EFESO

EFESO

¹ Ánuú Paulo, Ya/abusmoó Yesu Kristo as sla’aarír Mungú, barwaárí ngina gooiím amór múk Mungú oo baraá Efeso, kudá’ Yesu Kristo ngwa haratlinti’iiye’. ² Mungú Baabuúrén nee Aako Yesu Kristo kuungá’ nu tsuuqi nee nu waydí haniisi. ³ Mungú i xirfuuti, Baabuú Aakoorén Yesu Kristo. Inós atén tina tsuúq ar baraá Kristo ar tsuuqa sleémeero awa qeeru, baraá yaamaá qeeru. ⁴ Inós iimír yaamu ngiwa tleehhiiká, atén tina qaroó tsawaár ar baraá Kristo, asma tawa múk taa hhoohhooeés tleehhitaan, oo tlakweemaá koomaaká dír geeraawose. ⁵ Asma baraá sla’aarirose atén tina tsawaár iimír aáng wa ale tiwa na/’iiwós tleehhi ar loohír Yesu Kristo. Adoorí an adoodá’ inós aa slaá’ baraá muunaáwose. ⁶ Adoorí gana tleéhh as atén tsuuqaawós kuká’ xiríf kiwa ló’wa ilaiwawa/aan, as adoodá’ inós tira ló’wa tsuúq, qoomár Garmaawós kuduú sla’aarusmo nguwa atén i haniís. ⁷ Atén tina gweér baraá lawali’iimár Neetlaango, hingeemisuú tlakweema kway slawaán ar loohír gwa’arár Kristo. Gawaá adoorihe gurtleemuuwós ku ló’wa úr diirene. ⁸ Gurtleemuuwí nguna atén i tlahhás. ⁹ Inós atén tina sla’aarirós i laqán, tidá’ taa luú/, tidá’ aa slaá’ boo/eesaaro. Adoorí gana tleéhh ar baraá sagalooarós nee xu’utirós sleémeero. Al’axweesani gana oó’ adoorí ngiwa boo/eesi ar baraá Kristo. ¹⁰ Sla’aarirós iimír aange a mura’ sleémeero nguwa haragaasi ar baraá Kristo, kuduú baraá yaamu nee oo gawaá dooriwo, qoomaadá’ bál bira bó/, Kristo tay saga. ¹¹ Tam atén sleeme baraá Kristowo tina aaluuse tleéhh, adoodá’ inós aa qaroó slaá’, inósuudá’ mura’ sleémeero gu tlehhiít ar sla’aarirós. ¹² Asma a sla’aarirós atén tawa xirfuuwós tleehhitaan baraá Kristowo, ateédá’ Kristo ugwa haraxu’utirén i qaasaan geerí alé. ¹³ Kuungá’ sleeme baraawose iidíguú looeema ugwa axasé’, iidíguudá’ hhó’ oo ba/amarhúng. Slám inós ugwa haratlintié’, Qeeruuduú al’axweesani, kudá’ Hhoohhoó’, nuri dugunoó i qaás. ¹⁴ Qeeruuwí inós a arhaánír aalirén. Inós ngin xu’utimis diirén i aleeró gídaabá atén ti gweer, ateédá’ mukós. Gawaá adoorihe inós kuri xirfayees. ¹⁵ Aníng aga axaás adór kuungá’ Aako Yesu kura haratlintié’, nee adór muu sleémeero oo taa hhoohhooeés kur sla’a’. ¹⁶ Gawaá adoorihe án Mungú un sluufimiís umú deelooro as kunngá’ baraá firor’eene. ¹⁷ Mungú Aakoorén Yesu Kristo, Baabuú xirfuú koóm, aníng un firiiriím, kuungá’ nu Qeeruuwós i haniisi, Qeeruuduú sagaalooa nee gwa/atamaaye ngu haniisi dirhúng i alé, as inós kuwa xua’. ¹⁸ Aníng a firiiriím inós ilaahúng awa qeeru ngi gweeri, as haraxu’utidár ateetmorhúng kawa tsahha’, nee daqaari’iimár xirif ar aalirós adór i diri’ baraá múk taa hhoohhooeesi. ¹⁹ Slám kawa xua’ hhoohhooaarír uroó aleesleemuuwós baraá ateéká’ haratlintatia’a. ²⁰ /Uuruudá’ gadiyeét ga tleéhh baraarén wa ale an /uuruudá’ Mungú ira gadiyuús qoomár Kristo nguwa waaslee/atís baraá múk aa qaátl wa ale, guri qaás dakós oo doó /iyáy gawaá dooriwo. ²¹ Guri waawuti’iimár i haniís daanduú waawitá sleémeero, nee kudá’ sleémeero awa aleesleemuú koomá’, nee baaluuse, nee kudá’ /uuruú koomá’. Inós kwaa qaás daanduú ume sleémeero ar mukdá’ aleesleemuú koóm, kudá’ baraá yaamuuká’ i diriiá’, nee kudá’ baraá yaamaá hardahá’ sleeme. ²² Mungú mura’ sleémeero gwa gawaá dabaawós i qaás. Slám inós gun uráy haniis, as inós tawa ságw mukdá’ inós gwa haratlintii’, ²³ nee mukdá’ tawa slaqwtós. Mukwí sleémeero aa haáts inose, inósuudá’ umuúqo gaaro ga boo/eemiís baraá muu sleémeerowo.

