1 TIMOTEO

¹ Ánuú Paulo barwaárí ngina gooiím. Aníng a ya/abusmoó Kristo Yesu ar hara’ayár Mungú Ba/amusmoorén nee Kristo Yesu haraxu’utirén. ² Barwaárí ngina gooiím amoorók Timoteo, garmaaeé’ oo kilá’ oo baraá haratlintaao. Mungú Baabá nee Aakoorén Kristo Yesu kuungá’ nu tsuuqi, nee nu gurtlay, nee nu waydí haniisi. ³ Qoomár án niwa Makedoniár kaw, án kuúng una firiím gídaabá Efeso awa hooteek. Hám daxta un malé firiím. Asma kuúng muu bahh’alé kuwa hara’ayiyiin as intsaahhasár hatlá’ mingiwa huúw. ⁴ Slám inooín tiita makawa eeharahaár nee yaeemaá tlet awa tlahhi’i kiwa fadiiti, asma muruuwí gár i huwahuuwi a partlito. Slám gár i bui i káhh dír geeraharusmoó gadiyér Munguhe, asma iimu/úngw gadiyér Mungú a haratlintaao. ⁵ Gár hara’ayaarí ngisa haniís masók sla’aari i doogigiín, tidá’ baraá muunuú hhoohhoó’ daahh, nee afór hho’ ar baraá muunaá, nee haratlintaaór waaqoodár koomaaká. ⁶ Ala muu bahh’alé baraá loohirí ganaa’ gaa geexáy, inslawoó muu kudá’ gídaabár koomaaká kuri eehaár. ⁷ Inooín ka slaa’ tawa intsaahhatuusér hara’ayár Mungú. Ala inooín awa kilá’ axweesanaydá’ ta axweesi ku xuuiiká, nee slám inslawaydá’ ta aleekal/an ku tsatsahhanká. ⁸ A xuaán gídaabá hara’aya ka hhoo’, hee bir ngir gadiyuus ar loohír ganaa’. ⁹ Gár atén tiwa hariím masók an tsaahhaán gídaabá hara’aya kaa qaasiiká as múk hhó’. Ala kana qaás as múk aa dee/aanuut, nee mukdá’ hara’aya gaa sii’. Slám kana qaás as múk Mungú gwa haratlinti’iiká nee múk tlakweemaá tlehhahhiít, nee slám mukdá’ hhohhoeeká, kudá’ slasla/arén. Nee slám hara’aya kana qaás as múk baabi’ii’ín tsuú/ nee amuín, nee tsu/utuusér hatlá’. ¹⁰ Nee kana qaás as fuquuse nee as hhawaateedá’ fuquusá’ nee hhawaataá hatlá’, laqaá /ameenár fuquus nee /ameenár hatlá’, nee slám kana qaás as mukdá’ múk fisiisiím nee lamuuse, nee mukdá’ tawó lo’ór huwahuúw. Nee hara’aya kana qaás as daanduú umuúqo /aymuuwo oo nee intsaahhasár ló’ ti slaslaawa’aaká. ¹¹ Intsaahhasarí a tidá’ tinda aníng i haniís, as ngiwa alki/iit, intsaahhasarí a Ya/abtoodá’ hho’ daanduú iidíguú xirfuú Mungú kudá’ tsuuqaá koóm. ¹² Aníng Kristo Yesu Aakoorén un sluufimiís, kudá’ aníng iga /uuruú i haniis. Slám un sluufimiís asma aníng ina harafaár tawa heé inkihhimuúa koóm, iri qaás baraá gadiyeérós i alé, ¹³ aniídá’ aáng geeraawo inós ugwa /ooslaasliim, nee ugwa gusiisiim, nee ugwa slahhe’eemiis. Ala Mungú aníng ina gurtláy, asma tí sleémeero ana tleéhh as xuawasler’eé’. Asma qoomaadae aníng Yesu ugwa haratlinti’iiká. ¹⁴ Aníng gurtleemuú Aakoorén una ló’wa sláw, dinkwa nee haratlintaao nee sla’aari tidá’ ta koomaan baraá Kristo Yesuwo. ¹⁵ Kaangwí a oo ló’, oo hariím haratlintaaooro, slám i ló’wa harín ya/aamaro gídaabá Kristo Yesu nina hardáh baraaká’ yaamí alé as múk tlakuuse nguwa ba/amisi. Nee aníng a tlakusmoó úr ta tlakuuse sleémeerowo. ¹⁶ Gawaá adoorihe gaarí an gár án gurtleemu ngusa sláw, as Yesu Kristo qiqitliingós nguwa laqán dir’eé’ alé, aníng