1 PETRO

¹ Ánuú Petro, ya/abusmoó Yesu Kristo, barwaárí ngina gooiím amór múk taa tsawaár oo Mungú, oo aa diyaayaa/aat, oo hoót baraá yaamaá dahaayi’iimár wa ale, baraá yaamaá Ponto nee Galatia nee Kapadokia nee Asia nee Bitinia. ² Kuungá’ tunduna tsawaár as adoodá’ Mungú Baabá inósuú kilá’ aa slaá’, as kuungá’ tunduwa múk hhohhó’ tleehhi ar Qeeruuwós, nee as Yesu Kristo kuwa ilaiwawa/a’ nee tunduwa tseerér Yesu Kristó i tsifaqamiisi. Tsuuqaá Mungú nee wayduuwós i ló’wa doogine’ dirhunge. ³ Mungú Baabuú Aakoorén Yesu Kristo i xirfuuti. Inós atén tina sagaáwa tsár wa laqwaál ar gurtleemuuwós oo yaariír qoomár Yesu Kristo nguwa waaslee/atís baraá múk aa qaátl wa ale, as atén haraxu’utír slafiingw kawa slawaan. ⁴ Gawaá adoorihe atén aalír hhitiruutaaká a slawaán. Tidá’ slasla/aruutaaká, slám i /otská. Tidá’ taa amohhe’eemiís gawaá doorí wa ale as atén. ⁵ Kuungá’ tundun de’én nee /uuruú Mungú ar loohír haratlintaao, as ba/amadá’ taa qaroó amohhe’eés kawa ilaota’, tidá’ tindi geehhooutisi bál deelór alhhe’eesaywo. ⁶ Gawaá adoorihe kuungá’ a ló’wa qwalaala/á’, ala tam gurhaamuta’a qoomaarí niinawe as iiara’aduú dimbadimbé, asma adoorí i pa/aká. ⁷ Iiara’aduuwí gídaabárós i deer. A haratlintaaorhúng kan iiara’ar, gídaabá xáda xáy haratlintaaorhúng tisíng ar lóe? Miisli a gár qwaar, tam kaa iiari ar baraá asltadár miislír hhoohhooeemiis. Ala haratlintaaorhúng i gídaabár koón kángw kilá’ wa ale ta miisliro. Asma haratlintaaorhúng barkaa iiár, gár kawa hariím kan diidi’iimiis nee kan xirfeemiis nee kan ilaiwawaa/ qoomár Yesu Kristo burkwa geehhooutís. ⁸ Kuungá’ inós u sla’á’ tam ugwa aandi’iikahe. Slám inós u haratlintaatiá’ tam hamí u ara’aanda’aakahe. Kuungá’ u sageeqwalaala/á’ ar qwal/uú xirfuú koóm, kudá’ alki/ituuwo ta aleesleera’aaká, ⁹ asma haratlintaaorhúng gár i huwaahup a ba/amár munerhúng. ¹⁰ Ba/amarí an tidá’ aaruuse aa leelehhít nee aa tsee/aariín. Aaruuseedá’ ina aaririín iidíguú ba/amadá’ kuungá’ nu i hardah, ¹¹ qooma gari leelehhít gídaabá qoomár muruuwí i tleehharuuti a gaalá, nee a qoomár adoomá. Asma Qeeruú Kristo, kudá’ baraaín i dirií’, iidíguú qoomaadá’ gwa qaro geerí oó’, nee slahha’amaayér Kristo i slay gari dir’ín i lamaabu’ún, nee xirfuú i slay aluudae. ¹² Kaangwí kuri dir’ín i gwa/atís gídaabá inooín iidíguuwí gár kus kaahi a inooineeká, ala as kuungá’. Nee hám daxta