¹ Aáng kuungá’ aga qatlé’ baraá munerhunge asma ilaiwa/ame waslerhúng nee tlakweemaahúng. ² Qoomaadae kuungá’ loohír tlaakw ana oté’, tidár yaamuuká’. Kuungá’ waawutmoó qeeruudá’ oo neetlaame, kudá’ gawtí dirií’, una eehadé’, qeeruudá’ gadiyuús hamí baraá múk Mungú gwa sií’ wa ale. ³ Tam atén sleémeero aáng aqo an adoodá’. Ana hootaán ar ilatleerír slaqoorén kawa eeharaharaan, nee sla’aarirós kawa tleehhaan. Gawaá adoorihe atén qoomaadae gár tiwa hariím, a sakwasleemár Mungú an slawaán, adoodár múk hatlá’ sleeme. ⁴ Ala Mungú gurtleemuuwós ku úr, nee sla’aarirós ka ur diirene, ⁵ asma inós atén tina slafís dinkwa nee Kristo, qoomár atén tawa múk aa qaatl baraá muneerene as tlakweemaarén. Gár tundusa ba/amís a gurtleemuú Mungú. ⁶ Tina waaslee/atís dinkwa nee inós, nee tina iwiitiís gawaá doori dinkwa nee inós, ar baraá Yesu Kristo. ⁷ Adoorí gana tleéhh as ngiwa laqan dír qari sleémeerowo ar hardah adór hhooeemaawós nee gurtleemuuwós kur úr diirene baraá Kristo Yesuwo. ⁸ Gár tundusa ba/amís a gurtleemuú Mungú ar loohír haratlintaao. A gadiyérhungeeká, ala a gár Mungú naa tawó haniís. ⁹ Gawaá adoorihe hee mitiwa tawó xirfeemiís asma a tlehhmuú gadiyeéroseeká. ¹⁰ Asma atén a gadiyér Mungú. Inós atén tina tleéhh ar baraá Kristo Yesu, as atén tlehhma’aá hho’ kiwa tleehhaan, kudá’ Mungú aa qaroó amohhe’eés as atén kiwa eehaaraan. ¹¹ Gawaá adoorihe inslawiimé’ kunngá’ a múk adoomá aáng. Qoomaadae kuungá’ a múk xoordu baraá tlahhaywo. Mukdá’ taa hheehhe’eés ar al/utlór slaqwa nuna babáy kuungá’ a múk taa hheehhe’eesiiká. ¹² Slám inslawaak qoomaadae kuungá’ tunda paraátl dír Kristowo. Asma kuungá’ a múk Israeliwooká. Nee baraá alqadoodár Munguhe kuungá’ a kahhá’, tam baraá al’axweesantadá’ taa haragaasi nee alqadoodae. Kuungá’ tawa hoté’, a haraxu’utír koonda’aaká, slám Mungú u koonda’aaká baraá slafingwhúng oo baraaká’ yaamuuwo. ¹³ Ala hám daxta, baraá Kristo Yesuwo, kuungaádá’ aáng saawá’ bál geeraawo, tunda tseeweés as gwa’arár Kristo. ¹⁴ Asma Kristo a wayduurén. Inós múk Yahudi nee múk xoordaá hatlá’ giri wák tleéhh, nee wakaari gari hingeés, tidá’ aa sihhit adór baqa tla/angw’ín i alé. ¹⁵ Qoomár wakaari ngiwa hingeés, an qoomaadá’ dabe ngiwa hingeés dinkwa nee hara’ayaro, ar slaqwtós. Gawaá adoorihe baraá mukwí tsaraawo heé /abén oo wák guri tleéhh ar baraawós. Wayda guri tleéhh ar adoorí. ¹⁶ Inós ina gwaá’ gawaá msalaába as wakaari ngiwa hingeesi. Gawaá adoorihe múk Yahudi nee múk xoordaá hatlá’ giri wák tleéhh ar slaqwtá wák ar gawaá msalaába, giri ki/ís amór