1 KORITO

Korito mai‑ka yama hani daidi

¹Baoro ama·oni. Deoso ati ene Yeso Kirisito‑ka yo‑yose ama·oni. Ai‑ka soho i‑di Sotenesi owa‑ya sawi, dai‑ka yama hani‑bone oda kanahanoneni.

²Korito‑ya dai wi‑wina, tabora bara‑ya dai wi‑wina dai na, Deoso ati dai no‑nofa, Yeso Kirisito ene Deoso dai‑ya haane, dai‑ya kayawe, oda‑ka hidi tohemari, dai‑ka hidi tohahariwahe, oda‑ka yama hani dai kadikahi.

³Ai‑ka Abi i‑di Deoso, ai‑ka Ayo i‑di Yeso Kirisito mai fama, dai‑ya mai kasoma, dai atibodi dai‑ya ati soma teni.

⁴Deoso‑ya dai tamine ohiyarateni.

“Abi Deoso, Korito‑ya mai wi‑wina mai tikasomamaro, Yeso Kirisito‑ka mai tohawaha ihi ya‑yai·oneni.” Oteni.

⁵Deoso dai‑ya kanawato ene yama dai wato ba‑basi na, Deoso ati kamini dai wato, Deoso ene yama nafi‑ya dai wato neni.

⁶Yeso tamine dai‑ya oda hiyaramaro, oda ati‑maro‑nima dai nawahani.

⁷Dai ibi kasomi‑bone‑ka yama‑ya Deoso daanebona ati nemari, dai‑ya yama‑ya daanane. Ai‑ka Hidi i‑di Yeso Kirisito ko‑kobo dai nimaniya, Deoso dai‑ya kasomebona, dai kasomi‑ya fawaterebonane.

⁸Deoso dai eme‑ya nakitebonane, dai ene amosa fawarabonehe. Yeso Kirisito koboneya, dai ene ya‑yainebonane.

⁹Deoso dai‑ya haanemarine, Bidi i‑di Yeso Kirisito dai‑ka hidi tohe, dai‑ya sawibonaha. Ati‑nima tene.

¹⁰Oka soho dai amani. Owati dai mitahi. Ai‑ka Ayo i‑di Yeso Kirisito ati ene dai ibi weerihi, dai yorotokana dai ibi eberihi, dai ibi nofabisa, Yeso atibodi ati‑nima dai nafi atibodi ati nahi.

¹¹Dai tamine‑ya i‑di Korowe‑ka owa‑ya mai kamina, dai ibi weenamone mai ati naroni.

¹²“I‑di Baoro‑ka oda amani.” Dai one ati nihi,

“I‑di Aboro‑ka oda amani.” Dai one ati nihi,

“I‑di Bedoro‑ka oda amani.” Dai one ati nihi,

“I‑di Kirisito‑ka oda amani.” Dai one ati nihi namone, i‑di Korowe‑ka mai ati naroni.

¹³Kirisito‑ka ai toha, ai ebekiterani. Dai manakone‑ya onahabarihi, awa‑ya owa‑ya mai baakarihi namaroni. Faha‑ya dai‑ya mai habanirisa, owa oni‑ya dai weyetini? Owa oni‑ya dai weyeterani.

¹⁴Dai dami haba·onirisi awirani. I‑di Kayo, i‑di Kirisibo, mai fama‑ta mai haba·onirisikima, owa ene ya‑yai·oneni.

¹⁵“I‑di Baoro‑ka ai tohabone, ai‑ya Baoro habanirisemarine.” Dai ati rabone,

dai dama, dai‑ya haba·onirisaramaroni.

¹⁶“Hehe, i‑di Tefanasi hika mai eyehe haba·onirisahare, mai one‑ta haba·onirisarani.” Owatibodi ati nineni.

¹⁷Kirisito owa‑ya yose,

“Mai habatinirisahi.” Ati ni awiremarine.

“Owati Amosabote mai‑ya tihiyarabisahi. Awa‑ya owaana, o·aba, mai manakone onahabamaro, owati‑ya mai nofiya, mai abamaraboneni. Deoso tabaro‑ya mai wini ohareboneni.” Ati nemarine.

Yama‑ya mai wa‑wato mai ati‑nima ora, hiniya ai ibi hiyara‑nima oteni. Awa‑ya Kirisito waanemata ene kitabote tohe‑ya mai awaboneni.

¹⁸“Awa‑ya Yeso mai baahikane, ai manakone‑ya nanahabemarine.” Ai ati na,

Deoso ati‑ya mai nofara ai ati‑ya mai hahakana, mai ababoneni. Deoso ati‑ya ai no‑nofa Yeso abe tamine‑ya ai mita, ai ya‑yaina, Deoso ene kitabote tohe‑ya ai wato, Deoso tabaro‑ya ai winaboneni.

¹⁹“Yama nafi‑ya ai owa watomona mai dami ati na, Deoso ati‑ya mai nofara, Deoso ene yama‑ya mai watora mai‑ya mai dami awawahaboneni.

‘Owa‑ta yama owatobisini.’ Mai one ati na,

Deoso ene yama‑ya mai watora mai mai hiwatowahaboneni.” Deoso‑ka yama hani ati nineni.

²⁰Yama‑ya mai wa‑wato‑mone mai toha, Mose‑ka yama hani ati‑ya mai ka‑kamina mai toha, mai ibi ati wa‑wara mai toha na, Deoso ati‑ya mai nofara Deoso ene ka‑kana mai‑nima mai nawahani.

²¹Yama dama‑ya mai wa‑wato‑mone mai ati na, yama wato ihi Deoso hawine‑ya mai wasiterani. Deoso ene Yeso abe, ai manakone‑ya nanahabe tamine oda kamine, oda ati‑ya mai nofa, Deoso hawine‑ya mai wasiteni. Oda ati‑ya mai nofara, ka‑kana oda‑mone mai ati na, Deoso hawine‑ya mai wasirani.

²²Deoso ati ai hiyara, ai ati‑ya Yodeo mai mita,

“Deoso ati‑mona tina, neme‑ya tiwa ene kitabote oda awahi.” Mai ati teni.

Ai ati‑ya Kereko mai mita,

“Yama‑ya dai wato awirini, yama nafi oda watobisineni.” Mai ati teni.

²³“Yeso Kirisito awa‑ya mai baahikane, ai manakone‑ya nanahabematane. Ati dai nofeya, Yeso hawine‑ya dai sawi‑bone, Deoso tabaro‑ya dai kobonaboneni.” Oda ati na,

Oda ati‑ya Yodeo mai mita, mai atibodi yama‑ya kadika,

“Yeso oda manakone‑ya nanahabare, oda manakone oda nanahababisineni.” Mai atibodi ati na,

Ai taratokana‑nima mai na, Deoso tabaro‑ya mai koboraboneni.

Oda ati‑ya Kereko mai mita, oda‑ya mai hahakana,

“Yeso hawine‑mona‑ya oda sawiraboneni.” Kereko mai ati teni.

²⁴Deoso mai‑ya haanemataya,

“Deoso ene Kirisito kitabote amane.” Yodeo mai ati teni.

“Deoso ene Kirisito yama nafi‑ya watobisane.” Kereko mai ati teni.

²⁵Yama ai wato bi‑bidi nibisa, Deoso yama nafi‑ya watobise, ai nafi‑ka yama wato‑ya Deoso‑ka yama wato fiyakana, ai nafi kiti‑ya Deoso yehe bidi ohari kiti fiyakana nane.

²⁶Soho, Deoso dai‑ya haanemari tamine dai kadikahi. Yama nafi dai watorihi, dai kitabote toharihi, mai‑ka hidi dai toharihi na, hiniya Deoso dai‑ya haanemarine.

²⁷Yama ai watora Deoso ai‑ya haane, yama‑ya mai watamaro mai‑ka yama wato‑ya ai wato fiyakana, ai kitara Deoso ai‑ya haanemari, mai kitamaro, mai kiti‑ya ai kiti fiyakawaha ai teni.

²⁸Hibayata mai mai hinofara Deoso mai hikadika, mai amosawahaboneni. Hibayata mai mai hinofabisa mai fawanaboneni. Towe mai‑mone mai one ati na, Deoso mai hikadika, mai amosawahaboneni. Mai amosa‑mone mai one mai hina, mai amosi fawanaboneni.

²⁹“Amosabotebisa ama·oni.” Deoso‑kaya ai ati teraboneni.

³⁰Deoso ene Yeso Kirisito ai‑ya sawiwahene, ai abarabonehe. Kirisito ene yama‑ya ai watowaha, Deoso‑ka ai toha, Deoso ai‑ya kayawe, Kirisito ene ai ene amosawamaboneni. Ai manakone abawaha, ai abiya, ai kitamateboneni.

³¹“Dai‑ya dai kahiyarariyahi. Kirisito‑ta dai kahiyarabisahi.” Deoso‑ka yama hani ati na,

Ati‑nima ai nahi.

¹Hibati‑ya dai tabaro‑ya kobo·ona, Deoso ati‑ya dai‑ya ohiyara, yama nafi‑ya mai wa‑wato mai ati‑nima owati ni awiramaroni. Hini oka mai‑ya ohiyara owati‑nima dai‑ya ohiyara, owati namaroni.

²Yama bara tamine ohiyari awira, Yeso Kirisito tamine‑ya ohiyarabisamaroni.

“Yeso mai baahikane, abematane.” Onamaroni.

³Dai tabaro‑ya owina, okitara, owa habo siitona, wawawa·okanamaroni.

⁴Deoso ati dai‑ya ohiyara, owati amosi nafira,

“Baoro yama nafi‑ya watone.” Dai ati ramaroni.

Owati‑ya dai mita,

“Se! Deoso‑ka Doni kitabote i‑di Baoro‑ya sawine.” Dai ati nibisamaroni.

⁵Deoso‑ka Doni ene dai awa, Yeso ati dai nofawaha, yama‑ya mai wa‑wato mai ati ihi toharihi, owa ene toharihi namaroni.

⁶Deoso ati‑ya mai no‑nofa ai hawa toha‑nima mai na, oda ati‑ya mai mita, yama‑ya mai wato ba‑basi naboneni. Yama nafi‑ya mai watamone mai ati na, mai ati‑nima oda ati ni awirini. Yama nafi‑ya mai watamone mai ati na, mai ati fawanaboneni. Deoso ati oda kamine, ati fawaterebonane.

⁷Hibati‑ya Deoso ati‑ya mai mitaramete, ati ohiyarawahene. Ai‑ka idi‑bona‑ya Deoso wamani awisareya, hini‑ya hiyare,

“Oka dao oyoseboneni. Oka dao oyose, ati‑ya mai nofiya, owa tabaro‑ya mai winawahaboneni.” Deoso ati nematane.

⁸Yeso Deoso Bidi tohe tamine‑ya ai‑ka hidi mai one watora, mai baahikanematane. Tamine mai hiwato‑mana, ai‑ka Hidi amosabote mai baahikare namatane.

⁹Deoso ai nofa ai‑ka yama amosabote Deoso wamahinamete‑ya ai‑ya daanebonane.

“Ai‑ka yama‑bone‑ya mai awarihi, yama tamine‑ya mai mitarihi, ai‑ka yama‑bone hibati‑ya ai watorihi nineni.” Deoso‑ka yama hani ati nineni.

¹⁰Yama ai watoramaro Deoso‑ka Doni ai‑ya kanawatowahe, ai‑ka yama nafi‑ya wato, Deoso atibodi ati‑ya wato nane.

¹¹Ai atibodi ati‑ya mai watora, ai atibodi ati‑ya ai watobisa, Deoso atibodi ati ai watore, Deoso‑ka Doni hiwatobisatene.

¹²Deoso‑ka Doni ai atibodi‑ya sawi ene Deoso atibodi ati ai watowaha, Deoso ati‑ya mai nofara mai atibodi ati‑nima ai atibodi ati ni awira, Deoso yama‑ya daanebona tamine‑ya ai watoneni.

¹³Deoso‑ka Doni ai‑ya kanawato‑nima mai one‑ya ai kanawata, yama‑ya mai wa‑wato mai ati‑nima ai ati terani. Deoso ati dai no‑nofa Deoso ati dai‑ya oda kamine, Deoso‑ka Doni ene dai watowahaboneni.

¹⁴Deoso‑ka Doni mai‑ya sawire, Deoso ati‑ya mai watora,

“Deoso ati honita tohabisane.” Mai ati teni.

Deoso ati‑ya Deoso‑ka Doni mai‑ya kanawato awireya, Deoso ati‑ya mai watoteraboneni.

¹⁵Deoso‑ka Doni ai‑ya sawi, yama nafi ai kadika, yama amosa ai nofabisa, yama towe ai nofaterani. Deoso‑ka Doni mai‑ya sawire, ai ene kadiki‑ya mai watoterani.

¹⁶Deoso yama nafi‑ya wato, fare ai kanawatoterene. Deoso‑ka Doni ai‑ya sawi, Yeso Kirisito atibodi ati‑nima ai atibodi ati nawahaboneni.

¹Soho, ai hawa toha‑nima dai ra, madehe borehe‑nima dai na, Deoso ati dai wato nafirani.

²Madehe borehe mai‑ka ami mai yohari fahi‑ya mai fawi ohariteni, yama kita kabi‑ya mai watoraro. Fara madehe‑nima dai na, Deoso ati kite‑ya dai‑ya okanawatora, Deoso ati yoha fahi‑nima ne‑ya dai‑ya okanawatobisani. Deoso ati kite‑ya dai wato awisarani.

³Deoso ati‑ya dai nofi awisara awineni. Deoso ati‑ya mai nofara, mai ihi‑nima dai ene na, dai ibi wee, dai one‑ka yama‑ya dai atibodi kayafawaha na, mai ihi‑nima dai ene namariyahi.

