1 YOHANA

¹ Kángw axweesantá slafiingw ngun gooiimaán amorhúng, axweesantadá’ qaroó daadáw iimír iimu/uungo, tidá’ taa axaasaán, nee taa araán ar ilaarén, tidá’ taa ga/aawaán kay kwatimiitaán ar dabaarén. ² Slafiingwí nina geehhooúy, atén kway araán, slám ngun dirhúng i lamabu’uumaán nee ngun alki/iitaán slafingwdá’ alhhe’eesay wásl, kudá’ geeraawo amór Mungú Baabá i dirií’, tinda amoorén i geehhooutís. ³ Tidá’ taa araán nee taa axaasaán ngin dirhúng i alki/iitaán, asma kuungá’ niwa haragwa’a’ diirén, dír dinku’uumaarén, tidá’ ar dinkwa nee Baabá, nee Garmaawós Yesu Kristo. ⁴ Tí ngin amorhúng i gooiimaán asma qwal/amaayeerén iwa bo/. ⁵ Iidíguú taa dirós wa axaasaán oo ni kuungá’ i alki/iitaan an kwí, Mungú a gwa/ateema, tam giwtír baraawose dáw i káhh. ⁶ Atén bar kaahaan a al dinku’uumiisaán nee Mungú, amorqae atén a baraá giwtír wa kumiitaán, daqaní a lama an kaahaán, nee adór ló’ a tlehhiitanaaká. ⁷ Atén bar baraá gwa/atamaayér wa kumiitaán, adoodár inós ir baraá gwa/atamaayér i dirii’i, daqaní atén an kilootén dinku’uumisaán, nee tseerér Garmaawós Yesu, tlakweemaarén sleémeero gin hamátl. ⁸ Atén bar kaahaan tlakweema i koomanaaká, ti kilootén al/agiimaán, tam looeema baraarene i kahhiyá’. ⁹ Tlakweemaarén bira hhu’u’uumaán, inós an kudá’ axweesantós boo/eemiís, nee kudá’ gan’amuú koóm, inós tlakweemaarén aqo gin gurtláy, tiri hamaatl muruú tlákw sleémeero kudá’ ta tlehhahhitaana. ¹⁰ Atén bar kaahaan tlakweema iga tleehhaniiká, inós una lamusmo tleehhaán, tam axweesantós i káhh baraarene.

¹ Laqwalor’eé’ ar ninakw, tí ngin kuungá’ i gooiím as kahhoó’ tlakweema mi tleehhara’. Ala hee bar tlakweema gaa tleéhh, heé ti aleefiriiriím dír Baabahe u koomaán, an Yesu Kristo, kudá’ gan’amkuú koóm. ² Inós an kudá’ taa haniís as atén tiwa haraki/isi nee Mungú as tlakweemaarén, ala as tlakweemaarén kilooineeká, ala nee tlakweemaá muu sleémeero. ³ Hara’ayaarós bara oohaán, daqaní aga tsaahhaán gídaabá ugwa xuaán. ⁴ Heé káh “Aníng inós ugwa xuú’,” ala hara’ayaarós ga ohinaká, inós a lamusmo, tam looeema i kahhiyá’ baraawose. ⁵ Ala heé axweesantá Mungú gaa oh, baraawose sla’aarír Mungú aa tleehharút ló’wa ale, adór atén tar hootaan dinkwa nee Mungú, kay tsaahhaán. ⁶ Heé káh, inós nee Mungú a dinkwa, gár kuwa hariím, a adoodár Kristo inós sleeme gan ar hoot. ⁷ Sla’aaruuser’eé’, hara’ayár ni kuungá’ i gooiim ar /abeneeká, ala a hara’ayaadá’ ta xua’ qaroó alé iimír iimu/uungo. Hara’ayaadá’ ta qaroó xua’ a axweesantadá’ taa axasé’. ⁸ Ala inós ka /aben sleeme, axweesantadár ló’ baraawose nee baraahunge, tidá’ kah, giwti i waaráhh, nee gwa/ateemaadá’ awa ló’ naa qaroó gwa/aatiyé’. ⁹ Heé káh, aníng a baraá gwa/ateema, ala inós hhiyaawós gwa aáhh, inós i baraá giwti tam hamí. ¹⁰ Heé hhiyaawós gu slaá’, i baraá gwa/ateema. Baraawose gár gu hariaw i káhh. ¹¹ Ala heé hhiyaawós gwa aahh, i baraá giwti, slám i baraá giwtír wa hi’imiit, ala amór i kay ga xuiiká. Asma giwti ilaawós gaa taampuúr. ¹² Tí ngin kuungá’ i gooiím, kuungá’ laqwalór ninakw, asma tlakweemaahúng kaa gurtláy as Yesu. ¹³ Tí ngin kuungá’ i gooiím, kuungá’ ín baabá, asma kudá’ daadáw iimír iimu/uungo ugwa xué’. Tí ngin kuungá’ i gooiím, masoómba, asma kudá’ tlaákw ugwa ar ba/é’. ¹⁴ Tí ngina kuungá’ i gooiím, láqwalo, asma Baabá ugwa xué’. Tí ngina kuungá’ i gooiím, kuungá’ ín baabá, asma kudá’ daadáw iimír iimu/uungo ugwa xué’. Tí ngina kuungá’ i gooiím, masoómba, asma a /uuruú koondá’, nee axweesantá Mungú i baraahúng wa hót, nee kuungá’ kudá’ tlaákw ugwa ar ba/é’. ¹⁵ Yaamu mi sla’aara’, tam muruú baraá yaamuú i dirií’. Hee bar yaamu gaa slaá’, sla’aarír Baabá baraawose i káhh. ¹⁶ Asma umuúqo gár baraá yaamuuwo, gídaabá, ilatleerír slaqwa, nar ila’, nee muruú urén oo muu gwa daara/ángw ar ay baraá slafingw’ine, muruuwí i amór Mungú dahhiiká, ala a muruú baraá yaamuuká’. ¹⁷ Ala yaamu i waarahhiyá’ dinkwa nee ilatleerir’ín, ala heé adoodá’ Mungú i slai ga tlehhiít i kumamiit ay kureér. ¹⁸ Láqwalo, gaarí a qoomár alhhe’eesaay, adoodá’ kara axasé’ gídaabá, wakusmoó Kristo ni hardah. Tam hamí wakuusér Kristo ar yaariir aa qaroó deerút. Ala adoorihe gaarí a qoomár alhhe’eesaay. ¹⁹ Mukwí ina diirén wa tláy, ala asma inooín awa bartareneká. Inooín geera bar awa bartarén, geera taa al hoót nee atén. Ala tana tláy as kiwa tsaahha hhe’eesaan adór tar awa bartareneká. ²⁰ Ala kuungá’ tunda Qeeruú hhoohhoó’ i haniís nee kudá’ Hhoohhoó’, gawaá adoorihe mura’ sleémeero u xuá’. ²¹ Tí ngina kuungá’ i gooiím, as gídaabaheeká kuungá’ looeema i xua’aaká, ala a as gídaabá looeema i xuá’, sleeme a xuá’ gídaabá, baraá looeemaawo lama tam ar niiná i káhh. ²² Heé lamusmoó kilá’ an kwí káh, Yesu a Kristowooká. Kwí an Wakusmoó Kristo, kudá’ Baabá nee Garmaawo gi sa tlaank. ²³ Heé Garma gwa tlaank, tam Baabá gwa tlaánk sleeme, oo Garma gwa ya/an, tam Baabá gwa ya/án sleeme. ²⁴ Tidá’ kuungá’ taa qaroó axasé’ iimír iimu/uungo masók i baraahúng wa iwiiwít. Tidá’ taa qaroó axasé’, bir baraahúng wa iwiiwít, kuungá’ daqaní sleeme a baraá Garmá wa iwiiwitá’ nee baraá Baabá. ²⁵ Al’axweesantá inós naa diirén i oó’ aa tí, slafíngw alhhe’eesay wásl kuwa slawaan. ²⁶ Kaangwí nguna dirhúng i gooiím daanduú mukdá’ kuungá’ nu qwaareemisa. ²⁷ Kuungá’ tunda Qeeruú hhoohhoó’ i haniís. Nee Qeeruuwí hhoohhoó’ tinda kuungá’ i haniís, inós bir baraahúng i dirii’, daqaní hee kuungá’ gár nus intsaahhatimisi i káhh. Asma Qeeruudá’ tinda kuungá’ i haniís, inós mura’ sleémeero ngu kuungá’ i intsaahhatimis. Nee gár ni kuungá’ i intsaahhatimisi a looeema, a lamtooká. Tidá’ kuungá’ nuwa intsaahhatimisi oohaak, ta baraawós wa hotá’. ²⁸ Kuungá’ laqwalór ninakw, baraawós wa hootaak, as qoomár Kristo birna hardáh, burkwa geehhooeés, atén mitiwa mureekeés dír geeraawós wa ale, ala ku ilaoohaán ar qwala/. ²⁹ Kuungá’ a xuá’ adór inós tar kudá’ gan’amkuú koóm. Gawaá adoorihe xuaak sleeme gídaabá, umuúqo heé gan’amkuú tlehhiít, kwaa laqwaál nee inós.

¹ Sla’aarír Baabá adór kar úr áx ga/aawaak, tí ar atén tiwa na/’aá Mungú ar ateetin, anqo adór hamí ta i diriiaan. Gaarí an gár múk aa haratlintii’iiká atén tis tsatsahhanká, asma Baabá sleeme kwa tsaahhiiká. ² Sla’aaruúse, daxta atén a na/’aá Mungú, ala adór aluuwo ta laqaan hamírihe naa gehhoouuriká, ala tí a xuaán gídaabá Yesu bir na wayaá’, atén a adór inós tleehhitaán. Asma un araán adoodá’ inósuú kilá’ i dirii’i. ³ Ala umuúqo heé haraxu’utír adoorí ga koóm gawaá Yesuwo, tin hhoohhooeemiis adoodá’ Yesu kur hhoohhoó’. ⁴ Umuúqo heé tlakweemaá tlehhiít, a hara’ayár Mungú eeharto gana sií’. Asma hara’ayár Mungú barkaa sií’ eeharto, an tlakweema. ⁵ Kuungá’ a xuá’ gídaabá Yesu kunguna geehhooutís tlakweema ngiwa hingeesi, asma inós i tlakweemaá konká. ⁶ Heé baraawós wa hoót i tlakweemaá tlehhiitiiká. Heé tlakweemaá tlehhaahhiít, kwí Yesu gwa ariiká, nee gwa tsaahhiiká sleeme. ⁷ Laqwalór ninakw, hee munduwa al/aáy. Heé gan’amkuú tlehhaahhiít, an heé ganaá’ adoodá’ Yesu ir ganaai. ⁸ Heé tlakweemaá tlehhaahhiít a oo Neetlaangw, asma Neetlaangw i qaroó tlakweemaá tlehhaahhiit iimír iimu/uungo. Garmoó Mungú kunguna geehhooutís, as gadiyér Neetlaangw ngiwa hhitin. ⁹ Umuúqo heé taa laqwaali nee Mungú, tlakweema gi tlehhaahhitiiká, asma dahaasíngw Mungú i baraawós i dirii’. Slám i kumiitiiká tlakweema tlehhituwo, asma inós a na/oó Mungú. ¹⁰ Gawaá adoorihe na/’aá Mungú ki geehhoo’, tam na/’aá Neetlaangw sleeme. Asma heé tlakweemaá tlehhaahhiít