U BꞌAXA Uꞌ ITZꞌIBꞌA BꞌEN U XHAN XEꞌ QꞌU NIMAN TETZ U JESUUS
Yol tiꞌ u uꞌ tzaꞌ
Aatz u uꞌ tzaꞌ, aꞌ tzꞌibꞌan u Xhan vaꞌl chusulibꞌich kꞌatz u Jesuus. Ankoꞌxhtuꞌ vaꞌl tzꞌibꞌan u uꞌ U Xhan, tuchꞌ oxvaꞌl qꞌu tuꞌ qꞌuꞌl molomal tibꞌ tzaꞌ, tuchꞌ u uꞌ Qꞌu Kam Ibꞌaxabꞌsa Ikꞌuchax U Tioxh (Apocalipsis).
Nitalcheꞌ aas aꞌ itzꞌibꞌat u bꞌaxa tuꞌ tzaꞌ tu u yaꞌbꞌ 90 m.t.J. Aꞌ itzꞌibꞌav kꞌasuꞌl tu Eefeso.
Aatz u kam tiira ibꞌoꞌqꞌol niyolon u Xhan tiꞌ utz, ayaꞌ u tii uchchil ibꞌilaj, echaꞌ u Tioxh aas tii qiꞌ. Nitaleꞌ aas oj vetqootzajil vinujul, uncheeꞌ sakukꞌuch tu u kubꞌantu tiiꞌoꞌ tiꞌ aanima.
Nital majte aas echen saꞌatinoꞌ kꞌatz u txijtxubꞌal, ayaꞌ u Jesuus utz, yitꞌ tu elqꞌej.
Nipajtaleꞌ aas saꞌnalatin unjolol xeꞌkꞌulan tetz u Jesuus. Utz echen sabꞌanax kuentaibꞌ te.
Ech tiyaꞌtebꞌal nitaleꞌ aas tii nimamoj u Jesuus qaqꞌo. Sakunima viyolbꞌal. Utz tiira tiiojoꞌ qibꞌilaj.
Aꞌ u jatxbꞌal tibꞌ qꞌu yol tu u uꞌ tzaꞌ.
1) 1.1-4 Ech ixeꞌt u uꞌ tzaꞌ.
2) 1.5—2.29 Nital tiꞌ u chitpichil tu paav.
3) 3.1—4.6 Nital tiꞌ u mantaar tetz u tii uchchil ibꞌilaj.
4) 4.7—5.12 Nital tiꞌ qꞌu xeꞌkꞌulan tetz u Jesuus.
5) 5.13-21 Aꞌ qꞌu kam niyolon u Xhan tiꞌ tziꞌ utz, nikaꞌpaju nitoxpaju talaxeꞌ; nitzꞌajsa tu unjotoj yol.
1U BꞌAXA Uꞌ ITZꞌIBꞌA BꞌEN U XHAN XEꞌ QꞌU NIMAN TETZ U JESUUS
U tatin u Jesuus xeꞌ qꞌii xeꞌ saj
1 Aatz u Jesuus, atichnale aas yeꞌsajich ichee u vatz amlika txꞌavaꞌ. Utz ul u Aqꞌol Tiichajil sukuvatz tziꞌ. Qil tuchꞌ kuvatz. Abꞌimal iyolon qaqꞌo. Nojchit qootzaji u Jesuus, u Aqꞌol Tiichajil tan, kukanoꞌk tuchꞌ kuqꞌabꞌ. Echixeꞌat nikutxakbꞌaꞌ qibꞌ tiꞌ talaxeꞌ. Niqal u Aqꞌol Tiichajil sete tziꞌ vaꞌl bꞌenqꞌii bꞌensaj tatineꞌ. Aꞌ atichku xeꞌ u kuBꞌaals Amlika, pek ul sukuvatz.+ 1:1-2 Choktaj U Xhan 1.1, 14, 18; 2.13-14.3 Ech aꞌ niqal sete kam vaꞌl ilel qaqꞌo utz, abꞌimal qaqꞌo. Utz kam koj tok niqal sete, pek aꞌ kusaꞌ aas tiira maꞌl kuvatz tiꞌ inimaleꞌ, kam echaꞌ maꞌl kuvatz tuchꞌ u Tioxh u kuBꞌaals Amlika utz, tuchꞌ viKꞌaol, ayaꞌ u Jesucristo. 4 Ech nikutzꞌibꞌa qꞌu kam sete tziꞌ tan, aꞌ kusaꞌ ela tzꞌajel saꞌxhtxuqꞌtxunoꞌ tiꞌ.
