HEBREOS

Hebreos U u’uj

uva’ tz’ib’amal kan

te unq’a tiaal Israel

uva’ ni niman u Jesús

A’ u Jesús ni k’uchun vitxumb’al u Tiixh

¹ Jatpajul kuxh kat yolon u Tiixhe’ te unq’a q’esla kub’aale’ na’ytzan ta’n unq’a q’ajsan tetz viyol Aake’. As nimal txumb’al kat itxakonsa Aak ti’ uva’ la pal unq’a tename’ tu u yole’ uve’ ni tal Aak.

² Pet ech koj tu unq’a q’iie’ uva’ at o’ stuul cheel, tan kat tal ve’t Aak isuuchil u yole’ sqe ta’n viK’aole’. As tuk’ viK’aol Aake’ kat icheesa kan Aak u tx’ava’e’ tuk’ u almika’e’ skajayil. As kat ik’ujb’a’ ve’t Aak viK’aole’ ti’ uva’ a’e’ la etzin unq’a vee’ skajayil.

³ As a’ viK’aol u Tiixhe’ ni k’uchun uva’ nim talchu ve’t Aak eche’ itxijun u q’iie’ sqi’. As a’ vivatzib’al Aake’ viK’aole’ sukuvatz. As tuk’ viyol viK’aol Aake’ uva’ at tijle’m, ni til isuuchil unq’a icheesa’m Aake’ skajayil ti’ itzojpisata’ kam uva’ ni titz’a Aak sti’. As tul ma’t isotzsat viK’aol Aake’ kupaav, as kat xoneb’ ve’te’ tiseb’al u Tiixhe’ uva’ nim talche’ uva’ echen tu almika’.

⁴ Esti’e’ at ve’t pal u tijle’m viK’aol u Tiixhe’ ti’ u tijle’m unq’a ángel. As nim ve’t talchu vib’iie’ ti’ vib’ii unq’a ángel.

At pal u tijle’m viK’aol u Tiixh ti’ unq’a ángel

⁵ Tan ye’l umaj ángel uva’ ech koj kat tal u Tiixh ile’ ste:

Axhe’ axh unK’aol;

As ine’ uva’ kat aq’on u eejle’me’ cheel, ti’k koj Aak.

As mita’n te umaj ángel kat talkat Aak uma’t u yole’ uva’ ech ni tal ile’:

As ine’ in B’aala ti’ u uxhchile’.

As a’ u uxhchile’ unk’aol la ib’ane’, ti’k koj Aak.

⁶ As tul kat ul ve’t unch’i’til viK’aol u Tiixhe’ vatz u tx’ava’e’, as ech kat tal ve’t Aak ile’ sti’:

Techal chit la qaaeb’ unq’a ángel uva’ tetz u Tiixhe’ svatz skajayil, ti’k Aak.

⁷ As ech ni tal Aak ile’ ti’ unq’a ángel:

Ine’ ni b’anon uva’ ech ve’t unq’a ángel eche’ kajiq’.

As ech unq’a unk’ame’ eche’ taq’ xamal, ti’k Aak tal ti’ unq’a ángel.

⁸ Pet ech koj u yole’ uva’ ni tal Aak ti’ viK’aole’, tan ech ni tal Aak ile’ sti’:

Axh Tiixh. As ye’l ve’t iya’teb’al u eejle’me’ la ib’ane’ ti’ chit ib’ene’.

As jik chit axh la ab’ane’ tuk’ u eejle’me’.

⁹ Nasa’ unq’a jikla txumb’ale’. Pet ye’ nasa’ unq’a va’lexhla txumb’ale’.

As nim u chiib’ichile’ kat ib’an tu u q’iie’ tul uva’ kat unvaa vavi’e’ tu aceite,

texhlal tetz uva’ kat untxaa axh ti’ voksat aq’ii ti’ unq’a uxhchile’, ti’k u Tiixhe’ tal ti’ viK’aole’.

¹⁰ As ech uma’t u yol ile’ uva’ ni tal u Tiixhe’ ti’ viK’aole’:

UnK’aol, kat acheesa u vatz tx’ava’e’ tixe’teb’al u q’iisaje’.

As tuk’ vayak’ile’ kat acheesa u almika’e’ unpajte.

¹¹ Jank’al unq’a acheesa’me’ la sotze’. Pet ech koj axh, tan at chit axhe’ ti’ chit ib’ene’.

As kajayil chit unq’a acheesa’me’ as la pal iyak’il eche’ nib’an unq’a oksa’me’.

¹² As ech la oolb’e unq’a acheesa’me’ eche’ ni tulb’el umaj oksa’m uva’ nib’ochlik el, tul uva’ ye’ nitxakon ve’te’.

As la jalpul unq’a acheesa’me’ eche’ nib’anchu te umaj oksa’m uva’ nijalpule’.

Pet ech koj axh, tan at chit axhe’ ti’ chit ib’ene’.

As ye’l imoxteb’al vayaab’e’ ati, ti’k u Tiixhe’ ti’ viK’aole’.

¹³ As ye’l umaj ángel uva’ ech koj kat tal u Tiixh ile’ ste:

Xoneb’en tu vunseb’ale’

techanal la vaq’ kan unq’a uxhchile’ jaq’ avoj uve’ ni ch’o’n taama see’, ti’k koj Aak te umaj ángel.

¹⁴ As ootzimal sqa’n uva’ ech unq’a ángel eche’ u kajiq’e’. As a’e’ ik’am u Tiixhe’. As chajel tzane’ ti’ kulochpe’, jank’al o’ uva’ la etzin u nimla b’a’nile’ uva’ aq’el sqe ta’n Aak ti’ isotzsat Aak u kupaave’.

Nim talche’ u nimla b’a’nile’ uva’ kat ib’an u Jesús

¹ Esti’e’ ni val sete, qitz’ataj u b’a’nla yole’ uve’ ab’imal ve’t sqa’n, tan asoj ye’ la kunima, as la ib’ane’ uva’ va’len ve’t u kutxumb’ale’ la kub’ane’.

² As u tzaq’ite’ uva’ kat tal kan unq’a ángel, as techal chite’ la nimali. As ab’il uva’ kat ipaasa tzii as ye’ kat inima, as tetzik chit ve’te’ uva’ kat ul u k’axk’oe’ sti’.

³ ¿As a’ kol chit ye’ la ib’an q’a sqe, asoj ye’ la qoksa qaama ti’ u sotzb’al paave’ uve’ nim talche’? As tul a’ u Kub’aal Jesús kat alon isuuchil u yole’ sqe b’axa. As kat yak’insal ve’t u yole’ ta’n unq’a uxhchile’, uva’ kat ab’in viyol Aake’.

⁴ As ech iyak’insat Aake’ viyole’. Kat ik’uch Aak unq’a k’uchb’al tetz viyak’ile’ tuk’ ka’t unq’a uve’ kat ib’an Aak uva’ kat teq’o taama unq’a tename’ sta’n. As kat ijatxb’en Aak u Tiixhla Espíritu ti’ junun unq’a uxhchile’ uva’ kat niman viyol Aake’, as kam uva’ kat tal taama Aak ti’ taq’at ste.

Ni taq’ u Jesús tijle’m unq’a niman tetz

⁵ As jit tiq’ab’ unq’a ángel la oksalkat u ak’ tx’ava’e’ uve’ la uli, ti’ tilpu isuuchil eche’ u yole’ uve’ ni qale’.

⁶ As ech ni tal uma’l u yol ile’ uva’ tal kan uma’l u q’ajsan tetz viyol u Tiixhe’:

¿Kam chit tijle’m unq’a uxhchile’ q’i ti’ uva’ nooksa eeb’ tilil sti’?

¿As kam chit tijle’m unq’a uxhchile’ q’i ti’ uva’ la ul aloche’?

⁷ Tan axhe’ kat b’anon uva’ b’iit kuxh ye’ kat lejon tijle’m unq’a uxhchile’ ti’ unq’a ángel.

As kat ooksa iq’ii unq’a uxhchile’ eche’ umaj ijlenaal uva’ la je’ koroona ti’ ivi’;

as kat ooksa snimil unpajte.

As kat ak’ujb’a’ ve’t kan ti’ unq’a acheesa’me’ uve’ kat ab’ana.

⁸ As kat aaq’ unq’a acheesa’me’ skajayil te unq’a uxhchile’ ti’ tilat isuuchil, ti’k u yole’.

As u yole’ u vaa’, as a’e’ ni tale’ uva’ kat taq’ u Tiixhe’ unq’a icheesa’me’ skajayil te unq’a uxhchile’ ti’ tilat isuuchil. As a’ ni tale’ uva’ ni tal Aak uva’ jank’al unq’a icheesa’m Aake’, as la til unq’a uxhchile’ isuuchil. As jit’e’ch nib’ane’, tan ye’l unq’a icheesa’m Aake’ skajayil ni til unq’a uxhchile’ isuuchil tijikil.

⁹ Pet ootzimal u Jesús sqa’n u ilol tetz isuuchil unq’a icheesa’m u Tiixhe’, uva’ b’iil kuxh at kan u tijle’me’ ti’ unq’a ángel tul kat ul vatz tx’ava’. As tul kat q’aav ve’t Aak tu almika’, as nim talchu ve’t Aak kat ib’ana. As ib’a’nil kuxh u Tiixhe’ kat ipaleb’e u Jesús u kamchile’ sqi’. Esti’e’ kat oksal ve’t iq’ii u Jesús. As nim talchu ve’t Aak cheel.

¹⁰ As u Tiixhe’ uva’ cheesan tetz unq’a cheesa’me’ skajayil, as Aak ib’aal skajayil. As a’ nisa’ Aak uva’ nimal unq’a tename’ la ok sme’al ik’aol Aak, aq’al uva’ la ilpi uva’ nim talchu ve’t Aak. Esti’e’ uva’ b’a’n ve’t te Aak uva’ techal kat ipaleb’e u Jesús unq’a k’axk’oe’, aq’al uva’ a’ u Jesús la sotzsan kupaav.

¹¹ As jank’al o’ uva’ txaael ve’t o’ ti’ qok sitenam u Tiixhe’, as uma’l kuxh ve’t Kub’aal tuk’ u Jesús uva’ ni oksan o’ sitenam u Tiixhe’. Esti’e’ ye’l u Jesús nich’ixve’ ti’ talata’ uva’ qitz’in qatzik ve’t qib’ tuk’ Aak,

¹² eche’ uva’ ni tal uma’t u yol uva’ tz’ib’amal kan:

La val isuuchil u yole’ see’ te unq’a vitz’in vatzike’.

As la unb’itza ve’t axh xo’l unq’a uxhchile’ uve’ nimol tib’ ti’ vab’iie’, ti’k u yole’.

¹³ As ech ni tal uma’t u yol ile’:

La unk’ujb’a’ ve’t unk’u’l ti’ Aak, ti’k u yole’.

As ni tal unpajte:

As il in at in tuk’ unq’a me’al ik’aol u Tiixhe’ uva’ kat alpu sve uva’ la vil isuuchil, ti’k u yole’.

¹⁴ Esti’e’ uva’ echat kat ib’an u Jesús eche’ o’, tan at kuchi’ol tuk’ kukajal as tuk’ kub’ajil. As ech Aake’ eche’ o’ kat ib’ana tul kat ipaleb’e Aak u kamchile’ ti’ itx’akon ti’ u tx’i’lanaje’ uva’ kat toksa tib’ sib’aalil unq’a uxhchile’ uva’ ye’ ni niman u Tiixhe’.

¹⁵ As kat ul u Jesús kamoj ti’ iq’alpul unq’a tename’ vatz u tx’ava’e’ uva’ txeyik ta’n u tx’i’lanaje’, tan nik ixo’v unq’a tename’ ti’ ikame’.

¹⁶ As ootzimal sqa’n uva’ jit unq’a ángel kat ul iloch u Jesús. Pet o’ kat ul iloch o’ Aak, o’ uva’ o’ tiaal u Abraham.

¹⁷ Esti’e’ uva’ techal chit kat ib’ensa tib’ u Jesús eche’ o’, ti’ uva’ Aak ve’t u Nimla oksan tetz kuyol vatz u Tiixhe’. As jik chit toksat Aak kuyol, tan nitxum Aak kuvatz. As esti’e’ kat ichoo Aak u kupaave’.

¹⁸ As kat ipaleb’e Aak k’axk’o tul kat chukax txumb’al ti’ Aak uva’ la paavin Aak. As esti’e’ uva’ ootzimal ve’t ta’n Aak kam la tulb’e Aak kulochpe’, tul nichukax txumb’al sqi’ ti’ uva’ la paavin o’.

Nim talchu u Jesús ti’ u Moisés

¹ Esti’e’, vitz’in vatzik, ex uva’ ex itenam Tiixh, antu ve’t o’ uva’ kat imolo o’ u Tiixhe’ setuk’ ti’ qetzit u nimla b’a’nile’ k’atz Aak. As qitz’ataj setuk’ ti’ u Jesucristo uva’ chajel tzan ti’ kulochpe’. As Aake’ u nimla oksan tetz iyol tenam vatz u Tiixhe’, eche’ uva’ ni tal u yole’ uva’ chusel ve’t sqa’n.

² As k’ujleb’al k’u’l u Jesucristo vatz u Tiixhe’ uva’ kat ik’ujb’a’ kan Aak. As ech kat ib’an u Moisés xo’l unq’a itenam u Tiixhe’, tan k’ujleb’al chit k’u’l u Moisés vatz u tename’ kat ib’ana.

³ As at ve’t pal toksal iq’ii u Jesús ti’ u Moisés, eche’ tatin umaj lakol kab’al, tan at pal toksal iq’ii ti’ u kab’ale’ uva’ kat ilaka.

⁴ As jank’al unq’a kab’ale’, as at uma’l uxhchil lakol tetz. As a’ u Tiixhe’ cheesan tetz skajayil.

⁵ As k’ujleb’al k’u’l u Moisés vatz u Tiixhe’ kat ib’ana. As ech ve’t tatin u Moisés eche’ umaj k’am ti’ ib’anata’ jank’al uva’ kat tal u Tiixhe’ ste as ti’ talat isuuchil kam uva’ la tal u Tiixhe’ xamtel.

⁶ As ech koj u Cristo, tan ech tatin Aake’ xo’l vitename’ eche’ umaj k’aol uva’ ni ilon vikab’al vib’aale’. As o’e’ ta’ uva’ ech o’e’ ikab’al u Tiixhe’, asoj chab’amal qatin ti’ u nimla b’a’nile’ uva’ nu kutx’eb’e’. As ye’ la ya’ o’ ti’ kuchiib’ sti’, tul nu kutx’eb’e’.

Ni talpu te unq’a itenam u Tiixh uva’ la ichab’a tatine’ ti’ u k’ujleb’al ik’u’le’

⁷ Esti’e’ la val sete, tan ech la eb’ane’ eche’ uva’ ni tal u Tiixhla Espíritu, tan ech ni tal ile’:

Asoj netab’i viyol u Tiixhe’ cheel,

⁸ as ye’ la etiib’isa vetaanxelale’, eche’ uva’ kat ib’an unq’a tename’,

tul uva’ kat ul ve’t ivi’ u Tiixhe’ ti’ unq’a tename’ tu u tzuukin tx’ava’e’,

tan nik isa’ tootzita’ ma la ib’an Aak moj ye’le kam uva’ kat tal Aak.

