1 TESARONIKA

Tesaronika mai‑ka yama hani daidi

Deoso ati‑ya mai kamina, mai tamine‑ya Baoro mitane

¹I‑di Baoro ama·oni. I‑di Sira, i‑di Timoti mai fama, owa‑ya mai dabineni. Kirisito‑ka dai toha, Tesaronika‑ya dai wi‑wina, oda‑ka yama hani dai kadikiyahi. Ai‑ka Abi i‑di Deoso, ai‑ka Ayo i‑di Yeso Kirisito ne, dai‑ya mai kasoma, dai atibodi ati dai‑ya somateni.

²Deoso‑ya oda hiyara, dai tamine oda hiyarateni.

³Oda atibodi yama‑ya kadikineni. Deoso ati dai nofa, Deoso‑ka mai‑ya dai kasomineni. Ai‑ka Ayo Yeso Kirisito kamebona, dai nimateni.

⁴Hibati‑ya Deoso dai‑ya kadike oda wato,

“Oka dao dai tohabone, dai onofini.” Ati nemarine.

⁵Dai‑ya oda hiyara oda ati tohi awiramaroni. Deoso Ati Amosabote ati oda hiyarabisamaroni. Deoso‑ka Doni ene kite dai awemarine. Deoso ati‑nima oda na, keyehe‑ya oda hiriterani. Oda ene‑ya dai awamaro, dai‑ya oda nofi nafe, oda dai watoneni.

⁶Oda‑nima dai nawaha, i‑di Yeso‑nima dai nawahamaroni. Yeso ati dai no‑nofa, dai‑ya mai bisina, dai yawara, dai ya‑yaina, Deoso‑ka Doni dai‑ya sawi ene dai ya‑yainawahamaroni.

⁷Masedoni‑ya mai wi‑wina, Akaiya‑ya mai wi‑wina mai na, Yeso ati‑ya mai no‑nofa dai ene‑ya mai awa, hini dai‑nima mai nawahabone mai ati nineni.

⁸Mai tabori one‑ka dai ene Deoso ati‑ya mai mita, Deoso ati‑ya dai no‑nofa dai ene amosa tamine‑ya mai mita, dai ene tamine‑ya mai kamina, dai ene Masedoni‑ka tabora toha, Akaiya‑ka tabora toha na, mai tabori one toha na, dai tamine‑ya mai wata, dai tamine oda kaminara, dai tamine oda‑ya mai kaminabisani.

⁹Mai ati ihi oda ya‑yainineni. Hibati‑ya dai tabaro‑ya oda kobona, oda ati dai nofa, madi mai‑ya dai hiyaramaro, madi mai‑ya dai hiyarami awirabone dai ati na,

“Deoso yokana ohari‑ta oda kahiyarabisaboneni.” Dai ati namaro,

Dai ati‑nima dai nineni.

¹⁰Yeso kamebona‑ya dai nimanineni. Hibati‑ya Deoso hinakitame, neme‑ya tokome, ai‑ya idimebonane. Neme‑ya ai eyehe tokomeya, bofe‑ya mai winasa na, Deoso ene yama kome mai‑ya kitaboneni.

Mai tabori‑ya Baoro winemari tamine

¹Oka soho dai toha, hibati‑ya dai‑ya oda sawe, oda ene dai awa, oda ati honita toharamaroni.

²Firibo‑ya oda winiya, Deoso Ati Amosabote oda kamina, oda‑ya mai bisina, makobote dai tabaro‑ya oda kobona, Deoso Ati Amosabote oda kamina, oda‑ya mai ati bisi, oda‑ya mai wee, mai na, Deoso ene oda habo siitoni awiramaroni.

³Dai‑ya oda hiyara, keyehe‑ya oda hiriterani. Dai‑ka mai fanawi oda siwakarihi, dai‑ka yamata oda botirihi, oda teni. Oda ene amosa, Deoso ati‑ya dai‑ya oda kamina, yama manakone oda haani awiramaroni.