U tatin u Tioxhechaꞌ maꞌl txijtxubꞌal
5 Aꞌ u yol abꞌimal qaqꞌo kꞌatz u Jesucristo tzaꞌ utz, niqal sete. Tan txijtxunal u Tioxh; yeꞌk elqꞌej kꞌatza.+ 1:5 Aatz qꞌu yol “txijtxunal” tuchꞌ “saj” nital u Xhan tzaꞌ, aꞌ tokeꞌ “yeꞌk paav”, “vinujul” utz, “tiichajil bꞌenamen vatz u Tioxh”. Aatz u yol “elqꞌej”, aꞌ tokeꞌ “paav”, “txubꞌaꞌl”, “yitꞌ inujul” utz, “kamchil bꞌenamen vatz u Tioxh”.6 Ech oj maꞌl kuvatz tuchꞌ u Tioxh niqaleꞌ, loqꞌ an tereꞌn atiloꞌ tu elqꞌej siatz tiꞌ ibꞌanax u paav, nikutxubꞌaꞌleꞌ atziꞌ. Utz yeꞌxhkam nikubꞌan oꞌ bꞌanol tetz vinujul. 7 Oj nojchit atiloꞌ tu vitxijtxun u Tioxh tan, sakubꞌan vinujul atziꞌ, echaꞌ niꞌan u Tioxh. Uncheeꞌ maꞌl kuvatz qibꞌilaj atziꞌ, oꞌ niman tetz. Utz aꞌ satxꞌaaonoꞌ tu kajay qꞌu kupaav u Jesucristo, viKꞌaol.
8 Pek oj niqaleꞌ aas yeꞌk kupaav, kujunal koꞌxh nikusubꞌ jeꞌ qibꞌ. Uncheeꞌ yeꞌk vinujul quxeꞌ atziꞌ. 9 Pek oj saqal qꞌu kupaav te, sakujaj te sikuyeꞌ; sikuyeꞌ. Utz sateesa kajay qꞌu yeꞌxtxoj kukꞌatza. Tan nojchit ijikomal niꞌaneꞌ utz, nitzojpi viyol. 10 Pek oj saqaleꞌ aas yeꞌxhkam nikupaavineꞌ, nitekqaqꞌ bꞌens txubꞌaꞌlom u Tioxh atziꞌ. Utz yeꞌxhkam niqoksa tetz viyolbꞌal.
2U Jesuus u oksan kuyol xeꞌ Tioxh
1 Nuntzꞌibꞌa qꞌu kam sete tzaꞌ, tꞌoybꞌal etetz nunbꞌaneꞌ ech yeꞌk sapaavinex. Tan echaꞌ ex unkꞌaol unmeꞌal.+ 2:1 Aatz nital “unkꞌaol unmeꞌal”, aꞌ nital qꞌu aanima qꞌuꞌl anal nichꞌii tu u tatin kꞌatz u Tioxh niyolonka. Ech yitꞌ aꞌ koj nital kajay vikꞌaol qꞌu aanima. Pek oj abꞌil maꞌj nipaavineꞌ, atil oksan kuyol xeꞌ u kuTat, ayaꞌ u Jesucristo vaꞌl ijikomal.+ 2:1 Choktaj Qꞌu Niman Tetz U Jesuus Tu Roma 6.11-14.2 Tan aꞌ vaꞌl yatzꞌax tiꞌ ichool qꞌu kupaav. Utz taꞌn koꞌnkoxh tiꞌ qꞌu kupaav unjolol oꞌ, pek tiꞌ vipaav kajay qꞌu aanima majte tu u vatz amlika txꞌavaꞌ tzaꞌ.
3 Untzꞌoj nikunima qꞌul imantaar, techlal atziꞌ aas nojchit qootzaj u Tioxh.+ 2:3 Choktaj U Xhan 14.15, 21, 23.4 Abꞌil vaꞌl nialon aas: —Vootzajle u Tioxh.— Chia. Pek loqꞌ yeꞌ ninima qꞌul imantaar, txubꞌaꞌlom atziꞌ. Utz yeꞌk vinujul tzixeꞌ.
5 Pek abꞌil qꞌuꞌl niniman viyolbꞌal, nojchit tzꞌajel tek tu vitzꞌejtu taanima tiꞌ u Tioxh atziꞌ. Ech aꞌ saqootzajiv tziꞌ aas nojchit atiloꞌ kꞌatza. 6 Tan abꞌil nialon aas atoꞌk kꞌatz u Jesuus, ministeer ech itxumbꞌal siꞌaneꞌ vaꞌl iꞌan u Jesuus.
U mantaar vaꞌl tiira ibꞌoꞌqꞌol
7 Hermanos, aatz u mantaar nuntzꞌibꞌa sete tzaꞌ, yitꞌ anal koj cheeya. Pek ankoꞌxhtuꞌ u mantaar vaꞌl alax sete bꞌaxa aas okꞌex tiꞌ inimal u Jesuus tixeꞌtebꞌal.+ 2:7 Aatz u mantaar nital tzaꞌ tziꞌ, atich nal tu u oꞌtla mantaar tetz u Moisees. Choktaj u Leviitico 19.18. Pek aꞌ nital tzaꞌ kaniꞌch chit itxakun sabꞌanli. Choktaj U Xhan 13.34; 15.12.8 Pek nuntzꞌibꞌa vaꞌt tokebꞌal u mantaar sete cheel tzaꞌ, ayaꞌ vaꞌl ikꞌuch u Jesuus. Tan naꞌvit kꞌatza. Utz echen senima majte, sakꞌuchun sekꞌatza. Tan qootzajle vinujul utz, echen sapaqꞌun viyolbꞌal u Tioxh sukukꞌatza tziꞌ. Ech sotzchil siꞌan u elqꞌej.
