2 PETRO

¹ Ánuú Simoni Petro, lawaalmoó Yesu Kristo nee ya/abusmoowós, aníng barwaárí ngina gooiím amór mukdá’ haratlintaaór gídaabár koom gaa slay, adór atén wa ale, ar loohír gan’amuú Mungú nee Ba/amusmoorén Yesu Kristo. ² Tsuuqaá Mungú nee wayduuwós i ló’wa doogine’ dirhunge, as iidíguú Mungú nee oo Aako Yesu kuwa xua’. ³ Mungú atén tina ateét ar xirfuuwós nee /uuruuwós. Inós atén nguri xuaán. Aluuwo inós mura’ sleémeero nguri atén i haniís ar /uuruuwós kuduú munguiima, muruudá’ sleémeero atén ta sla’aan as tawa hootaan ar slafíngw Mungú kuwa ilaiwawa/aan. ⁴ Gawaá adoorihe tam al’axweesanoó urén nee oo gídaabár koóm atén ugwa slawaán ar xirfuuwós nee /uuruuwós. Kuungá’ al’axweesanaywí bura haratlintié’, hhitiru’uumár baraaká’ yaamu daqaní ilagowto a aleesleerá’, nee tlehhmuú munguiima u sleerá’. ⁵ Gawaá adoorihe kuungá’ ilakaaharu tleehhaak, as kuungá’ baraá haratlintaaorhunge hhooeema kiwa laqaqaanda’, nee baraá hhooeemaahunge xu’uti kawa laqaqaanda’, ⁶ nee baraá xu’utirhunge kuungá’ kiloohúng tiwa ila/aanda’, nee baraá ila/angwhunge qiqtliingw kuwa laqaqaanda’, nee baraá qiqtlingwhunge Mungú kuwa ilaiwawa/a’, ⁷ nee baraá ilaiwa/amerhunge hhae kiwa sla’asla’a’, nee baraá sla’aarír hhaeewo muu sleémeero kuwa sla’a’. ⁸ Ala muruuwí sleémeero barnaxes i deer dirhunge, nee bira doogiigín, kuungá’ daqaní a tawó iwiwita’aaká, nee slám slafingwhúng daqaní muruú hhó’ ngu huuw, nee Aakoorén Yesu Kristo u ló’wa xu’uti hhe’esá’. ⁹ Ala heé muruuwí gu koomaaká, inós a heé ila’ naa boo/aye’, nee a taampa. Asma aa gunqaruút gídaabá tlakweemaawós kudá’ aáng kaa hamaátl. ¹⁰ Gawaá adoorihe, hháe, ilakaaharu ló’wa tleehhaak as ateetamorhúng kawa gawdesa’, nee tsawdorhúng. Ala kuungá’ bar aga hoté’ ar adoorí, kuungá’ daqaní gár dirhunge dukutsmo tleehhiit i káhh. ¹¹ Gawaá adoorihe kuungá’ daqaní tundu ya/aámár i haniis ló’wa ale tawa data’ baraá waawuti’iimár alhhe’eesay wasl, tidár Aakoorén nee Ba/amusmoorén Yesu Kristo. ¹² Gawaá adoorihe, aníng gár ni slaa’ a kuungá’ nun inslawtimís daanduú muruuwihe umuúqo daqto. Ala tam kuungá’ muruuwí ugwa xui’i, nee tam aga gawduuri’i baraá looeemaadá’ taa ilaoti’i. ¹³ Án ngi slaá’ a gár hariím aníng kuungá’ nuwa inslawtimis umuúqo daqto daanduú muruuwihe qoomaarí án niwa slaaf. ¹⁴ Asma aníng a xuú’ gídaabá qooma aa naká/ ar aníng slaqwtí ngiwa geexaw. Asma Aakoorén Yesu Kristo aníng iga ádbáy. ¹⁵ Gawaá adoorihe aníng ilakaaharu un tlehhiít as kuungá’ muruuwí ku inslasleerá’ daqisleém, tam qoomár aníng bara gwaá’ sleeme. ¹⁶ Asma atén tiitár tawo ar sagaalooa aga eeharaharaaniiká qoomár atén iidíguú /uuruú Aakoorén Yesu Kristo nguwa dirhúng i alki/iitaán, nee iidíguú ki/imaawós. Ala atén awa kilá’ inós una araán ilaarene, nee xirfuuwós oo munguiima. ¹⁷ Asma Mungú Baabá guna ilaiwa/amér i haniís nee xirif, qoomár afoodá’ baraá xirfuú úr daahh nguwa i hardát, tidá’ kah, “Kwí an Garmaaeé’, sla’aarusmooeé’, oo aníng iga qwal/atis.” ¹⁸ Atén awa kilá’ afoorí ana axaasaán iwa gawaá dooraá dáhh, qoomaadá’ atén tawa dinkwa nee inós gawaá tloomadá’ hhoohhooe. ¹⁹ Gawaá adoorihe atén axweesantadá’ aaruuse aa alki/ít an ló’wa haratlintiaán. Kuungá’ adór hho’ aga tlehhé’ barnaxes axweesantadá’ aga alqaytsité’. Asma axweesantadá’ a adór tsaa’astá baraá giwtír wa oh, ay dír iimi i /awaakuur, nee ay dír tsatsee/ír Haymú i geehhouur baraá munerhúng wa ale. ²⁰ Ala kuungá’ /aymuuwí xuaak gídaabá, aaru’uuma i káhh baraá Gooír hhoohhooe ar hee i ilaharmiisi ar adoodá’ inós i slai. ²¹ Asma axweesantá aaru’uuma kinga baloó huuwiiká as adoodá’ hee i slai. Ala muu axweesantá Mungú gana axweés kiwa geeraharahaár nee Qeeruú hhoohhoó’ baraá muner’ine.

