Yowaho‑ka yama hani daidi
1Yeso awire‑ya, ai aba neni
1Hibati‑ya yama nafi Deoso wamahinamete awisari‑ya Yeso winemata kaki, ati oda mita, abano oda awa, oda boyonemarine. Yeso ai‑bone‑ya wamanemata tamine okanahanaboneni. Yeso awire‑mana, ai awira neni.
2Hibati‑ya ai‑bone‑ya wamane, neme‑ya Deoso eyehe winemata, ai tabaro‑ya kaki, oda awemari tamine okanahanoneni. Yeso ene ai atibodi abateraboneni.
3Yama oda awa, ati oda mitanamaro tamine okanahano, oda wata dai watohareboneni. Ai‑ka Abi i‑di Deoso, Bidi i‑di Yeso Kirisito‑ya fame, ai‑ya mai nofa, mai ai nofa, ai ibi hiyari nofateni.
4Owati dai kadikiya, owati dai tokadabiya, ai ya‑yainaboneni.
5Yeso ati‑mari dai mitahi.
“Deoso‑ya yama tehe hinama toha, ene amose hinama toha, yama sokirihi, ene towe toharihi, tene.” Yeso ati nemarine.
6“Deoso‑ka ama·oni.” Ai owa ati ne,
ene amosanadire, keyehe‑ya hirine, Deoso‑ka tohare, yama soki‑ya winasa nane.
7Yama tehe‑ya Deoso wini‑nima yama tehe‑ya ai wina, ai ibi hiyari nofateni. Ai ene amosara ai atibodi bisa toha, Deoso Bidi i‑di Yeso ai atibodi‑ya sokotene, ai atibodi besene fawanabonehe.
8“Owa ene amosa hinama amani.” Mai ati na,
keyehe‑ya mai hiriteni. Ai ene amosa hinama tohaterani.
9Ai ene amosara, Deoso‑ya ai hiyara kanibote nahi.
“Abi Deoso, owa ene amosara, owa‑ya tiwati somawamahi.” Ai ati nahi.
Ai ene amosara tamine Deoso‑ya ai hiyara, Deoso ati somawame, ai ene amosara‑ya kadikamaterebonane.
10“Mai ihi amosa hinama mai tohaterani.” Deoso ati nematane.
“Deoso owa‑ya watore, owa ene amosa hinama tohani.” Mai ati na,
Keyehe‑ya mai hirina, Deoso ati‑ya mai nofaterani.
2Deoso‑ya ai tamine‑ya Kirisito kaminatene
1Dai oka dao onamaro, dai‑ka yama hani‑bone okanahanowahineni, dai ene amosabonehe. Dai ene amosaraya, ai tamine‑ya ka‑kamina ai‑ka Abi eyehe itarine. Ai tamine‑ya Yeso Kirisito ene amose hinama kaminatene.
2Yeso ai manakone‑ya nanahabemari, Yeso ati ene Deoso ai‑ya yawamaterebonane. Ai nafi manakone‑ya Yeso nanahabemarine.
3Deoso ati ai tokadaba, Deoso‑ka ai toha, ai watowahebonane.
4“Deoso owatoni.” Ati ne,
Deoso ati‑ya tokadabare, keyehe‑ya hirine. Deoso‑ya watoterene.
5Deoso ati‑ya tokadabe, Deoso‑ya nofatene. Deoso ati‑ya ai tokadabiya, Deoso‑ka ai toha ai watone.
6“Yeso‑ka oda amani.” Ai ati na,
Yeso Kirisito ene‑mari‑nima ai ene nahi.
Ai owa ai kaka, yama soki‑ya ai winasa teni
7Owati bara tohi awirani. Hibati‑ka mai ati ni‑maro‑nima owati nineni. Hibati‑ya mai ati dai mitamaro, fara mai ati‑nima owati nineni.
8Owati bara tohawaha, keyehe‑ya hiri·ora, dai‑ka yama soki fawani yanatona, dai‑ka yama wahi yokana‑bone yanatona, hibati‑ya yama‑ya dai watora, yama soki‑nima dai namaro, hibayata Yeso ene yama‑ya dai watowaha, yama wahabisari‑nima dai nawahani.
9“Yama tehe‑ka ama·oni.” Dai ati na,
Dai one‑ya dai kako, yama tehe‑ka dai tohi awisara, yama soki‑ya dai winasa nineni.
10Yama tehe‑ya ai wina, ai ibi nofa, ai ene amosa, ai ene mai taratokaraboneni.
