1 BEDORO

Bedoro‑ka yama hani daidi

¹Bedoro ama·oni. Yeso Kirisito‑ka yo‑yose ama·oni. Deoso dai‑ya kadikematane, hika mai dai tohabonehe. Dai tabaro‑ya dai winamara, yama yaki‑ya dai winabisa, dai‑ka yama hani‑bone okanahanoneni. Boto‑ya dai wi‑wina, Karatiya‑ya dai wi‑wina, Kabadosiya‑ya dai wi‑wina, Asiya‑ya dai wi‑wina, Bitiniya‑ya dai wi‑wina, dai na, dai‑ka yama hani boneni.

²Hibati‑ya yama nafi‑ya ai‑ka Abi i‑di Deoso wato, dai‑ya kadikemata, Hika Doni dai‑ya sawiwahebonane. Yeso Kirisito emene‑ya dai atibodi‑ya wisane, dai atibodi besene fawanani, Yeso Kirisito ati dai tokadababonehe. Deoso‑ya dai tamine‑ya ohiyara,

“Abi Deoso, mai‑ya tikasoma, mai atibodi mai‑ya ati soma ba‑basi naboneni.” Oteni.

Deoso‑ka yama ai kayafabone ai nimana

³Ai‑ka Abi ai kahiyarahi. Ai‑ka Hidi i‑di Yeso Kirisito‑ka Abi i‑di Deoso amosabote amane. Ai‑ya nofe, ai‑ya kadike ene ai wada yati‑nima ai nawahani, Deoso bidi ai tohawahabonehe. Deoso bidi ai toha, Bidi i‑di Yeso Kirisito‑ya nakitame‑nima ai‑ya nakitamebona ai nimaneni.

⁴Neme‑ya ai‑ka yama daahinabone, hinawada, abaterihi, bote tohaterihi, bataterihi na‑ya, Deoso tabaro‑ya ai koboniya, ai kayafaboneni.

⁵Deoso kitabote dai‑ya nawade, tabaro‑ya dai kobona, Yeso ati‑ya dai nofa ene yama amosabote‑ya dai kayafaboneni.

⁶Deoso tabaro‑ya dai winabone dai tamine‑ya dai kadikiya, dai ya‑yainahi. Bofe‑ya dai wi‑wina mai yahi kome‑ya dai awaba awineni. Makobote neme‑ya dai winiya, dai ya‑yaini fawaraboneni.

⁷Oro‑ya mai awawama, yifo hiwe ihi oro fahi tohawamaya, yama bara sawe‑ya mai nanahaba, oro hinama tohaboneni. Makobote oro abawahaboneni. Yeso ati‑ya dai no‑nofa dai‑ya mai bisinabone, dai ene‑ya mai awaboneni. Yeso ati dai nofi yokana toha, ati dai nofi fawarebonane. Yeso kobonameya, Deoso dai‑ya kahiyara, hika wehene kote dai kayafaboneni.

⁸Yeso Kirisito dai awaremari, dai nofi neni. Hibayata dai aware, ati dai nofe, Deoso dai kahiyara, dai ya‑yaini ba‑basi na‑ya mai awa, yama‑ya mai watoterani.

⁹Yeso ati‑ya dai nofa ene dai atibodi abarabone, Deoso tabaro‑ya dai winabisaboneni.

¹⁰Deoso ati‑ya mai mi‑mita‑mete Deoso ati ene oda tamine‑ya mai kanahana, oda tamine‑ya mai atibodi watora, Deoso‑ya mai haanamatasameteni, yama‑ya mai watowahabonehe.

¹¹Kirisito‑ka Doni mai‑ya sawi, Deoso ati‑ya mai kanahano,

“Kirisito abebona‑ya makobote kitameya, amosabote tohebonane.” Kirisito‑ka Doni ati ene mai kanahanameteni.

“Ka! Hini yamata ihi Kirisito ababonati? Eme amoni ne‑ya ababonati?” Mai atibodi ati nineni.

