FILIPI

FILIPI

¹ Ánuú Paulo nee Timoteo, sagadiyuusér Kristo Yesu, barwaárí ngina gooiimaán amór múk hhohhó’ oo Mungú sleémeero oo baraá Kristo Yesu oo baraá Filipír i dirií’, dinkwa nee geeraharuuser’ín nee sagadiyuusér múk Kríshaanáy. ² Mungú Baabuúrén nee Aako Yesu Kristo kuungá’ nu tsuuqi nee nu waydí haniisi. ³ Án Mungú un sluufimiís umuúqo qoomár barnaxes kuungá’ naa insláw. ⁴ Qoomár barnaxes a firiiriím, án kuungá’ sleémeero nun aleefiraariím ar qwala/. ⁵ Asma kuungá’ aga dinku’uusé’ nee aníng Ya/abtór hho’ alki/ituuwo iimír bál geera nee tam ay laarí sleeme. ⁶ Gár án ni haratlintatii’ a tí gídaabá, kudá’ gadiyér hhoo’ gaa iimu/un baraá munerhúng wa aleeró, inós gadiyeédá’ ga alhhe’ees ay bál deelór Kristo nay xeer. ⁷ A gár hariím dir’eene adoorí ngiwa inslaslaw daanduuhunge, asma kuungá’ a baraá muunuúeé’ dir’á’. Asma kuungá’ sleémeero tsuuqaá Mungú iga sleeré’ adór aníng wa ale qoomár aníng tiwa tseék, nee tam qoomár Ya/abtór hho’ ngiwa aleekal/aám nee looeemaawós ngiwa laqaqaám. ⁸ Mungú ga xuu’ adór án kuungá’ sleémeero nur artá wa slaá’, asma nuwa ló’wa slaa’ ar sla’aaridár amór Kristo Yesú daahh. ⁹ Gár aníng kuungá’ nuwa aleefiriiriim a tí, gídaabá sla’aarirhúng i kumit iwa ló’wa doogiigiin dinkwa nee sagaalooa nee xu’uti sleémeerowo, ¹⁰ as kuungá’ sakwasleemár ganaa’ kawa aleesleera’ tsatto baraá umuúqo gaaro. Daqaní kuungá’ a múk hhó’ oo xaslxaanslír koomaaká bál deeloodár Kristo birna hardát. ¹¹ Nee kuungá’ tundu hatsiis gan’amuwo, kudá’ Kristo i tlehhiiti baraá munerhúng wa ale, as ilaiwa/amér Mungú nee xirfuuwós. ¹² Hhaee’eé’, gár ni slaa’, kuungá’ masók an xuá’ gídaabá slahha’amaayeedá’ sleémeero aníng naa sláw Ya/abtór hho’ gaa ila/iká, ala gana alee/ís tsiyaayaaxaro. ¹³ Asma aníng gár tisa tseék a as tawa eeharusmoó Kristo, nee adoorí aa xu’utít dír askaári nee muu sleémeero oo diirí dirií’. ¹⁴ Nee tseegamor’eé’ hha’aá yaariir awa Kríshaanáy gaa haratlintaao gawdés baraá Aakoowo, tari uraaráy baraá pihhu’uumaaro ar Ya/abtór hho’ kawa alik/iiti ar dae wasle. ¹⁵ A gár xu’uti gídaabá muu bahh’alé i deer oo iidíguú Kristo gu alki/iít as da/i nee gila, ala tam adoorihe awa hatlá’ i dayá’ sleeme awa iidíguú Kristo ngu alki/iitá’ ar muunuú hhoó’. ¹⁶ Kuká’ iidíguuwí ngun alki/iitiyá’ as sla’aari, asma ka xuu’ gídaabá aníng tina qaás as Ya/abtór hho’ ngiwa aleekal/aam. ¹⁷ Ala kudá’ hatlá’ a gídaabaheeká iidíguú Kristo nguna alki/iitiyá’ ar muunuú