9 Abꞌil aꞌ atil tu vinujul aas nitaleꞌ, loqꞌ ankoꞌxh nichiꞌkꞌula qꞌul imol niman tetz u Jesuus, taꞌxh bꞌanel atil tu u paav atziꞌ, ayaꞌ u elkꞌej. 10 Pek abꞌiste vaꞌl tiira tii tiꞌ qꞌul imol niman tetz u Jesuus, nojchit atil kꞌatz u Tioxh atziꞌ, ayaꞌ u txijtxubꞌal. Utz yeꞌk sakuꞌ tu u paav.+ 2:10 Choktaj u Proveerbios 2.9.11 Tan abꞌil vaꞌl nichiꞌkꞌula imol niman tetz u Jesuus, atil tu u paav atziꞌ, ayaꞌ u elqꞌej vatz Tioxh. Utz tu paav nipaalka. Yeꞌ tootzaj til chaj ech ibꞌenaꞌ tan, u elqꞌej nimajon isajineꞌ.
12 Nuntzꞌibꞌa qꞌu kam sete tzaꞌ tan, echaꞌ ex unkꞌaol unmeꞌal utz, kuyel tek qꞌul epaav tibꞌii u Jesuus.
13 Nuntzꞌibꞌa qꞌu kam sete tzaꞌ, ex txutxa bꞌaala tan, etootzaj u Jesuus vaꞌl atich nal xeꞌ qꞌii xeꞌ saj.
Nuntzꞌibꞌa qꞌu kam sete tzaꞌ, ex xiak tan, subꞌel u txꞌiꞌliꞌinaj setaqꞌo.
Nuntzꞌibꞌa qꞌu kam sete tzaꞌ, talaj nitxaꞌ tan, etootzajle u kuTat tu Amlika.
14 Tzꞌibꞌamal tek qꞌu kam sete vaqꞌo tzaꞌ, ex txutxa bꞌaala tan, ootzajimal tek u Jesuus setaqꞌo vaꞌl atich nal xeꞌ qꞌii saj.
Tzꞌibꞌamal tek qꞌu kam sete vaqꞌo tzaꞌ, ex xiak tan, iqꞌomal eyakꞌil. Atilex tiꞌ inimal u yolbꞌal Tioxh. Utz subꞌel tek u txꞌiꞌliꞌinaj setaqꞌo.
15 Yetzꞌej etaanima tiꞌ u txumbꞌal iqꞌomal tu u vatz amlika txꞌavaꞌ tzaꞌ, nikoꞌxh tiꞌ qꞌu kam atil tuul. Tan abꞌil aꞌ tzꞌejel taanima tiꞌ qꞌu kam tu u vatz amlika txꞌavaꞌ, yitꞌ tzꞌajel koj tu vitzꞌejtu taanima tiꞌ u kuTat tu Amlika. 16 Tan yitꞌ xeꞌ u Tioxh koj nikꞌaskuꞌl kajay qꞌu kam atil tu u vatz amlika txꞌavaꞌ tzaꞌ. Taꞌn nicheek tu u vatz amlika txꞌavaꞌ tzaꞌ. Echaꞌ qꞌu tachaꞌv u chiꞌl, qꞌu kam niqileꞌ utz, niqachva utz, tuchꞌ u tꞌeꞌsil. 17 Utz sakoꞌnpaal u vatz amlika txꞌavaꞌ tzaꞌ, tuchꞌ qꞌu kam nitachval tuul. Pek abꞌil vaꞌl nibꞌanon vitxumbꞌal u Tioxh, bꞌenqꞌii bꞌensaj tatin siꞌaneꞌ.
Qꞌu xeꞌkꞌulan tetz u Cristo sauli
18 Kꞌaol meꞌala, atiltekꞌoꞌ tu u motxebꞌal qꞌii saj. Utz abꞌimal u yol setaqꞌo aas saꞌnalchitꞌul u xeꞌkꞌulan tetz u Cristo. Tan echaꞌ cheel, sibꞌax koꞌxh xeꞌkꞌulan tetz u Cristo cheei. Ech qootzajle aas aꞌ texh u motxebꞌal qꞌii saj.+ 2:18 Aatz u yol “xeꞌkꞌulan tetz u Cristo”, ayaꞌ maꞌl u aanima saul tu u motxebꞌal qꞌii saj. Utz atil tek unjolol cheel. Aꞌ nital qꞌu aanima qꞌuꞌl nimanich tetz u Jesuus, pek jolol tek elnajka. Choktaj u Kaꞌbꞌ Uꞌ Tu Tesaloonica 2.8-10.19 Kꞌuxh aꞌ cheek tu kuxoꞌl, loqꞌ yitꞌ kumol koj. Tan noj koj chit kumol, tii atil tu kuxoꞌl koj atziꞌ. Pek kꞌuxh vetꞌelbꞌen tu kuxoꞌl, telchitꞌul vatzsaj aas yitꞌ kumol koj tu vinujul.
