2 TIMOTEO

¹ Anuú Paulo barwaárí ngina gooiím. Aníng a ya/abusmoó Kristo Yesu, ar adoodá’ Mungú aa slaá’, as slafingwdá’ taa geerí al’axweés nguwa alki/iit, kudá’ baraá Kristo Yesu i dirií’. ² Barwaárí ngina gooiím amoorók Timoteo, garmaaeé’ oo sla’aarusmo. Mungú Baabá nee Aakoorén Kristo Yesu kuúng u tsuuqi, nee u gurtlay, nee u waydí haniisi. ³ Mungúwí ni sagadiyuus ar muunuú hhoohhoó’ iimír taati’iieé’ wa ale un ló’wa sluufimiís. Aníng kuúng u baloó gunqareesaaká aleefirooro tlaatla/aangw nee xweeraawo. ⁴ Hhirhheeriwók bira insláw, aníng gár ni slaa’ ló’wa ale a kuúng un ár, as kahhoó’ muunuúeé’ i haats qwal/uuwo. ⁵ Asma aníng a xuú’ adór kuúng Mungú kura haratlintí’ ar haratlintaaór waaqooda wasl. Haratlintaaoorí geeraawo aamaarók Loisi gan koón, nee aayoorók Eunike. Slám aníng a xuú’ adór kuúng kar koón sleeme. ⁶ Gawaá adoorihe aníng kuúng u inslawtís gídaabá aleesleemuuduú Qeeru oo baraawók i dirií’ dukeek i doogin, kudá’ Mungú naa dirók i haniís qoomár aníng kuúng uwa dabaaeé’ i qaás. ⁷ Asma Mungú muunuú dae ngwa atén i haniisiiká. Gár naa haniís a muunuú tawa kumiitaan /uuruú ar alé, nee oo sla’aari nee oo qoomoó koóm. ⁸ Aakoorén lamabu’uungo mu sa murumiitaar, tam aniíwí taa tseék as inós mi sa murumiitaar sleeme. Ala burtu slahhe’eemiis asma Ya/abtór hho’, kuúng qiítl adoorír aníng wa ale, ar /uuruú Mungú. ⁹ Inós atén tina ba/amís, tiri ateét ar ateetamór hhohho’. Adoorí gana tleéhh, a gídaabaheeká as tlehhemi’iirén, ala gana tleéhh as adoodá’ inós aa slaá’, nee as gurtleemuuwós. Gurtleemuuwós kwí nguna haniís ar baraá Kristo Yesu iimír qoomaadá’ gár taa iimu/ún iwa kahh. ¹⁰ Hamí gurtleemuuwí kunguna geehhooutís as hardahamuú Ba/amusmoorén Kristo Yesu. Inós gwa’ara gana baál, slafiingw nee hhituru’uuma wasle giri gwa/atís ar Ya/abtór hho’. ¹¹ Ya/abtoorí hho’ an tidá’ aníng tisa qaás tawa alki/itusmo nee ya/abusmo nee intsaahhatusmo. ¹² Gaarí an gár án nis adoorír slahhahhaa’. Ala aníng a murumiitaaká as slahha’amkwí, asma heedaádá’ aníng naa haratlintií’ u xuú’. Nee slám aníng a xuú’ gídaabá gadaádá’ inós naa aníng i haniís, de’eengo ga aleesláy ay bál alhhe’eesaay. ¹³ Intsaahhatimisuuduú ló’, kudá’ taa dir’eén wa axás ilaooheek, ku adoodár intsaahhatimís. Baraá slafiingoge hoót ar Yesu Kristo kuwa haratlintati’ nee kuwa sla’. ¹⁴ Muruudá’ hhó’ oo tinda kuúng i saayín nee Mungú harmagahheek ar /uuruú Qeeruú hhoohhoó’, kudá’ baraarén wa hoót. ¹⁵ Kuúng a xú’ adór mukduú baraá yaamaá Asia ira geexáy sleémeero, tam Figelo nee Hermogene sleeme. ¹⁶ Aako múk doó Onesiforo ngu gurtleemuú i haniisi. Asma daqtá yaarire inós aníng i gurkwa/mamis, tam tsegmueé’ kwí aníng tiwa tseék gusa murumiitiiká sleeme. ¹⁷ Qoomár inós iwa Rumír i hardáh, ina leelehhahhiít, iri sláy. ¹⁸ Kuúng a ló’wa xú’ adór inós aníng ira sagadiyuumaamiís baraá yaamaá Efesooro. Aako inós ngu gurtleemuú i haniisi Bál alhhe’eesaywo, gurtleemuudá’ amór Aakoó daáhh.