hhoó’, ala as fola. Inooín ka xui a slahha’amaayer’eé’ kan dook baraá tseegamooro. ¹⁸ Ala a gaarooká. Aníng a qwalalaá/, asma iidíguú Kristo kuqo alki/iit umuúqo loohiro, barnaxes ar muunuú tlaákw laqaá ar muunuú hhoó’. Nee slám aníng a kumiít qwal/amaayeero, ¹⁹ asma aníng a xuú’ gídaabá alhhe’eesaywo án ti gweer, as án kuungá’ iwa aleefiriiriinda’ nee as Qeeruú Yesu Kristo aníng iwa alee/iimisi. ²⁰ Gár án ni haraxuu’ nee ar ni harahhiif a tí gídaabá, aníng a baloó muruutaaká baraá umuúqo gaaro. Haraxu’utir’eé’ a tí gídaabá umuúqo gaaro ar án ni slaw xirfuú Kristo gu laqaán ar geehhooeema dír muu sleémeerowo, adoodá’ Kristo kura xirfayeés aáng, nee tam hamí sleeme kuqo xirfayees, as muruudá’ án ni slaw barnaxes ar slafingw’eé’ laqaá ar gwa’arar’eé’. ²¹ Asma dir’eene slafiingw an Kristo, nee gwa’ara gár ak hhoo’ ngi húp. ²² Ala án bar kumiít hotaango, pa/aangw u koóm oo gadiyeérí ar gídaabár úr koom ngiwa koom tleehhamooro. Ala gawaá adoorihe ar ni tsawaar a xuaaká, slafiingw nee gwa’araro. ²³ Aníng a baraá baraatsarár i dirií’. Aníng a ló’wa slaá’ niwa tlaw, niwa hotángw aw amór Kristo, asma adoorí a tsiní kángw kilá’ wa ale. ²⁴ Ala aníng niwa kumiit slafiingo a gár gídaabár koom ak alé as kuungá’. ²⁵ Aníng kaangwí u xuú’. Gawaá adoorihe a xuú’ gídaabá aníng a kumiít slafiingo, dinkwa nee kuungá’ sleémeero as kuungá’ nuwa alee/iis, nee qwal/uuhúng nguwa dook baraá haratlintaaooro. ²⁶ Aníng binda amorhúng i hardáh malé alé, pa/ángw yaariír daqaní u koondá’ oo Kristo Yesu kuwa xirfayeemisa’ as aníng. ²⁷ Daxta gár gídaabár koom a kuungá’ masók an hotá’ ar adoodá’ Ya/abtór Kristo kawa hariím. Án barnaxes naa hardáh amorhúng, laqaá barnaxes naa hardahiiká, gár án ni slaa’ masók an axaás gídaabá kuungá’ aga sihhitano hhe’esé’ baraá haratlintaaoro ar wakleeli’iimár baraá Qeeru, nee haratlintaaór Ya/abtór hho’ kawa aleeslaqwa’ ar muunuú wák. ²⁸ Wakuuserhúng ma da’ayuumitaara’ baraá umuúqo gaaro. Kuungá’ bar pihhu’uumár koondá’, gaarí a laya dir’ine gídaabá inooín i qwaariyá’. Ala dirhunge a laya gídaabá kuungá’ a ba/aandá’. Nee layaarí amór i dahh a amór Mungú inósuú kilá’. ²⁹ Kuungá’ qeemu ugwa sleeré’ oo Kristo kuwa haratlintié’. Ala a har qeemuuwí kiloseeká, ala tunduna slahhe’eemiís sleeme as inós. ³⁰ Asma kuungá’ sleeme a slaqwá’ baraá slaqwaraarí aníng ni slaaqw. Kuungá’ aáng aníng iga aandé’, niwa slaáqw, nee hamí aga axasé’ adór aníng nir kumiít slaqwaraarihe.