Yama‑ya mai watora, mai atibodi yama‑ya kadikineni.

¹²“Owati dai kanahanohi. Owati‑ya mai wato kanibote raboneni. Mai amoni dami‑ya dai ati‑ya mai kadikiya, owati‑ya mai watowahaboneni.” Deoso‑ka Doni ati nematane.

Fare dai tamine‑ya hiyare, Deoso‑ka Doni neme‑ya kise, dai‑ya kanawatobona, dai‑ya oda kaminamakitasineni. Deoso‑ka yo‑yose neme‑ya mai wi‑wina, dai‑ya Deoso kanawato tamine‑ya mai atibodi kadika, yama‑ya mai watora, ai‑ta Deoso ati ai wato neni.

Dai ene amosa hinama tohahi

¹³Yeso Kirisito kamatasebona dai atibodi dai hawa tonihi. Yama amosa‑ya dai kadikabisahi. Dai atibodi noko wadahi. Dai‑ka yama amosabote‑bone‑ya Deoso daanebona dai nimanahi.

¹⁴Madehe ihi amosa, mai‑ka abi mai ati‑ya mai tokadabateni. Madehe‑nima Deoso ati dai tokadabahi. Hibati‑ya yama‑ya dai watoriya, yama amosara dai atibodi kobohina‑nima dai ene namariyahi.

¹⁵Deoso ati amose hinama tohatene. Deoso dai‑ya kadike, ati‑nima dai na, dai ene amosa hinama tohawahi.

¹⁶Deoso ati‑ya mai kanahanamete,

“Owa ene amosateni. Dai ene amosaharihi.” Deoso ati nematane.

¹⁷Deoso dai‑ka abi‑mona dai ati na, dai atibodi ati yokana‑ya Deoso kadikebona, dai ene‑nima dai manakone‑ya daanebonane. Hibayata bofe‑ya dai wi‑wina dai noko wadahi, dai atibodi ati amosabonehe.

¹⁸Dai‑ka idi mai ihi‑nima dai ene namaro, dai ene amosara dai manakone wada, dai manakone‑ya Kirisito nanahabemarine. Oro, barata yama na‑ya dai manakone‑ya nanahabi awiremarine.

¹⁹Hini emene‑ya dai manakone‑ya nanahabemarine. Hibati‑ya mai ihi amosara, kaneiro bidi amose‑ya mai daanameteni, mai ihi‑ya Deoso barikanebonaha. Kirisito Deoso‑ka kaneiro bidi emene ene ai manakone nafi abawahani.

²⁰Yama‑ya Deoso wamani awisareya, Bidi hiyosebona‑ya watone, ai manakone‑ya Bidi nanahabebonaha. Hibayata Deoso Bidi kame, dai manakone‑ya nanahabawahane.

²¹Hini Bidi‑ya Deoso nakitame, neme‑ya towakame, wehene nafi‑ya daanematane. Bidi ati‑ya dai nofa ene badi‑ya dai watowaha, ati‑ya dai nofa, tabaro‑ya dai tokabone dai nimaneni.

²²Deoso ati dai tokadabe, dai atibodi amosa, dai ene amosawamateni. Deoso‑ka dai toha, Deoso‑ka mai dai nofaboneni. Dai ibi nofi nafiyahi.

²³Deoso ati abatere, ati dai nofa, dai‑ka Abi i‑di Deoso tohe ene dai atibodi yati toha, ai wada yati‑nima dai nawaha, Deoso ene dai atibodi abaterabone, neme‑ya dai winamakeboneni.

²⁴Deoso ati mai hikanahanomata, ati dai mitahi.

“Bofe‑ya dai wi‑wina dai‑ka faha fowe damariya, dai ababoneni. Kabihi mowe‑nima dai nineni. Mowe wayatona, abateni.

²⁵Deoso ati‑ta abaterebona, ati‑nima yama naboneni.” Deoso‑ka yama hani ati nineni.

Mai nafi‑ya Deoso Ati Amosabote oda kaminateni.

