FILIPOSPI CRISTOWA TUKUSKAKUNATA

FILIPOS PUIBLUPI CRISTOWA TUKUSKAKUNATA

SAN PABLO KARTA KACHASKAMANDA

¹ Nukan­chi Pablo i Timoteo, Jesu­cristopa lutrin­sina­kuna­mi kan­chi. Tukui kam­kuna, Jesu­cris­to­wa tukuspa, Taita Dius­pa­lla kaspa, Filipos pui­blupi kaug­sag­kuna­ta­mi kai karta kachan­chi. Kam­kunata iacha­chig taita­kunata, kam­kunata aidag taita­kunata i tukui­kuna­ta­pas, ² nukan­chipa Taita Dius i Iaia Jesu­cristo, kuiaspa, suma iuiai­wa kawa­pua­chu.

Cristowa tukuska­kuna­manda Taita Diusta mañaska­manda

³ Nuka, kam­kuna­manda ima­ura­pas iuia­rispa, nuka­pa Taita Diusta Pai Siñurmi nini. ⁴ Chasa­lla­ta, paita kam­kuna­manda iuia­rispa maña­ura, ima­ura­pas alli iuia­chii­wa­mi tukui­kuna­manda maña­pui­ki­chita. ⁵ Kam­kuna, Cristo­wa tukus­ka­ura­manda­ta aida­wa­na­kun­gi­chimi, pai­manda Alli Willai­ta willaspa nuka purin­ga­pa. ⁶ Kasa­mi alli­lla iachani: Taita Dius, kam­kuna­wa alli­lla rurai kalla­rispa, chasa­mi rura­kunga, ikuti kikin Jesu­cristo samun­kama. ⁷ Tukui kam­kunata nuka suma kuias­pa­mi alli ka, nuka chasa iuian­ga­pa. Nuka kar­sil­pi kas­pa­pas, jus­ti­sia­kunapa ñawipi mana man­chas­pa­lla­mi saia­rispa, nini: “Kai Alli Willai, sutipa­mi ka”. Chasa­waka, tukui kam­kuna­pas nuka­wa Taita Dius­pa suma kuiai­ta­mi chas­ki­na­kun­gi­chi, ima­pi­pas alli­lla rura­wag­manda.

⁸ Taita Diusmi iachá, nuka kam­kunata kuiagta; imasa­mi Jesu­cristo nukan­chita suma kuiá: chasa­lla­ta. ⁹ Chi­mandaka, kasa­mi paita maña­pui­ki­chita: kam­kuna mas sumag­lla kuia­na­kuspa, tukui pun­cha­kuna kaug­sa­na­kun­ga­pa; chi­wanka, alli­lla iachaspa i ima­pi­pas alli iuiai­wa kan­ga­pa. ¹⁰ Cha­sa­mi iachan­kan­gi­chi, mai­kan mas suma rurai­kuna agllaspa, ruraspa kaug­sa­na­kun­ga­pa. Cha­saka, Cristo ikuti samu­ura, kam­kuna tukuipi alli mana ima­pi­pas pan­da­ris­ka­mi kawa­rin­kan­gi­chi. ¹¹ Kam­kuna alli­lla ruraspa kaug­sas­paka, Jesu­cris­to­wa tarpus­kata pallas­ka­sina­mi tukun­kan­gi­chi. Chasaka, Taita Diusta suma atun­ia­chis­pa­mi pai alli kagta kawa­chin­kan­gi­chi.

Cristo kikinmi nuka­pa kaug­sai kapuá, niska­manda

¹² Taita­kuna i mama­kuna, kasa­pas­mi nuka willai­ki­chita: nuka kai karsilpi kag­pi­pas, Alli Willai­taka mas sumag­lla­mi miraspa uia­ri­ku. ¹³ Kai iaia mandagpa wasipi i sug­kuna­pag­pi­pas, tukui­kunami iachan­kuna, nuka Cristo­manda­lla kaipi wata­raiagta. ¹⁴ Chasa­lla­ta, Iaia Jesus­wa tukus­ka­kuna, ñalla tukui­kuna, nuka wichka­raiagta iachas­paka, animu­rispa, Dius­pa Rimaita mana manchas­pa­lla­mi willa­nakú.