kwa laqwaaliiká nee Mungú, tam kudá’ hhiyaawós ahhiít sleeme. ¹¹ Asma iidíguuwí ugwa qaroó axasé’ iimír iiumu/uungo, gídaabá, “Atén ti kilootén sla’asla’aané’.” ¹² Atén mawa adór Kaini tleehhitaán, kuduú bartá Neetlaangw, oo hhiyaawós gwa gaas. Kaini hhiyaawós gár ngusa gaás a milá? Gár ngusa gaás a tlehhemi’iiwós kin tlakw, ala awa hhiyaawós in ganaaiyá’. ¹³ Hhaee’eé’, ma waa/oo/ara’ múk aa haratlintii’iiká bur na aáhh. ¹⁴ Atén a xuaán adór gwa’ara ngira geexawaán nay waarahhaán amór slafiingw. Tí an xuaán asma hhaeerén i sla’aán. Heé sla’aari wásl i baraá gwa’arár i kaahh. ¹⁵ Umuúqo heé hhiyaawós gwa aahh, an kudá’ múk tsu/a/iím. Nee kuungá’ a xuá’ gídaabá heé múk tsu/a/iím slafíngw alhhe’eesay wásl gu konká baraawose. ¹⁶ Atén daxta sla’aari aga tsaahhaán, asma Yesu slafiingós guna duúx as atén. Gawaá adoorihe atén sleeme gár tiwa hariím a slafingwrén un duuxaán as hhaeerén. ¹⁷ Ala heé muruú baraaká’ yaamu gu koóm, bar hhiyaawós oo gár koomaaká gun tawó ga/áy, ala gu alee/iimisiiká, xáy sla’aarír Mungú iqo deéro baraá heé adoorihe? ¹⁸ Laqwalór ninakw, sla’aarirén miwa axweesantá tawo tleehhít, ala masók sla’aarirén an sla’aarír tlehhema’aá koom, nee ar looeema. ¹⁹ Gawaá adoorihe daqaní a xuaán adór atén tar múk looeema, muneerén kay tsaeesaán adoorír alé dír geeraawose, ²⁰ gawaá umuúqo gaaro ar muneerén tiwa sakwasleemuta, asma Mungú ku úr ta muneerene, nee inós mura’ sleémeero gu xuu’. ²¹ Sla’aaruúse, muneerén bar atén ti sakwasleemutaká, daqaní dír Munguhe a da’ayumiitaanaaká. ²² Nee umuúqo gár ta dirós i firiimana a slawaán, asma hara’ayaarós kawa eeharaharaan, nee adoodá’ inós i slai kawa tlehhiitaan. ²³ Hara’ayaarós a tí, “Garmaawós Yesu Kristo ku haratlintiaán, nee atén nee hhaeerén ti sla’asla’aané’ adoodá’ tira hara’ayín.” ²⁴ Heé hara’ayaarós ga eeharahaár, in baraá Mungú wa hoot, nee Mungú baraawós. Gawaá adoorihe a xuaán gídaabá inós i baraarén wa hoot, ar Qeeruú hhoohhoó’ oo naa atén i haniís.

¹ Sla’aaruúse, umuú gár ta kaahi ma haratlintatiaara’, tlaampa’aasaak ala alé, áx amór i dahh a amór Mungúhe. Asma múk yaariír naa ti’iimiít baraá yaamuuwo oo káh, “Atén a aaruuse,” ala a loeeká. ² Qeeruú Mungú adór kur tsahha’ a adoorí, “Umuúqo heé káh, Yesu Kristo nina hardáh ar iwa slaqwa tleehhiít, tí amór i dahh a amór Mungú.” ³ Umuúqo gár ta kaahi ar Yesu kuwa siasi’i i amór Mungú dahhaká. Kangwsíng an oo kudá’ Kristo ngwa si’iye’, kangwdá’ taa axasé’ tawa kaahi, “Ni hardah, nee