⁹ As esti’e’ ech kat tal ve’t Aak ile’:

Tzitzi’ kat isa’kat unq’a q’esla eb’aale’ tootzita’ ma an chit u yole’ uva’ kat val ste moj ye’le.

As k’uxh kat til unq’a nimla b’a’nile’ uva’ kat unb’an sti’ tu ka’viinqil u yaab’e’,

as nik isa’ tootzita’ ma an chit u yole’ uva’ kat val ste moj ye’le.

¹⁰ As esti’e’ uva’ kat ul ve’t unvi’ ti’ unq’a tename’ uve’ atik tzitzi’.

As ech kat val ve’t ile’ sti’: «As tz’ejxinal chit unq’a tename’ tuk’ vitxumb’ale’.

As ye’ nisa’ tootzit vuntxumb’ale’,» ch’in kat vala.

¹¹ Esti’e’ kat vala uva’ kat tx’i’tzi’l tu ve’t in.

As kat unk’ujb’a’ ve’te’ uva’ ye’ la ok ve’t unq’a uxhchile’ tu u tx’ava’e’

uva’ kat valtzi’ ste uva’ la chiib’ kat as uva’ ye’ la b’uchlukat ve’te’, ti’k u Tiixhla Espíritu.

¹² Atoj enachb’al, vitz’in vatzik, aq’al uva’ ye’l umaj ex la eteesa kan etib’ k’atz u islich Tiixhe’, as ye’ la etoksat etaama ti’ u va’lexhe’, as ti’ iyansal vetxumb’ale’ ti’ u k’ujleb’al ek’u’le’ ti’ Aak.

¹³ Pet aal la iyak’insa tib’ etaama sevatzaj jun q’ii ti’ u k’ujleb’al ek’u’le’ ti’ Aak. As eb’antaj cheel, aq’al uva’ ye’l umaj ex la etiib’isa etaama ta’n u paave’ uve’ ni tal imaxtib’et ex.

¹⁴ Tan asoj chab’amal qatin ti’ u k’ujleb’al kuk’u’le’ ti’ u Cristo techal tul Aak unpajte eche’ uva’ nik kub’an sb’axa, as at ve’t qokeb’al ti’ unq’a nimla b’a’nile’ uva’ la aq’ax sqe ta’n Aak.

¹⁵ As esti’e’ uva’ ech ni tal u yol ile’:

Asoj netab’i viyol u Tiixhe’ cheel,

as ye’ la etiib’isa vetaanxelale’ eche’ uva’ kat ib’an unq’a tename’

tul uva’ kat ul ivi’ u Tiixhe’ sti’, ti’k u yole’.

¹⁶ As tuk unnachonsa sete uva’ ¿ab’il kat ab’in viyol u Tiixhe’ as ye’ kat inima? Tan a’ unq’a tename’ uve’ kat teq’o u Moisés b’ey svatz ti’ tel ch’u’l tu u Egipto.

¹⁷ ¿As ab’il sti’ kat ulkat ivi’ u Tiixhe’ tu ka’viinqil u yaab’e’? A’ unq’a tename’ uva’ kat ipaasa tzii, as kat kamik kan tu u tzuukin tx’ava’e’.

¹⁸ As unq’a uxhchile’ uva’ ye’ ni niman u yole’ as kat k’ujb’a’l ve’t kan sti’ uva’ ye’ la ok tu u tx’ava’e’ uva’ ye’l la b’uchlukat.

¹⁹ As nu kupal stuul uva’ ye’ kat uch tetzit ve’t unq’a uxhchile’ kam uva’ kat taltzi’ ve’t Aak ste, tan ti’ uva’ ye’ kat ik’ujb’a’ ik’u’l ti’ Aak.

¹ As eche’ uva’ kat ib’an unq’a tiaal Israel tul kat ok tu u tx’ava’e’ uva’ kat taltzi’ u Tiixhe’ ste uva’ kat chiib’kat. As echat chit nib’an cheel, tan tuk chiib’oj o’ k’atz u Tiixhe’. As atoj kunachb’al ti’ uva’ altzi’mal sqe ta’n Aak. As ye’xheb’il la teq’o kan tib’ ti’ Aak, aq’al uva’ ye’ la itz’ej kan uva’ altzi’mal ste ta’n Aak.

² Tan antu ve’t o’ kat alpu u b’a’nla yole’ sqe eche’ uve’ kat alpu te unq’a tename’ na’ytzan. Pet k’uxh kat tab’i ve’t unq’a tename’ viyol Aake’, as ye’ kat txakon ve’t sti’ tan ti’ uva’ ye’ kat ik’ujb’a’ ik’u’l ti’ Aak tul uva’ kat tab’i. As ye’ kat inima.

³ Pet ech koj o’ uva’ ni niman viyol u Tiixhe’ tan at ve’t qokeb’al k’atz Aak. As aq’al uva’ ye’ la ib’an ve’te’ eche’ uva’ tal kan Aak:

Esti’e’ kat ul ve’t unvi’.

As kat unk’ujb’a’ ve’te’ uva’ ye’ la ok ve’t unq’a uxhchile’ tu u tx’ava’e’

uva’ kat valtzi’ ste uva’ la chiib’ kat as ye’ la b’uchlukat ve’te’, ti’k u Tiixhe’.

Jank’al o’ uva’ at o’ vatz u tx’ava’e’

⁴ As at uma’t u yol uva’ tz’ib’amal kan uva’ ech ni tal ile’ ti’ ivujpu u q’iie’:

As tivujpu q’ii kat oleb’ u Tiixhe’ ti’ vicheesa’me’ skajayil,

as kat chiib’ ve’t Aak ti’ uve’ kat ib’an Aak, ti’k u yole’.

⁵ As ech ni tal uma’t u yol ile’ unpajte uva’ tz’ib’amal kan:

As kat unk’ujb’a’ ve’te’ uva’ ye’ la ok ve’t unq’a uxhchile’ tu u tx’ava’e’

uva’ kat valtzi’ ste uva’ la chiib’ kat as ye’ la b’uchlukat ve’te’, ti’k Aak.

⁶ As ootzimal sqa’n uva’ ye’ kat tetzi unq’a uxhchile’ u chiib’ichile’ k’atz u Tiixhe’ uva’ kat alax u b’a’nla yole’ ste b’axa, tan ye’ kat inima u yole’.

⁷ As kat ik’ujb’a’ ve’t kan u Tiixhe’ uma’t u q’ii cheel unpajte. As a’ u David kat tz’ib’an u yole’ ta’n Aak. As a’e’ uva’ ni tuch ve’t cheel:

Asoj netab’i viyol u Tiixhe’ cheel,

as ye’ la etiib’isa etaanxelal ti’ enimata’, ti’k u David.

⁸ As kat koj itx’ol unq’a uxhchile’ tetzit u chiib’ichile’ k’atz u Tiixhe’ ta’n u Josué, as ye’le’xh uma’t u q’iie’ kat ik’ujb’a’ kan u Tiixhe’.

⁹ Esti’e’ attel u chiib’ichile’ cheel sqi’, o’ uva’ o’ ve’t itenam u Tiixhe’.

¹⁰ Tan jank’al u aq’one’ uva’ nukub’ane’, as nu kuchiib’e’ eche’ uva’ kat ib’an u Tiixhe’ tul kat oleb’ Aak ti’ icheesat unq’a icheesa’me’ skajayil.

¹¹ Qaq’taj yak’il setuk’ ti’ u chiib’ichile’ uva’ alel sqe ta’n u Tiixhe’, aq’al uva’ ye’l umaj o’ la yan kutxumb’al eche’ uve’ kat ib’an unq’a tename’ uva’ na’ytzan uva’ kat ipaasa tzii.

¹² As a’ viyol u Tiixhe’ ni aq’on itiichajil u qaanxelale’. As at pal iyak’il ti’ tilat u qaanxelale’ ti’ u ch’ich’e’ uva’ ka’va’l tee, tan la palik ok viyol Aake’ tu u qaanxelale’ techal toon xe’ qaama eche’ tok umaj ch’ich’ tu kuchi’ol. As la chukun ib’en tu kub’ajil. As a’ viyol Aake’ la pich’un kam uva’ ni tal qaama tuk’ uva’ ni qitz’a.

¹³ As ye’l umaj vicheesa’m Aake’ uva’ ye’ koj na’l vatz Aak, tan kajayil chite’ unq’a vee’ na’l vatz Aak. As Aake’ uva’ la kuxocho’k qib’ ste ti’ uva’ kam kat kub’ana.

At pal u tijle’m u Jesucristo ti’ viq’esal unq’a nachol Tiixh ti’ unq’a tenam

¹⁴ As ye’ la kuya’sa kunimat unq’a yole’ ti’ u Jesús, viK’aol u Tiixhe’, tan Aake’ uva’ nimla q’esal oksan tetz iyol tenam vatz Tiixh. As echen ve’t Aak tu almika’.

¹⁵ As u Jesús, u nimla q’esal oksan iyol tenam vatz Tiixhe’ ti’ itxumat kuvatz as ti’ ilochat o’ Aak vatz u paave’, tan kat chukax txumb’al ti’ Aak eche’ uva’ ni qulb’ele’, tan a’ kat alchi uva’ kat koj paavin Aak. As ye’l Aak kat paavini.

¹⁶ Esti’e’ ye’ la xo’v ve’t o’ ti’ kujetz’en ok k’atz Aak tu uve’ xonle’lkat Aak tuk’ u tijle’me’ uva’ atkat vib’a’nil Aake’. As la itxum Aak kuvatz. As la iloch ve’t o’ Aak tuk’ vib’a’nile’, tul la kupaleb’e unq’a k’axk’oe’.

¹ As qitz’ataj kam itxaap unq’a iq’esal oksan iyol tenam vatz Tiixh, tan txaaele’ nib’anche’ xo’l unq’a imoole’. As k’ujlu ve’t kan ti’ toksal viyol u tename’ vatz u Tiixhe’, as ti’ toksal unq’a txooe’ vatz Aak ti’ ijajat sotzb’al ipaav unq’a tename’.

² As aapaav chite’ unq’a iq’esal oksan iyol tenam vatz Tiixh. Esti’e’ at itxumb’al ti’ uva’ la ik’uch u nima aamaile’ te unq’a tename’ uva’ ye’l itxumb’al ati ti’ u tzaq’ite’ uva’ tz’ib’amal kan.

³ As ti’ uva’ aapaav chajaak, as esti’e’ nitz’e’sa ve’t chajaak unq’a txooe’ vatz u Tiixhe’ ti’ ijajat sotzb’al ipaav as tuk’ ti’ vipaav unq’a tename’.

⁴ As ye’ la uch toksat je’ tib’ umaj uxhchil siq’esalil oksan iyol tenam vatz Tiixh. Pet a’ kuxh u uxhchile’ la oki uve’ kat txaapi ta’n u Tiixhe’, eche’ uva’ kat ib’an u Aarón.

⁵ As echat kat ib’an u Cristo, tan ye’l Aak kat toksa je’ iq’ii ti’ toksat tib’ siq’esalil oksan iyol tenam vatz Tiixh. Pet a’ u Tiixhe’ kat oksan u Cristo siq’esalil unq’a nachol Tiixhe’. As ech kat tal u Tiixh ile’:

Axhe’ axh unK’aol.

As ine’ uva’ kat aq’on u eejle’me’ cheel, ti’k u Tiixhe’ tal te u Cristo.

⁶ As ech ni tal u Tiixh ile’ unpajte tu uma’t u u’uje’:

Axh ve’t oksan iyol tenam vatz Tiixh ti’ chit ib’ene’,

eche’ uva’ kat ib’an u Melquisedec, ti’k Aak.

⁷ As tul atik u Cristo vatz u tx’ava’e’, as taq’ je’ Aak tuul ivi’ ti’ inachat Tiixh tuk’ oq’el, tan ootzimal ta’n Aak uva’ ta’n u Tiixhe’ la lochon Aak ti’ ipaleb’et u kamchile’. As kat ab’il ve’t viyol u Cristo, tan ti’ uva’ kat ixo’va Aak u Tiixhe’. As niman yol Aak kat ib’ana.

⁸ As k’uxh iK’aol u Tiixhe’ u Cristo, as tul uva’ kat ipaleb’e Aak unq’a k’axk’oe’, as kat tootzi ve’t Aak kam inimal viyol u Tiixhe’.

⁹ As tul ma’tik inimat ve’t Aak kajayil uva’ alel kan ti’ Aak, as kat ok ve’t Aak aq’ol tetz itiichajil u qaanxelale’ k’atz u Tiixhe’, jank’al o’ uva’ ni niman ve’t Aak,

¹⁰ as kat ik’ujb’a’ ve’t kan u Tiixhe’ viK’aole’ siq’esalil oksan iyol tenam vatz Tiixh eche’ uva’ kat ib’an ve’t u Melquisedec.

Nib’eyal te unq’a tiaal Israel ti’ uva’ ye’ la iya’sa inimat viyol u Jesús

¹¹ As nimatel yol la val sete ti’ u Melquisedec, uve’ ni vale’. As tza’l talax isuuchil u yole’ sete, tan ti’ uva’ ye’ nepal stuul.

¹² As na’ytzane’ exe’t ti’ echusat etib’ ti’ unq’a yole’. As a’ la eb’ane’ uva’ ex koj ve’t la chusun ex cheel, uva’ ni vale’. Pet ni vile’ uva’ techal la ka’pul unq’a chusb’ale’ sete uva’ kat chuspu sete sb’axa, tan echtel kuxh nib’an vetxumb’ale’ ti’ unq’a chusb’ale’ eche’ nib’an umaj tal ne’ uva’ nitel ich’u’une’. As ye’ la oleb’ ex ti’ tab’il unq’a chusb’ale’ uva’ tii tab’ile’, tan ech vetxumb’ale’ eche’ umaj ne’ uva’ ye’ echb’unoj.

¹³ As ab’il uva’ echtel kuxh vitxumb’ale’ eche’ unq’a ne’e’ uva’ nitel kuxh ich’u’une’, as ye’ nib’en ste ab’iste u va’lexhe’, as ab’iste u b’a’ne’.

¹⁴ Pet ech koj unq’a uxhchile’ uva’ ech vitxumb’ale’ eche’ unq’a q’esla aamae’, tan nichuspu ve’te’ ti’ unq’a chusb’ale’ uva’ tii tab’ile’ eche’ nib’anchu te unq’a talaj intxa’e’ uva’ ni taq’pu ve’t techb’ub’al. As chusel ve’t sta’n ti’ tootzita’ uva’ ab’iste u b’a’ne’ as ab’iste u ye’ b’a’ne’. As a’ u b’a’ne’ nib’ane’.