¹⁵ Sug­kunaka, nuka­manda mana alli­lla iuiaspa kawa­wag­kuna, Cristo­manda­lla­ta­ta­mi willa­nakú, “Nuka, Pablo­manda mas­mi kani” kikin­kuna iuia­rispa. Ikuti sug­kunaka, alli iuiai­wa­mi pai­manda sumag­lla willa­nakú. ¹⁶ Pai­kunaka, nukata kuia­was­pa­mi Cristo­manda willa­nakú, kasa iachaspa: Taita Dius­lla­tata kai karsilpi cha­ri­wa­kugta; chasaka, Alli Willai­ta mana man­chas­pa­lla willa­kun­ga­pa. ¹⁷ Chi sug­kunaka, “Nuka, Pablo­manda mas­mi kani” kikin­kuna iuia­ris­pa­mi Cristo­manda­lla­tata willa­nakú. Chi­kunaka, kikin­manda­lla iuia­ris­pa­mi willa­nakú. Nuka kar­sil­pi kas­ka­ta­mi mas llaki­chi­wan­ga­pa muna­nakú. ¹⁸ Chasa muna­na­kug­pi­pas, nuka ninimi: “Pai­kuna iacha­chu­kuna”. Alli­lla u mana alli­lla iuiai­wa willa­na­kug­pi­pas, Cristo­manda willa­na­kug­pika, nuka­taka alli­mi uia­riwá.

Kasa­manda­mi mas alli iuia­chii­wa kan­ga­pa kani: ¹⁹ kam­kuna Taita Diusta maña­puas­ka­manda i Jesu­cristopa Ispí­ritu aida­was­ka­manda, iacha­nimi nuka kai­manda llug­sin­ga­pa kagta. ²⁰ Suma alli iuiai­wa­mi suia­kuni, nukata Cristo­manda tapu­chi­wa­na­ku­ura, nuka tukuipi alli­lla ainin­ga­pa. Chi­wanka, sug biaji­kuna­sina, kuna­ura­pas mana man­chas­pa­lla­mi ainisa. Cha­saka, nuka kaug­san­ga­pa u wañun­ga­pa chaia­wag­pi­pas, muna­nimi, Cristota mas suma atun­ia­chiska ka­pua­chu. ²¹ Chasa­waka, nuka kaug­san­kama, Cristo kikin­mi nuka­pa kaug­sai ka­puá. Nukata wañui chaia­mu­wa­uraka, tukui alli sumag­lla­mi sug luarpi tuku­puag­rin­ga­pa ka. ²² Nuka chara kaug­san­ga­pa chaia­wag­pika, Taita Dius­manda­lla­mi ima­pas alli­lla ruraspa kaug­sa­kusa. Chasa iuia­ris­pa­pas, mana iacha­ri­wan­chu, mai­kanta agllanga: kaug­saita u wañuita. ²³ Iskan­di­nig­manda­mi cha­ri­wa­nakú. ¿Wañun­ga­pa­chu munan­trani; cha­saka, Cristo­wa sug­lla­pi kag­rin­ga­pa? Chasa­waka, mas alli­lla­char kan­trani. ²⁴ Ikuti nuka kam­kuna­wa mas unai kaug­sa­kug­pika, kam­kuna­manda­mi mas alli­lla kan­tra. ²⁵ Chasa iuia­ris­paka, iacha­nimi, nuka mas unai kam­kuna­wa kan­ga­pa kagta; cha­saka kam­kuna, Cristo­wa mas suma iuia­rispa, alli iuia­chii­wa kan­ga­pa­kuna. ²⁶ Chasa nuka ikuti kam­kuna­wa ka­uraka, kam­kuna Jesu­cristo­manda mas suma alli iuia­chii­wa­mi tukun­kan­gi­chi.