tawa heé geera, as aníng niwa slaqsaay tleehhiit dír múk hatlá’ oo aluú wa haratlintiia, nee slafíngw alhhe’eesay wásl kuwa slay. ¹⁷ Waawutmoó alhhe’eesay wásl kudá’ baloó gwaa’aaká, kudá’ geehhooeeká, inós kilós an Mungú. Ilaiwa/ame a tós nee xirif a kós ay alhhe’eesay wasle. Amin. ¹⁸ Timoteo, garmaaeé’, án hara’ayaarí ngi kuúng i haniís asma nee aaru’uumadá’ ti slaslayá’, tidá’ taa daanduuwók i oó’ geerí alé. Aaru’uumadá’ eehareek, nee slaqwaradá’ hho’ ka slaqw. ¹⁹ Mungú haratlintatieek, nee afoodá’ hho’ ar baraá muunuúwók kawa eeharahat. Kumiít baraá haratlintaaooroge nee afoodá’ hho’ ar baraá muunuúwók na iiár i qamimeek. Asma mukko i deer oo afór hho’ ar baraá muner’ín gaa sii’, haratlintaaor’ín dukuutse gari sleér, kari qwaareés. ²⁰ Baraá tla/angw’ine Himenayo nee Iskanda i dayá’. Ala inooín aníng iga paraátl amór Neetlángw i alé, as ngiwa tsaahhiya’ Mungú mukuwa /ooslislín.

¹ Gár ni gawdeemiis ta muruú hatlá’ sleémeerowo a tí, firo nee saaliingw nee aleefiro nee sluufaay, muruuwí sleémeero i tleehharuuti as muu sleémeero. ² Waawitá aleefiriiriimaak nee kudá’ aleesleemuú koomá’ sleémeero, as atén tawa hootaan ar slafíngw amohhooa nee oo wayda, Mungú kuwa haratlintatiaan nee tawa hootaan ar adoodá’ hariim. ³ Adoorí ka hhoo’, slám Mungú Ba/amusmoorén gu sla’atimís. ⁴ Inós muu sleémeero gu slaa’ iwa ba/an nee looeema ngiwa xuiya’. ⁵ Mungú a wak. Nee har’ohusmo a wak sleeme, kudá’ har’ohiím tla/ángw Mungú wa ale nee muu. Inós a hee, Kristo Yesu. ⁶ Inós kilós tina haniís tawa bu’utuú gweermór muu sleémeero. Inós an lamabu’úngw muruuwí. Kuna ya/aáw nee Mungú qoomaadá’ Mungú aa qaroó qaás iwa bó/. ⁷ Nee aníng tina qaás tawa alki/itusmoó iidíguuwí nee tawa Ya/abusmo. Tí ar ni kah ar ló’, lamtá ni kah i káhh. Tina qaás múk xoordaá hatlá’ nguwa intsaahhatimis daanduú haratlintaao nee looeemaawo. ⁸ Gár án ni slaa’ hhawaate masók an múk daba’ hhohhó’ nee oo buhhabuhhaaká nee múk tlaampa’aamisaaká. Ala umuúqo diiro hhawaataá adoorí masók dabaaín ngin gawtí tleemisiyá’ baraá firooro. ⁹ Tam /ameena sleeme an hara’ayiyiím gídaabá, masók inooín a múk qoóm nee oo tsatsaa’arén as tsitay’ín. Tsitay’ín masók a tsitoó qoóm. Slám mitiwa parootusiyé’ ar se’eengw kuwa hhutliiti, laqaá ar kwaslaá tlaxo gawden, nee tlabaá tlaxo gawden. ¹⁰ Ala parootir’ín masók an tlehhema’aá hho’. Asma adoorí an adór hariím dír /ameenár kaaha, “Atén a Mungú ilaiwawa/aán.” ¹¹ Baraá intsaahhasaro /ameena i intsaahhahhaan ar tsatsaa’areema nee ilaiwa/ame. ¹² Aníng /ameena a ya/aámár i haniisaaká iwa intsaahhatimis laqaá ar hhawaata nguwa bal, ala gár kawa hariím a in xaslít. ¹³ Asma Adamu an heé taa geerí tleéhh, nee Efa kari aluudá’ wa tleéhh. ¹⁴ Slám Adamu kwa al/ayiiká, ala a /ameeni kana al/aáy, tlakweema giri tléhh. ¹⁵ Ala /ameena inós ka ba/amis as xwaylar’ín, barnaxes taa kumiít baraá slafíngw haratlintaaooro nee sla’aari nee hhoohhooeema, dinkwa nee muunuú qoomoó koóm.