¹ Esti’e’ la val sete, ye’ la uchi uva’ jatpuul kuxh la chuspu unq’a chusb’ale’ sqe ti’ qatin k’atz u Cristo eche’ uva’ kat alax sqe sb’axa. Pet aal la kuchus qib’ ti’ unq’a chusb’ale’ uva’ la yak’insan u kutxumb’ale’ ti’ qatin k’atz u Cristo. As jit tz’ajinale’ la ka’puul unq’a chusb’ale’ ti’ kuk’axat qib’ ti’ u va’lexhe’ uva’ nik kub’ane’ uva’ laik eq’on o’ tu u kamchile’, as ti’ kuk’ujb’a’t kuk’u’l ti’ u Tiixhe’ uva’ kat kub’an b’axa.

² As mita’n la ka’puul unq’a chusb’ale’ uva’ kat alax sqe b’axa ti’ kuku’ xe’ u a’e’, as ti’ taq’at je’ unq’a kuq’esale’ iq’ab’ ti’ kuvi’, as ti’ u tuleb’al taama unq’a kamnaje’ unpajte, as ti’ ib’anat u Tiixhe’ kusuuchil.

³ Asoj la isa’ u Tiixhe’, as la kuchus qib’ ti’ unq’a chusb’ale’ ti’ uva’ la yak’in u kutxumb’ale’ ti’ qatin k’atz u Cristoe’.

⁴ Tan ye’ la uchi uva’ la alpu te unq’a uxhchile’ uva’ la ik’axa tib’ unpajte eche’ uva’ kat ib’an b’axa, as tul ma’t taq’at u Tiixhe’ ste uva’ la ootzil ve’t Aak sta’n, as ma’t ik’ulat ve’t unq’a uxhchile’ u b’a’nile’ uva’ ni taq’ u Tiixhe’ ste, as ma’t tok u Tiixhla Espíritu tu u taanxelale’,

⁵ as ma’t inachat vib’a’nil u b’a’nla yole’ tetz u Tiixhe’, as ma’t tilat unq’a nimla b’a’nile’ eche’ unq’a vee’ uva’ tuk ib’ane’ vatz u tx’ava’e’ tul uva’ la ul u Jesúse’ unpajte.

⁶ Asoj la teesa kan tib’ unq’a uxhchile’ ti’ inimat u b’a’nla yole’, as ye’ la uchi uva’ la ik’axa tib’ unpajte eche’ uva’ kat ib’an b’axa, tan eela kuxh stuk’ uva’ an chit u uxhchile’ ni aq’on je’ viK’aol u Tiixhe’ vatz u kuruse’ ti’ ich’ixvisale’ unpajte. Pet asoj ech la ib’ane’, as an kuxh unq’a uxhchile’ la eq’on tzan u k’axk’oe’ sti’.

⁷ As ech unq’a uxhchile’ eche’ uma’l u tx’ava’, tan tul uva’ ni tak’ u tx’ava’e’ ta’n u jab’ale’ uva’ b’enameen ni tule’, as nich’ii ve’t unq’a chikoe’ stuul. As nimal ve’t ivatz ni taq’e’ te unq’a uxhchile’ uve’ ni aq’onvan u tx’ava’e’. As nik’ul ve’t u tx’ava’e’ vib’a’nil u Tiixhe’.

⁸ Asoj a’ kuxh unq’a ch’i’xe’ la ch’ii tu u tx’ava’e’ tuk’ unq’a tze’e’ uva’ at ich’i’xil, as ye’l itxa’ke’. As at ve’t tzan u k’axk’oe’ ti’ u tx’ava’e’, tan la tz’e’sal ve’t unq’a ch’i’xe’ skajayil.

⁹ Vitz’in vatzik uva’ xo’n ve’t ex sve, as k’uxh ech u yole’ uva’ ni val sete, tan ootzimal sva’n uva’ ech exe’ eche’ u tx’ava’e’ uva’ b’a’nla chiko ni taq’e’, tan eq’omal unq’a b’a’nile’ seta’n uva’ ni k’uchun uva’ q’alpumal ve’t ex vatz vepaave’.

¹⁰ As ye’ la isotzsa u Tiixhe’ unq’a b’a’nile’ sk’u’l uve’ kat eb’an tuk’ vib’ii Aake’, tan jik chit Aake’. As kat ek’ucha uva’ xo’n ve’t Aak sete, tul uva’ kat eloch unq’a emoole’ uva’ ni niman Aak. As antel kuxh elochat cheel.

¹¹ As a’ ni vale’ uva’ junun chit ex uva’ aya’l chit ek’u’l ti’ eb’anat u b’a’ne’ eche’ uva’ neb’an cheel as techal la ekameb’e. As la etetzi unq’a nimla b’a’nile’ skajayil uva’ nu kutx’eb’ setuk’.

¹² As jit q’e’ay ex la ib’ane’ ti’ u k’ujleb’al ek’u’le’. Pet a’ ni vale’ uva’ ech la eb’ane’ eche’ nib’an unq’a kumoole’ uva’ la etzin ve’t unq’a b’a’nile’ uve’ alel kan sqe ta’n u Tiixhe’, tan ye’ nipal ik’u’l ti’ itx’eb’at unq’a b’a’nile’. As ye’ ni taq’ kan u k’ujleb’al ik’u’le’.

¹³ As tul uva’ kat tal kan u Tiixhe’ u yole’ te u Abraham uva’ nimal ve’t unq’a tiaal u Abraham la ib’ane’, as ye’l uma’toj uxhchil ati uva’ nim talche’ ti’ u Tiixhe’. As esti’e’ uva’ an kuxh Aak kat alon tuk’ vib’iie’ uva’ techal la ib’an Aak kam uva’ kat tal Aak.

¹⁴ As ech tal Aak ile’ te u Abraham:

As tuk val see uva’ nimal u b’a’nile’ la vaq’ tzan see.

As nimal unq’a aviaale’ la ib’ane’ ta’n vunb’a’nile’, ti’k Aak.

¹⁵ As ye’ kat pal ik’u’l u Abraham ti’ itx’eb’ata’. As kat ik’ul ve’t u b’a’ne’ uva’ kat tal kan u Tiixhe’ ste.

¹⁶ As tul ni qal umaj tiila yol uva’ techal chit la kunima. As ye’l ve’t uma’toj yol sti’, tan k’ujlu ve’t kan u yole’ uva’ kat qala. As techal la kub’ane’, tan tuk’ vib’ii u Tiixhe’ kat qalkat.

¹⁷ As echat kat ib’an u Tiixhe’ tan an kuxh tuk’ vib’ii Aake’ kat talkat Aak u yole’ te u Abraham tuk’ unq’a tiaale’, ti’ uva’ la b’en ste uva’ techal la ib’an u Tiixhe’ eche’ uva’ kat tal Aak. As ye’ la uch ijalpule’.

¹⁸ As tuk’ vib’ii Aake’ kat talkat Aak u yole’ ti’ ik’ujb’a’t Aak kuk’u’l, jank’al o’ uva’ k’ujle’l kuk’u’l ti’ Aak ti’ uva’ la iloch o’ Aak ti’ qetzit u nimla b’a’nile’ uva’ at sqi’. As ti’ ka’va’l unq’a yole’ uva’ kat tal Aak sqi’ uva’ ye’ la uch ijalpule’, as esti’e’ ootzimal sqa’n uva’ ye’ la uch ichulit Aak yol.

¹⁹ As ech tatin u k’ujleb’al kuk’u’le’ ti’ viyol u Jesús eche’ nib’an u ch’ich’e’ uva’ ancla uva’ ni majon u barco, ti’ uva’ ye’ la tija u kajiq’e’ u barco. As tuk’ u k’ujleb’al kuk’u’le’ la oon o’ ti’o’k iqul u nimla ixb’u’je’ uve’ at tu u tabernáculoe’.

²⁰ As a’e’ uva’ kat ib’an u Jesús tul kat ok ve’t Aak nimla b’ooq’olil ti’ unq’a oksan iyol tenam vatz Tiixh, as Aak uva’ kat ok sb’axa sukuvatz tu u tabernáculoe’ eche’ uva’ alel kan ta’n u Melquisedec.

U oksan iyol tenam vatz Tiixh uva’ Melquisedec

¹ As u Melquisedec uva’ atik ok ijlenaalil tu u tenam uva’ Salem, as a’e’ uva’ oksan iyol tenam vatz Tiixh uva’ nitoksal iq’ii. As tul kat q’aavik tzan u Abraham ti’ ib’anat ch’a’o ti’ unq’a ijlenaale’, as b’ex ik’ul ve’t u Melquisedec u Abraham. As kat inach ve’t u Melquisedec Tiixh ti’ ijajat b’a’nil te u Tiixhe’ ti’ u Abraham.

² As taq’ ve’t u Abraham uma’l xo’l chaj laval unq’a vee’ uva’ kat itx’ol tu u ch’a’oe’ te u Melquisedec. As ech ni tokkat vib’ii u Melquisedec ile’: Tijlenaal u Salem. As u ijlenaal uva’ b’anol tetz u jike’, as u ijlenaal nib’anon uva’ b’a’n qatin sukuvatzaj.

³ As ye’xhkam ootzimal uva’ ab’il ib’aal as ab’il itxutx. As mita’n unq’a q’esla ib’aale’ ootzimal. As ye’ ni tootzile’ kam q’iil itz’eb’i as mita’n vikameb’ale’. As esti’e’ uva’ ni talpu ti’ u Melquisedec, as a’ ve’te’ oksan iyol tenam vatz Tiixh ti’ chit ib’ene’ eche’ nib’an u Jesús, viK’aol u Tiixhe’.

⁴ As qitz’ataj setuk’, tan nim talche’ u Melquisedec. As k’uxh nim talchu u q’esla kub’aale’ uva’ Abraham, as kat taq’ ve’t u Abraham uma’l xo’l chaj laval unq’a vee’ uve’ kat itx’ol tu u ch’a’oe’ te u Melquisedec.

⁵ As tul kat ik’ul ve’t u Melquisedec uma’l xo’l chaj laval unq’a vee’ te u Abraham, as eela kuxh stuk’ uva’ kat ik’ul ve’t te unq’a tiaal u Abraham skajayil. As eche’ unq’a tiaal u Leví uva’ at ve’t ok nachol Tiixhil ti’ unq’a tename’. As a’e’ uva’ alel ve’t kan sti’ ta’n u tzaq’ite’ uva’ tz’ib’amal kan uva’ la taq’ unq’a tename’ uma’l xo’l chaj laval unq’a tetze’ ste. As an kuxh tiaal u Abraham unq’a tiaal u Leví.

⁶ As k’uxh jit tiaal u Leví u Melquisedec, as nim talche’ ti’ u Abraham. Esti’e’ kat taq’ ve’t u Abraham uma’l xo’l chaj laval unq’a vee’ ste. As k’uxh a’ u Abraham uva’ ma’tik talat u Tiixhe’ u yole’ ste ti’ u b’a’nile’ uva’ la ul sti’ ta’n Aak, as kat inach ve’t u Melquisedec Tiixh ti’ u Abraham.

⁷ As ootzimal sqa’n uva’ ab’il uva’ at pal u tijle’me’ ti’ vimoole’, as a’e’ uva’ ni nachon Tiixh sti’ aq’al uva’ la ul u b’a’ne’ ti’ u uxhchile’.

⁸ As jank’al unq’a tiaal u Leví uva’ ni k’ulun uma’l xo’l chaj laval unq’a oye’ te unq’a tename’, as nikame’. Pet ech koj u Melquisedec. Tan ni talpu sti’ uva’ isle’ltele.

⁹ As la uch qalata’ uva’ unq’a tiaal u Leví uva’ ni k’ulun uma’l xo’l chaj laval unq’a oye’ te u tename’, as a’e’ kat aq’on uma’l xo’l chaj laval unq’a vee’ te u Melquisedec. Tan tul uva’ kat taq’ u Abraham uma’l xo’l chaj laval unq’a vee’ te u Melquisedec, as eela kuxh stuk’ uva’ antu ve’t unq’a tiaal u Leví kat aq’on te u Melquisedec unpajte,

¹⁰ tan atik unq’a tiaal u Abraham tu vichi’ole’ tul b’ex k’ulpoj unq’a vee’ ta’n u Melquisedec tan ye’xnik itz’eb’i.

¹¹ As u tzaq’ite’ uva’ tz’ib’amal kan, as a’e’ k’ujb’a’n kan u Aarón uva’ tiaal u Leví ti’ toksal unq’a oye’ vatz u Tiixhe’. As kat koj ok unq’a tename’ jikla aamail vatz u Tiixhe’ sta’n, as jit tz’ajinale’ uva’ la ul uma’t oksan iyol tenam vatz Tiixh uva’ jit tiaal u Aarón. Pet techal kat ul uma’te uva’ eela tuk’ u Melquisedec.

¹² As tul uva’ kat jalpu ve’t u tzaq’ite’ ti’ uva’ ab’il la ok nachol Tiixhil ti’ u tename’, as techal kat ok ve’t uma’t u ak’ tzaq’it.

¹³ As u uxhchile’ uve’ ni talpu sti’ uva’ eela tuk’ u Melquisedec, as a’ u Jesús. As a’ unq’a tiaal u Leví ni ilon isuuchil u atinb’ale’ uva’ niyatz’pukat unq’a txooe’, as tul jit tiaal u Leví u Jesús. Pet tiaal uma’t ik’aol u Israel Aak. As ye’ kat ok uma’toj vik’aol u Israel ti’ inachat Tiixh ti’ unq’a tename’.

¹⁴ As ootzimal chite’ sqa’n uva’ a’ ulkat u Kub’aal Jesús xo’l unq’a tiaal u Judá. As ye’xhkam chit unb’ooj kat tal kan u Moisés ti’ uva’ la ok umaj tiaal u Judá snachol Tiixhil.

¹⁵ As u yole’ uva’ ni val sete, tan aal la pal ex stuul, asoj la b’en sete uva’ at uma’t oksan iyol tenam vatz Tiixh uva’ eela tuk’ u Melquisedec.

¹⁶ Pet jit ti’ u tzaq’ite’ uva’ k’ujeb’kat kan u Jesús nachol Tiixhil sqi’. As jit ti’ uva’ tiaal u Leví Aak eche’ uva’ ni tal u tzaq’ite’. Pet ti’ uva’ ye’xheb’il kat oleb’ ti’ Aak, tan isle’l Aak ti’ chit ib’ene’. As esti’e’ kat okkat Aak snachol Tiixhil sqi’.

¹⁷ As ti’ Aak tz’ib’amalkat kan u yole’ uva’ ech ni tal ile’:

Tan axhe’ oksan iyol tenam vatz Tiixh ti’ chit ib’ene’

eche’ uve’ kat ib’an u Melquisedec, ti’k u yole’.

¹⁸ As kat palyu ve’t iyak’il u tzaq’ite’ uva’ atik b’axa, tan ti’ uva’ ye’ kat ok unq’a tename’ jikla aamail sta’n.

¹⁹ As ye’xheb’il kat ok jikla aamail ti’ inimat u tzaq’ite’. Esti’e’ kat ik’ujb’a’ kan u Tiixhe’ uma’t u yole’ uva’ nim talche’ ti’ u tzaq’ite’. As a’ u yole’ ti’ u Jesús uva’ k’ujle’l kuk’u’l sti’ uva’ ni aq’on qokeb’al k’atz u Tiixhe’.