Deoso‑ka yobe‑ke yati amosabote Yeso tohe, yati bidi ai tohahari neni.

¹Deoso ati‑nima dai na, dai ene‑maro‑nima dai ene namariyahi. Keyehe‑ya dai ibi hirikariyahi. Hini dai atibodi ati yokana‑nima dai ati nahi. Mai‑ka yama‑ya dai atibodi kayafarihi, dai ibi tairihi nahi.

²Madehe borehe madi yohari fahi‑ya mai nokotoniteni, mai yanabonehe. Fara‑nima ai‑ka Abi i‑di Deoso ati ai nokotonihe, ai ene amosawama, neme‑ya ai winawahaboneni.

³Ai‑ka Hidi amose tohe dai watoya, Deoso ati dai nokotonihi.

⁴2:4 Deoso‑ka yobe: Yobe yokana tamine toharani. Yeso, Yeso ati ai no‑nofa na tamine tohani.2:4 Yati hasikana: Yeso, Yeso ati ai no‑nofa na ai tamine tohani.Deoso‑ka yobe‑ya Deoso wamanebona, kote yati hasikana amosabote, ohari‑ya kadike, manakone nafi tohe, bofe‑ya kame, mai hinofare, dai‑ta ati dai nofawahani.

⁵2:5 Deoso‑ka yama‑ya dai da‑daa: Hibati‑ya Deoso‑ka bani‑bona‑ya mai da‑daa toha, hibayata Deoso‑ya ai kahiyara, Yeso ati‑nima ai ene na, Deoso ya‑yaitene.Deoso‑ka yobe kote Yeso Kirisito tohane. Yati hasikana‑nima Yeso tohe, dai tohaharineni. Yeso ene yama amosa‑ya dai daanaboneni, Deoso‑ya.

⁶Deoso ati dai mitahi.

“Siyaho‑ya oka yati amosabote onawaa onaboneni. Oka yati amosabote manakone nafi tohe ihi yobe amosebonane. Yati amosabote‑nima Oka Dao tohane, Oka Dao ati‑ya dai nofa, ati tamine dai‑ya mai weena, dai atibodi dai‑ya weeraboneni.” Deoso ati nematane.

⁷Yeso ati‑ya dai nofa,

“Yati amosabote manakone nafi Yeso tohe.” Dai ati nani.

Yeso ati‑ya mai nofara,

“Yeso amosare.” Mai ati na.

Oda‑ka Hidi tohawahane.

⁸2:8 Yati‑ya mai taratokana: Yeso ati‑ya mai nofara ihi mai taratokana, mai sona‑nima mai toha, Deoso tabaro‑ya mai koboraboneni.Yati‑ya mai taratokana, yati ihi mai yawawahani. Yeso ati‑ya mai nofara, ati‑ya mai taratokateni. Mai ihi‑bone‑ya Deoso watomatane.

⁹Dai‑ya Deoso kadikemari, hika yama‑bone‑ya da‑daa dai tohaboneni. Dai ene amosa hinama tohebona ati ne, Deoso‑ka dai toha, Deoso ene amosabote tamine dai kaminahi. Hibati‑ya yama soki‑nima dai ene namaro, Deoso ene yama tehe‑nima dai ene nawaha, Deoso wehene amosabote tohatene.

¹⁰Hibati‑ya Deoso‑ka dai toharamaro, hibayata Deoso‑ka dai tohawahi neni. Hibati‑ya Deoso dai‑ya kasomare ati ne, hibayata dai‑ya kasomawahatene.

¹¹Oka dai amani, dai onofa, owati dai mitahi. Bofe‑ya dai wi‑wina, dai noko wadahi. Bofe‑ya dai tabaro yokana tohara, neme‑ya dai tabaro yokana tohateni. Deoso ati‑nima dai nahi. Yama amosara‑ya dai atibodi bote nokotonihe, dai atibodi yati‑ya weenaditeni, Deoso ati‑ya dai tokadabarabonehe.