¹ Ala kuúng, garmaaeé’, Mungú kuúng u tsuuqaá i hanmiis ar baraá Kristo Yesu. Gawaá adoorihe, kuúng masók a heé /uuruú koóm ar tsuuqaaká’. ² Kuúng aga axás tidá’ sleémeero aníng naa intsaahhatimís dír geerá múk wa ale. Kuúng intsaahhasarí ka qás dír dabaá múk inkihhimuú koóma i alé, kudá’ aleesleemuú koóm oo múk hatlá’ intsaahhasaro gu aleesláw. ³ Qiqtliím baraá slahha’amuú wa aleeró dinkwa nee aníng, tawa adór askaarmoó hhoó’ oo Kristo Yesu. ⁴ Askaarmoó baraá slaqwarár i dirií’, i dahiiká baraá daawitimér muruú hatlae, asma gár i slai a geeraharusmoowós kudá’ úr kilós gun sla’atimis. ⁵ Tam heé qwaátl baraá neetooro, slamaangw gu slayká barnaxes aa qwaatliiká ar adór hariím. ⁶ Dooslusmoodá’ gadiyeét gaa tleehh ar /uuru, inós gár kuwa hariím a bu’ungwduú gadiyeérós gun geerí /aay. ⁷ Tí án ni kah aldakuuteek, asma Aako sagaalooa ngi haniis dirók i alé ar mura’ sleémeero kur tsahh. ⁸ Yesu Kristo na inslaweek. Inós a heé tlahhoó Daudi, nina waasleé/ baraá múk aa qaátl wa ale. Gaarí a Ya/abtór hho’ ar aníng ni alki/aa/iit. ⁹ Aníng tin slahhe’eemiis as Ya/abtoorí hho’, slám taa tseék tawa adór heé tlaákw. Ala axweesantá Mungú kaa tseegiiká. ¹⁰ Gawaá adoorihe aníng umuúqo gaaro an qiqtliím as múk taa tsawaár oo Mungú, asma inooín sleeme masók alhhe’eesaywo ba/amadár baraá Kristo Yesu i dirii’ ngiwa slaya’, dinkwa nee xirfuudá’ alhhe’eesay wásl. ¹¹ /Aymuuwí i harín haratlintaaooro gídaabá, “Atén bar ana alqatlaán dinkwa nee inós, a alhootaán dinkwa nee inós sleeme. ¹² Atén bar aga qiitlaán, a alwaawuti’iimaán dinkwa nee inós sleeme. Atén inós bura sa tlaankaán, inós sleeme atén ti sa tlaank. ¹³ Atén bar inkihhimuúb koomanaaká, ala inós inkihhimuuwós i baloó faakiiká, asma inós kilós ti aleeslayká sa tlaankuuwo.” ¹⁴ Mukók inslawtiseek muruuwihe, naanaqeek dír geerá Mungú wa ale gídaabá, axweesanoó tlaampa’aamis kuwa may. Asma tlaampa’aamis i gídaabár konká, slám mukdá’ axamiís gu qwaarees. ¹⁵ Kuúng ilakaaharu tleehheek as tawa sihhit dír geerá Mungú i alé, tawa adór sagadiyusmoó taa ya/án nee inós, sagadiyusmoodá’ mure wásl daanduú gadiyeérose, sagadiyusmoodá’ axweesantá looeema gaa intsaahhatimis ar adoodá’ hariim. ¹⁶ Kuúng ti paratl nee axweesanoó gídaabár koomaaká, kudá’ múk Mungú gwa haratlinti’iiká i axweemaamisi. Asma múk adoorí tan ak sawees dír Munguhe. ¹⁷ Nee intsaahhasar’ín in geerí kumít adór inkahhoó sooní. Baraá tla/ángw mukwihe Himenayo nee Fileto i dayá’. ¹⁸ Inooín loohidár looeema ngaa mayé’. Asma inooín ta kaahi gídaabá, “Waasle/ naa qaroó hardáh.” Nee gawaá adoorihe haratlintaaór muu bahh’alé kari qwaareés. ¹⁹ Ala iimu/úngw haratlintaao aa sihhiít, kudá’ Mungú aa qaroó qaás. Iimu/uungwí layár kway gooín a tí, “Aako mukós gu xuu’,” nee slám “Umuúqo heewo oo umuú Aako gu ateetiím, tlakweema ngi may.” ²⁰ Baraá doó ure xooslár dáw a tidár miisli nee muqsla kiloseká, ala tam xooslár peehháy sleeme i deer, nee ar hhape. Xosluuká’ taa geerí oó’, kaa qaás as gadiyér xirfuú koom, nee kuká’ hatlá’ kaa qaás as gadiyér ak xirfuú koomaaká. ²¹ Ala hee bir taa hhoohhooeés nee tiri paraatl nee muruuwí tlákw kwí naa alki/iít, inós daqaní a xooslmoó taa qaás as gadiyér xirfuú koom, kudá’ taa hhoohhooeés, oo Aakoó do’dá’ wa hariím, nee slám a kudá’ hariím baraá umuúqo gadiyér hhooe. ²² Ala kuúng ilatleeridár masoombi’iima ilaguweek. Ilakaaharu na tleehheek gan’amu kuwa sleer, nee haratlintaao, sla’aari nee wayda. Adoorí na tleehheek dinkwa nee mukdá’ Aakoó ateetiím ar muunuú hhoohhoó’. ²³ Ala kuúng ma haragwaa’aar baraá tlaampa’amisuú dakti’iima, kudá’ sagaalooa wásl, asma a xú’ gídaabá tlaampa’amisuuwí gár i huwi a gila. ²⁴ Ala lawaalmoó Aako miwa gilá a’áy. Ala masók a heé hhoó’ dír umuúqo heewo. Slám masók a intsaahhatusmoó hhoó’, nee heé qiqtlíngw baál. ²⁵ Slám masók inós a heé tsatsa’aár, qoomár bar i mukdá’ qwatsín, oo inós gu tlaampa’amiís. Asma Mungú dooqa mukwí gu hhu’u’úngw i haniis, nee looeema ngiri tsaahhiyá’. ²⁶ Gawaá adoorihe inooín sagaalooa ka slay, nee tawa ti’iiti baraá tsaaxweelidár Neetlaango. Asma inooín kaa tsegiít baraá tsaaxweelidá’ i alé, as sla’aarír Neetlaangw ngiwa tlehhiitiya’.