²⁰ As tul kat ok unjoltu unq’a uxhchile’ nachol Tiixhil ti’ unq’a tename’, as ye’l uma’toj yol uva’ nim talche’ kat tal Aak sti’. Pet ech koj u Jesús, tan kat tal u Tiixhe’ uva’ a’ u Jesúse’ u oksan tetz u kuyole’ vatz u Tiixhe’ ti’ chit ib’ene’,

²¹ tan a’ u Tiixhe’ kat alon u yole’ ti’ toksat Aak u Jesúse’ oksan iyol tenam vatz Tiixh, eche’ uva’ ni tal uma’l u yol uva’ tz’ib’amal kan uva’ ech ni tal ile’:

As kat tal u Tiixhe’ u yole’ tuk’ vib’iie’.

As ye’xh jatu la ijalpu Aak vitxumb’ale’ ti’ u yole’, tan ech kat tal Aak ile’:

«Tan at ve’t ok chit axh nachol Tiixhil ti’ unq’a tename’ ti’ chit ib’ene’,»+ 7.21 At tu u O’t Testamento uva’ ech ni tal ile’: «eche’ uva’ kat ib’an u Melquisedec.» ti’k Aak, ti’k u yole’.

²² As a’ u Jesús uva’ nik’ujb’a’n kan ti’ uva’ la qetzi unq’a b’a’nile’, tan Aake’ kat taq’ tib’ sqi’ tul kat ik’ujb’a’ kan Aak u ak’ tzaq’ite’, as Aak kat kam ve’t sqi’.

²³ As nimal unq’a uxhchile’ kat oksan iyol tenam vatz Tiixh uva’ tiaal u Leví as kat mox kami. As esti’e’ uva’ kat mox taq’ ve’t kan u tijle’me’.

²⁴ Pet ech koj u Jesúse’, tan ato’k Aak nachol Tiixhil ti’ chit ib’ene’, tan ye’l Aak la kam ve’te’.

²⁵ Esti’e’ uva’ at tijle’m u Jesús ti’ chit ib’ene’ ti’ taq’at unq’a nimla b’a’nile’ sqe ti’ kuq’alpule’, jank’al o’ uva’ at ve’t qokeb’al k’atz u Tiixhe’ ta’n Aak tan isle’l chit Aak ti’ chit ib’ene’. As ye’ la iya’sa Aak toksal kuyol te u Tiixhe’.

²⁶ As a’ u Jesúse’ oksan iyol tenam vatz Tiixh. As Aake’ uva’ nisa’vit sqi’. As jik chit itxumb’al Aak. As ye’l umaj va’lexhla yol la alchu ti’ Aak. As jikla aama chit Aak. As jit eela Aak tuk’ o’ tan o’ aapaav. As kat ok ve’t iq’ii Aak, tul kat oon Aak tu almika’.

²⁷ As jit’e’ch kat ib’an Aake’ eche’ uva’ nib’an unjoltu unq’a iq’esal oksan iyol tenam vatz Tiixh, tan jun q’ii niyatz’ chajnaj unq’a txooe’ vatz u nachb’al Tiixhe’ ti’ ijajat kuyb’al ti’ u paave’. As b’axel nijaj chajnaj kuyb’al ti’ vipaave’. As a’n nijaj ve’t chajnaj kuyb’al ti’ vipaav unq’a tename’. Pet ech koj u Jesús, tan ye’l ipaav Aak ati. As unpajul kuxhe’ kat taq’ tib’ Aak kamoj sqi’ as tuk’ ti’ unq’a tename’ ti’ ichooat Aak u kupaave’ ti’ chit ib’ene’.

²⁸ As ti’ u tzaq’ite’ uva’ tz’ib’amal kan ta’n u Moisése’ ni tokkat unq’a naje’ siq’esalil oksan iyol tenam vatz Tiixh, k’uxh aapaav chajnaj. Pet ech koj u Jesús, viK’aol u Tiixhe’, tan ti’ uva’ kat tal u Tiixhe’ u yole’ tuk’ vib’iie’ tul uva’ ma’tik talat Aak u tzaq’ite’ uva’ tal Aak b’axa. As esti’e’ ato’k u Jesúse’ siq’esal oksan iyol tenam vatz Tiixh, tan k’ujlu kan chite’ u tijle’m u Jesúse’ ti’ chit ib’ene’.

Nim talche’ u Jesús uva’ ato’k tu nachb’al Tiixh tu almika’

¹ As a’ isuuchil u yole’ uva’ ni val sete ti’ itzaele’ uva’ at ve’t ok chite’ u Jesús q’esalil oksan iyol tenam vatz Tiixh. As xonle’l ve’t Aak tiseb’al u Tiixhe’ uva’ nim talche’ tu almika’.

² As Aake’ ni nachon Tiixh sqi’ tu u Tiixhla atinb’ale’ uva’ tabernáculo ib’ii uva’ k’ujle’l ta’n u Kub’aal Tiixhe’. As a’e’ u atinb’ale’ uva’ ninachpukat Tiixh tu almika’ uva’ jit umaj uxhchil kat b’anon.

³ As junun unq’a iq’esal oksan iyol tenam vatz Tiixh as k’ujlu kan ti’ toksal iyol unq’a tename’ vatz Tiixh. Esti’e’ uva’ techal la toksa u Jesús umaj oy vatz u Tiixhe’.

⁴ Pet attel koj u Jesús cheel, as jit Aak oksan iyol tenam vatz Tiixh la ib’ane’ vatz u tx’ava’e’, tan at ve’t unq’a oksan iyol tenam vatz Tiixh sukuxo’l ti’ toksat unq’a oye’ vatz u Tiixhe’ eche’ uva’ ni tal u tzaq’ite’ uva’ tz’ib’amal kan ta’n u Moisés.

⁵ As a’ chajnaje’ uve’ ni oksan unq’a oye’ vatz u Tiixhe’ tu u atinb’ale’ uva’ tabernáculo ib’ii uva’ ninachpukat Tiixh. As a’e’ ni b’anon ivaatzil u atinb’ale’ uva’ tabernáculo uva’ echen tu almika’ eche’ uva’ kat tal u Tiixhe’ te u Moisés, tan ech tal ve’t Aak ile’ te u Moisés tul uva’ aalik ib’anat ve’t u atinb’ale’ uva’ tabernáculo uva’ nik inachpukat Tiixh: «La chit ab’ane’ kam uve’ kat val see vi’ u vitze’,» ti’k Aak.

⁶ As kat aq’pu ve’t te u Jesús uva’ Aak kat oksan iyol tenam vatz u Tiixhe’. As echat u ak’ tzaq’ite’ uva’ k’ujlu kan ta’n u Jesúse’, tan at pal ti’ u tzaq’ite’ uva’ atik b’axa. As nim talche’ unq’a yole’ uva’ tal u Tiixhe’ ti’ u Jesúse’.

⁷ As jik koj chit kat ib’an unq’a uxhchile’ ta’n u tzaq’ite’ uva’ atik b’axa, as ye’le’xh u ka’v tzaq’ite’ kat k’ujeb’i.

⁸ Pet kat til u Kub’aal Tiixhe’ uva’ ye’ nik ib’an unq’a tename’ u b’a’ne’. Esti’e’ uva’ ech kat tal ve’t Aak ile’ sti’:

As la ilej ve’t uma’l u q’ii

uva’ la unk’ujb’a’ ve’t uma’t u ak’ tzaq’ite’ seti’,

ex unq’a aa Israel

tuk’ ex unq’a aa Judá.

⁹ Pet jit eela u ak’ tzaq’ite’ tuk’ u tzaq’ite’ uva’ kat unk’ujb’a’ kan xo’l unq’a q’esla eb’aale’,

tul uva’ kat veq’o el tzan tu u Egipto.

Ech nunb’ane’ eche’ nib’an umaj b’aala uva’ txeyel iq’ab’ vitalaj intxa’e’ sta’n ti’ ilochata’.

As ye’ kat inima unq’a q’esla eb’aale’ u tzaq’ite’

uva’ kat unk’ujb’a’ kan b’axa.

Esti’e’ uva’ ye’ kat vab’i ve’t viyol u tename’.

¹⁰ As tul ma’t ipal ve’t iyak’il u txumb’ale’ uva’ unk’ujb’a’ kan te unq’a tiaal Israel b’axa,

as a’ u vi’la’ uva’ tuk unk’ujb’a’ kan sti’, tan ech ni val ile’:

«La voksa ve’t vuntzaq’ite’ tu vitxumb’ale’.

As la voksa ve’t vunyole’ tu u taanxelale’.

As in ve’t iTiixh;

as a’e’ untenam la ib’ane’.

¹¹ As jit tz’ajinal la ichus ve’t unq’a uxhchile’ vimoole’.

As mita’n ech la tal ile’ te u titz’in tatzike’:

Qootzitaj u Kub’aal Tiixhe’ setuk’, chaj koj la tale’,

tan kajayil chit unq’a tename’ la ootzin ve’t in,

k’uxh at tijle’m as k’uxh ye’l tijle’m ati.

¹² As la unsotzsa ve’t ipaav unq’a uxhchile’.

As ye’xh jatu la vulsa ve’t vipaav unq’a uxhchile’ sunk’u’l uva’ kat ib’ana,» ti’k u Tiixhe’.

¹³ As tul uva’ kat tal ve’t Aak uva’ la ik’ujb’a’ kan Aak uma’t u ak’ tzaq’it, as a’ isuuchile’ uva’ nipal ve’t iyak’il u tzaq’ite’ uva’ atik b’axa. As ile’ nisotz ve’te’.

¹ As ootzimal sqa’n uva’ nik tal u b’axa tzaq’ite’ uva’ k’ujlik kan ti’ talat isuuchil sqe uva’ kam kunachat Tiixh. As nik tal isuuchil sqe ti’ u atinb’ale’ uva’ atik vatz u tx’ava’e’ uva’ nik inachpukat Tiixh ta’n unq’a tiaal Israel.

² As ech b’an ta’n u tabernáculoe’ uva’ nik inachpukat Tiixh, tan atik uma’l u b’axa tuul kab’al uva’ Txaala atinb’al ib’ii. As tzitzi’ atikkat tatinb’al u matxb’ale’ uva’ vujva’l ivi’ ati tuk’ u meexhae’ uva’ atikkat u paane’ uva’ nik toksal vatz u Tiixhe’.

³ As ti’ iqul u ka’v ixb’u’je’ atikkat uma’t u tuul tabernáculoe’ uva’ Tiixhla atinb’al ib’ii.

⁴ As a’ atikkat u tatinb’al uva’ tz’e’sab’ incienso uva’ lak’el ok b’a’nla q’an ch’ich’ sti’ tuk’ stuul as tuk’ u kaaxhae’ uva’ k’ujlu kan xo’l u tename’ ta’n u Tiixhe’. As atik ku’ uma’l u xhaalo stuul uva’ b’a’nla q’an ch’ich’, uva’ kolikkat u echb’ub’ale’ uva’ maná ib’ii. As atik ku’ vib’aara u Aarón tu u kaaxhae’, uva’ ma’tik ixalmite’; as atik ku’ unq’a lepkin k’ub’e’ stuul uva’ tz’ib’amalkat u tzaq’ite’.

⁵ As atik ka’va’l unq’a vatzib’al vi’ u jupb’al itzi’ u kaaxhae’ uva’ ech tilone’ eche’ ángel, k’uchb’al tetz uva’ ni toksal iq’ii u Tiixhe’ uva’ at xo’l vitename’. As atik b’en vixich’ unq’a uva’ eche’ ángel tiib’a u jupb’al itzi’ u kaaxhae’, k’uchb’al tetz uva’ ye’l vipaav unq’a tename’ nik toksa u Tiixhe’ stuul. As jit kuxh tz’ajinal la val ve’t isuuchil u yole’ skajayil cheel ti’ u tabernáculo.

⁶ As tul uva’ ma’tik itzojpu ve’t u tabernáculo uva’ ka’va’l tuul, as jun q’ii nik tok ve’t unq’a oksan iyol tenam vatz Tiixh tu u b’axa tuul u kab’ale’ ti’ inachat Tiixh.

⁷ Pet ech koj nik ib’an tu vika’v u tuul u kab’ale’ uve’ Tiixhla atinb’al, tan a’ik kuxh vib’ooq’ol unq’a oksan iyol tenam vatz Tiixh nik tuch tok tu u atinb’ale’, tan uma’l kuxh q’ii tu jun yaab’ nik tuch tok tu u atinb’ale’. As nik teq’o ve’t ok vikajal unq’a avane’ ti’ ijajat kuyb’al ti’ vipaave’ as tuk’ ti’ vipaav unq’a tename’ uve’ ye’ nachel ste uva’ nib’ane’.

⁸ As jank’al unq’a yole’ uva’ kat val ti’ u tabernáculo, as ni taq’ u Tiixhla Espíritu kutxumb’al ti’ u b’axa tuul u atinb’ale’, tan tul uva’ atiktele, as ye’xnik ik’uchat Aak te unq’a tename’ uva’ kam la tulb’e toon tu u Tiixhla atinb’ale’.

⁹ As k’uchuvatze’ nib’an sqe cheel. As ni taq’ kutxumb’al ti’ uva’ ye’ ni toleb’ unq’a oye’ tuk’ unq’a avane’ uva’ ni toksal vatz u Tiixhe’ ti’ ijikb’a’l u taanxelal unq’a uxhchile’.

¹⁰ As a’ kuxh nikat itxakonkat u yole’ tul uva’ ye’xnik ilejat u q’iie’ ti’ ijalpul u txumb’ale’ ti’ inachpu Tiixh. Tan jank’al uva’ nib’an unq’a uxhchile’ ti’ inachat Tiixh, as ti’ kuxh vichi’ole’ nitxakonkat, eche’ unq’a echb’ub’ale’ uva’ la uch techb’ule’, tuk’ unq’a a’e’ uva’ la uch tuk’ale’, as tuk’ uva’ kam la ulb’el ijosq’il unq’a aq’onb’ale’. As ye’ ni toleb’ ti’ ijikb’a’l u taanxelal unq’a uxhchile’.

¹¹ Pet ech koj cheel, tan kat ulyu ve’t u Cristo. As Aake’ ni aq’on u nimla b’a’nile’ sqe uva’ alel kan sqi’ ta’n u Tiixhe’, tan a’ u Cristo b’ooq’ol ti’ vib’ooq’ol unq’a oksan iyol tenam vatz Tiixh. As tetz Aak u tabernáculo uva’ nim talche’ ti’ u vatz tx’ava’illa tabernáculo, tan jit umaj naj b’anol tetz.

¹² As jit eela kat ib’an u Cristo tuk’ uva’ nib’an unq’a ib’ooq’ol oksan iyol tenam vatz Tiixh, tan unpajul kuxh kat ok u Cristo tu u Tiixhla atinb’ale’ ti’ ichooat u kupaave’ ti’ chit ib’ene’. As jit vikajal unq’a txul tooro’e’ as mita’n vikajal unq’a mam sik’e’ eq’omalik ta’n Aak, tul kat ok Aak tu u Tiixhla atinb’ale’. Pet a’ kuxh vikajal Aake’ eq’omalik sta’n. As ech iq’alput o’ Aak vatz u kupaave’ ti’ chit ib’ene’.