²⁷ Kasa­lla­mi mañai­ki­chita: Cris­to­manda Alli Willai­ta mana kun­ga­ris­pa­lla, alli­lla ruraspa kaug­sa­puan­gi­chi. Chasaka, nuka kam­kunata kawan­ga­pa rigpi u mana rig­pi­pas, kam­kuna­manda iacha­sami, sug­lla iuiai­wa chi Alli Willai­ta mana sakis­pa­lla kaug­sa­na­kugta. Chasa­lla­ta tukui kam­kuna, sug­lla­sina tukuspa, Alli Willai­ta suma iuiaspa charin­gi­chi. ²⁸ Kam­kunata piñag­pi­kunaka, mana ima­pi­pas pai­kunata mancha­rin­gi­chi. Chasa mana manchagpi­kunaka, pai­kuna­manda ni­raian­mi puchuka­rin­ga­pa ri­na­kugta. Ikuti kam­kuna­mandaka ni­raian­mi kispi­rin­ga­pa kagta­kuna. Tukui, Taita Diusmi chasa rurá. ²⁹ Taita Diusmi Cristo­manda kam­kunata kararka, pai­wa suma iuia­rin­ga­pag­lla, mana. Pai­manda llakii pasan­ga­pa­pas­mi nirka. ³⁰ Kam­kuna i nuka, sug­lla­pi­sina­mi binsin­ga­pa iuiai­wa llakii iukan­chi. Nuka lla­kiita binsi­kugta kawa­war­kan­gi­chimi. Nuka kuna­ura llakiita binsi­kug­ta­pas ñami iachan­gi­chi.

Cristo­sina mana atun tukuspa iuiai­wa ka­sun­chi

¹ ¿Mana­chu Cristo, kam­kunata suma kuiaspa iuiachí? Santu Ispí­ritu, ¿mana­chu kam­kuna­wa sug­lla­pi ka? ¿Mana­chu kam kikin­pura kuia­na­kuspa, llakii­wa kas­ka­kuna­ta sumag­lla iuia­chi­na­kuspa ka­puan­gi­chi? ² Chasa kag­pika, nukata iapa suma­mi kun­tin­ta­chi­wan­kan­gi­chi, sug­lla­sina tukuspa, sug­lla­sina kuia­na­kuspa i sug­lla­sina iuia­ris­pa­lla kaug­sa­pua­na­kug­manda.

³ Mana ima­pas ruran­gi­chi, “Nukan­chi, sug­kuna­manda mas­mi kan­chi” iuia­rispa ñi kam kikin­kuna atun tukug­sina iuia­rispa kan­ga­pa. Chasa­paka, mana atun­ia­chi­ris­pa­lla, sug­kuna­manda iuia­rispa kan­gi­chi: “Nukan­chi­manda mas alli­mi kan­kuna”. ⁴ Mana ima­pas mas­kan­gi­chi kam kikin­kuna­man­da­lla. Sug­kuna­man­da­pas­mi iukan­gi­chi, chasa alli­lla ruran­ga­pa iuia­rispa kan­ga­kuna.

⁵ Iukan­gi­chimi, Jesu­cristo imasa iuia­ris­kata iuia­rispa kan­ga­kuna. ⁶ Paika, Taita Dius imasa kas­ka­sina­lla­tata kas­pa­pas, mana nirka: “Atun­ia­chi­ri­sami, Taita Dius­wa iwal­lla kan­ga­pa”. ⁷ Chasa­paka, pai kikin, tukuipi suma atun Taita Dius­sina kas­pa­pas, sakispa, nukan­chi­sina aicha­iug tukurka, sug­kuna­manda lutrin­sina kan­ga­pa. Nukan­chi runa­sina ña kaspa, ⁸ mana atun tukuspa, Taita Dius ima munas­kata rurarka, kruspi wañu­chii tukugta.

⁹ Chi­manda­mi Taita Dius, paita tukui­kuna­manda mas atun­ia­chirka. Paipa suti kaska­ta­pas nirka, tukui suti­kuna­manda­pas mas atun kan­ga­pa. ¹⁰ Chi­manda, Jesuspa sutita uiaspa, tukui­kunami kungu­rin­ga­pa kan­kuna: sug luarpi, kai alpa luarpi i alpa ukuma kag­kuna­pas. ¹¹ Tukui­kunami nin­ga­pa kan­kuna: “Kam Jesu­cristo, tukui­kuna­manda Iaia­mi kangi”. Chasa nis­paka, Taita Dius­ta­mi suma atun­ia­chin­ga­pa kan­kuna.

Tuta alpapi kaug­sa­na­kus­kata punchaia­chig­sina ka­sun­chi

¹² Chi­manda­mi nii­ki­chita, nuka­pa kuias­ka­kuna, imasa­mi, nuka kam­kuna­wa ka­ura, ima­ura­pas nuka nis­kata rurar­kan­gi­chi: chasa­lla­ta, nuka mana kam­kuna­wa kag­pi­pas, nuka imasa ni­kus­kata ruraspa kaug­sa­na­kun­gi­chi. Kam­kuna dil­tudupa kispi­rin­ga­pa iuia­rispa, manchai­wa chugchu­rig­sina kaspa, tukui alli­lla ruraspa kan­gi­chi. ¹³ Taita Dius­mi kam­kunata iuia­chi­ku, pai imasa munas­ka­sina alli­lla iuiaipi ruraspa kaug­sa­na­kun­ga­pa.