11Mai ibi ka‑kako, yama soki‑ya mai winateni. Yama soki‑ya mai wi‑wina mai toki‑ya mai watora. Yama soki ihi yama‑ya mai awaterani.
12Madehe dai toha, dai‑ka yama hani‑bone okanahanoneni, Yeso dai manakone‑ya nanahabe ene Deoso ati somawamane.
13Bote dai toha, dai‑ka yama hani‑bone okanahanoneni. Yeso yama nafi‑ya wamanemata dai watoneni. Yetene dai toha, dai‑ka yama hani‑bone okanahanoneni, Satanasi ati‑ya dai nofarabonehe. Madehe dai toha, dai‑ka yama hani‑bone okanahanoneni, ai‑ka abi dai watabonehe.
14Bote dai toha, dai‑ka yama hani‑bone okanahano, Yeso yama nafi‑ya wamanemata dai watoneni. Yetene dai toha, dai‑ka yama hani‑bone okanahano, dai kita, Deoso ati‑ya dai wata, Satanasi ati‑ya dai nofarani.
Deoso‑ya ai kahiyarabisahi
15Yama dama dai nokotoniriyahi. Yama dama dai nokotoniya, Deoso‑ya dai nofi nafiraboneni.
16Mai fanawi‑ya mai nokotinihe, yama nafi‑ya mai awa, mai atibodi kobona, yama‑ya mai kiha, hini mai‑ya mai kahiyara, Deoso ene tohaterene. Satanasi ati‑ya mai no‑nofa, haa‑nima yama na‑ya mai nokotoniteni.
17Mai‑ka no‑nokotoni abawahaboneni. Deoso‑ta ai nokotonihe, ai abateraboneni.
Dai noko wadahi. Kirisito tohi awire mai ati naboneni
18Oka dao dai toha, owati dai mitahi. Ai amoni fa‑famaraba ni‑ya Yeso kamebonane. Kirisito‑ya ka‑kako kakibona tamine dai mitemarine. Hibayata Kirisito‑ya mai dama mai kakoneni. Kirisito‑ya mai kaka, mai ai awa, Yeso kami nahore ai watoboneni.
19Mai one Yeso‑ka mai‑mone mai ati na, Yeso‑ka mai tohaterani. Oda‑ya mai sawemaro, oda‑ya mai sawimi awira, Yeso‑ka mai toha‑mani, oda‑ya mai sawe neni. Yeso‑ka mai‑ya mai sawira, Yeso‑ka mai tohara, mai‑ya mai dami watowahaboneni.
20Yeso‑ka ai toha, Deoso‑ka Doni ai‑ya sawitene. Deoso‑ka Doni ai‑ya sawi, Deoso ati ai watoteni.
21Deoso ati‑ya dai wa‑wato, dai‑ka yama hani‑bone okanahanoneni. Deoso ati‑ya dai watora‑mani, dai‑ka yama hani‑ba okanahanora neni. Deoso keyehe‑ya hiriterene. Keyehe‑ya mai hirina, Deoso ati‑ya mai hiyaraterani.
22Ebeni‑ka keyehe‑ya mai hiri? Yeso Deoso Bidi tohi awire mai ati na, fara keyehe‑ya mai hirina, Kirisito‑ya mai ka‑kako mai tohani. Deoso‑ya mai nofarihi, Deoso Bidi‑ya mai nofarihi, mai teni.
23Deoso Bidi‑ya mai nofara, Deoso‑ya mai nofaterani. Deoso Bidi‑ya ai nofa, Deoso‑ya ai nofahari teni.
24Hibati‑ya Yeso tamine dai mitamaro, dai kadamoriyahi. Dai kadamora, Deoso dai‑ya sawi, Bidi dai‑ya sawihari nebonane.
25Deoso Bidi i‑di Kirisito ai‑ya sawi, ai abaterabone ati nane.
26Owati dai kadikiya, Deoso ati dai watabone, keyehe‑ya mai hirina, mai ati dai nofaraboneni.
27Kirisito ati ene Deoso‑ka Doni dai atibodi‑ya sawine, dai‑ya kanawatobonaha. Dai‑ya mai kanawatora, Deoso‑ka Doni dai‑ya kanawatobisebonane. Yama nafi‑ya Deoso‑ka Doni kanawato, keyehe‑ya hiriterene. Ai‑ka Abi i‑di Deoso ati‑nima ati tene. Deoso‑ka Doni ati‑nima ai na, Yeso‑ka ai tohateni.
28Oka madehe‑nima dai na, owati dai mitahi. Kirisito ati‑nima dai ene na, makobote kamataseya, dai ya‑yainaboneni. Yeso ati‑nima mai ihi ra, Kirisito kamataseya, mai kananaboneni, mai habi siitonaro.