¹ Slafingwhúng baraá Kristoowo i /uuruú huwahúwi? Sla’aarirós nu gurkwa/amísa? Dinku’uumár baraá Qeeru i deéro? Hhooa nee gurtleemu i koondá’a? ² Ala bar adoosíng, muunuú wák koomaak, as qwal/uueé’ iwa boo/i. Kuungá’ kiloohúng ti sla’aslae’, dinku’uumár baraá qeeru koomaak, nee umuúqo daqto ti axweesanaay axamise’. ³ Umuúqo gaaro ma tlehhiitara’ ar fola, laqaá ar daara/aangw. Ala masók umuúqo heewo tin kilós niinaweemiis. ⁴ Muruú múk hatlá’ i slai na leelehhiitaak, ala a muruudá’ kuungá’ ta sla’a’ kiloseeká. ⁵ Kuungá’ masók muunuú adór kuduú Kristo Yesu un koondá’. ⁶ Inós iimír iimu/uungo tlehhemuuwós a adór kuquú Mungú. Inós nee Mungú i qoná’. Ala inós ina ya/án qoomtidá’ nee Mungú tawa qon ngiwa geexay. ⁷ Baraá sla’aarirose uraydá’ tawa adór Mungú guri geexáy, iri adór lawaalmo tleehhiít. Iri hee tleehhiít adór atén wa ale; Iri geehhooúy ar slaqsoó hee. ⁸ Tiri kilós niinaweés, iri hoót ar ilaiwa/ame ay gwa’araarós, eeít, gwa’araadár gawaá msalaába. ⁹ Gawaá adoorihe gaarí an gár Mungú nguwa gáwtí tsaa/asa hhe’eés, nee guri umuudá’ úr i haniís, umuudá’ umee sleémeero ga baá/. ¹⁰ Asma muu sleémeero umuuwí ngu i tumbarara’atia, mukdá’ gawaá doorí i dirií’ laqaá mukdá’ baraá yaamí dirií’ nee tam kuduú baraá gi’i. ¹¹ Nee umuúqo heewo ngi ooi gídaabá, “Yesu Kristo a Aako,” as Mungú kuwa xirfayeesi. ¹² Sla’aaruuser’eé’, án qoomár niwa dirhúng i dirii’, kuungá’ axweesantaeé’ ana ilaiwawa/é’ umuúqo daqto. Ala a gár gídaabár koom tawa adoodár kumita’ tam qoomár án niwa kaahh. Gadiyeét tleehhaak ar dae nee ar daaraxaay, as ba/amarhúng kawa boo/esa’. ¹³ Asma Mungú in baraahúng wa gadiyuus. Inós nun munér i hanmiis ar muruudá’ i slai kuwa sla’a’ tleehhamooro. Nee /uuru sleeme ngun hanmiis oo tidá’ inós i slai kawa tlehha’. ¹⁴ Umuúqo gaaro bar tlehhitá’, ma tlehhitaara’ ar qununu/aay nee tlaampa’aamis. ¹⁵ Gawaá adoorihe heé kuungá’ nu dakuusár i ara’ár i kaahh, as kuungá’ tawa na/’aá Mungú tleehhita’ awa ta dakuusár i faditiiká, laqaá awa al/ayma wasl, nee awa xaslxaanslír kooma’aaká baraá tla/ángw qartír sageegawden ar aa amooqwat. Kuungá’ baraá tla/ángw qartihe tundu gehhó’ tawa adór tsatse/uú gawaá doorí dirií’, ¹⁶ asma kuungá’ Ya/abtór hho’ ar slafiingw an alki/itá’ dir’ín i alé. Gawaá adoorihe kuungá’ a xirfuueé’ bál deeloodár Kristoowo, asma aníng aga tawó ti’i’iimiiká, laqaá aga tawó daawiimiitiiká gadiyeede. ¹⁷ Haratlintaaorhúng a ilahhooár án ni hanmiis dír geerá Mungú i alé. Bar adór garka tseerer’eé’ iwa ku’uta gawaá daanduú ilahhooarí, aníng a qwalaá/ sleeme. Slám qwal/uueé’ kwí ngway qasiís dirhúng i alé. ¹⁸ Qwalaala/é’ kuungá’ sleeme, qwalaala/é’ dinkwa nee aníng. ¹⁹ Án haraxu’uti a koóm baraá Aako Yesuwo Timoteo nguwa ya/aaw ar gaanslaay iwa amorhúng i hardahi, as muunuúeé’ iwa qwalaa/i iidíguuhúng bura axaás. ²⁰ Heé hatlá’ i kaahh oo nee aníng ti kaangw slawá’ oo inós gu baá/, slám heé hatlá’ i kaahh oo kuungá’ nu sa daawiimiít adór inós wa ale. ²¹ Awa hatlá’ sleémeero muruú ta