⁴“Baoro‑ka oda amani.” Dai one ati nihi,

“Aboro‑ka oda amani.” Dai one ati nihi namoneni.

Deoso ati‑ya mai nofara mai ihi‑nima dai ene nasa nineni.

⁵I‑di Aboro oda fama, amosabote oda tohara, Yeso oda‑ya yosebise, Deoso ati oda kamine, ati dai nofamaro, ai‑ka Hidi ati‑nima oda nineni.

⁶Yamata‑ya mai ka‑kama mai‑nima ona, Deoso ati dai‑ya ohiyari bahamaroni. Yamata kami hawa tohaya, faha‑ya mai sorona mai‑nima i‑di Aboro ne, dai‑ya Deoso ati‑ya hiyaramatasane. Deoso ene yamata yana, Deoso ene Deoso ati‑ya dai nofahariteni.

⁷Deoso ati okamini bahe, ati‑ya i‑di Aboro kaminamakitase, oda ene dai tohara, oda‑ya dai nokotoniriyahi. Deoso‑ta dai nokotonibisahi.

⁸I‑di Aboro oda fama, fara oda kafama, Deoso ati oda kamine, hini oda ene‑nima oda manakone na‑ya Deoso daanebonane.

⁹Deoso‑ka yama‑ya i‑di Aboro oda fama oda anina, Deoso‑ka fadara‑nima dai nihi, Deoso‑ka yobe‑nima dai nihi, dai nineni.

¹⁰Deoso owa‑ya kasome ene Deoso‑ka yobe dai tohawaha, Yeso Kirisito dai‑ka yobe tati mese ewene tohawahene. Yeso abe, ai manakone‑ya nanahabe, kitame tamine dai‑ya okaminamaroni. Yobe wamani‑ya mai wata, mai ihi‑nima owa ene na. Mai‑ka yobe‑bona tati mese ewene hodone‑ya mai nakowe, yobe tati mese ewene kite‑ya mai nawaa, yobe tati mese ewene‑bona‑ya mai ibariteni. Fara mai ihi‑nima owa ene na, Kirisito tamine dai‑ya okamina, dai‑ya okanawata ene Yeso Kirisito dai‑ka yobe tati mese ewene tohawahene. Owa nowati‑ya dai‑ya mai kanawata, dai‑ka yobe‑ya mai aniniya, mai noki wadiyahi, mai ihi amosabonehe.

¹¹Yeso Kirisito ati‑ya mai nofi awiriya, Kirisito tamine‑ya mai kaminara, mai‑ka yobe tati mese ewene Yeso tohare, Deoso‑ka yobe mai tohi awiraboneni.

¹²Deoso‑ka yobe ai wamanabone, Deoso ati yokana ai wata, Deoso ati yokana‑ya mai ai kanawata, oro, barata, yati amosabote‑nima yobe nebonane. Mai one ati ai nofa, mai ati ai kamina, awa, kada efe, kabihi na‑nima yobe ai wamane nebonane.

¹³Yeso kamataseya, ai ene‑ya awebonane. Ai ene amosa, oro, barata, yati amosabote‑nima ai ene na, ai ene hasinaboneni. Ai ene amosara, awa, kada efe, kabi‑nima ai ene na, ai ene ababoneni. Yobe hati‑nima ai ene hateboneni.

¹⁴Yeso mai‑ka yobe tati mese ewene tohe, mai ihi hatira, Deoso tabaro‑ya mai winabone, mai manakone amosa‑ya mai kayafaboneni.

¹⁵Mai ihi hatiya, Deoso tabaro‑ya mai winabone, mai manakone amosa‑ya mai kayafi awiraboneni.

¹⁶Deoso‑ka yobe dai toha, Deoso‑ka Doni dai‑ya sawi dai watokarini?

¹⁷Deoso‑ka yobe‑ya mai towe tonihe, Deoso mai‑ya nanahabebonane. Deoso sawi‑ke yobe amosabote tohe, fare yobe dai amani.

¹⁸Deoso ati‑ya mai nofara dai tamine‑ya mai hiyariya, yama‑ya dai watamone mai ati na, mai ati dai nofariyahi. Mai ati dai nofa‑mani, hini dai‑ya dai keyehe neni. Ka‑kana dai‑mone mai ati na, fara yama dai wato ba‑basi na awineni.

¹⁹Deoso ati‑ya mai nofara,

“Yama nafi‑ya oda watoneni.” Mai ati na,

yama‑ya mai watora, ka‑kana mai amani.

“Hini mai ati mai‑ya kobotonamatasaboneni.” Deoso‑ka yama hani ati nineni.

²⁰Yama‑ya mai wa‑wato‑mone mai ati na, mai atibodi ati‑ya Deoso wato, mai atibodi honita tohamone Deoso ati tene.

²¹Yama‑ya mai wa‑wato‑mone mai ati na, mai dai kahiyarariyahi. Deoso ene yama nafi dai kayafineni.

²²Owa, i‑di Aboro, i‑di Bedoro, oda na, dai‑ka oda amani. Deoso ene yama nafi dai‑ya kasomaboneni. Dai hasiniya, Deoso dai‑ya kasoma, dai abiya, dai‑ya kasoma neya, dai kasomi‑ya fawaterebonane.

²³Kirisito‑ka dai amani. Deoso‑ka i‑di Kirisito amane.

¹Owa, i‑di Aboro, i‑di Bedoro oda na, oda tamine dai kadika, haa‑nima dai atibodi ati nibisahi.

“Yeso Kirisito‑ka yo‑yose i‑di Baoro, i‑di Aboro, i‑di Bedoro mai toha, Deoso ati ene Yeso ati‑ya mai hiyarateni. Deoso tamine ai mitaremata, tamine mai himitawahe, tamine‑ya ai‑ya mai kaminateni.” Dai atibodi ati nahi.

²Ai owa‑ka yo‑yose ai toha, ai‑ka hidi ati‑nima ai teni.

³Owati, owa ene na dai kadika, owa‑ya dai ati nofara, sibarini. Fara owati, owa ene na‑ya mai kadika, owa‑ya mai nofara, sibarihi, owatibodi ati nafi owatorihi, owa ene nafi owatorihi, oneni.

⁴Owatibodi owa‑ya ati soma, owa ene amosa awineni. Ai‑ka Hidi i‑di Yeso‑ta owa ene owatibodi ati na‑ya watobise, fara‑ya kadikebonane.

⁵Dai owa ene‑ya dai kadikariyahi. Yeso kamataseya, ai nafi ai ene‑ya kadikebonane. Yama ai kemamaro‑ya kadika, ai atibodi ati‑ya kadika neya, ai manakone‑ya Deoso daanebonane.

⁶Oka soho dai toha, yama‑ya dai watabone, i‑di Aboro oda fama oda tamine okanahanoneni. Deoso ati dai fiyakariyahi. Ai owa ohari dai nokotoniriyahi. Ai owa ene‑ya ai owa ene ai katomiriyahi.

⁷Yama dai kiha Deoso dai‑ya daanemarine. Hiniya honita‑ya dai‑ya daane. Hini yamata ihi dai‑ya dai kahiyariti? Dai ene tohi awirini.

⁸Yama dai atibodi kobohina‑ya dai kayafi hawa tohamone, dai‑ka yama dodamawaha, dai‑ya oda sawira, mai‑ka hidi dai tohawahamone dai ati namoneni. Mai‑ka hidi yokana dai toha‑mani, oda ya‑yaina neni. Mai‑ka hidi yokana dai toha‑mani, mai‑ka hidi oda tohahare neni.

⁹Deoso ene Yeso‑ka yo‑yose oda toha, dai‑nima oda ni awirani. Yama dama oda kihara, mai mai hinahababone mai‑nima oda nibisineni. Mai‑ka hidi oda tohara, oda‑ya mai hahakibisa, oda‑ya mai ati nanahaba, bofe‑ka mai toha, neme‑ka mai toha, mai na, oda abi awi‑ya mai nofineni. Owatibodi ati nineni.

¹⁰Kirisito ene yama dai watamone dai ati na, Kirisito ati oda kamina, ka‑kana oda namone mai ati teni. Dai kitamone dai ati na, oda‑ta oda kitaramone mai ati teni. Dai‑ya mai kahiyara, oda‑ta oda‑ya mai kakobisineni.

¹¹Yeso‑ka yo‑yose oda toha, oda tefe‑ba wadara, oda fimi, oda bako hoko, oda‑ka bora ohare oda weyena, oda‑ya mai bisi, oda tabaro yokana wadarihi nineni.

¹²Yama anini oda kitabisineni, oda tefe manakone bonehe. Oda‑ya mai kaka, mai oda kasoma, oda‑ya mai bisina, mai oda weeni awirihi nineni.

¹³Oda tamine‑mone‑ya keyehe‑ya mai hirina, mai‑ya oda hiyara, oda ati amosabisineni. Bani sabone‑nima oda nihi, yamata atori‑nima oda nawahamone mai ati teni.

¹⁴Oka madehe‑nima dai na, dai‑ya onofi nafineni. Dai‑ya wee·ora, dai‑ya okanawata, dai‑ka yama hani‑bone okanahanowahineni.

¹⁵Yeso Kirisito tamine dai‑ya okamini baha, dai‑ka abi‑nima ona. Owati dai mita, Kirisito ati dai nofamaro, Deoso‑ka dai tohawaha, Yeso Kirisito tamine‑ya 10.000 mai toha dai‑ya mai kanawatomakeba awineni. Fara dai‑ka abi‑nima mai ni awiraboneni.

¹⁶Dai‑ka abi‑nima ona, owa ene‑nima dai ene nahi.

¹⁷Owati‑ya dai ati kadamowamarabone, i‑di Timoti oyoseneni. I‑di Timoti onofi nafi, oka dao‑nima ne. Yeso Kirisito tamine‑ya okamine, owati‑nima nemari, fare oka dao amane. Mai tabori‑ya mai okanawato‑nima dai tabaro‑ya i‑di Timoti dai‑ya kanawatomakitasebonane.

¹⁸Dai one hini mai‑ya mai kahiyara,

“Yama oda watobisa, oda ene Baoro kakomehe, oda tabaro‑ya kamarebonane.” Mai ati namoneni.

¹⁹Deoso ati sibareya, okomatasaboneni. Kobo·oniya, mai‑ya mai kahiyara mai ati omita, mai kiti oawahari onaboneni.

²⁰Deoso ai‑ka hidi toheya, ai‑ya ai ati natamini awirani. Ai ene kitateni. Deoso ene ai kita,

²¹dai tabaro‑ya kobo·oniya, hini yamata‑ya dai ati kobonibati? Dai‑ya wee·onabone dai ati kobona awineni. Owati somabone dai ati kobonibisa awineni. Dai‑ya owati wee nofarini.

¹Dai‑ka owa Yeso ati‑ya nofe‑mona ati ne, badi fadi‑ya famawahemonane. Yeso ati‑ya ai nofa haa‑nima ai ene terani. Bara Yeso tamine‑ya mai watora, haa‑nima mai ihi terani.

²Dai‑ya dai kahiyarariyahi. Dai‑ka owa ene dai ya‑yairiyahi. Dai ohinibisahi. Ene amosare, dai‑ya dabamarayaho.

³Yama yaki‑ya owina, dai‑ya osawe‑nima owatibodi nineni. Dai owa tamine omita ene okadike, dai‑ya osawe owati‑nima owati naboneni.

⁴Dai yorotokana, ai‑ka Ayo Yeso tamine dai hiyarabone, dai‑ya owatibodi sawi, Yeso kiti sawitene.

⁵Dai‑ka owa madise‑ya famemona, dai weenaho.

“Satanasi ati‑ya tikadaba, oda‑ya didabamariyahi.” Dai ati nahi.

Dai ati ene abano‑ta abeba awane. Yeso ai‑ka Hidi kamataseya, Deoso tabaro‑ya atibodi‑ta winabiseba awane.

⁶Dai ene amosa‑mone dai ati na, dai ene amosarani. Dai‑ka owa ene‑ya dai kofeya, fare ene‑nima dai ene namakeboneni. Femeto i‑isi ne baho‑ya dabeya, baho tonafiteni. Fare femeto i‑isi ne‑nima dai‑ka owa ene ne dai kofeya, dai ene towe tohahareboneni.

⁷Dai owa ene amosare, hini‑ya kaminare, dai‑ya dabamarayaho, dai ene amosabonehe. Ene amosare dai‑ya dai dabareya, baho femeto kihara‑nima dai nawahaboneni. Hibati‑ya ai‑ka idi mai‑ya Deoso kakariwahemata, baho femeto kihara‑ta mai kababone Deoso ati ne, hibayata kaneiro bidi‑nima Yeso abe, ai manakone‑ya nanahabe, ai abarabonehe. Fare Deoso ai‑ya kakariwahe‑nima baho femeto kihara‑nima dai niyahi.

⁸Deoso‑ka yo‑yose ai‑ka idi mai‑ya kakariwahemata tamine‑ya ai kadika, ai mariteni. Ai marina, baho femeto kihara‑ya ai kabateni. Ai ene amosara femeto‑nima teni. Ai ene amosara‑ya mai awa, mai ihi amosara tohamakeba awineni. Ai ene amosaramaro‑nima ai ene namarihi. Ai ene amosabisa, keyehe‑ya ai hiririyahi.

⁹Owati dai mitamatasahi. Dai‑ka yama hani‑bone daa·onamaro, ati‑nima onaboneni.

“Mai‑ka yibote mai‑ya mai nokotoni oharira, mai one‑ya mai nokotonihe, fana mai one‑ya mai a‑aha, fana maki mai one mai‑ka mai a‑aha, maki hinama mai ibi a‑aha, mai toha na, dai‑ya mai sawimarihi nahi.” Onamaro, fara onamatasineni.