iidíguuwí kunga oó’ dirhunge nee mukdá’ Ya/abtór hhoo’ ngaa alki/iit dirhúng i alé ar loohír Qeeruú hhoohhoó’, kudá’ tinda ya/aáw gawaá doorí wa ale. Muruuwí tam malayke sleeme gun ilatleerús nguwa artá wa sla’. ¹³ Gawaá adoorihe inqwaruuhúng siinootaak, nee ta dal’á’. Kuungá’ masók tsuuqaadá’ tindi haniisi qoomár Yesu Kristo burkwa geehhooeés, in haraxuá’ ló’wa ale. ¹⁴ Kuungá’ masók a na/’aá ilaiwa/amér koomá’, slám ma kumiitara’ tunduwa uuruxun nee ilatleerirhúng, tidá’ taa eehadé’ qoomár gár ta xua’ iwa kahh. ¹⁵ Kudá’ kuungá’ naa ateet ku hhoohhoó’. Gawaá adoorihe kuungá’ sleeme masók a múk hhohhó’ baraá muruudá’ sleémeero ta tlehhita’a. ¹⁶ Asma Gooi i kat, “Kuungá’ masók a múk hhohhó’, asma aníng ti hhoohhoó’.” ¹⁷ Kuungá’ Mungú bur firiiriindá’, un Baabúr ateetiindá’, inósuudá’ umuúqo heewo gu sakwasleemuút ar adoodá’ tlehhemi’iiwós ar barqaanti wasle. Gawaá adoorihe, kuungá’ hooté’ ar Mungú kuwa ilaiwawa/a’ baraá qoomaarí tawa hota’ baraaká’ yaamuú wa ale adór dahaaye. ¹⁸ Kuungá’ a xuá’ gídaabá gár kuungá’ tundura tlaáxw a muruudá’ hhitiruumitaaká, a lapiyaheeká, laqaá miislirooká, as kuungá’ niwa ti’ita’ baraá tlehhemi’iihúng kudá’ hariima’aakahe, kudá’ taa ilaoté’ amór baabi’iihúng wa ale. ¹⁹ Ala gár kuungá’ tundura tlaáxw a tseerér gídaabár koom, tidár deelmoó bee/i, kudá’ slasla/areeká, nee kudá’ xaslxaanslír koomaaká, gídaabá ar Kristo. ²⁰ Gaarí an gár inós kusa tsawaár nee Mungú iimír yaamu kiwa tleehhiiká, nee hamí baraá deeloorír alhhe’eesaywo kuna geehhooutís as kuungá’. ²¹ Kuungá’ Mungú ugwa haratlintié’ ar inós, Mungúdá’ inós gwa waaslee/atis baraá múk aa qaátl wa ale, guri xirfuú i haniís. As kuungá’ Mungú kuwa haratlintia’ nee kuwa haraxua’. ²² Kuungá’ taa hhoohhooesé’ asma looeema iga ilaiwawa/é’, as tawa hota’ ar sla’aarír hhaahhafiingw wasl dír hhaeewo. Gawaá adoorihe kuungá’ ti sla’aaslae’ ló’wa ale ar mune sleémeero. ²³ Asma kuungá’ tunda laqwaál sagaáwa tsare, ar xwaylár slaqwtooká, ala ar xwaylár qeeru. Xwaylarí ina tleehharút ar /uuruú axweesantá Mungú, tidár slafíngw koom, nee slám i hotaatiín ay alhhe’eesay wasle. ²⁴ Asma Gooi i kat, “Muu sleémeero a adór gitso, nee hhohhoarir’ín sleémeero a adór /ayór gitso. Gitso in kát, nee /ayo iri páhh. ²⁵ Ala axweesantá Aako in hotaatiín ay alhhe’eesay wasle.” Axweesantí an tidá’ taa dirhúng wa alki/iít baraá Ya/abtór hho’.