20 Pek aatz ex sekajayil, aqꞌel etxumbꞌal tu u Tioxhla Espiiritu utz, etootzaj vinujul.+ 2:20 Choktaj u Bꞌaxa Uꞌ Tu Corinto 2.10-16.21 Kꞌuxh nuntzꞌibꞌa qꞌu kam sete tzaꞌ, yitꞌ tiꞌ koj aas yeꞌ etootzaj vinujul. Tan etootzaj utz, yeꞌk txubꞌaꞌl tu vinujul.
22 Pek aatz qꞌu txubꞌaꞌlom qꞌuꞌl yeꞌk vinujul tzixeꞌ, ayaꞌ qꞌuꞌl nialon aas yitꞌ iTxaaom koj u Tioxh u Jesuus nitaleꞌ. Aꞌ qꞌu xeꞌkꞌulan tetz u Cristo. Tan aal yeꞌk u Tioxh aas nitaleꞌ, ayaꞌ u kuTat. Utz yeꞌk u Kꞌaola aas nitaleꞌ. 23 Kajay qꞌuꞌl niteesa tibꞌ tiꞌ u Kꞌaola, yeꞌk u kuTat kꞌatza. Pek abꞌil qꞌuꞌl atil kꞌatz u Jesuus, viKꞌaol u Tioxh, atil u kuTat kꞌatza.
24 Pek atoj sekꞌuꞌl kam qꞌu chusbꞌal abꞌimal setaqꞌo tixeꞌtebꞌal. Tan oj tii atil sekꞌuꞌl kam vaꞌl abꞌimal setaqꞌo, atoꞌkꞌex kꞌatz u Kꞌaola atziꞌ utz, kꞌatz u kuTat. 25 Utz alel taqꞌo aas sataqꞌ u atinchil tu bꞌenqꞌii bꞌensaj qe.
26 Vetuntzꞌibꞌa qꞌu kam sete tzaꞌ tiꞌ etꞌoyax tiꞌ qꞌu eesanal tu bꞌey. 27 Pek aatz u Tioxhla Espiiritu vaꞌl taqꞌ u Jesuus sete, atil sekꞌatza bꞌenamen. Utz yitꞌ ministeer koj abꞌil vaꞌt sakꞌuchun vinujul sete. Tan aꞌ sakꞌuchun kajay qꞌu kam sete u Tioxhla Espiiritu. Tan tu vinujul nitiqꞌovbꞌeꞌnex; yitꞌ tu txubꞌaꞌl koj. Ech kam vechusax niꞌaneꞌ atojex tuul.
28 Aatz cheel kꞌaol meꞌal, tii atojex kꞌatz u Jesuus. Ech yeꞌxhkam sakuxoꞌva tu u tulebꞌal. Yitꞌ saꞌkojkuxaansa el qibꞌ echil tziꞌ tu chꞌixaꞌv. 29 Etootzajnale aas aꞌ ijikomal u Jesuus. Ech ootzajitaj majte aas abꞌil vaꞌl ijikomal niꞌaneꞌ, nojchit itzꞌpinaj kꞌatza; ela itxumbꞌal tuchꞌ u Jesuus.
3Vibꞌaꞌnil u Tioxh tiꞌ taqꞌtubꞌenoꞌ ikꞌaol imeꞌal
1 Nachtaj bꞌaꞌnil etileꞌ. Tiira tii u kuTat qiꞌ tan, vettaqꞌlu bꞌenoꞌ ikꞌaol imeꞌal. Loqꞌ aatz qꞌu aanima tu u vatz amlika txꞌavaꞌ, yeꞌ tootzaj aas bꞌennajtekꞌoꞌ ikꞌaol imeꞌal Tioxh tan, yeꞌ tootzaj u Tioxh.+ 3:1 Choktaj U Xhan 1.12.2 Aatz cheel unhermanos, oꞌ tek ikꞌaol imeꞌal Tioxh utz, kꞌuxh yeꞌsaj qiltaꞌ kam chit sataqꞌvoꞌ u Tioxh. Qootzajle aas ela tekoꞌn oꞌ tuchꞌ u Jesuus siꞌaneꞌ. Echixeꞌat taꞌxh luꞌuli, saꞌtekqileꞌ kam chit bꞌanel taqꞌo. 3 Utz kajay qꞌuꞌl nichꞌian tuchꞌ txuqꞌtxunchil, nikol tibꞌ vatz u paav. Echaꞌ u Tioxh tan, tiira yeꞌk paav kꞌatza.
4 Utz kajay qꞌuꞌl niꞌan paav, aꞌ niqel u oꞌtla mantaar. Tan qeloꞌm u bꞌano paav. 5 Pek loqꞌ etootzajle aas kꞌuxh ul u Jesuus, aꞌ vetꞌulisotzsa qꞌu kupaav. Tan yeꞌk paav kꞌatza. 6 Utz kajay qꞌuꞌl tiira taꞌn atoꞌk kꞌatza, yeꞌxhkam nipaavineꞌ. Pek aatz qꞌuꞌl nipaavineꞌ, yeꞌsaj tiltaꞌ utz, yeꞌsaj tootzajitaꞌ. 7 Kꞌaol meꞌala, yeꞌ koꞌxh abꞌil eesanex tu bꞌey. Tan abꞌiste vaꞌl ijikomal niꞌaneꞌ, jikom atziꞌ. Tan jikom u Tioxh.