⁴Deoso oda kadikemari, Yeso Ati Amosabote oda kaminabonehe. Yeso ati ohari‑ta oda kamina, Deoso ya‑yainebonaha. Oda ati‑ya mai one nofara, sibarineni. Ai atibodi ati ai ene na‑ya Deoso kadikatene.

⁵Oda‑ya dai nofabone, oda ati toharihi, oda‑ya yinero dai daanabone, oda ati toharihi na dai wato, Deoso hiwato hineni.

⁶Oda‑ya dai kahiyara oda ati rihi, mai one oda‑ya mai kahiyarabone oda ati rihi teni. Yeso Kirisito‑ka yo‑yose oda toha, oda‑ya dai kasomahi oda ati na‑mani, yama sibara neni. Haa‑nima oda ati terani.

⁷Dai‑ka ami‑nima oda nineni. Ai wada yati toha, ai‑ka ami ai‑ya nofa, ai‑ya kasoma, ai‑ya nayanateni. Fara‑nima dai oda kasomineni.

⁸Dai oda nofi nafe, dai‑ya Deoso Ati Amosabote oda kamina, dai ene yama oda anini kita, dai oda kasoma, mai‑ka yama wadara mai oda kasoma, oda namaroni.

⁹Oda‑ka soho dai toha, oda ene‑maro‑ya dai ati kadamowamariyahi. Deoso Ati Amosabote dai‑ya oda kamina, dai‑ya oda kanawata, oda na, oda ene‑ya dai awamaroni. Yama oda anina, yama soki‑ya yama oda ani, yama tehe‑ya yama oda ani, oda namaroni. Dai‑ka yinero oda haara, oda‑ka yinero‑ya oda‑ka yamata‑bone oda kanikabisamaroni.

¹⁰Oda ene dai awa, oda ene‑ya i‑di Deoso awa ne, Deoso ene‑nima oda ene namaroni. Yeso ati‑ya dai no‑nofa, dai‑ya oda sawe, oda ene sibaramaroni.

¹¹Ai‑ka abi ai‑ya kanawatotene. Dai‑ka abi‑nima oda na, Deoso ati‑ya dai oda kanawatoteni.

¹²“Yama Deoso hinofa‑nima dai ene nahi.” Oda ati nademaro,

Deoso dai‑ya haane, hini tabaro‑ya dai winabone, Deoso amose dai awe, wehene dai awa nebonane.

¹³Dai tabaro‑ya oda wina, dai‑ya oda hiyara,

“Baoro hini mai ati tohi awirani. Deoso ati‑ya mai hiyarabisani.” Dai ati namaroni.

Deoso ati oda hiyaremari, ati dai watowahineni. Deoso ati‑ya dai wata, dai ene sibarineni. Dai ene oda ya‑yaineni. Deoso‑ya dai ene oda hiyarineni.

¹⁴Deoso‑ka mai toha Yodeya‑ya mai wina mai‑nima dai nawahani. Yeso Kirisito ati‑ya Yodeo mai nofa mai‑ya Yodeo mai one bisina, fara mai‑nima Yeso ati‑ya dai nofa dai‑ya dai one bisineni.

¹⁵Hibati‑ya Deoso ati‑ya mai mi‑mita‑maro mai‑ya mai nanahaba, Yeso‑ya mai one nanahaba, oda‑ya mai one ati nanahabamake, mai ati ihi oda kananawahani. Mai ati yawa, mai ihi Deoso yawebonane.

¹⁶Deoso ati‑ya Bara mai miti awiriya, Deoso tabaro‑ya mai winateraboneni. Deoso ati‑ya Bara mai‑ya oda kaminabone, Yodeo mai one oda‑ya mai ati nanahabineni. Mai ati towe ihi mai‑ya mai ati kobonaboneni.