¹⁰Deoso ati‑ya mai nofara mai tamine‑ya owati toharani. Deoso ati‑ya mai ati nofa mai tamine‑ya owati tohabisani. Deoso ati‑ya mai nofara mai ihi amosara. Mai one‑ya mai nokotonihi, mai one‑ka yama‑ya mai kayafa, yama‑ya mai boti mai na, deoso bare‑ya mai kahiyara teni. Fara yama nafi‑nima mai nawaare, mai tabori yakari‑ya ai sawi nofara‑mani, bofe‑ya ai winara neni.

¹¹Yeso ati‑ya mai nofa‑mone mai ati na, mai ihi amosara, dai yorotokana, Deoso dai hiyarabone, dai‑ya mai dabarihi. Mai fanawi one‑ya mai a‑aha, mai makidi one‑ka mai a‑aha, kawi ihi mai towe toha, mai one‑ka yama‑ya mai kayafa, mai one tamine‑mone‑ya keyehe‑ya mai hiri, deoso bare‑ya mai ka‑kahiyara, yama‑ya mai boti mai na, dai‑ya mai dabarihi, mai tabori‑ya dai tafarihi nahi.

¹²Yeso ati‑ya mai nofara mai ihi ai kadikariyahi. Yeso ati‑ya mai nofa‑mone mai ati na, mai ihi ai kadika, mai ihi amosa, mai ai kahiyara, mai ihi amosara mai ai weeteni.

¹³Yeso ati‑ya mai nofara mai ihi‑ya Deoso kadikebonane. Mai ihi‑ya kadikeya, mai ihi amosara manakone‑ya daanebonane. Dai yorotokana, Deoso‑ya dai hiyarabone, Deoso ati‑ya mai nofa‑mone mai ati na, mai ihi ati kasira, dai‑ya mai dabariyahi.

¹Dai‑ka soho ene amosare, Deoso ati‑ya mai nofara mai‑ya dai‑ka soho tamine dai kaminamoneni, dai‑ka soho ene‑ya mai kadikabonehe. Haa‑nima dai riyahi. Deoso ati‑ya mai no‑nofa mai‑ya dai‑ka soho tamine dai kaminabisahi.

²Yeso kamataseya, Yeso ati‑ya ai no‑nofa mai nafi ihi ai kadikabone, hibayata yama bide kadiki dai watokarini?

³Deoso‑ka yo‑yose mai ihi ai kadikabone tamine dai watokarini? Fara ai one ene kadiki kitaraneni.

⁴Dai‑ka soho ene‑ya mai kadikabone, dai owa‑ta dai‑ka soho ene‑ya kadikabisaho. Dai owa yama‑ya wato nafire, sibarane. Deoso ati‑ya mai nofara mai‑ya dai‑ka soho ene dai kaminariyahi.

⁵Deoso ati‑ya dai no‑nofa dai owa ene kadiki dai watokarini? Yama bide kadiki dai watora‑mani, madehe borehe dai tohasa na neni. Dai ene ya‑yai·oni awirini.

⁶Dai‑ka soho ene amosare, Deoso ati‑ya mai nofara mai‑kaya dai towakemonane, ene mai hikadikebonaha.

⁷Bara mai‑ya dai owa ene tamine dai kamina, dai ene amosarani. Tiwa‑ya dai owa ene amosare, tiwati somawamabisahi. Tika yama‑ya dai owa boti, tiwati yanariyahi.

⁸Dai‑ka soho‑ya dai ati somara, dai‑ka soho‑ya dai wee, hika yama dai boti na, dai ene amosarani.

⁹Mai ihi amosara dai‑ya keyehe‑ya mai hirikariyahi. Mai fanawi one‑ya mai aha, mai one‑ka yibote mai‑ya mai aha, maki hini hinama mai ibi aha, mai fanawi hini hinama ibi nokotonihi na, deoso bare‑ya mai kahiyara, Deoso tabaro‑ya mai winateraboneni.

¹⁰Yama‑ya mai bo‑boti mai toha, hini mai‑ka yama‑mone‑ya mai ibi to‑tokatowe mai toha, kawi‑ya mai no‑nokotoni mai toha, mai one tamine‑mone‑ya keyehe‑ya mai hi‑hiri mai toha, mai na, Deoso tabaro‑ya mai winateraboneni.

¹¹Hibati‑ya mai ihi‑nima dai ene namaro, ai‑ka Hidi i‑di Yeso Kirisito dai manakone‑ya nanahabe, dai manakone wadamara, Deoso‑ka Doni dai atibodi‑ya namosawahemarine.

¹²Deoso owa‑ya ati barirene. Hiniya owa ene amosara‑mani, ai‑ya kasomara neni. Owa ene ai‑ya kasomabone‑ya owatibodi nofineni. Deoso owa‑ya ati barire, hiniya owa ene amosara, owa‑ya yaditonamatasaba awineni. Owa ene owa‑ya yaditonamatasa‑ya owatibodi nofi awirini.

¹³Yamata‑ya Deoso nayanane, ai kababonehe. Yamata ai kababone, ai tefe weyene‑ya Deoso wama, ai nabadi‑ya wama nematane. Makobote Yeso kamataseya, ai fimimaraboneni. Hini yamata‑bone Deoso ai abano‑ya wamanamatati? Deoso‑ya ai kahiyarabone, ai‑ya kasomebona ai abano‑ya wamanematane. Ai ene amosarabone ai‑ya wamani awirematane.

¹⁴Yeso ai‑ka Hidi abe, Deoso hinakitamemata, ati ai nofiya, ai abiya, Deoso ai‑ya nakitamaharibonane.

¹⁵Yeso Kirisito abano kobobone‑nima ai na, ai‑ya kobobona ai ati‑ya tokadaba‑nima Yeso Kirisito ati ai tokadabahi. Kirisito kobobone mai fanawi towe‑ya ai famateriyahi.

¹⁶Fana towe‑ya ai aha, fara fana towe‑ya ai abano fama, ai abano ohariwamateni. Deoso‑ka yama hani ati nineni.

¹⁷Deoso ati‑nima ai niya, Yeso atibodi‑ya ai atibodi famawahaboneni.

¹⁸Fana one‑ya tiwati aha, kanatibisahi, tiaharabonehe. Ai ene amosara ai‑ya nakoma, fana one ai aha, ai kobobona mai tohawaha, mai ihi towe ai kayafateni.

¹⁹Ai abano Deoso‑ka Doni tabaro toha, ai‑ya Deoso hika Doni‑ya nawine, tika hidi tihara, Deoso tika hidi tohabisane.

²⁰Ai manakone‑ya Kirisito nanahabe, Deoso‑ka ai tohawaha, ai‑ka ai tohamara, dai atibodi‑ya Deoso‑ya dai kahiyara, dai ene‑ya mai one awiya, Deoso‑ya mai kahiyaramakiyahi.

¹Owati dai mitabone, oka yama hani‑bone dai daana‑ya oawani.

“Dai honita wahamaro, dai fanara, sibarineni.” Owatibodi ati neni.

²Owati dai mitahi. Deoso ati‑ya mai nofara mai ibi siwakani dama mai‑nima dai rabone, dai ati fana tika yibote ohare dai famahi. Mai fanawi one‑ya didakorariyahi. Fara‑nima mai fanawi na mai ati faniya, mai‑ka yibote ohari‑ya mai fama, sibarini. Mai makidi one‑ya mai dakorariyahi.

³Tika yibote tiwa‑ya ati kobona, dai dakorahi. Tika yibote tiwa‑ya ati kobone, dai dakorahari, dai nahi.

⁴Fana, hini tika tihamara, tika yibote tiwa‑ya ati dakore, dai dakorahi. Maki, hini tika tihamara, tika yibote tiwa‑ya ati dakora, dai dakorahari, dai nahi.

⁵“Hibareya, Deoso ai hiyarabone, ai dakoramarihi, ai tafamarihi ai namatahi. Ai amoni fa‑famaraba niya, ai dakorama, ai tafama, ai nabani.” Dai fami ati na,

Hini dai ati‑nima dai niya, sibaraboneni. Makobote dai dakorama kanibote na, Satanasi ati ene mai one‑ya dai dakoraraboneni.

⁶Yama maakani‑ya dai fami nofara, dai dakora sibarini.

“Dai amoni fa‑famaraba niya, dai dakorariyahi.” Deoso ati terene.

“Hibareya, ai dakoramatariyahi.” Dai ati ni awiriya, sibarini.

Hini dai ati‑nima dai nahi.

⁷Owa‑nima dai nafi na‑mani, yama sibara neni. Owatibodi ati nofani. Deoso ene fara hinama ai tohaterani. Deoso ai‑ya kasome ene ai owa fana, ai owa fanarihi tene.

⁸Owati dai mitahi. Dai ati fani awiriya, sibaraboneni. Dai fanamaro dai‑ka yibote abiya, dai fanami awiriya, owa‑nima dai niya, yama sibarihi nabone owatibodi ati nineni.

⁹Fana‑ya tiwatibodi ati dakoriya, tifanahi, mai one‑ya didakorarabonehe. Hini ai‑ka yibote‑ya ai dakora, ai sibarini. Mai one‑ya ai atibodi ati dakora, ai ati kasiroteni.

¹⁰Dai fana, owati dai mitahi. Ai‑ka Hidi i‑di Yeso Kirisito ati okaminaboneni.

“Mai fanawi fanamaro, mai honita wahawamariyahi.

¹¹Mai honita wahana, maki owa‑ya mai famariyahi. Hini hika yibote‑ya famamabisiya, yama sibaraboneni. Makidi dai toha, dai fana, dai honita wahariyahi.” Deoso‑ka yama hani ati nineni.

¹²Deoso ati tohi awire, hini owati‑ya dai‑ya ohiyaraboneni. Deoso ati tinofabisa, tika yibote Deoso ati‑ya nofara, dai famamaro, tiwa‑ya ati wahakara, hini dai famahi.

¹³Fana tiha, Deoso ati‑ya tinofa, tika yibote Deoso ati‑ya nofare, dai famemari tiwa‑ya ati wahakare, hini dai famaho.

¹⁴Deoso ati‑ya maki nofare, fadi‑ta Deoso ati‑ya nofa ihi Deoso mai fami‑ya kasomikima tene. Fadi Deoso ati‑ya nofara, maki‑ta Deoso ati‑ya nofe ene Deoso mai‑ya kasomikima tene. Deoso mai‑ya kasoma, mai‑ka madehe‑ya kasomahari nebonane. Mai‑ya kasomare‑mana, mai‑ka madehe‑ya kasomaharire nane. Mai‑ka madehe‑ya kasoma tene.

¹⁵Deoso ati‑ya tika yibote nofara, tiwa‑ya wahakana, honita wahawamiya, sibaraboneni. Tiwa‑ya tika yibote wahakana, Deoso tiwa‑ya weerebona,

“Tiwati somahi.” Deoso ati nane.

¹⁶Fana tiha, Deoso ati tinofa, tika yibote Deoso ati‑ya nofare, tiwa ene‑ya aweya, Deoso ati‑ya nofamakiba awane. Yama tiwato awirini. Fara‑nima maki tiha, Deoso ati tinofa, tika yibote Deoso ati‑ya nofara, tiwa ene‑ya awiya, Deoso ati‑ya nofamakeba awineni. Yama tiwato awirini.

¹⁷Deoso‑ya mai hiyarabone, mai yorotokana, mai‑ya ohiyariya, haa‑nima owati teni.

“Hibati‑ya Deoso ati dai nofawahiya, hini dai abano tohamaro, tohasa niya, dai sibaraboneni.” Oteni.

¹⁸Hibati‑ya dai sowiri tati ataro‑ya mai wisinakosamaro, sibarini. Dai korikasariyahi. Hibati‑ya dai sowiri tati ataro‑ya mai wisinakosaramaro, sibarini. Mai wisihinakosariyahi.

¹⁹Hibayata ai sowiri tati ataro wisina‑ya Deoso nokotoni awire, hini ati‑nima ai niya, ya‑yainebonane.

²⁰Hibati‑ya dai sowiri tati ataro tohamaro, hini tohasa niya, sibaraboneni.

²¹Dai‑ya mai kaniki hawa tohiya, Deoso ati dai nofawaha, dai atibodi korikasariyahi. Dai ene amosa dai‑ka hidi dai‑ya seekaneya, dai ya‑yainahi.

²²Mai mai hikanikamaro Deoso ati‑ya mai nofawaha, Deoso‑ka se‑seekana mai tohawahani. Mai mai hikanikaramaro Deoso ati‑ya mai nofawaha, Kirisito‑ka ka‑kanika mai tohawahani.

²³Kirisito ai manakone‑ya nanahabemari, dai‑ya mai kanikaramaro, dai‑ya mai kanikariyahi.

²⁴Oka soho dai toha, owati dai mitahi. Hibati‑ya Deoso dai‑ya haanemari, dai sowiri tati ataro‑ya mai wisinakosi hawa toha dai toha, dai sowiri tati ataro‑ya mai wisinakosara dai toha, dai‑ya mai kanikamaro dai toha, dai‑ya mai kanikara dai toha na, hini dai tohamaro, dai tohasa nahi.

²⁵Mai fanara mai tamine dai mitabone, oka yama hani‑bone dai kanahanoneni. Mai fanara mai tamine‑ya Yeso owa‑ya kamini awisare, mai tamine yama owato bide oha, tamine okanahanaboneni. Deoso owa‑ya kasome ene keyehe‑ya hiri·ora, owa dai watoneni.

²⁶Hibayata Deoso ati‑ya ai no‑nofa ai‑ya mai kaka, dai fanaramaro, dai fanariya, yama amosabone owatibodi ati nineni.