8 Pek abꞌiste vaꞌl vet sikꞌuꞌl niꞌan paav, tetz u txꞌiꞌliꞌinaj atziꞌ. Tan u txꞌiꞌliꞌinaj xeꞌtixsan u paav xeꞌ qꞌii xeꞌ saj. Echixeꞌat vetꞌul viKꞌaol u Tioxh tiꞌ isotzsal qꞌu taqꞌonibꞌal u txꞌiꞌliꞌinaj.+ 3:8 Choktaj Qꞌu Hebreo 2.14-15.
9 Kajay qꞌuꞌl itzꞌpinaj kꞌatz u Tioxh, yitꞌ vet koj sikꞌuꞌl niꞌan u paav. Tan nojchit atil vitxumbꞌal u Tioxh kꞌatza. Ech yeꞌkan sapaavini tan, itzꞌpinaj tek kꞌatza. 10 Ech u techlal tzaꞌ abꞌil qꞌul ikꞌaol imeꞌal u Tioxh. Yitꞌ tetz koj u Tioxh kajay qꞌuꞌl yitꞌ ijikomal koj niꞌaneꞌ utz; yitꞌ tii koj tiꞌ imol. Aꞌ qꞌul ikꞌaol imeꞌal u txꞌiꞌliꞌinaj. Ech ninaꞌviteꞌ abꞌil qꞌuꞌl ikꞌaol imeꞌal u txꞌiꞌliꞌinaj.
U kubꞌantu tiiꞌoꞌ qibꞌilaj
11 Tan aꞌ u chusbꞌal abꞌimal qaqꞌo tixeꞌtebꞌal tzaꞌ aas sakubꞌan tiiꞌoꞌ qibꞌilaj.+ 3:11 Choktaj U Xhan 13.34; 15.2.12 Utz yitꞌeꞌch koj sakubꞌaneꞌ vaꞌl iꞌan u Caiin, aas aꞌ iꞌan u tetz u txꞌiꞌliꞌinaj. Tan iyatzꞌ vitzaꞌqꞌ. Utz ¿kam tiꞌ iyatzꞌva? Tiꞌ tan, jikom ibꞌanon vitzaꞌqꞌ vatz Tioxh. Pek ech koj u Caiin tan, yeꞌxtxoj vibꞌanon vatz Tioxh.+ 3:12 Choktaj u Geenesis 4.8.
13 Unhermanos, yeꞌ koꞌxh sotz ekꞌuꞌl oj nichiꞌkꞌulaꞌex qꞌu aanima yeꞌ tootzaj Tioxh tu u vatz txꞌavaꞌ tzaꞌ. 14 Tan qootzajle aas yitꞌ kamnajtereꞌnkojoꞌ vatz u Tioxh. Pek atil tek kutiichajil tu bꞌenqꞌii bꞌensaj taqꞌo. Utz aꞌ u techlal aas tiiꞌoꞌ tiꞌ kajay qꞌu niman tetz u Jesuus. Tan aatz qꞌuꞌl yitꞌ tii koj tiꞌ imol, kamnaj tatin vatz u Tioxh. 15 Utz abꞌil vaꞌl nichiꞌkꞌula imol, ela tuchꞌ yatzꞌol atziꞌ. Utz qootzajle aas yeꞌxhabꞌil koꞌxh maꞌj yatzꞌol atil itiichajil tu bꞌenqꞌii bꞌensaj kꞌatza.
16 Pek qootzajle kaniꞌch kubꞌantu tiiꞌoꞌ tiꞌ kumol sakubꞌaneꞌ tan, echaꞌ u Jesuus, taqꞌ tibꞌ tu kamchil qiꞌ. Utz echat sakubꞌan majte. Saqaqꞌ qibꞌ tiꞌ qꞌu kumol niman tetz u Jesuus. 17 Pek untzꞌoj abꞌil maꞌj atil txꞌiibꞌal iqꞌii utz, nikoꞌxhisaji ipaal imol tu meꞌbꞌiꞌl, yeꞌxh bꞌoj nilocheꞌ, ¿kaniꞌch tatin vitxumbꞌal u Tioxh kꞌatza ayaꞌ vibꞌantu tii qiꞌ? 18 Kꞌaol meꞌal, yitꞌ tuchꞌ koꞌnkoxh yol utz, tuchꞌ koꞌnkoxh kutziꞌ sakubꞌan tiiꞌoꞌ tiꞌ aanima, pek nojchit sakukꞌuch tu kubꞌanoneꞌ.