Dai tabaro‑ya owati tokomatasineni

¹⁷Hibati‑ya dai tabaro‑ya oda wina, oda‑ya mai kananihe, oda atibodi toki nofara, dai‑ya oda atibodi foya, dai tabaro oda toki nofa, dai noko oda awaboneni.

¹⁸Dai tabaro‑ya oda tokomabone ona, Satanasi ene oda maanaminadineni.

¹⁹Ai‑ka Ayo Yeso kameya, dai tamine‑ya oda hiyaraboneni. Hibati‑ya Deoso Ati Amosabote dai‑ya oda kamina, oda ati‑ya dai nofamaro, dai ene Yeso ya‑yainebonane. Dai tamine‑ya Yeso hiyareya, oda ya‑yainahareboneni.

²⁰Dai ene oda ya‑yaineni. Deoso Ati Amosabote dai‑ya oda kaminemari ene Deoso oda‑ya kahiyarebonane.

¹Dai‑ya oda atibodi foyamaroni, dai oda awabonehe. Dai tabaro‑ya oda tokabone oda ati namaroni. Oda tokabone oda ati na, oda maanama, i‑di Timoti ohari‑ta oda yosemaroni, dai tamine oda mitabonehe. I‑di Sira oda maakanama Atena‑kaya.

²Oda‑ka soho, i‑di Timoti oda yose, dai tabaro‑ya tokemarine. I‑di Timoti dai awa, dai habo kitawahabone oda ati namaroni. Kirisito ati‑ya hiyarane, Kirisito ati dai nofi ba‑basi nabonehe.

³Dai‑ya mai bisina, dai habo siitoriyahi. Dai‑ya mai bisinabone mai‑ya dai watamaroni.

⁴Ai‑ya mai bisinabone, mai tamine dai‑ya oda kaminamaro, fara oda ati ni‑maro‑nima mai ihi nawahani.

⁵Tesaronika‑ya dai wi‑wina Yeso ati‑ya dai nofamaro, Yeso ati‑ya dai nofasa na awineni, oda ati na, i‑di Timoti oda yosemaroni, dai tamine‑ya mitebonaha. Satanasi dai‑ya keyeheya, Satanasi ati dai nofarabone oda atibodi ati nofani. Satanasi ati dai nofa‑mani, oda ati aba neni.

Timoti ati ene oda ya‑yaineni

⁶I‑di Timoti oda yose, toke, kamatase, dai tamine‑ya oda mitawaha, dai tamine sibarani. Deoso ati dai nofa, dai ibi nofa, oda‑ya dai nofa na, oda‑ya dai ati foyamoneni. Dai‑ya oda ati foyaharineni.

⁷I‑di Timoti koboname, dai tamine‑ya kamine, ati ene oda ya‑yainineni. Oda‑ya mai bisinamaro, dai‑ya mai bisina, Deoso ati‑ya dai nofasa namone, dai tamine oda mita, oda ya‑yainineni.

⁸Yeso ati dai nofasa namone, dai ene oda habo kitamatasani.

⁹Deoso‑ya oda hiyara,

“Abi Deoso, Tesaronika‑ya mai wi‑wina mai ihi amosamone, mai ihi oda ya‑yainineni.” Oda ati teni.

Dai ene oda ya‑yainineni. Dai eme kita, dai‑ya mai bisina, dai habo siitoterani.

¹⁰Yama soki, yama tehe na‑ya Deoso‑ya ohiyarineni, dai tabaro‑ya oda tokomatasabonehe. Yeso ati‑ya dai‑ya oda hiyaramatasa, ati dai nofi ba‑basi nebona owatibodi ati nineni.

¹¹Ai‑ka Abi i‑di Deoso, ai‑ka Ayo i‑di Yeso mai fama, oda‑ya mai yosematasaba awineni, dai tabaro‑ya oda tokomatasabonehe.

¹²Ai‑ka Ayo Yeso, ati ene dai ibi nofi nafihi. Mai nafi dai nofahi. Dai oda nofi‑nima mai dai nofahi.