¹ Ala tam qoomaadae sleeme aaruusér lama i deer baraá tla/ángw muko. Tam baraahunge sleeme intsaahhatuusér lama i hardát. Inooín intsaahhasár hhiita ngin dahaasiyá’ ar baraá naaqo, tam Aakoodá’ inooín gaa tlaaxw nguri sa tlaankiyá’. Ala gawaá adoorihe inooín tin harakeemisiyá’ baraá qwanáy i alé ar adoorí. ² Múk yaariír inooín gi eehaar baraá slafingw’ín kudá’ slasla/aare, nee loohidár looeema ka /ooslislín as inooín. ³ Inooín ta haats ilatleerír peésaro. Lameemá tawo kin tawó tlaaq as peésa ngiwa slaya’ dirhúng wa ale. Ala iimír aáng sakwasleemar’ín kaa qaro tsaát, nee inooín amór i kaya’ a baraá qwanaay. ⁴ Asma Mungú malaykeedá’ tlakweema gaa tlehh, gaa gurtlayká, ala gana kwaáhh baraá bohóngw qwanaay. Tan baraadá’ wa hoot, kawa tsegiít nee kawa xun baraá giwtír wa ale, as Deeloodár sakwasleema kawa daamaaran. ⁵ Mungú múk aáng gwa gurtlayká sleeme, ala tluwoó da/atén nguri huúw daanduú yaamaá múk tlákw. Heé aa ba/an a Nuhu kilós, kudaádá’ iidíguú gan’amu gu alki/aa/iít, nee múk faanqw oo hatlá’ iri ba/án sleeme dinkwa nee inós. ⁶ Nee slám Mungú gixsár Sodoma nee Gomora gari sakwasleemuút, gari daá/ ar asla, gari slaqsaay tleéhh oo dae tlaáq dír múk tlakwe, oo aluuká’ wa i tláw, gídaabá inooín adór ki laqi an adoodá’ sleeme. ⁷ Ala Mungú Lutu guna ba/amís. Inós a heé gan’amuú koóm. Inós kuna daawitimiís nee slafíngw slasla/arén oo mukdá’ tlákw oo yaamuudá’ wa hoót. ⁸ Heewí gan’amuú koóm nee oo Mungú ilaiwawaá/, inós ina hoót baraá tla/ángw mukdá’ wa ale, umuúqo deelooro kuri slahhe’eemiís baraá muunuúwose, as muruudá’ tlákw sleémeero oo aa ga/áy nee aa axamiís. ⁹ Tí gár i laqaqaan a gídaabá Mungú ga aleesláy múk inós ilaiwawaá/ nguwa ba/amisi baraá iiara’aduwo. Slám ga aleesláy múk tlákw nguwa baraá tseegamór i ilaa/i, ay dír sakwasleema ngay slaya’ bál deelór sakwasleemaro, ¹⁰ ak alé mukdá’ ilatleerír slasla/aren ar slaqooín ga eeharahaár, kudá’ aleesleemuú Mungú waaqaqaá’. Intsaahhatuuseerí ar lama inooín a afakaharuusér sidór koom, slám a takaahuuse, slám ta daaraxiiká, ala tam malaykeedár aleesleemuú koom kan /ooslislín. ¹¹ Malayke ka uren nee i /uuruú koón ta intsaahhatuuseedae. Ala tam adoorihe malayke i qiqtliindaaká inooín ngiwa /ooslisliin qoomár birki sakwasleemuut dír geerá Munguhe. ¹² Ala