U Uꞌ ITZꞌIBꞌA BꞌEN U PABLOXEꞌ QꞌU NIMAN TETZ U JESUUSTU COLOSA
Yol tiꞌ u uꞌ tzaꞌ
Aatz u uꞌ tzaꞌ, aꞌ tzꞌibꞌan u Pablo, aꞌ chit atich tu tzeꞌ tu u Roma, u qꞌesal tenam tetz u impeerio Romano. Kamal tixoꞌl qꞌu yaꞌbꞌ 59 — 63 m.t.J.
Antu itzꞌibꞌa u Pablo qꞌu uꞌ tzaꞌ: Qꞌu Niman Tetz U Jesuus Tu Eefeso, tuchꞌ Qꞌu Niman Tetz U Jesuus Tu Filipos, U Filemoon tuchꞌ vaꞌt u uꞌ itzꞌibꞌa bꞌen xeꞌ qꞌu niman tetz u Jesuus tu Laodicea tu u tiempo tziꞌ. Pek aatz u uꞌ itzꞌibꞌa bꞌen tu Laodicea, tzꞌejxinaj. Utz nitalcheꞌ aas anal koꞌxh veet itzꞌibꞌataꞌ, el tek tu tzeꞌ. Aꞌ iqꞌon bꞌen u uꞌ tu Colosa tikuenta Aasia u Tiiquico tuchꞌ u Oneesimo. Nitalcheꞌ aas yitꞌ u Pablo koj chikon qꞌu niman tetz u Jesuus tziꞌ, pek maꞌj tu qꞌu lochol tetz. Kamal aꞌ chikon u Epafras.
Kam koj tokeꞌ aas itzꞌibꞌa bꞌen u uꞌ u Pablo tzaꞌ, pek tan, aatz qꞌu niman tetz u Jesuus tu Colosa, nichtekiyuu u bꞌaꞌnla chusbꞌal tuchꞌ unjot yeꞌxtxojla txumbꞌal tetz vaꞌt uqꞌaybꞌal xoꞌl qꞌu griego. Aatz vaꞌl nichtekinima tziꞌ utz, ayaꞌ u toksal iqꞌii vaꞌl “mam txumbꞌal” chu qꞌu griego tiꞌ. Aatz vaꞌl “mam txumbꞌal” chu tiꞌ tziꞌ, ayaꞌ qꞌu filosofia qꞌuꞌl tetz koꞌn aanima. Sikꞌuꞌl koꞌn unjoloj aanima cheenajka niyolonka. Utz techal siatz tan, qꞌu tioxh nichaqꞌon qꞌu “mamaj txumbꞌal” tu qꞌu aanima nichtaleꞌ. Ech techal u txumbꞌal siatz niyolonka.
Aatz paj vaꞌl nichiꞌan qꞌu aanima tziꞌ, nichtekinima maꞌl vichusbꞌal qꞌu Israeel aas satꞌanbꞌaꞌl qꞌu aanjel. Echaꞌ itꞌanbꞌaꞌl u Tioxh aas nimotxtaleꞌ tan, aatz qꞌu aanjel utz, paasan ok iyol qꞌu aanima vatz u Tioxh. Utz mamaj qꞌesala tatin siatz.
Nichpajinima unjolol qꞌu kam atich tu u oꞌtla mantaar majte. Echaꞌ qꞌu mantaar tiꞌaj echbꞌubꞌal. Ech aꞌ qꞌu oꞌtla kostuumbre qꞌuꞌl oksamal xoꞌl u bꞌaꞌnla chusbꞌal taqꞌo. Ech tokeꞌ nital bꞌen tzaꞌ aas yeꞌk saꞌabꞌil ok qꞌu txumbꞌal qꞌuꞌl tetz koꞌn aanima. Yeꞌk satꞌanbꞌaꞌl qꞌu aanjel. Utz yeꞌk sanimal qꞌu kostuumbre tetz kam txaaꞌ echbꞌuli.
Aꞌ u jatxbꞌal tibꞌ qꞌu yol tu u uꞌ tzaꞌ.
1) 1.1-8 Ech vixeꞌt u uꞌ tzaꞌ.
2) 1.9-23 Niyolon tiꞌ vichiton u Tioxh tu u paav.
3) 1.24—2.5 Nikꞌuch u Pablo aas ichaj u Jesuus.
4) 2.6—4.6 Niyolon tiꞌ u akꞌ txumbꞌal kꞌatz u Jesuus.
5) 4.7-18 Ech vitzojpu qꞌu yol tu u uꞌ tzaꞌ.
1U Uꞌ ITZꞌIBꞌA BꞌEN U PABLOXEꞌ QꞌU NIMAN TETZ U JESUUSTU COLOSA
Ichajlichil qꞌu niman tetz u Jesuus tu Colosa
1 Aatz in, in Pablo ichaj u Jesucristo titxumbꞌal u Tioxh. Aꞌ unmol u niman tetz u Jesuus Timoteo. 2 Nuntzꞌibꞌa bꞌen u uꞌ tzexeꞌ tzaꞌ, jatvaꞌl ex atilex tu Colosa, ex kuhermanos tiꞌ inimal u Jesuus. Ech u Tioxh, u kuTat tu Amlika koj tuchꞌ u kuBꞌaal Jesucristo aqꞌon kuꞌ u bꞌaꞌnil setiꞌ. Utz aꞌ koj aqꞌon u paas tetaanima.