¹ Axweesantí i looeemaá koón, tí kah gídaabá, “Hee bar gadiyér muu nguwa geeraharahari ga leelehhiit, a gadiyér ló’wa hhoo’ gan slaa’.” ² Geeraharusmo gár kuwa hariím masók a heé ta muruú tlákw i kaahiiká, inós masók hareerós a wak. Masók a heé qoóm nee oo sagaaloó’, heé muruú qoomemeés, heé dahi’iimis, oo intsaahhatisa ga baál. ³ Inós masók a heé ooniitusmoowooká, heé múk muxaaká, masók a heé tsá’, masók a heé kaanganusmowooká, slám masók a heé peésár ilatleerusaaká. ⁴ Inós masók a heé do’ós gu ló’wa sageesihhimiít, oo na/’iiwós gi hara’ayiyiím, adór hariímár alé. ⁵ Asma heé do’ós geeraharto gu aleeslaslawaaká, adór múk Mungú geeraharto ngur aleeslay a idoomá? ⁶ Slám inós masók a heé aa ba/aniiká deeloorí /abene, as miwa daar/uút, iri huu’, kuri sakwasleemuut adór Neetlángw wa ale. ⁷ Slám inós gár kuwa hariím masók kun lamabu’úngw hhoó’ i kah nee múk hatlá’, as mukuwa daanda axweés muruú tlákw i alé, nee kuri oh nee tsaaxweelír Neetlaangw. ⁸ Alee/isuusér múk Kríshaanáy sleeme inooín masók a múk ilaiwa/amér koóm. Inooín masók a múk axweesanay’ín warqaqawaaká, nee slám masók a múk xuufiitaaká. Slám inooín peésár loohír ganaa’aaká masók ka slaiiká. ⁹ Inooín masók intsaahhasadár ló’ ar haratlintaaoorén, tidá’ taa geehhooeés ngi oohiyá’ ar munér hho’. ¹⁰ Alee/isuuseerí sleeme ka ala iiari, ala gár daanduuine taa ár bir káhh, gadiyeét ngi tleehhiye’. ¹¹ Tlaaway’ín sleeme masók a /ameenár ilaiwa/amér koom, masók a takaahuuseerooká. Inooín masók a múk qoóm, nee masók ta inkihhimuúb kón baraá mura’ sleémeerowo. ¹² Alee/isuusér múk Kríshaanáy inooón masók a múk tlaaway wakét, múk na/’ii’ín gi hara’ayiyiím gan’amúr alé, nee múk maray’ín gi aleesláw geeraharahaduuwo. ¹³ Múk gadiyér hho’ ga tlehhiít dír múk Krishaanaye, ilaiwa/ame ga sláy, gawaá adóorihe ku iiár i qamín nee muu, qoomár haratlintaaoorén ar baraá Kristo Yesu bar ka alki/iit. ¹⁴ Aníng hamí barwaárí ngiwa amoorók i gooiim, a slaá’ niwa amoorók i hardah deeloorí tseewe. ¹⁵ Ala tam adoorihe barwaárí an gooiím asma aníng binda tliík hardahamuwo, kuúng kawa xu’ adór umuúqo heewo kuwa hariím hootaango baraá dinkwár múk Munguhe. Dinkwaarí an múk Kríshaanáy oo Mungúdá’ slaáf, mukdá’ looeemaá Mungú gi xuúm nee gi harmagagaáhh. ¹⁶ Ar ló’, lu/aaroó haratlintaaoorén ku ló’wa úr. Mungú kuna geehhooutís ar slaqsoó hee. Gan’amuuwós kuna laqán nee Qeeru. Inós kuri ár nee malayke. Iidíguuwós kuri alki/iít dír xoorduuwo, inós kuri haratlintií’ baraá yaamuuwo, kurir tláy gawaá doori.