¹³ As eche’ vikajal unq’a txul tooro’e’, tuk’ vikajal unq’a mam sik’e’, as tuk’ vitza’ajil u txul b’aakae’ uva’ yuel tib’ tuk’ a’ uva’ nitzikul b’en vatz u nachb’al Tiixhe’, as ti’ kuxh vichi’ol unq’a uxhchile’ uva’ ye’ nik tuch tok vatz u nachb’al Tiixhe’ nitxakonkat unq’a avane’ ti’ uva’ b’a’n ve’t unq’a uxhchile’ la ib’ane’.

¹⁴ Asoj nitxakon vikajal unq’a avane’ tuk’ vitza’ajile’, ¿as a’ kol chit ye’ la ib’an vikajal u Cristo q’a? Tan nim talche’ vikajal Aake’ ti’ vikajal unq’a avane’. As tuk’ vib’a’nil u Tiixhla Espíritu, as kat toksa ok tib’ u Cristo vatz u Tiixhe’ eche’ tok umaj avan vatz Aak. As tul ye’l ipaav u Cristo ati. As kat taq’ tib’ Aak kamoj sqi’ ti’ teesat el unq’a va’lexhla txumb’ale’ uva’ laik eq’on o’ tu u kamchile’, aq’al uva’ la kunima ve’t u islich Tiixhe’.

¹⁵ As tul kat taq’ tib’ u Cristo kamoj sqi’, as kat ku’ Aak xo’l u tename’ tuk’ u Tiixhe’. Esti’e’ Aake’ k’ujb’a’n kan tetz uma’t u ak’ tzaq’it ti’ ik’ulat tib’ iyol u tename’ tuk’ u Tiixhe’. As tul atik u b’axa tzaq’ite’, as atiktel iyak’il u paave’. Pet tul kat kam u Cristo, as kat ul u ak’ tzaq’ite’, as kat isotzsa ve’t Aak u paave’. As ab’il uva’ kat imolo u Tiixhe’, as la ik’ul unq’a uva’ kat tal tzii u Tiixhe’ ste uva’ ye’l iya’teb’al.

¹⁶ As la val uma’l u yol sete, eche’ la ib’an umaj uxhchile’ uve’ kat tzaq’tik kan techanal la kami, as a’n la tootzi ve’t unq’a uxhchile’ u tetze’ uve’ kat tal kan

¹⁷ As tul ma’t ikam ve’t u uxhchile’, as kat tootzi ve’t unq’a uxhchile’ u tetze’ kam uva’ kat tal kan. Asoj isle’ltel u uxhchile’ as ye’ la uch tootzit unq’a uxhchile’ u tetze’.

¹⁸ As ech kat ib’an u txumb’ale’ uva’ k’ujlu ve’t kan ta’n u Tiixhe’ tuk’ u tename’ b’axa, tan techal kat kam ve’t unq’a avane’ ti’ tel ikajal.

¹⁹ As tul ma’tik talat kan u Moisése’ unq’a tzaq’ite’ skajayil te unq’a tename’, as kat itxey ve’t unb’iil vixi’l u kaneero’e’ uva’ kajuxike tuk’ uma’t u q’ab’ tze’ uva’ hisopo ib’ii. As kat ichiq’ ve’t ku’ xe’ u a’e’ uva’ yuel tib’ tuk’ vikajal unq’a tooro’e’ as tuk’ vikajal unq’a mam sik’e’. As kat itziku ve’t b’en ti’ u u’uje’ uva’ tz’ib’amalkat u tzaq’ite’ as tuk’ ti’ unq’a tename’ skajayil.

²⁰ As ech tal ve’t u Moisés ile’: «A’ vikajal unq’a avane’ nijejon kan u txumb’ale’ uve’ k’ujlu kan ta’n u Tiixhe’,» ti’k u Moisés.

²¹ As kat itziku ve’t b’en u Moisés u kaje’ ti’ u tabernáculo as tuk’ ti’ unq’a aq’onb’ale’ uve’ nik ib’anb’ele’ ti’ inachpu Tiixh.

²² As nimal unq’a vee’ uva’ kat ib’an ve’t b’a’n ta’n vikajal unq’a avane’, eche’ uva’ ni tal u tzaq’ite’. As ye’ koj kat el ikajal umaj uxhchil ti’ ikame’ as ti’ ichooat u paave’, as ye’l ipaav unq’a tename’ la sotzi.

A’ vikajal u Cristo kat el vatz u kurus as a’e’ ni sotzsan u paave’

²³ As eche’ u vatz tx’ava’illa tabernáculo tuk’ unq’a vee’ nik itxakonsale’ ti’ inachpu Tiixh, tan k’uchuvatz kuxhe’ nik ib’ane’ ti’ unq’a vee’ tu almika’. As kat oksal ok unq’a avane’ tzitzi’. As kat tzikul ve’t vikajale’ ti’ unq’a vee’ uva’ atik tzitzi’ ti’ teesal u va’lexhe’ sti’. Pet ech koj uva’ kat ib’an tu almika’, tan techal kat toksa ok tib’ uma’l u uxhchil uva’ at pal u tijle’me’ ti’ unq’a avane’, ti’ isotzsal ipaav unq’a tename’.

²⁴ As u tabernáculo uva’ kat ib’an unq’a uxhchile’, tan a’e’ ni b’anon ivaatzil u nachb’al Tiixhe’ tu almika’. As ye’l u Cristo kat ok stuul ti’ toksat tib’ vatz u Tiixhe’ sqi’. Pet a’ kat okkat Aak tu almika’ ti’ ijajat kuyb’al sqi’ te u Kub’aal Tiixhe’.

²⁵ As ye’l uva’ jatpajul kuxh koj kat ok u Cristo tu almika’ ti’ toksat tib’ sqi’, eche’ uve’ nib’an vib’ooq’ol unq’a oksan iyol tenam vatz Tiixh, tan jun yaab’ ni toke’ tu u Tiixhla atinb’ale’ tuk’ vikajal unq’a txooe’ uve’ jit tetz.

²⁶ As jun yaab’ koj ni tok u Cristo tu u Tiixhla atinb’ale’, as aya’x tzan ixe’t Aake’ ti’ ikame’ tul sichee u vatz tx’ava’e’. Pet jit’e’ch kat ib’an Aak, tan tu unq’a q’iie’ uva’ at o’ stuul cheel, as unpajul kuxhe’ kat ul Aak kamoj sqi’ ti’ chit ib’ene’ ti’ isotzsat el Aak u paave’.

²⁷ As ech kat ib’ane’ eche’ uva’ nib’an unq’a uxhchile’, tan k’ujlu ve’t kan uva’ pajul kuxh la kam umaj uxhchil. As a’n la b’anchu ve’t isuuchile’.

²⁸ As ech kat ib’an u Cristo, tan unpajul kuxh kat taq’ tib’ Aak kamoj. As nimal unq’a tename’ kat isotzsa Aak ipaav. As tul la ul u Jesús unpajte tika’pa, as jit ve’t u kupaave’ tul ichoo Aak. Pet ti’ teesat o’ Aak k’atz uve’ nijatxon kuxo’l tuk’ u Tiixhe’.

¹ As u tzaq’ite’ uva’ tz’ib’amal kan ta’n u Moisés, as ivaatzil unq’a nimla b’a’nile’ nib’ane’ uva’ la uli. As jit u nimla b’a’nile’ u tzaq’ite’, tan jit u tzaq’ite’ la jikb’a’n itxumb’al unq’a tename’, k’uxh ye’ niya’sa unq’a tename’ toksat ok unq’a avane’ vatz u Tiixhe’ tu jun yaab’ ti’ ijajat sotzb’al ipaav.

² As at koj sotzb’al ipaav unq’a tename’ ti’ inimat u tzaq’ite’, as la iya’sa ve’t unq’a tename’ toksat ok unq’a avane’ vatz u Tiixhe’. Tan asoj josq’imal ve’t u taanxelal unq’a tename’ ti’ chit ib’ene’, as la inach ve’t je’ unq’a tename’ ste uva’ ye’l ve’t ipaav vatz Aak.

³ Pet jit’e’che’, tan tul ni toksa ok unq’a tename’ unq’a avane’ vatz u Tiixhe’ tu jun yaab’, as ni tulsa unq’a tename’ sk’u’l uva’ at ipaav vatz Aak,

⁴ tan ye’ ni toleb’ vikajal unq’a txul tooro’e’ tuk’ vikajal unq’a mam sik’e’ ti’ isotzsal ipaav unq’a tename’.

⁵ Esti’e’ uva’ ech tal ve’t u Cristo ile’ te u Tiixhe’, tul kat ul Aak vatz u tx’ava’e’:

«As ye’ nasa’ unq’a avane’ tuk’ unq’a oye’ uva’ ni toksal ok savatz.

Pet kat aaq’ vunchi’ole’ ti’ uva’ la unnima tuk’ vunchi’ole’ kam uva’ la aal sve.

⁶ As ye’ kat ib’an see ti’ unq’a avane’ uve’ nitz’e’sal ok savatz ti’ ijajat unq’a tename’ sotzb’al ipaav.

As mita’n kat ib’an unq’a oye’ see uva’ ni toksal ok savatz.

⁷ Esti’e’ uva’ ech kat val ve’t ile’ see: –Il in ila’, Tiixh.

As kat ul in ti’ ul unb’anata’ kam uva’ ni tal aama svi’,

eche’ uva’ tz’ib’amal kan svi’ tu u u’uje’,– » ti’k u Cristo.

⁸ As k’uxh k’ujlu ve’t kan u tzaq’ite’ ti’ uva’ la tz’e’sal ok unq’a avane’ vatz u Tiixhe’, as ech kat tal u Cristo ile’:

As ye’ nasa’ unq’a avane’ tuk’ unq’a oye’ uve’ ni toksa unq’a tename’ savatz ti’ ijajat sotzb’al ipaav.

As ye’ kat ib’an see, ti’k Aak tal te u Tiixhe’.

⁹ As ech tal Aak ile’ unpajte:

Il in ila’, Kub’aal Tiixh.

As kat ul in ti’ ul unb’anata’ kam uva’ ni tal aama svi’, ti’k Aak.

As tul kat tal Aak u yole’, as kat teesa ve’t u Tiixhe’ u tzaq’ite’ uva’ atik b’axa. As kat ik’ujb’a’ ve’t kan Aak uma’t u tzaq’ite’.

¹⁰ As kat toksa ve’t o’ u Tiixhe’ jikla aamail ta’n u Jesucristoe’, tan eche’ uva’ ni tal taama u Tiixhe’ sqi’. As unpajul kuxh kat taq’ tib’ u Jesucristoe’ kamoj sqi’ ti’ chit ib’ene’.

¹¹ As ootzimal sqa’n uva’ jun q’ii ni taq’onvu oksan iyol tenam vatz Tiixh ti’ toksat ok unq’a avane’ vatz u Tiixhe’. As jatpajul kuxh ni toksa ok chajaak unq’a avane’ vatz Aak, k’uxh ye’ ni toleb’e’ ti’ isotzsal ipaav unq’a tename’.

¹² Pet ech koj u Cristoe’, tan unpajul kuxh kat toksa ok tib’ Aak vatz u Tiixhe’ ti’ chit ib’ene’ ti’ isotzsat Aak u kupaave’. As a’n kat xoneb’ ve’t Aake’ tiseb’al u Tiixhe’.

¹³ As nitx’eb’on Aak ti’ u q’iie’ uva’ techal la el iq’ii+ 10.13 A’ isuuchil u yole’ tu yolb’al griego: as at isuuchil junun unq’a yole’ uva’ ech ni tal ile’: u q’iie’ uva’ techal la aq’ax kan unq’a uxhchile’ jaq’ toj Aak. unq’a uxhchile’ skajayil uva’ nich’o’n taama ti’ Aak.

¹⁴ As tuk’ vib’a’nil u Jesucristo uva’ unpajul kuxh kat toksa ok tib’ vatz u Tiixhe’ ti’ isotzsat Aak u kupaave’, as kat toksa ve’t o’ Aak jikla aamail vatz u Tiixhe’ ti’ chit ib’ene’, jank’al o’ uva’ txaael ve’t o’ ta’n u Tiixhe’ ti’ qok sitenam Aak.

¹⁵ As echat ni tal u Tiixhla Espíritue’ sqi’, tan ech kat tal ile’ b’axa:

¹⁶ Ni tal u Kub’aal Tiixhe’ uva’:

«Tul ma’t ipal ve’t unq’a q’iie’, as ech ve’t u txumb’al ile’ la unk’ujb’a’ kan xo’l vuntename’:

As la voksa ve’t vunyole’ tu u taanxelale’ tuk’ tu vitxumb’ale’,» ti’k Aak.

¹⁷ As ech ni tal uma’t u yol ile’ uva’ tal kan Aak:

«As la unsotzsa ve’t ipaav vuntename’ sunk’u’l tuk’ u paasan tziile’ uve’ nib’ane’, taq’ Aak,» ti’k u Tiixhla Espíritu.

¹⁸ As tul uva’ kat sotz ve’t u kupaave’ tuk’ u kupaasan tziile’, as ye’l ve’t uma’toj kam la oksal ve’t ok vatz u Tiixhe’ ti’ isotzsal u kupaave’.

¹⁹ Esti’e’ ni val sete, vitz’in vatzik, uva’ ib’a’nil kuxh u Jesucristoe’ uva’ kat el vikajale’ sqi’, as at ve’t qokeb’al tu u Tiixhla atinb’ale’ tu almika’,

²⁰ tan kat taq’ ve’t u Jesucristo qokeb’al ti’ uva’ at ve’t kutiichajil k’atz u Tiixhe’. As ech kat ib’an Aake’ sqi’ tul kat yatz’ax Aak vatz u kuruse’. As kat q’ixmik ku’ tzan u ixb’u’je’ uva’ atik ok tu u tostiixhe’, texhlal tetz uva’ kat taq’ ve’t Aak qokeb’al tu u Tiixhla atinb’ale’ tu almika’.

²¹ As a’ u Jesucristo u nimla q’esal oksan tetz kuyol vatz Tiixh, jank’al o’ uva’ o’ ime’al ik’aol u Tiixhe’.

²² Esti’e’ uva’ aya’loj chit kuk’u’l la kujetz’e ok qib’ k’atz u Tiixhe’. As ye’ la ka’kab’in qaama ti’ kuk’ujb’a’t kuk’u’l ti’ Aak, tan eesamal ve’t u va’lexhe’ tu u qaanxelale’ ta’n Aak. As nu kunache’ uva’ sotzsamal ve’t u kupaave’. As kat ku’ o’ xe’ u a’e’, texhlal tetz uva’ josq’imal ve’t u qaanxelale’ ta’n Aak.

²³ As kuchab’ata kuk’ujb’a’t kuk’u’l ti’ Aak. As ye’ la ka’kab’in qaama ti’ kutx’eb’at u nimla b’a’nile’ uva’ k’ujle’l kuk’u’l sti’ eche’ uva’ ni qal te unq’a tename’, tan la chit ib’an Aake’ kam uva’ altzi’mal kan sqi’ ta’n Aak.

