TITOTA

TITOTA

SAN PABLO KARTA KACHASKAMANDA

¹ Nuka Pablo, Taita Dius­pa lutrin­sina, Jesu­cristo kacha­mus­ka­mi kani, Alli Willai­ta willaspa purin­ga­pa; chasaka, Taita Dius agllas­ka­kuna pai­wa suma iuia­rin­ga­pa; chi­wanka, chi sutipa Alli Willai­ta iachag­samuspa, paita iuia­rispa kaug­san­ga­pa. ² Chasa kaug­sas­paka, mana puchuka­ri­diru suma kaug­sai­ta iukan­ga­pa­mi suia­na­kun­chi. Kai alpa manara tiag­pi­ta­mi Taita Dius, mana llu­llag kaspa, nukan­chita chasa karan­ga­pa nirka. ³ Kuna­ura, Taita Dius niska pun­cha­mi cha­iarka, paipa Rimaita willan­ga­pa. Chasa willan­ga­paka, Taita Dius nukan­chita kis­pi­chig­mi min­ga­waspa kacha­mu­warka. ⁴ Kam Tito­ta­mi kai karta kachaiki. Kamka, nuka­sina­lla­ta­ta Jesu­cristo­wa suma iuia­rispa, nuka kikinpa wam­bra­sina­mi ka­puangi. Taita Dius i Jesu­cristo nukan­chita kis­pi­chig, kamta kuiaspa, suma iuiai­wa kawa­pua­chu.

Kreta alpapi, Tito ima rurai iukaska­manda

⁵ Kasa­manda­mi kamta Kreta alpa­pi sakir­kaiki: chipi kaug­sa­na­kus­kata alli rurai­kunata mas suma iuia­chispa iacha­chin­ga­pa. Tukui pui­blu­kunapi Cristo­wa tukus­ka­pura iacha­chig taita­kunata agllan­ga­pa­pas­mi sakirkaiki; ima­sa­mi nuka mingarkaiki: chasa.

⁶ Iacha­chig taita­kunaka iukan­kuna­mi kanga ñi ima­pi­pas mana piñai tukunga­sina. Sug warmi­lla­wa kaug­sa­chu­kuna. Paipa wam­bra­kunaka, Cristo­wa suma iuia­rig­kuna ka­chu­kuna. Mana pipas pai­kuna­manda ni­chu­kuna: “Mana alli runa­kuna­mi kan­kuna; taitata mana uiag­kuna­mi kan­kuna”. ⁷ Mai­kan­pas iacha­chig taita kas­ka­taka, Taita Dius tukui Cristo­wa tukus­ka­kuna­ta­mi mingaska ka. Chi­man­da­mi paita chaiá, ñi ima­pi­pas mana piñai tukunga­sina kan­ga­pa. Mana ka­chu paipa iuiai­lla­wa rurag, mai­tuku sug­kuna: “Mana rura­ku­chu” nig­pi­pas. Mana kachu rabia­rig, machan­gi­chu, pilia­rig, imasa­pi­pas kulki mira­chin­ga­pa iuiai­lla kag. ⁸ Chasa­paka iukan­mi, wasima pipas chaiag­ris­kata: “Iai­kui” ni­dur kanga, ima­pi­pas alli­lla ruraita iuias­pa­lla ruranga, tukui­kuna­wa alli­lla iuiai­wa i tukuipi alli kanga, Taita Dius­manda­lla kaug­sanga, ima jiru iuia­rispa munai apig­pi­pas, chita mana ruras­pa­lla. ⁹ Dius­pa sutipa Rimaita iacha­chis­ka­taka mana kun­ga­ris­pa­lla­mi iuká kaug­sanga; chi­wanka, sug­kunata suma iuia­chispa, alli­llata iacha­chin­ga­pa; chasa­lla­ta, mai­kan­pas: “Dius­pa Rimai mana alli­lla kan­chu” ni­na­kus­kata alli­llapi iuia­chin­ga­pa.