U tatin u Tioxh sukukꞌatzatu kunimataꞌ
19 Ech tu qꞌu kam saqootzajiva tziꞌ aas atiloꞌ tu vinujul. Ech sakꞌujeꞌ ikꞌuꞌl qaanima aas bꞌaꞌn qatin vatz Tioxh. 20 Echaꞌ tziꞌ untzꞌoj atiloꞌ tu paav sinach u qaanima, u Tioxh sakuyunoꞌ. Aꞌ ootzajin tetz tan, paalchu vatz u qaanima. 21 Unhermanos, untzꞌoj yeꞌk oꞌ tu paav sinach u qaanima, uncheeꞌ kꞌujlel kukꞌuꞌl tiꞌ Tioxh atziꞌ aas bꞌaꞌn oꞌ siatz. 22 Ech kam chit vaꞌl sakujaj te, sataqꞌ qe. Tan nikukol qꞌul imantaar utz, nikubꞌan qꞌu kam qꞌuꞌl bꞌaꞌn niꞌenku te. 23 Tan aꞌ vimantaar tzaꞌ, aas sakunima viKꞌaol u Tioxh, ayaꞌ u Jesucristo. Utz sakubꞌan tiiꞌoꞌ qibꞌilaj majte, echaꞌ vaꞌl talka u Jesuus. 24 Ech abꞌiste qꞌuꞌl niniman qꞌul imantaar, atil kꞌatz Tioxh. Utz atil u Tioxh kꞌatza majte. Ech tiꞌ niqootzajiva aas atil u Tioxh kukꞌatza tan, aqꞌel viTioxhla Espiiritu qe taqꞌo.
4Vibꞌanax kuentaibꞌtu qꞌu txubꞌaꞌlomla xeꞌkꞌulantetz u Cristo
1 Unhermanos, yitꞌ maꞌl koꞌnkoxh inimal qꞌu chusbꞌal sebꞌaneꞌ. Echaꞌ tziꞌ aas satal paal chusbꞌal maꞌj aanima. Abꞌitaj inujul bꞌaꞌnil, tetz tzik Tioxh oj yitꞌ aꞌ koj. Tan sibꞌal chulin alol tetz u yolbꞌal Tioxh nipaal tu u vatz amlika txꞌavaꞌ tzaꞌ. 2 Ech tootzajil u Tioxhla Espiiritu tetz u Tioxh sebꞌaneꞌ tzaꞌ. Kajay qꞌuꞌl niniman utz, qꞌuꞌl nialon aas nojchit ul u Jesucristo tuchꞌ ichiꞌl, u Tioxhla Espiiritu atil kꞌatza. 3 Pek abꞌiste qꞌu chusbꞌal nialon aas yitꞌ tuchꞌ koj nojla chiꞌl itzꞌpu u Jesucristo, bꞌaꞌntan yitꞌ tetz koj u Tioxh atziꞌ. Pek vitioxhil u xeꞌkꞌulan tetz u Jesuus atziꞌ, ayaꞌ vaꞌl abꞌimal setaqꞌo aas tuleꞌ. Utz atil tek tu u vatz amlika txꞌavaꞌ tzaꞌ.
4 Pek subꞌel tek setaqꞌo, kꞌaol meꞌala tan, ex tek tetz u Tioxh. Utz aatz u Tioxh vaꞌl atil sekꞌatza, paalchu vatz u txꞌiꞌliꞌinaj vaꞌl atil tu u vatz amlika txꞌavaꞌ tzaꞌ. 5 Tan aatz qꞌu chulin alol tetz u yolbꞌal Tioxh, aꞌ iqꞌomal u txumbꞌal taqꞌo tetz u vatz amlika txꞌavaꞌ tzaꞌ. Echixeꞌat taꞌxh niyol qꞌu kam tu u vatz amlika txꞌavaꞌ tzaꞌ. Utz nikꞌulviꞌl tu tereꞌn qꞌu aanima tu u vatz amlika txꞌavaꞌ. 6 Pek aatz oꞌ tan, oꞌ tetz u Tioxh. Utz abꞌiste vaꞌl ootzajimal u Tioxh taqꞌo, nikꞌulviꞌoꞌ tiꞌ qꞌu kam niqaleꞌ. Pek aatz qꞌuꞌl yeꞌ tootzaj u Tioxh, yeꞌ nikꞌulviꞌiꞌoꞌ. Utz ech aꞌ niqootzajiv tziꞌ aas inujul tzik oj eesanal tu bꞌey u tioxhil atil kꞌatza.
U kubꞌantu tiiꞌoꞌ qibꞌilaj tan, tii u Tioxh qiꞌ
7 Unhermanos, tiiojchitꞌoꞌ qibꞌilaj. Tan aatz u kubꞌantu tiiꞌoꞌ qibꞌilaj, tetz u Tioxh. Ech abꞌiste vaꞌl tii tiꞌ imol, itzꞌpinaj kꞌatz Tioxh atziꞌ. Utz tootzaj u Tioxh. 8 Pek abꞌil vaꞌl yitꞌ tii koj timol, yeꞌsaj tootzajit u Tioxh atziꞌ. Tan aatz u Tioxh, tiira tii tiꞌ qꞌu aanima kajayil. 9 Utz ech vikꞌuchtu vibꞌantu tii u Tioxh qiꞌ tzaꞌ tan, ichajuꞌl viKꞌaol vaꞌl taꞌxh maꞌl, tu u vatz amlika txꞌavaꞌ tzaꞌ. Aꞌ isaꞌ saꞌatin kutiichajil kꞌatza taqꞌo. 10 Utz aꞌ vibꞌantu tii u Tioxh qiꞌ tzaꞌ aas, aꞌ vetiꞌan tii qiꞌ bꞌaxa. Ichajuꞌl viKꞌaol ul kamoj tiꞌ ichool qꞌu kupaav. Yitꞌ oꞌ koj vetkutzꞌej qaanima tiꞌ bꞌaxa.