Viqꞌilat isikꞌlet Tioxh u Pablo tiꞌ qꞌu niman tetz u Jesuus tu Colosa
3 Chajpaj nikuqꞌila kusikꞌle u Tioxh, viTat u kuBꞌaal Jesucristo, nikukꞌama setiꞌ. 4 Tan niqabꞌi aas tiira kꞌujlel ekꞌuꞌl tiꞌ u Cristo Jesuus. Utz tiira tiiꞌex setibꞌilaj, ex niman tetz u Jesuus. 5 Utz nikoꞌnkoxhebꞌan ech tziꞌ, pek tan, kꞌujlel ekꞌuꞌl tiꞌ vetetz txaael tu Amlika vaꞌl nechꞌia tuchꞌ txuqꞌtxunchil. Ayaꞌ vaꞌl alax sete aas enimat u nojla bꞌaꞌnla chusbꞌal. 6 Utz aatz u bꞌaꞌnla chusbꞌal alax sete tziꞌ, nipaxsal itziiul tu u vatz amlika txꞌavaꞌ cheel. Utz qꞌat yakꞌini, qꞌat jalp itxumbꞌal aanima taqꞌo. Echaꞌ iꞌan sekꞌatza, ayaꞌxchen tu u qꞌii aas ekꞌultu u bꞌaꞌnil, aꞌ chit etabꞌit vinujul. 7 Kam chit echaꞌ vaꞌl echabꞌa el kꞌatz u niman tetz u Jesuus Epafras, u bꞌaꞌnla qetz aqꞌonomil vaꞌl niꞌxhitzojpi u taqꞌon tiꞌ u Cristo texoꞌl. 8 Ech aꞌ vetiqꞌon ul yol sukuvatz setiꞌ, tiꞌ vebꞌantu tiiꞌex setibꞌilaj tu vitxumbꞌal u Tioxhla Espiiritu.
9 Echixeꞌat, yeꞌxhkam nikuyaꞌ tiꞌ iqꞌilal isikꞌlel u Tioxh setiꞌ, ayaꞌxchen tu u qꞌii aas qabꞌit u kam setiꞌ tziꞌ. Nikujaj tu u Tioxh aas saꞌxhetootzaji tereꞌn vitxumbꞌal. Saꞌxhtaqꞌ tereꞌn etzakꞌkinil kꞌatza. 10 Ech jikom chit ex siꞌaneꞌ kam echaꞌ visaꞌ u Tioxh setiꞌ. Utz bꞌaꞌn seꞌenku kajay vebꞌanon te. Tan tu qꞌul ebꞌanon sekꞌuchvu u bꞌaꞌnil. Ech chꞌiichil chit sebꞌan tiꞌ tootzajil u Tioxh. 11 Nikujaj tu u Tioxh majte aas setiqꞌo eyakꞌil tu vitechalla xamlil u Tioxh. Ech atil mam yakꞌil sekꞌatza, seqꞌiꞌ qꞌu tzaꞌl sapaalkꞌex. 12 Ech tuchꞌ txuqꞌtxunchil sekꞌama qꞌu kam tu u kuTat tu Amlika. Tan tiꞌ vibꞌaꞌnil, saetzanex tiꞌ qꞌu kam tu viQꞌesalail vaꞌl echaꞌ txijtxubꞌ kubꞌey kajay oꞌ niman tetz u Jesuus. 13 Tan aꞌ veteesanoꞌ tu u uken tikuenta u txꞌiꞌliꞌinaj utz, vettoksaꞌoꞌ tikuenta viQꞌesalail u Jesucristo, viKꞌaol u Tioxh vaꞌl tii tiꞌ. 14 Ech tiqꞌaqꞌal koꞌn vetitooloꞌ tu qꞌu kupaav tu vikajal utz, vetikuyloꞌ.
U nimla tijleꞌm u Cristo
15 Tan aatz u Jesuus, aꞌ vitziꞌ ivatz u Tioxh vaꞌl yeꞌ naꞌl tatineꞌ.
Utz atichnale aas yeꞌsajich ichee u vatz amlika txꞌavaꞌ.
16 Tiꞌ kuꞌen kꞌuxh iꞌan kajay qꞌu kam u Tioxh qꞌuꞌl tu amlika tuchꞌ qꞌuꞌl vatz txꞌavaꞌ;
antu qꞌu tioxhil kam, kꞌuxh naꞌl utz, kꞌuxh yeꞌ naꞌl.
Echaꞌ qꞌu qꞌesal tenam.
Echaꞌ qꞌuꞌl atil tijleꞌm.
Echaꞌ qꞌu qꞌesala.
Echaꞌ qꞌu ijlenal.