¹ Qeeruú hhoohhoó’ adoorí gaa ló’wa xu’utís gídaabá qoomaadár alhhe’eesaay binda hardát, baldá’ muu i deer oo haratlintaao ga máw. Inooín intsaahhasár dimbadimbé ar al/agigiim kari eehaar, nee intsaahhasár neetlaame. ² Intsaahhasarí amór i dahh a amór mukduú lamuuse. Afoodá’ hho’ ar baraá muner’ín aa hhitirút adór gár taa daá/ ar muqslír da/a/aam. ³ Mukwí in intsaahhatimis gídaabá duuxo ka tlaakw. Slám ta kaahi muruú /aymarka ku tlaákw /aymaaro. Ala Mungú muruú /ayma sleémeero guna tleéhh as kuwa /ayi ar sluufaay nee mukdá’ aa haratlintii’, kudá’ looeema gaa tsaahh. ⁴ Umuúqo gaaro ar Mungú aa tleéhh ka hhoo’. Ar si’imá wa hariim i káhh. Ala umuúqo gaaro gár kawa hariím masók a kan ilaoh ar sluufaay. ⁵ Asma axweesantá Mungú nee firo muruuwí sleémeero gwa hhoohhooés dír geerá Munguhe. ⁶ Intsaahhatisarí sleémeero alki/iiteek dír hhae. Daqaní kuúng a sagadiyusmoó hhoó’ tleehhít oo Kristo Yesu. Asma kuúng qeeruuwók un /aymís axweesantá haratlintaaooro nee intsaahhasadár ló’, tidá’ kuúng ta eehát. ⁷ Ala kuúng ti harmagahh nee tiitadár slasla/aren, tiitadár amami’i, tidá’ hariimaaká alki/ituuwo. Kuúng intsahhaám Mungú kuwa ilaiwawa/ baraá slafiingoge. ⁸ Asma slaqwa iwa intsahhaan neetoro as /uuru nguwa sleer, a gár gídaabár koom. Ala qeeru iwa intsahhan ilaiwa/amér Munguhe, a ak gár gídaabár koom kángw kilá’ wa ale. Asma adoorí bara tléhh, al’axweesantá slafiingwí i deer, nee ar slafingwdá’ aluú wa hardáh sleeme. ⁹ Kaangwí oo ló’, oo hariím haratlintaaooro, slám i ló’wa harín ya/aamaro. ¹⁰ Gaarí an gár atén tas daawimiitaan nee tas ló’wa gadiyuusaan, asma haraxu’utirén aga qaasaán gawa Mungúduú slaáf. Inós a Ba/amusmoó muu sleémeero, ak alé oo mukdá’ gwa haratlintii’. ¹¹ Muruuwí hara’ayiimeek nee intsaahhatimiseek. ¹² Hee masoombi’iimarók mingiwa waaqaá’, ala kuúng na slaqsaay tleehhiít dír mukdá’ aa haratlintii’i ar baraá axweesanaywók nee baraá tlehhemi’iiwók nee slám ar baraá sla’aari nee haratlintaao nee hhoohhooaari. ¹³ Qoomaarí án niwa hardahiiká, ilakaaharu tleehheek oo muu kuwa axweesantá Mungú i soomus, nee kuwa naanaq, nee kuwa intsaahhatimis. ¹⁴ Kuúng aleesleemuú Qeeru u koón baraawoge, kudá’ taa sleér qoomár aaruuse iwa aaririín nee bariisee uwa dákw i qás. Ala aleesleemuusíng mu mawaar kuwa ar gadiyus. ¹⁵ Muruuwí na aldakuuteek nee kuwa tlehhit ar ilakaaharu, as muu ngiwa tsaahhi adór kuúng tar geerí kumit. ¹⁶ Adór kuúng tar hot ga/aaweek nee muruudá’ ta intsaahhatimis ga/aaweek sleeme, kumiít muruuwí sleémeero kuwa tlehhit. Asma adoorí bara tléhh, daqaní kuúng kilók ti ba/amís, nee mukdá’ sleémeero oo kuúng u iiárí qamiím sleeme.