¹³Mai‑ya dai nofiya, dai ene sibaraboneni. Yeso ati‑nima dai naboneni. Yeso hika mai eyehe kameya, Deoso noko‑kaya ai nahoya,

“Dai ene sibarini.” Ai‑ka Abi i‑di Deoso ati nawahebonane.

Deoso ati ai nofa, eya ai nahi

¹Yeso‑ka dai toha oda ati dai mitamatasahi. Yeso ati oda hiyare, ati dai mitiyahi. Oda ati‑nima dai niya, Deoso ya‑yainebonane. Hibati‑ya oda ati‑nima dai namaroni. Hibati‑ya dai ene amosamaro, dai ene amosi ba‑basi nahi, yama sibaraboneni.

²Ai‑ka ayo i‑di Yeso ati oda kaminemari, ati dai watoneni.

³Dai ene amosabone Deoso ati ne, dai ene amosiyahi. Tika yibote dai famabisahi. Fana mai one‑ya dai famawahariyahi. Mai‑ya dai siwakariyahi.

⁴Dai atibodi ati amosa hinama toha, dai ene amosaboneni. Dai atibodi ati amosa, Deoso ati dai tokadaba, dai‑ya mai weeni awiraboneni. Dai ene‑ya mai nofaboneni.

⁵Deoso ati‑ya mai nofara, mai atibodi ati amosara, mai fanawi‑ya mai nokotoniteni, mai fanawi‑ya mai ahabonehe. Mai‑ka owa‑ka yibote mai‑ya mai siwakana, mai makidi hinama mai ibi siwakana, mai na, fara mai ihi Deoso yawatene. Tika yibote ohare‑ta tinofabisahi. Dai one mai‑nima dai riyahi.

⁶Ai owa‑ka yibote dai idiriyahi. Ai owa‑ka yibote dai ahaniya, haa‑nima dai ene niya, Deoso yaweya, dai manakone amosara‑ya daanebonane. Dai manakone dai nofaraboneni. Hibati‑ya oda ati dai mitamaroni, dai oda hiyararo.

⁷Deoso ai‑ya kadikemarine, ai ene towe toharabone, ai ene amosabonehe.

⁸Oda ati tohara, Deoso ati tohabise, ati dai tokadabi awireya, Deoso ati dai tokadabarani. Deoso ati dai tokadabahi. Deoso amane, Hika Doni‑ya dai‑ya da‑daa.

⁹Dai ibi nofabone, dai tamine okanahano awiraboneni. Deoso dai‑ya kanawato ene dai ibi nofateni.

¹⁰Masedoni‑kaya dai wi‑wina Deoso ati‑ya mai no‑nofa, mai nafi dai nofa, mai dai nofi ba‑basi nahi.

¹¹Dai ene amosabone, dai one tamine‑mone mai noki beheri‑kaya dai hiyarariyahi. Dai yehe‑ya dai‑ka yama anini‑ya dai aninibisiyahi. Hibati‑ya oda ati dai mitamaro, oda ati‑nima dai niyahi.

¹²Yeso ati‑ya mai nofara dai‑ka yama anini‑ya mai awa, dai ene amosa‑ya mai watowahaboneni. Oda ati‑nima dai niya, dai‑ka yama anini kita, dai‑ka yamata tosiyoteraboneni. Hasinaboneni.

Mai abamaro mai tamine

¹³Ai one abamaro tamine oda hiyaraboneni, yama dai watobonekaro. Deoso ati‑ya mai no‑nofa mai aba, mai ihi dai atibodi komene bi‑bidi nahi. Deoso tabaro‑ya mai winaboneni. Deoso ati‑ya mai nofara mai aba, mai tabiyo mai hiyawa, mai kitamiya, madi mai tabori‑ya mai sawiya, mai kome kitabisaboneni.

¹⁴Hibati‑ya i‑di Yeso abe, kitamemari, Yeso ati‑ya mai no‑nofa‑maro mai kitamahareboneni. Deoso ene Yeso kameya, mai korimari‑ya kakamebonane.

