QꞌU KAM IBꞌAXABꞌSA IKꞌUCHAXU TIOXH TU U XHAN (Apocalipsis)
Yol tiꞌ u uꞌ tzaꞌ
Aꞌ tzꞌibꞌan u uꞌ tzaꞌ u Xhan vaꞌl chusulibꞌich kꞌatz u Jesuus. Aꞌ itzꞌibꞌav kꞌasuꞌl tu u txꞌavaꞌ Patmos; maꞌl u txꞌavaꞌ nikꞌa aꞌ, vaꞌl txaypinajichku tu u yaꞌbꞌ 93 — 95 m.t.J.
Aꞌ itzꞌibꞌav bꞌen xeꞌ juj tanul qꞌu niman tetz u Jesuus tu Aasia. Ayaꞌ qꞌuꞌl tzaꞌ: u Eefeso, u Esmirna, u Peergamo, u Tiatira, u Sardis, u Filadeelfia, u Laodicea.
Aatz u yol “Apocalipsis”, aꞌ nikꞌaskuꞌl tiꞌ u yolbꞌal griego utz, “Revelación” chu u tokebꞌal tu kastiya. Qꞌu Kam Ibꞌaxabꞌsa Ikꞌuchax U Tioxh, chu tu kuyolbꞌal. Ikꞌuchax maꞌj kam aas yeꞌ naꞌl; taqꞌax eluꞌl maꞌj kam vatzsaj aas yeꞌ ootzajimal.
Aatz u Xhan tziꞌ, aꞌ maꞌl tu qꞌu chusulibꞌ vaꞌl tiira tiich chit u Jesuus tiꞌ. Sibꞌal kam til kꞌatz u Jesuus aas aal yeꞌt til unjot qꞌu chusulibꞌ. Antich xoꞌl oxvaꞌl qꞌuꞌl ilon qꞌaav titzꞌpu vimeꞌal u Jairo. Choktaj U Kuxh 5.37. Antich xoꞌl qꞌuꞌl ilon ijalpixsat tibꞌ u Jesuus vaꞌl nital U Tio 17.1. Antich xoꞌl qꞌuꞌl bꞌen tiꞌ u Jesuus aas ex iqꞌila isikꞌle Tioxh, aꞌ chit siꞌchtexhtxaypi. Choktaj U Xhan 13.23. Antu paj atich opon tu vaꞌl aqꞌlik jeꞌ u Jesuus vatz kurus. Utz tabꞌnaka vinan u Jesuus te. Ech nital U Xhan 18.15; 19.27. Aꞌ vaꞌl tꞌasp ibꞌen tuchꞌ u Luꞌ tu u mujbꞌal tetz u Jesuus taꞌxh tabꞌi aas qꞌaav itzꞌpia. Ech nital U Xhan 20.1-10.
Aꞌ u jatxbꞌal tibꞌ qꞌu yol tu u uꞌ tzaꞌ.
Oxvaꞌl elnaj tu qꞌu kam qꞌuꞌl kꞌuchax tu u Xhan. Nital u 1.19 aas alax tu u Xhan: —Pek tzꞌibꞌa qꞌu kam vetiilluka, qꞌu kam niil cheel tzaꞌ utz, tuchꞌ qꞌu kam qꞌuꞌl siil tiꞌ qꞌu kam tzaꞌ.— Texh teꞌleꞌ.
I) 1.10-18 Aꞌ nital qꞌu kam qꞌuꞌl maꞌtich tiltuka u Xhan.
II) 1.19—3.22 Aꞌ qꞌu kam nichtileꞌ, qꞌuꞌl; “Niil cheel tzaꞌ.” Texh u aanjel te.
III) 4.1—22.5 Aꞌ qꞌu kam til tiꞌ qꞌu kam tziꞌ, ayaꞌ qꞌuꞌl: “…siil tiꞌ qꞌu kam tzaꞌ.” Texh u aanjel te.
Atil 14 jatxbꞌal tibꞌ u uꞌ tzaꞌ.
1) 1.1-8 Ech ixeꞌt qꞌu yol tu u uꞌ iꞌan u Xhan tzaꞌ.
2) 1.9-20 Nital vikꞌuchtu u tijleꞌm u Jesuus xoꞌl qꞌu niman tetz.
3) Kꞌujul 2 tuchꞌ u 3 Nital tiꞌ kam bꞌanel tu u tatin qꞌu niman tetz Jesuus vatz u Tioxh tu u tiempo tziꞌ.
4) Kꞌujul 4 tuchꞌ u 5 Nitaleꞌ aas nitoksal iqꞌii u Jesuus tu qꞌu nachol tetz tu Amlika.
5) 6.1—8.1 Nitaleꞌ kam qꞌu kam uchi aas teesa junun qꞌu sello u Jesuus.
6) 8.2—11.19 Nitaleꞌ kam junun qꞌu choobꞌal paav kuꞌi aas oqꞌ jujvaꞌl qꞌu trompeta.
7) Kꞌujul 12 Nitaleꞌ kam uch tiꞌ u ixoj Israeel vaꞌl itzꞌpu tal titzꞌin.
8) Kꞌujul 13 Nital tiꞌ qꞌu xaꞌebꞌalla txokop.
9) Kꞌujul 14 Nital tiꞌ u 144,000 aanima; tiꞌ qꞌu aanjel qꞌuꞌl nitoksa iqꞌii u Tioxh utz, tuchꞌ tiꞌ u choobꞌal paav vaꞌl aꞌ nikꞌam tiꞌ vichokax qꞌu triigo tuchꞌ qꞌu uuva.
10) Kꞌujul 15 tuchꞌ u 16 Nital tiꞌ jujvaꞌl qꞌu koopa tetz vikꞌaꞌnal u Tioxh qꞌuꞌl kuꞌi.
11) Kꞌujul 17 tuchꞌ u 18 Nital tiꞌ visotz u mam tenam Babiloonia.
12) Kꞌujul 19 tuchꞌ u 20 Nital tiꞌ u txuqꞌtxunchil tiꞌ visotz qꞌu yeꞌxtxojla chaj txumbꞌal utz, tiꞌ vixeꞌt vibꞌantu u tijleꞌm u Jesuus tu u vatz amlika txꞌavaꞌ tu 1,000 yaꞌbꞌ.
13) 21.1—22.5 Nital tiꞌ u tenam Jerusaleen vaꞌl kuꞌl tu Amlika.
14) 22.6-21 Tu tek itzojpebꞌal, nitꞌoyon u Jesuus utz, nitaqꞌ nimal ikꞌuꞌl qꞌu niman tetz.
1QꞌU KAM IBꞌAXABꞌSA IKꞌUCHAXU TIOXH TU U XHAN (Apocalipsis)
Viqꞌilal qꞌu sikꞌlen tetz u uꞌ tzaꞌ
1 Aꞌ qꞌu kam ikꞌuch u Tioxh tu u Jesucristo tzaꞌ, qꞌuꞌl saꞌtexhuchi. Ech satootzaji qꞌu niman tetz. Aatz u talax iꞌan u Jesuus, aꞌ ichaj maꞌl u aanjel xeꞌ u Xhan, u taqꞌonom, ul tal te. 2 Tan aatz u Xhan, paxsanich nal tetz u yolbꞌal Tioxh vaꞌl ichuska u Jesuus. Ech aꞌ nialon kajay qꞌu kam qꞌuꞌl tila. 3 Chiꞌbꞌebꞌal tetz qꞌu aanima qꞌuꞌl nisikꞌlen utz, niabꞌin u yolbꞌal Tioxh vaꞌl bꞌaxabꞌsamal talaxeꞌ tzaꞌ utz; ninima qꞌu kam tzꞌibꞌamalka. Tan ninajabꞌ u tiempo aas satzojpi.
Viqꞌilal bꞌen juj tanul qꞌu niman tetz u Jesuus tu Aasia
4 In Xhan, nuntzꞌibꞌa opon qꞌu yol tzexeꞌ tzaꞌ, juj tanul ex niman tetz u Jesuus atilex tu jujvaꞌl qꞌu tenam tikuenta Aasia.+ 1:4 Aatz vaꞌl ikuenta Aasia nital tzaꞌ tziꞌ, Turquia tek ibꞌii cheel. Taqꞌ koj vibꞌaꞌnil u Tioxh sete. Utz at koj u paas tetaanima, vaꞌl nitaqꞌ u Tioxh, Tioxh tetz oꞌte, tetz cheel utz, tetz taabꞌaꞌbꞌen. Aꞌ imol nitaqꞌeꞌ jujvaꞌl u Tioxhla Espiiritu atil vatz u chꞌuxhlebꞌal tetz qꞌesala. 5 Utz aꞌ imol u Jesucristo, u txakbꞌaꞌn tetz inujul qꞌu kam ilel taqꞌo. Ayaꞌ vaꞌl taꞌxh maꞌl aas bꞌaxa qꞌaav itzꞌpinaj xoꞌl qꞌu kamnaj. Aꞌ u mam qꞌesala vaꞌl paalchu vatz kajay qꞌu ijlenal tu u vatz amlika txꞌavaꞌ. Tan vetiꞌan tii qiꞌ. Vetichitpuꞌoꞌ tu qꞌu kupaav tu vikajal el qiꞌ. 6 Vettaqꞌbꞌenoꞌ ikꞌaol imeꞌal kꞌatz u Tioxh, viTat utz, vettaqꞌbꞌenoꞌs oksan yol siatz. Ech saꞌaqꞌax itechalil. Utz saꞌaqꞌax iqꞌesalail bꞌenamen, ech koꞌxh ibꞌenaꞌ. Aꞌi.
7 Ech abꞌitaj tan, tul Jesuus tu sutzꞌ. Utz kajay aanima siꞌilon. Antu siꞌilon qꞌuꞌl iꞌan chiꞌ ikꞌuꞌl tiꞌ. Utz jatvatzul qꞌu aanima atil tu u vatz amlika txꞌavaꞌ tzaꞌ, toj nal motx txumunoj tan, yeꞌt motx inima. Aꞌi echi.+ 1:7 Choktaj u Zacarias 12.10.
8 —In viXeꞌtebꞌal utz, in viYaꞌtebꞌal.— Chu u kuBꞌaal, u Mam Tioxh tetz oꞌte, tetz cheel utz, tetz taabꞌaꞌbꞌen.+ 1:8 Aatz u yol “viXeꞌtebꞌal” nital tzaꞌ, ayaꞌ u yol “alfa” tu griego. Utz aatz u yol “viYaꞌtebꞌal” nital tzaꞌ, ayaꞌ u yol “omega” tu griego.
U visioon til u Xhan tiꞌu techalla tatin u Jesuus
9 In Xhan niman tetz u Jesuus setuchꞌ. Ela nikupaal tu tzaꞌl; ela nikuchꞌia viQꞌesalail u Tioxh. Utz txaypꞌin tiꞌ u yolbꞌal Tioxh, tiꞌ ipaxsal itziiul vinujul, ayaꞌ u Jesucristo. Ech txaypinajichꞌin tu u sepkin txꞌavaꞌ Patmos nikꞌa mar. 10 Utz aatz iꞌan tu maꞌl u ilanbꞌal qꞌii, tiira atich u Tioxhla Espiiritu sunkꞌatza. Ech vabꞌi maꞌl u yol tiꞌ unqul. Techal iqetuneꞌ, echaꞌ trompeta. 11 Tal ve ech tzaꞌ: —In vibꞌaxa utz, in viyaꞌtebꞌal. Pek aatz cheel, tzꞌibꞌa tu uꞌ kajay qꞌu kam niileꞌ naabꞌi. Utz aqꞌ bꞌen xeꞌ juj tanul qꞌu niman tetz u Jesuus tu qꞌu tenam tikuenta Aasia. Ayaꞌ qꞌuꞌl tzaꞌ: u Eefeso, u Esmirna, u Peergamo, u Tiatira, u Sardis, u Filadeelfia utz, tuchꞌ u Laodicea.— Texhtuꞌ.
12 Uncheeꞌ unpilqꞌu tek vibꞌ tiꞌ isajileꞌ abꞌil vaꞌl nichqꞌilanin. Utz vil jujvaꞌl tatibꞌal txijtxubꞌal, bꞌaꞌnla qꞌan chꞌichꞌ.+ 1:12 Aatz u jujvaꞌl tatibꞌal txijtxubꞌal nital tzaꞌ, ayaꞌ vaꞌl nital u Leviitico 24.1-4. Maꞌl koꞌn tajan atile, pek jujvaꞌl viviꞌ. Aatz junun qꞌul iviꞌ tziꞌ, jolol julkin tuul. Tan aꞌ nichkuꞌk u aseite tuul, u taꞌl olivo vaꞌl nichtoyveꞌ.13 Utz atich maꞌl u aanima tixoꞌl jujvaꞌl u tatibꞌal txijtxubꞌal tziꞌ, echaꞌ u Kꞌaola tiloneꞌ vaꞌl bꞌennaj koꞌn aanima. Yaꞌnaj kuꞌl u toksaꞌm xeꞌaj tajan. Utz paalnaj vaꞌt penkin bꞌaꞌnla qꞌan chꞌichꞌ vatz taanima.+ 1:13 Aatz u penkin bꞌaꞌnla qꞌan chꞌichꞌ tziꞌ. Qitzbꞌalich xeꞌaj uul. Nichibꞌanbꞌe vinaj tuchꞌ ixoj. Echaꞌ sincho nitxakunku tu qꞌu vinaj utz, echaꞌ kꞌalbꞌal nitxakunku tu qꞌu ixoj. Atia tzꞌuꞌm vichiꞌl; atia bꞌuꞌj. Jat vatzulich koꞌxh iveeteꞌ. Pek aatzich u tetz u Jesuus vaꞌl paalnajich vatz taanima tziꞌ utz, bꞌaꞌnla qꞌan chꞌichꞌ vichiꞌl. Aꞌ tokeꞌ aas tetz mam qꞌesala.14 Aatz viviꞌ tuchꞌ qꞌu xiꞌl iviꞌ, tiira poloxh saj. Echaꞌ puykin saj laana utz, echaꞌ tilon saj bꞌatz. Aatz qꞌu bꞌaqꞌ iatz, echaꞌ xamal. 15 Aatz qꞌu tajan, echaꞌ tzꞌuꞌkin qꞌan chꞌichꞌ vaꞌl toojaneꞌ aas anal teluꞌl tu tzaqꞌebꞌal chꞌichꞌ. Utz aatz ijeꞌ iviꞌ tiyoloneꞌ, echaꞌ ijelun chukchaj mam nimaꞌ. 16 Aatz tu sebꞌal iqꞌabꞌ, atich jujvaꞌl txꞌumiꞌl. Utz aatz titziꞌ, niteluꞌl maꞌl u espada, kaꞌl tee. Aatz vivatz, techal ikꞌajoneꞌ, echaꞌ ikꞌajon u qꞌii tziꞌ aas aqꞌel iviꞌ.
17 Ech taꞌxh vila, yakich xhalkꞌojkuꞌin vatz tajan, ech tek in kamnaj. Ech taqꞌ jeꞌ u sebꞌal iqꞌabꞌ vibꞌa. Ikanin utz, tal ve ech tzaꞌ: —Yeꞌ koꞌxh xoꞌvaxh. Tan in viXeꞌtebꞌal utz, in viYaꞌtebꞌal. 18 In vaꞌl kamin, loqꞌ itzꞌlelin cheel. Utz bꞌenqꞌii bꞌensaj tek vatineꞌ. Aꞌi. Ayeꞌn u laave tunqꞌabꞌ tetz u kamchil utz, tetz u choobꞌal paav.
19 Pek tzꞌibꞌa qꞌu kam vetiilluka, qꞌu kam niil cheel tzaꞌ utz, tuchꞌ qꞌu kam qꞌuꞌl siil tiꞌ qꞌu kam tzaꞌ. 20 Aatz u tokebꞌal jujvaꞌl qꞌu txꞌumiꞌl qꞌuꞌl vetiil tunsebꞌal, ayaꞌ qꞌu aanjel tetz jujvaꞌl qꞌu niman vetz. Utz aatz u tokebꞌal jujvaꞌl u tatibꞌal txijtxubꞌal vaꞌl bꞌaꞌnla qꞌan chꞌichꞌ, ayaꞌ juj tanul qꞌu niman vetz.— Texh ve.
2Qꞌu yol alax tu qꞌu niman tetzu Jesuus tu Eefeso
1 Uncheeꞌ tal paj ve ech tzaꞌ: —Tzꞌibꞌa bꞌen qꞌu yol xeꞌ u qꞌesala tetz qꞌu niman vetz tu Eefeso tzaꞌ, vaꞌl aanjel sunvatz. Utz al te ech tzaꞌ: «Nital ech tzaꞌ vaꞌl atil jujvaꞌl qꞌu txꞌumiꞌl tu sebꞌal iqꞌabꞌ utz, vaꞌl nipaal xoꞌl jujvaꞌl qꞌu tatibꞌal txijtxubꞌal, bꞌaꞌnla qꞌan chꞌichꞌ.+ 2:1 Aatz u tenam Eefeso, aꞌ atichku tikuenta Aasia. Utz latziꞌ atichku vitzꞌajich vatzibꞌal maꞌl u ixoj tioxh vaꞌl Diana ibꞌii. Aꞌich vitioxh qꞌu aanima tu u tenam tziꞌ. Pek u Pablo tuchꞌ u Apolos xeꞌt ex paxsan u yolbꞌal Tioxh tu qꞌu aa Eefeso tziꞌ. Echaꞌ nital tu Qꞌu Bꞌaꞌnla Chaj Kam Bꞌanel (Hechos) 18.18—20.1.2 Vootzajle qꞌu kam bꞌaꞌn naꞌaneꞌ. Vootzajle qꞌu tzaꞌl nipaalkꞌaxh. Atil apaciensia. Utz tii aatin sunkꞌatza. Utz yitꞌ nikoꞌnkoxhasaji qꞌuꞌl yeꞌxtxoj niꞌaneꞌ. Pek niꞌxhiil inujul utz, nachabꞌa titxubꞌaꞌl abꞌiste qꞌuꞌl nikoꞌxhtaqꞌ bꞌens tibꞌ ichaj u Jesuus. 3 Niꞌxhapaal tu tzaꞌl tiꞌ vunbꞌii tan, tzꞌejel avaanima viꞌ. Loqꞌ tii atilaxh sunkꞌatza. Yeꞌxhkam najochpu viꞌ.
4 Pek atil maꞌl kam naꞌaneꞌ aas yeꞌxtxoj. Tan yitꞌeꞌch tereꞌn koj atzꞌejt avaanima viꞌ echaꞌ tixeꞌtebꞌal. 5 Pek ulsa sakꞌuꞌl utz, nacha kam vaꞌl aqꞌelka saaqꞌo utz; kꞌaxa. Qꞌaavoj aꞌan kajay qꞌu bꞌaꞌnil qꞌuꞌl nichaꞌan bꞌaxa tiꞌ tel avaanima viꞌ. Tan oj yeꞌka, yeꞌk talcheꞌ suꞌlveesa u tatibꞌal txijtxubꞌal tu u tatibꞌal.
6 Pek bꞌaꞌn vaꞌl naꞌaneꞌ aas yeꞌ nasaꞌa vaꞌl niꞌan qꞌuꞌl nixambꞌu tiꞌ vichusbꞌal u Laxh. Tan echat in, yuꞌnsaꞌ.
7 Abꞌiste ex niabꞌin qꞌu yol tzaꞌ, nimataj kan tal u Tioxhla Espiiritu tu qꞌu niman tetz u Jesuus tu junun tenam. Utz abꞌil sasubꞌun u paav, savaqꞌ tzii siloꞌ tetz vivatz u tzeꞌ tetz u atinchil tu bꞌenqꞌii bꞌensaj vaꞌl atil tu u techalla atibꞌal xeꞌ u Tioxh. Chia.» Chajaxh te.— Texh ve.
Qꞌu yol alax tu qꞌu niman tetzu Jesuus tu Esmirna
8 Uncheeꞌ tal paj ve ech tzaꞌ: —Tzꞌibꞌa bꞌen qꞌu yol xeꞌ u qꞌesala tetz qꞌu niman vetz tu Esmirna tzaꞌ, vaꞌl aanjel sunvatz. Utz al te ech nital u Jesuus te tzaꞌ: «ViXeꞌtebꞌal utz, viYaꞌtebꞌal qꞌu kam kajayil.+ 2:8 Aatz tokebꞌal u yol Esmirna utz, “kꞌayla tzeꞌ” chia. Ibꞌiich maꞌl u tenam vaꞌl atichku qꞌu niman tetz u Jesuus. Ankoꞌxh atil u tenam cheel tziꞌ. Aꞌ atik tikuenta Turquia. Aatz vibꞌii cheel utz, Izmihir. Yitꞌ aꞌ tereꞌn koj atik tu vaꞌl atichku koꞌxtene aas itzꞌibꞌal bꞌen u uꞌ tzaꞌ. In vaꞌl kamin utz, qꞌaav itzꞌpinajin tikaꞌpaj. 9 Vootzajle qꞌul aaqꞌon naꞌaneꞌ tuchꞌ qꞌu tzaꞌl nipaalkꞌaxh viꞌ utz, tuchꞌ vamebꞌiꞌl. Pek axh txꞌiiol iqꞌii sunvatz. Utz vootzajle qꞌu yoqꞌbꞌal eetz niꞌan qꞌuꞌl nitoksa iqꞌii. Tan taꞌxh qꞌuꞌl nojchit meero itenam Tioxh nitaleꞌ, pek yitꞌeꞌch koj. Tan aal jolol tatibꞌal txꞌiꞌliꞌinaj qꞌu taanima. 10 Pek qeonichꞌaxh tu u tzaꞌl vaꞌl sapaalkꞌaxh. Tan aatz u txꞌiꞌliꞌinaj, sibꞌan provaalex. Sabꞌen unjolol ex tu tzeꞌ taqꞌo. Utz laval qꞌii sapaalex tu mam tzaꞌl. Pek aꞌtzii. Tii atojokꞌaxh viꞌ. Utz qꞌiꞌa kꞌuxh lakamebꞌe. Tan aatz u oya savaqꞌ see, ayaꞌ u bꞌenchil tu bꞌenqꞌii bꞌensaj.
11 Abꞌiste ex niabꞌin qꞌu yol tzaꞌ, nimataj kan tal u Tioxhla Espiiritu tu qꞌu niman tetz u Jesuus tu junun tenam. Utz abꞌil sasubꞌun u paav, yeꞌk sapaal tu u kaꞌbꞌ kamchil.» Chajaxh te.— Texh ve.