Ech tiꞌ u Jesuus koꞌn bꞌanaxku qꞌu kam tziꞌ utz, tetz bꞌanaxi.
17 Atich nal u Jesuus aas ichee qꞌu kam kajayil utz;
tiqꞌaqꞌal koꞌn kꞌuxh ankoꞌxh niyikun cheel.
18 Aꞌ u qꞌesala xoꞌl qꞌu niman tetz, echaꞌ tatin u kuviꞌ kꞌatz u kuchiꞌl.
Aꞌ u chikol tetz qꞌu kam kajayil.
Utz aꞌ u bꞌaxa qꞌaavitzꞌpichil xoꞌl qꞌu kamnaj.
Taꞌxh maꞌl sijunal aas aꞌ qꞌesala viꞌ qꞌu kam.
19 Tan titxumbꞌal u Tioxh elka aas ankoꞌxh ex eloj tu u Jesuus.
Ela koꞌn. Kajay vitxumbꞌal u Tioxh atil kꞌatz u Jesuus majte.
20 U Jesuus oksan ibꞌaꞌn qꞌu kam kajayil tuchꞌ u Tioxh,
tu tel vikajal vatz kurus.
Tiqꞌaqꞌal koꞌn u Jesuus kꞌuxh nitok ibꞌaꞌn qꞌu kam kajayil tuchꞌ u Tioxh,
kꞌuxh qꞌuꞌl tu Amlika utz,
kꞌuxh tu vatz txꞌavaꞌ.
21 Aatzich vetatin siatz vetiꞌanka, ech koꞌn aꞌ tatin puera aanima. Jolol exich koontrain tetz u Tioxh tu qꞌul etxumbꞌal tuchꞌ tu qꞌul ebꞌanoneꞌ aas yeꞌxtxoj. 22 Pek aatz cheel, okyu ebꞌaꞌn tuchꞌ u Tioxh tiqꞌaqꞌal u kamchil vaꞌl paalku u Jesuus tuchꞌ vichiꞌl. Tan aꞌ isaꞌ paat yeꞌk paav sekꞌatza siꞌaneꞌ aas latiqꞌooponex vatz u Tioxh. Ech yeꞌk maꞌj paav satxꞌolpik enujul. 23 Loqꞌ taꞌxhtzii oj nojchit tiira txaklelex kꞌatza tu vikꞌujeꞌ ekꞌuꞌl tiꞌ. Utz atilchitokꞌex tiꞌ. Paat yeꞌk sakaꞌtziiunex tiꞌ ichꞌial tuchꞌ txuqꞌtxunchil vaꞌl sakukꞌuleꞌ nital u bꞌaꞌnla chusbꞌal vaꞌl abꞌimal setaqꞌo. Ayaꞌ vaꞌl nipaxsal itziiul tu u vatz amlika txꞌavaꞌ kajayil. Utz aqꞌel vijleꞌm tiꞌ ipaxsal itziiul majte, in Pablo.
Vitxuqꞌtxun u Pablokꞌuxh nipaal tu tzaꞌl
24 Aatz cheel, nuntxuqꞌtxuneꞌ kꞌuxh nunpaal tu tzaꞌl tiꞌ talax u bꞌaꞌnla chusbꞌal sete. Kꞌuxh nunpaal tu qꞌu tzaꞌl tiꞌ itzꞌajsal vaꞌl paalku u Jesuus tiꞌ qꞌu niman tetz. 25 Utz vettaqꞌ maꞌl vijleꞌm u Tioxh texoꞌl tan, ech vitxumbꞌal setiꞌ ex niman tetz. Loqꞌ in koꞌn lochol etetz utz, in aqꞌonom texoꞌl tiꞌ ipax paal u yolbꞌal Tioxh bꞌaꞌnil. 26 Anal cheel aqꞌli eluꞌl vatzsaj tu u Tioxh u tokebꞌal u akꞌla txumbꞌal, vaꞌl yeꞌkich vatzsaj tu qꞌu tiempo paalnajka; yeꞌich ootzajimal. Pek aatz cheel, elyuꞌl vatzsaj vatz qꞌu niman tetz. 27 Utz u Tioxh atkoꞌxh vetꞌaqꞌon tzii aas saeluꞌl vatzsaj qꞌu mamaj techalla txumbꞌal yeꞌich ootzajimal. Ayaꞌ u tulebꞌal u Jesuus vatz txꞌavaꞌ tzaꞌ. Tan aꞌ vaꞌl nitekipax paal itziiul texoꞌl cheel, ex puera aanima yitꞌ oknajkojex tiꞌ u tuqꞌaybꞌal qꞌu Israeel. Utz atil tek sekꞌatza. Aꞌ tek vaꞌl nikuchꞌia tul tuchꞌ txuqꞌtxunchil.