¹ Ala axweesanaywí xueek gídaabá, bál deelór alhhe’eesaay binda naká/, qoomár slafíngw gawít i hardát. ² Asma qoomaadá’ binda hardát, muu a múk ti kilooín slaá’. Slám muu a múk peésár slaá’, nee a múk ti kilooín xirfayeemiís. Muu a múk daara/aám, nee a múk múk /ooslisliím, nee múk xwaylitér’ín ilaiwawa/aaká, nee múk sluufaay wásl. Nee slám a múk hhohhoeká. ³ Slám a múk múk maray’ín sla’aaká, a múk wayduú sla’aaká tlehhmuuwo. Nee slám inooín a múk /ayseenuuse, múk slaqooín ila/aamaaká, múk xaraásl, múk hhooeemaá sla’aaká, ⁴ múk múk sakikií/, múk siduuse nee daar/uuse, múk muruú baraaká’ yaamu gu ak slaá’ ta Munguhe. ⁵ Inooín bir ga/eér a adór múk Mungú, ala /uuruú Mungú ku ya/a/anká. Kuúng ti paratl dír múk adór kwihe. ⁶ Asma baraá múk adór kwihe, hhawaate i dayá’ awa ti dahamiisá’ baraá maraá múk i alé, nee /ameenár daktanaay kawa afa /aslin, tidá’ tlakweema ngaa al’iilouye’, nee kiwa uuruxun nee ilatleerír dimbadimbé. ⁷ /Ameenár adór tí daqisleém gár inooín ta slai a intsaahhasa. Ala xu’utír looeema i hardaharo ka baloó aleeslayká. ⁸ Adoodár aáng Yane nee Yambre tira tlaampa’aamisiyé’ nee Musa, adoorí an adór hhawaateeká’ sleeme tir tlaampa’aamisiya’ nee looeema. Mukwí a múk aa fuqureema hhitiruumiit, slám haratlintaaor’ín i qoondaaká. ⁹ Ala inooín geerí kumita ka aleeslayká ak alé. Asma daktu’uumar’ín i geehhoouúr dír muu sleémeerowo, adór daktu’uumadár Yane nee Yambre ira geehhoouúr. ¹⁰ Ala kuúng aníng iga eehát baraá intsaahhasar’eene, nee digir wakeetingw’eene, nee adoodá’ án ni slaa’ baraá slafingw’eene. Nee slám haratlintaaor’eé’ aga aán, nee daamaarangw’eé’, nee sla’aarir’eé’ nee qiqtlingw’eé’. ¹¹ Nee slám án kuúng ina eehát baraá gusisingw’eene nee baraá slahha’amaayer’eene, adór muruudá’ naa sláw baraá yaamaá Antiokiár wa ale, nee baraá Ikonio, nee baraá Listra. Gusisíngw yaariír una sláw. Ala Aako aníng ina ba/amís baraá muruuwí sleémeerowo. ¹² Mukdá’ sleémeero oo hotángw ilaiwa/ame gu slaá’ nguwa ar hootiya’ baraá Kristo Yesuwo aqo kin gusisín. ¹³ Ala múk tlákw nee al/aymuuse ta ak geerí kumiit baraá tlakweemaawo. Inooín in al/aginá’, nee slám inooín awa kilá’ kaa al/aáy. ¹⁴ Ala kuúng a inkihhimuú koón baraá looeemaadá’ tuwa intsaahhatimisi nee kudá’ kuúng taa ya/aán, asma kuúng a xú’ gídaaá heé kuúng uga intsaahhatimis a heemá. ¹⁵ Asma iimír na/u’uumaroge kuúng Gooír hhohho’ a xú’, tidá’ sagalooa ngi kuúng i hanmiis, as ba/ama kawa sleer ar loohír Kristo Yesu kuwa haratlinti’. ¹⁶ Gooi sleémeero i hiinsluú Mungú koón, nee i hariín muu nguwa looeemaá i intsaahhatimis, nee muu nguwa afa dukuun nee nguwa naanaq, nee slám muu nguwa geeraharahat as slafíngw ganaá’ kuwa ar hooti. ¹⁷ As daqaní heé Mungú iwa boo/i nee kuwa amoohhe’eemisi as umuúqo gadiyér hhoo’ ngiwa tleehhi.