¹²Bara mai‑ya dai sawiya, dai ene amosahi. Dai ene towe‑mone mai ati na, dai ene‑ya mai awiya, dai ene amosa‑ya mai atibodi watowaha, Yeso kamataseya, dai ene Deoso‑ya mai kahiyaraboneni.

Dai‑ka hidi mai ati‑ya dai tokadabahi

¹³Kofeno‑ka hidi bi‑bidi mai ati dai tokadabahi. Kofeno‑ka hidi webote i‑di Sesa tohe, ai‑ka Hidi i‑di Yeso ati ene kofeno‑ka hidi webote ati dai tokadabahi.

¹⁴Kofenado ati dai tokadabaharihi. Kofeno‑ka hidi bi‑bidi ne tohe, kofenado ati‑ya dai tokadabara, ati ene dai‑ya mai bisinaba awineni. Ati dai tokadabe, dai‑ya kasomatene.

¹⁵“Dai ene amosahi.” Deoso ati ne,

dai ene amosiya, yama‑ya mai watora dai ene‑ya mai awiya, mai ati fawanaboneni.

¹⁶Mai one‑ka yo‑yose dai tohara, Deoso‑ya na‑narifa dai toha, deoso ati‑nima dai ene amosarariyahi. Dai ene amosabone Deoso nofateni.

¹⁷Deoso ati‑ya dai no‑nofa dai ene‑ya mai awiya, mai yawaraboneni. Deoso ati‑ya mai no‑nofa mai dai nofa, Deoso ati‑ya dai tokadaba, kofeno‑ka hidi mai ati‑ya dai tokadaba, dai nahi.

¹⁸Dai‑ya mai kanikamaro, mai ati dai tokadaba, dai‑ka hidi dai‑ya bisi, dai‑ya weene, dai yawara, dai‑ka hidi ati dai tokadabahi. Dai‑ka hidi ati amose, ati dai tokadaba, ati amosare, ati dai tokadaba dai nahi.

¹⁹Ai ene amosa, ai‑ya mai weena, ai yawariya, Deoso ya‑yainebonane. Ai ene amosabisa, ai ene towe‑mone mai ati na, ai‑ya mai bisina, Deoso ai‑ya kasomebonane.

²⁰Dai ene amosariya, dai‑ka hidi dai‑ya bisineya, dai manakone amosa wadaraboneni. Dai ene amosa, dai‑ka hidi dai‑ya bisineya, dai yawariya, dai manakone wadaboneni, Deoso dai‑ya kasomeya.

²¹Dai ene Yeso Kirisito‑ya mai bisina, Yeso‑ya mai nanahabamaroni. Yeso ene amose hinama tohe, mai bisihine yawaremari,

“Owa‑nima dai nahi. Dai ene amosa, dai‑ya mai bisiniya, dai yawariyahi.” Yeso ati nemarine.

²²Yeso ene amose hinama tohe, keyehe‑ya hiriterene.

²³Yeso mai weeni kofihine, mai‑ya weerihi, mai bisihine, mai‑ya ati bisirihi ne,

“Deoso owa ene‑ya wato, owa ene‑ya kadikabisebonane.” Yeso ati nemarine.

²⁴Ai ene amosara, ai ene Yeso Kirisito awa‑ya abemarine, ai manakone‑ya nanahabebonaha. Yeso abe ene ai atibodi bote ati ai tokadabamaraboneni, ai ene amosabisabonehe. Yeso abe ene ai kitamawahani.

²⁵Kaneiro mai‑nima dai nineni. Kaneiro tabora hawi‑ya mai fawaniteni. Deoso tabaro hawine‑ya dai sawiramaro, Yeso ene Deoso hawine‑ya dai sawiwaha, dai‑ya Na‑nawada‑ya dai dabawahani.

Ai fana tamine

¹Mai fanawi, owati dai mitahi. Dai faniya, dai‑ka yibote mai ati dai tokadabahi. Deoso ati‑ya dai‑ka yibote nofare, Deoso ati dai tokadaba, Deoso ati‑ya mai nofaba awineni. Dai ati ene toharaboneni. Dai ene amosa‑ya mai awa, Deoso ati‑ya mai nofawahaba awineni.