11 Utz oj ech vibꞌantu tii u Tioxh qiꞌ tziꞌ unhermanos, echat kubꞌantu tii qibꞌilaj sakubꞌan majte.
12 Yeꞌxhabꞌil koꞌxh maꞌj ilonnaj iatz u Tioxh. Pek loqꞌ atil sukukꞌatza oj tiiꞌoꞌ qibꞌilaj. Utz tzꞌajeltekꞌoꞌ tu u kutzꞌejtu qaanima tiꞌ atziꞌ. 13 Ech niqootzajiva aas atoꞌkꞌoꞌ kꞌatza utz, atil sukukꞌatza tan, aqꞌel viTioxhla Espiiritu qe taqꞌo majte. 14 Utz nojchit qil viKꞌaol u Tioxh vaꞌl ichajuꞌl. Ayaꞌ u Chitol tetz qꞌu aanima tu paav tu u vatz amlika txꞌavaꞌ. 15 Utz kajay qꞌuꞌl nialon aas iKꞌaol Tioxh u Jesuus, atil u Tioxh kꞌatza atziꞌ. Utz atil kꞌatz Tioxh majte. 16 Ech vetqootzajilaꞌ utz, vetkunimalaꞌ aas tiira tii u Tioxh qiꞌ tan, ech chit vitxumbꞌal. Utz abꞌiste u aanima vaꞌl tii tiꞌ imol, atil kꞌatz Tioxh atziꞌ utz, atil u Tioxh kꞌatza majte. 17 Ech tzꞌajeltekꞌoꞌ tu u kutzꞌejtu qaanima tiꞌ u Tioxh atziꞌ utz, yeꞌxhkam veꞌt sakuxoꞌva kꞌuxh luꞌul u qꞌii aas latxꞌolax inujul qꞌu aanima kajayil. Tan nikubꞌan qꞌu kam jikom tu u vatz amlika txꞌavaꞌ tzaꞌ, kam echaꞌ iꞌan u Jesuus. Tan ela oꞌ tuchꞌ. 18 Oj nojchit tzꞌajeltekꞌoꞌ tu u kutzꞌejtu qaanima tiꞌ u Tioxh, yeꞌkan nikuxoꞌva tiꞌ vitxꞌoltu kunujul u Tioxh atziꞌ. Elyu u xoꞌval sukukꞌatza. Tan aatz qꞌuꞌl nixoꞌvan itxꞌolax inujul, yitꞌ tzꞌajel koj tu vitzꞌejtu taanima tiꞌ atziꞌ.
19 Nikubꞌan tiiꞌoꞌ tiꞌ qꞌu aanima utz, tiꞌ u Tioxh tan, vetiꞌan tii u Tioxh qiꞌ bꞌaxa. 20 Untzꞌoj abꞌil maꞌj nialon aas: —Tzꞌejel vaanima tiꞌ u Tioxh.— Chia. Loqꞌ nichiꞌkꞌula imol, txubꞌaꞌlom atziꞌ. Tan oj yitꞌ tii koj tiꞌ vimol vaꞌl nitil iatz, ¿kaniꞌch itzꞌejtu taanima tiꞌ u Tioxh vaꞌl yeꞌ nitil iatz? 21 Aꞌ u mantaar aqꞌelka qe taqꞌo tzaꞌ, aas abꞌil vaꞌl tzꞌejel taanima tiꞌ u Tioxh, tiioj tiꞌ imol majte.
5Viyolpeꞌl u paav tiꞌ qꞌuꞌl nojchit ikꞌaol imeꞌal Tioxh
1 Kajay qꞌuꞌl niniman aas iTxaaom Tioxh u Jesuus, itzꞌpinaj kꞌatz u Tioxh atziꞌ. Utz abꞌil vaꞌl tzꞌejel taanima tiꞌ tu u Tata, tii tiꞌ qꞌul ikꞌaol imeꞌal u Tioxh majte. 2 Ech oj tzꞌejel qaanima tiꞌ u Tioxh utz, nikukol qꞌul imantaar, aꞌ u techlal aas tiiꞌoꞌ tiꞌ qꞌul ikꞌaol imeꞌal u Tioxh. 3 Aꞌ u kutzꞌejtu qaanima tiꞌ u Tioxh tzaꞌ, aas sakukol qꞌul imantaar. Tan yitꞌ tzaꞌl koj qꞌul imantaar. 4 Tan aatz kajay qꞌuꞌl itzꞌpinaj kꞌatz Tioxh, nisubꞌ qꞌu paav tu u vatz amlika txꞌavaꞌ tzaꞌ. Utz tu vikꞌujeꞌ kukꞌuꞌl tiꞌ u Tioxh sakusubꞌvu u paav tu u vatz amlika txꞌavaꞌ. 5 Utz abꞌil koj qꞌuꞌl nisubꞌun qꞌu paav tu u vatz amlika txꞌavaꞌ tzaꞌ, pek ayaꞌ qꞌuꞌl niniman aas iKꞌaol Tioxh u Jesuus.