¹⁰ Alli Willai­ta mana uiag­kunaka, achka­kuna­mi tian­kuna. Judiu­kunapa marka chura­chin­ga­pa iacha­chig­kuna, mas­pas­mi mana uian­ga­pa munan­kuna. Chasa­kunaka, ianga rimas­pa­mi sug­kunata panda­chin­kuna. ¹¹ Chasa­kunata chaian­mi upalla­chin­ga­pa. Pai­kuna mana alli­llata iacha­chi­na­kun­chu. Pai­kuna iacha­chis­pa­mi wasipi tukui kaug­sag­kunata pan­da­chi­nakú. Chasaka, kikin­kuna­manda­lla­mi kulki mira­chi­nakú.

¹² Kreta­manda sug willag runa, chi alpapi kaug­sa­na­kus­ka­manda kasa­mi nirka: “Kai Kretapi kaug­sag­kuna, ima­ura­pas llullaspa, jiru ruraspa, killa wangu mikun­ga­pag­lla iuias­pa­mi kan­kuna”. ¹³ Chasa nispa, sutipa kas­ka­ta­mi willá. Chasa­manda, pai­kunata sin­chi piñaspa iuia­chingi; chasaka pai­kuna, Cristo­wa mas suma iuia­rig­kuna kan­ga­pa. ¹⁴ Chi­wanka, judiu­kuna kikinpa iuiai­wa rima­na­kus­kata mana uia­na­kuchu. Ñi sutipa Alli Willai­ta sakiska kag­kuna­ta­pas ima nis­kata rura­na­kus­kata mana uia­na­kuchu.

¹⁵ Alli iuiai­wa kag­kunaka, tukuipi alli iuiai­wa­mi kawan­kuna. Ikuti mana Cristo­wa iuia­rispa jiru iuiai­wa kag­kunaka, tukuipi mana alli iuiai­lla­wa­mi kawan­kuna. Pai­kunapa iuiaipi ima iuia­riska­pi­pas, jiru iuiai­lla­mi tukug­samú. ¹⁶ “Taita Diusta rigsi­nimi” nig­pi­pas, mana paita rigsig­sina­mi jiru ruraspa kaug­san­kuna. Chasa kaug­sag­kunaka, millanga­sina­mi tukun­kuna. Iapa subirbi kas­pa­mi mana pudin­kuna, ñi ima­pas alli­lla ruran­ga­pa.

Alli­lla iacha­chiska­lla­ta rimangi, niska­manda

¹ Kamka, alli­lla iacha­chiska­lla­ta rimangi.

² Achala runa­kunata iacha­chingi, mana iapa urdi­mal ka­chu­kuna; tukui­wa alli­lla iuiai­wa kaug­sa­na­ku­chu, ñi ima­pi­pas mana piñai tukun­ga­sina. Cristo­wa suma iuia­rispa, tukui­kunata alli­lla kuiaspa, tukui­kuna­wa mana piña­na­kus­pa­lla kaug­sa­na­ku­chu.

³ Achala warmi­kunata chasa­lla­ta iacha­chingi, pai­kuna Taita Dius­pa­lla kag­kuna­sina kaug­sa­chu­kuna, mana pi­manda­pas wasa rimas­pa­lla, mana machas­pa­lla. Chasa sumag­lla kaug­sas­pa­mi pudin­kuna, ⁴ mas sipas war­mi­kunata suma iuia­chispa iacha­chinga, paipa kusata i wam­bra­kunata kuian­ga­pa, ⁵ tukui­kuna­wa alli­lla iuiai­wa kan­ga­pa, tukui­wa alli kan­ga­pa, wasipi ima tias­kata ima minis­tiska ruraspa kan­ga­pa i kikinpa kusata suma uiaspa kaug­san­ga­pa. Chasa kaug­sag­pi­kunaka, ñi pipas mana pudin­ga­kuna­chu, Dius­pa Rimai­manda nin­ga­pa: “Mana alli­lla kan­chu”.