²Mai ati dai tokadaba, dai ene amosa, dai ene‑ya mai awaboneni.

³Dai amosi yokana tohabone dai ati na, dai mese‑ka ato ihi toharaboneni. Oro, ato, bora amosa toha na, dai mese‑ta‑ya namosateni.

⁴Dai amosi yokana tohabone, dai atibodi amosahi. Dai mese‑ka ato bote tohawahiya, amosi fawateni. Mai dai kasoma, dai ati soma na, dai atibodi‑ya Deoso awe, dai manakone nafimone ati tene. Dai atibodi amosi fawateraboneni.

⁵Hibati‑ya mai fanawi amosabone, Deoso‑ya mai kahiyara, mai‑ka yibote mai ati‑ya mai tokadaba na, fara mai atibodi amosameteni.

⁶I‑di Sara‑nima dai nahi. I‑di Sara i‑di Abaraho ati‑ya tokadaba,

“Abaraho, oka hidi amatini. Owa‑ya tiyose, tiwati okadababoneni.” Sara ati nameteni.

Dai ene amosa, dai habo siitora, Sara bide dai tohani.

⁷Mai makidi dai toha, owati dai mitahi. Dai faniya, dai‑ka yibote mai dai kasomiyahi. Yama‑ya mai weyeniya, mai‑ka yama kote dai weyekana, yama‑ya mai anina, mai dai kasoma nahi. Dai‑ka yibote mai dai weera, mai tamine dai hiyara, mai dai kahiyarabisahi. Dai kiti na‑nafi na, mai fanawi kiti bi‑bidi na, mai dai kasomahi. Mai dai kasomara, Deoso‑ya yama‑ya dai haaniya, dai ati‑ya mitarebonane. Deoso‑ka dai toha, Deoso‑ka dai‑ka yibote toha nineni.

Dai ene amosa, dai‑ya mai bisina, dai yawariyahi

⁸Owati hawa tohi yanatoneni. Owati dai nafi mitahi. Dai nafi atibodi ati fara hinama tohahi. Ai‑ka ayo ai nofi‑nima dai ibi nofiyahi. Mai atibodi koma mai dai kasomahi.

“Yama dai watora, owa‑ta yama owatobisineni.” Dai ati riyahi.

⁹Dai‑ya mai we‑wee mai dai weerihi, dai‑ya mai ka‑kako mai dai kakorihi na, hiniya mai dai kasomahi. Haa‑nima dai nabone Deoso ati ne, dai‑ya haanemarine. Haa‑nima dai niya, Deoso dai‑ya kasomebonane.

¹⁰Deoso ati dai mite,

“Dai ya‑yainabone, dai amosawahabone dai ati na, mai dai tairihi, keyehe‑ya dai hiririhi, dai nahi.

¹¹Dai ya‑yainabone dai ati na, dai ene‑maro‑nima dai ene namara, dai ene amosawaha, mai ibi weena, dai ati ene mai ibi ati somawamahi.

¹²Dai ene amosa, dai ene‑ya Deoso awe, dai‑ya kasomatene. Yama dai haana‑ya dai‑ya daanebonane. Mai ihi amosara Deoso ati‑ya mai tokadabara, yama‑ya mai haana, mai ati‑ya Deoso mitare mai‑ya kasomarebonane.” Deoso‑ka yama hani ati nineni.

¹³Dai ene amosabone dai nokotonihe, ebeni‑ke dai‑ya bisinabonati?

¹⁴Dai ene amosa, dai‑ya mai bisina, dai yawarihi, dai habo siitorihi na, Deoso dai‑ya kasomebonane.

¹⁵“Yeso Kirisito oka Hidi amosabote amane.” Dai atibodi ati nahi.

“Hini yamata ihi Yeso koboni dai nimaniti?” Mai ati na,

mai dai hiyariya, yama‑ya mai watowahaboneni.