29Yeso Kirisito ene amose hinama tohemari, mai ihi amosa, Deoso bidi mai toha, mai ihi dai awiya, mai ihi amosa, Deoso bidi mai toha, mai dai watowahaboneni.
3Deoso bidi ai tohawaha
1Deoso ai‑ya nofi nafi, dai awaho, ai‑ya bidine. Deoso‑ya mai dami watora ene oda‑ya mai watorani.
2Hibayata Deoso bidi ai toha, ai abano‑bone‑nima ai abano tohasa ra. Makobote Yeso kame, Yeso ai awiya, Yeso abano‑nima ai abano nawahaboneni.
3Yeso‑nima ai nabone ai atibodi ati na, ai ene ai namosateni, Yeso ene amose‑nima ai ene amosabonehe.
4Mai ihi amosara, Deoso ati‑nima mai ni awirani.
5Hibati‑ya Yeso kame, ai ene amosara, ai manakone‑ya nanahabemarine. Yeso ene amose hinama amane.
6Mai ihi amosanadira, Yeso‑ka mai tohara. Yeso‑ya mai awara, Yeso‑ya mai watoterani.
7Oka dai toha, owati dai mitahi. Oka dao dai toha, dai‑ya keyehe‑ya mai hirikariyahi. Dai ene amosa, Yeso‑ka dai tohani. Yeso ene amose, Yeso ene‑nima mai ihi na, Yeso‑ka mai tohateni.
8Mai ihi amosara, Satanasi‑ka mai toha, Satanasi ene amosaremata, ene amosanasa rene. Deoso Bidi i‑di Yeso kamemarine, Satanasi ene‑ya nanahabebonaha.
9Deoso bidi ai toha, ai ene towe hinama tohateraboneni. Ai‑ka abi ene‑nima ai ene nabone, Deoso bidi ai toha, ai ene amosawamaboneni.
10Mai ihi ai awiya, mai‑ka abi oni ai watoteni. Mai ihi amosara, mai one‑ya mai nofarihi na, Deoso bidi mai tohara, Satanasi bidi mai tohani.
Ai ibi nofahi
11Yeso tamine dai miti baha, oda ati dai mita,
“Dai ibi nofahi.” Oda ati namaro,
fara dai ibi nofahi.
12I‑di Kaina‑nima ai riyahi. I‑di Kaina sori‑ya nanahabematane. I‑di Kaina Satanasi‑ya abi ne, badi ene‑nima ene ne. Hini yamata‑nima ne sori‑ya nanahabamatati? Sori ene amosabise i‑di Kaina‑ta ene amosare, yawe, sori‑ya nanahabematane.
13Dai‑ya Satanasi‑ka mai kaka, dai korikasariyahi.
14Ai ibi nofa, ai abarabone ai wato, mai one‑ya mai nofara, mai ababoneni.
15Mai‑ka mai‑ya mai ka‑kako, mai‑ya mai ihi ide‑nima mai ihi teni. Mai‑ya mai nanahaba, Deoso tabaro‑ya mai winateraboneni.
16Deoso ai‑ya nofa, Yeso ai‑ya nofa ne, ai manakone‑ya nanahabemarine. Yeso ene ai awa, ai‑ya nofe‑ya ai watowahineni. Yeso ene‑nima ai ene na, ai‑ka mai ihi ai aba, ai sibaraboneni.
17Tika yamata dama toha, ai one‑ka yamata awira, hika yamata‑ba daatiyahi. Yamata daatira‑mani, tiwa‑ya Deoso nofe‑ya mai awaraboneni.
18Owati dai mitahi. Mai‑ya ai ati nofa, Hiniya mai‑ya ai ati nofariyahi. Mai ai nofi yokana toha, mai ai kasomahi.
19Mai ai nofa, mai ai kasoma, Deoso‑ka ai toha ai watoneni. Deoso‑ya ai awamakiya, ai habo siitoni awiraboneni.
20Ai atibodi ai‑ya weenaba awineni. Ai atibodi ai‑ya weena, Deoso yama nafi‑ya wato, Deoso ai‑ya weeni awireya, ai sibaraboneni.
21Ai atibodi ai‑ya weera, Deoso ai hiyara, ai habo siitoni awiraboneni.
22Deoso‑ya ai hiyara, ai ati‑ya mitatene. Deoso ati ai tokadaba, yama hinofa‑nima yama na ai haana, yama‑ya daatene.
23Deoso ati dai mitahi.