¹ Aakoó úr mu iigahhamiitaar, ala gurbueek adór baabá ar alé, nee masoomba adór hhaeewók ar alé. ² Amami’i gurbueek adór aayírók ar alé, nee /ameenár ninakw adór hhaeewók awa dasú wa ale, ar baraá hhoohhooaari sleémeero. ³ /Ameenár kwaeeli ilaiwawa/eek, tidá’ ló’ wa kwaeeli. ⁴ Ala kwaalo’o barnaxes i na/’aá koón, laqaá na/’aá naangós, na/’iiká’ gár kiwa hariím a hariímar’ín ngin xuiyá’ ar múk dooín nguwa amohhe’eemisiya’, nee xwaylitér’ín ngiwa ga/aya’. Asma tí ka hhoohhoo’ dír geerá Munguhe. ⁵ Kwaalo’ór ló’ a tidá’ taa kilós geexáy. Inós haraxu’utirós gaa amór Mungú i hanís, slám i hót baraá firór wa ale nee saaliingo tlaatla/aangw nee xweeraawo. ⁶ Ala kwaalo’oodár ilatleerirós eeharahaar, inós aa gwá’ tim slafa. ⁷ Muruuwí na hara’ayiimeek sleeme dir’ín i alé, as inooín mikiwa daanda axweés aluuwo. ⁸ Ala umuúqo heewo oo mukós gu amohhe’eemisaaká, ak alé múk do’ós oo kilá’, heé adoorí haratlintaao gaa sií’, nee inós a heé tlaákw kángw kilá’ wa aleeró ta kudá’ aa haratlinti’iiká ba/a. ⁹ Kwaalo’ór ta gooiin a tidár kureeraá mibeeraá lahhoó’ gaa eer. Nee slám inós masók hhawaatuú gaa duux a wak. ¹⁰ Slám inós masók kaa lamabu’ún tlehhema’aá hhoe. Masók na/’ii nga umiín, nee dahaaye gaa dahi’iimís, slám masók ya’aá múk Mungú nga hamtlít, nee múk taa slahhe’eemiís ngwa alee/iimís, nee slám tlehhemuú hhoó’ gwa tlehhít ar ilakaaharu. ¹¹ Ala /ameenár kwaeeli ar ninakw ma ya/aamaar gooiro. Asma ilatleerir’ín ar slaqwa bira tláhh, ta quutl dír Kristowo, tari duuxór áy. ¹² Nee daqaní inooín kiri sakwasleemuut as al’axweesantaín tidár geera nga si’iyé’. ¹³ Slám inooín waaweeraay ngun deliitiyá’ nee gawaá adoorihe tli/a ngiri intsaahhiyá’. Ala a har tli/a kiloseká. Tam niri takaahuuse tleehhitiyá’. Nee sleeme tawa darahi baraá muruú muu, kudá’ inooín wa hariimaaká. ¹⁴ Án ngi slaá’ /ameenár kwaeeli ar ninakw a tsiní barka malé duxuút, nee na/’ii ngiwa laqwal, nee iwa maráy wa daawimit, as wakaarusmo pa/aangw munguwa sláy oo kiwa daanda axweesi muruú tlakwe. ¹⁵ Asma bahh’alé baraaine naa qaroó warqayé’, Neetlaangw kuri eehaár. ¹⁶ Ala /ameenár aa haratlintii’ barnaxes i deer, ar kwaeelaá koom dír do’ose, kwaeelidá’ ngi alee/is inósar kilá’, as múk Kríshaanáy mukuwa diitsakwaár ar áy. As múk Kríshaanáy /ameenadár kwaeeli ló’ wa ale ngiwa alee/iisi. ¹⁷ Bariisér gadiyér’ín ar geeraharahat ga tleehh adoodá’ ir qoon, ka ilaiwa/amér i haniisi ló’wa ale, ak alé tidá’ ti daawiitimis ar muu kuwa