Qꞌu yol alax tu qꞌu niman tetzu Jesuus tu Peergamo
12 Uncheeꞌ tal paj ve ech tzaꞌ: —Tzꞌibꞌa bꞌen qꞌu yol xeꞌ u qꞌesala tetz qꞌu niman vetz tu Peergamo tzaꞌ, vaꞌl aanjel sunvatz. Utz al te ech tzaꞌ: «Aatz vaꞌl atil u jutzꞌ viꞌ espada tzixeꞌ, vaꞌl kaꞌl tee, nital ech tzaꞌ:+ 2:12 Aatz u tenam Peergamo tziꞌ utz, Bergama tek vibꞌii cheel. Aꞌ atik tikuenta Turquia. Aatz tu u tenam tziꞌ, atich tatibꞌal maꞌl u bꞌanich tioxh utz, maꞌl mam tzꞌajich vatzibꞌal txꞌiꞌla txokop atich okoꞌp tuul. Aatz ibꞌii u tatibꞌal u txꞌiꞌla txokop tziꞌ utz, ikꞌujlebꞌal u txꞌiꞌliꞌinaj. Echixeꞌat tal u Jesuus: —Vootzajle til atik vikꞌujlebꞌal u txꞌiꞌliꞌinaj.— Texhtuꞌ. Aꞌ nichtal u tzꞌajich vatzibꞌal txꞌiꞌla txokop. Tan sibꞌ aanima nichꞌenqꞌilan sikꞌlen u vatzibꞌal tziꞌ. Utz latziꞌ yatzꞌpik maꞌl u niman tetz u Jesuus vaꞌl Aantipas ibꞌii.13 Vootzajle aꞌ atilkꞌaxh tu u tenam vaꞌl niꞌanvu qꞌesalail u txꞌiꞌliꞌinaj. Loqꞌ kꞌuxh echi, aal tiira nanimaꞌin. Utz yeꞌxhkam neesa iibꞌ tu qꞌu kam viꞌ. Nikoꞌxh tu qꞌu qꞌii aas iyatzꞌpu u jikomla niman vetz texoꞌl vaꞌl Aantipas ibꞌii, tiꞌ koꞌn itxakbꞌaꞌt tibꞌ viꞌ tu u tenam tatibꞌal u txꞌiꞌliꞌinaj.
14 Pek atil kaꞌxvaꞌl kam naꞌaneꞌ aas yeꞌxtxoj. Tan nikoꞌxhaaqꞌ tzii aas atil ok unjolol qꞌu aanima texoꞌl qꞌuꞌl ankoꞌxh ninima vichusbꞌal u Balaam. Tan aatz u Balaam koꞌxtene, toksa titxumbꞌal u ijlenal Balaac aas kaniꞌch ikuꞌ vuntenam tu paav siꞌaneꞌ. Satoksa echbꞌubꞌal siatz aas paalnaj vatz qꞌu bꞌanich tioxh utz, sateesa tibꞌ tu bꞌey tuchꞌ aanima.+ 2:14 Choktaj u Nuumeros 22.1-20. Aatz vaꞌl nichiꞌan u Balaam tziꞌ utz, aꞌ ichajtziꞌi maꞌl u ijlenal aas kaniꞌch ibꞌen vitenam u Tioxh tu paav. Ech nikꞌamax tiꞌ u Balaam tzaꞌ. Tan atich unjolol aanima xoꞌl qꞌu niman tetz u Jesuus aas ech niꞌaneꞌ vaꞌl nichiꞌan u Balaam. Nichok txumbꞌal kaniꞌch taqꞌon kuꞌ tu paav.15 Atil unjolol aanima texoꞌl majte aas nimamal vichusbꞌal u Laxh taqꞌo. Ayaꞌ u chusbꞌal vaꞌl paat yuꞌnsaꞌ. 16 Ech tokeꞌ, kꞌaxa akꞌuꞌl. Tan oj yeꞌka, yeꞌk talcheꞌ soꞌoponin utz, sachꞌaꞌoinin tuchꞌ qꞌu aa paav tziꞌ. Sunbꞌan te tu vunyolbꞌal vaꞌl echaꞌ jutzꞌ viꞌ espada niteluꞌl tuntziꞌ.
17 Abꞌiste ex niabꞌin qꞌu yol tzaꞌ, nimataj kan tal u Tioxhla Espiiritu tu qꞌu niman tetz. Utz abꞌil sasubꞌun u paav, savaqꞌ tetz u echbꞌubꞌal manaa vaꞌl yitꞌ naꞌl koj tatineꞌ. Utz savaqꞌ maꞌl u tal saj sivan te sijununil; tzꞌibꞌamal ok maꞌl akꞌ bꞌii siatz, aas yeꞌxhabꞌil koꞌxh ootzajin tetz.+ 2:17 Atich maꞌl u ley tetz qꞌu qꞌatbꞌal tzii tu Roma tiꞌ qꞌuꞌl nixoch tibꞌ. Echaꞌ tziꞌ oj nojchit inujul ipaav maꞌl tu qꞌuꞌl nichixoch tibꞌ, nichtaqꞌax maꞌl qꞌej sivan te utz, nichibꞌen tu tzeꞌ. Utz aatz vaꞌl yeꞌk ipaav, nichtaqꞌax maꞌl saj sivan te, techlal aas yeꞌk ipaav. Ech nichibꞌen tu totzotz. Pek taꞌxh ootzajin tetz vaꞌl sakꞌulun. Chia.» Chajaxh te.— Texhtuꞌ.
Qꞌu yol alax tu qꞌu niman tetzu Jesuus tu Tiatira
18 Uncheeꞌ tal paj ve ech tzaꞌ: —Tzꞌibꞌa bꞌen qꞌu yol xeꞌ u qꞌesala tetz qꞌu niman vetz tu Tiatira tzaꞌ, vaꞌl aanjel sunvatz. Utz al te ech tzaꞌ: «Aatz viKꞌaol u Tioxh, vaꞌl kaj qꞌu bꞌaqꞌ iatz echaꞌ xamal utz, echaꞌ tzꞌuꞌkin tiila chꞌichꞌ qꞌu tajan, nital ech tzaꞌ:+ 2:18 Aatz u tenam tziꞌ, chꞌooich koꞌxh ichꞌiieꞌ aas taqꞌax bꞌen u uꞌ xeꞌ qꞌu niman tetz u Jesuus qꞌuꞌl atich tziꞌ. Aꞌich vitenam maꞌl u ixoj Liidia ibꞌii vaꞌl niman u Jesuus. Nital tu Qꞌu Bꞌaꞌnla Chaj Kam Bꞌanel (Hechos) 16.14. Pek yitꞌ Tiatira tereꞌn koj ibꞌii cheel, Akhisar tekuꞌen. Aatz u tokebꞌal utz, “Sajla Tenam”.19 Vootzajle qꞌul abꞌanoneꞌ, tiira tzꞌejel avaanima viꞌ. Kꞌujlel akꞌuꞌl viꞌ. Naaqꞌonin viꞌ. Tii atilaxh sunkꞌatza. Utz paalchu qꞌu bꞌaꞌnla chaj kam naꞌan vatz qꞌuꞌl bꞌaxa.
20 Pek atil maꞌl kam naꞌaneꞌ aas yeꞌxtxoj. Tan nikoꞌxhaaqꞌ tzii atil maꞌl u eesanal tu bꞌey texoꞌl, alol tetz vunyolbꞌal aas nitaleꞌ. Nipit qꞌu niman vetz tu eesaibꞌ tu bꞌey tuchꞌ aanima. Echaꞌ nichiꞌan u Jezabeel koꞌxtene.+ 2:20 Aatz u Jezabeel tziꞌ, qꞌesalaich xoꞌl qꞌu oksan txꞌoloꞌm vatz u bꞌanich tioxh Baal ibꞌii. Sibꞌal alol tetz u yolbꞌal Tioxh iyatzꞌa. Ech nital tu u Reyes I 16.31 tuchꞌ tu u Reyes II 9.22-30. Utz aꞌ vaꞌl nikꞌamax tiꞌ vibꞌii tu u Jesuus tiꞌ. Tan atich unjolol ixoj xoꞌl qꞌu niman tetz u Jesuus tu Tiatira aas ech ibꞌanoneꞌ utz, ech ichusuneꞌ u ixoj Jezabeel. Aꞌ niteesa qꞌu niman tetz u Jesuus tu bꞌey. Utz nipit tiꞌ techbꞌul echbꞌubꞌal majte aas paalnaj vatz bꞌanich tioxh. 21 Utz nunchꞌia ikꞌaxat vipaav. Pek yeꞌ nikꞌaxa u eesaibꞌ tu bꞌey tuchꞌ aanima yitꞌ ikꞌulel koj. 22 Ech saꞌnalvaqꞌ kuꞌ vatz txꞌach tu yaabꞌil. Utz savoksa tu mam tzaꞌl kꞌaxkꞌo, jatvaꞌl qꞌuꞌl niꞌan vibꞌanon u ixoj tziꞌ, oj yeꞌk sikꞌaxa qꞌul ipaav. 23 Utz yatzꞌel sunbꞌan tu yaabꞌil qꞌuꞌl nitiloꞌk tetz tiꞌ. Ech kajay qꞌu niman vetz samotxootzajin aas nojchit in vaꞌl nipichꞌun qꞌul itxumbꞌal qꞌu aanima tuchꞌ qꞌu taanima. Ech savaqꞌ opon u choobꞌal setiꞌ sejununil tiꞌ vebꞌanoneꞌ.
24 Pek nojchit nival sete, abꞌiste ex atilex tu Tiatira yeꞌ oknajex tiꞌ u yeꞌxtxojla chusbꞌal tziꞌ, yeꞌxhkam vaꞌt mantaar saval sete. Ayaꞌ ex yeꞌ etootzaj vaꞌl, “mam txumbꞌal” tetz txꞌiꞌliꞌinaj, chu teꞌleꞌ. 25 Utz aatz qꞌu bꞌaꞌnil txayel setaqꞌo cheel, tii enima opon nal u vulebꞌal.
26 Abꞌil vaꞌl sasubꞌun u paav opon nal tu u yaꞌtebꞌal qꞌii saj, savaqꞌ tijleꞌm tan, nitxuqꞌtxunsaꞌin tu vaꞌl niꞌaneꞌ. Qꞌesalail siꞌan xoꞌl qꞌu tenam qꞌuꞌl yeꞌ ninima Tioxh. 27 Kam u vijleꞌm vaꞌl kꞌulel vaqꞌo kꞌatz vunTat, ech u tijleꞌm savaqꞌeꞌ. Samotxtoksa qꞌu tenam tu jik tu vichꞌichꞌ bꞌaara, ayaꞌ qꞌul ikoontra. Echaꞌ ivejtzꞌul maꞌj tzꞌaj siꞌan te. 28 Utz aatz qꞌuꞌl sasubꞌun u paav, savaqꞌ bꞌens echaꞌ u mam txꞌumiꞌl majte vaꞌl nijeꞌul bꞌiit isajbꞌeꞌ. 29 Abꞌiste ex niabꞌin qꞌu yol tzaꞌ, nimataj kan tal u Tioxhla Espiiritu tu qꞌu niman tetz u Jesuus tu junun tenam. Chia.» Chajaxh te.— Texh ve.
3Qꞌu yol alax tu qꞌu niman tetzu Jesuus tu Sardis
1 Uncheeꞌ tal paj ve ech tzaꞌ: —Tzꞌibꞌa bꞌen qꞌu yol xeꞌ u qꞌesala tetz qꞌu niman vetz tu Sardis tzaꞌ, vaꞌl aanjel sunvatz.+ 3:1 Aatz u yol Sardis, aꞌ nikꞌaskuꞌl tiꞌ vaꞌt u yol Sario utz, “Vaꞌl nijutzpeꞌl” chia. Pek aatz vibꞌii cheel utz, Sart ayeꞌn tikuenta Turquia. Utz al te ech tzaꞌ: «Ech nital vaꞌl atil jujvaꞌl u Tioxhla Espiiritu tzixeꞌ tuchꞌ jujvaꞌl qꞌu txꞌumiꞌl tzaꞌ: Vootzajle kajay vabꞌanoneꞌ. Vootzajle aas itzꞌlelaxh nitalaxeꞌ; loqꞌ kamnajaxh sunvatz. 2 Pek nachnoj aatineꞌ. Tii aꞌan qꞌu kam qꞌuꞌl bꞌaꞌn, qꞌuꞌl toj texh yaꞌoj aꞌantaꞌ. Tiira yitꞌ jikom tereꞌn koj naꞌan unjolol qꞌu kam vatz Tioxh. 3 Ech ulsa sakꞌuꞌl, kam qꞌu chusbꞌal kꞌulel aaqꞌo utz, abꞌimal aaqꞌo. Nima. Utz kꞌaxa akꞌuꞌl tiꞌ qꞌul apaav. Tan oj yitꞌ nachnoj koj aatineꞌ, yeꞌk anachloꞌm suꞌulin. Echaꞌ tok elqꞌom tzaxeꞌ sunbꞌaneꞌ.
4 Pek ech koj tan, atil untxꞌajul aanima tzaxeꞌ xoꞌl qꞌu niman vetz tu Sardis aas yeꞌxhkam niyansa tibꞌ tu paav. Txꞌaatxꞌoch tatin sunvatz. Echaꞌ atoꞌk ibꞌaꞌnla poloxh saj oksaꞌm. Ech nikꞌuloꞌk tiꞌ saꞌatin sunkꞌatza. 5 Tan abꞌil aꞌ sasubꞌun u paav, saꞌnalbꞌens txꞌaatxꞌoch tatin vatz Tioxh, echaꞌ ivijlu tu bꞌaꞌnla poloxh saj oksaꞌm sabꞌanli. Utz yeꞌk sunsuu vibꞌii tu u libro vaꞌl tzꞌibꞌamalku vibꞌii qꞌuꞌl saꞌatin tu bꞌenqꞌii bꞌensaj. Utz savoksa vibꞌii vatz vunTat, tuchꞌ vatz qꞌul iaanjel majte. 6 Abꞌiste ex niabꞌin qꞌu yol tzaꞌ, nimataj kan tal u Tioxhla Espiiritu tu qꞌu niman tetz u Jesuus tu junun tenam. Chia.» Chajaxh te.— Texh ve.
Qꞌu yol alax tu qꞌu niman tetzu Jesuus tu Filadeelfia
7 Uncheeꞌ tal paj ve ech tzaꞌ: —Tzꞌibꞌa bꞌen qꞌu yol xeꞌ u qꞌesala tetz qꞌu niman vetz tu Filadeelfia tzaꞌ, vaꞌl aanjel sunvatz.+ 3:7 Aatz u Filadeelfia, “tiira bꞌaꞌn uchchil” chia. Alaser vibꞌii cheel. Latziꞌ vaꞌl atichku unjolol qꞌu u niman tetz u Jesuus aas nojchit tiira bꞌaꞌnich. Utz al te: «Nital u Tioxh ech tzaꞌ, vaꞌl yeꞌk paav kꞌatza utz, inujul, vaꞌl atil vilaave u Daviid tiqꞌabꞌ. Ech abꞌil koj sajupun vaꞌl nijajeꞌ. Utz abꞌil koj sajajon vaꞌl nijupeꞌ:+ 3:7 Choktaj u Isaias 22.22; Qꞌu Kam Ibꞌaxabꞌsa Ikꞌuchax U Tioxh (Apocalipsis) 3.9; Qꞌu Bꞌaꞌnla Chaj Kam Bꞌanel (Hechos) 15.1-2.8 Vootzajle kajay vaꞌl naꞌaneꞌ. Kꞌuxh yeꞌk maas ayakꞌil, bꞌaꞌnla kolel vunyolbꞌal saaqꞌo. Utz yeꞌxhkam neesa iibꞌ viꞌ. Echixeꞌat aatz cheel, nivoksa maꞌl u bꞌey saatz. Echaꞌ ijajeꞌ maꞌl jubꞌal utz, yeꞌxhabꞌil sajupun saatz. 9 Utz abꞌi iileꞌ. Saꞌnalulpecheꞌoj saatz vaqꞌo qꞌu koontrain eetz; ech satootzaji aas nojchit tiiꞌin saiꞌ. Ayaꞌ qꞌuꞌl nimotxtoksa iqꞌii aas taꞌxh qꞌuꞌl nojchit meero itenam u Tioxh nimotxtaleꞌ. Utz aal jolol tetz u txꞌiꞌliꞌinaj. Jolol kuꞌen txubꞌaꞌlom. 10 Pek aatz cheel, sunkolelaxh vatz u mam tzaꞌl vaꞌl tul tiꞌ qꞌu aanima tu u vatz amlika txꞌavaꞌ kajayil. Loqꞌ iqꞌaqꞌal koꞌn animat vunyolbꞌal utz, aqꞌiꞌt qꞌu tzaꞌl. Tan tu u tzaꞌl siꞌilchik vitxumbꞌal qꞌu aanima.
11 Tii abꞌan qꞌu bꞌaꞌnla chaj kam ninalaꞌaneꞌ. Tan saꞌtexhulin. Ech yitꞌ vaꞌten koj saetzan vakoroona vaꞌl nichꞌianeꞌ. 12 Tan abꞌil sasubꞌun u paav, savaqꞌ tijleꞌm kꞌatz u Tioxh. Echaꞌ tatin piraal tetz totztioxh siꞌaneꞌ; taꞌn sichabꞌa tatineꞌ. Echaꞌ suntzꞌibꞌa ok vibꞌii vunTioxh tiꞌ. Savoksa vibꞌii vitenam u Tioxh tiꞌ, ayaꞌ u Jerusaleen vaꞌl anal sacheei, vaꞌl tu Amlika sakꞌaskuꞌl. Utz saok vunbꞌii tiꞌ majte vaꞌl anal soꞌoki. 13 Abꞌiste ex niabꞌin qꞌu yol tzaꞌ, nimataj kan tal u Tioxhla Espiiritu tu qꞌu niman tetz u Jesuus tu junun qꞌu tenam. Chia.» Chajaxh te.— Texhtuꞌ.
Qꞌu yol alax tu qꞌu niman tetzu Jesuus tu Laodicea
14 Uncheeꞌ tal paj ve ech tzaꞌ: —Tzꞌibꞌa bꞌen qꞌu yol xeꞌ u qꞌesala tetz qꞌu niman vetz tu Laodicea tzaꞌ, vaꞌl aanjel sunvatz.+ 3:14 Aatz u tenam Laodicea tziꞌ, yeꞌkan cheel. Aꞌ texh atilka qꞌul ikuchamil. Latziꞌ vaꞌl itzꞌibꞌav bꞌen maꞌl u uꞌ u Pablo vaꞌl opon tu u tenam Colosa majte. Nital tu Qꞌu Niman Tetz U Jesuus Tu Colosa 4.16. Utz al te: «Nital u tzojpixsan tetz qꞌu kam ech tzaꞌ, vaꞌl txakbꞌaꞌn tetz vinujul, vaꞌl inujul niꞌan qꞌu kam, vaꞌl kꞌujlebꞌal kꞌuꞌl. Ayaꞌ u cheesan tetz kajay qꞌu kam tiqꞌaqꞌal u Tioxh. 15 Vootzale qꞌul abꞌanoneꞌ. Vootzajle aas nikoꞌxh axh koj chꞌichꞌ utz, nikoꞌxh axh koj tzꞌaꞌ tu val aatin sunkꞌatza. Aal bꞌaꞌn aꞌ axh koj chꞌichꞌ oj axh koj tzꞌaꞌ. 16 Ech tiꞌ val aatineꞌ tziꞌ aas yitꞌ axh koj chꞌichꞌ, nikoꞌxh axh koj tzꞌaꞌ, sakoꞌnunxaꞌvaelaxh tuntziꞌ. Tan axh kuꞌen tiqꞌkin tu val aatin sunkꞌatza. 17 Tan aal aatz naaleꞌ: ‘In txꞌiiol iqꞌii; bꞌaꞌn vatin vatz Tioxh. Utz yeꞌxh koꞌxh kam nunyaꞌta.’ Chaꞌaxh. Loqꞌ yeꞌxh at niꞌenku see aas txumbꞌal aatz sunvatz. Yeꞌk atxaꞌk. Axh meꞌbꞌaꞌ. Axh tzot. Utz tꞌuꞌlelaxh.
18 Pek aatz cheel nival see, aas aal bꞌaꞌn sajaj eetz u bꞌaꞌnla qꞌan chꞌichꞌ ve vaꞌl tiira bꞌaꞌnixnaj tu xamal. Ech nojchit saꞌan txꞌiiol iqꞌiil. Utz sajaj u nojla poloxh saj oksaꞌm ve, sooksa. Ech yeꞌk seꞌel aqꞌii tu vatꞌuꞌeaꞌ. Utz sajaj acoliirio ve, txachꞌamansabꞌ tetz isajin qꞌu bꞌaqꞌ avatz. Ech sasajinaxh bꞌaꞌnil.
19 Tan nivoksa tu jik utz, nunyaa kajay qꞌuꞌl tiiꞌin tiꞌ. Pek kꞌucha aas nojchit tzꞌejel avaanima viꞌ utz, kꞌaxa akꞌuꞌl. 20 Abꞌi iileꞌ. Atilin vatz jubꞌal utz; nunsikꞌleneꞌ. Ech abꞌiste a saꞌabꞌin unviꞌ utz, suꞌlijajin, soꞌokoꞌpꞌin tzixeꞌ. Utz ela satxꞌaꞌnin tuchꞌ.
21 Ech abꞌil aꞌ sasubꞌun u paav, savaqꞌ tzii te sakꞌujeꞌ sunkꞌatza tu u kꞌujlebꞌal tetz qꞌesala. Tan ech in, subꞌel tek u paav vaqꞌo. Echixeꞌat kꞌujeꞌyin kꞌatz vunTat tu u kꞌujlebꞌal tetz qꞌesala. 22 Abꞌiste ex niabꞌin qꞌu yol tzaꞌ, nimataj kan tal u Tioxhla Espiiritu tu qꞌu niman tetz u Jesuus tu junun tenam. Chia.» Chajaxh te.— Texh ve.
4U visioon tiꞌ u toksal iqꞌiiu Tioxh tu Amlika
1 Uncheeꞌ xamtich tek tiꞌ qꞌu kam tziꞌ, sajinin utz, vil maꞌl u jubꞌal tu amlika, jajliche. Utz iqꞌilapajin u viꞌ vaꞌl qꞌilanin bꞌaxa chituꞌ, vaꞌl echaꞌ toqꞌ trompeta. Utz tal ve ech tzaꞌ: —Niꞌaxh, chajeꞌul tzaꞌ. Tan sunkꞌuch tereꞌn qꞌu kam see qꞌuꞌl suꞌuch tiꞌ qꞌu kam paalyuka tziꞌ.— Texhtuꞌ.
2 Ech tu u muꞌkꞌul tziꞌ, tiira atich u Tioxhla Espiiritu sunkꞌatza. Utz aꞌ tek vila atich maꞌl u kꞌujlebꞌal tu Amlika tetz mam qꞌesala. Kꞌujlel maꞌl aanima tuul. 3 Utz aatz vaꞌl kꞌujliche tziꞌ, ech tiloneꞌ u sivan jaspe, tuchꞌ u sivan cornalina. Utz aatz tiꞌaj u kꞌujlebꞌal tziꞌ, atich maꞌl txakbꞌanchꞌel. Ech tiloneꞌ u sivan esmeralda.
4 Utz sutimal tiꞌ u kꞌujlebꞌal tetz mam qꞌesala tu vaꞌt 24 kꞌujlebꞌal tetz qꞌesala. Kꞌujlel 24 qꞌesala tuul vila. Bꞌaꞌnla poloxh saj oksaꞌm. Utz atil jeꞌ ikoroona tiviꞌ, bꞌaꞌnla chaj qꞌan chꞌichꞌ. 5 Aatz tu u kꞌujlebꞌal tetz mam qꞌesala tziꞌ, niripkabꞌin tel itzꞌnaꞌbꞌ. Nituch tininunchil. Utz nituch qꞌeqꞌuꞌm. Atil jujvaꞌl txijtxubꞌal vatz u kꞌujlebꞌal tziꞌ, nitoyveꞌ. Ayaꞌ jujvaꞌl u Tioxhla Espiiritu.+ 4:5 Choktaj u Zacarias 4.2-3; Qꞌu Kam Ibꞌaxabꞌsa Ikꞌuchax U Tioxh (Apocalipsis) 11.4.