²⁷Dai fani hawa toha, dai wahawamariyahi. Dai honita naha, dai fanabone dai nokotoniriyahi.

²⁸Yetene dai toha, atona dai toha, dai na, dai honita naha, dai ati faniya, dai faniya, sibaraboneni. Deoso yawarebonane. Ai‑ya mai ka‑kako mai ihi, mai fana yati mai habi siitoni damabone owatibodi ati nofa, fara hiniya dai‑ya okasomabone, dai‑ya owati barirabone owati amani.

²⁹Yeso ati‑ya dai no‑nofa owati dai mitahi. Yeso koboni nahorebonane. Dai fana, dai‑ka yibote mai‑ya dai nokotoni ohaririyahi. Ai fanara‑nima dai nahi.

³⁰Dai ohina, ai ohira‑nima dai nahi. Dai ya‑yaina, ai ya‑yaira‑nima dai nahi. Yama dai kanika, yama dai nokotoniriyahi.

³¹Deoso ati‑ya mai nofara yama dama‑ya mai kihabone, yama‑ya mai nokotoniteni. Dai‑ta yama‑ya dai nokotoniriyahi. Bofe‑ka yama nafi ababoneni.

³²Dai korikasarabone owatibodi ati nofateni. Ai fanara Kirisito‑ka yama ai nokotoni ohariya, Kirisito ya‑yainebonane.

³³Ai fana yama fama‑ya ai nokotoniteni. Ai‑ka yibote, ai‑ka madehe, ai‑ka hidi ne ai nokotoni teni. Ai‑ka hidi atibodi‑ya ai ya‑yainihi, ai‑ka yibote, ai‑ka madehe na, mai‑ya ai ya‑yainihi naboneni.

³⁴Mai fanawi honita naha, mai‑ka Hidi i‑di Yeso Kirisito‑ya mai nokotoni ohare, mai aboni, mai atibodi na amosabone, Yeso ya‑yainebonane. Mai fanawi fana, yama fama‑ya mai nokotoniwaha, Yeso‑ya mai nokotonihi, mai‑ka yibote mai‑ya mai nokotonihi teni, mai‑ka yibote mai ya‑yainabonehe.

³⁵Dai‑ya owati barini awira, dai‑ya owati kasomabisineni. Dai‑ya onofa, dai narabo okamina, dai ene amosa, Yeso‑ya dai ya‑yainihebone ona, owati amani.

³⁶Tika yibote‑bone bo‑boterama naya, tiwati fama, fara tiwa‑ya ati fama na, mai one dai dakorarabone, dai famahi. Sibarini. Dai ene towe tohi awirini.

³⁷Tiwati fanara, fana‑ya tiwatibodi kadikarihi, fana‑ya tiwatibodi dakorarihi na, tifanariya, sibaraboneni. Deoso yawarebonane.

³⁸Ai ati fana, ai ati amosa, ai ati fanara, ai ati amosi ba‑basi nibisineni.

³⁹Mai fanawi fana, mai‑ka yibote abare, bare‑ya mai idiwahariyahi. Mai‑ka yibote abe, mai honita wahawama, mai fanamatasabone mai ati na, mai‑ka yibote‑bona Deoso ati‑ya nofeya, mai famamatasiya, sibaraboneni. Mai‑ka yibote‑bona Deoso ati‑ya nofareya, mai famariyahi.

⁴⁰Mai‑ka yibote abe, mai ati fanami nofara, mai ya‑yainibisabone owatibodi ati na, owatibodi ati‑nima Deoso‑ka Doni ati nemona owatibodi ati nineni.

¹Mai‑ka deoso wamane‑ka bani‑bona mai daahine, kabi tamine dai watobisamone dai‑ka yama hani ati na, yama‑ya dai watamone dai ati na, hini dai‑ya dai tonanafebone dai ati amani. Mai ai nofa, mai ai tonanafibisa, ai‑ya ai tonanafiterani.

²Yama‑ya mai watobisamone mai ati na, yama‑ya Deoso mai‑ya kanawatobona‑ya mai wato awisarini.

³Deoso ai nofe ai‑ya wato nafitene.

⁴“Mai‑ka deoso bare‑ka bani‑bona oda kabakaribana?” Dai‑ka yama hani ati nani.

Mai‑ka deoso hiniya wamane, deoso tohaterene. Deoso yokana oharibisatene.

⁵Bofe‑ya deoso mai‑mone mai mai wamahina, mai dama mai toha, neme bofe‑kaya madi mai dama mai toha, mai nineni.

⁶Bofe‑ka mai‑ka deoso mai dama, Deoso yokana ohari, ai‑ka Abi amane. Yama nafi‑ya Deoso wamanemata, fare ai kahiyarahi. Deoso Bidi yokana i‑di Yeso Kirisito ai‑ka Hidi yokana oharine. Yama nafi‑ya wamanemata ene ai hasinineni.

⁷Deoso oharibise‑ya ai one watora, deoso mai dama‑mone mai atibodi ati na, Bara mai‑ka deoso‑mona‑ka bani‑ya mai kaba, hini mai‑ya mai atibodi weeteni.

⁸Bani ai kabe ene Deoso ai‑ya nofi na‑nafi ni awirihi, ai‑ya nofi bi‑bidi ni awirihi, bani ai kabare ai‑ya nofi na‑nafi ni awirihi, ai‑ya nofi bi‑bidi ni awirihi nane.

⁹Dai noko wadahi. Dai‑ka soho yama‑ya wato bi‑bidi ne, dai ene‑ya aweya, atibodi hini‑ya weerayaho.

¹⁰Yama‑ya mai wato bi‑bidi na, yama dai wato ba‑basi na, mai noki‑ya deoso bare‑ka bani‑bona‑ya dai kaba, dai‑ya mai awiya, dai ene deoso bare‑ka bani‑ya mai kabamakeba awineni.

¹¹Dai ene deoso bare‑ka bani‑ya mai kabiya, mai atibodi hini mai‑ya weeni kitiya, mai ababa awineni. Kirisito mai‑ya nofe, mai manakone‑ya nanahabemata, dai ene mai abariyahi.

¹²Dai ene dai‑ka soho atibodi koma, dai ene Kirisito atibodi komahari tene. Fara dai ene amosarani.

¹³Oka soho mai‑ya osawe, mai taratokarabone, mai noki‑ya bani okobaterabone oteni.

¹Kirisito‑ka yo‑yose oharamone mai ati na, bare‑ka yo‑yose ohara, Kirisito‑ka yo‑yose ohabisani. Yeso kitame‑ya oawara‑mone mai ati na, Yeso kitame‑ya oawamaroni. Ai‑ka Hidi i‑di Yeso Kirisito ati dai‑ya okamina, owati ihi Yeso ati dai nofawahamaroni.

²Yeso‑ka yo‑yose oharamone mai ati na, Yeso‑ka yo‑yose oha, owa dai watobisineni. Yeso Kirisito owa‑ya yose, ati ene dai‑ya ohiyara, owati‑nima dai na, Yeso ati‑ya dai nofawahamaroni. Dai‑ya mai awiya, Yeso Kirisito‑ka yo‑yose oha, owa‑ya mai wataboneni.

³Yeso‑ka yo‑yose oharamone mai ati niya, dai tamine okaminateni.

⁴Mai‑ya okanawata mai tafe‑ya okoba, mai‑ka faha‑ya ofi ona, sibari awireni? Hehe, sibarineni.

⁵Yeso‑ka yo‑yose mai toha, Yeso sohori yokana mai toha, i‑di Bedoro mai na, tabora one‑kaya mai‑ka yibote mai eyehe mai tokiya, yama sibaramone dai ati namoneni.

Fara mai‑nima i‑di Banabe oda fama oda na, oda fana‑mani, oda‑ka yibote mai oda dabiya, yama sibari awirineni? Hehe, sibarineni.

⁶Mai one dai‑ya kanawata, yama one‑ya mai anira, dai ati sibarineni. I‑di Banabe oda fama dai‑ya oda kanawata, yama one‑ya oda aninaharebone dai ati na awineni. Yama one‑ya oda anira oda sibakarini? Hehe, oda sibarini.

⁷Sodado mai toha mai tafe manakone wadaterani. Yamata ai kama, kote ai kaba, manakone wadarihi, kaneiro mai ai nawada, mai yohari fahi ai fawa, manakone wadarihi teni.

⁸Hiniya owati yanani awirani. Deoso‑ka yama hani ati‑nima owati nineni.

⁹Bani mai tamine‑ya Deoso hiyarematane.

“Dai ati ene yama‑ya bani mai anina, mai iridi dai barikariyahi. Yama mai anihinaya, mai kabiya, mai sibaraboneni.” Deoso ati ne, ati‑ya Mose kanahanomatane.

Bani mai tamine tohi ohari awirini.

¹⁰Ai tamine‑ya hiyaraharimatane.

“Yamata‑ya mai kama, yamata yana, kote‑ya mai kayafa, yamata‑ya mai tiina, yamata kote‑ya mai kayafahari teni.” Ati nematane.

¹¹Deoso ati‑ya dai‑ya oda hiyara, dai‑ka yamata bide oda haana‑mani, sibakari nehe? Hehe, sibaraneni.

¹²Deoso ati‑ya mai kamina, mai manakone‑ya dai daateni. Deoso ati dai‑ya oda kamine, oda manakone wadakarini? Hehe, wadani. Oda fime, manakone oda haaramaroni.

“Manakone oda haaniya, Kirisito ati‑ya mai one mitamakiraba awineni.” Oda ati namaroni.

¹³Yama‑ya dai watokarini? Deoso sawi‑ke yobe‑ya yama‑ya mai a‑ani, Deoso‑ka yama kote‑ya mai kayafa, Deoso‑ka bani‑bona‑ya mai da‑daa, bani kote‑ya mai kabateni.

¹⁴Fara‑nima Deoso‑ka yinero kote‑ya Deoso ati‑ya mai ka‑kamina mai kayafatebone Deoso ati nematane.

¹⁵Owa‑ta, Deoso ati okamina, manakone haa·oterani. Owati‑ya dai‑ya manakone haa·orihi, yama hani‑ya dai‑ya manakone haa·orihi oneni. Fimi ihi o·aba‑mani, sibara neni. Deoso ati kamini manakone haa·ona‑mani, owati kasiro neni. Owa ene ya‑yai·oteni.

¹⁶Deoso ati okaminabisa, owa‑ya okahiyari awirini. Deoso owa‑ya yosemarine, Kirisito tamine okaminebonaha. Ati okamini awire‑mana, owa‑ya nakome nane.

¹⁷Deoso ati kamini‑ya owati nofa, ati okamine, owa manakone wadaboneni. Deoso ati kamini onofara‑mani, oka Hidi ati ene kaminanasa oneni.

¹⁸Hini yamata‑ya owa manakone tohibati? Yama manakone haa·ora ihi ya‑yai·ona, fara hini owa ya‑yainiya, owa manakone tohateni.

¹⁹Bofe‑ya oka hidi awire, owa manakone‑ya mai nanahabara, hiniya mai nafi‑ya na‑narifa ama·oni, Deoso ati‑ya mai nofawahabonehe.

²⁰Yodeo mai‑ya osawe, Yodeo mai‑nima oteni, Deoso ati‑ya mai nofawahabonehe. Mose ati owa‑ya barini awire, Mose ati‑ya mai tokadaba mai‑ya osawe, mai‑nima onihi oteni, Deoso ati‑ya mai nofawahabonehe.

²¹Mose ati‑ya mai tokadabara mai‑ya osawe, mai‑nima onihi, Deoso ati‑ya mai nofawahabonehe. Deoso ati‑nima onasa onihi, Yeso Kirisito ati‑nima onasa onihi, oteni.

²²Yama‑ya mai watora mai‑ya osawe, mai‑nima onihi ona, owati ihi Kirisito ati‑ya mai watowahaba awineni. Mai nafi‑ya osawe, mai‑nima onihi ona, owa‑ya mai nofiya, Kirisito ati‑ya mai nofawahaba awineni.

²³Kirisito Ati Amosabote‑ya mai mitiya, ati mai hinofebona ona, owati ihi Kirisito ati‑ya mai nofa, Kirisito owa‑ya kasomaharibonane.

²⁴Mai ibi kanakanabone mai nafi kanani toka, ohari koboni dai tohe, mai ati‑nima ne kanane, hini kanani manakone‑ya kayafebonane. Dai‑ta Deoso tabaro‑ya dai tokabone, Deoso ati dai tokadabiya, dai manakone amosa‑ya dai kayafaboneni.

²⁵Mai ibi kanakanabone mahi‑nima mai kanateni, mai kitabonehe. Mai atibodi yama‑ya dika,

“Hini yamata‑nima obati, owa kanani kitabonehe?” Mai atibodi ati teni.

Mai ibi kanakana mai koboni dai toha, mai tati‑ya awa afe dasini itareboneni. Yama dasini aba kanibote teni. Yama Deoso ai‑ya daahinabone abateraboneni.

²⁶Mai ibi kanakanabone mai kanana, mai koboni‑bone‑ka hawi boni tati‑ya mai kakatoma, mai‑nima Deoso tabaro‑ya okabone ona, Deoso tabaro koboni‑ya noko·oni ohariteni. Mai ibi koona yama honita‑ya mai koonisarabone mai ati teni. Mai‑nima owati yananiya, owati honita toharabone owatibodi ati teni.

²⁷Owatibodi ati‑nima owa abano ati riya, owa abano ati onofara, owatibodi ati‑ta okadababisa,

“Deoso ati dai tokadabahi.” Oteni.

Deoso ati okadabara‑mani, owa manakone okayahara neni.