Qꞌu techlal aas nojchit ul viKꞌaolu Tioxh tu vatz txꞌavaꞌ
6 Aatz u Jesucristo, iꞌan ivautiismo utz, el ikajal vatz kurus. Yitꞌ taꞌn koꞌnkoxh ivautiismo iꞌana, pek antu el ikajal. U Tioxhla Espiiritu nialon qꞌu kam tzaꞌ tan, aꞌ vinujul. 7 Utz oxvaꞌl txakbꞌaꞌn tetz qꞌu kam atil tu Amlika tziꞌ: u Tata, u Aqꞌol Tiichajil utz, tuchꞌ u Tioxhla Espiiritu. Utz maꞌl koꞌn niꞌelka. 8 Utz oxvaꞌlen paj txakbꞌaꞌn tetz tu u vatz amlika txꞌavaꞌ tzaꞌ: u Tioxhla Espiiritu, u vautiismo tu aꞌ, tuchꞌ u kaj el vatz kurus. Utz ela nikꞌul tibꞌ oxvaꞌl qꞌu kam tiꞌ vinujul tziꞌ. 9 Utz oj nikunima kam nitxakbꞌaꞌ talax qꞌu aanima, ¡aꞌ tzik yeꞌ sakunima kam nital u Tioxh! Tan paalchu viyol u Tioxh vatz viyol qꞌu aanima. Utz aꞌ vaꞌl niyolon tiꞌ viKꞌaol. 10 Abꞌil vaꞌl niniman viKꞌaol u Tioxh, tiira atil viyol u Tioxh sikꞌuꞌl. Pek abꞌil vaꞌl yeꞌ niniman, aꞌ nitaqꞌ bꞌen txubꞌaꞌlom u Tioxh. Tan yeꞌ ninima qꞌul iyol nital tiꞌ viKꞌaol. 11 Utz aꞌ vaꞌl nitaleꞌ tzaꞌ. Taqꞌlu kutiichajil tetz bꞌenqꞌii bꞌensaj. Utz aatz u kutiichajil tziꞌ tan, tiqꞌaqꞌal viKꞌaol. 12 Tan abꞌil vaꞌl atil viKꞌaol u Tioxh kꞌatza, atil itiichajil tu bꞌenqꞌii bꞌensaj. Abꞌil vaꞌl yeꞌk viKꞌaol u Tioxh kꞌatza, yeꞌk itiichajil tu bꞌenqꞌii bꞌensaj.
Itzojpebꞌal u uꞌ tzaꞌ
13 Vetuntzꞌibꞌal qꞌu kam sete tzaꞌ, ex niman tetz viKꞌaol u Tioxh tan, aꞌ unsaꞌ at seꞌenku sete aas atil etiichajil tu bꞌenqꞌii bꞌensaj.
14 Kꞌujlel kukꞌuꞌl tiꞌ u Tioxh. Tan qootzajle nitabꞌiꞌoꞌ aas kam maꞌj sakujaj te. Utz sinimaꞌoꞌ, sataqꞌeꞌ oj bꞌaꞌn siatz vaꞌl sakujajeꞌ. 15 Tan qootzajle aas nitabꞌiꞌoꞌ tu u kuqꞌilat kusikꞌletaꞌ. Echixeꞌat kꞌujeꞌoj kukꞌuꞌl tiꞌ ikꞌulax qꞌu kam nikujaj te.
16 Untzꞌoj abꞌil maꞌj satil ikuꞌ imol tu paav, siqꞌila isikꞌle Tioxh tiꞌ. Ech sakuyax tu u Tioxh. Loqꞌ yitꞌ aꞌ koj aꞌ qꞌu mam paav vaꞌl yeꞌk kuybꞌal tiꞌ. Tan atil mam paav aas yeꞌkan kuybꞌal tetz. Utz yitꞌ aꞌ koj nivaleꞌ aas saqꞌilal sikꞌlel Tioxh tiꞌ. 17 Kajay qꞌu qelo Tioxh, paav. Loqꞌ atil paav aas nikuy u Tioxh; yitꞌ saꞌkojbꞌen tu choobꞌal paav tiꞌ.
18 Qootzajle aas abꞌil vaꞌl itzꞌpinaj kꞌatz u Tioxh, yitꞌ vet koj sikꞌuꞌl niꞌan u paav. Tan u Jesuus tek nikolon. Utz yeꞌxhkam nisubꞌax tu u txꞌiꞌliꞌinaj sakuꞌ tu paav. 19 Qootzajle aas oꞌ tek tetz u Tioxh. Pek kajay tereꞌn qꞌu aanima ayeꞌn jaqꞌ imantaar u txꞌiꞌliꞌinaj. 20 Pek qootzajle majte aas ulnaj viKꞌaol u Tioxh utz, taqꞌ kutxumbꞌal tiꞌ vinujul. Ech atiloꞌ tu vinujul; ayaꞌ u Jesucristo viKꞌaol u Tioxh. Tan aꞌ u nojla Tioxh. Utz aꞌ u Aqꞌol Tiichajil tu bꞌenqꞌii bꞌensaj.
21 Kꞌaol meꞌala, okiꞌch teviꞌ senima qꞌu bꞌanich tioxh chulimal. Aꞌi.