Mungú. ¹⁷ Kristo niri hardáh, Ya/abtór hho’ ar wayda ngiri alki/iít dír kuungaásingá’ saawá’ awa xoordaá hatlá’, nee dír kudaádá’ tseewá’ awa múk Yahudi. ¹⁸ Asma baraá Kristowo ateéká’ tsaraawo loohi ana slawaán ar Baabá kuwa i tseewuwaan ar baraá Qeeruú wák. ¹⁹ Ala daxta kuungá’ a dahaayeerooká, slám a múk waarahhaaká, ala an yaamu loouuse dinkwa nee múk hhohhó’, slám a múk doó Mungú. ²⁰ Kuungá’ tunduna tleéhh gawaá ihhafiirídá’ taa qaás nee ya/abuuse nee aaruuse, nee Kristo Yesu inósuú kilá’ an tlaa/adá’ ur ar do’ ir gawduduy. ²¹ Inós do’ sleémeero gun kón, nee gun tlehhiit, as iwa doó Mungú oo hhoohhoó’ tleehhiiti ar baraá Aako. ²² Baraawose kuungá’ tundu tlehhiit dinkwa nee inooín, tawa doó Mungú oo iwa hooti ar Qeeruuwós.

¹ Gawaá adoorihe ánuú Paulo, án kuungá’ nu aleefiriiriím, anuúwí taa tseék nee Kristo Yesu as daanduú kuungaásingá’ múk xoordu. ² Án ngi slaá’ kuungá’ aga axasé’ gídaabá Mungú aníng iga ló’wa tsuúq as gadiyeérí ngiwa aníng i haniís, ar kuungá’ nuwa sagadiyuus. ³ Mungú lu/aaráywós kudá’ i tlehhemuú wa slai nguna geehhooutís, nguri xu’utís dir’eén i alé. Nee án lu/aaráydá’ ngwa dirhúng i gooiím diirihe ar /ayma’aá niina. ⁴ Kuungá’ bura soomusé’, a tsahhá’ adór lu/aaráydá’ oo Kristo án ngura xuú’. ⁵ Qoomár aa waarahhi lu/aaráywí kwa laganiká dír múk i alé. Ala daxta kwa geehhooutís nee Qeeru dír ya/abuuseerós ar hhohho’ nee dír aaruuse. ⁶ Lu/aaráy a kwí, baraá Kristo Yesuwo múk xoordu kwaa aaluuse tleéhh dinkwa nee múk Yahudi. Inooín a diqoó slaqwtá wák. Al’axweesantá Mungú a tooín sleeme, ar loohír Ya/abtór hho’. ⁷ Mungú aníng ina tsuúq, tiri sagadiyusmoó Ya/abtór hho’ tleéhh, qoomár inós gadiyeét ngiwa tleéhh baraá slafingw’eé’ wa ale ar aleesleemuuwós. ⁸ Aníng ti niiná ta múk Mungú sleémeerowo. Ala tam adoorihe Mungú aníng ina tsuúq, gadiyeét ngiri aníng i haniís, ar Ya/abtór hho’ ngiwa alki/iit dír múk xoorduwo. Ya/abtoorí a iidíguú daqaari’iimár Kristo tidá’ faarooro ta aleeslayká. ⁹ Nee án gár tiwa hariím a lu/aaráydá’ Mungú i tleehhamór wa slai, loohír ir tleehharuuti aníng an gwa/atimís dír múk i alé. Iimír iimu/uungo Mungú, kudá’ mura’ sleémeero gwa tleehh, kaangwí guna luú/. ¹⁰ Gár geeraawo ngusa luú/, a as sagaalooarós ar yaariir ngiwa xu’utisi qoomaarihe dír waawitá nee dír kudá’ aleesleemuú koomá’ baraá yaamaá qeeruuwo ar loohír mukdá’ inós gwa haratlintii’. ¹¹ Mungú tí sleémeero gana qaás iimír iimu/uungo baraá muunuúwós i alé, as ngiwa boo/eesi ar baraá Kristo Yesu, Aakoorén. ¹² Gawaá adoorihe atén Kristo bura haratlintiaán, daqaní