¹Ai‑ka idi mai tamine dai watohi. Ai‑ka idi i‑di Mose‑ya mai nafi sawe, neme sabi‑ya Deoso mai‑ya yofikane, faha webote bai‑ya mai berenawaha, Deoso ati ene faha bai‑ya hawi tokoma, hokore‑ya mai yakanameteni.

²Faha webote bai‑ya mai yakana, mai neme‑kaya neme sabi kayana mai habanisa‑nima mai nawaha, Mose ati‑ya mai tokadababone mai ati nameteni.

³Tabora awiri‑ya mai yakana, Deoso ati ene neme‑kaya mai tafe‑bone sona, oni mana toha, farina boni‑nima na, fara‑ya mai nafi kabameteni.

⁴Tabora awiri‑ya mai yakana, Kirisito mai‑ya sawi ene yati‑ya mai‑ka faha‑bone tokafodaya, mai nafi fawameteni.

⁵Mai dami ihi amosara, mai ihi Deoso yawe, tabora awiri‑ya mai abameteni.

⁶Mai ihi‑nima ai ene rabone, mai tamine‑ya Mose kanahanomatane. Yama amosara‑ya mai atibodi kobonamete‑nima ai atibodi koboriyahi.

⁷Yama hiniya mai wamahina mai‑ka deoso‑mona mai ati na, fara‑ya mai nokotonihe. Mai yorotokana, mai‑ka deoso‑mona‑ya bani‑ya mai daa, mai tafa, kawi‑ya mai fawa, noko‑ya mai ibi siwakana namone Deoso‑ka yama hani ati na, mai‑nima ai riyahi.

⁸Mai fanawi one‑ya mai a‑aha mai ihi Deoso yawe, mahi ohari‑ya mai dama 23,000 mai toha, mai abawahameteni. Mai‑nima ai riyahi.

⁹10:9 Yodeo mai‑ya mai kadika 21:4-9Mahi‑nima Kirisito mai tafe‑bone‑ya daane, tefe bara‑ya mai kabara, i‑di Mose i‑di Kirisito ne‑ya mai weena, mai ati ihi Kirisito yawe, maka mai‑ya yose, maka mai mai kosehina, mai dama mai abamete, mai‑nima ai riyahi.

¹⁰Deoso ati‑ya mai nofara, Deoso‑ya mai weena, mai ihi Deoso‑ka yo‑yose kise, mai‑ya nanahabematane. Mai‑nima ai riyahi.

¹¹Deoso ai‑ya kanawatobona, ati ene mai tamine‑ya mai kanahanameteni, mai‑nima ai rabonehe. Yeso koboni nahorebonane.

¹²Yama‑ya dai watamone dai ati na, dai noko wadahi.

Dai noko wadariya, Satanasi dai‑ya keyehe‑ya hirikanebonane.

¹³Ai nafi‑ya Satanasi keyehetene. Tiwa‑ya keyehe‑nima mai‑ya keyehetene. Deoso hini ati‑nima ai‑ya kasomatene. Deoso ene ai kiti‑ya Satanasi ati fiyakiterene. Ati tikadabarebona, Deoso tiwa‑ya yofikane, Deoso ati tikadabiya, tiwa ene amosaboneni.

¹⁴Dai onofa, owati dai mitahi. Mai‑ka deoso bare dai kahiyarariyahi.

¹⁵Yama‑ya dai wa‑wato‑mone ona, owati dai kadikiya, yama owata dai watowahaboneni.

¹⁶Ai yorotokana, awa bono fahi ai fawa, baho ai ebekana, ai na, Yeso abe tamine ai hiyarateni. Awa bono fahi ai fawabone, Deoso‑ya ai hiyara, ai ene Yeso emene tokafodo tamine‑ya ai atibodi kadika, baho‑ya ai ebekanabone, Deoso‑ya ai hiyara, Yeso ai manakone‑ya nanahabemata tamine‑ya ai atibodi kadika teni.

¹⁷Hibati‑ya ai one bara toha, ai one bara toha namaro, Yeso ene ai hinama tohawaha, baho ohare‑ya ai ebekana ai nafi kaba, fara‑nima abano ohare kobobone ai nawahani.

¹⁸Isara·eo‑ka nodi mai toha Deoso‑ya mai kahiyarabone, bani‑ya mai daateni. Deoso‑ka bani kote‑bona‑ya mai sarikana, kote mai hikaba hine, Deoso eyehe bani‑ya mai kayafateni.

¹⁹Owati dai mitahi. Yama‑ya dai watowahaboneni. Mai‑ka deoso bare wadaterene. Mai‑ka deoso hiniya wamane‑ka bani‑bona mai daahineya, towe tonire, hika bani kote ai kabiya, ai‑ya nakomaterene.

²⁰Owati dai mitamatasahi. Mai‑ka deoso bare‑mona‑ka bani tohemona, madi mai‑ka bani tohabisane. Madi mai‑ya dai kahiyarariyahi. Madi mai eyehe bani‑ya dai kayafariyahi.

²¹Yeso emene‑nima awa bono fahi na‑ya dai fawa, Yeso abano‑nima baho na dai kaba na, makobote madi mai dai kahiyarariyahi. Madi mai‑ya dai kahiyara, Deoso‑ya dai kahiyaraterani.

²²Dai ene Yeso Kirisito yawarayaho. Kitabise, ai kitaterani.

²³Deoso ai ene‑ya barire, ai ene one mai‑ya kasomarihi, ai ene one mai‑ya ya‑yaini awirihi nani.

²⁴Tiwa ohare tiwa tinofariyahi. Mai nafi tinofabisiya, tiwa ene mai ya‑yainaboneni.

²⁵Bara mai‑ka bani dai kanike, dai kaba, sibarini. Mai‑ka deoso bare‑ka bani‑bona tamine dai miti awiriya, dai atibodi dai‑ya weeraboneni.

²⁶Deoso yama nafi‑ya wamane, ai tabaro‑bone‑ya wama, ai tefe‑bone‑ya wama, yama nafi‑ya wama nemata, Deoso‑ka yama ai kaba, sibarineni.

²⁷Deoso ati‑ya mai nofara mai marinabone, dai‑ya mai haana, mai tabori‑ya dai toki nofa, dai tokiya, bani tamine dai mitariya, dai kabaho, dai atibodi dai‑ya weerabonehe.

²⁸Mai one naha,

“Mai‑ka deoso bare‑ya bani‑ya daanene.” Ati ne,

ati dai mite, bani dai kabariyahi ati yanane, atibodi hini‑ya weerebonaha.

²⁹“Bani‑ya ai owa ati kabi nofare, hini yamata ihi owa‑ya ati barinati?” Dai ati na awineni.

Ai ene mai atibodi mai‑ya weeriyahi.

³⁰“Bani tamine Deoso‑ya ohiyara, bani okoba, hini yamata ihi owa‑ya mai weeniboneti?” Dai ati na awineni.

³¹Yama dai kaba, yama dai fawa na, dai ene Deoso‑ya mai kahiyarabisiya, yama sibaraboneni.

³²Yodeo mai toha, Kereko mai toha, Deoso‑ka mai toha na, dai ene‑ya mai awiya, Yeso hawine‑ya mai taratokariyahi.

³³Owa‑nima dai nahi. Mai nafi onofa, owa ene‑ya mai awiya, mai ya‑yainiya, Deoso ati‑ya mai nofawahaba awineni. Owa‑ya onofi bi‑bidi ona, mai‑ya onofi nafi neni.

¹Kirisito‑nima oteni. Owa‑nima dai niyahi.

²Owa ene‑maro dai wato, dai okanawata owati‑nima dai ene namaro, dai ene ya‑yai·oneni.

³Owati dai mitamakitasahi. I‑di Yeso Kirisito‑ka Hidi i‑di Deoso toha, mai makidi‑ka Hidi i‑di Yeso toha, mai fanawi‑ka hidi mai‑ka yibote mai toha teni.

⁴Mai makidi Deoso‑ya hiyara, Deoso ati‑ya mai kaminabone, mai tati bori‑ya mai sotatoteni. Mai tati bori‑ya mai sotatoni awiriya,

“Kirisito‑ya mai nofi awirini.” Mai one ati naboneni.

Mai tati bori‑ya mai sotatona, mai‑ya mai awiya,

“I‑di Yeso Kirisito mai‑ka hidi amane.” Mai ati naboneni.

⁵Mai fanawi Deoso‑ya hiyara, Deoso ati‑ya kamina mai na, mai tati bori awira,

“Hika yibote ati‑ya nofarani.” Mai one ati naboneni.

Mai tati bori awira, mai tati kone nafi aba‑nima mai nineni.

⁶Mai fanawi tati bori awirabone mai ati na, mai tati kone nafi abahi. Mai tati kone nafi aba, ati kasiramone mai ati na, mai tati bori‑ya mai sakonahi.

⁷Adaho‑ya Deoso wamanemata, Deoso‑nima ne‑ya wamanematane. Efa‑ya Deoso wamane, Adaho‑nima na‑ya wamanibisane. Deoso‑nima mai makidi na, Deoso ati‑ya mai kamina, mai tati‑ya mai barikariyahi. Makidi mai‑nima mai fanawi na, Deoso ati‑ya mai kaminabone, mai tati bori‑ya mai sakonibisahi.

⁸Mai fanawi awiriya, maki ohari‑ya Deoso wamane, maki fowari bodi tone fadi‑bone‑ya Deoso wamanamakimatane.

⁹Mai fanawi ihi maki‑ya Deoso wamani awirematane. Fana maki‑ya kasomabone‑ya Deoso wamanibisematane.

¹⁰Mai‑ka yibote mai‑ya mai kasomabone, mai tati bori‑ya mai sakonahi. Mai ihi Deoso‑ka yo‑yose mai hiawabonehe.

¹¹Mai fanawi awira‑mani, mai makidi awirihi, mai makidi awira‑mani, mai fanawi awirihi na neni.

¹²Hibati‑ya maki fowari bodi tone‑ya fana‑bone‑ya Deoso wamanematane. Hibayata maki‑bona fana dori‑ya foyatene. Mai fanawi awira‑mani, ai wadara neni. Deoso ene ai nafi toha, mai makidi, mai fanawi, ai nineni.

¹³Hini yamata‑nima dai atibodi ati niti? Deoso‑ya mai fanawi hiyarabone, mai tati bori‑ya mai sakonabone ona, mai tati bori‑ya mai sakokaribana?

¹⁴Mai makidi tati kone yaba‑ya ai nofaterani. Tabora nafi‑nima mai makidi tati kone yaba‑ya mai awa,

“Mai amosi awirini.” Mai ati teni.

¹⁵Mai fanawi‑ta tati kone yaba, mai amosateni. Mai tati kone yaba ihi mai ya‑yaiteni. Deoso ene mai fanawi tati kone yaboteni, mai tati bodi ai awarabonehe.

¹⁶Haa‑nima owati na dai nofara, hiniya dai ati yawa, owa hare owati tohi awira, mai tabori dami‑ya Deoso‑ya mai kahiyarabone, mai yorotokana, mai ati toha nineni.

¹⁷Dai yorotokana, Deoso tamine‑ya dai hiyarabone, dai ibi kasomi awira, dai ibi tokatowemone mai ati na, dai ene ya‑yai·oni awirani.

¹⁸Dai yorotokana, fara hinama dai tohabone Deoso ati ne. Dai‑ya dai ebenawahamone mai ati na, mai ati omitani.

¹⁹Dai yorotokana, dai one tamine‑ya dai hiyara,

“Yama‑ya mai wato awirini. Deoso oda‑ya kanawato, yama oda watobisineni.” Dai ati na,

Mai one ati‑ya mai nofarabone, dai ati‑ta‑ya mai nofabone dai atibodi nofateni.

²⁰Dai yorotokana, dai tafiya, ai‑ka Hidi i‑di Yeso Kirisito abe tamine‑ya dai kadikabone dai ati na, Kirisito ati‑nima dai ni awirini.

²¹Dai yorotokana, dai tafabone, dai one‑ya dai nimani awira,

“Ai tafi dai tohiya, mai tafi yotaboneni.” Dai ati na,

Dai tafi dai toha, yamata nafi‑ya dai tonasiya, mai yota, mai tafe‑bone wadara, mai fimi, dai one fino nafi‑ya fawa, fino‑ya mai tonasiya, fino ihi mai towe tohawaha, mai yota, mai‑ka fino‑bone wadara, mai baki hokoneni.

²²Yobe dai kihi awirini? Yobe dai kihani. Fare dai‑ka yobe‑ya dai tafa, fino dai fawa na, Deoso‑ka yobe‑ya dai toka, yama‑ya mai kihara, mai dai nimanahi, mai atibodi hini mai‑ya weerabonehe. Mai dai nimani awiramone mai ati na, dai ene amosara, dai ene ya‑yai·ona‑mani, dai ene ya‑yai·ora neni.

²³Hibati‑ya ai‑ka Hidi owa‑ya hiyare, dai‑ya ohiyaramakitasamaroni. Yama soki‑ya ai‑ka Ayo i‑di Yeso Yoda daahinebona, baho‑ya damane.

²⁴Baho tamine‑ya Deoso‑ya hiyare, hiyari hawa tohe, baho‑ya ebekane, mai‑ya baho‑ya daane,

“Owa abano‑nima baho nineni. Baho dai kaba, owa tamine dai kadikahi. Dai manakone onahababone o·ababoneni.” Yeso ati nane.

²⁵Mai tafi hawa toha, awa bono fahi‑ya damakane, Deoso‑ya hiyaramatase, mai‑ya hiyare,

“Owa emene tokafodabone, owati dai nofiya, Deoso dai‑ya kasomebona, hini tabaro‑ya dai‑ya towakamebonane. Dai yorotokana, awa bono fahi‑ya dai fawa, owa tamine dai kadikahi.” Yeso ati nane.