¹⁵Yeso ati dai mitahi.

“Ai hasina, ai dai tohi awiraboneni. Mai abamaro‑ta, mai aboni kitami dai tohaboneni. Mai korimari foyama, neme‑ya mai ai dodabamaboneni.” Yeso ati nemarine.

¹⁶Neme‑ya Yeso wine, kisameya, bofe‑ya koboni awirebonane. Kiseya, neme‑ya ati kite yananebonane. Deoso‑ka yo‑yose mai‑ka webote owa ati yananebonane. Deoso‑ka ho‑hori ati yananaboneni. Yeso kiseya, mai abamaro, Yeso ati‑ya mai no‑nofa‑mete mai kitami dai tohaboneni.

¹⁷Ai hasina, ai abi awira, mai‑ya ai dodabamaboneni. Yeso ati ai no‑nofa, neme sabi bai‑ya ai‑ka Ayo ai koboniya, hini tabaro‑ya ai eyehe tokomebonane. Yeso tabaro‑ya ai winawahaboneni.

¹⁸Ai abiya, ai kitamabone tamine dai watoyahi. Ai kitamabone tamine mai‑ya dai kamina, mai yawi awirabone, mai ya‑yainaboneni.

Yeso kamebona, amoni ai watora

¹Soho, Yeso kamebona tamine dai wato, yama dai wata tamine okanahano awiraboneni. Mahi‑ta tamine okanahanobisaboneni.

²Yama‑ya mai bo‑boti mai ai nimani awiriya, yama soki‑ya mai kakiteni. Fare‑nima Ai‑ka Hidi‑ya mai nimani awiriya, kobonebona dai watoneni.

³“Yama sibarini. Hibayata Yeso kamarebonane. Yama‑ya ai nofa‑nima ai nahi.” Mai atibodi ati niya,

Yeso kobonebonane. Mai fanawi naba toha, mai dori kome yanani‑bone‑ka yama mai watoraya, kome yanateni. Yeso koboneya, mai hawa tohara, mai fidotoni awirabone, mai manakone‑ya mai kayafaboneni. Mai ababoneni.

⁴Yeso kamebona dai wato, yama soki‑ya yama‑ya bo‑boti kaki‑nima dai‑ya Yeso kakini awirebonane.

⁵Yama tehe‑ka dai toha, yama tehe‑ya mai ihi amosa, mai ihi‑nima dai ene teni. Yama soki‑ya mai ihi amosara, mai ihi‑nima dai ene terani.

⁶Mai amona, yama‑ya mai watora, mai‑nima dai riyahi. Dai noko wadahi, yama‑ya dai watabonehe. Kawi‑ya mai fawa, mai towe toha, yama‑ya mai watora, mai‑nima dai riyahi.

⁷Mai amona, yama soki‑ya mai amoteni. Kawi ihi mai fawa, yama soki‑ya mai towe tohateni.

⁸Yama tehe‑ka ai toha, ai noko wadateni. Sodado mai‑ya mai nawadabone, mai baki‑ya yama kita waana, mai tati‑ya sabewa kita itariteni, wati, yima na, mai‑ya koborabonehe. Sodado mai‑nima ai nawadabone, ai‑ya ai nawada, Yeso, Yeso ati ne, ai nofi nafi, Deoso tabaro‑ya ai kobonabone ai wato, Satanasi ai‑ya keyeheya, ati ai nofaraboneni.

⁹Hibati‑ya Deoso ai‑ya kadikemata, ai‑ka Ayo i‑di Yeso Kirisito ene hika mai ai tohaboneni. Deoso yawe ai‑ya koborebonane.

¹⁰Hibati‑ya Yeso abe, ai manakone‑ya nanahabane. Ai aba, ai hasina, ai sibaraboneni. Yeso kameya, Yeso‑ya ai tosawimiya, ai winawahaboneni Deoso tabaro‑ya.