atén a da’ayumitanaaká Mungú i tseewuwto ar baraawós, nee tari axweesaán nee Mungú ar wayda. ¹³ Ala án kuungá’ nu firiím ma mune siaara’ as adoorí án tiwa slahhe’eemisi as kuungá’. Asma slahha’amaayeerí a xirif dír kuungae. ¹⁴ Gawaá adoorihe gaarí an gár Baabá án ngusa i tumbarara’aáta nguri firiiriím. ¹⁵ Inós a Baabuú ló’ oo na/’ii sleémeero awa gawaá doori nee awa baraá yaamuuwo. ¹⁶ Án Mungú u firiiriím as /uuru nguwa kuungá’ i haniisi ar Qeeruuwós, baraá munerhunge, ar har qoomoó daqaari’iimár xirfuuwós, ¹⁷ as Kristo iwa baraá munerhúng wa hooti ar haratlintaao. Án Mungú u firiiriím gídaabá kuungá’ masók dee/aruuhúng nee ihhafiirirhúng i baraá sla’aari, ¹⁸ as sla’aarír Kristo kawa tsahha’ dinkwa nee múk Mungú sleémeero, adór sla’aarirós kar úr, bihhe nee tleenaango, nee tleenángw gawa, nee tleenángw baraywo. ¹⁹ Nee slám kawa tsahha’ sla’aarirós tidá’ xu’uti sleémeero ga baa/ as kawa yaariír. Gawaá adoorihe Mungú inósuú kilá’ kuungá’ nu ló’wa hatsiisi munguiimarose. ²⁰ Mungú inós i xirfuuti, kudá’ muruú waa/oo/amór yaariir gu tlehhiít ar /uuruudá’ baraarén wa gadiyuús, ta kudá’ sleémeero oo atén ta firiiriimaana laqaá ta inslaslaawaan. ²¹ Mungú i xirfuuti baraá mukose, as adoodá’ atén tiwa haragaás nee Kristo Yesu. I xirfuuti umuúqo qarto ay alhhe’eesay wasle. Amin.

¹ Áníng kuungá’ nun ló’wa firiiriím, aniíwí taa tseék as Aako, hooté’ ar adoodá’ hariím as ateetamoodá’ Aako kuungá’ nura ateét. ² Umuúqo daqto masók ti niinaweemisá’ nee tawa múk tsatsa’arén, nee oo qiqitliím, tam tiwa sa qiqitliinda’ ar baraá sla’aari. ³ Wakleeli’iimarhúng ló’wa harmagahhaak, tidá’ Qeeru naa haniís ar kuungá’ kiloohúng tawa baraá wayduú wa hota’. ⁴ Slaqwa a wak, tam Qeeru a wak, adoodá’ kuungá’ tundura ateét nee Mungú, as haraxu’utír wák kawa sleera’. ⁵ Aako a wak, nee haratlintaao a wak, nee slám baatiísmo a wak. ⁶ Mungú a wak, nee inós a Baabuú muu sleémeero. Inós i gawtí dirii’ dír muu sleémeerowo, nee i gadiyuus baraá muu sleémeeró wa ale, slám i baraá muu sleémeeró i dirii’. ⁷ Ala umuúqo heewo diirene kwaa tsuúq ar har qoomaydá’ Kristo aa haniís. ⁸ Gaarí an gár Gooi is kat gídaabá, “Ina tsa/án gawtí alé, múk taa baál baraá slaqwarár wa ale, nguri ar tsa/án, muu guri tsuqaá i hanmiís.” ⁹ Ala /aymuuwí gídaabárós a milá, kwí tawa kaahi, “Ina tsa/án”. Gídaabárós a ina ala geerí aweér sleeme baraá yaamaá baraay. ¹⁰ Kudá’ aa aweer an kudá’ aa tsa/an sleeme. Ina tsa/án gawtá kilá’ i alé, doori sleémeero gay waaraáhh, as mura’ sleémeero nguwa hatsiisi, as inós iwa deér. ¹¹ Inós