axweesantá Mungú i alki/iiti nee kuwa intsaahhatimisi. ¹⁸ Asma Gooi i kat, “Awuú gadiyuús mu afa tseegaar,” nee slám i kat, “Heé gadiyuús i harín slaqwe ngiwa slay.” ¹⁹ Sakwasleemár daanduú geeraharusmoó múk Kríshaanáy ma ya/aamaar, aqo ay dír ki axas dír afér múk tsár wa ale, laqaá tám. ²⁰ Kudá’ tlakweema gaa tleehh iigahhaateek dír geerá muu sleémeero wa ale as awa hatlá’ i da’ayuutiye’. ²¹ Án kuúng u hara’ayiím dír geerá Mungú wa ale nee dír geerá Kristo Yesu, nee dír geerá malaykeerós tidá’ hhohho’ gídaabá, hara’ayaaarí na eehareek baraá umuúqo gaaro ar barqaanti wasle dír umuúqo heewo. ²² Hee dákw i qaasaro ma gaanslimaar. Slám tlakweemaá múk hatlá’ mi eeharaar. Kuúng kumiít baraá hhoohhooeemawo. ²³ Iimír hamí ma’aay kilós mi wahaamaar, ala difaaír niina wahaameek as guruuwók as tiqtisíng kuúng u daawiitimaamis daqtá yaarire. ²⁴ Tlakweemaá muu bahh’alé ki gehho’, nee tlakweemaaín naa geerí hardahiyé’ dír kwasleema ta inooine. Bahh’alé tlakweemaaín ki getlakw, ala i aluú wa geehhoouyá’. ²⁵ Gawaá adoorihe tlehhema’aá hho’ sleeme ki gehho’. Ala nee tam kudá’ gehhoeká ki aleeslayká lu/uto ay alhhe’eesaay.

¹ Mukdá’ sleémeero oo lawaale ka xui gídaabá daqaarer’ín a múk hariím ilaiwa/ameero, as umuú Mungú mukuwa /ooslislín, nee intsaahhasarén sleeme. ² Daqaareedár haratlintaauuse lawaaler’ín mingiwa waaqaqá’ as tawa hhae. Ala lawaaleedá’ gár kawa hariím a gin sageegadiyús kángw kilá’ wa ale. Asma daqaareedá’ ta alee/iimisi nee gadiyér lawaaleedá’, inooín a haratlintaauuse, slám a sla’aaruuser’ín. Muruuwí na gawdeeseek baraá intsaahhasaroge. ³ Umuúqo heewo kudá’ sagaalooár hatlá’ ga intsaahhatimís, slám axweesanoó Aakoorén Yesu Kristo kuduú ló’ gu ya/a/anká, nee intsaahhasár haratlintaaoorén, ⁴ heé adoorí i daara/án, nee slám heé adoorí gár i xui i káhh. Heé adoorí gár i slai ka tlaakw, asma inós gár i slai a tlaampa’amisuú axweesani nee kaangaani. Nee muruuwí gár ni huwi a da/i, nee gila, nee daanda axweesani, nee inslawoó tlákw daanduú heewo, ⁵ nee tlaampa’amisuú baloó faakaaká. Muruuwí sleémeero kun tlehhiit nee múk fuqurangw’ín aa hhitiruut, slám mukwí daxta looeema tsaahharo gi aleeslayká. Inooín ka xui diíni a gár slaasláwár úr huwahuuw. ⁶ Ala ar ló’, ilaiwa/amér Mungú i slaasláwár yaariír huwahúp dír heewo, hee barnaxes ku yaanda hhoó’ baraá tidá’ i kona. ⁷ Asma atén niwa hardahaán baraaká’ yaamu, gár ta koomaan i káhh, slám yaamu bir geexawaán, gár tar tlawaan i káhh. ⁸ Gawaá adoorihe atén barnaxes muruú /ayma u koomaán, nee inqwar, masók atén ti yaanda hhoó’ muruuwihe. ⁹ Ala múk daqaari’iimár leelehhiít, inooín ta dah baraá iiara’at, kuri uhín nee tsaaxweelaay, asma ilatleerír yaariir ar tlakw nee ar daktu’uuma. Ilatleerirí muu gu /aytís baraá hhitiru’uuma nee qwanaay. ¹⁰ Asma ilatleerír peésa an iimu/úngw umuúqo gár tlaakw. Muu bahh’alé haratlintaao gaa máy, gurhaamír yaariir kari sláy asma ilatleerír peésa. ¹¹ Ala kuúng a heé Mungú. Kuúng ti paratl nee muruú adór kwí. Gan’amu na eehareek, nee ilaiwa/ame nee haratlintaao, sla’aari nee qiqtliingw nee tsatsaa’areema. ¹² Slaqwaraadá’ hho’ ar haratlintaao ar slaqweek. Slafingwduú alhhe’eesay wásl ooheek, kudá’ Mungú kuúng usa ateét. Asma tí kuúnguú kilá’ aga lamabu’uún, qoomár lamabu’uungók oo hhoó’ kuwa ó’ dír geerá lamabu’uusér yaariir wa ale. ¹³ Án kuúng u hara’ayiím dír geerá Mungú wa ale, kudá’ mura’ sleémeero gu slafíngw i hanmiís, nee dír geerá Kristo Yesu, kudá’ lamabu’uungós oo hhohhó’ gwa oo’ dír geerá Pontio Pilató wa ale. Án kuúng un adoorír hara’ayiím. ¹⁴ Hara’ayaarí na ooheek, ar xaslxaansli wasle nee ar tlakweema wasle ay bál deeloodá’ Aakoorén Yesu Kristo nay hardahi. ¹⁵ Asma qooma bira bó/, inós kungu geehhooees nee Mungú. Mungú inós a baalusmo, kudá’ ta xirfaayeemisi, inós kilós an baalusmo, Waawutmoó waawitá nee Aakoó bariisee. ¹⁶ Inós kilós in gwaaiiká, dír i hooti a didá’ gwa/ateemaá ta baloó i tseewuyká, slám inós heé gwa ar i kaahh, nee slám heé gu baala wa ár i kaahh. Xirif an kós, nee aleesleemu, ay dír alhhe’eesay wasle. Amin. ¹⁷ Mukdá’ daqaari’iimar’ín baraaká’ yaamu ga koóm ádbaweek matawa daara/án. Daqaari’iimar’ín tí makawa haraxuú’, asma i fák. Ala masók inooín Mungú ngun haraxuiyá’, kudá’ mura’ sleémeero oo ta sla’aan ngu hanmiís ar yaareema. ¹⁸ Inooín masók hhooeema kin tleehh, slám masók tlehhema’aá hho’ awa yaariir ki tlehhiit, nee masók a múk gurhhó’ oo múk qaqáw muruuine. ¹⁹ Gawaá adoorihe inooín ti daqaari’iimár i slayá’, daqaari’iimár ló’wa hhoo’ ar qoomaadá’ xaw, as slafíngw ló’ kuwa slay. ²⁰ Timoteo, kuúng tidá’ sleémeero tinda dirók i saayín harmagaahheek. Ti paratl nee axweesanayduú gídaabár koomaaká, kuduú múk Mungú haratlintatiaaká. Slám ti paratl nee tlaampa’amisuuduú múk ti sagaalooár i harafadiít. Ala sagaalooar’ín a sagaalooár loeká. ²¹ Asma muu i deer oo haratlintaaor’ín gaa geexay as sagaalooarí kawa eehaár. Mungú kuungá’ sleémeero nu tsuuqi.