2 TESALONIKE

¹ Ánuú Paulo nee Silwano nee Timoteo barwaárí ngina gooiimaán amór múk Kríshaanáy oo baraá yaamaá Tesalonike, kudá’ baraá Mungú Baabá i dirií’ nee baraá Aako Yesu Kristo. ² Mungú Baabá nee Aako Yesu Kristo kuungá’ nu tsuuqi nee nu waydí haniisi. ³ Hháe, atén gár tiwa hariím a Mungú un sluufimiisaán umuúqo deelooro as kuungá’. A gár hariím adoorí atén kawa tleehhaan, asma haratlintaaorhúng aa ló’wa tláhh, nee slamtí aga ló’wa uraareeré’ baraá sla’aarír kuungá’ tiwa kiloohúng sla’asla’a’. ⁴ Gaarí an gár ataá kilá’ xirif kus ara’araan daanduuhunge dír múk Kríshaanáy oo baraá yaamaá hatlae. Atén xirif un ara’araán as adoodá’ kuungá’ tawa kumita’ baraá haratlintaaooro. Asma gusisiingw sleémeero u qiqitliindá’ nee slahhe’eemisuudá’ ta slasleera’. ⁵ Gaarí gár i laqaqaan a gídaabá Mungú sakwasleemár ganaa’ ga tleehh. Sakwasleemarí gár i laqaqaan a gídaabá kuungá’ a hariindá’ waawuti’iimár Mungú kawa sleera’. Asma kuungá’ tunduna slahhe’eemiís as waawuti’iimarí. ⁶ Mungú gan’amu gun tleehh. Mukdaádá’ kuungá’ naa slahhe’eemiis, inós gun slahhe’eemiis tawa bu’utuuín. ⁷ Nee kuungaásingá’ tunda slahhe’eemiís, inós amohhooa ngari dirhúng i haniis, dinkwa nee atén. Adoorí in tleehharút qoomár Aako Yesu burkwa geehhooeés gawaá doorí wa ale dinkwa nee malaykeerós ar aleesleemuú koom. ⁸ Qoomaadae tsángw asla iri deeruut. Inós mukdaádá’ Mungú gwa xuiiká guri sakwasleemuut, nee kudá’ Ya/abtór hho’ ar Aakoorén Yesu nga ilaiwawa/i’iiká. ⁹ Sakwasleemar’ín a kin qwaarees ay alhhe’eesay wasle, gídaabá kin paraatl dír gitsee/aá Aakoowo nee xirfuú aleesleemuuwós. ¹⁰ Adoorí in tleehharút bál deeloodá’ ure, qoomár inós binda hardáh as inós kuwa diidi’iimisi nee mukós kudá’ hhohhó’, nee kuwa xirfeemisi nee mukdá’ sleémeero oo inós gwa haratlintii’. Kuungá’ sleeme a deer baraadae, asma kuungá’ lamabu’ungwrén una haratlintié’. ¹¹ Gawaá adoorihe gaarí an gár kuungá’ atén nus aleefiriiriimaan umuúqo deelooro, gídaabá Mungú kuungá’ nu harafaari tawa hariinda’ ateetamoorose. Kuungá’ a hhooeemaá sla’á’. Atén Mungú un firiiriimaán gídaabá inós hhooeemaasíng ngi boo/eesi baraá munerhunge. Nee slám gadiyérhúng tidá’ sleémeero ar haratlintaao ngiwa boo/eesi. ¹² Gawaá adoorihe umuú Aakoorén Yesu ku xirfayeesi baraahúng wa ale, nee kuungá’ tundu xirfayeesi baraawós wa ale, ar loohír gurtleemuú Mungúrén nee Aako Yesu Kristo.