aleesleemuú Qeeru ngwa haniís, bahh’alé tawa ya/abuuse nee bahh’alé tawa múk ya/abtór amór Mungú daáhh ga axweemamiís, nee bahh’alé tawa múk Ya/abtór hhó’ alki/iít. Nee slám bahh’alé tawa de’eamuuse nee intsaahhatuuse. ¹² Gadiyér’ín a tí, múk hhohhó’ oo Mungú kuwa amohhe’eemisi, as inooín Mungú nguwa sagadiyusiya’, as slaqwtá Kristo kawa kwa/amisi. ¹³ Nee gawaá adoorihe atén sleémeero wakleeli’iima a i hardahaán as Garmoó Mungú ugwa haratlintiaán nee ugwa xu’uti hhe’eesaán, tam atén tari kwa/aán baraá heeuumarene, ar uraydá’ ta slawaan as tawa ganaa’aan baraá Kristowo. ¹⁴ Daqaní atén a kumiitaanaaká adór na/’aá ninákw wa ale, tiwa kwakwaahhi nee gwanduú ma’aay umuúqo barto, nee tiwa huwahuwi nee fur’ár intsaahhatimisuú dimbadimbé oo lama, oo mukdá’ ti al/agiím. Inooín an kudá’ atén ti qwaareesár wa sla’á’ ar al/aymar’ín. ¹⁵ Ala atén gár tiwa hariím masók an hootaán ar baraá looeema ar loohír sla’aari. Gawaá adoorihe an uraarawaán ay dír Kristo ngway i hardahaan. Nee inós an saga. ¹⁶ Inós slaqwa sleémeero gan haragaas dinkwár i alé, gari dinkwár i nighhitis ar kanuúdá’ Mungú naa haniís. Inós umuúqo diqto gan aleesleemuú i hanmiis, gadiyeérós tidá’ taa haniís ngiwa tlehh. Gawaá adoorihe slaqwa sleémeero in uraareér, nee tiri kwa/amís ar baraá sla’aari. ¹⁷ Gawaá adoorihe án kuungá’ nun baw, slám nun gurbu’uúm kángw kilá’ wa ale ar baraá umuú Aako, gídaabá, ma kumiitara’ tawa hota’ adór múk xoordaá hatlá’ ar alé. Asma inooín inslaway’ín a tawo, ¹⁸ nee fuqurangw’ín i baraá giwtír i dirii’. Inooín dir’ín i káhh baraá slafingwdá’ Mungú i haniisi. Asma inooín gár i xuiya’ i káhh, slám ta ilaiwa/amér konká. ¹⁹ Inooín mure kaa máy, baraá slafingw’ine. Tari hoót baraá tlehhema’aá slisla/arén wa ale, ilatleerir’ín kari eeharahaár, ala taa ilaa/ii’iiká. ²⁰ Ala kuungá’ iidíguú Kristowo tunda adoosír intsaahhatimisiiká. ²¹ Kuungá’ iidíguú Kristo ugwa axasé’. Looeemaadá’ baraawós i diriiá’ kingari dirhúng i intsaahhatimís, asma kuungá’ tawa eeharuuseerós. ²² Gawaá adoorihe gár kuungá’ tunduwa hariím a slafingwhúng kudá’ oo aáng un meerá’. Munerhúng na warqesaak, ta adoodár aange, asma munerhúng aáng i baraá hhitiruumit as ilatleerír al/ayma. ²³ Munerhúng nee sla’aarirhúng ka /abeemaá i ki/isi. ²⁴ Munér /aben slawaak, ar taa tleéhh ar tlehhemuú Mungú, tidá’ ti laqaqaam ar slafíngw ganaá’ nee oo hhoohhoó’, slafingwdá’ looeemaá wa hariím. ²⁵ Gawaá adoorihe, lama mawaak. Kuungá’ looeema kilooín na axweesaak baraá tla/angwhunge. Asma atén sleémeero a diqoó slaqwtá wák, tidár