¹ Gawaá adoorihe tlakweema sleémeero hingeesaak, lama nee hhaahhafiingw sleémeero, da/i nee /ayseeno sleémeero. ² Adoodár na/’aá qaweero ilwa ngir ilatleeruusiya’, kuungá’ sleeme ilwaá qeeru, ilwaadá’ kilá’, ilatleeruusaak, as kuungá’ tawa uraareera’ ay dír ba/ama kay i hardata’, ³ kuungá’ bar aga tsaqé’ gídaabá Aako ku hhoó’. ⁴ Qwalaasé’ amoorós, inós a tlaa/adá’ slaaf. Inós kwaa sií’ nee muu, ala dír geerá Munguhe inós a tlaa/adá’ taa tsawaár, tidá’ gídaabár koom. ⁵ Kuungá’ kilá’ sleeme masók a adór tlaa/aá slafá’, tundu tleehhi tawa doó qeeru tleehhita’. Kuungá’ masók a geeraharuusér saaliingw tleehhitá’, tidá’ hhohho’, nee ilahhooár qeeru kawa huba’, tidá’ ta ya/an nee Mungú ar loohír Yesu Kristo. ⁶ Asma kaa gooín baraá Gooiro gídaabá, “Ga/aaweek, aníng tlaa/ár ur ar do’ ir gawduy, tidá’ taa tsawaár nee ar gídaabár koom, a qaás gawaá Sioni. Umuúqo heewo oo inós gwa haratlintii’ ku murekeesiiká.” ⁷ Gawaá adoorihe inós i xirif tleehhiit dír kuungaásingá’ aga haratlinti’ii’i. Ala dír kudá’ naa haratlinti’ii’ikahe a adór “tlaa/aadá’ tleehharuuse aa sí’ aa tlaa/ár ur tleehhít ar koo/i.” ⁸ Nee kaa malé gooín gídaabá tlaa/arí a, “tlaa/ár inooine a dukuutsmo, nee tlaa/ár inooín ta i huui.” Inooín Axweesantadá’ haratlintaaooro kan siaasii’. Gawaá adoorihe axweesantadá’ iri dukuutsmo tleehhít dir’ine, asma gaarí an gár Mungú aa slaá’ daandeemaaine. ⁹ Ala kuungá’ a xoorór taa tsawaár, geeraharuusér saaliingw ar doó waawutmo, xoorór hhoohhoo’, xooroodár Mungú aa tós tleéhh, as kuungá’ tlehhemi’iiwós kudá’ xirfayen kuungá’ kiwa alki/ita’, kudá’ inós aa tleéhh. Inós kuungá’ nuna ateét baraá giwtír wa ale, nuri dahaás baraá gwa/atamaayeerós tidár waa/oo/amór koom. ¹⁰ Asma kuungá’ aáng geeraawo a xooroorooká, ala hám daxta a xoorór Mungú. Kuungá’ aáng gurtleemuú Mungú ugwa sleeri’iiká, ala hám daxta gurtleemu ugwa sleeré’. ¹¹ Sla’aaruuser’eé’, kuungá’ a adór múk waaraáhh nee adór dahaaye tawa hota’ baraaká’ yaamuuwo. Ala án kuungá’ nu gurbuú’, kuungá’ ti harmagahhe’ nee ilatleeri sleémeero ar slaqwa, asma i sláqw nee qeeru. ¹² Slafingwhúng masók i tlehhema’aá hhohho’ laqaaqán dír geerá múk xoorduuwo. As qoomár inooín bartundu /aysaní tlaaq, gídaabá a muruú tlákw tlehhitá’, ala inooín tlehhemi’iihúng awa hhohho’ birkaa