leelehhiiti a muruuín kilooín ala a gadiyér Yesu Kristoowooká. ²² Ala kuungá’ Timoteo u xuá’ adór ir inkihhimuú kón. Inós gadiyeét gaa tlehhaahhiít ar Ya/abtór hho’ dinkwa nee aníng, adór baabá nee garmaawós. ²³ Kwí an kudaádá’ án ni ya/aawár wa slaa’ amorhúng i alé ar gaanslaay, barnaxes adór kwasleemar’eé’ aga xuú’. ²⁴ Nee aníng haraxu’uti a koóm sleeme baraá Aakoowo, gídaabá anuú kilá’ ni hardáh amorhúng i alé deeloorí tseewe. ²⁵ Gár án naa ár ar hariím a hhiyaarén Epafradito ngun ya/aáw amorhúng i alé. Inós nee aníng aga algadiyuusaán, slám inós a slaqwarusmoó wák dinkwa nee aníng. Inós kuungá’ nguna ya/abé’ amor’eé’ alé as aníng iwa sagadiyuusi, nee tidá’ án ni slaa’ ngiwa hanmiisi. ²⁶ Inós kuungá’ sleémeero nuna ló’wa inslasláy, iri ló’wa daawiimiít as kuungá’, asma adoodá’ kuungá’ kara axasé’ gídaabá inós i tiiq. ²⁷ Ar ló’, inós aa ló’wa tiíq, afkwá bohoongw ngun wa kií/. Ala Mungú inós guri gurtláy. Tam aníng sleeme Mungú ina gurtláy, as gurhaamir’eé’ miwa doogiín. ²⁸ Gawaá adoorihe ilakaaharu una ló’wa tleéhh inós nguwa ya/aaw amorhúng i alé, as kuungá’ tawa qwal/a’ bura aandé’, nee slám as gurhaamir’eé’ iwa /aaruur. ²⁹ Gawaá adoorihe, inós ilaoohaak ar qwal/uú yaariír, adór hhiya’ oo baraá Aako. Múk adór inós ilaiwawa/aak. ³⁰ Asma inós ina dáh baraá tsaxwa, iri nakaá/ gwa’araaro as gadiyér Kristo, as aníng iwa alee/iisi, alee/isaydá’ kuungá’ taa harslaaqaté’.

¹ Alhhe’eesaywo gár án ni oo’, hhaee’eé’, qwalala/é’ baraá Aakoó wa ale, aníng a slaaqaataaká gooiro tidá’ naa qaroó dirhúng i gooiím, asma dirhunge i gídaabár koón ngiwa inkii/. ² Ti harmagahhe’ nee mukdá’ oo adór seeaawe, sagadiyuuseedár muruú tlákw inslaaslaw, mukdá’ slaqoo gi tlaquú wa slaá’ ar al/utlo. ³ Ala múk taa al/utlín a atén, ar al/utloodár ló’. Qeeruú Mungú atén ti gan’aamiis baraá sluufayrene. Atén xirif un ara’araán as Kristo Yesu kilós. Gár hatlá’ ar ta haraxuaan i káhh ar tlehhema’aá tawo. ⁴ Tlehhema’aá tawo geera bir bu’uutiyá’, aníng gár ni da’ayuumiit i káhh. Umuúqo heewo geera bar tlehhema’aá tawo gin haraxu’utír wa slaa’, geera alók aníng i baá/. ⁵ Aníng tina al/uútl qoomár tawa na/aay, bál dakaát. Aníng a heé xoorór Israeli, heé tlahhoó Benyamini, aníng a heé Ebrania, tam xwaylitér’eé’ a múk Ebrania. Iidíguú hara’aya ooharo aníng a heé Farisayo. ⁶ Ilakaaharu una ló’wa tleéhh gawaá daanduú hara’aya ooharo, tam múk Kríshaanáy nguri gusiisiím. Geera barnaxes gan’amu kun slaasláy ar hara’aya boo/eesa, geera alók aníng a tlakweemaá koomaaká. ⁷ Ala muruudá’ sleémeero aáng naa harafaár tawa slaasláw dir’eene, hám daxta muruudá’ u harafadiít tawa /aareema dir’eene as Kristo. ⁸ Ala a muruuwí kiloseká. Mura’ sleémeero un harafadiít tawa /aareemaá kilá’ asma Kristo Yesu Aakooeé’ nguwa xuú’, gaarí a gár gídaabár koom ta muruú hatlá’ sleémeero ba/a. Mura’ sleémeero una geexáw as inós, mura’ sleémeero una harafaár tawa xwaansloó tawo, as Kristo nguwa slaw, ⁹ nee niwa haragwaa’ dirós i alé. Daxta aníng gan’amuú ni