6 Atich paj maꞌl u kam vatz u kꞌujlebꞌal tziꞌ, echaꞌ mar. Puuro espejo. Nipaal tuch sajinchil tuul.+ 4:6 Choktaj u Ezequieel 1.5-25; 3.13; 10.15-22.
Aatz tinikꞌa utz, tiꞌaj qꞌu kꞌujlebꞌal tziꞌ, atich kaavaꞌt itzꞌlich kam echaꞌ txokop. Kaana bꞌaqꞌ vatz siatz chaj utz, tiꞌ iqul. 7 Aatz u bꞌaxa itzꞌlich kam tziꞌ, echaꞌ bꞌalam. Aatz u kaꞌbꞌ utz, echaꞌ chelem tooro vaakaxh. Aatz vitoxvaꞌ, echaꞌ ivatz aanima. Utz aatz vikaavaꞌ, echaꞌ xichꞌ aas nixichꞌaneꞌ. 8 Utz aatz kaavaꞌl qꞌu itzꞌlich kam tziꞌ, vaajil ixichꞌ atile sijununil. Kaana bꞌaqꞌ vatz tiꞌ eluꞌl tuchꞌ tu tuul qꞌul ixichꞌ. Utz yeꞌk ilaꞌm niꞌan qꞌiils aqꞌbꞌal tiꞌ talax ech tzaꞌ:
—¡Yeꞌk paav kꞌatza, yeꞌk paav kꞌatza, yeꞌk paav kꞌatz u kuBꞌaals Amlika, u mam Tioxh tetz oꞌte, tetz cheel utz, tetz taabꞌaꞌbꞌen!— Chia.
9 Aatz qꞌu itzꞌlich tziꞌ, nimotxtal vitechalil u Tioxh vaꞌl kꞌujlele utz, ibꞌenaꞌ ibꞌen koꞌxh u tatineꞌ. Nimotxtoksa iqꞌii. Utz nimotxikꞌamabꞌe qꞌu kam te kajayil. Ech koꞌxh niꞌan chajpaj. 10 Aatz u 24 qꞌesala, nimotxipecheꞌ vatz u Tioxh vaꞌl kꞌujlel tu u kꞌujlebꞌal tetz qꞌesala. Nitoksa iqꞌii. Nimotxteesa qꞌul ikoroona tiviꞌ utz, nimotxtaqꞌ kuꞌ siatz tan, ibꞌenaꞌ ibꞌen koꞌxh u tatineꞌ. Nimotxtal ech tzaꞌ:
11 —KuBꞌaal, nikꞌuloꞌk saiꞌ
aas saꞌalax vatechalil.
Saꞌoksal aqꞌii.
Utz eetz u mam ijleꞌm,
tan, axh vetcheesan qꞌu kam kajayil.
Utz tu vatxumbꞌal kꞌuxh atile utz,
tu vatxumbꞌal veetika.— Chia.
5U tijleꞌm u Chelem Karneꞌl tiꞌ ixhejul u uꞌ bꞌolqꞌimal tibꞌ tuul
1 Uncheeꞌ aꞌ tek vila atich maꞌl u uꞌ bꞌolqꞌimal tibꞌ tuul, tu u sebꞌal iqꞌabꞌ vaꞌl kꞌujlel tu u kꞌujlebꞌal tetz qꞌesala. Kaana tzꞌibꞌ atoꞌk tiꞌ utz, tu tuul. Utz bꞌaꞌnla jupel tu jujvaꞌl sello.+ 5:1 Aatz koꞌxtene tan, yeꞌkich libro. Pek bꞌenchimal vatz tzꞌuꞌm tiꞌ txokop nichuchku jeꞌ tzꞌibꞌ utz, bꞌenchimal viꞌ maꞌl u kam nichteesal eluꞌl tu tuul maꞌl u tal tzeꞌ papiro ibꞌii. Utz aatz nichveet tuch u tzꞌibꞌ siiꞌ, nichibꞌolqꞌil tuul. Ech aatz vaꞌl til u Xhan tziꞌ utz, echi. Nital tu U Lucas 4.20. Aꞌ nichitxakuneꞌ aas nichitzꞌibꞌal u Yolbꞌal Tioxh.2 Utz vil maꞌl u aanjel, aqꞌel iviꞌ. Qetun taltu ech tzaꞌ: —¿Abꞌil maꞌj sikꞌuloꞌk tiꞌ aas suꞌlijaj u uꞌ tziꞌ? Utz ¿suꞌlteesa qꞌu sello?— Texhtuꞌ.
3 Utz yeꞌxhabꞌil maꞌj cheei aas sijaj u uꞌ tziꞌ. Utz nikoꞌxh abꞌil koj sasajin; nikoꞌxh tu Amlika; nikoꞌxh vatz txꞌavaꞌ utz; nikoꞌxh xoꞌl qꞌu kamnaj jaqꞌ txꞌavaꞌ. 4 Ech aatz in tan, kaanaich tek voqꞌeꞌ tan, abꞌil koj maꞌj cheei aas nojchit sikꞌuloꞌk tiꞌ suꞌlijaj u uꞌ. Utz nikoꞌxh abꞌil koj sasajin.
5 Ech aatz tek maꞌl qꞌu qꞌesala, tal ve ech tzaꞌ: —Yeꞌ koꞌxh oqꞌaxh. Tan aꞌ sajajon u mam aa yakꞌil vaꞌl tiira oleꞌnaj, vaꞌl echaꞌ bꞌalam. Ayaꞌ vituꞌxh ixalam u Judaa, vituꞌxh ixalam u Daviid. Utz aꞌ seꞌeesan jujvaꞌl qꞌu sello. Tan aꞌ vaꞌl subꞌunya.— Texhtuꞌ.+ 5:5 Choktaj u Geenesis 49.9-10.
6 Uncheeꞌ sajinin. Utz aꞌ tek vil maꞌl u Chelem Karneꞌl txaklich xoꞌl qꞌu kꞌujlebꞌal, tuchꞌ xoꞌl kaavaꞌl qꞌu itzꞌlich kam utz, xoꞌl qꞌu qꞌesala. Echaꞌ yatzꞌel unpajul tu nachoꞌm vatz Tioxh tiꞌ ijajax kuybꞌal tiloneꞌ. Jujvaꞌl tukꞌ atile utz, jujvaꞌl bꞌaqꞌ iatz. Ayaꞌ jujvaꞌl qꞌu Tioxhla Espiiritu vaꞌl chajel tu u vatz amlika txꞌavaꞌ kajayil.+ 5:6 Aatz u yol “Chelem Karneꞌl” aꞌ nikꞌam tiꞌ vijaꞌmel u choobꞌal paav nichikꞌach qꞌu Israeel koꞌxtene. Nipajikꞌam tiꞌ u maanxhoil, u kuybꞌal. Choktaj u Eexodo 29.38-41.7 Ech ex tiqꞌo u uꞌ u Chelem Karneꞌl vaꞌl atich tu sebꞌal iqꞌabꞌ vaꞌl kꞌujlel tu u kꞌujlebꞌal tetz mam qꞌesala. 8 Utz taꞌxh veet ikꞌultu u uꞌ tziꞌ, motx pecheꞌ kuꞌ kaavaꞌl qꞌu itzꞌlich kam tuchꞌ qꞌu 24 qꞌesala vatz u Chelem Karneꞌl. Atich iaarpa sijununil. Utz iqꞌomal jununil tatibꞌal ikaxhlaan pom. Bꞌaꞌnla qꞌan chꞌichꞌ, noonaj tu kaxhlaan pom. Aatz u kaxhlaan pom, aꞌ nikꞌam tiꞌ viqꞌilat isikꞌlet Tioxh qꞌuꞌl niman tetz u Jesuus.+ 5:8 Choktaj u Leviitico 2.1-2.9 Utz nichmotxibꞌitza maꞌl u akꞌ bꞌitzal ech tzaꞌ:
—Niꞌxhikꞌuloꞌk saiꞌ aas okyu u uꞌ taqꞌabꞌ tziꞌ. Utz axh seꞌeesan qꞌul iselloil. Tan axh vaꞌl yatzꞌaxaxh vatz Tioxh, echaꞌ ook tu txꞌoloꞌm. Tu vakajal vetachoov vipaav qꞌu aanima, qꞌuꞌl tetz tek Tioxh, kꞌuxh jatvatzul koꞌn aanimail, kam koꞌn iyolbꞌal, kam koꞌn itenam.
10 Vetaaqꞌlu qijleꞌm kꞌatz u kuTioxh. Utz vetaaqꞌbꞌenoꞌ oksan yol siatz. Ech saꞌnalkubꞌan qꞌesalail tu u vatz txꞌavaꞌ.— Chia.
11 Uncheeꞌ sajinin. Utz vabꞌi iviꞌ sibꞌla chaj aanjel, seplich ok tiꞌ u kꞌujlebꞌal tetz qꞌesala utz, seplich ok tiꞌ qꞌu itzꞌlich kam utz, tiꞌ qꞌu qꞌesala. Aatz u tachul qꞌu aanjel tziꞌ, jatvaꞌl koꞌn miyoon. 12 Ech nichmotxiqetun tal tu ech tzaꞌ:
—Nikꞌuloꞌk tiꞌ u Chelem Karneꞌl aas satꞌanbꞌaꞌli tan;
aꞌ vaꞌl yatzꞌax vatz Tioxh, echaꞌ tok txꞌoloꞌm.
Ech nikꞌuloꞌk tiꞌ aas
saꞌaqꞌax tijleꞌm;
saꞌaqꞌax txꞌiibꞌal iqꞌii,
saꞌaqꞌax itxumbꞌal;
saꞌaqꞌax iyakꞌil;
saoksal iqꞌii;
saꞌaqꞌax itechalil utz;
sabꞌitzali.—
Texhtuꞌ.
13 Utz vabꞌi iyolon kajay qꞌu kam qꞌuꞌl cheesamal tu Amlika; antu qꞌu kam vatz txꞌavaꞌ, qꞌu kamnaj jaqꞌ txꞌavaꞌ tuchꞌ qꞌuꞌl tu mar. Utz tuchꞌ jatvatzul chit qꞌu kam atile. Tal ech tzaꞌ:
—Aatz u qꞌesala vaꞌl kꞌujlel tu u kꞌujlebꞌal tetz qꞌesala
tuchꞌ u Chelem Karneꞌl;
aꞌ samotxbꞌitzali;
aꞌ samotxalax itechalil;
aꞌ samotxoksal iqꞌii utz;
aꞌ samotxaqꞌax iyakꞌil bꞌenamen.
Ech koꞌxh ibꞌenaꞌ.—
Texhtuꞌ.
14 Utz aatz kaavaꞌl qꞌu itzꞌlich, tal ech tzaꞌ: —Eeꞌ aꞌ chituꞌ.— Texhtuꞌ. Ech aatz qꞌu 24 qꞌesala motx pecheꞌi. Taqꞌ kuꞌ ivatz vatz txꞌavaꞌ utz, toksa iqꞌii u Tioxh vaꞌl ibꞌenaꞌ ibꞌen koꞌxh u tatineꞌ.
6U teesal u bꞌaxa sello, chꞌaꞌo u tokebꞌal
1 Uncheeꞌ vil teesat u bꞌaxa sello u Chelem Karneꞌl. Ech vabꞌi iyolon maꞌl tu kaavaꞌl qꞌu itzꞌlich kam. Utz aqꞌel iviꞌ ijelun tuul viyol. Tal ech tzaꞌ: —Niꞌaxh.— Texhtuꞌ.
2 Ech vil maꞌl u sajiꞌ chee. Aatz vaꞌl atich jeꞌ tiꞌ, iqꞌomich maꞌl iarco bꞌanbꞌal ichꞌaꞌo. Utz aqꞌax maꞌl ikoroona. Ech kꞌasuꞌl tu chꞌaꞌo tan, bꞌanel nal kanaal taqꞌo. Utz kanaal tereꞌn maꞌt iꞌaneꞌ.
U teesal u kaꞌbꞌ sello, chiꞌkꞌulaꞌibꞌ u tokebꞌal
3 Aatz teesa u kaꞌbꞌ sello u Chelem Karneꞌl, vabꞌi iyolon u kaꞌbꞌ itzꞌlich kam. Tal ech tzaꞌ: —Niꞌaxh.— Texhtuꞌ.
4 Ech vil ikꞌasuꞌl maꞌl u kajiꞌ chee. Aatz vaꞌl atich jeꞌ tiꞌ, aqꞌax maꞌl mam espada te. Utz aqꞌax tzii te aas chꞌaꞌo suꞌltoksa tu u vatz txꞌavaꞌ. Saꞌtexhmotxiyatzꞌ jeꞌ tibꞌ aanima tibꞌilaj taqꞌo.
U teesal u toxvaꞌ sello, vaꞌy u tokebꞌal
5 Aatz teesa u toxvaꞌ sello u Chelem Karneꞌl, vabꞌi iyolon u toxvaꞌ itzꞌlich kam. Tal ech tzaꞌ: —Niꞌaxh.— Texhtuꞌ.
Utz vil maꞌl u qꞌejiꞌ chee. Aatz vaꞌl atich jeꞌ tiꞌ, atich maꞌl paabꞌal tiqꞌabꞌ. 6 Utz vabꞌi tuch maꞌl u yol xoꞌl kaavaꞌl qꞌu itzꞌlich kam. Tal ech tzaꞌ: —Kaꞌvaꞌl koꞌn libra triigo vijaꞌmel maꞌl qꞌii aqꞌon. Oj sebada utz, vaajil libra u jaꞌmel. Ech koj u aseite tuchꞌ u taꞌl uuva, yeꞌk sakanoꞌk.— Texhtuꞌ.+ 6:6 Aatz u jaꞌmel maꞌl qꞌii aqꞌon nital tzaꞌ utz, maꞌl denaario, maꞌl chꞌichꞌ puaj tetz qꞌu aa Roma. Pek nichibꞌanbꞌe vitenam u Tioxh majte tan, atich ok jaqꞌ imantaar u ijlenal tu Roma.
U teesal u kaavaꞌ sello, kamchil u tokebꞌal
7 Aatz teesa u kaavaꞌ sello u Chelem Karneꞌl, vabꞌi u kaavaꞌ itzꞌlich kam tal ech tzaꞌ: —Niꞌaxh.— Texhtuꞌ.
8 Ech aꞌ tek vil maꞌl u qꞌaniꞌ chee. Kamchil ibꞌii vaꞌl atich jeꞌ tiꞌ. Utz Molbꞌal Tibꞌ Kamnaj ibꞌii vaꞌl atichka tiꞌ iqul. Ech motx aqꞌax tzii te siyatzꞌ aanima tu u vatz txꞌavaꞌ; untanul tu kaa tanul siyatzꞌ tu espada, tu vaꞌy, tu chꞌaꞌo, tu yaabꞌil. Utz kam koꞌn txokpilil xoꞌl tzeꞌ sachiꞌon.
U teesal u toꞌvaꞌ sello, choobꞌal paav nijajax tiꞌ qꞌu yatzꞌol tetz qꞌu niman tetzu Jesuus
9 Aatz teesa u toꞌvaꞌ sello u Chelem Karneꞌl, vil jaqꞌ u nachbꞌal Tioxh, qꞌu taanxelal qꞌu aanima qꞌuꞌl maꞌtich iyatzꞌax tiꞌ itxakbꞌaꞌt tibꞌ tiꞌ u yolbꞌal Tioxh. 10 Utz nichmotxiqetun taltu ech tzaꞌ: —¡KuBꞌaal Tioxh, yeꞌk paav sakꞌatza, axh vinujul! ¿Jatu tek satxꞌol inujul vipaav qꞌu aanima tu u vatz txꞌavaꞌ qꞌuꞌl vetyatzꞌonoꞌ? ¿Jatu tek saaqꞌ chꞌexbꞌal te tiꞌ qꞌu kukajal vetel taqꞌo?— Texhtuꞌ.
11 Ech motx aqꞌax ibꞌaꞌnla chaj poloxh saj oksaꞌm sijununil. Utz alax te aas samotxichꞌia bꞌitoj tiempo, tzꞌaj nal opon tereꞌn qꞌu tetz niman Tioxh qꞌuꞌl echat ikam sakami.
U teesal u vajaj sello, mam kabꞌnaano ul taqꞌo
12 Aatz teesat u vajaj sello u Chelem Karneꞌl, yakich paaloj maꞌl mam kabꞌnaano. Yakich qꞌejbꞌoj iatz u qꞌii taqꞌo, ech tekuꞌen aꞌ qꞌej bꞌuꞌj tetz txumuꞌm. Kajbꞌ iatz u ichꞌ, ech tekuꞌen aꞌ ikajal aanima. 13 Ech motx chajpu kuꞌl qꞌu txꞌumiꞌl vatz txꞌavaꞌ, echaꞌ ichajpu kuꞌl viikuxh aas nipaal maꞌj mam kajiqꞌ. 14 Sotz u amlika tziꞌ; ibꞌolqꞌi tibꞌ tuul, echaꞌ ibꞌolqꞌil maꞌj xaj uꞌ. Utz motx jalpu tatibꞌal kajay qꞌu muunte, tuchꞌ kajay qꞌu sepkin txꞌavaꞌ nikꞌa aꞌ.
15 Ech aatz qꞌu ijlenal tu u vatz amlika txꞌavaꞌ tzaꞌ, motx ex imuj tibꞌ tu qꞌu jul. Utz at motx ex imuj tibꞌ tu joymal sivan tulaj muunte. Antu qꞌuꞌl sibꞌ tijleꞌm, qꞌu txꞌiiol iqꞌii, qꞌu qꞌesal sol, qꞌu mamaj qꞌatbꞌal tzii. Antu qꞌu meꞌbꞌaꞌ, qꞌuꞌl kꞌayimal tibꞌ tu aqꞌon utz, tuchꞌ qꞌuꞌl yitꞌ kꞌayimal koj tibꞌ tu aqꞌon. 16 Ech motx tal tu qꞌu muunte, tuchꞌ qꞌu mamaj sivan ech tzaꞌ: —¡Kuꞌojex qiꞌ! Utz ¡mujtajoꞌ vatz vaꞌl kꞌujlel tu u kꞌujlebꞌal tetz mam qꞌesala! Utz ¡koltajoꞌ vatz vikꞌaꞌnal u Chelem Karneꞌl! 17 Tan cheel u mam qꞌii tetz vikꞌaꞌnal vaꞌl xoꞌebꞌal. Utz abꞌil koj maꞌj satxꞌakon.— Texhtuꞌ.
7U tok techlal qꞌu Israeel tipala qꞌuꞌl niman tetz u Jesuus
1 Xamtich tek tiꞌ qꞌu kam tziꞌ, vil kaavaꞌl aanjel txakliche. Jununil tu junun ikaa paqꞌil ixoobꞌal u txꞌavaꞌ. Aꞌ nichimaj ipaal u kajiqꞌ tu kaavaꞌl vipaalebꞌal. Ech yeꞌkan sapaal kajiqꞌ vatz txꞌavaꞌ; nikoꞌxh viꞌ u mar utz; nikoꞌxh viꞌaj qꞌu tzeꞌ. 2 Utz vil vaꞌt u aanjel, aalich ijeꞌul tu vijeꞌabꞌal ul u qꞌii. Iqꞌomich maꞌl u oksabꞌ echlal taqꞌo, tetz u itzꞌlich Tioxh. Ech qetun taltu bꞌen tu kaavaꞌl qꞌu aanjel qꞌuꞌl maꞌtich taqꞌax tzii te aas siyansa u vatz txꞌavaꞌ tuchꞌ u mar.
3 Tal te ech tzaꞌ: —Eyansach u vatz txꞌavaꞌ tuchꞌ u mar utz, tuchꞌ qꞌu tzeꞌ. Pek analen aas maꞌt qoksat techlal kajay qꞌu taqꞌonom u kuTioxh tipala.— Texhtuꞌ.
4 Uncheeꞌ vabꞌi u tachul qꞌuꞌl ok techlal. Maꞌlen 144,000 xoꞌl qꞌul ituꞌxh ixalam qꞌul ikꞌaol u Israeel.
5 12,000 xoꞌl qꞌul ituꞌxh ixalam u Judaa oksal techlal.
12,000 xoꞌl qꞌul ituꞌxh ixalam u Rubeen.
12,000 xoꞌl qꞌul ituꞌxh ixalam u Gad.
6 12,000 xoꞌl qꞌul ituꞌxh ixalam u Aseer.
12,000 xoꞌl qꞌul ituꞌxh ixalam u Neftalii.
12,000 xoꞌl qꞌul ituꞌxh ixalam u Manasees.
7 12,000 xoꞌl qꞌul ituꞌxh ixalam u Simeoon.
12,000 xoꞌl qꞌul ituꞌxh ixalam u Levii.
12,000 xoꞌl qꞌul ituꞌxh ixalam u Isacaar.
8 12,000 xoꞌl qꞌul ituꞌxh ixalam u Zabuloon.
12,000 xoꞌl qꞌul ituꞌxh ixalam u Xhep.
Utz 12,000 ok techlal xoꞌl qꞌul ituꞌxh ixalam u Benjamiin.
U toksal iqꞌii u Tioxhtu tzꞌajel iatz aanima
9 Xamtich tek tiꞌ qꞌu kam tziꞌ, aꞌ tek vil maꞌl mamaꞌla tenam aas yeꞌxhabꞌil koꞌxh tech tiꞌ tachleꞌ. Tzꞌajel iatz aanimail tu vatz amlika txꞌavaꞌ, tikuenta mamaj tenam, tuchꞌ talaj tenam. Jatvatzul koꞌn aanimail utz, jatvatzul koꞌn iyolbꞌal. Jolol txaklich vatz u kꞌujlebꞌal tetz u mam qꞌesala utz, vatz u Chelem Karneꞌl. Jolol atoꞌk toksaꞌm bꞌaꞌnla poloxh saj. Utz sikajayil, iqꞌomal xaj ipalma tiqꞌabꞌ. 10 Utz motx qetun tal tu ech tzaꞌ:
—Aatz u kuTioxh, vaꞌl kꞌujlel tu u kꞌujlebꞌal tetz qꞌesala,
aꞌ u Chitol tu paav,
tuchꞌ u Chelem Karneꞌl.—
Texhtuꞌ.
11 Utz kajay qꞌu aanjel jolol txakliche. Seplich ok tiꞌ u kꞌujlebꞌal tetz qꞌesala, tiꞌ qꞌu qꞌesala utz, tiꞌ kaavaꞌl qꞌu itzꞌlich kam. Ech motx pecheꞌi. Motx taqꞌ kuꞌ ivatz utz, toksa iqꞌii u Tioxh vaꞌl kꞌujlel tu u kꞌujlebꞌal tetz qꞌesala. 12 Motx tal ech tzaꞌ:
—¡Aꞌ chituꞌ!
aꞌ saꞌalax bꞌaꞌnil tiꞌ u kuTioxh.
Aꞌ saꞌalax itechalil;
aꞌ saꞌalax aa txumbꞌal tiꞌ;
aꞌ sakꞌamabꞌel qꞌu kam te;
aꞌ saꞌoksal iqꞌii;
aꞌ saꞌalax aa yakꞌil tiꞌ;
bꞌenamen
ech koꞌxh ibꞌenaꞌ. Aꞌi.—
Texhtuꞌ.
13 Uncheeꞌ aatz maꞌl tu qꞌu qꞌesala, iqꞌilaꞌin. Tal ve ech tzaꞌ: —¿Abꞌil qꞌuꞌl bꞌaꞌnla poloxh saj qꞌu toksaꞌm niileꞌ tziꞌ? Utz ¿til vetmotxkꞌaskuꞌl?— Texh ve.