¹ Ala hám daxta, hháe, iidíguú hardahamuú Aakoorén Yesu Kristo u alqaytsitaán, nee adoodaádá’ atén tar burumburiitaan dír geeraawós i alé. Atén kuungá’ nun firiimaán ² gídaabá mutunduwa hhaawiís ar gaanslaay, laqaá mutunduwa dae tsaát ar iidíguudá’ káh gídaabá deeloodár Aako hamí i hardát. Múk adoorír axweés, inooín ka xui aaru’uuma kana ár, laqaá axweesanaay kuna axaás oo amoorén daáhh, laqaá barwár kah ar gídaabá i amoorén dáhh. ³ Umuúqo heewo munduwa al/aáy ar umuúqo loohiro. Asma deeloodá’ i hardatká ay dír dee/aanuudá’ Mungú kuwa si’i ay dír ni iimu/un, nee Heedá’ Tlaákw, kudá’ ta sakwasleemuuti, ay dír i geehhoouy. ⁴ Inós a Wakaarusmo, inós tin oo úr tlehhiit dír muruudá’ sleémeero muu i sluufimiisi adór mungi’ii’ín wa ale. Slám ti ureemiis dír muruudá’ sleémeero oo hhohhoe. Nee inós in baraá Doó Mungú i iwtanángw aa’áy, iwa kaahi, “Aníng a Mungú.” ⁵ Ahaá, kuungá’ a insleera’akáhe? Baré muruuwí aníng nguna kuungá’ báw qoomár án tawa dinkwa nee kuungá’. ⁶ Gár inós gu ila/aam i deer gídaabá mindiwa geehhooúy qoomaarihe. Ala gár gu ila/aam kuungá’ a xuá’. Qoomaadá’ taa qaás barnaxes aa bó/, Heedaádá’ Tlaákw iri geehhooúy. ⁷ Ala Heedá’ Tlaákw i gadiyér tleehh ar baraá lu/aaráy tam hamí, ay dír heedaádá’ ga ila/aám kway hingeesi. ⁸ Qoomaadá’ an qoomár Heedá’ Tlaákw tiwa geehhooeesi ar gaanslaay. Qoomaadae Aako Yesu niri hardah iri geehhooúy ar baraá xirif, nee Heedá’ Tlaákw guri gaas ar hiinsluú afkós. ⁹ Heedá’ Tlaákw nin hardah ar /uuruú Neetlaangw, nee inós umuúqo gár waa/oo/amór koom ga tleehh, nee layaá al/ayma. ¹⁰ Nee umuúqo loohír al/ayma gari tleehh as ngiwa qwaareesi kudá’ sleémeero awa baraá loohír qwanáy i diriiá’. Inooín tan qwaar asma looeema kaa slaiiká ilaooharo, looeemaadá’ geeraawo inooín ngi ba/amisá’. ¹¹ Gaarí an gár Mungú inooín ngisa ya/án kiwa qwaareesi, asma inooín lama kana haratlintií’ hariímár looeemaá wa ale. ¹² Gawaá adoorihe kudá’ sleémeero awa tlakweema ngaa sa qwalaala/iye’ kin sakwasleemuut, asma looeema nga haratlinti’ii’iiká. ¹³ Hháe, kuungá’ Aako nu slaa’, nee atén gár tiwa hariím a Mungú un sluufimisaán umuúqo daqto as kuungá’. Asma Mungú kuungá’ nuna tsawaár iimír iimu/uungo as ba/ama kawa sleera’ ar loohír Qeeruú hhoohhoó’, kudá’ kuungá’ nu hhoohhooeemiís, nee ar loohír looeema kiwa haratlintié’. ¹⁴ Mungú kuungá’ nuna ateét as tí kawa sleera’ ar loohír Ya/abtór hho’ ar atén naa kuungá’ i alki/iitaán, as kuungá’ xirfuú Aakoorén Yesu Kristo kuwa sleera’. ¹⁵ Gawaá adoorihe, hháe, kuungá’ gawduwé’ baraá haratlintaaooro. Intsaahhasa sleémeero oohaak, tidá’ atén naa kuungá’ i intsaahhatimisaán baraá alki/ituurén nee baraá barwaárene. ¹⁶ Aakoorén Yesu Kristo inós u kilá’ nee Mungú Baabuúrén, kudá’ atén ti slaa’, nee slám gurkwa/asár warqawaaká ngaa haniís ar baraá sla’aarirós, nee haraxu’utír hhoo’, ¹⁷ inós munerhúng ngi gurkwa/asi, nee nuwa /uuruú i haniisi as umuúqo gár hhoo’ kawa tlehhita’ nee kawa axwesa’.