¹⁴ Ima rurai­pi­pas, sug­kuna­manda mana wasa rimas­pa­lla, mana piña­chi­ri­na­kus­pa­lla kaug­san­gi­chi. ¹⁵ Chasaka, ñi pipas mana pudin­ga­kuna­chu, kam­kuna­manda ima­pas ninga. Taita Dius­pa ñawipi, ñi ima­pi­pas mana mapa­sina tukuipi alli wam­bra­kuna kan­gi­chi, kai alpapi jiru mana alli­lla rura­dur­kunapa chaugpipi kaug­san­ga­pa chaiag­pi­pas. Chasa kas­paka, pai­kuna tuta alpapi kaug­sa­na­kus­kata puncha­ia­chig­sina­mi kan­kan­gi­chi. ¹⁶ Kam­kunapa suma kaug­sai­wa­mi kawa­chin­kan­gi­chi, Taita Dius­pa Rimai iapa suma alli­lla kagta. Kam­kuna chasa kaug­sagpi­kunaka, Cristo samu­ura, nuka mana ianga kaug­sas­kata i willas­kata iachaspa, iapa alli iuia­chii­wa­mi kan­ga­pa kani. ¹⁷ Kam­kuna, Cristo­wa suma iuia­rispa, Taita Dius­manda wagra ufrinda rupa­chispa miski asna­chis­ka­sina­mi alli­lla rura­na­kun­gi­chi. Kam­kunapa ufrin­dapi churag­sina, nuka­pa kaug­saita puchu­kan­ga­pa chaia­wag­pi­pas, nuka iapa alli iuia­chii­wa­mi kan­ga­pa kani. Ari, tukui kam­kuna­wa­mi iapa alli iuia­chii­wa kan­ga­pa kani. ¹⁸ Kam­kuna­pas, chasa­lla­ta alli iuia­chii­wa kun­tin­tu­lla kan­gi­chi. Ari, tukui­kuna nuka­wa alli iuia­chii­wa kun­tin­tu­lla ka­sun­chi.

Waugki Timoteo­manda

¹⁹ Iaia Jesús munag­pika, iuia­ku­nimi, waugki Timoteota mana unai­lla kam­kuna­pagma kachan­ga­pa; chasaka, pai kuti­muspa, kam­kuna imasa kas­kata willa­wa­ura, sumag­lla kun­tin­tu­lla iuia­chi­wan­ga­pa. ²⁰ Timo­teo­mi nuka­sina kam­kuna­manda tukui alli­lla iuia­rispa ka. Sug pai­sinaka mana iuka­ni­chu. ²¹ Ikuti sug­kunaka, pai kikin­kuna­manda­lla­mi iuia­rin­kuna. Jesu­cristo­man­daka mana iuia­rin­kuna­chu. ²² Chasa kag­pi­pas, Timoteo imasa alli kagta ñami iachan­gi­chi. Paika, nuka­pa wam­bra kag­sina­mi ka; tukui pariju Alli Willai­ta willas­pa­mi puri­ku. ²³ Chi­manda­mi iuia­kuni, paita kam­kuna­pagma kachan­ga­pa, nuka­manda iacha­rig­lla­pi ima nukata justi­sia­kuna rura­wan­ga­pa kagta­kuna. ²⁴ Chasa kachas­pa­pas, Iaia Jesus­ta­mi maña­kuni, nuka­pas rispa, utkalla kam­kuna­pagma chaiag­rin­ga­pa.