28 Ech tokeꞌ nikupaxsa itziiul xoꞌl qꞌu aanima kajayil tiꞌ toksal tu jik. Nikumoxbꞌe tiꞌ sinima. Utz nikuchus kajay qꞌu bꞌaꞌnla txumbꞌal te tiꞌ u Cristo Jesuus. Ech tiira tzꞌajel tu u tatin kꞌatz u Jesuus liꞌana aas loꞌok siatz. 29 Ech aꞌ u vaqꞌon. Aꞌ nivaqꞌ yakꞌil tiꞌ. Utz nilochꞌin u mam iyakꞌil u Jesuus atil sunkꞌatza.
21 Aꞌ unsaꞌ setootzaji aas kaana vaqꞌtu yakꞌil setiꞌ tuchꞌ tiꞌ qꞌu niman tetz u Jesuus tu Laodicea utz, tuchꞌ tiꞌ qꞌuꞌl yeꞌ tootzaj unvatz. 2 Tan nunbꞌaꞌn yaꞌl utz, aꞌ unsaꞌ aas saꞌxhetiqꞌo eyakꞌil, maꞌl evatz tiꞌ ebꞌantu tii setibꞌilaj. Utz aꞌ unsaꞌ majte aas tiira saꞌxhetootzaji u mam txumbꞌal tiꞌ u Cristo vaꞌl yeꞌ ootzajimich koꞌxtene, pek elyuꞌl vatzsaj tu u Tioxh ayaꞌ u kuTat. 3 Tan tzixeꞌ kolelku qꞌu mamaj txumbꞌal, qꞌu ootzajibꞌal kajayil.
4 Utz kꞌuxh nival qꞌu kam sete ech tziꞌ tan, aꞌ unsaꞌ aas yeꞌxhabꞌil koꞌxh sasubꞌunex tu maꞌj yeꞌxtxojla txumbꞌal aas tiira inujul tabꞌileꞌ. 5 Tan kꞌuxh yeꞌk in texoꞌl utz, yeꞌ nitil tibꞌ unvatz setuchꞌ, ela koꞌxh tuchꞌ atilin texoꞌl. Tan tiira atilex sunkꞌuꞌl. Utz kaana untxuqꞌtxuneꞌ tan, nivabꞌi aas jikom chit iveet qꞌu kam nebꞌaneꞌ. Utz bꞌaꞌnla txaklelex tu vikꞌujeꞌ ekꞌuꞌl tiꞌ u Cristo.
Vinimal u Jesuustu u atinchil kꞌatza
6 Tan vetenima u kuBꞌaal Jesucristo tetaanima tiꞌ vikꞌujeꞌ ekꞌuꞌl tiꞌ. Ech tiꞌ vikꞌujeꞌ ekꞌuꞌl tiꞌ chꞌiiojex tu vetatin kꞌatza majte. 7 Tiira bꞌenoj ekꞌuꞌl tiꞌ. Echaꞌ maꞌj tzeꞌ aas sibꞌ tzian bꞌennaj taqꞌil tu txꞌavaꞌ; chꞌiichil chit sebꞌan kꞌatza. Tiira txaklojex tu qꞌu chusbꞌal nimamal setaqꞌo tiꞌ u Jesucristo, kam echaꞌ vaꞌl chusax sete. Utz tiira kꞌamataj chit qꞌu kam tu u Tioxh.
8 Pek kuentaꞌex, isubꞌchꞌex aanima tu qꞌu txumbꞌal qꞌuꞌl yol koꞌxhtuꞌ, yeꞌk tokebꞌal. Tan eesanal tu bꞌey. Yeꞌk senima tan, yeꞌk itxaꞌk. Kostuumbre koꞌn tu u vatz amlika txꞌavaꞌ tzaꞌ. Aꞌ niꞌelku kꞌatz u txꞌiꞌliꞌinaj, u qꞌesalain tetz u vatz amlika txꞌavaꞌ tzaꞌ. Utz yitꞌ kꞌatz koj u Cristo niteesava.
9 Tan kam chit bꞌanel tu u Tioxh, tiira echat chit bꞌanel tu u Cristo bꞌaꞌnil. Pek ok koꞌn ichiꞌl; bꞌen koꞌn aanima. 10 Ech tokeꞌ atil u Tioxh sekꞌatza bꞌaꞌnil tan, oknajtekꞌex kꞌatz u Cristo. Utz taꞌxh maꞌl u Cristo viꞌ qꞌu kam kajayil. Aꞌ u aa yol viꞌ kajay qꞌu tioxhil kam qꞌuꞌl atil tijleꞌm utz, viꞌ qꞌuꞌl atil iyakꞌil. 11 Utz aatz enimat u Cristo, vetijalpu vetxumbꞌal vaꞌl iqꞌomich setaqꞌo tetitzꞌpebꞌal tetz ibꞌanax u paav; echaꞌ tzokꞌel el iꞌana. Loqꞌ yitꞌ tiqꞌaqꞌal koj u kostuumbre tiꞌ itzokꞌax el bꞌiil chiꞌl, pek chꞌexpichil vetiꞌan vetxumbꞌal taqꞌo. 12 Utz aatz tu vebꞌant evautiismo, echaꞌ ela vetmujaxex tuchꞌ u Jesuus. Utz echaꞌ ela vetqꞌaavitzꞌpꞌex tuchꞌ tan, kꞌujlel ekꞌuꞌl tiꞌ u Tioxh vaꞌl qꞌaav itzꞌpixsan xoꞌl qꞌu kamnaj tu u mam iyakꞌil.