¹⁶Dai ati yananiya, dai ati yawara, dai ati somabisahi, dai atibodi dai‑ya weerabonehe.

“Yeso Kirisito‑ka mai‑mone mai ati kasiroteni.” Mai ati na,

Dai ene‑ya mai awiya, mai ati fawanabone, hini mai atibodi mai‑ya weenaboneni.

¹⁷Dai ene amosa, Deoso mai‑ya ati barini awire‑mana, dai‑ya mai bisina, sibarabone, Deoso dai‑ya kasomebonane. Dai ene amosara, dai‑ya mai bisiniya, Deoso dai‑ya kasomarebonane.

¹⁸I‑di Yeso Kirisito ene amose hinama tohe, abe, dai manakone‑ya nanahabe, dai‑ya Deoso ati somawamebonaha. Hibati‑ya ai ene amosara, Kirisito amosabote abe, ai abarabonehe. Deoso‑ka Doni ene Yeso kitamemarine.

¹⁹Kirisito abeya, korimari tokane, madi i‑di Deoso mai barihikanamete mai‑ya toke, mai‑ya hiyarane.

²⁰Hibati‑ya madi mai ihi amosara mai‑ya Deoso barikanematane. I‑di Nowe kanawa‑ya wamaneya, Deoso nimane. I‑di Nowe‑ka kanawa hawa tohiya, mai‑ya Deoso barikane. Makobote Yeso abe, mai‑ya hiyare, i‑di Nowe‑ka kanawa‑ka ai 8 kana mai hasina, mai one nafi abameteni, faha ihi. Mai 8 kana kanawa dori‑ya faha mese‑ya mai kawina, mai abarameteni.

²¹Ai‑ya mai habanirisa ihi ai besene fawara, Deoso‑ya ai tamine ai kamina ai‑ya ati somawame, ai atibodi besene fawateni. Ai‑ya mai habanirisa, ai‑ya mai one awiya, Deoso ati ai nofa ai‑ya mai watowahaboneni.

“Owati‑ya dai nofa, dai‑ya mai habanirisahi faha‑ya.” Deoso ati nematane.

Dai atibodi dai‑ya weerabone, dai‑ya mai habanirisahi. Yeso Kirisito kitamemari‑nima ai kitamahareboneni.

²²Yeso kitame, neme‑ya toke, Badi i‑di Deoso‑ka kanika‑ya itariwahe, Yeso kitabote tohe, neme‑ya mai wi‑wina, Deoso‑ka yo‑yose, mai na, mai‑ka hidi tohanane.

I‑di Yeso‑ka ai toha, ai ene bara tohateni

¹I‑di Yeso Kirisito mai bisihine, oda‑ya kasomebona abano komene kitemarine. Dai‑ya mai bisina, dai yawariyahi. Yeso atibodi ati‑nima dai atibodi ati nahi. Yeso Kirisito mai bisinamaro dai‑ya mai bisinaboneni. Ai‑ya mai bisina, yama towe‑ya ai nofamaraboneni.

²Ai‑ya mai bisina, ai ene amosaramaro ai nofamarabone, Deoso yama‑ya nofe‑nima ai nofabisaboneni.

³Hibati‑ya Deoso ati dai nofara, dai one ene‑nima dai ene namaro, mai fanawi‑ya dai nokotonihi, kawi‑ya dai fawa, mai fanawi dami‑ya dai dakora, deoso bare ati‑ya dai nofa na, dai ene amosara hinama tohamaroni.

⁴Hibayata dai‑ya mai haaniya, mai ati dai tokadabariya, mai‑nima dai namara,

“Ka! Hini yamata ihi ai ati‑ya mai nofamarihi?” Mai ati na,

dai‑ya mai hahakana, dai‑ya mai wee teboneni.

⁵Mai ihi‑ya Yeso kadikebonane, mai manakone‑ya daanebonaha. Mai one hasina toha, mai one aba toha na, mai tamine‑ya mai kaminabone, mai ihi‑nima mai manakone‑ya Yeso daanebonane.