hamí naa qaroó baraá yaamí hardáh.” ⁴ Laqwalór ninakw, kuungá’ awa Mungú, nee kuungá’ mukdá’ káh atén a aaruuse, ala a lama, kuungá’ mukdá’ ugwa ar ba/é’, asma Mungú i baraahúng i dirii’, nee inós ku úr ta Wakusmoó Kristo oo baraá yaamí diriia. ⁵ Kuká’ awa baraá yaamu, muruú ta axweesi oo baraá yaamu, nee yaamu tooín ngi axamiisiyá’. ⁶ Atén awa Mungú, umuúqo heé Mungú gu xuú’, axweesantarén ga axamiis, múk Munguheeká axweesantarén ga axamiisiiká. Adoorihe a tsaahhaán tidár ló’ nee tidá’ tlakw. ⁷ Sla’aaruúse, ti sla’asla’aané’. Asma sla’aari amór i dahh a amór Mungú. Kudá’ sla’aarír koóm, a kudá’ taa laqwaál nee Mungú, nee inós Mungú gwa tsaáhh. ⁸ Heé sla’aarír koomaaká, Mungú gwa tsaahhiiká, asma Mungú a sla’aari. ⁹ Adoorihe sla’aarír Mungú kinga amoorén i geehhooutís, gídaabá, Mungú Garmaawós oo kilós ngwa ya/aáw baraá yaamuú i ale, asma inós kuwa slafíngw ar slawaan. ¹⁰ Sla’aari an tí, gídaabá Mungú atén tina slaá’, a gídaabaheeká atén inós una sla’aán. Garmaawós nguna ya/aáw asma atén nee Mungú tiwa haraki/isi, nee wayda nguwa tleehhi as tlakweemaarén. ¹¹ Sla’aaruúse, bar Mungú atén taa slaá’ adoorír ale, atén gár tiwa hariím masók tin sla’asla’aán sleeme. ¹² Heé Mungú gwa baloó ar i kaahh. Atén birti sla’asla’aán, Mungú i baraarén wa hoot, sla’aarirós iri ganá’ baraarene. ¹³ Adoorihe kari xuaán gídaabá atén a baraawós wa hootaán, asma atén inós taa qáy Qeeruuwose. ¹⁴ Atén aga araán kay lamabu’uumaán gídaabá, Baabá Garma nguna ya/aáw tawa Ba/amusmoó yaamu. ¹⁵ Hee bira ya/án gídaabá Yesu Kristo a Garmoó Mungú, Mungú i baraawós i dirii’. Nee inós i baraá Mungú. ¹⁶ Atén adór Mungú tira slaá’, aga tsaahhaán, nee sla’aarirós kari haratlintiaán. Mungú a sla’aari. Kudá’ baraá sla’aarír wa hoót, in baraá Mungú, nee Mungú i baraawós. ¹⁷ Adoorihe sla’aari kana gan’aás baraarene, as kahhoó’ bál Deelór Sakwasleemaaro a da’ayumiitanaaká. Asma adoodá’ inós i dirii’i, an adór atén ti diriiaan baraá yaamuukae. ¹⁸ Baraá sla’aariro dae i káhh. Ala sla’aarír ganaa’ dae gan hingés. Asma dae i sakwasleemár koón. Heé daér koóm, baraá sla’aariro aa ganaiiká. ¹⁹ Atén Mungú un sla’aán, asma inós atén tina slaá’ geerí ale. ²⁰ Hee bir kaahi, “Mungú án u slaá’,” ala hhiyaawós gu slaiiká, inós a lamusmo. Asma hee bar hhiyaawós kudá’ i ga/ay gwa harslaaqaát sla’atiro, Mungú oo aa ariiká gu aslayká sla’atiro. ²¹ Inós tina adoorír hara’ayín gídaabá, “Heé Mungú gu slaá’, gár kuwa hariím a hhiyaawós gun slaa’ sleeme.”