²⁴ As kuchuktaj txumb’al ti’ kulochat qib’ sukuvatzaj, as ti’ kuxo’nit qib’ sukuvatzaj, as ti’ kub’anat u b’a’ne’.

²⁵ As ye’ la kub’an qetz eche’ nib’an unq’a uxhchile’ uva’ ye’ ni tex tu u atinb’ale’ tetz nachb’al Tiixh. Pet aal la kuyak’insa qib’ sukuvatzaj ti’ uva’ la kub’an u b’a’ne’, tan ootzimal sqa’n uva’ b’iit kuxh ilejat u q’iie’ uva’ la ul u Jesús unpajte.

Nib’eyal te unq’a uxhchil ti’ uva’ ye’ la paavini

²⁶ Tan asoj tzaa chit ve’t sqe uva’ la paavin o’ tul uva’ ma’t qootzit isuuchil u yole’ uva’ a’ u Jesucristo kat choon u kupaave’, as ye’l ve’t uma’toj kam la uch kub’anata’ ti’ ichooax u kupaave’.

²⁷ Pet xo’veb’al chit uva’ nitx’eb’on sqi’ tul la ib’an u Tiixhe’ kusuuchil. As at uma’l u xamal uva’ xo’veb’al chittu’ nitx’eb’on ti’ unq’a uxhchile’ ti’ isotzsal ivatz uva’ ni ixvan u Tiixhe’.

²⁸ As ni val sete tan xo’veb’al chit tatin u uxhchile’ uva’ ni ixvan u Tiixhe’, tan ab’il uva’ ye’ kat niman u tzaq’ite’ uva’ tz’ib’amal kan ta’n u Moisés, as techal la kami, asoj at ka’vo’j moj oxvo’j uxhchil uva’ la alon isuuchil vipaav u uxhchile’ vatz u b’anol isuuchil unq’a tename’.

²⁹ Pet nim chite’ u k’axk’oe’ la ul ti’ unq’a uxhchile’ uva’ ni ixvan viK’aol u Tiixhe’ ti’ uva’ kat ul ti’ unq’a tename’ uva’ na’ytzan, tan antu ve’t viK’aol u Tiixhe’ ni tixva u uxhchile’. As nik’uch u uxhchile’ tuk’ vitxumb’ale’ uva’ ye’l itxa’k vikajal viK’aol u Tiixhe’ uva’ kat k’ujb’a’n kan u ak’ tzaq’ite’ ti’ toksal unq’a uxhchile’ jikla aamail. Techal la ul u k’axk’oe’ ti’ u uxhchile’, tan niyoq’on ti’ u Tiixhla Espíritu uva’ ni aq’on vib’a’nil u Tiixhe’ sti’.

³⁰ As ootzimale’ sqa’n uva’ ech kat tal u Tiixh ile’:

Ine’ la b’anon ich’exel te unq’a uxhchile’ uve’ ni b’anon u va’lexhe’.

As ine’ la aq’on ich’exel ste, ti’k Aak.

As ech tal Aak ile’ unpajte:

Ine’ la b’anon isuuchil vuntename’, ti’k Aak.

³¹ ¡As xo’veb’al chite’ u k’axk’oe’ uva’ la ul ta’n u islich Tiixhe’ ti’ u uxhchile’ uva’ ni b’anon u va’lexhe’!

³² As la val sete, ye’ la ka’kab’in etaama. As etulsataj sek’u’l kam unq’a k’axk’oe’ uva’ kat epaleb’e b’axa, tul a’n nalik kuxh ijalpu etxumb’al, tan k’uxh mama’la k’axk’o kat epaleb’e, as kat ekuy ve’te’.

³³ As at ex uva’ vatz chit unq’a tename’ kat yoq’pukat ex ta’n unq’a uxhchile’ uve’ nich’o’n taama seti’. As kat tilul ex. As atix ib’ana uva’ antu ve’t ex kat paleb’en u k’axk’oe’ tuk’ unq’a emoole’, tul uva’ kat ipaleb’e unq’a k’axk’oe’.

³⁴ As kat etxum ve’t ivatz unq’a emoole’ tul kat ok tu u kaarsa. As tul kat maap ve’t unq’a etetze’, as ye’ kat txumun ve’t ex. Pet aal kat chiib’ ve’t ex, tan at sek’u’l uva’ at etetz tu almika’ uva’ aal b’a’n ti’ uve’ at vatz u tx’ava’e’. As a’e’ ye’ la pal iyak’il.

³⁵ Esti’e’ uva’ ni val sete, ejalpuk etxumb’al ti’ u k’ujleb’al ek’u’le’ ti’ u Tiixhe’, tan ti’ u k’ujleb’al ek’u’le’ la aq’pukat vetx’aja’me’.

³⁶ As techal chite’ uva’ ye’ la pal ek’u’l ti’ ekuyat unq’a k’axk’oe’, tan tul ma’t ekuyat unq’a k’axk’oe’ eche’ uva’ nisa’ u Tiixhe’ seti’, as la aq’pu ve’t u tx’aja’me’ sete uva’ alel kan ta’n Aak.

³⁷ As ech ni tal viyol u Tiixh ile’ uva’ tz’ib’amal kan:

As b’iit kuxh ilejat ve’t u q’iie’ uva’ la ul u uxhchile’ uva’ alel kan u tuleb’ale’.

As ye’ la b’alaxi ti’ u tuleb’ale’.

³⁸ As ab’il uva’ k’ujle’l ik’u’l svi’ as jik itxumb’al nib’ane’,

as at itiichajil sunk’atz.

Pet asoj ech vitxumb’ale’ la ib’ane’ eche’ uva’ nik ib’an b’axa,

as ye’l in la chiib’ in sti’, ti’k u Tiixhe’.

³⁹ Pet ech koj o’, tan jit’e’ch la kub’ane’ eche’ nib’an ka’t unq’a uxhchile’ uva’ niq’aav ti’ inimata’ kam uva’ nik ib’an b’axa. As a’ unq’a uxhchile’ uva’ ye’ la sotz ipaav. Pet ech koj o’, tan k’ujle’l kuk’u’l ti’ viK’aol u Tiixhe’. As at ve’t u kutiichajile’ k’atz u Kub’aal Tiixhe’.

U k’ujleb’al ik’u’l unq’a q’esla chaj txutx b’aala uva’ na’ytzan

¹ As a’ isuuchil u k’ujleb’al k’u’le’ uva’ techal la b’anchu u b’a’nile’ uva’ nu kutx’eb’e’. As k’uxh ye’ na’l sukuvatz cheel, as ootzimal sqa’n uva’ nitx’eb’on ve’t sqi’.

² As eche’ uva’ kat ib’an unq’a q’esla chaj txutx b’aalae’, tan ti’ uva’ k’ujlik chit ik’u’l chajaak ti’ u Tiixhe’, as b’a’n ve’t iyolb’el chajaak ta’n u Tiixhe’.

³ As ti’ uva’ k’ujle’l chit kuk’u’l ti’ u Tiixhe’, as ni qootzi ve’te’ uva’ tuk’ kuxh viyol Aake’ as kat chee u almika’e’ tuk’ u vatz tx’ava’e’ skajayil. As jank’al unq’a vee’ uva’ ni qile’, as a’ kat tzaakat xo’l unq’a vee’ uva’ ye’ na’like.

⁴ As eche’ uva’ kat ib’an u Abel tan k’ujlik chit ik’u’l ti’ u Tiixhe’, as kat toksa u oye’ uva’ nim talche’ ti’ u tetz u Caíne’ vatz u Tiixhe’. As b’a’n ve’t iyolb’el u Abele’ ta’n Aak, tan kat ik’ul Aak u oye’ uva’ kat toksa u Abele’ vatz Aak. As k’uxh kamnal ve’t u Abel, as nitel ichus o’ cheel ti’ kuk’ujb’a’t kuk’u’l ti’ u Tiixhe’.

⁵ As echat kat ib’an u Enoc, tan ti’ uva’ k’ujle’l ik’u’l ti’ u Tiixhe’, as ye’ kat pal tu u kamchile’. As ye’xheb’il kat ilon ve’te’, tan ma’tik teq’ol ve’t ta’n u Tiixhe’. As tul ye’xnik eq’ol u Enoc, as b’a’nik ve’t iyolb’ele’ ta’n Aak.

⁶ Asoj ye’ la ik’ujb’a’ umaj uxhchil ik’u’l ti’ u Tiixhe’, as ye’l Aak la txuq’txun sti’. Tan ab’il uva’ la isa’ toksat tib’ k’atz Aak, as techal la inima uva’ at Tiixh as la taq’ Aake’ itx’aja’m u uxhchile’ uve’ la toksa taama ti’ Aak.

⁷ As ti’ uva’ k’ujle’l ik’u’l u Noé ti’ u Tiixhe’, as kat ib’an ve’t uma’l u arca ti’ ikolat tib’ vatz u k’axk’oe’ tuk’ unq’a tatine’. As tul kat tal ve’t u Tiixhe’ ste kam uva’ la uli, as kat ixo’va ve’t u Noé u Tiixhe’. As k’uxh ye’ atixoj til u Noé kam uva’ tal u Tiixhe’ ste uva’ la uli, as kat inima ve’t u Noé. As kat ok ve’t jikla aamail ta’n u Tiixhe’. As tuk’ u k’ujleb’al ik’u’l u Noé, as kat tal ve’t isuuchil te unq’a tename’ uva’ techal la ul u k’axk’oe’ ti’ unq’a tename’ uva’ ye’ ni niman u Tiixhe’.

⁸ As ti’ uva’ k’ujlik chit ik’u’l u Abraham ti’ u Tiixhe’, as kat inima ve’t yol tul uva’ kat imolo ve’t u Tiixhe’ u Abrahame’ ti’ tel ch’u’l tu u tename’ uva’ atikkat. As k’uxh ye’ tootzaj u Abraham u tx’ava’e’ uva’ la oonkat, as kat b’en ve’te’ ti’ uva’ la tetzi ve’t u tx’ava’e’ ta’n u Tiixhe’.

⁹ As ti’ uva’ k’ujlik ik’u’l u Abrahame’, as kat b’ex jejeb’oj tu u tx’ava’e’ uva’ kat taltzi’ u Tiixhe’ ste. As kat atin tu unq’a lakich pache’, texhlal tetz uva’ ech ve’te’ eche’ umaj ulnaj tzaanaj kat b’ex ib’ana. As echat kat ib’an u Isaac tuk’ u Jacob, tan echat kuxh u yole’ kat tal Aak ste.

¹⁰ As a’ nik itx’eb’ u Abrahame’ ik’ujb’a’l u b’a’nla tename’ uva’ ye’ la e’pi, eche’ umaj kab’al uva’ chab’amal ik’ujeb’e’ vi’ u tz’aje’, tan a’ u Tiixhe’ la k’ujb’a’n, tan Aake’ cheesan tetz.

¹¹ As ti’ uva’ k’ujlik chit ik’u’l u Sara ti’ u Tiixhe’, as k’uxh ma’tik iq’esb’u ve’te’ as k’uxh ye’ nik talane’, poro kat yak’in ve’t vichi’ole’ ta’n u Tiixhe’.+ 11.11 As jalel tib’ unq’a yole’ tu u O’t Testamento ti’ u Abraham tuk’ u tixqele’ uva’ Sara as ti’ uva’ ab’iste chajaak kat chee iyak’il vichi’ole’, tan ati uva’ ech ni tal ile’: «As ti’ uva’ k’ujle’l ik’u’l u Sara ti’ u Tiixhe’, as k’uxh ma’tik iq’esb’u ve’te’ as ye’ nik talane’, as kat yak’in ve’t vichi’ole’ ta’n u Tiixhe’,» ti’k u yole’. As kat itz’eb’ ve’t uma’l u tal u Sara, tan nik inima u Sara tuk’ u Abraham uva’ la chit ib’an u Tiixhe’ kam uva’ altzi’mal kan ste ta’n Aak.

¹² As tul b’iitik kuxh ikam ve’t u Abrahame’, as tuk’ u k’ujleb’al ik’u’le’ as kat nitxa’in ve’te’. As ech ve’t tachul unq’a tiaale’ eche’ tachul unq’a tx’umile’ uva’ at tu almika’ as tuk’ unq’a sanab’e’ uve’ at tzi’ u mar uva’ ye’xheb’il la oleb’ ti’ tachpe’.

¹³ As jank’al unq’a uxhchile’ uve’ kat kuyolb’ela’, as k’ujlik chit ik’u’l ti’ u Tiixhe’. As kat kami. As ech kat tal ve’t ile’: «Ulnaj tzaanaj kuxh o’e’ vatz u tx’ava’e’,» ti’ke, tan jit ik’ul u nimla b’a’nile’ uva’ altzi’mal kan ta’n u Tiixhe’. As ech ve’t unq’a nimla b’a’nile’ vatz unq’a uxhchile’ eche’ umaj kam uva’ naach kuxh ni tilkat b’en. As nitxuq’txun ve’t sti’.

¹⁴ As tul uva’ kat tal unq’a uxhchile’ eche’ u vee’, as ni tal isuuchil sqe uva’ nik ichuk uma’l u tatinb’al uva’ la atinkat.

¹⁵ As kat koj titz’a iq’aavik b’en tu vitx’ava’e’ uve’ elkat ch’u’l, as la uch iq’aavik b’ene’ tu vitx’ava’e’.

¹⁶ Pet jit’e’ch kat ib’ana, tan a’ nik isa’ uva’ la b’en jejeb’oj tu uma’t u atinb’al uva’ nim talche’ ti’ uva’ atikkat. As b’a’nik vatz u Tiixhe’ ti’ uva’ la tal unq’a uxhchile’ uva’ Tiixh Aak. As kat ib’an ve’t Aak tuch tatinb’al unq’a uxhchile’.

¹⁷ As ti’ uva’ k’ujlik ik’u’l u Abraham ti’ u Tiixhe’, as kat inima tul uva’ kat tal u Tiixhe’ ste uva’ la toksa ok vik’aole’ vatz Aak, k’uxh ta’n chite’ unch’i’til. As aalik chit iyatz’at ve’t u Abraham vik’aole’, k’uxh ma’tik ichiib’ u Abraham ti’ unch’i’til vik’aole’ uva’ Isaac ib’ii.

¹⁸ As k’uxh ech ma’tik talat u Tiixh ile’ te u Abrahame’: «K’atz vak’aole’ uva’ Isaac la elkat ch’u’l unq’a aviaale’,» ti’k Aak ste, as inima u Abraham viyol Aake’,

¹⁹ tan kat titz’a ve’t u Abraham uva’ k’uxh laik iyatz’ vik’aole’ vatz u Tiixhe’, as at iyak’il u Tiixhe’ ti’ tulsat taama vik’aole’ unpajte. As vatz u Abraham as eela kuxh stuk’ uva’ kat kam vik’aole’ as kat ul taama unpajte.

²⁰ As ti’ uva’ k’ujlik chit ik’u’l u Isaac ti’ u Tiixhe’, as taq’ ve’t kan u Isaac u b’a’nile’ ti’ unq’a ik’aole’, u Jacob tuk’ u Esaú. As kat tal ve’t u Isaac isuuchil te chajnaj ti’ uva’ kam la til chajnaj uva’ xamtel.