“Oka dao i‑di Yeso Kirisito ati dai nofiya, owati‑maro‑nima dai ibi nofahi.” Deoso ati nemarine.
24Deoso ati ai nofa, ati ai tokadaba, Deoso‑ka Doni ai‑ya sawitene. Deoso‑ka ai toha, ai‑ya sawi ai watotene.
4Deoso ati‑mona mai ati na, mai ati dai kadikahi
1Soho, owati dai mitahi. Deoso‑ka yo‑yose mai ati‑mone mai ati na, mai ati dai kadika, mai ati dai wataboneni. Deoso ati yokana tohe dai wato, Deoso ati tohare dai wato, dai naboneni. Deoso‑ka yo‑yose ati‑mone mai dami ati na, ati bare‑ya mai kaminabisineni.
2“Deoso Bidi i‑di Yeso bofe‑ya kame, ai‑nima tohemarine.” Mai ati na,
Deoso‑ka mai toha, Deoso‑ka Doni ati mai ka‑kamina ai watoteni.
3“Yeso, Deoso Bidi tohi awire. Deoso Bidi ai tohaterene.” Kirisito‑ya mai ka‑kako mai‑ka hidi ati nane.
Kirisito‑ya ka‑kako kakibona tamine‑ya dai mitamaro, hibayata Kirisito‑ya mai dami kakoneni.
4Oka madehe‑nima dai na, Deoso‑ka dai toha, dai‑ya Satanasi‑ka mai nofara, Deoso‑ka Doni dai‑ya sawi, Deoso‑ka Doni ene kitabote toha, Satanasi mai‑ya sawi, Satanasi ene ki‑kita‑raba nibisane.
5Satanasi‑ka mai toha, Satanasi ati‑nima mai ati teni. Satanasi‑ka mai toha hini mai one ati‑ya mai nofateni.
6Deoso‑ka ai toha, Deoso‑ka mai one ai ati‑ya mai nofateni. Deoso‑ka mai tohara ai ati‑ya mai nofaterani. Ai ati‑ya mai nofa, Deoso‑ka mai toha mai ai wato. Ai ati‑ya mai nofara Satanasi‑ka mai toha, mai ai wato teni.
Deoso ai‑ya nofe, ai one ai nofahi
7Oka dai toha, owati dai mitahi. Deoso ene ai ibi nofateni. Deoso bidi ai toha, ai ibi nofa, Deoso ati‑ya ai wato teni.
8Mai ai nofara, Deoso ai watoterani. Deoso ai nafi‑ya nofatene.
9Deoso ene ai wato, ai‑ya nofe ai wato ne. Ai‑ya nofi nafi Bidi ohari‑ya daanemarine, ai manakone‑ya nanahabe, ai abarabonehe.
10Deoso ai‑ya nofi nafi dai awaho. Deoso‑ya ai nofi awisariya, ai‑ya nofe, Bidi‑ya yosemarine, ai manakone‑ya nanahabebonaha.
11Deoso ai‑ya nofe, ai ibi nofahariyahi.
12Deoso ai awaterani. Ai ibi nofa, Deoso ai atibodi‑ya winatene. Deoso ai atibodi‑ya wine, ai ibi nofi nafeboneni.
13Deoso ene hika Doni ai atibodi‑ya sawi ene Deoso‑ka ai toha ai watone.
14Oda ati dai mitahi. Deoso Bidi oda awamaroni. Deoso Bidi hiyose, ai manakone‑ya nanahabebona oda awemari, mai nafi‑ya tamine oda kaminebonane.
15Deoso ati‑ya mai no‑nofa,
“Yeso, Deoso Bidi amane.” Mai atibodi ati na,
mai atibodi‑ya Deoso wine, Deoso‑ka mai tohateni.
16Deoso ene oda awemari, oda nafi‑ya nofe oda watowahane. Ai nafi‑ya Deoso nofe, fare‑nima mai ai nofa, Deoso‑ka ai toha, ai atibodi‑ya sawitene.
17Deoso ai atibodi‑ya sawi, mai ai nofa na, ai ene‑ya Deoso kadikeya, ai korikasaraboneni. Bofe‑ya ai wi‑wina Deoso ene‑nima ai ene na ai korikasaterani.
18Ai‑ya nofe ene ai korikasara, ai‑ya nofe, ai‑ya ene amose‑bona ai watoteni. Ai korikasa‑mani, owa‑ya nofare ai atibodi ati teni. Ai‑ya nofe ai wato ai korikasaraboneni.
19Deoso ai‑ya nofi bahe, makobote mai ai nofamakiteni.