14 Ech aatz in, val te ech tzaꞌ: —Unbꞌaal, axh ootzajin tetz abꞌil.— Texhin te.
Utz tal ve ech tzaꞌ: —Aatz qꞌu aanima tziꞌ, aꞌ qꞌuꞌl vetpaal tu u mam kꞌaxkꞌo atziꞌ. Utz vettxꞌaaleꞌl qꞌul ipaav tu vikajal u Chelem Karneꞌl. Echixeꞌat txꞌaatxꞌochi utz, bꞌaꞌnla poloxh saj qꞌu toksaꞌm tziꞌ. 15 Ech tokeꞌ jolol atoꞌk vatz u kꞌujlebꞌal tetz iqꞌesalail u Tioxh. Utz qꞌiils aqꞌbꞌal nitoksa iqꞌii u Tioxh tu vaꞌl atilka. Utz aatz u Tioxh vaꞌl kꞌujlel tu u kꞌujlebꞌal tetz mam qꞌesala, satilbꞌe satoksa sikꞌatza.
16 Ech yeꞌkan samotxkam tu vaꞌy, tu tzaji tziꞌl. Nikoꞌxh u qꞌii saꞌtereꞌnkojkꞌachon tziꞌ. Utz yeꞌkan sakam tu tzꞌaꞌ. 17 Tan aꞌ saxeen; aꞌ sailbꞌen u Chelem Karneꞌl, vaꞌl atil xoꞌl qꞌu kꞌujlebꞌal tetz qꞌesala. Aꞌ siꞌiqꞌon ibꞌey. Seꞌntaqꞌ taaꞌ tu chun aꞌ tetz bꞌenqꞌii bꞌensaj. Utz u Tioxh sasuun qꞌu taꞌl bꞌaqꞌ iatz.— Texhtuꞌ.
8U teesal u jujvaꞌ sello, jujvaꞌt mam choobꞌal paavsaul taqꞌo
1 Uncheeꞌ aatz teesa u jujvaꞌ sello u Chelem Karneꞌl, yakich uchoj maꞌl tzꞌineꞌchil tu Amlika, kamal nikꞌamoj oora. 2 Ech vil jujvaꞌl qꞌu aanjel txaklich vatz u Tioxh. Utz aqꞌax jujvaꞌl trompeta te, jununil tetz.
3 Utz ul vaꞌt u aanjel. Txakeꞌ vatz u nachbꞌal Tioxh. Iqꞌomich maꞌl kuꞌebꞌal kaxhlaan pom tiqꞌabꞌ, bꞌaꞌnla qꞌan chꞌichꞌ. Utz sibꞌla chit kaxhlaan pom aqꞌax te. Sitzꞌeꞌsa jeꞌ viꞌ u nachbꞌal Tioxh vaꞌl qꞌan chꞌichꞌ vatz u kꞌujlebꞌal tetz mam qꞌesala. Aꞌ satoksav xoꞌl viqꞌilat isikꞌlet Tioxh qꞌu niman tetz u Jesuus. 4 Ech jeꞌ isibꞌel u kaxhlaan pom vaꞌl nichitzꞌeꞌ tu tzꞌeꞌsabꞌ kaxhlaan pom tiqꞌabꞌ u aanjel utz, jeꞌop vatz Tioxh, tuchꞌ viqꞌilat isikꞌlet Tioxh qꞌu niman tetz u Jesuus. 5 Ech inoosa kuꞌ tereꞌn txaꞌ xamal u aanjel tu u tzꞌeꞌsabꞌ ikaxhlaan pom. Aꞌ tiqꞌov eluꞌl viꞌ u nachbꞌal Tioxh. Ech ikꞌon kuꞌl u tzꞌeꞌsabꞌ kaxhlaan pom vatz txꞌavaꞌ. Ech yakich tininunoj u vatz amlika txꞌavaꞌ. Uch mamaj qꞌeqꞌuꞌm. El itzꞌnaꞌbꞌ. Utz mam kabꞌnaano paali.
U toqꞌsal jujvaꞌl qꞌu trompeta, choobꞌal paav nital junun
6 Ech aatz tek jujvaꞌl qꞌu aanjel qꞌuꞌl maꞌtich taqꞌax trompeta te, motx iꞌan liista qꞌul itrompeta tiꞌ toqꞌsaleꞌ. 7 Aatz u bꞌaxa aanjel, toqꞌsa vitrompeta. Utz kuꞌ sajbꞌatz. Kuꞌl xamal yuuel tuchꞌ kaj. Aꞌ kꞌonaxku kuꞌl vatz txꞌavaꞌ. Utz tzꞌeꞌ untanul tu ox tanul qꞌu tzeꞌ, tuchꞌ kajay qꞌu chaxa xajtzeꞌ.
8 Aatz u kaꞌbꞌ aanjel, toqꞌsa vitrompeta. Utz yakich kꞌonax bꞌen maꞌl vaꞌl tu mar echaꞌ mam muunte tiloneꞌ. Techal itiniꞌpun xamal tiꞌ. Ech yakich bꞌenoj kajal, untanul tu ox tanul u mar. 9 Ech yakich kamoj untanul tu ox tanul qꞌu itzꞌlich kam tu mar. Utz yakich yuchꞌaxoj untanul tu ox tanul qꞌu vaarko.
10 Aatz u toxvaꞌ aanjel, toqꞌsa vitrompeta. Utz yakich chajpoj kuꞌl maꞌl u mam txꞌumiꞌl tu amlika. Techal toyveꞌ. Echaꞌ toyvu maꞌj mam txijtxubꞌal. Utz kuꞌ viꞌ untanul, tu ox tanul qꞌu nimaꞌ utz, kuꞌ viꞌ untanul tu ox tanul qꞌu chunil aꞌ. 11 Aatz u txꞌumiꞌl vaꞌl chajpi, aꞌ ibꞌii Kꞌay. Echixeꞌat untanul bꞌens kꞌay tu ox tanul qꞌu aꞌ. Ech sibꞌ aanima kam tu qꞌu aꞌ tziꞌ. Tan kꞌaybꞌi.
12 Aatz u kaavaꞌ aanjel, toqꞌsa vitrompeta. Utz yakich yanoj qꞌu txijtxubꞌal atil tu amlika taqꞌo. Ukentu untanul tu ox tanul itxijtxuneꞌ. Yeꞌt txijtxuni, kꞌuxh u qꞌii, kꞌuxh u ichꞌ utz, kꞌuxh qꞌu txꞌumiꞌl. Ech 4 oora soꞌok aqꞌbꞌal tu maꞌl qꞌii taqꞌo. Utz 4 oora paat yeꞌk satxijtxun u ichꞌ tuchꞌ qꞌu txꞌumiꞌl tu aqꞌbꞌal siꞌan majte.
13 Uncheeꞌ sajinin utz, aꞌ tek vil ipaal maꞌl u xichꞌ tu amlika. Utz vabꞌi iqetun taltu ech tzaꞌ: —¡Tilayol, tilayol, tilayol sayaꞌk qꞌu aanima tu u vatz txꞌavaꞌ tu qꞌu kam suꞌul tiꞌ aas latoqꞌsa qꞌu trompeta oxvaꞌl qꞌu aanjel!— Texhtuꞌ.
91 Ech aatz u toꞌvaꞌ aanjel, toqꞌsa vitrompeta. Utz aꞌ tek vil ichajpu maꞌl u txꞌumiꞌl tu amlika; kuꞌ vatz txꞌavaꞌ. Aqꞌax tzii te sijaj u mam jul. 2 Utz aatz ijaj u mam jul, yakich bꞌukinoj ijeꞌul mam sibꞌ tuul. Echaꞌ ibꞌukin ijeꞌ isibꞌel maꞌj mam oorno. Utz yakich qꞌejbꞌoj iatz u qꞌii tuchꞌ u kajiqꞌ taqꞌo.+ 9:2 Choktaj U Lucas 8.31.3 Ech motx chee eluꞌl unjolol txokop xoꞌl qꞌu sibꞌ tziꞌ, echaꞌ sakꞌ. Utz motx ipaxi paal tibꞌ tu u vatz amlika txꞌavaꞌ. Ech aqꞌax tzii te aas ech ichiꞌon chꞌit jee siꞌaneꞌ. 4 Alax te aas taꞌxh sichiꞌ qꞌu aanima qꞌuꞌl yeꞌk u echlal tetz u Tioxh tipala. Pek yeꞌk siyansa qꞌu chaxa xajtzeꞌ tu vatz txꞌavaꞌ. Nikoꞌxh vixaj qꞌu mamaj tzeꞌ. 5 Pek yeꞌt aqꞌax tzii te aas siyatzꞌ qꞌu aanima. Pek sakoꞌxhtoksa bꞌoj tu choo tu peena tu oꞌvaꞌl ichꞌ. Aatz u chiꞌom sanachax tu vichiꞌbꞌal, echaꞌ ichiꞌon ichiꞌbꞌal chꞌit jee aas nichiꞌ aanima.
6 Ech aatz tek qꞌu aanima siꞌan tu qꞌu qꞌii tziꞌ, saꞌtekmotxichok ikameꞌ. Saꞌtektachva kamchil; loqꞌ saꞌtereꞌnkojkami. Tan yeꞌkan u kamchil sauchi.
7 Aatz qꞌu txokop tziꞌ, echaꞌ chee aas chꞌiam texh niꞌan tu bꞌenchil tu chꞌaꞌo. Jolol atich jeꞌ maꞌl u kam tiviꞌ, echaꞌ bꞌaꞌnla qꞌan chꞌichꞌ koroona. Aatz qꞌul ivatz, echaꞌ vatz aanima. 8 Atich xiꞌl iviꞌ, echaꞌ xiꞌl iviꞌ ixoj. Utz aatz qꞌu tee, echaꞌ ivaal tee bꞌalam. 9 Jolol atich ok ichaleꞌk tetz bꞌanbꞌal chꞌaꞌo, echaꞌ chꞌichꞌ. Utz aatz u toqꞌ tuul qꞌul ixichꞌ, echaꞌ ilekꞌnaꞌn ibꞌen chee tuchꞌ kareꞌt aas vitꞌasp ibꞌen tu chꞌaꞌo. 10 Atich ijee, echaꞌ ijee chꞌit jee. Utz aꞌ atik vichiꞌbꞌal tziꞌ. Ech tu qꞌul ijee siꞌanvu tu qꞌu aanima tu oꞌvaꞌl ichꞌ. 11 Aatz viqꞌesal tixoꞌl utz, ayaꞌ maꞌl u aanjel tetz txꞌiꞌliꞌinaj vaꞌl jeꞌul tu u mam jul. Utz Abadoon ibꞌii tu yolbꞌal hebreo. Pek aatz ibꞌii tu yolbꞌal griego utz, Apolioon.+ 9:11 Aatz u yol “Apolioon”, “yansanal” chu u tokebꞌal.
12 Aatz u bꞌaxa tilayolla mam choobꞌal paav, paalya. Pek kaꞌvaꞌt mam choobꞌal paav tul tiꞌ.
13 Uncheeꞌ aatz u vaajaj aanjel, toqꞌsa vitrompeta. Aꞌ tek vabꞌi teluꞌl maꞌl u yol xoꞌl junun qꞌu xoobꞌal iviꞌ u nachbꞌal Tioxh qꞌuꞌl echaꞌ tukꞌ txokop. Ayaꞌ u nachbꞌal vaꞌl bꞌaꞌnla qꞌan chꞌichꞌ atil vatz Tioxh.+ 9:13 Choktaj u Eexodo 27.2; 29.12.14 Utz tal bꞌen tu u vaajaj aanjel ech tzaꞌ, vaꞌl atich u trompeta tzixeꞌ: —Chiteꞌl kaavaꞌl qꞌu aanjel qꞌuꞌl qitzel tziꞌ u mam nimaꞌ Eeufrates.— Texh u yol. 15 Ech ichitlu kaavaꞌl qꞌu aanjel qꞌuꞌl nichnalichꞌianeꞌ. Utz aꞌ texh nichmotxichꞌia topon u oora, u qꞌii, u ichꞌ utz, u yaꞌbꞌ. Ech siyatzꞌ untanul xoꞌl ox tanul qꞌu aanima. 16 Utz vabꞌi u tachul qꞌul isol qꞌuꞌl atich jeꞌ tiꞌ chee; maꞌlen 200,000,000.
17 Uncheeꞌ ech tilax qꞌu chee unbꞌan tu visioon tzaꞌ. Atich jeꞌ sol tiꞌ. Aatz qꞌu sol, jolol atich ok ichꞌichꞌ chaleꞌk, bꞌanbꞌal chꞌaꞌo echaꞌ xamal. Utz ech tiloneꞌ u sivan safiro. Ech tilon qꞌol majte. Aatz qꞌul iviꞌ qꞌu chee tan, echaꞌ viꞌ bꞌalam. Utz niteluꞌl xamal titziꞌ, tuchꞌ sibꞌ utz, tuchꞌ qꞌol.+ 9:17 Aatz u bꞌaꞌnla sivan safiro, xolel tiloneꞌ, qꞌanqꞌo, kajko utz, xayiꞌ.18 Ech kam untanul tu ox tanul qꞌu aanima, tu oxvaꞌl qꞌu yatzꞌbꞌal qꞌuꞌl nichteluꞌl titziꞌ qꞌu chee tziꞌ. Ayaꞌ u xamal, u sibꞌ tuchꞌ u qꞌol. 19 Tan aatz viyatzꞌbꞌal qꞌu chee, ayeꞌn titziꞌ utz, ayeꞌn tijee. Aatz qꞌul ijee, atil iviꞌ, echaꞌ txꞌiꞌla txokop. Ech aꞌ nichmotxitzotiv qꞌu aanima tuul.
20 Uncheeꞌ aatz tereꞌn qꞌu aanima qꞌuꞌl yeꞌt motx kam tu qꞌu yatzꞌbꞌal tziꞌ, nikoꞌxh maꞌkojmotxikꞌaxa ikꞌuꞌl tiꞌ qꞌu yeꞌxtxoj nimotxiꞌaneꞌ. Motx koj iyaꞌsa tok iqꞌii qꞌu tioxhil txꞌiꞌliꞌinaj, tuchꞌ qꞌu bꞌanich tioxh qꞌuꞌl bꞌaꞌnla qꞌan chꞌichꞌ kuꞌen, bꞌaꞌnla saj chꞌichꞌ kuꞌen, qꞌan chꞌichꞌ kuꞌen utz, tuchꞌ qꞌu bꞌanich tioxh qꞌuꞌl kꞌoxich sivan, kꞌoxich tzeꞌ kuꞌen. Jatu koj sasajini. Jatu koj saꞌabꞌini. Utz saꞌkojitxꞌol xaaom. 21 Utz nikoꞌxh ikꞌaxa koj ikꞌuꞌl tiꞌ qꞌu yatzꞌoꞌm, tiꞌ qꞌu tistanineꞌ, tiꞌ qꞌu eesaibꞌ tu bꞌey tuchꞌ aanima yitꞌ ikꞌulel koj utz, tiꞌ qꞌu telaqꞌ.
10U taqꞌax u uꞌ tu u Xhaniꞌan u aanjel
1 Uncheeꞌ vil ikuꞌl vaꞌt u aanjel tu Amlika. Aqꞌel iviꞌ. Sutimich tiꞌaj tu sutzꞌ. Utz atich jeꞌ txakbꞌanchꞌel tiviꞌ. Aatz vivatz, ech iribꞌuneꞌ u qꞌii tziꞌ. Pek aatz qꞌu tajan, echaꞌ lankin xamal. 2 Atich maꞌl tal uꞌ tiqꞌabꞌ, jajlele. Ech aatz kuꞌl, itxakbꞌaꞌ u sebꞌal tajan viꞌ u mar. Utz itxakbꞌaꞌ vimax vatz txꞌavaꞌ. 3 Utz qetun tu yol. Ayaꞌl aꞌ iqꞌeqꞌun bꞌalam iꞌana. Utz taꞌxh veet iqꞌeqꞌuneꞌ, juj tanul mam tzaqꞌabꞌchꞌeꞌn kaꞌpajun qꞌul iyol.
4 Uncheeꞌ taꞌxh veet ikaꞌpajul qꞌul iyol tu jujvaꞌl qꞌu mam tzaqꞌabꞌchꞌeꞌn, siꞌchuntzꞌibꞌa vala. Pek aꞌ tek vabꞌi vaꞌt u yol tu Amlika, tal ve ech tzaꞌ: —Atoj koꞌn qꞌu yol sakꞌuꞌl tziꞌ, qꞌuꞌl vettal jujvaꞌl qꞌu mam tzaqꞌabꞌchꞌeꞌn. Yeꞌk satzꞌibꞌa.— Texh ve.
5 Ech aatz u aanjel vaꞌl vil itxakbꞌaꞌt maꞌl tajan viꞌ u mar utz, itxakbꞌaꞌ vaꞌt vatz txꞌavaꞌ. Ilak jeꞌ u sebꞌal iqꞌabꞌ tu amlika. 6 Utz ech toksat vibꞌii u Tioxh tu qꞌul iyol, u Tioxh vaꞌl bꞌenqꞌii bꞌensaj tatineꞌ, vaꞌl bꞌanon u amlika tuchꞌ kajay qꞌu kam atil tuul, u bꞌanol tetz u txꞌavaꞌ tuchꞌ kajay qꞌu kam atil tuul majte utz, u bꞌanol tetz u mar tuchꞌ kajay qꞌu kam atil tuul. Tal u aanjel ech tzaꞌ: —Yeꞌxhkam texh sachꞌiali. 7 Pek aꞌ texh soꞌopon u qꞌii aas satoqꞌsa vitrompeta u jujvaꞌ aanjel. Satzojpu kajay qꞌu kam bꞌanich nal tiꞌ tu u Tioxh, qꞌuꞌl yitꞌ ootzajimal koj tu aanima. Ayaꞌ qꞌu kam bꞌaxabꞌsamal nal el talax titziꞌ qꞌu taqꞌonom u Tioxh, ayaꞌ qꞌu alol tetz u yolbꞌal Tioxh.— Texh u aanjel.
8 Ech vabꞌi paj u viꞌ vaꞌl vabꞌi tu amlika bꞌaxa. Tal ve ech tzaꞌ: —Kuxh iqꞌo u tal uꞌ jajlel tuul tiqꞌabꞌ u aanjel tziꞌ, vaꞌl maꞌl tajan txaklel viꞌ mar utz, vaꞌt tajan txaklel vatz txꞌavaꞌ.— Texhtuꞌ.
9 Ech bꞌenin xeꞌ u aanjel utz, unjaj u tal uꞌ te. Utz tal ve ech tzaꞌ: —Ila utz, echbꞌu. Chiꞌ tokoꞌp tatziꞌ siꞌaneꞌ, echaꞌ taꞌl kabꞌ. Pek sikꞌaybꞌixsa tuul avuul.— Texhtuꞌ.
10 Ech unkꞌul u tal uꞌ tiqꞌabꞌ u aanjel utz, vechbꞌu. Chiꞌ tokoꞌp tuntziꞌ, echaꞌ taꞌl kabꞌ. Pek taꞌxh veet vechbꞌu, ikꞌaybꞌixsa tuul vuul.+ 10:10 Choktaj u Ezequieel 2.8-10; 3.1-3.
11 Ech alax ve ech tzaꞌ: —Ministeer saal qꞌu kam niileꞌ naabꞌi tzaꞌ. Saal xoꞌlaj tenam, xoꞌl mamaj tenam, xoꞌl aanima aas jatvatzul koꞌn iyolbꞌal utz, xoꞌl ijlenal.— Texhtuꞌ.
11Qꞌu kam siꞌan kaꞌvaꞌl qꞌu texhtiigo
1 Ech aqꞌax maꞌl u aa ve, echabꞌal echaꞌ bꞌaara. Utz alax ve ech tzaꞌ: —Kuxh utz, echa u tuuleval u totztioxh, tuchꞌ u nachbꞌal Tioxh. Utz laach majte jatvaꞌl qꞌu aanima qꞌuꞌl nimotxtoksa iqꞌii u Tioxh tziꞌ.+ 11:1 Choktaj u Ezequieel 40.3; u Zacarias 2.1-2.2 Pek aatz u vatz iqꞌanalil u totztioxh, aqꞌka; yeꞌk seecha. Tan oksamaltekka tikuenta qꞌu puera aanima qꞌuꞌl yeꞌ tootzaj Tioxh. Utz kam koꞌn toj motx iꞌan tu u tioxhla tenam tu maꞌl 42 ichꞌ. 3 Pek savaqꞌ tijleꞌm kaꞌvaꞌl qꞌul untexhtiigo tiꞌ talax qꞌul unyol tu maꞌl 1,260 qꞌii. Sibꞌaxabꞌsa qꞌul unyol. Satoksa toksaꞌm tetz txumuꞌm tuul sibꞌaxabꞌsa qꞌul unyol.— Texhtuꞌ.
4 Aatz kaꞌvaꞌl qꞌu texhtiigo, aꞌ nikꞌam tiꞌ kaꞌvaꞌl qꞌu tzeꞌ olivo. Utz nikꞌam tiꞌ kaꞌvaꞌl qꞌu tatibꞌal txijtxubꞌal majte qꞌuꞌl atil vatz u Tioxh viBꞌaal u vatz txꞌavaꞌ.+ 11:4 Choktaj u Zacarias 4.11-14.5 Ech oj abꞌil maꞌj kam siꞌan tu qꞌu texhtiigo sitxumeꞌ tziꞌ, kamchil siꞌaneꞌ. Xamal saeluꞌl titziꞌ qꞌu texhtiigo tiꞌ iyatzꞌaxeꞌ. Ech ikam kajay qꞌuꞌl ikoontra siꞌaneꞌ. 6 Tan atil tijleꞌm aas yeꞌk sachajpu jabꞌal tu amlika taqꞌo, jatvaꞌl qꞌii satal qꞌul iyol u Tioxh. Atil tijleꞌm aas sataqꞌ bꞌens kajal qꞌu aꞌ. Utz jatvatzul koꞌn choobꞌal paav sataqꞌ kuꞌ tiꞌ qꞌu aanima tu u vatz amlika txꞌavaꞌ. Samotxiꞌaneꞌ jatpajul isaꞌ.
7 Uncheeꞌ aatz samotxtzojpu tiꞌ talax qꞌul iyol u Tioxh, sachee jeꞌul tu u mam jul maꞌl u xaꞌebꞌalla txokop. Utz siꞌan chꞌaꞌo tuchꞌ qꞌu texhtiigo tziꞌ. Ech sasubꞌli, sayatzꞌli. 8 Ech aatz qꞌul ichiꞌl, samotxkaa tinikꞌa u mam tenam Jerusaleen, vaꞌl jeꞌk u kuBꞌaal Jesuus vatz kurus, vaꞌl aꞌ nikꞌam tiꞌ vibꞌii kaꞌvaꞌl qꞌu aa paavla chaj tenam, u Sodoma tuchꞌ u Egipto. 9 Ech oxvaꞌl qꞌii tuchꞌ unnikꞌamte siꞌan kuꞌ tu bꞌey. Yeꞌk saꞌaqꞌax tzii samujli. Kajay aanima sailon, jatvatzul koꞌn iyolbꞌal, jatvatzul koꞌn aanimail, tu mamaj tenam utz, tu talaj tenam. 10 Ech aatz qꞌu aanima tu u vatz amlika txꞌavaꞌ, saꞌxhmotxtxuqꞌtxun tiꞌ aas maꞌt ikam kaꞌvaꞌl qꞌu texhtiigo tziꞌ. Saꞌxhmotxchiꞌbꞌ taqꞌo. Samotxtaqꞌ bꞌen tibꞌ toya sivatzaj tiꞌ vikamebꞌal. Tan nojchit maꞌtich motx ipaal tu kꞌaxkꞌo taqꞌo.