13 Tan aatz vetatin koꞌxtene, kamnajichꞌex vatz u Tioxh tu qꞌul epaav. Yeꞌich etootzaj kam u kuybꞌal paav. Utz nikoꞌxh enima koj u kostuumbre tiꞌ itzokꞌax el bꞌiil chiꞌl. Pek aatz cheel, vetikuylu kajay qꞌul epaav. Atil tek etiichajil tu bꞌenqꞌii bꞌensaj kꞌatz u Cristo. 14 Aꞌ vettzaasan qꞌu tzii tuchꞌ qꞌu mantaar qꞌuꞌl oknajich qiꞌ. Aꞌ ijan qꞌu kutxꞌoj vatz u Tioxh u Jesuus aas laauxhil jeꞌ vatz kurus. 15 Ech tu vijeꞌ u Jesuus vatz u kurus, el vitxumbꞌal kajay qꞌu tioxhil kam. Echaꞌ qꞌu qꞌesala, qꞌu ijleꞌm utz, qꞌu yakꞌil. Bꞌoono teesal iqꞌii iꞌana. Aꞌ kaa qꞌesala siiꞌ aas jeꞌ u Jesuus vatz kurus.+ 2:15 Aatz vaꞌl nital tzaꞌ tziꞌ aas “bꞌoono teesal iqꞌii iꞌana” chia; loqꞌ koꞌnkoxh tel qꞌii. Pek aꞌ nikꞌam tiꞌ vaꞌl nichiꞌan qꞌu ijlenal koꞌxtene aas nichikꞌuch paal vatz tenam qꞌul ikoontra qꞌuꞌl nichisubꞌeꞌ utz, nichitxay tu chꞌaꞌo, qitzel nixaan ipaal vatz tenam.
U titzꞌal qꞌu kam nital u Tioxh
16 Echixeꞌat nival sete aas yeꞌk setoksa tetz kꞌuxh abꞌil saꞌeesan eqꞌii tiꞌ vaꞌl nenima. Echaꞌ tziꞌ aas kam netechbꞌu, netukꞌa. Nikoꞌxh tiꞌ abꞌiste qꞌii senima tetz nimla qꞌii, oj ichꞌ, oj ilanbꞌal qꞌii. 17 Tan aatz kajay qꞌu kam tziꞌ, techlalich koꞌn u tul u Cristo. Pek aꞌ chit ibꞌoꞌqꞌol u Cristo, u tzojpixsan tetz. 18 Echixeꞌat nival sete aas yeꞌ koꞌxh etaqꞌ tzii sisubꞌex qꞌuꞌl kaana visioon tootzaj aas nitaleꞌ. Nitoksa iqꞌii qꞌu aanjel, nitaleꞌ. Nikoꞌxh toksa tibꞌ tiꞌ talax kam aas paat yeꞌ ilel taqꞌo. Utz isubꞌchꞌex qꞌuꞌl maanxho chit itxumbꞌal tiloneꞌ; loqꞌ tꞌeꞌsil nibꞌanon. Tzaj itxumbꞌal koꞌxh nitoksa tiꞌ. Kuentaꞌex tiꞌ tan, noj etzꞌej vetoya kꞌatz u Tioxh. 19 Aatz qꞌuꞌl tziꞌ, yitꞌ atil koj ok kꞌatz u Cristo tu vaꞌl nitaleꞌ. Yitꞌ jikom koj vitxumbꞌal tan, yitꞌ txayel koj tibꞌ tuchꞌ u Jesuus. Tan aatz oꞌ niman tetz u Jesuus, jik nikuchꞌii kꞌatz u Jesuus tan, aꞌ u kuviꞌ. Aꞌ u chꞌiisan qetz tu u Tioxh. Echaꞌ vichꞌii u kunimal aas txayel tibꞌ tuchꞌ u kuviꞌ. Tan u viꞌ vaꞌl nichꞌiisan tereꞌn qꞌu txaybꞌal tetz u kuchiꞌl, echaꞌ qꞌu nutxꞌ bꞌaj.
20 Echaꞌ vetkamex tuchꞌ u Cristo utz, akꞌ tek qꞌul etxumbꞌal. Loqꞌ ankoꞌxh netachva qꞌu yeꞌxtxojla kostuumbre tu u vatz txꞌavaꞌ tzaꞌ. ¿Kantuꞌ ankoꞌxh nenima qꞌu kam tu u oꞌtla mantaar? 21 —Akanchoꞌk u kam tziꞌ.— Chia. —Eechbꞌuch vaꞌl tziꞌ.— Chia. —Nikoꞌxh saꞌkojatꞌok vaꞌl tziꞌ.— Chia. 22 Aatz qꞌu mantaar tziꞌ, sakoꞌnpaali tan, ichusbꞌal koꞌn aanima. Nikoꞌnisotzeꞌ tuul koꞌxh nibꞌanbꞌeleꞌ. 23 Nojchit bꞌaꞌn tabꞌileꞌ tetz maꞌj uqꞌaybꞌal. Bꞌaꞌnla txumbꞌal tabꞌileꞌ. Loqꞌ aꞌ isaꞌ qꞌu subꞌul tziꞌ aas oꞌ maanxho vatz qꞌul imantaar. Tan nitaleꞌ aas soꞌoksal u kuchiꞌl tu kꞌaxbꞌichil tiꞌ inimaleꞌ. Pek loqꞌ kam koj itxaꞌk tiꞌ teesal qꞌu yeꞌxtxojla chaj tachaꞌv u kuchiꞌl.
