3 YOHANA

¹ Anínguú aako, barwaárí ngina amoorók i gooiím, sla’aarusmooeé’ Gáyo. Aníng kuúng un slaá’ ar baraá looeema. ² Sla’aarusmooeé’, án kuúng un aleefiriiriím as adór hhoo’ kawa ar hot, nee slaqwtók masók ka hhoo’, adoodá’ muunuúwók kur hhoó’. ³ Aníng ana ló’wa qwalaá/, asma hhaeekaari niwa hardihiyé’, iidíguuwók nguri lamabu’uné’ diirene adór kuúng looeema kira ót, nee adoodá’ kuúng tar hot baraá looeemá wa ale. ⁴ Qwal/amaayér ur ar tí ga baa/ i káhh, tí naa axaás ar gídaabá na/’iieé’ i baraá looeema. ⁵ Sla’aarusmooeé’, kuúng tu iialoó’ baraá umuú gadiyér taa tlehhi as hhae, tam as hhaeedá’ dahaayeero sleeme. ⁶ Inooín hhooeemaawók kina alki/iít dír múk Kríshaanáy. Xa, inooín alee/iiseek, adór hariím dír geerá Munguhe, as iwa kumiitiya’ baraá aaii’ine. Daqaní adór hhoo’ aga tléhh. ⁷ Asma inooín tindina tláy as Yesu, nee gár taa sláy i káhh amór múk xoordaá hatlae. ⁸ Gár atén tiwa hariím a múk adór kwí un ilaohiimaán, as gadiyér’ín tidár looeema aga haratlaa/aán. ⁹ Kángw naa gooiím amór múk Kríshaanáy i deer, ala Diotrefe, kudá’ uroó slaá’ dir’ine, inós atén taa aleeya/aniká. ¹⁰ Aníng bir na hardáh, kaangós kudá’ aa tleéhh ngu dirhúng i alki/iít, adór inós axweesanoó tlákw oo dakti’iima ngura daanduurén i aaín. Slám a har tiheeká, asma inós hhae gina sií’ ilaooharo, tam mukdá’ gi ilaoohár wa slaá’ guna ilaá/ sleeme, guri paraátl dír múk Kríshaanayhe. ¹¹ Sla’aarúsmo, tlehhma’aá tlakw mi eeharaar, awa hho’ na eehareek. Heé tlehhma’aá hho’ gi tlehhiít a heé Mungú. Ala heé tlehhma’aá tlakw gi tlehhiít, Mungú gwa ariiká. ¹² Demetrio ku lamabu’úngw hhoó’ i kah nee muu sleémeero. Tam looeemaá kilá’ sleeme ngu lamabu’uná’. Ala atén sleeme un lamabu’uumaán, nee kuúng a xú’ adór gár atén ta kaahaan tar ar ló’. ¹³ Muruú yaariír oo ni kuúng i ooár wa slaa’ i deer geeraawo. Ala ngu ooaaká ar nguwa gooiim ar wiíno nee kalaámu. ¹⁴ Asma baraá deeloorí tseewe aníng ni hardahamuú slaá’ amoorók i alé, daqaní a afér ar axweesaán. ¹⁵ Wayduú Mungú masók i dirók. Mulqeerén i kuúng intsihhiimís. Mulqeerén intsihhiiseek, umuú heewo ar umuuwós.