ara’ár, daqaní inooín Mungú ku xirfayees bál inós birna hardáh. ¹³ Kuungá’ iialooemisé’ as Aako dír muu sleémeero oo aleesleemuú koóm, kudá’ taa uráy hanmiís nee muu. Iialooemisé’ dír waawutmoowo, asma inós i aleesleemuú kón ta muu sleémeerowo. ¹⁴ Iialooemisé’ dír ga/awuuseerose, asma inooín a múk tinda ya/aáw nee inós, as mukdá’ tlakweema gaa tlehhiit kuwa doohhomiisi, nee kudá’ tlehhema’aá hhohho’ gaa tlehhiit kuwa diidi’iimisi. ¹⁵ Asma gár Mungú i slai a tí gídaabá, kuungá’ bar hhooeema iga tlehhé’, daqaní múk axweesantá dakti’iimár axweés u xasltisá’. ¹⁶ Kuungá’ a múk taa gweér baraá lawaali’iimár wa ale. Gawaá adoorihe gweermoosíng tunduwa gweér masók a Mungú un sageegadiyusá’, ala a gídaabaheeká a tlakweema in tlehhitá’ ar tawa axwesa’ gídaabá atén taa gweér. ¹⁷ Muu sleémeero ilaiwawa/aak. Hhae sla’asla’aak, Mungú ilaiwawa/aak. Waawutmo ilaiwa/ame ti hanise’. ¹⁸ Kuungá’ lawaále, iialooemisé’ dír daqaarerhunge ar ilaiwa/amér yaariir. Ala a gídaabaheeká kudá’ hho’ nee kudá’ tsatsa’aren kilooín, ala tam kudá’ xaraaslá’ sleeme. ¹⁹ Daqaní Mungú kuungá’ nu tsuuq, asma Mungú ku sla’atimis nee heé slahha’amu gu sa qiqtlaatliím as gan’amu. Heé qiqtliím as Mungú baraá slahha’amaayeedá’ inós wa hariimaaká, inós ku tsuuq nee Mungú. ²⁰ Ala heé qiqtliím baraá slahha’amaayeedá’ inós wa hariima as tlakweemaadá’ aa tleéhh, inós gár kus xirfeemisi a milá? Ala kuungá’ adór ganaa’ bar ana tlehhé’, slahha’amu kuri qiqtliindá’, daqaní tundu tsuuq nee Mungú. ²¹ Gaarí an gár kuungá’ tundusa ateét. Asma Kristo inós kuna slahhe’eemiís as kuungá’, inós iri slaqsaay tleehhiít as kuungá’ digiruuwós kuwa eehada’. ²² Inós tlakweemaá aa tleéhh i kahhiyá’, slám lama gaa baloó ooiiká. ²³ Inós qoomár kuwa /ooslislín, /ooslima gaa taqár buiiká. Qoomár kuwa slahhe’eemiís, mukdá’ gwa slahhe’eemiis gwa dae tsatiiká, ala tiri qaás dír dabaá Mungú, kudá’ sakwasleemár ganaa’ ga tleéhh. ²⁴ Kristo inósuú kilá’ tlakweemaarén gina gagaár ar gawaá slaqwtós ay gawaá msalaába, as atén masók a adór múk aa qaatl baraá muruú tlakweemaawo, nee slám atén masók a múk slaáf baraá muruú gan’amuuwo. Kuungá’ tunduri hungu/uús as inkahhi’iidá’ inós aa sláy. ²⁵ Kuungá’ aáng a adór bee/ángw aa qwaar, ala hám daxta naa ki/é’ amór de’eamusmo nee xuumusmoó munerhúng.