11 Ech taꞌxh sael oxvaꞌl qꞌii tuchꞌ unnikꞌamte ikam qꞌu texhtiigo, saqꞌaavulsal taanxelal tu u Tioxh. Ech samotxlakpi; samotxchꞌineꞌi. Ech mam xoꞌval saok kꞌatz qꞌu aanima qꞌuꞌl sailon. 12 Utz ech samotxtabꞌi maꞌl u yol tu Amlika, satal te ech tzaꞌ: —¡Jeꞌojulex tzaꞌ!— Chaj te. Ech samotxbꞌenjeꞌ tu Amlika tu sutzꞌ. Utz sailax tu qꞌu koontrain tetz.
13 Ech aatz siꞌan tu u muꞌkꞌul tziꞌ, yak sapaaloj maꞌl mam kꞌabꞌnaano tu u tenam vaꞌl samotxelkubꞌen. Utz aatz untanul tu laa tanul u tenam, yak sabꞌenoj tu qootzꞌ. Utz sakam 7,000 aanima. Aatz tereꞌn qꞌu aanima samotxkaai, samotxxoꞌvi. Utz saꞌtektoksa iqꞌii u Tioxh tu Amlika.
14 Paalyu u kaꞌbꞌ tilayolla mam choobꞌal paav. Loqꞌ tul u toxvaꞌ mam choobꞌal paav vaꞌl tilayol.
U toqꞌsal u jujvaꞌ trompeta, nixeꞌt viQꞌesalail u Tioxh
15 Aatz u jujvaꞌ aanjel, toqꞌsa vitrompeta. Utz aꞌ tek vabꞌi tuch mam qꞌeqꞌuꞌm tu Amlika. Ech nichtal tzaꞌ:
—Aatz qꞌu ijlenalil
tu u vatz amlika txꞌavaꞌ kajayil,
okyu tiqꞌabꞌ u kuBꞌaals Amlika,
tuchꞌ u Cristo.
Ech siꞌan ijlenalil bꞌenamen,
bꞌenqꞌii bꞌensaj.—
Texhtuꞌ.
16 Uncheeꞌ aatz qꞌu 24 qꞌesala qꞌuꞌl kꞌujlich tu qꞌu kꞌujlebꞌal tetz qꞌesala vatz u Tioxh, motx pecheꞌi. Motx taqꞌ kuꞌ ivatz utz, toksa iqꞌii u Tioxh. 17 Motx tal ech tzaꞌ:
—Nikukꞌamabꞌe see kuBꞌaals Amlika,
Mam Tioxh.
Tan, axh u Tioxh tetz cheel,
tetz oꞌte utz,
tetz taabꞌaꞌbꞌen.
Tan okyu u mam iijleꞌm.
Xeꞌti val iijlenalil tu u vatz amlika txꞌavaꞌ.
18 Tan kꞌuxh nilakpu iviꞌ qꞌu mamaj tenam saiꞌ,
lakpi aviꞌ majte.
Utz cheel u tiempo aas satxꞌol inujul qꞌu kamnaj.
Cheel vaꞌl saaqꞌ vibꞌaꞌnla choobꞌal
kajay qꞌul aaqꞌonom,
qꞌu alol tetz vayolbꞌal,
tuchꞌ qꞌu niman tetz u Jesuus
utz, jatvaꞌl chit qꞌu nimaj,
chꞌooaj qꞌuꞌl atil aatin siatz.
Pek sasotzsa qꞌu yuchꞌul
tu u vatz amlika txꞌavaꞌ.—
Texhtuꞌ.
19 Uncheeꞌ aꞌ tek vil ijajpu u tatibꞌal u Tioxh vaꞌl tu Amlika. Utz naꞌvit eluꞌl u tioxhla kaaxha vaꞌl atil u nukꞌuꞌm tuul. Utz el itzꞌnaꞌbꞌ tu u vatz txꞌavaꞌ. Uch mam qꞌeqꞌuꞌm. Tininun u vatz txꞌavaꞌ. Paal maꞌl mam kabꞌnaano. Utz kaana sajbꞌatz kuꞌi.
12Vibꞌantu ikꞌuꞌl u Dragoon tiꞌ u ixoj vaꞌl aꞌ nikꞌam tiꞌ qꞌu Israeel
1 Uncheeꞌ aꞌ tek vil ichee maꞌl u mam xheenya tu amlika. Vil maꞌl u ixoj, techal iribꞌun tiꞌaj. Qꞌii u toksaꞌm. Atilka u ichꞌ jaqꞌ tajan. Utz atich jeꞌ maꞌl ikoroona tiviꞌ, kabꞌlaal txꞌumiꞌl tzolchel ok tiꞌ.+ 12:1 Nitalcheꞌ aas aꞌ nikꞌam tiꞌ u Israeel u ixoj tziꞌ, vitenam u Tioxh. Aatz u qꞌii tuchꞌ u ichꞌ, aꞌ nikꞌam tiꞌ qꞌesala oj txutxa bꞌaala. Utz aatz qꞌu txꞌumiꞌl, aꞌ nikꞌam tiꞌ aanima aas sibꞌ tijleꞌm. Nital tzaꞌ aas kabꞌlaal txꞌumiꞌl atoꞌk tiꞌ vikoroona u ixoj. Aatz u kabꞌlaal tziꞌ, aꞌ nikꞌam tiꞌ kabꞌlaal qꞌul ikꞌaol u Jacoob, ayaꞌ vikꞌuy imam kajay qꞌu Israeel. Nimnaꞌl tu u Geenesis 37.9 tuchꞌ tu u Jeremias 31.35-36. Aatz qꞌu kam qꞌuꞌl atil kꞌatz u ixoj, ayaꞌ u qꞌii, u ichꞌ tuchꞌ qꞌu txꞌumiꞌl, jolol amlikail kam. Pek aatz qꞌu kam atil tiꞌ u Dragoon, ayaꞌ jujvaꞌl qꞌu viꞌ tuchꞌ laval qꞌu ukꞌ, jolol vatz txꞌavaꞌ kamil.2 Aatz u ixoj tziꞌ, atich tu tiichajla yaabꞌil. Utz aalich texh topon u tiempo aas siꞌan bꞌaꞌn. Vaꞌl iqꞌeqꞌun tu chiꞌom.
3 Ech aꞌ tepaj vil ichee vaꞌt u xheenya tu amlika. Maꞌl u mam txokop, Dragoon ibꞌii. Kajiꞌ tiloneꞌ. Jujvaꞌlen iviꞌ utz, laval tukꞌ. Atil jeꞌ ikoroona tu junun qꞌul iviꞌ tziꞌ.+ 12:3 Kajiꞌ tilon u Dragoon; techlal kꞌaꞌnal. Aꞌ nikꞌam tiꞌ maꞌj txokop qꞌuꞌl juxuibꞌ ibꞌenaꞌ; echaꞌ maꞌj kan, oj maꞌj txokpil aꞌ. Choktaj u Jeremias 31.35; U Tio 24.29-30; u Geenesis 3.15.4 Utz paal ijuxu untanul tu ox tanul qꞌu txꞌumiꞌl tu amlika tu vijee. Ikꞌon kuꞌl vatz txꞌavaꞌ. Ech txakeꞌ u Dragoon vatz u ixoj vaꞌl siꞌchtekitzꞌpu u titzꞌin. Tan sichiꞌeꞌ nichtaleꞌ, taꞌxh siꞌitzꞌpi.
5 Ech itzꞌpu u titzꞌin u ixoj tziꞌ. Tal xiak. Utz saꞌnaliꞌan ijlenalil. Echaꞌ tu chꞌichꞌ bꞌaara satoksav qꞌu aanima tu jik tu kajay qꞌu tenam. Pek ul eesaloj bꞌen utz, ex aqꞌaxoj vatz u Tioxh, vatz vikꞌujlebꞌal tetz mam iqꞌesalail. 6 Utz aatz u ixoj tziꞌ, elbꞌen. Ex atoj tu maꞌl u tzꞌinlich tzaji txꞌavaꞌ tu vaꞌl bꞌanichnalku tuch tatibꞌal tu u Tioxh. Utz aꞌ siꞌilbꞌelik tziꞌ tu maꞌl 1,260 qꞌii.+ 12:6 Aatz u 1,260 qꞌii nital tzaꞌ, oxvaꞌl yaꞌbꞌ tuchꞌ unnikꞌamte niꞌelka.
7 Ech xeꞌt maꞌl chꞌaꞌo tu amlika. Aatz u Meꞌk, u qꞌesal aanjel, molomal tibꞌ tuchꞌ qꞌul iaanjel iꞌan chꞌaꞌo tuchꞌ u Dragoon.+ 12:7 Aatz u tokebꞌal u bꞌii “Meꞌk” utz, “Abꞌil koj echaꞌ u Tioxh” chia. Niyolon u Danieel tiꞌ u Meꞌk majte tziꞌ. Choktaj u Danieel 12.1-2; 10.12-14; U Judas v. 9. Utz aatz u Dragoon, ayaꞌ u txꞌiꞌliꞌinaj. Molomal tibꞌ tuchꞌ qꞌul iaanjel majte. 8 Pek aatz u txꞌiꞌliꞌinaj yeꞌt oleꞌ tuchꞌ qꞌul imol. Subꞌaxi. Yeꞌt kaa tu amlika. 9 Tan kꞌonax kuꞌl u mam Dragoon vatz txꞌavaꞌ. Ayaꞌ u txꞌiꞌliꞌinaj, vaꞌl Diablo utz, Satanaas ibꞌii. Tan aꞌ vaꞌl nieesan kajay qꞌu aanima tu bꞌey qꞌuꞌl atil tu u vatz amlika txꞌavaꞌ. Aꞌ imol qꞌul iaanjel bꞌajax kuꞌl vatz txꞌavaꞌ.
10 Ech vabꞌi tek maꞌl u yol tu Amlika. Techal iqetun taltu ech tzaꞌ:
—¡Aatz cheel, oponyu u tiempo aas elyoꞌ vatz u kukoontra! Oponyu u mam iyakꞌil u Tioxh. Nitekiꞌan viQꞌesalail. ¡Aqꞌaxyu u tijleꞌm tu viTxaaom! Bꞌajaxy el u txꞌiꞌliꞌinaj vaꞌl nichxochon vatz Tioxh qꞌiils aqꞌbꞌal qꞌu kumol niman tetz u Jesuus.
11 Pek vetmotxisubꞌlu u txꞌiꞌliꞌinaj tu vikajal u Chelem Karneꞌl utz, tu u taltu u yolbꞌal Tioxh. Yeꞌn toksa tetz u vatz iqꞌii isaj tu u vatz amlika txꞌavaꞌ. Utz yeꞌn ixoꞌva u kamchil.
12 ¡Echixeꞌat txuqꞌtxunojex Amlika utz, jatvaꞌl ex atilex tuul! Pek tilayol sayaꞌkꞌex aanima qꞌuꞌl abꞌil ex atilex tu u vatz txꞌavaꞌ tuchꞌ qꞌuꞌl tu mar. Tan kꞌonaxyu koꞌp u txꞌiꞌliꞌinaj texoꞌl. Utz techal ilakp iviꞌ tan, tootzajle aas bꞌiit koꞌxh siꞌaneꞌ, ech sabꞌen tu choobꞌal paav.—
Texhtuꞌ.
13 Uncheeꞌ taꞌxh til u Dragoon aas maꞌtich ikꞌonax kuꞌl vatz txꞌavaꞌ, aꞌ tek ex tojcha u ixoj vaꞌl maꞌtich titzꞌpu u tal titzꞌin tal xiak. 14 Pek aatz u Tioxh tan, taqꞌ kaꞌvaꞌl ixichꞌ u ixoj, echaꞌ tetz mam xichꞌ. Ech saxichꞌan telbꞌen vatz u Dragoon vaꞌl echaꞌ txꞌiꞌla txokop. Seꞌnikol tibꞌ tu u tzꞌinlich tzaji txꞌavaꞌ, tu vaꞌl atilku u tatibꞌal. Tan aꞌ siꞌilbꞌelik tziꞌ tu oxvaꞌl yaꞌbꞌ tuchꞌ unnikꞌamte. 15 Ech taꞌxh til ibꞌen u ixoj u Dragoon, ixaꞌva jeꞌul mam aꞌ titziꞌ, echaꞌ nimaꞌ. Ech sapaaltija u ixoj nichtaleꞌ. 16 Pek aatz u txꞌavaꞌ, iloch u ixoj. Ijajpu koꞌn tibꞌ. Utz bꞌen u nimaꞌ tuul vaꞌl ixaꞌva jeꞌul u Dragoon titziꞌ. 17 Ech lakp iviꞌ u Dragoon tiꞌ u ixoj tziꞌ. Utz aꞌ tek ex iꞌan chꞌaꞌo tuchꞌ qꞌul ituꞌxh ixalam u ixoj. Ayaꞌ jatvaꞌl qꞌu niman tetz qꞌul imantaar u Tioxh utz, qꞌuꞌl nibꞌanon qꞌu kam qꞌuꞌl tal u Jesucristo. Ech aꞌ tek txakeꞌkka u Dragoon viꞌ u sanaabꞌ tziꞌ u mar.
13Vichee jeꞌul maꞌl u mam txokoptu u mar
1 Ech aꞌ tepaj vil ichee jeꞌul vaꞌt u mam xaꞌebꞌalla txokop tu mar. Jujvaꞌlich iviꞌ. Utz lavalen tukꞌ. Atil jeꞌ jununil ikoroona junun qꞌu tukꞌ tziꞌ. Utz tzꞌibꞌamal ok yol tiꞌ junun qꞌul iviꞌ aas Tioxh niyoqꞌeꞌ. 2 Aatz u txokop vaꞌl vila, echaꞌ xhuꞌyiꞌ bꞌalam tiloneꞌ. Pek aatz qꞌu tajan, echaꞌ tajan oso. Utz aatz vitziꞌ, echaꞌ itziꞌ qꞌaniꞌ bꞌalam. Ech vil taqꞌax iyakꞌil tu u Dragoon. Taqꞌ vichꞌuxhlebꞌal te, bꞌanbꞌal iqꞌesalail. Utz taqꞌ mam tijleꞌm. 3 Utz atich maꞌl mam takꞌonbꞌeꞌm u xaꞌebꞌalla txokop tu maꞌl qꞌuꞌl iviꞌ, vila tziꞌ, aas kamnajich taqꞌo. Pek iꞌan bꞌaꞌn u takꞌonbꞌeꞌm. Ech mam tenam tzꞌejx ikꞌuꞌl taqꞌo tu u vatz amlika txꞌavaꞌ. Ech tek motx ibꞌen ikꞌuꞌl tiꞌ. 4 Motx toksa iqꞌii u Dragoon tan, taqꞌ u tijleꞌm tu u xaꞌebꞌalla txokop. Ech motx toksa iqꞌii u xaꞌebꞌalla txokop ech tzaꞌ: —Yeꞌxhabꞌil koꞌxh maꞌj echaꞌ u xaꞌebꞌalla txokop tziꞌ. Tan abꞌil koj maꞌj sasubꞌun tu chꞌaꞌo.— Texhtuꞌ.
5 Uncheeꞌ aatz u xaꞌebꞌalla txokop, aqꞌax tzii te aas satoksajeꞌ iqꞌii vatz u Tioxh. Utz sateesa iqꞌii majte. Aqꞌax tijleꞌm aas siꞌaneꞌ kam isaꞌ tu 42 ichꞌ. 6 Uncheeꞌ ech xeꞌt iqexeman itziꞌ tiꞌ iyoqꞌax u Tioxh, tiꞌ vibꞌii utz, tiꞌ u tatibꞌal tuchꞌ qꞌu niman tetz atil tu Amlika. 7 Aqꞌax tzii te majte aas siꞌan chꞌaꞌo tuchꞌ qꞌu niman tetz u Jesuus utz, sisubꞌeꞌ. Aqꞌax tijleꞌm viꞌ jatvatzul qꞌu aanima atile, jatvatzul qꞌu talaj tenam, qꞌu mamaj tenam utz, jatvatzul qꞌu yolbꞌal. 8 Ech soꞌoksal iqꞌii u xaꞌebꞌalla txokop tu jankꞌal qꞌu aanima tu vatz amlika txꞌavaꞌ. Ayaꞌ qꞌuꞌl yeꞌ tzꞌibꞌamal ibꞌii xeꞌ qꞌii xeꞌ saj tu u uꞌ tetz atinchil tu bꞌenqꞌii bꞌensaj, vaꞌl tetz u Chelem Karneꞌl vaꞌl yatzꞌax tu u nachbꞌal vatz Tioxh.
9 Abꞌiste ex saꞌabꞌin qꞌu yol tzaꞌ, tzꞌinbꞌaꞌtaj exichin.
10 —Tan abꞌil qꞌuꞌl satxayon bꞌen tu preexhuil,
satxayax bꞌen tu preexhuil.
Abꞌil aꞌ sayatzꞌon tu chꞌichꞌ,
tu chꞌichꞌ sakamku majte.— Chia.
Ech sailchu qꞌu niman tetz u Jesuus, tii tzik atoꞌk kꞌatz u Tioxh utz, kꞌujlel tzik ikꞌuꞌl tiꞌ.
Vichee maꞌl u mam txokoptu u vatz amlika txꞌavaꞌ
11 Uncheeꞌ aꞌ tek vil ichee jeꞌul vaꞌt u kaꞌbꞌ txokop tu txꞌavaꞌ; chuli alol tetz yolbꞌal Tioxh ul iꞌaneꞌ.+ 13:11 Aatz u yol “txokop” nital tzaꞌ, ankoꞌxhtuꞌ vaꞌl “chulin alol tetz u yolbꞌal Tioxh” chu tiꞌ majte. Ankoꞌxh nital maꞌl u kam, kꞌuxh kaꞌvaꞌl ibꞌii nital tu u uꞌ tzaꞌ. Echtzixeꞌt maꞌl koꞌn vibꞌii sakutxakunsa tziꞌ, ech yeꞌk sasotz ikꞌuꞌl u sikꞌlen uꞌ taqꞌo. Choktaj tu u uꞌ tzaꞌ 16.13; 19.20; 20.20. Atich kaꞌvaꞌl tukꞌ, echaꞌ tukꞌ chelem karneꞌl. Loqꞌ aatz viyoloneꞌ, ayaꞌl chituꞌ aꞌ iyolon u Dragoon. 12 Utz echat koꞌxh tijleꞌm u bꞌaxa xaꞌebꞌalla txokop niꞌaneꞌ. Aꞌ niꞌanvoꞌk siatz. Utz kajay qꞌu aanima atil tu u vatz amlika txꞌavaꞌ, nitoksa iqꞌii u bꞌaxa xaꞌebꞌalla txokop taqꞌo, vaꞌl iꞌan bꞌaꞌn tu u takꞌonbꞌeꞌm, vaꞌl kamchil tek siꞌchiꞌan taqꞌo.
13 Ech aatz u chulin alol tetz u yolbꞌal Tioxh tzaꞌ, kam koꞌn mamaj xheenya nikꞌuch vatz aanima. Aal nichichajpixsa xamal tu amlika utz, nikuꞌ vatz txꞌavaꞌ taqꞌo. 14 Utz oleꞌ tiꞌ tel qꞌu aanima tu bꞌey tuchꞌ koꞌxh qꞌu xheenya qꞌuꞌl nichikꞌuch vatz u xaꞌebꞌalla txokop. Utz nichtal tu qꞌu aanima aas satzꞌajax ivatzibꞌal u xaꞌebꞌalla txokop, vaꞌl iꞌan bꞌaꞌn tu mam takꞌonbꞌeꞌm tzokꞌel tan, kamnajich taqꞌo. 15 Ech aqꞌax tijleꞌm u chulin alol tetz u yolbꞌal Tioxh aas satoksa taanima vitzꞌajich vatzibꞌal u xaꞌebꞌalla txokop; ech sayoloni. Utz abꞌil yeꞌk soꞌoksan iqꞌii u tzꞌajich vatzibꞌal tziꞌ, vaꞌl nitekiyikuneꞌ, yatzꞌel siꞌaneꞌ. 16 Ech aatz paj iꞌan u xaꞌebꞌalla txokop, ibꞌan yaꞌl aas soꞌok techlal kajay qꞌu aanima tu sebꞌal iqꞌabꞌ oj tipala. Kꞌuxh nimajs chꞌooaj, txꞌiiol iqꞌiis, meꞌbꞌaꞌ, qꞌuꞌl kꞌayimal tibꞌ tu aqꞌon utz, kꞌuxh yitꞌ aꞌ koj; maꞌl tok techlal. 17 Ech yeꞌxhabꞌil saveet iloqꞌoneꞌ saveet ikꞌayineꞌ oj yeꞌ oknaj techlal, pek taꞌxhtuꞌ aꞌ qꞌuꞌl atil u techlal u xaꞌebꞌalla txokop tiꞌ. Ayaꞌ vibꞌii oj u tachul vibꞌii.
18 Pek txumbꞌal isaꞌ u tootzajileꞌ. Ech abꞌil tzakꞌkin, ibꞌan tiꞌ u tachul vibꞌii u xaꞌebꞌalla txokop. Tan anat koꞌxhtuꞌ aꞌ qꞌu ach qꞌuꞌl nibꞌanbꞌel xoꞌl qꞌu aanima. Utz ayaꞌ vaꞌl tzaꞌ, 666.
14Vibꞌitz u 144,000niman tetz u Jesuus
1 Aatz maꞌtich viltuka qꞌu kam tziꞌ, aꞌ tek vil txaklich u Chelem Karneꞌl viꞌ u muunte Sioon. Mam tenam imol; maꞌl 144,000 ixaaneꞌ. Utz jolol chit atoꞌk vibꞌii u Chelem Karneꞌl tipala tuchꞌ vibꞌii u Tioxh majte. 2 Aꞌ tek vabꞌi tuch maꞌl yol tu Amlika aas techal bꞌoj toqꞌ tuul, echaꞌ toqꞌ tuul mam nimaꞌ aas jatvaꞌl koꞌn nikꞌaskuꞌl. Echaꞌ itininun amlika aas sael itzꞌnaꞌbꞌ. Utz echaꞌ isonil sibꞌal aarpa nitoqꞌsaleꞌ. 3 Utz nichibꞌitzal ok akꞌ bꞌitzal vatz u mam qꞌesal chꞌuxhlebꞌal tuchꞌ vatz kaavaꞌl qꞌu itzꞌlich utz, vatz qꞌu qꞌesala majte. Aatz u bꞌitzal vaꞌl nichibꞌitzaleꞌ tziꞌ, abꞌil koj nichtxꞌolon ibꞌitzaleꞌ. Pek taꞌxh nichtxꞌolon u 144,000 aanima qꞌuꞌl eesal vatz u choobꞌal paav xoꞌl qꞌu aanima vatz txꞌavaꞌ. 4 Ayaꞌ qꞌuꞌl tiira yeꞌt motx tootzaji ixoj. Tan taꞌxh motx atichk ok tiꞌ u Chelem Karneꞌl kꞌuxh tileꞌch ibꞌenaꞌ. Utz aꞌ qꞌuꞌl bꞌaxa chit motx qꞌalpul tu qꞌul ipaav xoꞌl qꞌu aanima majte. Echaꞌ tok maꞌj bꞌaxa oya vatz Tioxh utz, tuchꞌ vatz u Chelem Karneꞌl. 5 Tan keꞌch koj txubꞌaꞌl jeꞌul titziꞌ. Pek paat yeꞌk ipaav tu u topon vatz vikꞌujlebꞌal u Tioxh tu viqꞌesalail.