²¹ As ti’ uva’ k’ujlik chit ik’u’l u Jacob ti’ u Tiixhe’, as tul unb’iitik kuxh ikam ve’te’, as taq’ ve’t kan u Jacob vib’a’nile’ ti’ junun vik’aol u Xhu’le’. As tul b’a’nxi, as ixi’a ve’t tib’ ti’ vikarootee’. As toksa ve’t iq’ii u Tiixhe’.

²² As ti’ uva’ k’ujlik chit ik’u’l u Xhu’le’ ti’ u Tiixhe’, as tul unb’iitik kuxh ikam ve’te’, as tal ve’t kan te unq’a titz’in tatzike’ uva’ la chit ilej uma’l u q’ii uva’ la el ve’t ch’u’l unq’a tiaale’ tu u Egipto. As tal ve’t kan u Xhu’le’ unpajte uva’ la eq’ol el vib’ajile’ tu u Egipto.

²³ As ti’ uva’ k’ujlik chit ik’u’l u txutx ib’aal u Moisés ti’ u Tiixhe’, as oxva’l ich’ uva’ imuj ve’t chajaak u Moisés tul ne’nalike, tan til chajaak uva’ acha’vik chit u Moisés tul itz’eb’i. As ye’ kat xo’v chajaak ti’ u yole’ uva’ alel ta’n u ijlenaale’ ti’ uva’ la mox yatz’ax unq’a ne’e’.

²⁴ As tul ok ve’t u Moisés najil, as k’ujlik chit ik’u’l ti’ u Tiixhe’. As ye’ nik isa’ uva’ la tal unq’a tename’ sti’ uva’ itxutx u Moisés vime’al u ijlenaale’.

²⁵ Pet a’ nik isa’ u Moisés uva’ eela tixvale’ tuk’ unq’a imoole’ uva’ tiaal Israel uva’ itenam Tiixh. As ye’ nik isa’ u Moisés ipaavine’ ti’ tatin k’atz u ijlenaale’ tu u Egipto ti’ u chiib’ichile’ uva’ palchil kuxhtu’,

²⁶ tan a’ik u tx’aja’me’ uve’ la taq’ u Tiixhe’ ste, as a’e’ uva’ nik titz’a u Moisés. Esti’e’ uva’ kat tixva ve’t kan unq’a nimla tx’iib’al q’iie’ uva’ laik tetzi tu u Egiptoe’. As aal b’a’nik ste uva’ la ipaleb’e u k’axk’oe’ tuk’ unq’a imoole’, tan atik sk’u’l uva’ la ul u Jesús uva’ alel kan u tuleb’ale’ ta’n u Tiixhe’.

²⁷ As ti’ uva’ k’ujlik chit ik’u’l u Moisés ti’ u Tiixhe’, as kat taq’ ve’t kan u Moisés u Egipto. As ye’ kat xo’v ve’te’ tul kat ul ivi’ u ijlenaale’ sti’. As ye’ kat ka’kab’in taama, tan eela kuxh stuk’ uva’ nik til u Moisés u Tiixhe’, k’uxh ye’ na’lik Aak svatz.

²⁸ As ti’ uva’ k’ujlik chit ik’u’l u Moisés ti’ u Tiixhe’, as kat inima ve’t u Moisése’ u yole’ ti’ uva’ la kolax vitenam u Tiixhe’ vatz u kamchile’ tul kat tzikul ok vikajal unq’a avane’ tzi’aj vikab’ale’, aq’al uva’ ye’ la kam unq’a b’axa ik’aol unq’a itenam u Tiixhe’ ta’n u yatz’ol aamae’.

²⁹ As ti’ uva’ k’ujlik chit ik’u’l unq’a itenam u Tiixhe’, as kat icheesa Aak b’ey tu u mar tul kat pal ve’t unq’a tename’ tu u mar uva’ Kaj Mar ib’ii. Pet ech koj unq’a aa Egipto, tan tul kat tal ipal tu u mar, as kat ijup ve’t tib’ u mar sti’. As kat kam ve’te’.

³⁰ As ti’ uva’ k’ujlik chit ik’u’l unq’a itenam u Tiixhe’, as vujva’l q’ii isuturit tib’ ti’ u tename’ uva’ Jericó. As kat e’p ve’t unq’a tz’aje’ uva’ atik ve’t ok ti’ u tename’.

³¹ As u yana’sla ixoj uva’ Rahab, as ik’ujb’a’ ve’t ixoj ik’u’l ti’ u Tiixhe’, as ye’ kat kam ve’te’ tul uva’ kat kam unq’a paasan tziie’ uve’ atik tu u Jericó, tan ti’ uva’ kat ib’an ixoj b’a’nil te unq’a uxhchile’ uva’ kat b’ex ilon kam b’an ta’n u tename’ uva’ Jericó.

³² As b’iit kuxh u yole’ la val sete ti’ ka’t unq’a uxhchile’, tan nimatel kuxh la teq’o ti’ valat isuuchil u yole’ ti’ uva’ kam kat ib’an u Gedeón, tuk’ u Barac, tuk’ u Sansón, tuk’ u Jefté, tuk’ u David, tuk’ u Samuel, as tuk’ unjoltu unq’a q’ajsan tetz viyol u Tiixhe’.

³³ As ti’ uva’ k’ujlik chit ik’u’l vitenam u Tiixhe’ uva’ na’ytzan, as ati kat tx’akoni ti’ ka’t unq’a tename’ tu u ch’a’oe’; as ati uva’ jik chit itxumb’al kat ib’ana tul atik jaq’ u tijle’m u Tiixhe’. As kat tetzi ve’t uva’ alel kan ta’n u Tiixhe’. As at uxhchil uva’ tul kat oksal xo’l unq’a b’alame’, as kat juplu ve’t itzi’ txoo ta’n u Tiixhe’, aq’al uva’ ye’l txoo la chi’on ve’te’.

³⁴ As ati uva’ kat oksal ve’t tu mam xamal. As ye’ kat tz’e’i. As ati uva’ kat alax iyatz’pe’ ta’n ch’ich’. As ye’ kat oleb’ unq’a uxhchile’ ti’ iyatz’pe’. As ati uva’ unb’iil kuxh iyak’il vichi’ole’ kat ib’ana. As kat yak’insal ve’te’ ta’n u Tiixhe’. As at unq’a uxhchile’ uva’ atik ve’t iyak’il ta’n Aak tul kat ib’an ch’a’o ti’ uma’t tenam. As ati uva’ kat oleb’ ti’ itilut el visol unjoltu unq’a tename’ uva’ nik ib’an ch’a’o stuk’.

³⁵ As at ixoj uva’ kat kam unq’a tatine’. As kat ul taama unpajte ta’n u Tiixhe’.

Pet ech koj unjoltu unq’a uxhchile’, tan ati uva’ kat q’ospi techal kat kami. As ye’ kat isa’ uva’ la eesal vatz u k’axk’oe’, tan a’ nik isa’ uva’ b’a’n ve’t tatine’ la ib’ane’ tul la ul taama unpajte ta’n u Tiixhe’.

³⁶ As at uxhchil uva’ mama’la yoq’o’m kat alpu ste; as ati kat q’ospi ta’n tz’u’m; as ati kat k’alpi ta’n kateena; as ati kat oksal tu u kaarsa;

³⁷ as ati uva’ kat yatz’pu ve’t ta’n k’ub’; as ati kat quxpi ta’n ch’ich’. As ka’va’l kat el stuul. As nik ichukax txumb’al sti’ ti’ uva’ la iya’sa inimat u Tiixhe’, tan ati kat yatz’pu ta’n ch’ich’. As ati uva’ katil kuxh kat vatkat ve’te’. As ati uva’ visale’yil unq’a kaneero’e’ tuk’ visale’yil unq’a sik’e’ nik toksa tan meeb’a’ik chittu’. As nik ipaleb’e k’axk’o, tan nik itilule’. As nik ik’axb’isale’.

³⁸ As ati uva’ kat kuxh xaan ve’te’ tulaj kaanaj tx’ava’, as tulaj tx’akab’e’n, as tulaj jul, as xo’laj vitz uva’ k’axk’o chit tatine’, tan a’ nik tal unq’a uxhchile’ uva’ ni ixvan u Tiixhe’ uva’ ye’ la uch tatin unq’a niman tetz u Tiixhe’ xo’l chajnaj. As tul nim talche’ unq’a niman tetz u Tiixhe’ ti’ unq’a uxhchile’.

³⁹ As k’uxh k’ujlik chit ik’u’l ti’ u Tiixhe’, as ye’ kat ik’ul chajaak u nimla b’a’nile’ uva’ altzi’mal kan ta’n u Tiixhe’.

⁴⁰ As a’ u b’a’ne’ nisa’ u Tiixhe’ sqi’, tan Tiixh kat b’anon uva’ at ve’t u b’a’nile’ sqi’ tuk’ ti’ unq’a q’esla kub’aale’, aq’al uva’ eela kuk’ulat ve’t u b’a’nile’ tuk’ chajaak.

Nib’eyal te unq’a tiaal Israel ti’ uva’ la ichab’a ik’ujb’a’t ik’u’l ti’ u Jesús

¹ Esti’e’ ni val sete, vitz’in vatzik: O’ uva’ nimal unq’a k’uchb’al tetz u k’ujleb’al ik’u’l unq’a q’esla kub’aale’ kat ik’uch kan sukuvatz, as kub’antaj eche’ uva’ kat ib’an chajaak. As qaq’taj kan unq’a paave’ uva’ ni majon kuvatz ti’ kuk’ujb’a’t kuk’u’l ti’ u Jesús, eche’ umaj uxhchil uva’ ye’xhkam ni majon ivatz ti’ tooje’le’ ti’ itx’akat umaj tx’aja’m. As kukuytaj kupaleb’et unq’a k’axk’oe’, jank’al uve’ aq’el sqe ta’n Aak ti’ uva’ la kupaleb’e.

² As ye’ la kuya’sa qitz’at u Jesús, tan Aake’ kat k’uchun b’axa ti’ uva’ kam kuk’ujb’a’t kuk’u’l ti’ u Tiixhe’. As Aake’ kat aq’on qokeb’al k’atz u Tiixhe’ ta’n u k’ujleb’al kuk’u’le’. As tul kat aq’ax je’ Aak vatz u kuruse’ ti’ ikame’, as kat ikuy Aak u k’axk’oe’. As ye’ kat toksa Aak stuul uva’ kat ch’ixvisal Aak, tan atik sk’u’l Aak uva’ tul ma’t ipaleb’et Aak u k’axk’oe’ vatz u kuruse’, as la txuq’txun ve’t Aak ti’ u nimla b’a’nile’ uva’ la taq’ Aak sqe. As nim ve’t talchu Aak tul kat xoneb’ ve’t Aak tiseb’al u b’a’nla xonleb’ale’ uva’ xonle’lkat u Tiixhe’.

³ As etitz’ataj uva’ kat ib’an u Jesúse’, aq’al uva’ ye’ la pal ek’u’l as ye’ la txumun etaama tul uva’ la yoq’pu ve’t ex, tan mama’la k’axk’o kat ipaleb’e Aak tul uva’ kat yoq’pu ve’t Aak ta’n unq’a b’anol va’lexhe’.

⁴ As eche’ ex, k’uxh nepaleb’e unq’a k’axk’oe’ ta’n unq’a uxhchile’ uva’ ni b’anon u va’lexhe’ sete, as ye’l umaj ex kamoj ex ta’n u k’axk’oe’.

⁵ As kat esotzsal u yole’ sek’u’l uva’ tz’ib’amal kan uva’ ni aq’on etxumb’al eche’ ib’eyat umaj b’aala te ik’aol. As ech ni tal u yol ile’:

Unk’aol, as ye’ la ib’ane’ uva’ jit kuxh latz’ unq’a yole’ see’,

tul la ib’eya u Kub’aal Tiixhe’ see.

As mita’n la ka’kab’in aama, tul uva’ la iyaa axh Aak,

⁶ tan nib’eya Aak te unq’a uxhchile’ uva’ xo’n te Aak.

As ab’il uva’ ni toksa ve’t Aak sme’al ik’aolil,

as nijikb’a’ Aak ti’ uva’ la ib’an u b’a’ne’, ti’k u yole’.

⁷ As u k’axk’oe’ uva’ nepaleb’e as nekuye’, as ech neb’ane’ eche’ nib’an umaj me’al k’aol, tul uva’ nib’eyal ste ta’n vib’aale’. As echat ni tulb’e ex u Tiixhe’, aq’al uva’ jik etxumb’al la ib’ane’.

⁸ Pet asoj ye’ la b’eyal sete ta’n u Tiixhe’ eche’ nib’an Aak te unq’a me’al ik’aole’ skajayil, as jit ex me’al ik’aol Aake’ b’a. Pet ech exe’ eche’ umaj uxhchil uva’ ye’ ootzimal ib’aal sta’n.

⁹ As tul uva’ nik ijikb’a’ u kub’aale’ u kutxumb’ale’ uva’ at vatz tx’ava’, as nu kunima u kub’aale’. ¿As a’ kol ye’ la kunima ve’t u Tiixhe’ q’a uva’ aq’ol tetz u qaanxelale’, ti’ uva’ at ve’t kutiichajil k’atz Aak?

¹⁰ As u kub’aale’ uva’ at vatz tx’ava’, as ye’xh jatva’l q’ii kat ib’eya chajaak sqe ti’ uva’ la kub’ane’ ab’iste u b’a’ne’ uva’ nisa’ chajaak sqi’. As ech koj u Tiixhe’ tan tul nib’eya Aak sqe, as sqi’e’ la txakonkat, aq’al uva’ ech ve’t u kutxumb’ale’ eche’ vitxumb’al Aake’.

¹¹ As ye’ nu kusa’ tul nib’eyal sqe, tan ye’ b’a’n sqe. Pet asoj la kunima tul la b’eyal sqe, as b’a’n la b’en ib’an sqe. As jik ve’t u kutxumb’ale’ la ib’an sta’n. As b’a’n qatin sukuvatzaj la ib’ane’.

Ye’ la ixval vib’a’nil u Tiixh

¹² As etaq’taj yak’il ti’ inimal u Jesúse’, eche’ taq’at umaj uxhchil yak’il ti’ ixaane’ uva’ ye’ ve’t iyak’il viq’ab’e’ tuk’ u toje’ ninache’.

¹³ As ek’ajtaj etib’ ti’ u jikla txumb’ale’ eche’ ik’ajat tib’ umaj ko’x tu umaj jikla b’ey, ti’ uva’ ye’ la itxiknisa u toje’ uva’ k’axb’inale. Pet aal la txani tu u b’a’nla b’eye’.

¹⁴ As b’a’noj etatine’ tuk’ unq’a tename’ skajayil. As aya’loj chit ek’u’l ti’ eb’anat u b’a’ne’ ti’ uva’ ex ve’t tetz u Tiixhe’, tan ab’il uva’ jit aya’l ik’u’l ti’ ib’anat u b’a’ne’, as ye’ la til tib’ tuk’ u Tiixhe’.