koom as hara’aya ngiwa boo/eés, i kaahh. Gan’amuú ni xuu’ a kudá’ kilós oo hee i slay as Yesu Kristo nguwa haratlintií’, gan’amuudá’ amór Mungú daáhh, as haratlintaao. ¹⁰ Gár án ni léelehhiit a wak kilós. A tí gídaabá Kristo nguwa xuu’, /uuruú waasle/uuwós nguwa slaw, nee niwa haragwaa’ nee inós baraá slahha’amaayeerós i alé. Nee aníng tawa adór inós baraá gwa’ araarose. ¹¹ Asma gár án ni haraxuu’ masók a niwa waaslee/ baraá múk aa qaátl wa ale. ¹² Aníng a kaahaaká gídaabá aníng amoodá’ ta i qwaatlaan aga i hardáh qaroó alé, slám a kaahaaká gídaabá gan’amu ugwa qaroó sláw. Aasla’áy. Ala ilakaaharu un tlehhiít niwa kumiit as niwa hardah nee gadaádá’ ngiwa oh, tidaádá’ ar Kristo Yesu isa ateét, qoomár iwa óh. ¹³ Hháe, aníng a xuú’ gídaabá gadaádá’ aga i hardahiiká. Gár án ni tlehhiit a tí kilós, muruudá’ naa alí geexáw un gunqareemiís, nee kuduú geeraaeé’ i dirií’ un i ti’i’iím. ¹⁴ A ló’wa naagamiís as amoodá’ ta i qwaatlaan ngiwa i hardah, as slaasláwadá’ Mungú isa ateét ar loohír Yesu ngiwa slaw, tidá’ niwa hoot gawaá doorí wa ale. ¹⁵ Ateéká’ sleémeero awa ganaa’á’, gár tiwa hariím a adoorí an inslaslaawaán. Ala kuungá’ bar adór hatlá’ aga inslasleeré’ gawaá umuúqo gaaro, Mungú muruudá’ ngu kuungá’ i geehhooutis. ¹⁶ Ala atén sleémeero gár tiwa hariím masók an kumiitaán ar digir wakeetingwdá’ tara iimu/uumaán. ¹⁷ Hhaee’eé’, kuungá’ sleémeero adoorí án nir hoot nar hootaak. Asma atén a slaqsaay dír kuungae. Ga/aawaagáy ló’wa ale kudá’ hootá’ adór atén nir hootaan. ¹⁸ Asma án kaangwí ngwa qaroó oó’ geerí ale daqtá yaariire, ala hám daxta ngun malé inkií/ ooaro ar hhirhheeri, gídaabá múk yaariír adór ir hooti a adór wakuusér gwa’arár Kristo ar gawaá msalaába. ¹⁹ Inooín i loohír i dirii’iyá’, tidár baraá qwanoó kaw. Mungúín a gura’. Muruú tir xirfayeemisi a kuduú murér koóm. Muruú ta inslaslay oo baraaká’ yaamu kilós. ²⁰ Ala atén a yaamuloouusér gawaá doori. Slám atén Aakoorén Yesu Kristo u daamaaramaán niwa hardahi gawaá doorí wa aleeró, tiwa ba/amisi. ²¹ Inós slaqoorén kuká’ hhitiruutá’ giri warqees nee giri tleehh tawa adór slaqwtós tidár xirfuú koom. Inós adoorí tleehhamooro ga aleesláy. Asma inós /uuru gu kón oo mura’ sleémeero nguwa qaasi baraá aleesleemuuwós i alé.

¹ Gawaá adoorihe, hhaee’eé’ awa sla’aaruuse, ma alí ki/aara’ ala kwa/é’ baraá slafingwhúng oo baraá Aakoowo. Sla’aaruúse, án kuungá’ nun ló’wa inslasláw. Kuungá’ a qwal/uueé’. Asma gadiyér’eé’ gár ira geehhoouúr a kuungá’. ² Aníng Euodia nee Sintike in firiím tiwa haraki/iya’, masók muunuú wák ngun koná’ baraá Aakoowo. ³ Nee kuúng sleeme, sla’aarusmooeé’ oo sagadiyusmo dinkwa nee aníng, án kuúng u firiím, /ameenaasíng alee/iiseek. Asma inooín Ya/abtór hho’ ngina sa slaqwiyé’ nee aníng, nee Klementiwo, dinkwa nee kudá’ hatlá’ awa gadiyeét ngaa tleehhiye’ nee aníng. Inooín umer’ín kaa gooín baraá kitaábuú slafiingw. ⁴ Qwalaala/é’ daqisleém baraá Aakoó wa ale, slám nun malé baw, qwalaala/é’. ⁵ Hhooeemaahúng masók i geehhoouyá’ dír muu sleémeerowo. Aako naa nakaá/. ⁶ Ma daawiimitaara’ baraá umuúqo gaaro. Ala umuúqo gaaro ar ta sla’a’a Mungú na adbawaak, kuwa firiiriinda’ nee kuwa sluufimisa’. ⁷ Nee wayduú Mungú, kudá’ tsaahharo ta aleeslawaanaaká sagaalooarene, munerhúng ngi de’en, nee inslawayhúng baraá Kristo Yesuwo. ⁸ Alhhe’eesaywo, hhaee’eé’, muruú kuungá’ tunduwa hariím inslaslaango a kwí, muruudá’ sleémeero oo ló’, nee kudá’ ilaiwa/amér koóm, muruudá’ sleémeero oo gan’amuú koóm, nee kudá’ hhohhó’, slám muruudá’ sleémeero oo sla’atimís nee oo hhooeemaá koóm, nee tlehhemi’iidá’ sleémeero awa hhohho’ nee awa xirfuú wa hariimá’. ⁹ Muruudá’ taa dir’eé’ wa intsahhé’ nee kudá’ taa ilaoté’ tleehhaak, kudá’ taa aandé’ nee oo taa axasé’ dir’eé’ wa ale. Daqaní Mungú wayduú koóm i dinkwa nee kuungá’. ¹⁰ Aníng aga ló’wa qwalaá/ baraá Aakoowo, asma kuungá’ aleesleemu ugwa malé sleeré’ daxta, tam aníng iri insleeré’ as alee/isaywí ni slaa’ naa hanisé’, adoodá’ aáng ngur hanmaamisa’. Baraá tla/angwihe a gídaabaheeká án kuungá’ ina gunqaresé’. Ala a gídaabá gár ta koonda’ in káhh. ¹¹ Aníng adoorí a kaahaaká as niwa gaa slaa’. Asma aníng umuúqo adooro aga intsaáhh. ¹² Aníng bar aga /aarúw, gár tlaakw i káhh, barnaxes slaasláw iga wa tláhh, gár tlaakw i káhh sleeme. Umuúqo barto án ti amohhoó’. Bar aáx, laqaá bar qwariít, nee tam mura’ bira wa tlaáhh, laqaá bira /aarúy, aníng ti amohhoó’. ¹³ Mura’ sleémeero u aleesláw baraá kudaádá’ aníng i /uuruú i hanmiisa. ¹⁴ Ala kuungá’ adór hhoo’ aga tlehhé’ ar aníng iwa alee/isé’ baraá slahha’amaayer’eé’ tihe. ¹⁵ Ala kuungá’ múk Filipi, kuungá’ kilá’ kaangwí u xuá’, qoomaadár geeraawo Ya/abtór hho’ ngiwa alki/iít, nee yaamaá Makedonia ngiwa geexáw, múk aa aldinku’uus nee aníng baraá mura’ slaslaango nee hanmisuuwo a kuungá’ múk Filipi kiloohúng. Múk Kríshaanoó amór yaamaá hatlae oo adoorí gaa tleehh i kaahh. ¹⁶ Tam qoomár aníng niwa Tesaloníkér i dirii’, alee/isaay nguri hubé’ qoomaadá’ án nguwa slaa’, tam a sagaáwa wakeeká. ¹⁷ Kuungá’ ma kaahara’ gídaabá aníng gár ni leelehhiit a ilahhooaadá’ amorhúng daahh. Ala gár ni leelehhiit a slaqweedá’ kuungá’ ta sleera’ asma tlehhemi’iidá’ naa aníng i tlehhé’. ¹⁸ /Aymi’iiká’ ni gooiim ngi laqaqaná’ gídaabá ilahhooarhúng aga ilaóh. Nee ilahhooarí ka ló’wa ur. Daxta umuúqo gaaro ar ló’wa bu’uut a koóm, alá Epafradito ilahhooarhúng ngiwa huúw. Ilahhooarhúng tidá’ naa hanisé’ dír geerá Munguhe a adór ilahhooadár xarángw tsuú’ koom, tidá’ Mungú i ya/a/an nee i ak slai. ¹⁹ Nee Mungúeé’ kudá’ xirfuú koóm baraá Kristo Yesuwo, tidá’ sleémeero kuungá’ ta sla’a’ ngi haniis ar har qoomoó daqaari’iimarós. ²⁰ Mungúrén i xirfuuti, Baabuúrén ay alhhe’eesay wasle. Amin. ²¹ Umuúqo heewo kudá’ hhoohhoó’ oo Mungú intsihhiisaak, kudá’ baraá Kristo Yesú i dirií’. Hhaeedá’ nee aníng dinkwa kuungá’ nu intsihhiimisiyá’ sleeme. ²² Múk hhohhó’ oo Mungú sleémeero kuungá’ nu intsihhiimiis, ak alé múk doó waawutmoó múk Rumi. ²³ Aakoorén Yesu Kristo munerhúng ngi tsuuqi.