31 Aꞌ chit setitzꞌa qꞌu kam tu Amlika tan, itzꞌpinajtekꞌex kꞌatz u Cristo. Utz ayeꞌn u Cristo tu Amlika, kꞌujlel tisebꞌal u Tioxh. Pek yitꞌ aꞌ koj setizꞌa ibꞌanax qꞌu kam yeꞌxtxoj tetz u vatz txꞌavaꞌ tzaꞌ. 3 Tan aatz tek vetatin cheel, ech tekuꞌen aꞌ kamnajelex vatz u paav. Elyex siatz. Kolel tek etatin kꞌatz u Cristo xeꞌ Tioxh. 4 Tan aꞌ tek vixeꞌal u qatin tu u vatz amlika txꞌavaꞌ tzaꞌ aas bꞌenamen saqitzꞌa ibꞌanax qꞌu kam vaꞌl isaꞌ u Cristo. Utz ant ex, saꞌatinex kꞌatza tu vitechalil aas luꞌuli.
Visotzsal qꞌu txumbꞌal tetz u paav
5 Echixeꞌat nival sete, bꞌantaj yaꞌl isotz sekꞌatza qꞌu yeꞌxtxojla chaj achaꞌv tiꞌ qꞌu kam tu u vatz amlika txꞌavaꞌ. Ayaꞌ qꞌuꞌl tzaꞌ: qꞌu eesaibꞌ tu bꞌey tuchꞌ aanima, qꞌu kam tzuꞌkin vatz Tioxh, qꞌu yeꞌxtxojla chaj achaꞌv, tuchꞌ u achva kam yeꞌk nooebꞌal tiꞌ. Tan aatz vibꞌanax qꞌu kam tziꞌ, ela koꞌn tuchꞌ inimal bꞌanich tioxh. 6 Utz nikuꞌ vikꞌaꞌnal u Tioxh tiꞌ qꞌu aanima qꞌuꞌl niꞌan ech tziꞌ. Utz exich bꞌanol tetz qꞌu paav vetiꞌanka atziꞌ, aas atichꞌex tu qꞌul epaav.
8 Pek aatz cheel, aqꞌtajka qꞌu kam tzaꞌ: u mam kꞌaꞌnal, u lakpichil viꞌ, u onkonil, u tzꞌejo yol tiꞌ aanima, tuchꞌ u maalola chaj yol nijeꞌul tetziꞌ. 9 Yeꞌ koꞌxh etxubꞌaꞌli etibꞌ tan, motx kaay qꞌu oꞌtla chaj txumbꞌal qꞌuꞌl nichebꞌan koꞌxtene tziꞌ, kꞌuxh naqꞌbꞌinajichꞌex tiꞌ ibꞌanaxeꞌ aas yeꞌsajich enimat u Jesuus. 10 Akꞌ tek vetxumbꞌal tu vibꞌaꞌnil u Tioxh vaꞌl vetxeꞌtixsan u bꞌaꞌnil sekꞌatza. Utz aal tereꞌn chꞌexpichil nebꞌaneꞌ. Ech tek vetxumbꞌal siꞌaneꞌ u Tioxh, u tzꞌajol qetz.
11 Tan aatz oꞌ, oꞌ niman tetz u Jesuus. Maꞌl tekoꞌn kuvatz vatz u Tioxh. Yitꞌ paarten koj tel qꞌu griego tuchꞌ qꞌu Israeel. Yitꞌ paarten koj tel qꞌuꞌl tzokꞌel el bꞌiil ichiꞌl tuchꞌ qꞌuꞌl yeꞌ tzokꞌel el ichiꞌl. Yitꞌ paarten koj tel qꞌu puera aanima, nikoꞌxh qꞌuꞌl yeꞌk tootzajibꞌal. Utz yeꞌk tel qꞌuꞌl kꞌayimal tibꞌ tu aqꞌon tuchꞌ qꞌu qꞌesal aqꞌon. Tan maꞌl koꞌn u Cristo nikunima utz, atil sukukꞌatza kukajayil.