²⁶Yeso kobonami awisareya, Yeso abano‑nima baho na ai kaba, Yeso emene‑nima awa bono fahi na ai fawa na, Yeso emene tokafodo tamine‑ya ai kamina teni.

²⁷Yeso ati‑ya mai nofara Yeso abano‑nima baho na‑ya mai kaba, Yeso emene‑nima awa bono fahi na‑ya mai fawa na, mai ihi amosara, Yeso‑ya mai nanahaba mai‑nima mai naboneni.

²⁸Dai ene‑ya dai atibodi dai kadikahi. Dai ene one amosara‑ya Deoso‑ya dai kamina, dai kamini hawa tohiya, baho dai kaba, awa bono fahi‑ya dai fawa niya, dai sibaraboneni.

²⁹Yeso ati dai nofara Yeso abano‑nima baho na dai kaba, Yeso emene‑nima awa bono fahi na dai fawa na, dai ene dai aba naba awineni.

³⁰Dai one mai ihi amosara, mai tamine‑ya mai kaminara, Yeso abano‑nima baho na‑ya mai kaba, Yeso emene‑nima awa bono fahi na‑ya mai fawa, mai ihi dai one dama kiya, mai one aba nineni.

³¹Dai ene‑ya dai atibodi kadika, dai ene amosara tamine Deoso‑ya dai kaminiya, dai manakone amosara wadara neni.

³²Ai ene‑ya Deoso kadikeya, ai‑ka abi bofe‑ke ene‑nima ai‑ya wee, ai‑ya kosi neba awane, Satanasi‑ka mai ababone mai‑nima ai ni awirabonehe.

³³Dai yorotokana, dai tafabone, hini dai‑ya dai nokotoniriyahi. Dai one dai nimanahi.

³⁴Dai fime, dai‑ka yobe‑ya dai tafahi. Dai yorotokana, dai ene amosahi, Deoso dai‑ya nakomarayaho. Dai tabaro‑ya kobo·oniya, yama one tamine okaminaboneni.

¹Oka mai dai toha, yama‑ya Deoso‑ka Doni ai‑ya daane tamine dai watabone dai okanawataboneni.

²Hibati‑ya Bara dai toha, dai‑ya mai kanawata, mai ati‑nima dai namaro, mai‑ka deoso hiniya mai wamana, mai ati wadara, mai‑ya dai kahiyaramaroni.

³Deoso ati‑mona mai ati na, mai ati dai nofa kanibote riyahi. Mai ati dai mita, mai ati‑ya dai atibodi kadikiya, mai ati dai watowahaboneni. Yeso ati kasiro‑mona mai ati na, Deoso‑ka Doni ati tohi awire, madi mai ati tohabisineni.

“Yeso ati amose, ai‑ka Hidi amane.” Mai ati na,

Deoso‑ka Doni ati‑ya mai ati tohateni.

⁴Deoso‑ka Doni ohari yama dama‑ya ai‑ya daane, ai owa‑ya yama bara‑ya daa, ai owa‑ya yama bara‑ya daa tene.

⁵Ai‑ka yama anini damateni. Ai owa yama bara‑ya ani, ai owa yama bara‑ya ani ne, ai‑ka Hidi‑ta oharibisa tene.

⁶Deoso ati ene yama bara‑ya ai owa wato, yama bara‑ya ai owa wato tene. Deoso ati ene yama ai watoteni.

⁷Yama ai aninabone, Deoso‑ka Doni ai‑ya kanawatone, mai nafi ai kasomabonehe.

⁸Deoso‑ka Doni ene dai owa Deoso ati‑ya wato ba‑basi ne, dai owa Deoso ati kanawato‑ya wato tene.

⁹Deoso‑ka Doni ene Deoso ati‑ya dai owa nofi nafi, fare ene kite, Deoso‑ka Doni ene mai‑ya dai owa nakitama tene.

¹⁰Deoso‑ka Doni ene dai owa ene kitabote tohe, Deoso‑ka Doni ene dai owa Deoso ati‑ya mite, Deoso ati‑ya kaminatene. Deoso ati‑mona mai one ati na, Deoso‑ka Doni ene mai ati‑ya dai owa mite, Deoso ati tohe, Deoso ati tohare‑ya mai watowahaboneni. Deoso‑ka Doni ene mai one ati‑ya dai owa hiyare, Deoso‑ka Doni ene mai one ati‑ya dai owa dai ati‑ya dai‑ya kaminebonane.

¹¹Deoso‑ka Doni ohari, ene dame, ai‑ya yama‑ya ati daane, yama‑ya ai‑ya daatene.

¹²Ai abano ohare, ai kobobona‑ta damateni. Ai abano kobobona dama, ai abano ohare‑ya wamanineni. Fara ai abano‑nima Yeso Kirisito nane. Yeso ati‑ya ai no‑nofa ai dama, Yeso‑ka ai hinama tohawahani.

¹³Hibati‑ya Yodeo ai one toha, Kereko ai one toha, ai‑ya mai ka‑kanika ai one toha, ai‑ya mai kanikara ai one toha namaroni. Makobote Deoso‑ka Doni ene Yeso kobobone ai tohawaha, fara hinama ai‑ya Deoso‑ka Doni sawiwahane.

¹⁴Ai abano ohare‑ya ai kobobona damateni.

¹⁵Ai teme yawa‑mani,

“Ai yehe ama·ora, fara ai kobobona ama·ora, ama·oni.”

Ai teme ati na‑mani, ai kobobona tohi awiri neni? Ai kobobona tohasa neni.

¹⁶Ai narabo yawa‑mani,

“Ai nokobodi ama·ora, ai kobobona ama·ora ama·oni.”

Ai narabo ati na‑mani, ai kobobona tohi awiri neni? Ai kobobona tohasa neni.

¹⁷Ai kobobona, ai nokobodi hinama tohiya, mai ati ai mitara neni. Ai kobobona, ai narabo hinama tohiya, yama mahi ai hisira neni.

¹⁸Hibayata Deoso ene ai abano kobobona dama, hini ati‑nima ai abano kobobona teni.

¹⁹Ai kobobona hinama toha‑mani, ai abano wadara neni.

²⁰Deoso ati ene ai kobobona‑nima ai dami toha, ai abano ohari‑nima ai nawahani.

²¹Ai yehe‑ya ai noko kakora, ai yehe‑ya ai noko nofateni. Ai noko yama‑ya anira, ai yehe‑ta yama‑ya aniteni. Ai teme‑ya ai noko kakora, ai teme‑ya ai noko nofateni. Ai noko yakara, ai teme‑ta yakateni.

²²Ai abano bodi‑ka kobobona kitara wadara‑mani, ai aba neni.

²³Ai kobobona amosara‑ya mai awarabone, bora‑ya ai sakoteni. Ai kobobona amosi bi‑bidi na ai atoteni, ai amosabonehe.

²⁴Ai kobobona amosa ai katafaterani, mai hiawabonehe. Deoso ene ai kobobona one amosateni. Ai kobobona amosara ai katafateni.

²⁵Ai kobobona hinama‑ya ai nofa, ai kobobona amosara‑ya ai kakoterani.

²⁶Ai kobobona ohare koma, ai nafi‑ya nakomateni. Ai kobobona ohare‑ya mai kahiyara, ai abano nafi ya‑yaiteni.

²⁷Kirisito kobobone dame, Kirisito kobobone ai tohineni.

²⁸Yeso ati‑ya ai no‑nofa ai ibi kasomaboneni, ai nafi. Deoso ati ene Yeso‑ka yo‑yose ai one toha, Deoso ati‑ya mai ka‑kamina‑bone mai one toha, mai one‑ya mai ka‑kanawato‑bone mai one toha, mai one‑ya mai na‑nakitama‑bone mai one toha, mai ihi ki‑kita‑bone mai one toha, ai one‑ya mai ka‑kasoma‑bone mai one toha, mai one‑ya mai yo‑yofikana‑bone mai one toha, mai one ati‑ya mai hi‑hiyara‑bone mai one toha naboneni.

²⁹Yeso‑ka yo‑yose ai nafi toharihi, Deoso ati‑ya ai ka‑kamina ai nafi toharihi, mai‑ya ai ka‑kanawato ai nafi toharihi, mai ihi ki‑kita ai nafi toharihi, teni.

³⁰Mai‑ya ai na‑nakitama, ai nafi toharihi, mai one ati‑ya ai nafi hiyararihi, mai one ati‑ya ai owa hiri, ai ati‑ya ai nafi kamini awirihi teni.

³¹Deoso‑ka Doni yama daahina, one amosi ba‑basi na toha, one amosi bi‑bidi na toha teni. Yama amosi ba‑basi na Deoso‑ka Doni‑ya dai haanahi. Yama amosabote tamine okanahanowahaboneni.

¹Mai one ati dami‑ya owati yana, Deoso‑ka yo‑yose mai ati‑ya owati yana na, dai‑ya onofara‑mani, dai‑ya okasomara neni. Metaho‑ya mai ba‑baa mai moni‑nima owati tohaneni.

²Deoso‑ka Doni ene Deoso ati okaminiya, yama‑ya mai one watora, owa‑ta yama owatobisiya, Deoso ati onofi nafiya, owati ihi adami fawaniya, dai onofara‑mani, owati honita toha neni.

³Mai‑ka yamata wadara mai‑ya oka yamata nafi daa·ona, mai onofara‑mani, Deoso‑ya owa manakone wadara neni. Ai owa‑ya mai sarikanabone, owati ihi owa‑ya mai sarikibisa, ai owa onofara‑mani, Deoso‑ya owa manakone wadara neni.

⁴Mai ai nofa mai ai kasoma, mai‑ka yama ai kayafarihi, ai yawa kanibote rihi, ai‑ya ai tonanafirihi, ai teni.

⁵Mai ai nofa mai ai nayawarabone, mai ai nofa mai dai tohiya, ai yota, sibarini. Mai ai nofa ai ati‑nima mai ni awiriya, ai yawamara, mai tamine yama towe‑ya ai atibodi kadikaterani.

⁶Mai ai nofa mai ihi amosara, mai ihi ai ya‑yaira, ai ohiteni. Mai ihi amosa, mai ihi ai ya‑yainibisateni.

⁷Mai ai nofa mai ihi amosara, Deoso ene mai ihi amosawamabone ai atibodi ati teni.

“Owa ene amosawami nofani.” Mai ati na,

Mai ati ihi ai ya‑yaina, mai ihi amosawami awisara, mai ihi‑ta ai nofara, mai aboni‑ta ai nofabisateni.

⁸Deoso ai‑ya nofe, Deoso‑nima mai ai nofa, mai nofi ai fawateraboneni. Deoso ati‑ya mai ka‑kamina, Yeso kamataseya, mai ati fawanaboneni. Ai nafi Deoso ati‑ya ai watowahaboneni. Mai one ati‑ya mai hi‑hiyara mai ati fawanabone, ai nafi ati ohariwama naboneni. Hibayata yama‑ya mai one wato ba‑basi na, makobote yama nafi‑ya ai nafi watowahaboneni.

⁹Hibayata yama nafi ai watora, yama bide ai watobisa, Deoso ati nafi ai kamini awira, ati nafi ai wato awisarane.

¹⁰Ai‑ka wa‑wato bide fawanabone, ai‑ka wa‑wato nafiwahaboneni.

¹¹Madehe oha, madehe ati‑ya owati toha, madehe yama hiwata owato, madehe ihi‑nima owa ene nihi namaro, makobote onafiwaha, madehe‑nima onamaterani.

¹²Hibayata isibiyo towe‑ya ai awi‑nima Deoso‑ya ai awi re‑refona, makobote Deoso noko ai awawahaboneni. Hibayata owato bide oha, makobote Deoso owa‑ya wato‑nima yama owatowahaboneni.

¹³Hibayata Deoso ati ai nofa, ati‑nima yama nabone ai nimanasa nineni. Yeso kobonamebona, koboni ai nimana, koboneya, ai nimani fawanaboneni. Hibayata ai ibi nofa, makobote ai ibi nofi fawarabone, fara amosabisateni.

¹Mai dai nofahi. Deoso‑ka Doni‑ka da‑daa dai kayafabone, yama amosa mai‑ya kasomabone dai haa, Deoso ati dai kaminabone dai haa nahi.

²Mai one ati‑ya dai hiyara, mai ati‑ya dai watora, dai ati‑ya mai mita mai hiwatora, hini dai atibodi ati toha, dai atibodi ati‑ya Deoso watobisebonane.

³Deoso ati dai kamina dai ati‑ya mai mita, mai dai kasomaboneni. Dai ati ene yama‑ya Deoso nofe‑ya mai wata, ati‑nima mai ihi nabone, mai nofaboneni. Mai atibodi koma Deoso ati‑ya mai mita, mai atibodi kome fawanaboneni.

⁴Mai one ati‑ya dai hiyara, hini dai‑ya dai ya‑yainibisa, mai dai kasomi awiraboneni. Deoso ati‑ya dai kamina, Kirisito‑ka mai dai kasomaboneni.

⁵Mai one ati‑ya dai ati toha, dai sibarineni. Owatibodi ati nineni. Mai one ati‑ya tiwati yanani dai toha, makobote ai ati‑ya tiwati yananamatasiya, ai‑ya tikasomaba awineni. Deoso ati tikamine, ai nafi‑ya kasomatene.

⁶Dai tabaro‑ya okiya, mai one ati‑ya dai‑ya ohiyariya, owati‑ya dai watoriya, dai‑ya okasomaraboneni. Dai tabaro‑ya okiya, yama‑ya Deoso owa‑ya kanawato, dai ati‑ya dai okanawatomakiya, dai‑ya okasomabisaboneni.