Kristo. ²⁶ Kuungá’ bar aga buhhabuhhé’, ti harmagahhe’, tlakweema mi tleehhara’. Nee buhhtaasíng mindiwa baraá munerhúng wa kumiitiyé’ nee looa iri dát. ²⁷ Neetlaangw pa/aangw munguwa sláy oo ir dahi baraahúng i alé. ²⁸ Heé fisaasiím, fiiso ngi may, ala inós gár kuwa hariím gadiyér hhoo’ gan tleehh ar dabaawós awa kilá’, as gaa ngiwa slay ar liitlakuuse ngir alee/iisi. ²⁹ Axweesanoó tlákw mu kaahara’, ala masók a axweesanoó gídaabár koóm, kudá’ muu gu kwa/amís, nee kudá’ amoqwaareemisaaká. Gawaá adoorihe axweesanayhúng i tsuuqaá huuwi dír mukdá’ kuungá’ nu iiár i qamiima. ³⁰ Qeeruú hhoohhoó’ oo Mungú mu gurhaamír ar awaara’. Asma Qeeruuwós an duguno diirene ar atén tir tsaahhi gídaabá atén a mukós, bál deeloodá’ ar inós atén tiwa gweeri. ³¹ Ala kuungá’ magoódár baraahúng i dirii’ hingeesaak, nee xarslamaaye sleémeero, nee buhhta, nee kaantiingw nee /ooslisliingw, nee tlakweema sleémeero awa hatlá’ mindiwa deeruutiyé’. ³² Kuungá’ masók a múk tsatsa’aarén, nee tiwa sla’aasla’a’ kiloohúng alé. Ti kiloohúng gurtlatleere’ adoodá’ Mungú kuungá’ nura gurtláy baraá Kristowo.

¹ Kuungá’ a na/’aá Mungú, kudá’ inós i slai. Gawaá adoorihe inós na eeharaak. ² Hooté’ ar sla’aari, adoodá’ Kristo atén tira slaá’, tiri kilós haniís as atén, ilahhooár Mungú wa ale, tidá’ ta da/i, ar xarángw tsuú’ koom. ³ Ala tsaatu’uuma nee slasla/areemaá dimbadimbé, nee ilatleeri, muruuwí mukuwa baloó oó’ dirhunge, as kuungá’ tawa múk hhohhó’ oo Mungú. ⁴ Tam axweesanoó ilaiwa/ame wásl nee axweesanoó dakti’iima nee axweesanoó slasla/arén i harinká sleeme dirhunge. Ala gár kuungá’ tundu wa hariím, Mungú un sluufimisá’. ⁵ Kuungá’ /aymuuwí u xu’uti hhe’esá’, gídaabá, heé tsaatusmo waawuti’iimár Kristo nee Mungú ga baloó aaliiká, laqaá tam heé slafiingós slasla/arén, laqaá tam heé ilatleerusmo sleeme, asma inós i munguaá hatlá’ kón. ⁶ Hee munduwa al/aáy ar /ayma’aá gídaabár kooma’aaká. Asma múk ilaiwa/ame wásl sakwasleemár Mungú gun i hardarat as tlehhema’aá adoorí. ⁷ Nee múk adór kwí ma aldinku’uumisaara’. ⁸ Asma aáng kuungá’ a giwti, ala hamí a gwa/ateema asma kuungá’ tawa múk Aako. Hooté’ adór múk baraá gwa/ateema kuwa hariím hotaango. ⁹ Asma didár gwa/ateema i dirii’iya’ gár tleehharumiit a hhooeema sleémeero nee gan’amu nee looeema. ¹⁰ Gawaá adoorihe kuungá’ tsaahhaagáy gídaabá gár Aako gu sla’atimis a milá. ¹¹ Ma aldinku’uumisaara’ nee mukdá’ tlehhema’aá giwtír tlehhiít, kudá’ gídaabár kooma’aaká. Ala tlehhemi’iidá’ na geehhooeesaak. ¹² Asma muruudá’ ta tlehhahiti baraá lu/aaráy wa ale, tam kuwa