Waugki Epafrodito­manda

²⁵ Allimi rigcha­wa­ku, waugki Epa­frodito­ta­pas kam­kuna­pagma ikuti kachan­ga­pa. Paimi nuka­wa sug­lla­pi ima­pi­pas alli ruraspa purirka. Chasa­lla­ta pari­juma ani­mu­chig­mi ka­puá. Kam kikin­kuna­mi paita kacha­mur­kan­gi­chi, nuka ima minis­tis­kata kawa­puan­ga­pa. ²⁶ Paika, ajaimi muna­ku, ikuti kam­kunata kawag­rin­ga­pa. Pai­manda ungui­wa kagta kam­kuna iachagta uias­paka, iapa­mi lla­ki­rirka. ²⁷ Chika, sutipa­mi pai iapa ungug karka, ña wañun­ga­sina. Chasa kag­manda, Taita Dius pai­manda lla­ki­rir­kami. Pai­manda­lla mana; nuka­manda­pas­mi lla­ki­rirka; chasaka, nuka mana mas lla­kii­kuna iukan­ga­pa. ²⁸ Chi­manda­mi muna­kuni, mas utka­lla kam­kuna­pag­ma paita kachan­ga­pa; paita ikuti kawas­paka, kam­kuna alli iuia­chii­wa kan­ga­pa­kuna. Chasaka, nuka­pa lla­kii­kunata kun­ga­rig­sina­mi iuia­chi­wanga. ²⁹ Paita alli iuia­chii­wa chas­ki­puan­gi­chi, Iaia Jesusta: “Pai Siñur” nispa. Pai­sina kaug­sa­na­kus­kata muna­puan­gi­chi. ³⁰ Cristo imasa munas­ka­sina pai rura­kus­pa­mi ña­lla wañun­ga­pa karka. Paipa kaug­saita nuka­manda lla­kispa, wañui kis­pigta chu­rarka, kam­kuna iapa karupi kaspa, nuka­manda mana ima­pas ruran­ga­pa pudi­rig­manda.

Jesu­cristo, tukui­kuna­manda mas bali kaska­manda

¹ Kuna­ura, taita­kuna i mama­kuna, Iaia Jesus­wa alli iuia­chii­lla­wa ka­puai­chi. Mana saiku­wan­chu, kam­kunata chasa­lla­ta ikuti ikuti rima­kun­ga­pa; chasaka, kam­kuna alli­lla kan­ga­pa­kuna.

² ¡Ujala­lla­pas alku­sina rabia­wa kaug­saspa jiru rurag­kuna­wa sug­lla­pi kan­gi­chi! Pai­kunaka, judiu­kunapa markata kuir­pupi chu­ra­chig­kuna­mi kan­kuna. ³ Ikuti nukan­chi­mi sutipa mar­kata chu­raska ni­raian­chi. Santu Ispi­ri­tu­wa Taita Diusta kun­gu­rispa, Jesu­cris­to­wa alli iuia­chi­ris­pa­mi kan­chi. Nukan­chi imasa kas­ka­sina­lla­wa mana iuia­rin­chi­chu kis­pi­rin­ga­pa. ⁴ Chasa kag­pi­pas, nukaka pudin­tra­nimi, nuka imasa kas­ka­sina­lla­wa kis­pi­rin­ga­pa.

Mai­kan­pas imasa kas­ka­sina­lla­wa kispi­rin­ga­pa iuia­rig­pika, mas­pas­mi nuka pudin­trani iuia­rin­ga­pa. ⁵ Pusag puncha tiag­samuska ka­uraka, judiu­kunapa marka kuir­pupi churas­ka­mi kani. Ñugpa­manda achala taita Israelpa iawar­mi kani. Nuka­pa ñugpa­manda achala tai­taka, Benjamin­mi suti karka. Nuka­pa taita i mama, hebreo­mi kar­ka­kuna. Chi­manda­mi nuka­pas hebreo­lla­tata kani. Moi­sés ima ruran­ga­pa nis­kata iachai­kuspa, fari­seomi nuka kar­kani. ⁶ “Moi­sés nis­kata tukui alli­lla­mi rura­kuni” iuiaspa, Cristo­wa tukus­ka­kunata puchukan­ga­pa kalpa­chi­dur­mi kar­kani. Moi­sés tukui ima nis­kata alli­lla­mi rurar­kani. Chasaka, ñi pipas mana pudir­ka­kuna­chu, nuka­manda ima­pas ni­wan­ga­kuna.