⁷Kaida‑ya mai afo, araba‑ya mai deona, mai‑ka yama ati one nafi, ati one i‑isi na, ati ai mitiya, yama ai wataba awineni. Ati ohariya, yama ai watoraboneni.

⁸Ho‑hori sodado mai afohina, ati‑ya sodado mai one mita, ati mai hiwata, mai tokomakiteni, mai one‑ya mai taonabonehe. Ho‑hori afoni‑ya sodado watore, ho‑hori‑ya afoneya, sodado mai one tokomakiterani. Yama bara‑ya haane awane, mai ati niya, mai tokomakiterani.

⁹Mai one ati‑ya dai hiyariya, dai ati oda mitara, dai ati ababoneni.

¹⁰Mai one ati dama, hini mai ati‑ya mai watoteni.

¹¹Mai one ati‑ya mai hiyariya, mai ati owatora,

“Bara mai amani.” Owatibodi ati naboneni.

Owati yananiya, owati‑ya mai mitara,

“Bare amane.” Mai ati naboneni.

¹²Yama‑ya Deoso‑ka Doni dai‑ya daanebona dai nokotonihemone, Kirisito‑ka mai dai kasomabone dai nokotonihari nahi.

¹³Mai one ati‑ya dai ati yanana, mai ati dai watora, Deoso‑ya dai haana,

“Abi Deoso, mai one ati‑ya owati yanana, mai ati owatora, oda ati‑ya hini yamata‑nima owati niti? Owa‑ya tikaminiya, oda ati‑ya mai‑ya okaminamakeboneni.” Dai ati nahi.

¹⁴Mai one ati‑ya Deoso‑ya ohiyariya, owatibodi ati toha, owa‑ya kasomaraneni.

¹⁵Deoso‑ya ohiyariya, owati‑ya ohiyara, owatibodi hiyarahari teni. Deoso‑ka wayoma hiri·oniya, owati‑ya hiri·ona, owatibodi wayoma hirinahariteni.

¹⁶Mai one ati‑ya Deoso‑ya dai kahiyariya, dai ati‑ya mai watora, Deoso‑ya mai kahiyari awiraboneni. Ai ati‑ya Deoso‑ya dai kahiyariya, dai eyehe Deoso‑ya mai kahiyaraboneni.

¹⁷Mai one ati‑ya dai ati yanana, Deoso‑ya dai ati amosa awineni. Hiniya dai ati‑ya mai mita, dai ati‑ya mai watora, mai‑ya kasomi awiraboneni.

¹⁸Deoso‑ya ohiyara, mai one ati‑ya owati yanani dama, Deoso owati‑ya wato, ya‑yai·oteni. Dai‑ta mai one ati‑ya dai ati yanani damarani.

¹⁹Ai yorotokana, Deoso tamine dai‑ya ohiyara, dai ati‑ya owati 5‑ta toha, owati ihi Deoso‑ya dai nofi ba‑basi naba awineni. Mai one ati‑ya owati yanani 10,000 kana, dai‑ya kasomara, Deoso‑ya dai nofi ba‑basi ni awiraboneni.

²⁰Soho, madehe i‑isi na yama towe‑ya mai atibodi kadikaterani. Mai‑nima yama towe‑ya dai kadikariyahi. Madehe yama‑ya watora, mai‑nima dai riyahi. Ai hawa toha, yama‑ya wato‑nima yama dai watobisahi.

²¹Deoso ati‑ya mai kanahanamete, mai ati dai mitahi.

“Isara·eo‑ka hini mai ati‑ya mai‑ya ohiyara, owati‑ya mai tokadabaramaroni. Mai one ati‑ya mai‑ya ohiyaramakiya, owati‑ya mai nofi awiraboneni.” Deoso ati nematane.

²²Mai ati‑ya Deoso mai‑ya hiyari bahe, ati mai hinofareya, mai one ati‑ya mai‑ya hiyaramakimatane. Yeso ati ai nofa, Deoso ati mai ka‑kamina, ai ya‑yaiteni.

²³Kirisito‑ka dai toha, dai yorotokana, Deoso‑ya dai kahiyarabone, mai one ati‑ya dai ati yananiya, Deoso ati‑ya mai nofara, dai ati‑ya mai mita, dai ati‑ya mai watora,

“Ka‑kana mai amani.” Mai atibodi ati naboneni.

²⁴Ai ati‑ya Deoso ati‑ya dai kamina, Deoso ati‑ya mai watora mai koboniya, dai ati‑ya mai mitiya, mai ihi amosara mai atibodi hini mai‑ya weena,

“Ka! Owa ene amosara tamine‑ya mai wata awineni.” Mai ati naboneni.

²⁵Mai atibodi ati‑ya Deoso wato‑ya mai wata, mai moikanisa,

“Deoso dai‑ya sawine.” Mai ati nabone,

Deoso‑ya mai kahiyaraboneni.

²⁶Oka soho dai amani. Owati dai mitahi. Dai yorotokana, Deoso‑ya dai kahiyarabone, mai nafi dai kasomabone, Deoso‑ka wayoma‑ya dai owa wayome, dai‑ka wayoma mai‑ya kasomiya, sibarini. Deoso dai‑ya kanawato, mai dai kasomabone, mai dai kanawatohi. Mai one ati‑ya dai owa hiyare, hini dai ati‑ya dai owa mai‑ya kaminamakitaseya, mai‑ya kasome, sibarineni. Dai ati hinama mai‑ya kasomiya, dai sibarihi nineni.

²⁷Mai one ati‑ya dai hiyarabone dai damariyahi. Mai fama owa oharine sibara awineni. Mai fiyakariyahi. Mai oharirina mai hiyara, mai hawa tohiya, ai ati‑ya mai ati dai kaminamakitasahi.

²⁸Dai yorotokana, Deoso‑ya dai kahiyarabone, mai one ati‑ya dai ati yananakosabone dai ati na, mai one ati kamini‑ya dai owa watore, dai ati yananakosariyahi. Hini dai atibodi‑ya dai ati toha, dai atibodi ati dai wato, Deoso hiwato hineni.

²⁹Deoso ati‑ya mai mi‑mita mai kaminabone mai damariyahi. Mai fama owa oharineya, sibaraboneni. Mai ati dai mita, mai ati dai kadikiyahi.

³⁰Deoso ati‑ya dai owa hiyare, dai owa itari atibodi‑ya Deoso ati‑ya mite, Deoso ati‑ya kamine ati fawaneya, itari ati yanane, sibarineni.

³¹Deoso ati dai mita, dai oharirina Deoso ati dai kamina, dai ati‑ya mai nafi mitiya, yama‑ya mai watabone, mai ya‑yainaboneni.

³²Deoso ati‑ya mai ka‑kamina mai atibodi ati‑nima mai teni. Mai maakanabone mai atibodi ati na, mai maakana, mai ati yananabone mai atibodi ati na, mai ati yanateni.

³³Deoso yama amosa‑ya nofatene. Dai dami ati yananiya, dai ati amosi awirini. Deoso‑ya mai kahiyarabone, mai ati ohaririteni.

³⁴Deoso‑ka yobe‑ya dai yorotokaniya, mai fanawi ati yanariyahi. Mai‑ka yibote ati‑ya mai tokadaba, fara‑nima Mose ati nane.

³⁵Mai fanawi yama‑ya watabone, tabora‑ya mai‑ka yibote mai‑ya mai hiyarahi. Deoso‑ka yobe‑ya mai ati yanariyahi.

³⁶Korito‑ya dai wi‑wina dai‑ya Deoso hiyari oharibisemona dai atibodi ati na awineni. Deoso‑ka mai nafi‑ya Deoso hiyarane. Deoso‑ka mai one Deoso ati‑ya mai watoramone dai atibodi ati na, Deoso‑ka mai one Deoso ati‑ya watoharineni.

³⁷Deoso ati‑ya dai mi‑mita dai toha, Deoso ati dai wato na, Deoso ati okamine dai watoneni.

³⁸Deoso ati okamine‑ya mai watora‑mani, hiniya yama‑ya mai watora neni.

³⁹Oka soho dai amani, owati dai mitahi. Deoso‑ka Doni ene Deoso ati dai kaminabone dai nokotonihi. Deoso‑ka Doni ene mai one ati‑ya dai owa hiyareya, dai ati baririyahi.

⁴⁰Dai ene amosiyahi. Dai owa hiyari hawa toheya, dai ati yananiya, yama amosaboneni.

¹Oka soho dai amani, owati dai mitamatasahi. Hibati‑ya Deoso Ati Amosabote dai‑ya okamine, ati dai nofemari, ati‑nima dai teni.

²Deoso Ati Amosabote ati dai nofa, Deoso tabaro‑ya dai winaboneni. Deoso Ati Amosabote‑ya mai atibodi nofara, hiniya mai ati hinofabise, Deoso tabaro‑ya mai winateraboneni.

³Yeso Kirisito yama owa‑ya hikaminamaro, dai‑ya okaminamakitasineni.

“Kirisito abe, ai manakone‑ya nanahabematane.” Deoso‑ka yama hani ati na,

fara dai‑ya okaminamaroni.

⁴“Yeso abe, mai hikame, amoni fama, amoni ohari ne‑ya Deoso hinakitamane.” Deoso‑ka yama hani ati nineni.

⁵Yeso kitame, i‑di Bedoro‑kaya tokomakiya, i‑di Bedoro awi bahe, makobote Yeso‑ya mai da‑daba mai 12 toha, Yeso kitame‑ya mai awamakitasa nameteni.

⁶Makobote 500 mai fiyakana, Deoso ati‑ya mai no‑nofa mai yorotokana, Yeso kitame‑ya mai awameteni. 500 mai fiyakana, mai dama mai hasina, mai fa‑famaraba na‑ta mai abineni.

⁷Makobote i‑di Tiyako hiawamatasane, nowati‑ya Yeso‑ka yo‑yose mai nafi hiawawahane.

⁸Makobote amoni dameya, oawane. Yeso bofe‑ya wineya, oawaterene. Neme‑ya toki hawa toheya, oawawahemarine.

⁹Yeso‑ka yo‑yose mai one amosabisa, owa‑ta towe ama·oni. Hibati‑ya Yeso ati‑ya mai no‑nofa mai‑ya bisi·onamaroni. Owa ene‑maro Deoso owa‑ya yosere‑mana, sibare nane. Owa‑ya yosemarine.

¹⁰Deoso owa‑ya kasomi nafi, owa‑ya yosemarine, Yeso ati okaminabonehe. Deoso owa‑ya kasome ene honita tohare, owa‑ya kasomi nafi ene mai dami‑ya Yeso ati okaminabisa, mai one ihi‑ya owa ene fiyakanineni. Owa ene yokana tohara, Deoso owa‑ya kasome ene tohabisane.

¹¹“Yeso Kirisito abe, kitamematane.” Yeso‑ka yo‑yose mai one ati toha,

fara owati toha na, oda ati dai mita, oda ati dai nofamaroni.

¹²Yeso Kirisito abe, Deoso hinakitame tamine oda kaminamaro, hini yamata ihi ai aba, ai kitamaterabone dai one ati niti?

¹³Ai kitamaterabone‑mani, Yeso kitami awire nane.

¹⁴Yeso kitami awire‑mana, oda ati honita toha neni. Yeso kitamare‑mana, ati dai nofe dai‑ya kasomare nane.

¹⁵Ai kitamatera‑mani, Deoso tamine‑ya keyehe oda hirina neni. Yeso‑ya Deoso nakitame oda ati na, ai kitamara‑mani, Yeso kitamare nane.

¹⁶Ai‑ya Deoso nakitami awirebona‑mana, Yeso‑ya nakitamare namatane.

¹⁷Yeso kitami awire‑mana, dai manakone‑ya nanahabare nane. Yeso kitami awire‑mana, dai manakone towe wadasa na, dai abiya, madi mai tabori‑ya dai ohina neni.

¹⁸Yeso kitami awire‑mana, Kirisito ati‑ya mai nofamete mai aba, Deoso tabaro‑ya mai winara neni.

¹⁹“Bofe‑ya ai wina ai‑ya Deoso kasomi oharine.” Dai owa ati ne,

Ai‑ya nakitamarebona‑mana, Deoso ati ai tokadaba ai manakone wadara neni. Ai‑ya mai bisi, ai‑ya mai kosi, ai‑ya mai nanahaba na, ai manakone honita tohaneni. Deoso ati‑ya mai nofara mai‑ya mai bisirihi, mai‑ya mai kosirihi mai‑ya mai nanahabarihi na, mai kome bi‑bidi ai komene ba‑basi nineni.

²⁰Yeso abe, kitami dai tohe, nowati‑ya mai aba mai kitamaboneni.

²¹Ai‑ka idi i‑di Adaho ene ai aba, Yeso ene ai kitama, ai naboneni.

²²Ai‑ka idi i‑di Adaho ene ai abano ababoneni, ai nafi. Ai‑ka Ayo i‑di Yeso Kirisito ati ai nofa, ai kitamaboneni, ai nafi.

²³Yeso Kirisito abano kitami dai tohemata, Yeso‑ka ai tohawaha, Yeso kamataseya, ai abano kitamamakitasaboneni.

²⁴Yeso kameya, neme‑ya mai wi‑wina mai toha, bofe‑ya mai wi‑wina mai toha, bai‑ya mai wi‑wina mai toha na, Deoso ati‑ya mai nofara, wara hirini‑ya Yeso mai‑ya weretowitibonane. Makobote yama hasina‑ya Badi i‑di Deoso‑ya daaneya, yama nafi hawa tohawahaboneni.

²⁵Hibayata Yeso Kirisito ai‑ka hidi tohe, mai dama Yeso Kirisito‑ya mai kakonasa nineni. Makobote Yeso Kirisito‑ya mai ka‑kako‑maro, Deoso ene Yeso noko‑kaya mai moikanisabone,

“Yeso kitabote tohane.” Mai ati nawahaboneni.