⁶ Musu­kunataka chasa­lla­ta iuia­chingi, tukui­kuna­wa alli­lla iuiai­wa kan­ga­pa­kuna. ⁷ Kamka, tukuipi alli­lla rurangi. Chasaka sug­kuna, kamta kawas­paka, chasa­lla­ta­mi ruran­ga­kuna. Alli Willai­ta suma iacha­chingi, mana urdimal nis­pa­lla. ⁸ Chasa­lla­ta, ima­pi­pas alli­lla rimangi. Chasaka, mana pipas kam­manda: “Mana alli­lla kan­chu” nin­ga­kuna­chu. Chasa rurag­pika, mai­kan kamta piñag­kuna­pas, mancha­rispa, mana pudin­ga­kuna­chu, ñi ima jiru­pas nukan­chi­manda riman­ga­pa.

⁹ Lutrin­kunata iacha­chingi, patrunta tukuipi sumag­lla uia­chu­kuna. Mana aini­ris­pa­lla, patrun ima nis­kata sumag­lla rura­chu­kuna. ¹⁰ Sisai kag­pi­kunaka, mana ikuti sisa­chu­kuna. Chasa sumag­lla kaug­sag­pi­kunaka, Taita Dius nukan­chita kispi­chig­manda iacha­chiska iapa suma kas­ka­ta­mi sug­kunata kawa­chinga­kuna.

¹¹ Taita Dius, kikinpa wam­brata kacha­muspa, paipa suma kuiai­ta­mi kawa­chirka; chasaka, tukui runa­kuna kispi­rin­ga­pa. ¹² Chi kuiai­wa iacha­chi­mukumi, mana alli­lla iuiai­kunata i jiru rurai­kunata nukan­chi sakin­ga­pa; chi­wanka, tukui­kuna­wa alli­lla iuiai­wa kaspa, alli­lla ruraspa, Taita Dius­manda­lla iuia­rispa, kai alpapi kaug­sa­na­kun­ga­pa. ¹³ Kasa­pas­mi iacha­chi­muku: kun­tin­tu­lla suian­ga­pa, Taita Dius ima niska tukug­samun­kama. Chika ni­raian­mi, nukan­chipa atun Dius i kis­pi­chig Jesu­cristo sumag­lla ikuti samun­ga­pa puncha chaian­kama. ¹⁴ Pai kikin­mi saki­rirka, nukan­chi­manda wañu­chii tukun­ga­pa; cha­saka, nukan­chi tukui panda­ris­ka­kunata kispi­chin­ga­pa. Chi­wanka nukan­chi, armas­ka­sina lim­piu­lla tukuspa, pai­pa­lla runa­kuna ni­raian­ga­pa. Chasaka muna­na­ku­sun­chimi, tukuipi alli­lla ruraspa kaug­sa­na­kun­ga­pa.

¹⁵ Chasa­mi iukangi, tukui iachai­wa sin­chi rimanga i iuia­chinga. Mana alli­lla rura­na­kus­ka­taka iukangimi piñanga. Kamta, ñi pipas mana wabutichu.

Cristowa tukuska­kuna, imasa kaug­sai iukaska­kuna­manda

¹ Tukui­kunata iuia­chingi, mai­kan mandag ima nis­kata suma uiaspa, ruraspa kaug­sa­na­ku­chu. Ima­ura­pas iuiaipi ka­chu­kuna, alli­lla ruran­ga­pa. ² Mana pi­manda­pas wasa rima­chu­kuna. Pilia­rin­ga­taka, tukui­kuna­wa mana piña­na­kus­pa­lla i mana atun­ia­chi­ri­na­kus­pa­lla iuiai­pi ka­chu­kuna.