⁷ Nuka chasa kag­pi­pas, tukui ima ñugpata nuka­manda balig­sina ni­raias­kaka kuna­uraka ñi ima mana balin­chu, nuka Cristo­wa kag­manda. ⁸ Iaia Jesu­cristota nuka rig­sig­manda, paimi nuka­manda tukui tuku­puarka. Chi­manda­mi nini: tukui ima mana pai­wa kas­kaka, ñi ima­pas mana balin­chu. Cristo­wa nuka tukus­ka­manda­mi tukui ima iukaska, kichui tukug­sina kani. Chi tukui ima mana pai­wa kas­kaka, ismus­ka­sina­mi ni­raiá. Chi­manda, tukui sakispa, ⁹ Cris­to­pag­ma chaiag­rispa, pai­wa kag­rin­ga­pa: chasaka, tukui­manda mas alli­mi ka.

Nuka mana muna­ni­chu, Moi­sés niska­lla­ta uiaspa ruras­ka­wa mana panda­rig­sina kan­ga­pa. Cristo­wa suma iuia­ris­ka­wa­mi mana panda­rig ni­raian­ga­pa munani. Ari, muna­nimi, pai­wa suma iuia­rispa, Taita Dius­pa ñawipi mana panda­rig ni­raian­ga­pa.

¹⁰ Kasa­pas­mi munani: Cristota mas alli­lla rigsin­ga­pa i pai iapa iachai­wa imasa kaugsa­riska kagta iachan­ga­pa. Pai imasa llakii iukas­kata, nuka­pas pai­wa llakii iukan­ga­pa­mi munani. Imasa­mi pai wañurka: nuka­pas chasa­lla­ta­mi munani. ¹¹ Chasa wañus­paka, nuka­pas ikuti kaugsa­rin­ga­pa­mi iuiani.

Muna­sun­chi, tukuipi Jesu­cristo imasa munaska­sina kaug­san­ga­pa

¹² Nuka mana ni­ku­ni­chu, ña tukui chi munas­ka­kuna­lla­waka tukuipi alli­lla tukuska kagta. Ima­sa­mi Jesu­cristo, nukata aglla­warka: chasa­manda­mi nuka muna­kuni, pai imasa muna­was­ka­sina kaug­san­ga­pa. ¹³ Taita­kuna i mama­kuna, mana nii­ki­chitachu, tukuipi pai imasa muna­was­ka­sina ña kaug­sa­kugta. Nuka ñugpata imasa kaug­sa­kus­kata sakispa, kuna­ura muna­nimi, kati kati sin­chi paita kati­chis­pa­lla kan­ga­pa; ¹⁴ chasaka, maipi chaiag­ri­diruma chaiag­rin­ga­pa. Chi­wa, imasa­mi Taita Dius, Jesu­cristo­wa nukata kaiawá: chasa­manda­mi suma luarpi ima kara­wan­ga­pa kas­kata chaskig­rin­ga­pa suia­kuni.

¹⁵ Imasa­mi Jesu­cristo­wa alli­lla iuia­rispa kan­chi: chasa­lla­ta­mi iukan­chi, iuia­ris­pa­lla kan­ga­kuna, pai­pagma chaiag­rin­kama. Kam­kuna ima­pi­pas sug rigcha iuia­na­kug­pika, chi­ta­pas­mi Taita Dius alli­lla iuia­chinga. ¹⁶ Chasa kag­pi­pas, nukan­chi ña iachas­ka­ta­mi iukan­chi alli iuia­rispa kan­ga­kuna.

¹⁷ Taita­kuna i mama­kuna, kawa­wai­chi imasa nuka kaug­sa­kugta. Chasa­lla­ta­mi kam­kuna iukan­gi­chi kaug­san­ga­kuna. Mai­kan imasa nukan­chi iacha­chis­ka­sina kaug­sa­na­kuska­ta­pas kawaspa, chasa­lla­ta kaug­san­gi­chi. ¹⁸ Ña achka biaji­mi kasa willarkai­ki­chita. Ikutimi kuna­ura­pas wakaspa nii­ki­chita: Cristo kruspi wañug­pi­pas, achka­kuna­mi paita mana munaspa kaug­sa­nakú. ¹⁹ Chasa kaug­sa­na­kug­ka, kai alpa tuku­rii pun­cha, dil­tu­du­pa chin­gan­ga­pa luarma sitai tukun­ga­pa kan­kuna. Kuna­ura pai­kunapa wig­sa­lla­mi dius ni­raia­pun­kunata. Pai­kunapa jiru rurai­kuna­wa pinga­ia­chi­rig­sina tukun­ga­taka, chi­kuna­wa atun­ia­chi­rig­sina­mi iuia­rin­kuna. Kai alpapi ima tias­ka­kuna­lla­wa­mi iuia­rispa kaug­san­kuna.

