiwa‑ya mai weenaboneni.

“Ene amosare ene‑nima ene nawahene.” Mai ati naboneni.

Tiwa ene amosa hinama tohiyahi.

²³Kiya tinofa, tiwa nabadi koma na, fino bide tifihi, tikitamawahaba. Faha hinama tife, kiyatinamatasabone owatibodi ati neni.

²⁴Ai owa ene amosare‑ya ai awa, mai ai weena, mai ihi amosawahabonehe. Ai owa ene amosare‑ya ai awara, ai teni. Mai ai weera, Deoso‑ta mai ihi‑ya awe, mai manakone‑ya daanebonane.

²⁵Ai owa ene amose ai awa, ai owa ene amose ai awirihi, ai teni. Mai amosa mai fama Deoso mai ihi‑ya awikime, mai manakone amosa‑ya daanebonane.

¹Dai‑ya mai kanikamaro, dai‑ka hidi dai nofiyahi. Dai‑ka hidi ati dai tokadaba ene Deoso‑ya mai kakorabone, Deoso‑ka yama hani tamine‑ya mai kakoraboneni.

²Deoso ati‑ya tika hidi nofe ene ya‑yaitiyahi. Tika hidi tikakoriyahi. Tika ayo amane. Tika hidi Deoso ati‑ya nofe, yama anini tikitabisahi. Deoso mai‑ya nofatene.

Yama‑ya mai watora, dai‑ya mai kanawatoriyahi

³Owati‑nima mai tihiyarahi, yama‑ya mai watowahabonehe. Ai‑ka Ayo Yeso Kirisito ati‑nima mai ati ni awiriya, yama‑ya mai kanawatobone mai ati na,

⁴towe mai amani. Hini mai‑ya mai kahiyarabone mai ati toha, mai ati ihi mai ibi wee, mai ibi yawa, mai ibi kaka, mai yorotokaterani.

⁵Yeso ati‑ya mai nofara,

“Yeso ati oda ati nofa, mai oda kanawatoya, yinero nafi oda kayafaboneni.” Mai atibodi ati na.

Mai ihi Yeso ati‑ya mai one nofara, mai ibi ati tokatoweboneni.

⁶Deoso ati ai tokadabiya, ai ya‑yaina, yama dama ai kayafa‑nima yama naboneni.

⁷Ai wada yati toha, yinero ai kihaterani. Ai abiya, ai‑ka yinero ai‑ya sawiterene.

⁸Hibayata ai tefe toha, ai‑ka bora toha na, ai ya‑yainahi.

⁹Yinero‑ya mai no‑nokotoni towe mai amani.

“Yama amosara‑ya ai aniniya, ai‑ka yinero nafibisebonane.” Mai ati teni.

Mai ihi amosara. Satanasi mai‑ya waratonebonane. Yama amosara‑ya mai nokotonihe, hini mai ihi mai abawahaboneni.

¹⁰Yinero‑ya mai nokotonihe, mai ihi amosaraba awineni. Yinero‑ya ai one no‑nokotoni Deoso hawine‑ya mai sawimi awiramaroni. Hini mai ihi mai yawi kitawahamaroni.

Deoso hawine‑ya tiwa yakani amosahi

¹¹Timoti, Deoso‑ka amatini, mai‑nima tiriyahi. Deoso ati‑nima tina, tiwa ene amosiyahi, mai‑ya tinofiyahi. Deoso hawine‑ya yakatina, tiwa yakani amosiyahi. Mai‑ya tiwati yawariyahi. Deoso ati tinofiyahi.

¹²Deoso ati fawatiniriyahi. Deoso tiwa‑ya haanemari, tabaro‑ya tiwinabone, Deoso ati‑ya tinofamone, mai dami tiwati‑ya mai mita, mai ihi tiwa habo siitoriyahi. Satanasi tiwa‑ya kako, ati‑nima tiriyahi.

¹³Deoso ai‑ya wamanemata owati‑ya mitane. Yeso Kirisito i‑di Bonisiyo Birato‑ya hiyare, habo siitoremari, Yeso Kirisito owati‑ya mitane. Owati timitaharihi. Deoso ati tikadaba, tiwa‑ya mai ati bisina, tiwa habo siitoriyahi.

¹⁴Yeso ati‑nima tiyahi. Yeso ati‑nima tiniya, Yeso‑ka mai‑ya mai hahakani awiraboneni. Makobote Yeso kamatasebonane.

¹⁵Deoso ati ene Yeso kamatasebonane. Deoso amosabote amane. Ai‑ka Hidi i‑di Deoso tohe, hidi webote mai‑ka Hidi tohe, hidi mai nafi mai‑ka Hidi tohe nane.

¹⁶Deoso abaterebonane. Hini wehene kite‑ya winane. Yama wahi kita ihi ahiyata‑ya ai tokaterani. Deoso noko ai awaterani. Deoso ai kahiyarahi. Deoso kitabote amane. Kiti fawaterebonane. Feye amani.

¹⁷Mai‑ka yinero dame, mai tihiyara,

“Dai‑ya dai kahiyarariyahi. Dai‑ka yinero dai nokotoniriyahi. Deoso ati‑ta dai nofabisahi. Deoso ati dai nofiya, dai‑ka yamata‑bone‑ya dai‑ya daanebonane.” Tinahi.

¹⁸“Dai ene amosa damahi. Mai‑ka yamata wadara, mai‑ka yamata dai daa, mai‑ka bora wadara bora dai daa dai nahi.” Tinahi.

¹⁹Haa‑nima mai niya, Deoso ya‑yainebonane. Deoso tabaro‑ya mai‑ka yama manakone wadaboneni. Bofe‑ya mai wi‑wina mai ya‑yainaboneni.

²⁰Timoti, Yeso ati nafi tinofa, Yeso ati‑nima tiyahi. Mai ati one tinofariyahi. Yama‑ya mai watora, mai ati tinofariyahi. Yama‑ya mai watamone mai ati na, yama‑ya mai watorani.

²¹Mai ati‑ya mai mita, Deoso ati‑ya mai nofami awirani. Deoso tabaro hawine‑ya mai watora mai tosawarineni. Timoti, Deoso tiwa‑ya kasomane.