Viyolon kꞌasuꞌl oxvaꞌl qꞌu aanjel tu amlika
6 Uncheeꞌ vil paj vaꞌt u aanjel, nichixichꞌan ipaal tu amlika. Aꞌ iqꞌomal u yolbꞌal Tioxh taqꞌo vaꞌl bꞌenqꞌii bꞌensaj. Aꞌ sipaxsav paal tu kajay qꞌu aanima tu u vatz amlika txꞌavaꞌ, kꞌuxh kam itenam aanimail, kꞌuxh kam tiloneꞌ utz, kꞌuxh kam iyolbꞌal. 7 Uncheeꞌ qetun taltu u aanjel ech tzaꞌ:
—¡Nimataj! ¡Xoꞌvataj u Tioxh! Utz tꞌanbꞌaꞌtaj. Tan oponyu u qꞌii utz, oponyu u oora aas saꞌtektaqꞌ u choobꞌal paav. Ech oksataj iqꞌii tan, aꞌ vaꞌl bꞌanon u amlika tuchꞌ u vatz txꞌavaꞌ, vaꞌl bꞌanon u mar utz, aꞌ vaꞌl bꞌanon qꞌu chun aꞌ.—
Texh u aanjel.
8 Ech yolon vaꞌt aanjel tiꞌ; vikaꞌbꞌ tekuꞌen. Qetun taltu ech tzaꞌ: —Sotzyu u mam tenam Babiloonia. Sotzyu u eesan tetz qꞌu aanima tu bꞌey tu u vatz amlika txꞌavaꞌ tzaꞌ. Tan echaꞌ qꞌabꞌansamal itxumbꞌal niꞌaneꞌ.— Texhtuꞌ.
9 Ech yolon vaꞌt u aanjel tiꞌ; vitoxvaꞌ tekuꞌen. Utz qetun taltu ech tzaꞌ: —Abꞌil soꞌoksan iqꞌii u xaꞌebꞌalla txokop, sikꞌul u mam choobꞌal paav tetz vikꞌaꞌnal u Tioxh vaꞌl molel koꞌn taqꞌo. Antu sakꞌulun qꞌuꞌl saoksan iqꞌii vitzꞌajich vatzibꞌal utz, qꞌuꞌl sataqꞌ tzii soꞌok u techlal tipala oj tiꞌ iqꞌabꞌ. Utz ech saꞌxhtulebꞌe qꞌu aanima tu xamal tuchꞌ tu pultinajla qꞌol vatz qꞌul iaanjel xaannaj el kꞌatz paav utz, vatz u Chelem Karneꞌl majte. 11 Ech bꞌenamen sabꞌukin ijeꞌ visibꞌel itzꞌeꞌ qꞌu aanima tziꞌ. Bꞌenqꞌii bꞌensaj yeꞌk iloꞌtzꞌ qꞌiils aqꞌbꞌal tiꞌ kajay qꞌuꞌl nimotxoksan iqꞌii u xaꞌebꞌalla txokop tuchꞌ vitzꞌajich vatzibꞌal utz, tuchꞌ qꞌuꞌl samotxtaqꞌ tzii soꞌok u techlal vibꞌii tiꞌ. 12 Ech siꞌilchu qꞌu niman tetz u Jesuus, qꞌuꞌl nimamal qꞌul imantaar taqꞌo utz, kꞌujlel ikꞌuꞌl tiꞌ u Jesuus tan, siqꞌiꞌ qꞌu kꞌaxkꞌo.— Texhtuꞌ.
13 Ech tek vabꞌi maꞌl u yol qꞌilankꞌasuꞌlin tu Amlika. Tal ve ech tzaꞌ: —Tzꞌibꞌa qꞌu yol tzaꞌ. «Chiꞌbꞌebꞌal tetz qꞌu aanima qꞌuꞌl aꞌ sakamku tiꞌ u kuBꞌaal taabꞌaꞌbꞌen tzaꞌ.» Chia.— Texhtuꞌ.
Ech aꞌ tepaj vabꞌi vaꞌt u yol: —Eeꞌ, aꞌ chituꞌ. Ilaꞌm samotxiꞌan tiꞌ qꞌu tzaꞌl, qꞌu peena vetmotxpaalku tiꞌ u Tioxh. Utz satil iqꞌaqꞌal qꞌu bꞌaꞌnil vetmotxiꞌana.— Texh u Tioxhla Espiiritu.
Vimolax kajay qꞌu aanima tu u vatz amlika txꞌavaꞌ
14 Utz aꞌ tek vil maꞌl aanima kꞌujlich jeꞌ viꞌ maꞌl u saj sutzꞌ, echaꞌ u Kꞌaola vaꞌl bꞌennaj koꞌn aanima. Utz atich jeꞌ ikoroona tiviꞌ, bꞌaꞌnla qꞌan chꞌichꞌ. Iqꞌomich maꞌl lok juꞌ chꞌichꞌ taqꞌo, tzokꞌbꞌal triigo; techal tee. 15 Ech eluꞌl vaꞌt u aanjel tu u tatibꞌal u Tioxh tu Amlika. Utz qetuꞌm chit iqꞌilal bꞌen u aanima iꞌana vaꞌl kꞌujlich jeꞌ viꞌ u saj sutzꞌ. Tal te ech tzaꞌ: —Bꞌanbꞌe tek valok juꞌ chꞌichꞌ tziꞌ utz, tzokꞌ qꞌu vatz chikobꞌeꞌm. Tan oponyu tiempo chokbꞌal tetz. Qꞌanbꞌi qꞌu vatz chikobꞌeꞌm tu u vatz amlika txꞌavaꞌ.— Texh te.
16 Uncheeꞌ aatz tek vaꞌl kꞌujlich jeꞌ viꞌ u sutzꞌ, ipaasa vilok juꞌ chꞌichꞌ vatz txꞌavaꞌ utz, ichok kajay qꞌu vatz chikobꞌeꞌm.
17 Ech eluꞌl vaꞌt u aanjel tu u tatibꞌal u Tioxh tu Amlika. Iqꞌomich paj ilok juꞌ chꞌichꞌ tiqꞌabꞌ; techal tee. 18 Utz eluꞌl vaꞌt aanjel vatz u nachbꞌal Tioxh. Atil tijleꞌm viꞌ u xamal. Ech qꞌetun iqꞌilat bꞌen u aanjel vaꞌl atich u lok juꞌ chꞌichꞌ tzixeꞌ; techal tee. Tal te ech tzaꞌ: —Bꞌanbꞌe valok juꞌ chꞌichꞌ techal tee tziꞌ utz, qoleꞌl qꞌu uuva kꞌatz tajan tu u vatz amlika txꞌavaꞌ tan, maꞌxh qꞌanbꞌia.— Texhtuꞌ. 19 Ech aatz u aanjel, ipaasa vilok juꞌ chꞌichꞌ vatz txꞌavaꞌ utz, iqoleꞌl qꞌu uuva kꞌatz tajan. Ech ex taqꞌ tu u mam pachꞌbꞌal el tetz. Techlal vikꞌaꞌnal u Tioxh vaꞌl sakuꞌ tiꞌ qꞌu aanima. 20 Ech aꞌ pachꞌqꞌulik qꞌu uuva tiꞌ eloꞌp u tenam. Utz ech xaan teluꞌl u taꞌl uuva tu mam pachꞌbꞌal tetz, echaꞌ ixaan kaj. Aatz vipimal u kaj, jiꞌop kꞌatz ixhekeema qꞌu chee tijuꞌ. Utz 300 kiloometro ixaa u kaj tziꞌ.
15U jujvaꞌl choobꞌal paavsakuꞌ tiꞌ qꞌu yoqꞌol Tioxh
1 Uncheeꞌ vil vaꞌt u mam xheenya tu amlika, tzꞌejxebꞌal kꞌuꞌl. Vil jujvaꞌl aanjel iqꞌomich jujvaꞌt qꞌu choobꞌal paav taqꞌo vaꞌl sitzojpebꞌe u mam ikꞌaꞌnal u Tioxh tiꞌ qꞌu aanima tu u vatz amlika txꞌavaꞌ.
2 Ech vil vaꞌt u kam majte, echaꞌ mar. Tiira ribꞌkin, echaꞌ espejo yuuel tuchꞌ xamal. Utz aatz siiꞌ vaꞌl echaꞌ mar, txaklich jeꞌ qꞌu aanima qꞌuꞌl yeꞌt bꞌen ikꞌuꞌl tiꞌ u xaꞌebꞌalla txokop tuchꞌ tiꞌ vivatzibꞌal. Utz yeꞌt motx taqꞌ tibꞌ aas soꞌok vibꞌii tiꞌ tuchꞌ u tachul. Jolol iqꞌomich iaarpa. U Tioxh aqꞌon te. 3 Utz nichmotxibꞌitza maꞌl u bꞌitzal vaꞌl nichibꞌitza u Moisees, u taqꞌonom u Tioxh, tuchꞌ vibꞌitzal u Chelem Karneꞌl. Ech nichmotxtal tzaꞌ:
—Aqꞌel iviꞌ qꞌu mamaj kam naꞌaneꞌ, kuBꞌaals Mam Tioxh. Tiira jikom vabꞌey utz, aꞌ vinujul. Echixeꞌat axh tijlenal qꞌu tenam kajayil.
4 Ech abꞌil koj maꞌj yeꞌ saxoꞌvanaxh kuBꞌaal utz, yeꞌk sitꞌanbꞌaꞌxh. Tan taꞌxh maꞌl, axh yeꞌk apaav. Utz nojchit tinujul itxꞌolax qꞌu kam naꞌaneꞌ. Echixeꞌat til chaj koꞌn toj kꞌaskuꞌl aanima tulaj mamaj tenam utz, suꞌltoksa aqꞌii.— Chia.
5 Xamtich tek tiꞌ qꞌu kam tzaꞌ, aꞌ tek vil ijajpu u okebꞌalop tu u tioxhla atibꞌal tu Amlika, vaꞌl atik u oꞌtla nukꞌuꞌm. 6 Utz aꞌ elkuꞌl jujvaꞌl qꞌu aanjel tuul qꞌuꞌl iqꞌomich jujvaꞌl qꞌu choobꞌal paav taqꞌo. Bꞌaꞌnla chaj tzꞌuꞌkin saj lino bꞌuꞌj qꞌu toksaꞌm; kexh iribꞌuneꞌ. Utz paalnaj jununil jiskin bꞌaꞌnla qꞌan chꞌichꞌ vatz taanima. 7 Ech aatz maꞌl tu kaavaꞌl qꞌu itzꞌlich kam, taqꞌ jununil ikoopa jujvaꞌl qꞌu aanjel; bꞌaꞌnla qꞌan chꞌichꞌ. Noonaj tu vikꞌaꞌnal u Tioxh; ayaꞌ qꞌu choobꞌal paav sataqꞌuꞌl u Tioxh vaꞌl bꞌenqꞌii bꞌensaj tatineꞌ. 8 Aatz u tatibꞌal u oꞌtla nukꞌuꞌm, tiira noo sibꞌ tuul tu vixamlil vitechalil u Tioxh. Ech abꞌil koj saveet tokoꞌp tuul, pek analen satzojpu taqꞌtu kuꞌ jujvaꞌl qꞌu choobꞌal paav jujvaꞌl qꞌu aanjel.
16Qꞌu choobꞌal paav sakuꞌi
1 Ech vabꞌi tuch kꞌasuꞌl maꞌl u mam qetuꞌm tu u totztioxh. Iqꞌila jujvaꞌl qꞌu aanjel. Tal te ech tzaꞌ: —Bꞌenoj eqoo kuꞌ qꞌu tuul qꞌul ekoopa vatz txꞌavaꞌ tziꞌ, vaꞌl aꞌ nikꞌam tiꞌ u mam ikꞌaꞌnal u Tioxh.— Texhtuꞌ.
2 Ech bꞌen u bꞌaxa aanjel, ex iqoo kuꞌ u tuul vikoopa vatz txꞌavaꞌ. Utz yakich cheeoj toy tiꞌ qꞌu aanima taqꞌo qꞌuꞌl atich ok u techlal u xaꞌebꞌalla txokop tiꞌ utz, tuchꞌ qꞌuꞌl nichmotxoksan iqꞌii vitzꞌajich vatzibꞌal. Yitꞌ suula toy koj. Xoꞌebꞌal ichiꞌoneꞌ.
3 Aatz u kaꞌbꞌ aanjel, iqoo kuꞌ u tuul vikoopa viꞌ u mar. Utz yakich bꞌenojs kaj, echaꞌ kajal kamnaj. Utz yakich kamoj kajay qꞌu txokop atil tu mar taqꞌo.
4 Aatz u toxvaꞌ aanjel, iqoo kuꞌ u tuul vikoopa viꞌ qꞌu nimaꞌ tuchꞌ viꞌ qꞌu chun aꞌ. Utz yakich paj bꞌenojs kajal. 5 Ech aꞌ tek vabꞌi iyolon u aanjel vaꞌl aa kuenta tiꞌ qꞌu aꞌ. Tal ech tzaꞌ:
—Tiira axh jikom kuBꞌaal,
yeꞌk paav sakꞌatza.
Axh u Tioxh tetz cheel utz,
tetz oꞌte.
Natxꞌol inujul qꞌu kam.
6 Tan aatz qꞌu aanima tziꞌ,
vetixaansa ikajal qꞌu alol tetz qꞌuꞌl ayol
tuchꞌ qꞌu niman eetz.
Motx iyatzꞌa.
Ech aatz cheel, vetaaqꞌlu
ichꞌexel qꞌul ibꞌanon te,
echaꞌ kaj satukꞌa.
Aꞌ bꞌoj isaꞌ.—
Texhtuꞌ.
7 Ech vabꞌi iyolon vaꞌt u aanjel vatz u nachbꞌal Tioxh. Tal ech tzaꞌ: —KuBꞌaal Mam Tioxh, nojchit tiira jikom utz, inujul vaꞌl naꞌaneꞌ aas naaqꞌ u choobꞌal paav.— Texhtuꞌ.
8 Ech aatz u kaavaꞌ aanjel, aꞌ iqoov kuꞌ u tuul vikoopa viꞌ u qꞌii tziꞌ. Utz ech tzꞌeꞌchil siꞌan qꞌu aanima tu xamal tu vikꞌachon u qꞌii taqꞌo. 9 Utz motx tzꞌeꞌ qꞌu aanima tu u qꞌii tziꞌ. Pek yeꞌt koꞌn motx ikꞌaxa qꞌul ibꞌanoneꞌ. Yeꞌt itꞌanbꞌaꞌ u Tioxh. Pek motx koꞌn iyoqꞌ vibꞌii u Tioxh vaꞌl atil qꞌu choobꞌal paav tiqꞌabꞌ.
10 Ech aatz u toꞌvaꞌ aanjel, iqoo kuꞌ u tuul vikoopa viꞌ u bꞌanbꞌal iqꞌesalail u xaꞌebꞌalla txokop. Ech yakich kaaoj viqꞌesalail tu uken. Utz nichtexhmotxikochꞌi taqꞌ qꞌu aanima tu chiꞌom. 11 Utz motx koꞌn iyoqꞌ u Tioxh tu Amlika tu vichiꞌon qꞌul itoy. Utz yeꞌt motx ikꞌaxa qꞌul ibꞌanoneꞌ.
12 Aatz u vaajaj aanjel, iqoo kuꞌ u tuul vikoopa viꞌ u mam nimaꞌ Eeufrates. Ech yakich tzajoj u aꞌ taqꞌo, tiꞌ tamax ibꞌey qꞌu ijlenal taqꞌo qꞌuꞌl atil tikuenta aal telaꞌ. 13 Ech aꞌ tek vil teluꞌl maꞌl maalola aanxel titziꞌ u Dragoon, vaꞌt titziꞌ u xaꞌebꞌalla txokop utz, vaꞌt titziꞌ u chulin alol tetz iyol u Tioxh. Oxvaꞌl echaꞌ petej. 14 Utz jolol itioxhil txꞌiꞌliꞌinaj. Kam koꞌn xheenya nimotxiꞌaneꞌ. Utz aꞌ samotxbꞌenku xeꞌ qꞌu ijlenal tu u vatz amlika txꞌavaꞌ kajayil. Samotximolo tibꞌ taqꞌo tu u mam chꞌaꞌo vaꞌl siꞌan tuchꞌ u Mam Tioxh tu u qꞌii aas luꞌuli.
15 Ech vabꞌi maꞌl u yol tal ech tzaꞌ: —Abꞌitaj, yeꞌk talcheꞌ soꞌoponin, echaꞌ topon elqꞌom sunbꞌaneꞌ. Ech chiꞌbꞌebꞌal tetz u aanima vaꞌl nachnoch tatineꞌ utz, nitilbꞌe tatin sunkꞌatza. Echaꞌ atoꞌk toksaꞌm. Ech jatu koj satꞌuꞌeꞌi utz, saꞌkojel iqꞌii.— Texhtuꞌ.
16 Utz ech imol tibꞌ qꞌu qꞌesal tenam tu qꞌu maalola chaj aanxel tu maꞌl u txꞌavaꞌ Armagedoon ibꞌii tu yolbꞌal hebreo.
17 Ech aatz u jujvaꞌ aanjel, iqoo kuꞌ u tuul vikoopa viꞌ u kajiqꞌ. Utz ech qetun eluꞌl maꞌl u yol tu u kꞌujlebꞌal tetz qꞌesala tu u tatibꞌal u Tioxh tu Amlika. Tal ech tzaꞌ: —¡Tzojpia!— Texhtuꞌ. 18 Ech kaana itzꞌnaꞌbꞌ eli. Mam qꞌeqꞌuꞌm uchi, tuchꞌ tininunchil. Utz paal maꞌl mam kabꞌnaano. Yeꞌsaj ipaal maꞌj kabꞌnaano echi, jatvaꞌx tiempo xeꞌt tatin aanima tu u vatz amlika txꞌavaꞌ tzaꞌ.
19 Uncheeꞌ aatz u mam tenam Babiloonia tziꞌ, paxi. Oxvaꞌl kuꞌ tuul. Aatz tereꞌn qꞌu tenam motx kuꞌ majte. Tan iqꞌat u Tioxh aas saꞌchittaqꞌ kuꞌ u choobꞌal paav tiꞌ u mam tenam Babiloonia tu vikꞌaꞌnal. 20 Utz kajay qꞌu txꞌavaꞌ atich nikꞌa aꞌ, sotzi. Utz kajay qꞌu muunte, yeꞌkanich tekuꞌen. 21 Utz mamaj sajbꞌatz kuꞌ tiꞌ qꞌu aanima. Kintaal talal junun qꞌu sajbꞌatz tziꞌ. Pek aatz qꞌu aanima, motx koꞌn iyoqꞌ u Tioxh tiꞌ aas taqꞌ kuꞌl u sajbꞌatz tiꞌ. Tan nojchit aqꞌel iviꞌ u choobꞌal paav kuꞌi tziꞌ.
17Vikuꞌ u choobꞌal paavtiꞌ u aa paavla ixoj
1 Uncheeꞌ aatz maꞌl tu jujvaꞌl qꞌu aanjel qꞌuꞌl atich jununil ikoopa, ul tal ve ech tzaꞌ: —Niꞌaxh tzaꞌ. Sunkꞌuch see kam u choobꞌal paav suꞌul tiꞌ u cheela ixoj vaꞌl kꞌujlel jeꞌ viꞌ qꞌu aꞌ tziꞌ. 2 Tan aatz u ixoj tziꞌ, maꞌxh teesal tibꞌ tu bꞌey tuchꞌ qꞌu ijlenal tu u vatz amlika txꞌavaꞌ. Kajay qꞌu aanima tu u vatz amlika txꞌavaꞌ ely itxumbꞌal tu bꞌey taqꞌo tu vimaalola txumbꞌal. Echaꞌ qꞌabꞌansamal niꞌaneꞌ.— Texhtuꞌ.
3 Ech tiqꞌobꞌenin u Tioxhla Espiiritu tu maꞌl u tzꞌinlich tzaji txꞌavaꞌ. Utz vil maꞌl u ixoj atich jeꞌ tiꞌ maꞌl u kajiꞌ xaꞌebꞌalla txokop. Utz tzꞌibꞌamal ok yol tiꞌ u xaꞌebꞌalla txokop tziꞌ. Aꞌ niyoqꞌ Tioxh. Jujvaꞌl iviꞌ atile tuchꞌ lavat tukꞌ. 4 Utz aatz u ixoj, bꞌaꞌnla kaj oksaꞌm atoꞌk taqꞌo. Vijel u toksaꞌm tu bꞌaꞌnla qꞌan chꞌichꞌ, bꞌaꞌnla chaj sivan, tuchꞌ tu perla. Atich maꞌl koopa tiqꞌabꞌ, bꞌaꞌnla qꞌan chꞌichꞌ. Noonaj kuꞌ tzuꞌkin paav tuul tuchꞌ yoqꞌbꞌalla chaj yol. Aꞌ u techlal u teesat tibꞌ tu bꞌey. 5 Aatz tipala, tzꞌibꞌamal ok maꞌl u bꞌii aas yeꞌ ootzajimal u tokebꞌal. Ech nichtal tzaꞌ: “U MAM TENAM BABILOONIA, INAN QꞌU CHEELA CHAJ IXOJ TUCHꞌ QꞌU CHꞌIXVEBꞌALLA PAAV TU U VATZ TXꞌAVAꞌ.” Chia.
6 Uncheeꞌ aꞌ tek vil u ixoj tziꞌ. Ech tekuꞌen aꞌ qꞌabꞌareel tu vikajal qꞌu niman tetz u Jesuus qꞌuꞌl maꞌtich iyatzꞌtaꞌ, tuchꞌ tu vikajal qꞌuꞌl kamnaj tiꞌ itxakbꞌaꞌl viyol u Jesuus. Ech taꞌxh vila, tiira yakich tzꞌejxoj unkꞌuꞌl taqꞌo.
7 Ech aatz u aanjel, tal ve ech tzaꞌ: —¿Kantuꞌ nitzꞌejx akꞌuꞌl? Tan saval see kam u tokebꞌal u kam yeꞌ ootzajimal tiꞌ u ixoj tziꞌ utz; kam u tokebꞌal u txokop, u iqꞌon tetz vaꞌl jujvaꞌl iviꞌ utz, laval tukꞌ. 8 Aatz u xaꞌebꞌalla txokop vaꞌl vetiilluka tziꞌ tan, nojchit atiche. Pek yeꞌkan cheel. Utz saꞌnalqꞌaavuꞌl. Aꞌ sajeꞌkuꞌl tu u mam jul. Ech tek labꞌen tu sotzchil. Samotxsotz ikꞌuꞌl qꞌu aanima taqꞌo aas satil iqꞌaavuꞌl xaꞌebꞌalla txokop vaꞌl nojchit atiche, pek yeꞌkan cheel. Aꞌ sasotz ikꞌuꞌl qꞌu aanima qꞌuꞌl yeꞌ tzꞌibꞌamal ibꞌii tu u libro tetz atinchil tu bꞌenqꞌii bꞌensaj ayaꞌxchen xeꞌ qꞌii xeꞌ saj.