²⁰ Ikuti nukan­chika, suma luarpi kaug­sag­rin­ga­pa­mi ni­raian­chi. Chi­manda­mi Iaia Jesu­cristo kispi­chig ikuti samun­kama suia­na­kun­chi. ²¹ Pai Jesu­cristomi nukan­chipa ismun­ga­pa kuir­puta sug rigcha rurag­samun­ga­pa ka, pai kikinpa suma kuir­pu­sina­lla­tata kawa­ri. Paipa iapa iachai­wa­mi chasa rurag­samun­ga­pa ka. Paipa iapa iachai­lla­wa­mi tukuipi pai ima nis­kata tukug­samun­ga­pa ka.

Iaia Jesus­wa ima­ura­pas alli iuia­chii­lla­wa ka­sun­chi

¹ Chasa­manda, nuka­pa ku­ias­ka taita­kuna i mama­kuna, Iaia Jesus­lla­wa iuia­rispa kan­gi­chi, mana samba­ias­pa­lla. Nuka, ajai­mi muna­kuni kam­kunata kawag­rin­ga­pa. Kam­kuna­wa­mi alli iuia­chii­wa kani. Kam­kuna­mi nuka­pa llaug­tu­sina kan­gi­chi.

² Pani Evodiata i pani Sin­ti­ke­taka kasa­mi mañai­ki­chita:

Iaia Jesuswa suma iuia­rispa ñañan­di­sina, sug­lla kag­sina tukug­samui­chi. ³ Chasa­lla­ta, kam waugki nuka­wa Taita Dius­manda alli­lla rurag­ta­pas­mi kasa mañaiki: chi pani­kunata iuia­chispa aida­puai, sug­lla­sina kaug­sa­na­kun­ga­pa. Pai­kunaka, waugki Klementewa i sug nuka­wa waugki­kuna­wan­ta, Alli Willai­ta mana muna­na­kuska­ta­pas­mi willai apar­ka­kuna. Pai­kunapa suti­kuna, dil­tudupa kaug­san­ga­pa willa­raiaska libru­pi­mi willa­raiá.

⁴ Iaia Jesus­wa ima­ura­pas alli iuia­chii­lla­wa ka­puan­gi­chi. Ikutimi nii­ki­chita: pai­wa alli iuia­chii­lla­wa kan­gi­chi. ⁵ Tukui­kuna kam­kuna­manda iacha­chu­kuna, tukuipi sumag­lla ruraspa kaug­sa­na­kugta. Iaia Jesús samun­ga­pa puncha, ñami chaia­ku.

⁶ Ñi ima­manda­pas mana lla­kispa kan­gi­chi. Chasa­paka, tukui ima­manda­pas Taita Diusta willa­na­kun­gi­chi. Paita tukui mañaspa, “Pai Siñur” nin­gi­chi. ⁷ Chasa kaug­sa­na­kus­ka­taka, Taita Diuska paipa sumag­lla kaug­sai­ta­mi kara­munga. Chi sumag­lla kaug­saika, tukui iuiaita ialig­ta­mi ka. Chi sumag­lla kaug­saita kara­mus­ka­waka, kam­kunapa uma i suma iuiai, Jesu­cristopa waka­chiska kag­sina­mi kan­kan­gi­chi.

Alli kaska­kuna­lla­ta iuia­rispa ka­sun­chi

⁸ Taita­kuna i mama­kuna, kasa­pas­mi nii­ki­chita: tukui sutipa kas­kata iuia­rispa kan­gi­chi. Chasa­lla­ta iuia­rin­gi­chi, tukui alli­lla uian­ga­pa chaia­kus­kata, tukui suma alli chaia kas­kata, tukuipi alli kagta ni­raias­kata i ima suma alli kas­ka­manda suma riman­ga­pa cha­ia­kus­kata. Chi­kuna­manda­mi iukan­gi­chi iuia­rispa kan­ga­kuna.

⁹ Imasa­mi nuka iacha­chispa rimas­kata uia­war­kan­gi­chi i ima­sa­mi nuka ruras­kata kawa­war­kan­gi­chi: chasa­lla­ta ruraspa kaug­sa­puan­gi­chi. Kam­kuna chasa kaug­sa­na­kug­pika, Taita Dius suma iuiai­lla­pi cha­rig­mi kam­kuna­wa sug­lla­pi kan­ga­pa ka.