³ Nukan­chipas, ñugpata upa­sina­mi kar­kan­chi. Taita Diusta mana uias­pa­lla­mi chingas­ka­sina kar­kan­chi. Tukui jiru munai­wa, nukan­chi alli iuia­chi­rin­ga­pa iuiai­wa watas­ka­sina­mi kar­kan­chi. Pari­ju­ma piña­na­kuspa, jiru iuiai­wa kawa­na­kuspa, tukui jiru ruras­pa­mi kaug­sa­na­kur­kan­chi. ⁴ Chasa kaug­sa­na­kug­pi­pas, Taita Dius nukan­chita kispi­chig, runa­kuna­manda lla­ki­rispa, paipa suma kuiai­ta­mi kikinpa wam­bra­wa kawa­chi­muspa, ⁵ nukan­chita kis­pi­chirka. Nukan­chi alli­lla iuia­rispa ruras­ka­kuna­mandaka, mana; nukan­chi­manda lla­kis­pa­mi pai kikin kis­pi­chirka. Nukan­chipa pan­da­ris­ka­kunata mai­llas­ka­sina­mi ikuti tiag­samug­sina ni­raian­chi. Santu Ispi­ri­tu­wa­mi chi musu kaug­saita iukan­chi. ⁶ Jesu­cristo nukan­chita kispi­chig­manda­mi Santu Ispi­ri­tuta nukan­chita achka kara­murka; ⁷ chasaka nukan­chi, paipa suma kuiai­wa mana pan­da­rig ni­raiag­samun­ga­pa. Chi­wanka suia­na­kun­chimi, mana puchu­ka­ri­diru suma kaug­saita chas­kin­ga­pa.

⁸ Chi willaika, tukui sutipa­mi ka. Muna­nimi, kampas sug­kunata sin­chi rimaspa iuia­chin­ga­pa. Cha­saka Taita Dius­wa suma iuia­rig­kuna, alli­lla ruras­pa­mi kaug­sanga­kuna. Chi tukui suma iacha­chii­kunaka, tukui­kuna­manda alli­pa­mi kan­kuna.

⁹ Sugkuna ianga rima­na­kus­kata mana uia­kungi. Chasa­lla­ta, ñug­pa­manda taita­kuna imasa kag­kuna­manda par­lu­kunata mana uia­kungi. Moi­sés ruran­ga­pa niska ima ni­raias­kata pai­pura aini­chi­ri­na­kus­ka­ta­pas mana uia­kungi. Chi par­lu­kunaka, ianga­lla­mi rima­nakú; ñi pi­manda­pas mana alli­lla tukun­chu.

¹⁰ Mai­kan­pas Cristo­wa tukus­ka­kunata sug­kuna­wa sug­kuna­wa piña­chi­ri­na­kus­ka­taka sug biaji sug biaji piñaspa, alli­llapa iuia­chingi. Iskaima rimas­kata mana uiag­pika, kam­kuna­pura­pag­manda llugsi­chingi. ¹¹ Kasa iuia­ringi: chasa­kuna, kikin­kuna­mi panda­ri­nakú. Chasa panda­ris­ka­kuna­waka kikin­kuna­mi maska­ri­nakú, dil­tudupa ninama sitai tukun­ga­pa.

Tito ima rurai iukaska­manda

¹² Waugki Artemasta u Tikikota nuka kam­bagma kacha­ura, mana unai­lla Nikópolis pui­bluma samungi kawa­wan­ga­pa. Chi­pi­mi nuka iuia­kuni, tamia puncha­kuna iali­chin­ga­pa. ¹³ Waugki Zenas, jus­ti­sia­kunata nukan­chi­manda rimag­mi ka. Paita, waugki Apolos­ta­pas, kam masa pudiska aida­puangi. Chasaka, pai­kuna puri­na­ku­ura, mana ima­pas pisin­ga­kunata­chu. ¹⁴ Nukan­chi kikin­pura Cristo­wa tukus­ka­kuna­pas iachai­ku­chu­kuna, suma ruras­pa, minis­tis­ka­kunata aidan­ga­pa. Chasa aidag­kunaka, alli­lla­pa­mi kaug­sa­na­kunga.

Kaia­kama, niska­manda

¹⁵ Nuka­wa sug­lla­pi kag­kuna, tukui­kuna­mi kamta: “Puangi” nin­kuna. Cristo­wa iuia­rispa nukan­chita kuiag­kunata: “Puangi” ni­puai. Taita Dius, tukui kam­wa kag­kunata sumag­lla kawa­pua­chu.