¹ Alhhe’eesaywo, hháe, atén ti aleefiriiriinde’. Firiiriimé’ as axweesantá Aako iwa geerí hi’it ar gaanslaay, nee kawa ilaoohi ar ilaiwa/ame ar adoodá’ kuungá’ kara ilaoté’. ² Firiiriimé’ sleeme as atén tiwa ba/amisi dír múk muruú ganaa’aaká gu leelehhahhiít, mukdá’ tlákw. Asma a muu sleémeerowooká oo haratlintaaór koóm. ³ Ala Aako i inkihhimuúa kón. Kuungá’ inós nu /uuruú i haniis, nee nu de’en dír kuduú tlakusmoowo. ⁴ Asma atén a haraxu’utír koomaán baraá Aakoowo gídaabá, tidá’ atén ni hara’ayiyiimaan a tlehhitá’ nee slám a kumitá’ kawa tlehha’. ⁵ Aako munerhúng ngi gan’aamisi as Mungú kuwa sla’a’, nee as Kristo kuwa daamaraanda’ ar qiqitliingw. ⁶ Hháe, atén kuungá’ nu hara’ayiimaán ar aleesleemuudá’ taa atén i haniís nee Aako Yesu Kristo, ti paratle’ nee hhae sleémeero awa tli/uuse, kudaádá’ hara’ayaarén ngaa si’iye’. ⁷ Asma kuungá’ kilá’ a xuá’ gídaabá gár kuungá’ tunduwa hariím a an hotá’ ar adoodá’ atén tara hootaán. Qoomár tawa hootaán nee kuungá’, atén aga tli/uusaniiká. ⁸ Asma atén umuúqo doó hee tawa /ayiimaani, heedaádá’ bu’uto ugwa mawaaniiká. Ala atén ana ló’wa gadiyuusaán nee ana daawimiitaán tlaatla/aangw nee xweeraawo as umuúqo heewo dirhunge muwa diitsakwaár ar awaán. ⁹ Geeraawo a gár hariím atén kuungá’ tiwa /aymisa’. Ala atén adoorí aga sla’aaniiká, asma gár atén ta sla’aan a masók atén an slaqsaay tleehhitaán dirhunge, as kuungá’ tiwa eehada’. ¹⁰ Qoomár atén tawa dinkwa nee kuungá’ hara’aya ngina haniisaán gídaabá, “Heé gadiyér sla’aaká, miwa /ayín.” ¹¹ Ala daxta hamí aga axaasaán gídaabá baraá tla/angwhunge mukko i deer oo tli/uuse. Inooín gadiyér i tleehhiya’ i káhh, ala gár i tleehhiya’ a gadiyeedá muu ngin amoqwaaremisiyá’. ¹² Muksíng un hara’ayiimaán nee un naanaqaán ar baraá umuú Aako Yesu Kristo gídaabá, ta hooti ar tsatsaa’areema, nee gadiyeét kawa tleehhi as muruú /aymar’ín kuwa slaslay. ¹³ Ala kuungá’ hháe, ma baloó slaaqataara’ tidá’ ganaa’ kawa tlehha’. ¹⁴ Heé axweesanoó baraá barwaárí gwa sii’, heé adoorí ga/aawaak, ma aldinku’uusara’ nee inós as dakuúsarós ngiwa tsaahhi. ¹⁵ Ala mu harafadiitara’ tawa wakusmo, kuungá’ naanaaqaak adór hhiyaahúng wa ale. ¹⁶ Aako inós u kilá’ oo wayduú hanmiís, wayda ngu haniisi dirhunge daqisleém ar baraá umuúqo loohiro. Aako masók i dinkwa nee kuungá’ sleémeero. ¹⁷ Ánuú Paulo gooirír alhhe’eesaay ngina gooiím ar dakw’eé’ oo kilá’. Gaarí an layar’eé’ baraá umuúqo barwár ni gooiima gídaabá amór i dahh a amor’eé’. Adoorí an adór án nir gooaaiim ar dakw’eé’. ¹⁸ Aakoorén Yesu Kristo kuungá’ sleémeero nu tsuuqi.