⁶Hibati‑ya mai wi‑wina Yeso abi awisareya, mai aba, Deoso ati‑ya mai nofamete, mai ihi amosara manakone‑ya Deoso daare, mai ihi‑ya barikanematane. Mai manakone‑ya Yeso nanahabe, mai‑ya seekawahe, mai‑ya towakamane neme‑ya.

⁷Yama nafi tosiyo kanibote nabone, dai atibodi amosabone dai nokotonihi, dai ati‑ya Deoso mitebonaha.

⁸Dai ibi nofi nafihi. Ai ibi nofa, ai ene Deoso ya‑yainebonane. Mai ihi amosara mai dai nofa, mai ihi dai kadikara, mai dai nofaboneni.

⁹Dai‑ka yobe‑ya dai one kobona, mai naha, mai‑ya dai ya‑yainahi.

¹⁰Mai one‑ya dai kasomabone, yama wa‑wato Deoso dai‑ya daatene. Deoso dai‑ya kasomi‑nima dai one‑ya dai kasomaharihi.

¹¹Mai‑ya hi‑hiyara dai wa‑wato toha, Deoso ati dai kaminahi. Mai‑ya ka‑kasoma dai wa‑wato toha, mai‑ya dai kasomahi. Deoso ene dai kita toha, mai‑ya yama kita‑ya dai kasomahi. Dai ene Deoso, Yeso Kirisito ne‑ya mai kahiyaraboneni. Deoso kitabote tohe, kiti fawaterebona, ai kahiyari fawarinahi.

Yeso ati‑ya dai tokadaba, dai‑ya mai bisinahareba awineni

¹²Oka dai toha, dai onofa, mai yahi kome dai awiya, dai yawariyahi.

“Hini yamata‑ba ai‑ya mai bisi? Mai one‑ya mai bisira.” Dai ati riyahi.

Yeso‑ya mai bisinamaro, dai‑ya mai bisinabone, mai dai wato,

¹³Dai ya‑yaina, Kirisito‑nima dai nawaha, makobote Yeso Kirisito amosabote kamatase‑ya dai awiya, dai ya‑yaini nafeboneni.

¹⁴Kirisito‑ka dai toha, dai‑ya mai taina, dai yawara, dai ya‑yaina, Deoso dai‑ya kasome, Deoso‑ka Doni amosabote dai‑ya sawi, tamine‑ya dai kadikabisahi.

¹⁵Dai ene amosahi. Hini dai ene amosara dai‑ya mai bisiriyahi. Dai one dai nanahabarihi, mai‑ka yama dai botirihi, mai ati‑mone‑ya dai kaminamarihi nahi.

¹⁶Deoso ati dai tokadaba, dai‑ya mai bisina, dai yawariya, dai ya‑yainahi, Deoso‑ka dai toha, Deoso dai kahiyarahi.

¹⁷Hibayata Deoso ati ai no‑nofa ai ene‑ya Deoso kadikeya, ai manakone‑ya daanebonane. Deoso ati‑ya mai nofara, mai ihi Deoso kadikeya, hini yamata‑ya mai kayafiboneti?

¹⁸Deoso hawine yakani kite tohe, ai yakana, Deoso tabaro‑ya ai kobonaboneni. Deoso ati‑ya mai nofara mai ihi amosara, ebeni‑kaya mai kobonibati?

¹⁹Deoso ati‑ya dai tokadaba, dai‑ya mai bisiniya, dai yawariyahi.

“Owa‑ya wamanemari ati‑nima ona, owa‑ya kasomebonane.” Dai atibodi ati na.

Dai ene amosanasa nahi.

Deoso‑ka mai dai nawadahi

¹Deoso‑ka mai‑ka webote dai toha, owati dai mitahi. Deoso‑ka mai‑ka webote ohaharineni. Hibati‑ya Kirisito‑ya mai bisina, mai hinahabe, neme‑ya tokome, oawamaroni. Makobote Kirisito amosabote kamataseya, Yeso‑nima ohawahaboneni.