intsaahhatuuseerí muruú ta xuiiká kun /ooslislín. Inooín a adór makaá fuqurángw kooma’aaká, kudá’ taa tleéhh as kiwa oohi nee kiwa qwaareesi. Inooín sleeme ki qwaarees adoorír aleeró, asma hhitiru’uumar’ín taqá’. ¹³ Inooín ki slahhe’eemiis asma adoodá’ inooín ngira slahhe’eemisiyá’. Tam qoomár tlaatla/aangw inooín ta qwalalaa/ as hheehha. Mukwí bar nee kuungá’ a al iwitá’ dír muruú /aymaaro, inooín barta /ayín ar bi’iri, gaarí a gár múk Kríshaanáy gu slasla/areemiis nee gu murér i qamiim. ¹⁴ Inooín gár hatlá’ ta ilatleeruus i káhh, aqo har /ameenár tsaatuuse kilós, slám inooín i hhe’eesiaaká tlakweemaawo. Inooín múk aa kwa/iiká baraá haratlintaaooro ngun qwaareemiisiyá’. Inooín a múk peésár slaá’ ló’wa ale. Gawaá adoorihe inooín kaa lu’ús nee Mungú. ¹⁵ Asma inooín loohidá’ ganaa’ kaa geexáy, tari qwaár. Asma inooín loohír Balaamu kana eehaár, garmoó Beori. Inós gár ganaa’aaká gana tleéhh as peésa ngiwa slay. ¹⁶ Ala inós kuri iigahhaát as tlakweemaawós kudá’. Asma daqwaydá’ axweesani ga aleeslawaaká, iri axweés ar afór hee, aarusmoowí guri ilaá/ baraá tlehhemuuwós kuduú sagawasleero. ¹⁷ Mukwí a adór tsinqa’aá naa /one’, nee slám a adór hunkoó ta gusisin nee fur’a. Mungú hotangw’ín gwa amohhe’eés didár ma/amír wa ale. ¹⁸ Asma inooín axweesanoó urén kun kah oo gídaabá wásl. Inooín ilatleerír slaqwa kan ar gadiyuus as múk aa sangw haratlintii’ kuwa al/ayi, mukdá’ baraá tla/ángw tlakuuse ngwa sangw geexay. ¹⁹ Inooín gár ta al’axweés dír múk i alé a gídaabá ki gweer baraá lawaali’iimaro. Ala laatí inooín awa kilá’ a lawaalér tlehhema’aá hhitiru’uuma. Asma hee burkwa baál nee gaa, inós a lawaalmoó gadaádá’. ²⁰ Mukwí geeraawo tina paraátl dír slasla/aruú baraaká’ yaamuuwo, qoomár Aakoorén nee Ba/amusmoorén Yesu Kristo kuwa xuú’. Aluuwo kuri malé uuruúx tari kií/ baraá slasla/aruudí alé, kiri baál nee slasla/aruudá’. Gawaá adoorihe tlehhemuuín kwí oo alhhe’eesaay ku ló’wa tlaákw ta kuduú geera ba/a. ²¹ Geeraawo a tsiní dir’ine barnaxas loohidár ganaa’ bar kaa baloó xuiiká, ta kawa xui, aluuwo hara’ayadá’ hhoohhoo’ tidá’ taa dir’ín i haniís kari máy. ²² Inooín a adór axweesantadár múk urén ar kah gídaabá, “Seeaay wa/ariwós gaa sakií/,” nee ar hatlá’ i kat, “Baynimo bura hamátl, inós i malé kii/ baraá baa/ír i ale.”