9 Ech aatz qꞌu kam tzaꞌ, tetz aanima aas seꞌel itxumbꞌal tuul. Aatz jujvaꞌl qꞌul iviꞌ u xaꞌebꞌalla txokop, aꞌ nikꞌam tiꞌ jujvaꞌl muunte vaꞌl kꞌujlelku jeꞌ u ixoj. 10 Utz aꞌ paj nikꞌam tiꞌ jujvaꞌl ijlenal. Oꞌvaꞌl tu qꞌu ijlenal tziꞌ, kuꞌnaj tek ul tu qꞌu tijleꞌm. Aatz u vajaj, niꞌan viqꞌesalail cheel. Pek ech koj u jujvaꞌ tan, yeꞌsaj tokeꞌ. Pek aatz loꞌoki, bꞌiil koꞌxh siꞌanoꞌk tu tijleꞌm. 11 Aatz u xaꞌebꞌalla txokop vaꞌl atiche tziꞌ utz, yeꞌkan cheel. Antu xoꞌl jujvaꞌl qꞌu ijlenal, vaaxajil tek tuchꞌ. Utz ela samotxbꞌen tu sotzchil.
12 Utz aatz laval u tukꞌ vetiila tziꞌ, aꞌ nikꞌam tiꞌ lavat ijlenal. Yeꞌsaj tok tu qꞌu tijlenalil. Pek bꞌiil koꞌxh samotxiꞌanoꞌk tu qꞌu tijleꞌm. Aꞌ imol aꞌ u xaꞌebꞌalla txokop samotxiꞌan qꞌesalail. 13 Maꞌl koꞌn iatz samotxiꞌan laval qꞌu ijlenal tziꞌ. Utz samotxtaqꞌ qꞌu tijlenalil jaqꞌ imantaar u xaꞌebꞌalla txokop, simolo tibꞌ tuchꞌ. 14 Ech samotxiꞌan chꞌaꞌo tuchꞌ u Chelem Karneꞌl. Loqꞌ sakoꞌnsubꞌax tu u Chelem Karneꞌl. Tan Tijlenal qꞌu ijlenal u Chelem Karneꞌl; iQꞌesala qꞌu qꞌesal. Utz aatz qꞌuꞌl atil kꞌatza, junal sikꞌlemal tu u Tioxh; jolol itxaaom utz; tiira jolol kꞌujlebꞌal kꞌuꞌl.— Texhtuꞌ.
15 Tal paj u aanjel ve ech tzaꞌ: —Aatz qꞌu aꞌ vetiila tziꞌ vaꞌl kꞌujlelku jeꞌ u cheela ixoj, aꞌ nikꞌam tiꞌ sibꞌla aanima tu talaj tenam utz, mamaj tenam, jatvatzul koꞌn aanimail, jatvatzul koꞌn iyolbꞌal.
16 Utz aatz u xaꞌebꞌalla txokop tuchꞌ laval qꞌu ijlenal vaꞌl vetiilla tziꞌ, samotxichiꞌkꞌula u cheela ixoj. Sibꞌajeꞌl tu tijleꞌm. Sitꞌuꞌbꞌaꞌka tu meꞌbꞌiꞌl. Samotxichiꞌ vichiꞌl. Utz sikꞌach tereꞌn vichiꞌl tu xamal. 17 Tan u Tioxh vetꞌoksan tu taanima aas aꞌ siꞌaneꞌ, kam vaꞌl isaꞌ u Tioxh. Maꞌl koꞌn iatz laval qꞌu ijlenal samotxiꞌaneꞌ utz, samotxtaqꞌ qꞌu tijlenalil jaqꞌ imantaar u xaꞌebꞌalla txokop. Saꞌnalchittzojpi kam vaꞌl ninaltal u Tioxh tiꞌ.
18 Aatz u ixoj vaꞌl vetiila tziꞌ, aꞌ nikꞌam tiꞌ maꞌl u mam tenam vaꞌl sanimal tu qꞌu ijlenal tu u vatz amlika txꞌavaꞌ.— Texhtuꞌ.
18Visotz qꞌu aa paav, aꞌ nikꞌam tiꞌ isotz u Babiloonia
1 Uncheeꞌ xamtich tek tiꞌ qꞌu kam tziꞌ, aꞌ tek vil ikuꞌl vaꞌt u aanjel tu Amlika. Tiira sibꞌ u tijleꞌm. Yakich itxijtxu u txꞌavaꞌ tu vitechalil. 2 Ech qetun taltu ech tzaꞌ:
—¡Sakuꞌ u mam tenam Babiloonia! ¡Sakuꞌi! Sabꞌens tatibꞌal txꞌiꞌliꞌinaj, tatibꞌal maalola chaj aanxel. Utz sabꞌen isok qꞌu tzuꞌkin xichꞌomla chaj txokop qꞌuꞌl txojonbꞌal kꞌuꞌl sajil ok.
3 Tan kajay qꞌu tenam tu vatz txꞌavaꞌ tziꞌ, vetmotxteesa tibꞌ tu bꞌey tuchꞌ. Ech tekuꞌen aꞌ qꞌabꞌareel taqꞌo. Utz echat qꞌu ijlenal majte, nimotxteesa tibꞌ tu bꞌey tuchꞌ. Ech tekuꞌen aꞌ qꞌabꞌareel. Utz echat qꞌu aa kꞌaꞌy tu u vatz txꞌavaꞌ majte, vetmotxiꞌan txꞌiiol iqꞌiil tiꞌ qꞌu tzuꞌkinla chaj tachaꞌv niꞌaneꞌ.—
Texh u aanjel.
4 Ech vabꞌi vaꞌt u yol tu Amlika tal ech tzaꞌ:
—Untenam, elojex xoꞌl qꞌu aanima tziꞌ. Ech yeꞌk sebꞌan etetz qꞌul ipaav. Utz yeꞌk sapotzonex tiꞌ qꞌu choobꞌal paav sakuꞌ tiꞌ.
5 Tan maꞌxh taqꞌl iviꞌ ichꞌii qꞌul ipaav niꞌaneꞌ. Utz vettillu u Tioxh, ech siꞌan te tiꞌ qꞌu tonkonil.
6 Ech aqꞌloj u choobꞌal paav te tiꞌ kam chit qꞌuꞌl niꞌaneꞌ. Kaꞌ tanul tek iqꞌaav te sabꞌanaxi. Kam qꞌul ibꞌanoneꞌ, kam vipaabꞌal nichtoksa tiꞌ toksal aanima tu kꞌaxkꞌo, echat tetz sabꞌanaxi. Aal kaꞌpajul paalchu siiꞌ vichꞌexel sikꞌuleꞌ.
7 Kam chit vitꞌanbꞌaꞌt tibꞌ utz, vitꞌeꞌsut tibꞌ, echil u choobꞌal paav saꞌaqꞌax te, kꞌaxkꞌo tuchꞌ oqꞌel. Tan nital tu taanima ech tzaꞌ: «¡Kꞌujlelin echaꞌ ikꞌujeꞌ maꞌl ijlenal! ¡Yitꞌ in koj txakay ixoj utz, yeꞌk il tzaꞌl savileꞌ!» Chia.
8 Ech tokeꞌ tu koꞌn maꞌl qꞌii soꞌoponku u choobꞌal paav tiꞌ, u vaꞌy, u oqꞌel, u kamchil utz, vitzꞌeꞌ tu xamal. Tan techal u Mam Tioxh u kuBꞌaal vaꞌl satxꞌolon inujul.—
Texh u aanjel.
9 Ech saꞌnalmotxoqꞌ qꞌu ijlenal tiꞌ tu u vatz txꞌavaꞌ. Saꞌnalmotxtxumuni aas latil ibꞌukin ijeꞌ isibꞌel vitzꞌeꞌaꞌ tan, nichmotxteesa tibꞌ tu bꞌey tuchꞌ. Vetchiꞌbꞌ tuchꞌ. 10 Saꞌtexhmotxtxakeꞌ bꞌen tzian tu xoꞌval tan, noj ipotzon tiꞌ. Utz samotxtal ech tzaꞌ:
—¡Tilayol, tilayol! vetaꞌanla mam tenam Babiloonia. Techalich axh, pek oora koꞌxh vetꞌul u choobꞌal paav saiꞌ.— Chaj.
11 Antu samotxoqꞌ qꞌu aa kꞌaꞌy tu vatz txꞌavaꞌ majte. Utz samotxtxumun tiꞌ u tenam tziꞌ tan, abꞌil tereꞌn koj saloqꞌon qꞌul ikꞌaꞌy. 12 Aꞌ qꞌul ikꞌaꞌy tzaꞌ: bꞌaꞌnla qꞌan chꞌichꞌ, bꞌaꞌnla saj chꞌichꞌ, bꞌaꞌnla sivan, bꞌaꞌnla perla, bꞌaꞌnla seda, lino, kajko bꞌuꞌj, txꞌumqꞌinajla tzeꞌ, tuchꞌ marfiil, kajay qꞌu bꞌaꞌnla chaj kam aas tzeꞌ, qꞌan chꞌichꞌ, nojla chꞌichꞌ, tuchꞌ marmol vijbꞌalla sivan, 13 tuchꞌ kanela tuchꞌ txꞌumtxꞌuchla kam, kaxhlaan pom, mirra, oliibano, taꞌl uuva, aseite, triigo, cheꞌm triigo, karneꞌl, chee, kareꞌt. Utz niloqꞌeꞌ nikꞌayi aanima.
14 Motx tal qꞌu aa kꞌaꞌy ech tzaꞌ: —Elyu kajay qꞌu bꞌaꞌnla chaj kam saatz, qꞌuꞌl niꞌxhaachva tuchꞌ avaanima utz, kajay qꞌu kam qꞌuꞌl tiira techal seetz, qꞌu txꞌiibꞌal qꞌii. Utz jatu tereꞌn koj siil iatz.— Texhtuꞌ. 15 Utz aatz qꞌu aa kꞌaꞌy tetz qꞌu kam tziꞌ, saꞌtexhmotxtxakeꞌ kꞌasuꞌl tu xoꞌval tzian tiꞌ isajil u choobꞌal paav tan, noj ipotzon tiꞌ. Samotxoqꞌi, samotxtxumuni. Tan vetmotxiꞌan txꞌiiol iqꞌiil tu kꞌaꞌy tu u tenam tziꞌ. 16 Samotxtal ech tzaꞌ:
—¡Tilayol, tilayol! vetiꞌanlu u mam tenam tziꞌ, vaꞌl echich ivijtu tibꞌ vijolibꞌla ixoj tu bꞌaꞌnla tzꞌuꞌkin saj lino bꞌuꞌj, tuchꞌ bꞌaꞌnla kaj bꞌuꞌj, bꞌaꞌnla morado bꞌuꞌj. Nichivij tibꞌ tu bꞌaꞌnla qꞌan chꞌichꞌ, tu bꞌaꞌnla sivan, tuchꞌ tu perla.
17 Pek tu koꞌxh unmuꞌkꞌul sasotz qꞌu mamaꞌla txꞌiibꞌal qꞌii tziꞌ.—
Texhtuꞌ.
Utz antu saꞌtexhmotxtxakeꞌ kꞌasuꞌl tzian qꞌu olin vaarko tuchꞌ qꞌu xaaol viꞌaj aꞌ utz, tuchꞌ qꞌuꞌl viꞌ mar niaqꞌoninka. 18 Samotxtil ijeꞌ isibꞌel vitzꞌeꞌ u tenam tziꞌ. Samotxtal ech tzaꞌ: —¡Abꞌiste koj maꞌj tenam echich u mam tenam tziꞌ!— Texhtuꞌ. 19 Ech motx imakꞌ jeꞌ pojoj tiviꞌ, techlal itxumuneꞌ. Motx qetun tu oqꞌel. Tal ech tzaꞌ:
—¡Tilayol, tilayol! vetiꞌanlu u mam tenam tziꞌ. Tan aal aꞌ vaꞌl vetcheek txꞌiibꞌal kuqꞌii tuul, oꞌ bꞌaal vaarko. Pek aatz tek cheel utz, ¡unmuꞌkꞌul koꞌxh vetsotzi!—
Texhtuꞌ.
20 Ech alax ech tzaꞌ:
—¡Txuqꞌtxunen tiꞌ Amlika! Txuqꞌtxunojex tiꞌ ex xaannaj el ex kꞌatz u paav, ex ichaj u Jesuus, tuchꞌ ex alol tetz qꞌul iyol u Tioxh. Tan vetitxꞌol inujul u tenam u Tioxh, tiꞌ vaꞌl bꞌanel sete taqꞌo.—
Texhtuꞌ.
21 Ech aatz vaꞌt u aanjel, mam aa yakꞌil, ikꞌoli maꞌl mam sivan echaꞌ cheꞌbꞌ triigo. Utz ikꞌon bꞌen tu mar. Tal ech tzaꞌ:
—Kaniꞌch aꞌ mikꞌonax koꞌp u mam sivan jaqꞌ aꞌ tziꞌ, echat isotz u mam tenam Babiloonia tziꞌ. Utz abꞌil tereꞌn koj sailon.
22 Saꞌtereꞌnkojabꞌil iviꞌ qꞌu oqꞌsan aarpa tuul, nikoꞌxh xuli aa. Utz saꞌtereꞌnkojabꞌil toqꞌ trompeta. Saꞌtereꞌnkojabꞌil ikꞌoxon qꞌu aqꞌonom tuul. Utz yeꞌkan saꞌabꞌil icheꞌl triigo.
23 Yeꞌkan txijtxubꞌal satxijtxuni. Yeꞌkan saꞌabꞌil chiꞌbꞌichil tiꞌ tzumbꞌaꞌa tan, tiira vetmotxpaal tetz qꞌu aa kꞌaꞌy. Utz sibꞌ mamaj tenam veteesa tu bꞌey tu qꞌu kam nachuli.
24 Ech iveet u tenam tziꞌ, tiꞌ majte tan, cheey vikajal qꞌu alol tetz u yolbꞌal Tioxh tuul, tuchꞌ vikajal qꞌu aanima niman tetz u Jesuus utz, tuchꞌ qꞌuꞌl yatzꞌel tu vatz txꞌavaꞌ tiꞌ.—
Texh u aanjel.
19Vikꞌamabꞌel u Tioxhtiꞌ viyaꞌsat u paav
1 Xamtich tek tiꞌ qꞌu kam tzaꞌ, aꞌ tek vabꞌi tuch maꞌl yol tu Amlika. Mam tenam chit nichalon ech tzaꞌ:
—¡Bꞌitzataj! ¡Tꞌanbꞌaꞌtaj u kuBꞌaal Tioxh!
Tan aꞌ u Chitol tetz qꞌu aanima tu tzaꞌl.
Ech alaxoj itechalil;
alaxoj mam tijleꞌm.
2 Tan tuchꞌ chit inujul utz,
tijikomal nitaqꞌ kuꞌ u choobꞌal paav.
Vetitxꞌol inujul vipaav u tenam
vaꞌl echaꞌ cheela ixoj.
Tan vetiyansa vitxumbꞌal qꞌu aanima tu vatz txꞌavaꞌ,
echaꞌ teesat tibꞌ tu bꞌey tuchꞌ.
Ech aqꞌaxyu ichꞌexel te
tiꞌ iyatzꞌtu qꞌu niman tetz u Tioxh.—
Texhtuꞌ.
3 Ech alax paj ech tzaꞌ:
—¡Bꞌitzaloj! ¡Tꞌanbꞌaꞌloj u kuBꞌaals Amlika!
Bꞌenamen sabꞌukbꞌuꞌlan ijeꞌ
isibꞌel vitzꞌeꞌ u tenam tziꞌ,
yeꞌk iyaꞌeꞌ.—
Texhtuꞌ.
4 Ech pecheꞌ kuꞌ qꞌu 24 qꞌesala vatz u Tioxh tuchꞌ kaavaꞌl qꞌu itzꞌlich kam. Utz motx toksa iqꞌii vaꞌl kꞌujlel tu u kꞌujlebꞌal tetz mam qꞌesala. Nichtal ech tzaꞌ:
—¡Aꞌi, bꞌitzaloj!
¡Tꞌanbꞌaꞌloj u kuBꞌaals Amlika!—
Texhtuꞌ.
5 Ech uch kꞌasuꞌl vaꞌt u yol kꞌatz u kꞌujlebꞌal tetz qꞌesala. Tal ech tzaꞌ:
—¡Tꞌanbꞌaꞌtaj u kuTioxh,
kajay ex niman tetz,
ex taqꞌonom, chꞌooajs nimaj!—
Texhtuꞌ.
6 Aꞌ tepaj vabꞌi maꞌl u mam tenam, techal ijelun tuul viyol echaꞌ mam nimaꞌ. Utz echaꞌ itininun amlika aas sael itzꞌnaꞌbꞌ. Tal ech tzaꞌ:
—¡Bꞌitzaloj! ¡Tꞌanbꞌaꞌloj u kuBꞌaals Amlika! Tan nitekiꞌan u tijlenalil, ayaꞌ u kuBꞌaal Mam Tioxh.
7 Ech chiꞌbꞌojoꞌ utz, txuqꞌtxunojoꞌ. Qaltaj vitechalil u Tioxh. Tan oponyu u qꞌii vitzumeꞌbꞌal u Chelem Karneꞌl. Utz vetiꞌanlu tuch tibꞌ u ixviak vimol satzumeꞌi.
8 Aqꞌaxyu tzii te aas sivij tibꞌ tu bꞌaꞌnla tzꞌuꞌkin saj lino; techal iribꞌuneꞌ, yeꞌk tzꞌil tiꞌ. Tan aatz u bꞌaꞌnla tzꞌuꞌkin saj lino tziꞌ, aꞌ nikꞌam tiꞌ u jikomla ibꞌanon qꞌu aanima niman tetz u Jesuus.—
Texhtuꞌ.
9 Aatz tek u aanjel, tal ve ech tzaꞌ: —Tzꞌibꞌa qꞌu yol ech tzaꞌ: «Chiꞌbꞌebꞌal tetz qꞌu aanima qꞌuꞌl motx savsali tu u txꞌaꞌom tiꞌ u nimla qꞌii tetz vitzumbꞌaꞌa u Chelem Karneꞌl.» Chia.— Texhtuꞌ. Utz tal paj ve ech tzaꞌ: —Aatz qꞌu yol tzaꞌ, nojchit jikomla chaj yol tetz Tioxh.— Texhtuꞌ.
10 Uncheeꞌ aatz in tan, yakich pecheꞌojkuꞌin vatz u aanjel tiꞌ toksal iqꞌii. Pek tal ve ech tzaꞌ: —Yeꞌka. Yaꞌan ech tziꞌ tan, ela koꞌn in taqꞌonom Tioxh sauchꞌ. Utz ela koꞌn in tuchꞌ kajay qꞌul ahermano majte qꞌuꞌl niniman viyol u Jesuus. Pek aꞌ oksa iqꞌii Tioxh. Tan tiꞌ vinimal viyol u Jesuus kꞌuxh nital qꞌul iyol u Tioxh qꞌu alol tetz u yolbꞌal Tioxh.— Texhtuꞌ.
Vitxꞌolax inujul qꞌu aanima siꞌanu Vinaj vaꞌl atil jeꞌ tiꞌ u sajiꞌ chee
11 Uncheeꞌ aꞌ tek vil jajlich u Amlika tziꞌ. Utz vil maꞌl u sajiꞌ chee. Aatz vaꞌl atich jeꞌ tiꞌ, aꞌ ibꞌii “Jikom” utz, “Inujul”. Tan tinujul utz, tijikomal nitxꞌol inujul qꞌu kam utz, tinujul nichꞌaꞌoineꞌ. 12 Echaꞌ iribꞌun xamal qꞌu bꞌaqꞌ iatz. Utz kalabꞌen ikoroona atil jeꞌ tiviꞌ. Tzꞌibꞌamal ok maꞌl u bꞌii tiꞌ aas yeꞌxhabꞌil koꞌxh ootzajin tetz. Pek taꞌxh ootzajin tetz kam nitaleꞌ. 13 Tzꞌitumal ok kaj tiꞌ u toksaꞌm atoꞌk. Utz “Yolbꞌal Tioxh” vibꞌii. 14 Jolol ayeꞌn tu amlika qꞌul isol xamel tiꞌ. Bꞌaꞌnla chaj tzꞌuꞌkin saj lino qꞌu toksaꞌm. Yeꞌk tzꞌil tiꞌ. Utz tiꞌ sajiꞌ chee atik jeꞌ majte. 15 Utz niteluꞌl maꞌl jutzꞌ viꞌ espada titziꞌ. Utz aꞌ vaꞌl siꞌanvu tu qꞌu aanima tu kajay qꞌu tenam aas liꞌan viqꞌesalail. Utz tu vichꞌichꞌ bꞌaara satoksav tu jik. Echaꞌ ipachꞌqꞌul uuva tu pachꞌbꞌal tetz siꞌan te. Ech sinach vikꞌaꞌnal u Mam Tioxh. 16 Tzꞌibꞌamal ok maꞌl u bꞌii tiꞌ iqul u toksaꞌm nital ech tzaꞌ: “TIJLENAL QꞌU IJLENAL UTZ, IQꞌESAL QꞌU QꞌESALA.” Chia.
17 Ech vil maꞌl u aanjel txaklich tu u qꞌii. Qetun bꞌen tu qꞌu xichꞌomla chaj txokop tu amlika qꞌuꞌl chiꞌo nichiꞌeꞌ. Tal te ech tzaꞌ: —Niꞌextaj utz, moltaj etibꞌ tu maꞌl u nimla tzujbꞌeꞌibꞌ sataqꞌ u Tioxh sete. 18 Ech setzoti echiꞌo, ichiꞌl ijlenal, ichiꞌl qꞌesal sol, ichiꞌl sol, ichiꞌl mamaj aa yakꞌil, aꞌ imol ichee, ichiꞌl aanima kꞌayimal tibꞌ tu aqꞌon, tuchꞌ ichiꞌl qꞌuꞌl kꞌuxh yitꞌ kꞌayimal koj tibꞌ, nimajs chꞌooaj.— Texhtuꞌ.
19 Ech vil u xaꞌebꞌalla txokop, aꞌ imol qꞌu ijlenal tu vatz txꞌavaꞌ tuchꞌ qꞌul isol. Molel tibꞌ tiꞌ ibꞌanax chꞌaꞌo tuchꞌ vaꞌl atich jeꞌ tiꞌ u sajiꞌ chee, aꞌ imol qꞌul isol xamich tiꞌ majte. 20 Pek yakich txaypoj u xaꞌebꞌalla txokop tuchꞌ u chulin alol tetz u iyol u Tioxh. Ayaꞌ vaꞌl kam koꞌxh xheenya nichikꞌuch titxumbꞌal u xaꞌebꞌalla txokop tan, aꞌ subꞌun qꞌuꞌl ok u techlal u xaꞌebꞌalla txokop tiꞌ utz, motx toksa iqꞌii vitzꞌajich vatzibꞌal. Ech itzꞌlele sikaꞌbꞌil kꞌonax bꞌen tu u mam nebꞌlich aꞌ xamal vaꞌl nichtoyvu tuchꞌ qꞌol. 21 Pek ech koj tereꞌn qꞌul imol, aꞌ yatzꞌon u jutzꞌ viꞌ espada vaꞌl nichteluꞌl titziꞌ vaꞌl atich jeꞌ tiꞌ u sajiꞌ chee. Ech tiira motx ibꞌan itzujbꞌet tibꞌ qꞌu xichꞌomla txokop tiꞌ qꞌul ichiꞌl.