¹ Umuúqo heé adoorí gaa haratlintii’ gídaabá, Yesu a Kristo, heewí kwa laqwaál nee Mungú. Heé baabuú na/aay gu slaá’, na/aydá’ baabá aa laqwaál gu slaa’ sleeme. ² Adoorihe na/’aá Mungú adór kir sla’aan a tsaahhaán, bar Mungú u sla’aán, nee dabeerós bara eeharaán. ³ Asma dabeerós bar eeharaharaán, tí gár i laqaaqaan a gídaabá, atén Mungú u sla’aán. Slám bur sla’aán, dabeerós eeharto ka gawideká. ⁴ Heé taa laqwaál nee Mungú, yaamu gir baa/. Mungú bura haratlintiaán, haratlintaaoorén tí an gár yaamu gir baa/. ⁵ Heé yaamu gir baá/ a heemá, aqo har kudá’ aa haratlintí’iíke gídaabá, Yesu a Garmoó Mungú. ⁶ Yesu Kristo an kwí naa hardah ar ma’aay nee tseere. Naa hardihiiká ar ma’aay kilooín, ala nina hardáh ar ma’aay nee tseere. Qeeru an kudá’ gu lamabu’uúm, asma Qeeru a looeema. ⁷ Asma awa ngu lamabu’uumá’ a tám [gawaá dooriwo, a Baabá, nee Axweesani, nee Qeeruú hhoohhoó’, ala kuká’ tám a wak. ⁸ Awa tám i dayá’ baraá yaamuuwo, awa ngu lamabu’uumá’]. Qeeru, nee ma’aay, nee tseere. Kuká’ tamaawo lamabu’ungw’ín a wák. ⁹ Atén lamabu’úngw muu u ya/aa/amaán, ala lamabu’úngw Mungú ku ak úr. Lamabu’úngw Mungú a kwí oo Garmaawós nguwa lamabu’un. ¹⁰ Heé Garmoó Mungú gwa haratlintii’, lamabu’uungwí gu kón baraawose. Heé Mungú gwa haratlintii’iiká, a Mungú guna lamusmo tleéhh, asma lamabu’uungwí Mungú Garmaawós nguwa lamabu’ún, gwa haratlintii’iiká. ¹¹ Lamabu’uungw an kwí, Mungú slafíngw alhhe’eesay wásl nguna haniís. Slafiingwí naa haniís i baraá Garmaawós i dirii’. ¹² Heé Garmoó Mungú gwa haratlintii’, slafiingwí gu kón, oo Garmoó Mungú gwa haratlinti’iiká, slafiingwí gu konká. ¹³ Kaangwí nguna kuungá’ i gooiím, asma kawa xua’ adór slafíngw alhhe’eesay wásl kur koonda’, kuungaádá’ Garmoó Mungú ugwa haratlintie’. ¹⁴ Adoorihe a haraxu’utír koomaán dirose gídaabá bar ugwa firiimaán ar adór inós i slai, ti axaas. ¹⁵ Atén bara xuaán gídaabá ti axamiis, daqaní umuúqo gár kuwa firiimana, a xuaán gídaabá aga slawaán. ¹⁶ Hee bar hhiyaawós gwa ár, i tlakweemaá tlehhiit, ala a tlakweemaá gwa’arár kooma’aaká, ngu aleefirin, nee Mungú gu slafíngw i haniis. Ala firoorí a har dír mukdá’ tlakweemaá gwa’ara nga tleehhi’iiká. Tlakweemaá gwa’arár koomá’ i dayá’. Aníng a kaahaaká ngu aleefirin as tlakweemaaká’. ¹⁷ Umuúqo gár ganaa’aaká a tlakweema, ala tlakweemaá gwa’arár kooma’aaká i dayá’. ¹⁸ Atén a xuaán gídaabá heé taa laqwaál nee Mungú i tlakweemaá tlehhiitiiká, ala inós ku harmagagaahh nee Garmoó Mungú, tam Neetlaangw gu kwatiitiiká. ¹⁹ A xuaán gídaabá atén a múk Mungú, ala yaamu sleémeero kudá’ tlaákw gin baliit. ²⁰ Garmoó Mungú adór nira hardáh, atén a xuaán, nee inós fuquraangw ngwa haniís oo inósuuduú Mungú ló’ kuwa xuaan. Nee atén a baraá inósuuduú ló’ i diriiaán, as tawa baraá Garmaawós Yesu Kristo. Kwí an Mungú ló’ nee slafíngw alhhe’eesay wásl. ²¹ Laqwalór ninakw, munguaá lamto ti harmagahhe’.