12 Tiira tii u Tioxh setiꞌ sejununil tan, vetitxaaꞌex. Vettaqꞌbꞌenex niman tetz. Echixeꞌat atoj qꞌu bꞌaꞌnil sekꞌatza tzaꞌ, echaꞌ etoksaꞌm: u txumu vatz, u jikil, u maanxhoil utz, u paciensiail utz, vaꞌl yeꞌk sajeꞌsa etibꞌ. 13 Txꞌaktaj etibꞌ. Kuytaj etibꞌ oj abꞌil sixoch tibꞌ sevatz. Echaꞌ iꞌan u Cristo aas vetikuyoꞌ, echat sebꞌan majte. Kuyunojex. 14 Aꞌ chit sebꞌan tiiꞌex setibꞌilaj tan, aꞌ vibꞌoꞌqꞌol viꞌ qꞌu kam kajayil. Aꞌ u txaybꞌal etibꞌ tiꞌ ebꞌantu maꞌl evatz. 15 Utz tiira aꞌ koj iqꞌon etetz u paas atil tetaanima vaꞌl nitaqꞌ u Tioxh. Tan aꞌ isaꞌ setiꞌ; vetisikꞌleꞌex aas maꞌl evatz. Ech kꞌamabꞌetaj te.
16 Utz tiira at koj chit viyolbꞌal u Cristo sekꞌuꞌl. Chustaj tuchꞌ txumbꞌal; etaqꞌtaj tibꞌ nimal ekꞌuꞌl tiꞌ. Utz kꞌamataj qꞌu kam tu u kuBꞌaal tuchꞌ bꞌitzal, qꞌuꞌl atil tu u uꞌ tetz bꞌitzal Tioxh, tuchꞌ tereꞌn kam koꞌxh bꞌitzalil utz, tuchꞌ qꞌu bꞌitzal qꞌuꞌl nitoksa u Tioxhla Espiiritu tetaanima. 17 Utz kam chit kajay qꞌuꞌl nimotxebꞌaneꞌ, nimotxetaleꞌ, tibꞌii u kuBꞌaal Jesuus sebꞌanva. Utz tibꞌii u Jesuus sekꞌamav qꞌu kam tu u Tioxh u kuTat.
U tiqꞌol unjolol qꞌu kam sabꞌanax tu u vatz txꞌavaꞌ
18 Aatz ex, ex tzumlich ixoj, nimataj qꞌul evinaj tan, ech visaꞌ u kuBꞌaal.
19 Ex majte, ex tzumlich vinaj, tiiojex tiꞌ qꞌul etixoj. Yeꞌ koꞌxh ebꞌan ex qichkin te.
20 Echat ex kꞌaol meꞌala, noj enima etxutx ebꞌaal tiꞌ kajay qꞌu kam. Tan aꞌ vaꞌl bꞌaꞌn niꞌenku tu u Tioxh.
21 Txutxa bꞌaala, yeꞌk selak iviꞌ qꞌul enitxaꞌa. Ech yeꞌk sakꞌaybꞌ ikꞌuꞌl.
22 Ex majte jatvaꞌl ex kꞌayimal etibꞌ tu aqꞌon, ayaꞌl ekꞌuꞌl senima qꞌu bꞌaal etaqꞌon tu vatz txꞌavaꞌ tzaꞌ tiꞌ kajay qꞌu kam. Yitꞌ taꞌn koꞌnkoxh bꞌaꞌn sebꞌaneꞌ aas nixeeꞌex. Echaꞌ niꞌan qꞌuꞌl aꞌ isaꞌ bꞌaꞌn chit sakaak vatz aanima. Pek tuchꞌ chit etaanima sebꞌan qꞌul etaqꞌon. Aꞌ sexoꞌva u Tioxh. 23 Tuchꞌ chit etaanima sebꞌan kajay qꞌul etaqꞌon. Ayaꞌl kala taqꞌon u kuBꞌaal nebꞌaneꞌ utz, yitꞌ tetz koj aanima. 24 Tan etootzajle aas sataqꞌ echoobꞌal, saetzanex kꞌatza. Tan nenima u Cristo, u nojla eBꞌaal. 25 Pek abꞌil vaꞌl yeꞌxtxoj niꞌaneꞌ, yeꞌxtxoj sikꞌulvatzi tiꞌ vaꞌl niꞌan majte. Tan yeꞌk tel aanima vatz u Tioxh.
41 Aatz ex bꞌaal aqꞌon, aꞌ sebꞌan vinujul, vijikomal tu qꞌul etaqꞌonom. Elachajil ivatz sebꞌaneꞌ tan, kꞌuxh ex bꞌaal aqꞌon, etootzajle aas atil vaꞌt eQꞌesal tu Amlika.