Filipos­manda­kuna, San Pablota kulki karaska­manda

¹⁰ Kam­kuna ikuti nukata iuia­ri­wag­manda, Iaia Jesus­wa iapa­mi alli iuia­chi­warka. Nuka chasa nig­pi­pas, mana ni­raian­chu, kam­kuna nukata kunga­ri­waska kagta. Nukata mai­tuku iuia­ri­wa­na­kug­pi­pas, mana pudir­kan­gi­chi­chu aida­wan­ga­pa. ¹¹ Nukata ima pisi­wag­mandaka mana rimai­ki­chita­chu. Iachai­kur­ka­nimi, nuka ima iukas­ka­lla­wa alli­lla iuia­rispa kaug­san­ga­pa. ¹² Iacha­nimi ima minis­tiska kaug­saita. Achka iukaspa kaug­sai­ta­pas­mi iachani. Iacha­ri­du­mi kani, imasa kaug­sag­pi­pas, alli­lla iuia­rispa kaug­san­ga­pa: sag­sagta mikuspa u iar­kai­wa­pas, puchugta iukaspa u ñi ima mana iukas­pa­pas. ¹³ Cris­to­mi kua­wá, nuka chasa suma kaug­san­ga­pa. Tukui, pai­wa­mi pudini. ¹⁴ Chasa pudig­pi­pas, nuka lla­kii­wa ka­ura, kam­kuna suma alli­lla kara­was­ka­wa­mi aida­war­kan­gi­chi.

¹⁵ Kam Filipos­manda runa­kuna iachan­gi­chimi, nukaka Alli Willai­ta willag­rin­ga­pa kam­kunapa Mase­donia alpa­manda manara llug­sigpi, Cristo­wa iuiag­kuna sug­nigta kas­ka­kuna, ñi mai­kan­pas mana aida­wag­ta­kuna. Kam­kuna­lla­mi, nuka ima willas­kata uiaspa, Taita Diusta karag­sina kulkita kara­war­kan­gi­chi. ¹⁶ Nuka Tesa­ló­nika pui­blupi ka­ura­pas, nuka ima minis­tis­ka­kuna­manda ikuti ikuti­mi kara­wan­ga­pa kacha­puar­kan­gi­chi. ¹⁷ Nuka chas­ki­kun­ga­pag­lla mana muna­ni­chu. Kam­kuna­manda muna­nimi, chi kara­was­ka­kuna­waka, Taita Dius­pa ñawipi kam­kuna achka miras­kata chas­kig­rin­ga­pa. ¹⁸ Kam­kuna tukui ima kacha­mu­was­ka­waka puchug­ta­mi iukani. Epa­fro­di­to­wa ima kacha­mu­was­ka­ta­mi chas­kir­kani. Chi­wanka, ñi ima mana pisi­wan­chu; kam­kuna ima kara­was­kaka, Taita Dius­manda insinsu rupa­chi­ura, miski asna­mi ni­raiá: chasa. Chi­ta­mi Taita Dius, suma kawa­muspa, kun­tin­ta­rispa, chas­kig­sina rurá. ¹⁹ Ima­sa­mi nuka­pa Taita Dius, Jesu­cristo­wa iapa achka tukui suma iuká: chasa­lla­ta­mi kam­kuna­ta­pas tukui ima pisi­kuska kara­munga. ²⁰ Nukan­chipa Taita Diusta ni­sun­chi: “Kam, iapa suma atun­mi kangi, mai­tuku waranga waranga wata­kuna ialig­pi­pas”. Chasa kachu.

Kaiakama, niska­manda

²¹ Tukui Jesu­cristo­wa tukus­ka­kunata: “Puangi” ni­puai­chi. Nuka­wa kaipi kag waugki­kuna­mi kam­kunata: “Puangi” nin­kuna. ²² Taita Dius­pa­lla kag­kuna tukui kaipi kag­kuna­pas­mi, “Puangi” nin­kuna. Iaia mandagpa wasipi kag­kuna, mas­mi kam­kunata: “Puangi” nin­kuna.

²³ Iaia Jesu­cristo, tukui kam­kunata sumag­lla kawa­pua­chu. Chasa kachu.