²⁶Yeso kamataseya, ai abamarihi, yama one abamarihi, yama ai‑ya ka‑kako wadamarihi, teboneni.

²⁷Deoso ene ai nafi‑ka Hidi i‑di Yeso Kirisito tohe, Deoso‑ka Hidi‑ta wadaterene. Deoso ene Yeso Kirisito yama nafi‑ka Hidi tohene.

²⁸Yama nafi‑ka Hidi Yeso Kirisito toheya, Yama nafi‑ya daanebonane, Deoso‑ya.

“Abi, tiwati‑nima oda nafi naboneni.” Yeso ati nebonane.

Yama nafi‑ka hidi i‑di Deoso tohebonane.

²⁹“Mai aba, mai kitamateraboneni.” Dai one ati nihi,

“Oka mai habanisara mai abamaro, mai ihi owa dai habanirisahi, oka mai habanisa‑nima mai nawahabonehe.” Dai one ati nihi namoneni.

Mai abamaro mai kitamarabone dai ati na, hini yamata‑bone dai‑ya mai habanirisiti?

³⁰Ai kitamarabone owatibodi ati na‑mani, ai kitami tamine‑ya ohiyarara neni. Ai kitami tamine‑ya ohiyarariya, owa‑ya mai kakorihi, owa‑ya mai ati nanahabarihi neni. Ai kitamaboneni.

³¹Oka soho dai toha, ai‑ka ayo Yeso Kirisito ene dai onofi nafe, yama‑ya dai wato awisa ra awineni. Ai kitamaboneni. Mahi‑nima owa‑ya mai ati nanahabateni.

³²Ai aba, ai kitamarabone‑mani, Deoso‑ka yama ai nokotonira neni. Ai kitamabone, Deoso‑ka yama ai nokotonihe, ai aba nowati‑ya manakone ai kayafaboneni. Efesiyo‑ya Deoso‑ka yama noko·onihe, yama‑ka bani mai hama‑nima Efesiyo‑ka mai hama mai na, owa‑ya mai nanahabi yanatoneni. Okitamarabone‑mani, owa manakone wadara neni. Ai kitamarabone‑mani, hiniya ai tafa, faha ai fawa, ai aba niya, ai wadamara neni.

³³Dai noko wadahi. Mai ihi amosara mai‑ya dai daba, dai ene amosaraboneni.

³⁴Dai amona‑nima dai na, dai dodafiya, dai atibodi dai kadikahi, dai ene amosabonehe. Mai one yama‑ya mai wa‑wato‑mone mai ati na, Deoso‑ya mai nofara dai‑ya keyehe‑ya mai hirikanateni, dai ene amosarabonehe. Yama dai watabone ona, yama dai watora awineni.

³⁵“Ai aba, ai kitama, hini yamata‑nima ai noko nibati?” Dai ati na awineni.

³⁶Yama‑ya dai wato awineni? Awa bono noki ai kama, moone, ade yanateni. Awa bono noki aba‑nima ni awiriya, yanaterani.

³⁷Awa bono noki ai kama, awa aboni ai kamara, noki‑ta ai kamateni. Noki awi‑nima ade awiterani.

³⁸Deoso ene ayawa noki ai kama, ayawa ade yanabisa teni. Yama bara yanaterani. Kimi noko ai kama, kimi ade yana tene. Yama bara yanaterani.

³⁹Yama dama fara nafi tohaterani. Ai eme bara toha, bani mai ime bara toha, bani mai afe wada mai ime bara toha, aba mai ime bara toha teni.

⁴⁰Neme‑ya mai wi‑wina mai aboni bara toha, bofe‑ya ai wi‑wina ai abano bara toha, ai teni. Neme‑ya mai wi‑wina mai amosa, bofe‑ya ai wi‑wina ai amosa, hiniya neme‑ya mai wi‑wina mai amosi bara toha, bofe‑ya ai wi‑wina ai amosi bara toha, ai teni.

⁴¹Mahi noko amosa, abariko noko amosa ne, mahi noko‑nima abariko noko terene. Amowa mai noki amosa, mai noki‑nima mahi noko ni awire, abariko noko‑nima amowa nokoni awirene, amowa owa bare toha, owa bare toha tene.

⁴²Deoso ai‑ya nakitameya, ai bara tohawahaboneni. Ai aba, ai abano batateni. Ai kitamiya, ai abamarihi, ai batamarihi teboneni.

⁴³Ai aba, ai abano amosaterani. Ai abano kitara, Deoso ai‑ya nakitameya, ai amosa, ai kitawahaboneni.

⁴⁴Atabo‑ya ai abano wamani toha, Deoso ai‑ya nakitameya, neme‑ya mai wi‑wina mai aboni‑nima ai abano nawahaboneni. Bofe‑ya ai wi‑wina atabo‑ya ai abano wamani toha, neme‑ya mai wi‑wina yama bara‑ya mai aboni wamani toha nineni.

⁴⁵Hibati‑ya ai‑ka idi‑bona i‑di Adaho tamine‑ya Deoso hiyare,

“I‑di Adaho atabo‑ya wama·one, ai tohawahane.” Deoso‑ka yama hani ati nineni.

I‑di Adaho yoto‑ke Kirisito tohe, ai abano yati‑ya daanebonane.

⁴⁶Neme‑ke abano ai kayafi dai tohara, bofe‑ke abano ai kayafi baha, bofe‑ke abano abeya, neme‑ke abano ai kayafawahaboneni.

⁴⁷I‑di Adaho bofe‑ke atabo‑ya Deoso wamahine, Adaho owa i‑di Yeso Kirisito neme‑ke amane.

⁴⁸Bofe‑ya ai wi‑wina Adaho abano‑nima ai abano na, neme‑ya ai winiya, Kirisito abano‑nima ai abano nawahaboneni.

⁴⁹Hibayata i‑di Adaho abano‑nima ai abano na, makobote i‑di Yeso Kirisito abano‑nima ai abano nawahaboneni.

⁵⁰Soho, dai okanawatabone, owati dai mitahi. Bofe‑ke abano ai weyeniya, neme‑ya ai tokaraboneni. Bofe‑ke abano fawaneya, neme‑ke abano ai weyeniya, neme‑ya ai tokaboneni. Neme‑ke Hidi Deoso tohe, yama ababone neme‑ya koboteraboneni. Ai abano neme‑ke abaterebonane.

⁵¹Ai nafi abaraboneni. Ai one aba, ai one hasi na, ai nafi tohiyaboneni. Deoso ati ene ai tohiya, neme‑ke abano ai weyenaboneni. Ai tohiyabone, hibati‑ya tamine mai himitara, hibayata tamine ai mitawahineni.

⁵²Neme‑ke abano sakoni nahorebonane. Ai noko ataro yebekana‑nima neme‑ke abano ai sakone, sakoni nahoterebonane. Deoso‑ka ho‑hori ati yananiya, mai abamete mai kitamiya, mai abamateraboneni. Ai hasina, neme‑ke abano ai sakonaboneni.

⁵³Ai hasina, neme‑ke abano ai sakona, neme‑ke abano abaterebonane.

⁵⁴Ai abano bote fawaniya, ai abano yati ai sakonawaha, Deoso ati‑mata‑nima yama nawahaboneni.

“Ai abamaterabone, Deoso tabaro‑ya ai wini ohareboneni.

⁵⁵Ai abamaterabone ene ai aba tamine ai kadikamarabone, mai ababone mai korikasa mai‑nima ai korikasaraboneni.” Deoso‑ka yama hani ati nineni.

⁵⁶Hibayata Deoso ati hinama mai tokadabariya, mai ihi amosara manakone ababone, fara mai korikasateni.

⁵⁷Deoso‑ya ai kahiyarahi. Deoso ene ai‑ka Ayo Yeso Kirisito ai manakone‑ya nanahabane, ai abarabonehe.

⁵⁸Oka dai amani, owati dai mitahi. Dai eme kitahi. Ai‑ka Hidi ati‑nima dai nabone, dai‑ya mai we‑wee, mai ati dai nokotoniriyahi. Ai‑ka Hidi ati‑nima dai niya, dai manakone amosa wadaboneni.

¹“Yodeya‑ya mai wi‑wina, Deoso ati‑ya mai no‑nofa mai‑ka yinero‑bona oda yorotokaniheboneni.” Dai‑ka yama hani ati na.

Fara dai‑ka yama hani ati‑nima dai nahi. Karatiya‑ya mai wi‑wina mai oyosehare, mai‑ka yinero‑bona‑ya mai yorotokanaharebonehe.

²Domiko‑ya dai yorotokana, dai‑ka yinero kote dai nawitahi, Yodeya‑ya mai wi‑wina mai‑ka yinero‑bonaha. Dai‑ka yinero dame, yinero ba‑basi ne dai daa, dai‑ka yinero damare, yinero bidi dai daa nahi. Yinero dai nawiti hawa tohiya, kobo·oniya, yinero‑ya dai sibani awirabone, yinero hawa tohebonane.

³Kobo·oniya, dai‑ka mai one Yerosare‑ya yinero‑ya mai towakamabone, mai ai yoseboneni. Mai‑ka yama hani‑bone okanahano oniya, Yerosare‑ya mai koboniya, oka yama hani‑ya mai kadikiya, dai‑ka mai one‑ya mai watowahaboneni.

⁴Yerosare‑ya dai‑ka mai one yinero‑ya towakamiya, mai‑ya osawebone dai ati niya, osaweboneni.

⁵Masedoni‑kaya oki bahiya, mai tabori‑ya owiniya, owa amoni fa‑famaraba niya, dai tabaro‑ya okomakebani.

⁶Dai tabaro‑ya owiniya, owa amoni ba‑basi naba awineni. Abariko fama abariko ohari ne‑ya dai tabaro‑ya owinaba awineni. Makobote mai tabori one‑kaya owa‑ya dai yoseba awineni.

⁷Hibayata dai‑ya oawi awiraboneni. Makobote Deoso ati sibareya, dai tabaro‑ya okiya, dai tabaro‑ya owa wini ba‑basi nabone owatibodi ati nineni.

⁸Hibayata Efesiyo‑ya owina, makobote Benekosi marina hawa tohiya, yana·onaboneni.

⁹Hibayata owatibodi ati toki nofarani. Deoso ene owati‑ya mai dami mitawaha, Satanasi ene owa‑ya mai one kakona, owa‑ya mai ati nanahabineni.

¹⁰I‑di Timoti dai tabaro‑ya koboneya, dai ati ene habo siitorayaho. Deoso‑ka yama ani·ona‑nima i‑di Timoti anitene.

¹¹Owa‑nima i‑di Timoti ne, dai ati yasiriyahi. Dai tabaro‑ya koboneya, dai kasomayaho. I‑di Timoti mai eyehe owa‑ya dai yosema kanibote nayaho. I‑di Timoti mai‑nima onaboneni.

¹²I‑di Aboro haa·ona, i‑di Timoti mai eyehe dai tabaro‑ya tokebona, hibayata dai tabaro‑ya ati toki nofare, makobote hika yama nafi hawa tohiya, tokawahebona ati nene.

¹³Dai noko wadahi. Yeso tamine‑ya keyehe‑ya mai hirinabone, Yeso ati‑ya dai nofahi. Dai‑ya mai we‑wee, dai eme kita, dai habo siitoriyahi.

¹⁴Dai ibi nofa, dai ibi nofi fawariyahi.

¹⁵I‑di Tefanasi hika mai eyehe dai watoneni. Akaiya‑ya dai wi‑wina‑ya i‑di Tefanasi hika mai eyehe Deoso ati‑ya mai nofi baha, i‑di Tefanasi nowati‑ya Deoso ati‑ya dai owa nofamaki, Deoso ati‑ya dai no‑nofa, Tefanasi dai‑ya mai kasomateni.

¹⁶I‑di Tefanasi mai ati dai nofiyahi. Oda ene‑nima i‑di Tefanasi mai ihi na, mai ihi‑nima ai owa ene ne, mai ati dai nofa nahi.

¹⁷Yama yaki‑ya dai wina, dai‑ya owatibodi foya, dai‑ka mai one i‑di Tefanasi i‑di Fotonato, i‑di Akiyako mai na, mai kobona, mai‑ya owa ya‑yai·oneni. Owa‑ya mai kasomi ba‑basi neni.

¹⁸Dai tabaro‑ya mai wi‑wina mai ihi dai ya‑yainamone, ya‑yai·onaharineni. I‑di Tefanasi‑nima mai na, mai ati dai tokadabiyahi, mai ihi amosaro.

¹⁹Asiya‑ya mai wi‑wina, Deoso ati‑ya mai no‑nofa dai‑ya mai ati foya, i‑di Akira fadi i‑di Birisira‑ya fame dai‑ya mai ati foyahari nineni. Akira tabaro‑ya mai yorotokana, Deoso‑ya mai hiyara, dai tamine‑ya mai hiyarineni.

²⁰Ahi‑ya mai wi‑wina, Deoso ati‑ya mai no‑nofa dai‑ya mai nofa, dai‑ya mai tamine okaminabone mai ati nineni. Dai ibi kobona, dai‑ka ayo dai kobona‑nima dai one‑ya dai kobona, dai nahi.

²¹Baoro ama·oni. Owa yehe‑ya yama okanahana, dai‑ya owati foyineni.

²²Ai‑ka Hidi ati‑ya mai nofara, Deoso mai‑ya nakomebonane.

“Yeso, oda‑ka Hidi amatini. Kama kanibote tinahi.” Oteni.

²³Yeso Kirisito dai‑ya kasome oteni.

²⁴Yeso Kirisito‑ka dai toha, dai onofi nafini. Feye amani.