¹ Kuungá’ tlaáwaay sleeme, iialooemisé’ dír hhawaateehunge, asma tam hhawaateehúng kudá’ axweesantá Mungú ngaa haratlinti’ii’iiká, ngi haratlinti’iiye’ as tlehhemi’iihúng, tam kaa ádbaykahe. ² Asma slafingwhúng kwa ár, adór kur hhohhó’, nee adór ir ilaiwa/amér kon. ³ Kuungá’ tlaáwaay, hhohhoaari ma leelehhitara’ ar parootír slaqwa, adór se’eengw kuwa hhutlita’, nee tiwa parootusa’ ar muruú tlaxór gawden, nee ar inqwaruú hhohhó’. ⁴ Ala hhohhoaarirhúng masók a hhohhoaaridár baraá muuná, tidá’ geetlaakw, slám i hhitirutaká. A hhohhoaaridár muunuú tsatsa’aár nee amoohhoa. An tidár gídaabár koom ló’wa ale geerá Munguhe. ⁵ /Ameenaadá’ hhohho’ ar aáng hhohhoaari adór ngira leelehhít an adoorí. Inooín Mungú kuna haraxuú’, tam iri iialooemís dír hhawaateeine. ⁶ Sara adoorí gana tléhh. Inós ina iialooemís dír Abrahamuwo, guna Aakoowós ar ateetiín. Kuungá’ bar tlehhma’aá hhohho’ iga tlehhé’ awa adór kuká’, nee bar hotá’ ar dae wasle, daqaní kuungá’ a na/’iiwós. ⁷ Kuungá’ hhawaáte, nee tlaawayhúng hooté’ ar sagaalooa, kiwa ilaiwawa/a’ as inooín tawa múk /uuruú koomaaká ta kuungane, asma inooín nee kuungá’ a al aaluusér slafíngw alhhe’eesay wásl, kudá’ tinda tawó haniís amorhúng i alé. Adoosíng tleehhaak as firorhúng makawa baáq. ⁸ /Aymuú alhhe’eesaay a kwí, “Kuungá’ sleémeero masók a múk ti kaangw axamiís, nee múk gurtleemuú ara’ár, nee slám hhae na sla’asla’aak. Kuungá’ masók a múk gurtleemuú koóm, nee múk ti kilooín niinaweemiís. ⁹ Tlakweema mi kuqá’ ar bu’uumara’, laqaá burtunda /ooslín, /oosli ma tiqá’ ar bu’uumaara’. Ala kuungá’ masók tsuuqaá Mungú in hanmisá’. Asma gaarí an gár Mungú kuungá’ nusa ateét sleeme as tsuuqa kiwa sleera’. ¹⁰ Asma kaa gooín gídaabá, ‘Umuúqo heewo oo slafiingós gu slaá’, nee oo deelór qwal/amaaye ga leelehhiít, inós tsifraangós ngu ilaa/i tlakweema mingiwa ooín, nee afkós ngu ilaa/i lama mingiwa káh. ¹¹ Inós tlakweema ngi may nee tlehhema’aá hho’ ngi tleehhi. Wayda ngu leeleehhi ar ilakaaharu. ¹² Asma Aako mukdá’ gan’amuú koóm gun ga/áy, nee firor’ín ga axamiis umuúqo siiwaro. Ala gitsee/aá Aako i daanduú mukdá’ tlakweemaá tlehhiít. Asma Aako mukdá’ tlakweemaá tlehhiít gu sii’.’ ” ¹³ Ala heé kuungá’ nu aleesláw slahhe’eemisuuwo a heemá bar kuungá’ gár ta sla’a’ a hhooeema in tlehhá’. ¹⁴ Ala kuungá’ bartundun slahhe’eemiis as gan’amu kuwa tlehhiité’, kuungá’ daqaní a múk amoohhó’. Kuungá’ mutunduwa tawó dae tlaáq, laqaá ma tawó amoqwaqwadiimara’. ¹⁵ Ala Kristo na xirfeemisaak baraá munerhunge tawa Aakoohúng. Umuúqo siiwaro kuungá’ masók taa amohhe’esé’ ar heé yaahamiís kuwa i ilawatsa’, as iidíguú haraxu’utidár baraahúng i dirii’ kuwa alki/ita’ dirós i alé. ¹⁶ Ala adoorí tleehhaak ar tsatsa’areema nee ilaiwa/ame, as munerhúng masók ka hhohho’. Gawaá adoorihe mukdá’ kuungá’ nu daanda kaantiím as slafingwhúng oo Krishaanu’uuma, inooín ki murekeesi as kaantingw’ín kudá’. ¹⁷ Asma a tsiní burtu slahhe’eemiis as tlehhema’aá hhohho’, barnaxes a sla’aarír Mungú, ta tuwa slahhe’eemisi as tlehhema’aá tlakw. ¹⁸ Tam Kristo sleeme inós ina gwaá’ as tlakweema. Ina gwaá’ sagaáwa wák wa ale as tlakweema sleémeero. Inósuudá’ gan’amuú koóm kuna slahhe’eemiís as mukdá’ gan’amuú koomaaká, as inós atén tiwa huuwi amór Mungú. Slaqwtós kana gaás, ala kuri waaslee/atís ar Qeeru. ¹⁹ Slám iri tláy ar baraá Qeeru ay dír muneedár baraá tseegamór i dirii’, gari i dahareemiís. ²⁰ Mukwí an kudá’ Mungú gwa sii’ qoomár de’emaá Nuhuwo. Qoomaadaádae Mungú ina daamarán ar qiqtliingw qoomár miringamoó úr kuwa tleehhahhiiti. Baraá miringamoodae múk niiná ina ba/án ar baraá ma’aay, inooín a dakaát kilós. ²¹ Ma’aydá’ a slaqsoó baatiísmo, kudá’ kuungá’ nu ba/amiimís de’emakaákae. Baatiísmo a gídaabaheeká slasla/aruú slaqwa gun hingeemiis, ala baatiísmo a gídaabá hee Mungú gun firiirín as muunuú hhoó’ nguwa slay, ar /uuruú waasle/uú Yesu Kristo, kudá’ aa iwiit dákw doó /iyáy oo Mungú. ²² Inós ina tsa/án gawaá doori, nee malayke nee kudá’ aleesleemuú koomá’ nee kudá’ /uuruú koomá’ kaa gawaá dabaawós i qaás.

¹ Kristo slahhe’eemisuú slaqwa gwa sa qiqtlín. Gawaá adoorihe kuungá’ sleeme gár tunduwa hariím a inslawoó adoorí un koondá’ gídaabá, heedaádá’ slahhe’eemisuú slaqwa gwa sa qiqtlin, inós taa paraátl dír tlakweemaawo. ² Gawaá adoorihe qoomár aa meti baraá slafingwhúng baraaká’ yaamuuwo, kuungá’ gár tunduwa hariím an hotá’ ar sla’aarír Mungú kawa tlehha’, ala a gídaabaheeká an hotá’ ar ilatleerír muu kawa eeharahada’. ³ Asma qoomaadá’ aa waarahhi kuungá’ sla’aarír múk Mungú xuaaká ana eehadé’. Ala a ido daxta. Qoomaadae ana hoté’ ar slafíngw slasla/arén oo mure wásl, nee ar ilatleerír tlakw. Ana hoté’ ar oonitime nee hheehha nee layda, nee slám ana hoté’ ar munguaá hatlá’ kiwa sluufimisa’ adoodár hariimaaká. ⁴ Inooín i waa/oo/amór ara’ariyá’ asma kuungá’ tawa daqaqeera’aaká daxta baraá tlehhemi’ii’ín kudá’ slasla/arene, kudá’ hariima wasle. Gawaá adoorihe tundu /ooslislín. ⁵ Ala inooín iidíguú