¹ Aníng kuúng u hara’ayiyiím dír geerá Mungú wa ale nee dír geerá Kristo Yesu, kudá’ múk slaáf gu sakwasleemuút, nee kudá’ aa qaatl. Slám u hara’ayiyiím asma hardahamuuwós nee waawuti’iimarós gídaabá, ² Axweesani alki/iiteek, tiwa amohhe’es qoomaadá’ hariima nee qoomaadá’ hariimaakahe. Tlakweemaá muu geehhooutiseek, iigahhamiiteek, naanaqeek ar qitla sleémeero, nee kiwa intsaahhatimis. ³ Asma qooma i hardát ar muu intsaahhatimisuuduú ló’ nguwa si’i. Aluuwo intsaahhatuuser’ín ar yaariir kari leeleehh ar adoodá’ inooín ta slai, as intsaahhatimisuudá’ inooín ta slai kuwa axamisi. ⁴ Inooín kari sii’ tidá’ ló’ axaasaro, nee tiitár lama kari i warqáy. ⁵ Ala kuúng masók tin harmagáhh baraá mura’ sleémeerowo as tidá’ ló’ kawa eehat. Kuúng qiqtliím baraá slahha’amuú ta sleera. Ya/abtór hho’ alki/iiteek tawa gadiyeérók. Gadiyeérók boo/eeseek. ⁶ Asma aníng daxta ti ilahhooár wa haniis, nee qoomár gwa’arar’eé’ naa hardát. ⁷ Slaqwarár hhoo’ aga slaáqw, qwaatlo aga faák, nee haratlintaao aga xuúm. ⁸ Nee hám daxta gár aa met a slamangwduú gan’amu kunguwa tseegi, oo taa aníng wa amohhe’eés, kudá’ Aako ni haniisi Baldae. Inós a sakwasleemusmoó ganaá’. Ala heé slamangwí gu sláw a aníng kilooeeneeká, ala tam kudá’ sleémeero awa hardahamuuwós ngu haraxuuá’ ar qwal/amaaye. ⁹ Ilakaaharu tleehheek niwa amor’eé’ hardat ar gaanslaay. ¹⁰ Asma Dema muruú yaamu guna slaá’, aníng iri geexáy, iri tláy ay Tesalonike. Kreske aa yaamaá Galatiár i tláy. Tito sleeme aa yaamaá Dalmatiár i tláy. ¹¹ Luka kilós in diirí, an heé aa dir’eéní meet. Marko leelehhang, nee kuúng ni alhardatá’, asma inós a alee/isusmoó hhoó’ dir’eene. ¹² Ala Tikiko ugwa ya/aáw Efeso. ¹³ Hiyay’eé’ kudá’ naa geexáw dír Karpo baraá yaamaá Troa, bindi amoorí keér, huwang, nee kitaabi’iidá’ sleeme, ak alé kudá’ kaahari. ¹⁴ Iskanda, kuduú kareermo, adór tlaakw gaa ló’wa tleéhh dir’eene. Maweek Aako gu li/áyc buu’ as tlehhemi’iiwós kudaádá’. ¹⁵ Ala kuúng ti harmagahh dír heesinge, asma inós axweesanayrén guna ló’wa sií’. ¹⁶ Heé aníng iga lamabu’un i kaahh tam oo wák baraá kwasleemar’eene bál har geeraawo. Ala sleémeero ina geexayé’. Ala tlakweemaaká’ mikiwa daandeemooín i harafaár. ¹⁷ Ala Aako ina sihhiít dinkwa nee aníng, aníng iri /uuruú i haniís. Asma Aako gár i slai a Ya/abtór hho’ sleémeero kawa alki/iiti nee aníng, as múk xoordu sleémeero ngiwa axaasi. Aníng tiri ba/amís baraá afkwá dirángw wa ale. ¹⁸ Aako aníng i ba/amis baraá umuúqo /aymuú tlaakwe, nee iwa amohhe’eemisi ay dír ni hardah baraá waawuti’iimarós ar gawaá doori. Inós i xirfuuti ay alhhe’eesay wasle. Amin. ¹⁹ Priska nee Akila intsihhiiseek, nee múk doó Onesiforowo. ²⁰ Erasto ina meét yaamaá Korintór i alé. Trofimo una geexáw yaamaá Mileto, asma i tiiq. ²¹ Kuúng ilakaaharu tleehheek niwa hardat dír qoomár tsaaqwa nira xeeriiká. Eubulo i kuúng intsihhiimiis, nee Pude, nee Lino, nee Klaudia, tam hhae sleémeero. ²² Aako muunuúwók ngu de’en. Aako kuungá’ nu tsuuqi.