2 Atojchitꞌokꞌex tiꞌ iqꞌilal isikꞌlel Tioxh. Nachnoj etatineꞌ. Utz kꞌamataj chit qꞌu kam tu u Tioxh. 3 Utz qꞌilataj sikꞌletaj Tioxh qiꞌ majte. Ech satam kubꞌey u kuBꞌaal tiꞌ ipaxsal viyolbꞌal. Ech saqal viyol u Cristo vaꞌl yeꞌich ootzajimal utz, vaꞌl tiꞌ koꞌn atilin tu tzeꞌ cheel. 4 Qꞌilataj sikꞌletaj Tioxh viꞌ, ech saveet unpaxsat itziiul vatzsaj tinujul. Tan aꞌ chit u vetz. 5 Tiira jikomoj chit epaal vatz qꞌu aanima qꞌuꞌl yeꞌsaj inimat u Jesuus. Liistaꞌex tiꞌ ikꞌuchax u jikomil. 6 Txꞌanel chit tel qꞌuꞌl eyol sebꞌaneꞌ aas neyolon tuchꞌ qꞌuꞌl yeꞌsaj inimat u Jesuus. Chiꞌbꞌebꞌal eyolon sebꞌaneꞌ. Utz nachtaj bꞌaꞌnil kaniꞌch itzaqꞌbꞌel junun sebꞌaneꞌ oj kam satabꞌi sete. Chiꞌ chit tel eyol echaꞌ ichiꞌbꞌixsan u atzꞌam.
Itzojpebꞌal u uꞌ tzaꞌ
7 Aatz cheel, aꞌ saꞌalon opon sete kam bꞌanel tu u vatin tzaꞌ, u niman tetz u Jesuus Tiiquico vaꞌl tiiꞌin tiꞌ. Tan tiira kꞌujlebꞌal kꞌuꞌl tiꞌ u taqꞌon utz, aꞌ maꞌl qetz aqꞌonomil tiꞌ u kuBꞌaal.+ 4:7 Choktaj Qꞌu Bꞌaꞌnla Chaj Kam Bꞌanel (Hechos) 20.4.8 Echixeꞌat nunchaj opon tzexeꞌ tiꞌ talax sete kam qꞌu kam nipaalkꞌoꞌ. Utz seꞌntaqꞌ nimal ekꞌuꞌl majte.
9 Aꞌ imol soꞌoponi u niman tetz u Jesuus Oneesimo vaꞌl tiiꞌin tiꞌ, vetetz aa tenamil, vaꞌl kꞌujlebꞌal kꞌuꞌl kꞌatz u Tioxh majte. Ech aꞌ samotxalon sete kajay qꞌu kam qꞌuꞌl nikubꞌan tzaꞌ.
10 Niqꞌilaoponex u niman tetz u Jesuus Aristarco, vunmol atilin tu tzeꞌ. Niqꞌilaoponex u Kuxh majte u niman tetz u Jesuus, visobrino u Bernabee. Alel tek opon sete aas oj loꞌoponi, ayaꞌl chit ekꞌuꞌl lekꞌula.+ 4:10 Choktaj Qꞌu Bꞌaꞌnla Chaj Kam Bꞌanel (Hechos) 19.29; 27.2.11 Antu niqꞌilanoponex u niman tetz u Jesuus, vaꞌl Justo chu teꞌleꞌ. Aꞌ oxvaꞌl qꞌu niman tetz u Jesuus tziꞌ aas Israeel; niꞌxhtaqꞌonin sunkꞌatza tiꞌ viQꞌesalail u Tioxh. Ech kaana untxuqꞌtxun tiꞌ tan, nimotxtaqꞌ nimal unkꞌuꞌl. 12 Antu niqꞌilaoponex u taqꞌonom u Cristo, u Epafras, vetetz aa tenamil. Utz bꞌenamen niqꞌila isikꞌle Tioxh setiꞌ. Aꞌ isaꞌ aas iqꞌomal koj chit eyakꞌil, tzꞌajelkojchitꞌex siatz utz, txaklelkojchitꞌex tiꞌ ibꞌanax vitxumbꞌal u Tioxh. 13 In niꞌilon aas nojchit niqꞌila isikꞌle Tioxh setiꞌ. Kaana taqꞌonin setiꞌ majte. Niꞌxhtitzꞌa qꞌu niman tetz u Jesuus aa Laodicea utz, tuchꞌ qꞌuꞌl tu Hieraapolis. 14 Niqꞌilaoponex u niman tetz u Jesuus Lucas majte, u aa tzꞌak vaꞌl tiiꞌin tiꞌ. Antu u Demas niqꞌilaoponex.
15 Aqꞌtaj vetz ichajlichil qꞌu niman tetz u Jesuus qꞌuꞌl atil tu Laodicea. Aqꞌtaj ichajlichil u Ninfa tuchꞌ qꞌu niman tetz u Jesuus majte qꞌuꞌl nimol tibꞌ tu totzotz.
16 Aatz laveet esikꞌlet u uꞌ xoꞌl qꞌu niman tetz u Jesuus tzexeꞌ tzaꞌ, letaqꞌ bꞌen xeꞌ qꞌu niman tetz u Jesuus tu Laodicea. Ech lasikꞌlel te tziꞌ majte.
17 Utz altaj tu u Arquipo ibꞌan yaꞌl tibꞌ tiꞌ ibꞌanax u aqꞌon vaꞌl vettal u kuBꞌaal te.
18 In vetqꞌabꞌin itzꞌibꞌal u chajlichil tzaꞌ, in Pablo. Utz ulsatajin sekꞌuꞌl tuul atilin tu tzeꞌ. Tioxh koj laꞌaqꞌon vibꞌaꞌnil sete. Aꞌi.