slafingw’ín ku alki/iit dír geerá kudá’ muu gu sakwasleemuút. Inós taa amoohhe’eés as múk slaáf nee múk aa qaatl nguwa sakwasleemuuti. ⁶ Asma Ya/abtór hho’ kana alki/iít dír múk aa qaatl, as inooín masók tan slaaf baraá qeeruuwo, ar adoodá’ Mungú ir slafi, ala tam inooín sakwasleemár slaqwa nga slay’i adoodár muu kuwa hariím. ⁷ Alhhe’eesoó mura’ sleémeero aa nakaá/. Gawaá adoorihe kuungá’ masók a múk ti ila/aám nee múk dalaá’, as kuungá’ tawa múk Mungú firiiriím. ⁸ Ala gár gídaabár koom ta muruuwí sleémeerowo a tí, kuungá’ kiloohúng ti sla’aslae’. Asma sla’aari tlakweemaá yaariir gi tuntúk. ⁹ Nee slám kuungá’ kiloohúng ti dahi’iimise’ ar qununu/ay wasle. ¹⁰ Kuungá’ ti kiloohúng sagadiyuumise’ ar adoodá’ Qeeruú hhoohhoó’ umuúqo heewo ngway aleesleemuú i haniís, kuungá’ masók tawa adór sagadiyuusér hho’ ar tsuuqaá dimbadimbé awa Mungú gi koom. ¹¹ Heé axweesantá Mungú alki/iít, ngi alki/iiti adoodá’ axweesantá Mungú i kat. Heé gadiyuús, i gadiyuusi ar /uuruudá’ Mungú aa haniís dirós i alé, as Mungú iwa xirfuuti baraá mura’ sleémeerowo ar loohír Yesu Kristo. Xirif nee aleesleemu a kós tam ay alhhe’eesay wasle. Amin. ¹² Sla’aaruuser’eé’, kuungá’ ma waa/oo/amiimara’ as slahha’amuú yaariír kwisíng ta slasleera’, oo adór iiara’aduú asla, tawa kata’ a gár waa/oo/amór koom. ¹³ Ala kuungá’ qwalala/é’ as adoodá’ slahha’amaayér Kristo kawa tsaqé’, as kuungá’ tawa qwal/amaaye hhe’esa’, qoomár xirfuuwós kuwa geehhooutís. ¹⁴ Kuungá’ bar tundun /ooslislín as Kristo, kuungá’ daqaní a múk amoohhó’. Asma Qeeruú Xiríf, gídaabá Qeeruú Mungú, i gawaahúng i dirii’. ¹⁵ Ala hee baraá tla/angwhunge mukuwa slahhe’eemiís as iwa tsu/uút, laqaá as tlehhmuú tlákw ngwa tleéhh, laqaá as tawa heé ti dahamiís baraá muruú múk i aleeró. ¹⁶ Ala bar hee kun slahhe’eemiis as inós tawa Krishaanmo, inós miwa muruút. Ala inós Mungú ngu xirfeesi as adoodá’ inós kuwa Krishaanmo babay. ¹⁷ Asma qooma naa xeér ar sakwasleema iwa iimu/uun dír múk Mungú wa ale. Ala barnaxes sakwasleema in iimu/uún diirén wa ale, ala alhhe’eesaywós a idoomá dír mukdaádá’ Ya/abtór hho’ ar Mungú gaa si’i. ¹⁸ Asma Gooi i kat, “Ala ba/amár heedaáduú gan’amuú koóm barnaxes a gár gawit, xáy, a adoomá dír heedaádá’ Mungú ilaiwawa/aakahe nee oo tlakusmoowo.” ¹⁹ Gawaá adoorihe mukdaádá’ ta slahhe’eemisi ar adoodá’ Mungú i slai, muner’ín ngi dabaá Mungú i qaasiye’, asma inós a tleehharusmooín oo inkihhimuúa koóm, nee inooín tawa qiqtlin baraá tlehhema’aá hhó’ wa ale.