²Kaneiro ewete mai ai natafa‑nima Deoso‑ka mai‑ya dai kanawatohi. Mai‑ya dai kanawatabone, yinero ihi toharihi, mai one tiwa‑ya yose ihi toharihi, mai‑ya tinofa, mai‑ya dai kasomabone tohabisahi.

³Mai dai weenadiriyahi. Hiniya mai dai kasoma, dai ene amosiya, dai ene‑ya mai awiya, yama‑ya mai watowahiya, Deoso ati‑ya mai tokadababoneni.

⁴Ai‑ya Na‑nawada i‑di Yeso Kirisito kameya, dai‑ya yama amosabote‑ya daanebonane. Ai tati borone oro wamani‑nima yama na‑ya dai‑ya daanebonane.

⁵Yetene dai toha, owati dai mitahi. Bote mai toha mai ati dai nofa,

“Owa‑ta amosabote ama·oni.” Dai ati riyahi.

Hiniya dai ibi kasomahi.

“Hini mai‑ya mai kahiyara, mai‑ya Deoso kakotene. Hini mai‑ya mai kahiyarara, mai‑ya Deoso kasomatene.” Deoso‑ka yama hani ati teni.

⁶“Yama owatora, Deoso‑ta yama‑ya wato, amosabote ohara, Deoso‑ta amosabote amane.” Ai ati na.

Makobote Deoso ene yama ai watowaha, ai amosawahaboneni.

⁷Mai ati ihi dai korikasa, dai tamine Deoso‑ya dai hiyarahi.

Deoso dai‑ya nofe, dai‑ya kasomebonane.

⁸Dai noko wadahi. Yama‑ke yomahi‑nima Satanasi nane. Yama‑ke yomahi bani mai‑ya kiiyotene, bani mai‑ya kabebonaha. Fare‑nima dai‑ya ka‑kako i‑di Satanasi dai‑ya kakatome, dai noko wadahi. Dai noko wadariya, dai‑ya keyehe, ati dai tokadabebonane.

⁹Satanasi ati tinofariyahi. Yeso ati‑ta tinofabisahi. Deoso ati‑ya dai no‑nofa dai nafi‑ya Satanasi keyehe‑ya hiri kitine. Kirisito‑ya mai ka‑kako mai yahi kome dai awabone, tabora dami‑ya mai wi‑wina Yeso ati‑ya mai nofa, Satanasi mai‑ya keyehe‑ya hirikitine.

¹⁰Deoso yama nafi‑ya da‑daa dai‑ya kadikemarine, hini tabaro‑ya dai winawahabonehe. Bofe‑ya dai winasa niya, dai‑ya mai bisina, makobote Yeso Kirisito amosabote‑nima dai nawahaboneni. Deoso ene dai kitawaha dai korikasara, Yeso ati‑ya dai nofi nafiwahaboneni.

¹¹Ai nafi‑ka Hidi i‑di Deoso tohe, kite, kiti fawaterebonane. Deoso ati‑nima yama naboneni.

Bedoro ati hawa tohe

¹²Oka soho, i‑di Sira owati‑ya kanahanone, dai kadikabonehe. I‑di Sira Deoso ati‑ya nofe, Deoso ati‑ya tokadabatene. Owati dami awirini. Owati fa‑famaraba nineni, dai okasomabonehe. Deoso ati‑ta dai‑ya okamine, Deoso ati‑nima yama teni. Ati dai tokadabayaho.

¹³Deoso ati‑ya mai no‑nofa, Babironi‑ya mai wi‑wina, dai‑ya mai ati foya, dai‑ya i‑di Maroko ati foyahari ne. Oka dao‑nima i‑di Maroko nane.

¹⁴Deoso ati‑ya mai no‑nofa mai dai kobona, ai‑ka soho ai‑ka asima mai na mai‑ya ai kobona, ai‑nima dai ibi kobona dai nahi. Yeso‑ka dai toha, dai atibodi ati somahi.