¹ Sla’aaruuser’eé’. Barwaárí án ni kuungá’ i gooiim ar tsár. Gawaá barwaduuká’ tsaraawo aníng muruuwí nguna inslawtimís, as inslawoó hhohhó’ nguwa daarkitis baraá munerhunge. ² Asma gár kuungá’ tunduwa hariím a /aymi’iidá’ awa aaruusér aáng ar hhohho’ in insleerá’, nee hara’ayaadá’ Aako nee Ba/amusmo, tidá’ tinda amorhúng i huúw nee ya/abuuserhúng. ³ Gár har geerá a tí gídaabá baraá deeloodár alhhe’eesaywo muu ni hardah oo ilatleerir’ín eeharahaár. Inooín kuungá’ nuri niqimiisiyá’, ⁴ tawa kaahi gídaabá, “Inós al’axweesani ngina haniísiíke gídaabá niwa ki/i, ala i amá? Baabi’iirén naa qaroó qatliyé’, ala mura’ sleémeero u ga/eerá’aáke i adoodaádí kaahh, adoodár aáng iimír yaamu kiwa tleéhh.” ⁵ Múk adoorí káh, kaa gunqareés gídaabá, iimír aáng doori nee yaamu kina tleéhh ar axweesantá Mungú. Kina tleéhh ar ma’aay nee ar baraá ma’aay. ⁶ Ala yaamuudá’ geera kina qwaareés sleeme ar ma’aay, ar ma’aydá’ tluwoó da/atén. ⁷ Doori nee yaamu kuká’ hamí daawá’ kina amohhe’eés nee kin xún ar axweesantá Mungú sleeme, nee in kumiitiyá’ ar adoorós tidá’ i dirii’iya’ ay bál deeloodár sakwasleema. Baldá’ bira xeér, kiri daa/ ar asla, nee múk tlakuuse kuri sakwasleemuut nee kuri qwaarees. ⁸ Sla’aaruuser’eé’, gaarí wák ma gunqareesara’. Dír Aakoowo deelór wák a adór kureeraá kumuú wák, nee slám kureeraá kumuú wák a adór deelór wák dirose. ⁹ Muu bahh’alé i kaahi, Aako al’axweesantós boo/eesaro i tligatliik. Ala a adoosingeeká. Ala inós kuungá’ nun sageeqiqtlín. Asma gu slaiiká tam heé wák iwa qwaari. Ala masók sleémeero tlakweemaaín ngiwa hhu’u’una’. ¹⁰ Ala deelór Aako i hardát adór fisusmoó ar alé. Baldá’ doori ni ilaá wa qwaariyá’ ar kududuhoó úr, nee tsatse/ asla gu ót nee iri weeq. Yaamu nee muruú baraawós i dirií’ sleémeero niri qwaariyá’. ¹¹ Ala mura’ sleémeero barqo in adoorír weeq, kuungá’ gár tunduwa hariím masók an hotá’ ar slafíngw hhohhó’ nee oo Mungú kuwa ilaiwawa/a’, ¹² qoomár deeloodár Mungú kawa daamaraanda’ nee kawa harakeemisa’. Ala deeloodá’ bál binda hardát, doori asla gi ót nay weeqiyá’, nee tam tsatse/ i weeq as asla. ¹³ Ala Mungú al’axweesani ngina diirén i haniís, dooraá /aben kiwa slawaan, nee yaamaá /aben. Baraadaádae gár dáw a gan’amu. Nee atén muruuwí un haraxuaán. ¹⁴ Sla’aaruuser’eé’, kuungá’ muruuwí u daamaraandá’. Gawaá adoorihe ilakaaharu tleehhaak tawa wayduú koonda’, nee tawa sihhita’ dír geeraawós i alé tunduwa hhohhó’ nee tawa múk xaslxanslír koomaaká. ¹⁵ Nee kuungá’ xuaak gídaabá, qiqtlíngw Aakoorén gár ni huwi dirhunge a ba/ama. Tam hhiyaarén, kuduú sla’aarusmo, Paulo, adoorí sleeme ngaa gooín amorhúng i alé. Inós kuna geeraharahaár nee sagaalooadá’ aa sláy dír Mungú wa ale. ¹⁶ Adoorí an adoodá’ i kaahi baraá barwaduuwós kudá’ sleémeerowo, qoomár bar i iidíguuwí alki/iit. Baraá barwaduuwose muruuko ku gawdén tsaahharo. Múk xu’utír koomaaká nee múk aa kwa/iiká muruuwí gun warqeemiis, adoodár muruú hatlá’ sleeme oo baraá Gooi ngur warqeemaamisiya’. ¹⁷ Ala kuungá’ sla’aaruuser’eé’, kuungá’ adoorí aga qaroó xué’. Gawaá adoorihe ti harmagahhe’. Ma ya/aamara’ tunduwa uuruuxi baraá haratlintaaorhúng tidá’ taa oti’i, nee tunduri qwaarees nee múk tlákw. ¹⁸ Kuungá’ uraarawé’ Aakoorén nee Ba/amusmoorén Yesu Kristo kuwa xua’, nee tawa gawduura’ ar loohír tsuuqaawós kudá’ ni tawó hanmamiisi dirhúng i alé.