¹ Kuungá’ bariisee, án kuungá’ nu gurbuú’. Asma aníng sleeme a aakoó adór kuungá’. Slám aníng a lamabu’usmoó slahha’amaayér Kristo. Tam xirfuudá’ ta geehhooeesi a kwe’eé’ sleeme. ² Gawaá adoorihe án kuungá’ nu gurbuú’, gídaabá. Kuungá’ múk Mungú de’eemaak, kudá’ taa dabaahúng i saayín, nee kawa sageesihhimita’. Ala adoorí ma tleehhara’ as tunduwa harakeemisi, ala masók an tlehhá’ ar sla’aarirhúng ar kilá’, asma an adoodá’ Mungú i slai. Slám ma tleehhara’ as peésa kawa sleera’ kilós ala na tleehhaak ar muunuú /awaák. ³ Nee slám kuungá’ miti baaluuse tlehhiitara’ daanduú kudá’ taa amorhúng i saayín, ala masók kuungá’ an slaqsaay tleehhitá’ dir’ine. ⁴ Nee de’eamusmoodá’ úr qoomár burkwa geehhooeés, kuungá’ slamangwduú xiríf u sleerá’, kudá’ baloó hhitiruutaaká. ⁵ Kuungá’ masoómba sleeme, iialooemisé’ dír múk urene. Kuungá’ sleémeero niinaweema ya/aamaak, as tiwa kiloohúng sagadiyusa’. Asma kaa gooín gídaabá, “Mungú múk daara/aám gu sii’, ala mukdá’ ti niinaweemiís gu gurtláy.” ⁶ Gawaá adoorihe, ti niinaweese’ baraá dákw Mungú, kudá’ /uuruú koóm, as inós nuwa uráy i haniisi, qoomaarós bira xeér. ⁷ Daawitimerhúng sleémeero gawaawós ti qase’, asma inós ti daawitimis as kuungá’. ⁸ Kuungá’ masók a múk qoóm. Dalaaé’, asma wakusmoohúng, Neetlaangw, i harweerirín adór dirángw wa ale, kudá’ aahhamiím, as heé i gu/i nguwa leelehhiiti. ⁹ Ala kuungá’ kwí siaak, tawa ló’wa sihhita’ baraá haratlintaaooro. Asma kuungá’ a xuá’ gídaabá, slahha’amuú adór kwí kuungá’ ta slasleera’, hhaeehúng sleeme ngu slaslayá’ umuúqo dír i dirii’iia baraaká’ yaamuuwo. ¹⁰ Mungúdá’ tsuuqa sleémeero gi tawó hanmiís, inós kuungá’ naa ateét as xirfuuwós kudá’ alhhe’eesay wásl kuwa sleera’ ar loohír Kristo. Kuungá’ burtunda slahhe’eemiís deelór niinawe, daqaní Mungúdá’ oo kuungá’ naa ateet, gadiyeérós ga alhhe’ees baraahúng wa ale. Inós kuungá’ nu aleesleemuú i haniis nee nu gawdees, nu /uuruú i haniis, nee nu sihhitis baraá haratlintaaooro. ¹¹ Aleesleemu a kós ay alhhe’eesay wasle. Amin. ¹² Án barwaárí naa amorhúng i gooiimi a Silwano ina alee/iís. Inós a hhiyoó inkihhimuúb koóm ló’wa ale. Barwaárí ngina gooiím as kuungá’ nuwa gurbuu’ nee nuwa lamabu’uum gídaabá gaarí a gurtleemuú ló’ oo Mungú. Ala gawaá adoorihe, gawduwé’ baraá gurtleemuuwí wa ale. ¹³ Múk Kríshaanáy kudá’ baraá yaamaá Babélír i dirií’ kuungá’ nu intsihhiimiis. Mukwí kwaa tsawaár adór kuungá’ wa ale. Nee garmaaeé’, Marko, sleeme kuungá’ nu intsihhiimiis. ¹⁴ Kuungá’ ti kiloohúng intsihhiimise’ ar ma’amisuú sla’aari, ar adoodá’ múk hhohhó’ oo Mungú tir ma’amaamisi. Mungú kuungá’ nu waydí haniisi, kuungaásingá’ sleémeero awa baraá Kristó i diriiá’. Amin.