axweesi a mure kángw kilá’ wa ale. ¹³ Umuúqo gaaro ar tinda huúw dír gwa/ateemaá i alé, adór i diri’ ka geehhooees. Nee umuúqo gaaro ar ta i gwa/aát nee gwa/ateema, i warqeér tari gwa/ateema. ¹⁴ Gaarí an gár tasa oó’, “Tláw, kuúnguudá’ guaiím, waasleé/ baraá múk aa qaátl wa ale, daqaní Kristo kuúng u i gwa/aat.” ¹⁵ Gawaá adoorihe, adór baraá slafingwhunge tar hota’ alqaytsitaak. Ma hootara’ adór múk daktanár ar alé, ala masók a adór múk sagaaloén. ¹⁶ Qoomaarí ta koonda’ ar gadiyuusaak, asma de’emaaká’ a de’emaá tlakweema. ¹⁷ Gawaá adoorihe ma daktana tleehhitaara’, ala masók an xuá’ gídaabá Aako gár i slai a milá ar ta tlehha’. ¹⁸ Xuftaaro ma kumiitara’, asma bar xufitá’, slafingwhúng sleémeero u qwaaresá’. Ala masók tundun hatsiis Qeeruú hhoohhooe. ¹⁹ Nee axweesé’ kiloohúng alé ar wara’ami nee daa’ángw bara/, nee daa’ángw baraá Qeeru. Daaé’ nee ta bar/á’ baraá munerhunge as Aako. ²⁰ Nee Mungú Baabá ku sluufimisá’ daqisleém as mura’ sleémeero ar baraá umuú Aakoorén Yesu Kristo. ²¹ Kuungá’ kiloohúng ti ilaiwawa/e’ as adoodá’ Kristo kur ilaiwawa/a’. ²² Kuungá’ tlaáwaay, hhawaateehúng ilaiwawa/aak, adór Aako kur ilaiwawa/a’. ²³ Asma hhawaata a ságw hare, adoodár Kristo tar ságw mukós. Nee inós a Ba/amusmooín sleeme, nee inooín an slaqwtós. ²⁴ Gawaá adoorihe, tlaawaay gár kuwa hariím, a hhawaateeín gin ilaiwawaa/ baraá umuúqo gaaro, adoodár múk Kríshaanáy Kristo ngur ilaiwawa/i. ²⁵ Kuungá’ hhawaáte, /ameenarhúng sla’aak, adoodá’ Kristo mukós ngura slaá’ sleeme, slafiingós guri duúx as inooín. ²⁶ Adoorí gana tleéhh as mukós nguwa hhoohhooeesi nee nguwa hamaatli ar ma’aay ar /uuruú axweesantós. ²⁷ Asma inós gár i slai a múk xirfuú koóm gun sláy, oo hhohhó’, nee oo tlakweemaá koomaaká, kudá’ gár slasla/aar ga koomaaká, kudá’ /ootsoo ga koomaaká, laqaá muruú dimbadimbé oo tlákw oo adór kwí, ala alók a múk hhohhó’ oo xaslxaanslír koomaaká. ²⁸ Gawaá adoorihe hhawaate gár kiwa hariím a /ameenar’ín kawa slai adór slaqooín kir slai. Asma heé hareerós ga slaá’, inós ti kilós slaa’. ²⁹ Heé slaqwtós gaa aahh i kaahh. Ala gan /aymiis, nee gan amohhe’eemiis. Adoorí an adoodá’ Kristo mukós ngur amohhe’eemisi. ³⁰ Asma atén a diqoó slaqwtós. ³¹ Asma Gooi i kat, “Gaarí an gár hee baabuúwós nee aayoorós ngis geexay, nee tari hoot nee hareerós. Nee kuká’ tsár tari slaqwtá wák.” ³² Lu/aaráywí ku úr. Ala án gár ni axwees a iidíguú Kristo nee mukós. ³³ Ala iidíguuwí i kuungá’ wa harín sleeme. Umuú heewo hareerós ngi slai adoodá’ inós kilós tir slai. Nee hare hhawaatuuwós ngu ilaiwawa/.