20Deoso‑ya nofe‑mona ati ne, mai one‑ya nofare, keyehe‑ya hirine. Mai one ai nofara, Deoso ai nofahariterani. Mai ai awabisa, Deoso ai awaterani. Mai ai nofara, Deoso ai nofaterani.
21Hibati‑ya Deoso ai‑ya hiyare,
“Owa‑ya dai nofabone, dai one dai nofaharihi!” Deoso ati nematane.
5Deoso ati ai nofa Satanasi ati ai nofarani
1Kirisito i‑di Yeso tohene ai atibodi ati na, Deoso bidi ai tohateni. Ai‑ka Abi i‑di Deoso ai nofa, bidi mai ai nofahari teni.
2Deoso ai nofi nafi, ati ai tokadabe, Deoso bidi mai ai nofa ai watowahaboneni.
3Deoso ai nofa, ati‑nima ai teboneni. Ati‑nima ai na, ai ya‑yainaboneni.
4Deoso bidi ai toha, Deoso ati‑ya ai nofa Satanasi ati‑ya ai nofarani.
5“Deoso Bidi i‑di Yeso amane.” Ai ati na,
Satanasi ati‑ya ai nofarani. Yeso ati‑ya mai nofara, Satanasi ati‑ya mai nofateni.
Yeso tamine‑ya Deoso hiyarane
6Hibati‑ya Yeso‑ya Yowaho habanirise, Yeso tamine‑ya Deoso ati yanane. Yeso abebona‑ya ati yananamatase,
“Yeso, Oka Dao amane.” Ati nemarine.
Deoso‑ka Doni Yeso tamine‑ya kaminaharitene. Deoso‑ka Doni keyehe‑ya hiriterene. Faha‑ya Yeso habanise‑ya ati toha, emene tokafodobona‑ya ati toha nemarine.
7Ati 3 tohe, Yeso tamine‑ya kamine, Deoso‑ka Doni tohe, faha‑ya habanise, Deoso ati yanane, emene tokafodobonaya, Deoso ati yananamatasane. Fara hinama mai toha, mai ati 3 tohateni.
8Bofe‑ka mai ati 3 toha, Yeso tamine‑ya mai hiyara, Deoso‑ka Doni, faha, Yeso emene ne Yeso tamine‑ya mai hiyarineni.
9Ai owa mai 3 toha, mai ati fara hinama toha, mai ati ai nofateni. Ai owa keyehe‑ya mai hirinaba awineni. Deoso keyehe‑ya hiritere, ati ai nofahi.
10Yeso ati ai nofa, ai atibodi‑ya Deoso‑ka Doni hiyare, Deoso Bidi i‑di Yeso amane, ati tene. Yeso ati‑ya mai nofara,
“Yeso Deoso Bidi tohaterene keyehe‑ya Deoso hirinane.” Mai atibodi ati teni.
11Deoso ene ai abaterabone, Bidi ati ai nofeya, ati nemarine.
12Deoso Bidi ai nofa, ai abateraboneni. Deoso Bidi‑ya mai nofara, mai ababoneni.
Yama‑ya dai watowahaboneni
13Deoso Bidi ati dai no‑nofa dai‑ya okanahanabone, dai abaterabone dai watowahaboneni.
14Deoso‑ya ai hiyara, yama hinofa‑ya ai ati toha, ai ati‑ya mite ai watotene.
15Ai ati‑ya Deoso miteya, ai ati‑nima yama na‑ya daanebona ai watoneni.
16Ai owa ene amosare ai awa, mai abarabone, mai tamine Deoso‑ya ai kamina, mai‑ya Deoso ati somawamebonane. Mai one ihi amosara mai aba kanibote nabone, mai tamine ai hiyari awirani.
17Ai ene amosara‑ya Deoso nofaterene. Ai ene one ene ai aba kanibote teni. Ai ene one amosara, Deoso ai‑ya kasomatene, ai abarabonehe.
18Deoso bidi ai toha, mahi‑nima ai ene amosara hinama toha terani. Deoso Bidi ai‑ya nawade, Satanasi ai‑ya kayafaterebonane.
19Deoso‑ka ai toha mai ai watoteni. Satanasi‑ka mai toha Satanasi mai‑ya yokobonane.
20Deoso Bidi hibati‑ya kaki oda awemarine. Yeso ene, Badi, i‑di Deoso yokana ai watowahene. Yeso ene, Deoso ai‑ya bidi nane. Yeso ai‑ya soho ne, Deoso yokana ohari‑ta ene ai abateraboneni.
21Deoso yokana dai nokotonibisahi. Bara mai dai nokotoniriyahi. Feye amani.