20Vibꞌantu qꞌesalail qꞌu niman tetzu Jesuus kꞌatza tu 1,000 yaꞌbꞌ
1 Ech aꞌ tek vil ikuꞌl maꞌl u aanjel tu Amlika. Iqꞌomich u laave taqꞌo tetz u mam jul. Utz iqꞌomich vaꞌt mam kadeena tiqꞌabꞌ. 2 Ech itxay u Dragoon, u oꞌtla txꞌiꞌla txokop. Ayaꞌ u Diablo, u Satanaas. Utz 1,000 yaꞌbꞌ iqitza. 3 Ech ikꞌon koꞌp tu u mam jul, u tatibꞌal. Utz bꞌoono ijupilka iꞌana. Utz toksaka visello tiꞌ u jupbꞌal tetz. Ech yeꞌkan sateesa qꞌu aanima tu bꞌey tu kajay u vatz txꞌavaꞌ. Pek tzꞌajnalen u 1,000 yaꞌbꞌ, ech nal laꞌpajchajpul bꞌiite.
4 Uncheeꞌ vil unjolol kꞌujlebꞌal tetz qꞌesala. Utz motx kꞌujeꞌ qꞌu aanima tuul qꞌuꞌl motx aqꞌax tijleꞌm tiꞌ iqꞌatax tzii. Utz vil u taanxelal qꞌu aanima majte qꞌuꞌl motx kutilel iviꞌ tiꞌ vinimal vichusbꞌal u Jesuus utz, tiꞌ koꞌn u yolbꞌal Tioxh. Tan yeꞌt motx toksa iqꞌii u xaꞌebꞌalla txokop, nikoꞌxh vitzꞌajich vatzibꞌal. Utz yeꞌt taqꞌ tzii aas soꞌok u techlal tipala oj tiꞌ iqꞌabꞌ. Utz vil iqꞌaav titzꞌpeꞌ, iꞌan qꞌesalail 1,000 yaꞌbꞌ kꞌatz u Jesuus. 5 Ech aꞌ u bꞌaxa qꞌaavitzꞌpichil tziꞌ. Pek aatz unjolt qꞌu kamnaj, yitꞌ yakich koj qꞌaav itzꞌpi. Analen aas latzꞌaj u 1,000 yaꞌbꞌ. 6 Pek chiꞌbꞌebꞌal tetz qꞌu niman tetz u Jesuus qꞌuꞌl laqꞌaavitzꞌpu tu u bꞌaxa qꞌaavitzꞌpichil. Tan yeꞌxhkam veꞌt tokebꞌal u kaꞌbꞌ kamchil tiꞌ. Pek qꞌilan sikꞌlen tetz Tioxh utz, tetz u Jesuus. Ech siꞌan qꞌesalail kꞌatza 1,000 yaꞌbꞌ.
Vichajpu u txꞌiꞌliꞌinaj tikaꞌpaj titiempo u yaꞌtebꞌal chꞌaꞌo
7 Uncheeꞌ taꞌxh latzꞌaj u 1,000 yaꞌbꞌ, sachajpul u txꞌiꞌliꞌinaj, saeluꞌl tu vipreexhuil. 8 Utz seꞌnteesa kajay qꞌu tenam tu bꞌey tu u vatz amlika txꞌavaꞌ. Antu u Gog tuchꞌ u Magoog samotximol tibꞌ taqꞌo tiꞌ ibꞌanax maꞌl u mam chꞌaꞌo. Yeꞌ achebꞌe tachul qꞌul isol. Echaꞌ sanaabꞌ tziꞌ mar. 9 Ech ipaxi paal tibꞌ tu kajay u vatz txꞌavaꞌ tziꞌ. Utz motx isuti tiꞌ u tatinbꞌal qꞌu niman tetz u Tioxh; u tenam vaꞌl tii u Tioxh tiꞌ. Pek kuꞌl xamal tu Amlika utz, ikꞌacha. 10 Ech txaypu u txꞌiꞌliꞌinaj, u eesan aanima tu bꞌey. Utz kꞌonax okoꞌp tu u mam nebꞌlich aꞌ xamal tuchꞌ qꞌol. Aꞌ atichku u xaꞌebꞌalla txokop tziꞌ tuchꞌ u chulin alol tetz iyol u Tioxh. Ech latziꞌ samotxulevasalku qꞌiils aqꞌbꞌal ech koꞌxh ibꞌenaꞌ, yeꞌk iyaꞌeꞌ.
Vitxꞌolax inujul qꞌu kamnaj
11 Ech vil maꞌl u mam saj kꞌujlebꞌal tetz mam qꞌesala. Utz vil vaꞌl kꞌujlich tuul. Utz yakich elojbꞌen u txꞌavaꞌ tuchꞌ u amlika siatz. Utz yeꞌt chee veꞌteꞌ. 12 Ech vil qꞌu kamnaj, chꞌooajs nimaj, jolol txaklich ok vatz u Tioxh. Ech jajax tuul qꞌu libro. Utz jajax tuul vaꞌt u libro majte, u tetz u atinchil tu bꞌenqꞌii bꞌensaj. Ech motx txꞌolax inujul qꞌu kamnaj tiꞌ qꞌu kam nichmotxiꞌaneꞌ aas itzꞌliche tan, tzꞌibꞌamal tu qꞌu libro tziꞌ. 13 Aatz u mar, ikꞌuch kajay qꞌu aanima qꞌuꞌl kam tuul. Echat u tioxhil kamchil majte tuchꞌ u molbꞌal tibꞌ qꞌu kamnaj, ikꞌucha jatvaꞌl kamnaj atil tuul. Utz motx txꞌolax inujul qꞌu kamnaj sijununil tiꞌ qꞌu kam motx iꞌana aas itzꞌliche. 14 Ech kꞌonax bꞌen u tioxhil kamchil tuchꞌ u molbꞌal tibꞌ qꞌu kamnaj tu u mam nebꞌlich aꞌ xamal. Aꞌ tekuꞌen aꞌ u kaꞌbꞌ kamchil. 15 Ech abꞌil vaꞌl yeꞌt chee vibꞌii tu u libro vaꞌl tetz atinchil tu bꞌenqꞌii bꞌensaj, kꞌonax bꞌen tu u mam nebꞌlich aꞌ xamal majte.
21Vichee vaꞌt u akꞌ amlikatuchꞌ vaꞌt akꞌ txꞌavaꞌ
1 Uncheeꞌ vil maꞌl u amlika tuchꞌ vaꞌt txꞌavaꞌ, akꞌ tekuꞌen. Tan yeꞌkanich u bꞌaxa amlika tuchꞌ u bꞌaxa txꞌavaꞌ. Utz yeꞌkan tek u mar. 2 Utz vil ikuꞌl u tioxhla tenam tu Amlika xeꞌ Tioxh, u akꞌ Jerusaleen. Bꞌaꞌnla vijel, echaꞌ ixviak aas saꞌtektzumeꞌi. In ilon, in Xhan.
3 Ech aꞌ tek vabꞌi maꞌl u yol majte, qꞌeqꞌuꞌm chit tel tu Amlika. Tal ech tzaꞌ: —Aatz u tatibꞌal u Tioxh, atil tek xoꞌl qꞌu aanima. Aꞌ saꞌatinku u Tioxh tixoꞌl tan, itenam tekuꞌen. 4 Ech aꞌ sasuun qꞌu taꞌl bꞌaqꞌ iatz qꞌu aanima. Utz yeꞌkan kamchil suꞌuchi. Yeꞌkan oqꞌel. Yeꞌkan sichꞌiꞌm. Utz yeꞌkan chiꞌom saꞌatini. Tan aatz qꞌu bꞌaxa kam tziꞌ, motx paalyuka.— Texhtuꞌ.
5 Ech yolon vaꞌl kꞌujlich tu u kꞌujlebꞌal tetz mam qꞌesala. Tal ech tzaꞌ: —Kajay qꞌu kam vetunchꞌexpixsalaꞌ.— Texhtuꞌ. Utz tal ve ech tzaꞌ: —Tzꞌibꞌa qꞌu yol tziꞌ tan, inujul utz, ijikomal atziꞌ.— Texhtuꞌ.
6 Tal paj ve ech tzaꞌ: —Atil kuꞌ tibꞌeyil, in viXeꞌtebꞌal utz, in viYaꞌebꞌal. Ech abꞌil maꞌj nikam tu tzaj itziꞌl utz, uloj. Tan oya koꞌn savaqꞌ tetz u aꞌ tu chun aꞌ vaꞌl tetz bꞌenqꞌii bꞌensaj. 7 Utz abꞌil aꞌ sasubꞌun u paav, saꞌetzan tiꞌ qꞌu kam sunkꞌatza. Ech in iTioxh siꞌaneꞌ utz; unkꞌaol unmeꞌal siꞌaneꞌ. 8 Pek aatz qꞌu xoꞌvom tuchꞌ qꞌuꞌl yeꞌ niniman aas atilin, tuchꞌ qꞌuꞌl tzuꞌkin tu paav, qꞌu yatzꞌol, qꞌu eesanibꞌ tu bꞌey tuchꞌ aanima, qꞌu istan, qꞌu oksan iqꞌii bꞌanich tioxh utz, tuchꞌ kajay qꞌu txubꞌaꞌlom, aꞌ yakku tu u mam nebꞌlich aꞌ xamal vaꞌl yuuel tuchꞌ qꞌol. Aꞌ u kaꞌbꞌ kamchil.— Texhtuꞌ.
Viveet u tioxhla tenam Jerusaleen
9 Ech xaanuꞌl maꞌl tu jujvaꞌl qꞌu aanjel sunkꞌatza qꞌuꞌl atich jujvaꞌl koopa tzixeꞌ. Noonaj kuꞌ jujvaꞌl qꞌu yaꞌtebꞌal choobꞌal paav tuul. Iqꞌilaꞌin. Utz tal ve ech tzaꞌ: —Niꞌaxh tan, sunkꞌuch vikꞌulel u Chelem Karneꞌl see.— Texhtuꞌ. 10 Ech tiqꞌotbꞌenin u Tioxhla Espiiritu taqꞌo viꞌ maꞌl u mam tꞌankin muunte. Ech ikꞌuch u Jerusaleen ve, u tioxhla tenam. Tuul nichikuꞌl tu Amlika xeꞌ Tioxh. 11 Kaana iribꞌun tiꞌ tu vitechalil u Tioxh. Echaꞌ iribꞌun maꞌj bꞌaꞌnla sivan. Echaꞌ u sivan jaspe aas nipaal kusajin tuul. 12 Aatz tiꞌaj utz, atoꞌk maꞌl mam tꞌankin tzꞌach; kabꞌlaalen ijubꞌalil atoꞌk. Utz aatz tziꞌ junun qꞌu jubꞌal, atil maꞌl aanjel; kabꞌlaal sikajayil. Utz tzꞌibꞌamal ok vibꞌii kabꞌlaal qꞌul ikꞌaol u Israeel tiꞌ. 13 Oxvaꞌl jubꞌal aal telaꞌ. Oxvaꞌt aal ijeꞌaꞌ. Oxvaꞌl aal tokeꞌ. Utz oxvaꞌt aal ikuꞌeꞌ. 14 Aatz u mam itzꞌachil u tenam tziꞌ, aꞌ atik jeꞌ viꞌ kabꞌlaal mamaj sivan. Utz tzꞌibꞌamal ok qꞌul ibꞌii kabꞌlaal qꞌul ichaj u Jesuus tiꞌ.
15 Aatz u aanjel vaꞌl nichqꞌilanin, atich maꞌl echabꞌal tzixeꞌ bꞌaꞌnla qꞌan chꞌichꞌ. Aꞌ satecha jankꞌal ichꞌii u tenam; jankꞌal ichꞌii qꞌul ijubꞌalil utz, jankꞌal itꞌaneꞌ jeꞌ vitzꞌachil. 16 Tiira kaa xoobꞌal u tenam tziꞌ. Jankꞌal ichꞌii u tajan, echat koꞌxh vivatz. Loqꞌ techa u tenam tu techabꞌal utz, 2,200 kiloometro unchaj paqꞌil. Ela koꞌn u tajan tuchꞌ vivatz utz, tuchꞌ vitꞌaneꞌ jeꞌ. 17 Ech techa jankꞌal itꞌebꞌlu vitzꞌachil utz, maꞌlen 65 metros. Aꞌ techav tu u techabꞌal vaꞌl niꞌanbꞌe qꞌu aanima. Aꞌ vaꞌl iꞌanbꞌe u aanjel. 18 Utz jaspe sivan u mam tzꞌach tziꞌ. Pek aatz u tenam tan, bꞌaꞌnla qꞌan chꞌichꞌ. Echaꞌ espejo, nipaal kusajin tuul. 19 Aatz qꞌu mam sivan vaꞌl atik jeꞌ u mam tzꞌach tetz u tenam, bꞌaꞌnla vijel tu jatvatzul koꞌn bꞌaꞌnla chaj sivan. Aatz u bꞌaxa utz, vijel tu jaspe. Aatz u kaꞌbꞌ utz, zafiro. Aatz u toxvaꞌ utz, aagata. Aatz u kaavaꞌ utz, esmeralda. 20 Aatz u toꞌvaꞌ utz, onice. Aatz u vaajaj utz, cornalina. Aatz u jujvaꞌ utz, crisoolito. Aatz u vaaxaj utz, berilo. Aatz vibꞌele utz, topaacio. Aatz vilava utz, crisopraso. Aatz vijunlaa utz, jacinto. Utz aatz vikabꞌlaa, amatista. 21 Pek aatz kabꞌlaal qꞌu jubꞌal tziꞌ, jolol perla vichiꞌl. Perla junun qꞌu jubꞌal tziꞌ. Pek aatz u mam bꞌey tu u tenam tziꞌ, tiira bꞌaꞌnla qꞌan chꞌichꞌ. Nipaal kusajin tuul, echaꞌ espejo.
22 Utz yeꞌt vil maꞌj totztioxh tu u tenam tziꞌ. Tan aꞌ totztioxh u kuBꞌaal Mam Tioxh tuchꞌ u Chelem Karneꞌl. 23 Utz yeꞌk ministeer vitxijtxun u qꞌii tziꞌ tuchꞌ u ichꞌ. Tan aꞌ nitxijtxun vitechalil u Tioxh utz, aꞌ nitxijtxun u Chelem Karneꞌl majte. 24 Ech aꞌ samotxpaalku qꞌu mamaj tenam vatz vitxijtxuneꞌ qꞌuꞌl maꞌt iqꞌalpul tu qꞌul ipaav. Utz saoksal iqꞌii qꞌu ijlenal tu kajay tenam utz, satal itechalil. 25 Utz jatu koj sajupax qꞌul ijubꞌalil u tenam qꞌiil tan, yeꞌkan aqꞌbꞌal tziꞌ. 26 Utz samotxtiqꞌo ul qꞌu txꞌiibꞌal qꞌii qꞌu tenam tuul, tuchꞌ qꞌu tijleꞌm. 27 Pek jatu koj soꞌokoꞌp tzuꞌkin kam tuul, qꞌu bꞌanol paav, tuchꞌ qꞌu txubꞌaꞌlom. Pek taꞌxh soꞌokoꞌp tuul qꞌu aanima qꞌuꞌl tzꞌibꞌamal qꞌul ibꞌii tu vilibro u Chelem Karneꞌl vaꞌl tetz atinchil tu bꞌenqꞌii bꞌensaj.
22U nimaꞌ tetz tiichajil
1 Ech aatz u aanjel, ikꞌuch maꞌl u nimaꞌ ve tetz tiichajil bꞌenamen. Kexh ikꞌankꞌochil; tiira ribꞌkin, echaꞌ espejo. Aꞌ nikꞌaskuꞌl kꞌatz vikꞌujlebꞌal u Tioxh tuchꞌ u Chelem Karneꞌl. 2 Utz atil maꞌl u tzeꞌ tetz tiichajil tinikꞌa u mam bꞌey tu u tenam tziꞌ, tu vitziꞌaj u nimaꞌ. Kabꞌlaa vatzul ivatz nitaqꞌeꞌ jun ichꞌ. Utz aatz qꞌul ixaj, bꞌaꞌnixsan tetz qꞌu aanima tu u vatz amlika txꞌavaꞌ. 3 Utz yeꞌkan tzꞌejbꞌal tzii yol sakuꞌ tu u tenam tziꞌ. Tan aꞌ saꞌatinku u Tioxh tuul tuchꞌ u Chelem Karneꞌl kꞌujlel tu kꞌujlebꞌal tetz iqꞌesalail. Utz kajay qꞌu taqꞌonom samotxoksan iqꞌii. 4 Utz samotxtil tibꞌ ivatz tuchꞌ u Tioxh. Ech aatz qꞌu niman tetz tziꞌ, samotxtzꞌibꞌal ok vibꞌii u Tioxh tipala. 5 Utz yeꞌkan aqꞌbꞌal saꞌatin tziꞌ. Saꞌtereꞌnkojsavsal txijtxubꞌal, nikoꞌxh vitxijtxun u qꞌii tziꞌ. Tan aꞌ tek satxijtxun u kuBꞌaal u kuTioxh. Utz bꞌenamen samotxiꞌan qꞌesalail qꞌu niman tetz kꞌatza, yeꞌk iyaꞌeꞌ.
U qꞌaavtulebꞌal u Jesuus
6 Uncheeꞌ tal paj u aanjel ve ech tzaꞌ: —Aatz qꞌu yol tzaꞌ, inujul utz, kꞌujlebꞌal kꞌuꞌl. Tan u kuBꞌaal vetchajon viaanjel tiꞌ talax tu qꞌu niman tetz kam qꞌu kam saꞌtexhuchi. Utz ankoꞌxh u kuTioxh tziꞌ vaꞌl nichiyolon kꞌatz qꞌu alol tetz viyolbꞌal oꞌten majte.— Texhtuꞌ.
7 Utz vabꞌi talax ech tzaꞌ majte: —Abꞌi iileꞌ oora koꞌxh suꞌulin. Utz chiꞌbꞌebꞌal tetz qꞌu aanima qꞌuꞌl niniman qꞌu yol bꞌaxabꞌsamal talax tu u uꞌ tzaꞌ.— Texhtuꞌ.
8 In Xhan, in vaꞌl ilon utz, abꞌin qꞌu kam tzaꞌ. Utz taꞌxh veet vila, veet vabꞌi, yakich pecheꞌojkuꞌin vatz u aanjel vaꞌl kꞌuchun qꞌu kam ve tziꞌ. Siꞌchvoksa iqꞌii vala. 9 Pek tal ve ech tzaꞌ: —Yeꞌka. Yeꞌ koꞌxh aꞌan ech tziꞌ tan, ela koꞌn in taqꞌonom Tioxh sauchꞌ. Utz ela koꞌn in tuchꞌ kajay qꞌul amol, qꞌu alol tetz qꞌul iyol u Tioxh. Utz ela koꞌn in tuchꞌ qꞌu aanima qꞌuꞌl niniman qꞌu yol tu u uꞌ tzaꞌ. Pek ¡aꞌ sooksa iqꞌii u Tioxh!— Texh ve.
10 Ech tal paj ve ech tzaꞌ: —Yitꞌ sakoꞌnkoxhaatinsa qꞌu kam sakꞌuꞌl qꞌuꞌl bꞌaxabꞌsamal el talax tu uꞌ tzaꞌ. Pek ala. Tan najaꞌ texh u tiempo tetz vitzojpebꞌal. 11 Ech aatz qꞌuꞌl yitꞌ inujul koj niꞌaneꞌ, ibꞌan tereꞌn vaꞌl yitꞌ inujul koj. Aatz qꞌuꞌl tzuꞌkin niꞌaneꞌ, ibꞌaneꞌn tereꞌn tzuꞌkin paav. Pek aatz qꞌu aanima qꞌuꞌl jikom, ibꞌaneꞌn qꞌu kam jikom. Utz aatz qꞌuꞌl xaannaj el kꞌatz paav, ibꞌaneꞌn tereꞌn qꞌu kam qꞌuꞌl yeꞌk paav tiꞌ.— Texh u aanjel.
12 Pek tal pajeꞌ: —Abꞌi iileꞌ: «Oora koꞌxh suꞌulin. Utz saviqꞌouꞌl vichoobꞌal junun qꞌu aanima tiꞌ jankꞌal qꞌu kam vetiꞌana. 13 In viXeꞌtebꞌal; in viYaꞌebꞌal. In viBꞌaxa utz, in viTzojpebꞌal.
14 Chiꞌbꞌebꞌal tetz qꞌu aanima qꞌuꞌl yeꞌxhkam niyansa tibꞌ tu paav. Echaꞌ txꞌaatxꞌoch toksaꞌm. Tan aꞌ qꞌuꞌl atil tokebꞌal tiꞌ u tzeꞌ tetz tiichaji. Utz aꞌ qꞌuꞌl soꞌokoꞌp tu qꞌul ijubꞌalil u tenam. 15 Pek ech koj qꞌuꞌl tiira txꞌiꞌ tiꞌ ibꞌanax u paav, saꞌkojokoꞌp. Echat qꞌu istan, qꞌu eesanibꞌ tu bꞌey tuchꞌ aanima, qꞌu yatzꞌol, qꞌu oksan iqꞌii bꞌanich tioxh utz, tuchꞌ qꞌuꞌl vatz ikꞌuꞌl ibꞌanax txubꞌaꞌl.
16 In u Jesuus. In vetchajon vunaanjel tiꞌ talax qꞌu yol tu qꞌu niman vetz. In vimukanil u Daviid utz, vituꞌxh ixalam. Utz in u ribꞌkin txꞌumiꞌl vaꞌl nijeꞌul kuꞌ chaj saj.» Chu u Jesuus.— Texh u aanjel.
17 Ech nital u Tioxhla Espiiritu tuchꞌ vikꞌulel u Chelem Karneꞌl. —¡Niꞌaxh!— Chia.
Utz abꞌil vaꞌl niabꞌin: —¡Niꞌaxh!— Chaj majte.
Ech abꞌil nitzaj itziꞌ tiꞌ u atinchil tu u bꞌenqꞌii bꞌensaj, uloj. Echaꞌ tukꞌal aꞌ siꞌaneꞌ. Tan tiira oya kuꞌen.
18 Utz nival tu kajay qꞌu aanima qꞌuꞌl niabꞌin qꞌu yol bꞌaxabꞌsamal talax tu u uꞌ tzaꞌ aas, oj abꞌil maꞌj satzꞌajsan ok tereꞌn iviꞌ qꞌu yol tzaꞌ, sakuꞌ qꞌu choobꞌal paav tiꞌ tu u Tioxh, qꞌuꞌl tzꞌibꞌamal tu u uꞌ tzaꞌ. 19 Utz oj abꞌil saꞌeesan tereꞌn qꞌu yol bꞌaxabꞌsamal talax tu uꞌ tzaꞌ, yeꞌk tokebꞌal tiꞌ u vatzomla tzeꞌ tetz tiichajil. Utz yeꞌk tokebꞌal tiꞌ u tioxhla tenam vaꞌl nital u uꞌ tzaꞌ.
20 Aatz vaꞌl nialon kajay qꞌu kam tzaꞌ, nital ech tzaꞌ:
—Nojchit vul texhtuꞌ.— Chia.
Utz aatz qꞌu abꞌin tetz u yol tzaꞌ sataleꞌ:
—¡Aꞌi, kuBꞌaal Jesuus, niꞌaxh!— Chaj.
21 Atoj vibꞌaꞌnil u kuBꞌaal Jesucristo texoꞌl sekajayil. Aꞌi.