¹ Kuungá’ ná/’ii, xwaylitérhúng ilaiwawa/aak ar baraá Aako. Gaarí an gár hariím. ² “Baabuúwók nee aayo ilaiwawa/eek.” Hara’ayaarí an hara’ayaadár geera, tidá’ al’axweesantá koom. ³ Al’axweesani a tí, “as amohhooa kawa sleer tawa hot deelór yaariire baraaká’ yaamuuwo.” ⁴ Kuungá’ xwaylité, na/’iihúng mi buhhtimisara’, ala geeraharaharaak ar baraá ilaiwa/ame, nee kiwa naanaqá’ ar baraá Aako. ⁵ Kuungá’ lawaále, kuungá’ daqaarerhúng tidá’ ta sagadiyusa’ ilaiwawa/aak, ar muunuú /awaák, ar dae nee daaraxaay, adoodá’ geera Kristo kur sagadiyusa’. ⁶ Kuungá’ masók a adór lawaaleedá’ ilaá maaqumiisaaká. Ti harafade’ tawa lawaalér Kristo, kudá’ sla’aarír Mungú ngi tlehhiitá’ ar muunuú /awaák. ⁷ Gadiyérhúng tleehhaak ar muunuú hhoó’, masók a adór lawaalér múk sagadiyuusaaká, ala masók a adór lawaalér Aakoó sagadiyuus. ⁸ Inslawaak gídaabá umuúqo heewo oo hhooeema gaa tleehh, slasláwarós ga slay dír Aakoowo, barnaxes a lawaalmo, laqaá tam lawaalmoowooká. ⁹ Kuungá’ daqaáre, gár kuungá’ tunduwa hariím sleeme, aqo tí an tlehhá’ sleeme dír lawaalerhunge. Lawaalerhúng ma dae tlaaqara’. Nee xuaak gídaabá kuungá’ nee inooín Aakoohúng a wak. Inós i gawaá doorí dirii’. Dirose barqaanti i káhh. ¹⁰ Gimsé’, ilakaaharu tleehhaak baraá Aakoowo, nee baraá aleesleemuú /uuruuwose. ¹¹ Xoslaá slaqwarár Mungú sleémeero oohaak, as al/aymár Neetlaangw daqaní ila/aaro a aleesleerá’. ¹² Asma wakuusér nee atén slaqwá’ a mukooká, ala a waawitá nee kudá’ aleesleemuú koomá’, kudá’ waawuti’iimá’ daanduú yaamuuká’ giwtír kooma’a, nee neetlaamér tlakw ar baraá yaamaá qeeru. ¹³ Gawaá adoorihe xoslaá slaqwarár Mungú sleémeero oohaak. Deeloodá’ tlaakw bál binda hardát, daqaní wakusmoodá’ u aleesleerá’ kuwa baqa’, nee arba/ato bura hhe’esé’, ta sihhitano hhe’esá’. ¹⁴ Gimsé’, ti amohhe’esé’. Siinootayhúng a looeema. Gaambór ta da/eewár qoomesa’ a gan’amu. ¹⁵ Nee ya/ataá ta dahasa’ a sla’aaridá’ Ya/abtór hho’ ar wayda kawa alki/ita’. ¹⁶ Nee gaambór ta koonda’ umuúqo qoomaaro masók a haratlintaao, nee gaamboósinge daqaní kuungá’ maheeri sleémeero awa Neetlaangw, kudá’ asltá koomá’, i aleesleerá’ baqto. ¹⁷ Ba/ama oohaak sleeme, tawa kofiíyár gawit ar ta ságw i qasa’. Nee paángár Qeeru oohaak, an axweesantá Mungú. ¹⁸ Muruuwí sleémeero tlehhiitaak ar baraá firo, tawa firiiriinda’ umuúqo daqto ar /uuruú Qeeruú hhoohhoó’. Gawaá adoorihe dalaaé’ tawa kumita’ baraá firooro, múk hhohhó’ oo Mungú sleémeero kuwa aleefiriiriinda’. ¹⁹ Aníng sleeme aleefiriiriimaaré’, as axweesanoó ni oo’ nguwa slaw nee aleesleemu, oo lu/aaroó Ya/abtór hho’ nguwa alki/iit ar pihhu’uuma. ²⁰ Aníng a ya/abusmoó Ya/abtoorí hho’, ala tam taa tseegi. Gawaá adoorihe, án aleefiriiriimaaré’ as Ya/abtoorí hho’ ngi axwees ar pihhu’uuma adoodá’ án iwa hariím. ²¹ Iidíguueé’ bur sla’á’ nee adór nir kumiit, Tikiko ngu alki/iiti. Asma inós a hhiya’ oo sla’aarsumo, slám i inkihhmuúb kón baraá gadiyér Aakoowo. ²² Án inós ngun amorhúng i ya/aáw as kuungá’ iidíguurén kuwa axasa’ nee nuwa gurkwa/asi. ²³ Wayda masók i dír hhae sleémeero, nee sla’aari nee haratlintaao, kudá’ amór Mungú Baabá daáhh, nee amór Aakoorén Yesu Kristo. ²⁴ Mungú muu sleémeero ngu tsuuqi, kudá’ Aakoorén Yesu ngu sla’á’ ar sla’aarír faakaaká.