¹¹Dai one abamaro, ai nafi kitamabone tamine dai wata, dai ibi hiyara, dai ya‑yainahi.

“Ai one aba, mai ihi ai yawi kitariyahi. Ai one Deoso tabaro‑ya toha, ai ya‑yainahi.” Dai ati nahi.

Hibayata dai ene hini toha, tohaboneni. Mai‑ya dai kasoma, mai‑ya dai kasomi na‑nafi niyahi.

Mai‑ya kanawatomakine

¹²Oda ati dai mitamakihi. Yeso ati‑ya dai‑ka mai wato ba‑basi na, dai‑ya mai kanawata, mai dai nofiyahi. Yeso ati‑ya dai tokadabara dai‑ya mai weena, mai dai nofahi. Dai ene amosara, mai‑ya dai weeriyahi.

“Hehe, fara amani. Owa ene amosara, Deoso‑ya owa‑ya okaminaboneni.” Dai ati nahi.

Dai‑ya mai kanawata, mai‑ya dai nofabisahi.

¹³Dai‑ya mai ka‑kanawato mai ihi mai‑ya dai nofi nafiyahi. Dai narabo hawihi, mai ati dai mitabonehe. Dai ibi weeriyahi.

¹⁴Yama anini‑ya dai one mai ati nofara, mai dai weeniyahi, yama‑ya mai aninabonehe. Dai one hi‑hiyana mai dai kasomahi. Mai habi siitona, mai dai kasomiya, mai ya‑yainaboneni. Dai yawa kanibote riyahi.

¹⁵Dai‑ya mai nofara, mai‑ya dai nofaba nahi. Mai ihi amosara, dai ene‑ta amosabisiyahi. Dai ibi kasomiyahi.

¹⁶Dai ya‑yaina, dai ya‑yaini fawariyahi.

¹⁷Deoso‑ya dai hiyara, dai hiyari fawariyahi.

¹⁸Yeso Kirisito ati dai no‑nofa yama nafi tamine‑ya Deoso‑ya dai kahiyarahi. Dai kiyara dai toha, dai kiyana dai toha na, Deoso‑ya dai kahiyarahi. Yamata dai kiha dai toha, yamata dai kihara dai toha na, Deoso‑ya dai kahiyarahi. Deoso dai‑ya nofi nafi dai‑ya kasomebona tamine dai kadika, Deoso ene dai ya‑yainaboneni. Haa‑nima dai niya, Deoso ya‑yainebonane.

¹⁹Deoso‑ka Doni dai‑ya sawi, Deoso‑ka Doni ati‑ya dai atibodi mita, Deoso‑ka Doni ati ai nanahabariyahi.

²⁰Deoso ati‑ya mai kaminamone mai ati na, Deoso‑ka yama hani ati‑nima mai ati na, mai ati dai tokadabahi.

²¹Deoso‑ka yama hani ati‑nima mai ati ni awira, mai ati dai nofariyahi.

²²Dai ene amosa hinama tohahi.

²³Deoso ati ene ai ati somateni. I‑di Deoso‑ya dai tamine ohiyarateni.

“Abi Deoso, mai atibodi, mai aboni, mai korimari na tinamosahi.” Oteni.

Yeso kameya, dai‑ya weeni awirebonane. Dai ene amosabisaboneni.

²⁴Deoso ai‑ya kadikemari, hini ati‑nima nebonane.

²⁵Oda tamine Deoso‑ya dai hiyarahi.

²⁶Yeso‑ka dai toha, Yeso‑ka owa dai koboniya, dai ibi hiyara, dai ibi nofahi.

²⁷Oda ati dai mitahi. Yeso Kirisito ati oda kanahano, ati abarayaho. Yeso ati‑ya dai no‑nofa dai yorotokaniya, oda‑ka yama hani dai kadikahi, mai nafi himitabonehe.

²⁸Ai‑ka Ayo Yeso Kirisito dai‑ya kasomebonane. Feye amani.