¹⁵ As etiltaj etib’ sevatzaj, aq’al uva’ ye’l umaj ex la kaaik kan ex ti’ vib’a’nil u Tiixhe’ as ye’l umaj uxhchil la chee sexo’l uva’ la eesan ex ti’ enimat u Jesúse’, tan nimal ex uva’ la yan ve’t vetxumb’ale’ as la b’en ve’t ex tu u va’lexhe’ sta’n.

¹⁶ As etiltaj etib’ sevatzaj, aq’al uva’ ye’l umaj ex la eb’an etetz eche’ uva’ kat ib’an u Esaú uva’ kat iyansa tib’ vatz u Tiixhe’, tan ye’lik itxumb’al. As k’uxh atzika u Esaú, as ti’ kuxh uma’l u echb’ub’al, as kat ik’ayi ve’t ok unq’a tetze’ te u titz’ine’ uva’ Jacob.

¹⁷ As ootzimale’ seta’n uva’ xamtel kat tal ve’t u Esaú te vib’aale’ uva’ la taq’ aak u b’a’nile’ sti’. As k’uxh mama’la oq’el kat ib’an u Esaú tul kat ijaj u b’a’nile’ te vib’aale’, as ye’ kat uch ijalput aak viyole’, tan ma’tik taq’at aak te u itz’inae’.

¹⁸ As ni val sete uva’ jit’e’ch kat eb’ana tul kat etoksa etib’ ti’ enimat u ak’ txumb’ale’ eche’ kat ib’an unq’a q’esla eb’aale’ uva’ na’ytzan. As ye’ kat ejetz’e ok etib’ k’atz umaj vitz uva’ la uch ikanpe’ uva’ nik toypu xamal sti’ uva’ atikkat u toktoe’ tuk’ u mam kajiq’e’.

¹⁹ As ye’ kat etab’i ve’t toq’ umaj trompeta. As mita’n umaj tuul vi’ kat etab’i eche’ uva’ kat ab’il na’ytzan. As jank’al unq’a tename’ uva’ kat ab’in u tuul vi’e’, as tuk’ chit xo’vichil kat ijaj ve’t b’a’nil ti’ uva’ ye’l ve’t ka’toj yol la alpu ste,

²⁰ tan ti’ uva’ ye’ nik itx’ak ve’t unq’a tename’ u yole’ uva’ ech nik tal ile’:

Ab’il uva’ la pach’on u vitze’ as k’uxh avan,

as la sutil ve’t ta’n k’ub’. As techal la kami, ti’k u yole’.

²¹ As xo’veb’al chit uve’ kat ik’uch tib’ vi’ u vitze’. Esti’e’ uve’ ech tal ve’t u Moisés ile’: «Va’l chit unt’unt’uch ve’te’ ta’n xo’vichil,» ti’k u Moisése’.

²² Pet ech koj ex, vitz’in vatzik, tan a’ kat okkat ex k’atz u vitze’ uva’ Sion tu u tename’ uva’ Jerusalén uva’ echen tu almika’, vitenam u islich Tiixhe’ uva’ atkat unq’a ángel uva’ ye’l tachul ati uva’ molel tib’ tuk’ mam chiib’ichil.

²³ As kat ok ex xo’l vitenam u Tiixhe’ uva’ b’axel kat niman u Jesús. As a’e’ uva’ tz’ib’amal ve’t vib’iie’ tu almika’. As kat ok ex k’atz u Tiixhe’ uva’ la b’anon isuuchil unq’a tename’ skajayil vatz u tx’ava’e’, as k’atz unq’a q’esla chaj b’aalae’ uva’ kat k’ulun u nimla b’a’nile’ ta’n u Jesúse’.

²⁴ As kat ok ve’t ex k’atz u Jesúse’, tan a’ Jesúse’ uva’ at xo’l u tename’ tuk’ u Tiixhe’. As ib’a’nil kuxh u Jesúse’ uva’ kat k’ujeb’ ve’t u ak’ tzaq’ite’ ti’ ik’ulat tib’ iyol u tename’ tuk’ u Tiixhe’. As a’ vikajal u Jesúse’ uva’ kat el sqi’ vatz u kuruse’, as nim talche’ ti’ vikajal u Abel uva’ kat yatz’pi.

²⁵ As etixvak unq’a yole’ uva’ ni tal u Tiixhe’ sete. As eb’anak etetz eche’ uva’ kat ib’an unq’a tename’ na’ytzan, tan ye’ nik isa’ tab’it u yole’ uva’ nik ib’eyal ste ta’n unq’a uxhchile’ uva’ atik vatz u tx’ava’e’. As esti’e’ kat ul u k’axk’oe’ sti’. Asoj techal kat ul u k’axk’oe’ ti’ unq’a tename’ tan ti’ uva’ ye’ kat inima, ¿as a’ kol o’ q’a ye’ la ul u k’axk’oe’ sqi’, asoj ye’ la kunima u yole’ uva’ ni tal u Tiixhe’ sqe uve’ echen tu almika’?

²⁶ As tul kat yolon u Tiixhe’ te unq’a tename’ na’ytzan, as kat tiin ve’t u tx’ava’e’. Pet ech ni tal ve’t uma’t u yol ile’ uva’ alel ta’n Aak:

La ilej ve’t uma’l u q’ii uva’ la untiinsa ve’t u tx’ava’e’ unpajte.

As antu ve’t u almika’e’ la tiin sva’n, ti’k Aak.

²⁷ As tul ni tal Aak u yole’ ti’ uva’ la itiinsa ve’t Aak u tx’ava’e’ unpajte, as a’ isuuchile’ uva’ la teesa ve’t el Aak unq’a icheesa’me’ ab’iste uva’ la tal Aak tele’. Esti’e’ uva’ a’ unq’a vee’ la kaa ve’te’ uva’ ye’ la isa’ Aak teesat el.

²⁸ Qaq’taj ta’ntiixh te u Kub’aal Tiixhe’, tan kat toksa ve’t ok o’ Aak xo’l u tename’ uva’ at jaq’ u tijle’m u Tiixhe’. As kunimataj Aak ti’ qaq’at ta’ntiixh te Aak ti’ u b’a’nile’ uva’ ni taq’ Aak sqe. As kuxo’vataj Aak, ti’ uva’ ye’ la kub’an u va’lexhe’ vatz Aak,

²⁹ tan ech Aake’ eche’ umaj xamal uva’ la tz’e’san unq’a vee’ skajayil uva’ ye’ b’a’n.

Kam itxumb’al u me’al ik’aol u Tiixh la ib’ane’

¹ Eya’sak exo’nit etib’ sevatzaj, ex uva’ ex me’al ik’aol u Tiixh.

² As eya’sak etaq’at ivatb’al unq’a uxhchile’ uva’ la oon tekab’al, tan at unq’a kumoole’ uva’ ye’ kat b’en ste uva’ antu ve’t unq’a ángele’ kat aq’ax ivatb’al.

³ As ye’ la esotzsa unq’a qitz’in qatzike’ sek’u’l uve’ ato’k tu u kaarsa, tuk’ uve’ ni yoq’pe’. As eela kuxh stuk’ uva’ antu ve’t ex ni paleb’en u k’axk’oe’ eche’ uve’ nipaleb’e.

⁴ As unq’a naje’ uva’ at tixqel as moj unq’a ixoje’ uva’ at itzumel, as jikoj chit la ib’ane’ tuk’ vik’ulele’. Tan la ib’an u Tiixhe’ isuuchil u naje’ uve’ nichuk tixoj, as u ixoje’ uve’ nimooline’, as echat la ib’an Aak te unq’a uxhchile’ uve’ ye’l ik’ulel ati, as nu kuxh ipaavine’ tuk’ uma’t uxhchil.

⁵ As ye’ kuxh etoksa etaama ti’ u puaje’. Pet txuq’txunoj kuxh ex ti’ vetetze’ jank’al uve’ ati, tan ech ni tal u Tiixh ile’:

Ye’xh jatue’ la vaq’ kan ex sejunal.

Pet at chit ine’ seti’ ti’ chit ib’ene’, ti’k Aak.

⁶ Esti’e’ ye’ la kuxaansa qaama. Pet la kuk’ujb’a’ kuk’u’l ti’ Aak, tul ech la qal ile’:

K’uxh kam kuxh la ib’an unq’a uxhchile’ sqe, as ye’l o’ la xo’v o’,

tan a’ u Kub’aal Tiixhe’ la lochon o’, chaj o’ la qale’.

⁷ As la etitz’a uva’ kam itxumb’al unq’a qitz’in qatzike’ nik ib’an sexo’l uve’ ni ilon isuuchil vitenam u Tiixhe’, tan ech nib’ane’ eche’ unq’a xeen txooe’. As etitz’ataj kam ikuyat chajaak unq’a vee’ uva’ kat ipaleb’e. As eteesataj etexhlab’al ti’ u k’ujleb’al ik’u’l chajaake’.

⁸ As k’uxh ye’l chajaak cheel, as at chit ve’t u Jesucristo sqi’. As Aake’ tixe’teb’al u q’ii saje’. As an kuxh Aak cheel ti’ chit ib’ene’.

⁹ As ye’ la etaq’ tokeb’al umaj va’lexhla chusb’al uva’ jit eela tuk’ u jikla chusb’ale’. As aal b’a’ne’ uva’ la yak’in ve’t u qaanxelale’ ta’n vib’a’nil u Jesúse’. Pet jit ta’n unq’a echb’ub’ale’ uva’ tetz u b’axa tzaq’ite’, tan ye’xhkam nitxakon ti’ unq’a uxhchile’ ti’ iyak’in u taanxelale’.

¹⁰ As at uma’l u uxhchil uva’ kat kam sqi’ uva’ ech tatine’ eche’ unq’a avane’ uva’ niyatz’ax tu u tabernáculo ta’n oksan iyol tenam vatz Tiixh. As a’e’ u Jesucristo. As jit umaj avan uva’ kat kami ti’ uva’ la echb’ul vichi’ole’.

¹¹ As ni teq’o ok viq’esal oksan iyol tenam vatz Tiixh vikajal unq’a avane’ tu u Tiixhla atinb’ale’ tu jun yaab’ ti’ ijajat kuyb’al ti’ vipaav unq’a tename’. Pet nitz’e’sal vichi’ol unq’a avane’ ti’e’l u tename’.

¹² As echat chit kat ib’an u Jesús, tan kat b’ex yatz’poj el Aak ti’e’l u tename’. As kat toksa ve’t o’ Aak sitenam u Tiixhe’ ta’n vikajale’ uva’ kat el sqi’, ti’ uva’ ye’l ve’t tetz u paave’ sqi’.

¹³ As kat b’ex yatz’poj el u Cristo ti’e’l u tename’ ti’ ichooat u kupaave’. Esti’e’ ni val sete, xekeb’oj chit o’ ti’ u Cristoe’. As ye’ la xekeb’ o’ ti’ iyatz’ax ok unq’a avane’ tu u nachb’al Tiixhe’, k’uxh la eesal kuq’ii ta’n unq’a tename’ eche’ uva’ kat ulb’el Aak,

¹⁴ tan tzitza’ vatz u tx’ava’e’ as ye’l qatinb’al ati uva’ ti’ chit ib’ene’. Pet a’ u qatinb’ale’ ni qil b’en uva’ la atinkat o’ ti’ chit ib’ene’.

¹⁵ Esti’e’ uva’ a’ u Jesucristoe’ la lochon o’ ti’ qoksat iq’ii u Tiixhe’ ti’ chit ib’ene’ tuk’ unq’a yole’ uva’ ni tel ch’u’l tu kutzi’, tan a’e’ ni b’anon ivaatzil kuyatz’at ok unq’a avane’ vatz u Tiixhe’, o’ uva’ o’ niman tetz Aak.

¹⁶ As ye’ la eya’sa eb’anat u b’a’ne’ sevatzaj. As la etaq’ unb’ooj vetetze’ ti’ elochat unq’a uxhchile’ uva’ ye’l tetz ati. As a’ u b’a’ne’ uva’ nisa’ u Tiixhe’ uva’ la eb’ane’, tan a’ ve’t ivaatzile’ ti’ iyatz’ax ok unq’a avane’ tu u nachb’al Tiixhe’.

¹⁷ As enimataj unq’a eq’esale’ uva’ ni ilon isuuchil vitenam u Tiixhe’, tan at tijle’m chajaak ti’ tilat esuuchil. As at sk’u’l chajaak uva’ la ilej uma’l u q’ii uva’ tuknal tal chajaak isuuchil te u Tiixhe’ ti’ uva’ kam kat ib’an chajaak sexo’l. Esti’e’ uva’ enimataj chit chajaak, aq’al uva’ la chiib’ chajaak ti’ u taq’one’ uva’ nib’an vatz u Tiixhe’. As ye’ la inach chajaak ik’axk’oil u aq’one’ uva’ nib’ane’. As la txakon u taq’on chajaake’ seti’.

¹⁸ As eb’antaj b’a’nil. As enachtaj chit Tiixh sqi’, tan ootzimal sqa’n uva’ b’a’n kuxh kutxumb’al vatz u Tiixhe’, tan a’ chit ni qale’ uva’ a’ koj chit u b’a’ne’ la kub’an vatz Aak.

¹⁹ As nunjaj b’a’nil sete uva’ la chit enach Tiixh svi’ ti’ uva’ ye’ la b’alax in ti’ b’en vilat ex.

Itzojpeb’al u yol

²⁰ U Tiixhe’ ni b’anon uva’ b’a’n qatin sukuvatzaj, as Aak kat ulsan taama u Jesucristo uva’ ech tatine’ sqi’ eche’ umaj xeen kaneero’. As a’ vikajal u Jesúse’ uva’ kat k’ujb’a’n kan u ak’ tzaq’ite’ uva’ ye’l iya’teb’al.

²¹ As ti’ vikajal u Jesúse’ la taq’ kat u Tiixhe’ etxumb’al ti’ eb’anat u b’a’ne’ uva’ nisa’ Aak. As ib’a’nil kuxh Aak as neb’ane’ kam uva’ nisa’ Aak. Esti’e’ la qoksa ve’t iq’ii u Jesucristoe’. An chite’.

²² Ka’l kuxh unq’a yole’ kat untz’ib’a b’en sete, vitz’in vatzik. As nunjaj b’a’nil sete ti’ uva’ la ekuy in ti’ unq’a yole’ uva’ kat untz’ib’a b’en ti’ iyak’insat etaama.

²³ As la val sete uva’ kat chajpul ve’t u qitz’in qatzike’ u Timoteo. Asoj ye’ tuk b’alaxtoj aak ti’ tul sunk’atz, as la b’en qil ex tuk’ aak.

²⁴ As la unjaj b’a’nil sete ti’ uva’ la etaq’ untzii te unq’a qitz’in qatzike’ uva’ ni ilon isuuchil vitenam u Tiixhe’, as tuk’ te ka’t unq’a qitz’in qatzike’. As unq’a qitz’in qatzike’ uva’ echen tzitza’ tu u Italia, as ni taq’ b’en itzii sete unpajte.

²⁵ As a’ vib’a’nil u Tiixhe’ la atin seti’aj sekajayil. An chite’.